1耶和華吩咐摩西亞倫，對in講：Iâ-hô-hoa hoan-hù Mô͘-se A-lûn, tùi in kóng,

2Lín tio̍h吩咐以色列人講：Tī地上一切走獸中thang食ê活物，就是chiah-ê。Lín tio̍h hoan-hù Í-sek-lia̍t lâng kóng, Tī tōe-chiūⁿ it-chhè cháu-siù-tiong thang chia̍h ê oa̍h-mi̍h, chiū-sī chiah-ê.

3見若分蹄拆叉、翻草ê cheng-siⁿ，lín lóng thang食伊。Kìⁿ-nā pun-tôe thiah-chhe, hoan-chháu ê cheng-siⁿ, lín lóng thang chia̍h i.

4獨獨翻草，á是分蹄ê中間m̄-thang食ê，就是chiah-ê；駱駝，因為翻草，無分蹄，對tī lín是無清氣。To̍k-to̍k hoan-chháu, á-sī pun-tôe ê tiong-kan m̄-thang chia̍h-ê, chiū-sī chiah-ê; lo̍k-tô, in-ūi hoan-chháu, bô pun-tôe, tùi tī lín sī bô chheng-khì.

5Sa-hoan，因為有翻草無分蹄，對tī lín是無清氣。Sa-hoan, in-ūi ū hoan-chháu bô pun-tôe, tùi tī lín sī bô chheng-khì.

6兔á，因為有翻草，無分蹄，對tī lín是無清氣。Thò͘-á, in-ūi ū hoan-chháu, bô pun-tôe, tùi tī lín sī bô chheng-khì.

7豬，因為有分蹄拆叉，總是無翻草，對tī lín是無清氣。Ti, in-ūi ū pun-tôe thiah-chhe, chóng-sī bô hoan-chháu, tùi tī lín sī bô chheng-khì.

8Hiah-ê肉lín lóng m̄-thang食；死ê lín lóng m̄-thang摸；對tī lín是無清氣。Hiah ê bah lín lóng m̄-thang chia̍h; sí-ê lín lóng m̄-thang bong; tùi tī lín sī bô chheng-khì.

9水中lín所thang食ê就是chiah-ê；見若tī水裡、海裡、河裡，有翅有鱗ê，lóng thang食伊。Chúi-tiong lín só͘ thang chia̍h-ê chiū-sī chiah-ê; kìⁿ-nā tī chúi-ni̍h, hái-ni̍h, hô-ni̍h, ū-si̍t ū-lân ê, lóng thang chia̍h i.

10見若tī海裡、河裡、水內一切ê動物，就是水內一切ê活物，見若無翅無鱗ê，lín lóng tio̍h掠做可惡。Kìⁿ-nā tī hái-ni̍h, hô-ni̍h, chúi-lāi it-chhè ê tōng-bu̍t, chiū-sī chúi-lāi it-chhè ê oa̍h-mi̍h, kìⁿ-nā bô-si̍t bô-lân ê, lín lóng tio̍h lia̍h chòe khó-ò͘ⁿ.

11Hiah-ê對tī lín是可惡ê；lín m̄-thang食伊ê肉；死ê也tio̍h掠做可惡。Hiah-ê tùi tī lín sī khó-ò͘ⁿ-ê; lín m̄-thang chia̍h i ê bah; sí-ê iā tio̍h lia̍h-chòe khó-ò͘ⁿ.

12見若水內無翅無鱗ê，lín lóng tio̍h掠做可惡。Kìⁿ-nā chúi-lāi bô-si̍t bô-lân ê, lín lóng tio̍h lia̍h-chòe khó-ò͘ⁿ.

13鳥隻ê中間lín tio̍h掠做可惡ê，就是chiah-ê；lín m̄-thang食伊，因為是可惡，就是鷹、梟、鵰、鵪，Chiáu-chiah ê tiong-kan lín tio̍h lia̍h-chòe khó-ò͘ⁿ-ê, chiū-sī chiah-ê; lín m̄-thang chia̍h i, in-ūi sī khó-ò͘ⁿ, chiū-sī eng, hiau, tiau, ian,

14小鷹kap伊ê類，sió-eng kap i ê lūi,

15烏鴉kap伊ê類，o͘-a kap i ê lūi,

16鴕鳥、公ê鴕鳥、魚鷹、鵲鷹kap伊ê類，tô-chiáu, kang ê tô-chiáu, hî-eng, chhiok-eng kap i ê lūi,

17暗光鳥、lô͘-chî、鴣黃、àm-kong-chiáu, lô͘-chî, ko͘-n̂g,

18貓頭鷹、鶗鶘、臭頭鷹，niau-thâu-eng, thê-ô͘, chhàu-thâu-eng,

19鶴、白鴒鷥kap伊ê類，tì-kè鳥，kap蝙蝠。ho̍h, pe̍h-lēng-si kap i ê lūi, tì-kè-chiáu, kap pián-hok.

20見若有翅ê蟲，用四腳行ê，lín lóng tio̍h掠做可惡。Kìⁿ-nā ū-si̍t ê thâng, ēng sì-kha kiâⁿ ê, lín lóng tio̍h lia̍h chòe khó-ò͘ⁿ.

21獨獨有翅ê蟲，用四腳行ê，其中有腳有腿，用來跳tī地裡ê，lín也thang食伊。To̍k-to̍k ū-si̍t ê thâng, ēng sì-kha kiâⁿ ê, kî-tiong ū kha ū thúi, ēng lâi thiàu tī tōe-ni̍h ê, lín iā thang chia̍h i.

