1Ai ah！chit-ê城從前百姓滿滿，taⁿ怎樣孤單teh坐！ 從前tī列國中做大ê，taⁿ竟然親像寡婦； 從前tī chiah-ê省中尊伊做王后ê，Taⁿ成做進貢ê)Ai ah! chit ê siâⁿ chiông-chêng peh-sìⁿ móa-móa, taⁿ cháiⁿ-iūⁿ ko͘-toaⁿ teh chē! Chiông-chêng tī lia̍t-kok-tiong chòe-tōa-ê, taⁿ kéng-jiân chhin-chhiūⁿ kóaⁿ-hū; Chiông-chêng tī chiah ê séng-tiong chun i chòe ông-hō͘--ê, Taⁿ chiâⁿ-chòe chìn-kòng--ê.

2伊暝間大啼哭，目屎流到滿面； Tī一切親愛ê人ê中間無一個安慰伊； 伊ê朋友lóng用詭詐款待伊， In成做伊ê對敵。I mî-kan tōa thî-khàu, ba̍k-sái lâu kàu móa-bīn; Tī it-chhè chhin-ài ê lâng ê tiong-kan bô chi̍t-ê an-ùi i; I ê pêng-iú lóng ēng khúi-chà khoán-thāi i, In chiâⁿ-chòe i ê tùi-te̍k.

3猶大因為tú-tio̍h苦難，koh因為受tio̍h chōe-chōe勞苦，就遷徙到外邦； 伊tiàm tī異邦中無thang chhē-tio̍h安歇； 追jip伊ê tī狹狹ê所在lóng jip-tio̍h伊。Iû-tāi in-ūi tú-tio̍h khó͘-lān, koh in-ūi siū-tio̍h chōe-chōe lô-khó͘, chiū chhian-sóa kàu gōa-pang; I tiàm tī īⁿ-pang-tiong bô thang chhē-tio̍h an-hioh; Tui-jip i--ê tī oe̍h-oe̍h ê só͘-chāi lóng jip-tio̍h i.

4錫安ê路徑悲傷，因為無人赴伊ê節期； 伊ê城門lóng冷靜，伊ê祭司吐氣； 伊ê在室女艱難，伊本身也憂苦。Sek-an ê lō͘-kèng pi-siong, in-ūi bô lâng hù i ê choeh-kî; I ê siâⁿ-mn̂g lóng léng-chēng, i ê chè-si thó͘-khùi; I ê chāi-sek-lú kan-lân, i pún-sin iā iu-khó͘.

5伊ê對敵做頭，伊ê仇讎興通； 因為耶和華為tio̍h伊chōe-chōe悖逆，hō͘伊受苦； 伊ê gín-ná hō͘對敵掠去。I ê tùi-te̍k chòe-thâu, i ê kiû-siû heng-thong; In-ūi Iâ-hô-hoa ūi-tio̍h i chōe-chōe pōe-ge̍k, hō͘ i siū-khó͘; I ê gín-ná hō͘ tùi-te̍k lia̍h--khì.

6錫安ê cha-bó͘-kiáⁿ，伊ê súi一盡無去； 伊ê貴族親像chhē無草場ê鹿。 In無氣力，受趕tī追jip ê人ê面前。Sek-an ê cha-bó͘-kiáⁿ, i ê súi it-chīn bô--khì; I ê kùi-cho̍k chhin-chhiūⁿ chhē bô chháu-tiûⁿ ê lo̍k. In bô khùi-la̍t, siū-kóaⁿ tī tui-jip ê lâng ê bīn-chêng.

7耶路撒冷tī患難khún-tio̍k ê時， 就追想早時一切歡喜ê事； 伊ê百姓陷落tī對敵ê手，無人救護伊ê時， 對敵看見就恥笑伊ê冷靜。Iâ-lō͘-sat-léng tī hoān-lān khún-tio̍k ê sî, Chiū tui-siūⁿ chá-sî it-chhè hoaⁿ-hí ê sū; I ê peh-sìⁿ hām-lo̍h tī tùi-te̍k ê chhiú, bô lâng kiù-hō͘ i ê sî, Tùi-te̍k khòaⁿ-kìⁿ chiū thí-chhiò i ê léng-chēng.

8耶路撒冷大大犯罪；所以成做無清氣ê物； 平素尊敬伊ê，taⁿ看見伊赤身露體，就lóng看輕伊； 伊家己也吐氣，倒退。Iâ-lō͘-sat-léng tōa-tōa hoān-chōe; só͘-í chiâⁿ-chòe bô chheng-khì ê mi̍h; Pêng-sò͘ chun-kèng i-ê, taⁿ khòaⁿ-kìⁿ i chhiah-sin lō͘-thé, chiū lóng khòaⁿ-khin i; I ka-kī iā thó͘-khùi, tò-thè.

9伊ê污穢tī伊ê衫á裾；伊無想tio̍h伊ê結局； 所以tú-tio̍h非常ê狼狽；無人安慰伊。 耶和華ah，求你看我ê苦難；因為對敵家己誇大。I ê ù-òe tī i ê saⁿ-á-ku; i bô siūⁿ-tio̍h i ê kiat-kio̍k; Só͘-í tú-tio̍h hui-siông ê lông-pōe; bô lâng an-ùi i. Iâ-hô-hoa ah, kiû Lí khòaⁿ góa ê khó͘-lān; in-ūi tùi-te̍k ka-kī khoa-tōa.

