1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人，kā in講：我是耶和華，lín ê上帝。Lí tio̍h hoan-hù Í-sek-lia̍t lâng, kā in kóng, Góa sī Iâ-hô-hoa, lín ê Siōng-tè.

3Lín前所tiàm ê埃及地，hit位ê人所行ê lín m̄-thang thàn in來行；我beh chhōa lín到迦南地，hit位ê人所行ê，lín也m̄-thang thàn in來行，也m̄-thang照in ê規例來行。Lín chêng só͘ tiàm ê Ai-ki̍p tōe, hit-ūi ê lâng só͘-kiâⁿ-ê lín m̄-thang thàn in lâi kiâⁿ; Góa beh chhōa lín kàu Ka-lâm tōe, hit-ūi ê lâng só͘-kiâⁿ-ê, lín iā m̄-thang thàn in lâi kiâⁿ, iā m̄-thang chiàu in ê kui-lē lâi kiâⁿ.

4Lín tio̍h thàn我ê法度，守我ê律例，照chit-ê來行；我是耶和華lín ê上帝。Lín tio̍h thàn Góa ê hoat-tō͘, siú Góa ê lu̍t-lē, chiàu chit-ê lâi kiâⁿ; Góa sī Iâ-hô-hoa lín ê Siōng-tè.

5所以lín tio̍h守我ê律例法度；人若行chiah-ê就beh tùi chiah-ê來活；我是耶和華。Só͘-í lín tio̍h siú Góa ê lu̍t-lē hoat-tō͘; lâng nā kiâⁿ chiah-ê chiū beh tùi chiah-ê lâi oa̍h; Góa sī Iâ-hô-hoa.

6Lín lóng m̄-thang親近骨肉ê親，來露現伊ê下體；我是耶和華。Lín lóng m̄-thang chhin-kūn kut-jio̍k ê chhin, lâi lō͘-hiān i ê ē-thé; Góa sī Iâ-hô-hoa.

7M̄-thang露現你ê老母ê下體，來凌辱你ê老父；伊是你ê老母，m̄-thang露現伊ê下體。M̄-thang lō͘-hiān lí ê lāu-bú ê ē-thé, lâi lêng-jio̍k lí ê lāu-pē; i sī lí ê lāu-bú, m̄-thang lō͘-hiān i ê ē-thé.

8你老父ê後bó͘ ê下體你m̄-thang露現；伊是你ê老父ê下體。Lí lāu-pē ê āu-bó͘ ê ē-thé lí m̄-thang lō͘-hiān; i sī lí ê lāu-pē ê ē-thé.

9你ê姊妹，無論是同父ê á是同母ê，出世tī家內，á是出世tī家外，lóng m̄-thang露現in ê下體。Lí ê chí-bē, bô-lūn sī tâng-pē-ê á-sī tâng-bú-ê, chhut-sì tī ke-lāi, á-sī chhut-sì tī ke-gōa, lóng m̄-thang lō͘-hiān in ê ē-thé.

10你ê後生ê cha-bó͘-kiáⁿ，á是你ê cha-bó͘-kiáⁿ ê cha-bó͘-kiáⁿ，m̄-thang露現in ê下體；因為是你本身ê下體。Lí ê hāu-siⁿ ê cha-bó͘-kiáⁿ, á-sī lí ê cha-bó͘-kiáⁿ ê cha-bó͘-kiáⁿ, m̄-thang lō͘-hiān in ê ē-thé; in-ūi sī lí pún-sin ê ē-thé.

11你老父ê後bó͘ ê cha-bó͘-kiáⁿ，對你ê老父生ê，是你ê小妹，m̄-thang露現伊ê下體。Lí lāu-pē ê āu-bó͘ ê cha-bó͘-kiáⁿ, tùi lí ê lāu-pē siⁿ-ê, sī lí ê sió-bē, m̄-thang lō͘-hiān i ê ē-thé.

12M̄-thang露現你ê姑ê下體；伊是你ê老父骨肉ê親。M̄-thang lō͘-hiān lí ê ko͘ ê ē-thé; i sī lí ê lāu-pē kut-jio̍k ê chhin.

13M̄-thang露現你ê姨母ê下體；伊是你ê老母骨肉ê親。M̄-thang lō͘-hiān lí ê î-bú ê ē-thé; i sī lí ê lāu-bú kut-jio̍k ê chhin.

14你m̄-thang凌辱你ê叔伯，露現伊ê bó͘ ê下體；伊是你ê姆，你ê嬸。Lí m̄-thang lêng-jio̍k lí ê chek-peh, lō͘-hiān i ê bó͘ ê ē-thé; i sī lí ê ḿ, lí ê chím.

