1約書亞聚集以色列眾支派到tī示劍，召以色列ê長老，kap in ê族長、審判官，以及官長來；in就khiā tī上帝ê面前。Iok-su-a chū-chi̍p Í-sek-lia̍t chèng chi-phài kàu tī Sī-kiàm, tiàu Í-sek-lia̍t ê tiúⁿ-ló, kap in ê cho̍k-tiúⁿ, sím-phòaⁿ-koaⁿ, í-ki̍p koaⁿ-tiúⁿ lâi; in chiū khiā tī Siōng-tè ê bīn-chêng.

2約書亞kā眾百姓講：耶和華以色列ê上帝án-ni講：在早lín ê列祖，就是亞伯拉罕ê老父，Ná-ho̍k ê老父，Tha-la̍h，tiàm tī大河hit-pêng，服事別ê上帝。Iok-su-a kā chèng peh-sìⁿ kóng, Iâ-hô-hoa Í-sek-lia̍t ê Siōng-tè án-ni kóng, Chāi-chá lín ê lia̍t-chó͘, chiū-sī A-pek-la̍h-hán ê lāu-pē, Ná-ho̍k ê lāu-pē, Tha-la̍h, tiàm tī Tōa-hô hit-pêng, ho̍k-sāi pa̍t ê siōng-tè.

3我取lín ê祖亞伯拉罕tùi大河hit-pêng chhōa伊遍行迦南全地；koh hō͘伊ê kiáⁿ孫chōe-chōe，用以撒賞賜伊；Góa chhú lín ê chó͘ A-pek-la̍h-hán tùi Tōa-hô hit-pêng chhōa i piàn-kiâⁿ Ka-lâm choân-tōe; koh hō͘ i ê kiáⁿ-sun chōe-chōe, ēng Í-sat siúⁿ-sù i;

4koh用雅各kap以掃賞賜以撒，將Se-jíⁿ山賞賜以掃做業；後來雅各kap伊ê kiáⁿ孫落去埃及。koh ēng Ngá-kok kap Í-sò siúⁿ-sù Í-sat, chiong Se-jíⁿ soaⁿ siúⁿ-sù Í-sò chòe-gia̍p; āu-lâi Ngá-kok kap i ê kiáⁿ-sun lo̍h-khì Ai-ki̍p.

5我差摩西kap亞倫，我也降災厄tī埃及，照我tī hit中間所行ê；然後chhōa lín出來。Góa chhe Mô͘-se kap A-lûn, Góa iā kàng chai-ē tī Ai-ki̍p, chiàu Góa tī hí tiong-kan só͘ kiâⁿ ê; jiân-āu chhōa lín chhut-lâi.

6我chhōa lín ê列祖出埃及，lín就到海墘，埃及人chhōa in ê車kap馬兵追jip lín ê列祖到紅海；Góa chhōa lín ê lia̍t-chó͘ chhut Ai-ki̍p, lín chiū kàu hái-kîⁿ, Ai-ki̍p lâng chhōa in ê chhia kap bé-peng tui-jip lín ê lia̍t-chó͘ kàu Âng-hái;

7in求叫耶和華，伊就用烏暗hē tī lín kap埃及人ê中間，koh hō͘海來淹密in；我tī埃及所行ê事lín親目看見；lín tiàm tī曠野chōe-chōe日。in kiû-kiò Iâ-hô-hoa, I chiū ēng o͘-àm hē tī lín kap Ai-ki̍p lâng ê tiong-kan, koh hō͘ hái lâi im-ba̍t in; Góa tī Ai-ki̍p só͘ kiâⁿ ê sū lín chhin-ba̍k khòaⁿ-kìⁿ; lín tiàm tī khòng-iá chōe-chōe ji̍t.

8我chhōa lín到khiā起tī約旦hit-pêng，A-mô͘-lī人ê地；in kap lín交戰；我將in交tī lín ê手；lín就得tio̍h in ê地；我剿滅in tī lín ê面前。Góa chhōa lín kàu khiā-khí tī Iok-tàn hit-pêng, A-mô͘-lī lâng ê tōe; in kap lín kau-chiàn; Góa chiong in kau tī lín ê chhiú; lín chiū tit-tio̍h in ê tōe; Góa châu-bia̍t in tī lín ê bīn-chêng.

9Hit時Mô͘-ap王Se-phoat ê kiáⁿ Pa-le̍k起來kap以色列交戰；差人去叫Pí-jíⁿ ê kiáⁿ Pa-lân來咒詛lín。Hit-sî Mô͘-ap ông Se-phoat ê kiáⁿ Pa-le̍k khí-lâi kap Í-sek-lia̍t kau-chiàn; chhe lâng khì kiò Pí-jíⁿ ê kiáⁿ Pa-lân lâi chiù-chó͘ lín.

10我m̄聽Pa-lân ê話；所以伊連連kā lín祝福；án-ni，我就救lín脫離伊ê手。Góa m̄-thiaⁿ Pa-lân ê ōe; só͘-í i liân-liân kā lín chiok-hok; án-ni, Góa chiū kiù lín thoat-lī i ê chhiú.

