1Lín m̄-thang為本身做甚麼神佛，也m̄-thang chhāi雕刻ê偶像，á是柱像；也m̄-thang tī lín ê地界安置甚麼刻像ê石，跪拜伊；因為我是耶和華lín ê上帝。Lín m̄-thang ūi pún-sin chòe sím-mi̍h sîn-pu̍t, iā m̄-thang chhāi tiau-khek ê ngó͘-siōng, á-sī thiāu-siōng; iā m̄-thang tī lín ê tōe-kài an-tì sím-mi̍h khek-siōng ê chio̍h, kūi-pài i; in-ūi Góa sī Iâ-hô-hoa lín ê Siōng-tè.

2Lín tio̍h守我chiah-ê安歇，敬我ê聖所；我是耶和華。Lín tio̍h siú Góa chiah ê an-hioh, kèng Góa ê sèng-só͘; Góa sī Iâ-hô-hoa.

3Lín若遵thàn我ê律例，守我ê誡命來行伊，Lín nā chun-thàn Góa ê lu̍t-lē, siú Góa ê kài-bēng lâi kiâⁿ i,

4我就kā lín落及時ê 雨，地出伊ê土產，田野ê樹木結果子。Góa chiū kā lín lo̍h ki̍p-sî ê hō͘, tōe chhut i ê thó͘-sán, chhân-iá ê chhiū-ba̍k kiat ké-chí.

5Lín phah五穀beh phah到挽葡萄ê時；挽葡萄beh 挽到掖種ê時；koh lín beh食lín ê米糧到飽，tī lín ê土地安然khiā起。Lín phah gō͘-kak beh phah kàu bán phû-tô ê sî; bán phû-tô beh bán kàu iā-chéng ê sî; koh lín beh chia̍h lín ê bí-niû kàu pá, tī lín ê thó͘-tōe an-jiân khiā-khí.

6我beh賞賜平安tī lín ê地；lín倒teh睏，無人phah驚lín；我beh tī lín ê地除去惡獸，刀劍也無經過lín ê地。Góa beh siúⁿ-sù pêng-an tī lín ê tōe; lín tó-teh khùn, bô lâng phah-kiaⁿ lín; Góa beh tī lín ê tōe tû-khì ok-siù, to-kiàm iā bô keng-kè lín ê tōe.

7Lín beh趕走對敵，in beh tī lín ê面前倒tī刀下。Lín beh kóaⁿ-cháu tùi-te̍k, in beh tī lín ê bīn-chêng tó tī to-ē.

8Lín五人beh趕走一百人，lín一百人beh趕走一萬人，對敵beh tī lín ê面前倒tī刀下。Lín gō͘ lâng beh kóaⁿ-cháu chi̍t-pah lâng, lín chi̍t-pah lâng beh kóaⁿ-cháu chi̍t-bān lâng, tùi-te̍k beh tī lín ê bīn-chêng tó tī to-ē.

9我beh看顧lín，hō͘ lín生養真chōe，也beh kap lín建立我ê約。Góa beh khòaⁿ-kò͘ lín, hō͘ lín seng-ióng chin-chōe, iā beh kap lín kiàn-li̍p Góa ê iok.

10Lín beh食khǹg久久ê舊五穀，koh為tio̍h新ê，搬出舊ê。Lín beh chia̍h khǹg kú-kú ê kū ngó͘-kok, koh ūi-tio̍h sin ê, poaⁿ-chhut kū-ê.

11我beh tī lín中間立我ê會幕，我ê心也無厭惡lín。Góa beh tī lín tiong-kan li̍p Góa ê hōe-bō͘, Góa ê sim iā bô iàm-ò͘ⁿ lín.

12我beh行tī lín中間，我beh做lín ê上帝，lín beh做我ê百姓。Góa beh kiâⁿ tī lín tiong-kan, Góa beh chòe lín ê Siōng-tè, lín beh chòe Góa ê peh-sìⁿ.

13我是耶和華lín ê上帝，bat chhōa lín出埃及地，免得lín做in ê奴僕；我bat斬斷lín ê擔ê索，hō͘ lín挺身sin來行。Góa sī Iâ-hô-hoa lín ê Siōng-tè, bat chhōa lín chhut Ai-ki̍p tōe, bián-tit lín chòe in ê lô͘-po̍k; Góa bat chām-tn̄g lín ê taⁿ ê soh, hō͘ lín théng-sin lâi kiâⁿ.

14Lín若m̄聽thàn我，m̄守我lóng總ê誡命，Lín nā m̄ thiaⁿ-thàn Góa, m̄ siú Góa lóng-chóng ê kài-bēng,

15lín若棄sak我ê律例，心內厭惡我ê法度，致到無行我一切誡命，背我ê約，lín nā khì-sak Góa ê lu̍t-lē, sim-lāi iàm-ò͘ⁿ Góa ê hoat-tō͘, tì-kàu bô kiâⁿ Góa it-chhè kài-bēng, pōe Góa ê iok,

16我就beh án-ni款待lín；我定tio̍h beh hō͘ lín驚惶、siau瘦、熱病，目睭phah-pháiⁿ，心憂傷；lín beh空空掖種，因為lín ê對敵beh食伊。Góa chiū beh án-ni khoán-thāi lín; Góa tiāⁿ-tio̍h beh hō͘ lín kiaⁿ-hiâⁿ, siau-sán, jia̍t-pīⁿ, ba̍k-chiu phah-pháiⁿ, sim iu-siong; lín beh khang-khang iā-chéng, in-ūi lín ê tùi-te̍k beh chia̍h i.

17我beh對lín變面，lín beh排陣tī對敵ê面前；怨恨lín-ê beh管轄lín；無人追趕，lín也beh逃走。Góa beh tùi lín pìⁿ-bīn, lín beh pāi-tīn tī tùi-te̍k ê bīn-chêng; oàn-hūn lín-ê beh koán-hat lín; bô lâng tui-kóaⁿ, lín iā beh tô-cháu.

