1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人kā伊講：耶和華ê節期，lín所tio̍h宣布做聖會ê，以下chiah-ê就是我ê節期。Lí tio̍h hoan-hù Í-sek-lia̍t lâng kā i kóng, Iâ-hô-hoa ê choeh-kî, lín só͘ tio̍h soan-pò͘ chòe sèng-hōe ê, í-ē chiah-ê chiū-sī Góa ê choeh-kî.

3六日tio̍h做工，第七日是大ê安歇日；tio̍h做聖會；lín一切ê工lóng m̄-thang做，tī lín一切khiā起ê所在；這是做耶和華ê聖日。La̍k-ji̍t tio̍h chòe-kang, tē-chhit ji̍t sī tōa ê an-hioh-ji̍t; tio̍h chòe sèng-hōe; lín it-chhè ê kang lóng m̄-thang chòe, tī lín it-chhè khiā-khí ê só͘-chāi; che sī chòe Iâ-hô-hoa ê sèng-ji̍t.

4耶和華chiah-ê節期，就是聖會，lín到期所tio̍h宣布ê，就是chiah-ê。Iâ-hô-hoa chiah ê choeh-kî, chiū-sī sèng-hōe, lín kàu-kî só͘ tio̍h soan-pò͘-ê, chiū-sī chiah-ê.

5正月十四日黃昏ê時，是耶和華ê逾越節。Chiaⁿ-ge̍h cha̍p-sì-ji̍t hông-hun ê sî, sī Iâ-hô-hoa ê jû-oa̍t-choeh.

6Chit月十五日是耶和華ê除酵節；lín tio̍h食無酵餅七日久。Chit-ge̍h cha̍p-gō͘ ji̍t sī Iâ-hô-hoa ê tû-kàⁿ-choeh; lín tio̍h chia̍h bô-kàⁿ-piáⁿ chhit-ji̍t kú.

7頭一日tio̍h有聖會；lóng m̄-thang做甚麼苦工。Thâu-chi̍t-ji̍t tio̍h ū sèng-hōe; lóng m̄-thang chòe sím-mi̍h khó͘-kang.

8七日久tio̍h獻火祭hō͘耶和華；第七日是聖會，lóng m̄-thang做甚麼苦工。Chhit-ji̍t kú tio̍h hiàn hé-chè hō͘ Iâ-hô-hoa; tē-chhit ji̍t sī sèng-hōe, lóng m̄-thang chòe sím-mi̍h khó͘-kang.

9耶和華吩咐摩西講：Iâ-hô-hoa hoan-hù Mô͘-se kóng,

10你tio̍h吩咐以色列人kā in講：Lín到我賞賜lín ê地，收割五穀ê時，tio̍h將起頭熟ê五穀一綑，帶來hō͘祭司。Lí tio̍h hoan-hù Í-sek-lia̍t lâng kā in kóng, Lín kàu Góa siúⁿ-sù lín ê tōe, siu-koah ngó͘-kok ê sî, tio̍h chiong khí-thâu-se̍k ê ngó͘-kok chi̍t-khún, tòa-lâi hō͘ chè-si.

11伊tio̍h用chit綑搖tī耶和華ê面前，hō͘ lín得tio̍h接納；祭司tio̍h tī安歇日ê隔日搖伊。I tio̍h ēng chit-khún iô tī Iâ-hô-hoa ê bīn-chêng, hō͘ lín tit-tio̍h chiap-la̍p; chè-si tio̍h tī an-hioh-ji̍t ê keh-ji̍t iô i.

12搖chit綑ê日，lín tio̍h將一隻未滿年無瑕疵ê綿羊káng-á，獻hō͘耶和華做燒祭。Iô chit-khún ê ji̍t, lín tio̍h chiong chi̍t chiah bē-móa-nî bô hâ-chhû ê mî-iûⁿ-káng-á, hiàn hō͘ Iâ-hô-hoa chòe sio-chè.

13相續獻ê素祭，就是調和油ê幼麵粉i-hoat十份ê兩份，做芳芳ê火祭獻hō͘耶和華；相續獻ê灌奠，tio̍h用酒一him ê四份一。Saⁿ-sòa hiàn ê sò͘-chè, chiū-sī tiau-hô iû ê iù-mī-hún i-hoat cha̍p-hūn ê nn̄g-hūn, chòe phang-phang ê hé-chè hiàn-hō͘ Iâ-hô-hoa; saⁿ-sòa hiàn ê koàn-tiān, tio̍h ēng chiú chi̍t-him ê sì-hūn chi̍t.

14無論是餅，á是焙(pē)ê五穀，á是新ê sūi，lín lóng m̄-thang食，到lín帶禮物獻hō͘ lín ê上帝hit日chiah thang；這tī lín一切khiā起ê所在，做lín代代永遠ê例。Bô-lūn sī piáⁿ, á-sī pē ê ngó͘-kok, á-sī sin ê sūi, lín lóng m̄-thang chia̍h, kàu lín tòa lé-mi̍h hiàn-hō͘ lín ê Siōng-tè hit-ji̍t chiah thang; che tī lín it-chhè khiā-khí ê só͘-chāi, chòe lín tāi-tāi éng-oán ê lē.

15Lín tio̍h tùi安歇日ê隔日，獻tiū-khún做搖祭；hit日為家己算-khit，滿七個安歇日，Lín tio̍h tùi an-hioh-ji̍t ê keh-ji̍t, hiàn tiū-khún chòe iô-chè; hit-ji̍t ūi ka-kī sǹg-khí, móa chhit ê an-hioh-ji̍t,

16到第七個安歇日ê隔日，lín tio̍h算五十日，koh tio̍h將sin ê素祭獻hō͘耶和華。kàu tē-chhit ê an-hioh-ji̍t ê keh-ji̍t, lín tio̍h sǹg gō͘-cha̍p-ji̍t, koh tio̍h chiong sin ê sò͘-chè hiàn-hō͘ Iâ-hô-hoa.

