1耶和華tī西奈山吩咐摩西講：Iâ-hô-hoa tī Se-nái soaⁿ hoan-hù Mô͘-se kóng,

2你tio̍h吩咐以色列人kā in講：Lín到我賞賜lín hit-ê地ê時；地就tio̍h kā耶和華守安歇。Lí tio̍h hoan-hù Í-sek-lia̍t lâng kā in kóng, Lín kàu Góa siúⁿ-sù lín hit ê tōe ê sî; tōe chiū tio̍h kā Iâ-hô-hoa siú an-hioh.

3六年tio̍h種作你ê田園，六年久tio̍h芟割你ê葡萄園，收地ê出產。La̍k-nî tio̍h chèng-choh lí ê chhân-hn̂g, la̍k-nî kú tio̍h san-koah lí ê phû-tô-hn̂g, siu tōe ê chhut-sán.

4到第七年，地 tio̍h守大ê安歇，就是kā耶和華守ê安歇，m̄-thang種作你ê田園，也m̄-thang san葡萄園。Kàu tē-chhit nî tōe tio̍h siú tōa ê an-hioh, chiū-sī kā Iâ-hô-hoa siú ê an-hioh, m̄-thang chèng-choh lí ê chhân-hn̂g, iā m̄-thang san phû-tô-hn̂g.

5收成了家己發ê五穀，m̄-thang收割，無過芟割ê葡萄樹，也m̄-thang挽葡萄；chit年是地 ê安歇年。Siu-sêng liáu ka-kī hoat ê gō͘-kak, m̄-thang siu-koah, bô kè san-koah ê phû-tô-chhiū, iā m̄-thang bán phû-tô; chit-nî sī tōe ê an-hioh nî.

6地tī安歇年所出ê beh hō͘ lín做食物；伊ê出產lóng beh hō͘你kap你ê奴僕，你ê女婢，你ê倩工人，以及寄腳tī你hia ê外人，Tōe tī an-hioh nî só͘-chhut-ê beh hō͘ lín chòe chia̍h-mi̍h; i ê chhut-sán lóng beh hō͘ lí kap lí ê lô͘-po̍k, lí ê lú-pī, lí ê chhiàⁿ-kang-lâng, í-ki̍p kià-kha tī lí hia ê gōa-lâng,

7kap你ê cheng-siⁿ，以及tī你ê地ê走獸做食物。kap lí ê cheng-siⁿ, í-ki̍p tī lí ê tōe ê cháu-siù chòe chia̍h-mi̍h.

8你tio̍h為家己算安歇年七個，就是七pái ê七年；chit七pái ê安歇年，對tī你是四十九年。Lí tio̍h ūi ka-kī sǹg an-hioh-nî chhit-ê, chiū-sī chhit-pái ê chhit-nî; chit chhit-pái ê an-hioh-nî, tùi tī lí sī sì-cha̍p-káu nî.

9Hit年七月初十日，你tio̍h四界pûn大聲ê哨角；tī贖罪ê日tio̍h全地pûn哨角。Hit-nî chhit-ge̍h chhoe-cha̍p ji̍t, lí tio̍h sì-kòe pûn tōa-siaⁿ ê sàu-kak; tī sio̍k-chōe ê ji̍t tio̍h choân-tōe pûn sàu-kak.

10Lín tio̍h用第五十年做聖，tī遍地kā一切khiā起ê百姓宣布自由；chit年beh做lín ê禧年；lín ta̍k人tio̍h歸家己ê產業，ta̍k人tio̍h tò去伊ê本家。Lín tio̍h ēng tē gō͘-cha̍p nî chòe-sèng, tī piàn-tōe kā it-chhè khiā-khí ê peh-sìⁿ soan-pò͘ chū-iû; chit-nî beh chòe lín ê hi-liân; lín ta̍k lâng tio̍h kui ka-kī ê sán-gia̍p, ta̍k-lâng tio̍h tò-khì i ê pún-ke.

11第五十年beh做lín ê禧年，m̄-thang種作；地家己發ê，m̄-thang收割；無芟ê葡萄樹也m̄-thang挽伊。Tē gō͘-cha̍p nî beh chòe lín ê hi-liân, m̄-thang chèng-choh; tōe ka-kī hoat ê, m̄-thang siu-koah; bô-san ê phû-tô-chhiū iā m̄-thang bán i.

12因為這是禧年，lín tio̍h掠伊做聖；lín thang食地裡家己出ê土產。In-ūi che sī hi-liân, lín tio̍h lia̍h i chòe-sèng; lín thang chia̍h tōe-ni̍h ka-kī chhut ê thó͘-sán.

13Chit-ê禧年，lín ta̍k人tio̍h tò去家己ê產業。Chit ê hi-liân, lín ta̍k-lâng tio̍h tò-khì ka-kī ê sán-gia̍p.

14Lín賣物hō͘厝邊，á是tùi厝邊買物，lín m̄-thang相刻虧。Lín bōe mi̍h hō͘ chhù-piⁿ, á-sī tùi chhù-piⁿ bóe mi̍h, lín m̄-thang saⁿ khek-khui.

15你tio̍h照禧年後ê年限，tùi厝邊買，伊也tio̍h照收成ê年限賣 hō͘ lín。Lí tio̍h chiàu hi-liân-āu ê nî-hān, tùi chhù-piⁿ bóe, i iā tio̍h chiàu siu-sêng ê nî-hān bōe hō͘ lín.

16照年限ê chōe，你tio̍h加添伊ê價錢，照年限ê少，你tio̍h減少伊ê價錢；因為伊照收成ê數額來賣hō͘ lín。Chiàu nî-hān ê chōe, lí tio̍h ke-thiⁿ i ê kè-chîⁿ, chiàu nî-hān ê chió, lí tio̍h kiám-chió i ê kè-chîⁿ; in-ūi i chiàu siu-sêng ê siàu-gia̍h lâi bōe hō͘ lín.

17Lín也m̄-thang相刻虧，獨獨tio̍h敬畏lín ê上帝；因為我是耶和華lín ê上帝。Lín iā m̄-thang saⁿ khek-khui, to̍k-to̍k tio̍h kèng-ùi lín ê Siōng-tè; in-ūi Góa sī Iâ-hô-hoa lín ê Siōng-tè.

18所以lín tio̍h行我ê律例，守我ê法度來行伊；就thang tī hit-ê地安然khiā起。Só͘-í lín tio̍h kiâⁿ Góa ê lu̍t-lē, siú Góa ê hoat-tō͘ lâi kiâⁿ i; chiū thang tī hit ê tōe an-jiân khiā-khí.

