1以色列人koh行耶和華所看做pháiⁿ ê事，耶和華就交in tī米甸ê手，歷過七年。Í-sek-lia̍t lâng koh kiâⁿ Iâ-hô-hoa só͘ khòaⁿ-chòe pháiⁿ ê sū, Iâ-hô-hoa chiū kau in tī Bí-tiân ê chhiú, le̍k-kè chhit-nî.

2米甸ê手壓制以色列人；以色列人為tio̍h米甸人ê緣故，就為家己tī山裡開穴kap洞，kap險要ê所在。Bí-tiân ê chhiú ap-chè Í-sek-lia̍t lâng; Í-sek-lia̍t lâng ūi-tio̍h Bí-tiân lâng ê iân-kò͘, chiū ūi ka-kī tī soaⁿ--nih khui hia̍t kap tōng, kap hiám-iàu ê só͘-chāi.

3以色列人掖種了後，米甸人，A-má-le̍k人，kap東方ê人，lóng上來攻擊in；Í-sek-lia̍t lâng iā-chéng liáu-āu, Bí-tiân lâng, A-má-le̍k lâng, kap tang-hng ê lâng, lóng chiūⁿ-lâi kong-kek in;

4紮營tī in ê對面，phah-pháiⁿ hit所在ê土產，到Ka-sat，無留食物hō͘以色列人，羊kap牛kap驢也無。chat-iâⁿ tī in ê tùi-bīn, phah-pháiⁿ hit só͘-chāi ê thó͘-sán, kàu Ka-sat, bô lâu chia̍h-mi̍h hō͘ Í-sek-lia̍t lâng, iûⁿ kap gû kap lû iā bô.

5因為in帶cheng-siⁿ kap布棚上來，親像草蜢hiah-chōe來，人kap駱駝算bōe了；in入chit-ê地方beh phah-pháiⁿ伊。In-ūi in tòa cheng-siⁿ kap pò͘-pîⁿ chiūⁿ-lâi, chhin-chhiūⁿ chháu-meh hiah-chōe lâi, lâng kap lo̍k-tô sǹg-bōe-liáu; in ji̍p chit ê tōe-hng beh phah-pháiⁿ i.

6以色列人因為米甸人ê緣故，困苦到極；以色列人就求叫耶和華。Í-sek-lia̍t lâng in-ūi Bí-tiân lâng ê iân-kò͘, khùn-khó͘ kàu-ke̍k; Í-sek-lia̍t lâng chiū kiû-kiò Iâ-hô-hoa.

7以色列人因為米甸人ê緣故求叫耶和華ê時，Í-sek-lia̍t lâng in-ūi Bí-tiân lâng ê iân-kò͘ kiû-kiò Iâ-hô-hoa ê sî,

8耶和華就差先知到以色列人hia，對in講，耶和華以色列ê上帝án-ni講：我bat chhōa lín tùi埃及上來，tùi做奴才ê家出來；Iâ-hô-hoa chiū chhe sian-ti kàu Í-sek-lia̍t lâng hia, tùi in kóng, Iâ-hô-hoa Í-sek-lia̍t ê Siōng-tè án-ni kóng, Góa bat chhōa lín tùi Ai-ki̍p chiūⁿ-lâi, tùi chòe lô͘-châi ê ke chhut-lâi;

9我也救lín脫離埃及人ê手，也脫離一切壓制lín ê人ê手，tùi lín ê面前趕in出，用in ê地hō͘ lín；Góa iā kiù lín thoat-lī Ai-ki̍p lâng ê chhiú, iā thoat-lī it-chhè ap-chè lín ê lâng ê chhiú, tùi lín ê bīn-chêng kóaⁿ in chhut, ēng in ê tōe hō͘ lín;

10我也對lín講，我是耶和華lín ê上帝，lín khiā起A-mō͘-lī人ê地，m̄-thang驚in ê上帝；總是lín m̄聽我ê話。Góa iā tùi lín kóng, Góa sī Iâ-hô-hoa lín ê Siōng-tè, lín khiā-khí A-mō͘-lī lâng ê tōe, m̄-thang kiaⁿ in ê siōng-tè; chóng-sī lín m̄-thiaⁿ Góa ê ōe.

11耶和華ê使者到Gô-hut-la̍h，坐tī A-pí-í-siā族ê人Iok-a-si ê橡樹腳；Iok-a-si ê kiáⁿ基甸tī酒窟hia teh phah麥，m̄-ài hō͘米甸人看見。Iâ-hô-hoa ê sù-chiá kàu Gô-hut-la̍h, chē tī A-pí-í-siā cho̍k ê lâng Iok-a-si ê siōng-chhiū-kha; Iok-a-si ê kiáⁿ Ki-tiân tī chiú-khut hia teh phah-be̍h, m̄-ài hō͘ Bí-tiân lâng khòaⁿ-kìⁿ.

12耶和華ê使者對基甸顯現，對伊講，大氣力ê勇士ah，耶和華kap你tī-teh。Iâ-hô-hoa ê sù-chiá tùi Ki-tiân hián-hiān, tùi i kóng, Tōa khùi-la̍t ê ióng-sū ah, Iâ-hô-hoa kap lí tī-teh.

13基甸對伊講，我ê主ah，若耶和華kap阮tī-teh，阮怎樣tú-tio̍h這一切ê事ah？阮ê列祖所kā阮講耶和華hiah-ê奇事tī tah落ah？in講：伊kiám無chhōa阮tùi埃及上來mah？Taⁿ耶和華放sak阮，將阮交tī米甸人ê手。Ki-tiân tùi i kóng, Góa ê chú ah, nā Iâ-hô-hoa kap goán tī-teh, goán cháiⁿ-iūⁿ tú-tio̍h che it-chhè ê sū ah? goán ê lia̍t-chó͘ só͘ kā goán kóng Iâ-hô-hoa hiah ê kî-sū tī tah-lo̍h ah? in kóng, I kiám bô chhōa goán tùi Ai-ki̍p chiūⁿ-lâi mah? Taⁿ Iâ-hô-hoa pàng-sak goán, chiong goán kau tī Bí-tiân lâng ê chhiú.

