14Ai城ê王看見，城內hiah-ê人趕緊透早起來，照所定tio̍h ê時，出去到A-la̍h-pa ê頭前，beh kap以色列人交戰，王kap眾百姓lóng去；總是in m̄知tī城後有兵埋伏，beh攻擊in。Ai siâⁿ ê ông khòaⁿ-kìⁿ, siâⁿ-lāi hiah ê lâng kóaⁿ-kín thàu-chá khí-lâi, chiàu só͘ tiāⁿ-tio̍h ê sî, chhut-khì kàu A-la̍h-pa ê thâu-chêng, beh kap Í-sek-lia̍t lâng kau-chiàn, ông kap chèng peh-sìⁿ lóng khì; chóng-sī in m̄-chai tī siâⁿ-āu ū peng bâi-ho̍k, beh kong-kek in.