19地也beh出伊ê土產，lín就beh食飽，tī hit-ê地安然khiā起。Tōe iā beh chhut i ê thó͘-sán, lín chiū beh chia̍h-pá, tī hit ê tōe an-jiân khiā-khí.

20Lín若講，看ah，chit-ê第七年阮無種作，也無收成土產，beh食甚麼ah?Lín nā kóng, Khòaⁿ ah, chit ê tē-chhit nî goán bô chèng-choh, iā bô siu-sêng thó͘-sán, beh chia̍h sím-mi̍h ah?

21我beh tī第六年命令我ê福氣hō͘ lín，地就生三年ê土產。Góa beh tī tē la̍k-nî bēng-lēng Góa ê hok-khì hō͘ lín, tōe chiū siⁿ saⁿ-nî ê thó͘-sán.

22第八年lín tio̍h種作，也tio̍h食地ê出產，就是舊ê米糧；thèng候到第九年，hit年ê出產收來ê時，lín iáu-kú teh食舊ê米糧。Tē-poeh nî lín tio̍h chèng-choh, iā tio̍h chia̍h tōe ê chhut-sán, chiū-sī kū ê bí-niû; thèng-hāu kàu tē-káu nî, hit-nî ê chhut-sán siu-lâi ê sî, lín iáu-kú teh chia̍h kū ê bí-niû.

23地m̄-thang永遠賣斷，因為地是我ê；lín tī我ê面前是出外人，是寄腳ê。Tōe m̄-thang éng-oán bōe-tn̄g, in-ūi tōe sī Góa ê; lín tī Góa ê bīn-chêng sī chhut-gōa lâng, sī kià-kha-ê.

24Lín所得tio̍h做業ê全地，tio̍h准人贖回。Lín só͘ tit-tio̍h chòe-gia̍p ê choân-tōe, tio̍h chún lâng sio̍k-hôe.

25你ê兄弟若變做sòng-hiong，賣伊ê業kúi-nā份，伊ê至親tio̍h來，贖回伊ê兄弟所賣ê。Lí ê hiaⁿ-tī nā pìⁿ-chòe sòng-hiong, bōe i ê gia̍p kúi-nā hūn, i ê chì-chhin tio̍h lâi, sio̍k-hôe i ê hiaⁿ-tī só͘ bōe ê.

26若無人thang kā伊贖回，伊本身koh成做好額，夠額能贖回，Nā bô lâng thang kā i sio̍k-hôe, i pún-sin koh chiâⁿ chòe hó-gia̍h, kàu gia̍h ōe sio̍k-hôe,

27伊就tio̍h算賣出地 ê年限，將所chhun-ê 還hit-ê買主，本身就thang復到伊ê產業。i chiū tio̍h sǹg bōe-chhut tōe ê nî-hān, chiong só͘-chhun-ê hêng hit ê bóe-chú, pún-sin chiū thang ho̍k-tò i ê sán-gia̍p.

28Hit-ê人若bōe-ōe為家己贖回，就所賣ê猶原存tī買主ê手，直到禧年；禧年已經到，產業tio̍h交出；hit人就復到伊ê業。Hit ê lâng nā bōe-ōe ūi ka-kī sio̍k-hôe, chiū só͘-bōe ê iû-goân chûn tī bóe-chú ê chhiú, ti̍t-kàu hi-liân; hi-liân í-keng kàu, sán-gia̍p tio̍h kau-chhut; hit-lâng chiū ho̍k-tò i ê gia̍p.

29人若賣城內ê厝，賣了後一年thang贖回；一年ka-nn̂g也有贖回ê權。Lâng nā bōe siâⁿ-lāi ê chhù, bōe liáu-āu chi̍t-nî thang sio̍k-hôe; chi̍t-nî ka-nn̂g iā ū sio̍k-hôe ê koân.

30若一年已經滿無贖回chit-ê城內ê厝，就定tio̍h永遠歸買主到ta̍k代；tī禧年也bōe得交出。Nā chi̍t-nî í-keng móa bô sio̍k-hôe chit ê siâⁿ-lāi ê chhù, chiū tiāⁿ-tio̍h éng-oán kui bóe-chú kàu ta̍k-tāi; tī hi-liân iā bōe-tit kau-chhut.

31獨獨厝tī無城牆ê鄉庄，tio̍h看伊親像鄉下ê田一樣，thang贖回；到禧年，lóng tio̍h交出。To̍k-to̍k chhù tī bô siâⁿ-chhiûⁿ ê hiuⁿ-chng, tio̍h khòaⁿ i chhin-chhiūⁿ hiuⁿ-ē ê chhân chi̍t-iūⁿ, thang sio̍k-hôe; kàu hi-liân, lóng tio̍h kau-chhut.

32總是利未人ê城，就是in所得tio̍h做業ê城hit中間ê厝，利未人thang不管時來贖回。Chóng-sī Lī-bī lâng ê siâⁿ, chiū-sī in só͘ tit-tio̍h chòe-gia̍p ê siâⁿ hit tiong-kan ê chhù, Lī-bī lâng thang put-koán-sî lâi sio̍k-hôe.

33若有人追利未人贖回厝宅，所賣ê厝tī所得tio̍h做業ê城，到禧年就tio̍h交出；因為利未人城內ê厝，是in tī以色列人中ê產業。Nā ū lâng tui Lī-bī lâng sio̍k-hôe chhù-the̍h, só͘ bōe ê chhù tī só͘ tit-tio̍h chòe-gia̍p ê siâⁿ, kàu hi-liân chiū tio̍h kau-chhut; in-ūi Lī-bī lâng siâⁿ-lāi ê chhù, sī in tī Í-sek-lia̍t lâng tiong ê sán-gia̍p.

34總是in ê城外郊野ê地，m̄-thang賣，因為是in永遠ê產業。Chóng-sī in ê siâⁿ-gōa kau-iá ê tōe, m̄-thang bōe, in-ūi sī in éng-oán ê sán-gia̍p.

35你ê兄弟變做sòng-hiong衰退tī你hia，你tio̍h補助伊，hō͘伊kap你相kap tòa，親像外人kap寄腳ê一樣。Lí ê hiaⁿ-tī pìⁿ-chòe sòng-hiong soe-thè tī lí hia, lí tio̍h pó͘-chō͘ i, hō͘ i kap lí saⁿ-kap tòa, chhin-chhiūⁿ gōa-lâng kap kià-kha-ê chi̍t-iūⁿ.

36M̄-thang the̍h伊ê利息，也m̄-thang the̍h伊khah加；獨獨tio̍h敬畏你ê上帝，hō͘你ê兄弟kap你tòa。M̄-thang the̍h i ê lī-sek, iā m̄-thang the̍h i khah-ke; to̍k-to̍k tio̍h kèng-ùi lí ê Siōng-tè, hō͘ lí ê hiaⁿ-tī kap lí tòa.