22其中有蝗蟲(hông-thiông)、螞蚱(má-chà)、蟋蟀(sek-sut)，kap伊ê類，蚱蜢(chà-bēng)kap伊ê類，chiah-ê lín lóng thang食伊。Kî-tiong ū hông-thiông, má-chà, sek-sut, kap i ê lūi, chà-bēng kap i ê lūi, chiah-ê lín lóng thang chia̍h i.

23獨獨見有翅有四腳teh爬ê物，lín lóng tio̍h掠做可惡。To̍k-to̍k kìⁿ-ū si̍t ū sì-kha teh pê ê mi̍h, lín lóng tio̍h lia̍h-chòe khó-ò͘ⁿ.

24Tùi下面chiah-ê lóng會hō͘ lín無清氣，見若摸tio̍h hit-ê死ê，的確無清氣到ê-hng時。Tùi ē-bīn chiah-ê lóng ōe hō͘ lín bô chheng-khì, kìⁿ-nā bong-tio̍h hit ê sí ê, tek-khak bô chheng-khì kàu ê-hng sî.

25見若the̍h-tio̍h死屍ê一塊á，tio̍h洗伊ê衣服，的確無清氣到ê-hng時。Kìⁿ-nā the̍h-tio̍h sí-si ê chi̍t-tè-á, tio̍h sóe i ê i-ho̍k, tek-khak bô chheng-khì kàu ê-hng sî.

26見若cheng-siⁿ有分蹄無拆叉，也無翻草ê，對tī lín是無清氣；見若摸ê也無清氣。Kìⁿ-nā cheng-siⁿ ū pun-tôe bô thiah-chhe, iā bô hoan-chháu-ê, tùi tī lín sī bô chheng-khì; kìⁿ-nā bong-ê iā bô chheng-khì.

27見若四腳ê獸，其中用腳掌行ê，對tī lín是無清氣；摸伊ê死屍ê的確無清氣到tī ê-hng時。Kìⁿ-nā sì-kha ê siù, kî-tiong ēng kha-chiúⁿ kiâⁿ-ê, tùi tī lín sī bô chheng-khì; bong i ê sí-si-ê tek-khak bô chheng-khì kàu tī ê-hng sî.

28The̍h伊ê死屍ê tio̍h洗伊ê衣服；的確無清氣到ê-hng時；chiah-ê對tī lín是無清氣。The̍h i ê sí-si-ê tio̍h sóe i ê i-ho̍k; tek-khak bô chheng-khì kàu ê-hng sî; chiah-ê tùi tī lín sī bô chheng-khì.

29地上teh爬ê物，對tī lín無清氣ê，就是chiah-ê；鼬鼠、se̍k鼠、蜥蝪(sek-e̍k)，kap伊ê類，Tōe-chiūⁿ teh pê ê mi̍h, tùi tī lín bô chheng-khì-ê, chiū-sī chiah-ê; iû-chhú, se̍k-chhú, sek-e̍k, kap i ê lūi,

30壁虎、liông-chú、守宮、siâ-i、ián-têng。piah-hó͘, liông-chú, siú-kiong, siâ-i, ián-têng.

31Teh爬ê物ê中間，chiah-ê對tī lín是無清氣ê；tī in已經死，見若摸伊ê，的確無清氣到ê-hng時。Teh pê ê mi̍h ê tiong-kan, chiah-ê tùi tī lín sī bô chheng-khì-ê; tī in í-keng sí, kìⁿ-nā bong i ê, tek-khak bô chheng-khì kàu ê-hng-sî.

32其中有死ê ka-la̍uh tī甚麼物，hit-ê物就無清氣；無論是柴ê器具，á是衣服，á是皮，á是布袋，無論是做甚麼路用ê器具，tio̍h hē tī水裡，的確無清氣到ê-hng，hit時chiah清氣。Kî-tiong ū sí-ê ka-la̍uh tī sím-mi̍h mi̍h, hit ê mi̍h chiū bô chheng-khì; bô-lūn sī chhâ ê khì-kū, á-sī i-ho̍k, á-sī phê, á-sī pò͘-tē, bô-lūn sī chòe sím-mi̍h lō͘-ēng ê khì-kū, tio̍h hē tī chúi-ni̍h, tek-khak bô chheng-khì kàu ê-hng, hit-sî chiah chheng-khì.

33若in有一隻poa̍h tī磁器內，hit內面無論有甚麼，就bak無清氣；lín tio̍h將chit-ê磁器phah破。Nā in ū chi̍t-chiah poa̍h tī hûi-khì-lāi, hit lāi-bīn bô-lūn ū sím-mi̍h, chiū bak bô chheng-khì; lín tio̍h chiong chit ê hûi-khì phah-phòa.

34hit內面一切能食得ê食物，bak-tio̍h水ê，就無清氣；kohhit號器具內能lim得ê，也是無清氣。Hit lāi-bīn it-chhè ōe chia̍h-tit ê chia̍h-mi̍h, bak-tio̍h chúi ê, chiū bô chheng-khì; koh hit-hō khì-kū-lāi ōe lim-tit-ê, iā sī bô chheng-khì.

35Hiah-ê死屍，若有一塊ka-la̍uh tī甚麼物件，hit-ê物件就無清氣；無論是風爐，á是灶，就tio̍h phah破，lóng無清氣，也對tī lín是無清氣。Hiah ê sí-si, nā ū chi̍t-tè ka-la̍uh tī sím-mi̍h mi̍h-kiāⁿ, hit ê mi̍h-kiāⁿ chiū bô chheng-khì; bô-lūn sī hong-lô͘, á-sī chàu, chiū tio̍h phah-phòa, lóng bô chheng-khì, iā tùi tī lín sī bô chheng-khì.