17Tio̍h tùi lín khiā起ê所在the̍h出幼ê麵粉i-hoat十份兩，chham酵，pek兩塊搖祭ê餅，做起頭熟ê物，獻hō͘耶和華。Tio̍h tùi lín khiā-khí ê só͘-chāi the̍h-chhut iù ê mī-hún i-hoat cha̍p-hūn-nn̄g, chham kàⁿ, pek nn̄g tè iô-chè ê piáⁿ, chòe khí-thâu-se̍k ê mi̍h, hiàn hō͘ Iâ-hô-hoa.

18Koh tio̍h用未滿年無瑕疵ê羊á七隻，牛káng-á一隻，綿羊káng兩隻，kap hiah-ê餅相kap獻in做燒祭hō͘耶和華，kap in ê素祭，in ê灌奠，做芳芳ê火祭，獻hō͘耶和華。Koh tio̍h ēng bē-móa-nî bô hâ-chhû ê iûⁿ-á chhit-chiah, gû-káng-á chi̍t-chiah, mî-iûⁿ-káng nn̄g-chiah, kap hiah ê piáⁿ saⁿ-kap hiàn in chòe sio-chè hō͘ Iâ-hô-hoa, kap in ê sò͘-chè, in ê koàn-tiān, chòe phang-phang ê hé-chè, hiàn hō͘ Iâ-hô-hoa.

19Lín tio̍h獻一隻山羊káng做贖罪祭，兩隻未滿年ê綿羊á做謝恩祭。Lín tio̍h hiàn chi̍t chiah soaⁿ-iûⁿ-káng chòe sio̍k-chōe-chè, nn̄g chiah bē-móa-nî ê mî-iûⁿ-á chòe siā-un-chè.

20祭司tio̍h搖in，kap起頭熟ê麥ê餅，做搖祭tī耶和華ê面前，kap hit兩隻羊á；tio̍h分別in做聖，獻hō͘耶和華，來歸hō͘祭司。Chè-si tio̍h iô in, kap khí-thâu-se̍k ê be̍h ê piáⁿ, chòe iô-chè tī Iâ-hô-hoa ê bīn-chêng, kap hí nn̄g chiah iûⁿ-á; tio̍h hun-piat in chòe sèng, hiàn hō͘ Iâ-hô-hoa, lâi kui hō͘ chè-si.

21siâng hit日lín tio̍h宣布做lín ê聖會；lóng m̄-thang做甚麼苦工；這tī lín一切khiā起ê所在，做ta̍k世代永遠ê例。Siâng hit-ji̍t lín tio̍h soan-pò͘ chòe lín ê sèng-hōe; lóng m̄-thang chòe sím-mi̍h khó͘-kang; che tī lín it-chhè khiā-khí ê só͘-chāi, chòe ta̍k sè-tāi éng-oán ê lē.

22Lín收割田ê五穀，田ê角頭m̄-thang割到盡，ka-la̍uh-ê也m̄-thang拾；tio̍h留hō͘ sòng-hiong人kap出外ê拾；我是耶和華。Lín siu-koah chhân ê ngó͘-kok, chhân ê kak-thâu m̄-thang koah kàu chīn, ka-la̍uh-ê iā m̄-thang khioh; tio̍h lâu hō͘ sòng-hiong lâng kap chhut-gōa-ê khioh; Góa sī Iâ-hô-hoa.

23耶和華吩咐摩西講：Iâ-hô-hoa hoan-hù Mô͘-se kóng,

24你tio̍h吩咐以色列人講：七月初一，lín tio̍h守做聖ê安歇日，tio̍h pûn號頭做記念；tio̍h做聖會。Lí tio̍h hoan-hù Í-sek-lia̍t lâng kóng, Chhit-ge̍h chhoe-it, lín tio̍h siú chòe sèng ê an-hioh-ji̍t, tio̍h pûn hō-thâu chòe kì-liām; tio̍h chòe sèng-hōe.

25Lóng m̄-thang做甚麼苦工；tio̍h將火祭獻hō͘耶和華。Lóng m̄-thang chòe sím-mi̍h khó͘-kang; tio̍h chiong hé-chè hiàn hō͘ Iâ-hô-hoa.

26耶和華吩咐摩西講：Iâ-hô-hoa hoan-hù Mô͘-se kóng,

27七月初十日是贖罪ê日；lín tio̍h守做聖會；koh tio̍h刻苦家己ê心；也tio̍h將火祭獻hō͘耶和華。Chhit-ge̍h chhoe-cha̍p ji̍t sī sio̍k-chōe ê ji̍t; lín tio̍h siú chòe sèng-hōe; koh tio̍h khek-khó͘ ka-kī ê sim; iā tio̍h chiong hé-chè hiàn hō͘ Iâ-hô-hoa.

28siâng chit日lóng m̄-thang做甚麼工，因為是贖罪ê日；tī耶和華lín ê上帝ê面前kā lín贖罪。Siâng chit-ji̍t lóng m̄-thang chòe sím-mi̍h kang, in-ūi sī sio̍k-chōe ê ji̍t; tī Iâ-hô-hoa lín ê Siōng-tè ê bīn-chêng kā lín sio̍k-chōe.

29siâng chit日，見若無刻苦伊ê心ê，beh tùi百姓中受剪除。Siâng chit-ji̍t, kìⁿ-nā bô khek-khó͘ i ê sim ê, beh tùi peh-sìⁿ-tiong siū chián-tû.

30見若tī chit日做甚麼工ê，我beh tùi百姓中除滅伊。Kìⁿ-nā tī chit-ji̍t chòe sím-mi̍h kang ê, Góa beh tùi peh-sìⁿ-tiong tû-bia̍t i.

