1耶和華對約書亞講：莫得驚，也莫得忍；你起來chhōa lóng總ê戰士上去Ai城，我已經將Ai城ê王，kap伊ê百姓，伊ê城，伊ê地，lóng交tī你ê手。Iâ-hô-hoa tùi Iok-su-a kóng, Bo̍h-tit kiaⁿ, iā bo̍h-tit lún; lí khí-lâi chhōa lóng-chóng ê chiàn-sū chiūⁿ-khì Ai siâⁿ, Góa í-keng chiong Ai siâⁿ ê ông, kap i ê peh-sìⁿ, i ê siâⁿ, i ê tōe, lóng kau tī lí ê chhiú.

2你款待Ai城，kap伊ê王，tio̍h親像前款待耶利哥kap伊ê王一樣；總是所搶伊ê財物，kap cheng-siⁿ，lín thang 取做家己ê；你tio̍h用兵埋伏tī城後。Lí khoán-thāi Ai siâⁿ, kap i ê ông, tio̍h chhin-chhiūⁿ chêng khoán-thāi Iâ-lī-ko kap i ê ông chi̍t-iūⁿ; chóng-sī só͘ chhiúⁿ i ê châi-bu̍t, kap cheng-siⁿ, lín thang chhú chòe ka-kī ê; lí tio̍h ēng peng bâi-ho̍k tī siâⁿ-āu.

3Tùi án-ni，約書亞kap一切ê戰士lóng起來，beh上去Ai城；約書亞揀三萬大力ê勇士，暝時差in去；Tùi án-ni Iok-su-a kap it-chhè ê chiàn-sū lóng khí-lâi, beh chiūⁿ-khì Ai siâⁿ; Iok-su-a kéng saⁿ-bān tōa-la̍t ê ióng-sū, mî-sî chhe in khì;

4吩咐in講：Lín tio̍h埋伏兵攻城，就是tī城後，m̄-thang離開城siuⁿ遠，lóng tio̍h備辦便。hoan-hù in kóng, Lín tio̍h bâi-ho̍k peng kong-siâⁿ, chiū-sī tī siâⁿ-āu, m̄-thang lī-khui siâⁿ siuⁿ hn̄g, lóng tio̍h pī-pān piān.

5我kap我所chhōa ê眾百姓beh近óa城；in親像頭pái出來攻擊阮，hit時阮就beh tī in ê面前逃走。Góa kap góa só͘ chhōa ê chèng peh-sìⁿ beh kūn-óa siâⁿ; in chhin-chhiūⁿ thâu-pái chhut-lâi kong-kek goán, hit-sî goán chiū beh tī in ê bīn-chêng tô-cháu.

6In beh出來追jip阮，到阮引誘in離開城；因為in beh講：chiah-ê人親像頭pái tī阮ê面前逃走；所以阮beh tī in ê面前逃走；In beh chhut-lâi tui-jip goán, kàu goán ín-iú in lī-khui siâⁿ; in-ūi in beh kóng, Chiah ê lâng chhin-chhiūⁿ thâu-pái tī goán ê bīn-chêng tô-cháu; só͘-í goán beh tī in ê bīn-chêng tô-cháu;

7Hit時lín就tio̍h tùi埋伏ê所在起來，取hit-ê城，因為耶和華lín ê上帝beh將伊交tī lín ê手。hit-sî lín chiū tio̍h tùi bâi-ho̍k ê só͘-chāi khí-lâi, chhú hit ê siâⁿ, in-ūi Iâ-hô-hoa lín ê Siōng-tè beh chiong i kau tī lín ê chhiú.

8Lín已經取城，就tio̍h用火燒城，tio̍h照耶和華ê話行；看ah，這是我所命令lín ê。Lín í-keng chhú siâⁿ, chiū tio̍h ēng hé sio siâⁿ, tio̍h chiàu Iâ-hô-hoa ê ōe kiâⁿ; khòaⁿ ah, che sī góa só͘ bēng-lēng lín ê.

9約書亞差in，in就去埋伏ê所在，tiàm tī Pek-te̍k-lī kap Ai城ê中間，就是Ai城ê西勢；hit暝約書亞歇tī百姓ê中間。Iok-su-a chhe in, in chiū khì bâi-ho̍k ê só͘-chāi, tiàm tī Pek-te̍k-lī kap Ai siâⁿ ê tiong-kan, chiū-sī Ai siâⁿ ê sai-sì; hit-mî Iok-su-a hioh tī peh-sìⁿ ê tiong-kan.

10天光約書亞早早起來，點算百姓；伊kap以色列ê長老tī百姓ê頭前上去Ai城。Thiⁿ-kng Iok-su-a chá-chá khí-lâi, tiám-sǹg peh-sìⁿ; i kap Í-sek-lia̍t ê tiúⁿ-ló tī peh-sìⁿ ê thâu-chêng chiūⁿ-khì Ai siâⁿ.

11眾百姓，就是kap伊tī-teh ê戰士，lóng上去近óa城ê頭前，tī Ai ê北pêng紮營；tī伊kap Ai ê中間有一個山谷。Chèng peh-sìⁿ, chiū-sī kap i tī-teh ê chiàn-sū, lóng chiūⁿ-khì kūn-óa siâⁿ ê thâu-chêng, tī Ai ê pak-pêng chat-iâⁿ; tī i kap Ai ê tiong-kan ū chi̍t ê soaⁿ-kok.

12伊約略有揀五千人，hō͘ in埋伏tī Pek-te̍k-lī kap Ai城ê中間，就是tī城ê西勢。I iok-lio̍k ū kéng gō͘-chheng lâng, hō͘ in bâi-ho̍k tī Pek-te̍k-lī kap Ai siâⁿ ê tiong-kan, chiū-sī tī siâⁿ ê sai-sì.

13Tùi án-ni，安置百姓，就是城北勢ê全軍，kap城西勢埋伏ê兵；chit暝約書亞入山谷中。Tùi án-ni an-tì peh-sìⁿ, chiū-sī siâⁿ pak-sì ê choân-kun, kap siâⁿ sai-sì bâi-ho̍k ê peng; chit-mî Iok-su-a ji̍p soaⁿ-kok tiong.