11Lín過約旦，到耶利哥；耶利哥人、A-mô͘-lī人、Pí-lī-sé人、迦南人、Hek人、Kek-ka-sat人、Hi-bī人、Iâ-pò͘-su人，lóng kap lín交戰；我將in交tī lín ê手。Lín kè Iok-tàn, kàu Iâ-lī-ko; Iâ-lī-ko lâng, A-mô͘-lī lâng, Pí-lī-sé lâng, Ka-lâm lâng, Hek lâng, Kek-ka-sat lâng, Hi-bī lâng, Iâ-pò͘-su lâng, lóng kap lín kau-chiàn ; Góa chiong in kau tī lín ê chhiú.

12我差大隻蜂飛tī lín ê頭前，將A-mô͘-lī人兩個王，tùi lín ê面前趕出去；m̄是用你ê刀，也m̄是用你ê弓。Góa chhe tōa-chiah-phang pe tī lín ê thâu-chêng, chiong A-mô͘-lī lâng nn̄g ê ông, tùi lín ê bīn-chêng kóaⁿ-chhut-khì; m̄-sī ēng lí ê to, iā m̄-sī ēng lí ê keng.

13我賞賜lín ê土地，m̄是lín所tio̍h磨ê，也賞賜lín城，m̄是lín所起造ê，lín就tiàm tī hit中間；koh m̄是lín所栽種ê葡萄園橄欖-園，lín得tio̍h食伊ê果子。Góa siúⁿ-sù lín ê thó͘-tōe, m̄-sī lín só͘ tio̍h-bôa-ê, iā siúⁿ-sù lín siâⁿ, m̄-sī lín só͘ khí-chō-ê, lín chiū tiàm tī hí tiong-kan; koh m̄-sī lín só͘ chai-chèng ê phû-tô-hn̂g kaⁿ-ná-hn̂g, lín tit-tio̍h chia̍h i ê ké-chí.

14Taⁿ lín tio̍h敬畏耶和華，誠心實意服事伊，將lín列祖tī大河hit-pêng kap tī埃及所服事ê上帝除去，來服事耶和華。Taⁿ lín tio̍h kèng-ùi Iâ-hô-hoa, sêng-sim si̍t-ì ho̍k-sāi I, chiong lín lia̍t-chó͘ tī Tōa-hô hit-pêng kap tī Ai-ki̍p só͘ ho̍k-sāi ê siōng-tè tû-khì, lâi ho̍k-sāi Iâ-hô-hoa.

15Nā是lín掠服事耶和華做m̄好，今á日lín tio̍h揀lín所beh服事ê；看是lín列祖tī大河hit-pêng所服事hiah-ê上帝，á是lín所khiā起in ê地， A-mô͘-lī人，hiah-ê上帝ah。論到我kap我ê家，阮決斷beh服事耶和華。Nā sī lín lia̍h ho̍k-sāi Iâ-hô-hoa chòe m̄-hó, kin-á-ji̍t lín tio̍h kéng lín só͘ beh ho̍k-sāi-ê; khòaⁿ sī lín lia̍t-chó͘ tī Tôa-hô hit-pêng só͘ ho̍k-sāi hiah ê siōng-tè, á-sī lín só͘ khiā-khí in ê tōe, A-mô͘-lī lâng, hiah ê siōng-tè ah. Lūn-kàu góa kap góa ê ke, goán koat-toàn beh ho̍k-sāi Iâ-hô-hoa.

16百姓應講，阮決斷無意思beh棄sak耶和華去服事別ê上帝。Peh-sìⁿ ìn kóng, Goán koat-toàn bô ì-sù beh khì-sak Iâ-hô-hoa khì ho̍k-sāi pa̍t ê siōng-tè.

17因為耶和華阮ê上帝bat chhōa阮kap阮ê列祖tùi埃及地做奴才ê家出來，tī阮ê目睭前行hiah-ê大ê神蹟，tī阮所行一切ê路，所經過ê ta̍k國，lóng有保護阮。In-ūi Iâ-hô-hoa goán ê Siōng-tè bat chhōa goán kap goán ê lia̍t-chó͘ tùi Ai-ki̍p tōe chòe lô͘-châi ê ke chhut-lâi, tī goán ê ba̍k-chiu-chêng kiâⁿ hiah ê tōa ê sîn-jiah, tī goán só͘ kiâⁿ it-chhè ê lō͘, só͘ keng-kè ê ta̍k-kok, lóng ū pó-hō͘ goán.

18耶和華也tī阮ê面前趕出lóng總ê百姓，趕出khiā起chit-ê所在ê A-mô͘-lī人；所以阮也beh服事耶和華，因為祂是阮ê上帝。Iâ-hô-hoa iā tī goán ê bīn-chêng kóaⁿ-chhut lóng-chóng ê peh-sìⁿ, kóaⁿ-chhut khiā-khí chit ê só͘-chāi ê A-mô͘-lī lâng; só͘-í goán iā beh ho̍k-sāi Iâ-hô-hoa, in-ūi I sī goán ê Siōng-tè.

19約書亞對百姓講：Lín bōe會服事耶和華，因為伊是聖ê上帝，決斷無容允用別ê上帝匹配伊，無beh赦免lín ê過失，lín ê罪惡。Iok-su-a tùi peh-sìⁿ kóng, Lín bōe-ōe ho̍k-sāi Iâ-hô-hoa, in-ūi I sī sèng ê Siōng-tè, koat-toàn bô iông-ún ēng pa̍t ê Siōng-tè phit-phòe I, bô beh sià-bián lín ê kè-sit, lín ê chōe-ok.

