1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人講：若有婦人人懷孕生 ta-po͘-kiáⁿ，伊就無清氣七日，親像tī經期內lâ-sâm ê日無清氣一樣。Lí tio̍h hoan-hù Í-sek-lia̍t lâng kóng, Nā ū hū-jîn-lâng hoâi-īn siⁿ ta-po͘-kiáⁿ, i chiū bô chheng-khì chhit-ji̍t, chhin-chhiūⁿ tī keng-kî-lāi lâ-sâm ê ji̍t bô chheng-khì chi̍t-iūⁿ.

3到第八日hit-ê嬰á tio̍h受割禮。Kàu tē-poeh ji̍t hit ê eⁿ-á tio̍h siū kat-lé.

4婦人人iáu teh流血，tio̍h tiàm tī伊ê厝三十三日；清氣ê日iáu未滿，m̄-thang摸聖ê物，也m̄-thang入聖ê所在。Hū-jîn-lâng iáu teh lâu-huih, tio̍h tiàm tī i ê chhù saⁿ-cha̍p-saⁿ ji̍t; chheng-khì ê ji̍t iáu-bē móa, m̄-thang bong sèng ê mi̍h, iā m̄-thang ji̍p sèng ê só͘-chāi.

5伊若生cha-bó͘-kiáⁿ，就無清氣兩個七日，親像tī經期ê時一樣；若iáu teh流血，tio̍h tiàm tī伊ê厝六十六日，chiah清氣。I nā siⁿ cha-bó͘-kiáⁿ, chiū bô chheng-khì nn̄g ê chhit ji̍t, chhin-chhiūⁿ tī keng-kî ê sî chi̍t-iūⁿ; nā iáu teh lâu-huih, tio̍h tiàm tī i ê chhù la̍k-cha̍p-la̍k ji̍t, chiah chheng-khì.

6tī伊清氣ê日滿，無論是為 ta-po͘-kiáⁿ，á是cha-bó͘-kiáⁿ，伊tio̍h用未滿年ê羊á做燒祭，一隻鴿á-kiáⁿ，á是一隻ka-chui，做贖罪祭，帶到會幕門口，交代祭司。Tī i chheng-khì ê ji̍t móa, bô-lūn sī ūi ta-po͘-kiáⁿ, á-sī cha-bó͘-kiáⁿ, i tio̍h ēng bē-móa-nî ê iûⁿ-á chòe sio-chè, chi̍t chiah chíⁿ-á-kiáⁿ, á-sī chi̍t chiah ka-chui, chòe sio̍k-chōe-chè, tòa kàu hōe-bō͘ mn̂g-kháu, kau-tài chè-si.

7祭司tio̍h獻tī耶和華ê面前，為伊贖罪；伊ê血源就清氣；這就是婦人人生ta-po͘-kiáⁿ á是生cha-bó͘-kiáⁿ ê規例。Chè-si tio̍h hiàn tī Iâ-hô-hoa ê bīn-chêng, ūi i sio̍k-chōe; i ê huih-goân chiū chheng-khì; che chiū-sī hū-jîn-lâng siⁿ ta-po͘-kiáⁿ á-sī siⁿ cha-bó͘-kiáⁿ ê kui-lē.

8伊ê氣力若無夠額thang獻一隻羊á，伊就tio̍h用兩隻 ka-chui，á是兩隻鴿á-kiáⁿ，一隻做燒祭，一隻做贖罪祭；祭司tio̍h替伊贖罪，伊就清氣。I ê khùi-la̍t nā bô kàu-gia̍h thang hiàn chi̍t chiah iûⁿ-á, i chiū tio̍h ēng nn̄g-chiah ka-chui, á-sī nn̄g chiah chíⁿ-á-kiáⁿ, chi̍t-chiah chòe sio-chè, chi̍t-chiah chòe sio̍k-chōe-chè; chè-si tio̍h thòe i sio̍k-chōe, i chiū chheng-khì.

1耶和華吩咐摩西亞倫講：Iâ-hô-hoa hoan-hù Mô͘-se A-lûn kóng,

2人ê皮膚若腫，kiám-chhái生癬，á是生火斑，tī伊ê皮膚變成thái-ko ê症頭，tio̍h chhōa伊到祭司亞倫，á是到伊ê kiáⁿ孫一個祭司ê面前；Lâng ê phê-hu nā chéng, kiám-chhái siⁿ-sián, á-sī siⁿ hé-pan, tī i ê phê-hu pìⁿ-chiâⁿ thái-ko ê chèng-thâu, tio̍h chhōa i kàu chè-si A-lûn, á-sī kàu i ê kiáⁿ-sun chi̍t ê chè-si ê bīn-chêng;

3祭司tio̍h驗皮膚ê症頭；若是tio̍h症頭ê所在hit-ê毛已經變白，症頭ê款式深入去tī皮膚內，這就是thái-ko ê症頭；祭司tio̍h驗伊，斷伊做無清氣。chè-si tio̍h giām phê-hu ê chèng-thâu; nā sī tio̍h chèng-thâu ê só͘-chāi hit ê mn̂g í-keng piàn-pe̍h, chèng-thâu ê khoán-sit chhim-ji̍p-khì tī phê-hu-lāi, che chiū-sī thái-ko ê chèng-thâu; chè-si tio̍h giām i, toàn i chòe bô chheng-khì.

4若火斑tī伊ê皮膚是白ê，款式無深入tī皮膚內，伊ê毛也無變白，祭司就tio̍h將有症頭ê人關禁七日。Nā hé-pan tī i ê phê-hu sī pe̍h-ê, khoán-sit bô chhim-ji̍p tī phê-hu-lāi, i ê mn̂g iā bô piàn-pe̍h, chè-si chiū tio̍h chiong ū chèng-thâu ê lâng koaiⁿ-kìm chhit-ji̍t.

5到第七日，祭司tio̍h驗伊；看ah，若看見症頭已經停止，伊ê症頭無湠入皮膚，祭司tio̍h koh kā伊關禁七日久。Kàu tē-chhit ji̍t chè-si tio̍h giām i; khòaⁿ ah, nā khòaⁿ-kìⁿ chèng-thâu í-keng thêng-chí, i ê chèng-thâu bô thòaⁿ ji̍p phê-hu, chè-si tio̍h koh kā i koaiⁿ-kìm chhit-ji̍t kú.

