1參孫到Ka-sat，tī-hia看見一個妓女，就親近伊。Chham-sun kàu Ka-sat, tī-hia khòaⁿ-kìⁿ chi̍t ê kī-lú, chiū chhin-kūn i.

2有人kā Ka-sat人講：參孫到chia；in就透暝圍伊，tī城門當等伊，thong暝靜靜，講：到天光早咱就thang thâi伊。Ū lâng kā Ka-sat lâng kóng, Chham-sun kàu chia; in chiū thàu-mî ûi i, tī siâⁿ-mn̂g tng-tán i, thong-mî chēng-chēng, kóng, Kàu thiⁿ-kng-chá lán chiū thang thâi i.

3參孫睏到半暝；tī半暝起來，將城門ê門扇，kap兩支門khiā，kap門栱，lóng拆起來，hē tī肩頭裡，giâ到Hi-pek-lûn對面ê山頂。Chham-sun khùn kàu pòaⁿ-mî; tī pòaⁿ-mî khí-lâi, chiong siâⁿ-mn̂g ê mn̂g-sìⁿ, kap nn̄g ki mn̂g-khiā, kap mn̂g-kông, lóng thiah--khí-lâi, hē tī keng-thâu--nih, giâ kàu Hi-pek-lûn tùi-bīn ê soaⁿ-téng.

4後來參孫tī So-lia̍t山谷戀愛一個cha-bó͘人名叫Tāi-lī-la̍h。Āu-lâi Chham-sun tī So-lia̍t soaⁿ-kok loân-ài chi̍t ê cha-bó͘-lâng miâ kiò Tāi-lī-la̍h.

5腓利士人hiah-ê首領上去見hit-ê cha-bó͘人，對伊講，你tio̍h làu參孫，看伊ê大氣力在tī toh落，阮怎樣chiah會贏伊，thang縛來困苦伊；阮就ta̍k人hō͘你一千一百銀。Hui-lī-sū lâng hiah ê siú-léng chiūⁿ-khì kìⁿ hit ê cha-bó͘-lâng, tùi i kóng, Lí tio̍h làu Chham-sun, khòaⁿ i ê tōa khùi-la̍t chāi-tī toh-lo̍h, goán cháiⁿ-iūⁿ chiah ōe iâⁿ i, thang pa̍k lâi khùn-khó͘ i; goán chiū ta̍k-lâng hō͘ lí chi̍t-chheng chi̍t-pah gûn.

6Tāi-lī-la̍h kā參孫講：求你kā我講：你ê大氣力在tī toh落，tio̍h怎樣chiah會縛你，困苦你。Tāi-lī-la̍h kā Chham-sun kóng, Kiû lí kā góa kóng, lí ê tōa khùi-la̍t chāi-tī toh-lo̍h, tio̍h cháiⁿ-iūⁿ chiah ōe pa̍k lí, khùn-khó͘ lí.

7參孫應講，人若用七條iáu未乾，生(chhiⁿ) ê藤á縛我，我就軟弱親像別人。Chham-sun ìn kóng, Lâng nā ēng chhit-tiâu iáu-bē ta, chhiⁿ ê tîn-á pa̍k góa, góa chiū loán-jio̍k chhin-chhiūⁿ pa̍t-lâng.

8Tùi án-ni，腓利士人hiah-ê首領the̍h七條iáu未乾，生ê藤á來，交hō͘婦人人，伊就用hit-ê來縛伊。Tùi án-ni Hui-lī-sū lâng hiah ê siú-léng the̍h chhit-tiâu iáu-bē ta, chhiⁿ ê tîn-á lâi, kau hō͘ hū-jîn-lâng, i chiū ēng hit-ê lâi pa̍k i.

9婦人人已經有埋伏人tī伊ê內房；婦人人講：參孫ah，腓利士人來beh掠你。參孫就chhoah斷藤á，親像chhoah斷經過火ê 麻絲一樣；án-ni伊ê大氣力人猶原m̄知。Hū-jîn-lâng í-keng ū bâi-ho̍k lâng tī i ê lāi-pâng; hū-jîn-lâng kóng, Chham-sun ah, Hui-lī-sū lâng lâi beh lia̍h lí. Chham-sun chiū chhoah-tn̄g tîn-á, chhin-chhiūⁿ chhoah-tn̄g keng-kè hé ê môa-si chi̍t-iūⁿ; án-ni i ê tōa khùi-la̍t lâng iū-goân m̄-chai.

