1亞倫兩個kiáⁿ近óa耶和華ê面前來死；in死了耶和華吩咐摩西，對摩西講：A-lûn nn̄g ê kiáⁿ kūn-óa Iâ-hô-hoa ê bīn-chêng lâi sí; in sí-liáu Iâ-hô-hoa hoan-hù Mô͘-se, tùi Mô͘-se kóng,

2Tio̍h kā你ê hiaⁿ亞倫講：m̄-thang隨便時入聖所ê帳籬內，到約櫃頂施恩所ê面前，免得死；因為我beh tī雲中顯現tī施恩所ê頂面。Tio̍h kā lí ê hiaⁿ A-lûn kóng, m̄-thang sûi-piān-sî ji̍p sèng-só͘ ê tiùⁿ-lî-lāi, kàu iok-kūi-téng si-un-só͘ ê bīn-chêng, bián-tit sí; in-ūi Góa beh tī hûn-tiong hián-hiān tī si-un-só͘ ê téng-bīn.

3亞倫beh入聖所tio̍h án-ni；tio̍h帶一隻牛káng-á-kiáⁿ做贖罪祭，一隻綿羊káng做燒祭。A-lûn beh ji̍p sèng-só͘ tio̍h án-ni; tio̍h tòa chi̍t-chiah gû-káng-á-kiáⁿ chòe sio̍k-chōe-chè, chi̍t chiah mî-iûⁿ-káng chòe sio-chè.

4伊tio̍h穿幼苧布聖ê內衫，也tio̍h穿幼苧布ê褲tī身軀裡，腰hâ幼苧布ê帶，頭tì幼苧布ê帽；這lóng是聖ê衣服；伊tio̍h用水洗身軀，然後穿伊。I tio̍h chhēng iù-tōe-pò͘ sèng ê lāi-saⁿ, iā tio̍h chhēng iù-tōe-pò͘ ê khò͘ tī seng-khu-ni̍h, io hâ iù-tōe-pò͘ ê tòa, thâu tì iù-tōe-pò͘ ê bō; che lóng sī sèng ê i-ho̍k; i tio̍h ēng chúi sóe seng-khu, jiân-āu chhēng i.

5伊tio̍h tùi以色列人ê會中取兩隻山羊káng，做贖罪祭，一隻綿羊káng做燒祭。I tio̍h tùi Í-sek-lia̍t lâng ê hōe-tiong chhú nn̄g chiah soaⁿ-iûⁿ-káng, chòe sio̍k-chōe-chè, chi̍t-chiah mî-iûⁿ-káng chòe sio-chè.

6亞倫tio̍h獻為本身做贖罪祭ê牛káng，為tio̍h本身kap伊ê家贖罪。A-lûn tio̍h hiàn ūi pún-sin chòe sio̍k-chōe-chè ê gû-káng, ūi-tio̍h pún-sin kap i ê ke sio̍k-chōe.

7也tio̍h用hit兩隻山羊káng安置tī會幕門口，耶和華ê面前。Iā tio̍h ēng hit nn̄g chiah soaⁿ-iûⁿ-káng an-tì tī hōe-bō͘ mn̂g-kháu, Iâ-hô-hoa ê bīn-chêng.

8亞倫tio̍h為tio̍h hit兩隻山羊liam-khau，liam一隻歸耶和華，liam一隻歸A-sat-sià-le̍k。A-lûn tio̍h ūi-tio̍h hit nn̄g chiah soaⁿ-iûⁿ liam-khau, liam chi̍t-chiah kui Iâ-hô-hoa, liam chi̍t-chiah kui A-sat-sià-le̍k.

9亞倫tio̍h用hit隻 liam-khau歸耶和華ê山羊，獻做贖罪祭。A-lûn tio̍h ēng hit-chiah liam-khau kui Iâ-hô-hoa ê soaⁿ-iûⁿ, hiàn chòe sio̍k-chōe-chè.

10若是hit隻 liam-khau歸A-sat-sià-le̍k ê山羊，tio̍h活活安置tī耶和華ê面前，替伊贖罪，放伊去曠野，歸tī A-sat-sià-le̍k。Nā-sī hit-chiah liam-khau kui A-sat-sià-le̍k ê soaⁿ-iûⁿ, tio̍h oa̍h-oa̍h an-tì tī Iâ-hô-hoa ê bīn-chêng, thòe i sio̍k-chōe, pàng i khì khòng-iá, kui tī A-sat-sià-le̍k.

