1Ki-lia̍t人Iâ-hut-tha是一個大權能ê勇士，是妓女ê kiáⁿ；Iâ-hut-tha是Ki-lia̍t所生ê。Ki-lia̍t lâng Iâ-hut-tha sī chi̍t ê tōa koân-lêng ê ióng-sū, sī kī-lú ê kiáⁿ; Iâ-hut-tha sī Ki-lia̍t só͘ siⁿ ê.

2Ki-lia̍t ê bó͘也kā伊生kúi-nā ê kiáⁿ；伊ê bó͘所生ê kiáⁿ已經大漢，就激逐(tio̍k) Iâ-hut-tha，kā伊講，你m̄-thang tī阮老父ê家承接業，因為你是別ê婦人人ê kiáⁿ。Ki-lia̍t ê bó͘ iā kā i siⁿ kúi-nā ê kiáⁿ; i ê bó͘ só͘ siⁿ ê kiáⁿ í-keng tōa-hàn, chiū kek-tio̍k Iâ-hut-tha, kā i kóng, Lí m̄-thang tī goán lāu-pē ê ke sêng-chiap gia̍p, in-ūi lí sī pa̍t ê hū-jîn-lâng ê kiáⁿ.

3Iâ-hut-tha就走，閃避伊ê兄弟，去tiàm tī Tô-pek ê地；有匪類聚集tī Iâ-hut-tha hia，tè伊出入。Iâ-hut-tha chiū cháu, siám-pī i ê hiaⁿ-tī, khì tiàm tī Tô-pek ê tōe; ū húi-lūi chū-chi̍p tī Iâ-hut-tha hia, tè i chhut-ji̍p.

4過有hiah久，A-bûn人kap以色列交戰。Kè ū hiah-kú, A-bûn lâng kap Í-sek-lia̍t kau-chiàn.

5A-bûn人kap以色列交戰ê時，Ki-lia̍t ê長老去beh招Iâ-hut-tha tùi Tô-pek ê地來；A-bûn lâng kap Í-sek-lia̍t kau-chiàn ê sî, Ki-lia̍t ê tiúⁿ-ló khì beh chio Iâ-hut-tha tùi Tô-pek ê tōe lâi;

6對Iâ-hut-tha講：請你來做阮ê元帥，阮就thang kap A-bûn人交戰。tùi Iâ-hut-tha kóng, Chhiáⁿ lí lâi chòe goán ê goân-sòe, goán chiū thang kap A-bûn lâng kau-chiàn.

7Iâ-hut-tha應Ki-lia̍t ê長老講：前lín kiám m̄是怨恨我，趕我出老父ê家mah？taⁿ lín tú-tio̍h患難，啥事來我chia ah？Iâ-hut-tha ìn Ki-lia̍t ê tiúⁿ-ló kóng, Chêng lín kiám m̄-sī oàn-hūn góa, kóaⁿ góa chhut lāu-pē ê ke mah? taⁿ lín tú-tio̍h hoān-lān, siáⁿ-sū lâi góa chia ah?

8Ki-lia̍t ê長老應Iâ-hut-tha講：阮taⁿ所以歸向你，是ài你kap阮去，kap A-bûn人交戰；你thang做阮ê頭，來管轄Ki-lia̍t一切khiā起ê百姓。Ki-lia̍t ê tiúⁿ-ló ìn Iâ-hut-tha kóng, Goán taⁿ só͘-í kui-ǹg lí, sī ài lí kap goán khì, kap A-bûn lâng kau-chiàn; lí thang chòe goán ê thâu, lâi koán-hat Ki-lia̍t it-chhè khiā-khí ê peh-sìⁿ.

9Iâ-hut-tha對Ki-lia̍t ê長老講：Lín chhōa我tò去，kap A-bûn人交戰，耶和華將in交tī我ê面前，我真正beh做lín ê頭mah？Iâ-hut-tha tùi Ki-lia̍t ê tiúⁿ-ló kóng, Lín chhōa góa tò--khì, kap A-bûn lâng kau-chiàn, Iâ-hô-hoa chiong in kau tī góa ê bīn-chêng, góa chin-chiàⁿ beh chòe lín ê thâu mah?

10Ki-lia̍t ê長老應Iâ-hut-tha講：耶和華tī咱中間做干證，阮的確照你ê話行。Ki-lia̍t ê tiúⁿ-ló ìn Iâ-hut-tha kóng, Iâ-hô-hoa tī lán tiong-kan chòe kan-chèng, goán tek-khak chiàu lí ê ōe kiâⁿ.