10Tāi-lī-la̍h kā參孫講：你騙我，對我講白賊；taⁿ求你kā我講tio̍h怎樣chiah會縛你。Tāi-lī-la̍h kā Chham-sun kóng, Lí phiàn góa, tùi góa kóng pe̍h-chha̍t; taⁿ kiû lí kā góa kóng tio̍h cháiⁿ-iūⁿ chiah ōe pa̍k lí.

11參孫應講，人若用bē-bat用ê新索縛我，我就軟弱親像別人。Chham-sun ìn kóng, Lâng nā ēng bē-bat ēng ê sin soh pa̍k góa, góa chiū loán-jio̍k chhin-chhiūⁿ pa̍t-lâng.

12Tāi-lī-la̍h就用新索縛伊，對伊講，參孫ah，腓利士人來beh掠你。Hit時埋伏ê人bih tī內房；參孫就chhoah斷伊手骨裡ê索，親像chhoah斷一條線。Tāi-lī-la̍h chiū ēng sin soh pa̍k i, tùi i kóng, Chham-sun ah, Hui-lī-sū lâng lâi beh lia̍h lí. Hit-sî bâi-ho̍k ê lâng bih tī lāi-pâng; Chham-sun chiū chhoah-tn̄g i chhiú-kut--nih ê soh, chhin-chhiūⁿ chhoah-tn̄g chi̍t tiâu sòaⁿ.

13Tāi-lī-la̍h kā參孫講：你到taⁿ iáu騙我，對我講白賊；求你kā我講：tio̍h怎樣chiah會縛你。參孫應講，你若用七股ê頭毛kap緯(hūi)線相kap織，就能。Tāi-lī-la̍h kā Chham-sun kóng, Lí kàu-taⁿ iáu phiàn góa, tùi góa kóng pe̍h-chha̍t; kiû lí kā góa kóng, tio̍h cháiⁿ-iūⁿ chiah ōe pa̍k lí. Chham-sun ìn kóng, Lí nā ēng chhit-kó͘ ê thâu-mn̂g kap hūi-sòaⁿ saⁿ-kap chit, chiū ōe.

14婦人人就，用釘釘伊ê頭毛，kā伊講，參孫ah，腓利士人來beh掠你。參孫就醒，將布機ê釘kap 緯線，做一下拔出來。Hū-jîn-lâng chiū, ēng teng tèng i ê thâu-mn̂g, kā i kóng, Chham-sun ah, Hui-lī-sū lâng lâi beh lia̍h lí. Chham-sun chiū chhíⁿ, chiong pò͘-ki ê teng kap hūi-sòaⁿ, chòe chi̍t-ē pu̍ih--chhut-lâi.

15Tāi-lī-la̍h kā伊講，你ê心無連tī我；怎樣講你疼我？你已經騙我三pái，無kā我講：你ê氣力在tī toh落。Tāi-lī-la̍h kā i kóng, Lí ê sim bô liân tī góa; cháiⁿ-iūⁿ kóng lí thiàⁿ góa? lí í-keng phiàn góa saⁿ-pái, bô kā góa kóng, lí ê khùi-la̍t chāi-tī toh-lo̍h.

16Tāi-lī-la̍h日日用話催伊，逼伊，致到伊ê心鬱悶，到beh死；Tāi-lī-la̍h ji̍t-ji̍t ēng ōe chhui i, pek i, tì-kàu i ê sim ut-būn, kàu beh sí;

17就將伊ê心底所khǹg-ê lóng報伊，kā伊講，Éng m̄-bat有剃頭刀到我ê頭殼；因為我tùi母胎就歸上帝做Ná-sè-jíⁿ人；若kā我剃起來，我ê氣力就離開我，我就軟弱親像別人。chiū chiong i ê sim-tóe só͘-khǹg-ê lóng pò i, kā i kóng, Éng m̄-bat ū thì-thâu-to kàu góa ê thâu-khak; in-ūi góa tùi bú-thai chiū kui Siōng-tè chòe Ná-sè-jíⁿ lâng; nā kā góa thì--khí-lâi, góa ê khùi-la̍t chiū lī-khui góa, góa chiū loán-jio̍k chhin-chhiūⁿ pa̍t-lâng.

