1約書亞死了後，以色列人問耶和華講：Chī-chūi tio̍h做頭上去kā阮攻擊迦南人，kap in交戰？Iok-su-a sí liáu-āu, Í-sek-lia̍t lâng mn̄g Iâ-hô-hoa kóng, Chī-chūi tio̍h chòe-thâu chiūⁿ-khì kā goán kong-kek Ka-lâm lâng, kap in kau-chiàn?

2耶和華講：猶大tio̍h上去；看ah，我已經將hit-ê地交tī伊ê手。Iâ-hô-hoa kóng, Iû-tāi tio̍h chiūⁿ-khì; khòaⁿ ah, Góa í-keng chiong hit ê tōe kau tī i ê chhiú.

3猶大對伊ê兄西門講：請你kap我上去到我所liam-tio̍h ê地，kap迦南人交戰；我也beh kap你去，到你所liam-tio̍h ê地；西門就kap伊去。Iû-tāi tùi i ê hiaⁿ Se-biān kóng, Chhiáⁿ lí kap góa chiūⁿ-khì kàu góa só͘ liam-tio̍h ê tōe, kap Ka-lâm lâng kau-chiàn; góa iā beh kap lí khì, kàu lí só͘ liam-tio̍h ê tōe; Se-biān chiū kap i khì.

4猶大就上去；耶和華將迦南人，kap Pí-lī-sé人，交tī in ê手；Iû-tāi chiū chiūⁿ-khì; Iâ-hô-hoa chiong Ka-lâm lâng, kap Pí-lī-sé lâng, kau tī in ê chhiú;

5in tī Pí-sek phah死in一萬人；koh tī Pí-sek tú-tio̍h A-to-nî-pí-sek，kap伊交戰；thâi贏迦南人kap Pí-lī-sé人。in tī Pí-sek phah-sí in chi̍t-bān lâng; koh tī Pí-sek tú-tio̍h A-to-nî-pí-sek, kap i kau-chiàn; thâi-iâⁿ Ka-lâm lâng kap Pí-lī-sé lâng.

6A-to-nî-pí-sek逃走，in追jip伊，掠tio̍h伊，剉斷伊ê手伊ê腳ê大pō͘母。A-to-nî-pí-sek tô-cháu, in tui-jip i, lia̍h-tio̍h i, chhò-tn̄g i ê chhiú i ê kha ê tōa-pō͘-bú.

7A-to-nî-pí-sek講：前有七十個王，手kap腳ê大pō͘母lóng 剉起來，tī我ê桌腳拾食物；taⁿ上帝照我所行ê報應我。In帶伊到耶路撒冷；伊就死tī-hia。A-to-nî-pí-sek kóng, Chêng ū chhit-cha̍p ê ông, chhiú kap kha ê tōa-pō͘-bú lóng chhò--khí-lâi, tī góa ê toh-kha khioh chia̍h-mi̍h; taⁿ Siōng-tè chiàu góa só͘-kiâⁿ-ê pò-èng góa. In tòa i kàu Iâ-lō͘-sat-léng; i chiū sí tī-hia.

8猶大人攻擊耶路撒冷，取伊，用刀thâi死in，koh放火燒城；Iû-tāi lâng kong-kek Iâ-lō͘-sat-léng, chhú i, ēng to thâi-sí in, koh pàng-hé sio siâⁿ;

9後來猶大人落去，kap tiàm tī山地，南勢ê地，平洋ê地ê迦南人交戰。āu-lâi Iû-tāi lâng lo̍h-khì, kap tiàm tī soaⁿ-tōe, lâm--sì ê tōe, pîⁿ-iûⁿ ê tōe ê Ka-lâm lâng kau-chiàn.

10猶大koh去，phah hiah-ê khiā起Hi-pek-lûn ê迦南人，thâi死Sī-su、A-hi-bān、That-mái；Hi-pek-lûn前名叫Ki-lia̍t-a-pa。Iû-tāi koh khì, phah hiah ê khiā-khí Hi-pek-lûn ê Ka-lâm lâng, thâi-sí Sī-su, A-hi-bān, That-mái; Hi-pek-lûn chêng miâ kiò Ki-lia̍t-a-pa.

11伊tùi-hia去phah Tí-phek khiā起ê百姓；I tùi-hia khì phah Tí-phek khiā-khí ê peh-sìⁿ;

12Tí-phek前名叫Ki-lia̍t-se-hut。迦勒講：若有人phah Ki-lia̍t-se-hut來取伊，我beh將我ê cha-bó͘-kiáⁿ Ap-sat hō͘伊做bó͘。Tí-phek chêng miâ kiò Ki-lia̍t-se-hut. Ka-le̍k kóng, Nā ū lâng phah Ki-lia̍t-se-hut lâi chhú i, góa beh chiong góa ê cha-bó͘-kiáⁿ Ap-sat hō͘ i chòe-bó͘.