11亞倫tio̍h牽為家己做贖罪祭ê牛káng-á，為tio̍h家己kap伊ê家贖罪，也tio̍h thâi為家己做贖罪祭ê牛káng-á；A-lûn tio̍h khan ūi ka-kī chòe sio̍k-chōe-chè ê gû-káng-á, ūi-tio̍h ka-kī kap i ê ke sio̍k-chōe, iā tio̍h thâi ūi ka-kī chòe sio̍k-chōe-chè ê gû-káng-á;

12也tio̍h the̍h香爐，tùi耶和華ê面前壇頂貯to̍h ê火炭滿滿，也tio̍h用芳ê香末一phóng帶入帳籬內；iā tio̍h the̍h hiuⁿ-lô͘, tùi Iâ-hô-hoa ê bīn-chêng tôaⁿ-téng tóe to̍h ê hé-thòaⁿ móa-móa, iā tio̍h ēng phang ê hiuⁿ-boa̍h chi̍t-phóng tòa-ji̍p tiùⁿ-lî-lāi;

13也tī耶和華ê面前將香hē tī火裡，hō͘香煙遮掩約櫃頂ê施恩所，免得伊死。iā tī Iâ-hô-hoa ê bīn-chêng chiong hiuⁿ hē tī hé-ni̍h, hō͘ hiuⁿ-ian jia-iám iok-kūi-téng ê si-un-só͘, bián-tit i sí.

14也tio̍h the̍h淡薄牛káng-á ê血，用指頭á hiù tī施恩所ê東勢；koh用指頭á tī施恩所ê面前hiù血七pái。Iā tio̍h the̍h tām-po̍h gû-káng-á ê huih, ēng chńg-thâu-á hiù tī si-un-só͘ ê tang-sì; koh ēng chńg-thâu-á tī si-un-só͘ ê bīn-chêng hiù-huih chhit-pái.

15Koh tio̍h thâi hit隻為tio̍h百姓做贖罪祭ê山羊káng，帶伊ê血入帳籬內，用伊ê血hiù tī施恩所kap施恩所ê面前，親像hiù牛káng-á ê血一樣。Koh tio̍h thâi hit-chiah ūi-tio̍h peh-sìⁿ chòe sio̍k-chōe-chè ê soaⁿ-iûⁿ-káng, tòa i ê huih ji̍p tiùⁿ-lî-lāi, ēng i ê huih hiù tī si-un-só͘ kap si-un-só͘ ê bīn-chêng, chhin-chhiūⁿ hiù gû-káng-á ê huih chi̍t-iūⁿ.

16Koh tio̍h因為以色列人ê污穢，過失，kap in一切ê罪惡替聖所贖罪；也tio̍h為tio̍h tṳn污穢ê中間相kap tòa ê會幕照án-ni行。Koh tio̍h in-ūi Í-sek-lia̍t lâng ê ù-òe, kè-sit, kap in it-chhè ê chōe-ok thòe sèng-só͘ sio̍k-chōe; iā tio̍h ūi-tio̍h tī in ù-òe ê tiong-kan saⁿ-kap tòa ê hōe-bō͘ chiàu án-ni kiâⁿ.

17亞倫入聖所贖罪ê時，會幕內m̄-thang有人tī-teh，thèng候伊為tio̍h本身kap伊ê家kap以色列ê會眾已經贖罪出來。A-lûn ji̍p sèng-só͘ sio̍k-chōe ê sî, hōe-bō͘-lāi m̄-thang ū lâng tī-teh, thèng-hāu i ūi-tio̍h pún-sin kap i ê ke kap Í-sek-lia̍t ê hōe-chiòng í-keng sio̍k-chōe chhut-lâi.

18伊tio̍h出來到耶和華面前ê壇hia，替伊贖罪；也tio̍h the̍h淡薄牛káng-á ê血kap 山羊káng ê血，抹tī壇頂hiah-ê角ê四圍。I tio̍h chhut-lâi kàu Iâ-hô-hoa bīn-chêng ê tôaⁿ hia, thòe i sio̍k-chōe; iā tio̍h the̍h tām-po̍h gû-káng-á ê huih kap soaⁿ-iûⁿ-káng ê huih, boah tī tôaⁿ-téng hiah ê kak ê sì-ûi.