10對敵伸手，搶伊一切ê寶物； 伊看見外邦人入伊ê聖所， 就是你bat吩咐m̄-thang入你ê會中ê)Tùi-te̍k chhun-chhiú, chhiúⁿ i it-chhè ê pó-mi̍h; I khòaⁿ-kìⁿ gōa-pang lâng ji̍p i ê sèng-só͘, Chiū-sī Lí bat hoan-hù m̄-thang ji̍p Lí ê hōe-tiong ê.

11伊ê百姓lóng吐氣，四界chhē食物； In用好物換米糧，ài救性命； 耶和華ah，求你看顧；因為我是真卑賤。I ê peh-sìⁿ lóng thó͘-khùi, sì-kòe chhē chia̍h-mi̍h; In ēng hó-mi̍h ōaⁿ bí-niû, ài kiù sìⁿ-miā; Iâ-hô-hoa ah, kiû Lí khòaⁿ-kò͘; in-ūi góa sī chin pi-chiān.

12凡若tùi chia過ê人ah，chit-ê事kiám kap你無干涉mah？ 請看我所tú-tio̍h ê憂悶，有甚麼憂悶thang比並， 就是耶和華tī伊大受氣ê日所行tī我ê)Hoān-nā tùi chia kè ê lâng ah, chit ê sū kiám kap lí bô kan-sia̍p mah? Chhiáⁿ khòaⁿ góa só͘ tú-tio̍h ê iu-būn, ū sím-mi̍h iu-būn thang pí-phēng, Chiū-sī Iâ-hô-hoa tī I tōa siū-khì ê ji̍t só͘ kiâⁿ tī góa--ê.

13伊tùi頂面降落火，入我ê骨來khah贏伊； 伊張羅網，纏絆我ê腳，hō͘我oa̍t倒tńg； 伊hō͘我thong日冷靜，暈去。I tùi téng-bīn kàng-lo̍h hé, ji̍p góa ê kut lâi khah-iâⁿ--i; I tiuⁿ lô-bāng, tîⁿ-pòaⁿ góa ê kha, hō͘ góa oa̍t-tò-tńg; I hō͘ góa thong-ji̍t léng-chēng, hūn--khì.

14我罪過ê擔，是伊ê手所縛ê； 絞kui條，hē tī我ê頷頸；hō͘我ê氣力無去； 主交我tī對敵ê手，我所抵擋bōe-tiâu-ê)Góa chōe-kòa ê taⁿ, sī I ê chhiú só͘ pa̍k--ê; Ká kui-tiâu, hē tī góa ê ām-kún; hō͘ góa ê khùi-la̍t bô--khì; Chú kau góa tī tùi-te̍k ê chhiú, góa só͘ tí-tng bōe-tiâu--ê.

15我城中ê勇士，主m̄-ti̍h伊； 主招集大ê會來攻擊我，制壓我ê少年人； 主踏猶大ê在室女，親像tī酒窟中。Góa siâⁿ-tiong ê ióng-sū, Chú m̄-ti̍h--i; Chú chio-chi̍p tōa ê hōe lâi kong-kek góa, chè-ap góa ê siàu-liân lâng; Chú ta̍h Iû-tāi ê chāi-sek-lú, chhin-chhiūⁿ tī chiú-khut-tiong.

16我因為chiah-ê tāi-chì啼哭，我ê目睭目屎chhē-chhē倒； 因為扶持我ê性命來安慰我ê，離開我真遠。 我ê kiáⁿ兒無依óa，因為對敵khah贏。Góa in-ūi chiah ê tāi-chì thî-khàu, góa ê ba̍k-chiu ba̍k-sái chhē-chhē-tò; In-ūi hû-chhî góa ê sìⁿ-miā lâi an-ùi góa--ê, lī-khui góa chin-hn̄g. Góa ê kiáⁿ-jî bô i-óa, in-ūi tùi-te̍k khah-iâⁿ.

17錫安伸手，無人安慰伊； 論到雅各，耶和華已經出命令，hō͘四圍ê人做伊ê對敵； 耶路撒冷tī in中間，親像無清氣ê物。Sek-an chhun-chhiú, bô lâng an-ùi i; Lūn-kàu Ngá-kok, Iâ-hô-hoa í-keng chhut bēng-lēng, hō͘ sì-ûi ê lâng chòe i ê tùi-te̍k; Iâ-lō͘-sat-léng tī in tiong-kan, chhin-chhiūⁿ bô chheng-khì ê mi̍h.

18耶和華是公義，因為我有悖逆伊ê命令； 眾百姓ah，請聽，看我ê痛苦； 我chiah-ê在室女kap少年人lóng hō͘人掠去。Iâ-hô-hoa sī kong-gī, in-ūi góa ū pōe-ge̍k I ê bēng-lēng; Chèng peh-sìⁿ ah, chhiáⁿ thiaⁿ, khòaⁿ góa ê thòng-khó͘; Góa chiah ê chāi-sek-lú kap siàu-liân lâng lóng hō͘ lâng lia̍h--khì.