15你m̄-thang露現你ê新婦ê下體；伊是你ê kiáⁿ ê bó͘；m̄-thang露現伊ê下體。Lí m̄-thang lō͘-hiān lí ê sim-pū ê ē-thé; i sī lí ê kiáⁿ ê bó͘; m̄-thang lō͘-hiān i ê ē-thé.

16M̄-thang露現你ê兄弟ê bó͘ ê下體；伊是你ê兄弟ê下體。M̄-thang lō͘-hiān lí ê hiaⁿ-tī ê bó͘ ê ē-thé; i sī lí ê hiaⁿ-tī ê ē-thé.

17婦人人kap伊ê cha-bó͘-kiáⁿ ê下體m̄-thang lóng露現；m̄-thang將伊ê kiáⁿ ê cha-bó͘-kiáⁿ á是伊ê cha-bó͘-kiáⁿ ê cha-bó͘-kiáⁿ ê下體來露現伊；in是骨肉ê親，這是真pháiⁿ。Hū-jîn-lâng kap i ê cha-bó͘-kiáⁿ ê ē-thé m̄-thang lóng lō͘-hiān; m̄-thang chiong i ê kiáⁿ ê cha-bó͘-kiáⁿ á-sī i ê cha-bó͘-kiáⁿ ê cha-bó͘-kiáⁿ ê ē-thé lâi lō͘-hiān i; in sī kut-jio̍k ê chhin, che sī chin pháiⁿ.

18Bó͘ iáu tī-teh，你m̄-thang另外koh娶伊ê姊妹，露現伊ê下體，來做伊ê對頭。Bó͘ iáu tī-teh, lí m̄-thang lēng-gōa koh chhōa i ê chí-bē, lō͘-hiān i ê ē-thé, lâi chòe i ê tùi-thâu.

19婦人人經期到，無清氣ê時，你m̄-thang近óa伊來露現伊ê下體。Hū-jîn-lâng keng-kî kàu, bô chheng-khì ê sî, lí m̄-thang kūn-óa i lâi lō͘-hiān i ê ē-thé.

20你m̄-thang kap厝邊ê bó͘行淫來phah lâ-sâm家己。Lí m̄-thang kap chhù-piⁿ ê bó͘ kiâⁿ-îm lâi phah lâ-sâm ka-kī.

21M̄-thang hō͘你ê kiáⁿ兒tùi火中過去，歸hō͘ Mô͘-lo̍k；也m̄-thang褻瀆你ê上帝ê名；我就是耶和華。M̄-thang hō͘ lí ê kiáⁿ-jî tùi hé-tiong kè-khì, kui hō͘ Mô͘-lo̍k; iā m̄-thang siat-to̍k lí ê Siōng-tè ê miâ; Góa chiū-sī Iâ-hô-hoa.

22M̄-thang kap ta-po͘人交合，親像kap婦人人一樣；這是真可惡ê tāi。M̄-thang kap ta-po͘-lâng kau-ha̍p, chhin-chhiūⁿ kap hū-jîn-lâng chi̍t-iūⁿ; che sī chin khó-ò͘ⁿ ê tāi.

23不論甚麼獸，m̄-thang kap伊交合，來phah lâ-sâm家己；婦人人也m̄-thang khiā tī獸ê頭前kap伊交合；這是逆性ê tāi。Put-lūn sím-mi̍h siù, m̄-thang kap i kau-ha̍p, lâi phah lâ-sâm ka-kī; hū-jîn-lâng iā m̄-thang khiā tī siù ê thâu-chêng kap i kau-ha̍p; che sī ge̍k-sèng ê tāi.

24Tī chiah-ê一切ê事lín lóng m̄-thang phah lâ-sâm家己；因為我tī lín ê面前所趕出ê列邦，tī chiah-ê一切有phah lâ-sâm家己；Tī chiah ê it-chhè ê sū lín lóng m̄-thang phah lâ-sâm ka-kī; in-ūi Góa tī lín ê bīn-chêng só͘ kóaⁿ-chhut ê lia̍t-pang tī chiah-ê it-chhè ū phah lâ-sâm ka-kī;

25地也phah lâ-sâm，所以我辦伊ê罪；hit-ê地也吐出伊khiā起ê百姓。tōe iā phah lâ-sâm, só͘-í Góa pān i ê chōe; hit ê tōe iā thò͘-chhut i khiā-khí ê peh-sìⁿ.