19也tio̍h用伊ê指頭á hiù血tī壇裡七pái，hō͘伊清氣，離開以色列人ê無清氣，分別伊做聖。Iā tio̍h ēng i ê chńg-thâu-á hiù-huih tī tôaⁿ-ni̍h chhit-pái, hō͘ i chheng-khì, lī-khui Í-sek-lia̍t lâng ê bô chheng-khì, hun-piat i chòe-sèng.

20伊為tio̍h聖所，會幕，祭壇贖罪明白，tio̍h牽hit隻活ê山羊káng來；I ūi-tio̍h sèng-só͘, hōe-bō͘, chè-tôaⁿ sio̍k-chōe bêng-pe̍k, tio̍h khan hit-chiah oa̍h ê soaⁿ-iûⁿ-káng lâi;

21亞倫tio̍h用兩手按 tī活ê山羊ê頭殼，tī伊ê頂面認以色列人一切ê pháiⁿ，in一切ê過失，kap in一切ê罪過；lóng歸tī山羊ê頭殼，交代所派ê人，送去曠野；A-lûn tio̍h ēng nn̄g-chhiú hōaⁿ tī oa̍h ê soaⁿ-iûⁿ ê thâu-khak, tī i ê téng-bīn jīn Í-sek-lia̍t lâng it-chhè ê pháiⁿ, in it-chhè ê kè-sit, kap in it-chhè ê chōe-kòa; lóng kui tī soaⁿ-iûⁿ ê thâu-khak, kau-tài só͘ phài ê lâng, sàng-khì khòng-iá;

22hit隻山羊beh擔當in一切ê pháiⁿ到無人tòa ê所在；伊就放山羊tī曠野。hit chiah soaⁿ-iûⁿ beh tam-tng in it-chhè ê pháiⁿ kàu bô lâng tòa ê só͘-chāi; i chiū pàng soaⁿ-iûⁿ tī khòng-iá.

23亞倫tio̍h入會幕，thǹg伊入聖所ê時所穿幼苧ê衣服，留tī-hia；A-lûn tio̍h ji̍p hōe-bō͘, thǹg i ji̍p sèng-só͘ ê sî só͘ chhēng iù-tōe ê i-ho̍k, lâu tī-hia;

24koh tio̍h tī聖ê所在用水洗身軀，穿伊ê衫出來，獻伊ê燒祭kap百姓ê燒祭，為tio̍h本身kap百姓贖罪。koh tio̍h tī sèng ê só͘-chāi ēng chúi sóe seng-khu, chhēng i ê saⁿ chhut-lâi, hiàn i ê sio-chè kap peh-sìⁿ ê sio-chè, ūi-tio̍h pún-sin kap peh-sìⁿ sio̍k-chōe.

25贖罪祭ê油tio̍h燒伊tī壇頂。Sio̍k-chōe-chè ê iû tio̍h sio i tī tôaⁿ-téng.

26hit-ê放山羊歸tī A-sat-sià-le̍k ê人，tio̍h洗伊ê衫，用水洗身軀，然後thang入營內。Hit ê pàng soaⁿ-iûⁿ kui tī A-sat-sià-le̍k ê lâng, tio̍h sóe i ê saⁿ, ēng chúi sóe seng-khu, jiân-āu thang ji̍p iâⁿ-lāi.

27做贖罪祭ê牛káng，kap贖罪祭ê山羊，in ê血已經帶入聖所贖罪，in ê身體tio̍h帶出營外，用火燒in ê皮，in ê肉，in ê糞。Chòe sio̍k-chōe-chè ê gû-káng, kap sio̍k-chōe-chè ê soaⁿ-iûⁿ, in ê huih í-keng tòa-ji̍p sèng-só͘ sio̍k-chōe, in ê sin-thé tio̍h tòa-chhut iâⁿ-gōa, ēng hé sio in ê phê, in ê bah, in ê pùn.

28燒in ê人tio̍h洗伊ê衫，用水洗身軀，然後thang入營內。Sio in ê lâng tio̍h sóe i ê saⁿ, ēng chúi sóe seng-khu, jiân-āu thang ji̍p iâⁿ-lāi.

