1Iâ-lō͘-pa-le̍k ê kiáⁿ A-pí-bí-le̍k到示劍，見伊ê眾母舅，對in kap伊外公全家ê人講：Iâ-lō͘-pa-le̍k ê kiáⁿ A-pí-bí-le̍k kàu Sī-kiàm, kìⁿ i ê chèng bú-kū, tùi in kap i gōa-kong choân-ke ê lâng kóng,

2請lín講hō͘示劍ê眾人聽，看是Iâ-lō͘-pa-le̍k ê眾kiáⁿ，七十人管lín，á是一人管lín，tah落一項khah好？Lín也tio̍h siàu念我是lín ê骨肉。Chhiáⁿ lín kóng hō͘ Sī-kiàm ê chèng-lâng thiaⁿ, khòaⁿ sī Iâ-lō͘-pa-le̍k ê chèng-kiáⁿ, chhit-cha̍p lâng koán lín, á-sī chi̍t-lâng koán lín, tah-lo̍h chi̍t-hāng khah-hó? Lín iā tio̍h siàu-liām góa sī lín ê kut-jio̍k.

3伊hiah-ê母舅就將chit-ê一切ê話，替伊講hō͘示劍ê人聽；in ê心就歸向A-pí-bí-le̍k；因為講：伊是咱ê兄弟。I hiah ê bú-kū chiū chiong chit ê it-chhè ê ōe, thòe i kóng hō͘ Sī-kiàm ê lâng thiaⁿ; in ê sim chiū kui-ǹg A-pí-bí-le̍k; in-ūi kóng, I sī lán ê hiaⁿ-tī.

4就tùi Pa-le̍k-pí-lī-thó͘ ê厝the̍h七十個銀á hō͘ A-pí-bí-le̍k；伊就用伊來顧chiah-ê無下落ê匪類；hiah-ê人來tè伊。Chiū tùi Pa-le̍k-pí-lī-thó͘ ê chhù the̍h chhit-cha̍p ê gûn-á hō͘ A-pí-bí-le̍k; i chiū ēng i lâi kò͘ chiah ê bô hē-lo̍h ê húi-lūi; hiah ê lâng lâi tè i.

5伊去Gô-hut-la̍h到伊ê老父ê家，將Iâ-lō͘-pa-le̍k ê kiáⁿ，就是伊ê兄弟七十人，lóng thâi死tī一塊石磐頂；只有Iâ-lō͘-pa-le̍k ê soah尾kiáⁿ Iok-thán 留teh；因為伊有走去bih。I khì Gô-hut-la̍h kàu i ê lāu-pē ê ke, chiong Iâ-lō͘-pa-le̍k ê kiáⁿ, chiū-sī i ê hiaⁿ-tī chhit-cha̍p lâng, lóng thâi-sí tī chi̍t tè chio̍h-pôaⁿ-téng; chí-ū Iâ-lō͘-pa-le̍k ê soah-bé kiáⁿ Iok-thán lâu--teh; in-ūi i ū cháu khì bih.

6示劍人kap Bí-lô ê家，lóng聚集，去設立A-pí-bí-le̍k做王，tī示劍chhāi柱ê橡樹腳。Sī-kiàm lâng kap Bí-lô ê ke, lóng chū-chi̍p, khì siat-li̍p A-pí-bí-le̍k chòe-ông, tī Sī-kiàm chhāi-thiāu ê siōng-chhiū-kha.

7有人kā Iok-thán講chit-ê事，伊就去khiā tī Ki-lī-sim山頂，大聲hoah，kā in講：示劍人ah，lín tio̍h聽我ê話，hō͘上帝也聽lín。Ū lâng kā Iok-thán kóng chit ê sū, i chiū khì khiā tī Ki-lī-sim soaⁿ-téng, tōa-siaⁿ hoah, kā in kóng, Sī-kiàm lâng ah, lín tio̍h thiaⁿ góa ê ōe, hō͘ Siōng-tè iā thiaⁿ lín.

8Bat有一pái，chiah-ê樹lóng去，beh設立一叢樹做in ê王；就去對橄欖樹講：請你做阮ê王。Bat ū chi̍t-pái, chiah ê chhiū lóng khì, beh siat-li̍p chi̍t châng chhiū chòe in ê ông; chiū khì tùi kaⁿ-ná-chhiū kóng, Chhiáⁿ lí chòe goán ê ông.

9橄欖樹應講，我kiám thang放sak我ê 油，就是人所用來尊重上帝kap人ê，去搖tī眾樹ê頂面mah？Kaⁿ-ná-chhiū ìn kóng, Góa kiám thang pàng-sak góa ê iû, chiū-sī lâng só͘ ēng lâi chun-tiōng Siōng-tè kap lâng ê, khì iô tī chèng-chhiū ê téng-bīn mah?

10chiah-ê樹對無花果樹講：你來，來做阮ê王。Chiah ê chhiū tùi bû-hoa-kó-chhiū kóng, Lí lâi, lâi chòe goán ê ông.

11無花果樹應講，我kiám thang放sak我ê甜koh好ê果子，去搖tī眾樹ê頂面mah？Bû-hoa-kó-chhiū ìn kóng, Góa kiám thang pàng-sak góa ê tiⁿ koh hó ê ké-chí, khì iô tī chèng-chhiū ê téng-bīn mah?

12chiah-ê樹對葡萄樹講：你來，來做阮ê王。Chiah ê chhiū tùi phû-tô-chhiū kóng, Lí lâi, lâi chòe goán ê ông.

13葡萄樹應講，我kiám thang放sak我ê新酒，就是hō͘上帝kap人歡喜ê，去搖tī眾樹ê頂面mah？Phû-tô-chhiū ìn kóng, Góa kiám thang pàng-sak góa ê sin-chiú, chiū-sī hō͘ Siōng-tè kap lâng hoaⁿ-hí-ê, khì iô tī chèng-chhiū ê téng-bīn mah?

14chiah-ê樹對刺á講：你來，來做阮ê王。Chiah ê chhiū tùi chhì-á kóng, Lí lâi, lâi chòe goán ê ông.

15刺á應hiah-ê樹講：Lín若實在設立我做lín ê王，就tio̍h閃bih tī我ê蔭影下；若m̄，願火tùi刺á出，燒滅黎巴嫩ê柏香樹。Chhì-á ìn hiah ê chhiū kóng, Lín nā si̍t-chāi siat-li̍p góa chòe lín ê ông, chiū tio̍h siám-bih tī góa ê ìm-ńg-ē; nā m̄, goān hé tùi chhì-á chhut, sio-bia̍t Lī-pa-lùn ê pek-hiuⁿ-chhiū.

