1參孫落去Têng-ná，tī Têng-ná看見一個cha-bó͘-gín-ná，就是腓利士人ê cha-bó͘-kiáⁿ。Chham-sun lo̍h-khì Têng-ná, tī Têng-ná khòaⁿ-kìⁿ chi̍t ê cha-bó͘-gín-ná, chiū-sī Hui-lī-sū lâng ê cha-bó͘-kiáⁿ.

2參孫上去kā伊老父老母講：我tī Têng-ná看見一個cha-bó͘-gín-ná，是腓利士人ê cha-bó͘-kiáⁿ；願lín kā我娶伊來做bó͘。Chham-sun chiūⁿ-khì kā i lāu-pē lāu-bú kóng, Góa tī Têng-ná khòaⁿ-kìⁿ chi̍t ê cha-bó͘-gín-ná, sī Hui-lī-sū lâng ê cha-bó͘-kiáⁿ; goān lín kā góa chhōa i lâi chòe-bó͘.

3伊ê老父伊ê老母kā伊講，Tī你兄弟中ê cha-bó͘-gín-ná，á是tī咱百姓中，kiám無一個cha-bó͘-gín-ná，致到你去tī無受割禮ê腓利士人中娶bó͘ ah？參孫kā伊ê老父講：願你kā我娶伊；因為伊是我合意ê。I ê lāu-pē i ê lāu-bú kā i kóng, Tī lí hiaⁿ-tī tiong ê cha-bó͘-gín-ná, á-sī tī lán peh-sìⁿ tiong, kiám bô chi̍t ê cha-bó͘-gín-ná, tì-kàu lí khì tī bô siū kat-lé ê Hui-lī-sū lâng tiong chhōa-bó͘ ah? Chham-sun kā i ê lāu-pē kóng, Goān lí kā góa chhōa i; in-ūi i sī góa kah-ì ê.

4總是伊ê老父伊ê老母m̄知chit-ê事是出tī耶和華；因為伊chhē機會攻擊腓利士，hit時腓利士人管轄以色列。Chóng-sī i ê lāu-pē i ê lāu-bú m̄-chai chit ê sū sī chhut tī Iâ-hô-hoa; in-ūi I chhē ki-hōe kong-kek Hui-lī-sū. Hit-sî Hui-lī-sū lâng koán-hat Í-sek-lia̍t.

5參孫kap伊ê父母落去Têng-ná，到Têng-ná ê葡萄園；tú-tn̄g有一隻獅á-thûn哮來óa伊。Chham-sun kap i ê pē-bú lo̍h-khì Têng-ná, kàu Têng-ná ê phû-tô-hn̂g; tú-tn̄g ū chi̍t chiah sai-á-thûn háu lâi óa i.

6耶和華ê神大大臨到參孫，伊ê手無ke-si，也拆裂伊，親像拆裂山羊á一樣；伊也無kā伊ê父母講伊所行ê事。Iâ-hô-hoa ê Sîn tōa-tōa lîm-kàu Chham-sun, i ê chhiú bô ke-si, iā thiah-li̍h i, chhin-chhiūⁿ thiah-li̍h soaⁿ-iûⁿ-á chi̍t-iūⁿ; i iā bô kā i ê pē-bú kóng i só͘ kiâⁿ ê sū.

7伊落去kap cha-bó͘-gín-ná講話；伊是參孫所合意ê。I lo̍h-khì kap cha-bó͘-gín-ná kóng ōe; i sī Chham-sun só͘ kah-ì ê.

8Koh有hiah久，倒tńg beh來娶伊，oat tùi路邊beh看死ê獅，看見有一siū蜂kap蜜tī獅ê身屍內；Koh ū hiah-kú, tò-tńg beh lâi chhōa i, oat tùi lō͘-piⁿ beh khòaⁿ sí ê sai, khòaⁿ-kìⁿ ū chi̍t siū phang kap bi̍t tī sai ê sin-si-lāi;

9手the̍h蜜去行，ná行ná食；到伊ê父母hia，就hō͘ in，in也食；總是無kā伊講chit-ê蜜是tùi獅ê身屍the̍h來ê。chhiú the̍h bi̍t khì kiâⁿ, ná-kiâⁿ ná-chia̍h; kàu i ê pē-bú hia, chiū hō͘ in, in iā chia̍h; chóng-sī bô kā i kóng chit ê bi̍t sī tùi sai ê sin-si the̍h-lâi-ê.