14Ai城ê王看見，城內hiah-ê人趕緊透早起來，照所定tio̍h ê時，出去到A-la̍h-pa ê頭前，beh kap以色列人交戰，王kap眾百姓lóng去；總是in m̄知tī城後有兵埋伏，beh攻擊in。Ai siâⁿ ê ông khòaⁿ-kìⁿ, siâⁿ-lāi hiah ê lâng kóaⁿ-kín thàu-chá khí-lâi, chiàu só͘ tiāⁿ-tio̍h ê sî, chhut-khì kàu A-la̍h-pa ê thâu-chêng, beh kap Í-sek-lia̍t lâng kau-chiàn, ông kap chèng peh-sìⁿ lóng khì; chóng-sī in m̄-chai tī siâⁿ-āu ū peng bâi-ho̍k, beh kong-kek in.

15約書亞kap以色列ê眾人tī in ê頭前假thâi輸，tùi曠野ê路逃走。Iok-su-a kap Í-sek-lia̍t ê chèng-lâng tī in ê thâu-chêng ké thâi-su, tùi khòng-iá ê lō͘ tô-cháu.

16城內ê眾百姓lóng聚集，追jip in；in追jip約書亞，就受引誘離開in ê城。Siâⁿ-lāi ê chèng peh-sìⁿ lóng chū-chi̍p, tui-jip in; in tui-jip Iok-su-a, chiū siū ín-iú lī-khui in ê siâⁿ.

17Ai城，kap Pek-te̍k-lī城，無留一人無出去追jip以色列人；城門放開開，去追jip以色列人。Ai siâⁿ, kap Pek-te̍k-lī siâⁿ, bô lâu chi̍t-lâng bô chhut-khì tui-jip Í-sek-lia̍t lâng; siâⁿ-mn̂g pàng khui-khui, khì tui-jip Í-sek-lia̍t lâng.

18耶和華對約書亞講：你伸出手裡所kia̍h ê鎗來kí Ai城；因為我beh將伊交tī你ê手。約書亞就伸出手裡所kia̍h ê鎗來kí hit-ê城。Iâ-hô-hoa tùi Iok-su-a kóng, Lí chhun-chhut chhiú-ni̍h só͘ kia̍h ê chhiuⁿ lâi kí Ai siâⁿ; in-ūi Góa beh chiong i kau tī lí ê chhiú. Iok-su-a chiū chhun-chhut chhiú-ni̍h só͘ kia̍h ê chhiuⁿ lâi kí hit ê siâⁿ.

19伊一下伸手，埋伏ê兵就對伊ê所在緊緊起來，走去入城取伊，緊緊放火燒城。I chi̍t-ē chhun chhiú, bâi-ho̍k ê peng chiū tùi i ê só͘-chāi kín-kín khí-lâi, cháu-khì ji̍p siâⁿ chhú i, kín-kín pàng hé sio siâⁿ.

20Ai城ê人oa̍t頭一下看；無phah算，城內火煙chhèng上天；in就走chia走hia，lóng無路；hiah-ê走去曠野ê百姓就hoan頭來攻擊追jip in。Ai siâⁿ ê lâng oa̍t-thâu chi̍t-ē khòaⁿ; bô phah-sǹg, siâⁿ-lāi hé-ian chhèng chiūⁿ thiⁿ; in chiū cháu-chia cháu-hia, lóng bô lō͘; hiah ê cháu-khì khòng-iá ê peh-sìⁿ chiū hoan-thâu lâi kong-kek tui-jip in.

21約書亞kap以色列ê眾人看見埋伏ê兵已經取城，城內火煙chhèng上高，就oa̍t-tńg身thâi死Ai城ê人；Iok-su-a kap Í-sek-lia̍t ê chèng-lâng khòaⁿ-kìⁿ bâi-ho̍k ê peng í-keng chhú siâⁿ, siâⁿ-lāi hé-ian chhèng chiūⁿ-koâiⁿ, chiū oa̍t-tńg-sin thâi-sí Ai siâⁿ ê lâng;

22埋伏ê兵也出來攻擊in；in受圍困tī以色列人ê中間，前後lóng是以色列人；tùi án-ni，thâi死in；無一個留teh，也無一個走去。bâi-ho̍k ê peng iā chhut-lâi kong-kek in; in siū ûi-khùn tī Í-sek-lia̍t lâng ê tiong-kan, chêng-āu lóng sī Í-sek-lia̍t lâng; tùi án-ni thâi-sí in; bô chi̍t-ê lâu-teh, iā bô chi̍t-ê cháu-khì.

23In就活掠Ai城ê王，押伊到約書亞hia。In chiū oa̍h-lia̍h Ai siâⁿ ê ông, ah i kàu Iok-su-a hia.

24以色列人一盡thâi死khiā起tī Ai ê百姓，tī田裡，tī曠野jip-tio̍h ê所在，in lóng倒tī刀下，到滅無。以色列眾人就倒tńg來Ai城，用刀thâi城中ê人。Í-sek-lia̍t lâng it-chīn thâi-sí khiā-khí tī Ai ê peh-sìⁿ, tī chhân-ni̍h, tī khòng-iá jip-tio̍h ê só͘-chāi, in lóng tó tī to-ē, kàu bia̍t-bô. Í-sek-lia̍t chèng-lâng chiū tò-tńg lâi Ai siâⁿ, ēng to thâi siâⁿ-tiong ê lâng.

25當hit日thâi死ê男女，共一萬兩千，就是Ai城ê百姓。Tng hit-ji̍t thâi-sí ê lâm-lú, kiōng chi̍t-bān nn̄g-chheng, chiū-sī Ai siâⁿ ê peh-sìⁿ.

26約書亞無kiu伊伸出鎗ê手，直到一盡滅Ai城ê百姓。Iok-su-a bô kiu i chhun-chhut chhiuⁿ ê chhiú, ti̍t-kàu it-chīn bia̍t Ai siâⁿ ê peh-sìⁿ.