16Taⁿ lín設立A-pí-bí-le̍k做王，若照誠實公義來行，koh好款待Iâ-lō͘-pa-le̍k kap伊ê家，照伊ê手所tio̍h磨ê報答伊；Taⁿ lín siat-li̍p A-pí-bí-le̍k chòe-ông, nā chiàu sêng-si̍t kong-gī lâi kiâⁿ, koh hó khoán-thāi Iâ-lō͘-pa-le̍k kap i ê ke, chiàu i ê chhiú só͘ tio̍h-bôa-ê pò-tap i;

17因為我ê老父bat phe死，為lín交戰，救lín脫離米甸人ê手；in-ūi góa ê lāu-pē bat phe-sí, ūi lín kau-chiàn, kiù lín thoat-lī Bí-tiân lâng ê chhiú;

18lín今á日起來攻擊我老父ê家，thâi死伊ê kiáⁿ，七十人，tī一塊石磐頂，koh設立伊ê女婢ê kiáⁿ A-pí-bí-le̍k做示劍人ê王，因為伊是lín ê兄弟；lín kin-á-ji̍t khí-lâi kong-kek góa lāu-pē ê ke, thâi-sí i ê kiáⁿ, chhit-cha̍p lâng, tī chi̍t tè chio̍h-pôaⁿ-téng, koh siat-li̍p i ê lú-pī ê kiáⁿ A-pí-bí-le̍k chòe Sī-kiàm lâng ê ông, in-ūi i sī lín ê hiaⁿ-tī;

19lín今á日若照誠實公義款待Iâ-lō͘-pa-le̍k kap伊ê家，就lín thang tùi A-pí-bí-le̍k來歡喜，伊也thang tùi lín來歡喜；lín kin-á-ji̍t nā chiàu sêng-si̍t kong-gī khoán-thāi Iâ-lō͘-pa-le̍k kap i ê ke, chiū lín thang tùi A-pí-bí-le̍k lâi hoaⁿ-hí, i iā thang tùi lín lâi hoaⁿ-hí;

20若無，願火tùi A-pí-bí-le̍k出，燒示劍人kap Bí-lô ê家；koh願火tùi示劍人kap Bí-lô ê家出，燒 A-pí-bí-le̍k。nā bô, goān hé tùi A-pí-bí-le̍k chhut, sio Sī-kiàm lâng kap Bí-lô ê ke; koh goān hé tùi Sī-kiàm lâng kap Bí-lô ê ke chhut, sio A-pí-bí-le̍k.

21Iok-thán，因為驚伊ê兄弟，就逃走；走去bih tī Pí-jíⁿ，tiàm tī-hia。Iok-thán, in-ūi kiaⁿ i ê hiaⁿ-tī, chiū tô-cháu; cháu-khì bih tī Pí-jíⁿ, tiàm tī-hia.

22A-pí-bí-le̍k管以色列三年。A-pí-bí-le̍k koán Í-sek-lia̍t saⁿ-nî.

23上帝差pháiⁿ神tī A-pí-bí-le̍k kap示劍人ê中間。示劍人就用詭詐款待A-pí-bí-le̍k；Siōng-tè chhe pháiⁿ-sîn tī A-pí-bí-le̍k kap Sī-kiàm lâng ê tiong-kan. Sī-kiàm lâng chiū ēng khúi-chà khoán-thāi A-pí-bí-le̍k;

24來報應Iâ-lō͘-pa-le̍k七十個kiáⁿ所受ê殘害；也hō͘ in ê血歸tī thâi死in ê，就是in ê兄弟A-pí-bí-le̍k，也歸tī示劍人，就是贊伊ê手thâi死伊ê兄弟ê。lâi pò-èng Iâ-lō͘-pa-le̍k chhit-cha̍p ê kiáⁿ só͘ siū ê chân-hāi; iā hō͘ in ê huih kui tī thâi-sí in ê, chiū-sī in ê hiaⁿ-tī A-pí-bí-le̍k, iā kui tī Sī-kiàm lâng, chiū-sī chān i ê chhiú thâi-sí i ê hiaⁿ-tī ê.

25示劍人tī山頂設埋伏，來當等伊；見若tùi hit條路過ê人，in就搶伊；有人就將這事去報A-pí-bí-le̍k。Sī-kiàm lâng tī soaⁿ-téng siat bâi-ho̍k, lâi tng-tán i; kìⁿ-nā tùi hit tiâu lō͘ kè ê lâng, in chiū chhiúⁿ i; ū lâng chiū chiong che sū khì pò A-pí-bí-le̍k.

26Í-piat ê kiáⁿ迦勒，kap伊ê兄弟，來到示劍；示劍人lóng信靠伊。Í-piat ê kiáⁿ Ka-le̍k, kap i ê hiaⁿ-tī, lâi kàu Sī-kiàm; Sī-kiàm lâng lóng sìn-khò i.

27In出去園裡，收葡萄園，來踏酒，設筵席，入in ê上帝ê廟lim食，咒詛A-pí-bí-le̍k。In chhut-khì hn̂g--nih, siu phû-tô-hn̂g, lâi ta̍h chiú, siat iân-sia̍h, ji̍p in ê siōng-tè ê biō lim-chia̍h, chiù-chó͘ A-pí-bí-le̍k.

28Í-piat ê kiáⁿ迦勒講：A-pí-bí-le̍k是是誰，示劍是是誰，hō͘咱服事伊ah？伊kiám m̄是Iâ-lō͘-pa-le̍k ê kiáⁿ mah？伊ê軍長kiám m̄是Se-pò͘-le̍k mah？lín tio̍h服事示劍ê老父Hap-boa̍t ê人；咱啥事服事伊ah？Í-piat ê kiáⁿ Ka-le̍k kóng, A-pí-bí-le̍k sī chī-chūi, Sī-kiàm sī chī-chūi, hō͘ lán ho̍k-sāi i ah? i kiám m̄-sī Iâ-lō͘-pa-le̍k ê kiáⁿ mah? i ê kun-tiúⁿ kiám m̄-sī Se-pò͘-le̍k mah? lín tio̍h ho̍k-sāi Sī-kiàm ê lāu-pē Hap-boa̍t ê lâng; lán siáⁿ-sū ho̍k-sāi i ah?