18Lín因為chiah-ê tāi-chì若iáu-kú m̄聽thàn我，我就beh為tio̍h lín ê罪加添七倍責罰lín。Lín in-ūi chiah ê tāi-chì nā iáu-kú m̄-thiaⁿ-thàn Góa, Góa chiū beh ūi-tio̍h lín ê chōe ke-thiⁿ chhit-pē chek-hoa̍t lín.

19我beh斷絕lín有勢力ê驕傲；koh beh hō͘ lìn ê天親像鐵，lín ê地親像銅。Góa beh toān-choa̍t lín ū sè-le̍k ê kiau-ngō͘; koh beh hō͘ lìn ê thiⁿ chhin-chhiūⁿ thih, lín ê tōe chhin-chhiūⁿ tâng.

20Lín出力tio̍h磨beh空空，因為lín ê地無出伊ê土產，地 ê樹木也無結伊ê果子。Lín chhut-la̍t tio̍h-bôa beh khang-khang, in-ūi lín ê tōe bô chhut i ê thó͘-sán, tōe ê chhiū-ba̍k iā bô kiat i ê ké-chí.

21Lín行tāi-chì若kap我反對，m̄肯聽thàn我，我就beh照lín ê罪加添七倍降災禍hō͘ lín。Lín kiâⁿ tāi-chì nā kap Góa hoán-tùi, m̄-khéng thiaⁿ-thàn Góa, Góa chiū beh chiàu lín ê chōe ke-thiⁿ chhit-pē kàng chai-ē hō͘ lín.

22我beh差野獸到lín ê中間，咬食lín ê kiáⁿ兒，吞滅lín ê cheng-siⁿ，hō͘ lín ê人額減少，lín ê路拋荒。Góa beh chhe iá-siù kàu lín ê tiong-kan, kā-chia̍h lín ê kiáⁿ-jî, thun-bia̍t lín ê cheng-siⁿ, hō͘ lín ê lâng-gia̍h kiám-chió, lín ê lō͘ pha-hng.

23Lín因為chiah-ê iáu-kú無受責督來歸向我，行tāi-chì反對我，Lín in-ūi chiah-ê iáu-kú bô siū chek-tok lâi kui-ǹg Góa, kiâⁿ tāi-chì hoán-tùi Góa,

24我也beh行tāi-chì來反對lín；我本身beh因為lín ê罪，phah lín七倍重。Góa iā beh kiâⁿ tāi-chì lâi hoán-tùi lín; Góa pún-sin beh in-ūi lín ê chōe, phah lín chhit-pē tāng.

25我koh beh hō͘刀劍臨到lín，報應lín背約ê罪；lín beh受圍困tī城內；我beh降瘟疫tī lín中間；也beh交lín tī對敵ê手。Góa koh beh hō͘ to-kiàm lîm-kàu lín, pò-èng lín pōe-iok ê chōe; lín beh siū ûi-khùn tī siâⁿ-lāi; Góa beh kàng un-e̍k tī lín tiong-kan; iā beh kau lín tī tùi-te̍k ê chhiú.

26我斷絕lín所óa靠ê米糧；hit時beh有十個婦人人tī一個爐kā lín pek餅，秤lín ê額ê食物hō͘ lín，lín beh食，也食bōe飽。Góa toān-choa̍t lín só͘ óa-khò ê bí-niû; hit-sî beh ū cha̍p ê hū-jîn-lâng tī chi̍t ê lô͘ kā lín pek-piáⁿ, chhìn lín ê gia̍h ê chia̍h-mi̍h hō͘ lín, lín beh chia̍h, iā chia̍h bōe pá.

27Lín因為這一切ê事，若iáu-kú m̄聽thàn我，也行tāi-chì反對我，Lín in-ūi che it-chhè ê sū, nā iáu-kú m̄ thiaⁿ-thàn Góa, iā kiâⁿ tāi-chì hoán-tùi Góa,

28我就beh發出大受氣，行tāi-chì反對lín；我本身因為lín ê罪，責罰lín七倍ê重。Góa chiū beh hoat-chhut tōa siū-khì, kiâⁿ tāi-chì hoán-tùi lín; Góa pún-sin in-ūi lín ê chōe, chek-hoa̍t lín chhit-pē ê tāng.

29Koh lín beh食lín ê kiáⁿ ê肉；lín ê cha-bó͘-kiáⁿ ê肉lín也beh食。Koh lín beh chia̍h lín ê kiáⁿ ê bah; lín ê cha-bó͘-kiáⁿ ê bah lín iā beh chia̍h.

30我也beh毀壞lín ê山頭壇，剉lín ê日像，將lín ê身屍hiat tī lín ê偶像ê身上；我ê心也beh厭惡lín。Góa iā beh húi-hoāi lín ê soaⁿ-thâu-tôaⁿ, chhò lín ê ji̍t-siōng, chiong lín ê sin-si hiat tī lín ê ngó͘-siōng ê sin-chiūⁿ; Góa ê sim iā beh iàm-ò͘ⁿ lín.

31我beh hō͘ lín ê城拋荒，hō͘ lín chiah-ê聖所荒廢；我也無beh phīⁿ lín ê香料ê芳味。Góa beh hō͘ lín ê siâⁿ pha-hng, hō͘ lín chiah ê sèng-só͘ hong-hòe; Góa iā bô beh phīⁿ lín ê hiuⁿ-liāu ê phang-bī.

32我beh hō͘地荒廢；lín ê對敵khiā tī-hia ê，beh因為án-ni來gông-ngia̍h。Góa beh hō͘ tōe hong-hòe; lín ê tùi-te̍k khiā tī-hia ê, beh in-ūi án-ni lâi gông-ngia̍h.