14耶和華看基甸，kā伊講，tio̍h用你chit-ê力去，來救以色列出米甸人ê手；我kiám無差你mah？Iâ-hô-hoa khòaⁿ Ki-tiân, kā i kóng, Tio̍h ēng lí chit ê la̍t khì, lâi kiù Í-sek-lia̍t chhut Bí-tiân lâng ê chhiú; Góa kiám bô chhe lí mah?

15基甸kā伊講，主ah，我beh用甚麼救以色列？看ah，我ê家是Má-ná-se中第一sòng-hiong ê，tī我老父ê家我是第一細ê。Ki-tiân kā I kóng, Chú ah, góa beh ēng sím-mi̍h kiù Í-sek-lia̍t? khòaⁿ ah, góa ê ke sī Má-ná-se tiong tē-it sòng-hiong ê, tī góa lāu-pē ê ke góa sī tē-it sòe ê.

16耶和華對伊講，我beh kap你tī-teh，你beh phah米甸人，親像phah一人一樣。Iâ-hô-hoa tùi i kóng, Góa beh kap lí tī-teh, lí beh phah Bí-tiân lâng, chhin-chhiūⁿ phah chi̍t-lâng chi̍t-iūⁿ.

17伊kā伊講，我若tī你ê面前得tio̍h恩典，求你hō͘我一個兆頭thang知kap我講ê就是你。I kā I kóng, Góa nā tī Lí ê bīn-chêng tit-tio̍h un-tián, kiû Lí hō͘ góa chi̍t ê tiāu-thâu thang chai kap góa kóng-ê chiū-sī Lí.

18請你m̄-thang離開chia，thèng候我koh來你chia，帶我ê禮物hē tī你ê面前。伊講：我beh thèng候你koh來。Chhiáⁿ Lí m̄-thang lī-khui chia, thèng-hāu góa koh lâi lí chia, tòa góa ê lé-mi̍h hē tī Lí ê bīn-chêng. I kóng, Góa beh thèng-hāu lí koh lâi.

19基甸去備辦一隻山羊á，用一i-hoat ê麵粉做無酵餅；肉hē tī筐裡，湯貯tī壺裡，帶到橡樹腳，獻hō͘伊。Ki-tiân khì pī-pān chi̍t chiah soaⁿ-iûⁿ-á, ēng chi̍t i-hoat ê mī-hún chòe bô-kàⁿ-piáⁿ; bah hē tī kheng--nih, thng tóe tī ô͘--nih, tòa kàu siōng-chhiū-kha, hiàn hō͘ I.

20上帝ê使者吩咐伊講：肉kap無酵餅hē tī chit-ê石磐頂，湯倒出來；伊照án-ni行。Siōng-tè ê sù-chiá hoan-hù i kóng, Bah kap bô-kàⁿ-piáⁿ hē tī chit ê chio̍h-pôaⁿ-téng, thng tò--chhut-lâi; i chiàu án-ni kiâⁿ.

21耶和華ê使者伸出手裡所kia̍h ê柺á尾，來tuh-tio̍h肉kap無酵餅；就有火tùi石磐出來，一盡燒肉kap無酵餅；耶和華ê使者就去，無koh看見。Iâ-hô-hoa ê sù-chiá chhun-chhut chhiú--nih só͘ kia̍h ê koáiⁿ-á-bé, lâi tuh-tio̍h bah kap bô-kàⁿ-piáⁿ; chiū ū hé tùi chio̍h-pôaⁿ chhut-lâi, it-chīn sio bah kap bô-kàⁿ-piáⁿ; Iâ-hô-hoa ê sù-chiá chiū khì, bô koh khòaⁿ-kìⁿ.

22基甸看出伊是耶和華ê使者；基甸就講：Hāiⁿ ah！主耶和華ah，因為我當面看見耶和華ê使者。Ki-tiân khòaⁿ-chhut I sī Iâ-hô-hoa ê sù-chiá; Ki-tiân chiū kóng, Hāiⁿ ah! Chú Iâ-hô-hoa ah, in-ūi góa tng-bīn khòaⁿ-kìⁿ Iâ-hô-hoa ê sù-chiá.

23耶和華對伊講，安你ê心，m̄免驚；你bōe致到死。Iâ-hô-hoa tùi i kóng, An lí ê sim, m̄-bián kiaⁿ; lí bōe tì-kàu sí.

24基甸就tī-hia kā耶和華起一座壇，號名叫耶和華sa-liông；chit-ê壇tī A-pí-í-siā族ê Gô-hut-la̍h，到今á日iáu tī-teh。Ki-tiân chiū tī-hia kā Iâ-hô-hoa khí chi̍t chō tôaⁿ, hō miâ kiò Iâ-hô-hoa-sa-liông; chit ê tôaⁿ tī A-pí-í-siā cho̍k ê Gô-hut-la̍h, kàu kin-á-ji̍t iáu tī-teh.

25Hit暝耶和華吩咐基甸講：你牽你老父ê牛á來，就是七年ê第二隻牛，也tio̍h拆毀你老父所有Pa-le̍k ê壇，剉壇邊ê A-sià-la̍h；Hit-mî Iâ-hô-hoa hoan-hù Ki-tiân kóng, Lí khan lí lāu-pē ê gû-á lâi, chiū-sī chhit-nî ê tē-jī chiah gû, iā tio̍h thiah-húi lí lāu-pē só͘-ū Pa-le̍k ê tôaⁿ, chhò tôaⁿ-piⁿ ê A-sià-la̍h;

26tī chit-ê山寨，照合宜ê法，為耶和華你上帝起一座壇，用第二隻牛獻做燒祭，用你所beh剉ê A-sià-la̍h做柴。tī chit ê soaⁿ-chē, chiàu ha̍p-gî ê hoat, ūi Iâ-hô-hoa lí Siōng-tè khí chi̍t chō tôaⁿ, ēng tē-jī chiah gû hiàn-chòe sio-chè, ēng lí só͘ beh chhò ê A-sià-la̍h chòe-chhâ.