11Iâ-hut-tha就kap Ki-lia̍t ê長老tò去；百姓就立伊做頭，做元帥。Iâ-hut-tha tī Bí-su-pa將家己一切ê話排列tī耶和華ê面前。Iâ-hut-tha chiū kap Ki-lia̍t ê tiúⁿ-ló tò--khì; peh-sìⁿ chiū li̍p i chòe-thâu, chòe goân-sòe. Iâ-hut-tha tī Bí-su-pa chiong ka-kī it-chhè ê ōe pâi-lia̍t tī Iâ-hô-hoa ê bīn-chêng.

12Iâ-hut-tha差hiah-ê使者去見A-bûn人ê王講：你kap我甚麼干涉，竟然來我chia攻擊我ê地ah？Iâ-hut-tha chhe hiah ê sù-chiá khì kìⁿ A-bûn lâng ê ông kóng, Lí kap góa sím-mi̍h kan-sia̍p, kéng-jiân lâi góa chia kong-kek góa ê tōe ah?

13A-bûn人ê王應Iâ-hut-tha ê使者講：因為以色列人tùi埃及上來ê時，佔我ê地，tùi A-lùn到Ngá-phok，直到約旦；taⁿ lín tio̍h願願將chiah-ê地還我。A-bûn lâng ê ông ìn Iâ-hut-tha ê sù-chiá kóng, In-ūi Í-sek-lia̍t lâng tùi Ai-ki̍p chiūⁿ-lâi ê sî, chiàm góa ê tōe, tùi A-lùn kàu Ngá-phok, ti̍t-kàu Iok-tàn; taⁿ lín tio̍h goān-goān chiong chiah ê tōe hêng góa.

14Iâ-hut-tha koh 差使者去見A-bûn人ê王，kā伊講，Iâ-hut-tha koh chhe sù-chiá khì kìⁿ A-bûn lâng ê ông, kā i kóng,

15Iâ-hut-tha án-ni講：以色列人並無佔Mô͘-ap地，kap A-bûn人ê地。Iâ-hut-tha án-ni kóng, Í-sek-lia̍t lâng pēng bô chiàm Mô͘-ap tōe, kap A-bûn lâng ê tōe.

16以色列人tùi埃及上來，經過曠野到紅海，來到Ka-te-su；Í-sek-lia̍t lâng tùi Ai-ki̍p chiūⁿ-lâi, keng-kè khòng-iá kàu Âng-hái, lâi kàu Ka-te-su;

17Hit時以色列就差使者去見Í-tong王講：求你准阮經過你ê地；總是Í-tong王m̄聽伊。Koh 差使者去見Mô͘-ap王，伊也m̄准；以色列人就tiàm tī Ka-te-su。hit-sî Í-sek-lia̍t chiū chhe sù-chiá khì kìⁿ Í-tong ông kóng, Kiû lí chún goán keng-kè lí ê tōe; chóng-sī Í-tong ông m̄ thiaⁿ i. Koh chhe sù-chiá khì kìⁿ Mô͘-ap ông, i iā m̄-chún; Í-sek-lia̍t lâng chiū tiàm tī Ka-te-su.

18In koh經過曠野，se̍h Í-tong地kap Mô͘-ap地，tùi Mô͘-ap地ê東勢過來，tī A-lùn hit-pêng紮營；也無入Mô͘-ap ê境內；因為A-lùn河是Mô͘-ap ê交界。In koh keng-kè khòng-iá, se̍h Í-tong tōe kap Mô͘-ap tōe, tùi Mô͘-ap tōe ê tang--sì kè-lâi, tī A-lùn hit-pêng chat-iâⁿ; iā bô ji̍p Mô͘-ap ê kéng-lāi; in-ūi A-lùn hô sī Mô͘-ap ê kau-kài.

19以色列差人去見A-mô͘-lī王Se-hông，就是Hi-si̍t-本ê王，以色列對伊講，求你准阮過你ê地，去阮家己ê所在。Í-sek-lia̍t chhe lâng khì kìⁿ A-mô͘-lī ông Se-hông, chiū-sī Hi-si̍t-pún ê ông, Í-sek-lia̍t tùi i kóng, Kiû lí chún goán kè lí ê tōe, khì goán ka-kī ê só͘-chāi.

20總是Se-hông m̄信以色列，m̄-hō͘ in經過伊ê境界；Se-hông就聚集伊ê眾百姓，tī Ngá-cha̍p紮營，kap以色列人交戰。Chóng-sī Se-hông m̄-sìn Í-sek-lia̍t, m̄-hō͘ in keng-kè i ê kéng-kài; Se-hông chiū chū-chi̍p i ê chèng peh-sìⁿ, tī Ngá-cha̍p chat-iâⁿ, kap Í-sek-lia̍t lâng kau-chiàn.