29Ta̍k-pái tú-tio̍h七月初十日，lín tio̍h刻苦lín ê心，無論是本地人，á是寄腳tī lín中間ê外人，lóng m̄-thang做甚麼工；這beh做lín永遠ê例。Ta̍k-pái tú-tio̍h chhit-ge̍h chhoe-cha̍p ji̍t, lín tio̍h khek-khó͘ lín ê sim, bô-lūn sī pún-tōe lâng, á-sī kià-kha tī lín tiong-kan ê gōa-lâng, lóng m̄-thang chòe sím-mi̍h kang; che beh chòe lín éng-oán ê lē.

30因為tī chit日beh kā lín贖罪，hō͘ lín清氣，lín beh tī耶和華ê面前得tio̍h清氣，脫離一切ê罪過。In-ūi tī chit-ji̍t beh kā lín sio̍k-chōe, hō͘ lín chheng-khì, lín beh tī Iâ-hô-hoa ê bīn-chêng tit-tio̍h chheng-khì, thoat-lī it-chhè ê chōe-kòa.

31chit日lín tio̍h守最大ê安歇日；lín tio̍h刻苦lín ê心；這是做永遠ê例。Chit-ji̍t lín tio̍h siú chòe tōa ê an-hioh-ji̍t; lín tio̍h khek-khó͘ lín ê sim; che sī chòe éng-oán ê lē.

32hit-ê受抹油來設立伊當聖職ê祭司，就是承接伊ê老父做祭司ê，tio̍h行贖罪ê禮，tio̍h穿幼苧布ê衫，就是聖衫。Hit ê siū boah-iû lâi siat-li̍p i tng sèng-chit ê chè-si, chiū-sī sêng-chiap i ê lāu-pē chòe chè-si ê, tio̍h kiâⁿ sio̍k-chōe ê lé, tio̍h chhēng iù-tōe-pò͘ ê saⁿ, chiū-sī sèng-saⁿ.

33伊tio̍h為tio̍h聖ê聖所贖罪，也為tio̍h會幕kap祭壇贖罪；koh為tio̍h眾祭司kap全會ê百姓贖罪。I tio̍h ūi-tio̍h sèng ê sèng-só͘ sio̍k-chōe, iā ūi-tio̍h hōe-bō͘ kap chè-tôaⁿ sio̍k-chōe; koh ūi-tio̍h chèng chè-si kap choân-hōe ê peh-sìⁿ sio̍k-chōe.

34這tio̍h做lín永遠ê例，就是因為以色列人一切ê罪，tio̍h一年一pái為tio̍h in贖罪。亞倫就照耶和華所命令摩西ê來行。Che tio̍h chòe lín éng-oán ê lē, chiū-sī in-ūi Í-sek-lia̍t lâng it-chhè ê chōe, tio̍h chi̍t-nî chi̍t-pái ūi-tio̍h in sio̍k-chōe. A-lûn chiū chiàu Iâ-hô-hoa só͘ bēng-lēng Mô͘-se ê lâi kiâⁿ.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐亞倫kap伊hiah-ê kiáⁿ kap以色列ê眾人講：耶和華所命令ê就是án-ni講。Lí tio̍h hoan-hù A-lûn kap i hiah ê kiáⁿ kap Í-sek-lia̍t ê chèng-lâng kóng, Iâ-hô-hoa só͘ bēng-lēng-ê chiū-sī án-ni kóng.

3見若屬以色列家ê人，thâi牛káng，á是綿羊á，á是山羊，無論thâi tī 營內á是thâi tī營外，Kìⁿ-nā sio̍k Í-sek-lia̍t-ke ê lâng, thâi gû-káng, á-sī mî-iûⁿ-á, á-sī soaⁿ-iûⁿ, bô-lūn thâi tī iâⁿ-lāi á-sī thâi tī iâⁿ-gōa,

4若無事先牽到會幕門口，來耶和華ê會幕前，獻hō͘耶和華做禮物，刺血ê罪beh歸tī hit人，伊有刺血；hit人beh tùi伊ê百姓中剪除；nā bô tāi-seng khan kàu hōe-bō͘ mn̂g-kháu, lâi Iâ-hô-hoa ê hōe-bō͘ chêng, hiàn hō͘ Iâ-hô-hoa chòe lé-mi̍h, chhiah-huih ê chōe beh kui tī hit-lâng, i ū chhiah-huih; hit-lâng beh tùi i ê peh-sìⁿ-tiong chián-tû;