27基甸就對伊ê奴僕中chhōa十人，照耶和華吩咐伊去行；伊因為驚老父ê家，kap城內ê人，日時m̄敢做chit-ê事，就tī暝時做伊。Ki-tiân chiū tùi i ê lô͘-po̍k tiong chhōa cha̍p-lâng, chiàu Iâ-hô-hoa hoan-hù i khì kiâⁿ; i in-ūi kiaⁿ lāu-pē ê ke, kap siâⁿ-lāi ê lâng, ji̍t--sî m̄-káⁿ chòe chit ê sū, chiū tī mî--sî chòe i.

28城內ê人清早起來，看見Pa-le̍k ê壇拆毀，壇邊ê A-sià-la̍h剉落，第二隻牛獻tī所起ê壇。Siâⁿ-lāi ê lâng chheng-chá khí-lâi, khòaⁿ-kìⁿ Pa-le̍k ê tôaⁿ thiah-húi, tôaⁿ-piⁿ ê A-sià-la̍h chhò-lo̍h, tē-jī chiah gû hiàn tī só͘ khí ê tôaⁿ.

29In相kap講：甚麼人做chit-ê事ah？In查問了後，就講：這是Iok-a-si ê kiáⁿ基甸做ê。In saⁿ-kap kóng, Sím-mi̍h lâng chòe chit ê sū ah? In chhâ-mn̄g liáu-āu, chiū kóng, Che sī Iok-a-si ê kiáⁿ Ki-tiân chòe ê.

30城內ê人對Iok-a-si講：掠你ê kiáⁿ出來，thang hō͘伊死；因為伊拆毀Pa-le̍k ê壇，剉壇邊ê A-sià-la̍h。Siâⁿ-lāi ê lâng tùi Iok-a-si kóng, Lia̍h lí ê kiáⁿ chhut-lâi, thang hō͘ i sí; in-ūi i thiah-húi Pa-le̍k ê tôaⁿ, chhò tôaⁿ-piⁿ ê A-sià-la̍h.

31Iok-a-si kā一切khiā teh攻擊伊ê人講：Lín beh為Pa-le̍k爭辯mah？lín beh救伊mah？若有人為伊爭辯，thàn早起tio̍h hō͘伊死；Pa-le̍k若是上帝，chiah hō͘伊為家己爭辯，因為人拆毀伊ê壇。Iok-a-si kā it-chhè khiā teh kong-kek i ê lâng kóng, Lín beh ūi Pa-le̍k cheng-piān mah? lín beh kiù i mah? Nā ū lâng ūi i cheng-piān, thàn chá-khí tio̍h hō͘ i sí; Pa-le̍k nā sī siōng-tè, chiah hō͘ i ūi ka-kī cheng-piān, in-ūi lâng thiah-húi i ê tôaⁿ.

32Tùi hit日叫伊ê名Iâ-lō͘-pa-le̍k，是講：Pa-le̍k tio̍h kap伊爭辯，因為伊毀壞伊ê壇。Tùi hit-ji̍t kiò i ê miâ Iâ-lō͘-pa-le̍k, sī kóng, Pa-le̍k tio̍h kap i cheng-piān, in-ūi i húi-hoāi i ê tôaⁿ.

33Hit時米甸人，A-má-le̍k人，kap東方ê百姓，lóng聚集過河，tī Iâ-su-lia̍t ê山谷紮營。Hit-sî Bí-tiân lâng, A-má-le̍k lâng, kap tang-hng ê peh-sìⁿ, lóng chū-chi̍p kè-hô, tī Iâ-su-lia̍t ê soaⁿ-kok chat-iâⁿ.

34耶和華ê神臨到基甸；伊就pûn哨角；A-pí-í-siā族lóng聚集跟tè伊。Iâ-hô-hoa ê Sîn lîm-kàu Ki-tiân; i chiū pûn sàu-kak; A-pí-í-siā cho̍k lóng chū-chi̍p kun-tè i.

35伊差人遍行Má-ná-se；Má-ná-se人也聚集來tè伊；koh差人去見A-siat人、Se-pò͘-lûn人、Ná-hut-tha-lī人；in也lóng上來kap in連合。I chhe lâng piàn-kiâⁿ Má-ná-se; Má-ná-se lâng iā chū-chi̍p lâi tè i; koh chhe lâng khì kìⁿ A-siat lâng, Se-pò͘-lûn lâng, Ná-hut-tha-lī lâng; in iā lóng chiūⁿ-lâi kap in liân-ha̍p.

36基甸對上帝講：你若照你所講ê，beh用我ê手來救以色列，Ki-tiân tùi Siōng-tè kóng, Lí nā chiàu Lí só͘ kóng ê, beh ēng góa ê chhiú lâi kiù Í-sek-lia̍t,

37我就用kui領ê羊毛hē tī五穀場；若kan-ta羊毛有露水，土腳lóng乾乾，我就知你beh照你所講ê，用我ê手救以色列。góa chiū ēng kui-niá ê iûⁿ-mn̂g hē tī gō͘-kak-tiûⁿ; nā kan-ta iûⁿ-mn̂g ū lō͘-chúi, thô͘-kha lóng ta-ta, góa chiū chai Lí beh chiàu Lí só͘ kóng ê, ēng góa ê chhiú kiù Í-sek-lia̍t.

38就果然án-ni；隔日基甸早早起來，chūn羊毛，tùi羊毛絞出露水一碗滿滿。Chiū kó-jiân án-ni; keh-ji̍t Ki-tiân chá-chá khí-lâi, chūn iûⁿ-mn̂g, tùi iûⁿ-mn̂g ká-chhut lō͘-chúi chi̍t-óaⁿ móa-móa.

