1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h吩咐以色列人講：若有人犯罪，錯誤犯tio̍h耶和華所命令m̄-thang行ê一項；Lí tio̍h hoan-hù Í-sek-lia̍t lâng kóng, Nā ū lâng hoān-chōe, chhò-gō͘ hoān-tio̍h Iâ-hô-hoa só͘ bēng-lēng m̄-thang kiâⁿ ê chi̍t-hāng;

3若受抹油ê祭司犯罪，連累百姓tī罪，就tio̍h因為伊所犯ê罪，用無瑕疵ê牛káng-á，獻hō͘耶和華做贖罪祭。nā siū boah-iû ê chè-si hoān-chōe, liân-lūi peh-sìⁿ tī chōe, chiū tio̍h in-ūi i só͘ hoān ê chōe, ēng bô hâ-chhû ê gû-káng-á, hiàn hō͘ Iâ-hô-hoa chòe sio̍k-chōe-chè.

4伊tio̍h牽牛káng-á到會幕門口，tī耶和華ê面前，按手tī牛káng-á ê頭殼頂，thâi牛káng-á tī耶和華ê面前。I tio̍h khan gû-káng-á kàu hōe-bō͘ mn̂g-kháu, tī Iâ-hô-hoa ê bīn-chêng, hōaⁿ-chhiú tī gû-káng-á ê thâu-khak-téng, thâi gû-káng-á tī Iâ-hô-hoa ê bīn-chêng.

5受抹油ê祭司tio̍h取淡薄牛káng ê血，帶到會幕。Siū boah-iû ê chè-si tio̍h chhú tām-po̍h gû-káng ê huih, tòa-kàu hōe-bō͘.

6祭司tio̍h用指頭á ùn血，tī耶和華ê面前，tùi聖所ê帳籬前，hiù血七pái。Chè-si tio̍h ēng chńg-thâu-á ùn-huih, tī Iâ-hô-hoa ê bīn-chêng, tùi sèng-só͘ ê tiùⁿ-lî chêng, hiù huih chhit-pái.

7祭司koh tio̍h用淡薄血抹tī會幕內，tī耶和華ê面前，香壇hiah-ê角；伊也tio̍h用牛káng-á ê血lóng piàⁿ tī會幕門口燒祭ê壇腳。Chè-si koh tio̍h ēng tām-po̍h huih boah tī hōe-bō͘-lāi, tī Iâ-hô-hoa ê bīn-chêng, hiuⁿ-tôaⁿ hiah ê kak; i iā tio̍h ēng gû-káng-á ê huih lóng piàⁿ tī hōe-bō͘ mn̂g-kháu sio-chè ê tôaⁿ-kha.

8伊tio̍h用贖罪祭ê牛káng-á所有ê油lóng the̍h起來，用蓋臟腑ê油，kap臟腑所有ê油，I tio̍h ēng sio̍k-chōe-chè ê gû-káng-á só͘ ū ê iû lóng the̍h-khí-lâi, ēng khàm chōng-hú ê iû, kap chōng-hú só͘ ū ê iû,

9以及兩粒腰子，kap in所有ê油，就是óa近腰雙pêng ê油，kap肝裡ê網紗，kap腰子，一概the̍h起來，kap tùi謝恩祭ê牛káng-á所the̍h起來-ê一樣；í-ki̍p nn̄g lia̍p io-chí, kap in só͘ ū ê iû, chiū-sī óa-kūn io siang-pêng ê iû, kap koaⁿ-ni̍h ê bāng-se, kap io-chí, it-khài the̍h-khí-lâi, kap tùi siā-un-chè ê gû-káng-á só͘ the̍h-khí-lâi-ê chi̍t-iūⁿ;

10祭司tio̍h燒hiah-ê tī燒祭ê壇頂。chè-si tio̍h sio hiah-ê tī sio-chè ê tôaⁿ-téng.