36總是水泉á是聚集水ê池猶原是清氣；若kha̍p-tio̍h hit-ê死屍ê，就無清氣。Chóng-sī chúi-chôaⁿ á-sī chū-chi̍p chúi ê tî iû-goân sī chheng-khì; nā kha̍p-tio̍h hit ê sí-si-ê, chiū bô chheng-khì.

37若tī死屍有一塊ka-la̍uh tī beh眾ê種子，種子猶原清氣。Nā tī sí-si ū chi̍t-tè ka-la̍uh tī beh chèng ê chéng-chí, chéng-chí iû-goân chheng-khì.

38若水已經kā伊phah-tâm，hit-ê死屍有一塊ka-la̍uh tī伊ê頂面，hit-ê種子對tī lín是無清氣。Nā chúi í-keng kā i phah-tâm, hit ê sí-si ū chi̍t-tè ka-la̍uh tī i ê téng-bīn, hit ê chéng-chí tùi tī lín sī bô chheng-khì.

39Lín所thang食ê cheng-siⁿ，伊若家己死；有人摸tio̍h伊ê死屍，伊的確無清氣到ê-hng時。Lín só͘ thang chia̍h ê cheng-siⁿ, i nā ka-kī sí; ū lâng bong-tio̍h i ê sí-si, i tek-khak bô chheng-khì kàu ê-hng-sî.

40有人食hit-ê死ê cheng-siⁿ，tio̍h洗伊ê衣服，的確無清氣到ê-hng時；the̍h死ê cheng-siⁿ-ê也tio̍h洗伊ê衣服；的確無清氣到ê-hng時。Ū lâng chia̍h hit ê sí ê cheng-siⁿ, tio̍h sóe i ê i-ho̍k, tek-khak bô chheng-khì kàu ê-hng-sî; the̍h sí ê cheng-siⁿ-ê iā tio̍h sóe i ê i-ho̍k; tek-khak bô chheng-khì kàu ê-hng-sî.

41見若tī地上teh爬ê物是可惡ê，lóng m̄-thang食。Kìⁿ-nā tī tōe-chiūⁿ teh pê ê mi̍h sī khó-ò͘ⁿ-ê, lóng m̄-thang chia̍h.

42見若用腹肚行ê，kap用四腳行ê，á是有chōe-chōe腳ê，就是一切爬tī地上ê，lín lóng m̄-thang食；因為是可惡ê物。Kìⁿ-nā ēng pak-tó͘ kiâⁿ ê, kap ēng sì-kha kiâⁿ ê, á-sī ū chōe-chōe kha ê, chiū-sī it-chhè pê tī tōe-chiūⁿ ê, lín lóng m̄-thang chia̍h; in-ūi sī khó-ò͘ⁿ ê mi̍h.

43Lín m̄-thang因為甚麼teh爬ê物，hō͘家己成做可惡，也m̄-thang因為chiah-ê hō͘家己無清氣，致到lín bak lâ-sâm。Lín m̄-thang in-ūi sím-mi̍h teh pê ê mi̍h, hō͘ ka-kī chiâⁿ chòe khó-ò͘ⁿ, iā m̄-thang in-ūi chiah-ê hō͘ ka-kī bô chheng-khì, tì-kàu lín bak lâ-sâm.

44因為我是耶和華lín ê上帝，lín tio̍h家己聖來成聖；因為我是聖，lín也m̄-thang用tī地上teh爬ê物來phah lâ-sâm家己。In-ūi Góa sī Iâ-hô-hoa lín ê Siōng-tè, lín tio̍h ka-kī sèng lâi chiâⁿ-sèng; in-ūi Góa sī sèng, lín iā m̄-thang ēng tī tōe-chiūⁿ teh pê ê mi̍h lâi phah lâ-sâm ka-kī.

45因為我是chhōa lín出埃及地ê耶和華，beh做lín ê上帝；所以lín tio̍h聖，因為我是聖。In-ūi Góa sī chhōa lín chhut Ai-ki̍p tōe ê Iâ-hô-hoa, beh chòe lín ê Siōng-tè; só͘-í lín tio̍h sèng, in-ūi Góa sī sèng.

46這是走獸、飛鳥，kap水中會振動ê活物，以及會爬tī地上ê物ê規例。Che sī cháu-siù, pe-chiáu, kap chúi-tiong ōe tín-tāng ê oa̍h-mi̍h, í-ki̍p ōe pê tī tōe-chiūⁿ ê mi̍h ê kui-lē.

47Tio̍h分別無清氣ê kap清氣ê，能食得ê活物kap bōe食得ê活物。Tio̍h hun-piat bô chheng-khì-ê kap chheng-khì-ê, ōe-chia̍h-tit ê oa̍h-mi̍h kap bōe-chia̍h-tit ê oa̍h-mi̍h.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人講：若有婦人人懷孕生 ta-po͘-kiáⁿ，伊就無清氣七日，親像tī經期內lâ-sâm ê日無清氣一樣。Lí tio̍h hoan-hù Í-sek-lia̍t lâng kóng, Nā ū hū-jîn-lâng hoâi-īn siⁿ ta-po͘-kiáⁿ, i chiū bô chheng-khì chhit-ji̍t, chhin-chhiūⁿ tī keng-kî-lāi lâ-sâm ê ji̍t bô chheng-khì chi̍t-iūⁿ.