5這是為tio̍h以色列人將in tī田野所獻ê祭，帶到會幕門口，耶和華ê面前，交hō͘祭司，獻hō͘耶和華做謝恩ê祭。che sī ūi-tio̍h Í-sek-lia̍t lâng chiong in tī chhân-iá só͘ hiàn ê chè, tòa kàu hōe-bō͘ mn̂g-kháu, Iâ-hô-hoa ê bīn-chêng, kau hō͘ chè-si, hiàn hō͘ Iâ-hô-hoa chòe siā-un ê chè.

6祭司tio̍h將血hiù tī會幕門口耶和華ê壇頂，將油燒做芳芳ê味，獻hō͘耶和華。Chè-si tio̍h chiong huih hiù tī hōe-bō͘ mn̂g-kháu Iâ-hô-hoa ê tôaⁿ-téng, chiong iû sio chòe phang-phang ê bī, hiàn hō͘ Iâ-hô-hoa.

7in m̄-thang koh獻祭tī in行邪淫所thàn ê鬼怪；這beh做in ta̍k世代永遠ê例。In m̄-thang koh hiàn-chè tī in kiâⁿ siâ-îm só͘ thàn ê kúi-koài; che beh chòe in ta̍k sè-tāi éng-oán ê lē.

8你tio̍h對in講：見若屬以色列家ê人，á是寄腳tī in中間ê外人，獻燒祭á是祭物；Lí tio̍h tùi in kóng, Kìⁿ-nā sio̍k Í-sek-lia̍t-ke ê lâng, á-sī kià-kha tī in tiong-kan ê gōa-lâng, hiàn sio-chè á-sī chè-mi̍h;

9若無帶到會幕門口，獻hō͘耶和華，hit人tio̍h tùi伊ê百姓中受剪除。nā bô tòa kàu hōe-bō͘ mn̂g-kháu, hiàn-hō͘ Iâ-hô-hoa, hit-lâng tio̍h tùi i ê peh-sìⁿ-tiong siū chián-tû.

10見若屬以色列家ê人，á是寄腳tī in中間ê外人，若食甚麼血，我beh 對hit-ê食血ê人變面，tùi伊ê百姓中剪除伊。Kìⁿ-nā sio̍k Í-sek-lia̍t-ke ê lâng, á-sī kià-kha tī in tiong-kan ê gōa-lâng, nā chia̍h sím-mi̍h huih, Góa beh tùi hit ê chia̍h-huih ê lâng pìⁿ-bīn, tùi i ê peh-sìⁿ-tiong chián-tû i.

11因為肉ê活命在tī血，我用伊賞賜lín，thang tī壇頂為lín ê活命贖罪；因為血內有活命，所以能贖罪。In-ūi bah ê oa̍h-miā chāi tī huih, Góa ēng i siúⁿ-sù lín, thang tī tôaⁿ-téng ūi lín ê oa̍h-miā sio̍k-chōe; in-ūi huih-lāi ū oa̍h-miā, só͘-í ōe sio̍k-chōe.

12所以我對以色列人講：Lín lóng m̄-thang食血；寄腳tī lín中間ê外人也m̄-thang食血。Só͘-í Góa tùi Í-sek-lia̍t lâng kóng, Lín lóng m̄-thang chia̍h huih; kià-kha tī lín tiong-kan ê gōa-lâng iā m̄-thang chia̍h huih.

13見若以色列人，á是寄腳tī in中間ê外人，若phah獵得tio̍h 能食得ê禽獸，tio̍h刺伊ê血出來，用土蓋伊。Kìⁿ-nā Í-sek-lia̍t lâng, á-sī kià-kha tī in tiong-kan ê gōa-lâng, nā phah-la̍h tit-tio̍h ōe-chia̍h-tit ê khîm-siù, tio̍h chhiah i ê huih chhut-lâi, ēng thô͘ khàm i.