37你借伊錢m̄-thang kā伊the̍h利息，你借伊米糧也m̄-thang kā伊the̍h khah加。Lí chioh i chîⁿ m̄-thang kā i the̍h lī-sek, lí chioh i bí-niû iā m̄-thang kā i the̍h khah-ke.

38我是耶和華lín ê上帝，bat chhōa lín出埃及地，為tio̍h beh賞賜lín迦南地，也beh做lín ê上帝。Góa sī Iâ-hô-hoa lín ê Siōng-tè, bat chhōa lín chhut Ai-ki̍p tōe, ūi-tio̍h beh siúⁿ-sù lín Ka-lâm tōe, iā beh chòe lín ê Siōng-tè.

39你ê兄弟若變sòng-hiong tī你hia，將本身賣hō͘你，m̄-thang hō͘伊親像奴僕服事你。Lí ê hiaⁿ-tī nā pìⁿ sòng-hiong tī lí hia, chiong pún-sin bōe hō͘ lí, m̄-thang hō͘ i chhin-chhiūⁿ lô͘-po̍k ho̍k-sāi lí.

40伊tio̍h tī你hia親像做工人，kap寄腳ê一樣；tio̍h服事你直到禧年。I tio̍h tī lí hia chhin-chhiūⁿ chòe-kang lâng, kap kià-kha-ê chi̍t-iūⁿ; tio̍h ho̍k-sāi lí ti̍t kàu hi-liân.

41Hit時伊beh離開你出去，kap伊ê kiáⁿ兒相kap tò去伊ê本家，復到伊祖公ê業。Hit-sî i beh lī-khui lí chhut-khì, kap i ê kiáⁿ-jî saⁿ-kap tò-khì i ê pún-ke, ho̍k-tò i chó͘-kong ê gia̍p.

42因為in是我ê奴僕，是我所chhōa出埃及地 ê；m̄-thang 賣做奴僕。In-ūi in sī Góa ê lô͘-po̍k, sī Góa só͘ chhōa-chhut Ai-ki̍p tōe ê; m̄-thang bōe chòe lô͘-po̍k.

43M̄-thang嚴嚴管轄伊，獨獨tio̍h敬畏你ê上帝。M̄-thang giâm-giâm koán-hat i, to̍k-to̍k tio̍h kèng-ùi lí ê Siōng-tè.

44論到你所beh有ê奴僕女婢，thang tùi四圍ê國中買來做奴僕女婢。Lūn-kàu lí só͘ beh ū ê lô͘-po̍k lú-pī, thang tùi sì-ûi ê kok tiong bóe lâi chòe lô͘-po̍k lú-pī.

45Koh hiah-ê寄腳tī lín中間ê外人ê kiáⁿ兒，以及in kap lín tiàm hiah-ê家眷，tī lín ê地方所生ê，lín也thang tùi in中間買人；in beh做lín ê家業。Koh hiah ê kià-kha tī lín tiong-kan ê gōa-lâng ê kiáⁿ-jî, í-ki̍p in kap lín tiàm hiah ê ke-koàn, tī lín ê tōe-hng só͘-siⁿ-ê, lín iā thang tùi in tiong-kan bóe lâng; in beh chòe lín ê ke-gia̍p.

46Lín beh取in做業，留hō͘ kiáⁿ孫做家業；lín beh永遠tùi in中間取伊做奴僕；獨獨lín ê兄弟以色列人，lín m̄-thang嚴嚴相管轄。Lín beh chhú in chòe-gia̍p, lâu hō͘ kiáⁿ-sun chòe ke-gia̍p; lín beh éng-oán tùi in tiong-kan chhú i chòe lô͘-po̍k; to̍k-to̍k lín ê hiaⁿ-tī Í-sek-lia̍t lâng, lín m̄-thang giâm-giâm saⁿ koán-hat.

47Tiàm tī lín hia ê外人，á是寄腳ê，若變做好額，你ê兄弟tī in hia變做sòng-hiong，將家己賣hō͘ lín中間ê外人，á是寄腳ê，á是外人ê家族。Tiàm tī lín hia ê gōa-lâng, á-sī kià-kha-ê, nā pìⁿ-chòe hó-gia̍h, lí ê hiaⁿ-tī tī in hia pìⁿ-chòe sòng-hiong, chiong ka-kī bōe hō͘ lín tiong-kan ê gōa-lâng, á-sī kià-kha-ê, á-sī gōa-lâng ê ke-cho̍k.

48賣了後thang贖回伊，伊ê兄弟ê一個thang贖回伊；Bōe liáu-āu thang sio̍k-hôe i, i ê hiaⁿ-tī ê chi̍t-ê thang sio̍k-hôe i;

49伯叔，á是伯叔ê kiáⁿ thang贖回伊，á是本家ê親人，也thang屬伊；伊本身若成做好額也thang家己屬。peh-chek, á-sī peh-chek ê kiáⁿ thang sio̍k-hôe i, á-sī pún-ke ê chhin-lâng, iā thang sio̍k i; i pún-sin nā chiâⁿ-chòe hó-gia̍h iā thang ka-kī sio̍k.

50伊tio̍h kap買主算賬，tùi賣家己hit年起，算到禧年，所賣ê價錢照年限ê chōe少，tio̍h照做工人ê年限kap伊算。I tio̍h kap bóe-chú sǹg-siàu, tùi bōe ka-kī hit-nî khí, sǹg kàu hi-liân, só͘ bōe ê ké-chîⁿ chiàu nî-hān ê chōe-chió, tio̍h chiàu chòe-kang lâng ê nî-hān kap i sǹg.

51若所chhun ê年iáu-kú chōe，就tio̍h照hit-ê年限，tùi買伊ê價錢，伊tio̍h 還伊贖回ê價錢。Nā só͘ chhun ê nî iáu-kú chōe, chiū tio̍h chiàu hit ê nî-hān, tùi bóe-i ê kè-chîⁿ, i tio̍h hêng i sio̍k-hôe ê kè-chîⁿ.

52若到禧年chhun無幾年，tio̍h kap伊算；照hit-ê年限tio̍h還伊贖回價錢。Nā kàu hi-liân chhun bô kúi-nî, tio̍h kap i sǹg; chiàu hit ê nî-hān tio̍h hêng i sio̍k-hôe kè-chîⁿ.