11牛káng-á ê皮kap所有ê肉，kap伊ê頭，伊ê腿，伊ê臟腑，伊ê糞，Gû-káng-á ê phê kap só͘ ū ê bah, kap i ê thâu, i ê thúi, i ê chōng-hú, i ê pùn,

12就是ka-nn̂g隻牛káng-á tio̍h帶出營外到清氣ê地，piàⁿ火灰ê所在；用火燒tī柴頂，tī piàⁿ火灰ê所在燒伊。chiū-sī ka-nn̂g-chiah gû-káng-á tio̍h tòa chhut iâⁿ-gōa kàu chheng-khì ê tōe, piàⁿ hé-hu ê só͘-chāi; ēng hé sio tī chhâ-téng, tī piàⁿ hé-hu ê só͘-chāi sio i.

13若是以色列全會行錯，行耶和華所命令m̄-thang行ê一項事，致到有罪，tāi-chì iáu-kú隱密，會眾看無tio̍h ê。Nā sī Í-sek-lia̍t choân-hōe kiâⁿ-chhò, kiâⁿ Iâ-hô-hoa só͘ bēng-lēng m̄-thang kiâⁿ ê chi̍t-hāng sū, tì-kàu ū chōe, tāi-chì iáu-kú ún-ba̍t, hōe-chiòng khòaⁿ bô tio̍h ê.

14到所犯ê罪，人一下知，會眾就tio̍h獻一隻牛káng-á-kiáⁿ做贖罪祭；牽到會幕前。Kàu só͘ hoān ê chōe, lâng chi̍t-ē chai, hōe-chiòng chiū tio̍h hiàn chi̍t chiah gû-káng-á-kiáⁿ chòe sio̍k-chōe-chè; khan kàu hōe-bō͘-chêng.

15會中ê長老就tio̍h tī耶和華ê面前按手tī牛káng-á ê頭殼頂，牛káng-á tio̍h thâi tī耶和華ê面前。Hōe-tiong ê tiúⁿ-ló chiū tio̍h tī Iâ-hô-hoa ê bīn-chêng hōaⁿ-chhiú tī gû-káng-á ê thâu-khak-téng, gû-káng-á tio̍h thâi tī Iâ-hô-hoa ê bīn-chêng.

16受抹油ê祭司tio̍h取淡薄牛káng-á ê血，帶到會幕；Siū-boah-iû ê chè-si tio̍h chhú tām-po̍h gû-káng-á ê huih, tòa kàu hōe-bō͘;

17祭司tio̍h用指頭á ùn血tī耶和華ê面前，tī帳籬ê頭前，hiù七pái。chè-si tio̍h ēng chńg-thâu-á ùn huih tī Iâ-hô-hoa ê bīn-chêng, tī tiùⁿ-lî ê thâu-chêng, hiù chhit pái.

18Koh tio̍h用淡薄血抹tī會幕內，tī耶和華ê面前ê壇hiah-ê角；伊也tio̍h用所有ê血，lóng piàⁿ tī會幕ê門口燒祭ê壇腳。Koh tio̍h ēng tām-po̍h huih boah tī hōe-bō͘-lāi, tī Iâ-hô-hoa ê bīn-chêng ê tôaⁿ hiah ê kak; i iā tio̍h ēng só͘ ū ê huih, lóng piàⁿ tī hōe-bō͘ ê mn̂g-kháu sio-chè ê tôaⁿ-kha.

19Tio̍h將所有ê油lóng the̍h起來，燒tī壇頂。Tio̍h chiong só͘ ū ê iû lóng the̍h-khí-lâi, sio tī tôaⁿ-téng.

20Tio̍h行tī chit隻牛káng-á，親像所行tī贖罪祭ê牛káng-á，tio̍h照án-ni行；祭司tio̍h án-ni替in贖罪，in就beh得tio̍h赦免。Tio̍h kiâⁿ tī chit chiah gû-káng-á, chhin-chhiūⁿ só͘ kiâⁿ tī sio̍k-chōe-chè ê gû-káng-á, tio̍h chiàu án-ni kiâⁿ; chè-si tio̍h án-ni thòe in sio̍k-chōe, in chiū beh tit-tio̍h sià-bián.