10伊ê老父落去到cha-bó͘-gín-ná hia；參孫tī-hia設筵席；因為平素少年人lóng有chit號ê風俗。I ê lāu-pē lo̍h-khì kàu cha-bó͘-gín-ná hia; Chham-sun tī-hia siat iân-sia̍h; in-ūi pêng-sò͘ siàu-liân lâng lóng ū chit hō ê hong-sio̍k.

11In看見參孫，就chhōa三十個伴來陪伊。In khòaⁿ-kìⁿ Chham-sun, chiū chhōa saⁿ-cha̍p ê phōaⁿ lâi pôe i.

12參孫kā in講：我taⁿ beh出一個猜hō͘ lín；lín tī筵席ê七日內若會猜出意思來kā我講：我就beh hō͘ lín三十領ê幼苧衫，三十套ê外衫；Chham-sun kā in kóng, Góa taⁿ beh chhut chi̍t ê chhai hō͘ lín; lín tī iân-sia̍h ê chhit-ji̍t-lāi nā ōe chhai-chhut ì-sù lâi kā góa kóng, góa chiū beh hō͘ lín saⁿ-cha̍p niá ê iù-tōe saⁿ, saⁿ-cha̍p thò ê gōa-saⁿ;

13lín若bōe能kā我講：lín就tio̍h hō͘我三十領ê幼苧衫，三十套ê外衫。In講：請出你ê猜hō͘阮聽。lín nā bōe-ōe kā góa kóng, lín chiū tio̍h hō͘ góa saⁿ-cha̍p niá ê iù-tōe saⁿ, saⁿ-cha̍p thò ê gōa-saⁿ. In kóng, Chhiáⁿ chhut lí ê chhai hō͘ goán thiaⁿ.

14伊就kā in講： Tùi食ê出食物； Tùi強ê出甜。In三日久猜bōe出。I chiū kā in kóng, Tùi chia̍h-ê chhut chia̍h-mi̍h; Tùi kiông-ê chhut tiⁿ. In saⁿ-ji̍t kú chhai bōe chhut.

15到第七日，in kā參孫ê bó͘講：你tio̍h làu你ê丈夫，hō͘伊用猜ê意思kā阮講：免得阮用火燒你kap你ê老父ê厝；lín請阮來，是beh搶阮á-m̄是？Kàu tē-chhit ji̍t, in kā Chham-sun ê bó͘ kóng, Lí tio̍h làu lí ê tiōng-hu, hō͘ i ēng chhai ê ì-sù kā goán kóng, bián-tit goán ēng hé sio lí kap lí ê lāu-pē ê chhù; lín chhiáⁿ goán lâi, sī beh chhiúⁿ goán á-m̄-sī?

16參孫ê bó͘啼哭tī伊ê面前講：你是怨恨我，m̄是疼我；因為你出猜hō͘我本國ê人，也無kā我講明。伊應伊講：連我ê老父老母都無kā伊講，kiám thang kā你講mah？Chham-sun ê bó͘ thî-khàu tī i ê bīn-chêng kóng, Lí sī oàn-hūn góa, m̄-sī thiàⁿ góa; in-ūi lí chhut-chhai hō͘ góa pún-kok ê lâng, iā bô kā góa kóng-bêng. I ìn i kóng, Liân góa ê lāu-pē lāu-bú to͘ bô kā i kóng, kiám thang kā lí kóng mah?

17Tī筵席ê七日內，伊啼哭tī伊ê丈夫ê面前；到第七日就kā伊講；因為伊逼伊真thiám；伊ê bó͘就kā伊本國ê人講。Tī iân-sia̍h ê chhit-ji̍t-lāi, i thî-khàu tī i ê tiōng-hu ê bīn-chêng; kàu tē-chhit ji̍t chiū kā i kóng; in-ūi i pek i chin-thiám; i ê bó͘ chiū kā i pún-kok ê lâng kóng.

18到第七日，日iáu未落ê事先，城內ê百姓kā參孫講：有甚麼比蜜khah甜ah？有甚麼比獅khah強ah？參孫kā in講： Lín若m̄是用我ê牛種á犁田， 我ê猜就猜bōe出。Kàu tē-chhit ji̍t, ji̍t iáu-bē lo̍h ê tāi-seng, siâⁿ-lāi ê peh-sìⁿ kā Chham-sun kóng, Ū sím-mi̍h pí bi̍t khah-tiⁿ ah? ū sím-mi̍h pí sai khah-kiông ah? Chham-sun kā in kóng, Lín nā m̄-sī ēng góa ê gû-chéng-á lôe-chhân, Góa ê chhai chiū chhai-bōe-chhut.