27獨獨cheng-siⁿ，kap所搶城內ê財物，以色列人lóng 取做家己ê，照耶和華所命令約書亞ê話。To̍k-to̍k cheng-siⁿ, kap só͘ chhiúⁿ siâⁿ-lāi ê châi-bu̍t, Í-sek-lia̍t lâng lóng chhú chòe ka-kī-ê, chiàu Iâ-hô-hoa só͘ bēng-lēng Iok-su-a ê ōe.

28約書亞燒Ai城，hō͘伊永永做土堆，荒廢到今á日；Iok-su-a sio Ai siâⁿ, hō͘ i éng-éng chòe thô͘-tui, hong-hòe kàu kin-á-ji̍t;

29koh召Ai城ê王tī樹裡；到黃昏日落ê時，約書亞出命令，人就tùi樹裡收身屍落來，hiat tī城門口；tī hit頂面疊一大堆ê石頭，到今á日iáu tī-teh。koh tiàu Ai siâⁿ ê ông tī chhiū-ni̍h; kàu hông-hun ji̍t-lo̍h ê sî, Iok-su-a chhut bēng-lēng, lâng chiū tùi chhiū-ni̍h siu sin-si lo̍h-lâi, hiat tī siâⁿ-mn̂g-kháu; tī hit téng-bīn thia̍p chi̍t tōa-tui ê chio̍h-thâu, kàu kin-á-ji̍t iáu tī-teh.

30Hit時約書亞tī Í-pa-lō͘山，為耶和華以色列ê上帝，起一座壇；Hit-sî Iok-su-a tī Í-pa-lō͘ soaⁿ, ūi Iâ-hô-hoa Í-sek-lia̍t ê Siōng-tè, khí chi̍t chō tôaⁿ;

31是用自然ê石，hit頂面無動tio̍h鐵器ê，來起伊，照耶和華ê奴僕摩西所命令以色列人ê話，照摩西律法冊內所記ê；in tī chit-ê壇頂獻燒祭hō͘耶和華，也奉謝恩ê祭。sī ēng chū-jiân ê chio̍h, hí téng-bīn bô tāng-tio̍h thih-khì-ê, lâi khí i, chiàu Iâ-hô-hoa ê lô͘-po̍k Mô͘-se só͘ bēng-lēng Í-sek-lia̍t lâng ê ōe, chiàu Mô͘-se lu̍t-hoat chheh-lāi só͘ kì ê; in tī chit ê tôaⁿ-téng hiàn sio-chè hō͘ Iâ-hô-hoa, iā hōng siā-un ê chè.

32約書亞tī-hia用摩西ê律法抄寫tī石頂，就是伊tī以色列人ê面前所寫ê。Iok-su-a tī-hia ēng Mô͘-se ê lu̍t-hoat chhau-siá tī chio̍h-téng, chiū-sī i tī Í-sek-lia̍t lâng ê bīn-chêng só͘ siá-ê.

33以色列眾人，kap in ê長老、官長，以及審判官，lóng khiā tī約櫃ê雙pêng，tī 扛耶和華約櫃ê祭司利未人ê面前，無論是本地人，是寄腳-ê；一半tī Ki-lī-sim山ê頭前，一半tī Í-pa-lō͘山ê頭前，kā以色列百姓祝福，照耶和華ê奴僕摩西前所命令ê。Í-sek-lia̍t chèng-lâng, kap in ê tiúⁿ-ló, koaⁿ-tiúⁿ, í-ki̍p sím-phòaⁿ-koaⁿ, lóng khiā tī iok-kūi ê siang-pêng, tī kng Iâ-hô-hoa iok-kūi ê chè-si Lī-bī lâng ê bīn-chêng, bô-lūn sī pún-tōe lâng, sī kià-kha-ê; chi̍t-pòaⁿ tī Ki-lī-sim soaⁿ ê thâu-chêng, chi̍t-pòaⁿ tī Í-pa-lō͘ soaⁿ ê thâu-chêng, kā Í-sek-lia̍t peh-sìⁿ chiok-hok, chiàu Iâ-hô-hoa ê lô͘-po̍k Mô͘-se chêng só͘ bēng-lēng ê.

34然後約書亞讀律法lóng總ê話，祝福ê，咒詛ê，照lóng總記tī律法ê。Jiân-āu Iok-su-a tha̍k lu̍t-hoat lóng-chóng ê ōe, chiok-hok-ê, chiù-chó͘-ê, chiàu lóng-chóng kì tī lu̍t-hoat ê.

35摩西所命令一切ê話，約書亞tī以色列ê全會，kap婦人人、gín-ná，kap in中間往來出外人ê面前，無一句無讀。Mô͘-se só͘ bēng-lēng it-chhè ê ōe, Iok-su-a tī Í-sek-lia̍t ê choân-hōe, kap hū-jîn-lâng, gín-ná, kap in tiong-kan óng-lâi chhut-gōa lâng ê bīn-chêng, bô chi̍t-kù bô tha̍k.

1約旦hit-pêng，或是tī山地，或是tī平洋，或是tī大海Lī-pa-lùn相對ê邊á，Hek人、A-mō͘-lī人、迦南人、Pí-lī-sé人、Hi-bī人、Iâ-pò͘-su人，chiah-ê王一下聽見這，Iok-tàn hit-pêng, he̍k-sī tī soaⁿ-tōe, he̍k-sī tī pîⁿ-iûⁿ, he̍k-sī tī tōa-hái Lī-pa-lùn saⁿ-tùi ê piⁿ-á, Hek-lâng, A-mō͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, chiah ê ông chi̍t-ē thiaⁿ-kìⁿ che,

2就lóng聚集，同心合意，beh kap約書亞kap以色列人交戰。chiū lóng chū-chi̍p, tâng-sim ha̍p-ì, beh kap Iok-su-a kap Í-sek-lia̍t lâng kau-chiàn.