3到第八日hit-ê嬰á tio̍h受割禮。Kàu tē-poeh ji̍t hit ê eⁿ-á tio̍h siū kat-lé.

4婦人人iáu teh流血，tio̍h tiàm tī伊ê厝三十三日；清氣ê日iáu未滿，m̄-thang摸聖ê物，也m̄-thang入聖ê所在。Hū-jîn-lâng iáu teh lâu-huih, tio̍h tiàm tī i ê chhù saⁿ-cha̍p-saⁿ ji̍t; chheng-khì ê ji̍t iáu-bē móa, m̄-thang bong sèng ê mi̍h, iā m̄-thang ji̍p sèng ê só͘-chāi.

5伊若生cha-bó͘-kiáⁿ，就無清氣兩個七日，親像tī經期ê時一樣；若iáu teh流血，tio̍h tiàm tī伊ê厝六十六日，chiah清氣。I nā siⁿ cha-bó͘-kiáⁿ, chiū bô chheng-khì nn̄g ê chhit ji̍t, chhin-chhiūⁿ tī keng-kî ê sî chi̍t-iūⁿ; nā iáu teh lâu-huih, tio̍h tiàm tī i ê chhù la̍k-cha̍p-la̍k ji̍t, chiah chheng-khì.

6tī伊清氣ê日滿，無論是為 ta-po͘-kiáⁿ，á是cha-bó͘-kiáⁿ，伊tio̍h用未滿年ê羊á做燒祭，一隻鴿á-kiáⁿ，á是一隻ka-chui，做贖罪祭，帶到會幕門口，交代祭司。Tī i chheng-khì ê ji̍t móa, bô-lūn sī ūi ta-po͘-kiáⁿ, á-sī cha-bó͘-kiáⁿ, i tio̍h ēng bē-móa-nî ê iûⁿ-á chòe sio-chè, chi̍t chiah chíⁿ-á-kiáⁿ, á-sī chi̍t chiah ka-chui, chòe sio̍k-chōe-chè, tòa kàu hōe-bō͘ mn̂g-kháu, kau-tài chè-si.

7祭司tio̍h獻tī耶和華ê面前，為伊贖罪；伊ê血源就清氣；這就是婦人人生ta-po͘-kiáⁿ á是生cha-bó͘-kiáⁿ ê規例。Chè-si tio̍h hiàn tī Iâ-hô-hoa ê bīn-chêng, ūi i sio̍k-chōe; i ê huih-goân chiū chheng-khì; che chiū-sī hū-jîn-lâng siⁿ ta-po͘-kiáⁿ á-sī siⁿ cha-bó͘-kiáⁿ ê kui-lē.

8伊ê氣力若無夠額thang獻一隻羊á，伊就tio̍h用兩隻 ka-chui，á是兩隻鴿á-kiáⁿ，一隻做燒祭，一隻做贖罪祭；祭司tio̍h替伊贖罪，伊就清氣。I ê khùi-la̍t nā bô kàu-gia̍h thang hiàn chi̍t chiah iûⁿ-á, i chiū tio̍h ēng nn̄g-chiah ka-chui, á-sī nn̄g chiah chíⁿ-á-kiáⁿ, chi̍t-chiah chòe sio-chè, chi̍t-chiah chòe sio̍k-chōe-chè; chè-si tio̍h thòe i sio̍k-chōe, i chiū chheng-khì.

1耶和華吩咐摩西亞倫講：Iâ-hô-hoa hoan-hù Mô͘-se A-lûn kóng,

2人ê皮膚若腫，kiám-chhái生癬，á是生火斑，tī伊ê皮膚變成thái-ko ê症頭，tio̍h chhōa伊到祭司亞倫，á是到伊ê kiáⁿ孫一個祭司ê面前；Lâng ê phê-hu nā chéng, kiám-chhái siⁿ-sián, á-sī siⁿ hé-pan, tī i ê phê-hu pìⁿ-chiâⁿ thái-ko ê chèng-thâu, tio̍h chhōa i kàu chè-si A-lûn, á-sī kàu i ê kiáⁿ-sun chi̍t ê chè-si ê bīn-chêng;

3祭司tio̍h驗皮膚ê症頭；若是tio̍h症頭ê所在hit-ê毛已經變白，症頭ê款式深入去tī皮膚內，這就是thái-ko ê症頭；祭司tio̍h驗伊，斷伊做無清氣。chè-si tio̍h giām phê-hu ê chèng-thâu; nā sī tio̍h chèng-thâu ê só͘-chāi hit ê mn̂g í-keng piàn-pe̍h, chèng-thâu ê khoán-sit chhim-ji̍p-khì tī phê-hu-lāi, che chiū-sī thái-ko ê chèng-thâu; chè-si tio̍h giām i, toàn i chòe bô chheng-khì.

4若火斑tī伊ê皮膚是白ê，款式無深入tī皮膚內，伊ê毛也無變白，祭司就tio̍h將有症頭ê人關禁七日。Nā hé-pan tī i ê phê-hu sī pe̍h-ê, khoán-sit bô chhim-ji̍p tī phê-hu-lāi, i ê mn̂g iā bô piàn-pe̍h, chè-si chiū tio̍h chiong ū chèng-thâu ê lâng koaiⁿ-kìm chhit-ji̍t.

5到第七日，祭司tio̍h驗伊；看ah，若看見症頭已經停止，伊ê症頭無湠入皮膚，祭司tio̍h koh kā伊關禁七日久。Kàu tē-chhit ji̍t chè-si tio̍h giām i; khòaⁿ ah, nā khòaⁿ-kìⁿ chèng-thâu í-keng thêng-chí, i ê chèng-thâu bô thòaⁿ ji̍p phê-hu, chè-si tio̍h koh kā i koaiⁿ-kìm chhit-ji̍t kú.