20Lín若離開耶和華去服事外邦ê上帝，耶和華tī降福氣hō͘ lín了後，beh oa̍t-tńg來降災厄hō͘ lín，滅無lín。Lín nā lī-khui Iâ-hô-hoa khì ho̍k-sāi gōa-pang ê Siōng-tè, Iâ-hô-hoa tī kàng hok-khì hō͘ lín liáu-āu, beh oa̍t-tńg lâi kàng chai-ē hō͘ lín, bia̍t-bô lín.

21百姓ìn約書亞講：無lah；阮定tio̍h beh服事耶和華。Peh-sìⁿ ìn Iok-su-a kóng, Bô-lah; goán tiāⁿ-tio̍h beh ho̍k-sāi Iâ-hô-hoa.

22約書亞對百姓講：Lín揀耶和華beh服事伊，lín家己做lín ê干證。In應講，好，阮做干證。Iok-su-a tùi peh-sìⁿ kóng, Lín kéng Iâ-hô-hoa beh ho̍k-sāi I, lín ka-kī chòe lín ê kan-chèng. In ìn kóng, Hó, goán chòe kan-chèng.

23約書亞講：Lín taⁿ tio̍h除去lín中間所有外邦ê上帝，hō͘ lín專心歸向耶和華以色列ê上帝。Iok-su-a kóng, Lín taⁿ tio̍h tû-khì lín tiong-kan só͘ ū gōa-pang ê siōng-tè, hō͘ lín choan-sim kui-ǹg Iâ-hô-hoa Í-sek-lia̍t ê Siōng-tè.

24百姓ìn約書亞講：阮beh服事耶和華阮ê上帝，聽thàn伊ê話。Peh-sìⁿ ìn Iok-su-a kóng, Goán beh ho̍k-sāi Iâ-hô-hoa goán ê Siōng-tè, thiaⁿ-thàn I ê ōe.

25Hit日約書亞就kap百姓立約，tī示劍kā in設立律例法度。Hit-ji̍t Iok-su-a chiū kap peh-sìⁿ li̍p-iok, tī Sī-kiàm kā in siat-li̍p lu̍t-lē hoat-tō͘.

26約書亞將chiah-ê話lóng寫tī上帝律法ê冊，koh將一塊大石頭khiā tī-hia，tī橡樹腳，耶和華聖所ê邊á。Iok-su-a chiong chiah ê ōe lóng siá tī Siōng-tè lu̍t-hoat ê chheh, koh chiong chi̍t-tè tōa chio̍h-thâu khiā tī-hia, tī siōng-chhiū kha, Iâ-hô-hoa sèng-só͘ ê piⁿ-á.

27約書亞對眾百姓講：看ah，chit-ê石頭beh做咱ê干證；因為伊有聽見耶和華所吩咐咱一切ê話，所以beh對lín做干證，驚了lín悖逆lín ê上帝。Iok-su-a tùi chèng peh-sìⁿ kóng, Khòaⁿ ah, chit ê chio̍h-thâu beh chòe lán ê kan-chèng; in-ūi i ū thiaⁿ-kìⁿ Iâ-hô-hoa só͘ hoan-hù lán it-chhè ê ōe, só͘-í beh tùi lín chòe kan-chèng, kiaⁿ-liáu lín pōe-ge̍k lín ê Siōng-tè.

28約書亞就差百姓去；ta̍k人就tò去伊所得tio̍h ê地。Iok-su-a chiū chhe peh-sìⁿ khì; ta̍k-lâng chiū tò-khì i só͘ tit-tio̍h ê tōe.

29Chiah-ê事以後，耶和華ê奴僕，Lùn ê kiáⁿ約書亞，一百一十歲就死。Chiah ê sū í-āu, Iâ-hô-hoa ê lô͘-po̍k, Lùn ê kiáⁿ Iok-su-a, chi̍t-pah it-cha̍p hè chiū sí.

30In就埋葬伊tī伊ê業ê界內，就是tī Í-hoat-liân山地ê Têng-ná-se-la̍h，tī Ka-si̍t山ê北勢。In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-se-la̍h, tī Ka-si̍t soaⁿ ê pak-sì.

31約書亞tī-teh ê日，kap約書亞死了後，hiah-ê知耶和華為以色列人所行chiah-ê事ê長老iáu tī-teh ê時，以色列人服事耶和華。Iok-su-a tī-teh ê ji̍t, kap Iok-su-a sí liáu-āu, hiah ê chai Iâ-hô-hoa ūi Í-sek-lia̍t lâng só͘ kiâⁿ chiah ê sū ê tióng-ló iáu tī-teh ê sî, Í-sek-lia̍t lâng ho̍k-sāi Iâ-hô-hoa.

32以色列人tùi埃及所帶來約瑟ê骨頭，in埋葬伊tī示劍，就是雅各早前用一百銀tùi示劍ê老父Hap-boa̍t hiah-ê kiáⁿ所買ê地；就做約瑟kiáⁿ孫ê業。Í-sek-lia̍t lâng tùi Ai-ki̍p só͘ tòa lâi Iok-sek ê kut-thâu, in bâi-chòng i tī Sī-kiàm, chiū-sī Ngá-kok chá-chêng ēng chi̍t-pah gûn tùi Sī-kiàm ê lāu-pē Hap-boa̍t hiah ê kiáⁿ só͘ bóe ê tōe; chiū chòe Iok-sek kiáⁿ-sun ê gia̍p.