33我beh四散lín tī列邦中；我也beh拔刀追趕lín；lín ê地beh荒廢，lín ê城beh拋荒。Góa beh sì-sòaⁿ lín tī lia̍t-pang tiong; Góa iā beh pu̍ih to tui-kóaⁿ lín; lín ê tōe beh hong-hòe, lín ê siâⁿ beh pha-hng.

34Lín tī對敵ê地khiā起ê時，lín ê地拋荒beh享受伊ê安歇；tī hit時地beh歇睏，享受伊ê安歇。Lín tī tùi-te̍k ê tōe khiā-khí ê sî, lín ê tōe pha-hng beh hióng-siū i ê an-hioh; tī hit-sî tōe beh hioh-khùn, hióng-siū i ê an-hioh.

35地拋荒jōa久，就beh得tio̍h安歇hiah-久；因為lín tiàm tī-hia ê日，lín chiah-ê安歇ê期伊無得tio̍h安歇。Tōe pha-hng jōa-kú, chiū beh tit-tio̍h an-hioh hiah-kú; in-ūi lín tiàm tī-hia ê ji̍t, lín chiah ê an-hioh ê kî i bô tit-tio̍h an-hioh.

36論到lín所chhun ê人，我beh hō͘ in tī對敵ê地，心驚到暈去；樹葉hō͘風吹振動ê聲追趕in，in beh逃閃，ná親像逃閃刀劍ê；無人追趕伊，也beh跋倒。Lūn-kàu lín só͘ chhun ê lâng, Góa beh hō͘ in tī tùi-te̍k ê tōe, sim kiaⁿ kàu hūn-khì; chhiū-hio̍h hō͘ hong chhe tín-tāng ê siaⁿ tui-kóaⁿ in, in beh tô-siám, ná chhin-chhiūⁿ tô-siám to-kiàm ê; bô lâng tui-kóaⁿ i, iā beh poa̍h-tó.

37無人追趕ê時，in beh大家相khoeh跋倒，親像tī刀劍ê頭前；lín tī對敵ê面前也khiā bōe tiâu。Bô lâng tui-kóaⁿ ê sî, in beh tāi-ke saⁿ-khoeh poa̍h-tó, chhin-chhiūⁿ tī to-kiàm ê thâu-chêng; lín tī tùi-te̍k ê bīn-chêng iā khiā bōe tiâu.

38Lín beh滅無tī列邦中，對敵ê地beh吞食lín。Lín beh bia̍t-bô tī lia̍t-pang-tiong, tùi-te̍k ê tōe beh thun-chia̍h lín.

39Lín所chhun ê人beh tī對敵ê地，因為家己ê罪來消無；也因為祖公ê罪kap in平平消無。Lín só͘ chhun ê lâng beh tī tùi-te̍k ê tōe, in-ūi ka-kī ê chōe lâi siau-bô; iā in-ūi chó͘-kong ê chōe kap in pîⁿ-pîⁿ siau-bô.

40In beh認家己ê罪，kap in祖公ê罪，就是in所干犯我ê罪，koh認家己行tāi-chì反對我；In beh jīn ka-kī ê chōe, kap in chó͘-kong ê chōe, chiū-sī in só͘ kan-hoān Góa ê chōe, koh jīn ka-kī kiâⁿ tāi-chì hoán-tùi Góa;

41所以我行tāi-chì反對in，帶in到對敵ê地；hit時in無受割禮ê心，若有謙卑，甘願受罪ê刑罰，só͘-í Góa kiâⁿ tāi-chì hoán-tùi in, tòa in kàu tùi-te̍k ê tōe; hit-sî in bô siū kat-lé ê sim, nā ū khiam-pi, kam-goān siū chōe ê hêng-hoa̍t,

42我beh記念我kap雅各所立ê約，我beh記念我kap以撒所立ê約，我kap亞伯拉罕所立ê約，我也beh記念chit-ê地。Góa beh kì-liām Góa kap Ngá-kok só͘ li̍p ê iok, Góa beh kì-liām Góa kap Í-sat só͘ li̍p ê iok, Góa kap A-pek-la̍h-hán só͘ li̍p ê iok, Góa iā beh kì-liām chit ê tōe.

43Hit-ê地hō͘ in離開，得tio̍h享受伊ê安歇，tī伊拋荒，in無tī-teh ê時，koh in甘願受罪ê刑罰，因為in棄sak我ê法度，心內厭惡我ê律例；Hit ê tōe hō͘ in lī-khui, tit-tio̍h hióng-siū i ê an-hioh, tī i pha-hng, in bô tī-teh ê sî, koh in kam-goān siū chōe ê hêng-hoa̍t, in-ūi in khì-sak Góa ê hoat-tō͘, sim-lāi iàm-ò͘ⁿ Góa ê lu̍t-lē;

44雖然án-ni，in tī對敵ê地ê時，我iáu-kú無棄sak in，也無厭惡in，來一盡滅in，致到背我kap in所立ê約；因為我是耶和華in ê上帝。sui-jiân án-ni, in tī tùi-te̍k ê tōe ê sî, Góa iáu-kú bô khì-sak in, iā bô iàm-ò͘ⁿ in, lâi it-chīn bia̍t in, tì-kàu pōe Góa kap in só͘ li̍p ê iok; in-ūi Góa sī Iâ-hô-hoa in ê Siōng-tè.

45我也beh為tio̍h in ê緣故，記念我kap in ê祖公所立ê約，就是我tī異邦-人ê面前chhōa in出埃及地 ê，beh做in ê上帝ê；我是耶和華。Góa iā beh ūi-tio̍h in ê iân-kò͘, kì-liām Góa kap in ê chó͘-kong só͘ li̍p ê iok, chiū-sī Góa tī īⁿ-pang-lâng ê bīn-chêng chhōa in chhut Ai-ki̍p tōe ê, beh chòe in ê Siōng-tè-ê; Góa sī Iâ-hô-hoa.