26所以lín tio̍h守我ê律例，我ê法度；chiah-ê一切可惡ê事，無論是本地人á是寄腳tī lín中間ê外人lóng m̄-thang行伊；Só͘-í lín tio̍h siú Góa ê lu̍t-lē, Góa ê hoat-tō͘; chiah-ê it-chhè khó-ò͘ⁿ ê sū, bô-lūn sī pún-tōe lâng á-sī kià-kha tī lín tiong-kan ê gōa-lâng lóng m̄-thang kiâⁿ i;

27(因為tī lín以前khiā起hit-ê地ê人行chiah-ê一切可惡ê事，地就phah lâ-sâm) ；(in-ūi tī lín í-chêng khiā-khí hit ê tōe ê lâng kiâⁿ chiah-ê it-chhè khó-ò͘ⁿ ê sū, tōe chiū phah lâ-sâm);

28免得lín phah lâ-sâm hit-ê地ê時，地就將lín吐出，親像吐出tī lín以前ê百姓一般樣。bián-tit lín phah lâ-sâm hit ê tōe ê sî, tōe chiū chiong lín thò͘-chhut, chhin-chhiūⁿ thò͘-chhut tī lín í-chêng ê peh-sìⁿ chi̍t-poaⁿ-iūⁿ.

29因為見若行chiah-ê一切可惡ê事ê一項，行伊ê人beh tùi伊ê百姓中剪除伊。In-ūi kìⁿ-nā kiâⁿ chiah-ê it-chhè khó-ò͘ⁿ ê sū ê chi̍t-hāng, kiâⁿ i ê lâng beh tùi i ê peh-sìⁿ-tiong chián-tû i.

30所以lín tio̍h守我所交代ê，免得lín thàn hiah-ê可惡ê風俗，就是tī lín以前ê人所常常行ê，致到lín tùi hiah-ê phah lâ-sâm家己；我就是耶和華lín ê上帝。Só͘-í lín tio̍h siú Góa só͘ kau-tài-ê, bián-tit lín thàn hiah ê khó-ò͘ⁿ ê hong-sio̍k, chiū-sī tī lín í-chêng ê lâng só͘ siông-siông kiâⁿ-ê, tì-kàu lín tùi hiah-ê phah lâ-sâm ka-kī; Góa chiū-sī Iâ-hô-hoa lín ê Siōng-tè.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列全會對in講：Lín tio̍h做聖，因為我耶和華lín ê上帝是聖。Lí tio̍h hoan-hù Í-sek-lia̍t choân-hōe tùi in kóng, Lín tio̍h chòe-sèng, in-ūi Góa Iâ-hô-hoa lín ê Siōng-tè sī sèng.

3Lín ta̍k人lóng tio̍h孝敬伊ê老母，伊ê老父；也tio̍h守我hiah-ê安歇；我是耶和華lín ê上帝。Lín ta̍k-lâng lóng tio̍h hàu-kèng i ê lāu-bú, i ê lāu-pē; iā tio̍h siú Góa hiah ê an-hioh; Góa sī Iâ-hô-hoa lín ê Siōng-tè.

4Lín m̄-thang偏ǹg偶像，也m̄-thang為家己鑄造上帝；我是耶和華lín ê上帝。Lín m̄-thang phian-ǹg ngó͘-siōng, iā m̄-thang ūi ka-kī chù-chō siōng-tè; Góa sī Iâ-hô-hoa lín ê Siōng-tè.

5Lín獻謝恩祭hō͘耶和華ê時tio̍h獻thang得tio̍h接納ê。Lín hiàn siā-un-chè hō͘ Iâ-hô-hoa ê sî tio̍h hiàn thang tit-tio̍h chiap-la̍p ê.

6Tī獻ê日á是過日食伊；若有chhun到第三日ê tio̍h用火燒伊。Tī hiàn ê ji̍t á-sī kè-ji̍t chia̍h i; nā ū chhun kàu tē-saⁿ ji̍t-ê tio̍h ēng hé sio i.

7第三日若koh食tio̍h，這是thang厭惡ê；bōe得tio̍h接納。Tē-saⁿ ji̍t nā koh chia̍h-tio̍h, che sī thang iàm-ò͘ⁿ-ê; bōe tit-tio̍h chiap-la̍p.

8凡若食伊ê人，的確tio̍h擔當伊ê罪過；因為伊褻瀆耶和華ê聖物；hit人的確tùi伊ê百姓中受剪除。Hoān-nā chia̍h i ê lâng, tek-khak tio̍h tam-tng i ê chōe-kòa; in-ūi i siat-to̍k Iâ-hô-hoa ê sèng-mi̍h; hit-lâng tek-khak tùi i ê peh-sìⁿ-tiong siū chián-tû.

9Lín收割田ê五穀，田ê角頭m̄-thang割到盡，ka-la̍uh-ê也m̄-thang拾。Lín siu-koah chhân ê ngó͘-kok, chhân ê kak-thâu m̄-thang koah kàu chīn, ka-la̍uh-ê iā m̄-thang khioh.