19我叫親愛ê人，總是in欺騙我； 我ê祭司，我ê長老，teh chhē救命ê米糧； hit時就斷氣tī城內。Góa kiò chhin-ài ê lâng, chóng-sī in khi-phiàn góa; Góa ê chè-si, góa ê tiúⁿ-ló, teh chhē kiù-miā ê bí-niû; Hit-sî chiū tn̄g-khùi tī siâⁿ-lāi.

20耶和華ah，我tī患難中請你來鑑察； 我ê心腸攪絞，我ê心tī我ê內面亂chau-chau；因為我大大悖逆。 Tī外面刀劍hō͘人死kiáⁿ；tī厝內親像有死失。Iâ-hô-hoa ah, góa tī hoān-lān tiong chhiáⁿ Lí lâi kàm-chhat; Góa ê sim-tn̂g kiau(**kiáu)-ká, góa ê sim tī góa ê lāi-bīn loān-chau-chau; in-ūi góa tōa-tōa pōe-ge̍k. Tī gōa-bīn to-kiàm hō͘ lâng sí-kiáⁿ; tī chhù-lāi chhin-chhiūⁿ ū sí-sit.

21In聽見我吐氣，亦無人安慰我； 我ê對敵lóng聽見我所tú-tio̍h ê患難，因為你做chit-ê事，in lóng歡喜； 你beh hō͘報告ê日到，in就親像我。In thiaⁿ-kìⁿ góa thó͘-khùi, ia̍h bô lâng an-ùi góa; Góa ê tùi-te̍k lóng thiaⁿ-kìⁿ góa só͘ tú-tio̍h ê hoān-lān, in-ūi Lí chòe chit ê sū, in lóng hoaⁿ-hí; Lí beh hō͘ pò-kò ê ji̍t kàu, in chiū chhin-chhiūⁿ góa.

22願in pháiⁿ ê所行，lóng排tī你ê面前； 你為tio̍h我一切ê罪過，怎樣款待我，求你照án-ni款待in； 因為我ê吐氣真chōe，我ê心亦暈去。Goān in pháiⁿ ê só͘-kiâⁿ, lóng pâi tī Lí ê bīn-chêng; Lí ūi-tio̍h góa it-chhè ê chōe-kòa, cháiⁿ-iūⁿ khoán-thāi góa, kiû Lí chiàu án-ni khoán-thāi in; In-ūi góa ê thó͘-khùi chin-chōe, góa ê sim ia̍h hūn-khì.

1Ai ah！主受氣，hō͘烏雲遮蓋錫安ê cha-bó͘-kiáⁿ； 伊將以色列ê súi tùi天hiat落地； tī伊受氣ê日，亦無念tio̍h伊ê腳踏椅。Ai ah! Chú siū-khì, hō͘ o͘-hûn jia-khàm Sek-an ê cha-bó͘-kiáⁿ; I chiong Í-sek-lia̍t ê súi tùi thiⁿ hiat lo̍h tōe; Tī I siū-khì ê ji̍t, ia̍h bô liām-tio̍h I ê kha-ta̍h-í.

2主thún踏雅各一切khiā起ê所在，亦無憐憫； 伊受氣chhia倒猶大cha-bó͘-kiáⁿ ê衛所，hō͘伊倒到平地； 伊凌辱chit國，kap伊ê貴族。Chú thún-ta̍h Ngá-kok it-chhè khiā-khí ê só͘-chāi, ia̍h bô lîn-bín; I siū-khì chhia-tó Iû-tāi cha-bó͘-kiáⁿ ê ōe-só͘, hō͘ i tó kàu pîⁿ-tōe; I lêng-jio̍k chit-kok, kap i ê kùi-cho̍k.

3伊ê受氣真烈，一盡斬斷以色列ê角； Tī對敵ê面前，kiu伊ê chiàⁿ手； 伊親像四圍吞滅ê火燄，將雅各燒lio去。I ê siū-khì chin lia̍t, it-chīn chām-tn̄g Í-sek-lia̍t ê kak; Tī tùi-te̍k ê bīn-chêng, kiu I ê chiàⁿ-chhiú; I chhin-chhiūⁿ sì-ûi thun-bia̍t ê hé-iām, chiong Ngá-kok sio-lio--khì.

4伊開弓親像對敵，伊khiā-teh kia̍h起chiàⁿ手親像仇讎， 亦一盡剿滅目睭所歡喜ê； Tī錫安cha-bó͘-kiáⁿ ê布棚，piàⁿ出伊ê大受氣親像火一樣。I khui-keng chhin-chhiūⁿ tùi-te̍k, I khiā-teh kia̍h-khí chiàⁿ-chhiú chhin-chhiūⁿ kiû-siû, Ia̍h it-chīn châu-bia̍t ba̍k-chiu só͘ hoaⁿ-hí--ê; Tī Sek-an cha-bó͘-kiáⁿ ê pò͘-pîⁿ, piàⁿ-chhut I ê tōa siū-khì chhin-chhiūⁿ hé chi̍t-iūⁿ.