31Lín lóng m̄-thang做甚麼工；這tī lín一切khiā起ê所在，做lín ta̍k世代永遠ê例。Lín lóng m̄-thang chòe sím-mi̍h kang; che tī lín it-chhè khiā-khí ê só͘-chāi, chòe lín ta̍k sè-tāi éng-oán ê lē.

32Lín tio̍h守chit日做大ê安歇日；tī chit月ê初九日ê-hng，tùi hit-ê-hng到隔ê-hng，tio̍h守lín ê安歇日。Lín tio̍h siú chit-ji̍t chòe tōa ê an-hioh-ji̍t; tī chit-ge̍h ê chhoe-káu ji̍t ê-hng, tùi hit ê-hng kàu keh ê-hng, tio̍h siú lín ê an-hioh-ji̍t.

33耶和華吩咐摩西講：Iâ-hô-hoa hoan-hù Mô͘-se kóng,

34你tio̍h kā以色列人講：chit-ê七月十五日是搭寮á節，七日久kā耶和華守伊。Lí tio̍h kā Í-sek-lia̍t lâng kóng, Chit ê chhit-ge̍h cha̍p-gō͘ ji̍t sī tah-liâu-á choeh, chhit-ji̍t kú kā Iâ-hô-hoa siú i.

35頭一日tio̍h有聖會，m̄-thang做甚麼苦工。Thâu-chi̍t-ji̍t tio̍h ū sèng-hōe, m̄-thang chòe sím-mi̍h khó͘-kang.

36Lín七日久tio̍h將火祭獻hō͘耶和華；第八日tio̍h守聖會，tio̍h將火祭獻hō͘耶和華；這是嚴肅會，lóng m̄-thang做甚麼苦工。Lín chhit-ji̍t kú tio̍h chiong hé-chè hiàn-hō͘ Iâ-hô-hoa; tē-poeh ji̍t tio̍h siú sèng-hōe, tio̍h chiong hé-chè hiàn hō͘ Iâ-hô-hoa; che sī giâm-siok-hōe, lóng m̄-thang chòe sím-mi̍h khó͘-kang.

37這是耶和華chiah-ê節；lín tio̍h宣布做聖會ê，tio̍h將火祭、燒祭、素祭，祭物，kap灌奠獻hō͘耶和華，koh照伊ê日期。Che sī Iâ-hô-hoa chiah ê choeh; lín tio̍h soan-pò͘ chòe sèng-hōe ê, tio̍h chiong hé-chè, sio-chè, sò͘-chè, chè-mi̍h, kap koàn-tiān hiàn-hō͘ Iâ-hô-hoa, koh chiàu i ê ji̍t-kî.

38這是tī耶和華見安歇日以外，koh tī lín ê禮物以外，kap lín所下ê願以外，kap甘心獻ê以外，就是lín所獻hō͘耶和華ê。Che sī tī Iâ-hô-hoa kìⁿ an-hioh-ji̍t í-gōa, koh tī lín ê lé-mi̍h í-gōa, kap lín só͘ hē ê goān í-gōa, kap kam-sim hiàn-ê í-gōa, chiū-sī lín só͘ hiàn hō͘ Iâ-hô-hoa ê.

39Koh tī七月十五日，lín已經收土產ê時，tio̍h守耶和華ê節七日久；頭一日做聖ê安歇，第八日也做聖ê安歇。Koh tī chhit-ge̍h cha̍p-gō͘ ji̍t, lín í-keng siu thó͘-sán ê sî, tio̍h siú Iâ-hô-hoa ê choeh chhit-ji̍t kú; thâu-chi̍t ji̍t chòe sèng ê an-hioh, tē-poeh ji̍t iā chòe sèng ê an-hioh.

40頭一日tio̍h挽好樹ê果子，kap棗樹ê枝，kap ām樹ê椏(oāiⁿ)，kap河邊ê柳，tī耶和華lín上帝ê面前歡喜七日久。Thâu-chi̍t-ji̍t tio̍h bán hó-chhiū ê ké-chí, kap chó-chhiū ê ki, kap ām-chhiū ê oāiⁿ, kap hô-piⁿ ê liú, tī Iâ-hô-hoa lín Siōng-tè ê bīn-chêng hoaⁿ-hí chhit-ji̍t kú.

41ta̍k年七月間，lín tio̍h七日久kā耶和華守chit-ê節；這是lín ta̍k世代永遠ê例。Ta̍k-nî chhit-ge̍h-kan, lín tio̍h chhit-ji̍t kú kā Iâ-hô-hoa siú chit ê choeh; che sī lín ta̍k sè-tāi éng-oán ê lē.

42Lín tio̍h tiàm tī草寮á內七日久；見若以色列本地人lóng tio̍h tiàm tī草寮á內。Lín tio̍h tiàm tī chháu-liâu-á-lāi chhit-ji̍t kú; kìⁿ-nā Í-sek-lia̍t pún-tōe lâng lóng tio̍h tiàm tī chháu-liâu-á-lāi.

43Thang hō͘ lín ta̍k代知我chhōa以色列人出埃及地 ê時，我hō͘ in tiàm tī草寮á內；我是耶和華lín ê上帝。Thang hō͘ lín ta̍k-tāi chai Góa chhōa Í-sek-lia̍t lâng chhut Ai-ki̍p tōe ê sî, Góa hō͘ in tiàm tī chháu-liâu-á-lāi; Góa sī Iâ-hô-hoa lín ê Siōng-tè.

44摩西就將耶和華ê節期傳hō͘以色列人。Mô͘-se chiū chiong Iâ-hô-hoa ê choeh-kî thoân hō͘ Í-sek-lia̍t lâng.