19耶和華ê神大大臨到參孫，伊就落去到A-si̍t-ki-lûn，thâi死in中間三十人，搶in，將hiah-ê衫hō͘猜tio̍h ê人。參孫大受氣，就上去in老父ê家。Iâ-hô-hoa ê Sîn tōa-tōa lîm-kàu Chham-sun, i chiū lo̍h-khì kàu A-si̍t-ki-lûn, thâi-sí in tiong-kan saⁿ-cha̍p lâng, chhiúⁿ in, chiong hiah ê saⁿ hō͘ chhai-tio̍h ê lâng. Chham-sun tōa siū-khì, chiū chiūⁿ-khì in lāu-pē ê ke.

20參孫ê bó͘就嫁hō͘伊ê陪伴，就是參孫用做伊ê朋友ê。Chham-sun ê bó͘ chiū kè hō͘ i ê pôe-phōaⁿ, chiū-sī Chham-sun ēng chòe i ê pêng-iú ê.

1Koh有hiah久，到割麥ê時，參孫帶一隻山羊á去chhē伊ê bó͘，講：我beh入房chhē我ê bó͘；伊ê丈人m̄准伊入。Koh ū hiah-kú, kàu koah-be̍h ê sî, Chham-sun tòa chi̍t chiah soaⁿ-iûⁿ-á khì chhē i ê bó͘, kóng, Góa beh ji̍p pâng chhē góa ê bó͘; i ê tiūⁿ-lâng m̄-chún i ji̍p.

2丈人講：我按算你實在怨恨伊，因為án-ni我將伊hō͘你ê陪伴；伊ê小妹kiám-m̄是比伊 khah-súi mah？請你娶來替伊。Tiūⁿ-lâng kóng, Góa àn-sǹg lí si̍t-chāi oàn-hūn i, in-ūi án-ni góa chiong i hō͘ lí ê pôe-phōaⁿ; i ê sió-bē kiám-m̄-sī pí i khah-súi mah? Chhiáⁿ lí chhōa lâi thòe i.

3參孫kā in講：Chit-pái我傷害腓利士人，in無thang責罪我。Chham-sun kā in kóng, Chit-pái góa siong-hāi Hui-lī-sū lâng, in bô thang chek-chōe góa.

4參孫就去掠三百隻狐狸，koh帶火把，將狐狸尾兩隻兩隻縛相liâm，將火把縛tī兩支尾ê中間；Chham-sun chiū khì lia̍h saⁿ-pah chiah hô͘-lî, koh tòa hé-pé, chiong hô͘-lî bé nn̄g-chiah nn̄g-chiah pa̍k saⁿ-liâm, chiong hé-pé pa̍k tī nn̄g-ki bé ê tiong-kan;

5火把點to̍h就放狐狸入腓利士人iáu未收割ê五穀，燒伊kui綑ê，kap伊未割ê五穀，以及橄欖園，lóng燒去。hé-pé tiám-to̍h chiū pàng hô͘-lî ji̍p Hui-lī-sū lâng iáu-bē siu-koah ê gō͘-kak, sio i kui-khún--ê, kap i bē-koah ê gō͘-kak, í-ki̍p kaⁿ-ná-hn̂g, lóng sio-khì.

6腓利士人講：chit-ê事是誰做ê ah？In講：是Têng-ná人ê kiáⁿ婿參孫；因為伊ê丈人將伊ê bó͘ hō͘伊ê陪伴，腓利士人就上去，用火燒婦人人kap伊ê老父。Hui-lī-sū lâng kóng, Chit ê sū chī-chūi chòe ê ah? In kóng, Sī Têng-ná lâng ê kiáⁿ-sài Chham-sun; in-ūi i ê tiūⁿ-lâng chiong i ê bó͘ hō͘ i ê pôe-phōaⁿ, Hui-lī-sū lâng chiū chiūⁿ-khì, ēng hé sio hū-jîn-lâng kap i ê lāu-pē.

7參孫對腓利士人講：Lín既然行án-ni，我beh對lín報仇，chiah beh soah。Chham-sun tùi Hui-lī-sū lâng kóng, Lín kì-jiân kiâⁿ án-ni, góa beh tùi lín pò-siû, chiah beh soah.