5主變做親像對敵，吞滅以色列； 伊吞滅一切伊ê宮殿，伊毀壞伊hiah-ê衛所； Tī猶大cha-bó͘-kiáⁿ ê中間，加添chōe-chōe悲傷kap悲哀。Chú pìⁿ-chòe chhin-chhiūⁿ tùi-te̍k, thun-bia̍t Í-sek-lia̍t; I thun-bia̍t it-chhè i ê kiong-tiān, I húi-hoāi i hiah ê ōe-só͘; Tī Iû-tāi cha-bó͘-kiáⁿ ê tiong-kan, ke-thiⁿ chōe-chōe pi-siong kap pi-ai.

6伊出力拆毀伊ê籬笆，親像花園； 伊毀壞伊聚會ê所在； 所定tio̍h ê節期kap安歇日，tī錫安lóng bōe記得；耶和華hō͘伊án-ni； Koh tī伊ê受氣痛恨中，看輕君王kap祭司。I chhut-la̍t thiah-húi I ê lî-pa, chhin-chhiūⁿ hoe-hn̂g; I húi-hoāi I chū-hōe ê só͘-chāi; Só͘ tiāⁿ-tio̍h ê choeh-kî kap an-hioh-ji̍t, tī Sek-an lóng bōe-kì-tit; Iâ-hô-hoa hō͘ i án-ni; Koh tī I ê siū-khì thòng-hūn tiong, khòaⁿ-khin kun-ông kap chè-si.

7主棄sak伊ê祭壇，厭惡伊ê聖所； 將伊ê宮殿ê牆交tī對敵ê手； In tī耶和華ê厝hōa-hōa哮，親像tī節期ê日一樣。Chú khì-sak I ê chè-tôaⁿ, iàm-ò͘ⁿ I ê sèng-só͘; Chiong I ê kiong-tiān ê chhiûⁿ kau tī tùi-te̍k ê chhiú; In tī Iâ-hô-hoa ê chhù hōa-hōa-háu, chhin-chhiūⁿ tī choeh-kî ê ji̍t chi̍t-iūⁿ.

8錫安cha-bó͘-kiáⁿ ê城牆，耶和華決意beh拆毀； 伊牽準線，直直毀滅，手無kiu 倒tńg； 伊hō͘ 外牆kap城牆lóng悲哀；做一下衰敗。Sek-an cha-bó͘-kiáⁿ ê siâⁿ-chhiûⁿ, Iâ-hô-hoa koat-ì beh thiah-húi; I khan chîn-sòaⁿ, ti̍t-ti̍t húi-bia̍t, chhiú bô kiu tò-tńg; I hō͘ gōa-chhiûⁿ kap siâⁿ-chhiûⁿ lóng pi-ai; chòe chi̍t-ē soe-pāi.

9伊ê門沉落地，主毀壞at折伊ê門栱； 伊ê君王kap貴族tòa tī無法律ê列國中； 伊ê先知無得tio̍h耶和華ê啟示。I ê mn̂g tîm-lo̍h tōe, Chú húi-hoāi at-chi̍h i ê mn̂g-kông; I ê kun-ông kap kùi-cho̍k tòa tī bô hoat-lu̍t ê lia̍t-kok tiong; I ê sian-ti bô tit-tio̍h Iâ-hô-hoa ê khé-sī.

10錫安cha-bó͘-kiáⁿ ê長老坐tī土腳，靜靜無聲； 用土粉sám頭殼；用麻布hâ腰； 耶路撒冷ê在室女頭殼chhih落地。Sek-an cha-bó͘-kiáⁿ ê tióng-ló chē tī thô͘-kha, chēng-chēng bô siaⁿ; Ēng thô͘-hún sám thâu-khak; ēng môa-pò͘ hâ-io; Iâ-lō͘-sat-léng ê chāi-sek-lú thâu-khak chhih-lo̍h tōe.

11我ê目睭流目屎致到煙暈，我ê心腸攪絞。 我ê肝膽墮落地，因為我ê百姓ê cha-bó͘-kiáⁿ tú-tio̍h毀滅； Koh因為gín-ná kap食奶ê tī城內ê街路暈去。Góa ê ba̍k-chiu lâu ba̍k-sái tì-kàu ian-n̄g, góa ê sim-tn̂g kiau(**kiáu)-ká. Góa ê koaⁿ-táⁿ tūi-lo̍h tōe, in-ūi góa ê peh-sìⁿ ê cha-bó͘-kiáⁿ tú-tio̍h húi-bia̍t; Koh in-ūi gín-ná kap chia̍h-lin-ê tī siâⁿ-lāi ê ke-lō͘ hūn--khì.

12In tī城內街路暈去，親像受傷ê， Tī老母ê心懷氣beh斷； hit時對老母講，五穀kap酒tī toh-lo̍h？In tī siâⁿ-lāi ke-lō͘ hūn--khì, chhin-chhiūⁿ siū-siong--ê, Tī lāu-bú ê sim-hoâi khùi beh tn̄g; Hit-sî tùi lāu-bú kóng, Gō͘-kak kap chiú tī toh-lo̍h?