14論到一切有肉身ê活命，伊ê血就是伊ê活命；所以我對以色列人講：無論甚麼肉身ê血lín lóng m̄-thang食；因為一切肉身ê活命就是伊ê血；見若食伊ê人的確受剪除。Lūn-kàu it-chhè ū jio̍k-sin ê oa̍h-miā, i ê huih chiū-sī i ê oa̍h-miā; só͘-í Góa tùi Í-sek-lia̍t lâng kóng, Bô-lūn sím-mi̍h jio̍k-sin ê huih lín lóng m̄-thang chia̍h; in-ūi it-chhè jio̍k-sin ê oa̍h-miā chiū-sī i ê huih; kìⁿ-nā chia̍h i ê lâng tek-khak siū chián-tû.

15見若食家己死ê物，á是hō͘野獸拆裂ê，無論是本地人，á是外人，的確無清氣到ê-hng，lóng tio̍h洗伊ê衫，用水洗身軀，到ê-hng chiah清氣。Kìⁿ-nā chia̍h ka-kī sí ê mi̍h, á-sī hō͘ iá-siù thiah-li̍h ê, bô-lūn sī pún-tōe lâng, á-sī gōa-lâng, tek-khak bô chheng-khì kàu ê-hng, lóng tio̍h sóe i ê saⁿ, ēng chúi sóe seng-khu, kàu ê-hng chiah chheng-khì.

16總是伊若無洗衫，洗身軀，就tio̍h擔當伊ê罪過。Chóng-sī i nā bô sóe-saⁿ, sóe seng-khu, chiū tio̍h tam-tng i ê chōe-kòa.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人，kā in講：我是耶和華，lín ê上帝。Lí tio̍h hoan-hù Í-sek-lia̍t lâng, kā in kóng, Góa sī Iâ-hô-hoa, lín ê Siōng-tè.

3Lín前所tiàm ê埃及地，hit位ê人所行ê lín m̄-thang thàn in來行；我beh chhōa lín到迦南地，hit位ê人所行ê，lín也m̄-thang thàn in來行，也m̄-thang照in ê規例來行。Lín chêng só͘ tiàm ê Ai-ki̍p tōe, hit-ūi ê lâng só͘-kiâⁿ-ê lín m̄-thang thàn in lâi kiâⁿ; Góa beh chhōa lín kàu Ka-lâm tōe, hit-ūi ê lâng só͘-kiâⁿ-ê, lín iā m̄-thang thàn in lâi kiâⁿ, iā m̄-thang chiàu in ê kui-lē lâi kiâⁿ.

4Lín tio̍h thàn我ê法度，守我ê律例，照chit-ê來行；我是耶和華lín ê上帝。Lín tio̍h thàn Góa ê hoat-tō͘, siú Góa ê lu̍t-lē, chiàu chit-ê lâi kiâⁿ; Góa sī Iâ-hô-hoa lín ê Siōng-tè.

5所以lín tio̍h守我ê律例法度；人若行chiah-ê就beh tùi chiah-ê來活；我是耶和華。Só͘-í lín tio̍h siú Góa ê lu̍t-lē hoat-tō͘; lâng nā kiâⁿ chiah-ê chiū beh tùi chiah-ê lâi oa̍h; Góa sī Iâ-hô-hoa.

6Lín lóng m̄-thang親近骨肉ê親，來露現伊ê下體；我是耶和華。Lín lóng m̄-thang chhin-kūn kut-jio̍k ê chhin, lâi lō͘-hiān i ê ē-thé; Góa sī Iâ-hô-hoa.

7M̄-thang露現你ê老母ê下體，來凌辱你ê老父；伊是你ê老母，m̄-thang露現伊ê下體。M̄-thang lō͘-hiān lí ê lāu-bú ê ē-thé, lâi lêng-jio̍k lí ê lāu-pē; i sī lí ê lāu-bú, m̄-thang lō͘-hiān i ê ē-thé.

8你老父ê後bó͘ ê下體你m̄-thang露現；伊是你ê老父ê下體。Lí lāu-pē ê āu-bó͘ ê ē-thé lí m̄-thang lō͘-hiān; i sī lí ê lāu-pē ê ē-thé.

9你ê姊妹，無論是同父ê á是同母ê，出世tī家內，á是出世tī家外，lóng m̄-thang露現in ê下體。Lí ê chí-bē, bô-lūn sī tâng-pē-ê á-sī tâng-bú-ê, chhut-sì tī ke-lāi, á-sī chhut-sì tī ke-gōa, lóng m̄-thang lō͘-hiān in ê ē-thé.