18Tāi-lī-la̍h看見伊將心底所khǹg-ê lóng kā伊講，就差人叫腓利士人ê首領，kā in講：請lín chit-pái koh上來，因為伊已經將心底所khǹg-ê lóng kā我講。腓利士人ê首領上去婦人人hia，hit-ê銀帶tī手裡。Tāi-lī-la̍h khòaⁿ-kìⁿ i chiong sim-tóe só͘-khǹg-ê lóng kā i kóng, chiū chhe lâng kiò Hui-lī-sū lâng ê siú-léng, kā in kóng, Chhiáⁿ lín chit-pái koh chiūⁿ-lâi, in-ūi i í-keng chiong sim-tóe só͘-khǹg-ê lóng kā góa kóng. Hui-lī-sū lâng ê siú-léng chiūⁿ-khì hū-jîn-lâng hia, hit ê gûn tòa tī chhiú--nih.

19伊就hō͘參孫睏tī伊ê腳頭u，叫一人來剃伊七股ê頭毛；tùi án-ni，困苦伊，伊ê氣力就離開伊。I chiū hō͘ Chham-sun khùn tī i ê kha-thâu-u, kiò chi̍t-lâng lâi thì i chhit-kó͘ ê thâu-mn̂g; tùi án-ni khùn-khó͘ i, i ê khùi-la̍t chiū lī-khui i.

20伊講：參孫ah，腓利士人來beh掠你。參孫睏就醒，心內講：我beh親像前kúi-nā pái家己滾開；總是伊m̄知耶和華已經離開伊。I kóng, Chham-sun ah, Hui-lī-sū lâng lâi beh lia̍h lí. Chham-sun khùn chiū chhíⁿ, sim-lāi kóng, Góa beh chhin-chhiūⁿ chêng kúi-nā pái ka-kī kùn-khui; chóng-sī i m̄-chai Iâ-hô-hoa í-keng lī-khui i.

21腓利士人掠伊，iah伊ê目睭，帶伊到Ka-sat，用銅鏈縛伊；伊就tī監裡挨磨。Hui-lī-sū lâng lia̍h i, iah i ê ba̍k-chiu, tòa i kàu Ka-sat, ēng tâng-liān pa̍k i; i chiū tī kaⁿ--nih oe-bō.

22但是伊ê頭毛受剃了後，koh漸漸長起來。Nā-sī i ê thâu-mn̂g siū thì liáu-āu, koh chiām-chiām tn̂g--khí-lâi.

23腓利士人hiah-ê首領聚集，beh獻大祭hō͘ in ê上帝Tāi-kún，也beh宴樂；因為in講：咱ê上帝將咱ê對敵參孫交tī咱ê手lah。Hui-lī-sū lâng hiah ê siú-léng chū-chi̍p, beh hiàn tōa-chè hō͘ in ê siōng-tè Tāi-kún, iā beh iàn-lo̍k; in-ūi in kóng, Lán ê siōng-tè chiong lán ê tùi-te̍k Chham-sun kau tī lán ê chhiú lah.

24百姓看見參孫，就o-ló in ê上帝，講：咱ê對敵毀咱ê地，koh thâi死咱chōe-chōe人ê，taⁿ咱ê上帝已經將伊交tī咱ê手。Peh-sìⁿ khòaⁿ-kìⁿ Chham-sun, chiū o-ló in ê siōng-tè, kóng, Lán ê tùi-te̍k húi lán ê tōe, koh thâi-sí lán chōe-chōe lâng ê, taⁿ lán ê siōng-tè í-keng chiong i kau tī lán ê chhiú.

25In宴樂ê時，就講：叫參孫來，hō͘咱弄thit-thô；in就叫參孫出監；伊就hō͘ in弄thit-thô；in hō͘伊khiā tī兩支柱ê中間。In iàn-lo̍k ê sî, chiū kóng, Kiò Chham-sun lâi, hō͘ lán lāng thit-thô; in chiū kiò Chham-sun chhut-kaⁿ; i chiū hō͘ in lāng thit-thô; in hō͘ i khiā tī nn̄g ki thiāu ê tiong-kan.

26參孫kā牽伊ê手ê gín-ná講：請你hō͘我摸tio̍h thuh厝ê柱，hō͘我óa in。Chham-sun kā khan i ê chhiú ê gín-ná kóng, Chhiáⁿ lí hō͘ góa bong--tio̍h thuh-chhù ê thiāu, hō͘ góa òa in.