13耶路撒冷ê cha-bó͘-kiáⁿ ah，我beh怎樣為你做干證？我beh用甚麼譬喻你ah？ 錫安ê在室女ah，我beh用甚麼比並你，hō͘你得tio̍h安慰ah？ 因為你ê傷嘴大親像海；是誰能醫好你ah？Iâ-lō͘-sat-léng ê cha-bó͘-kiáⁿ ah, Góa beh cháiⁿ-iūⁿ ūi lí chòe kan-chèng? Góa beh ēng sím-mi̍h phì-jū lí ah? Sek-an ê chāi-sek-lú ah, Góa beh ēng sím-mi̍h pí-phēng lí, hō͘ lí tit-tio̍h an-ùi ah? In-ūi lí ê siong-chhùi tōa chhin-chhiūⁿ hái; chī-chūi ōe i-hó lí ah?

14你ê先知替你看虛假kap愚戇ê異象； 無顯出你ê罪過，thang hō͘你受掠ê 倒tńg來； 獨獨替你看虛假ê啟示，kap受遷徙ê因端nā-tiāⁿ。Lí ê sian-ti thòe lí khòaⁿ hu-ké kap gû-gōng ê īⁿ-siōng; Bô hián-chhut lí ê chōe-kòa, thang hō͘ lí siū-lia̍h-ê tò-tńg--lâi; To̍k-to̍k thòe lí khòaⁿ hu-ké ê khé-sī, kap siū chhian-sóa ê in-toaⁿ nā-tiāⁿ.

15見若過路人lóng kā你phah pho̍k-á； In ǹg耶路撒冷ê cha-bó͘-kiáⁿ，恥笑搖頭，講： chit-ê城kiám是人所稱十足súi，做全地所歡喜ê mah？Kìⁿ-nā kè-lō͘ lâng lóng kā lí phah pho̍k-á; In ǹg Iâ-lō͘-sat-léng ê cha-bó͘-kiáⁿ, thí-chhiò iô-thâu, kóng: Chit ê siâⁿ kiám-sī lâng só͘ chheng cha̍p-chiok súi, chòe choân-tōe só͘ hoaⁿ-hí--ê mah?

16你ê對敵lóng ǹg你大大開伊ê嘴； In恥笑koh咬齒，講，阮有吞滅伊； 這真正是阮所ǹg望ê日；taⁿ阮有tú-tio̍h，阮有看見。Lí ê tùi-te̍k lóng ǹg lí tōa-tōa khui i ê chhùi; In thí-chhiò koh kā-khí, kóng, Goán ū thun-bia̍t i; Che chin-chiàⁿ sī goán só͘ ǹg-bāng ê ji̍t; taⁿ goán ū tú-tio̍h, goán ū khòaⁿ-kìⁿ.

17耶和華有成伊所定tio̍h； 應驗伊早時所命令ê話； 伊chhia倒，亦無保惜； Hō͘對敵對你大悅， hō͘你ê對敵ê角kia̍h高。Iâ-hô-hoa ū chiâⁿ I só͘ tiāⁿ-tio̍h; Èng-giām I chá-sî só͘ bēng-lēng ê ōe; I chhia-tó, ia̍h bô pó-sioh; Hō͘ tùi-te̍k tùi lí tāi-ia̍t, Hō͘ lí ê tùi-te̍k ê kak kia̍h-koâiⁿ.

18In ê心求叫主； 錫安cha-bó͘-kiáⁿ ê牆ah，你tio̍h暝日流目屎親像溪； 你m̄-thang歇睏，你ê目睭仁tio̍h流目屎無soah。In ê sim kiû-kiò Chú; Sek-an cha-bó͘-kiáⁿ ê chhiûⁿ ah, lí tio̍h mî-ji̍t lâu ba̍k-sái chhin-chhiūⁿ khoe; Lí m̄-thang hioh-khùn, lí ê ba̍k-chiu-jîn tio̍h lâu ba̍k-sái bô soah.

19暝間換更ê時，tio̍h起來求叫； Tī主ê面前piàⁿ出你ê心親像水； 你ê gín-ná tī街市口因為iau暈去； 你tio̍h為tio̍h in ê性命ǹg主kia̍h手來祈禱。Mî-kan ōaⁿ-kiⁿ ê sî, tio̍h khí-lâi kiû-kiò; Tī Chú ê bīn-chêng piàⁿ-chhut lí ê sim chhin-chhiūⁿ chúi; Lí ê gín-ná tī koe-chhī-kháu in-ūi iau hūn--khì; Lí tio̍h ūi-tio̍h in ê sìⁿ-miā ǹg Chú kia̍h-chhiú lâi kî-tó.

20耶和華ah，求你鑑察，看你ǹg 是誰 án-ni行！ 婦人人kiám thang食in所生ê，手所抱ê嬰á mah？ 祭司kap先知kiám thang tī主ê聖所受thâi mah？Iâ-hô-hoa ah, kiû Lí kàm-chhat, khòaⁿ Lí ǹg chī-chūi án-ni kiâⁿ! Hū-jîn-lâng kiám thang chia̍h in só͘ siⁿ-ê, chhiú só͘ phō ê eⁿ-á mah? Chè-si kap sian-ti kiám thang tī Chú ê sèng-só͘ siū thâi mah?