39基甸koh對上帝講：求你m̄-thang受氣我，我koh講一pái nā-tiāⁿ；求你准我koh一pái用羊毛試看，taⁿ獨獨hō͘羊毛乾乾，土腳lóng有露水；Ki-tiân koh tùi Siōng-tè kóng, Kiû Lí m̄-thang siū-khì góa, góa koh kóng chi̍t-pái nā-tiāⁿ; kiû Lí chún góa koh chi̍t-pái ēng iûⁿ-mn̂g chhì-khòaⁿ, taⁿ to̍k-to̍k hō͘ iûⁿ-mn̂g ta-ta, thô͘-kha lóng ū lō͘-chúi;

40chit暝上帝也án-ni行，獨獨羊毛乾乾，土腳lóng有露水。chit-mî Siōng-tè iā án-ni kiâⁿ, to̍k-to̍k iûⁿ-mn̂g ta-ta, thô͘-kha lóng ū lō͘-chúi.

1Iâ-lō͘-pa-le̍k就是基甸，伊kap一切tè伊ê人，早早起來，tī Hap-lu̍t水泉邊紮營；米甸營tī in北勢ê山谷，óa近Mô͘-lī山。Iâ-lō͘-pa-le̍k chiū-sī Ki-tiân, i kap it-chhè tè i ê lâng, chá-chá khí-lâi, tī Hap-lu̍t chúi-chôaⁿ-piⁿ chat-iâⁿ; Bí-tiân iâⁿ tī in pak--sì ê soaⁿ-kok, óa-kūn Mô͘-lī soaⁿ.

2耶和華對基甸講：我用米甸交tī百姓ê手，m̄-kú tè你ê人siuⁿ-chōe，驚了以色列人對tī我來家己誇口，講：是我家己ê手救我。Iâ-hô-hoa tùi Ki-tiân kóng, Góa ēng Bí-tiân kau tī peh-sìⁿ ê chhiú, m̄-kú tè lí ê lâng siuⁿ-chōe, kiaⁿ-liáu Í-sek-lia̍t lâng tùi tī Góa lâi ka-kī khoa-kháu, kóng, Sī góa ka-kī ê chhiú kiù góa.

3Taⁿ你tio̍h宣布hō͘百姓聽，見若驚惶忍neh ê人，thang離開Ki-lia̍t山tò去；tùi án-ni，百姓中有兩萬兩千人tò去；iáu有chhun一萬。Taⁿ lí tio̍h soan-pò͘ hō͘ peh-sìⁿ thiaⁿ, kìⁿ-nā kiaⁿ-hiâⁿ lún-neh ê lâng, thang lī-khui Ki-lia̍t soaⁿ tò--khì; tùi án-ni peh-sìⁿ tiong ū nn̄g-bān nn̄g-chheng lâng tò--khì; iáu ū chhun chi̍t-bān.

4耶和華對基甸講：人iáu-kú siuⁿ-chōe；你tio̍h chhōa in落去到水邊，我beh tī-hia kā你試in；見若我kí甚麼人對你講，Chit人thang kap你去，hit人就thang kap你去；我kí甚麼人kā你講，Chit人m̄-thang kap你去，hit人就m̄-thang去。Iâ-hô-hoa tùi Ki-tiân kóng, Lâng iáu-kú siuⁿ-chōe; lí tio̍h chhōa in lo̍h-khì kàu chúi-piⁿ, Góa beh tī-hia kā lí chhì in; kìⁿ-nā Góa kí sím-mi̍h lâng tùi lí kóng, Chit-lâng thang kap lí khì, hit-lâng chiū thang kap lí khì; Góa kí sím-mi̍h lâng kā lí kóng, Chit-lâng m̄-thang kap lí khì, hit-lâng chiū m̄-thang khì.

5基甸就chhōa百姓落去到水邊；耶和華對基甸講：見若用舌nà水，親像狗teh nà，hit人tio̍h hō͘伊另外khiā-teh，見若跪落去lim水ê，也tio̍h hō͘伊另外khiā-teh。Ki-tiân chiū chhōa peh-sìⁿ lo̍h-khì kàu chúi-piⁿ; Iâ-hô-hoa tùi Ki-tiân kóng, Kìⁿ-nā ēng chi̍h nà chúi, chhin-chhiūⁿ káu teh nà, hit-lâng tio̍h hō͘ i lēng-gōa khiā-teh, kìⁿ-nā kūi--lo̍h-khì lim-chúi-ê, iā tio̍h hō͘ i lēng-gōa khiā-teh.

6用手óa嘴來nà水ê，有三百人；其餘hiah-ê百姓lóng跪落去lim水。Ēng chhiú óa-chhùi lâi nà-chúi ê, ū saⁿ-pah lâng; kî-û hiah ê peh-sìⁿ lóng kūi--lo̍h-khì lim-chúi.

7耶和華kā基甸講：我beh用chiah-ê nà水ê三百人救lín，將米甸人交tī你ê手；眾百姓lóng thang tò去伊ê所在。Iâ-hô-hoa kā Ki-tiân kóng, Góa beh ēng chiah ê nà-chúi ê saⁿ-pah lâng kiù lín, chiong Bí-tiân lâng kau tī lí ê chhiú; chèng peh-sìⁿ lóng thang tò--khì i ê só͘-chāi.

8百姓手裡就帶乾糧kap in ê哨角；基甸差以色列眾人ta̍k人tò去in ê布棚；只有留chit三百人；米甸ê營紮tī伊下面ê山谷。Peh-sìⁿ chhiú--nih chiū tòa kan-niû kap in ê sàu-kak; Ki-tiân chhe Í-sek-lia̍t chèng-lâng ta̍k-lâng tò-khì in ê pò͘-pîⁿ; chí-ū lâu chí saⁿ-pah lâng; Bí-tiân ê iâⁿ chat tī i ē-bīn ê soaⁿ-kok.