29願chiah-ê百姓歸我ê手下，我就除A-pí-bí-le̍k；伊就kā A-pí-bí-le̍k講：加添你ê軍兵出來。Goān chiah ê peh-sìⁿ kui góa ê chhiú-ē, góa chiū tû A-pí-bí-le̍k; i chiū kā A-pí-bí-le̍k kóng, Ke-thiⁿ lí ê kun-peng chhut-lâi.

30城守Se-pò͘-le̍k聽見Í-piat ê kiáⁿ迦勒ê話，就受氣；Siâⁿ-siú Se-pò͘-le̍k thiaⁿ-kìⁿ Í-piat ê kiáⁿ Ka-le̍k ê ōe, chiū siū-khì;

31暗靜差人去見A-pí-bí-le̍k，講：Í-piat ê kiáⁿ迦勒kap伊ê兄弟到示劍，誘惑城內ê百姓攻擊你；àm-chīⁿ chhe lâng khì kìⁿ A-pí-bí-le̍k, kóng, Í-piat ê kiáⁿ Ka-le̍k kap i ê hiaⁿ-tī kàu Sī-kiàm, iú-he̍k siâⁿ-lāi ê peh-sìⁿ kong-kek lí;

32所以你kap tè你ê人，tio̍h透暝起來，埋伏tī田裡；só͘-í lí kap tè lí ê lâng, tio̍h thàu-mî khí-lâi, bâi-ho̍k tī chhân--nih;

33早起時，日tú-á出；你tio̍h早早起來，衝óa攻城；迦勒kap tè伊ê人出來攻擊你ê時，你就thang siòng機會來款待in。chá-khí-sî, ji̍t tú-á chhut; lí tio̍h chá-chá khí-lâi, chhiong-óa kong siâⁿ; Ka-le̍k kap tè i ê lâng chhut-lâi kong-kek lí ê sî, lí chiū thang siòng ki-hōe lâi khoán-thāi in.

34A-pí-bí-le̍k kap tè伊ê眾人透暝起來，分做四隊，ǹg示劍埋伏。A-pí-bí-le̍k kap tè i ê chèng-lâng thàu-mî khí-lâi, pun chòe sì-tūi, ǹg Sī-kiàm bâi-ho̍k.

35Í-piat ê kiáⁿ迦勒出去，khiā tī城門口；A-pí-bí-le̍k kap tè ê人tùi埋伏ê所在起來。Í-piat ê kiáⁿ Ka-le̍k chhut-khì, khiā tī siâⁿ-mn̂g-kháu; A-pí-bí-le̍k kap tè ê lâng tùi bâi-ho̍k ê só͘-chāi khí-lâi.

36迦勒看見hiah-ê人，就對Se-pò͘-le̍k講：看ah，有人tùi山頂落來。Se-pò͘-le̍k講：你看見山ê影，掠做是人。Ka-le̍k khòaⁿ-kìⁿ hiah ê lâng, chiū tùi Se-pò͘-le̍k kóng, Khòaⁿ ah, ū lâng tùi soaⁿ-téng lo̍h--lâi. Se-pò͘-le̍k kóng, Lí khòaⁿ-kìⁿ soaⁿ ê iáⁿ, lia̍h-chòe sī lâng.

37迦勒koh講：看ah，有人tùi高地落來，koh有一隊tùi Bí-ok-nî-nî橡樹ê路上來。Ka-le̍k koh kóng, Khòaⁿ ah, ū lâng tùi koâiⁿ-tōe lo̍h-lâi, koh ū chi̍t-tūi tùi Bí-ok-nî-nî siōng-chhiū ê lō͘ chiūⁿ-lâi.

38Se-pò͘-le̍k對伊講，你bat講：A-pí-bí-le̍k是是誰，hō͘咱服事伊，你講chiah-ê話ê嘴tī tah落？這kiám m̄是你所藐視ê百姓mah？你taⁿ tio̍h出去，kap in交戰。Se-pò͘-le̍k tùi i kóng, Lí bat kóng, A-pí-bí-le̍k sī chī-chūi, hō͘ lán ho̍k-sāi i, lí kóng chiah ê ōe ê chhùi tī tah-lo̍h? che kiám m̄-sī lí só͘ biáu-sī ê peh-sìⁿ mah? lí taⁿ tio̍h chhut-khì, kap in kau-chiàn.

39迦勒就tùi示劍人ê頭前出去，kap A-pí-bí-le̍k交戰。Ka-le̍k chiū tùi Sī-kiàm lâng ê thâu-chêng chhut-khì, kap A-pí-bí-le̍k kau-chiàn.

40A-pí-bí-le̍k追趕伊；伊tī伊ê面前逃走，有chōe-chōe人tio̍h傷倒teh，直到城門口。A-pí-bí-le̍k tui-kóaⁿ i; i tī i ê bīn-chêng tô-cháu, ū chōe-chōe lâng tio̍h-siong tó--teh, ti̍t-kàu siâⁿ-mn̂g-kháu.

41A-pí-bí-le̍k tiàm tī A-ló͘-má；Se-pò͘-le̍k趕迦勒kap伊ê兄弟，m̄准伊tiàm tī示劍。A-pí-bí-le̍k tiàm tī A-ló͘-má; Se-pò͘-le̍k kóaⁿ Ka-le̍k kap i ê hiaⁿ-tī, m̄-chún i tiàm tī Sī-kiàm.

42隔日百姓出去到田裡；有人kā A-pí-bí-le̍k講。Keh-ji̍t peh-sìⁿ chhut-khì kàu chhân--nih; ū lâng kā A-pí-bí-le̍k kóng.

43伊就將伊ê人分做三隊，埋伏tī田裡；看見示劍人tùi城裡出來，就起來攻擊in，thâi in。I chiū chiong i ê lâng pun chòe saⁿ-tūi, bâi-ho̍k tī chhân--nih; khòaⁿ-kìⁿ Sī-kiàm lâng tùi siâⁿ--nih chhut-lâi, chiū khí-lâi kong-kek in, thâi in.