33亞倫ê kiáⁿ Í-lī-a-sat也死；in就埋葬伊tī伊ê kiáⁿ Hui-nî-hap所得tio̍h ê山崙á，就是tī Í-hoat-liân ê山地。A-lûn ê kiáⁿ Í-lī-a-sat iā sí; in chiū bâi-chòng i tī i ê kiáⁿ Hui-nî-hap só͘ tit-tio̍h ê soaⁿ-lūn-á, chiū-sī tī Í-hoat-liân ê soaⁿ-tōe.

1約書亞死了後，以色列人問耶和華講：Chī-chūi tio̍h做頭上去kā阮攻擊迦南人，kap in交戰？Iok-su-a sí liáu-āu, Í-sek-lia̍t lâng mn̄g Iâ-hô-hoa kóng, Chī-chūi tio̍h chòe-thâu chiūⁿ-khì kā goán kong-kek Ka-lâm lâng, kap in kau-chiàn?

2耶和華講：猶大tio̍h上去；看ah，我已經將hit-ê地交tī伊ê手。Iâ-hô-hoa kóng, Iû-tāi tio̍h chiūⁿ-khì; khòaⁿ ah, Góa í-keng chiong hit ê tōe kau tī i ê chhiú.

3猶大對伊ê兄西門講：請你kap我上去到我所liam-tio̍h ê地，kap迦南人交戰；我也beh kap你去，到你所liam-tio̍h ê地；西門就kap伊去。Iû-tāi tùi i ê hiaⁿ Se-biān kóng, Chhiáⁿ lí kap góa chiūⁿ-khì kàu góa só͘ liam-tio̍h ê tōe, kap Ka-lâm lâng kau-chiàn; góa iā beh kap lí khì, kàu lí só͘ liam-tio̍h ê tōe; Se-biān chiū kap i khì.

4猶大就上去；耶和華將迦南人，kap Pí-lī-sé人，交tī in ê手；Iû-tāi chiū chiūⁿ-khì; Iâ-hô-hoa chiong Ka-lâm lâng, kap Pí-lī-sé lâng, kau tī in ê chhiú;

5in tī Pí-sek phah死in一萬人；koh tī Pí-sek tú-tio̍h A-to-nî-pí-sek，kap伊交戰；thâi贏迦南人kap Pí-lī-sé人。in tī Pí-sek phah-sí in chi̍t-bān lâng; koh tī Pí-sek tú-tio̍h A-to-nî-pí-sek, kap i kau-chiàn; thâi-iâⁿ Ka-lâm lâng kap Pí-lī-sé lâng.

6A-to-nî-pí-sek逃走，in追jip伊，掠tio̍h伊，剉斷伊ê手伊ê腳ê大pō͘母。A-to-nî-pí-sek tô-cháu, in tui-jip i, lia̍h-tio̍h i, chhò-tn̄g i ê chhiú i ê kha ê tōa-pō͘-bú.

7A-to-nî-pí-sek講：前有七十個王，手kap腳ê大pō͘母lóng 剉起來，tī我ê桌腳拾食物；taⁿ上帝照我所行ê報應我。In帶伊到耶路撒冷；伊就死tī-hia。A-to-nî-pí-sek kóng, Chêng ū chhit-cha̍p ê ông, chhiú kap kha ê tōa-pō͘-bú lóng chhò--khí-lâi, tī góa ê toh-kha khioh chia̍h-mi̍h; taⁿ Siōng-tè chiàu góa só͘-kiâⁿ-ê pò-èng góa. In tòa i kàu Iâ-lō͘-sat-léng; i chiū sí tī-hia.

8猶大人攻擊耶路撒冷，取伊，用刀thâi死in，koh放火燒城；Iû-tāi lâng kong-kek Iâ-lō͘-sat-léng, chhú i, ēng to thâi-sí in, koh pàng-hé sio siâⁿ;

9後來猶大人落去，kap tiàm tī山地，南勢ê地，平洋ê地ê迦南人交戰。āu-lâi Iû-tāi lâng lo̍h-khì, kap tiàm tī soaⁿ-tōe, lâm--sì ê tōe, pîⁿ-iûⁿ ê tōe ê Ka-lâm lâng kau-chiàn.

10猶大koh去，phah hiah-ê khiā起Hi-pek-lûn ê迦南人，thâi死Sī-su、A-hi-bān、That-mái；Hi-pek-lûn前名叫Ki-lia̍t-a-pa。Iû-tāi koh khì, phah hiah ê khiā-khí Hi-pek-lûn ê Ka-lâm lâng, thâi-sí Sī-su, A-hi-bān, That-mái; Hi-pek-lûn chêng miâ kiò Ki-lia̍t-a-pa.

