1Hit時以色列中無王；hit時Tàn ê人ê支派chhē地做業thang khiā起；因為到hit日，tī以色列支派中，in iáu未得tio̍h業。Hit-sî Í-sek-lia̍t tiong bô ông; hit-sî Tàn ê lâng ê chi-phài chhē tōe chòe-gia̍p thang khiā-khí; in-ūi kàu hit-ji̍t, tī Í-sek-lia̍t chi-phài-tiong, in iáu-bē tit-tio̍h gia̍p.

2Tàn ê人tùi Só-la̍h kap Í-si̍t-tô，差本族，眾百姓中，五個勇士，去偷看hit-ê地來查考，吩咐in講：lín去查考hit-ê地；in來到Í-hoat-liân山，入Bí-ka ê厝，就歇tī-hia。Tàn ê lâng tùi Só-la̍h kap Í-si̍t-tô, chhe pún-cho̍k, chèng peh-sìⁿ tiong, gō͘ ê ióng-sū, khì thau-khòaⁿ hit ê tōe lâi chhâ-khó, hoan-hù in kóng, Lín khì chhâ-khó hit ê tōe; in lâi kàu Í-hoat-liân soaⁿ, ji̍p Bí-ka ê chhù, chiū hioh tī-hia.

3In近Bí-ka ê厝，認tio̍h hit-ê少年利未人ê聲音，就入去問伊，Chī-chūi chhōa你來chia？你tī-chia做甚麼？你tī-chia得tio̍h甚麼？In kūn Bí-ka ê chhù, jīn-tio̍h hit ê siàu-liân Lī-bī lâng ê siaⁿ-im, chiū ji̍p-khì mn̄g i, Chī-chūi chhōa lí lâi chia? lí tī-chia chòe sím-mi̍h? lí tī-chia tit-tio̍h sím-mi̍h?

4伊講：Bí-ka款待我án-ni，án-ni；伊有倩我，我做伊ê祭司。I kóng, Bí-ka khoán-thāi góa án-ni, án-ni; i ū chhiàⁿ góa, góa chòe i ê chè-si.

5In kā伊講，請你問上帝，hō͘阮知阮所teh行ê路，興通á無？In kā i kóng, Chhiáⁿ lí mn̄g Siōng-tè, hō͘ goán chai goán só͘ teh kiâⁿ ê lō͘, heng-thong á-bô?

6祭司kā in講：Lín thang平安去；lín所行ê路是tī耶和華ê面前。Chè-si kā in kóng, Lín thang pêng-an khì; lín só͘ kiâⁿ ê lō͘ sī tī Iâ-hô-hoa ê bīn-chêng.

7Gō͘人就起身，來到La̍h-ek，看見hia ê百姓，安然khiā起，平安，無掛慮，親像Se-tùn人一樣；tī-hia無有掌權用甚麼事來攪擾in，in離開Se-tùn人遠遠，無kap別人往來。Gō͘-lâng chiū khí-sin, lâi kàu La̍h-ek, khòaⁿ-kìⁿ hia ê peh-sìⁿ, an-jiân khiā-khí, pêng-an, bô khòa-lū, chhin-chhiūⁿ Se-tùn lâng chi̍t-iūⁿ; tī-hia bô ū chiáng-koân ēng sím-mi̍h sū lâi kiáu-jiáu in, in lī-khui Se-tùn lâng hn̄g-hn̄g, bô kap pa̍t-lâng óng-lâi.

8Gō͘人tò來到Só-la̍h Í-si̍t-tô in兄弟hia；兄弟問in講：Lín有甚麼話？Gō͘-lâng tò-lâi kàu Só-la̍h Í-si̍t-tô in hiaⁿ-tī hia; hiaⁿ-tī mn̄g in kóng, Lín ū sím-mi̍h ōe?

9In應講，起來，咱上來去攻擊in，因為阮已經看hit-ê地；看ah，hit-ê地真好；lín啥事恬恬？tio̍h來去入，得tio̍h hit-ê地做業，m̄-thang 延chhiân。In ìn kóng, Khí-lâi, lán chiūⁿ-lâi khì kong-kek in, in-ūi goán í-keng khòaⁿ hit ê tōe; khòaⁿ ah, hit ê tōe chin-hó; lín siáⁿ-sū tiām-tiām? tio̍h lâi khì ji̍p, tit-tio̍h hit ê tōe chòe-gia̍p, m̄-thang iân-chhiân.

10Lín到hia，beh看安然khiā起ê百姓，所在也開闊；上帝已經將hit所在交tī lín ê手；地上所有ê物，hit所在無欠一項。Lín kàu hia, beh khòaⁿ an-jiân khiā-khí ê peh-sìⁿ, só͘-chāi iā khui-khoah; Siōng-tè í-keng chiong hit só͘-chāi kau tī lín ê chhiú; tōe-chiūⁿ só͘ ū ê mi̍h, hit só͘-chāi bô khiàm chi̍t-hāng.

11Tùi án-ni， Tàn族ê六百人，ta̍k-ê帶軍器，tùi Só-la̍h kap Í-si̍t-tô進前去。Tùi án-ni Tàn cho̍k ê la̍k-pah lâng, ta̍k-ê tòa kun-khì, tùi Só-la̍h kap Í-si̍t-tô chìn-chêng khì.

12In上去紮營tī猶大ê Ki-lia̍t-iâ-lîm；所以叫chit所在名Má-hap-lī-tàn，到今á日；看ah，這是tī Ki-lia̍t-iâ-lîm ê後面。In chiūⁿ-khì chat-iâⁿ tī Iû-tāi ê Ki-lia̍t-iâ-lîm; só͘-í kiò chit só͘-chāi miâ Má-hap-lī-tàn, kàu kin-á-ji̍t; khòaⁿ ah, che sī tī Ki-lia̍t-iâ-lîm ê āu-bīn.

13In tùi-hia去Í-hoat-liân山地，到Bí-ka ê厝。In tùi-hia khì Í-hoat-liân soaⁿ-tōe, kàu Bí-ka ê chhù.