6到第七日祭司tio̍h koh驗伊；看ah，若症頭khah hoa，koh症頭無湠入皮膚，祭司tio̍h斷伊做清氣；是癬nā-tiāⁿ；hit人就tio̍h洗衫褲，得tio̍h做清氣。Kàu tē-chhit ji̍t chè-si tio̍h koh giām i; khòaⁿ ah, nā chèng-thâu khah hoa, koh chèng-thâu bô thòaⁿ-ji̍p phê-hu, chè-si tio̍h toàn i chòe chheng-khì; sī sián nā-tiāⁿ; hit-lâng chiū tio̍h sóe saⁿ-khò͘, tit-tio̍h chòe chheng-khì.

7總是伊為tio̍h清氣，將身軀hō͘祭司驗了，癬若湠tī皮膚，伊tio̍h koh去hō͘祭司驗。chóng-sī i ūi-tio̍h chheng-khì, chiong seng-khu hō͘ chè-si giām-liáu, sián nā thòaⁿ tī phê-hu, i tio̍h koh khì hō͘ chè-si giām.

8祭司tio̍h驗伊；看ah，癬若湠tī皮膚；祭司tio̍h斷伊做無清氣；是thái-ko。Chè-si tio̍h giām i; khòaⁿ ah, sián nā thòaⁿ tī phê-hu; chè-si tio̍h toàn i chòe bô chheng-khì; sī thái-ko.

9人已經有thái-ko ê症頭，就tio̍h chhōa伊見祭司。Lâng í-keng ū thái-ko ê chèng-thâu, chiū tio̍h chhōa i kìⁿ chè-si.

10祭司tio̍h驗伊；看ah，皮膚若有所在腫白白，致到伊ê毛變白，tī腫ê所在見赤肉，Chè-si tio̍h giām i; khòaⁿ ah, phê-hu nā ū só͘-chāi chéng pe̍h-pe̍h, tì-kàu i ê mn̂g piàn-pe̍h, tī chéng ê só͘-chāi kìⁿ chhiah-bah,

11這是皮肉舊ê thái-ko；祭司tio̍h斷伊做無清氣，m̄免koh關禁伊，因為伊是無清氣。che sī phê-bah kū ê thái-ko; chè-si tio̍h toàn i chòe bô chheng-khì, m̄-bián koh koaiⁿ-kìm i, in-ūi i sī bô chheng-khì.

12Thái-ko若生湠tī皮膚ê四圍，tī患症頭ê人ê皮膚khit到滿滿，照祭司驗伊，tùi頭到腳無一所在無；Thái-ko nā siⁿ-thòaⁿ tī phê-hu ê sì-ûi, tī hoān chèng-thâu ê lâng ê phê-hu khí kàu móa-móa, chiàu chè-si giām i, tùi thâu kàu kha bô chi̍t só͘-chāi bô;

13祭司就tio̍h驗伊；看ah，thái-ko若已經khit tī全身，就tio̍h斷hit-ê患tio̍h症頭ê做清氣；thong身軀lóng變白，伊是清氣。chè-si chiū tio̍h giām i; khòaⁿ ah, thái-ko nā í-keng khí tī choân-sin, chiū tio̍h toàn hit ê hoān-tio̍h chèng-thâu-ê chòe chheng-khì; thong seng-khu lóng piàn-pe̍h, i sī chheng-khì.

14總是伊ê身軀甚麼時見赤肉，hit時就無清氣。Chóng-sī i ê seng-khu sím-mi̍h sî kìⁿ chhiah-bah, hit-sî chiū bô chheng-khì.

15祭司tio̍h驗hit-ê赤肉，就斷伊是無清氣；赤肉本是無清氣，是thái-ko。Chè-si tio̍h giām hit ê chhiah-bah, chiū toàn i sī bô chheng-khì; chhiah-bah pún sī bô chheng-khì, sī thái-ko.

16赤肉若復原，koh變白，伊tio̍h來見祭司；祭司tio̍h驗伊；Chhiah-bah nā ho̍k-goân, koh piàn-pe̍h, i tio̍h lâi kìⁿ chè-si; chè-si tio̍h giām i;

17看ah，症頭若變白，祭司就tio̍h斷hit-ê患症頭ê做清氣；伊就清氣。khòaⁿ ah, chèng-thâu nā piàn-pe̍h, chè-si chiū tio̍h toàn hit ê hoān chèng-thâu-ê chòe chheng-khì; i chiū chheng-khì.

18人若tī皮膚生粒á，也有醫好，Lâng nā tī phê-hu siⁿ lia̍p-á, iā ū i-hó,

19tī生粒á ê所在koh腫白白，á是粉紅色ê火斑，就tio̍h hō͘祭司驗。tī siⁿ lia̍p-á ê só͘-chāi koh chéng pe̍h-pe̍h, á-sī hún-âng-sek ê hé-pan, chiū tio̍h hō͘ chè-si giām.

20祭司tio̍h驗伊；看ah，若款式透入皮膚內，伊ê毛也變白，祭司tio̍h斷伊做無清氣，是thái-ko ê症頭，發tī粒á內。Chè-si tio̍h giām i; khòaⁿ ah, nā khoán-sit thàu-ji̍p phê-hu-lāi, i ê mn̂g iā piàn-pe̍h, chè-si tio̍h toàn i chòe bô chheng-khì, sī thái-ko ê chèng-thâu, hoat tī lia̍p-á lāi.

21祭司若驗伊；看ah，hit頂面無有白ê毛，也無透入tī皮膚內，koh有khah-hoa，祭司就tio̍h kā伊關禁七日。Chè-si nā giām i; khòaⁿ ah, hit téng-bīn bô ū pe̍h ê mn̂g, iā bô thàu-ji̍p tī phê-hu-lāi, koh ū khah-hoa, chè-si chiū tio̍h kā i koaiⁿ-kìm chhit-ji̍t.

22若生湠tī皮膚，祭司就tio̍h斷伊做無清氣；是患tio̍h症頭。Nā siⁿ-thòaⁿ tī phê-hu, chè-si chiū tio̍h toàn i chòe bô chheng-khì; sī hoān-tio̍h chèng-thâu.

23火斑若tī原所在停止，無生湠，就是粒á ê痕跡；祭司就tio̍h斷伊做清氣。Hé-pan nā tī goân só͘-chāi thêng-chí, bô siⁿ-thòaⁿ, chiū-sī lia̍p-á ê hûn-jiah; chè-si chiū tio̍h toàn i chòe chheng-khì.