21耶和華以色列ê上帝，用Se-hông kap伊ê眾百姓交tī以色列人ê手，in就phah in；tùi án-ni，以色列就得tio̍h hit所在khiā起ê A-mô͘-lī人全地。Iâ-hô-hoa Í-sek-lia̍t ê Siōng-tè, ēng Se-hông kap i ê chèng peh-sìⁿ kau tī Í-sek-lia̍t lâng ê chhiú, in chiū phah in; tùi án-ni Í-sek-lia̍t chiū tit-tio̍h hit só͘-chāi khiā-khí ê A-mô͘-lī lâng choân-tōe.

22In得tio̍h A-mô͘-lī人ê全境界，tùi A-lùn到Ngá-phok，tùi曠野到約旦。In tit-tio̍h A-mô͘-lī lâng ê choân kéng-kài, tùi A-lùn kàu Ngá-phok, tùi khòng-iá kàu Iok-tàn.

23耶和華以色列ê上帝tī伊百姓以色列ê面前，趕出A-mô͘-lī人；你也beh得tio̍h in ê地mah？Iâ-hô-hoa Í-sek-lia̍t ê Siōng-tè tī I peh-sìⁿ Í-sek-lia̍t ê bīn-chêng, kóaⁿ-chhut A-mô͘-lī lâng; lí iā beh tit-tio̍h in ê tōe mah?

24你ê上帝Ki-boa̍t所賞賜你得tio̍h-ê，你無得tio̍h伊來做業mah？耶和華阮ê上帝見若tùi阮ê面前所趕出ê，阮beh得tio̍h伊。Lí ê siōng-tè Ki-boa̍t só͘ siúⁿ-sù lí tit-tio̍h-ê, lí bô tit-tio̍h i lâi chòe-gia̍p mah? Iâ-hô-hoa goán ê Siōng-tè kìⁿ-nā tùi goán ê bīn-chêng só͘ kóaⁿ-chhut-ê, goán beh tit-tio̍h i.

25你kiám贏過Mô͘-ap王Se-phoat ê kiáⁿ Pa-le̍k mah？伊kiám bat kap以色列人計較mah？kiám bat kap in交戰mah？Lí kiám iâⁿ-kè Mô͘-ap ông Se-phoat ê kiáⁿ Pa-le̍k mah? i kiám bat kap Í-sek-lia̍t lâng kè-kàu mah? kiám bat kap in kau-chiàn mah?

26以色列人tiàm tī Hi-si̍t-pún kap伊ê鄉社，A-lô-jíⁿ kap伊ê鄉社，kap A-lùn河邊hiah-ê城，已經有三百年，lín tī hit時啥事無取in 倒tńg ah？Í-sek-lia̍t lâng tiàm tī Hi-si̍t-pún kap i ê hiuⁿ-siā, A-lô-jíⁿ kap i ê hiuⁿ-siā, kap A-lùn hô-piⁿ hiah ê siâⁿ, í-keng ū saⁿ-pah nî, lín tī hit-sî siáⁿ-sū bô chhú in tò-tńg ah?

27我無得罪你，你反tńg kap我交戰，實在無理；願審判ê耶和華今á日tī以色列kap A-bûn ê中間來判斷。Góa bô tek-chōe lí, lí hoán-tńg kap góa kau-chiàn, si̍t-chāi bû-lí; goān sím-phòaⁿ ê Iâ-hô-hoa kin-á-ji̍t tī Í-sek-lia̍t kap A-bûn ê tiong-kan lâi phòaⁿ-toàn.

28總是A-bûn人ê王m̄肯聽Iâ-hut-tha差人對伊講ê話。Chóng-sī A-bûn lâng ê ông m̄-khéng thiaⁿ Iâ-hut-tha chhe lâng tùi i kóng ê ōe.

29耶和華ê神臨到Iâ-hut-tha；伊就經過Ki-lia̍t kap Má-ná-se，koh經過到Ki-lia̍t ê Bí-su-pa，koh tùi Ki-lia̍t ê Bí-su-pa經過到A-bûn人hia。Iâ-hô-hoa ê Sîn lîm-kàu Iâ-hut-tha; i chiū keng-kè Ki-lia̍t kap Má-ná-se, koh keng-kè kàu Ki-lia̍t ê Bí-su-pa, koh tùi Ki-lia̍t ê Bí-su-pa keng-kè kàu A-bûn lâng hia.