3總是Ki-piàn khiā起ê百姓聽見約書亞對耶利哥kap Ai城所行ê事；Chóng-sī Ki-piàn khiā-khí ê peh-sìⁿ thiaⁿ-kìⁿ Iok-su-a tùi Iâ-lī-ko kap Ai siâⁿ só͘ kiâⁿ ê sū;

4就設詭計，假做使者，用舊ê袋，kap破裂koh補ê舊酒袋，hō͘驢馱(tô)伊；chiū siat khúi-kè, ké-chòe sù-chiá, ēng kū ê tē, kap phòa-li̍h koh pó͘ ê kū chiú-tē, hō͘ lû tô i;

5腳裡穿過補ê舊鞋，身軀穿舊衫，in所備辦ê餅lóng是乾koh臭phú。kha-ni̍h chhēng kè-pó͘ ê kū-ôe, seng-khu chhēng kū-saⁿ, in só͘ pī-pān ê piáⁿ lóng sī ta koh chhàu-phú.

6In到Kiat-kah營中見約書亞，對伊kah以色列人講：阮是tùi真遠ê所在來ê；taⁿ求你kap阮立約。In kàu Kiat-kah iâⁿ-tiong kìⁿ Iok-su-a, tùi i kah Í-sek-lia̍t lâng kóng, Goán sī tùi chin-hn̄g ê só͘-chāi lâi ê; taⁿ kiû lí kap goán li̍p-iok.

7以色列人對chiah-ê Hi-bī人講：Kiám-chhái lín是khiā起tī阮中間ê，beh怎樣kap lín立約ah？Í-sek-lia̍t lâng tùi chiah ê Hi-bī lâng kóng, Kiám-chhái lín sī khiā-khí tī goán tiong-kan ê, beh cháiⁿ-iūⁿ kap lín li̍p-iok ah?

8In對約書亞講：阮是你ê奴僕。約書亞問in講：Lín是甚麼人，是tùi toh落來ê？In tùi Iok-su-a kóng, Goán sī lí ê lô͘-po̍k. Iok-su-a mn̄g in kóng, Lín sī sím-mi̍h lâng, sī tùi toh-lo̍h lâi ê?

9In對伊講，你ê奴僕tùi極遠ê所在來，為tio̍h耶和華你上帝ê名；因為阮已經聽見伊ê名聲，kap伊tī埃及一切所行ê；In tùi i kóng, Lí ê lô͘-po̍k tùi ke̍k-hn̄g ê só͘-chāi lâi, ūi-tio̍h Iâ-hô-hoa lí Siōng-tè ê miâ; in-ūi goán í-keng thiaⁿ-kìⁿ I ê miâ-siaⁿ, kap I tī Ai-ki̍p it-chhè só͘ kiâⁿ ê;

10以及伊tī約旦hit-pêng tùi A-mô͘-lī兩個王，就是Hi-si̍t-pún王Se-hông，kap tī A-su-tha-lio̍k ê Pa-san王Go̍k，一切所行ê事。í-ki̍p I tī Iok-tàn hit-pêng tùi A-mô͘-lī nn̄g ê ông, chiū-sī Hi-si̍t-pún ông Se-hông, kap tī A-su-tha-lio̍k ê Pa-san ông Go̍k, it-chhè só͘ kiâⁿ ê sū.

11阮ê長老kap阮hia khiā起ê百姓就kā阮講：Lín手tio̍h 帶路裡用ê食物，去迎接in，對in講，阮是你ê奴僕，taⁿ求你kap阮立約。Goán ê tióng-ló kap goán hia khiā-khí ê peh-sìⁿ chiū kā goán kóng, Lín chhiú tio̍h tòa lō͘-ni̍h ēng ê chia̍h-mi̍h, khì ngiâ-chih in, tùi in kóng, Goán sī lí ê lô͘-po̍k, taⁿ kiû lí kap goán li̍p-iok.

12阮出來beh來lín chia ê日，tùi厝內帶出chiah-ê餅做路中ê路用，hit時iáu燒燒；看ah，taⁿ已經lóng乾 koh臭phú lah；Goán chhut-lâi beh lâi lín chia ê ji̍t, tùi chhù-lāi tòa-chhut chiah ê piáⁿ chòe lō͘-tiong ê lō͘-ēng, hit-sî iáu sio-sio; khòaⁿ ah, taⁿ í-keng lóng ta koh chhàu-phú lah;

13Chiah-ê酒囊阮貯酒ê時，iáu是新ê，看ah，taⁿ已經破裂；阮chiah-ê衫kap鞋也lóng穿舊，因為路真遠。chiah ê chiú-lông goán tóe-chiú ê sî, iáu sī sin-ê, khòaⁿ ah, taⁿ í-keng phòa-li̍h; goán chiah ê saⁿ kap ôe iā lóng chhēng-kū, in-ūi lō͘ chin-hn̄g.

14以色列人就tùi in ê食物the̍h淡薄，也無請問耶和華。Í-sek-lia̍t lâng chiū tùi in ê chia̍h-mi̍h the̍h tām-po̍h, iā bô chhéng-mn̄g Iâ-hô-hoa.

15約書亞就kap in講和，kap in立約，容允in活；會眾ê首領也對in chiù-chōa。Iok-su-a chiū kap in káng-hô, kap in li̍p-iok, iông-ún in oa̍h; hōe-chiòng ê siú-léng iā tùi in chiù-chōa.

16Kap in立約了後，過三日，chiah聽見in是近近，tiàm tī in中間。Kap in li̍p-iok liáu-āu, kè saⁿ-ji̍t, chiah thiaⁿ-kìⁿ in sī kūn-kūn, tiàm tī in tiong-kan.

17以色列起身，第三日到in ê城；hiah-ê城就是Ki-piàn、Ki-hui-la̍h、Pí-lio̍k、Ki-lia̍t-iâ-lîm。Í-sek-lia̍t khí-sin, tē-saⁿ ji̍t kàu in ê siâⁿ; hiah ê siâⁿ chiū-sī Ki-piàn, Ki-hui-la̍h, Pí-lio̍k, Ki-lia̍t-iâ-lîm.