10葡萄園果子m̄-thang挽了了，也m̄-thang拾葡萄所lak ê果子；tio̍h留hō͘ sòng-hiong人kap出外ê；我是耶和華lín ê上帝。Phû-tô-hn̂g ké-chí m̄-thang bán liáu-liáu, iā m̄-thang khioh phû-tô só͘ lak ê ké-chí; tio̍h lâu hō͘ sòng-hiong lâng kap chhut-gōa ê; Góa sī Iâ-hô-hoa lín ê Siōng-tè.

11Lín m̄-thang偷the̍h；m̄-thang欺騙；大家m̄-thang講白賊。Lín m̄-thang thau-the̍h; m̄-thang khi-phiàn; tāi-ke m̄-thang kóng pe̍h-chha̍t.

12Lín m̄-thang kí我ê名lâm-sám chiù -chōa，來褻瀆你ê上帝ê名；我就是耶和華。Lín m̄-thang kí Góa ê miâ lâm-sám chiù-chōa, lâi siat-to̍k lí ê Siōng-tè ê miâ; Góa chiū-sī Iâ-hô-hoa.

13M̄-thang欺負你ê厝邊，也m̄-thang搶the̍h伊ê物；做工人ê工錢m̄-thang留tī你hia kui暝到天光。M̄-thang khi-hū lí ê chhù-piⁿ, iā m̄-thang chhiúⁿ-the̍h i ê mi̍h; chòe-kang lâng ê kang-chîⁿ m̄-thang lâu tī lí hia kui-mî kàu thiⁿ-kng.

14M̄-thang罵臭耳人ê，也m̄-thang hē塞礙ê物tī chhiⁿ-mî人ê面前；tio̍h敬畏你ê上帝；我就是耶和華。M̄-thang mē chhàu-hī-lâng-ê, iā m̄-thang hē that-gāi ê mi̍h tī chhiⁿ-mî lâng ê bīn-chêng; tio̍h kèng-ùi lí ê Siōng-tè; Góa chiū-sī Iâ-hô-hoa.

15Lín審判m̄-thang無公道；m̄-thang偏袒sòng-hiong人，也m̄-thang看重有勢力ê人；tio̍h照公道審判你ê厝邊。Lín sím-phòaⁿ m̄-thang bô kong-tō; m̄-thang phian-thán sòng-hiong lâng, iā m̄-thang khòaⁿ-tāng ū sè-le̍k ê lâng; tio̍h chiàu kong-tō sím-phòaⁿ lí ê chhù-piⁿ.

16M̄-thang tī你ê百姓ê中間四界行譭謗人；也m̄-thang做干證ài害死你ê厝邊；我就是耶和華。M̄-thang tī lí ê peh-sìⁿ ê tiong-kan sì-kòe kiâⁿ húi-pòng lâng; iā m̄-thang chòe kan-chèng ài hāi-sí lí ê chhù-piⁿ; Góa chiū-sī Iâ-hô-hoa.

17你m̄-thang心內怨恨你ê兄弟；的確tio̍h責備你ê厝邊，免得為tio̍h伊擔當罪。Lí m̄-thang sim-lāi oàn-hūn lí ê hiaⁿ-tī; tek-khak tio̍h chek-pī lí ê chhù-piⁿ, bián-tit ūi-tio̍h i tam-tng chōe.

18M̄-thang報仇，也m̄-thang埋怨你本國ê百姓；tio̍h疼厝邊親像家己；我就是耶和華。M̄-thang pò-siû, iā m̄-thang bâi-oàn lí pún-kok ê peh-sìⁿ; tio̍h thiàⁿ chhù-piⁿ chhin-chhiūⁿ ka-kī; Góa chiū-sī Iâ-hô-hoa.

19Lín tio̍h守我ê律例。M̄-thang hō͘ lín ê cheng-siⁿ kap無同類ê交合；m̄-thang用兩樣ê種子chham-chhap掖tī你ê園地；m̄-thang用兩樣ê料 chham-chhap做衫，穿tī你ê身軀。Lín tio̍h siú Góa ê lu̍t-lē. M̄-thang hō͘ lín ê cheng-siⁿ kap bô tâng-lūi-ê kau-ha̍p; m̄-thang ēng nn̄g-iūⁿ ê chéng-chí chham-chhap iā tī lí ê hn̂g-tōe; m̄-thang ēng nn̄g-iūⁿ ê liāu chham-chhap chòe-saⁿ, chhēng tī lí ê seng-khu.

20女婢做人定tio̍h，iáu未受贖，bē得tio̍h tháu放，人若kap伊行淫，兩人tio̍h受刑罰；總是m̄-thang hō͘伊死，因為女婢iáu未得tio̍h自由。Lú-pī chòe-lâng tiāⁿ-tio̍h, iáu-bē siū-sio̍k, bē tit-tio̍h tháu-pàng, lâng nā kap i kiâⁿ-îm, nn̄g-lâng tio̍h siū hêng-hoa̍t; chóng-sī m̄-thang hō͘ i sí, in-ūi lú-pī iáu-bē tit-tio̍h chū-iû.