1耶和華吩咐摩西講：Iâ-hô-hoa hoan-hù Mô͘-se kóng,

2Tio̍h命令以色列人，用橄欖khoeh成清ê油，the̍h來hō͘你，thang點燈hō͘伊常常光。Tio̍h bēng-lēng Í-sek-lia̍t lâng, ēng kaⁿ-ná khoeh-chiâⁿ chheng ê iû, the̍h lâi hō͘ lí, thang tiám-teng hō͘ i siông-siông kng.

3Tī會幕內法櫃ê帳籬外，亞倫tio̍h料理伊，tùi ê-hng到早起，常常tī耶和華ê面前；這是做lín代代永遠ê例。Tī hōe-bō͘-lāi hoat-kūi ê tiùⁿ-lî-gōa, A-lûn tio̍h liāu-lí i, tùi ê-hng kàu chá-khí, siông-siông tī Iâ-hô-hoa ê bīn-chêng; che sī chòe lín tāi-tāi éng-oán ê lē.

4伊tio̍h tī耶和華ê面前，常常料理chiah-ê燈tī清氣ê燈台頂。I tio̍h tī Iâ-hô-hoa ê bīn-chêng, siông-siông liāu-lí chiah ê teng tī chheng-khì ê teng-tâi-téng.

5你tio̍h the̍h幼ê麵粉，pek十二塊餅，每塊用i-hoat十份二。Lí tio̍h the̍h iù ê mī-hún, pek cha̍p-jī tè piáⁿ, múi-tè ēng i-hoat cha̍p-hūn-nn̄g.

6Tio̍h將餅排做兩chōa，每chōa六塊tī耶和華ê面前聖潔ê桌頂。Tio̍h chiong piáⁿ pâi chòe nn̄g-chōa, múi-chōa la̍k-tè tī Iâ-hô-hoa ê bīn-chêng sèng-kiat ê toh-téng.

7Koh tio̍h用清氣ê乳香hē tī六chōa，kā餅做記號，就是做火祭獻hō͘耶和華。Koh tio̍h ēng chheng-khì ê jú-hiuⁿ hē tī ta̍k-chōa, kā piáⁿ chòe kì-hō, chiū-sī chòe hé-chè hiàn hō͘ Iâ-hô-hoa.

8Ta̍k-ê安歇日，伊tio̍h常常排tī耶和華ê面前；這是為tio̍h以色列人做永遠ê約。Ta̍k ê an-hioh-ji̍t, i tio̍h siông-siông pâi tī Iâ-hô-hoa ê bīn-chêng; che sī ūi-tio̍h Í-sek-lia̍t lâng chòe éng-oán ê iok.

9chiah-ê餅tio̍h歸hō͘亞倫kap伊ê kiáⁿ孫，in tio̍h tī聖ê所在食伊；因為tī耶和華ê火祭中，chit-ê是至聖歸tī伊，做永遠ê例。Chiah ê piáⁿ tio̍h kui hō͘ A-lûn kap i ê kiáⁿ-sun, in tio̍h tī sèng ê só͘-chāi chia̍h i; in-ūi tī Iâ-hô-hoa ê hé-chè tiong, chit-ê sī chì-sèng kui tī i, chòe éng-oán ê lē.

10有一人伊ê老母是以色列人；伊ê老父是埃及人，出來行tī以色列人ê中間；chit-ê以色列婦人人ê kiáⁿ，kap一個以色列人tī營盤內冤家。Ū chi̍t-lâng i ê lāu-bú sī Í-sek-lia̍t lâng; i ê lāu-pē sī Ai-ki̍p lâng, chhut-lâi kiâⁿ tī Í-sek-lia̍t lâng ê tiong-kan; chit ê Í-sek-lia̍t hū-jîn-lâng ê kiáⁿ, kap chi̍t ê Í-sek-lia̍t lâng tī iâⁿ-pôaⁿ-lāi oan-ke.

11Chit-ê以色列婦人人ê kiáⁿ褻瀆聖名，koh咒詛；就有人將伊帶到摩西hia；伊ê老母名叫Sī-lô-bi̍t，是Tàn ê支派，Tí-pek-lī ê cha-bó͘-kiáⁿ。Chit ê Í-sek-lia̍t hū-jîn-lâng ê kiáⁿ siat-to̍k sèng miâ, koh chiù-chó͘; chiū ū lâng chiong i tòa kàu Mô͘-se hia; i ê lāu-bú miâ kiò Sī-lô-bi̍t, sī Tàn ê chi-phài, Tí-pek-lī ê cha-bó͘-kiáⁿ.

12In關伊tī拘留所，beh thèng候耶和華指示。In koaiⁿ i tī khu-liû-só͘, beh thèng-hāu Iâ-hô-hoa chí-sī.

13耶和華吩咐摩西講：Iâ-hô-hoa hoan-hù Mô͘-se kóng,

14Tio̍h將hit-ê咒詛ê人帶到營外，hō͘聽見ê人按手tī伊ê頭殼頂；全會眾人tio̍h用石頭tìm死伊。Tio̍h chiong hit ê chiù-chó͘ ê lâng tòa kàu iâⁿ-gōa, hō͘ thiaⁿ-kìⁿ ê lâng hōaⁿ-chhiú tī i ê thâu-khak-téng; choân-hōe chèng-lâng tio̍h ēng chio̍h-thâu tìm-sí i.

15你tio̍h吩咐以色列人講：見若咒詛伊ê上帝ê，tio̍h擔當伊ê罪。Lí tio̍h hoan-hù Í-sek-lia̍t lâng kóng, Kìⁿ-nā chiù-chó͘ i ê Siōng-tè ê, tio̍h tam-tng i ê chōe.