46Chiah-ê律例，法度，教示，就是耶和華tī伊本身kap以色列人ê中間，tī西奈山，託摩西所立ê。Chiah ê lu̍t-lē, hoat-tō͘, kà-sī, chiū-sī Iâ-hô-hoa tī I pún-sin kap Í-sek-lia̍t lâng ê tiong-kan, tī Se-nái soaⁿ, thok Mô͘-se só͘ li̍p ê.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人講：用人下特別ê願，tio̍h照你所估ê身價歸hō͘耶和華。Lí tio̍h hoan-hù Í-sek-lia̍t lâng kóng, Ēng lâng hē te̍k-pia̍t ê goān, tio̍h chiàu lí só͘ kó͘ ê sin-kè kui hō͘ Iâ-hô-hoa.

3你所估ê價，ta-po͘人tùi二十歲到六十歲，tio̍h估伊ê價銀五十sià-khek-le̍k，照聖所ê sià-khek-le̍k。Lí só͘ kó͘ ê kè, ta-po͘-lâng tùi jī-cha̍p hè kàu la̍k-cha̍p hè, tio̍h kó͘ i ê kè-gûn gō͘-cha̍p sià-khek-le̍k, chiàu sèng-só͘ ê sià-khek-le̍k.

4若是cha-bó͘人，你tio̍h估伊ê價三十sià-khek-le̍k。Nā sī cha-bó͘-lâng, lí tio̍h kó͘ i ê kè saⁿ-cha̍p sià-khek-le̍k.

5若是tùi五歲到二十歲，ta-po͘-ê你tio̍h估伊ê價二十sià-khek-le̍k；cha-bó͘人估十sià-khek-le̍k。Nā sī tùi gō͘-hè kàu jī-cha̍p hè, ta-po͘-ê lí tio̍h kó͘ i ê kè jī-cha̍p sià-khek-le̍k; cha-bó͘-lâng kó͘ cha̍p sià-khek-le̍k.

6若是tùi滿月到五歲，ta-po͘-ê你tio̍h估價銀五sià-khek-le̍k，cha-bó͘-ê tio̍h估價銀三sià-khek-le̍k。Nā sī tùi móa-ge̍h kàu gō͘-hè, ta-po͘-ê lí tio̍h kó͘ kè-gûn gō͘ sià-khek-le̍k, cha-bó͘-ê tio̍h kó͘ kè-gûn saⁿ sià-khek-le̍k.

7若是對六十歲以上，ta-po͘人你tio̍h估價銀十五sià-khek-le̍k，cha-bó͘人十sià-khek-le̍k。Nā sī tùi la̍k-cha̍p hè í-chiūⁿ, ta-po͘-lâng lí tio̍h kó͘ kè-gûn cha̍p-gō͘ sià-khek-le̍k, cha-bó͘-lâng cha̍p sià-khek-le̍k.

8Hit人若sòng-hiong，bōe照你所估ê價，就tio̍h hō͘伊khiā tī祭司ê面前，祭司tio̍h估伊；照下願ê人ê氣力，祭司tio̍h估伊。Hit-lâng nā sòng-hiong, bōe chiàu lí só͘ kó͘ ê kè, chiū tio̍h hō͘ i khiā tī chè-si ê bīn-chêng, chè-si tio̍h kó͘ i; chiàu hē-goān ê lâng ê khùi-la̍t, chè-si tio̍h kó͘ i.

9若是cheng-siⁿ，就是人獻hō͘耶和華做禮物ê，lóng tio̍h分別伊做聖。Nā sī cheng-siⁿ, chiū-sī lâng hiàn hō͘ Iâ-hô-hoa chòe lé-mi̍h ê, lóng tio̍h hun-piat i chòe-sèng.

10人m̄-thang改換，也m̄-thang對換，或是用好ê換pháiⁿ-ê，á是用pháiⁿ-ê 換好ê；若用cheng-siⁿ對換cheng-siⁿ，所下ê kap所換ê lóng tio̍h分別伊做聖。Lâng m̄-thang kóe-ōaⁿ, iā m̄-thang tùi-ōaⁿ, he̍k-sī ēng hó-ê ōaⁿ pháiⁿ-ê, á-sī ēng pháiⁿ-ê ōaⁿ hó-ê; nā ēng cheng-siⁿ tùi-ōaⁿ cheng-siⁿ, só͘ hē ê kap só͘ ōaⁿ ê lóng tio̍h hun-piat i chòe-sèng.

11若無清氣ê cheng-siⁿ，人所m̄-thang獻hō͘耶和華做禮物ê，就tio̍h hō͘ cheng-siⁿ khiā tī祭司ê面前；Nā bô chheng-khì ê cheng-siⁿ, lâng só͘ m̄-thang hiàn-hō͘ Iâ-hô-hoa chòe lé-mi̍h ê, chiū tio̍h hō͘ cheng-siⁿ khiā tī chè-si ê bīn-chêng;

12祭司就tio̍h估伊ê價；cheng-siⁿ是好是pháiⁿ，你祭司所估ê án-ni就是。chè-si chiū tio̍h kó͘ i ê kè; cheng-siⁿ sī hó sī pháiⁿ, lí chè-si só͘-kó͘-ê án-ni chiū-sī.

13伊若一定beh贖回，就tio̍h tī你所估ê價錢以外，加添五份ê一份。I nā it-tēng beh sio̍k-hôe, chiū tio̍h tī lí só͘ kó͘ ê kè-chîⁿ í-gōa, ke-thiⁿ gō͘-hūn ê chi̍t-hūn.

14人用厝分別做聖，歸hō͘耶和華，祭司就tio̍h估伊ê價，厝是好是pháiⁿ；祭司所估ê價，照án-ni定tio̍h。Lâng ēng chhù hun-piat chòe-sèng, kui hō͘ Iâ-hô-hoa, chè-si chiū tio̍h kó͘ i ê kè, chhù sī hó sī pháiⁿ; chè-si só͘ kó͘ ê kè, chiàu án-ni tiāⁿ-tio̍h.