21Hit-ê ta-po͘人tio̍h用補過失ê祭，就是一隻綿羊káng，牽到會幕門口，耶和華ê面前，做補過失祭ê祭。Hit ê ta-po͘-lâng tio̍h ēng pó͘-kè-sit ê chè, chiū-sī chi̍t chiah mî-iûⁿ-káng, khan kàu hōe-bō͘ mn̂g-kháu, Iâ-hô-hoa ê bīn-chêng, chòe pó͘-kè-sit-chè ê chè.

22祭司tio̍h用補過失祭ê羊káng，tī耶和華ê面前屬伊所犯ê罪；伊所犯ê罪就得tio̍h赦免。Chè-si tio̍h ēng pó͘-kè-sit-chè ê iûⁿ-káng, tī Iâ-hô-hoa ê bīn-chêng sio̍k i só͘ hoān ê chōe; i só͘ hoān ê chōe chiū tit-tio̍h sià-bián.

23Lín到迦南地ê時，栽種ta̍k樣能食得ê果子樹，lín tio̍h看hit-ê果子做親像bē受割禮ê一樣；三年ê久，lín tio̍h看hiah-ê親像bē受割禮ê，m̄-thang食in。Lín kàu Ka-lâm tōe ê sî, chai-chèng ta̍k-iūⁿ ōe-chia̍h-tit ê ké-chí-chhiū, lín tio̍h khòaⁿ hit ê ké-chí chòe chhin-chhiūⁿ bē siū kat-lé-ê chi̍t-iūⁿ; saⁿ-nî ê kú, lín tio̍h khòaⁿ hiah-ê chhin-chhiūⁿ bē siū kat-lé-ê, m̄-thang chia̍h in.

24到第四年所結ê果子lóng tio̍h做聖，用伊來o-ló耶和華。Kàu tē-sì nî só͘ kiat ê ké-chí lóng tio̍h chòe sèng, ēng i lâi o-ló Iâ-hô-hoa.

25到第五年，lín tio̍h食伊ê果子，thang hō͘伊kā lín結khah chōe果子；我是耶和華lín ê上帝。Kàu tē-gō͘ nî lín tio̍h chia̍h i ê ké-chí, thang hō͘ i kā lín kiat khah chōe ké-chí; Góa sī Iâ-hô-hoa lín ê Siōng-tè.

26Lín m̄-thang食kâⁿ血ê物；m̄-thang用法術，也m̄-thang占卜。Lín m̄-thang chia̍h kâⁿ huih ê mi̍h; m̄-thang ēng hoat-su̍t, iā m̄-thang chiam-pok.

27頭殼ê周圍m̄-thang剃，嘴鬚ê周圍也m̄-thang khun。Thâu-khak ê chiu-ûi m̄-thang thì, chhùi-chhiu ê chiu-ûi iā m̄-thang khun.

28Lín m̄-thang為死人割家己ê肉，也m̄-thang刺記號tī身軀；我是耶和華。Lín m̄-thang ūi sí-lâng koah ka-kī ê bah, iā m̄-thang chhiah kì-hō tī seng-khu; Góa sī Iâ-hô-hoa.

29M̄-thang凌辱你ê cha-bó͘-kiáⁿ，hō͘伊做娼妓，驚了地上專專ǹg淫亂，地上滿滿大pháiⁿ。M̄-thang lêng-jio̍k lí ê cha-bó͘-kiáⁿ, hō͘ i chòe chhiong-ki, kiaⁿ-liáu tōe-chiūⁿ choan-choan ǹg îm-loān, tōe-chiūⁿ móa-móa tōa-pháiⁿ.

30Lín tio̍h守我hiah-ê安歇，敬我ê聖所；我是耶和華。Lín tio̍h siú Góa hiah ê an-hioh, kèng Góa ê sèng-só͘; Góa sī Iâ-hô-hoa.

31M̄-thang偏ǹg hiah-ê 鬼上身ê，kap行邪術ê，也m̄-thang去問in，致到hō͘ in phah lâ-sâm；我是耶和華lín ê上帝。M̄-thang phian-ǹg hiah ê kúi chiūⁿ-sin ê, kap kiâⁿ siâ-su̍t-ê, iā m̄-thang khì mn̄g in, tì-kàu hō͘ in phah lâ-sâm; Góa sī Iâ-hô-hoa lín ê Siōng-tè.