44A-pí-bí-le̍k kap tè伊hit一隊衝進前，khiā tī城門口；hit兩隊直直衝到田裡hiah-ê人，來thâi in。A-pí-bí-le̍k kap tè i hit chi̍t-tūi chhiong chìn-chêng, khiā tī siâⁿ-mn̂g-kháu; hit nn̄g-tūi ti̍t-ti̍t chhiong kàu chhân--nih hiah ê lâng, lâi thâi in.

45A-pí-bí-le̍k thong日攻擊城；取hit-ê城，thâi死hit內面ê百姓；拆毀hit-ê城，用鹽掖伊。A-pí-bí-le̍k thong-ji̍t kong-kek siâⁿ; chhú hit ê siâⁿ, thâi-sí hí lāi-bīn ê peh-sìⁿ; thiah-húi hit ê siâⁿ, ēng iâm iā i.

46Tiàm tī示劍台ê人聽見，就閃入Pa-le̍k-pí-lī-thó͘ ê厝ê衛所。Tiàm tī Sī-kiàm tâi ê lâng thiaⁿ-kìⁿ, chiū siám-ji̍p Pa-le̍k-pí-lī-thó͘ ê chhù ê ōe-só͘.

47有人kā A-pí-bí-le̍k講：示劍台ê人lóng聚集tī一所在。Ū lâng kā A-pí-bí-le̍k kóng, Sī-kiàm tâi ê lâng lóng chū-chi̍p tī chi̍t só͘-chāi.

48A-pí-bí-le̍k kap tè伊ê人就lóng 上 Sat-bûn山；A-pí-bí-le̍k手the̍h斧頭，剉一叢樹枝，giâ tī肩頭頂；對tè伊ê人講：Lín看我所行ê，也tio̍h緊緊學我來行。A-pí-bí-le̍k kap tè i ê lâng chiū lóng chiūⁿ Sat-bûn soaⁿ; A-pí-bí-le̍k chhiú the̍h pó͘-thâu, chhò chi̍t châng chhiū-ki, giâ tī keng-thâu-téng; tùi tè i ê lâng kóng, Lín khòaⁿ góa só͘-kiâⁿ-ê, iā tio̍h kín-kín o̍h góa lâi kiâⁿ.

49眾人就ta̍k-ê剉一支，來tè A-pí-bí-le̍k，將樹枝疊tī衛所，放火燒衛所tī hiah-ê人ê頂面，致到示劍台ê人lóng死；男女約略一千人。Chèng-lâng chiū ta̍k-ê chhò chi̍t-ki, lâi tè A-pí-bí-le̍k, chiong chhiū-ki thia̍p tī ōe-só͘, pàng-hé sio ōe-só͘ tī hiah ê lâng ê téng-bīn, tì-kàu Sī-kiàm tâi ê lâng lóng sí; lâm-lú iok-lio̍k chi̍t-chheng lâng.

50A-pí-bí-le̍k去到Thê-pī-su，紮營tī Thê-pī-su，來取伊。A-pí-bí-le̍k khì kàu Thê-pī-su, chat-iâⁿ tī Thê-pī-su, lâi chhú i.

51城內有堅固ê台；城內ê眾人，無論男女，lóng走去hia，關門，上台頂。Siâⁿ-lāi ū kian-kò͘ ê tâi; siâⁿ-lāi ê chèng-lâng, bô-lūn lâm-lú, lóng cháu-khì hia, koaiⁿ-mn̂g, chiūⁿ tâi-téng.

52A-pí-bí-le̍k到hit-ê台攻擊伊，óa近台門，beh用火燒伊。A-pí-bí-le̍k kàu hit ê tâi kong-kek i, óa-kūn tâi-mn̂g, beh ēng hé sio i.

53有一個婦人人將一塊téng-tún ê磨石，tìm-tio̍h A-pí-bí-le̍k ê頭殼，phah破伊ê頭殼碗；Ū chi̍t ê hū-jîn-lâng chiong chi̍t-tè téng-tún ê bō-chio̍h, tìm-tio̍h A-pí-bí-le̍k ê thâu-khak, phah-phòa i ê thâu-khak-óaⁿ;

54伊就緊緊叫kia̍h伊ê軍器ê少年人，kā伊講，拔你ê刀thâi我，免得人講我，伊是婦人人所thâi-ê；少年人就kā伊鑿透，伊就死。i chiū kín-kín kiò kia̍h i ê kun-khì ê siàu-liân lâng, kā i kóng, Pu̍ih lí ê to thâi góa, bián-tit lâng kóng góa, I sī hū-jîn-lâng só͘ thâi-ê; siàu-liân lâng chiū kā i chha̍k-thàu, i chiū sí.

55以色列人看見A-pí-bí-le̍k已經死，ta̍k-ê就tò去伊ê所在。Í-sek-lia̍t lâng khòaⁿ-kìⁿ A-pí-bí-le̍k í-keng sí, ta̍k-ê chiū tò-khì i ê só͘-chāi.

56Án-ni，上帝報應A-pí-bí-le̍k ǹg伊ê老父所行ê pháiⁿ，就是thâi死伊ê兄弟七十人。Án-ni, Siōng-tè pò-èng A-pí-bí-le̍k ǹg i ê lāu-pē só͘ kiâⁿ ê pháiⁿ, chiū-sī thâi-sí i ê hiaⁿ-tī chhit-cha̍p lâng.

57示劍人一切ê pháiⁿ，上帝也lóng報應tī in ê頭殼頂；Iâ-lō͘-pa-le̍k ê kiáⁿ Iok-thán ê咒詛歸tī in ê頂面。Sī-kiàm lâng it-chhè ê pháiⁿ, Siōng-tè iā lóng pò-èng tī in ê thâu-khak-téng; Iâ-lō͘-pa-le̍k ê kiáⁿ Iok-thán ê chiù-chó͘ kui tī in ê téng-bīn.

1A-pí-bí-le̍k了後，有Í-sat-ka人，Tó-to ê孫，Phó͘-óa ê kiáⁿ，Tô-la̍h起來，拯救以色列人；伊tiàm tī Í-hoat-liân山地ê Sa-bi̍t；A-pí-bí-le̍k liáu-āu, ū Í-sat-ka lâng, Tó-to ê sun, Phó͘-óa ê kiáⁿ, Tô-la̍h khí-lâi, chín-kiù Í-sek-lia̍t lâng; i tiàm tī Í-hoat-liân soaⁿ-tōe ê Sa-bi̍t;

2伊做以色列ê士師二十三年，就死，埋葬tī Sa-bi̍t。i chòe Í-sek-lia̍t ê sū-su jī-cha̍p-saⁿ nî, chiū sí, bâi-chòng tī Sa-bi̍t.