53伊tio̍h kap伊tòa，親像年年雇倩ê做工人；買主m̄-thang嚴嚴管轄伊。I tio̍h kap i tòa, chhin-chhiūⁿ nî-nî kò͘-chhiàⁿ ê chòe-kang lâng; bóe-chú m̄-thang giâm-giâm koán-hat i.

54若無tī chiah-ê受屬，到禧年伊kap伊ê kiáⁿ兒lóng thang出去自由。Nā bô tī chiah-ê siū-sio̍k, kàu hi-liân i kap i ê kiáⁿ-jî lóng thang chhut-khì chū-iû.

55因為以色列人是我ê奴僕，是我chhōa出埃及地 ê；我是耶和華lín ê上帝。In-ūi Í-sek-lia̍t lâng sī Góa ê lô͘-po̍k, sī Góa chhōa-chhut Ai-ki̍p tōe ê; Góa sī Iâ-hô-hoa lín ê Siōng-tè.

1Lín m̄-thang為本身做甚麼神佛，也m̄-thang chhāi雕刻ê偶像，á是柱像；也m̄-thang tī lín ê地界安置甚麼刻像ê石，跪拜伊；因為我是耶和華lín ê上帝。Lín m̄-thang ūi pún-sin chòe sím-mi̍h sîn-pu̍t, iā m̄-thang chhāi tiau-khek ê ngó͘-siōng, á-sī thiāu-siōng; iā m̄-thang tī lín ê tōe-kài an-tì sím-mi̍h khek-siōng ê chio̍h, kūi-pài i; in-ūi Góa sī Iâ-hô-hoa lín ê Siōng-tè.

2Lín tio̍h守我chiah-ê安歇，敬我ê聖所；我是耶和華。Lín tio̍h siú Góa chiah ê an-hioh, kèng Góa ê sèng-só͘; Góa sī Iâ-hô-hoa.

3Lín若遵thàn我ê律例，守我ê誡命來行伊，Lín nā chun-thàn Góa ê lu̍t-lē, siú Góa ê kài-bēng lâi kiâⁿ i,

4我就kā lín落及時ê 雨，地出伊ê土產，田野ê樹木結果子。Góa chiū kā lín lo̍h ki̍p-sî ê hō͘, tōe chhut i ê thó͘-sán, chhân-iá ê chhiū-ba̍k kiat ké-chí.

5Lín phah五穀beh phah到挽葡萄ê時；挽葡萄beh 挽到掖種ê時；koh lín beh食lín ê米糧到飽，tī lín ê土地安然khiā起。Lín phah gō͘-kak beh phah kàu bán phû-tô ê sî; bán phû-tô beh bán kàu iā-chéng ê sî; koh lín beh chia̍h lín ê bí-niû kàu pá, tī lín ê thó͘-tōe an-jiân khiā-khí.

6我beh賞賜平安tī lín ê地；lín倒teh睏，無人phah驚lín；我beh tī lín ê地除去惡獸，刀劍也無經過lín ê地。Góa beh siúⁿ-sù pêng-an tī lín ê tōe; lín tó-teh khùn, bô lâng phah-kiaⁿ lín; Góa beh tī lín ê tōe tû-khì ok-siù, to-kiàm iā bô keng-kè lín ê tōe.

7Lín beh趕走對敵，in beh tī lín ê面前倒tī刀下。Lín beh kóaⁿ-cháu tùi-te̍k, in beh tī lín ê bīn-chêng tó tī to-ē.

8Lín五人beh趕走一百人，lín一百人beh趕走一萬人，對敵beh tī lín ê面前倒tī刀下。Lín gō͘ lâng beh kóaⁿ-cháu chi̍t-pah lâng, lín chi̍t-pah lâng beh kóaⁿ-cháu chi̍t-bān lâng, tùi-te̍k beh tī lín ê bīn-chêng tó tī to-ē.

9我beh看顧lín，hō͘ lín生養真chōe，也beh kap lín建立我ê約。Góa beh khòaⁿ-kò͘ lín, hō͘ lín seng-ióng chin-chōe, iā beh kap lín kiàn-li̍p Góa ê iok.

10Lín beh食khǹg久久ê舊五穀，koh為tio̍h新ê，搬出舊ê。Lín beh chia̍h khǹg kú-kú ê kū ngó͘-kok, koh ūi-tio̍h sin ê, poaⁿ-chhut kū-ê.

11我beh tī lín中間立我ê會幕，我ê心也無厭惡lín。Góa beh tī lín tiong-kan li̍p Góa ê hōe-bō͘, Góa ê sim iā bô iàm-ò͘ⁿ lín.

12我beh行tī lín中間，我beh做lín ê上帝，lín beh做我ê百姓。Góa beh kiâⁿ tī lín tiong-kan, Góa beh chòe lín ê Siōng-tè, lín beh chòe Góa ê peh-sìⁿ.

13我是耶和華lín ê上帝，bat chhōa lín出埃及地，免得lín做in ê奴僕；我bat斬斷lín ê擔ê索，hō͘ lín挺身sin來行。Góa sī Iâ-hô-hoa lín ê Siōng-tè, bat chhōa lín chhut Ai-ki̍p tōe, bián-tit lín chòe in ê lô͘-po̍k; Góa bat chām-tn̄g lín ê taⁿ ê soh, hō͘ lín théng-sin lâi kiâⁿ.

14Lín若m̄聽thàn我，m̄守我lóng總ê誡命，Lín nā m̄ thiaⁿ-thàn Góa, m̄ siú Góa lóng-chóng ê kài-bēng,

15lín若棄sak我ê律例，心內厭惡我ê法度，致到無行我一切誡命，背我ê約，lín nā khì-sak Góa ê lu̍t-lē, sim-lāi iàm-ò͘ⁿ Góa ê hoat-tō͘, tì-kàu bô kiâⁿ Góa it-chhè kài-bēng, pōe Góa ê iok,

16我就beh án-ni款待lín；我定tio̍h beh hō͘ lín驚惶、siau瘦、熱病，目睭phah-pháiⁿ，心憂傷；lín beh空空掖種，因為lín ê對敵beh食伊。Góa chiū beh án-ni khoán-thāi lín; Góa tiāⁿ-tio̍h beh hō͘ lín kiaⁿ-hiâⁿ, siau-sán, jia̍t-pīⁿ, ba̍k-chiu phah-pháiⁿ, sim iu-siong; lín beh khang-khang iā-chéng, in-ūi lín ê tùi-te̍k beh chia̍h i.

17我beh對lín變面，lín beh排陣tī對敵ê面前；怨恨lín-ê beh管轄lín；無人追趕，lín也beh逃走。Góa beh tùi lín pìⁿ-bīn, lín beh pāi-tīn tī tùi-te̍k ê bīn-chêng; oàn-hūn lín-ê beh koán-hat lín; bô lâng tui-kóaⁿ, lín iā beh tô-cháu.