14從前偷看La̍h-ek地ê五人，kā in ê兄弟講：chiah-ê厝內有í-hut-tek，kap家內偶像，kap雕刻ê像，鑄ê像，lín知mah？Taⁿ lín tio̍h想，看beh怎樣做。Chiông-chêng thau-khòaⁿ La̍h-ek tōe ê gō͘-lâng, kā in ê hiaⁿ-tī kóng, Chiah ê chhù-lāi ū í-hut-tek, kap ke-lāi ngó͘-siōng, kap tiau-khek ê siōng, chù ê siōng, lín chai mah? Taⁿ lín tio̍h siūⁿ, khòaⁿ beh cháiⁿ-iūⁿ chòe.

15In就oat去hia，到hit-ê少年ê利未人ê厝，就是Bí-ka ê厝，問伊平安。In chiū oat-khì hia, kàu hit ê siàu-liân ê Lī-bī lâng ê chhù, chiū-sī Bí-ka ê chhù, mn̄g i pêng-an.

16Tàn族hiah-ê六百人帶軍器，lóng khiā tī門口。Tàn cho̍k hiah ê la̍k-pah lâng tòa kun-khì, lóng khiā tī mn̂g-kháu.

17偷看地ê 五人就入去，將雕刻ê像，í-hut-tek，家內ê像，kap鑄ê像lóng the̍h去；祭司kap帶軍器ê六百人相kap khiā tī門口。Thau-khòaⁿ tōe ê gō͘-lâng chiū ji̍p-khì, chiong tiau-khek ê siōng, í-hut-tek, ke-lāi ê siōng, kap chù ê siōng lóng the̍h-khì; chè-si kap tòa kun-khì ê la̍k-pah lâng saⁿ-kap khiā tī mn̂g-kháu.

18Hit五人入Bí-ka ê厝，the̍h雕刻ê偶像，í-hut-tek，家內ê偶像，kap鑄ê像，祭司就問in講：Lín做甚麼ah？Hí gō͘-lâng ji̍p Bí-ka ê chhù, the̍h tiau-khek ê ngó͘-siōng, í-hut-tek, ke-lāi ê ngó͘-siōng, kap chù ê siōng, chè-si chiū mn̄g in kóng, Lín chòe sím-mi̍h ah?

19In應講，莫得做聲，用手掩嘴，tè阮來去，做阮ê父，做阮ê祭司；你做一人ê家ê祭司khah好，á是做以色列一支派一族ê祭司khah好ah？In ìn kóng, Bo̍h-tit chòe-siaⁿ, ēng chhiú ng-chhùi, tè goán lâi khì, chòe goán ê pē, chòe goán ê chè-si; lí chòe chi̍t-lâng ê ke ê chè-si khah-hó, á-sī chòe Í-sek-lia̍t chi̍t chi-phài chi̍t-cho̍k ê chè-si khah-hó ah?

20祭司心歡喜，就the̍h í-hut-tek，kap家內ê偶像，kap雕刻ê像，行tī百姓ê中間。Chè-si sim hoaⁿ-hí, chiū the̍h í-hut-tek, kap ke-lāi ê ngó͘-siōng, kap tiau-khek ê siōng, kiâⁿ tī peh-sìⁿ ê tiong-kan.

21In就oa̍t-tńg身離開hia，hō͘ gín-ná、cheng-siⁿ、貨財，做頭前。In chiū oa̍t-tńg-sin lī-khui hia, hō͘ gín-ná, cheng-siⁿ, hè-châi, chòe thâu-chêng.

22離開Bí-ka ê厝嶄然遠，Bí-ka hiah-ê厝邊lóng聚集，追趕Tàn ê人；喉叫Tàn ê人。Lī-khui Bí-ka ê chhù chám-jiân hn̄g, Bí-ka hiah ê chhù-piⁿ lóng chū-chi̍p, tui-kóaⁿ Tàn ê lâng; âu-kiò Tàn ê lâng.

23Tàn ê人oa̍t頭看，問Bí-ka講：你聚集hiah-ê人來，是甚麼tāi-chì ah？Tàn ê lâng oa̍t-thâu khòaⁿ, mn̄g Bí-ka kóng, Lí chū-chi̍p hiah ê lâng lâi, sī sím-mi̍h tāi-chì ah?

24伊講：我所妝ê上帝kap祭司，lín lóng帶去，我iáu有chhun甚麼？怎樣iáu問我講：你甚麼tāi-chì ah？I kóng, Góa só͘ chng ê siōng-tè kap chè-si, lín lóng tòa-khì, góa iáu ū chhun sím-mi̍h? cháiⁿ-iūⁿ iáu mn̄g góa kóng, Lí sím-mi̍h tāi-chì ah?

25Tàn ê人kā伊講，你m̄-thang hō͘阮聽見你ê聲，驚了躁性ê人來kāng lín，致到你kap全家lóng失落性命。Tàn ê lâng kā i kóng, Lí m̄-thang hō͘ goán thiaⁿ-kìⁿ lí ê siaⁿ, kiaⁿ-liáu sò-sèng ê lâng lâi kāng lín, tì-kàu lí kap choân-ke lóng sit-lo̍h sìⁿ-miā.

26Tàn ê人做in行；Bí-ka看見in 比伊khah強，就oa̍t-tńg身tò去伊ê厝。Tàn ê lâng chòe in kiâⁿ; Bí-ka khòaⁿ-kìⁿ in pí i khah-kiông, chiū oa̍t-tńg-sin tò-khì i ê chhù.

27In tòa Bí-ka所做ê，kap伊所有ê祭司，到La̍h-ek，看見安然無掛慮ê百姓，就用刀thâi死in，koh放火燒hit-ê城；In tòa Bí-ka só͘-chòe-ê, kap i só͘ ū ê chè-si, kàu La̍h-ek, khòaⁿ-kìⁿ an-jiân bô khòa-lū ê peh-sìⁿ, chiū ēng to thâi-sí in, koh pàng hé sio hit ê siâⁿ;

28也無人拯救，因為離開Se-tùn真遠，in koh無kap別人往來；hit-ê城tī hit-ê óa近Pek-lī-ha̍p ê山谷。iā bô lâng chín-kiù, in-ūi lī-khui Se-tùn chin hn̄g, in koh bô kap pa̍t-lâng óng-lâi; hit ê siâⁿ tī hit ê óa-kūn Pek-lī-ha̍p ê soaⁿ-kok.