13迦勒ê小弟Ki-la̍p-su ê kiáⁿ Gô-tô-liap取伊；伊就將伊ê cha-bó͘-kiáⁿ Ap-sat hō͘伊做bó͘。Ka-le̍k ê sió-tī Ki-la̍p-su ê kiáⁿ Gô-tô-liap chhú i; i chiū chiong i ê cha-bó͘-kiáⁿ Ap-sat hō͘ i chòe-bó͘.

14Ap-sat過門ê時勸丈夫tùi in老父討一坵田；Ap-sat tùi驢落來；迦勒問伊講：你beh甚麼ah？Ap-sat kè-mn̂g ê sî khǹg tiōng-hu tùi in lāu-pē thó chi̍t khu chhân; Ap-sat tùi lû lo̍h--lâi; Ka-le̍k mn̄g i kóng, Lí beh sím-mi̍h ah?

15伊對伊講，求你賜福我；你已經安置我tī南方ê地，求你hō͘我水泉。迦勒就用頂ê水泉，下ê水泉，hō͘伊。I tùi i kóng, Kiû lí sù-hok góa; lí í-keng an-tì góa tī lâm-hng ê tōe, kiû lí hō͘ góa chúi-chôaⁿ. Ka-le̍k chiū ēng téng ê chúi-chôaⁿ, ē ê chúi-chôaⁿ, hō͘ i.

16摩西ê外戚是Ki-nî人，伊ê kiáⁿ孫kap猶大ê kiáⁿ孫tùi棗樹城相kap上去，到A-la̍h-tek lâm-sì猶大ê曠野，kap百姓相kap khiā起。Mô͘-se ê gōa-chhek sī Ki-nî lâng, i ê kiáⁿ-sun kap Iû-tāi ê kiáⁿ-sun tùi chó-chhiū siâⁿ saⁿ-kap chiūⁿ--khì, kàu A-la̍h-tek lâm--sì Iû-tāi ê khòng-iá, kap peh-sìⁿ saⁿ-kap khiā-khí.

17猶大kap伊ê兄西門相kap去，phah死khiā起tī Sé-hoat ê迦南人，一盡毀滅伊；hit-ê城就名叫Hô-jíⁿ-má。Iû-tāi kap i ê hiaⁿ Se-biān saⁿ-kap khì, phah-sí khiā-khí tī Sé-hoat ê Ka-lâm lâng, it-chīn húi-bia̍t i; hit ê siâⁿ chiū miâ kiò Hô-jíⁿ-má.

18猶大koh取Ka-sat kap伊ê境界，A-si̍t-kî-lûn kap伊ê境界，Í-kek-lûn kap伊ê境界。Iû-tāi koh chhú Ka-sat kap i ê kéng-kài, A-si̍t-kî-lûn kap i ê kéng-kài, Í-kek-lûn kap i ê kéng-kài.

19耶和華kap猶大相kap tī-teh；伊就趕出山地khiā起ê百姓；總是bōe能趕出平洋khiā起ê百姓，因為in有鐵車。Iâ-hô-hoa kap Iû-tāi saⁿ-kap tī-teh; i chiū kóaⁿ-chhut soaⁿ-tōe khiā-khí ê peh-sìⁿ; chóng-sī bōe-ōe kóaⁿ-chhut pîⁿ-iûⁿ khiā-khí ê peh-sìⁿ, in-ūi in ū thih-chhia.

20In照摩西所講ê，用Hi-pek-lûn hō͘迦勒，伊就tùi-hia趕出A-la̍p三個kiáⁿ。In chiàu Mô͘-se só͘ kóng ê, ēng Hi-pek-lûn hō͘ Ka-le̍k, i chiū tùi-hia kóaⁿ-chhut A-la̍p saⁿ ê kiáⁿ.

21便雅憫人無趕出khiā起tī耶路撒冷ê Iâ-pò͘-su人；Iâ-pò͘-su人猶原tī耶路撒冷kap便雅憫人相kap khiā起，到今á日。Piān-ngá-bín lâng bô kóaⁿ-chhut khiā-khí tī Iâ-lō͘-sat-léng ê Iâ-pò͘-su lâng; Iâ-pò͘-su lâng iû-goân tī Iâ-lō͘-sat-léng kap Piān-ngá-bín lâng saⁿ-kap khiā-khí, kàu kin-á-ji̍t.

22約瑟家也上去攻擊Pek-te̍k-lī；耶和華kap in相kap tī-teh。Iok-sek ke iā chiūⁿ-khì kong-kek Pek-te̍k-lī; Iâ-hô-hoa kap in saⁿ-kap tī-teh.

23約瑟家差人去偷看Pek-te̍k-lī；hit-ê城頭先名叫Lō͘-su。Iok-sek-ke chhe lâng khì thau-khòaⁿ Pek-te̍k-lī; hit ê siâⁿ thâu-seng miâ kiò Lō͘-su.