11伊tùi-hia去phah Tí-phek khiā起ê百姓；I tùi-hia khì phah Tí-phek khiā-khí ê peh-sìⁿ;

12Tí-phek前名叫Ki-lia̍t-se-hut。迦勒講：若有人phah Ki-lia̍t-se-hut來取伊，我beh將我ê cha-bó͘-kiáⁿ Ap-sat hō͘伊做bó͘。Tí-phek chêng miâ kiò Ki-lia̍t-se-hut. Ka-le̍k kóng, Nā ū lâng phah Ki-lia̍t-se-hut lâi chhú i, góa beh chiong góa ê cha-bó͘-kiáⁿ Ap-sat hō͘ i chòe-bó͘.

13迦勒ê小弟Ki-la̍p-su ê kiáⁿ Gô-tô-liap取伊；伊就將伊ê cha-bó͘-kiáⁿ Ap-sat hō͘伊做bó͘。Ka-le̍k ê sió-tī Ki-la̍p-su ê kiáⁿ Gô-tô-liap chhú i; i chiū chiong i ê cha-bó͘-kiáⁿ Ap-sat hō͘ i chòe-bó͘.

14Ap-sat過門ê時勸丈夫tùi in老父討一坵田；Ap-sat tùi驢落來；迦勒問伊講：你beh甚麼ah？Ap-sat kè-mn̂g ê sî khǹg tiōng-hu tùi in lāu-pē thó chi̍t khu chhân; Ap-sat tùi lû lo̍h--lâi; Ka-le̍k mn̄g i kóng, Lí beh sím-mi̍h ah?

15伊對伊講，求你賜福我；你已經安置我tī南方ê地，求你hō͘我水泉。迦勒就用頂ê水泉，下ê水泉，hō͘伊。I tùi i kóng, Kiû lí sù-hok góa; lí í-keng an-tì góa tī lâm-hng ê tōe, kiû lí hō͘ góa chúi-chôaⁿ. Ka-le̍k chiū ēng téng ê chúi-chôaⁿ, ē ê chúi-chôaⁿ, hō͘ i.

16摩西ê外戚是Ki-nî人，伊ê kiáⁿ孫kap猶大ê kiáⁿ孫tùi棗樹城相kap上去，到A-la̍h-tek lâm-sì猶大ê曠野，kap百姓相kap khiā起。Mô͘-se ê gōa-chhek sī Ki-nî lâng, i ê kiáⁿ-sun kap Iû-tāi ê kiáⁿ-sun tùi chó-chhiū siâⁿ saⁿ-kap chiūⁿ--khì, kàu A-la̍h-tek lâm--sì Iû-tāi ê khòng-iá, kap peh-sìⁿ saⁿ-kap khiā-khí.

17猶大kap伊ê兄西門相kap去，phah死khiā起tī Sé-hoat ê迦南人，一盡毀滅伊；hit-ê城就名叫Hô-jíⁿ-má。Iû-tāi kap i ê hiaⁿ Se-biān saⁿ-kap khì, phah-sí khiā-khí tī Sé-hoat ê Ka-lâm lâng, it-chīn húi-bia̍t i; hit ê siâⁿ chiū miâ kiò Hô-jíⁿ-má.

18猶大koh取Ka-sat kap伊ê境界，A-si̍t-kî-lûn kap伊ê境界，Í-kek-lûn kap伊ê境界。Iû-tāi koh chhú Ka-sat kap i ê kéng-kài, A-si̍t-kî-lûn kap i ê kéng-kài, Í-kek-lûn kap i ê kéng-kài.

19耶和華kap猶大相kap tī-teh；伊就趕出山地khiā起ê百姓；總是bōe能趕出平洋khiā起ê百姓，因為in有鐵車。Iâ-hô-hoa kap Iû-tāi saⁿ-kap tī-teh; i chiū kóaⁿ-chhut soaⁿ-tōe khiā-khí ê peh-sìⁿ; chóng-sī bōe-ōe kóaⁿ-chhut pîⁿ-iûⁿ khiā-khí ê peh-sìⁿ, in-ūi in ū thih-chhia.

20In照摩西所講ê，用Hi-pek-lûn hō͘迦勒，伊就tùi-hia趕出A-la̍p三個kiáⁿ。In chiàu Mô͘-se só͘ kóng ê, ēng Hi-pek-lûn hō͘ Ka-le̍k, i chiū tùi-hia kóaⁿ-chhut A-la̍p saⁿ ê kiáⁿ.

21便雅憫人無趕出khiā起tī耶路撒冷ê Iâ-pò͘-su人；Iâ-pò͘-su人猶原tī耶路撒冷kap便雅憫人相kap khiā起，到今á日。Piān-ngá-bín lâng bô kóaⁿ-chhut khiā-khí tī Iâ-lō͘-sat-léng ê Iâ-pò͘-su lâng; Iâ-pò͘-su lâng iû-goân tī Iâ-lō͘-sat-léng kap Piān-ngá-bín lâng saⁿ-kap khiā-khí, kàu kin-á-ji̍t.

22約瑟家也上去攻擊Pek-te̍k-lī；耶和華kap in相kap tī-teh。Iok-sek ke iā chiūⁿ-khì kong-kek Pek-te̍k-lī; Iâ-hô-hoa kap in saⁿ-kap tī-teh.

23約瑟家差人去偷看Pek-te̍k-lī；hit-ê城頭先名叫Lō͘-su。Iok-sek-ke chhe lâng khì thau-khòaⁿ Pek-te̍k-lī; hit ê siâⁿ thâu-seng miâ kiò Lō͘-su.