27Hit時厝內男女滿滿；腓利士人ê眾首領也lóng tī-hia；厝頂男女約略有三千人，看人teh弄參孫thit-thô。Hit-sî chhù-lāi lâm-lú móa-móa; Hui-lī-sū lâng ê chèng siú-léng iā lóng tī-hia; chhù-téng lâm-lú iok-lio̍k ū saⁿ-chheng lâng, khòaⁿ lâng teh lāng Chham-sun thit-thô.

28參孫祈禱耶和華講：主耶和華ah，求你siàu念我，上帝ah，求你賜我盡chit-pái ê氣力，hō͘我為我兩蕊目睭，對腓利士人做一下報仇。Chham-sun kî-tó Iâ-hô-hoa kóng, Chú Iâ-hô-hoa ah, kiû Lí siàu-liām góa, Siōng-tè ah, kiû Lí sù góa chīn chit-pái ê khui-la̍t, hō͘ góa ūi góa nn̄g lúi ba̍k-chiu, tùi Hui-lī-sū lâng chòe chi̍t-ē pò-siû.

29參孫就攬thuh hit間厝ê兩支中柱，來óa伊，chiàⁿ手攬一支，tò手攬一支。Chham-sun chiū lám thuh hit keng chhù ê nn̄g-ki tiong-thiāu, lâi òa i, chiàⁿ-chhiú lám chi̍t-ki, tò-chhiú lám chi̍t-ki.

30參孫講：願我kap腓利士人相kap死。就盡力屈身；厝就倒，來teh tī hiah-ê首領，kap tī hit內面ê眾人。Án-ni，參孫死ê時所害死ê，比活ê時所害死ê koh khah-chōe。Chham-sun kóng, Goān góa kap Hui-lī-sū lâng saⁿ-kap sí. Chiū chīn-la̍t khut-sin; chhù chiū tó, lâi teh tī hiah ê siú-léng, kap tī hí lāi-bīn ê chèng-lâng. Án-ni, Chham-sun sí ê sî só͘ hāi-sí-ê, pí oa̍h ê sî só͘ hāi-sí-ê koh khah-chōe.

31參孫ê兄弟，kap伊ê老父全家，lóng落來收拾伊，扛上去埋葬tī Só-la̍h kap Í-si̍t-tô ê中間，tī伊ê老父Má-lô-à ê墓地。參孫做以色列ê士師二十年。Chham-sun ê hiaⁿ-tī, kap i ê lāu-pē choân-ke, lóng lo̍h-lâi siu-si̍p i, kng chiūⁿ-khì bâi-chòng tī Só-la̍h kap Í-si̍t-tô ê tiong-kan, tī i ê lāu-pē Má-lô-à ê bōng-tōe. Chham-sun chòe Í-sek-lia̍t ê sū-su jī-cha̍p nî.

1Í-hoat-liân山地有一個人，名叫Bí-ka；Í-hoat-liân soaⁿ-tōe ū chi̍t ê lâng, miâ-kiò Bí-ka;

2伊kā老母講：你hit一千一百銀hō͘人the̍h去，你因為án-ni咒詛，koh講hō͘我聽，看ah，chit-ê銀tī我chia；是我the̍h去。伊ê老母講：願耶和華賜福我ê kiáⁿ。i kā lāu-bú kóng, Lí hit chi̍t-chheng chi̍t-pah gûn hō͘ lâng the̍h-khì, lí in-ūi án-ni chiù-chó͘, koh kóng hō͘ góa thiaⁿ, khòaⁿ ah, chit ê gûn tī góa chia; sī góa the̍h--khì. I ê lāu-bú kóng, Goān Iâ-hô-hoa sù-hok góa ê kiáⁿ.

3伊就將千一銀還伊ê老母；伊ê老母講：我已經tùi我ê手用chit-ê銀，為我ê kiáⁿ，獻hō͘耶和華，thang雕刻一sian像，鑄一sian像；taⁿ我猶原koh交你。I chiū chiong chheng-it gûn hêng i ê lāu-bú; i ê lāu-bú kóng, Góa í-keng tùi góa ê chhiú ēng chit ê gûn, ūi góa ê kiáⁿ, hiàn hō͘ Iâ-hô-hoa, thang tiau-khek chi̍t sian siōng, chù chi̍t sian siōng; taⁿ góa iû-goân koh kau lí.

4Bí-ka將銀還伊ê老母；伊ê老母用兩百銀hō͘鑄造ê人，伊就用hit-ê做雕刻ê偶像，鑄ê偶像；hē 伊tī Bí-ka ê厝。Bí-ka chiong gûn hêng i ê lāu-bú; i ê lāu-bú ēng nn̄g-pah gûn hō͘ chù-chō ê lâng, i chiū ēng hit-ê chòe tiau-khek ê ngó͘-siōng, chù ê ngó͘-siōng; hē i tī Bí-ka ê chhù.