8參孫就大大phah死in，身屍相疊(tha̍h)；就落去tiàm tī Í-thán ê石頭孔。Chham-sun chiū tōa-tōa phah-sí in, sin-si saⁿ-tha̍h; chiū lo̍h-khì tiàm tī Í-thán ê chio̍h-thâu-khang.

9腓利士人上去紮營tī猶大，分散tī Lī-hi。Hui-lī-sū lâng chiūⁿ-khì chat-iâⁿ tī Iû-tāi, hun-sòaⁿ tī Lī-hi.

10猶大人講：Lín啥事上來攻擊阮ah？In講：阮上來是beh綑縛參孫；伊款待阮怎樣，阮也beh án-ni款待伊。Iû-tāi lâng kóng, Lín siáⁿ-sū chiūⁿ-lâi kong-kek goán ah? In kóng, Goán chiūⁿ-lâi sī beh khún-pa̍k Chham-sun; i khoán-thāi goán cháiⁿ-iūⁿ, goán iā beh án-ni khoán-thāi i.

11Tùi án-ni，猶大三千人到Í-thán ê石頭孔，對參孫講：腓利士人管轄咱，你m̄知mah？你啥事做chit-ê事hō͘阮ah？應講，In怎樣款待我，我也án-ni款待in。Tùi án-ni Iû-tāi saⁿ-chheng lâng kàu Í-thán ê chio̍h-thâu-khang, tùi Chham-sun kóng, Hui-lī-sū lâng koán-hat lán, lí m̄-chai mah? lí siáⁿ-sū chòe chit ê sū hō͘ goán ah? Ìn kóng, In cháiⁿ-iūⁿ khoán-thāi góa, góa iā án-ni khoán-thāi in.

12猶大人kā伊講，阮落來是beh綑縛你，將你交tī腓利士人ê手。參孫kā in講：Lín tio̍h對我chiù-chōa，lín本身無beh害我。Iû-tāi lâng kā i kóng, Goán lo̍h-lâi sī beh khún-pa̍k lí, chiong lí kau tī Hui-lī-sū lâng ê chhiú. Chham-sun kā in kóng, Lín tio̍h tùi góa chiù-chōa, lín pún-sin bô beh hāi góa.

13In對伊講，無，只有beh綑縛你交tī in ê手，阮的確無害死你。就用兩條新ê索綑縛伊，tùi石磐帶伊上去。In tùi i kóng, Bô, chí-ū beh khún-pa̍k lí kau tī in ê chhiú, goán tek-khak bô hāi-sí lí. Chiū ēng nn̄g tiâu sin ê soh khún-pa̍k i, tùi chio̍h-pôaⁿ tòa i chiūⁿ-khì.

14參孫到Lī-hi，腓利士人tú-tio̍h就hoah。耶和華ê神大大臨到伊，伊手裡ê索就親像過火燒ê麻，所縛伊ê索就對伊ê手lak落去。Chham-sun kàu Lī-hi, Hui-lī-sū lâng tú-tio̍h chiū hoah. Iâ-hô-hoa ê Sîn tōa-tōa lîm-kàu i, i chhiú--nih ê soh chiū chhin-chhiūⁿ kè-hé sio ê môa, só͘ pa̍k i ê soh chiū tùi i ê chhiú lak--lo̍h-khì.

15伊看見驢一支新ê嘴phóe骨，就伸手拾伊，用來phah死一千人。I khòaⁿ-kìⁿ lû chi̍t ki sin ê chhùi-phóe-kut, chiū chhun-chhiú khioh i, ēng lâi phah-sí chi̍t-chheng lâng.

16參孫講： 我用驢ê嘴phóe骨，phah死人一堆一堆， 我用驢ê嘴phóe骨phah死一千人。Chham-sun kóng, Góa ēng lû ê chhùi-phóe-kut, phah-sí lâng chi̍t-tui chi̍t-tui, Góa ēng lû ê chhùi-phóe-kut phah-sí chi̍t-chheng lâng.

17講soah，就將手裡 ê嘴phóe骨hiat-ka̍k；hit所在就叫La̍h-boa̍t-lī-hi。Kóng soah, chiū chiong chhiú--nih ê chhùi-phóe-kut hiat-ka̍k; hit só͘-chāi chiū kiò La̍h-boa̍t-lī-hi.