21Gín-ná kap老人倒tī街路ê土腳； 我chiah-ê在室女kap壯丁倒tī刀下； 你受氣ê日thâi死in；你thâi死in，亦無憐憫。Gín-ná kap lāu-lâng tó tī ke-lō͘ ê thô͘-kha; Góa chiah ê chāi-sek-lú kap chòng-teng tó tī to-ē; Lí siū-khì ê ji̍t thâi-sí in; Lí thâi-sí in, ia̍h bô lîn-bín.

22你叫四圍thang驚惶ê到tī我，親像tī節期ê日。 Tī耶和華受氣ê日，無人有脫離，亦無人留teh； 我所抱所io-ê，對敵kā伊thâi死了了。Lí kiò sì-ûi thang kiaⁿ-hiâⁿ--ê kàu tī góa, chhin-chhiūⁿ tī choeh-kî ê ji̍t. Tī Iâ-hô-hoa siū-khì ê ji̍t, bô lâng ū thoat-lī, ia̍h bô lâng lâu--teh; Góa só͘ phō só͘ io--ê, tùi-te̍k kā i thâi-sí liáu-liáu.

1因為主受氣ê柺á來tú-tio̍h艱苦ê，我就是hit-ê人。In-ūi Chú siū-khì ê koáiⁿ-á lâi tú-tio̍h kan-khó͘-ê, góa chiū-sī hit ê lâng.

2伊chhōa我，hō͘我行tī烏暗，無tī光明。I chhōa góa, hō͘ góa kiâⁿ tī o͘-àm, bô tī kng-bêng.

3伊真正thong日ta̍uh-ta̍uh出手攻擊我。I chin-chiàⁿ thong-ji̍t ta̍uh-ta̍uh chhut-chhiú kong-kek góa.

4伊hō͘我ê肉kap皮ta-la去；伊at折我ê骨頭。I hō͘ góa ê bah kap phê ta-la--khì; I at-chi̍h góa ê kut-thâu.

5伊起土堆攻擊我，用苦毒ê物kap艱難圍困我。I khí thô͘-tui kong-kek góa, ēng khó͘-to̍k ê mi̍h kap kan-lân ûi-khùn góa.

6伊hō͘我tòa tī烏暗ê所在，親像死久久ê人一樣。I hō͘ góa tòa tī o͘-àm ê só͘-chāi, chhin-chhiūⁿ sí kú-kú ê lâng chi̍t-iūⁿ.

7伊用籬笆圍我，hō͘我走bōe出，伊hō͘我ê鐵鏈ná重。I ēng lî-pa ûi góa, hō͘ góa cháu bōe chhut, I hō͘ góa ê thih-liān ná tāng.

8我哀叫求幫贊ê時，伊hō͘我ê祈禱bōe得tio̍h聽見。Góa ai-kiò kiû pang-chān ê sî, I hō͘ góa ê kî-tó bōe tit-tio̍h thiaⁿ-kìⁿ.

9伊用過phah ê石頭塞密我ê路，伊hō͘我ê路彎曲。I ēng kè-phah ê chio̍h-thâu that-ba̍t góa ê lō͘, I hō͘ góa ê lō͘ oan-khiau.

10伊對tī我親像熊埋伏teh，親像獅tiàm暗密ê所在。I tùi-tī góa chhin-chhiūⁿ hîm bâi-ho̍k--teh, chhin-chhiūⁿ sai tiàm àm-ba̍t ê só͘-chāi.

11伊hō͘我迷路，kā我拆碎；hō͘我冷靜。I hō͘ góa bê-lō͘, kā góa thiah-chhùi; hō͘ góa léng-chēng.

12伊開弓，用我做箭靶。I khui-keng, ēng góa chòe chìⁿ-pé.

13伊用箭袋ê箭射入我ê臟腑。I ēng chìⁿ-tē ê chìⁿ siā-ji̍p góa ê chōng-hú.

14我成做我ê百姓ê笑柄；in thong日用我做歌曲。Góa chiâⁿ-chòe góa ê peh-sìⁿ ê chhiò-pìⁿ; in thong-ji̍t ēng góa chòe koa-khek.

15伊用苦毒ê物充滿我，用in-tîn kā我灌到驚。I ēng khó͘-to̍k ê mi̍h chhiong-móa góa, ēng in-tîn kā góa koàn kàu kiaⁿ.

16伊用沙母粒(soa-bú-lia̍p)phah折我ê嘴齒，用火灰sám我ê身軀。I ēng soa-bú-lia̍p phah-chi̍h góa ê chhùi-khí, ēng hé-hu sám góa ê sin-khu.

17你hō͘我ê心離開平安遠遠；我bōe記得福氣。Lí hō͘ góa ê sim lī-khui pêng-an hn̄g-hn̄g; góa bōe-kì-tit hok-khì.

18我就講，我ê氣力衰敗，koh我tī耶和華hia，lóng無ǹg望。Góa chiū kóng, Góa ê khùi-la̍t soe-pāi, koh góa tī Iâ-hô-hoa hia, lóng bô ǹg-bāng.