18Lín因為chiah-ê tāi-chì若iáu-kú m̄聽thàn我，我就beh為tio̍h lín ê罪加添七倍責罰lín。Lín in-ūi chiah ê tāi-chì nā iáu-kú m̄-thiaⁿ-thàn Góa, Góa chiū beh ūi-tio̍h lín ê chōe ke-thiⁿ chhit-pē chek-hoa̍t lín.

19我beh斷絕lín有勢力ê驕傲；koh beh hō͘ lìn ê天親像鐵，lín ê地親像銅。Góa beh toān-choa̍t lín ū sè-le̍k ê kiau-ngō͘; koh beh hō͘ lìn ê thiⁿ chhin-chhiūⁿ thih, lín ê tōe chhin-chhiūⁿ tâng.

20Lín出力tio̍h磨beh空空，因為lín ê地無出伊ê土產，地 ê樹木也無結伊ê果子。Lín chhut-la̍t tio̍h-bôa beh khang-khang, in-ūi lín ê tōe bô chhut i ê thó͘-sán, tōe ê chhiū-ba̍k iā bô kiat i ê ké-chí.

21Lín行tāi-chì若kap我反對，m̄肯聽thàn我，我就beh照lín ê罪加添七倍降災禍hō͘ lín。Lín kiâⁿ tāi-chì nā kap Góa hoán-tùi, m̄-khéng thiaⁿ-thàn Góa, Góa chiū beh chiàu lín ê chōe ke-thiⁿ chhit-pē kàng chai-ē hō͘ lín.

22我beh差野獸到lín ê中間，咬食lín ê kiáⁿ兒，吞滅lín ê cheng-siⁿ，hō͘ lín ê人額減少，lín ê路拋荒。Góa beh chhe iá-siù kàu lín ê tiong-kan, kā-chia̍h lín ê kiáⁿ-jî, thun-bia̍t lín ê cheng-siⁿ, hō͘ lín ê lâng-gia̍h kiám-chió, lín ê lō͘ pha-hng.

23Lín因為chiah-ê iáu-kú無受責督來歸向我，行tāi-chì反對我，Lín in-ūi chiah-ê iáu-kú bô siū chek-tok lâi kui-ǹg Góa, kiâⁿ tāi-chì hoán-tùi Góa,

24我也beh行tāi-chì來反對lín；我本身beh因為lín ê罪，phah lín七倍重。Góa iā beh kiâⁿ tāi-chì lâi hoán-tùi lín; Góa pún-sin beh in-ūi lín ê chōe, phah lín chhit-pē tāng.

25我koh beh hō͘刀劍臨到lín，報應lín背約ê罪；lín beh受圍困tī城內；我beh降瘟疫tī lín中間；也beh交lín tī對敵ê手。Góa koh beh hō͘ to-kiàm lîm-kàu lín, pò-èng lín pōe-iok ê chōe; lín beh siū ûi-khùn tī siâⁿ-lāi; Góa beh kàng un-e̍k tī lín tiong-kan; iā beh kau lín tī tùi-te̍k ê chhiú.

26我斷絕lín所óa靠ê米糧；hit時beh有十個婦人人tī一個爐kā lín pek餅，秤lín ê額ê食物hō͘ lín，lín beh食，也食bōe飽。Góa toān-choa̍t lín só͘ óa-khò ê bí-niû; hit-sî beh ū cha̍p ê hū-jîn-lâng tī chi̍t ê lô͘ kā lín pek-piáⁿ, chhìn lín ê gia̍h ê chia̍h-mi̍h hō͘ lín, lín beh chia̍h, iā chia̍h bōe pá.

27Lín因為這一切ê事，若iáu-kú m̄聽thàn我，也行tāi-chì反對我，Lín in-ūi che it-chhè ê sū, nā iáu-kú m̄ thiaⁿ-thàn Góa, iā kiâⁿ tāi-chì hoán-tùi Góa,

28我就beh發出大受氣，行tāi-chì反對lín；我本身因為lín ê罪，責罰lín七倍ê重。Góa chiū beh hoat-chhut tōa siū-khì, kiâⁿ tāi-chì hoán-tùi lín; Góa pún-sin in-ūi lín ê chōe, chek-hoa̍t lín chhit-pē ê tāng.

29Koh lín beh食lín ê kiáⁿ ê肉；lín ê cha-bó͘-kiáⁿ ê肉lín也beh食。Koh lín beh chia̍h lín ê kiáⁿ ê bah; lín ê cha-bó͘-kiáⁿ ê bah lín iā beh chia̍h.

30我也beh毀壞lín ê山頭壇，剉lín ê日像，將lín ê身屍hiat tī lín ê偶像ê身上；我ê心也beh厭惡lín。Góa iā beh húi-hoāi lín ê soaⁿ-thâu-tôaⁿ, chhò lín ê ji̍t-siōng, chiong lín ê sin-si hiat tī lín ê ngó͘-siōng ê sin-chiūⁿ; Góa ê sim iā beh iàm-ò͘ⁿ lín.

31我beh hō͘ lín ê城拋荒，hō͘ lín chiah-ê聖所荒廢；我也無beh phīⁿ lín ê香料ê芳味。Góa beh hō͘ lín ê siâⁿ pha-hng, hō͘ lín chiah ê sèng-só͘ hong-hòe; Góa iā bô beh phīⁿ lín ê hiuⁿ-liāu ê phang-bī.

32我beh hō͘地荒廢；lín ê對敵khiā tī-hia ê，beh因為án-ni來gông-ngia̍h。Góa beh hō͘ tōe hong-hòe; lín ê tùi-te̍k khiā tī-hia ê, beh in-ūi án-ni lâi gông-ngia̍h.

33我beh四散lín tī列邦中；我也beh拔刀追趕lín；lín ê地beh荒廢，lín ê城beh拋荒。Góa beh sì-sòaⁿ lín tī lia̍t-pang tiong; Góa iā beh pu̍ih to tui-kóaⁿ lín; lín ê tōe beh hong-hòe, lín ê siâⁿ beh pha-hng.

34Lín tī對敵ê地khiā起ê時，lín ê地拋荒beh享受伊ê安歇；tī hit時地beh歇睏，享受伊ê安歇。Lín tī tùi-te̍k ê tōe khiā-khí ê sî, lín ê tōe pha-hng beh hióng-siū i ê an-hioh; tī hit-sî tōe beh hioh-khùn, hióng-siū i ê an-hioh.