24做偵探-ê看見一人tùi城內出來，就對伊講，求你用入城ê路報阮知，阮beh好款待你。Chòe cheng-thàm-ê khòaⁿ-kìⁿ chi̍t-lâng tùi siâⁿ-lāi chhut-lâi, chiū tùi i kóng, Kiû lí ēng ji̍p siâⁿ ê lō͘ pò goán chai, goán beh hó khoán-thāi lí.

25Hit人就報in入城ê路，in就用刀phah死城內ê百姓；獨獨放hit人kap伊全家去。Hit-lâng chiū pò in ji̍p siâⁿ ê lō͘, in chiū ēng to phah-sí siâⁿ-lāi ê peh-sìⁿ; to̍k-to̍k pàng hit-lâng kap i choân-ke khì.

26Hit人去Hek人ê地，起一座城，號名叫Lō͘-su；到今á日iáu叫chit-ê名。Hit-lâng khì Hek lâng ê tōe, khí chi̍t chō siâⁿ, hō miâ kiò Lō͘-su; kàu kin-á-ji̍t iáu kiò chit ê miâ.

27Má-ná-se也無趕出Pek-siān kap伊ê鄉社ê百姓，Tha-la̍p kap伊ê鄉社ê百姓，To-jíⁿ kap伊ê鄉社ê百姓，Í-pek-liân kap伊ê鄉社ê百姓，Bí-kiat-to kap伊ê鄉社ê百姓；迦南人就決意khiā起tī hiah-ê地方。Má-ná-se iā bô kóaⁿ-chhut Pek-siān kap i ê hiuⁿ-siā ê peh-sìⁿ, Tha-la̍p kap i ê hiuⁿ-siā ê peh-sìⁿ, To-jíⁿ kap i ê hiuⁿ-siā ê peh-sìⁿ, Í-pek-liân kap i ê hiuⁿ-siā ê peh-sìⁿ, Bí-kiat-to kap i ê hiuⁿ-siā ê peh-sìⁿ; Ka-lâm lâng chiū koat-ì khiā-khí tī hiah ê tōe-hng.

28到以色列強盛，就hō͘迦南人做苦工，無一盡趕in出。Kàu Í-sek-lia̍t kiông-sēng, chiū hō͘ Ka-lâm lâng chòe khó͘-kang, bô it-chīn kóaⁿ in chhut.

29Í-hoat-liân也無趕出khiā起tī Ki-sek ê迦南人；迦南人就tī in中間猶原khiā起tī Ki-sek。Í-hoat-liân iā bô kóaⁿ-chhut khiā-khí tī Ki-sek ê Ka-lâm lâng; Ka-lâm lâng chiū tī in tiong-kan iû-goân khiā-khí tī Ki-sek.

30Se-pò͘-lûn也無趕出Ki-lûn ê百姓，kap Ná-hap-la̍h ê百姓。迦南人就猶原khiā起tī in中間，來做苦工。Se-pò͘-lûn iā bô kóaⁿ-chhut Ki-lûn ê peh-sìⁿ, kap Ná-hap-la̍h ê peh-sìⁿ. Ka-lâm lâng chiū iû-goân khiā-khí tī in tiong-kan, lâi chòe khó͘-kang.

31A-siat也無趕出A-kho khiā起ê百姓，kap Se-tùn、A-hek-la̍h、A-kek-sek、Hek-pa、A-hut-kek、Lī-ha̍p khiā起ê百姓。A-siat iā bô kóaⁿ-chhut A-kho khiā-khí ê peh-sìⁿ, kap Se-tùn, A-hek-la̍h, A-kek-sek, Hek-pa, A-hut-kek, Lī-ha̍p khiā-khí ê peh-sìⁿ.

32A-sait人tòa tī khiā起hit所在迦南人ê中間，因為無趕in出去。A-sait lâng tòa tī khiā-khí hit só͘-chāi Ka-lâm lâng ê tiong-kan, in-ūi bô kóaⁿ in chhut-khì.

33Ná-hut-tha-lī無趕出Pek-sī-be̍k khiā起ê百姓，Pek-a-la̍p khiā起ê百姓；Ná-hut-tha-lī就tòa tī khiā起hit所在迦南人ê中間；總是Pek-sī-be̍k kap Pek-a-la̍p khiā起ê百姓lóng做苦工。Ná-hut-tha-lī bô kóaⁿ-chhut Pek-sī-be̍k khiā-khí ê peh-sìⁿ, Pek-a-la̍p khiā-khí ê peh-sìⁿ; Ná-hut-tha-lī chiū tòa tī khiā-khí hit só͘-chāi Ka-lâm lâng ê tiong-kan; chóng-sī Pek-sī-be̍k kap Pek-a-la̍p khiā-khí ê peh-sìⁿ lóng chòe khó͘-kang.