9Siâng hit暝，耶和華kā基甸講：起來，落去到hit-ê營盤，因為我已經將伊交tī你ê手。Siâng hit-mî Iâ-hô-hoa kā Ki-tiân kóng, Khí--lâi, lo̍h--khì kàu hit ê iâⁿ-pôaⁿ, in-ūi Góa í-keng chiong i kau tī lí ê chhiú.

10你若m̄敢落去，你kap你ê奴僕Phó͘-la̍h tio̍h落去hit-ê營盤；Lí nā m̄-káⁿ lo̍h--khì, lí kap lí ê lô͘-po̍k Phó͘-la̍h tio̍h lo̍h--khì hit ê iâⁿ-pôaⁿ;

11你beh聽見in所講ê；然後你就有膽力落去到營盤。伊就kap伊ê奴僕Phó͘-la̍h落去到營盤，帶軍器ê ê邊á。lí beh thiaⁿ-kìⁿ in só͘ kóng ê; jiân-āu lí chiū ū tám-le̍k lo̍h--khì kàu iâⁿ-pôaⁿ. I chiū kap i ê lô͘-po̍k Phó͘-la̍h lo̍h--khì kàu iâⁿ-pôaⁿ, tòa kun-khì-ê ê piⁿ-á.

12米甸人、A-má-le̍k人，kap東方ê眾人，lóng倒tī山谷，親像草蜢hiah-chōe；in ê駱駝bōe算得，chōe親像海墘ê沙。Bí-tiân lâng, A-má-le̍k lâng, kap tang-hng ê chèng-lâng, lóng tó tī soaⁿ-kok, chhin-chhiūⁿ chháu-meh hiah-chōe; in ê lo̍k-tô bōe-sǹg--tit, chōe chhin-chhiūⁿ hái-kîⁿ ê soa.

13基甸已經到，有人用夢kā伊ê同伴講：我夢見一個夢；看ah，有一個大麥餅kō入米甸ê營，到一個布棚，衝hō͘伊倒，hō͘布棚péng-lìn-tńg，倒到平地。Ki-tiân í-keng kàu, ū lâng ēng bāng kā i ê tâng-phōaⁿ kóng, Góa bāng-kìⁿ chi̍t ê bāng; khòaⁿ ah, ū chi̍t ê tōa-be̍h-piáⁿ kō-ji̍p Bí-tiân ê iâⁿ, kàu chi̍t ê pò͘-pîⁿ, chhiong hō͘ i tó, hō͘ pò͘-pîⁿ péng-lìn-tńg, tó kàu pîⁿ-tōe.

14伊ê同伴應講，這m̄是別項，就是以色列人，Iok-a-si ê kiáⁿ基甸ê刀；上帝已經將米甸kap伊ê全軍交tī伊ê手。I ê tâng-phōaⁿ ìn kóng, Che m̄-sī pa̍t-hāng, chiū-sī Í-sek-lia̍t lâng, Iok-a-si ê kiáⁿ Ki-tiân ê to; Siōng-tè í-keng chiong Bí-tiân kap i ê choân-kun kau tī i ê chhiú.

15基甸聽見chit-ê夢ê話，kap伊ê解說，就敬拜上帝；tò來到以色列ê營中，講：起來ah，因為耶和華已經將米甸ê軍隊交tī lín ê手lah。Ki-tiân thiaⁿ-kìⁿ chit ê bāng ê ōe, kap i ê kóe-seh, chiū kèng-pài Siōng-tè; tò--lâi kàu Í-sek-lia̍t ê iâⁿ-tiong, kóng, Khí-lâi ah, in-ūi Iâ-hô-hoa í-keng chiong Bí-tiân ê kun-tūi kau tī lín ê chhiú lah.

16伊就分三百人做三隊，用哨角kap 空甕交tī ta̍k人ê手，甕內lóng khǹg火把；I chiū pun saⁿ-pah lâng chòe saⁿ-tūi, ēng sàu-kak kap khang-àng kau tī ta̍k-lâng ê chhiú, àng-lāi lóng khǹg hé-pé;

17kā in講：Lín tio̍h看我ê樣來做；我到hit-ê營盤邊，我所做ê，lín也tio̍h án-ni做。kā in kóng, Lín tio̍h khòaⁿ góa ê iūⁿ lâi chòe; góa kàu hit ê iâⁿ-pôaⁿ-piⁿ, góa só͘-chòe-ê, lín iā tio̍h án-ni chòe.

18我kap hiah-ê kap我tī-teh ê人pûn哨角ê時，lín也tio̍h tī營ê四圍pûn哨角，講：為tio̍h耶和華也為tio̍h基甸。Góa kap hiah ê kap góa tī-teh ê lâng pûn sàu-kak ê sî, lín iā tio̍h tī iâⁿ ê sì-ûi pûn sàu-kak, kóng, Ūi-tio̍h Iâ-hô-hoa iā ūi-tio̍h Ki-tiân.

19基甸kap tè伊ê一百人，tī三更頭，來到營邊；hit時守更ê tú-á換班；in就pûn哨角，kòng破手裡ê甕；Ki-tiân kap tè i ê chi̍t-pah lâng, tī saⁿ-kiⁿ-thâu, lâi kàu iâⁿ-piⁿ; hit-sî chiú-kiⁿ-ê tú-á ōaⁿ-pan; in chiū pûn sàu-kak, kòng-phòa chhiú--nih ê àng;

20三隊ê人就lóng pûn哨角，kòng破甕，tò手kia̍h火把，chiàⁿ手kia̍h哨角，來pûn，hoah講：耶和華kap基甸ê刀。saⁿ-tūi ê lâng chiū lóng pûn sàu-kak, kòng phòa àng, tò-chhiú kia̍h hé-pé, chiàⁿ-chhiú kia̍h sàu-kak, lâi pûn, hoah kóng, Iâ-hô-hoa kap Ki-tiân ê to.