24人ê皮肉若hō͘火燒tio̍h，燒tio̍h ê所在見赤肉，成做火斑，á是粉紅，á是lóng總白；Lâng ê phê-bah nā hō͘ hé sio-tio̍h, sio-tio̍h ê só͘-chāi kìⁿ chhiah-bah, chiâⁿ-chòe hé-pan, á-sī hún-âng, á-sī lóng-chóng pe̍h;

25祭司就tio̍h驗伊；看ah，火斑中ê毛若變白，款式koh深入tī皮膚內，是thái-ko tī火燒ê中間發起來；祭司就tio̍h斷伊做無清氣，是thái-ko ê症頭。chè-si chiū tio̍h giām i; khòaⁿ ah, hé-pan-tiong ê mn̂g nā piàn-pe̍h, khoán-sit koh chhim-ji̍p tī phê-hu-lāi, sī thái-ko tī hé-sio ê tiong-kan hoat-khí-lâi; chè-si chiū tio̍h toàn i chòe bô chheng-khì, sī thái-ko ê chèng-thâu.

26總是祭司驗了，看ah，tī火跡無有白毛，也無透入皮膚內，koh有khah-hoa，祭司就tio̍h kā伊關禁七日。Chóng-sī chè-si giām-liáu, khòaⁿ ah, tī hé-jiah bô ū pe̍h-mn̂g, iā bô thàu-ji̍p phê-hu-lāi, koh ū khah-hoa, chè-si chiū tio̍h kā i koaiⁿ-kìm chhit-ji̍t.

27到第七日祭司tio̍h驗伊；若湠tī皮膚，祭司就tio̍h斷伊做無清氣；是thái-ko ê症頭。Kàu tē-chhit ji̍t chè-si tio̍h giām i; nā thòaⁿ tī phê-hu, chè-si chiū tio̍h toàn i chòe bô chheng-khì; sī thái-ko ê chèng-thâu.

28火斑若tī goân所在停止，無生湠tī皮膚，koh有khah-hoa，是tùi火燒tio̍h來腫；祭司tio̍h斷伊做清氣；不過是火燒tio̍h ê痕跡。Hé-pan nā tī goân só͘-chāi thêng-chí, bô siⁿ-thòaⁿ tī phê-hu, koh ū khah-hoa, sī tùi hé sio-tio̍h lâi chéng; chè-si tio̍h toàn i chòe chheng-khì; put-kò sī hé sio-tio̍h ê hûn-jiah.

29無論男女，若tī頭殼á是嘴鬚有致症頭，Bô-lūn lâm-lú, nā tī thâu-khak á-sī chhùi-chhiu ū tì chèng-thâu,

30祭司tio̍h驗hit-ê症頭；看ah，款式若深入tī皮膚內，hit中間有幼幼黃ê毛，祭司就tio̍h斷伊做無清氣；這是瘡，就是頭殼á是嘴鬚裡ê thái-ko。chè-si tio̍h giām hit ê chèng-thâu; khòaⁿ ah, khoán-sit nā chhim-ji̍p tī phê-hu-lāi, hit tiong-kan ū iù-iù n̂g ê mn̂g, chè-si chiū tio̍h toàn i chòe bô chheng-khì; che sī chhng, chiū-sī thâu-khak á-sī chhùi-chhiu-ni̍h ê thái-ko.

31祭司驗hit-ê瘡ê症頭，看ah，款式若無深入皮膚內，hit中間也無烏ê毛，祭司就tio̍h將患tio̍h瘡ê症頭ê，關禁七日久。Chè-si giām hit ê chhng ê chèng-thâu, khòaⁿ ah, khoán-sit nā bô chhim-ji̍p phê-hu-lāi, hit tiong-kan iā bô o͘ ê mn̂g, chè-si chiū tio̍h chiong hoān-tio̍h chhng ê chèng-thâu ê, koaiⁿ-kìm chhit-ji̍t kú.

32到第七日祭司tio̍h驗hit-ê症頭，看ah，瘡若無湠，hit中間也無黃ê毛，瘡ê款式也無深入皮膚內；Kàu tē-chhit ji̍t chè-si tio̍h giām hit ê chèng-thâu, khòaⁿ ah, chhng nā bô thòaⁿ, hit tiong-kan iā bô n̂g ê mn̂g, chhng ê khoán-sit iā bô chhim-ji̍p phê-hu-lāi;

33hit人tio̍h剃伊ê毛，總是瘡m̄-thang剃；祭司tio̍h koh關禁hit-ê 生瘡ê七日久。hit-lâng tio̍h thì i ê mn̂g, chóng-sī chhng m̄-thang thì; chè-si tio̍h koh koaiⁿ-kìm hit ê siⁿ-chhng-ê chhit-ji̍t kú.

34到第七日祭司tio̍h驗hit-ê瘡；看ah，瘡若無湠tī皮膚，款式也無深入tī皮膚內，祭司就tio̍h斷伊做清氣；伊tio̍h洗衫褲，就成做清氣。Kàu tē-chhit ji̍t chè-si tio̍h giām hit ê chhng; khòaⁿ ah, chhng nā bô thòaⁿ tī phê-hu, khoán-sit iā bô chhim-ji̍p tī phê-hu-lāi, chè-si chiū tio̍h toàn i chòe chheng-khì; i tio̍h sóe saⁿ-khò͘, chiū chiâⁿ-chòe chheng-khì.

35總是伊清氣以後瘡若湠tī皮膚，祭司tio̍h驗伊；Chóng-sī i chheng-khì í-āu chhng nā thòaⁿ tī phê-hu, chè-si tio̍h giām i;

36看ah，伊ê瘡若湠tī皮膚，祭司m̄免koh chhē 黃ê毛；伊是無清氣。khòaⁿ ah, i ê chhng nā thòaⁿ tī phê-hu, chè-si m̄-bián koh chhē n̂g ê mn̂g; i sī bô chheng-khì.

37若照伊看，瘡已經停止，hit中間若發烏ê毛，瘡既然好，hit人是清氣；祭司就tio̍h斷伊做清氣。Nā chiàu i khòaⁿ, chhng í-keng thêng-chí, hit tiong-kan nā hoat o͘ ê mn̂g, chhng kì-jiân hó, hit-lâng sī chheng-khì; chè-si chiū tio̍h toàn i chòe chheng-khì.