34A-mô͘-lī人強迫Tàn ê人khiā起tī山地，無容允in落去平洋。A-mô͘-lī lâng kiông-pek Tàn ê lâng khiā-khí tī soaⁿ-tōe, bô iông-ún in lo̍h-khì pîⁿ-iûⁿ.

35A-mô͘-lī人就決意khiā起tī Hi-lia̍t山，tī A-ngá-lûn，tī Sa-pin；後來約瑟家強盛，hō͘ in做苦工。A-mô͘-lī lâng chiū koat-ì khiā-khí tī Hi-lia̍t soaⁿ, tī A-ngá-lûn, tī Sa-pin; āu-lâi Iok-sek-ke kiông-sēng, hō͘ in chòe khó͘-kang.

36A-mô͘-lī人ê地界，是tùi A-khek-la̍h-pin山坪，tùi Se-la̍h上去。A-mô͘-lī lâng ê tōe-kài, sī tùi A-khek-la̍h-pin soaⁿ-phiâⁿ, tùi Se-la̍h chiūⁿ--khì.

1耶和華ê使者tùi Kiat-kah上到Pho-kim，講：我hō͘ lín tùi埃及上來，chhōa lín到我tùi lín列祖chiù-chōa ê地；我也bat講：所kap lín立ê約，我永遠無違背；Iâ-hô-hoa ê sù-chiá tùi Kiat-kah chiūⁿ kàu Pho-kim, kóng, Góa hō͘ lín tùi Ai-ki̍p chiūⁿ-lâi, chhōa lín kàu Góa tùi lín lia̍t-chó͘ chiù-chōa ê tōe; Góa iā bat kóng, só͘ kap lín li̍p ê iok, Góa éng-oán bô ûi-pōe;

2lín也m̄-thang kap chit所在khiā起ê百姓立約；tio̍h拆毀in ê壇。Lín竟然m̄聽我ê話，是怎樣án-ni行ah？lín iā m̄-thang kap chit só͘-chāi khiā-khí ê peh-sìⁿ li̍p-iok; tio̍h thiah-húi in ê tôaⁿ. Lín kéng-jiân m̄ thiaⁿ Góa ê ōe, sī cháiⁿ-iūⁿ án-ni kiâⁿ ah?

3因為án-ni我koh講：我無beh tùi lín ê面前趕出in，in beh做lín hia̍p下ê刺，in ê上帝beh做害lín ê羅網。In-ūi án-ni Góa koh kóng, Góa bô beh tùi lín ê bīn-chêng kóaⁿ-chhut in, in beh chòe lín hia̍p-ē ê chhì, in ê siōng-tè beh chòe hāi lín ê lô-bāng.

4耶和華ê使者對以色列眾人講chiah-ê話ê時，百姓就開聲啼哭；Iâ-hô-hoa ê sù-chiá tùi Í-sek-lia̍t chèng-lâng kóng chiah ê ōe ê sî, peh-sìⁿ chiū khui-siaⁿ thî-khàu;

5就號hit所在ê名叫Pho-kim；in tī-hia獻祭hō͘耶和華。chiū hō hit só͘-chāi ê miâ kiò Pho-kim; in tī-hia hiàn-chè hō͘ Iâ-hô-hoa.

6約書亞已經差以色列人去ê時，in ta̍k人歸in ê業，來得tio̍h in ê地。Iok-su-a í-keng chhe Í-sek-lia̍t lâng khì ê sî, in ta̍k-lâng kui in ê gia̍p, lâi tit-tio̍h in ê tōe.

7約書亞tī-teh ê日，kap約書亞死了後hiah-ê看見耶和華為以色列人所行大事ê長老iáu tī-teh ê時，百姓服事耶和華。Iok-su-a tī-teh ê ji̍t, kap Iok-su-a sí liáu-āu hiah ê khòaⁿ-kìⁿ Iâ-hô-hoa ūi Í-sek-lia̍t lâng só͘ kiâⁿ tōa-sū ê tióng-ló iáu tī-teh ê sî, peh-sìⁿ ho̍k-sāi Iâ-hô-hoa.

8耶和華ê奴僕，Lùn ê kiáⁿ約書亞，一百一十歲，就死。Iâ-hô-hoa ê lô͘-po̍k, Lùn ê kiáⁿ Iok-su-a, chi̍t-pah it-cha̍p hè, chiū sí.

9In就埋葬伊tī伊ê業ê界內，就是tī Í-hoat-liân山地ê Têng-ná-hi-lia̍t，tī Ka-si̍t山ê北勢。In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-hi-lia̍t, tī Ka-si̍t soaⁿ ê pak--sì.