21In tī營ê四圍ta̍k-ê khiā家己ê位；全營ê人lóng走；hoah-hiàm hō͘ in逃走。In tī iâⁿ ê sì-ûi ta̍k-ê khiā ka-kī ê ūi; choân-iâⁿ ê lâng lóng cháu; hoah-hiàm hō͘ in tô-cháu.

22Pûn三百支哨角ê時，耶和華hō͘全營ê人ta̍k-ê用刀相thâi；軍隊走到Se-lī-la̍h ê Pek-hap-sī-tha，koh到A-pek-bí-hô-la̍h ê界，近tī Tha-pa。Pûn saⁿ-pah ki sàu-kak ê sî, Iâ-hô-hoa hō͘ choân-iâⁿ ê lâng ta̍k-ê ēng to saⁿ-thâi; kun-tūi cháu kàu Se-lī-la̍h ê Pek-hap-sī-tha, koh kàu A-pek-bí-hô-la̍h ê kài, kūn tī Tha-pa.

23以色列人就tùi Ná-hut-tha-lī、A-siat，kap Má-ná-se聚集，來追趕米甸。Í-sek-lia̍t lâng chiū tùi Ná-hut-tha-lī, A-siat, kap Má-ná-se chū-chi̍p, lâi tui-kóaⁿ Bí-tiân.

24基甸差人遍行Í-hoat-liân ê山地，講：Lín落來攻擊米甸，thàn in未到，把守hiah-ê渡頭，直到Pek-pa-la̍h，就是約旦。Tùi án-ni， Í-hoat-liân ê眾人聚集，把守hiah-ê渡頭，直到Pek-pa-la̍h，就是約旦；Ki-tiân chhe lâng piàn-kiâⁿ Í-hoat-liân ê soaⁿ-tōe, kóng, Lín lo̍h-lâi kong-kek Bí-tiân, thàn in bē kàu, pé-siú hiah ê tō͘-thâu, ti̍t-kàu Pek-pa-la̍h, chiū-sī Iok-tàn. Tùi án-ni Í-hoat-liân ê chèng-lâng chū-chi̍p, pé-siú hiah ê tō͘-thâu, ti̍t-kàu Pek-pa-la̍h, chiū-sī Iok-tàn;

25也掠tio̍h米甸兩個首領，Gô-li̍p kap Se-i-pek；thâi死Gô-li̍p tī Gô-li̍p ê石磐，thâi死Se-i-pek tī Se-i-pek ê酒窟hia；koh追趕米甸人；帶Gô-li̍p kap Se-i-pek ê頭殼到約旦hit-pêng，基甸hia。iā lia̍h-tio̍h Bí-tiân nn̄g ê siú-léng, Gô-li̍p kap Se-i-pek; thâi-sí Gô-li̍p tī Gô-li̍p ê chio̍h-pôaⁿ, thâi-sí Se-i-pek tī Se-i-pek ê chiú-khut hia; koh tui-kóaⁿ Bí-tiân lâng; tòa Gô-li̍p kap Se-i-pek ê thâu-khak kàu Iok-tàn hit-pêng, Ki-tiân hia.

1Í-hoat-liân人對基甸講：你去kap米甸人交戰，無叫阮kap你去，啥事án-ni款待阮ah？ In就kap伊大大計較。Í-hoat-liân lâng tùi Ki-tiân kóng, Lí khì kap Bí-tiân lâng kau-chiàn, bô kiò goán kap lí khì, siáⁿ-sū án-ni khoán-thāi goán ah? In chiū kap i tōa-tōa kè-kàu.

2基甸對in講，我所行ê kiám會比得lín mah？Í-hoat-liân拾葡萄屑(seh)，kiám無khah贏A-pí-í-siā挽葡萄mah？Ki-tiân tùi in kóng, Góa só͘ kiâⁿ-ê kiám ōe pí-tit lín mah? Í-hoat-liân khioh phû-tô-seh, kiám bô khah-iâⁿ A-pí-í-siā bán phû-tô mah?

3上帝已經將米甸ê首領Gô-li̍p Se-i-pek交tī lín ê手，我所行ê kiám會比得lín mah？伊講chiah-ê話，in ê受氣就消。Siōng-tè í-keng chiong Bí-tiân ê siú-léng Gô-li̍p Se-i-pek kau tī lín ê chhiú, góa só͘-kiâⁿ ê kiám ōe pí-tit lín mah? I kóng chiah ê ōe, in ê siū-khì chiū siau.

4基甸kap tè伊ê三百人到約旦過渡，雖然厭倦，iáu-kú teh追jip。Ki-tiân kap tè i ê saⁿ-pah lâng kàu Iok-tàn kè-tō͘, sui-jiân ià-siān, iáu-kú teh tui-jip.

5基甸對So͘-kat人講：請你將餅供給跟tè我ê百姓；因為in厭倦，我也teh jip米甸兩個王，Se-pa kap Sat-bō͘-ná。Ki-tiân tùi So͘-kat lâng kóng, Chhiáⁿ lí chiong piáⁿ kiong-kip kun-tè góa ê peh-sìⁿ; in-ūi in ià-siān, góa iā teh jip Bí-tiân nn̄g ê ông, Se-pa kap Sat-bō͘-ná.

6So͘-kat hiah-ê首領應講，Se-pa kap Sat-bō͘-ná ê手已經tī你ê手，阮chiah tio̍h用餅hō͘你ê軍隊ah？So͘-kat hiah ê siú-léng ìn kóng, Se-pa kap Sat-bō͘-ná ê chhiú í-keng tī lí ê chhiú, goán chiah tio̍h ēng piáⁿ hō͘ lí ê kun-tūi ah?

7基甸講：耶和華將Se-pa kap Sat-bō͘-ná交tī我ê手了後，我就beh用曠野ê刺 kap刺á phah傷lín ê肉。Ki-tiân kóng, Iâ-hô-hoa chiong Se-pa kap Sat-bō͘-ná kau tī góa ê chhiú liáu-āu, góa chiū beh ēng khòng-iá ê chhì kap chhì-á phah-siong lín ê bah.