29Tàn ê人koh tī-hia 起城來khiā起；照in祖公以色列ê kiáⁿ Tàn ê名，叫hit-ê城名Tàn；hit-ê城起頭名叫La̍h-ek。Tàn ê lâng koh tī-hia khí siâⁿ lâi khiā-khí; chiàu in chó͘-kong Í-sek-lia̍t ê kiáⁿ Tàn ê miâ, kiò hit ê siâⁿ miâ Tàn; hit ê siâⁿ khí-thâu miâ-kiò La̍h-ek.

30Tàn ê人就為家己chhāi hit-ê雕刻ê像；摩西ê孫，Kek-sūn ê kiáⁿ，約拿單，kap伊ê kiáⁿ孫，做Tàn ê支派ê祭司，直到hit地方ê人tú-tio̍h掠ê日。Tàn ê lâng chiū ūi ka-kī chhāi hit ê tiau-khek ê siōng; Mô͘-se ê sun, Kek-sūn ê kiáⁿ, Iok-ná-tan, kap i ê kiáⁿ-sun, chòe Tàn ê chi-phài ê chè-si, ti̍t-kàu hit tōe-hng ê lâng tú-tio̍h lia̍h ê ji̍t.

31上帝ê厝tī Sī-lô hiah-ê日，Tàn ê人為家己chhāi Bí-ka所做雕刻ê像。Siōng-tè ê chhù tī Sī-lô hiah ê ji̍t, Tàn ê lâng ūi ka-kī chhāi Bí-ka só͘ chòe tiau-khek ê siōng.

1當以色列無王ê時，有寄腳tī Í-hoat-liân山地hit-pêng ê一個利未人，娶一個猶大伯利恆ê cha-bó͘-gín-ná做細姨；Tng Í-sek-lia̍t bô ông ê sî, ū kià-kha tī Í-hoat-liân soaⁿ-tōe hit-pêng ê chi̍t ê Lī-bī lâng, chhōa chi̍t ê Iû-tāi Pek-lī-hêng ê cha-bó͘-gín-ná chòe sòe-î;

2細姨行淫背伊ê丈夫，離開伊tò去猶大伯利恆，到老父ê家，tòa hia四月日。sòe-î kiâⁿ-îm pōe i ê tiōng-hu, lī-khui i tò--khì Iû-tāi Pek-lī-hêng, kàu lāu-pē ê ke, tòa hia sì-ge̍h-ji̍t.

3伊ê丈夫起來，帶一個奴僕兩隻驢去jip伊，beh用好話安慰伊，chhōa伊tò來；伊就chhōa伊入老父ê厝；婦人人ê老父看見，就歡迎伊。I ê tiōng-hu khí-lâi, tòa chi̍t ê lô͘-po̍k nn̄g chiah lû khì jip i, beh ēng hó-ōe an-ùi i, chhōa i tò-lâi; i chiū chhōa i ji̍p lāu-pē ê chhù; hū-jîn-lâng ê lāu-pē khòaⁿ-kìⁿ, chiū hoan-gêng i.

4伊ê丈人，就是cha-bó͘-gín-ná ê老父，留伊；伊就kap伊tòa三日；in就相kap lim食，tiàm tī-hia。I ê tiūⁿ-lâng, chiū-sī cha-bó͘-gín-ná ê lāu-pē, lâu i; i chiū kap i tòa saⁿ-ji̍t; in chiū saⁿ-kap lim-chia̍h, tiàm tī-hia.

5到第四日，in透早起來，伊beh起身去；cha-bó͘-gín-ná ê老父kā kiáⁿ婿講：請你食淡薄餅做點心，後來chiah thang起身行。Kàu tē-sì ji̍t, in thàu-chá khí-lâi, i beh khí-sin khì; cha-bó͘-gín-ná ê lāu-pē kā kiáⁿ-sài kóng, Chhiáⁿ lí chia̍h tām-po̍h piáⁿ chòe tiám-sim, āu-lâi chiah thang khí-sin kiâⁿ.

6兩人就坐落去，相kap lim食；cha-bó͘-gín-ná ê老父對hit人講：請你歡喜koh tiàm一暝，hō͘你ê心快樂。Nn̄g-lâng chiū chē--lo̍h-khì, saⁿ-kap lim-chia̍h; cha-bó͘-gín-ná ê lāu-pē tùi hit-lâng kóng, Chhiáⁿ lí hoaⁿ-hí koh tiàm chi̍t-mî, hō͘ lí ê sim khoài-lo̍k.

7Hit人起來beh起身，伊ê丈人強強留伊；伊就koh歇一暝。Hit-lâng khí-lâi beh khí-sin, i ê tiūⁿ-lâng kiông-kiông lâu i; i chiū koh hioh chi̍t-mî.

8到第五日，伊透早起來beh起身；cha-bó͘-gín-ná ê老父kā伊講，請你koh點心，thèng候到日斜西；in兩人就相kap食。Kàu tē-gō͘ ji̍t, i thàu-chá khí-lâi beh khí-sin; cha-bó͘-gín-ná ê lāu-pē kā i kóng, Chhiáⁿ lí koh tiám-sim, thèng-hāu kàu ji̍t chhiâ-sai; in nn̄g lâng chiū saⁿ-kap chia̍h.

9Hit人kap伊ê細姨kap奴僕起來beh 起行；伊ê丈人，就是cha-bó͘-gín-ná ê老父，kā伊講，看ah，日beh暗，請你koh歇一暝，日beh落lah；你tio̍h歇chia，hō͘你ê心快樂；明á日透早起身tò去lín tau。Hit-lâng kap i ê sòe-î kap lô͘-po̍k khí-lâi beh khí kiâⁿ; i ê tiūⁿ-lâng, chiū-sī cha-bó͘-gín-ná ê lāu-pē, kā i kóng, Khòaⁿ ah, ji̍t beh àm, chhiáⁿ lí koh hioh chi̍t-mî, ji̍t beh lo̍h lah; lí tio̍h hioh chia, hō͘ lí ê sim khoài-lo̍k; bîn-á-ji̍t thàu-chá khí-sin tò--khì lín tau.