30Iâ-hut-tha就對耶和華下願，講：你若將A-bûn人交tī我ê手，Iâ-hut-tha chiū tùi Iâ-hô-hoa hē-goān, kóng, Lí nā chiong A-bûn lâng kau tī góa ê chhiú,

31我tùi A-bûn人hia平安tò來ê時，見若tùi我ê厝ê門出來迎接我ê，beh歸tī耶和華，我beh獻伊做燒祭。góa tùi A-bûn lâng hia pêng-an tò-lâi ê sî, kìⁿ-nā tùi góa ê chhù ê mn̂g chhut-lâi ngiâ-chih góa-ê, beh kui tī Iâ-hô-hoa, góa beh hiàn i chòe sio-chè.

32Tùi án-ni， Iâ-hut-tha去A-bûn人hia，kap in交戰；耶和華將in交tī伊ê手；Tùi án-ni Iâ-hut-tha khì A-bûn lâng hia, kap in kau-chiàn; Iâ-hô-hoa chiong in kau tī i ê chhiú;

33伊就phah in，大大thâi死in，tùi A-lô-jíⁿ到Bí-le̍k，直到A-pī-le̍k-ki-la̍h-bêng，共二十個城；án-ni A-bûn人就屈服tī以色列人。i chiū phah in, tōa-tōa thâi-sí in, tùi A-lô-jíⁿ kàu Bí-le̍k, ti̍t-kàu A-pī-le̍k-ki-la̍h-bêng, kiōng jī-cha̍p ê siâⁿ; án-ni A-bûn lâng chiū khut-ho̍k tī Í-sek-lia̍t lâng.

34Iâ-hut-tha tò來Bí-su-pa到家己ê厝，hit時伊ê cha-bó͘-kiáⁿ kia̍h lin-long鼓跳舞出來迎接伊；chit-ê是伊獨生ê，以外無kiáⁿ，無cha-bó͘-kiáⁿ。Iâ-hut-tha tò-lâi Bí-su-pa kàu ka-kī ê chhù, hit-sî i ê cha-bó͘-kiáⁿ kia̍h lin-long-kó͘ thiàu-bú chhut-lâi ngiâ-chih i; chit-ê sī i to̍k-siⁿ ê, í-gōa bô kiáⁿ, bô cha-bó͘-kiáⁿ.

35Iâ-hut-tha看見伊，就拆裂衫講：Ai-ah，我ê cha-bó͘-kiáⁿ，你hō͘我真慘，你也是hō͘我真大艱難；因為我已經對耶和華開嘴，bōe會收倒tńg。Iâ-hut-tha khòaⁿ-kìⁿ i, chiū thiah-li̍h saⁿ kóng, Ai--ah, góa ê cha-bó͘-kiáⁿ, lí hō͘ góa chin-chhám, lí iā sī hō͘ góa chin tōa kan-lân; in-ūi góa í-keng tùi Iâ-hô-hoa khui-chhùi, bōe-ōe siu tò-tńg.

36伊應講，我ê父ah，你已經對耶和華開嘴，就tio̍h照你ê嘴所講出ê行tī我；因為耶和華已經為tio̍h你報仇你ê對敵A-bûn人。I ìn kóng, Góa ê pē ah, lí í-keng tùi Iâ-hô-hoa khui-chhùi, chiū tio̍h chiàu lí ê chhùi só͘ kóng-chhut-ê kiâⁿ tī góa; in-ūi Iâ-hô-hoa í-keng ūi-tio̍h lí pò-siû lí ê tùi-te̍k A-bûn lâng.

37Koh對伊ê老父講：有chit件事求你允准，容允我兩月日，hō͘我kap我ê同伴去山裡，thang啼哭我做在室女。Koh tùi i ê lāu-pē kóng, Ū chit kiāⁿ sū kiû lí ún-chún, iông-ún góa nn̄g-ge̍h-ji̍t, hō͘ góa kap góa ê tâng-phòaⁿ khì soaⁿ--nih, thang thî-khàu góa chòe chāi-sek-lú.

38伊講：你去ah。就差伊去兩月日；伊kap同伴去，tī山裡為tio̍h伊做在室女啼哭；I kóng, Lí khì ah. Chiū chhe i khì nn̄g-ge̍h-ji̍t; i kap tâng-phōaⁿ khì, tī soaⁿ--nih ūi-tio̍h i chòe chāi-sek-lú thî-khàu;

39兩月日已經滿，伊tò來到老父hia，老父就照伊所下ê願款待伊；伊lóng無親近ta-po͘人。nn̄g-ge̍h-ji̍t í-keng móa, i tò-lâi kàu lāu-pē hia, lāu-pē chiū chiàu i só͘ hē ê goān khoán-thāi i; i lóng bô chhin-kūn ta-po͘-lâng.