16人褻瀆耶和華ê名，tio̍h hō͘伊死；全會ê眾人tio̍h用石頭tìm死伊；不管是出外人，á是本地人，伊褻瀆耶和華ê名ê時，tio̍h hō͘伊死。Lâng siat-to̍k Iâ-hô-hoa ê miâ, tio̍h hō͘ i sí; choân-hōe ê chèng-lâng tio̍h ēng chio̍h-thâu tìm-sí i; put-koán sī chhut-gōa lâng, á-sī pún-tōe lâng, i siat-to̍k Iâ-hô-hoa ê miâ ê sî, tio̍h hō͘ i sí.

17見若phah死人ê，的確tio̍h hō͘伊死。Kìⁿ-nā phah-sí lâng ê, tek-khak tio̍h hō͘ i sí.

18Phah死cheng-siⁿ ê，tio̍h賠伊，用命賠命。Phah-sí cheng-siⁿ ê, tio̍h pê i, ēng miā pê miā.

19人若hō͘伊ê厝邊受損傷，伊án-ni行，也tio̍h án-ni款待伊。Lâng nā hō͘ i ê chhù-piⁿ siū sún-siong, i án-ni kiâⁿ, iā tio̍h án-ni khoán-thāi i.

20用傷賠傷，用目睭賠目睭，用嘴齒賠嘴齒，伊損傷人怎樣，也tio̍h án-ni辦伊。Ēng siong pê siong, ēng ba̍k-chiu pê ba̍k-chiu, ēng chhùi-khí pê chhùi-khí, i sún-siong lâng cháiⁿ-iūⁿ, iā tio̍h án-ni pān i.

21Phah死cheng-siⁿ ê，tio̍h賠伊；phah死人ê，的確tio̍h hō͘伊死。Phah-sí cheng-siⁿ ê, tio̍h pê i; phah-sí lâng ê, tek-khak tio̍h hō͘ i sí.

22不管是出外人，á是本地人，同一樣ê法律；因為我耶和華是lín ê上帝。Put-koán sī chhut-gōa lâng, á-sī pún-tōe lâng, tâng chi̍t-iūⁿ ê hoat-lu̍t; in-ūi Góa Iâ-hô-hoa sī lín ê Siōng-tè.

23摩西就kā以色列人講：in就將hit-ê咒詛ê人帶到營外，用石頭tìm死；以色列人就照耶和華所命令摩西ê來行。Mô͘-se chiū kā Í-sek-lia̍t lâng kóng, in chiū chiong hit ê chiù-chó͘ ê lâng tòa kàu iâⁿ-gōa, ēng chio̍h-thâu tìm-sí; Í-sek-lia̍t lâng chiū chiàu Iâ-hô-hoa só͘ bēng-lēng Mô͘-se ê lâi kiâⁿ.

1耶和華tī西奈山吩咐摩西講：Iâ-hô-hoa tī Se-nái soaⁿ hoan-hù Mô͘-se kóng,

2你tio̍h吩咐以色列人kā in講：Lín到我賞賜lín hit-ê地ê時；地就tio̍h kā耶和華守安歇。Lí tio̍h hoan-hù Í-sek-lia̍t lâng kā in kóng, Lín kàu Góa siúⁿ-sù lín hit ê tōe ê sî; tōe chiū tio̍h kā Iâ-hô-hoa siú an-hioh.

3六年tio̍h種作你ê田園，六年久tio̍h芟割你ê葡萄園，收地ê出產。La̍k-nî tio̍h chèng-choh lí ê chhân-hn̂g, la̍k-nî kú tio̍h san-koah lí ê phû-tô-hn̂g, siu tōe ê chhut-sán.

4到第七年，地 tio̍h守大ê安歇，就是kā耶和華守ê安歇，m̄-thang種作你ê田園，也m̄-thang san葡萄園。Kàu tē-chhit nî tōe tio̍h siú tōa ê an-hioh, chiū-sī kā Iâ-hô-hoa siú ê an-hioh, m̄-thang chèng-choh lí ê chhân-hn̂g, iā m̄-thang san phû-tô-hn̂g.

5收成了家己發ê五穀，m̄-thang收割，無過芟割ê葡萄樹，也m̄-thang挽葡萄；chit年是地 ê安歇年。Siu-sêng liáu ka-kī hoat ê gō͘-kak, m̄-thang siu-koah, bô kè san-koah ê phû-tô-chhiū, iā m̄-thang bán phû-tô; chit-nî sī tōe ê an-hioh nî.

6地tī安歇年所出ê beh hō͘ lín做食物；伊ê出產lóng beh hō͘你kap你ê奴僕，你ê女婢，你ê倩工人，以及寄腳tī你hia ê外人，Tōe tī an-hioh nî só͘-chhut-ê beh hō͘ lín chòe chia̍h-mi̍h; i ê chhut-sán lóng beh hō͘ lí kap lí ê lô͘-po̍k, lí ê lú-pī, lí ê chhiàⁿ-kang-lâng, í-ki̍p kià-kha tī lí hia ê gōa-lâng,

7kap你ê cheng-siⁿ，以及tī你ê地ê走獸做食物。kap lí ê cheng-siⁿ, í-ki̍p tī lí ê tōe ê cháu-siù chòe chia̍h-mi̍h.

8你tio̍h為家己算安歇年七個，就是七pái ê七年；chit七pái ê安歇年，對tī你是四十九年。Lí tio̍h ūi ka-kī sǹg an-hioh-nî chhit-ê, chiū-sī chhit-pái ê chhit-nî; chit chhit-pái ê an-hioh-nî, tùi tī lí sī sì-cha̍p-káu nî.

9Hit年七月初十日，你tio̍h四界pûn大聲ê哨角；tī贖罪ê日tio̍h全地pûn哨角。Hit-nî chhit-ge̍h chhoe-cha̍p ji̍t, lí tio̍h sì-kòe pûn tōa-siaⁿ ê sàu-kak; tī sio̍k-chōe ê ji̍t tio̍h choân-tōe pûn sàu-kak.