10Hit人m̄肯koh歇一暝，就起來起身，到Iâ-pò͘-su ê對面，Iâ-pò͘-su就是耶路撒冷；兩隻掛鞍ê驢，以及伊ê細姨，kap伊去；Hit-lâng m̄-khéng koh hioh chi̍t-mî, chiū khí-lâi khí-sin, kàu Iâ-pò͘-su ê tùi-bīn, Iâ-pò͘-su chiū-sī Iâ-lō͘-sat-léng; nn̄g-chiah kòa-oaⁿ ê lû, í-ki̍p i ê sòe-î, kap i khì;

11行近Iâ-pò͘-su ê時，日已經beh落；奴僕kā主人講：來ah，咱m̄值tio̍h oat入Iâ-pò͘-su人chit-ê城，歇暝tī-hia。kiâⁿ kūn Iâ-pò͘-su ê sî, ji̍t í-keng beh lo̍h; lô͘-po̍k kā chú-lâng kóng, Lâi ah, lán m̄-ta̍t-tio̍h oat-ji̍p Iâ-pò͘-su lâng chit ê siâⁿ, hioh-mî tī-hia.

12主人講：咱無beh oat入外邦人ê城，就是無屬以色列人ê；khah好咱tio̍h過來Ki-pí-a；Chú-lâng kóng, Lán bô beh oat-ji̍p gōa-pang lâng ê siâⁿ, chiū-sī bô sio̍k Í-sek-lia̍t lâng ê; khah-hó lán tio̍h kè-lâi Ki-pí-a;

13koh kā奴僕講：來，咱tio̍h去chiah-ê所在ê一個，來歇tī Ki-pí-a，á是La̍h-má。koh kā lô͘-po̍k kóng, Lâi, lán tio̍h khì chiah ê só͘-chāi ê chi̍t-ê, lâi hioh tī Ki-pí-a, á-sī La̍h-má.

14In就進前去；將近便雅憫ê Ki-pí-a，日已經落。In chiū chìn-chêng khì; chiong-kūn Piān-ngá-bín ê Ki-pí-a, ji̍t í-keng lo̍h.

15In就oat入去，beh歇tī Ki-pí-a；就入去坐tī城內ê街路；因為無人接納in入厝歇暝。In chiū oat-ji̍t-khì, beh hioh tī Ki-pí-a; chiū ji̍p-khì chē tī siâⁿ-lāi ê ke-lō͘; in-ūi bô lâng chiap-la̍p in ji̍p chhù hioh-mî.

16日暗有一個老人tùi 田裡做工tò來，伊本是Í-hoat-liân山地ê人，寄腳tī Ki-pí-a；總是hit所在ê人是便雅憫人。Ji̍t-àm ū chi̍t ê lāu-lâng tùi chhân--nih chòe-kang tò-lâi. I pún sī Í-hoat-liân soaⁿ-tōe ê lâng, kià-kha tī Ki-pí-a; chóng-sī hit só͘-chāi ê lâng sī Piān-ngá-bín lâng.

17老人kia̍h目看見人客tī城內ê街路，就問伊講：你tùi toh落來？beh去toh落？Lāu-lâng kia̍h-ba̍k khòaⁿ-kìⁿ lâng-kheh tī siâⁿ-lāi ê ke-lō͘, chiū mn̄g i kóng, Lí tùi toh-lo̍h lâi? beh khì toh-lo̍h?

18伊應講，阮tùi猶大伯利恆來，beh去Í-hoat-liân山地hit-pêng；我本tī-hia，過去猶大伯利恆；taⁿ我去耶和華ê厝；tī-chia無人接納我入伊ê厝；I ìn kóng, Goán tùi Iû-tāi Pek-lī-hêng lâi, beh khì Í-hoat-liân soaⁿ-tōe hit-pêng; góa pún tī-hia, kè--khì Iû-tāi Pek-lī-hêng; taⁿ góa khì Iâ-hô-hoa ê chhù; tī-chia bô lâng chiap-la̍p góa ji̍p i ê chhù;

19總是我有草有糧，thang hō͘驢，也有餅有酒thang hō͘本身，kap你ê女婢，kap tè你ê奴僕ê少年人，lóng無欠一項。chóng-sī góa ū chháu ū niû, thang hō͘ lû, iā ū piáⁿ ū chiú thang hō͘ pún-sin, kap lí ê lú-pī, kap tè lí ê lô͘-po̍k ê siàu-liân lâng, lóng bô khiàm chi̍t-hāng.

20老人講：願你平安；你所欠用ê是我tāi；獨獨你m̄-thang tī街路裡過暝。Lāu-lâng kóng, Goān lí pêng-an; lí só͘ khiàm-ēng-ê sī góa tāi; to̍k-to̍k lí m̄-thang tī ke-lō͘--nih kè-mî.

21Tùi án-ni，chhōa in到伊ê厝，飼伊ê驢；in就洗腳lim食。Tùi án-ni chhōa in kàu i ê chhù, chhī i ê lû; in chiū sóe-kha lim-chia̍h.

22In ê心tú teh快樂ê時，城內hiah-ê匪類圍纍伊ê厝，直直phah門，tùi厝主老人講：你將hit-ê入你ê厝ê人帶出來，阮beh kap伊交合。In ê sim tú teh khoài-lo̍k ê sî, siâⁿ-lāi hiah ê húi-lūi ûi-lûi i ê chhù, ti̍t-ti̍t phah-mn̂g, tùi chhù-chú lāu-lâng kóng, Lí chiong hit ê ji̍p lí ê chhù ê lâng tòa--chhut-lâi, goán beh kap i kau-ha̍p.

23Hit-ê厝主出來in hia，kā in講：我ê兄弟ah，m̄-thang，莫得做chit-ê pháiⁿ；chit人既然入我ê厝，lín就莫得做chit-ê見笑ê事。Hit ê chhù-chú chhut-lâi in hia, kā in kóng, Góa ê hiaⁿ-tī ah, m̄-thang, bo̍h-tit chòe chit ê pháiⁿ; chit-lâng kì-jiân ji̍p góa ê chhù, lín chiū bo̍h--tit chòe chit ê kiàn-siàu ê sū.