38無論男女，皮肉若起火斑，就是白色ê火斑；祭司tio̍h驗伊；Bô-lūn lâm-lú, phê-bah nā khí hé-pan, chiū-sī pe̍h-sek ê hé-pan; chè-si tio̍h giām i;

39看ah，in ê皮肉ê火斑，若是火灰色，這是皮膚所發ê白phā，hit人是清氣。khòaⁿ ah, in ê phê-bah ê hé-pan, nā sī hé-hu sek, che sī phê-hu só͘ hoat ê pe̍h-phā, hit lâng sī chheng-khì.

40人若lut頭毛，伊ê頭殼是光khō-khō，iáu是清氣。Lâng nā lut thâu-mn̂g, i ê thâu-khak sī kng-khō-khō, iáu sī chheng-khì.

41伊ê頭殼前ê頭毛若lut，伊是liù額ê；iáu-kú是清氣。I ê thâu-khak-chêng ê thâu-mn̂g nā lut, i sī liù-hia̍h-ê; iáu-kú sī chheng-khì.

42頭殼光khō-khō ê所在，á是liù額ê所在，若有粉紅色ê症頭，這是thái-ko發tī頭光khō-khō ê所在，á是liù額ê所在。Thâu-khak kng-khō-khō ê só͘-chāi, á-sī liù-hia̍h ê só͘-chāi, nā ū hún-âng-sek ê chèng-thâu, che sī thái-ko hoat tī thâu kng-khō-khō ê só͘-chāi, á-sī liù-hia̍h ê só͘-chāi.

43祭司tio̍h驗伊；看ah，伊ê症頭若tī頭殼光khō-khō ê所在，á是liù額ê所在，有粉紅色腫起來，親像皮肉thái-ko ê款式，Chè-si tio̍h giām i; khòaⁿ ah, i ê chèng-thâu nā tī thâu-khak kng-khō-khō ê só͘-chāi, á-sī liù-hia̍h ê só͘-chāi, ū hún-âng-sek chéng-khí-lâi, chhin-chhiūⁿ phê-bah thái-ko ê khoán-sit,

44hit人就是起thái-ko，無清氣ê；祭司的確tio̍h斷伊做無清氣；伊ê症頭是tī頭殼。hit-lâng chiū-sī khí thái-ko, bô chheng-khì-ê; chè-si tek-khak tio̍h toàn i chòe bô chheng-khì; i ê chèng-thâu sī tī thâu-khak.

45有thái-ko ê症頭ê，伊ê衫褲tio̍h拆裂，伊ê頭毛tio̍h phah散，掩(ng) 伊ê嘴ê頂唇，叫講：無清氣，無清氣。Ū thái-ko ê chèng-thâu-ê, i ê saⁿ-khò͘ tio̍h thiah-li̍h, i ê thâu-mn̂g tio̍h phah-sòaⁿ, ng i ê chhùi ê téng-tûn, kiò kóng, Bô chheng-khì, bô chheng-khì.

46症頭tī伊ê身軀ê日，伊就無清氣；伊既然是無清氣；伊tio̍h家己tiàm；伊ê所在tī營外。Chèng-thâu tī i ê seng-khu ê ji̍t, i chiū bô chheng-khì; i kì-jiân sī bô chheng-khì; i tio̍h ka-kī tiàm; i ê só͘-chāi tī iâⁿ-gōa.

47染tio̍h thái-ko症ê衫褲，無論是羊毛ê，á是苧布；Jiám-tio̍h thái-ko chèng ê saⁿ-khò͘, bô-lūn sī iûⁿ-mn̂g ê, á-sī tōe-pò͘;

48無論是經(kiⁿ)，是緯(hūi)，是苧布ê；是羊毛ê，是皮ê，á是皮做ê物；bô-lūn sī kiⁿ, sī hūi, sī tōe-pò͘ ê; sī iûⁿ-mn̂g ê, sī phê ê, á-sī phê chòe ê mi̍h;

49Hit-ê症頭若是青á是紅ê色，tī衫褲，tī皮，tī經，tī緯，á是tī皮做ê物，是thái-ko ê症頭，tio̍h hō͘祭司驗。hit ê chèng-thâu nā sī chhiⁿ á-sī âng ê sek, tī saⁿ-khò͘, tī phê, tī kiⁿ, tī hūi, á-sī tī phê chòe ê mi̍h, sī thái-ko ê chèng-thâu, tio̍h hō͘ chè-si giām.

50祭司tio̍h驗hit-ê症頭，將染tio̍h症頭ê物，關禁七日。Chè-si tio̍h giām hit ê chèng-thâu, chiong jiám-tio̍h chèng-thâu ê mi̍h, koaiⁿ-kìm chhit-ji̍t.

51到第七日，伊tio̍h驗hit-ê症頭；症頭若湠tī衫褲，tī經，tī 緯，tī皮，chit-ê皮無論做甚麼路用，hit-ê症頭是惡ê thái-ko；lóng是無清氣。Kàu tē-chhit ji̍t, i tio̍h giām hit ê chèng-thâu; chèng-thâu nā thòaⁿ tī saⁿ-khò͘, tī kiⁿ, tī hūi, tī phê, chit ê phê bô-lūn chòe sím-mi̍h lō͘-ēng, hit ê chèng-thâu sī ok ê thái-ko; lóng sī bô chheng-khì.

52hit-ê 染tio̍h症頭ê衫褲，或是經，是緯，是羊毛，是苧布，á是皮做ê物，伊lóng tio̍h燒去，因為這是惡ê thái-ko，的確tī火中燒去。Hit ê jiám-tio̍h chèng-thâu ê saⁿ-khò͘, he̍k-sī kiⁿ, sī hūi, sī iûⁿ-mn̂g, sī tōe-pò͘, á-sī phê chòe ê mi̍h, i lóng tio̍h sio-khì, in-ūi che sī ok ê thái-ko, tek-khak tī hé-tiong sio-khì.

53祭司驗伊；看ah，症頭若無湠tī衫裡，tī經，tī緯，á是皮做ê物；Chè-si giām i; khòaⁿ ah, chèng-thâu nā bô thòaⁿ tī saⁿ-ni̍h, tī kiⁿ, tī hūi, á-sī phê-chòe ê mi̍h;

54祭司tio̍h吩咐in洗hit-ê染tio̍h症頭ê物，koh關禁七日。chè-si tio̍h hoan-hù in sóe hit ê jiám-tio̍h chèng-thâu ê mi̍h, koh koaiⁿ-kìm chhit-ji̍t.