10Lín tio̍h用第五十年做聖，tī遍地kā一切khiā起ê百姓宣布自由；chit年beh做lín ê禧年；lín ta̍k人tio̍h歸家己ê產業，ta̍k人tio̍h tò去伊ê本家。Lín tio̍h ēng tē gō͘-cha̍p nî chòe-sèng, tī piàn-tōe kā it-chhè khiā-khí ê peh-sìⁿ soan-pò͘ chū-iû; chit-nî beh chòe lín ê hi-liân; lín ta̍k lâng tio̍h kui ka-kī ê sán-gia̍p, ta̍k-lâng tio̍h tò-khì i ê pún-ke.

11第五十年beh做lín ê禧年，m̄-thang種作；地家己發ê，m̄-thang收割；無芟ê葡萄樹也m̄-thang挽伊。Tē gō͘-cha̍p nî beh chòe lín ê hi-liân, m̄-thang chèng-choh; tōe ka-kī hoat ê, m̄-thang siu-koah; bô-san ê phû-tô-chhiū iā m̄-thang bán i.

12因為這是禧年，lín tio̍h掠伊做聖；lín thang食地裡家己出ê土產。In-ūi che sī hi-liân, lín tio̍h lia̍h i chòe-sèng; lín thang chia̍h tōe-ni̍h ka-kī chhut ê thó͘-sán.

13Chit-ê禧年，lín ta̍k人tio̍h tò去家己ê產業。Chit ê hi-liân, lín ta̍k-lâng tio̍h tò-khì ka-kī ê sán-gia̍p.

14Lín賣物hō͘厝邊，á是tùi厝邊買物，lín m̄-thang相刻虧。Lín bōe mi̍h hō͘ chhù-piⁿ, á-sī tùi chhù-piⁿ bóe mi̍h, lín m̄-thang saⁿ khek-khui.

15你tio̍h照禧年後ê年限，tùi厝邊買，伊也tio̍h照收成ê年限賣 hō͘ lín。Lí tio̍h chiàu hi-liân-āu ê nî-hān, tùi chhù-piⁿ bóe, i iā tio̍h chiàu siu-sêng ê nî-hān bōe hō͘ lín.

16照年限ê chōe，你tio̍h加添伊ê價錢，照年限ê少，你tio̍h減少伊ê價錢；因為伊照收成ê數額來賣hō͘ lín。Chiàu nî-hān ê chōe, lí tio̍h ke-thiⁿ i ê kè-chîⁿ, chiàu nî-hān ê chió, lí tio̍h kiám-chió i ê kè-chîⁿ; in-ūi i chiàu siu-sêng ê siàu-gia̍h lâi bōe hō͘ lín.

17Lín也m̄-thang相刻虧，獨獨tio̍h敬畏lín ê上帝；因為我是耶和華lín ê上帝。Lín iā m̄-thang saⁿ khek-khui, to̍k-to̍k tio̍h kèng-ùi lín ê Siōng-tè; in-ūi Góa sī Iâ-hô-hoa lín ê Siōng-tè.

18所以lín tio̍h行我ê律例，守我ê法度來行伊；就thang tī hit-ê地安然khiā起。Só͘-í lín tio̍h kiâⁿ Góa ê lu̍t-lē, siú Góa ê hoat-tō͘ lâi kiâⁿ i; chiū thang tī hit ê tōe an-jiân khiā-khí.

19地也beh出伊ê土產，lín就beh食飽，tī hit-ê地安然khiā起。Tōe iā beh chhut i ê thó͘-sán, lín chiū beh chia̍h-pá, tī hit ê tōe an-jiân khiā-khí.

20Lín若講，看ah，chit-ê第七年阮無種作，也無收成土產，beh食甚麼ah?Lín nā kóng, Khòaⁿ ah, chit ê tē-chhit nî goán bô chèng-choh, iā bô siu-sêng thó͘-sán, beh chia̍h sím-mi̍h ah?

21我beh tī第六年命令我ê福氣hō͘ lín，地就生三年ê土產。Góa beh tī tē la̍k-nî bēng-lēng Góa ê hok-khì hō͘ lín, tōe chiū siⁿ saⁿ-nî ê thó͘-sán.

22第八年lín tio̍h種作，也tio̍h食地ê出產，就是舊ê米糧；thèng候到第九年，hit年ê出產收來ê時，lín iáu-kú teh食舊ê米糧。Tē-poeh nî lín tio̍h chèng-choh, iā tio̍h chia̍h tōe ê chhut-sán, chiū-sī kū ê bí-niû; thèng-hāu kàu tē-káu nî, hit-nî ê chhut-sán siu-lâi ê sî, lín iáu-kú teh chia̍h kū ê bí-niû.

23地m̄-thang永遠賣斷，因為地是我ê；lín tī我ê面前是出外人，是寄腳ê。Tōe m̄-thang éng-oán bōe-tn̄g, in-ūi tōe sī Góa ê; lín tī Góa ê bīn-chêng sī chhut-gōa lâng, sī kià-kha-ê.

24Lín所得tio̍h做業ê全地，tio̍h准人贖回。Lín só͘ tit-tio̍h chòe-gia̍p ê choân-tōe, tio̍h chún lâng sio̍k-hôe.

25你ê兄弟若變做sòng-hiong，賣伊ê業kúi-nā份，伊ê至親tio̍h來，贖回伊ê兄弟所賣ê。Lí ê hiaⁿ-tī nā pìⁿ-chòe sòng-hiong, bōe i ê gia̍p kúi-nā hūn, i ê chì-chhin tio̍h lâi, sio̍k-hôe i ê hiaⁿ-tī só͘ bōe ê.