35地拋荒jōa久，就beh得tio̍h安歇hiah-久；因為lín tiàm tī-hia ê日，lín chiah-ê安歇ê期伊無得tio̍h安歇。Tōe pha-hng jōa-kú, chiū beh tit-tio̍h an-hioh hiah-kú; in-ūi lín tiàm tī-hia ê ji̍t, lín chiah ê an-hioh ê kî i bô tit-tio̍h an-hioh.

36論到lín所chhun ê人，我beh hō͘ in tī對敵ê地，心驚到暈去；樹葉hō͘風吹振動ê聲追趕in，in beh逃閃，ná親像逃閃刀劍ê；無人追趕伊，也beh跋倒。Lūn-kàu lín só͘ chhun ê lâng, Góa beh hō͘ in tī tùi-te̍k ê tōe, sim kiaⁿ kàu hūn-khì; chhiū-hio̍h hō͘ hong chhe tín-tāng ê siaⁿ tui-kóaⁿ in, in beh tô-siám, ná chhin-chhiūⁿ tô-siám to-kiàm ê; bô lâng tui-kóaⁿ i, iā beh poa̍h-tó.

37無人追趕ê時，in beh大家相khoeh跋倒，親像tī刀劍ê頭前；lín tī對敵ê面前也khiā bōe tiâu。Bô lâng tui-kóaⁿ ê sî, in beh tāi-ke saⁿ-khoeh poa̍h-tó, chhin-chhiūⁿ tī to-kiàm ê thâu-chêng; lín tī tùi-te̍k ê bīn-chêng iā khiā bōe tiâu.

38Lín beh滅無tī列邦中，對敵ê地beh吞食lín。Lín beh bia̍t-bô tī lia̍t-pang-tiong, tùi-te̍k ê tōe beh thun-chia̍h lín.

39Lín所chhun ê人beh tī對敵ê地，因為家己ê罪來消無；也因為祖公ê罪kap in平平消無。Lín só͘ chhun ê lâng beh tī tùi-te̍k ê tōe, in-ūi ka-kī ê chōe lâi siau-bô; iā in-ūi chó͘-kong ê chōe kap in pîⁿ-pîⁿ siau-bô.

40In beh認家己ê罪，kap in祖公ê罪，就是in所干犯我ê罪，koh認家己行tāi-chì反對我；In beh jīn ka-kī ê chōe, kap in chó͘-kong ê chōe, chiū-sī in só͘ kan-hoān Góa ê chōe, koh jīn ka-kī kiâⁿ tāi-chì hoán-tùi Góa;

41所以我行tāi-chì反對in，帶in到對敵ê地；hit時in無受割禮ê心，若有謙卑，甘願受罪ê刑罰，só͘-í Góa kiâⁿ tāi-chì hoán-tùi in, tòa in kàu tùi-te̍k ê tōe; hit-sî in bô siū kat-lé ê sim, nā ū khiam-pi, kam-goān siū chōe ê hêng-hoa̍t,

42我beh記念我kap雅各所立ê約，我beh記念我kap以撒所立ê約，我kap亞伯拉罕所立ê約，我也beh記念chit-ê地。Góa beh kì-liām Góa kap Ngá-kok só͘ li̍p ê iok, Góa beh kì-liām Góa kap Í-sat só͘ li̍p ê iok, Góa kap A-pek-la̍h-hán só͘ li̍p ê iok, Góa iā beh kì-liām chit ê tōe.

43Hit-ê地hō͘ in離開，得tio̍h享受伊ê安歇，tī伊拋荒，in無tī-teh ê時，koh in甘願受罪ê刑罰，因為in棄sak我ê法度，心內厭惡我ê律例；Hit ê tōe hō͘ in lī-khui, tit-tio̍h hióng-siū i ê an-hioh, tī i pha-hng, in bô tī-teh ê sî, koh in kam-goān siū chōe ê hêng-hoa̍t, in-ūi in khì-sak Góa ê hoat-tō͘, sim-lāi iàm-ò͘ⁿ Góa ê lu̍t-lē;

44雖然án-ni，in tī對敵ê地ê時，我iáu-kú無棄sak in，也無厭惡in，來一盡滅in，致到背我kap in所立ê約；因為我是耶和華in ê上帝。sui-jiân án-ni, in tī tùi-te̍k ê tōe ê sî, Góa iáu-kú bô khì-sak in, iā bô iàm-ò͘ⁿ in, lâi it-chīn bia̍t in, tì-kàu pōe Góa kap in só͘ li̍p ê iok; in-ūi Góa sī Iâ-hô-hoa in ê Siōng-tè.

45我也beh為tio̍h in ê緣故，記念我kap in ê祖公所立ê約，就是我tī異邦-人ê面前chhōa in出埃及地 ê，beh做in ê上帝ê；我是耶和華。Góa iā beh ūi-tio̍h in ê iân-kò͘, kì-liām Góa kap in ê chó͘-kong só͘ li̍p ê iok, chiū-sī Góa tī īⁿ-pang-lâng ê bīn-chêng chhōa in chhut Ai-ki̍p tōe ê, beh chòe in ê Siōng-tè-ê; Góa sī Iâ-hô-hoa.

46Chiah-ê律例，法度，教示，就是耶和華tī伊本身kap以色列人ê中間，tī西奈山，託摩西所立ê。Chiah ê lu̍t-lē, hoat-tō͘, kà-sī, chiū-sī Iâ-hô-hoa tī I pún-sin kap Í-sek-lia̍t lâng ê tiong-kan, tī Se-nái soaⁿ, thok Mô͘-se só͘ li̍p ê.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人講：用人下特別ê願，tio̍h照你所估ê身價歸hō͘耶和華。Lí tio̍h hoan-hù Í-sek-lia̍t lâng kóng, Ēng lâng hē te̍k-pia̍t ê goān, tio̍h chiàu lí só͘ kó͘ ê sin-kè kui hō͘ Iâ-hô-hoa.

3你所估ê價，ta-po͘人tùi二十歲到六十歲，tio̍h估伊ê價銀五十sià-khek-le̍k，照聖所ê sià-khek-le̍k。Lí só͘ kó͘ ê kè, ta-po͘-lâng tùi jī-cha̍p hè kàu la̍k-cha̍p hè, tio̍h kó͘ i ê kè-gûn gō͘-cha̍p sià-khek-le̍k, chiàu sèng-só͘ ê sià-khek-le̍k.

4若是cha-bó͘人，你tio̍h估伊ê價三十sià-khek-le̍k。Nā sī cha-bó͘-lâng, lí tio̍h kó͘ i ê kè saⁿ-cha̍p sià-khek-le̍k.