10你ê後生ê cha-bó͘-kiáⁿ，á是你ê cha-bó͘-kiáⁿ ê cha-bó͘-kiáⁿ，m̄-thang露現in ê下體；因為是你本身ê下體。Lí ê hāu-siⁿ ê cha-bó͘-kiáⁿ, á-sī lí ê cha-bó͘-kiáⁿ ê cha-bó͘-kiáⁿ, m̄-thang lō͘-hiān in ê ē-thé; in-ūi sī lí pún-sin ê ē-thé.

11你老父ê後bó͘ ê cha-bó͘-kiáⁿ，對你ê老父生ê，是你ê小妹，m̄-thang露現伊ê下體。Lí lāu-pē ê āu-bó͘ ê cha-bó͘-kiáⁿ, tùi lí ê lāu-pē siⁿ-ê, sī lí ê sió-bē, m̄-thang lō͘-hiān i ê ē-thé.

12M̄-thang露現你ê姑ê下體；伊是你ê老父骨肉ê親。M̄-thang lō͘-hiān lí ê ko͘ ê ē-thé; i sī lí ê lāu-pē kut-jio̍k ê chhin.

13M̄-thang露現你ê姨母ê下體；伊是你ê老母骨肉ê親。M̄-thang lō͘-hiān lí ê î-bú ê ē-thé; i sī lí ê lāu-bú kut-jio̍k ê chhin.

14你m̄-thang凌辱你ê叔伯，露現伊ê bó͘ ê下體；伊是你ê姆，你ê嬸。Lí m̄-thang lêng-jio̍k lí ê chek-peh, lō͘-hiān i ê bó͘ ê ē-thé; i sī lí ê ḿ, lí ê chím.

15你m̄-thang露現你ê新婦ê下體；伊是你ê kiáⁿ ê bó͘；m̄-thang露現伊ê下體。Lí m̄-thang lō͘-hiān lí ê sim-pū ê ē-thé; i sī lí ê kiáⁿ ê bó͘; m̄-thang lō͘-hiān i ê ē-thé.

16M̄-thang露現你ê兄弟ê bó͘ ê下體；伊是你ê兄弟ê下體。M̄-thang lō͘-hiān lí ê hiaⁿ-tī ê bó͘ ê ē-thé; i sī lí ê hiaⁿ-tī ê ē-thé.

17婦人人kap伊ê cha-bó͘-kiáⁿ ê下體m̄-thang lóng露現；m̄-thang將伊ê kiáⁿ ê cha-bó͘-kiáⁿ á是伊ê cha-bó͘-kiáⁿ ê cha-bó͘-kiáⁿ ê下體來露現伊；in是骨肉ê親，這是真pháiⁿ。Hū-jîn-lâng kap i ê cha-bó͘-kiáⁿ ê ē-thé m̄-thang lóng lō͘-hiān; m̄-thang chiong i ê kiáⁿ ê cha-bó͘-kiáⁿ á-sī i ê cha-bó͘-kiáⁿ ê cha-bó͘-kiáⁿ ê ē-thé lâi lō͘-hiān i; in sī kut-jio̍k ê chhin, che sī chin pháiⁿ.

18Bó͘ iáu tī-teh，你m̄-thang另外koh娶伊ê姊妹，露現伊ê下體，來做伊ê對頭。Bó͘ iáu tī-teh, lí m̄-thang lēng-gōa koh chhōa i ê chí-bē, lō͘-hiān i ê ē-thé, lâi chòe i ê tùi-thâu.

19婦人人經期到，無清氣ê時，你m̄-thang近óa伊來露現伊ê下體。Hū-jîn-lâng keng-kî kàu, bô chheng-khì ê sî, lí m̄-thang kūn-óa i lâi lō͘-hiān i ê ē-thé.

20你m̄-thang kap厝邊ê bó͘行淫來phah lâ-sâm家己。Lí m̄-thang kap chhù-piⁿ ê bó͘ kiâⁿ-îm lâi phah lâ-sâm ka-kī.