24做偵探-ê看見一人tùi城內出來，就對伊講，求你用入城ê路報阮知，阮beh好款待你。Chòe cheng-thàm-ê khòaⁿ-kìⁿ chi̍t-lâng tùi siâⁿ-lāi chhut-lâi, chiū tùi i kóng, Kiû lí ēng ji̍p siâⁿ ê lō͘ pò goán chai, goán beh hó khoán-thāi lí.

25Hit人就報in入城ê路，in就用刀phah死城內ê百姓；獨獨放hit人kap伊全家去。Hit-lâng chiū pò in ji̍p siâⁿ ê lō͘, in chiū ēng to phah-sí siâⁿ-lāi ê peh-sìⁿ; to̍k-to̍k pàng hit-lâng kap i choân-ke khì.

26Hit人去Hek人ê地，起一座城，號名叫Lō͘-su；到今á日iáu叫chit-ê名。Hit-lâng khì Hek lâng ê tōe, khí chi̍t chō siâⁿ, hō miâ kiò Lō͘-su; kàu kin-á-ji̍t iáu kiò chit ê miâ.

27Má-ná-se也無趕出Pek-siān kap伊ê鄉社ê百姓，Tha-la̍p kap伊ê鄉社ê百姓，To-jíⁿ kap伊ê鄉社ê百姓，Í-pek-liân kap伊ê鄉社ê百姓，Bí-kiat-to kap伊ê鄉社ê百姓；迦南人就決意khiā起tī hiah-ê地方。Má-ná-se iā bô kóaⁿ-chhut Pek-siān kap i ê hiuⁿ-siā ê peh-sìⁿ, Tha-la̍p kap i ê hiuⁿ-siā ê peh-sìⁿ, To-jíⁿ kap i ê hiuⁿ-siā ê peh-sìⁿ, Í-pek-liân kap i ê hiuⁿ-siā ê peh-sìⁿ, Bí-kiat-to kap i ê hiuⁿ-siā ê peh-sìⁿ; Ka-lâm lâng chiū koat-ì khiā-khí tī hiah ê tōe-hng.

28到以色列強盛，就hō͘迦南人做苦工，無一盡趕in出。Kàu Í-sek-lia̍t kiông-sēng, chiū hō͘ Ka-lâm lâng chòe khó͘-kang, bô it-chīn kóaⁿ in chhut.

29Í-hoat-liân也無趕出khiā起tī Ki-sek ê迦南人；迦南人就tī in中間猶原khiā起tī Ki-sek。Í-hoat-liân iā bô kóaⁿ-chhut khiā-khí tī Ki-sek ê Ka-lâm lâng; Ka-lâm lâng chiū tī in tiong-kan iû-goân khiā-khí tī Ki-sek.

30Se-pò͘-lûn也無趕出Ki-lûn ê百姓，kap Ná-hap-la̍h ê百姓。迦南人就猶原khiā起tī in中間，來做苦工。Se-pò͘-lûn iā bô kóaⁿ-chhut Ki-lûn ê peh-sìⁿ, kap Ná-hap-la̍h ê peh-sìⁿ. Ka-lâm lâng chiū iû-goân khiā-khí tī in tiong-kan, lâi chòe khó͘-kang.

31A-siat也無趕出A-kho khiā起ê百姓，kap Se-tùn、A-hek-la̍h、A-kek-sek、Hek-pa、A-hut-kek、Lī-ha̍p khiā起ê百姓。A-siat iā bô kóaⁿ-chhut A-kho khiā-khí ê peh-sìⁿ, kap Se-tùn, A-hek-la̍h, A-kek-sek, Hek-pa, A-hut-kek, Lī-ha̍p khiā-khí ê peh-sìⁿ.

32A-sait人tòa tī khiā起hit所在迦南人ê中間，因為無趕in出去。A-sait lâng tòa tī khiā-khí hit só͘-chāi Ka-lâm lâng ê tiong-kan, in-ūi bô kóaⁿ in chhut-khì.

33Ná-hut-tha-lī無趕出Pek-sī-be̍k khiā起ê百姓，Pek-a-la̍p khiā起ê百姓；Ná-hut-tha-lī就tòa tī khiā起hit所在迦南人ê中間；總是Pek-sī-be̍k kap Pek-a-la̍p khiā起ê百姓lóng做苦工。Ná-hut-tha-lī bô kóaⁿ-chhut Pek-sī-be̍k khiā-khí ê peh-sìⁿ, Pek-a-la̍p khiā-khí ê peh-sìⁿ; Ná-hut-tha-lī chiū tòa tī khiā-khí hit só͘-chāi Ka-lâm lâng ê tiong-kan; chóng-sī Pek-sī-be̍k kap Pek-a-la̍p khiā-khí ê peh-sìⁿ lóng chòe khó͘-kang.

34A-mô͘-lī人強迫Tàn ê人khiā起tī山地，無容允in落去平洋。A-mô͘-lī lâng kiông-pek Tàn ê lâng khiā-khí tī soaⁿ-tōe, bô iông-ún in lo̍h-khì pîⁿ-iûⁿ.