40後來以色列中有chit-ê例，ta̍k年以色列chiah-ê cha-bó͘-gín-ná去追悼Ki-lia̍t人Iâ-hut-tha ê cha-bó͘-kiáⁿ，每年四日。Āu-lâi Í-sek-lia̍t tiong ū chit ê lē, ta̍k-nî Í-sek-lia̍t chiah ê cha-bó͘-gín-ná khì tui-tō Ki-lia̍t lâng Iâ-hut-tha ê cha-bó͘-kiáⁿ, múi-nî sì ji̍t.

1Í-hoat-liân人聚集到北方，tùi Iâ-hut-tha講：你過去kap A-bûn人交戰，啥事無叫阮kap你去ah？阮beh用火燒你kap你ê厝。Í-hoat-liân lâng chū-chi̍p kàu pak-hng, tùi Iâ-hut-tha kóng, Lí kè-khì kap A-bûn lâng kau-chiàn, siáⁿ-sū bô kiò goán kap lí khì ah? goán beh ēng hé sio lí kap lí ê chhù.

2Iâ-hut-tha對in講，我kap我ê百姓kap A-bûn人大計較；我招lín來，lín竟然無救我脫離in ê手；Iâ-hut-tha tùi in kóng, Góa kap góa ê peh-sìⁿ kap A-bûn lâng tōa kè-kàu; góa chio lín lâi, lín kéng-jiân bô kiù góa thoat-lī in ê chhiú;

3我看見lín無來救我，我就拚命進前去攻擊A-bûn人；耶和華將in交tī我ê手，lín今á日啥事來我chia，beh kap我交戰ah？góa khòaⁿ-kìⁿ lín bô lâi kiù góa, góa chiū piàⁿ-miā chìn-chêng khì kong-kek A-bûn lâng; Iâ-hô-hoa chiong in kau tī góa ê chhiú, lín kin-á-ji̍t siáⁿ-sū lâi góa chia, beh kap góa kau-chiàn ah?

4Iâ-hut-tha就聚集Ki-lia̍t ê眾人，kap Í-hoat-liân人交戰；Ki-lia̍t人phah死Í-hoat-liân人，因為in講：Lín Ki-lia̍t人tī Í-hoat-liân、Má-ná-se ê中間，是Í-hoat-liân逃走ê人。Iâ-hut-tha chiū chū-chi̍p Ki-lia̍t ê chèng-lâng, kap Í-hoat-liân lâng kau-chiàn; Ki-lia̍t lâng phah-sí Í-hoat-liân lâng, in-ūi in kóng, Lín Ki-lia̍t lâng tī Í-hoat-liân Má-ná-se ê tiong-kan, sī Í-hoat-liân tô-cháu ê lâng.

5Ki-lia̍t人tī Í-hoat-liân人ê頭前把守約旦ê渡口；Í-hoat-liân逃走ê若講，請hō͘阮過去，Ki-lia̍t人就問伊講：你是Í-hoat-liân人á m̄是？Ki-lia̍t lâng tī Í-hoat-liân lâng ê thâu-chêng pé-siú Iok-tàn ê tō͘-kháu; Í-hoat-liân tô-cháu-ê nā kóng, Chhiáⁿ hō͘ goán kè-khì, Ki-lia̍t lâng chiū mn̄g i kóng, Lí sī Í-hoat-liân lâng á m̄-sī?

6伊若講，m̄是，就kā伊講，你講Sī-pò͘-lia̍t；伊講做Se-pò͘-lia̍t，因為in ê音講bōe正；in就掠伊，thâi tī約旦ê渡口；hit時Í-hoat-liân人受thâi-ê，四萬兩千人。I nā kóng, M̄-sī, chiū kā i kóng, Lí kóng Sī-pò͘-lia̍t; i kóng chòe Se-pò͘-lia̍t, in-ūi in ê im kóng bōe chiàⁿ; in chiū lia̍h i, thâi tī Iok-tàn ê tō͘-kháu; hit-sî Í-hoat-liân lâng siū-thâi-ê, sì-bān nn̄g-chheng lâng.

7Iâ-hut-tha做以色列ê士師六年。Ki-lia̍t人Iâ-hut-tha死，埋葬tī Ki-lia̍t ê一個城。Iâ-hut-tha chòe Í-sek-lia̍t ê sū-su la̍k-nî. Ki-lia̍t lâng Iâ-hut-tha sí, bâi-chòng tī Ki-lia̍t ê chi̍t ê siâⁿ.