18參孫嘴乾到極，就求叫耶和華講：你既然用你ê奴僕ê手行chiah大ê拯救，總無我taⁿ tio̍h嘴乾來死，陷落tī無受割禮ê人ê手mah？Chham-sun chhùi-ta kàu-ke̍k, chiū kiû-kiò Iâ-hô-hoa kóng, Lí kì-jiân ēng Lí ê lô͘-po̍k ê chhiú kiâⁿ chiah-tōa ê chín-kiù, chóng-bô góa taⁿ tio̍h chhùi-ta lâi sí, hām-lo̍h tī bô siū kat-lé ê lâng ê chhiú mah?

19上帝就hō͘ Lī-hi lap-u ê所在裂開，有水tùi-hia chhèng出來，參孫lim了精神復到，koh活動；tùi án-ni，號hit-ê水泉叫Ún-hap-ko-lī；hit-ê水泉到今á日iáu tī Lī-hi。Siōng-tè chiū hō͘ Lī-hi lap-u ê só͘-chāi li̍h-khui, ū chúi tùi-hia chhèng--chhut lâi, Chham-sun lim-liáu cheng-sîn ho̍k-tò, koh oa̍h-tāng; tùi án-ni hō hit ê chúi-chôaⁿ kiò Ún-hap-ko-lī; hit ê chúi-chôaⁿ kàu kin-á-ji̍t iáu tī Lī-hi.

20當腓利士人ê時，參孫做以色列ê士師二十年。Tng Hui-lī-sū lâng ê sî, Chham-sun chòe Í-sek-lia̍t ê sū-su jī-cha̍p nî.

1參孫到Ka-sat，tī-hia看見一個妓女，就親近伊。Chham-sun kàu Ka-sat, tī-hia khòaⁿ-kìⁿ chi̍t ê kī-lú, chiū chhin-kūn i.

2有人kā Ka-sat人講：參孫到chia；in就透暝圍伊，tī城門當等伊，thong暝靜靜，講：到天光早咱就thang thâi伊。Ū lâng kā Ka-sat lâng kóng, Chham-sun kàu chia; in chiū thàu-mî ûi i, tī siâⁿ-mn̂g tng-tán i, thong-mî chēng-chēng, kóng, Kàu thiⁿ-kng-chá lán chiū thang thâi i.

3參孫睏到半暝；tī半暝起來，將城門ê門扇，kap兩支門khiā，kap門栱，lóng拆起來，hē tī肩頭裡，giâ到Hi-pek-lûn對面ê山頂。Chham-sun khùn kàu pòaⁿ-mî; tī pòaⁿ-mî khí-lâi, chiong siâⁿ-mn̂g ê mn̂g-sìⁿ, kap nn̄g ki mn̂g-khiā, kap mn̂g-kông, lóng thiah--khí-lâi, hē tī keng-thâu--nih, giâ kàu Hi-pek-lûn tùi-bīn ê soaⁿ-téng.

4後來參孫tī So-lia̍t山谷戀愛一個cha-bó͘人名叫Tāi-lī-la̍h。Āu-lâi Chham-sun tī So-lia̍t soaⁿ-kok loân-ài chi̍t ê cha-bó͘-lâng miâ kiò Tāi-lī-la̍h.

5腓利士人hiah-ê首領上去見hit-ê cha-bó͘人，對伊講，你tio̍h làu參孫，看伊ê大氣力在tī toh落，阮怎樣chiah會贏伊，thang縛來困苦伊；阮就ta̍k人hō͘你一千一百銀。Hui-lī-sū lâng hiah ê siú-léng chiūⁿ-khì kìⁿ hit ê cha-bó͘-lâng, tùi i kóng, Lí tio̍h làu Chham-sun, khòaⁿ i ê tōa khùi-la̍t chāi-tī toh-lo̍h, goán cháiⁿ-iūⁿ chiah ōe iâⁿ i, thang pa̍k lâi khùn-khó͘ i; goán chiū ta̍k-lâng hō͘ lí chi̍t-chheng chi̍t-pah gûn.

6Tāi-lī-la̍h kā參孫講：求你kā我講：你ê大氣力在tī toh落，tio̍h怎樣chiah會縛你，困苦你。Tāi-lī-la̍h kā Chham-sun kóng, Kiû lí kā góa kóng, lí ê tōa khùi-la̍t chāi-tī toh-lo̍h, tio̍h cháiⁿ-iūⁿ chiah ōe pa̍k lí, khùn-khó͘ lí.