5若是tùi五歲到二十歲，ta-po͘-ê你tio̍h估伊ê價二十sià-khek-le̍k；cha-bó͘人估十sià-khek-le̍k。Nā sī tùi gō͘-hè kàu jī-cha̍p hè, ta-po͘-ê lí tio̍h kó͘ i ê kè jī-cha̍p sià-khek-le̍k; cha-bó͘-lâng kó͘ cha̍p sià-khek-le̍k.

6若是tùi滿月到五歲，ta-po͘-ê你tio̍h估價銀五sià-khek-le̍k，cha-bó͘-ê tio̍h估價銀三sià-khek-le̍k。Nā sī tùi móa-ge̍h kàu gō͘-hè, ta-po͘-ê lí tio̍h kó͘ kè-gûn gō͘ sià-khek-le̍k, cha-bó͘-ê tio̍h kó͘ kè-gûn saⁿ sià-khek-le̍k.

7若是對六十歲以上，ta-po͘人你tio̍h估價銀十五sià-khek-le̍k，cha-bó͘人十sià-khek-le̍k。Nā sī tùi la̍k-cha̍p hè í-chiūⁿ, ta-po͘-lâng lí tio̍h kó͘ kè-gûn cha̍p-gō͘ sià-khek-le̍k, cha-bó͘-lâng cha̍p sià-khek-le̍k.

8Hit人若sòng-hiong，bōe照你所估ê價，就tio̍h hō͘伊khiā tī祭司ê面前，祭司tio̍h估伊；照下願ê人ê氣力，祭司tio̍h估伊。Hit-lâng nā sòng-hiong, bōe chiàu lí só͘ kó͘ ê kè, chiū tio̍h hō͘ i khiā tī chè-si ê bīn-chêng, chè-si tio̍h kó͘ i; chiàu hē-goān ê lâng ê khùi-la̍t, chè-si tio̍h kó͘ i.

9若是cheng-siⁿ，就是人獻hō͘耶和華做禮物ê，lóng tio̍h分別伊做聖。Nā sī cheng-siⁿ, chiū-sī lâng hiàn hō͘ Iâ-hô-hoa chòe lé-mi̍h ê, lóng tio̍h hun-piat i chòe-sèng.

10人m̄-thang改換，也m̄-thang對換，或是用好ê換pháiⁿ-ê，á是用pháiⁿ-ê 換好ê；若用cheng-siⁿ對換cheng-siⁿ，所下ê kap所換ê lóng tio̍h分別伊做聖。Lâng m̄-thang kóe-ōaⁿ, iā m̄-thang tùi-ōaⁿ, he̍k-sī ēng hó-ê ōaⁿ pháiⁿ-ê, á-sī ēng pháiⁿ-ê ōaⁿ hó-ê; nā ēng cheng-siⁿ tùi-ōaⁿ cheng-siⁿ, só͘ hē ê kap só͘ ōaⁿ ê lóng tio̍h hun-piat i chòe-sèng.

11若無清氣ê cheng-siⁿ，人所m̄-thang獻hō͘耶和華做禮物ê，就tio̍h hō͘ cheng-siⁿ khiā tī祭司ê面前；Nā bô chheng-khì ê cheng-siⁿ, lâng só͘ m̄-thang hiàn-hō͘ Iâ-hô-hoa chòe lé-mi̍h ê, chiū tio̍h hō͘ cheng-siⁿ khiā tī chè-si ê bīn-chêng;

12祭司就tio̍h估伊ê價；cheng-siⁿ是好是pháiⁿ，你祭司所估ê án-ni就是。chè-si chiū tio̍h kó͘ i ê kè; cheng-siⁿ sī hó sī pháiⁿ, lí chè-si só͘-kó͘-ê án-ni chiū-sī.

13伊若一定beh贖回，就tio̍h tī你所估ê價錢以外，加添五份ê一份。I nā it-tēng beh sio̍k-hôe, chiū tio̍h tī lí só͘ kó͘ ê kè-chîⁿ í-gōa, ke-thiⁿ gō͘-hūn ê chi̍t-hūn.

14人用厝分別做聖，歸hō͘耶和華，祭司就tio̍h估伊ê價，厝是好是pháiⁿ；祭司所估ê價，照án-ni定tio̍h。Lâng ēng chhù hun-piat chòe-sèng, kui hō͘ Iâ-hô-hoa, chè-si chiū tio̍h kó͘ i ê kè, chhù sī hó sī pháiⁿ; chè-si só͘ kó͘ ê kè, chiàu án-ni tiāⁿ-tio̍h.

15分別伊ê厝做聖ê，若beh贖回，就tio̍h tī你所估ê價銀以外，加添五份ê一份；厝照舊歸伊。Hun-piat i ê chhù chòe-sèng ê, nā beh sio̍k-hôe, chiū tio̍h tī lí só͘ kó͘ ê kè-gûn í-gōa, ke-thiⁿ gō͘-hūn ê chi̍t-hūn; chhù chiàu-kū kui i.

16人若tùi伊ê業ê地分別一份做聖歸hō͘耶和華，你tio̍h照伊掖種ê chōe少估伊ê價；若也大麥一hō-mûi-jíⁿ，價銀tio̍h五十sià-khek-le̍k。Lâng nā tùi i ê gia̍p ê tōe hun-piat chi̍t-hūn chòe-sèng kui hō͘ Iâ-hô-hoa, lí tio̍h chiàu i iā-chéng ê chōe-chió kó͘ i ê kè; nā iā tōa-be̍h chi̍t hō-mûi-jíⁿ, kè-gûn tio̍h gō͘-cha̍p sià-khek-le̍k.

17伊若tùi禧年乞將地分別做聖，就tio̍h照你所估ê價錢來定tio̍h。I nā tùi hi-liân khí chiong tōe hun-piat chòe-sèng, chiū tio̍h chiàu lí só͘ kó͘ ê kè-chîⁿ lâi tiāⁿ-tio̍h.

18設使伊tī禧年以後將地分別做聖，祭司就tio̍h tùi hit-tia̍p到禧年所chhun ê年額，算伊ê價錢；也tio̍h tùi你所估ê，來減少伊。Siat-sú i tī hi-liân í-āu chiong tōe hun-piat chòe-sèng, chè-si chiū tio̍h tùi hit-tia̍p kàu hi-liân só͘ chhun ê nî-gia̍h, sǹg i ê kè-chîⁿ; iā tio̍h tùi lí só͘ kó͘-ê, lâi kiám-chió i.

19分別伊ê地做聖ê，若一定beh贖回，伊就tio̍h tī你所估ê價錢以外，加添五份ê一份；地就定tio̍h歸伊。Hun-piat i ê tōe chòe-sèng ê, nā it-tēng beh sio̍k-hôe, i chiū tio̍h tī lí só͘ kó͘ ê kè-chîⁿ í-gōa, ke-thiⁿ gō͘-hūn ê chi̍t-hūn; tōe chiū tiāⁿ-tio̍h kui i.