26若無人thang kā伊贖回，伊本身koh成做好額，夠額能贖回，Nā bô lâng thang kā i sio̍k-hôe, i pún-sin koh chiâⁿ chòe hó-gia̍h, kàu gia̍h ōe sio̍k-hôe,

27伊就tio̍h算賣出地 ê年限，將所chhun-ê 還hit-ê買主，本身就thang復到伊ê產業。i chiū tio̍h sǹg bōe-chhut tōe ê nî-hān, chiong só͘-chhun-ê hêng hit ê bóe-chú, pún-sin chiū thang ho̍k-tò i ê sán-gia̍p.

28Hit-ê人若bōe-ōe為家己贖回，就所賣ê猶原存tī買主ê手，直到禧年；禧年已經到，產業tio̍h交出；hit人就復到伊ê業。Hit ê lâng nā bōe-ōe ūi ka-kī sio̍k-hôe, chiū só͘-bōe ê iû-goân chûn tī bóe-chú ê chhiú, ti̍t-kàu hi-liân; hi-liân í-keng kàu, sán-gia̍p tio̍h kau-chhut; hit-lâng chiū ho̍k-tò i ê gia̍p.

29人若賣城內ê厝，賣了後一年thang贖回；一年ka-nn̂g也有贖回ê權。Lâng nā bōe siâⁿ-lāi ê chhù, bōe liáu-āu chi̍t-nî thang sio̍k-hôe; chi̍t-nî ka-nn̂g iā ū sio̍k-hôe ê koân.

30若一年已經滿無贖回chit-ê城內ê厝，就定tio̍h永遠歸買主到ta̍k代；tī禧年也bōe得交出。Nā chi̍t-nî í-keng móa bô sio̍k-hôe chit ê siâⁿ-lāi ê chhù, chiū tiāⁿ-tio̍h éng-oán kui bóe-chú kàu ta̍k-tāi; tī hi-liân iā bōe-tit kau-chhut.

31獨獨厝tī無城牆ê鄉庄，tio̍h看伊親像鄉下ê田一樣，thang贖回；到禧年，lóng tio̍h交出。To̍k-to̍k chhù tī bô siâⁿ-chhiûⁿ ê hiuⁿ-chng, tio̍h khòaⁿ i chhin-chhiūⁿ hiuⁿ-ē ê chhân chi̍t-iūⁿ, thang sio̍k-hôe; kàu hi-liân, lóng tio̍h kau-chhut.

32總是利未人ê城，就是in所得tio̍h做業ê城hit中間ê厝，利未人thang不管時來贖回。Chóng-sī Lī-bī lâng ê siâⁿ, chiū-sī in só͘ tit-tio̍h chòe-gia̍p ê siâⁿ hit tiong-kan ê chhù, Lī-bī lâng thang put-koán-sî lâi sio̍k-hôe.

33若有人追利未人贖回厝宅，所賣ê厝tī所得tio̍h做業ê城，到禧年就tio̍h交出；因為利未人城內ê厝，是in tī以色列人中ê產業。Nā ū lâng tui Lī-bī lâng sio̍k-hôe chhù-the̍h, só͘ bōe ê chhù tī só͘ tit-tio̍h chòe-gia̍p ê siâⁿ, kàu hi-liân chiū tio̍h kau-chhut; in-ūi Lī-bī lâng siâⁿ-lāi ê chhù, sī in tī Í-sek-lia̍t lâng tiong ê sán-gia̍p.

34總是in ê城外郊野ê地，m̄-thang賣，因為是in永遠ê產業。Chóng-sī in ê siâⁿ-gōa kau-iá ê tōe, m̄-thang bōe, in-ūi sī in éng-oán ê sán-gia̍p.

35你ê兄弟變做sòng-hiong衰退tī你hia，你tio̍h補助伊，hō͘伊kap你相kap tòa，親像外人kap寄腳ê一樣。Lí ê hiaⁿ-tī pìⁿ-chòe sòng-hiong soe-thè tī lí hia, lí tio̍h pó͘-chō͘ i, hō͘ i kap lí saⁿ-kap tòa, chhin-chhiūⁿ gōa-lâng kap kià-kha-ê chi̍t-iūⁿ.

36M̄-thang the̍h伊ê利息，也m̄-thang the̍h伊khah加；獨獨tio̍h敬畏你ê上帝，hō͘你ê兄弟kap你tòa。M̄-thang the̍h i ê lī-sek, iā m̄-thang the̍h i khah-ke; to̍k-to̍k tio̍h kèng-ùi lí ê Siōng-tè, hō͘ lí ê hiaⁿ-tī kap lí tòa.

37你借伊錢m̄-thang kā伊the̍h利息，你借伊米糧也m̄-thang kā伊the̍h khah加。Lí chioh i chîⁿ m̄-thang kā i the̍h lī-sek, lí chioh i bí-niû iā m̄-thang kā i the̍h khah-ke.

38我是耶和華lín ê上帝，bat chhōa lín出埃及地，為tio̍h beh賞賜lín迦南地，也beh做lín ê上帝。Góa sī Iâ-hô-hoa lín ê Siōng-tè, bat chhōa lín chhut Ai-ki̍p tōe, ūi-tio̍h beh siúⁿ-sù lín Ka-lâm tōe, iā beh chòe lín ê Siōng-tè.

39你ê兄弟若變sòng-hiong tī你hia，將本身賣hō͘你，m̄-thang hō͘伊親像奴僕服事你。Lí ê hiaⁿ-tī nā pìⁿ sòng-hiong tī lí hia, chiong pún-sin bōe hō͘ lí, m̄-thang hō͘ i chhin-chhiūⁿ lô͘-po̍k ho̍k-sāi lí.

40伊tio̍h tī你hia親像做工人，kap寄腳ê一樣；tio̍h服事你直到禧年。I tio̍h tī lí hia chhin-chhiūⁿ chòe-kang lâng, kap kià-kha-ê chi̍t-iūⁿ; tio̍h ho̍k-sāi lí ti̍t kàu hi-liân.