32Tī白頭毛ê人ê面前，你tio̍h起來khiā；也tio̍h尊敬老人ê面；koh tio̍h敬畏你ê上帝；我是耶和華。Tī pe̍h-thâu-mn̂g ê lâng ê bīn-chêng, lí tio̍h khí-lâi khiā; iā tio̍h chun-kèng lāu-lâng ê bīn; koh tio̍h kèng-ùi lí ê Siōng-tè; Góa sī Iâ-hô-hoa.

33若有出外人寄腳tī lín ê地方，kap lín khiā起，就m̄-thang欺負in。Nā ū chhut-gōa lâng kià-kha tī lín ê tōe-hng, kap lín khiā-khí, chiū m̄-thang khi-hū in.

34kap lín khiā起ê出外人，lín tio̍h看in親像本地人一樣；也tio̍h疼in親像本身；因為lín也bat tī埃及地做出外人；我是耶和華lín ê上帝。Kap lín khiā-khí ê chhut-gōa lâng, lín tio̍h khòaⁿ in chhin-chhiūⁿ pún-tōe lâng chi̍t-iūⁿ; iā tio̍h thiàⁿ in chhin-chhiūⁿ pún-sin; in-ūi lín iā bat tī Ai-ki̍p tōe chòe chhut-gōa lâng; Góa sī Iâ-hô-hoa lín ê Siōng-tè.

35Lín審判m̄-thang無公道；tī尺，tī秤，tī斗，lóng tio̍h公道。Lín sím-phòaⁿ m̄-thang bô kong-tō; tī chhioh, tī chhìn, tī táu, lóng tio̍h kong-tō.

36Tio̍h用公道ê秤(phêng)，公道ê tô-chit，公道ê i-hoat，公道ê him；我是耶和華lín ê上帝，bat chhōa lín出埃及地ê。Tio̍h ēng kong-tō ê phêng, kong-tō ê tô-chí, kong-tō ê i-hoat, kong-tō ê him; Góa sī Iâ-hô-hoa lín ê Siōng-tè, bat chhōa lín chhut Ai-ki̍p tōe ê.

37Lín tio̍h守我一切ê律例，kap我一切ê法度，來行伊；我是耶和華。Lín tio̍h siú Góa it-chhè ê lu̍t-lē, kap Góa it-chhè ê hoat-tō͘, lâi kiâⁿ i; Góa sī Iâ-hô-hoa.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h koh對以色列人講：見若以色列人，á是tī以色列中寄腳ê外人，用家己ê kiáⁿ兒獻hō͘ Mô͘-lo̍k ê，的確tio̍h hō͘伊死；hit地方ê人tio̍h用石頭tìm死伊。Lí tio̍h koh tùi Í-sek-lia̍t lâng kóng, Kìⁿ-nā Í-sek-lia̍t lâng, á-sī tī Í-sek-lia̍t tiong kià-kha ê gōa-lâng, ēng ka-kī ê kiáⁿ-jî hiàn-hō͘ Mô͘-lo̍k ê, tek-khak tio̍h hō͘ i sí; hit tōe-hng ê lâng tio̍h ēng chio̍h-thâu tìm-sí i.

3我也beh對hit人變面，tùi伊ê百姓中剪除伊；因為伊用kiáⁿ兒獻hō͘ Mô͘-lo̍k，bak lâ-sâm我ê聖所，褻瀆我ê聖名。Góa iā beh tùi hit-lâng pìⁿ-bīn, tùi i ê peh-sìⁿ-tiong chián-tû i; in-ūi i ēng kiáⁿ-jî hiàn-hō͘ Mô͘-lo̍k, bak lâ-sâm Góa ê sèng-só͘, siat-to̍k Góa ê sèng-miâ.

4hit人用kiáⁿ兒獻hō͘ Mô͘-lo̍k，hit所在ê人若tìⁿ做無看見，也無hō͘伊死，Hit-lâng ēng kiáⁿ-jî hiàn-hō͘ Mô͘-lo̍k, hit só͘-chāi ê lâng nā tìⁿ-chòe bô khòaⁿ-kìⁿ, iā bô hō͘ i sí,

5我beh對hit人kap伊ê家變面，將伊kap一切tè伊行邪淫ê，就是kap Mô͘-lo̍k行邪淫ê，lóng tùi伊ê百姓中剪除伊。Góa beh tùi hit-lâng kap i ê ke pìⁿ-bīn, chiong i kap it-chhè tè i kiâⁿ siâ-îm ê, chiū-sī kap Mô͘-lo̍k kiâⁿ siâ-îm ê, lóng tùi i ê peh-sìⁿ-tiong chián-tû i.