15分別伊ê厝做聖ê，若beh贖回，就tio̍h tī你所估ê價銀以外，加添五份ê一份；厝照舊歸伊。Hun-piat i ê chhù chòe-sèng ê, nā beh sio̍k-hôe, chiū tio̍h tī lí só͘ kó͘ ê kè-gûn í-gōa, ke-thiⁿ gō͘-hūn ê chi̍t-hūn; chhù chiàu-kū kui i.

16人若tùi伊ê業ê地分別一份做聖歸hō͘耶和華，你tio̍h照伊掖種ê chōe少估伊ê價；若也大麥一hō-mûi-jíⁿ，價銀tio̍h五十sià-khek-le̍k。Lâng nā tùi i ê gia̍p ê tōe hun-piat chi̍t-hūn chòe-sèng kui hō͘ Iâ-hô-hoa, lí tio̍h chiàu i iā-chéng ê chōe-chió kó͘ i ê kè; nā iā tōa-be̍h chi̍t hō-mûi-jíⁿ, kè-gûn tio̍h gō͘-cha̍p sià-khek-le̍k.

17伊若tùi禧年乞將地分別做聖，就tio̍h照你所估ê價錢來定tio̍h。I nā tùi hi-liân khí chiong tōe hun-piat chòe-sèng, chiū tio̍h chiàu lí só͘ kó͘ ê kè-chîⁿ lâi tiāⁿ-tio̍h.

18設使伊tī禧年以後將地分別做聖，祭司就tio̍h tùi hit-tia̍p到禧年所chhun ê年額，算伊ê價錢；也tio̍h tùi你所估ê，來減少伊。Siat-sú i tī hi-liân í-āu chiong tōe hun-piat chòe-sèng, chè-si chiū tio̍h tùi hit-tia̍p kàu hi-liân só͘ chhun ê nî-gia̍h, sǹg i ê kè-chîⁿ; iā tio̍h tùi lí só͘ kó͘-ê, lâi kiám-chió i.

19分別伊ê地做聖ê，若一定beh贖回，伊就tio̍h tī你所估ê價錢以外，加添五份ê一份；地就定tio̍h歸伊。Hun-piat i ê tōe chòe-sèng ê, nā it-tēng beh sio̍k-hôe, i chiū tio̍h tī lí só͘ kó͘ ê kè-chîⁿ í-gōa, ke-thiⁿ gō͘-hūn ê chi̍t-hūn; tōe chiū tiāⁿ-tio̍h kui i.

20伊若m̄贖回hit-ê地，á是將地賣hō͘別人，就bōe能koh贖得。I nā m̄ sio̍k-hôe hit ê tōe, á-sī chiong tōe bōe hō͘ pa̍t-lâng, chiū bōe-ōe koh sio̍k-tit.

21Hit-ê地到禧年ê時已經交出，tio̍h做聖歸hō͘耶和華，親像永遠獻ê地一樣，tio̍h歸hō͘祭司做業。Hit ê tōe kàu hi-liân ê sî í-keng kau-chhut, tio̍h chòe-sèng kui hō͘ Iâ-hô-hoa, chhin-chhiūⁿ éng-oán hiàn ê tōe chi̍t-iūⁿ, tio̍h kui hō͘ chè-si chòe-gia̍p.

22伊若將所買ê一塊地，m̄是伊產業ê地，分別做聖歸hō͘耶和華；I nā chiong só͘ bóe ê chi̍t tè tōe, m̄-sī i sán-gia̍p ê tōe, hun-piat chòe-sèng kui hō͘ Iâ-hô-hoa;

23祭司就tio̍h用你所估ê價錢kā伊推算到禧年；hit日伊tio̍h the̍h出你所估ê價錢做聖，歸hō͘耶和華。chè-si chiū tio̍h ēng lí só͘ kó͘ ê kè-chîⁿ kā i chhui-sǹg kàu hi-liân; hit-ji̍t i tio̍h the̍h-chhut lí só͘ kó͘ ê kè-chîⁿ chòe-sèng, kui hō͘ Iâ-hô-hoa.

24禧年已經到，hit-ê地tio̍h歸賣主，就是hit-ê承接業ê原主。Hi-liân í-keng kàu, hit ê tōe tio̍h kui bōe-chú, chiū-sī hit ê sêng-chiap gia̍p ê goân-chú.

25見若你所估ê價銀，lóng tio̍h照聖所ê sià-khek-le̍k；二十kùi-la̍h做一sià-khek-le̍k。Kìⁿ-nā lí só͘ kó͘ ê kè-gûn, lóng tio̍h chiàu sèng-só͘ ê sià-khek-le̍k; jī-cha̍p kùi-la̍h chòe chi̍t sià-khek-le̍k.

26獨獨cheng-siⁿ ê中間頭水生ê，無論是牛是羊，已經歸耶和華做頭水生ê，人m̄-thang koh分別伊做聖，因為這本是耶和華ê。To̍k-to̍k cheng-siⁿ ê tiong-kan thâu-chúi-siⁿ ê, bô-lūn sī gû sī iûⁿ, í-keng kui Iâ-hô-hoa chòe thâu-chúi-siⁿ ê, lâng m̄-thang koh hun-piat i chòe-sèng, in-ūi che pún sī Iâ-hô-hoa ê.

27若是無清氣ê cheng-siⁿ所生ê，就tio̍h照你所估ê價，加五份一來贖回伊；若m̄贖回，就tio̍h照你所估ê價來賣。Nā sī bô chheng-khì ê cheng-siⁿ só͘ siⁿ ê, chiū tio̍h chiàu lí só͘ kó͘ ê kè, ke gō͘-hūn-chi̍t lâi sio̍k-hôe i; nā m̄ sio̍k-hôe, chiū tio̍h chiàu lí só͘ kó͘ ê kè lâi bōe.