8伊tùi hia上去Pí-lô͘-i-le̍k，也對in án-ni講；Pí-lô͘-i-le̍k人應伊，也kap So͘-kat人所應ê相同。I tùi hia chiūⁿ-khì Pí-lô͘-i-le̍k, iā tùi in án-ni kóng; Pí-lô͘-i-le̍k lâng ìn i, iā kap So͘-kat lâng só͘ ìn-ê saⁿ-tâng.

9伊對Pí-lô͘-i-le̍k ê人講：我平安tò來ê時，我beh拆chit-ê台5。I tùi Pí-lô͘-i-le̍k ê lâng kóng, Góa pêng-an tò--lâi ê sî, góa beh thiah chit ê tâi.

10Hit時Se-pa kap Sat-bō͘-ná，以及跟tè伊ê軍隊，lóng tī Ka-kok，約略有一萬五千人，就是東方全軍所chhun-ê；因為已經死十二萬人，lóng是kia̍h刀ê。Hit-sî Se-pa kap Sat-bō͘-ná, í-ki̍p kun-tè i ê kun-tūi, lóng tī Ka-kok, iok-lio̍k ū chi̍t-bān gō͘-chheng lâng, chiū-sī tang-hng choân-kun só͘-chhun-ê; in-ūi í-keng sí cha̍p-jī bān lâng, lóng sī kia̍h-to-ê.

11基甸就tùi Lô-pa kap Iok-pí-hap東pêng tùi khiā起布棚ê ê路，上去，phah贏in ê軍隊；因為in ê軍隊安然。Ki-tiân chiū tùi Lô-pa kap Iok-pí-hap tang-pêng tùi khiā-khí pò͘-pîⁿ--ê ê lō͘, chiūⁿ-khì, phah-iâⁿ in ê kun-tūi; in-ūi in ê kun-tūi an-jiân.

12Se-pa kap Sat-bō͘-ná逃走，基甸追jip in，掠tio̍h米甸兩個王Se-pa kap Sat-bō͘-ná，hō͘ in全軍驚走。Se-pa kap Sat-bō͘-ná tô-cháu, Ki-tiân tui-jip in, lia̍h-tio̍h Bí-tiân nn̄g ê ông Se-pa kap Sat-bō͘-ná, hō͘ in choân-kun kiaⁿ-cháu.

13Iok-a-si ê kiáⁿ基甸tùi Hi-lia̍t-su ê山坪，tùi戰陣tò來。Iok-a-si ê kiáⁿ Ki-tiân tùi Hi-lia̍t-su ê soaⁿ-phiâⁿ, tùi chiàn-tīn tò--lâi.

14掠So͘-kat一個少年人，問伊；伊就寫So͘-kat hiah-ê首領kap長老，共七十七人，hō͘伊。Lia̍h So͘-kat chi̍t ê siàu-liân lâng, mn̄g i; i chiū siá So͘-kat hiah ê siú-léng kap tiúⁿ-ló, kiōng chhit-cha̍p-chhit lâng, hō͘ i.

15基甸到So͘-kat，對hia ê人講：Lín前為tio̍h Se-pa kap Sat-bō͘-ná gio̍h-sio̍h我講：Se-pa kap Sat-bō͘-ná ê手已經tī你ê手，阮chiah tio̍h用餅hō͘你厭倦ê人ah？Taⁿ lín來看。Ki-tiân kàu So͘-kat, tùi hia ê lâng kóng, Lín chêng ūi-tio̍h Se-pa kap Sat-bō͘-ná gio̍h-sio̍h góa kóng, Se-pa kap Sat-bō͘-ná ê chhiú í-keng tī lí ê chhiú, goán chiah tio̍h ēng piáⁿ hō͘ lí ià-siān ê lâng ah? Taⁿ lín lâi khòaⁿ.

16就掠城內ê長老，用曠野ê刺kap刺á來教督So͘-kat人；Chiū lia̍h siâⁿ-lāi ê tiúⁿ-ló, ēng khòng-iá ê chhì kap chhì-á lâi kàu-tok So͘-kat lâng;

17koh拆Pí-lô͘-i-le̍k ê台，thâi死hit-ê城內ê人。koh thiah Pí-lô͘-i-le̍k ê tâi, thâi-sí hit ê siâⁿ-lāi ê lâng.

18就問Se-pa kap Sat-bō͘-ná講：Lín tī Tha-po̍k山所thâi ê人甚麼款？應講，In親像你，ta̍k人lóng有王ê kiáⁿ ê容貌。Chiū mn̄g Se-pa kap Sat-bō͘-ná kóng, Lín tī Tha-po̍k soaⁿ só͘ thâi ê lâng sím-mi̍h khoán? Ìn kóng, In chhin-chhiūⁿ lí, ta̍k-lâng lóng ū ông ê kiáⁿ ê iông-māu.

19伊講：In是我siâng母ê兄弟；我指耶和華ê永活來講：Lín前若留in ê性命，我taⁿ就無thâi lín。I kóng, In sī góa siâng-bú ê hiaⁿ-tī; góa chí Iâ-hô-hoa ê éng-oa̍h lâi kóng, Lín chêng nā lâu in ê sìⁿ-miā, góa taⁿ chiū bô thâi lín.

20就對伊ê大kiáⁿ Ek-thiap講：起來thâi in；總是少年人無拔刀，因為伊iáu少年，就驚。Chiū tùi i ê tōa-kiáⁿ Ek-thiap kóng, Khí-lâi thâi in; chóng-sī siàu-liân lâng bô pu̍ih-to, in-ūi i iáu siàu-liân, chiū kiaⁿ.

21Se-pa kap Sat-bō͘-ná講：你家己起來thâi阮；因為人怎樣，氣力也是án-ni。基甸就起來thâi死Se-pa kap Sat-bō͘-ná，取in駱駝頷頸ê裝飾，款式親像月眉。Se-pa kap Sat-bō͘-ná kóng, Lí ka-kī khí-lâi thâi goán; in-ūi lâng cháiⁿ-iūⁿ, khùi-la̍t iā sī án-ni. Ki-tiân chiū khí-lâi thâi-sí Se-pa kap Sat-bō͘-ná, chhú in lo̍k-tô ām-kún ê chng-thāⁿ, khoán-sit chhin-chhiūⁿ ge̍h-bâi.