7參孫應講，人若用七條iáu未乾，生(chhiⁿ) ê藤á縛我，我就軟弱親像別人。Chham-sun ìn kóng, Lâng nā ēng chhit-tiâu iáu-bē ta, chhiⁿ ê tîn-á pa̍k góa, góa chiū loán-jio̍k chhin-chhiūⁿ pa̍t-lâng.

8Tùi án-ni，腓利士人hiah-ê首領the̍h七條iáu未乾，生ê藤á來，交hō͘婦人人，伊就用hit-ê來縛伊。Tùi án-ni Hui-lī-sū lâng hiah ê siú-léng the̍h chhit-tiâu iáu-bē ta, chhiⁿ ê tîn-á lâi, kau hō͘ hū-jîn-lâng, i chiū ēng hit-ê lâi pa̍k i.

9婦人人已經有埋伏人tī伊ê內房；婦人人講：參孫ah，腓利士人來beh掠你。參孫就chhoah斷藤á，親像chhoah斷經過火ê 麻絲一樣；án-ni伊ê大氣力人猶原m̄知。Hū-jîn-lâng í-keng ū bâi-ho̍k lâng tī i ê lāi-pâng; hū-jîn-lâng kóng, Chham-sun ah, Hui-lī-sū lâng lâi beh lia̍h lí. Chham-sun chiū chhoah-tn̄g tîn-á, chhin-chhiūⁿ chhoah-tn̄g keng-kè hé ê môa-si chi̍t-iūⁿ; án-ni i ê tōa khùi-la̍t lâng iū-goân m̄-chai.

10Tāi-lī-la̍h kā參孫講：你騙我，對我講白賊；taⁿ求你kā我講tio̍h怎樣chiah會縛你。Tāi-lī-la̍h kā Chham-sun kóng, Lí phiàn góa, tùi góa kóng pe̍h-chha̍t; taⁿ kiû lí kā góa kóng tio̍h cháiⁿ-iūⁿ chiah ōe pa̍k lí.

11參孫應講，人若用bē-bat用ê新索縛我，我就軟弱親像別人。Chham-sun ìn kóng, Lâng nā ēng bē-bat ēng ê sin soh pa̍k góa, góa chiū loán-jio̍k chhin-chhiūⁿ pa̍t-lâng.

12Tāi-lī-la̍h就用新索縛伊，對伊講，參孫ah，腓利士人來beh掠你。Hit時埋伏ê人bih tī內房；參孫就chhoah斷伊手骨裡ê索，親像chhoah斷一條線。Tāi-lī-la̍h chiū ēng sin soh pa̍k i, tùi i kóng, Chham-sun ah, Hui-lī-sū lâng lâi beh lia̍h lí. Hit-sî bâi-ho̍k ê lâng bih tī lāi-pâng; Chham-sun chiū chhoah-tn̄g i chhiú-kut--nih ê soh, chhin-chhiūⁿ chhoah-tn̄g chi̍t tiâu sòaⁿ.

13Tāi-lī-la̍h kā參孫講：你到taⁿ iáu騙我，對我講白賊；求你kā我講：tio̍h怎樣chiah會縛你。參孫應講，你若用七股ê頭毛kap緯(hūi)線相kap織，就能。Tāi-lī-la̍h kā Chham-sun kóng, Lí kàu-taⁿ iáu phiàn góa, tùi góa kóng pe̍h-chha̍t; kiû lí kā góa kóng, tio̍h cháiⁿ-iūⁿ chiah ōe pa̍k lí. Chham-sun ìn kóng, Lí nā ēng chhit-kó͘ ê thâu-mn̂g kap hūi-sòaⁿ saⁿ-kap chit, chiū ōe.

14婦人人就，用釘釘伊ê頭毛，kā伊講，參孫ah，腓利士人來beh掠你。參孫就醒，將布機ê釘kap 緯線，做一下拔出來。Hū-jîn-lâng chiū, ēng teng tèng i ê thâu-mn̂g, kā i kóng, Chham-sun ah, Hui-lī-sū lâng lâi beh lia̍h lí. Chham-sun chiū chhíⁿ, chiong pò͘-ki ê teng kap hūi-sòaⁿ, chòe chi̍t-ē pu̍ih--chhut-lâi.