10Hit代ê人lóng tò祖；以後koh一代 ê人興起，m̄知耶和華，也m̄知Hit-tāi ê lâng lóng tò-chó͘; í-āu koh chi̍t-tāi ê lâng heng-khí, m̄-chai Iâ-hô-hoa, iā m̄-chai ūi Í-sek-lia̍t lâng só͘ kiâⁿ ê sū.

11以色列人行耶和華看做pháiⁿ ê事，去服事Pa-le̍k；Í-sek-lia̍t lâng kiâⁿ Iâ-hô-hoa khòaⁿ-chòe pháiⁿ ê sū, khì ho̍k-sāi Pa-le̍k;

12棄sak in列祖ê上帝耶和華，就是chhōa in出埃及地ê；去tè別ê上帝，就是四圍hiah-ê百姓ê上帝跪拜in，來惹耶和華ê大受氣。khì-sak in lia̍t-chó͘ ê Siōng-tè Iâ-hô-hoa, chiū-sī chhōa in chhut Ai-ki̍p tōe ê; khì tè pa̍t ê siōng-tè, chiū-sī sì-ûi hiah ê peh-sìⁿ ê siōng-tè kūi-pài in, lâi jiá Iâ-hô-hoa ê tōa siū-khì.

13In也棄sak耶和華，去服事Pa-le̍k kap A-su-tha-lio̍k。In iā khì-sak Iâ-hô-hoa, khì ho̍k-sāi Pa-le̍k kap A-su-tha-lio̍k.

14耶和華受氣以色列ê人，將in交tī搶掠in ê人ê手，in就搶in；伊koh賣in hō͘四圍對敵ê手；致到in tī in ê對敵ê頭前無koh khiā能tiâu；Iâ-hô-hoa siū-khì Í-sek-lia̍t ê lâng, chiong in kau tī chhiúⁿ-lia̍h in ê lâng ê chhiú, in chiū chhiúⁿ in; I koh bōe in hō͘ sì-ûi tùi-te̍k ê chhiú; tì-kàu in tī in ê tùi-te̍k ê thâu-chêng bô koh khiā-ōe-tiâu;

15in無論去toh落，耶和華伸手降災厄hō͘ in，照耶和華所講ê話，koh照耶和華對in所chiù-chōa ê；in就極困苦。in bô-lūn khì toh-lo̍h, Iâ-hô-hoa chhun-chhiú kàng chai-ē hō͘ in, chiàu Iâ-hô-hoa só͘ kóng ê ōe, koh chiàu Iâ-hô-hoa tùi in só͘ chiù-chōa ê; in chiū ke̍k khùn-khó͘.

16耶和華就興起士師；in就救百姓脫離搶掠in ê人ê手。Iâ-hô-hoa chiū heng-khí sū-su; in chiū kiù peh-sìⁿ thoat-lī chhiúⁿ-lia̍h in ê lâng ê chhiú.

17總是in無聽thàn in ê士師，竟然行邪淫，tè別ê上帝來跪拜in；in ê列祖thàn耶和華ê命令所行ê路，in緊緊歪chhoa̍h伊，無照án-ni行。Chóng-sī in bô thiaⁿ-thàn in ê sū-su, kéng-jiân kiâⁿ siâ-îm, tè pa̍t ê siōng-tè lâi kūi-pài in; in ê lia̍t-chó͘ thàn Iâ-hô-hoa ê bēng-lēng só͘ kiâⁿ ê lō͘, in kín-kín oai-chhoa̍h i, bô chiàu án-ni kiâⁿ.

18耶和華kā in興起士師ê時，耶和華就kap士師tī-teh；也tī士師活tī-teh一切ê日，救in脫離對敵ê手；in因為受壓制苦楚，就吐氣，所以耶和華就退悔。Iâ-hô-hoa kā in heng-khí sū-su ê sî, Iâ-hô-hoa chiū kap sū-su tī-teh; iā tī sū-su oa̍h tī--teh it-chhè ê ji̍t, kiù in thoat-lī tùi-te̍k ê chhiú; in in-ūi siū ap-chè khó͘-chhó͘, chiū thó͘-khùi, só͘-í Iâ-hô-hoa chiū thè-hóe.

19到士師死了，in就oa̍t-tńg去行，比in ê父公koh khah-pháiⁿ，tè別ê上帝來服事in，跪拜in，lóng無改in ê所行kap in固執ê路。Kàu sū-su sí-liáu, in chiū oa̍t-tńg khì kiâⁿ, pí in ê pē-kong koh khah-pháiⁿ, tè pa̍t ê siōng-tè lâi ho̍k-sāi in, kūi-pài in, lóng bô kóe in ê só͘-kiâⁿ kap in kò͘-chip ê lō͘.