28獨獨一切永遠獻ê，就是人tùi伊所有ê永遠獻hō͘耶和華，無論是人，是cheng-siⁿ，á是伊產業ê地，lóng m̄-thang賣，也m̄-thang贖回；伊永遠獻ê是至聖，歸hō͘耶和華。To̍k-to̍k it-chhè éng-oán hiàn ê, chiū-sī lâng tùi i só͘ ū ê éng-oán hiàn-hō͘ Iâ-hô-hoa, bô-lūn sī lâng, sī cheng-siⁿ, á-sī i sán-gia̍p ê tōe, lóng m̄-thang bōe, iā m̄-thang sio̍k-hôe; i éng-oán hiàn-ê sī chì-sèng, kui hō͘ Iâ-hô-hoa.

29見若永遠獻ê就是tùi人ê中間永遠獻，lóng m̄-thang贖；伊的確tio̍h受死。Kìⁿ-nā éng-oán hiàn-ê chiū-sī tùi lâng ê tiong-kan éng-oán hiàn, lóng m̄-thang sio̍k; i tek-khak tio̍h siū sí.

30見若地上所有ê，無論是土產，á是樹頂ê果子，十份ê一份是耶和華ê，做聖歸hō͘耶和華。Kìⁿ-nā tōe-chiūⁿ só͘ ū ê, bô-lūn sī thó͘-sán, á-sī chhiū-téng ê ké-chí, cha̍p-hūn ê chi̍t-hūn sī Iâ-hô-hoa ê, chòe-sèng kui hō͘ Iâ-hô-hoa.

31人若beh贖回chit-ê十份一ê甚麼物，就tio̍h加五份ê一份。Lâng nā beh sio̍k-hôe chit ê cha̍p-hūn-chi̍t ê sím-mi̍h mi̍h, chiū tio̍h ke gō͘-hūn ê chi̍t-hūn.

32見若牛群，羊群ê十份一，經過柺á下ê，每第十隻tio̍h做聖歸hō͘耶和華。Kìⁿ-nā gû-kûn, iûⁿ-kûn ê cha̍p-hūn-chi̍t, keng-kè koáiⁿ-á-ē ê, múi tē-cha̍p-chiah tio̍h chòe-sèng kui hō͘ Iâ-hô-hoa.

33無管伊是好pháiⁿ，m̄-thang對換；若beh對換，就所對換ê kap本然ê cheng-siⁿ，lóng tio̍h做聖，bōe贖得。Bô-koán i sī hó-pháiⁿ, m̄-thang tùi-ōaⁿ; nā beh tùi-ōaⁿ, chiū só͘ tùi-ōaⁿ-ê kap pún-jiân ê cheng-siⁿ, lóng tio̍h chòe-sèng, bōe sio̍k-tit.

34這就是耶和華tī西奈山為tio̍h以色列人所命令摩西chiah-ê命令。Che chiū-sī Iâ-hô-hoa tī Se-nái soaⁿ ūi-tio̍h Í-sek-lia̍t lâng só͘ bēng-lēng Mô͘-se chiah ê bēng-lēng.

1以色列人出埃及地以後，第二年，二月初一日，耶和華tī西奈ê曠野tī會幕中吩咐摩西講：Í-sek-lia̍t lâng chhut Ai-ki̍p tōe í-āu, tē-jī nî, jī-ge̍h chhoe-it ji̍t, Iâ-hô-hoa tī Se-nái ê khòng-iá tī hōe-bō͘-tiong hoan-hù Mô͘-se kóng,

2Lín tio̍h將以色列全會ê總數，照in ê家口宗族，照人名ê數額，算in ta-po͘ ê人丁。Lín tio̍h chiong Í-sek-lia̍t choân-hōe ê chóng-sò͘, chiàu in ê ke-kháu chong-cho̍k, chiàu lâng-miâ ê siàu-gia̍h, sǹg in ta-po͘ ê jîn-teng.

3見若以色列中，tùi二十歲以上，能出去交戰ê，你kap亞倫tio̍h照in ê軍隊來點算伊。Kìⁿ-nā Í-sek-lia̍t tiong, tùi jī-cha̍p hè í-chiūⁿ, ōe chhut khì kau-chiàn ê, lí kap A-lûn tio̍h chiàu in ê kun-tūi lâi tiám-sǹg i.

4每支派中，tio̍h有一人，做in ê族長ê，來幫贊lín。Múi chi-phài-tiong, tio̍h ū chi̍t-lâng, chòe in ê cho̍k-tiúⁿ ê, lâi pang-chān lín.

5Kap lín khiā做堆ê人，in ê名字記tī下底。屬Liû-piān ê，有Sī-tiu-jíⁿ ê kiáⁿ Í-lī-siok。Kap lín khiā chòe-tui ê lâng, in ê miâ-jī kì tī ē-tóe. Sio̍k Liû-piān ê, ū Sī-tiu-jíⁿ ê kiáⁿ Í-lī-siok.

6屬西門ê，有So͘-lī-sa-tāi ê kiáⁿ Sī-lō͘-bia̍t。Sio̍k Se-biān ê, ū So͘-lī-sa-tāi ê kiáⁿ Sī-lō͘-bia̍t.

7屬猶大ê，有A-bí-ná-ta̍t ê kiáⁿ，Ná-sūn。Sio̍k Iû-tāi ê, ū A-bí-ná-ta̍t ê kiáⁿ, Ná-sūn.

8屬Í-sat-ka ê，有So͘-ap ê kiáⁿ，Ná-thán-gia̍p。Sio̍k Í-sat-ka ê, ū So͘-ap ê kiáⁿ, Ná-thán-gia̍p.

9屬Se-pò͘-lûn ê，有Hi-lûn ê kiáⁿ，Í-lī-ap。Sio̍k Se-pò͘-lûn ê, ū Hi-lûn ê kiáⁿ, Í-lī-ap.