55症頭洗了後祭司tio̍h驗伊；看ah，症頭若無變色，症頭若無koh湠，hit-ê就無清氣；是惡毒ê症頭；無論面pháiⁿ，裡pháiⁿ，lóng tio̍h用火燒。Chèng-thâu sóe liáu-āu chè-si tio̍h giām i; khòaⁿ ah, chèng-thâu nā bô piàn-sek, chèng-thâu nā bô koh thòaⁿ, hit-ê chiū bô chheng-khì; sī ok-to̍k ê chèng-thâu; bô-lūn bīn pháiⁿ, lí pháiⁿ, lóng tio̍h ēng hé sio.

56洗了後，祭司驗伊；看ah，若hit-ê症頭khah hoa，伊就tio̍h tùi衫，á是皮，á是經，á是緯，kā伊拆起來。Sóe liáu-āu, chè-si giām i; khòaⁿ ah, nā hit ê chèng-thâu khah hoa, i chiū tio̍h tùi saⁿ, á-sī phê, á-sī kiⁿ, á-sī hūi, kā i thiah-khí-lâi.

57若是iáu-kú發現tī衫裡，á是經，á是緯，á是皮做ê物，這是症頭teh發；tio̍h用火燒hit-ê染tio̍h症頭ê物。Nā sī iáu-kú hoat-hiān tī saⁿ-ni̍h, á-sī kiⁿ, á-sī hūi, á-sī phê-chòe ê mi̍h, che sī chèng-thâu teh hoat; tio̍h ēng hé sio hit ê jiám-tio̍h chèng-thâu ê mi̍h.

58你所洗ê衫，或是經，或是緯，或是皮做ê物，若症頭已經離開，tio̍h koh再洗，就清氣。Lí só͘ sóe ê saⁿ, he̍k-sī kiⁿ, he̍k-sī hūi, he̍k-sī phê-chòe ê mi̍h, nā chèng-thâu í-keng lī-khui, tio̍h koh-chài sóe, chiū chheng-khì.

59這就是thái-ko症頭ê規例，無論是tī羊毛衫，苧布衫，tī經，tī緯，kap皮做ê物，thang斷做清氣，á是斷做無清氣。Che chiū-sī thái-ko chèng-thâu ê kui-lē, bô-lūn sī tī iûⁿ-mn̂g-saⁿ, tōe-pò͘-saⁿ, tī kiⁿ, tī hūi, kap phê-chòe ê mi̍h, thang toàn-chòe chheng-khì, á-sī toàn-chòe bô chheng-khì.

1耶和華吩咐摩西講：Iâ-hô-hoa hoan-hù Mô͘-se kóng,

2Thái-ko-ê得tio̍h清氣ê日，伊ê規例就是án-ni；tio̍h chhōa伊去見祭司。Thái-ko-ê tit-tio̍h chheng-khì ê ji̍t, i ê kui-lē chiū-sī án-ni; tio̍h chhōa i khì kìⁿ chè-si.

3祭司tio̍h出營外；祭司tio̍h驗伊；看ah，thái-ko-ê，若伊ê thái-ko症已經好，Chè-si tio̍h chhut iâⁿ-gōa; chè-si tio̍h giām i; khòaⁿ ah, thái-ko-ê, nā i ê thái-ko-chèng í-keng hó,

4祭司tio̍h吩咐人為tio̍h hit-ê beh得tio̍h清氣ê，取兩隻清氣活活ê鳥，kap柏香柴，朱紅色ê料，kap牛膝草。chè-si tio̍h hoan-hù lâng ūi-tio̍h hit-ê beh tit-tio̍h chheng-khì-ê, chhú nn̄g-chiah chheng-khì oa̍h-oa̍h ê chiáu, kap pek-hiuⁿ-chhâ, chu-áng-sek ê liāu, kap giû-chhek-chháu.

5祭司tio̍h吩咐人thâi hit兩隻鳥ê一隻tī活水ê頂面，tī磁器內。Chè-si tio̍h hoan-hù lâng thâi hit nn̄g chiah chiáu ê chi̍t-chiah tī oa̍h-chúi ê téng-bīn, tī hûi-khì-lāi.

6論到hit隻活鳥，伊tio̍h掠伊，用柏香柴，朱紅色ê料，kap牛膝草，kap活鳥，lóng ùn tī hit隻thâi tī活水頂ê鳥ê血。Lūn-kàu hit chiah oa̍h-chiáu, i tio̍h lia̍h i, ēng pek-hiuⁿ-chhâ, chu-âng-sek ê liāu, kap giû-chhek-chháu, kap oa̍h-chiáu, lóng ùn tī hit-chiah thâi tī oa̍h-chúi-téng ê chiáu ê huih.

7Tio̍h hiù hit-ê thái-ko beh得tio̍h清氣ê人七pái；就斷伊做清氣，koh放hit隻活鳥去山裡。Tio̍h hiù hit ê thái-ko beh tit-tio̍h chheng-khì ê lâng chhit-pái; chiū toàn i chòe chheng-khì, koh pàng hit chiah oa̍h-chiáu khì soaⁿ-ni̍h.

8Beh得tio̍h清氣ê人tio̍h洗伊ê衣裳，一盡剃伊ê毛，用水洗身軀就清氣；然後thang入營，獨獨tio̍h tī家己ê布棚外khiā起七日。Beh tit-tio̍h chheng-khì ê lâng tio̍h sóe i ê i-chiûⁿ, it-chīn thì i ê mn̂g, ēng chúi sóe seng-khu chiū chheng-khì; jiân-āu thang ji̍p iâⁿ, to̍k-to̍k tio̍h tī ka-kī ê pò͘-pîⁿ-gōa khiā-khí chhit-ji̍t.

9到第七日tio̍h一盡剃伊ê頭毛，kap嘴鬚、目眉，就是剃伊lóng總ê毛，koh tio̍h洗伊ê衫褲，用水洗身軀，就清氣。Kàu tē-chhit ji̍t tio̍h it-chīn thì i ê thâu-mn̂g, kap chhùi-chhiu, ba̍k-bâi, chiū-sī thì i lóng-chóng ê mn̂g, koh tio̍h sóe i ê saⁿ-khò͘, ēng chúi sóe seng-khu, chiū chheng-khì.