24我有cha-bó͘-kiáⁿ，iáu是在室女，koh有伊ê細姨；我chhōa伊出來，lín thang凌辱伊，chhut-chāi lín ê意思款待in；獨獨tùi chit人lín m̄-thang行chit-ê見笑事。Góa ū cha-bó͘-kiáⁿ, iáu sī chāi-sek-lú, koh ū i ê sòe-î; góa chhōa i chhut-lâi, lín thang lêng-jio̍k i, chhut-chāi lín ê ì-sù khoán-thāi in; to̍k-to̍k tùi chit-lâng lín m̄-thang kiâⁿ chit ê kiàn-siàu sū.

25總是hiah-ê人m̄聽伊ê話；hit人就將伊ê細姨牽出去外面交in；in就kap伊交合，thong暝凌辱伊；到早起天beh光ê時，chiah放伊去。Chóng-sī hiah ê lâng m̄-thiaⁿ i ê ōe; hit-lâng chiū chiong i ê sòe-î khan chhut-khì gōa-bīn kau in; in chiū kap i kau-ha̍p, thong-mî lêng-jio̍k i; kàu chá-khí thiⁿ beh kng ê sî, chiah pàng i khì.

26天phú光ê時，婦人人來到伊ê主人所歇hit-ê厝門口，就倒tī-hia，直到天光。Thiⁿ phú-kng ê sî, hū-jîn-lâng lâi kàu i ê chú-lâng só͘ hioh hit ê chhù mn̂g-kháu, chiū tó tī-hia, ti̍t-kàu thiⁿ-kng.

27天光早，伊ê主人起來開厝ê門，出去beh起身，看見hit-ê婦人人，就是伊ê細姨，倒tī厝門口，兩支手khòa tī戶碇裡；Thiⁿ-kng-chá i ê chú-lâng khí-lâi khui chhù ê mn̂g, chhut-khì beh khí-sin, khòaⁿ-kìⁿ hit ê hū-jîn-lâng, chiū-sī i ê sòe-î, tó tī chhù mn̂g-kháu, nn̄g ki chhiú khòa tī hō͘-tēng--nih;

28就kā婦人人講：起來，咱beh起身；總是伊無應；伊就kā伊扶tī驢ê頂面，起身去伊ê本所在。chiū kā hū-jîn-lâng kóng, Khí-lâi, lán beh khí-sin; chóng-sī i bô ìn; i chiū kā i hû tī lû ê téng-bīn, khí-sin khì i ê pún só͘-chāi.

29到伊ê厝，就用刀將伊ê細姨ê身屍kap 骨割做十二塊，差人the̍h去thong以色列ê全境。Kàu i ê chhù, chiū ēng to chiong i ê sòe-î ê sin-si kap kut koah chòe cha̍p-jī tè, chhe lâng the̍h-khì thong Í-sek-lia̍t ê choân-kéng.

30見若看見ê人lóng講：Tùi以色列人出埃及ê日，直到今á日，bē-bat án-ni行，也無看見；taⁿ lín tio̍h想，tio̍h參詳，然後chiah講。Kìⁿ-nā khòaⁿ-kìⁿ ê lâng lóng kóng, Tùi Í-sek-lia̍t lâng chhut Ai-ki̍p ê ji̍t, ti̍t-kàu kin-á-ji̍t, bē-bat án-ni kiâⁿ, iā bô khòaⁿ-kìⁿ; taⁿ lín tio̍h siūⁿ, tio̍h chham-siông, jiân-āu chiah kóng.

1Tùi án-ni，以色列眾人tùi Tàn到別是巴lóng出來，kap tiàm tī Ki-lia̍t ê人，全會聚集親像一人，tī Bí-su-pa，到耶和華ê面前。Tùi án-ni Í-sek-lia̍t chèng-lâng tùi Tàn kàu Pia̍t-sī-pa lóng chhut-lâi, kap tiàm tī Ki-lia̍t ê lâng, choân-hōe chū-chi̍p chhin-chhiūⁿ chi̍t-lâng, tī Bí-su-pa, kàu Iâ-hô-hoa ê bīn-chêng.

2百姓ê首領kap以色列眾支派lóng家己來khiā tī上帝百姓ê會中，kia̍h刀ê步兵共四十萬。Peh-sìⁿ ê siú-léng kap Í-sek-lia̍t chèng chi-phài lóng ka-kī lâi khiā tī Siōng-tè peh-sìⁿ ê hōe-tiong, kia̍h-to ê pō͘-peng kiōng sì-cha̍p-bān.

3(便雅憫人lóng聽見以色列人上到Bí-su-pa。) 以色列人就講：chit-ê pháiⁿ-tāi ê情由tio̍h kā阮講明。(Piān-ngá-bín lâng lóng thiaⁿ-kìⁿ Í-sek-lia̍t lâng chiūⁿ-kàu Bí-su-pa.) Í-sek-lia̍t lâng chiū kóng, Chit ê pháiⁿ-tāi ê chêng-iû tio̍h kā goán kóng-bêng.

4Hit-ê利未人，就是受害死ê婦人人ê丈夫，應講，我kap我ê細姨到便雅憫ê Ki-pí-a歇暝。Hit ê Lī-bī lâng, chiū-sī siū hái-sí ê hū-jîn-lâng ê tiōng-hu, ìn kóng, Góa kap góa ê sòe-î kàu Piān-ngá-bín ê Ki-pí-a hioh-mî.

5Ki-pí-a人起來攻擊我，暝時包圍我歇ê厝，想beh害死我，koh強姦我ê細姨，致到死；Ki-pí-a lâng khí-lâi kong-ke̍k góa, mî-sî pau-ûi góa hioh ê chhù, siūⁿ beh hāi-sí góa, koh kiông-kan góa ê sòe-î, tì-kàu sí;

6我就將我ê細姨割kui塊，差人the̍h到以色列得tio̍h做業ê全地；因為in tī以色列中行淫亂kap見笑事。góa chiū chiong góa ê sòe-î koah kui-tè, chhe lâng the̍h kàu Í-sek-lia̍t tit-tio̍h chòe-gia̍p ê choân-tōe; in-ūi in tī Í-sek-lia̍t tiong kiâⁿ îm-loān kap kiàn-siàu sū.