10約瑟ê kiáⁿ孫屬Í-hoat-liân ê，有A-bí-hut ê kiáⁿ，Í-lī-sa-má；屬Má-ná-se ê，有Pí-tāi-siok ê kiáⁿ，Ka-má-lia̍t。Iok-sek ê kiáⁿ-sun sio̍k Í-hoat-liân ê, ū A-bí-hut ê kiáⁿ, Í-lī-sa-má; sio̍k Má-ná-se ê, ū Pí-tāi-siok ê kiáⁿ, Ka-má-lia̍t.

11屬便雅憫ê，有Ki-to-nî ê kiáⁿ，A-pí-tàn。Sio̍k Piān-ngá-bín ê, ū Ki-to-nî ê kiáⁿ, A-pí-tàn.

12屬Tàn ê，有A-bí-sa-tāi ê kiáⁿ，A-hi-í-siā。Sio̍k Tàn ê, ū A-bí-sa-tāi ê kiáⁿ, A-hi-í-siā.

13屬A-siat ê，有Gô-lân ê kiáⁿ，Phàⁿ-kiat。Sio̍k A-siat ê, ū Gô-lân ê kiáⁿ, Phàⁿ-kiat.

14屬Ka-tek ê，有Tiu-jíⁿ ê kiáⁿ，Í-lī-ngá-sat。Sio̍k Ka-tek ê, ū Tiu-jíⁿ ê kiáⁿ, Í-lī-ngá-sat.

15屬Ná-hut-tha-lí ê，有Í-lâm ê kiáⁿ，A-hi-la̍h。Sio̍k Ná-hut-tha-lí ê, ū Í-lâm ê kiáⁿ, A-hi-la̍h.

16Chiah-ê lóng是tùi會中揀選ê，ta̍k-ê做in本支派ê首領，lóng是以色列軍隊中ê統領。Chiah-ê lóng sī tùi hōe-tiong kéng-soán ê, ta̍k-ê chòe in pún chi-phài ê siú-léng, lóng sī Í-sek-lia̍t kun-tūi-tiong ê thóng-léng.

17摩西、亞倫就chhōa hiah-ê受記名ê人；tī二月初一日，召集會眾；Mô͘-se A-lûn chiū chhōa hiah ê siū kì-miâ ê lâng; tī jī-ge̍h chhoe-it ji̍t, tiàu-chi̍p hōe-chiòng;

18in就照in ê人丁，tùi二十歲以上，照in ê名額，照in ê家口宗族，排列in ê世系。in chiū chiàu in ê jîn-teng, tùi jī-cha̍p hè í-siōng, chiàu in ê miâ-gia̍h, chiàu in ê ke-kháu chong-cho̍k, pâi-lia̍t in ê sè-hē.

19耶和華án-ni命令摩西，伊就tī西奈ê曠野點算in。Iâ-hô-hoa án-ni bēng-lēng Mô͘-se, i chiū tī Se-nái ê khòng-iá tiám-sǹg in.

20以色列ê大kiáⁿ，Liû-piān kiáⁿ孫ê世系，照in ê家口，in ê宗族，照人名ê數額，照in ê人丁，tùi二十歲以上ê ta-po͘-ê，能出去交戰ê；Í-sek-lia̍t ê tōa-kiáⁿ, Liû-piān kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, chiàu in ê jîn-teng, tùi jī-cha̍p hè í-chiūⁿ ê ta-po͘-ê, ōe chhut-khì kau-chiàn-ê;

21屬Liû-piān ê支派計算ê，四萬六千五百名。sio̍k Liû-piān ê chi-phài kè-sǹg-ê, sì-bān la̍k-chheng gō͘-pah miâ.

22西門kiáⁿ孫ê世系，照in ê家口，in ê宗族，計算ê，照人名ê數額，照in ê人丁，tùi二十歲以上ê ta-po͘，能出去交戰ê；Se-biān kiáⁿ-sun ê sè-hē, chiàu in ê ke-kháu, in ê chong-cho̍k, kè-sǹg-ê, chiàu lâng-miâ ê siàu-gia̍h, chiàu in ê jîn-teng, tùi jī-cha̍p hè í-chiūⁿ ê ta-po͘, ōe chhut-khì kau-chiàn-ê;

23屬西門ê支派計算ê，五萬九千三百名。sio̍k Se-biān ê chi-phài kè-sǹg-ê, gō͘-bān káu-chheng saⁿ-pah miâ.

24Ka-tek kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Ka-tek kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

25屬Ka-tek ê支派，計算ê，四萬五千六百五十名。sio̍k Ka-tek ê chi-phài, kè-sǹg-ê, sì-bān gō͘-chheng la̍k-pah gō͘-cha̍p miâ.

26猶大kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Iû-tāi kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

27屬猶大ê支派，計算ê，七萬四千六百名。sio̍k Iû-tāi ê chi-phài, kè-sǹg-ê, chhit-bān sì-chheng la̍k-pah miâ.

28Í-sat-ka kiáⁿ孫ê世系，照in ê家口，in ê宗族，照人名ê數額，tùi二十歲以上能出去交戰ê；Í-sat-ka kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ ōe chhut-khì kau-chiàn-ê;

29屬Í-sat-ka ê支派，計算ê，五萬四千四百名。sio̍k Í-sat-ka ê chi-phài, kè-sǹg-ê, gō͘-bān sì-chheng sì-pah miâ.

30Se-pò͘-lûn kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Se-pò͘-lûn kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

31屬Se-pò͘-lûn ê支派，計算ê，五萬七千四百名。sio̍k Se-pò͘-lûn ê chi-phài, kè-sǹg-ê, gō͘-bān chhit-chheng sì-pah miâ.