6人偏ǹg hō͘鬼上身ê，kap行邪術ê，tè in行邪淫，我beh對hit人變面，tùi伊ê百姓中剪除伊。Lâng phian-ǹg hō͘ kúi chiūⁿ-sin-ê, kap kiâⁿ siâ-su̍t ê, tè in kiâⁿ siâ-îm, Góa beh tùi hit-lâng pìⁿ-bīn, tùi i ê peh-sìⁿ-tiong chián-tû i.

7所以lín tio̍h家己聖，來成聖；因為我是耶和華，lín ê上帝。Só͘-í lín tio̍h ka-kī sèng, lâi chiâⁿ-sèng; in-ūi Góa sī Iâ-hô-hoa, lín ê Siōng-tè.

8Lín tio̍h守我ê律例，來行伊；我是hō͘ lín成聖ê耶和華。Lín tio̍h siú Góa ê lu̍t-lē, lâi kiâⁿ i; Góa sī hō͘ lín chiâⁿ-sèng ê Iâ-hô-hoa.

9見若咒詛老父á是老母ê的確tio̍h hō͘伊死；伊咒詛老父á是老母；伊ê罪tio̍h歸tī伊ê身上。Kìⁿ-nā chiù-chó͘ lāu-pē á-sī lāu-bú-ê tek-khak tio̍h hō͘ i sí; i chiù-chó͘ lāu-pē á-sī lāu-bú; i ê chōe tio̍h kui tī i ê sin-chiūⁿ.

10Kap別人ê bó͘行淫，就是kap伊厝邊ê bó͘行淫ê，姦夫淫婦的確tio̍h hō͘ in死。Kap pa̍t-lâng ê bó͘ kiâⁿ-îm, chiū-sī kap i chhù-piⁿ ê bó͘ kiâⁿ-îm-ê, kan-hu îm-hū tek-khak tio̍h hō͘ in sí.

11人kap後母私通ê就是凌辱伊ê老父；in兩人的確tio̍h hō͘ in死；in ê罪歸tī in。Lâng kap āu-bú su-thong-ê chiū-sī lêng-jio̍k i ê lāu-pē; in nn̄g-lâng tek-khak tio̍h hō͘ in sí; in ê chōe kui tī in.

12人kap新婦私通ê，的確tio̍h hō͘ in兩人lóng死；in行逆倫ê事；in ê罪歸tī in。Lâng kap sim-pū su-thong-ê, tek-khak tio̍h hō͘ in nn̄g-lâng lóng sí; in kiâⁿ ge̍k-lûn ê sū; in ê chōe kui tī in.

13人若kap ta-po͘人交合，親像kap婦人人一樣，in兩人行可惡ê事，的確tio̍h hō͘ in死；in ê罪歸tī in。Lâng nā kap ta-po͘-lâng kau-ha̍p, chhin-chhiūⁿ kap hū-jîn-lâng chi̍t-iūⁿ, in nn̄g-lâng kiâⁿ khó-ò͘ⁿ ê sū, tek-khak tio̍h hō͘ in sí; in ê chōe kui tī in.

14人若娶bó͘續娶 bó͘ ê老母，就是極pháiⁿ；chit三人tio̍h用火燒in，免得lín中間有chit號pháiⁿ。Lâng nā chhōa-bó͘ sòa chhōa bó͘ ê lāu-bú, chiū-sī ke̍k-pháiⁿ; chí saⁿ-lâng tio̍h ēng hé sio in, bián-tit lín tiong-kan ū chit-hō pháiⁿ.

15人kap獸交合，伊的確tio̍h死；hit隻獸也tio̍h thâi死。Lâng kap siù kau-ha̍p, i tek-khak tio̍h sí; hit chiah siù iā tio̍h thâi-sí.

16婦人人親近獸kap伊交合，你tio̍h thâi死hit-ê婦人人kap獸，的確tio̍h hō͘ in死；in ê罪歸tī in。Hū-jîn-lâng chhin-kūn siù kap i kau-ha̍p, lí tio̍h thâi-sí hit ê hū-jîn-lâng kap siù, tek-khak tio̍h hō͘ in sí; in ê chōe kui tī in.

17人若牽伊ê姊妹，無論同父á是同母ê，伊看伊ê下體，伊看伊ê下體，這是見笑ê事；in tio̍h tī伊ê百姓ê目睭前受剪除；伊有露現伊ê姊妹ê下體；tio̍h擔當伊ê罪。Lâng nā khan i ê chí-bē, bô-lūn tâng-pē á-sī tâng-bú ê, i khòaⁿ i ê ē-thé, i khòaⁿ i ê ē-thé, che sī kiàn-siàu ê sū; in tio̍h tī i ê peh-sìⁿ ê ba̍k-chiu-chêng siū chián-tû; i ū lō͘-hiān i ê chí-bē ê ē-thé; tio̍h tam-tng i ê chōe.