8Iâ-hut-tha了後，有伯利恆人Í-pí-chàn做以色列ê士師；Iâ-hut-tha liáu-āu, ū Pek-lī-hêng lâng Í-pí-chàn chòe Í-sek-lia̍t ê sū-su;

9伊有三十個kiáⁿ，koh三十個cha-bó͘-kiáⁿ嫁tī外口，也tùi外口kā伊ê kiáⁿ chhōa三十個新婦；伊做以色列ê士師七年。i ū saⁿ-cha̍p ê kiáⁿ, koh saⁿ-cha̍p ê cha-bó͘-kiáⁿ kè tī gōa-kháu, iā tùi gōa-kháu kā i ê kiáⁿ chhōa saⁿ-cha̍p ê sim-pū; i chòe Í-sek-lia̍t ê sū-su chhit-nî.

10Í-pí-chàn死，埋葬tī伯利恆。Í-pí-chàn sí, bâi-chòng tī Pek-lī-hêng.

11伊了後，有Se-pò͘-lûn人Í-lûn做以色列ê士師；伊做以色列ê士師十年。I liáu-āu, ū Se-pò͘-lûn lâng Í-lûn chòe Í-sek-lia̍t ê sū-su; i chòe Í-sek-lia̍t ê sū-su cha̍p-nî.

12Se-pò͘-lûn人Í-lûn死，埋葬tī Se-pò͘-lûn地ê A-ngá-lūn。Se-pò͘-lûn lâng Í-lûn sí, bâi-chòng tī Se-pò͘-lûn tōe ê A-ngá-lūn.

13伊了後，有Pí-la̍h-tûn人，Hi-lia̍t ê kiáⁿ Ap-tùn，做以色列ê士師；I liáu-āu, ū Pí-la̍h-tûn lâng, Hi-lia̍t ê kiáⁿ Ap-tùn, chòe Í-sek-lia̍t ê sū-su;

14伊有四十個kiáⁿ，三十個孫，騎七十隻驢á；伊做以色列ê士師八年。i ū sì-cha̍p ê kiáⁿ, saⁿ-cha̍p ê sun, khiâ chhit-cha̍p chiah lû-á; i chòe Í-sek-lia̍t ê sū-su poeh-nî.

15Pí-la̍h-tùn人Hi-lia̍t ê kiáⁿ Ap-tùn死，埋葬tī Í-hoat-liân地ê Pí-la̍h-tùn，ti7A-má-le̍k人ê山地。Pí-la̍h-tùn lâng Hi-lia̍t ê kiáⁿ Ap-tùn sí, bâi-chòng tī Í-hoat-liân tōe ê Pí-la̍h-tùn, tī A-má-le̍k lâng ê soaⁿ-tōe.

1以色列人koh行耶和華所看做pháiⁿ ê事；耶和華將in交tī腓利士人ê手四十年。Í-sek-lia̍t lâng koh kiâⁿ Iâ-hô-hoa só͘ khòaⁿ-chòe pháiⁿ ê sū; Iâ-hô-hoa chiong in kau tī Hui-lī-sū lâng ê chhiú sì-cha̍p nî.

2Hit時有一個Só-la̍h人，是Tàn ê族，名叫Má-lô-à；伊ê bó͘無懷孕，無生。Hit-sî ū chi̍t ê Só-la̍h lâng, sī Tàn ê cho̍k, miâ-kiò Má-lô-à; i ê bó͘ bô hoâi-īn, bô siⁿ.

3耶和華ê使者對hit-ê婦人人顯現，kā伊講，你平素無懷孕無生，taⁿ你beh懷孕生一個kiáⁿ。Iâ-hô-hoa ê sù-chiá tùi hit ê hū-jîn-lâng hián-hiān, kā i kóng, Lí pêng-sò͘ bô hoâi-īn bô siⁿ, taⁿ lí beh hoâi-īn siⁿ chi̍t ê kiáⁿ.

4所以你tio̍h細膩，薄酒厚酒lóng m̄-thang lim，無清氣ê物也lóng m̄-thang食。Só͘-í lí tio̍h sòe-jī, po̍h-chiú kāu-chiú lóng m̄-thang lim, bô chheng-khì ê mi̍h iā lóng m̄-thang chia̍h.

5因為你懷孕beh 生一個kiáⁿ；剃頭毛ê刀m̄-thang到伊ê頭殼；因為chit-ê gín-ná tùi胎裡就歸上帝做Ná-sè-jíⁿ人；因為伊beh做救以色列ê頭一站，脫離腓利士人ê手。In-ūi lí hoâi-īn beh siⁿ chi̍t ê kiáⁿ; thì thâu-mn̂g ê to m̄-thang kàu i ê thâu-khak; in-ūi chit ê gín-ná tùi thai--nih chiū kui Siōng-tè chòe Ná-sè-jíⁿ lâng; in-ūi i beh chòe kiù Í-sek-lia̍t ê thâu-chi̍t-chām, thoat-lī Hui-lī-sū lâng ê chhiú.