6到第七日祭司tio̍h koh驗伊；看ah，若症頭khah hoa，koh症頭無湠入皮膚，祭司tio̍h斷伊做清氣；是癬nā-tiāⁿ；hit人就tio̍h洗衫褲，得tio̍h做清氣。Kàu tē-chhit ji̍t chè-si tio̍h koh giām i; khòaⁿ ah, nā chèng-thâu khah hoa, koh chèng-thâu bô thòaⁿ-ji̍p phê-hu, chè-si tio̍h toàn i chòe chheng-khì; sī sián nā-tiāⁿ; hit-lâng chiū tio̍h sóe saⁿ-khò͘, tit-tio̍h chòe chheng-khì.

7總是伊為tio̍h清氣，將身軀hō͘祭司驗了，癬若湠tī皮膚，伊tio̍h koh去hō͘祭司驗。chóng-sī i ūi-tio̍h chheng-khì, chiong seng-khu hō͘ chè-si giām-liáu, sián nā thòaⁿ tī phê-hu, i tio̍h koh khì hō͘ chè-si giām.

8祭司tio̍h驗伊；看ah，癬若湠tī皮膚；祭司tio̍h斷伊做無清氣；是thái-ko。Chè-si tio̍h giām i; khòaⁿ ah, sián nā thòaⁿ tī phê-hu; chè-si tio̍h toàn i chòe bô chheng-khì; sī thái-ko.

9人已經有thái-ko ê症頭，就tio̍h chhōa伊見祭司。Lâng í-keng ū thái-ko ê chèng-thâu, chiū tio̍h chhōa i kìⁿ chè-si.

10祭司tio̍h驗伊；看ah，皮膚若有所在腫白白，致到伊ê毛變白，tī腫ê所在見赤肉，Chè-si tio̍h giām i; khòaⁿ ah, phê-hu nā ū só͘-chāi chéng pe̍h-pe̍h, tì-kàu i ê mn̂g piàn-pe̍h, tī chéng ê só͘-chāi kìⁿ chhiah-bah,

11這是皮肉舊ê thái-ko；祭司tio̍h斷伊做無清氣，m̄免koh關禁伊，因為伊是無清氣。che sī phê-bah kū ê thái-ko; chè-si tio̍h toàn i chòe bô chheng-khì, m̄-bián koh koaiⁿ-kìm i, in-ūi i sī bô chheng-khì.

12Thái-ko若生湠tī皮膚ê四圍，tī患症頭ê人ê皮膚khit到滿滿，照祭司驗伊，tùi頭到腳無一所在無；Thái-ko nā siⁿ-thòaⁿ tī phê-hu ê sì-ûi, tī hoān chèng-thâu ê lâng ê phê-hu khí kàu móa-móa, chiàu chè-si giām i, tùi thâu kàu kha bô chi̍t só͘-chāi bô;

13祭司就tio̍h驗伊；看ah，thái-ko若已經khit tī全身，就tio̍h斷hit-ê患tio̍h症頭ê做清氣；thong身軀lóng變白，伊是清氣。chè-si chiū tio̍h giām i; khòaⁿ ah, thái-ko nā í-keng khí tī choân-sin, chiū tio̍h toàn hit ê hoān-tio̍h chèng-thâu-ê chòe chheng-khì; thong seng-khu lóng piàn-pe̍h, i sī chheng-khì.

14總是伊ê身軀甚麼時見赤肉，hit時就無清氣。Chóng-sī i ê seng-khu sím-mi̍h sî kìⁿ chhiah-bah, hit-sî chiū bô chheng-khì.

15祭司tio̍h驗hit-ê赤肉，就斷伊是無清氣；赤肉本是無清氣，是thái-ko。Chè-si tio̍h giām hit ê chhiah-bah, chiū toàn i sī bô chheng-khì; chhiah-bah pún sī bô chheng-khì, sī thái-ko.

16赤肉若復原，koh變白，伊tio̍h來見祭司；祭司tio̍h驗伊；Chhiah-bah nā ho̍k-goân, koh piàn-pe̍h, i tio̍h lâi kìⁿ chè-si; chè-si tio̍h giām i;

17看ah，症頭若變白，祭司就tio̍h斷hit-ê患症頭ê做清氣；伊就清氣。khòaⁿ ah, chèng-thâu nā piàn-pe̍h, chè-si chiū tio̍h toàn hit ê hoān chèng-thâu-ê chòe chheng-khì; i chiū chheng-khì.

18人若tī皮膚生粒á，也有醫好，Lâng nā tī phê-hu siⁿ lia̍p-á, iā ū i-hó,

19tī生粒á ê所在koh腫白白，á是粉紅色ê火斑，就tio̍h hō͘祭司驗。tī siⁿ lia̍p-á ê só͘-chāi koh chéng pe̍h-pe̍h, á-sī hún-âng-sek ê hé-pan, chiū tio̍h hō͘ chè-si giām.

20祭司tio̍h驗伊；看ah，若款式透入皮膚內，伊ê毛也變白，祭司tio̍h斷伊做無清氣，是thái-ko ê症頭，發tī粒á內。Chè-si tio̍h giām i; khòaⁿ ah, nā khoán-sit thàu-ji̍p phê-hu-lāi, i ê mn̂g iā piàn-pe̍h, chè-si tio̍h toàn i chòe bô chheng-khì, sī thái-ko ê chèng-thâu, hoat tī lia̍p-á lāi.