20伊若m̄贖回hit-ê地，á是將地賣hō͘別人，就bōe能koh贖得。I nā m̄ sio̍k-hôe hit ê tōe, á-sī chiong tōe bōe hō͘ pa̍t-lâng, chiū bōe-ōe koh sio̍k-tit.

21Hit-ê地到禧年ê時已經交出，tio̍h做聖歸hō͘耶和華，親像永遠獻ê地一樣，tio̍h歸hō͘祭司做業。Hit ê tōe kàu hi-liân ê sî í-keng kau-chhut, tio̍h chòe-sèng kui hō͘ Iâ-hô-hoa, chhin-chhiūⁿ éng-oán hiàn ê tōe chi̍t-iūⁿ, tio̍h kui hō͘ chè-si chòe-gia̍p.

22伊若將所買ê一塊地，m̄是伊產業ê地，分別做聖歸hō͘耶和華；I nā chiong só͘ bóe ê chi̍t tè tōe, m̄-sī i sán-gia̍p ê tōe, hun-piat chòe-sèng kui hō͘ Iâ-hô-hoa;

23祭司就tio̍h用你所估ê價錢kā伊推算到禧年；hit日伊tio̍h the̍h出你所估ê價錢做聖，歸hō͘耶和華。chè-si chiū tio̍h ēng lí só͘ kó͘ ê kè-chîⁿ kā i chhui-sǹg kàu hi-liân; hit-ji̍t i tio̍h the̍h-chhut lí só͘ kó͘ ê kè-chîⁿ chòe-sèng, kui hō͘ Iâ-hô-hoa.

24禧年已經到，hit-ê地tio̍h歸賣主，就是hit-ê承接業ê原主。Hi-liân í-keng kàu, hit ê tōe tio̍h kui bōe-chú, chiū-sī hit ê sêng-chiap gia̍p ê goân-chú.

25見若你所估ê價銀，lóng tio̍h照聖所ê sià-khek-le̍k；二十kùi-la̍h做一sià-khek-le̍k。Kìⁿ-nā lí só͘ kó͘ ê kè-gûn, lóng tio̍h chiàu sèng-só͘ ê sià-khek-le̍k; jī-cha̍p kùi-la̍h chòe chi̍t sià-khek-le̍k.

26獨獨cheng-siⁿ ê中間頭水生ê，無論是牛是羊，已經歸耶和華做頭水生ê，人m̄-thang koh分別伊做聖，因為這本是耶和華ê。To̍k-to̍k cheng-siⁿ ê tiong-kan thâu-chúi-siⁿ ê, bô-lūn sī gû sī iûⁿ, í-keng kui Iâ-hô-hoa chòe thâu-chúi-siⁿ ê, lâng m̄-thang koh hun-piat i chòe-sèng, in-ūi che pún sī Iâ-hô-hoa ê.

27若是無清氣ê cheng-siⁿ所生ê，就tio̍h照你所估ê價，加五份一來贖回伊；若m̄贖回，就tio̍h照你所估ê價來賣。Nā sī bô chheng-khì ê cheng-siⁿ só͘ siⁿ ê, chiū tio̍h chiàu lí só͘ kó͘ ê kè, ke gō͘-hūn-chi̍t lâi sio̍k-hôe i; nā m̄ sio̍k-hôe, chiū tio̍h chiàu lí só͘ kó͘ ê kè lâi bōe.

28獨獨一切永遠獻ê，就是人tùi伊所有ê永遠獻hō͘耶和華，無論是人，是cheng-siⁿ，á是伊產業ê地，lóng m̄-thang賣，也m̄-thang贖回；伊永遠獻ê是至聖，歸hō͘耶和華。To̍k-to̍k it-chhè éng-oán hiàn ê, chiū-sī lâng tùi i só͘ ū ê éng-oán hiàn-hō͘ Iâ-hô-hoa, bô-lūn sī lâng, sī cheng-siⁿ, á-sī i sán-gia̍p ê tōe, lóng m̄-thang bōe, iā m̄-thang sio̍k-hôe; i éng-oán hiàn-ê sī chì-sèng, kui hō͘ Iâ-hô-hoa.

29見若永遠獻ê就是tùi人ê中間永遠獻，lóng m̄-thang贖；伊的確tio̍h受死。Kìⁿ-nā éng-oán hiàn-ê chiū-sī tùi lâng ê tiong-kan éng-oán hiàn, lóng m̄-thang sio̍k; i tek-khak tio̍h siū sí.

30見若地上所有ê，無論是土產，á是樹頂ê果子，十份ê一份是耶和華ê，做聖歸hō͘耶和華。Kìⁿ-nā tōe-chiūⁿ só͘ ū ê, bô-lūn sī thó͘-sán, á-sī chhiū-téng ê ké-chí, cha̍p-hūn ê chi̍t-hūn sī Iâ-hô-hoa ê, chòe-sèng kui hō͘ Iâ-hô-hoa.

31人若beh贖回chit-ê十份一ê甚麼物，就tio̍h加五份ê一份。Lâng nā beh sio̍k-hôe chit ê cha̍p-hūn-chi̍t ê sím-mi̍h mi̍h, chiū tio̍h ke gō͘-hūn ê chi̍t-hūn.

32見若牛群，羊群ê十份一，經過柺á下ê，每第十隻tio̍h做聖歸hō͘耶和華。Kìⁿ-nā gû-kûn, iûⁿ-kûn ê cha̍p-hūn-chi̍t, keng-kè koáiⁿ-á-ē ê, múi tē-cha̍p-chiah tio̍h chòe-sèng kui hō͘ Iâ-hô-hoa.

33無管伊是好pháiⁿ，m̄-thang對換；若beh對換，就所對換ê kap本然ê cheng-siⁿ，lóng tio̍h做聖，bōe贖得。Bô-koán i sī hó-pháiⁿ, m̄-thang tùi-ōaⁿ; nā beh tùi-ōaⁿ, chiū só͘ tùi-ōaⁿ-ê kap pún-jiân ê cheng-siⁿ, lóng tio̍h chòe-sèng, bōe sio̍k-tit.

34這就是耶和華tī西奈山為tio̍h以色列人所命令摩西chiah-ê命令。Che chiū-sī Iâ-hô-hoa tī Se-nái soaⁿ ūi-tio̍h Í-sek-lia̍t lâng só͘ bēng-lēng Mô͘-se chiah ê bēng-lēng.