7Lín lóng總以色列人tio̍h打算議論。Lín lóng-chóng Í-sek-lia̍t lâng tio̍h táⁿ-sǹg gī-lūn.

8眾百姓lóng起來親像一人，講：阮無一人beh去伊ê布棚，也無一人beh tò去伊ê厝；Chèng peh-sìⁿ lóng khí-lâi chhin-chhiūⁿ chi̍t-lâng, kóng, Goán bô chi̍t-lâng beh khì i ê pò͘-pîⁿ, iā bô chi̍t-lâng beh tò--khì i ê chhù;

9阮對Ki-pí-a人beh án-ni行；照所抽ê籤去攻擊伊；goán tùi Ki-pí-a lâng beh án-ni kiâⁿ; chiàu só͘ thiu ê chhiam khì kong-kek i;

10阮beh tī以色列眾支派中，一百人取十人，一千取一百，一萬取一千，kā百姓運糧，hō͘ in到便雅憫ê Ki-pí-a ê時，thang照in tī以色列中所行見笑ê事來行tī in。goán beh tī Í-sek-lia̍t chèng chi-phài tiong, chi̍t-pah lâng chhú cha̍p-lâng, chi̍t-chheng chhú chi̍t-pah, chi̍t-bān chhú chi̍t-chheng, kā peh-sìⁿ ūn-niû, hō͘ in kàu Piān-ngá-bín ê Ki-pí-a ê sî, thang chiàu in tī Í-sek-lia̍t tiong só͘ kiâⁿ kiàn-siàu ê sū lâi kiâⁿ tī in.

11Tùi án-ni，以色列眾人聚集攻擊hit-ê城，大家連合親像一人。Tùi án-ni Í-sek-lia̍t chèng-lâng chū-chi̍p kong-kek hit ê siâⁿ, tāi-ke liân-ha̍p chhin-chhiūⁿ chi̍t-lâng.

12以色列chiah-ê支派差人遍遍kā便雅憫ê支派講：Lín中間所行ê，甚麼pháiⁿ ah？Í-sek-lia̍t chiah ê chi-phài chhe lâng piàn-piàn kā Piān-ngá-bín ê chi-phài kóng, Lín tiong-kan só͘ kiâⁿ ê, sím-mi̍h pháiⁿ ah?

13Taⁿ lín tio̍h將hiah-ê人，就是Ki-pí-a ê匪類，交出，阮thang hō͘ in死，tùi以色列中除去hit-ê pháiⁿ。總是便雅憫人m̄肯聽in兄弟以色列人ê話。Taⁿ lín tio̍h chiong hiah ê lâng, chiū-sī Ki-pí-a ê húi-lūi, kau-chhut, goán thang hō͘ in sí, tùi Í-sek-lia̍t tiong tû-khì hit ê pháiⁿ. Chóng-sī Piān-ngá-bín lâng m̄-khéng thiaⁿ in hiaⁿ-tī Í-sek-lia̍t lâng ê ōe.

14便雅憫人tùi in hiah-ê城出來，聚集到Ki-pí-a，beh kap以色列人交戰。Piān-ngá-bín lâng tùi in hiah ê siâⁿ chhut-lâi, chū-chi̍p kàu Ki-pí-a, beh kap Í-sek-lia̍t lâng kau-chiàn.

15Hit時便雅憫人，tùi ta̍k ê城點出kia̍h刀ê，共兩萬六千，另外iáu有Ki-pí-a人點出七百精練ê兵。Hit-sî Piān-ngá-bín lâng, tùi ta̍k ê siâⁿ tiám-chhut kia̍h-to-ê, kiōng nn̄g-bān la̍k-chheng, lēng-gōa iáu ū Ki-pí-a lâng tiám-chhut chhit-pah cheng-liān ê peng.

16Tī眾百姓ê中間有七百精練ê兵，慣練用tò手ê，ta̍k-ê能用索hìⁿ石，準準分毫無差。Tī chèng peh-sìⁿ ê tiong-kan ū chhit-pah cheng-liān ê peng, koàn-liān ēng tò-chhiú-ê, ta̍k-ê ōe ēng soh hìⁿ chio̍h, chún-chún hun-hô bô chha.

17便雅憫人以外，點出以色列人kia̍h刀ê，共四十萬，lóng是戰士。Piān-ngá-bín lâng í-gōa, tiám-chhut Í-sek-lia̍t lâng kia̍h-to-ê, kiōng sì-cha̍p bān, lóng sī chiàn-sū.

18以色列人就起來，到Pek-te̍k-lī，問上帝講：阮中間是誰 tio̍h事先上去，kap便雅憫人交戰ah？耶和華講：猶大tio̍h事先去。Í-sek-lia̍t lâng chiū khí-lâi, kàu Pek-te̍k-lī, mn̄g Siōng-tè kóng, Goán tiong-kan chī-chūi tio̍h tāi-seng chiūⁿ khì, kap Piān-ngá-bín lâng kau-chiàn ah? Iâ-hô-hoa kóng, Iû-tāi tio̍h tāi-seng khì.

19以色列透早起來，紮營攻擊Ki-pí-a。Í-sek-lia̍t thàu-chá khí-lâi, chat-iâⁿ kong-kek Ki-pí-a.

20以色列人就出來，beh kap便雅憫人交戰；以色列人排陣tī Ki-pí-a beh攻擊in。Í-sek-lia̍t lâng chiū chhut-lâi, beh kap Piān-ngá-bín lâng kau-chiàn; Í-sek-lia̍t lâng pâi-tīn tī Ki-pí-a beh kong-kek in.

21便雅憫人就tùi Ki-pí-a出來，hit日thâi死以色列人兩萬兩千，倒tī地裡。Piān-ngá-bín lâng chiū tùi Ki-pí-a chhut-lâi, hit-ji̍t thâi-sí Í-sek-lia̍t lâng nn̄g-bān nn̄g-chheng, tó tī tōe--nih.