10到第八日，伊tio̍h取兩隻無瑕疵ê羊káng-á，kap一隻未滿年無瑕疵ê羊種á，koh tio̍h用調和油ê麵粉i-hoat十份三做素祭，kap油一lô-kek。Kàu tē-poeh ji̍t, i tio̍h chhú nn̄g chiah bô hâ-chhû ê iûⁿ-káng-á, kap chi̍t-chiah bē-móa-nî bô hâ-chhû ê iûⁿ-chéng-á, koh tio̍h ēng tiau-hô iû ê mī-hún i-hoat cha̍p-hūn-saⁿ chòe sò͘-chè, kap iû chi̍t lô-kek.

11行清氣ê禮ê祭司，tio̍h將hit-ê ài得tio̍h清氣ê人，kap hiah-ê物，安置tī會幕門口，耶和華ê面前。Kiâⁿ chheng-khì ê lé ê chè-si, tio̍h chiong hit-ê ài tit-tio̍h chheng-khì ê lâng, kap hiah ê mi̍h, an-tì tī hōe-bō͘ mn̂g-kháu, Iâ-hô-hoa ê bīn-chêng.

12祭司tio̍h取羊káng-á ê一隻，獻做補過失ê祭，kap油一lô家k，lóng搖tī耶和華ê面前做搖祭。Chè-si tio̍h chhú iûⁿ-káng-á ê chi̍t-chiah, hiàn chòe pó͘-kè-sit ê chè, kap iû chi̍t lô-kek, lóng iô tī Iâ-hô-hoa ê bīn-chêng chòe iô-chè.

13Koh tio̍h thâi羊káng-á tī聖所ê地，就是thâi贖罪祭kap燒祭ê所在；補過失祭tio̍h歸hō͘祭司，親像贖罪祭一般樣；是至聖ê。Koh tio̍h thâi iûⁿ-káng-á tī sèng-só͘ ê tōe, chiū-sī thâi sio̍k-chōe-chè kap sio-chè ê só͘-chāi; pó͘-kè-sit-chè tio̍h kui hō͘ chè-si, chhin-chhiūⁿ sio̍k-chōe-chè chi̍t-poaⁿ-iūⁿ; sī chì-sèng-ê.

14祭司tio̍h the̍h淡薄補過失祭ê血，抹tī ài得tio̍h清氣ê人chiàⁿ-pêng ê耳á錘，kap chiàⁿ手ê大pō͘拇，kap chiàⁿ腳ê大pō͘拇。Chè-si tio̍h the̍h tām-po̍h pó͘-kè-sit-chè ê huih, boah tī ài tit-tio̍h chheng-khì ê lâng chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú.

15祭司tio̍h tùi hit一lô家k油ê中間the̍h淡薄，tò tī家己tò手ê手中心。Chè-si tio̍h tùi hit chi̍t lô-kek iû ê tiong-kan the̍h tām-po̍h, tò tī ka-kī tò-chhiú ê chhiú-tiong-sim.

16祭司tio̍h用chiàⁿ手ê一支指頭á ùn tò手手中心ê油，tī耶和華ê面前，用指頭á hiù油七pái。Chè-si tio̍h ēng chiàⁿ-chhiú ê chi̍t ki chńg-thâu-á ùn tò-chhiú chhiú-tiong-sim ê iû, tī Iâ-hô-hoa ê bīn-chêng, ēng chńg-thâu-á hiù iû chhit-pái.

17祭司將手中所chhun ê油，抹tī hit-ê ài得tio̍h清氣ê人chiàⁿ-pêng ê耳á錘，kap chiàⁿ手ê大pō͘拇，kap chiàⁿ腳ê大pō͘拇，就是抹tha̍h tī補過失祭ê血頂。Chè-si chiong chhiú-tiong só͘ chhun ê iû, boah tī hit-ê ài tit-tio̍h chheng-khì ê lâng chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú, chiū-sī boah tha̍h tī pó͘-kè-sit-chè ê huih-téng.

18祭司手中所chhun ê油，tio̍h piàⁿ tī hit-ê ài得tio̍h清氣ê人ê頭殼頂；祭司tī耶和華ê面前kā伊贖罪。Chè-si chhiú-tiong só͘ chhun ê iû, tio̍h piàⁿ tī hit-ê ài tit-tio̍h chheng-khì ê lâng ê thâu-khak-téng; chè-si tī Iâ-hô-hoa ê bīn-chêng kā i sio̍k-chōe.

19祭司tio̍h獻贖罪祭，kā hit-ê ài得tio̍h清氣ê人，為tio̍h伊ê無清氣贖罪；然後thâi hit-ê燒祭ê cheng-siⁿ。Chè-si tio̍h hiàn sio̍k-chōe-chè, kā hit-ê ài tit-tio̍h chheng-khì ê lâng, ūi-tio̍h i ê bô chheng-khì sio̍k-chōe; jiân-āu thâi hit ê sio-chè ê cheng-siⁿ.

20祭司tio̍h tī壇頂獻燒祭kap素祭；祭司tio̍h為伊贖罪；伊就清氣。Chè-si tio̍h tī tôaⁿ-téng hiàn sio-chè kap sò͘-chè; chè-si tio̍h ūi i sio̍k-chōe; i chiū chheng-khì.

21伊若sòng-hiong bōe備辦到hiah-chōe，就tio̍h取一隻羊káng-á做補過失ê祭，thang搖伊，為伊贖罪；也tio̍h帶調和油ê幼麵粉i-hoat十份一，做素祭，kap油一lô-kek。I nā sòng-hiong bōe pī-pān kàu hiah-chōe, chiū tio̍h chhú chi̍t chiah iûⁿ-káng-á chòe pó͘-kè-sit ê chè, thang iô i, ūi i sio̍k -chōe; iā tio̍h tòa tiau-hô iû ê iù-mī-hún i-hoat cha̍p-hūn-chi̍t, chòe sò͘-chè, kap iû chi̍t lô-kek.