21伊tio̍h將牛káng-á帶出營外燒伊，親像燒頭一隻牛káng-á一樣；這是會眾ê贖罪祭。I tio̍h chiong gû-káng-á tòa-chhut iâⁿ-gōa sio-i, chhin-chhiūⁿ sio thâu-chi̍t-chiah gû-káng-á chi̍t-iūⁿ; che sī hōe-chiòng ê sio̍k-chōe-chè.

22官長若有犯罪，錯誤行耶和華伊ê上帝所命令m̄-thang行ê一項事，致到有罪；Koaⁿ-tiúⁿ nā ū hoān-chōe, chhò-gō͘ kiâⁿ Iâ-hô-hoa i ê Siōng-tè só͘ bēng-lēng m̄-thang kiâⁿ ê chi̍t-hāng sū, tì-kàu ū chōe;

23所犯ê罪到伊家己知，就tio̍h牽一隻無瑕疵ê山羊káng做伊ê禮物。só͘ hoān ê chōe kàu i ka-kī chai, chiū tio̍h khan chi̍t chiah bô hâ-chhû ê soaⁿ-iûⁿ-káng chòe i ê lé-mi̍h.

24Tio̍h按伊ê手tī山羊ê頭殼頂，thâi伊tī耶和華ê面前，tī thâi燒祭ê cheng-siⁿ ê所在；這是贖罪祭。Tio̍h hōaⁿ i ê chhiú tī soaⁿ-iûⁿ ê thâu-khak-téng, thâi i tī Iâ-hô-hoa ê bīn-chêng, tī thâi sio-chè ê cheng-siⁿ ê só͘-chāi; che sī sio̍k-chōe-chè.

25祭司tio̍h用指頭á the̍h淡薄贖罪祭ê血，抹tī燒祭ê壇hiah-ê角，將血piàⁿ tī燒祭ê壇腳。Chè-si tio̍h ēng chńg-thâu-á the̍h tām-po̍h sio̍k-chōe-chè ê huih, boah tī sio-chè ê tôaⁿ hiah ê kak, chiong huih piàⁿ tī sio-chè ê tôaⁿ-kha.

26所有ê油，伊lóng tio̍h燒tī壇頂，親像謝恩祭ê油一樣；論到伊ê罪，祭司tio̍h án-ni kā伊贖罪，伊就beh得tio̍h赦免。Só͘ ū ê iû, i lóng tio̍h sio tī tôaⁿ-téng, chhin-chhiūⁿ siā-un-chè ê iû chi̍t-iūⁿ; lūn-kàu i ê chōe, chè-si tio̍h án-ni kā i sio̍k-chōe, i chiū beh tit-tio̍h sià-bián.

27百姓中若有人錯誤犯罪，行耶和華所命令m̄-thang行ê一項事，致到有罪，Peh-sìⁿ-tiong nā ū lâng chhò-gō͘ hoān-chōe, kiâⁿ Iâ-hô-hoa só͘ bēng-lēng m̄-thang kiâⁿ ê chi̍t-hāng sū, tì-kàu ū-chōe,

28所犯ê罪到伊家己知，伊因為所犯ê罪，就tio̍h牽一隻無瑕疵ê山羊母，做伊ê禮物。só͘ hoān ê chōe kàu i ka-kī chai, i in-ūi só͘ hoān ê chōe, chiū tio̍h khan chi̍t-chiah bô hâ-chhû ê soaⁿ-iûⁿ-bú, chòe i ê lé-mi̍h.

29Tio̍h按伊ê手tī贖罪cheng-siⁿ ê頭殼頂，tī燒祭ê所在thâi贖罪祭ê cheng-siⁿ；Tio̍h hōaⁿ i ê chhiú tī sio̍k-chōe cheng-siⁿ ê thâu-khak-téng, tī sio-chè ê só͘-chāi thâi sio̍k-chōe-chè ê cheng-siⁿ;

30祭司tio̍h用指頭á the̍h淡薄羊血，抹tī燒祭ê壇hiah-ê角；所有ê血lóng tio̍h piàⁿ tī壇腳裡。chè-si tio̍h ēng chńg-thâu-á the̍h tām-po̍h iûⁿ-huih, boah tī sio-chè ê tôaⁿ hiah ê kak; só͘ ū ê huih lóng tio̍h piàⁿ tī tôaⁿ-kha-ni̍h.