41Hit時伊beh離開你出去，kap伊ê kiáⁿ兒相kap tò去伊ê本家，復到伊祖公ê業。Hit-sî i beh lī-khui lí chhut-khì, kap i ê kiáⁿ-jî saⁿ-kap tò-khì i ê pún-ke, ho̍k-tò i chó͘-kong ê gia̍p.

42因為in是我ê奴僕，是我所chhōa出埃及地 ê；m̄-thang 賣做奴僕。In-ūi in sī Góa ê lô͘-po̍k, sī Góa só͘ chhōa-chhut Ai-ki̍p tōe ê; m̄-thang bōe chòe lô͘-po̍k.

43M̄-thang嚴嚴管轄伊，獨獨tio̍h敬畏你ê上帝。M̄-thang giâm-giâm koán-hat i, to̍k-to̍k tio̍h kèng-ùi lí ê Siōng-tè.

44論到你所beh有ê奴僕女婢，thang tùi四圍ê國中買來做奴僕女婢。Lūn-kàu lí só͘ beh ū ê lô͘-po̍k lú-pī, thang tùi sì-ûi ê kok tiong bóe lâi chòe lô͘-po̍k lú-pī.

45Koh hiah-ê寄腳tī lín中間ê外人ê kiáⁿ兒，以及in kap lín tiàm hiah-ê家眷，tī lín ê地方所生ê，lín也thang tùi in中間買人；in beh做lín ê家業。Koh hiah ê kià-kha tī lín tiong-kan ê gōa-lâng ê kiáⁿ-jî, í-ki̍p in kap lín tiàm hiah ê ke-koàn, tī lín ê tōe-hng só͘-siⁿ-ê, lín iā thang tùi in tiong-kan bóe lâng; in beh chòe lín ê ke-gia̍p.

46Lín beh取in做業，留hō͘ kiáⁿ孫做家業；lín beh永遠tùi in中間取伊做奴僕；獨獨lín ê兄弟以色列人，lín m̄-thang嚴嚴相管轄。Lín beh chhú in chòe-gia̍p, lâu hō͘ kiáⁿ-sun chòe ke-gia̍p; lín beh éng-oán tùi in tiong-kan chhú i chòe lô͘-po̍k; to̍k-to̍k lín ê hiaⁿ-tī Í-sek-lia̍t lâng, lín m̄-thang giâm-giâm saⁿ koán-hat.

47Tiàm tī lín hia ê外人，á是寄腳ê，若變做好額，你ê兄弟tī in hia變做sòng-hiong，將家己賣hō͘ lín中間ê外人，á是寄腳ê，á是外人ê家族。Tiàm tī lín hia ê gōa-lâng, á-sī kià-kha-ê, nā pìⁿ-chòe hó-gia̍h, lí ê hiaⁿ-tī tī in hia pìⁿ-chòe sòng-hiong, chiong ka-kī bōe hō͘ lín tiong-kan ê gōa-lâng, á-sī kià-kha-ê, á-sī gōa-lâng ê ke-cho̍k.

48賣了後thang贖回伊，伊ê兄弟ê一個thang贖回伊；Bōe liáu-āu thang sio̍k-hôe i, i ê hiaⁿ-tī ê chi̍t-ê thang sio̍k-hôe i;

49伯叔，á是伯叔ê kiáⁿ thang贖回伊，á是本家ê親人，也thang屬伊；伊本身若成做好額也thang家己屬。peh-chek, á-sī peh-chek ê kiáⁿ thang sio̍k-hôe i, á-sī pún-ke ê chhin-lâng, iā thang sio̍k i; i pún-sin nā chiâⁿ-chòe hó-gia̍h iā thang ka-kī sio̍k.

50伊tio̍h kap買主算賬，tùi賣家己hit年起，算到禧年，所賣ê價錢照年限ê chōe少，tio̍h照做工人ê年限kap伊算。I tio̍h kap bóe-chú sǹg-siàu, tùi bōe ka-kī hit-nî khí, sǹg kàu hi-liân, só͘ bōe ê ké-chîⁿ chiàu nî-hān ê chōe-chió, tio̍h chiàu chòe-kang lâng ê nî-hān kap i sǹg.

51若所chhun ê年iáu-kú chōe，就tio̍h照hit-ê年限，tùi買伊ê價錢，伊tio̍h 還伊贖回ê價錢。Nā só͘ chhun ê nî iáu-kú chōe, chiū tio̍h chiàu hit ê nî-hān, tùi bóe-i ê kè-chîⁿ, i tio̍h hêng i sio̍k-hôe ê kè-chîⁿ.

52若到禧年chhun無幾年，tio̍h kap伊算；照hit-ê年限tio̍h還伊贖回價錢。Nā kàu hi-liân chhun bô kúi-nî, tio̍h kap i sǹg; chiàu hit ê nî-hān tio̍h hêng i sio̍k-hôe kè-chîⁿ.

53伊tio̍h kap伊tòa，親像年年雇倩ê做工人；買主m̄-thang嚴嚴管轄伊。I tio̍h kap i tòa, chhin-chhiūⁿ nî-nî kò͘-chhiàⁿ ê chòe-kang lâng; bóe-chú m̄-thang giâm-giâm koán-hat i.

54若無tī chiah-ê受屬，到禧年伊kap伊ê kiáⁿ兒lóng thang出去自由。Nā bô tī chiah-ê siū-sio̍k, kàu hi-liân i kap i ê kiáⁿ-jî lóng thang chhut-khì chū-iû.

55因為以色列人是我ê奴僕，是我chhōa出埃及地 ê；我是耶和華lín ê上帝。In-ūi Í-sek-lia̍t lâng sī Góa ê lô͘-po̍k, sī Góa chhōa-chhut Ai-ki̍p tōe ê; Góa sī Iâ-hô-hoa lín ê Siōng-tè.