18因為會眾ê首領已經指耶和華以色列ê上帝對in chiù-chōa，所以以色列人無phah in；全會眾就哀怨hiah-ê首領。In-ūi hōe-chiòng ê siú-léng í-keng chí Iâ-hô-hoa Í-sek-lia̍t ê Siōng-tè tùi in chiù-chōa, só͘-í Í-sek-lia̍t lâng bô phah in; choân hōe-chiòng chiū ai-oàn hiah ê siú-léng.

19眾首領對全會講：阮已經指耶和華以色列ê上帝對in chiù-chōa，taⁿ咱m̄-thang kha̍p-tio̍h in。Chèng siú-léng tùi choân-hōe kóng, Goán í-keng chí Iâ-hô-hoa Í-sek-lia̍t ê Siōng-tè tùi in chiù-chōa, taⁿ lán m̄-thang kha̍p-tio̍h in.

20咱tio̍h án-ni款待in，容允in活teh，驚了咱為tio̍h所對in chiù-chōa-ê，受氣到tī咱。Lán tio̍h án-ni khoán-thāi in, iông-ún in oa̍h-teh, kiaⁿ-liáu lán ūi-tio̍h só͘ tùi in chiù-chōa-ê, siū-khì kàu tī lán.

21首領koh對in講，Tio̍h容允in活；tùi án-ni，in就kā會眾做破柴chhiūⁿ水ê人，照首領所kā in講ê話。Siú-léng koh tùi in kóng, Tio̍h iông-ún in oa̍h; tùi án-ni in chiū kā hōe-chiòng chòe phòa-chhâ chhiūⁿ-chúi ê lâng, chiàu siú-léng só͘ kā in kóng ê ōe.

22約書亞叫in來，kā in講：啥事騙阮講：阮離開lín真遠ah？其實lín是tiàm tī阮中間。Iok-su-a kiò in lâi, kā in kóng, Siáⁿ-sū phiàn goán kóng, Goán lī-khui lín chin-hn̄g ah? Kî-si̍t lín sī tiàm tī goán tiong-kan.

23Taⁿ lín是受咒詛ê，lín中間做奴才ê永無斷，kā我上帝ê殿做破柴chhiūⁿ水ê。Taⁿ lín sī siū chiù-chó͘-ê, lín tiong-kan chòe lô͘-châi-ê éng bô tn̄g, kā góa Siōng-tè ê tiān chòe phòa-chhâ chhiūⁿ-chúi ê.

24In應約書亞講：因為有人確實報你ê奴僕講：耶和華你ê上帝bat命令伊ê奴僕摩西，將chit-ê全地賞賜lín，掖tī lín ê頭前剿滅chit-ê所在一切khiā起ê百姓；所以阮因為lín ê緣故，驚了無命，chiah做chit-ê tāi-chì。In ìn Iok-su-a kóng, In-ūi ū lâng khak-si̍t pò lí ê lô͘-po̍k kóng, Iâ-hô-hoa lí ê Siōng-tè bat bēng-lēng I ê lô͘-po̍k Mô͘-se, chiong chit ê choân-tōe siúⁿ-sù lín, iā tī lín ê thâu-chêng châu-bia̍t chit ê só͘-chāi it-chhè khiā-khí ê peh-sìⁿ; só͘-í goán in-ūi lín ê iân-kò͘, kiaⁿ-liáu bô-miā, chiah chòe chit ê tāi-chì.

25Taⁿ阮tī你ê手頭；你看做好做正直ê，照án-ni行來款待阮。Taⁿ goán tī lí ê chhiú-thâu; lí khòaⁿ-chòe hó chòe chèng-ti̍t ê, chiàu án-ni kiâⁿ lâi khoán-thāi goán.

26約書亞就án-ni款待in，救in脫離以色列人ê手；所以in就無thâi in。Iok-su-a chiū án-ni khoán-thāi in, kiù in thoat-lī Í-sek-lia̍t lâng ê chhiú; só͘-í in chiū bô thâi in.

27當hit日，約書亞hō͘ in kā會眾kap耶和華ê壇，做破柴kap chhiūⁿ水ê人，tī伊所beh揀ê所在，到今á日。Tng hit-ji̍t Iok-su-a hō͘ in kā hōe-chiòng kap Iâ-hô-hoa ê tôaⁿ, chòe phòa-chhâ kap chhiūⁿ-chúi ê lâng, tī I só͘ beh kéng ê só͘-chāi, kàu kin-á-ji̍t.

1耶路撒冷王A-to-nî-sé-tek聽見約書亞取Ai城，一盡滅伊，款待Ai城kap伊ê王，親像前款待耶利哥kap伊ê王一樣；koh聽見Ki-piàn khiā起ê百姓kap以色列人立和約，khiā起tī in中間；Iâ-lō͘-sat-léng ông A-to-nî-sé-tek thiaⁿ-kìⁿ Iok-su-a chhú Ai siâⁿ, it-chīn bia̍t i, khoán-thāi Ai siâⁿ kap i ê ông, chhin-chhiūⁿ chêng khoán-thāi Iâ-lī-ko kap i ê ông chi̍t-iūⁿ; koh thiaⁿ-kìⁿ Ki-piàn khiā-khí ê peh-sìⁿ kap Í-sek-lia̍t lâng li̍p hô-iok, khiā-khí tī in tiong-kan;

2就真驚；因為Ki-piàn是大城，親像一個京城，比Ai城khah大；koh城內ê人lóng是勇士。chiū chin kiaⁿ; in-ūi Ki-piàn sī tōa-siâⁿ, chhin-chhiūⁿ chi̍t ê kiaⁿ-siâⁿ, pí Ai siâⁿ khah-tōa; koh siâⁿ-lāi ê lâng lóng sī ióng-sū.

3Tùi án-ni，耶路撒冷王A-to-nî-sé-tek差人去見Hi-pek-lûn王Hô-hâm，Iâ-boa̍t王Pí-lân，拉結王Ngá-hui-a，kap I-ki-lûn王Tí-phek，講：Tùi án-ni Iâ-lō͘-sat-léng ông A-to-nî-sé-tek chhe lâng khì kìⁿ Hi-pek-lûn ông Hô-hâm, Iâ-boa̍t ông Pí-lân, La̍h-kiat ông Ngá-hui-a, kap I-ki-lûn ông Tí-phek, kóng,

4請lín上來我chia，幫贊我；咱thang來去phah Ki-piàn，因為伊kap約書亞kap以色列立和約。Chhiáⁿ lín chiūⁿ-lâi góa chia, pang-chān góa; lán thang lâi khì phah Ki-piàn, in-ūi i kap Iok-su-a kap Í-sek-lia̍t li̍p hô-iok.