22Koh照伊ê氣力取兩隻ka-chui，á是兩隻鴿á-kiáⁿ，一隻做贖罪祭，一隻做燒祭。Koh chiàu i ê khùi-la̍t chhú nn̄g chiah ka-chui, á-sī nn̄g chiah chíⁿ-á-kiáⁿ, chi̍t-chiah chòe sio̍k-chōe-chè, chi̍t-chiah chòe sio-chè.

23到第八日為tio̍h伊得tio̍h清氣，將chiah-ê帶到會幕門口，耶和華ê面前；交代祭司。Kàu tē-poeh ji̍t ūi-tio̍h i tit-tio̍h chheng-khì, chiong chiah-ê tòa kàu hōe-bō͘ mn̂g-kháu, Iâ-hô-hoa ê bīn-chêng; kau-tài chè-si.

24祭司tio̍h取補過失ê羊á，kap油一lô-kek；祭司tio̍h伊ô iti7耶和華ê面前做搖祭。Chè-si tio̍h chhú pó͘-kè-sit ê iûⁿ-á, kap iû chi̍t lô-kek; chè-si tio̍h iô i tī Iâ-hô-hoa ê bīn-chêng chòe iô-chè.

25伊tio̍h thâi補過失祭ê羊á；祭司取淡薄補過失祭ê血，抹tī hit-ê ài得tio̍h清氣ê人chiàⁿ-pêng ê耳á錘，kap chiàⁿ手ê大pō͘拇kap chiàⁿ腳ê大pō͘拇。I tio̍h thâi pó͘-kè-sit-chè ê iûⁿ-á; chè-si chhú tām-po̍h pó͘-kè-sit-chè ê huih, boah tī hit-ê ài tit-tio̍h chheng-khì ê lâng chiàⁿ-pêng ê hī-á-sûi, kap chiàⁿ-chhiú ê tōa-pō͘-bú kap chiàⁿ-kha ê tōa-pō͘-bú.

26祭司tio̍h將淡薄油tò tī家己tò手ê手中心。Chè-si tio̍h chiong tām-po̍h iû tò tī ka-kī tò-chhiú ê chhiú-tiong-sim.

27祭司用tò手裡ê油，tī耶和華ê面前，用chiàⁿ手ê一支指頭á hiù油七pái。Chè-si ēng tò-chhiú-ni̍h ê iû, tī Iâ-hô-hoa ê bīn-chêng, ēng chiàⁿ-chhiú ê chi̍t ki chńg-thâu-á hiù iû chhit-pái.

28祭司koh用手中ê油抹淡薄tī hit-ê ài得tio̍h清氣ê人chiàⁿ-pêng ê耳á錘，kap chiàⁿ手ê大pō͘拇，chiàⁿ腳ê大pō͘拇，就是抹tī補過失祭ê血ê原位。Chè-si koh ēng chhiú-tiong ê iû boah tām-po̍h tī hit-ê ài tit-tio̍h chheng-khì ê lâng chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, chiàⁿ-kha ê tōa-pō͘-bú, chiū-sī boah tī pó͘-kè-sit-chè ê huih ê goân-ūi.

29祭司手中所chhun ê油，tio̍h抹tī hit-ê ài得tio̍h清氣ê人ê頭殼，tī耶和華ê面前為tio̍h伊贖罪。Chè-si chhiú-tiong só͘ chhun ê iû, tio̍h boah tī hit-ê ài tit-tio̍h chheng-khì ê lâng ê thâu-khak, tī Iâ-hô-hoa ê bīn-chêng ūi-tio̍h i sio̍k-chōe.

30伊tio̍h照伊ê氣力獻hiah-ê ka-chui ê一隻，á是鴿á-kiáⁿ ê一隻，就是照伊所能ê，I tio̍h chiàu i ê khùi-la̍t hiàn hiah ê ka-chui ê chi̍t-chiah, á-sī chíⁿ-á-kiáⁿ ê chi̍t-chiah, chiū-sī chiàu i só͘-ōe-ê,

31一隻做贖罪祭，一隻做燒祭，kap素祭相kap獻；祭司tio̍h tī耶和華ê面前，kā hit-ê ài得tio̍h清氣ê人贖罪。chi̍t-chiah chòe sio̍k-chōe-chè, chi̍t-chiah chòe sio-chè, kap sò͘-chè saⁿ-kap hiàn; chè-si tio̍h tī Iâ-hô-hoa ê bīn-chêng, kā hit-ê ài tit-tio̍h chheng-khì ê lâng sio̍k-chōe.

32人患tio̍h thái-ko ê症頭，也無力thang備辦得tio̍h清氣ê禮物，hit-ê規例是án-ni。Lâng hoān-tio̍h thái-ko ê chèng-thâu, iā bô la̍t thang pī-pān tit-tio̍h chheng-khì ê lé-mi̍h, hit ê kui-lē sī án-ni.

33耶和華吩咐摩西亞倫講：Iâ-hô-hoa hoan-hù Mô͘-se A-lûn kóng,

34Lín到我賞賜lín做業ê迦南地ê時，我用thái-ko症染tio̍h一間厝，tī lín所得tio̍h做業ê地；Lín kàu Góa siúⁿ-sù lín chòe-gia̍p ê Ka-lâm tōe ê sî, Góa ēng thái-ko-chèng jiám-tio̍h chi̍t keng chhù, tī lín só͘ tit-tio̍h chòe-gia̍p ê tōe;

35厝主tio̍h去通知祭司，kā伊講：照我看，厝內親像有症頭；chhù-chú tio̍h khì thong-ti chè-si, kā i kóng, Chiàu góa khòaⁿ, chhù-lāi chhin-chhiūⁿ ū chèng-thâu;

36祭司iáu bē入去驗症頭ê事先，祭司就tio̍h吩咐人，將厝piàⁿ空，免得厝內所有ê bak-tio̍h無清氣；後來祭司tio̍h入去驗hit間厝。chè-si iáu bē ji̍p-khì giām chèng-thâu ê tāi-seng, chè-si chiū tio̍h hoan-hù lâng, chiong chhù piàⁿ-khang, bián-tit chhù-lāi só͘ ū-ê bak-tio̍h bô chheng-khì; āu-lâi chè-si tio̍h ji̍p-khì giām hit keng chhù.