20耶和華就受氣以色列人，講：因為chit-ê百姓違背我ê約，就是我所命令in ê列祖ê，也無聽thàn我ê話；Iâ-hô-hoa chiū siū-khì Í-sek-lia̍t lâng, kóng, In-ūi chit ê peh-sìⁿ ûi-pōe Góa ê iok, chiū-sī Góa só͘ bēng-lēng in ê lia̍t-chó͘ ê, iā bô thiaⁿ-thàn Góa ê ōe;

21所以約書亞死ê時所chhun ê ta̍k族，以後我無beh koh tī in ê面前趕出一族；só͘-í Iok-su-a sí ê sî só͘ chhun ê ta̍k-cho̍k, í-āu Góa bô beh koh tī in ê bīn-chêng kóaⁿ-chhut chi̍t-cho̍k;

22thang用chiah-ê來試驗以色列人，看in肯執守耶和華ê道路來行伊，親像in ê列祖bat守伊，á無。thang ēng chiah-ê lâi chhì-giām Í-sek-lia̍t lâng, khòaⁿ in khéng chip-siú Iâ-hô-hoa ê tō-lō͘ lâi kiâⁿ i, chhin-chhiūⁿ in ê lia̍t-chó͘ bat siú i, á-bô.

23所以耶和華留chiah-ê族，無緊緊趕in出，也無將in交tī約書亞ê手。Só͘-í Iâ-hô-hoa lâu chiah ê cho̍k, bô kín-kín kóaⁿ in chhut, iā bô chiong in kau tī Iok-su-a ê chhiú.

1耶和華所留chiah-ê族，是beh用伊來試驗以色列人，就是hiah-ê m̄-bat見過迦南交戰ê事ê；Iâ-hô-hoa só͘ lâu chiah ê cho̍k, sī beh ēng i lâi chhì-giām Í-sek-lia̍t lâng, chiū-sī hiah-ê m̄-bat kìⁿ-kè Ka-lâm kau-chiàn ê sū ê;

2tiâu-tî beh hō͘以色列後代ê人知，來教示in交戰，就是hiah-ê前所未bat經過ê人。tiâu-tî beh hō͘ Í-sek-lia̍t āu-tāi ê lâng chai, lâi kà-sī in kau-chiàn, chiū-sī hiah-ê chêng só͘ bē bat keng-kè ê lâng.

3所留teh hiah-ê族，就是腓利士五個首領，kap一切ê迦南人、Se-tùn人，kap khiā起Lī-pa-lùn山ê Hi-bī人，tùi Pa-le̍k-hek-bûn山，到Hap-má口；Só͘ lâu--teh hiah ê cho̍k, chiū-sī Hui-lī-sū gō͘ ê siú-léng, kap it-chhè ê Ka-lâm lâng, Se-tùn lâng, kap khiā-khí Lī-pa-lùn soaⁿ ê Hi-bī lâng, tùi Pa-le̍k-hek-bûn soaⁿ, kàu Hap-má kháu;

4這就是beh用in來試驗以色列人，看in肯聽thàn耶和華託摩西所命令in列祖ê誡命á無。che chiū-sī beh ēng in lâi chhì-giām Í-sek-lia̍t lâng, khòaⁿ in khéng thiaⁿ-thàn Iâ-hô-hoa thok Mô͘-se só͘ bēng-lēng in lia̍t-chó͘ ê kài-bēng á-bô.

5Tùi án-ni，以色列人khiā起tī迦南人、Hek人、A-mô͘-lī人、Pí-lī-sé人、Hi-bī人、Iâ-pò͘-su人ê中間；娶in ê cha-bó͘-kiáⁿ做bó͘；也用cha-bó͘-kiáⁿ嫁in ê kiáⁿ，Tùi án-ni Í-sek-lia̍t lâng khiā-khí tī Ka-lâm lâng, Hek lâng, A-mô͘-lī lâng, Pí-lī-sé lâng, Hi-bī lâng, Iâ-pò͘-su lâng ê tiong-kan; chhōa in ê cha-bó͘-kiáⁿ chòe-bó͘; iā ēng cha-bó͘-kiáⁿ kè in ê kiáⁿ,

6續服事in hiah-ê上帝。sòa ho̍k-sāi in hiah ê siōng-tè.

7以色列人行耶和華所看做pháiⁿ ê事，bōe記得耶和華in ê上帝，去服事chiah-ê Pa-le̍k kap A-su-tha-lio̍k。Í-sek-lia̍t lâng kiâⁿ Iâ-hô-hoa só͘ khòaⁿ-chòe pháiⁿ ê sū, bōe-kì-tit Iâ-hô-hoa in ê Siōng-tè, khì ho̍k-sāi chiah ê Pa-le̍k kap A-su-tha-lio̍k.

8所以耶和華受氣以色列人，賣in hō͘ Bí-só͘-pho-tāi-bí王Kó͘-san-lī-sat-tiân ê手；以色列人服事Kó͘-san-lī-sat-tiân八年。Só͘-í Iâ-hô-hoa siū-khì Í-sek-lia̍t lâng, bōe in hō͘ Bí-só͘-pho-tāi-bí ông Kó͘-san-lī-sat-tiân ê chhiú; Í-sek-lia̍t lâng ho̍k-sāi Kó͘-san-lī-sat-tiân poeh nî.