5Tùi án-ni，A-mô͘-lī人五個王，就是耶路撒冷王、Hi-pek-lûn王、Iâ-boa̍t王、拉結王、I-ki-lûn王，大家聚集，kap in ê軍隊上去，紮營tī Ki-piàn ê對面，beh攻擊伊。Tùi án-ni A-mô͘-lī lâng gō͘ ê ông, chiū-sī Iâ-lō͘-sat-léng ông, Hi-pek-lûn ông, Iâ-boa̍t ông, La̍h-kiat ông, I-ki-lûn ông, tāi-ke chū-chi̍p, kap in ê kun-tūi chiūⁿ-khì, chat-iâⁿ tī Ki-piàn ê tùi-bīn, beh kong-kek i.

6Ki-piàn人就差人去Kiat-kah ê營，見約書亞講：你m̄-thang kiu手m̄看你ê奴僕；求你緊緊來chia拯救阮，幫贊阮；因為khiā起山地A-mô͘-lī人hiah-ê王，lóng聚集來攻擊阮。Ki-piàn lâng chiū chhe lâng khì Kiat-kah ê iâⁿ, kìⁿ Iok-su-a kóng, Lí m̄-thang kiu chhiú m̄-khòaⁿ lí ê lô͘-po̍k; kiû lí kín-kín lâi chia chín-kiù goán, pang-chān goán; in-ūi khiā-khí soaⁿ-tōe A-mô͘-lī lâng hiah ê ông, lóng chū-chi̍p lâi kong-kek goán.

7Tùi án-ni，約書亞，kap伊一切ê戰士，以及一切大力ê勇士，lóng tùi Kiat-kah上去。Tùi án-ni Iok-su-a, kap i it-chhè ê chiàn-sū, í-ki̍p it-chhè tōa-la̍t ê ióng-sū, lóng tùi Kiat-kah chiūⁿ-khì.

8耶和華kā約書亞講：莫得驚in，因為我已經將in交tī你ê手；in無一人能khiā-tiâu tī你ê面前。Iâ-hô-hoa kā Iok-su-a kóng, Bo̍h-tit kiaⁿ in, in-ūi Góa í-keng chiong in kau tī lí ê chhiú; in bô chi̍t-lâng ōe khiā-tiâu tī lí ê bīn-chêng.

9約書亞忽然到in hia，因為伊tùi Kiat-kah thong暝上去。Iok-su-a hut-jiân kàu in hia, in-ūi i tùi Kiat-kah thong-mî chiūⁿ-khì.

10耶和華hō͘ in tī以色列人ê面前紛亂；就tī Ki-piàn thâi死in真chōe；追jip in tī上 Pek-hô-lûn ê路，phah in到A-se-ka kap Má-ki-tāi。Iâ-hô-hoa hō͘ in tī Í-sek-lia̍t lâng ê bīn-chêng hun-loān; chiū tī Ki-piàn thâi-sí in chin-chōe; tui-jip in tī chiūⁿ Pek-hô-lûn ê lō͘, phah in kàu A-se-ka kap Má-ki-tāi.

11In tī以色列人ê面前逃走；tī Pek-hô-lûn落去ê時，耶和華tùi天落大雹tī in ê身上，到A-se-ka，hō͘ in死；hiah-ê hō͘雹phah死ê，比以色列人用刀thâi死ê，khah-chōe。In tī Í-sek-lia̍t lâng ê bīn-chêng tô-cháu; tī Pek-hô-lûn lo̍h-khì ê sî, Iâ-hô-hoa tùi thiⁿ lo̍h tōa pha̍uh tī in ê sin-chiūⁿ, kàu A-se-ka, hō͘ in sí; hiah ê hō͘ pha̍uh phah-sí-ê, pí Í-sek-lia̍t lâng ēng to thâi-sí-ê, khah-chōe.

12當耶和華將A-mô͘-lī人交tī以色列人ê日，約書亞就kā耶和華講：也tī以色列人ê面前講： 日頭ah，你tio̍h停tī Ki-piàn ê頂面， 月ah，你tio̍h停tī A-ngá-lûn ê山谷。Tng Iâ-hô-hoa chiong A-mô͘-lī lâng kau tī Í-sek-lia̍t lâng ê ji̍t, Iok-su-a chiū kā Iâ-hô-hoa kóng, iā tī Í-sek-lia̍t lâng ê bīn-chêng kóng, Ji̍t-thâu ah, lí tio̍h thêng tī Ki-piàn ê téng-bīn, Ge̍h ah, lí tio̍h thêng tī A-ngá-lûn ê soaⁿ-kok.

13日頭就停teh，月就歇teh， thèng候百姓報仇tī in ê對敵。Chit-ê事kiám m̄是寫tī Ngá-soah-jíⁿ ê冊mah？日頭停tī天ê中央，無緊緊落去，約略有一日ê久。Ji̍t-thâu chiū thêng-teh, ge̍h chiū hioh-teh, Thèng-hāu peh-sìⁿ pò-siû tī in ê tùi-te̍k.Chit ê sū kiám m̄-sī siá tī Ngá-soah-jíⁿ ê chheh mah? Ji̍t-thâu thêng tī thiⁿ ê tiong-ng, bô kín-kín lo̍h-khì, iok-lio̍k ū chi̍t-ji̍t ê kú.

14以前以後無有親像hit一日，得tio̍h耶和華聽人ê聲；是因為耶和華替以色列人交戰。Í-chêng í-āu bô ū chhin-chhiūⁿ hí chi̍t-ji̍t, tit-tio̍h Iâ-hô-hoa thiaⁿ lâng ê siaⁿ; sī in-ūi Iâ-hô-hoa thòe Í-sek-lia̍t lâng kau-chiàn.