37伊tio̍h驗hit-ê症頭；看ah，症頭若tī厝ê壁有顯出青á是紅ê凹痕，款式深入牆壁，I tio̍h giām hit ê chèng-thâu; khòaⁿ ah, chèng-thâu nā tī chhù ê piah ū hián-chhut chhiⁿ á-sī âng ê nah-hûn, khoán-sit chhim-ji̍p chhiûⁿ-piah,

38祭司tio̍h出hit間厝，到厝門口，封hit間厝七日。chè-si tio̍h chhut hit keng chhù, kàu chhù mn̂g-kháu, hong hit keng chhù chhit-ji̍t.

39到第七日祭司tio̍h koh去驗；看ah，症頭若湠tī厝ê牆壁，Kàu tē-chhit ji̍t chè-si tio̍h koh khì giām; khòaⁿ ah, chèng-thâu nā thòaⁿ tī chhù ê chhiûⁿ-piah,

40祭司就tio̍h吩咐人將hiah-ê 染tio̍h症頭ê石iah起來，hiat tī城外無清氣ê所在。chè-si chiū tio̍h hoan-hù lâng chiong hiah ê jiám-tio̍h chèng-thâu ê chio̍h iah-khí-lâi, hiat tī siâⁿ-gōa bô chheng-khì ê só͘-chāi.

41也tio̍h kah人khau厝內ê四圍；所khau起來ê灰土，tio̍h piàⁿ tī城外無清氣ê所在。Iā tio̍h kah lâng khau chhù-lāi ê sì-ûi; só͘ khau-khí-lâi ê he-thô͘, tio̍h piàⁿ tī siâⁿ-gōa bô chheng-khì ê só͘-chāi.

42Koh tio̍h用別塊石，替hiah-ê石，koh用灰土抹hit間厝。Koh tio̍h ēng pa̍t tè chio̍h, thòe hiah ê chio̍h, koh ēng he-thô͘ boah hit keng chhù.

43伊iah石，khau厝，抹灰了後，症頭若koh到，koh發現tī hit間厝，I iah chio̍h, khau-chhù, boah-he liáu-āu, chèng-thâu nā koh kàu, koh hoat-hiān tī hit keng chhù,

44祭司tio̍h koh入去驗；症頭若湠tī hit間厝，hit間厝是染tio̍h惡ê thái-ko；是無清氣。chè-si tio̍h koh ji̍p-khì giām; chèng-thâu nā thòaⁿ tī hit keng chhù, hit keng chhù sī jiám-tio̍h ok ê thái-ko; sī bô chheng-khì.

45伊就tio̍h拆hit間厝，伊ê石，伊ê柴，kap伊一切ê灰土，lóng搬出城外，到無清氣ê所在。I chiū tio̍h thiah hit keng chhù, i ê chio̍h, i ê chhâ, kap i it-chhè ê he-thô͘, lóng poaⁿ-chhut siâⁿ-gōa, kàu bô chheng-khì ê só͘-chāi.

46hit間厝封密ê時間，人若入去就無清氣，到ê-hng。Hit keng chhù hong-ba̍t ê sî-kan, lâng nā ji̍p-khì chiū bô chheng-khì, kàu ê-hng.

47睏tī hit間厝ê，tio̍h洗伊ê衣服；食tī hit間厝ê也tio̍h洗伊ê衣服。Khùn tī hit keng chhù ê, tio̍h sóe i ê i-ho̍k; chia̍h tī hit keng chhù-ê iā tio̍h sóe i ê i-ho̍k.

48hit間厝抹灰了後，祭司入去驗；看ah，若症頭無湠tī厝內，祭司就tio̍h斷hit間厝做清氣，因為症頭已經消無。Hit keng chhù boah-he liáu-āu, chè-si ji̍p khì giām; khòaⁿ ah, nā chèng-thâu bô thòaⁿ tī chhù-lāi, chè-si chiū tio̍h toàn hit keng chhù chòe chheng-khì, in-ūi chèng-thâu í-keng siau-bô.

49為tio̍h清氣hit間厝tio̍h取兩隻鳥，kap柏香柴，朱紅色料，kap牛膝草。Ūi-tio̍h chheng-khì hit keng chhù tio̍h chhú nn̄g chiah chiáu, kap pek-hiuⁿ-chhâ, chu-âng-sek liāu, kap giû-chhek-chháu.

50Tio̍h thâi hit兩隻鳥ê一隻，tī活水頂，磁器ê內面。Tio̍h thâi hit nn̄g chiah chiáu ê chi̍t-chiah, tī oa̍h-chúi-téng, hûi-khì ê lāi-bīn.

51伊tio̍h the̍h hit-ê柏香柴、牛膝草、朱紅色ê料，kap hit隻活鳥，lóng ùn tī hit隻受thâi ê鳥ê血，kap活水，來hiù hit間厝七pái。I tio̍h the̍h hit ê pek-hiuⁿ-chhâ, giû-chhek-chháu, chu-âng-sek ê liāu, kap hit-chiah oa̍h-chiáu, lóng ùn tī hit-chiah siū-thâi ê chiáu ê huih, kap oa̍h-chúi, lâi hiù hit keng chhù chhit-pái.

52伊tio̍h用hit隻鳥ê血、活水、活鳥、柏香柴、牛膝草，kap朱紅色料，清氣hit間厝。I tio̍h ēng hit chiah chiáu ê huih, oa̍h-chúi, oa̍h-chiáu, pek-hiuⁿ-chhâ, giû-chhek-chháu, kap chu-âng-sek liāu, chheng-khì hit keng chhù.

53總是tio̍h用hit隻活鳥放tī城外ê山裡；án-ni kā hit間厝贖罪，hit間厝就清氣。Chóng-sī tio̍h ēng hit chiah oa̍h-chiáu pàng tī siâⁿ-gōa-ê soaⁿ-ni̍h; án-ni kā hit keng chhù sio̍k-chōe, hit keng chhù chiū chheng-khì.

54這是為tio̍h ta̍k樣thái-ko ê症頭，kap瘡；Che sī ūi-tio̍h ta̍k-iūⁿ thái-ko ê chèng-thâu, kap chhng;

55kap衣服kap厝ê thái-ko；kap i-ho̍k kap chhù ê thái-ko;

56以及腫、癬、火斑所立ê規例，í-ki̍p chéng, sián, hé-pan só͘ li̍p ê kui-lē,

57指明甚麼時是無清氣，甚麼時是清氣；這是thái-ko ê規例。chí-bêng sím-mi̍h sî sī bô chheng-khì, sím-mi̍h sî sī chheng-khì; che sī thái-ko ê kui-lē.