21祭司若驗伊；看ah，hit頂面無有白ê毛，也無透入tī皮膚內，koh有khah-hoa，祭司就tio̍h kā伊關禁七日。Chè-si nā giām i; khòaⁿ ah, hit téng-bīn bô ū pe̍h ê mn̂g, iā bô thàu-ji̍p tī phê-hu-lāi, koh ū khah-hoa, chè-si chiū tio̍h kā i koaiⁿ-kìm chhit-ji̍t.

22若生湠tī皮膚，祭司就tio̍h斷伊做無清氣；是患tio̍h症頭。Nā siⁿ-thòaⁿ tī phê-hu, chè-si chiū tio̍h toàn i chòe bô chheng-khì; sī hoān-tio̍h chèng-thâu.

23火斑若tī原所在停止，無生湠，就是粒á ê痕跡；祭司就tio̍h斷伊做清氣。Hé-pan nā tī goân só͘-chāi thêng-chí, bô siⁿ-thòaⁿ, chiū-sī lia̍p-á ê hûn-jiah; chè-si chiū tio̍h toàn i chòe chheng-khì.

24人ê皮肉若hō͘火燒tio̍h，燒tio̍h ê所在見赤肉，成做火斑，á是粉紅，á是lóng總白；Lâng ê phê-bah nā hō͘ hé sio-tio̍h, sio-tio̍h ê só͘-chāi kìⁿ chhiah-bah, chiâⁿ-chòe hé-pan, á-sī hún-âng, á-sī lóng-chóng pe̍h;

25祭司就tio̍h驗伊；看ah，火斑中ê毛若變白，款式koh深入tī皮膚內，是thái-ko tī火燒ê中間發起來；祭司就tio̍h斷伊做無清氣，是thái-ko ê症頭。chè-si chiū tio̍h giām i; khòaⁿ ah, hé-pan-tiong ê mn̂g nā piàn-pe̍h, khoán-sit koh chhim-ji̍p tī phê-hu-lāi, sī thái-ko tī hé-sio ê tiong-kan hoat-khí-lâi; chè-si chiū tio̍h toàn i chòe bô chheng-khì, sī thái-ko ê chèng-thâu.

26總是祭司驗了，看ah，tī火跡無有白毛，也無透入皮膚內，koh有khah-hoa，祭司就tio̍h kā伊關禁七日。Chóng-sī chè-si giām-liáu, khòaⁿ ah, tī hé-jiah bô ū pe̍h-mn̂g, iā bô thàu-ji̍p phê-hu-lāi, koh ū khah-hoa, chè-si chiū tio̍h kā i koaiⁿ-kìm chhit-ji̍t.

27到第七日祭司tio̍h驗伊；若湠tī皮膚，祭司就tio̍h斷伊做無清氣；是thái-ko ê症頭。Kàu tē-chhit ji̍t chè-si tio̍h giām i; nā thòaⁿ tī phê-hu, chè-si chiū tio̍h toàn i chòe bô chheng-khì; sī thái-ko ê chèng-thâu.

28火斑若tī goân所在停止，無生湠tī皮膚，koh有khah-hoa，是tùi火燒tio̍h來腫；祭司tio̍h斷伊做清氣；不過是火燒tio̍h ê痕跡。Hé-pan nā tī goân só͘-chāi thêng-chí, bô siⁿ-thòaⁿ tī phê-hu, koh ū khah-hoa, sī tùi hé sio-tio̍h lâi chéng; chè-si tio̍h toàn i chòe chheng-khì; put-kò sī hé sio-tio̍h ê hûn-jiah.

29無論男女，若tī頭殼á是嘴鬚有致症頭，Bô-lūn lâm-lú, nā tī thâu-khak á-sī chhùi-chhiu ū tì chèng-thâu,

30祭司tio̍h驗hit-ê症頭；看ah，款式若深入tī皮膚內，hit中間有幼幼黃ê毛，祭司就tio̍h斷伊做無清氣；這是瘡，就是頭殼á是嘴鬚裡ê thái-ko。chè-si tio̍h giām hit ê chèng-thâu; khòaⁿ ah, khoán-sit nā chhim-ji̍p tī phê-hu-lāi, hit tiong-kan ū iù-iù n̂g ê mn̂g, chè-si chiū tio̍h toàn i chòe bô chheng-khì; che sī chhng, chiū-sī thâu-khak á-sī chhùi-chhiu-ni̍h ê thái-ko.

31祭司驗hit-ê瘡ê症頭，看ah，款式若無深入皮膚內，hit中間也無烏ê毛，祭司就tio̍h將患tio̍h瘡ê症頭ê，關禁七日久。Chè-si giām hit ê chhng ê chèng-thâu, khòaⁿ ah, khoán-sit nā bô chhim-ji̍p phê-hu-lāi, hit tiong-kan iā bô o͘ ê mn̂g, chè-si chiū tio̍h chiong hoān-tio̍h chhng ê chèng-thâu ê, koaiⁿ-kìm chhit-ji̍t kú.

32到第七日祭司tio̍h驗hit-ê症頭，看ah，瘡若無湠，hit中間也無黃ê毛，瘡ê款式也無深入皮膚內；Kàu tē-chhit ji̍t chè-si tio̍h giām hit ê chèng-thâu, khòaⁿ ah, chhng nā bô thòaⁿ, hit tiong-kan iā bô n̂g ê mn̂g, chhng ê khoán-sit iā bô chhim-ji̍p phê-hu-lāi;

33hit人tio̍h剃伊ê毛，總是瘡m̄-thang剃；祭司tio̍h koh關禁hit-ê 生瘡ê七日久。hit-lâng tio̍h thì i ê mn̂g, chóng-sī chhng m̄-thang thì; chè-si tio̍h koh koaiⁿ-kìm hit ê siⁿ-chhng-ê chhit-ji̍t kú.