9以色列人求叫耶和華ê時，耶和華就kā以色列人興起一個拯救ê救in；就是迦勒ê小弟Ki-la̍p-su ê kiáⁿ Gô-tô-liap。Í-sek-lia̍t lâng kiû-kiò Iâ-hô-hoa ê sî, Iâ-hô-hoa chiū kā Í-sek-lia̍t lâng heng-khí chi̍t ê chín-kiù--ê kiù in; chiū-sī Ka-le̍k ê sió-tī Ki-la̍p-su ê kiáⁿ Gô-tô-liap.

10耶和華ê神臨到伊，伊就做以色列ê士師，出去交戰。耶和華將Bí-só͘-pho-tāi-bí王Kó͘-san-lī- sat-tiân交tī伊ê手，伊就khah贏Kó͘-san-lī-sat-tiân。Iâ-hô-hoa ê Sîn lîm-kàu i, i chiū chòe Í-sek-lia̍t ê sū-su, chhut-khì kau-chiàn. Iâ-hô-hoa chiong Bí-só͘-pho-tāi-bí ông Kó͘-san-lī-sat-tiân kau tī i ê chhiú, i chiū khah-iâⁿ Kó͘-san-lī-sat-tiân.

11Tùi án-ni， hit-ê地方太平四十年，Ki-la̍p-su ê kiáⁿ Gô-tô-liap死。Tùi án-ni hit ê tōe-hng thài-pêng sì-cha̍p nî. Ki-la̍p-su ê kiáⁿ Gô-tô-liap sí.

12以色列人koh行耶和華所看做pháiⁿ ê事；耶和華就hō͘ Mô͘-ap王I-ki-lûn強盛，攻擊以色列人；因為in行耶和華所看做pháiⁿ-ê。Í-sek-lia̍t lâng koh kiâⁿ Iâ-hô-hoa só͘ khòaⁿ-chòe pháiⁿ ê sū; Iâ-hô-hoa chiū hō͘ Mô͘-ap ông I-ki-lûn kiông-sēng, kong-kek Í-sek-lia̍t lâng; in-ūi in kiâⁿ Iâ-hô-hoa só͘ khòaⁿ-chòe pháiⁿ-ê.

13I-ki-lûn聚集A-bûn人kap A-má-le̍k人óa伊，去phah以色列人，佔棗樹ê城。I-ki-lûn chū-chi̍p A-bûn lâng kap A-má-le̍k lâng óa i, khì phah Í-sek-lia̍t lâng, chiàm chó-chhiū ê siâⁿ.

14Tùi án-ni，以色列人服事Mô͘-ap王I-ki-lûn十八年。Tùi án-ni Í-sek-lia̍t lâng ho̍k-sāi Mô͘-ap ông I-ki-lûn cha̍p-poeh nî.

15以色列人求叫耶和華ê時，耶和華就kā in興起一個拯救ê；就是便雅憫人Ki-la̍h ê kiáⁿ Í-hut；伊是慣練用tò手ê；以色列人託重伊送禮物hō͘ Mô͘-ap王I-ki-lûn。Í-sek-lia̍t lâng kiû-kiò Iâ-hô-hoa ê sî, Iâ-hô-hoa chiū kā in heng-khí chi̍t ê chín-kiù--ê; chiū-sī Piān-ngá-bín lâng Ki-la̍h ê kiáⁿ Í-hut; i sī koàn-liān ēng tò-chhiú-ê; Í-sek-lia̍t lâng thok-tiōng i sàng lé-mi̍h hō͘ Mô͘-ap ông I-ki-lûn.

16Í-hut為家己phah一支雙面內ê劍，長一肘，縛tī chiàⁿ腿衣服ê內面。Í-hut ūi ka-kī phah chi̍t-ki siang-bīn lāi ê kiàm, tn̂g chi̍t-tiú, pa̍k tī chiàⁿ-thúi i-ho̍k ê lāi-bīn.

17伊用禮物獻hō͘ Mô͘-ap王I-ki-lûn；I-ki-lûn是真肥ê人。I ēng lé-mi̍h hiàn-hō͘ Mô͘-ap ông I-ki-lûn; I-ki-lûn sī chin pûi ê lâng.

18獻禮物已經明白，就差帶禮物ê人lóng去。Hiàn lé-mi̍h í-keng bêng-pe̍k, chiū chhe tòa lé-mi̍h ê lâng lóng khì.