3伊了後有Ki-lia̍t人Gâi-jíⁿ起來，做以色列ê士師二十二年。I liáu-āu ū Ki-lia̍t lâng Gâi-jíⁿ khí-lâi, chòe Í-sek-lia̍t ê sū-su jī-cha̍p-jī nî.

4伊有三十個kiáⁿ，騎三十隻ê驢á，in有三十座城，名叫Hap-úi-te̍k-gâi-jíⁿ，到今á日；lóng是tī Ki-lia̍t地。I ū saⁿ-cha̍p ê kiáⁿ, khiâ saⁿ-cha̍p chiah ê lû-á, in ū saⁿ-cha̍p chō siâⁿ, miâ kiò Hap-úi-te̍k-gâi-jíⁿ, kàu kin-á-ji̍t; lóng sī tī Ki-lia̍t tōe.

5Gâi-jíⁿ死，就埋葬tī Ka-bûn。Gâi-jíⁿ sí, chiū bâi-chòng tī Ka-bûn.

6以色列人koh行耶和華所看做pháiⁿ ê事，去服事chiah-ê Pa-le̍k，kap A-su-tha-lio̍k，以及A-lân ê上帝，Se-tùn hiah-ê上帝，Mô͘-ap ê上帝，A-bûn人ê上帝，腓利士人ê上帝；棄sak耶和華無服事伊。Í-sek-lia̍t lâng koh kiâⁿ Iâ-hô-hoa só͘ khòaⁿ-chòe pháiⁿ ê sū, khì ho̍k-sāi chiah ê Pa-le̍k, kap A-su-tha-lio̍k, í-ki̍p A-lân ê siōng-tè, Se-tùn hiah ê siōng-tè, Mô͘-ap ê siōng-tè, A-bûn lâng ê siōng-tè, Hui-lī-sū lâng ê siōng-tè; khì-sak Iâ-hô-hoa bô ho̍k-sāi I.

7耶和華受氣以色列人，賣in tī腓利士人ê手，kap A-bûn人ê手。Iâ-hô-hoa siū-khì Í-sek-lia̍t lâng, bōe in tī Hui-lī-sū lâng ê chhiú, kap A-bûn lâng ê chhiú.

8In tùi hit年擾亂壓制以色列人十八年，就是tī約旦hit-pêng，眾以色列人khiā起tī A-mô͘-lī人ê地，就是tī Ki-lia̍t ê。In tùi hit-nî jiáu-loān ap-chè Í-sek-lia̍t lâng cha̍p-poeh nî, chiū-sī tī Iok-tàn hit-pêng, chèng Í-sek-lia̍t lâng khiā-khí tī A-mô͘-lī lâng ê tōe, chiū-sī tī Ki-lia̍t ê.

9A-bûn人koh過約旦河，去攻擊猶大，便雅憫，Í-hoat-liân族；以色列人就盡在窘迫。A-bûn lâng koh kè Iok-tàn hô, khì kong-kek Iû-tāi, Piān-ngá-bín, Í-hoat-liân cho̍k; Í-sek-lia̍t lâng chiū chīn-chāi khún-pek.

10以色列人哀求耶和華，講：阮得罪你，因為有棄sak阮ê上帝，去服事chiah-ê Pa-le̍k。Í-sek-lia̍t lâng ai-kiû Iâ-hô-hoa, kóng, Goán tek-chōe Lí, in-ūi ū khì-sak goán ê Siōng-tè, khì ho̍k-sāi chiah ê Pa-le̍k.

11耶和華對以色列人講：我kiám無救lín脫離埃及人、A-mô͘-lī人、A-bûn人，kap腓利士人mah？Iâ-hô-hoa tùi Í-sek-lia̍t lâng kóng, Góa kiám bô kiù lín thoat-lī Ai-ki̍p lâng, A-mô͘-lī lâng, A-bûn lâng, kap Hui-lī-sū lâng mah?

12Se-tùn人、A-má-le̍k人、Má-hûn人，也lóng壓制lín；lín哀求我，我也拯救lín脫離in ê手；Se-tùn lâng, A-má-le̍k lâng, Má-hûn lâng, iā lóng ap-chè lín; lín ai-kiû Góa, Góa iā chín-kiù lín thoat-lī in ê chhiú;

13lín竟然放sak我，服事別ê上帝；lín kéng-jiân pàng-sak Góa, ho̍k-sāi pa̍t ê siōng-tè;

14所以我無koh救lín；lín去哀求lín所揀ê上帝；lín tú-tio̍h患難ê時，thang hō͘ in救lín。só͘-í Góa bô koh kiù lín; lín khì ai-kiû lín só͘ kéng ê siōng-tè; lín tú-tio̍h hoān-lān ê sî, thang hō͘ in kiù lín.

15以色列人對耶和華講：阮犯罪lah，chhut-chāi你ê意思款待阮；獨獨求你今á日救阮。Í-sek-lia̍t lâng tùi Iâ-hô-hoa kóng, Goán hoān-chōe lah, chhut-chāi Lí ê ì-sù khoán-thāi goán; to̍k-to̍k kiû Lí kin-á-ji̍t kiù goán.

16In就tùi in中間除去外邦ê上帝，服事耶和華；耶和華ê心因為以色列人ê艱苦就憂悶。In chiū tùi in tiong-kan tû-khì gōa-pang ê siōng-tè, ho̍k-sāi Iâ-hô-hoa; Iâ-hô-hoa ê sim in-ūi Í-sek-lia̍t lâng ê kan-khó͘ chiū iu-būn.

17當hit時A-bûn人聚集，紮營tī Ki-lia̍t；以色列人也聚集，紮營tī Bí-su-pa。Tng hit-sî A-bûn lâng chū-chi̍p, chat-iâⁿ tī Ki-lia̍t; Í-sek-lia̍t lâng iā chū-chi̍p, chat-iâⁿ tī Bí-su-pa.

18Ki-lia̍t ê百姓kap眾首領，大家相kap議論講：Chī-chūi能事先去攻擊A-bûn人？hit人beh做Ki-lia̍t眾百姓ê頭人。Ki-lia̍t ê peh-sìⁿ kap chèng siú-léng, tāi-ke saⁿ-kap gī-lūn kóng, Chī-chūi ōe tāi-seng khì kong-kek A-bûn lâng? hit-lâng beh chòe Ki-lia̍t chèng peh-sìⁿ ê thâu-lâng.