34到第七日祭司tio̍h驗hit-ê瘡；看ah，瘡若無湠tī皮膚，款式也無深入tī皮膚內，祭司就tio̍h斷伊做清氣；伊tio̍h洗衫褲，就成做清氣。Kàu tē-chhit ji̍t chè-si tio̍h giām hit ê chhng; khòaⁿ ah, chhng nā bô thòaⁿ tī phê-hu, khoán-sit iā bô chhim-ji̍p tī phê-hu-lāi, chè-si chiū tio̍h toàn i chòe chheng-khì; i tio̍h sóe saⁿ-khò͘, chiū chiâⁿ-chòe chheng-khì.

35總是伊清氣以後瘡若湠tī皮膚，祭司tio̍h驗伊；Chóng-sī i chheng-khì í-āu chhng nā thòaⁿ tī phê-hu, chè-si tio̍h giām i;

36看ah，伊ê瘡若湠tī皮膚，祭司m̄免koh chhē 黃ê毛；伊是無清氣。khòaⁿ ah, i ê chhng nā thòaⁿ tī phê-hu, chè-si m̄-bián koh chhē n̂g ê mn̂g; i sī bô chheng-khì.

37若照伊看，瘡已經停止，hit中間若發烏ê毛，瘡既然好，hit人是清氣；祭司就tio̍h斷伊做清氣。Nā chiàu i khòaⁿ, chhng í-keng thêng-chí, hit tiong-kan nā hoat o͘ ê mn̂g, chhng kì-jiân hó, hit-lâng sī chheng-khì; chè-si chiū tio̍h toàn i chòe chheng-khì.

38無論男女，皮肉若起火斑，就是白色ê火斑；祭司tio̍h驗伊；Bô-lūn lâm-lú, phê-bah nā khí hé-pan, chiū-sī pe̍h-sek ê hé-pan; chè-si tio̍h giām i;

39看ah，in ê皮肉ê火斑，若是火灰色，這是皮膚所發ê白phā，hit人是清氣。khòaⁿ ah, in ê phê-bah ê hé-pan, nā sī hé-hu sek, che sī phê-hu só͘ hoat ê pe̍h-phā, hit lâng sī chheng-khì.

40人若lut頭毛，伊ê頭殼是光khō-khō，iáu是清氣。Lâng nā lut thâu-mn̂g, i ê thâu-khak sī kng-khō-khō, iáu sī chheng-khì.

41伊ê頭殼前ê頭毛若lut，伊是liù額ê；iáu-kú是清氣。I ê thâu-khak-chêng ê thâu-mn̂g nā lut, i sī liù-hia̍h-ê; iáu-kú sī chheng-khì.

42頭殼光khō-khō ê所在，á是liù額ê所在，若有粉紅色ê症頭，這是thái-ko發tī頭光khō-khō ê所在，á是liù額ê所在。Thâu-khak kng-khō-khō ê só͘-chāi, á-sī liù-hia̍h ê só͘-chāi, nā ū hún-âng-sek ê chèng-thâu, che sī thái-ko hoat tī thâu kng-khō-khō ê só͘-chāi, á-sī liù-hia̍h ê só͘-chāi.

43祭司tio̍h驗伊；看ah，伊ê症頭若tī頭殼光khō-khō ê所在，á是liù額ê所在，有粉紅色腫起來，親像皮肉thái-ko ê款式，Chè-si tio̍h giām i; khòaⁿ ah, i ê chèng-thâu nā tī thâu-khak kng-khō-khō ê só͘-chāi, á-sī liù-hia̍h ê só͘-chāi, ū hún-âng-sek chéng-khí-lâi, chhin-chhiūⁿ phê-bah thái-ko ê khoán-sit,

44hit人就是起thái-ko，無清氣ê；祭司的確tio̍h斷伊做無清氣；伊ê症頭是tī頭殼。hit-lâng chiū-sī khí thái-ko, bô chheng-khì-ê; chè-si tek-khak tio̍h toàn i chòe bô chheng-khì; i ê chèng-thâu sī tī thâu-khak.

45有thái-ko ê症頭ê，伊ê衫褲tio̍h拆裂，伊ê頭毛tio̍h phah散，掩(ng) 伊ê嘴ê頂唇，叫講：無清氣，無清氣。Ū thái-ko ê chèng-thâu-ê, i ê saⁿ-khò͘ tio̍h thiah-li̍h, i ê thâu-mn̂g tio̍h phah-sòaⁿ, ng i ê chhùi ê téng-tûn, kiò kóng, Bô chheng-khì, bô chheng-khì.

46症頭tī伊ê身軀ê日，伊就無清氣；伊既然是無清氣；伊tio̍h家己tiàm；伊ê所在tī營外。Chèng-thâu tī i ê seng-khu ê ji̍t, i chiū bô chheng-khì; i kì-jiân sī bô chheng-khì; i tio̍h ka-kī tiàm; i ê só͘-chāi tī iâⁿ-gōa.