31Tio̍h將伊所有ê油lóng the̍h起來，親像the̍h謝恩祭ê油一樣，祭司tio̍h燒伊tī壇頂，tī耶和華ê面前，做芳味；祭司tio̍h為伊贖罪，伊就beh得tio̍h赦免。Tio̍h chiong i só͘ ū ê iû lóng the̍h-khí-lâi, chhin-chhiūⁿ the̍h siā-un-chè ê iû chi̍t-iūⁿ, chè-si tio̍h sio i tī tôaⁿ-téng, tī Iâ-hô-hoa ê bīn-chêng, chòe phang-bī; chè-si tio̍h ūi i sio̍k-chōe, i chiū beh tit-tio̍h sià-bián.

32伊若牽一隻綿羊á做贖罪祭ê禮物，就tio̍h牽一隻無瑕疵ê羊母。I nā khan chi̍t chiah mî-iûⁿ-á chòe sio̍k-chōe-chè ê lé-mi̍h, chiū tio̍h khan chi̍t-chiah bô hâ-chhû ê iûⁿ-bú.

33Tio̍h按伊ê手tī贖罪cheng-siⁿ ê頭殼頂；tī thâi燒祭ê所在，thâi贖罪祭ê cheng-siⁿ。Tio̍h hōaⁿ i ê chhiú tī sio̍k-chōe cheng-siⁿ ê thâu-khak-téng; tī thâi sio-chè ê só͘-chāi, thâi sio̍k-chōe-chè ê cheng-siⁿ.

34祭司tio̍h用指頭á the̍h淡薄贖罪祭cheng-siⁿ ê血，抹tī燒祭ê壇hiah-ê角，所有ê血lóng tio̍h piàⁿ tī壇腳裡。Chè-si tio̍h ēng chńg-thâu-á the̍h tām-po̍h sio̍k-chōe-chè cheng-siⁿ ê huih, boah tī sio-chè ê tôaⁿ hiah ê kak, só͘ ū ê huih lóng tio̍h piàⁿ tī tôaⁿ-kha-ni̍h.

35Tio̍h將伊所有ê油lóng the̍h起來，親像謝恩祭the̍h去羊á ê油一樣；祭司tio̍h燒伊tī壇頂，親像獻hō͘耶和華ê火祭；論到伊所犯tio̍h ê罪，祭司tio̍h án-ni kā伊贖罪，伊就beh得tio̍h赦免。Tio̍h chiong i só͘ ū ê iû lóng the̍h-khí-lâi, chhin-chhiūⁿ siā-un-chè the̍h-khì iûⁿ-á ê iû chi̍t-iūⁿ; chè-si tio̍h sio i tī tôaⁿ-téng, chhin-chhiūⁿ hiàn hō͘ Iâ-hô-hoa ê hé-chè; lūn-kàu i só͘ hoān-tio̍h ê chōe, chè-si tio̍h án-ni kā i sio̍k-chōe, i chiū beh tit-tio̍h sià-bián.

1若有人犯罪，就是聽見chiù -chōa ê聲，也伊本tio̍h做干證，總是所看見，á是所知ê，伊m̄講：伊tio̍h擔當伊ê罪。Nā ū lâng hoān-chōe, chiū-sī thiaⁿ-kìⁿ chiù-chōa ê siaⁿ, iā i pún tio̍h chòe kan-chèng, chóng-sī só͘ khòaⁿ-kìⁿ, á-sī só͘ chai ê, i m̄-kóng, i tio̍h tam-tng i ê chōe.