6婦人人來kā伊ê丈夫講：有一個上帝ê人到我chia，伊ê容貌親像上帝使者ê容貌，真thang驚；我無問伊tùi toh落來，伊也無用伊ê名kā我講；Hū-jîn-lâng lâi kā i ê tiōng-hu kóng, Ū chi̍t ê Siōng-tè ê lâng kàu góa chia, i ê iông-māu chhin-chhiūⁿ Siōng-tè sù-chiá ê iông-māu, chin thang kiaⁿ; góa bô mn̄g i tùi toh-lo̍h lâi, i iā bô ēng i ê miâ kā góa kóng;

7總是kā我講：你懷孕beh 生一個kiáⁿ，所以薄酒厚酒lóng m̄-thang lim，無清氣ê物也lóng m̄-thang食；因為chit-ê gín-ná tùi胎裡到伊死ê日beh歸上帝做Ná-sè-jíⁿ ê人。chóng-sī kā góa kóng, Lí hoâi-īn beh siⁿ chi̍t ê kiáⁿ, só͘-í po̍h-chiú kāu-chiú lóng m̄-thang lim, bô chheng-khì ê mi̍h iā lóng m̄-thang chia̍h; in-ūi chit ê gín-ná tùi thai--nih kàu i sí ê ji̍t beh kui Siōng-tè chòe Ná-sè-jíⁿ ê lâng.

8Má-lô-à就求耶和華講：主ah，求你hō͘你所差上帝ê人koh來阮chia，thang教示阮怎樣款待chit-ê beh生ê kiáⁿ。Má-lô-à chiū kiû Iâ-hô-hoa kóng, Chú ah, kiû Lí hō͘ Lí só͘ chhe Siōng-tè ê lâng koh lâi goán chia, thang kà-sī goán cháiⁿ-iūⁿ khoán-thāi chit ê beh siⁿ ê kiáⁿ.

9上帝聽Má-lô-à ê話；婦人人坐tī田裡ê時，上帝ê使者koh到伊hia；總是伊ê丈夫Má-lô-à無kap伊tī-teh。Siōng-tè thiaⁿ Má-lô-à ê ōe; hū-jîn-lâng chē tī chhân--nih ê sî Siōng-tè ê sù-chiá koh kàu i hia; chóng-sī i ê tiōng-hu Má-lô-à bô kap i tī-teh.

10婦人人趕緊走去，報伊ê丈夫，kā伊講，hit日來我chia hit-ê人koh對我出現。Hu-jîn-lâng kóaⁿ-kín cháu-khì, pò i ê tiōng-hu, kā i kóng, Hit-ji̍t lâi góa chia hit ê lâng koh tùi góa chhut-hiān.

11Má-lô-à起來tè伊ê bó͘到hit人hia，kā伊講，Bat kap chit-ê婦人人講話ê，是你mah？伊講：是我。Má-lô-à khí-lâi tè i ê bó͘ kàu hit-lâng hia, kā i kóng, Bat kap chit ê hū-jîn-lâng kóng-ōe ê, sī lí mah? I kóng, Sī góa.

12Má-lô-à講：願你ê話應驗；chit-ê gín-ná tio̍h照甚麼法，阮tio̍h對伊怎樣行？Má-lô-à kóng, Goān lí ê ōe èng-giām; chit ê gín-ná tio̍h chiàu sím-mi̍h hoat, goán tio̍h tùi i cháiⁿ-iūⁿ kiâⁿ?

13耶和華ê使者對Má-lô-à講：我kā婦人人所講一切ê事，伊lóng tio̍h chim-chiok；Iâ-hô-hoa ê sù-chiá tùi Má-lô-à kóng, Góa kā hū-jîn-lâng só͘ kóng it-chhè ê sū, i lóng tio̍h chim-chiok;

14見若葡萄所出ê，伊m̄-thang食，薄酒厚酒lóng m̄-thang lim，一切無清氣ê物也m̄-thang食；見我所命令ê，伊lóng tio̍h遵守。kìⁿ-nā phû-tô só͘ chhut ê, i m̄-thang chia̍h, po̍h-chiú kāu-chiú lóng m̄-thang lim, it-chhè bô chheng-khì ê mi̍h iā m̄-thang chia̍h; kìⁿ góa só͘ bēng-lēng ê, i lóng tio̍h chun-siú.