15約書亞kap以色列眾人tò來Kiat-kah ê營內。Iok-su-a kap Í-sek-lia̍t chèng-lâng tò-lâi Kiat-kah ê iâⁿ-lāi.

16Hit五個王逃走，bih tī Má-ki-tāi ê洞內。Hí gō͘ ê ông tô-cháu, bih tī Má-ki-tāi ê tōng-lāi.

17有人去kā約書亞講：Hit五個王已經chhē-tio̍h lah，lóng bih tī Má-ki-tāi ê洞內。Ū lâng khì kā Iok-su-a kóng, Hí gō͘ ê ông í-keng chhē-tio̍h lah, lóng bih tī Má-ki-tāi ê tōng-lāi.

18約書亞講：徙大塊石到洞口，派人tiàm hia顧守in；Iok-su-a kóng, Sóa tōa tè chio̍h kàu tōng-kháu, phài lâng tiàm hia kò͘-siú in;

19總是lín m̄-thang停腳，tio̍h追jip lín ê對敵，phah in ê後隊，m̄-thang容允in入in ê城；因為耶和華lín ê上帝已經將in交tī lín ê手。chóng-sī lín m̄-thang thêng-kha, tio̍h tui-jip lín ê tùi-te̍k, phah in ê āu-tūi, m̄-thang iông-ún in ji̍p in ê siâⁿ; in-ūi Iâ-hô-hoa lín ê Siōng-tè í-keng chiong in kau tī lín ê chhiú.

20約書亞kap以色列大大thâi死in，到一盡剿滅chiah soah；其中chhun ê人lóng入堅固ê城；Iok-su-a kap Í-sek-lia̍t tōa-tōa thâi-sí in, kàu it-chīn châu-bia̍t chiah soah; kî-tiong chhun ê lâng lóng ji̍p kian-kò͘ ê siâⁿ;

21眾百姓就安然tò來Má-ki-tāi ê營，到約書亞hia；無一人敢出聲攻擊以色列人。chèng peh-sìⁿ chiū an-jiân tò-lâi Má-ki-tāi ê iâⁿ, kàu Iok-su-a hia; bô chi̍t-lâng káⁿ chhut-siaⁿ kong-kek Í-sek-lia̍t lâng.

22約書亞講：開洞口，掠hit五個王出洞，來我chia。Iok-su-a kóng, Khui tōng-kháu, lia̍h hí gō͘ ê ông chhut-tōng, lâi góa chia.

23In就án-ni行，掠hit五個王，就是耶路撒冷王、Hi-pek-lûn王、Iâ-boa̍t王、拉結王、I-ki-lûn王，tùi洞內出來，帶到伊hia。In chiū án-ni kiâⁿ, lia̍h hí gō͘ ê ông, chiū-sī Iâ-lō͘-sat-léng ông, Hi-pek-lûn ông, Iâ-boa̍t ông, La̍h-kiat ông, I-ki-lûn ông, tùi tōng-lāi chhut-lâi, tòa kàu i hia.

24掠hiah-ê王出來到約書亞hia ê時，約書亞就叫以色列眾人來，對hiah-ê kap伊相kap去ê軍長講：Lín近前來，將腳踏tī chiah-ê王ê頷頸；in就近前來，用腳踏tī in ê頷頸。Lia̍h hiah ê ông chhut-lâi kàu Iok-su-a hia ê sî, Iok-su-a chiū kiò Í-sek-lia̍t chèng-lâng lâi, tùi hiah ê kap i saⁿ-kap khì ê kun-tiúⁿ kóng, Lín kūn-chêng lâi, chiong kha ta̍h tī chiah ê ông ê ām-kún; in chiū kūn-chêng lâi, ēng kha ta̍h tī in ê ām-kún.

25約書亞對in講，Lín莫得驚，也莫得忍，tio̍h勇敢壯膽；因為lín所beh攻擊一切ê對敵，耶和華beh án-ni款待in。Iok-su-a tùi in kóng, Lín bo̍h-tit kiaⁿ, iā bo̍h-tit lún, tio̍h ióng-kám chòng-táⁿ; in-ūi lín só͘ beh kong-kek it-chhè ê tùi-te̍k, Iâ-hô-hoa beh án-ni khoán-thāi in.

26後來約書亞phah死in，召in tī五叢樹；in召tī樹裡到ê-hng。Āu-lâi Iok-su-a phah-sí in, tiàu in tī gō͘ châng chhiū; in tiàu tī chhiū-ni̍h kàu ê-hng.

27日落ê時，約書亞出令，就tùi樹裡收身屍落來，hiat tī in所bih ê洞，將kúi-nā塊大石hē tī 洞口，到taⁿ iáu tī-teh。Ji̍t-lo̍h ê sî, Iok-su-a chhut-lēng, chiū tùi chhiū-ni̍h siu sin-si lo̍h-lâi, hiat tī in só͘ bih ê tōng, chiong kúi-nā tè tōa-chio̍h hē tī tōng-kháu, kàu-taⁿ iáu tī-teh.

28Hit日約書亞取Má-ki-tāi，用刀thâi死in kap in ê王；hit內面ê人一盡剿滅，無留一個；伊款待Má-ki-tāi ê王，親像前款待耶利哥王一樣。Hit-ji̍t Iok-su-a chhú Má-ki-tāi, ēng to thâi-sí in kap in ê ông; hí lāi-bīn ê lâng it-chīn châu-bia̍t, bô lâu chi̍t-ê; i khoán-thāi Má-ki-tāi ê ông, chhin-chhiūⁿ chêng khoán-thāi Iâ-lī-ko ông chi̍t-iūⁿ.

29約書亞kap以色列眾人tùi Má-ki-tāi hia去到Li̍p-ná，攻擊Li̍p-ná。Iok-su-a kap Í-sek-lia̍t chèng-lâng tùi Má-ki-tāi hia khì kàu Li̍p-ná, kong-kek Li̍p-ná.