15Tāi-lī-la̍h kā伊講，你ê心無連tī我；怎樣講你疼我？你已經騙我三pái，無kā我講：你ê氣力在tī toh落。Tāi-lī-la̍h kā i kóng, Lí ê sim bô liân tī góa; cháiⁿ-iūⁿ kóng lí thiàⁿ góa? lí í-keng phiàn góa saⁿ-pái, bô kā góa kóng, lí ê khùi-la̍t chāi-tī toh-lo̍h.

16Tāi-lī-la̍h日日用話催伊，逼伊，致到伊ê心鬱悶，到beh死；Tāi-lī-la̍h ji̍t-ji̍t ēng ōe chhui i, pek i, tì-kàu i ê sim ut-būn, kàu beh sí;

17就將伊ê心底所khǹg-ê lóng報伊，kā伊講，Éng m̄-bat有剃頭刀到我ê頭殼；因為我tùi母胎就歸上帝做Ná-sè-jíⁿ人；若kā我剃起來，我ê氣力就離開我，我就軟弱親像別人。chiū chiong i ê sim-tóe só͘-khǹg-ê lóng pò i, kā i kóng, Éng m̄-bat ū thì-thâu-to kàu góa ê thâu-khak; in-ūi góa tùi bú-thai chiū kui Siōng-tè chòe Ná-sè-jíⁿ lâng; nā kā góa thì--khí-lâi, góa ê khùi-la̍t chiū lī-khui góa, góa chiū loán-jio̍k chhin-chhiūⁿ pa̍t-lâng.

18Tāi-lī-la̍h看見伊將心底所khǹg-ê lóng kā伊講，就差人叫腓利士人ê首領，kā in講：請lín chit-pái koh上來，因為伊已經將心底所khǹg-ê lóng kā我講。腓利士人ê首領上去婦人人hia，hit-ê銀帶tī手裡。Tāi-lī-la̍h khòaⁿ-kìⁿ i chiong sim-tóe só͘-khǹg-ê lóng kā i kóng, chiū chhe lâng kiò Hui-lī-sū lâng ê siú-léng, kā in kóng, Chhiáⁿ lín chit-pái koh chiūⁿ-lâi, in-ūi i í-keng chiong sim-tóe só͘-khǹg-ê lóng kā góa kóng. Hui-lī-sū lâng ê siú-léng chiūⁿ-khì hū-jîn-lâng hia, hit ê gûn tòa tī chhiú--nih.

19伊就hō͘參孫睏tī伊ê腳頭u，叫一人來剃伊七股ê頭毛；tùi án-ni，困苦伊，伊ê氣力就離開伊。I chiū hō͘ Chham-sun khùn tī i ê kha-thâu-u, kiò chi̍t-lâng lâi thì i chhit-kó͘ ê thâu-mn̂g; tùi án-ni khùn-khó͘ i, i ê khùi-la̍t chiū lī-khui i.

20伊講：參孫ah，腓利士人來beh掠你。參孫睏就醒，心內講：我beh親像前kúi-nā pái家己滾開；總是伊m̄知耶和華已經離開伊。I kóng, Chham-sun ah, Hui-lī-sū lâng lâi beh lia̍h lí. Chham-sun khùn chiū chhíⁿ, sim-lāi kóng, Góa beh chhin-chhiūⁿ chêng kúi-nā pái ka-kī kùn-khui; chóng-sī i m̄-chai Iâ-hô-hoa í-keng lī-khui i.

21腓利士人掠伊，iah伊ê目睭，帶伊到Ka-sat，用銅鏈縛伊；伊就tī監裡挨磨。Hui-lī-sū lâng lia̍h i, iah i ê ba̍k-chiu, tòa i kàu Ka-sat, ēng tâng-liān pa̍k i; i chiū tī kaⁿ--nih oe-bō.

22但是伊ê頭毛受剃了後，koh漸漸長起來。Nā-sī i ê thâu-mn̂g siū thì liáu-āu, koh chiām-chiām tn̂g--khí-lâi.

23腓利士人hiah-ê首領聚集，beh獻大祭hō͘ in ê上帝Tāi-kún，也beh宴樂；因為in講：咱ê上帝將咱ê對敵參孫交tī咱ê手lah。Hui-lī-sū lâng hiah ê siú-léng chū-chi̍p, beh hiàn tōa-chè hō͘ in ê siōng-tè Tāi-kún, iā beh iàn-lo̍k; in-ūi in kóng, Lán ê siōng-tè chiong lán ê tùi-te̍k Chham-sun kau tī lán ê chhiú lah.