15Má-lô-à對耶和華ê使者講：請你hō͘我留teh，阮thang kā你備辦一隻山羊á。Má-lô-à tùi Iâ-hô-hoa ê sù-chiá kóng, Chhiáⁿ lí hō͘ góa lâu--teh, goán thang kā lí pī-pān chi̍t chiah soaⁿ-iûⁿ-á.

16耶和華ê使者kā Má-lô-à講：你雖然留我，我m̄食你ê物；你若備辦燒祭，就tio̍h獻hō͘耶和華。因為Má-lô-à m̄知伊是耶和華ê使者。Iâ-hô-hoa ê sù-chiá kā Má-lô-à kóng, Lí sui-jiân lâu góa, góa m̄-chia̍h lí ê mi̍h; lí nā pī-pān sio-chè, chiū tio̍h hiàn hō͘ Iâ-hô-hoa. In-ūi Má-lô-à m̄-chai i sī Iâ-hô-hoa ê sù-chiá.

17Má-lô-à kā耶和華ê使者講：你名叫甚麼，到你ê話應驗ê時，阮thang尊敬你？Má-lô-à kā Iâ-hô-hoa ê sù-chiá kóng, Lí miâ kiò sím-mi̍h, kàu lí ê ōe èng-giām ê sî, goán thang chun-kèng lí?

18耶和華ê使者kā伊講，你啥事問我ê名？我ê名是奇妙ê，Iâ-hô-hoa ê sù-chiá kā i kóng, Lí siáⁿ-sū mn̄g góa ê miâ? góa ê miâ sī kî-biāu--ê,

19Má-lô-à將一隻山羊á kap素祭，tī石磐頂來獻hō͘耶和華；使者行奇怪ê事，Má-lô-à kap伊ê bó͘看見。Má-lô-à chiong chi̍t chiah soaⁿ-iûⁿ-á kap sò͘-chè, tī chio̍h-pôaⁿ-téng lâi hiàn hō͘ Iâ-hô-hoa; sù-chiá kiâⁿ kî-koài ê sū, Má-lô-à kap i ê bó͘ khòaⁿ-kìⁿ.

20因為火燄tùi壇頂chhèng上天ê時，耶和華ê使者tī壇頂ê火燄中也上去。Má-lô-à kap伊ê bó͘看見，就仆tī地裡。In-ūi hé-iām tùi tôaⁿ-téng chhèng-chiūⁿ thiⁿ ê sî, Iâ-hô-hoa ê sù-chiá tī tôaⁿ-téng ê hé-iām-tiong iā chiūⁿ-khì. Má-lô-à kap i ê bó͘ khòaⁿ-kìⁿ, chiū phak tī tōe--nih.

21耶和華ê使者無koh出現hō͘ Má-lô-à kap伊ê bó͘看見，Má-lô-à chiah知伊是耶和華ê使者。Iâ-hô-hoa ê sù-chiá bô koh chhut-hiān hō͘ Má-lô-à kap i ê bó͘ khòaⁿ-kìⁿ, Má-lô-à chiah chai i sī Iâ-hô-hoa ê sù-chiá.

22Má-lô-à kā伊ê bó͘講：咱的確會死，因為咱有看見上帝。Má-lô-à kā i ê bó͘ kóng, Lán tek-khak ōe sí, in-ūi lán ū khòaⁿ-kìⁿ Siōng-tè.

23伊ê bó͘就kā伊講，耶和華若beh hō͘咱死，的確無tùi咱ê手接納燒祭kap素祭，koh無將chiah-ê一切ê事指示咱，chit-tia̍p也無將這事kā咱講。I ê bó͘ chiū kā i kóng, Iâ-hô-hoa nā beh hō͘ lán sí, tek-khak bô tùi lán ê chhiú chiap-la̍p sio-chè kap sò͘-chè, koh bô chiong chiah ê it-chhè ê sū chí-sī lán, chit-tia̍p iā bô chiong che sū kā lán kóng.

24後來婦人人生一個kiáⁿ，kā伊號名叫參孫；gín-ná大漢，耶和華賜福伊。Āu-lâi hū-jîn-lâng siⁿ chi̍t ê kiáⁿ, kā i hō-miâ kiò Chham-sun; gín-ná tōa-hàn, Iâ-hô-hoa sù-hok i.

25Tī Má-hap-nî-tàn，就是Só-la̍h kap Í-si̍t-tô ê中間，耶和華ê神起頭感動伊。Tī Má-hap-nî-tàn, chiū-sī Só-la̍h kap Í-si̍t-tô ê tiong-kan, Iâ-hô-hoa ê Sîn khí-thâu kám-tōng i.