1Ki-lia̍t人Iâ-hut-tha是一個大權能ê勇士，是妓女ê kiáⁿ；Iâ-hut-tha是Ki-lia̍t所生ê。Ki-lia̍t lâng Iâ-hut-tha sī chi̍t ê tōa koân-lêng ê ióng-sū, sī kī-lú ê kiáⁿ; Iâ-hut-tha sī Ki-lia̍t só͘ siⁿ ê.

2Ki-lia̍t ê bó͘也kā伊生kúi-nā ê kiáⁿ；伊ê bó͘所生ê kiáⁿ已經大漢，就激逐(tio̍k) Iâ-hut-tha，kā伊講，你m̄-thang tī阮老父ê家承接業，因為你是別ê婦人人ê kiáⁿ。Ki-lia̍t ê bó͘ iā kā i siⁿ kúi-nā ê kiáⁿ; i ê bó͘ só͘ siⁿ ê kiáⁿ í-keng tōa-hàn, chiū kek-tio̍k Iâ-hut-tha, kā i kóng, Lí m̄-thang tī goán lāu-pē ê ke sêng-chiap gia̍p, in-ūi lí sī pa̍t ê hū-jîn-lâng ê kiáⁿ.

3Iâ-hut-tha就走，閃避伊ê兄弟，去tiàm tī Tô-pek ê地；有匪類聚集tī Iâ-hut-tha hia，tè伊出入。Iâ-hut-tha chiū cháu, siám-pī i ê hiaⁿ-tī, khì tiàm tī Tô-pek ê tōe; ū húi-lūi chū-chi̍p tī Iâ-hut-tha hia, tè i chhut-ji̍p.

4過有hiah久，A-bûn人kap以色列交戰。Kè ū hiah-kú, A-bûn lâng kap Í-sek-lia̍t kau-chiàn.

5A-bûn人kap以色列交戰ê時，Ki-lia̍t ê長老去beh招Iâ-hut-tha tùi Tô-pek ê地來；A-bûn lâng kap Í-sek-lia̍t kau-chiàn ê sî, Ki-lia̍t ê tiúⁿ-ló khì beh chio Iâ-hut-tha tùi Tô-pek ê tōe lâi;

6對Iâ-hut-tha講：請你來做阮ê元帥，阮就thang kap A-bûn人交戰。tùi Iâ-hut-tha kóng, Chhiáⁿ lí lâi chòe goán ê goân-sòe, goán chiū thang kap A-bûn lâng kau-chiàn.

7Iâ-hut-tha應Ki-lia̍t ê長老講：前lín kiám m̄是怨恨我，趕我出老父ê家mah？taⁿ lín tú-tio̍h患難，啥事來我chia ah？Iâ-hut-tha ìn Ki-lia̍t ê tiúⁿ-ló kóng, Chêng lín kiám m̄-sī oàn-hūn góa, kóaⁿ góa chhut lāu-pē ê ke mah? taⁿ lín tú-tio̍h hoān-lān, siáⁿ-sū lâi góa chia ah?

8Ki-lia̍t ê長老應Iâ-hut-tha講：阮taⁿ所以歸向你，是ài你kap阮去，kap A-bûn人交戰；你thang做阮ê頭，來管轄Ki-lia̍t一切khiā起ê百姓。Ki-lia̍t ê tiúⁿ-ló ìn Iâ-hut-tha kóng, Goán taⁿ só͘-í kui-ǹg lí, sī ài lí kap goán khì, kap A-bûn lâng kau-chiàn; lí thang chòe goán ê thâu, lâi koán-hat Ki-lia̍t it-chhè khiā-khí ê peh-sìⁿ.

9Iâ-hut-tha對Ki-lia̍t ê長老講：Lín chhōa我tò去，kap A-bûn人交戰，耶和華將in交tī我ê面前，我真正beh做lín ê頭mah？Iâ-hut-tha tùi Ki-lia̍t ê tiúⁿ-ló kóng, Lín chhōa góa tò--khì, kap A-bûn lâng kau-chiàn, Iâ-hô-hoa chiong in kau tī góa ê bīn-chêng, góa chin-chiàⁿ beh chòe lín ê thâu mah?

10Ki-lia̍t ê長老應Iâ-hut-tha講：耶和華tī咱中間做干證，阮的確照你ê話行。Ki-lia̍t ê tiúⁿ-ló ìn Iâ-hut-tha kóng, Iâ-hô-hoa tī lán tiong-kan chòe kan-chèng, goán tek-khak chiàu lí ê ōe kiâⁿ.

11Iâ-hut-tha就kap Ki-lia̍t ê長老tò去；百姓就立伊做頭，做元帥。Iâ-hut-tha tī Bí-su-pa將家己一切ê話排列tī耶和華ê面前。Iâ-hut-tha chiū kap Ki-lia̍t ê tiúⁿ-ló tò--khì; peh-sìⁿ chiū li̍p i chòe-thâu, chòe goân-sòe. Iâ-hut-tha tī Bí-su-pa chiong ka-kī it-chhè ê ōe pâi-lia̍t tī Iâ-hô-hoa ê bīn-chêng.

12Iâ-hut-tha差hiah-ê使者去見A-bûn人ê王講：你kap我甚麼干涉，竟然來我chia攻擊我ê地ah？Iâ-hut-tha chhe hiah ê sù-chiá khì kìⁿ A-bûn lâng ê ông kóng, Lí kap góa sím-mi̍h kan-sia̍p, kéng-jiân lâi góa chia kong-kek góa ê tōe ah?

13A-bûn人ê王應Iâ-hut-tha ê使者講：因為以色列人tùi埃及上來ê時，佔我ê地，tùi A-lùn到Ngá-phok，直到約旦；taⁿ lín tio̍h願願將chiah-ê地還我。A-bûn lâng ê ông ìn Iâ-hut-tha ê sù-chiá kóng, In-ūi Í-sek-lia̍t lâng tùi Ai-ki̍p chiūⁿ-lâi ê sî, chiàm góa ê tōe, tùi A-lùn kàu Ngá-phok, ti̍t-kàu Iok-tàn; taⁿ lín tio̍h goān-goān chiong chiah ê tōe hêng góa.