22以色列人就家己奮勇，猶原tī頭一日排陣ê所在koh排陣。Í-sek-lia̍t lâng chiū ka-kī hùn-ióng, iû-goân tī thâu-chi̍t-ji̍t pâi-tīn ê só͘-chāi koh pâi-tīn.

23(以色列人上去，tī耶和華ê面前啼哭到ê-hng；問耶和華講：阮tio̍h koh上去kap阮ê兄弟便雅憫人交戰á m̄免？耶和華講：Tio̍h上去攻擊伊。)(Í-sek-lia̍t lâng chiūⁿ-khì, tī Iâ-hô-hoa ê bīn-chêng thî-khàu kàu ê-hng; mn̄g Iâ-hô-hoa kóng, Goán tio̍h koh chiūⁿ-khì kap goán ê hiaⁿ-tī Piān-ngá-bín lâng kau-chiàn á m̄-bián? Iâ-hô-hoa kóng, Tio̍h chiūⁿ-khì kong-kek i.)

24第二日以色列人就進前去攻擊便雅憫人。Tē-jī ji̍t Í-sek-lia̍t lâng chiū chìn-chêng khì kong-kek Piān-ngá-bín lâng.

25便雅憫人也tī第二日tùi Ki-pí-a出來，攻擊in；koh thâi死以色列人一萬八千人，倒tī地裡，lóng是kia̍h刀ê。Piān-ngá-bín lâng iā tī tē-jī ji̍t tùi Ki-pí-a chhut-lâi, kong-kek in; koh thâi-sí Í-sek-lia̍t lâng chi̍t-bān poeh-chheng lâng, tó tī tōe--nih, lóng sī kia̍h-to-ê.

26以色列人kap眾百姓lóng上去到Pek-te̍k-lī，tī-hia坐tī耶和華ê面前啼哭；hit日禁食到日暗，koh tī耶和華ê面前獻燒祭kap平安祭。Í-sek-lia̍t lâng kap chèng peh-sìⁿ lóng chiūⁿ-khì kàu Pek-te̍k-lī, tī-hia chē tī Iâ-hô-hoa ê bīn-chêng thî-khàu; hit-ji̍t kìm-chia̍h kàu ji̍t-àm, koh tī Iâ-hô-hoa ê bīn-chêng hiàn sio-chè kap pêng-an-chè.

27Hit時上帝ê約櫃tī-hia。亞倫ê孫，以利亞撒ê kiáⁿ，Hui-nî-hap hit時khiā tī伊ê面前。Hit-sî Siōng-tè ê iok-kūi tī-hia. A-lûn ê sun, Í-lī-a-sat ê kiáⁿ, Hui-nî-hap hit-sî khiā tī i ê bīn-chêng.

28以色列人問耶和華講：我tio̍h出去kap我ê兄弟便雅憫人交戰mah？á是tio̍h soah ah？耶和華講：你tio̍h上去，因為明á日我beh將in交tī你ê手。Í-sek-lia̍t lâng mn̄g Iâ-hô-hoa kóng, góa tio̍h chhut-khì kap góa ê hiaⁿ-tī Piān-ngá-bín lâng kau-chiàn mah? á-sī tio̍h soah ah? Iâ-hô-hoa kóng, Lí tio̍h chiūⁿ-khì, in-ūi bîn-á-ji̍t Góa beh chiong in kau tī lí ê chhiú.

29以色列人就埋伏兵tī Ki-pí-a ê四圍。Í-sek-lia̍t lâng chiū bâi-ho̍k peng tī Ki-pí-a ê sì-ûi.

30第三日以色列人koh上去攻擊便雅憫人，排列隊伍tī Ki-pí-a，kap前兩pái一樣。Tē-saⁿ ji̍t Í-sek-lia̍t lâng koh chiūⁿ-khì kong-kek Piān-ngá-bín lâng, pâi-lia̍t tūi-ngó͘ tī Ki-pí-a, kap chêng nn̄g-pái chi̍t-iūⁿ.

31便雅憫人就出去抵敵百姓，就受引誘離開城；in親像前兩pái tī 田裡起手thâi死以色列人約略三十個，tī大路頂；hiah-ê條路，一條thàng Pek-te̍k-lī，一條thàng Ki-pí-a。Piān-ngá-bín lâng chiū chhut-khì tí-te̍k peh-sìⁿ, chiū siū ín-iú lī-khui siâⁿ; in chhin-chhiūⁿ chêng nn̄g-pái tī chhân--nih khí-chhiú thâi-sí Í-sek-lia̍t lâng iok-lio̍k saⁿ-cha̍p-ê, tī tōa-lō͘-téng; hiah ê tiâu lō͘, chi̍t-tiâu thàng Pek-te̍k-lī , chi̍t-tiâu thàng Ki-pí-a.

32便雅憫人講：In猶原thâi輸tī咱ê面前。以色列人，講：咱tio̍h逃走，引誘in離開城到大路。Piān-ngá-bín lâng kóng, In iû-goân thâi-su tī lán ê bīn-chêng. Í-sek-lia̍t lâng, kóng, Lán tio̍h tô-cháu, ín-iú in lī-khui siâⁿ kàu tōa-lō͘.

33以色列眾人lóng對伊ê所在起來，排列隊伍tī Pa-le̍k-tha-má；以色列埋伏ê兵tùi in ê所在，就是Má-lī-ka-pa，衝出來。Í-sek-lia̍t chèng-lâng lóng tùi i ê só͘-chāi khí-lâi, pâi-lia̍t tūi-ngó͘ tī Pa-le̍k-tha-má; Í-sek-lia̍t bâi-ho̍k ê peng tùi in ê só͘-chāi, chiū-sī Má-lī-ka-pa, chhiong--chhut-lâi.

34Thong以色列有一萬精練ê兵，進前來攻擊Ki-pí-a，交戰ê勢面真猛烈；總是便雅憫人m̄知災厄到lah。Thong Í-sek-lia̍t ū chi̍t-bān cheng-liān ê peng, chìn-chêng lâi kong-kek Ki-pí-a, kau-chiàn ê sè-bīn chin béng-lia̍t; chóng-sī Piān-ngá-bín lâng m̄-chai chai-ē kàu lah.