2若有人摸tio̍h無清氣ê物，或是無清氣ê獸ê身屍，或是無清氣ê cheng-siⁿ ê身屍，或是無清氣ê蟲thōa ê身屍，伊也m̄知，伊就無清氣，伊就有罪。Nā ū lâng bong-tio̍h bô chheng-khì ê mi̍h, he̍k-sī bô chheng-khì ê siù ê sin-si, he̍k-sī bô chheng-khì ê cheng-siⁿ ê sin-si, he̍k-sī bô chheng-khì ê thâng-thōa ê sin-si, i iā m̄-chai, i chiū bô chheng-khì, i chiū ū chōe.

3á是伊摸tio̍h別人ê無清氣，無論bak-tio̍h甚麼無清氣來無清氣，總是伊m̄知；到一下知，就有罪。Á-sī i bong-tio̍h pa̍t-lâng ê bô chheng-khì, bô-lūn bak-tio̍h sím-mi̍h bô chheng-khì lâi bô chheng-khì, chóng-sī i m̄-chai; kàu chi̍t-ē chai, chiū ū chōe.

4á是有人隨便chiù -chōa，嘴講beh做pháiⁿ，beh做好，無論人tī甚麼事隨便chiù -chōa，伊也m̄知；到一下知，就tī chiah-ê項ê一項，算做有罪。Á-sī ū lâng sûi-piān chiù-chōa, chhùi kóng beh chòe-pháiⁿ, beh chòe-hó, bô-lūn lâng tī sím-mi̍h sū sûi-piān chiù-chōa, i iā m̄-chai; kàu chi̍t-ē chai, chiū tī chiah ê hāng ê chi̍t-hāng, sǹg-chòe ū chōe.

5伊tī chiah-ê項ê一項有罪，就tio̍h承認伊所犯ê罪。I tī chiah ê hāng ê chi̍t-hāng ū chōe, chiū tio̍h sêng-jīn i só͘ hoān ê chōe.

6也tio̍h因為所犯ê罪，帶補過失ê祭，到耶和華ê面前，就是羊群中ê母ê，或是綿羊á，或是山羊做贖罪ê祭；論到伊ê罪，祭司tio̍h án-ni kā伊贖。Iā tio̍h in-ūi só͘ hoān ê chōe, tòa pó͘-kè-sit ê chè, kàu Iâ-hô-hoa ê bīn-chêng, chiū-sī iûⁿ-kûn-tiong ê bú-ê, he̍k-sī mî-iûⁿ-á, he̍k-sī soaⁿ-iûⁿ chòe sio̍k-chōe ê chè; lūn-kàu i ê chōe, chè-si tio̍h án-ni kā i sio̍k.

7伊ê氣力若無夠額thang獻一隻羊á，就tio̍h因為伊所犯ê罪，用兩隻ka-chui，á是兩隻鴿á-kiáⁿ，帶到耶和華ê面前做補過失ê祭；一隻做贖罪祭，一隻做燒祭。I ê khùi-la̍t nā bô kàu-gia̍h thang hiàn chi̍t chiah iûⁿ-á, chiū tio̍h in-ūi i só͘ hoān ê chōe, ēng nn̄g chiah ka-chui, á-sī nn̄g chiah chíⁿ-á-kiáⁿ, tòa kàu Iâ-hô-hoa ê bīn-chêng chòe pó͘-kè-sit ê chè; chi̍t-chiah chòe sio̍k-chōe-chè, chi̍t-chiah chòe sio-chè.

8伊tio̍h將chiah-ê帶到祭司hia；祭司就tio̍h事先獻hit隻做贖罪祭ê；tùi頷頸chūn伊ê頭，總是m̄-thang kā伊破開。I tio̍h chiong chiah-ê tòa kàu chè-si hia; chè-si chiū tio̍h tāi-seng hiàn hit-chiah chòe sio̍k-chōe-chè ê; tùi ām-kún chūn i ê thâu, chóng-sī m̄-thang kā i phòa-khui.

9伊也tio̍h用chit-ê贖罪祭ê血，hiù tī壇邊；所chhun ê血tio̍h le̍k tī壇腳；這是贖罪祭。I iā tio̍h ēng chit ê sio̍k-chōe-chè ê huih, hiù tī tôaⁿ-piⁿ; só͘ chhun ê huih tio̍h le̍k tī tôaⁿ-kha; che sī sio̍k-chōe-chè.