14Iâ-hut-tha koh 差使者去見A-bûn人ê王，kā伊講，Iâ-hut-tha koh chhe sù-chiá khì kìⁿ A-bûn lâng ê ông, kā i kóng,

15Iâ-hut-tha án-ni講：以色列人並無佔Mô͘-ap地，kap A-bûn人ê地。Iâ-hut-tha án-ni kóng, Í-sek-lia̍t lâng pēng bô chiàm Mô͘-ap tōe, kap A-bûn lâng ê tōe.

16以色列人tùi埃及上來，經過曠野到紅海，來到Ka-te-su；Í-sek-lia̍t lâng tùi Ai-ki̍p chiūⁿ-lâi, keng-kè khòng-iá kàu Âng-hái, lâi kàu Ka-te-su;

17Hit時以色列就差使者去見Í-tong王講：求你准阮經過你ê地；總是Í-tong王m̄聽伊。Koh 差使者去見Mô͘-ap王，伊也m̄准；以色列人就tiàm tī Ka-te-su。hit-sî Í-sek-lia̍t chiū chhe sù-chiá khì kìⁿ Í-tong ông kóng, Kiû lí chún goán keng-kè lí ê tōe; chóng-sī Í-tong ông m̄ thiaⁿ i. Koh chhe sù-chiá khì kìⁿ Mô͘-ap ông, i iā m̄-chún; Í-sek-lia̍t lâng chiū tiàm tī Ka-te-su.

18In koh經過曠野，se̍h Í-tong地kap Mô͘-ap地，tùi Mô͘-ap地ê東勢過來，tī A-lùn hit-pêng紮營；也無入Mô͘-ap ê境內；因為A-lùn河是Mô͘-ap ê交界。In koh keng-kè khòng-iá, se̍h Í-tong tōe kap Mô͘-ap tōe, tùi Mô͘-ap tōe ê tang--sì kè-lâi, tī A-lùn hit-pêng chat-iâⁿ; iā bô ji̍p Mô͘-ap ê kéng-lāi; in-ūi A-lùn hô sī Mô͘-ap ê kau-kài.

19以色列差人去見A-mô͘-lī王Se-hông，就是Hi-si̍t-本ê王，以色列對伊講，求你准阮過你ê地，去阮家己ê所在。Í-sek-lia̍t chhe lâng khì kìⁿ A-mô͘-lī ông Se-hông, chiū-sī Hi-si̍t-pún ê ông, Í-sek-lia̍t tùi i kóng, Kiû lí chún goán kè lí ê tōe, khì goán ka-kī ê só͘-chāi.

20總是Se-hông m̄信以色列，m̄-hō͘ in經過伊ê境界；Se-hông就聚集伊ê眾百姓，tī Ngá-cha̍p紮營，kap以色列人交戰。Chóng-sī Se-hông m̄-sìn Í-sek-lia̍t, m̄-hō͘ in keng-kè i ê kéng-kài; Se-hông chiū chū-chi̍p i ê chèng peh-sìⁿ, tī Ngá-cha̍p chat-iâⁿ, kap Í-sek-lia̍t lâng kau-chiàn.

21耶和華以色列ê上帝，用Se-hông kap伊ê眾百姓交tī以色列人ê手，in就phah in；tùi án-ni，以色列就得tio̍h hit所在khiā起ê A-mô͘-lī人全地。Iâ-hô-hoa Í-sek-lia̍t ê Siōng-tè, ēng Se-hông kap i ê chèng peh-sìⁿ kau tī Í-sek-lia̍t lâng ê chhiú, in chiū phah in; tùi án-ni Í-sek-lia̍t chiū tit-tio̍h hit só͘-chāi khiā-khí ê A-mô͘-lī lâng choân-tōe.

22In得tio̍h A-mô͘-lī人ê全境界，tùi A-lùn到Ngá-phok，tùi曠野到約旦。In tit-tio̍h A-mô͘-lī lâng ê choân kéng-kài, tùi A-lùn kàu Ngá-phok, tùi khòng-iá kàu Iok-tàn.

23耶和華以色列ê上帝tī伊百姓以色列ê面前，趕出A-mô͘-lī人；你也beh得tio̍h in ê地mah？Iâ-hô-hoa Í-sek-lia̍t ê Siōng-tè tī I peh-sìⁿ Í-sek-lia̍t ê bīn-chêng, kóaⁿ-chhut A-mô͘-lī lâng; lí iā beh tit-tio̍h in ê tōe mah?

24你ê上帝Ki-boa̍t所賞賜你得tio̍h-ê，你無得tio̍h伊來做業mah？耶和華阮ê上帝見若tùi阮ê面前所趕出ê，阮beh得tio̍h伊。Lí ê siōng-tè Ki-boa̍t só͘ siúⁿ-sù lí tit-tio̍h-ê, lí bô tit-tio̍h i lâi chòe-gia̍p mah? Iâ-hô-hoa goán ê Siōng-tè kìⁿ-nā tùi goán ê bīn-chêng só͘ kóaⁿ-chhut-ê, goán beh tit-tio̍h i.

25你kiám贏過Mô͘-ap王Se-phoat ê kiáⁿ Pa-le̍k mah？伊kiám bat kap以色列人計較mah？kiám bat kap in交戰mah？Lí kiám iâⁿ-kè Mô͘-ap ông Se-phoat ê kiáⁿ Pa-le̍k mah? i kiám bat kap Í-sek-lia̍t lâng kè-kàu mah? kiám bat kap in kau-chiàn mah?

26以色列人tiàm tī Hi-si̍t-pún kap伊ê鄉社，A-lô-jíⁿ kap伊ê鄉社，kap A-lùn河邊hiah-ê城，已經有三百年，lín tī hit時啥事無取in 倒tńg ah？Í-sek-lia̍t lâng tiàm tī Hi-si̍t-pún kap i ê hiuⁿ-siā, A-lô-jíⁿ kap i ê hiuⁿ-siā, kap A-lùn hô-piⁿ hiah ê siâⁿ, í-keng ū saⁿ-pah nî, lín tī hit-sî siáⁿ-sū bô chhú in tò-tńg ah?

27我無得罪你，你反tńg kap我交戰，實在無理；願審判ê耶和華今á日tī以色列kap A-bûn ê中間來判斷。Góa bô tek-chōe lí, lí hoán-tńg kap góa kau-chiàn, si̍t-chāi bû-lí; goān sím-phòaⁿ ê Iâ-hô-hoa kin-á-ji̍t tī Í-sek-lia̍t kap A-bûn ê tiong-kan lâi phòaⁿ-toàn.