19求你記得我ê困苦，我ê艱難，親像in-tîn苦膽。Kiû lí kì-tit góa ê khùn-khó͘, góa ê kan-lân, chhin-chhiūⁿ in-tîn khó͘-táⁿ.

20我ê心追想chiah-ê，就tī我ê腹內鬱悶。Góa ê sim tui-siūⁿ chiah-ê, chiū tī góa ê pak-lāi ut-būn.

21我ê心倒tńg想chit-ê事，所以我有ǹg望，Góa ê sim tò-tńg siūⁿ chit ê sū, só͘-í góa ū ǹg-bāng,

22阮無致到滅無，是tùi耶和華chiah-ê慈愛；因為伊ê憐憫無窮盡。Goán bô tì-kàu bia̍t-bô, sī tùi Iâ-hô-hoa chiah ê chû-ài; in-ūi I ê lîn-bín bû-kiông-chīn.

23主ê仁慈ta̍k早起換新；你ê誠實極其闊大。Chú ê jîn-chû ta̍k chá-khí ōaⁿ-sin; Lí ê sêng-si̍t ke̍k-kî khoah-tōa.

24我ê心講，耶和華是我ê基業；因為án-ni我beh ǹg望伊。Góa ê sim kóng, Iâ-hô-hoa sī góa ê ki-gia̍p; in-ūi án-ni góa beh ǹg-bāng I.

25見若thèng候耶和華，chhē求伊ê，伊beh施恩hō͘伊。Kìⁿ-nā thèng-hāu Iâ-hô-hoa, chhē-kiû I--ê, I beh si-un hō͘--i.

26Ǹg望耶和華ê拯救，靜靜thèng候，這是好。Ǹg-bāng Iâ-hô-hoa ê chín-kiù, chēng-chēng thèng-hāu, che sī hó.

27人少年ê時背伊ê擔，這是好。Lâng siàu-liân ê sî pē i ê taⁿ, che sī hó.

28伊tio̍h家己坐，無做聲，因為chit-ê擔是耶和華hē tī伊ê身上。I tio̍h ka-kī chē, bô chòe-siaⁿ, in-ūi chit ê taⁿ sī Iâ-hô-hoa hē tī i ê sin-chiūⁿ.

29伊ê嘴tio̍h俯tī塵埃，kiám-chhái有ǹg望。I ê chhùi tio̍h àⁿ tī tîn-ai, kiám-chhái ū ǹg-bāng.

30伊tio̍h kù-chāi人phah嘴phóe，滿滿受凌辱。I tio̍h kù-chāi lâng phah chhùi-phóe, móa-móa siū lêng-jio̍k.

31因為主的確無永遠棄sak人。In-ūi Chú tek-khak bô éng-oán khì-sak lâng.

32主雖然hō͘人憂悶，iáu-kú beh照伊百般ê慈愛，發出憐憫。Chú sui-jiân hō͘ lâng iu-būn, iáu-kú beh chiàu I pah-poaⁿ ê chû-ài, hoat-chhut lîn-bín.

33伊hō͘人受苦憂悶，m̄是伊所甘心。I hō͘ lâng siū-khó͘ iu-būn, m̄-sī I só͘ kam-sim.

34人將世上受關監ê踏tī腳下，Lâng chiong sè-chiūⁿ siū koaiⁿ-kaⁿ--ê ta̍h tī kha-ē,

35á是tī至koânê ê面前冤屈人，Á-sī tī Chì-koâiⁿ--ê ê bīn-chêng un-khut lâng,

36á是冤枉人ê案件，這是主所無歡喜。Á-sī oan-óng lâng ê àn-kiāⁿ, che sī Chú só͘ bô hoaⁿ-hí.

37若m̄是主所命令，是誰能講伊就成？Nā m̄-sī Chú só͘ bēng-lēng, chī-chūi ōe kóng--i chiū-chiâⁿ?

38好pháiⁿ-tāi kiám-m̄是出tī至koânê ê嘴mah？Hó-pháiⁿ-tāi kiám-m̄-sī chhut tī Chì-koâiⁿ--ê ê chhùi mah?

39人活tī世間，因為家己ê罪過受刑罰，啥事哀怨？Lâng oa̍h tī sè-kan, in-ūi ka-kī ê chōe-kòa siū hêng-hoa̍t, siáⁿ-sū ai-oàn?

40咱tio̍h省察，查考咱ê路；koh oa̍t-tńg來歸耶和華。Lán tio̍h séng-chhat, chhâ-khó lán ê lō͘; koh oa̍t-tńg lâi kui Iâ-hô-hoa.

41咱tio̍h獻心kia̍h手，ǹg天頂ê上帝。Lán tio̍h hiàn-sim kia̍h-chhiú, ǹg thiⁿ-téng ê Siōng-tè.

42阮犯罪悖逆，你無赦免。Goán hoān-chōe pōe-ge̍k, Lí bô sià-bián.

43你用受氣罩阮，追jip阮；你行剿滅，亦無憐憫。Lí ēng siū-khì tà--goán, tui-jip--goán; Lí kiâⁿ châu-bia̍t, ia̍h bô lîn-bín.