32約瑟ê kiáⁿ孫，屬2-hoat-liân kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Iok-sek ê kiáⁿ-sun, sio̍k Í-hoat-liân kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

33屬Í-hoat-liân ê支派計算ê，四萬連五百名。sio̍k Í-hoat-liân ê chi-phài, kè-sǹg-ê, sì-bān liân gō͘-pah miâ.

34Má-ná-se kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Má-ná-se kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

35屬Má-ná-se ê支派，計算ê，三萬兩千兩百名。sio̍k Má-ná-se ê chi-phài, kè-sǹg-ê, saⁿ-bān nn̄g-chheng nn̄g-pah miâ.

36便雅憫kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Piān-ngá-bín kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

37屬便雅憫ê支派，計算ê，三萬五千四百名。sio̍k Piān-ngá-bín ê chi-phài, kè-sǹg-ê, saⁿ-bān gō͘-chheng sì-pah miâ.

38Tàn kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Tàn kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

39屬Tàn ê支派，計算ê，六萬兩千七百名。sio̍k Tàn ê chi-phài, kè-sǹg-ê, la̍k-bān nn̄g-chheng chhit-pah miâ.

40A-siat kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；A-siat kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

41屬A-siat ê支派，計算ê，四萬一千五百名。sio̍k A-siat ê chi-phài, kè-sǹg-ê, sì-bān chi̍t-chheng gō͘-pah miâ.

42Ná-hut-tha-lī kiáⁿ孫ê世系，照in ê家口，in ê宗族，照人名ê數額，tùi二十歲以上，能出去交戰ê；Ná-hut-tha-lī kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê siàu-gia̍h, tùi jī-cha̍p hè í-chiūⁿ, ōe chhut-khì kau-chiàn-ê;

43屬Ná-hut-tha-lī ê支派，計算ê，五萬三千四百名。sio̍k Ná-hut-tha-lī ê chi-phài, kè-sǹg-ê, gō͘-bān saⁿ-chheng sì-pah miâ.

44Chiah-ê lóng是計算ê，是摩西、亞倫kap以色列十二個首領所算ê；in ta̍k-ê代表in ê宗族。Chiah-ê lóng sī kè-sǹg-ê, sī Mô͘-se A-lûn kap Í-sek-lia̍t cha̍p-jī ê siú-léng só͘-sǹg-ê; in ta̍k-ê tāi-piáu in ê chong-cho̍k.

45Án-ni以色列人計算ê，照伊ê宗族，tùi二十歲以上，見若以色列中能出去交戰ê人；Án-ni Í-sek-lia̍t lâng kè-sǹg-ê, chiàu i ê chong-cho̍k, tùi jī-cha̍p hè í-chiūⁿ, kìⁿ-nā Í-sek-lia̍t-tiong ōe chhut-khì kau-chiàn ê lâng;

46就是一切計算ê共六十萬連三千五百五十名。chiū-sī it-chhè kè-sǹg-ê kiōng la̍k-cha̍p-bān liân saⁿ-chheng gō͘-pah gō͘-cha̍p miâ.

47獨獨利未人照祖宗ê支派，無算在內。To̍k-to̍k Lī-bī lâng chiàu chó͘-chong ê chi-phài, bô sǹg chāi-lāi.

48因為耶和華bat吩咐摩西講：In-ūi Iâ-hô-hoa bat hoan-hù Mô͘-se kóng,

49獨獨利未支派你m̄-thang點算，也m̄-thang tī以色列中算in ê總額。To̍k-to̍k Lī-bī chi-phài lí m̄-thang tiám-sǹg, iā m̄-thang tī Í-sek-lia̍t-tiong sǹg in ê chóng-gia̍h.

50獨獨tio̍h派利未人管理證據ê會幕，kap其中一切ê器具，kap一切屬tī hit內面ê；in tio̍h扛會幕kap其中一切ê器具，也tio̍h伺候會幕，tī伊ê四圍安營。To̍k-to̍k tio̍h phài Lī-bī lâng koán-lí chèng-kù ê hōe-bō͘, kap kî-tiong it-chhè ê khì-kū, kap it-chhè sio̍k tī hí lāi-bīn-ê; in tio̍h kng hōe-bō͘ kap kî-tiong it-chhè ê khì-kū, iā tio̍h su-hāu hōe-bō͘, tī i ê sì-ûi an-iâⁿ.

51會幕beh起身ê時，tio̍h利未人拆伊；會幕beh搭ê時，tio̍h利未人khiā伊；以外ê人近óa伊，的確tio̍h受死。Hōe-bō͘ beh khí-sin ê sî, tio̍h Lī-bī lâng thiah i; hōe-bō͘ beh tah ê sî, tio̍h Lī-bī lâng khiā i; í-gōa ê lâng kūn-óa i, tek-khak tio̍h siū sí.

52以色列人搭布棚，各照in ê軍隊，各歸in ê本營，各歸in ê大旗。Í-sek-lia̍t lâng tah pò͘-pîⁿ, kok chiàu in ê kun-tūi, kok kui in ê pún-iâⁿ, kok kui in ê tōa-kî.

53獨獨利未人tio̍h tī證據ê會幕四圍安營，免得大受氣臨到tī以色列ê會眾；利未人也tio̍h守證據ê會幕ê責成。To̍k-to̍k Lī-bī lâng tio̍h tī chèng-kù ê hōe-bō͘ sì-ûi an-iâⁿ, bián-tit tōa siū-khì lîm-kàu tī Í-sek-lia̍t ê hōe-chiòng; Lī-bī lâng iā tio̍h siú chèng-kù ê hōe-bō͘ ê chek-sêng.

54以色列人就án-ni行；見若耶和華所命令摩西ê，in就照án-ni行。Í-sek-lia̍t lâng chiū án-ni kiâⁿ; kìⁿ-nā Iâ-hô-hoa só͘ bēng-lēng Mô͘-se ê, in chiū chiàu án-ni kiâⁿ.