5Chit-ê Bí-ka有上帝ê厝，koh製造í-hut-tek，kap家內hiah-ê偶像，行設立ê禮，分別伊一個kiáⁿ做伊ê祭司。Chit ê Bí-ka ū siōng-tè ê chhù, koh chè-chō í-hut-tek, kap ke-lāi hiah ê ngó͘-siōng, kiâⁿ siat-li̍p ê lé, hun-piat i chi̍t ê kiáⁿ chòe i ê chè-si.

6Hit時以色列中無王；ta̍k人照伊所看做tio̍h-ê來行。Hit-sî Í-sek-lia̍t tiong bô ông; ta̍k-lâng chiàu i só͘ khòaⁿ-chòe tio̍h--ê lâi kiâⁿ.

7猶大伯利恆有一個少年人，屬猶大族ê利未人，伊寄腳tī-hia。Iû-tāi Pek-lī-hêng ū chi̍t ê siàu-liân lâng, sio̍k Iû-tāi cho̍k ê Lī-bī lâng, i kià-kha tī-hia.

8Chit人離開猶大伯利恆城，beh chhē一個thang khiā起ê所在；行路ê時，到Í-hoat-liân ê山地，Bí-ka ê厝。Chit-lâng lī-khui Iû-tāi Pek-lī-hêng siâⁿ, beh chhē chi̍t-ê thang khiā-khí ê só͘-chāi; kiâⁿ-lō͘ ê sî, kàu Í-hoat-liân ê soaⁿ-tōe, Bí-ka ê chhù.

9Bí-ka問伊講：你tùi toh落來？伊應講，我是猶大伯利恆ê利未人，beh chhē一個thang khiā起ê所在。Bí-ka mn̄g i kóng, Lí tùi toh-lo̍h lâi? I ìn kóng, Góa sī Iû-tāi Pek-lī-hêng ê Lī-bī lâng, beh chhē chi̍t-ê thang khiā-khí ê só͘-chāi.

10Bí-ka kā伊講，你來kap我tòa，做我ê老父，做我ê祭司；我ta̍k年hō͘你十個銀á，一副衣裳，kap你ê日食。利未人就入去。Bí-ka kā i kóng, Lí lâi kap góa tòa, chòe góa ê lāu-pē, chòe góa ê chè-si; góa ta̍k-nî hō͘ lí cha̍p ê gûn-á, chi̍t-hù i-chiûⁿ, kap lí ê ji̍t-si̍t. Lī-bī lâng chiū ji̍t-khì.

11利未人甘願kap hit人相kap tòa。Bí-ka看chit-ê少年人親像家己ê kiáⁿ。Lī-bī lâng kam-goān kap hit-lâng saⁿ-kap tòa. Bí-ka khòaⁿ chit ê siàu-liân lâng chhin-chhiūⁿ ka-kī ê kiáⁿ.

12Bí-ka kā利未人行設立ê禮；少年人就做伊ê祭司，來tòa tī伊ê厝。Bí-ka kā Lī-bī lâng kiâⁿ siat-li̍p ê lé; siàu-liân lâng chiū chòe i ê chè-si, lâi tòa tī i ê chhù.

13Bí-ka講：Taⁿ我知耶和華beh好款待我，因為我有一個利未人做祭司。Bí-ka kóng, Taⁿ góa chai Iâ-hô-hoa beh hó khoán-thāi góa, in-ūi góa ū chi̍t ê Lī-bī lâng chòe chè-si.

1Hit時以色列中無王；hit時Tàn ê人ê支派chhē地做業thang khiā起；因為到hit日，tī以色列支派中，in iáu未得tio̍h業。Hit-sî Í-sek-lia̍t tiong bô ông; hit-sî Tàn ê lâng ê chi-phài chhē tōe chòe-gia̍p thang khiā-khí; in-ūi kàu hit-ji̍t, tī Í-sek-lia̍t chi-phài-tiong, in iáu-bē tit-tio̍h gia̍p.