21M̄-thang hō͘你ê kiáⁿ兒tùi火中過去，歸hō͘ Mô͘-lo̍k；也m̄-thang褻瀆你ê上帝ê名；我就是耶和華。M̄-thang hō͘ lí ê kiáⁿ-jî tùi hé-tiong kè-khì, kui hō͘ Mô͘-lo̍k; iā m̄-thang siat-to̍k lí ê Siōng-tè ê miâ; Góa chiū-sī Iâ-hô-hoa.

22M̄-thang kap ta-po͘人交合，親像kap婦人人一樣；這是真可惡ê tāi。M̄-thang kap ta-po͘-lâng kau-ha̍p, chhin-chhiūⁿ kap hū-jîn-lâng chi̍t-iūⁿ; che sī chin khó-ò͘ⁿ ê tāi.

23不論甚麼獸，m̄-thang kap伊交合，來phah lâ-sâm家己；婦人人也m̄-thang khiā tī獸ê頭前kap伊交合；這是逆性ê tāi。Put-lūn sím-mi̍h siù, m̄-thang kap i kau-ha̍p, lâi phah lâ-sâm ka-kī; hū-jîn-lâng iā m̄-thang khiā tī siù ê thâu-chêng kap i kau-ha̍p; che sī ge̍k-sèng ê tāi.

24Tī chiah-ê一切ê事lín lóng m̄-thang phah lâ-sâm家己；因為我tī lín ê面前所趕出ê列邦，tī chiah-ê一切有phah lâ-sâm家己；Tī chiah ê it-chhè ê sū lín lóng m̄-thang phah lâ-sâm ka-kī; in-ūi Góa tī lín ê bīn-chêng só͘ kóaⁿ-chhut ê lia̍t-pang tī chiah-ê it-chhè ū phah lâ-sâm ka-kī;

25地也phah lâ-sâm，所以我辦伊ê罪；hit-ê地也吐出伊khiā起ê百姓。tōe iā phah lâ-sâm, só͘-í Góa pān i ê chōe; hit ê tōe iā thò͘-chhut i khiā-khí ê peh-sìⁿ.

26所以lín tio̍h守我ê律例，我ê法度；chiah-ê一切可惡ê事，無論是本地人á是寄腳tī lín中間ê外人lóng m̄-thang行伊；Só͘-í lín tio̍h siú Góa ê lu̍t-lē, Góa ê hoat-tō͘; chiah-ê it-chhè khó-ò͘ⁿ ê sū, bô-lūn sī pún-tōe lâng á-sī kià-kha tī lín tiong-kan ê gōa-lâng lóng m̄-thang kiâⁿ i;

27(因為tī lín以前khiā起hit-ê地ê人行chiah-ê一切可惡ê事，地就phah lâ-sâm) ；(in-ūi tī lín í-chêng khiā-khí hit ê tōe ê lâng kiâⁿ chiah-ê it-chhè khó-ò͘ⁿ ê sū, tōe chiū phah lâ-sâm);

28免得lín phah lâ-sâm hit-ê地ê時，地就將lín吐出，親像吐出tī lín以前ê百姓一般樣。bián-tit lín phah lâ-sâm hit ê tōe ê sî, tōe chiū chiong lín thò͘-chhut, chhin-chhiūⁿ thò͘-chhut tī lín í-chêng ê peh-sìⁿ chi̍t-poaⁿ-iūⁿ.

29因為見若行chiah-ê一切可惡ê事ê一項，行伊ê人beh tùi伊ê百姓中剪除伊。In-ūi kìⁿ-nā kiâⁿ chiah-ê it-chhè khó-ò͘ⁿ ê sū ê chi̍t-hāng, kiâⁿ i ê lâng beh tùi i ê peh-sìⁿ-tiong chián-tû i.

30所以lín tio̍h守我所交代ê，免得lín thàn hiah-ê可惡ê風俗，就是tī lín以前ê人所常常行ê，致到lín tùi hiah-ê phah lâ-sâm家己；我就是耶和華lín ê上帝。Só͘-í lín tio̍h siú Góa só͘ kau-tài-ê, bián-tit lín thàn hiah ê khó-ò͘ⁿ ê hong-sio̍k, chiū-sī tī lín í-chêng ê lâng só͘ siông-siông kiâⁿ-ê, tì-kàu lín tùi hiah-ê phah lâ-sâm ka-kī; Góa chiū-sī Iâ-hô-hoa lín ê Siōng-tè.