24百姓看見參孫，就o-ló in ê上帝，講：咱ê對敵毀咱ê地，koh thâi死咱chōe-chōe人ê，taⁿ咱ê上帝已經將伊交tī咱ê手。Peh-sìⁿ khòaⁿ-kìⁿ Chham-sun, chiū o-ló in ê siōng-tè, kóng, Lán ê tùi-te̍k húi lán ê tōe, koh thâi-sí lán chōe-chōe lâng ê, taⁿ lán ê siōng-tè í-keng chiong i kau tī lán ê chhiú.

25In宴樂ê時，就講：叫參孫來，hō͘咱弄thit-thô；in就叫參孫出監；伊就hō͘ in弄thit-thô；in hō͘伊khiā tī兩支柱ê中間。In iàn-lo̍k ê sî, chiū kóng, Kiò Chham-sun lâi, hō͘ lán lāng thit-thô; in chiū kiò Chham-sun chhut-kaⁿ; i chiū hō͘ in lāng thit-thô; in hō͘ i khiā tī nn̄g ki thiāu ê tiong-kan.

26參孫kā牽伊ê手ê gín-ná講：請你hō͘我摸tio̍h thuh厝ê柱，hō͘我óa in。Chham-sun kā khan i ê chhiú ê gín-ná kóng, Chhiáⁿ lí hō͘ góa bong--tio̍h thuh-chhù ê thiāu, hō͘ góa òa in.

27Hit時厝內男女滿滿；腓利士人ê眾首領也lóng tī-hia；厝頂男女約略有三千人，看人teh弄參孫thit-thô。Hit-sî chhù-lāi lâm-lú móa-móa; Hui-lī-sū lâng ê chèng siú-léng iā lóng tī-hia; chhù-téng lâm-lú iok-lio̍k ū saⁿ-chheng lâng, khòaⁿ lâng teh lāng Chham-sun thit-thô.

28參孫祈禱耶和華講：主耶和華ah，求你siàu念我，上帝ah，求你賜我盡chit-pái ê氣力，hō͘我為我兩蕊目睭，對腓利士人做一下報仇。Chham-sun kî-tó Iâ-hô-hoa kóng, Chú Iâ-hô-hoa ah, kiû Lí siàu-liām góa, Siōng-tè ah, kiû Lí sù góa chīn chit-pái ê khui-la̍t, hō͘ góa ūi góa nn̄g lúi ba̍k-chiu, tùi Hui-lī-sū lâng chòe chi̍t-ē pò-siû.

29參孫就攬thuh hit間厝ê兩支中柱，來óa伊，chiàⁿ手攬一支，tò手攬一支。Chham-sun chiū lám thuh hit keng chhù ê nn̄g-ki tiong-thiāu, lâi òa i, chiàⁿ-chhiú lám chi̍t-ki, tò-chhiú lám chi̍t-ki.

30參孫講：願我kap腓利士人相kap死。就盡力屈身；厝就倒，來teh tī hiah-ê首領，kap tī hit內面ê眾人。Án-ni，參孫死ê時所害死ê，比活ê時所害死ê koh khah-chōe。Chham-sun kóng, Goān góa kap Hui-lī-sū lâng saⁿ-kap sí. Chiū chīn-la̍t khut-sin; chhù chiū tó, lâi teh tī hiah ê siú-léng, kap tī hí lāi-bīn ê chèng-lâng. Án-ni, Chham-sun sí ê sî só͘ hāi-sí-ê, pí oa̍h ê sî só͘ hāi-sí-ê koh khah-chōe.

31參孫ê兄弟，kap伊ê老父全家，lóng落來收拾伊，扛上去埋葬tī Só-la̍h kap Í-si̍t-tô ê中間，tī伊ê老父Má-lô-à ê墓地。參孫做以色列ê士師二十年。Chham-sun ê hiaⁿ-tī, kap i ê lāu-pē choân-ke, lóng lo̍h-lâi siu-si̍p i, kng chiūⁿ-khì bâi-chòng tī Só-la̍h kap Í-si̍t-tô ê tiong-kan, tī i ê lāu-pē Má-lô-à ê bōng-tōe. Chham-sun chòe Í-sek-lia̍t ê sū-su jī-cha̍p nî.