2Tàn ê人tùi Só-la̍h kap Í-si̍t-tô，差本族，眾百姓中，五個勇士，去偷看hit-ê地來查考，吩咐in講：lín去查考hit-ê地；in來到Í-hoat-liân山，入Bí-ka ê厝，就歇tī-hia。Tàn ê lâng tùi Só-la̍h kap Í-si̍t-tô, chhe pún-cho̍k, chèng peh-sìⁿ tiong, gō͘ ê ióng-sū, khì thau-khòaⁿ hit ê tōe lâi chhâ-khó, hoan-hù in kóng, Lín khì chhâ-khó hit ê tōe; in lâi kàu Í-hoat-liân soaⁿ, ji̍p Bí-ka ê chhù, chiū hioh tī-hia.

3In近Bí-ka ê厝，認tio̍h hit-ê少年利未人ê聲音，就入去問伊，Chī-chūi chhōa你來chia？你tī-chia做甚麼？你tī-chia得tio̍h甚麼？In kūn Bí-ka ê chhù, jīn-tio̍h hit ê siàu-liân Lī-bī lâng ê siaⁿ-im, chiū ji̍p-khì mn̄g i, Chī-chūi chhōa lí lâi chia? lí tī-chia chòe sím-mi̍h? lí tī-chia tit-tio̍h sím-mi̍h?

4伊講：Bí-ka款待我án-ni，án-ni；伊有倩我，我做伊ê祭司。I kóng, Bí-ka khoán-thāi góa án-ni, án-ni; i ū chhiàⁿ góa, góa chòe i ê chè-si.

5In kā伊講，請你問上帝，hō͘阮知阮所teh行ê路，興通á無？In kā i kóng, Chhiáⁿ lí mn̄g Siōng-tè, hō͘ goán chai goán só͘ teh kiâⁿ ê lō͘, heng-thong á-bô?

6祭司kā in講：Lín thang平安去；lín所行ê路是tī耶和華ê面前。Chè-si kā in kóng, Lín thang pêng-an khì; lín só͘ kiâⁿ ê lō͘ sī tī Iâ-hô-hoa ê bīn-chêng.

7Gō͘人就起身，來到La̍h-ek，看見hia ê百姓，安然khiā起，平安，無掛慮，親像Se-tùn人一樣；tī-hia無有掌權用甚麼事來攪擾in，in離開Se-tùn人遠遠，無kap別人往來。Gō͘-lâng chiū khí-sin, lâi kàu La̍h-ek, khòaⁿ-kìⁿ hia ê peh-sìⁿ, an-jiân khiā-khí, pêng-an, bô khòa-lū, chhin-chhiūⁿ Se-tùn lâng chi̍t-iūⁿ; tī-hia bô ū chiáng-koân ēng sím-mi̍h sū lâi kiáu-jiáu in, in lī-khui Se-tùn lâng hn̄g-hn̄g, bô kap pa̍t-lâng óng-lâi.

8Gō͘人tò來到Só-la̍h Í-si̍t-tô in兄弟hia；兄弟問in講：Lín有甚麼話？Gō͘-lâng tò-lâi kàu Só-la̍h Í-si̍t-tô in hiaⁿ-tī hia; hiaⁿ-tī mn̄g in kóng, Lín ū sím-mi̍h ōe?

9In應講，起來，咱上來去攻擊in，因為阮已經看hit-ê地；看ah，hit-ê地真好；lín啥事恬恬？tio̍h來去入，得tio̍h hit-ê地做業，m̄-thang 延chhiân。In ìn kóng, Khí-lâi, lán chiūⁿ-lâi khì kong-kek in, in-ūi goán í-keng khòaⁿ hit ê tōe; khòaⁿ ah, hit ê tōe chin-hó; lín siáⁿ-sū tiām-tiām? tio̍h lâi khì ji̍p, tit-tio̍h hit ê tōe chòe-gia̍p, m̄-thang iân-chhiân.

10Lín到hia，beh看安然khiā起ê百姓，所在也開闊；上帝已經將hit所在交tī lín ê手；地上所有ê物，hit所在無欠一項。Lín kàu hia, beh khòaⁿ an-jiân khiā-khí ê peh-sìⁿ, só͘-chāi iā khui-khoah; Siōng-tè í-keng chiong hit só͘-chāi kau tī lín ê chhiú; tōe-chiūⁿ só͘ ū ê mi̍h, hit só͘-chāi bô khiàm chi̍t-hāng.

11Tùi án-ni， Tàn族ê六百人，ta̍k-ê帶軍器，tùi Só-la̍h kap Í-si̍t-tô進前去。Tùi án-ni Tàn cho̍k ê la̍k-pah lâng, ta̍k-ê tòa kun-khì, tùi Só-la̍h kap Í-si̍t-tô chìn-chêng khì.