35耶和華phah便雅憫tī以色列ê面前；hit日以色列人thâi死便雅憫兩萬五千一百人，lóng是kia̍h刀ê。Iâ-hô-hoa phah Piān-ngá-bín tī Í-sek-lia̍t ê bīn-chêng; hit-ji̍t Í-sek-lia̍t lâng thâi-sí Piān-ngá-bín nn̄g-bān gō͘-chheng chi̍t-pah lâng, lóng sī kia̍h-to-ê.

36便雅憫人chiah知in ê受phah；因為以色列人退讓便雅憫人，是為tio̍h in óa靠所設tī Ki-pí-a ê伏兵。Piān-ngá-bín lâng chiah chai in ê siū-phah; in-ūi Í-sek-lia̍t lâng thè-niū Piān-ngá-bín lâng, sī ūi-tio̍h in óa-khò só͘ siat tī Ki-pí-a ê ho̍k-peng.

37埋伏ê兵緊緊竄入Ki-pí-a；埋伏ê兵進前用刀thâi死thong城ê人。Bâi-ho̍k ê peng kín-kín chhoàn-ji̍p Ki-pí-a; bâi-ho̍k ê peng chìn-chêng ēng to thâi-sí thong-siâⁿ ê lâng.

38以色列人kap伏兵有事先約一個記號，就是hō͘火薰tùi城內chhèng起來。Í-sek-lia̍t lâng kap ho̍k-peng ū tāi-seng iok chi̍t ê kì-hō, chiū-sī hō͘ hé-hun tùi siâⁿ-lāi chhèng--khí-lâi.

39以色列人當交戰ê時oa̍t-tńg身；便雅憫人起手thâi死以色列人，約略三十個，就講：In猶原親像前pái thâi輸tī咱ê面前。Í-sek-lia̍t lâng tng kau-chiàn ê sî oa̍t-tńg-sin; Piān-ngá-bín lâng khí-chhiú thâi-sí Í-sek-lia̍t lâng, iok-lio̍k saⁿ-cha̍p-ê, chiū kóng, In iû-goân chhin-chhiūⁿ chêng-pái thâi-su tī lán ê bīn-chêng.

40當火燄親像煙柱tùi城中chhèng上去ê時，便雅憫人oa̍t頭看，看見thong城ê火薰抵天。Tng hé-iām chhin-chhiūⁿ ian-thiāu tùi siâⁿ-tiong chhèng--chiūⁿ-khì ê sî, Piān-ngá-bín lâng oa̍t-thâu khòaⁿ, khòaⁿ-kìⁿ thong-siâⁿ ê hé-hun tú-thiⁿ.

41以色列人koh oa̍t-tńg身；便雅憫人就真gông-ngia̍h，因為看見災厄到lah。Í-sek-lia̍t lâng koh oa̍t-tńg-sin; Piān-ngá-bín lâng chiū chin gông-ngia̍h, in-ūi khòaⁿ-kìⁿ chai-ē kàu lah.

42所以in tī以色列人ê面前oa̍t-tńg身ǹg曠野ê路逃走；總是追jip in真óa，tùi hiah-ê城出來ê in lóng thâi in tī hit中間。Só͘-í in tī Í-sek-lia̍t lâng ê bīn-chêng oa̍t-tńg-sin ǹg khòng-iá ê lō͘ tô-cháu; chóng-sī tui-jip in chin óa, tùi hiah ê siâⁿ chhut-lâi-ê in lóng thâi in tī hit tiong-kan.

43In圍困便雅憫人，追jip in，tī in歇腳ê所在thún踏in，到Ki-pí-a ê對面，ǹg日出ê所在。In ûi-khùn Piān-ngá-bín lâng, tui-jip in, tī in hioh-kha ê só͘-chāi thún-ta̍h in, kàu Ki-pí-a ê tùi-bīn, ǹg ji̍t-chhut ê só͘-chāi.

44便雅憫人死ê，有一萬八千；chiah-ê lóng是勇士；其餘ê人oa̍t-tńg身走去曠野，到Lîm-bûn ê石磐。Piān-ngá-bín lâng sí-ê, ū chi̍t-bān poeh-chheng; chiah-ê lóng sī ióng-sū; kî-û ê lâng oa̍t-tńg-sin cháu-khì khòng-iá, kàu Lîm-bûn ê chio̍h-pôaⁿ.

45以色列人tī大路裡收拾in五千人，親像拾麥屑一樣；koh追jip in到Ki-tùn，thâi死in兩千人。Í-sek-lia̍t lâng tī tōa-lō͘--nih siu-si̍p in gō͘-chheng lâng, chhin-chhiūⁿ khioh be̍h-seh chi̍t-iūⁿ; koh tui-jip in kàu Ki-tùn, thâi-sí in nn̄g-chheng lâng.

46Hit日便雅憫人死ê，共兩萬五千人；hiah-ê lóng是kia̍h刀ê勇士。Hit-ji̍t Piān-ngá-bín lâng sí-ê, kiōng nn̄g-bān gō͘-chheng lâng; hiah-ê lóng sī kia̍h-to ê ióng-sū.

47獨獨六百人oa̍t-tńg身走去曠野，到Lîm-bûn ê石磐，就tiàm tī Lîm-bûn ê石磐四月日。To̍k-to̍k la̍k-pah lâng oa̍t-tńg-sin cháu--khì khòng-iá, kàu Lîm-bûn ê chio̍h-pôaⁿ, chiū tiàm tī Lîm-bûn ê chio̍h-pôaⁿ sì-ge̍h-ji̍t.

48以色列人koh oa̍t-tńg攻擊便雅憫人，用刀phah死chiah-ê城中ê人kap cheng-siⁿ，以及一切所tú-tio̍h-ê；koh一切所到ê城lóng用火燒。Í-sek-lia̍t lâng koh oa̍t-tńg kong-kek Piān-ngá-bín lâng, ēng to phah-sí chiah ê siâⁿ-tiong ê lâng kap cheng-siⁿ, í-ki̍p it-chhè só͘ tú-tio̍h-ê; koh it-chhè só͘ kàu ê siâⁿ lóng ēng hé sio.