22以色列人對基甸講：你已經救阮脫離米甸人ê手，願你kap你ê kiáⁿ，你ê孫，管理阮。Í-sek-lia̍t lâng tùi Ki-tiân kóng, Lí í-keng kiù goán thoat-lī Bí-tiân lâng ê chhiú, goān lí kap lí ê kiáⁿ, lí ê sun, koán-lí goán.

23基甸講：我無beh管理lín，我ê kiáⁿ也無beh管理lín；獨獨耶和華beh做lín ê王。Ki-tiân kóng, Góa bô beh koán-lí lín, góa ê kiáⁿ iā bô beh koán-lí lín; to̍k-to̍k Iâ-hô-hoa beh chòe lín ê ông.

24基甸koh對in講，我有一項求lín，請lín ta̍k人將所搶ê耳鐶hō͘我。(因為對敵是以實瑪利ê人，chiah有chit號金ê耳鐶。)Ki-tiân koh tùi in kóng, Góa ū chi̍t-hāng kiû lín, chhiáⁿ lín ta̍k-lâng chiong só͘ chhiúⁿ ê hī-khoân hō͘ góa. (In-ūi tùi-te̍k sī Í-si̍t-má-lī ê lâng, chiah ū chit-hō kim ê hī-khoân.)

25In講：阮甘願hō͘你。就chhu一領外衫，ta̍k人將所搶ê耳鐶hiat tī hit頂面。In kóng, Goán kam-goān hō͘ lí. Chiū chhu chi̍t niá gōa-saⁿ, ta̍k-lâng chiong só͘ chhiúⁿ ê hī-khoân hiat tī hí téng-bīn.

26基甸所討ê金耳鐶，重一千七百sià-khek-le̍k ê金á；chit-ê以外koh有月眉ê裝飾，耳墜，kap紫色ê衣服，米甸王所有ê，kap駱駝頷頸ê鍊á。Ki-tiân só͘ thó ê kim hī-khoân, tāng chi̍t-chheng chhit-pah sià-khek-le̍k ê kim-á; chit-ê í-gōa koh ū ge̍h-bâi ê chng-thāⁿ, hī-tūi, kap chí-sek ê i-ho̍k, Bí-tiân ông só͘ ū-ê, kap lo̍k-tô ām-kún ê liān-á.

27基甸用chit-ê製造一個í-hut-tek，hē tī伊ê本城Gô-hut-la̍h；後來以色列人lóng去hia行邪淫拜伊；這是做害基甸kap伊全家ê羅網。Ki-tiân ēng chit-ê chè-chō chi̍t ê í-hut-tek, hē tī i ê pún-siâⁿ Gô-hut-la̍h; āu-lâi Í-sek-lia̍t lâng lóng khì hia kiâⁿ siâ-îm pài i; che sī chòe hāi Ki-tiân kap i choân-ke ê lô-bāng.

28Án-ni米甸屈服tī以色列人，bōe會koh kia̍h起頭殼。基甸ê日，hit-ê地方太平四十年。Án-ni Bí-tiân khut-ho̍k tī Í-sek-lia̍t lâng, bōe-ōe koh kia̍h-khí thâu-khak. Ki-tiân ê ji̍t, hit ê tōe-hng thài-pêng sì-cha̍p nî.

29Iok-a-si ê kiáⁿ Iâ-lō͘-pa-le̍k tò去家己ê厝khiā起。Iok-a-si ê kiáⁿ Iâ-lō͘-pa-le̍k tò-khì ka-kī ê chhù khiā-khí.

30基甸有七十個親生kiáⁿ；因為伊有chhōa chōe-chōe ê bó͘。Ki-tiân ū chhit-cha̍p ê chhin-siⁿ kiáⁿ; in-ūi i ū chhōa chōe-chōe ê bó͘.

31Tī示劍伊ê細姨也kā伊生一個kiáⁿ；伊就kā伊號名叫A-pí-bí-le̍k。Tī Sī-kiàm i ê sòe-î iā kā i siⁿ chi̍t ê kiáⁿ; i chiū kā i hō-miâ kiò A-pí-bí-le̍k.

32Iok-a-si ê kiáⁿ基甸年老歲chōe，就死，埋葬tī A-pí-í-siā族Gô-hut-la̍h，tī伊ê老父Iok-a-si ê墓。Iok-a-si ê kiáⁿ Ki-tiân nî-lāu hè-chōe, chiū sí, bâi-chòng tī A-pí-í-siā cho̍k Gô-hut-la̍h, tī i ê lāu-pē Iok-a-si ê bōng.

33基甸死了後以色列人oa̍t-tńg去行淫，tè chiah-ê Pa-le̍k，用Pa-le̍k-pí-lī-thó͘做in ê上帝。Ki-tiân sí liáu-āu Í-sek-lia̍t lâng oa̍t-tńg khì kiâⁿ-îm, tè chiah ê Pa-le̍k, ēng Pa-le̍k-pí-lī-thó͘ chòe in ê siōng-tè.

34以色列人無記念耶和華in ê上帝，就是救in脫離四圍ê對敵ê手ê；Í-sek-lia̍t lâng bô kì-liām Iâ-hô-hoa in ê Siōng-tè, chiū-sī kiù in thoat-lī sì-ûi ê tùi-te̍k ê chhiú ê;

35也無好款待Iâ-lō͘-pa-le̍k，就是基甸ê家，照伊所行tī以色列ê恩惠。iā bô hó khoán-thāi Iâ-lō͘-pa-le̍k, chiū-sī Ki-tiân ê ke, chiàu i só͘ kiâⁿ tī Í-sek-lia̍t ê un-hūi.