12In上去紮營tī猶大ê Ki-lia̍t-iâ-lîm；所以叫chit所在名Má-hap-lī-tàn，到今á日；看ah，這是tī Ki-lia̍t-iâ-lîm ê後面。In chiūⁿ-khì chat-iâⁿ tī Iû-tāi ê Ki-lia̍t-iâ-lîm; só͘-í kiò chit só͘-chāi miâ Má-hap-lī-tàn, kàu kin-á-ji̍t; khòaⁿ ah, che sī tī Ki-lia̍t-iâ-lîm ê āu-bīn.

13In tùi-hia去Í-hoat-liân山地，到Bí-ka ê厝。In tùi-hia khì Í-hoat-liân soaⁿ-tōe, kàu Bí-ka ê chhù.

14從前偷看La̍h-ek地ê五人，kā in ê兄弟講：chiah-ê厝內有í-hut-tek，kap家內偶像，kap雕刻ê像，鑄ê像，lín知mah？Taⁿ lín tio̍h想，看beh怎樣做。Chiông-chêng thau-khòaⁿ La̍h-ek tōe ê gō͘-lâng, kā in ê hiaⁿ-tī kóng, Chiah ê chhù-lāi ū í-hut-tek, kap ke-lāi ngó͘-siōng, kap tiau-khek ê siōng, chù ê siōng, lín chai mah? Taⁿ lín tio̍h siūⁿ, khòaⁿ beh cháiⁿ-iūⁿ chòe.

15In就oat去hia，到hit-ê少年ê利未人ê厝，就是Bí-ka ê厝，問伊平安。In chiū oat-khì hia, kàu hit ê siàu-liân ê Lī-bī lâng ê chhù, chiū-sī Bí-ka ê chhù, mn̄g i pêng-an.

16Tàn族hiah-ê六百人帶軍器，lóng khiā tī門口。Tàn cho̍k hiah ê la̍k-pah lâng tòa kun-khì, lóng khiā tī mn̂g-kháu.

17偷看地ê 五人就入去，將雕刻ê像，í-hut-tek，家內ê像，kap鑄ê像lóng the̍h去；祭司kap帶軍器ê六百人相kap khiā tī門口。Thau-khòaⁿ tōe ê gō͘-lâng chiū ji̍p-khì, chiong tiau-khek ê siōng, í-hut-tek, ke-lāi ê siōng, kap chù ê siōng lóng the̍h-khì; chè-si kap tòa kun-khì ê la̍k-pah lâng saⁿ-kap khiā tī mn̂g-kháu.

18Hit五人入Bí-ka ê厝，the̍h雕刻ê偶像，í-hut-tek，家內ê偶像，kap鑄ê像，祭司就問in講：Lín做甚麼ah？Hí gō͘-lâng ji̍p Bí-ka ê chhù, the̍h tiau-khek ê ngó͘-siōng, í-hut-tek, ke-lāi ê ngó͘-siōng, kap chù ê siōng, chè-si chiū mn̄g in kóng, Lín chòe sím-mi̍h ah?

19In應講，莫得做聲，用手掩嘴，tè阮來去，做阮ê父，做阮ê祭司；你做一人ê家ê祭司khah好，á是做以色列一支派一族ê祭司khah好ah？In ìn kóng, Bo̍h-tit chòe-siaⁿ, ēng chhiú ng-chhùi, tè goán lâi khì, chòe goán ê pē, chòe goán ê chè-si; lí chòe chi̍t-lâng ê ke ê chè-si khah-hó, á-sī chòe Í-sek-lia̍t chi̍t chi-phài chi̍t-cho̍k ê chè-si khah-hó ah?

20祭司心歡喜，就the̍h í-hut-tek，kap家內ê偶像，kap雕刻ê像，行tī百姓ê中間。Chè-si sim hoaⁿ-hí, chiū the̍h í-hut-tek, kap ke-lāi ê ngó͘-siōng, kap tiau-khek ê siōng, kiâⁿ tī peh-sìⁿ ê tiong-kan.

21In就oa̍t-tńg身離開hia，hō͘ gín-ná、cheng-siⁿ、貨財，做頭前。In chiū oa̍t-tńg-sin lī-khui hia, hō͘ gín-ná, cheng-siⁿ, hè-châi, chòe thâu-chêng.