28總是A-bûn人ê王m̄肯聽Iâ-hut-tha差人對伊講ê話。Chóng-sī A-bûn lâng ê ông m̄-khéng thiaⁿ Iâ-hut-tha chhe lâng tùi i kóng ê ōe.

29耶和華ê神臨到Iâ-hut-tha；伊就經過Ki-lia̍t kap Má-ná-se，koh經過到Ki-lia̍t ê Bí-su-pa，koh tùi Ki-lia̍t ê Bí-su-pa經過到A-bûn人hia。Iâ-hô-hoa ê Sîn lîm-kàu Iâ-hut-tha; i chiū keng-kè Ki-lia̍t kap Má-ná-se, koh keng-kè kàu Ki-lia̍t ê Bí-su-pa, koh tùi Ki-lia̍t ê Bí-su-pa keng-kè kàu A-bûn lâng hia.

30Iâ-hut-tha就對耶和華下願，講：你若將A-bûn人交tī我ê手，Iâ-hut-tha chiū tùi Iâ-hô-hoa hē-goān, kóng, Lí nā chiong A-bûn lâng kau tī góa ê chhiú,

31我tùi A-bûn人hia平安tò來ê時，見若tùi我ê厝ê門出來迎接我ê，beh歸tī耶和華，我beh獻伊做燒祭。góa tùi A-bûn lâng hia pêng-an tò-lâi ê sî, kìⁿ-nā tùi góa ê chhù ê mn̂g chhut-lâi ngiâ-chih góa-ê, beh kui tī Iâ-hô-hoa, góa beh hiàn i chòe sio-chè.

32Tùi án-ni， Iâ-hut-tha去A-bûn人hia，kap in交戰；耶和華將in交tī伊ê手；Tùi án-ni Iâ-hut-tha khì A-bûn lâng hia, kap in kau-chiàn; Iâ-hô-hoa chiong in kau tī i ê chhiú;

33伊就phah in，大大thâi死in，tùi A-lô-jíⁿ到Bí-le̍k，直到A-pī-le̍k-ki-la̍h-bêng，共二十個城；án-ni A-bûn人就屈服tī以色列人。i chiū phah in, tōa-tōa thâi-sí in, tùi A-lô-jíⁿ kàu Bí-le̍k, ti̍t-kàu A-pī-le̍k-ki-la̍h-bêng, kiōng jī-cha̍p ê siâⁿ; án-ni A-bûn lâng chiū khut-ho̍k tī Í-sek-lia̍t lâng.

34Iâ-hut-tha tò來Bí-su-pa到家己ê厝，hit時伊ê cha-bó͘-kiáⁿ kia̍h lin-long鼓跳舞出來迎接伊；chit-ê是伊獨生ê，以外無kiáⁿ，無cha-bó͘-kiáⁿ。Iâ-hut-tha tò-lâi Bí-su-pa kàu ka-kī ê chhù, hit-sî i ê cha-bó͘-kiáⁿ kia̍h lin-long-kó͘ thiàu-bú chhut-lâi ngiâ-chih i; chit-ê sī i to̍k-siⁿ ê, í-gōa bô kiáⁿ, bô cha-bó͘-kiáⁿ.

35Iâ-hut-tha看見伊，就拆裂衫講：Ai-ah，我ê cha-bó͘-kiáⁿ，你hō͘我真慘，你也是hō͘我真大艱難；因為我已經對耶和華開嘴，bōe會收倒tńg。Iâ-hut-tha khòaⁿ-kìⁿ i, chiū thiah-li̍h saⁿ kóng, Ai--ah, góa ê cha-bó͘-kiáⁿ, lí hō͘ góa chin-chhám, lí iā sī hō͘ góa chin tōa kan-lân; in-ūi góa í-keng tùi Iâ-hô-hoa khui-chhùi, bōe-ōe siu tò-tńg.

36伊應講，我ê父ah，你已經對耶和華開嘴，就tio̍h照你ê嘴所講出ê行tī我；因為耶和華已經為tio̍h你報仇你ê對敵A-bûn人。I ìn kóng, Góa ê pē ah, lí í-keng tùi Iâ-hô-hoa khui-chhùi, chiū tio̍h chiàu lí ê chhùi só͘ kóng-chhut-ê kiâⁿ tī góa; in-ūi Iâ-hô-hoa í-keng ūi-tio̍h lí pò-siû lí ê tùi-te̍k A-bûn lâng.

37Koh對伊ê老父講：有chit件事求你允准，容允我兩月日，hō͘我kap我ê同伴去山裡，thang啼哭我做在室女。Koh tùi i ê lāu-pē kóng, Ū chit kiāⁿ sū kiû lí ún-chún, iông-ún góa nn̄g-ge̍h-ji̍t, hō͘ góa kap góa ê tâng-phòaⁿ khì soaⁿ--nih, thang thî-khàu góa chòe chāi-sek-lú.

38伊講：你去ah。就差伊去兩月日；伊kap同伴去，tī山裡為tio̍h伊做在室女啼哭；I kóng, Lí khì ah. Chiū chhe i khì nn̄g-ge̍h-ji̍t; i kap tâng-phōaⁿ khì, tī soaⁿ--nih ūi-tio̍h i chòe chāi-sek-lú thî-khàu;

39兩月日已經滿，伊tò來到老父hia，老父就照伊所下ê願款待伊；伊lóng無親近ta-po͘人。nn̄g-ge̍h-ji̍t í-keng móa, i tò-lâi kàu lāu-pē hia, lāu-pē chiū chiàu i só͘ hē ê goān khoán-thāi i; i lóng bô chhin-kūn ta-po͘-lâng.

40後來以色列中有chit-ê例，ta̍k年以色列chiah-ê cha-bó͘-gín-ná去追悼Ki-lia̍t人Iâ-hut-tha ê cha-bó͘-kiáⁿ，每年四日。Āu-lâi Í-sek-lia̍t tiong ū chit ê lē, ta̍k-nî Í-sek-lia̍t chiah ê cha-bó͘-gín-ná khì tui-tō Ki-lia̍t lâng Iâ-hut-tha ê cha-bó͘-kiáⁿ, múi-nî sì ji̍t.