30耶和華將伊kap伊ê王交tī以色列人ê手；伊用刀thâi死伊，kap hit內面ê眾人，無留一個；伊款待伊ê王，親像前款待耶利哥王一樣。Iâ-hô-hoa chiong i kap i ê ông kau tī Í-sek-lia̍t lâng ê chhiú; i ēng to thâi-sí i, kap hí lāi-bīn ê chèng-lâng, bô lâu chi̍t-ê; i khoán-thāi i ê ông, chhin-chhiūⁿ chêng khoán-thāi Iâ-lī-ko ông chi̍t-iūⁿ.

31約書亞kap以色列眾人tùi Li̍p-ná hia去到拉結，紮營tī伊ê對面，來攻擊伊。Iok-su-a kap Í-sek-lia̍t chèng-lâng tùi Li̍p-ná hia khì kàu La̍h-kiat, chat-iâⁿ tī i ê tùi-bīn, lâi kong-kek i.

32耶和華將拉結交tī以色列人ê手；隔日就取伊，用刀thâi死伊，kap hit內面ê眾人；是照伊對Li̍p-ná一切所行ê。Iâ-hô-hoa chiong La̍h-kiat kau tī Í-sek-lia̍t lâng ê chhiú; keh-ji̍t chiū chhú i, ēng to thâi-sí i, kap hí lāi-bīn ê chèng-lâng; sī chiàu i tùi Li̍p-ná it-chhè só͘ kiâⁿ ê.

33Hit時Ki-sek ê王Hô-lân來beh幫贊拉結；約書亞就phah死伊，kap伊ê百姓；lóng無kā伊留一個。Hit-sî Ki-sek ê ông Hô-lân lâi beh pang-chān La̍h-kiat; Iok-su-a chiū phah-sí i, kap i ê peh-sìⁿ; lóng bô kā i lâu chi̍t-ê.

34約書亞kap以色列眾人tùi拉結去到I-ki-lûn，tī伊ê對面紮營，攻擊伊；Iok-su-a kap Í-sek-lia̍t chèng-lâng tùi La̍h-kiat khì kàu I-ki-lûn, tī i ê tùi-bīn chat-iâⁿ, kong-kek i;

35Hit日就取伊，用刀phah伊；tī hit日一盡剿滅hit內面ê眾人；是照伊tùi拉結一切所行ê。hit-ji̍t chiū chhú i, ēng to phah i; tī hit-ji̍t it-chīn châu-bia̍t hí lāi-bīn ê chèng-lâng; sī chiàu i tùi La̍h-kiat it-chhè só͘ kiâⁿ ê.

36約書亞kap以色列眾人tùi I-ki-lûn上去到Hi-pek-lûn，攻擊伊；Iok-su-a kap Í-sek-lia̍t chèng-lâng tùi I-ki-lûn chiūⁿ-khì kàu Hi-pek-lûn, kong-kek i;

37就取伊，用刀phah伊，kap伊ê王，以及伊所屬ê城；thâi死hit內面ê百姓，lóng無留一個；是照伊對I-ki-lûn一切所行ê，一盡剿滅伊，kap hit內面ê眾百姓。chiū chhú i, ēng to phah i, kap i ê ông, í-ki̍p i só͘ sio̍k ê siâⁿ; thâi-sí hí lāi-bīn ê peh-sìⁿ, lóng bô lâu chi̍t-ê; sī chiàu i tùi I-ki-lûn it-chhè só͘ kiâⁿ ê, it-chīn châu-bia̍t i, kap hí lāi-bīn ê chèng peh-sìⁿ.

38約書亞kap以色列眾人tò來到Tí-phek，攻擊伊；Iok-su-a kap Í-sek-lia̍t chèng-lâng tò-lâi kàu Tí-phek, kong-kek i;

39就取伊，kap伊ê王，以及屬伊ê城，用刀phah伊；一盡滅hit內面ê眾人，無留一個，照伊前款待Hi-pek-lûn ê，taⁿ也款待Tí-phek kap伊ê王；也照伊前款待Li̍p-ná kap伊ê王一樣。chiū chhú i, kap i ê ông, í-ki̍p sio̍k i ê siâⁿ, ēng to phah i; it-chīn bia̍t hí lāi-bīn ê chèng-lâng, bô lâu chi̍t-ê, chiàu i chêng khoán-thāi Hi-pek-lûn ê, taⁿ iā khoán-thāi Tí-phek kap i ê ông; iā chiàu i chêng khoán-thāi Li̍p-ná kap i ê ông chi̍t-iūⁿ.

40Án-ni約書亞phah全地，就是山地，南方ê地、平洋、山坪，kap in lóng總ê王，無留一個；見有喘氣ê一盡剿滅，照耶和華以色列ê上帝所命令ê。Án-ni Iok-su-a phah choân-tōe, chiū-sī soaⁿ-tōe, lâm-hng ê tōe, pîⁿ-iûⁿ, soaⁿ-phiâⁿ, kap in lóng-chóng ê ông, bô lâu chi̍t-ê; kìⁿ-ū chhoán-khùi-ê it-chīn châu-bia̍t, chiàu Iâ-hô-hoa Í-sek-lia̍t ê Siōng-tè só͘ bēng-lēng ê.

41Tùi Ka-te-su-pa-nî-a到Ka-sat，koh Ko-san全地，以及Ki-piàn，lóng hō͘約書亞phah。Tùi Ka-te-su-pa-nî-a kàu Ka-sat, koh Ko-san choân-tōe, í-ki̍p Ki-piàn, lóng hō͘ Iok-su-a phah.

42Hiah-ê王kap in ê地，約書亞做一時取in；因為耶和華以色列ê上帝替以色列交戰。Hiah ê ông kap in ê tōe, Iok-su-a chòe chi̍t-sî chhú in; in-ūi Iâ-hô-hoa Í-sek-lia̍t ê Siōng-tè thòe Í-sek-lia̍t kau-chiàn.

43約書亞kap以色列ê眾人就tò來到Kiat-kah ê營盤。Iok-su-a kap Í-sek-lia̍t ê chèng-lâng chiū tò-lâi kàu Kiat-kah ê iâⁿ-pôaⁿ.