19伊本身tùi近Kiat-kah phah石像ê所在oat-倒tńg來，講：王ah，我有祕密ê事beh kā你講；王講：肅靜；khiā tī伊身邊ê人就lóng退出。I pún-sin tùi kūn Kiat-kah phah chio̍h-siōng ê só͘-chāi oat-tò-tńg lâi, kóng, Ông ah, góa ū pì-bi̍t ê sū beh kā lí kóng; ông kóng, Sok-chēng; khiā tī i sin-piⁿ ê lâng chiū lóng thè-chhut.

20Í-hut就近伊，王家己一個坐tī涼冷ê樓頂；Í-hut講：我奉上帝ê命令有tāi-chì來報你；王就tùi座位khiā起來。Í-hut chiū-kūn i, ông ka-kī chi̍t-ê chē tī liâng-léng ê lâu-téng; Í-hut kóng, Góa hōng Siōng-tè ê bēng-lēng ū tāi-chì lâi pò lí; ông chiū tùi chō-ūi khiā khí-lâi.

21Í-hut就伸tò手，tùi chiàⁿ腿拔出劍，刺入王ê腹肚；Í-hut chiū chhun tò-chhiú, tùi chiàⁿ-thúi pu̍ih-chhut kiàm, chhì-ji̍p ông ê pak-tó͘;

22劍ê柄也續入去，劍hō͘油咬tiâu，因為伊無對伊ê腹肚拔劍出來；就thàng過ka-chiah出來。kiàm ê pìⁿ iā sòa ji̍p-khì, kiàm hō͘ iû kā-tiâu, in-ūi i bô tùi i ê pak-tó͘ pu̍ih kiàm chhut-lâi; chiū thàng-kè ka-chiah chhut-lâi.

23Í-hut就出去到léng-lông，將hiah-ê樓門關鎖。Í-hut chiū chhut-khì kàu léng-lông, chiong hiah ê lâu-mn̂g koaiⁿ-só.

24伊出去了，王ê奴僕到，看見樓門關鎖，就講：伊的確是tī樓頂teh大便。I chhut-khì liáu, ông ê lô͘-po̍k kàu, khòaⁿ-kìⁿ lâu-mn̂g koaiⁿ-só, chiū kóng, I tek-khak sī tī lâu-téng teh tāi-piān.

25In thèng候到gông-ngia̍h，看見伊無開樓頂ê門，就kia̍h鎖匙來開；看ah，in ê主人已經死，倒tī地裡。In thèng-hāu kàu gông-ngia̍h, khòaⁿ-kìⁿ i bô khui lâu-téng ê mn̂g, chiū kia̍h só-sî lâi khui; khòaⁿ ah, in ê chú-lâng í-keng sí, tó tī tōe--nih.

26In 延chhiân ê時，Í-hut就逃走，已經過phah石像ê地，閃走到Se-i-la̍h。In iân-chhiân ê sî, Í-hut chiū tô-cháu, í-keng kè phah chio̍h-siōng ê tōe, siám cháu kàu Se-i-la̍h.

27已經到，就tī Í-hoat-liân山地pûn哨角；以色列人就tè伊tùi山地落去，伊行tī頭前；Í-keng kàu, chiū tī Í-hoat-liân soaⁿ-tōe pûn sàu-kak; Í-sek-lia̍t lâng chiū tè i tùi soaⁿ-tōe lo̍h--khì, i kiâⁿ tī thâu-chêng;

28對in講，Lín tè我來，因為耶和華已經將lín ê對敵Mô͘-ap人交tī lín ê手。In就tè伊落去，把守Mô͘-ap ê對面，約旦河ê渡頭，無容允一人過去；tùi in kóng, Lín tè góa lâi, in-ūi Iâ-hô-hoa í-keng chiong lín ê tùi-te̍k Mô͘-ap lâng kau tī lín ê chhiú. In chiū tè i lo̍h--khì, pé-siú Mô͘-ap ê tùi-bīn, Iok-tàn hô ê tō͘-thâu, bô iông-ún chi̍t-lâng kè-khì;

29Hit時thâi死Mô͘-ap人約略一萬，lóng是大漢ê勇士，無一個走離。hit-sî thâi-sí Mô͘-ap lâng iok-lio̍k chi̍t-bān, lóng sī tōa-hàn ê ióng-sū, bô chi̍t-ê cháu-lī.

30Tùi án-ni， Mô͘-ap就屈服tī以色列人；地方太平八十年。Tùi án-ni Mô͘-ap chiū khut-ho̍k tī Í-sek-lia̍t lâng; tōe-hng thài-pêng poeh-cha̍p nî.

31Í-hut了後，有A-ná ê kiáⁿ San-ka，伊用趕牛ê鐵刺phah死六百ê腓利士人。伊也救以色列人。Í-hut liáu-āu, ū A-ná ê kiáⁿ San-ka, i ēng kóaⁿ-gû ê thih-chhì phah-sí la̍k-pah ê Hui-lī-sū lâng. I iā kiù Í-sek-lia̍t lâng.