44你用密雲遮蓋家己，致到祈禱bōe能透過。Lí ēng ba̍t-hûn jia-khàm ka-kī, tì-kàu kî-tó bōe-ōe thàu-kè.

45你hō͘阮tī萬百姓ê中間成做污穢受棄sak ê物。Lí hō͘ goán tī bān peh-sìⁿ ê tiong-kan chiâⁿ-chòe ù-òe siū khì-sak ê mi̍h.

46阮ê對敵lóng ǹg阮大大開嘴。Goán ê tùi-te̍k lóng ǹg goán tōa-tōa khui-chhùi.

47驚惶kap陷坑，殘害kap毀滅，lóng到tī阮。Kiaⁿ-hiâⁿ kap hām-khiⁿ, chân-hāi kap húi-bia̍t, lóng kàu tī goán.

48我ê百姓ê cha-bó͘-kiáⁿ tú-tio̍h毀滅，因為án-ni我流目屎親像溪。Góa ê peh-sìⁿ ê cha-bó͘-kiáⁿ tú-tio̍h húi-bia̍t, in-ūi án-ni góa lâu ba̍k-sái chhin-chhiūⁿ khoe.

49我ê目睭流目屎，無停無soah，Góa ê ba̍k-chiu lâu ba̍k-sái, bô thêng bô soah,

50直直thèng候耶和華俯落看，tùi天鑑察。Ti̍t-ti̍t thèng-hāu Iâ-hô-hoa àⁿ-lo̍h khòaⁿ, tùi thiⁿ kàm-chhat.

51因為我ê城chiah-ê cha-bó͘-kiáⁿ，hō͘我觸目傷心。In-ūi góa ê siâⁿ chiah ê cha-bó͘-kiáⁿ, hō͘ góa chhiok-bo̍k siong-sim.

52無因端kap我做仇讎ê追jip我，親像jip鳥á一樣。Bô in-toaⁿ kap góa chòe kiû-siû--ê tui-jip góa, chhin-chhiūⁿ jip chiáu-á chi̍t-iūⁿ.

53In hō͘我ê性命死tī陷坑，用一塊石頭thūn tī我ê頂面。In hō͘ góa ê sìⁿ-miā sí tī hām-khiⁿ, ēng chi̍t tè chio̍h-thâu thūn tī góa ê téng-bīn.

54Chōe-chōe水淹過我ê頭殼；我講，我無命lah。Chōe-chōe chúi im-kè góa ê thâu-khak; góa kóng, Góa bô miā lah.

55耶和華ah，我tùi深ê陷坑求叫你ê名。Iâ-hô-hoa ah, góa tùi chhim ê hām-khiⁿ kiû-kiò Lí ê miâ.

56你bat聽我ê聲；我ê提氣求叫，你莫得ng耳孔m̄聽。Lí bat thiaⁿ góa ê siaⁿ; góa ê thoe̍h-khùi kiû-kiò, Lí bo̍h-tit ng hī-khang m̄-thiaⁿ.

57我求叫你ê日，你近óa我，講，m̄免驚。Góa kiû-kiò Lí ê ji̍t, Lí kūn-óa góa, kóng, M̄-bián kiaⁿ.

58主ah，祢申我ê冤枉，祢救贖我ê性命。Chú ah, Lí sin góa ê oan-óng, Lí kiù-sio̍k góa ê sìⁿ-miā.

59耶和華ah，你看見我所受ê冤屈，求你kā我判斷。Iâ-hô-hoa ah, Lí khòaⁿ-kìⁿ góa só͘ siū ê un-khut, kiû Lí kā góa phòaⁿ-toàn.

60In怨恨我，謀害我，你lóng有看見。In oàn-hūn góa, bô͘-hāi góa, Lí lóng ū khòaⁿ-kìⁿ.

61耶和華ah，in詈罵我，謀害我，你lóng有聽見；Iâ-hô-hoa ah, in lóe-mē góa, bô͘-hāi góa, Lí lóng ū thiaⁿ-kìⁿ;

62亦聽見hiah-ê起來攻擊我ê人所講ê，以及thong日所設beh害我ê計謀。Ia̍h thiaⁿ-kìⁿ hiah-ê khí--lâi kong-kek góa ê lâng só͘ kóng--ê, í-ki̍p thong-ji̍t só͘ siat beh hāi góa ê kè-bô͘.

63求你觀看，in坐teh á是起來，lóng用我做in ê歌曲，Kiû Lí koan-khòaⁿ, in chē-teh á-sī khí--lâi, lóng ēng góa chòe in ê koa-khek,

64耶和華ah，你tio̍h照in ê手所做ê，來報應in。Iâ-hô-hoa ah, Lí tio̍h chiàu in ê chhiú só͘ chòe--ê, lâi pò-èng in.

65你tio̍h hō͘ in ê心剛硬，hō͘你ê咒詛到tī in。Lí tio̍h hō͘ in ê sim kong-ngī, hō͘ Lí ê chiù-chó͘ kàu tī in.

66你tio̍h發出受氣追趕in；tùi耶和華ê天下剿滅in。Lí tio̍h hoat-chhut siū-khì tui-kóaⁿ in; tùi Iâ-hô-hoa ê thiⁿ-ē châu-bia̍t in.