47染tio̍h thái-ko症ê衫褲，無論是羊毛ê，á是苧布；Jiám-tio̍h thái-ko chèng ê saⁿ-khò͘, bô-lūn sī iûⁿ-mn̂g ê, á-sī tōe-pò͘;

48無論是經(kiⁿ)，是緯(hūi)，是苧布ê；是羊毛ê，是皮ê，á是皮做ê物；bô-lūn sī kiⁿ, sī hūi, sī tōe-pò͘ ê; sī iûⁿ-mn̂g ê, sī phê ê, á-sī phê chòe ê mi̍h;

49Hit-ê症頭若是青á是紅ê色，tī衫褲，tī皮，tī經，tī緯，á是tī皮做ê物，是thái-ko ê症頭，tio̍h hō͘祭司驗。hit ê chèng-thâu nā sī chhiⁿ á-sī âng ê sek, tī saⁿ-khò͘, tī phê, tī kiⁿ, tī hūi, á-sī tī phê chòe ê mi̍h, sī thái-ko ê chèng-thâu, tio̍h hō͘ chè-si giām.

50祭司tio̍h驗hit-ê症頭，將染tio̍h症頭ê物，關禁七日。Chè-si tio̍h giām hit ê chèng-thâu, chiong jiám-tio̍h chèng-thâu ê mi̍h, koaiⁿ-kìm chhit-ji̍t.

51到第七日，伊tio̍h驗hit-ê症頭；症頭若湠tī衫褲，tī經，tī 緯，tī皮，chit-ê皮無論做甚麼路用，hit-ê症頭是惡ê thái-ko；lóng是無清氣。Kàu tē-chhit ji̍t, i tio̍h giām hit ê chèng-thâu; chèng-thâu nā thòaⁿ tī saⁿ-khò͘, tī kiⁿ, tī hūi, tī phê, chit ê phê bô-lūn chòe sím-mi̍h lō͘-ēng, hit ê chèng-thâu sī ok ê thái-ko; lóng sī bô chheng-khì.

52hit-ê 染tio̍h症頭ê衫褲，或是經，是緯，是羊毛，是苧布，á是皮做ê物，伊lóng tio̍h燒去，因為這是惡ê thái-ko，的確tī火中燒去。Hit ê jiám-tio̍h chèng-thâu ê saⁿ-khò͘, he̍k-sī kiⁿ, sī hūi, sī iûⁿ-mn̂g, sī tōe-pò͘, á-sī phê chòe ê mi̍h, i lóng tio̍h sio-khì, in-ūi che sī ok ê thái-ko, tek-khak tī hé-tiong sio-khì.

53祭司驗伊；看ah，症頭若無湠tī衫裡，tī經，tī緯，á是皮做ê物；Chè-si giām i; khòaⁿ ah, chèng-thâu nā bô thòaⁿ tī saⁿ-ni̍h, tī kiⁿ, tī hūi, á-sī phê-chòe ê mi̍h;

54祭司tio̍h吩咐in洗hit-ê染tio̍h症頭ê物，koh關禁七日。chè-si tio̍h hoan-hù in sóe hit ê jiám-tio̍h chèng-thâu ê mi̍h, koh koaiⁿ-kìm chhit-ji̍t.

55症頭洗了後祭司tio̍h驗伊；看ah，症頭若無變色，症頭若無koh湠，hit-ê就無清氣；是惡毒ê症頭；無論面pháiⁿ，裡pháiⁿ，lóng tio̍h用火燒。Chèng-thâu sóe liáu-āu chè-si tio̍h giām i; khòaⁿ ah, chèng-thâu nā bô piàn-sek, chèng-thâu nā bô koh thòaⁿ, hit-ê chiū bô chheng-khì; sī ok-to̍k ê chèng-thâu; bô-lūn bīn pháiⁿ, lí pháiⁿ, lóng tio̍h ēng hé sio.

56洗了後，祭司驗伊；看ah，若hit-ê症頭khah hoa，伊就tio̍h tùi衫，á是皮，á是經，á是緯，kā伊拆起來。Sóe liáu-āu, chè-si giām i; khòaⁿ ah, nā hit ê chèng-thâu khah hoa, i chiū tio̍h tùi saⁿ, á-sī phê, á-sī kiⁿ, á-sī hūi, kā i thiah-khí-lâi.

57若是iáu-kú發現tī衫裡，á是經，á是緯，á是皮做ê物，這是症頭teh發；tio̍h用火燒hit-ê染tio̍h症頭ê物。Nā sī iáu-kú hoat-hiān tī saⁿ-ni̍h, á-sī kiⁿ, á-sī hūi, á-sī phê-chòe ê mi̍h, che sī chèng-thâu teh hoat; tio̍h ēng hé sio hit ê jiám-tio̍h chèng-thâu ê mi̍h.

58你所洗ê衫，或是經，或是緯，或是皮做ê物，若症頭已經離開，tio̍h koh再洗，就清氣。Lí só͘ sóe ê saⁿ, he̍k-sī kiⁿ, he̍k-sī hūi, he̍k-sī phê-chòe ê mi̍h, nā chèng-thâu í-keng lī-khui, tio̍h koh-chài sóe, chiū chheng-khì.

59這就是thái-ko症頭ê規例，無論是tī羊毛衫，苧布衫，tī經，tī緯，kap皮做ê物，thang斷做清氣，á是斷做無清氣。Che chiū-sī thái-ko chèng-thâu ê kui-lē, bô-lūn sī tī iûⁿ-mn̂g-saⁿ, tōe-pò͘-saⁿ, tī kiⁿ, tī hūi, kap phê-chòe ê mi̍h, thang toàn-chòe chheng-khì, á-sī toàn-chòe bô chheng-khì.