18婦人人經期到，人kap伊同房，露現伊ê下體；伊有露現婦人人ê血源，婦人人也有露現伊ê血源；in兩個tio̍h tùi in ê百姓中受剪除。Hū-jîn-lâng keng-kî kàu, lâng kap i tâng-pâng, lō͘-hiān i ê ē-thé; i ū lō͘-hiān hū-jîn-lâng ê huih-goân, hū-jîn-lâng iā ū lō͘-hiān i ê huih-goân; in nn̄g-ê tio̍h tùi in ê peh-sìⁿ-tiong siū chián-tû.

19老母ê姊妹á是老父ê姊妹，m̄-thang露現in ê下體，就是凌辱骨肉ê親；in tio̍h擔當in ê罪。Lāu-bú ê chí-bē á-sī lāu-pē ê chí-bē, m̄-thang lō͘-hiān in ê ē-thé, chiū-sī lêng-jio̍k kut-jio̍k ê chhin; in tio̍h tam-tng in ê chōe.

20人若私通伊ê嬸姆，就是凌辱伊ê叔伯；in beh擔當in ê罪；一世人無kiáⁿ。Lâng nā su-thong i ê chím ḿ, chiū-sī lêng-jio̍k i ê chek peh; in beh tam-tng in ê chōe; chi̍t-sì-lâng bô kiáⁿ.

21人娶兄弟ê bó͘，這是lâ-sâm ê事；伊有凌辱伊ê兄弟；in的確無kiáⁿ。Lâng chhōa hiaⁿ-tī ê bó͘, che sī lâ-sâm ê sū; i ū lêng-jio̍k i ê hiaⁿ-tī; in tek-khak bô kiáⁿ.

22所以lín tio̍h守我一切ê律例kap我一切ê法度，來行伊；免得我所chhōa lín去tiàm ê地將lín吐出。Só͘-í lín tio̍h siú Góa it-chhè ê lu̍t-lē kap Góa it-chhè ê hoat-tō͘, lâi kiâⁿ i; bián-tit Góa só͘ chhōa lín khì tiàm ê tōe chiong lín thò͘-chhut.

23我tī lín ê面前所趕出ê百姓，lín m̄-thang thàn in ê風俗；因為in行chiah-ê一切ê事，所以我厭惡in。Góa tī lín ê bīn-chêng só͘ kóaⁿ-chhut ê peh-sìⁿ, lín m̄-thang thàn in ê hong-sio̍k; in-ūi in kiâⁿ chiah ê it-chhè ê sū, só͘-í Góa iàm-ò͘ⁿ in.

24總是我bat對lín講：Lín beh承接in ê地，我beh用hit-ê賞賜lín做業，就是流奶kap蜜ê地；我是耶和華，lín ê上帝，tùi萬百姓ê中間分別lín。Chóng-sī Góa bat tùi lín kóng, Lín beh sêng-chiap in ê tōe, Góa beh ēng hit-ê siúⁿ-sù lín chòe-gia̍p, chiū-sī lâu lin kap bi̍t ê tōe; Góa sī Iâ-hô-hoa, lín ê Siōng-tè, tùi bān peh-sìⁿ ê tiong-kan hun-piat lín.

25所以lín tio̍h分別清氣kap無清氣ê獸，無清氣kap清氣ê鳥隻；或是獸，或是琴，或是爬tī地裡lóng總ê活物，我所kā lín分別做無清氣ê，lín m̄-thang為tio̍h in致到家己做thang厭惡ê。Só͘-í lín tio̍h hun-piat chheng-khì kap bô chheng-khì ê siù, bô chheng-khì kap chheng-khì ê chiáu-chiah; he̍k-sī siù, he̍k-sī khîm, he̍k-sī pê tī tōe-ni̍h lóng-chóng ê oa̍h-mi̍h, Góa só͘ kā lín hun-piat chòe bô chheng-khì ê, lín m̄-thang ūi-tio̍h in tì-kàu ka-kī chòe thang iàm-ò͘ⁿ ê.

26Lín tio̍h歸tī我，來做聖；因為我耶和華是聖，tùi萬百姓ê中間分別lín，來歸tī我。Lín tio̍h kui tī Góa, lâi chòe-sèng; in-ūi Góa Iâ-hô-hoa sī sèng, tùi bān peh-sìⁿ ê tiong-kan hun-piat lín, lâi kui tī Góa.

27無論男女有鬼上身，á是行邪術ê，的確tio̍h hō͘伊死；人tio̍h用石頭kā in tìm死；in ê罪歸tī in。Bô-lūn lâm-lú ū kúi chiūⁿ-sin, á-sī kiâⁿ siâ-su̍t ê, tek-khak tio̍h hō͘ i sí; lâng tio̍h ēng chio̍h-thâu kā in tìm-sí; in ê chōe kui tī in.