22離開Bí-ka ê厝嶄然遠，Bí-ka hiah-ê厝邊lóng聚集，追趕Tàn ê人；喉叫Tàn ê人。Lī-khui Bí-ka ê chhù chám-jiân hn̄g, Bí-ka hiah ê chhù-piⁿ lóng chū-chi̍p, tui-kóaⁿ Tàn ê lâng; âu-kiò Tàn ê lâng.

23Tàn ê人oa̍t頭看，問Bí-ka講：你聚集hiah-ê人來，是甚麼tāi-chì ah？Tàn ê lâng oa̍t-thâu khòaⁿ, mn̄g Bí-ka kóng, Lí chū-chi̍p hiah ê lâng lâi, sī sím-mi̍h tāi-chì ah?

24伊講：我所妝ê上帝kap祭司，lín lóng帶去，我iáu有chhun甚麼？怎樣iáu問我講：你甚麼tāi-chì ah？I kóng, Góa só͘ chng ê siōng-tè kap chè-si, lín lóng tòa-khì, góa iáu ū chhun sím-mi̍h? cháiⁿ-iūⁿ iáu mn̄g góa kóng, Lí sím-mi̍h tāi-chì ah?

25Tàn ê人kā伊講，你m̄-thang hō͘阮聽見你ê聲，驚了躁性ê人來kāng lín，致到你kap全家lóng失落性命。Tàn ê lâng kā i kóng, Lí m̄-thang hō͘ goán thiaⁿ-kìⁿ lí ê siaⁿ, kiaⁿ-liáu sò-sèng ê lâng lâi kāng lín, tì-kàu lí kap choân-ke lóng sit-lo̍h sìⁿ-miā.

26Tàn ê人做in行；Bí-ka看見in 比伊khah強，就oa̍t-tńg身tò去伊ê厝。Tàn ê lâng chòe in kiâⁿ; Bí-ka khòaⁿ-kìⁿ in pí i khah-kiông, chiū oa̍t-tńg-sin tò-khì i ê chhù.

27In tòa Bí-ka所做ê，kap伊所有ê祭司，到La̍h-ek，看見安然無掛慮ê百姓，就用刀thâi死in，koh放火燒hit-ê城；In tòa Bí-ka só͘-chòe-ê, kap i só͘ ū ê chè-si, kàu La̍h-ek, khòaⁿ-kìⁿ an-jiân bô khòa-lū ê peh-sìⁿ, chiū ēng to thâi-sí in, koh pàng hé sio hit ê siâⁿ;

28也無人拯救，因為離開Se-tùn真遠，in koh無kap別人往來；hit-ê城tī hit-ê óa近Pek-lī-ha̍p ê山谷。iā bô lâng chín-kiù, in-ūi lī-khui Se-tùn chin hn̄g, in koh bô kap pa̍t-lâng óng-lâi; hit ê siâⁿ tī hit ê óa-kūn Pek-lī-ha̍p ê soaⁿ-kok.

29Tàn ê人koh tī-hia 起城來khiā起；照in祖公以色列ê kiáⁿ Tàn ê名，叫hit-ê城名Tàn；hit-ê城起頭名叫La̍h-ek。Tàn ê lâng koh tī-hia khí siâⁿ lâi khiā-khí; chiàu in chó͘-kong Í-sek-lia̍t ê kiáⁿ Tàn ê miâ, kiò hit ê siâⁿ miâ Tàn; hit ê siâⁿ khí-thâu miâ-kiò La̍h-ek.

30Tàn ê人就為家己chhāi hit-ê雕刻ê像；摩西ê孫，Kek-sūn ê kiáⁿ，約拿單，kap伊ê kiáⁿ孫，做Tàn ê支派ê祭司，直到hit地方ê人tú-tio̍h掠ê日。Tàn ê lâng chiū ūi ka-kī chhāi hit ê tiau-khek ê siōng; Mô͘-se ê sun, Kek-sūn ê kiáⁿ, Iok-ná-tan, kap i ê kiáⁿ-sun, chòe Tàn ê chi-phài ê chè-si, ti̍t-kàu hit tōe-hng ê lâng tú-tio̍h lia̍h ê ji̍t.

31上帝ê厝tī Sī-lô hiah-ê日，Tàn ê人為家己chhāi Bí-ka所做雕刻ê像。Siōng-tè ê chhù tī Sī-lô hiah ê ji̍t, Tàn ê lâng ūi ka-kī chhāi Bí-ka só͘ chòe tiau-khek ê siōng.