10伊tio̍h照例獻第二隻做燒祭；論到伊所犯ê罪，祭司tio̍h照án-ni kā伊贖；就beh得tio̍h赦免。I tio̍h chiàu-lē hiàn tē-jī-chiah chòe sio-chè; lūn-kàu i só͘ hoān ê chōe, chè-si tio̍h chiàu án-ni kā i sio̍k; chiū beh tit-tio̍h sià-bián.

11伊ê氣力若無夠額thang獻兩隻ka-chui，á是兩隻鴿á-kiáⁿ，就tio̍h因為伊所犯ê罪，帶伊ê禮物來，就是幼ê麵粉i-hoat ê十份一，做贖罪祭，m̄-thang落油，也m̄-thang chham乳香；因為是贖罪祭。I ê khùi-la̍t nā bô kàu-gia̍h thang hiàn nn̄g chiah ka-chui, á-sī nn̄g chiah chíⁿ-á-kiáⁿ, chiū tio̍h in-ūi i só͘ hoān ê chōe, tòa i ê lé-mi̍h lâi, chiū-sī iù ê mī-hún i-hoat ê cha̍p-hūn-chi̍t, chòe sio̍k-chōe-chè, m̄-thang lo̍h iû, iā m̄-thang chham jú-hiuⁿ; in-ūi sī sio̍k-chōe-chè.

12伊tio̍h將禮物帶到祭司hia；祭司tio̍h la̍k一la̍k，來做伊ê記念，燒tī壇頂，照獻hō͘耶和華ê火祭；這是贖罪祭。I tio̍h chiong lé-mi̍h tòa kàu chè-si hia; chè-si tio̍h la̍k chi̍t-la̍k, lâi chòe i ê kì-liām, sio tī tôaⁿ-téng, chiàu hiàn hō͘ Iâ-hô-hoa ê hé-chè; che sī sio̍k-chōe-chè.

13論到伊tī chit幾項事ê中間，所犯ê一項，祭司tio̍h án-ni kā伊贖，就伊beh得tio̍h赦免；所chhun ê lóng歸hō͘祭司，kap素祭一樣。Lūn-kàu i tī chitkui2 hāng sū ê tiong-kan, só͘ hoān ê chi̍t-hāng, chè-si tio̍h án-ni kā i sio̍k, chiū i beh tit-tio̍h sià-bián; só͘ chhun ê lóng kui hō͘ chè-si, kap sò͘-chè chi̍t-iūⁿ.

14耶和華吩咐摩西講：Iâ-hô-hoa hoan-hù Mô͘-se kóng,

15人若tī耶和華ê聖物錯誤犯罪，致到有過失，就tio̍h用補過失ê祭來獻hō͘耶和華，照理所估sià-khek-le̍k ê銀，就是照聖所ê sià-khek-le̍k，tùi羊群中用無瑕疵ê綿羊káng，做補過失ê祭；Lâng nā tī Iâ-hô-hoa ê sèng-mi̍h chhò-gō͘ hoān-chōe, tì-kàu ū kè-sit, chiū tio̍h ēng pó͘-kè-sit ê chè lâi hiàn hō͘ Iâ-hô-hoa, chiàu lí só͘ kó͘ sià-khek-le̍k ê gûn, chiū-sī chiàu sèng-só͘ ê sià-khek-le̍k, tùi iûⁿ-kûn-tiong ēng bô hâ-chhû ê mî-iûⁿ-káng, chòe pó͘-kè-sit ê chè;

16koh伊因為tī聖物ê錯誤tio̍h賠，另外tio̍h加五份ê一份交hō͘祭司；祭司tio̍h用補過失ê祭ê綿羊káng，替伊贖罪，伊就beh得tio̍h赦免。koh i in-ūi tī sèng-mi̍h ê chhò-gō͘ tio̍h pê, lēng-gōa tio̍h ke gō͘-hūn ê chi̍t-hūn kau hō͘ chè-si; chè-si tio̍h ēng pó͘-kè-sit ê chè ê mî-iûⁿ-káng, thòe i sio̍k-chōe, i chiū beh tit-tio̍h sià-bián.