35A-mô͘-lī人就決意khiā起tī Hi-lia̍t山，tī A-ngá-lûn，tī Sa-pin；後來約瑟家強盛，hō͘ in做苦工。A-mô͘-lī lâng chiū koat-ì khiā-khí tī Hi-lia̍t soaⁿ, tī A-ngá-lûn, tī Sa-pin; āu-lâi Iok-sek-ke kiông-sēng, hō͘ in chòe khó͘-kang.

36A-mô͘-lī人ê地界，是tùi A-khek-la̍h-pin山坪，tùi Se-la̍h上去。A-mô͘-lī lâng ê tōe-kài, sī tùi A-khek-la̍h-pin soaⁿ-phiâⁿ, tùi Se-la̍h chiūⁿ--khì.

1耶和華ê使者tùi Kiat-kah上到Pho-kim，講：我hō͘ lín tùi埃及上來，chhōa lín到我tùi lín列祖chiù-chōa ê地；我也bat講：所kap lín立ê約，我永遠無違背；Iâ-hô-hoa ê sù-chiá tùi Kiat-kah chiūⁿ kàu Pho-kim, kóng, Góa hō͘ lín tùi Ai-ki̍p chiūⁿ-lâi, chhōa lín kàu Góa tùi lín lia̍t-chó͘ chiù-chōa ê tōe; Góa iā bat kóng, só͘ kap lín li̍p ê iok, Góa éng-oán bô ûi-pōe;

2lín也m̄-thang kap chit所在khiā起ê百姓立約；tio̍h拆毀in ê壇。Lín竟然m̄聽我ê話，是怎樣án-ni行ah？lín iā m̄-thang kap chit só͘-chāi khiā-khí ê peh-sìⁿ li̍p-iok; tio̍h thiah-húi in ê tôaⁿ. Lín kéng-jiân m̄ thiaⁿ Góa ê ōe, sī cháiⁿ-iūⁿ án-ni kiâⁿ ah?

3因為án-ni我koh講：我無beh tùi lín ê面前趕出in，in beh做lín hia̍p下ê刺，in ê上帝beh做害lín ê羅網。In-ūi án-ni Góa koh kóng, Góa bô beh tùi lín ê bīn-chêng kóaⁿ-chhut in, in beh chòe lín hia̍p-ē ê chhì, in ê siōng-tè beh chòe hāi lín ê lô-bāng.

4耶和華ê使者對以色列眾人講chiah-ê話ê時，百姓就開聲啼哭；Iâ-hô-hoa ê sù-chiá tùi Í-sek-lia̍t chèng-lâng kóng chiah ê ōe ê sî, peh-sìⁿ chiū khui-siaⁿ thî-khàu;

5就號hit所在ê名叫Pho-kim；in tī-hia獻祭hō͘耶和華。chiū hō hit só͘-chāi ê miâ kiò Pho-kim; in tī-hia hiàn-chè hō͘ Iâ-hô-hoa.

6約書亞已經差以色列人去ê時，in ta̍k人歸in ê業，來得tio̍h in ê地。Iok-su-a í-keng chhe Í-sek-lia̍t lâng khì ê sî, in ta̍k-lâng kui in ê gia̍p, lâi tit-tio̍h in ê tōe.

7約書亞tī-teh ê日，kap約書亞死了後hiah-ê看見耶和華為以色列人所行大事ê長老iáu tī-teh ê時，百姓服事耶和華。Iok-su-a tī-teh ê ji̍t, kap Iok-su-a sí liáu-āu hiah ê khòaⁿ-kìⁿ Iâ-hô-hoa ūi Í-sek-lia̍t lâng só͘ kiâⁿ tōa-sū ê tióng-ló iáu tī-teh ê sî, peh-sìⁿ ho̍k-sāi Iâ-hô-hoa.

8耶和華ê奴僕，Lùn ê kiáⁿ約書亞，一百一十歲，就死。Iâ-hô-hoa ê lô͘-po̍k, Lùn ê kiáⁿ Iok-su-a, chi̍t-pah it-cha̍p hè, chiū sí.

9In就埋葬伊tī伊ê業ê界內，就是tī Í-hoat-liân山地ê Têng-ná-hi-lia̍t，tī Ka-si̍t山ê北勢。In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-hi-lia̍t, tī Ka-si̍t soaⁿ ê pak--sì.

10Hit代ê人lóng tò祖；以後koh一代 ê人興起，m̄知耶和華，也m̄知Hit-tāi ê lâng lóng tò-chó͘; í-āu koh chi̍t-tāi ê lâng heng-khí, m̄-chai Iâ-hô-hoa, iā m̄-chai ūi Í-sek-lia̍t lâng só͘ kiâⁿ ê sū.

11以色列人行耶和華看做pháiⁿ ê事，去服事Pa-le̍k；Í-sek-lia̍t lâng kiâⁿ Iâ-hô-hoa khòaⁿ-chòe pháiⁿ ê sū, khì ho̍k-sāi Pa-le̍k;

12棄sak in列祖ê上帝耶和華，就是chhōa in出埃及地ê；去tè別ê上帝，就是四圍hiah-ê百姓ê上帝跪拜in，來惹耶和華ê大受氣。khì-sak in lia̍t-chó͘ ê Siōng-tè Iâ-hô-hoa, chiū-sī chhōa in chhut Ai-ki̍p tōe ê; khì tè pa̍t ê siōng-tè, chiū-sī sì-ûi hiah ê peh-sìⁿ ê siōng-tè kūi-pài in, lâi jiá Iâ-hô-hoa ê tōa siū-khì.

13In也棄sak耶和華，去服事Pa-le̍k kap A-su-tha-lio̍k。In iā khì-sak Iâ-hô-hoa, khì ho̍k-sāi Pa-le̍k kap A-su-tha-lio̍k.

14耶和華受氣以色列ê人，將in交tī搶掠in ê人ê手，in就搶in；伊koh賣in hō͘四圍對敵ê手；致到in tī in ê對敵ê頭前無koh khiā能tiâu；Iâ-hô-hoa siū-khì Í-sek-lia̍t ê lâng, chiong in kau tī chhiúⁿ-lia̍h in ê lâng ê chhiú, in chiū chhiúⁿ in; I koh bōe in hō͘ sì-ûi tùi-te̍k ê chhiú; tì-kàu in tī in ê tùi-te̍k ê thâu-chêng bô koh khiā-ōe-tiâu;

15in無論去toh落，耶和華伸手降災厄hō͘ in，照耶和華所講ê話，koh照耶和華對in所chiù-chōa ê；in就極困苦。in bô-lūn khì toh-lo̍h, Iâ-hô-hoa chhun-chhiú kàng chai-ē hō͘ in, chiàu Iâ-hô-hoa só͘ kóng ê ōe, koh chiàu Iâ-hô-hoa tùi in só͘ chiù-chōa ê; in chiū ke̍k khùn-khó͘.

16耶和華就興起士師；in就救百姓脫離搶掠in ê人ê手。Iâ-hô-hoa chiū heng-khí sū-su; in chiū kiù peh-sìⁿ thoat-lī chhiúⁿ-lia̍h in ê lâng ê chhiú.

17總是in無聽thàn in ê士師，竟然行邪淫，tè別ê上帝來跪拜in；in ê列祖thàn耶和華ê命令所行ê路，in緊緊歪chhoa̍h伊，無照án-ni行。Chóng-sī in bô thiaⁿ-thàn in ê sū-su, kéng-jiân kiâⁿ siâ-îm, tè pa̍t ê siōng-tè lâi kūi-pài in; in ê lia̍t-chó͘ thàn Iâ-hô-hoa ê bēng-lēng só͘ kiâⁿ ê lō͘, in kín-kín oai-chhoa̍h i, bô chiàu án-ni kiâⁿ.

18耶和華kā in興起士師ê時，耶和華就kap士師tī-teh；也tī士師活tī-teh一切ê日，救in脫離對敵ê手；in因為受壓制苦楚，就吐氣，所以耶和華就退悔。Iâ-hô-hoa kā in heng-khí sū-su ê sî, Iâ-hô-hoa chiū kap sū-su tī-teh; iā tī sū-su oa̍h tī--teh it-chhè ê ji̍t, kiù in thoat-lī tùi-te̍k ê chhiú; in in-ūi siū ap-chè khó͘-chhó͘, chiū thó͘-khùi, só͘-í Iâ-hô-hoa chiū thè-hóe.

19到士師死了，in就oa̍t-tńg去行，比in ê父公koh khah-pháiⁿ，tè別ê上帝來服事in，跪拜in，lóng無改in ê所行kap in固執ê路。Kàu sū-su sí-liáu, in chiū oa̍t-tńg khì kiâⁿ, pí in ê pē-kong koh khah-pháiⁿ, tè pa̍t ê siōng-tè lâi ho̍k-sāi in, kūi-pài in, lóng bô kóe in ê só͘-kiâⁿ kap in kò͘-chip ê lō͘.

20耶和華就受氣以色列人，講：因為chit-ê百姓違背我ê約，就是我所命令in ê列祖ê，也無聽thàn我ê話；Iâ-hô-hoa chiū siū-khì Í-sek-lia̍t lâng, kóng, In-ūi chit ê peh-sìⁿ ûi-pōe Góa ê iok, chiū-sī Góa só͘ bēng-lēng in ê lia̍t-chó͘ ê, iā bô thiaⁿ-thàn Góa ê ōe;

21所以約書亞死ê時所chhun ê ta̍k族，以後我無beh koh tī in ê面前趕出一族；só͘-í Iok-su-a sí ê sî só͘ chhun ê ta̍k-cho̍k, í-āu Góa bô beh koh tī in ê bīn-chêng kóaⁿ-chhut chi̍t-cho̍k;

22thang用chiah-ê來試驗以色列人，看in肯執守耶和華ê道路來行伊，親像in ê列祖bat守伊，á無。thang ēng chiah-ê lâi chhì-giām Í-sek-lia̍t lâng, khòaⁿ in khéng chip-siú Iâ-hô-hoa ê tō-lō͘ lâi kiâⁿ i, chhin-chhiūⁿ in ê lia̍t-chó͘ bat siú i, á-bô.

23所以耶和華留chiah-ê族，無緊緊趕in出，也無將in交tī約書亞ê手。Só͘-í Iâ-hô-hoa lâu chiah ê cho̍k, bô kín-kín kóaⁿ in chhut, iā bô chiong in kau tī Iok-su-a ê chhiú.