17若有人犯罪行耶和華所命令m̄-thang行ê一項事，伊雖然m̄知也是有罪，就tio̍h擔當伊ê罪。Nā ū lâng hoān-chōe kiâⁿ Iâ-hô-hoa só͘ bēng-lēng m̄-thang kiâⁿ ê chi̍t-hāng-sū, i sui-jiân m̄-chai iā sī ū-chōe, chiū tio̍h tam-tng i ê chōe.

18伊tio̍h照你所估ê，tùi羊群中牽一隻無瑕疵ê綿羊káng，來交hō͘祭司做補過失ê祭，因為伊錯誤犯tio̍h，伊也m̄知，祭司就beh替伊贖罪，伊就beh得tio̍h赦免。I tio̍h chiàu lí só͘ kó͘ ê, tùi iûⁿ-kûn-tiong khan chi̍t chiah bô hâ-chhû ê mî-iûⁿ-káng, lâi kau hō͘ chè-si chòe pó͘-kè-sit ê chè, in-ūi i chhò-gō͘ hoān-tio̍h, i iā m̄-chai, chè-si chiū beh thòe i sio̍k-chōe, i chiū beh tit-tio̍h sià-bián.

19這是補過失ê祭；因為伊tī耶和華ê面前實在有過失。Che sī pó͘-kè-sit ê chè; in-ūi i tī Iâ-hô-hoa ê bīn-chêng si̍t-chāi ū kè-sit.

1耶和華吩咐摩西講：Iâ-hô-hoa hoan-hù Mô͘-se kóng,

2若有人犯罪干犯耶和華，對伊ê厝邊行詭詐，或是所交代伊物件，或是kau-koan買賣，或是搶人ê財物，Nā ū lâng hoān-chōe kan-hoān Iâ-hô-hoa, tùi i ê chhù-piⁿ kiâⁿ khúi-chà, he̍k-sī só͘ kau-tài i mi̍h-kiāⁿ, he̍k-sī kau-koan bóe-bōe, he̍k-sī chhiúⁿ lâng ê châi-bu̍t,

3或是欺壓厝邊，或是拾tio̍h失落ê物，行詭詐，白賊來chiù -chōa；tī人所行一切ê事ê中間，犯tio̍h一項，來有罪；he̍k-sī khi-ap chhù-piⁿ, he̍k-sī khioh-tio̍h sit-lo̍h ê mi̍h, kiâⁿ khúi-chà, pe̍h-chha̍t lâi chiù-chōa; tī lâng só͘ kiâⁿ it-chhè ê sū ê tiong-kan, hoān-tio̍h chi̍t-hāng, lâi ū chōe;

4伊若犯tio̍h致到有過失，就tio̍h 還所搶ê，á是因為欺壓所得tio̍h-ê，á是所交代伊ê物，á是人失落hō͘伊所拾tio̍h ê物；i nā hoān-tio̍h tì-kàu ū kè-sit, chiū tio̍h hêng só͘ chhiúⁿ-ê, á-sī in-ūi khi-ap só͘ tit-tio̍h-ê, á-sī só͘ kau-tài i ê mi̍h, á-sī lâng sit-lo̍h hō͘ i só͘ khioh-tio̍h ê mi̍h;

5á是伊因為甚麼物白賊chiù -chōa，就tio̍h照數額來還，另外加五份ê一份；tī查出伊有過失ê日，tio̍h還本主。á-sī i in-ūi sím-mi̍h mi̍h pe̍h-chha̍t chiù-chōa, chiū tio̍h chiàu siàu-gia̍h lâi hêng, lēng-gōa ke gō͘-hūn ê chi̍t-hūn; tī chhâ-chhut i ū kè-sit ê ji̍t, tio̍h hêng pún-chú.

6也tio̍h照你所估ê，用伊補過失ê祭，就是羊群中一隻無瑕疵ê綿羊káng牽到耶和華ê面前，交hō͘祭司做補過失ê祭。Iā tio̍h chiàu lí só͘ kó͘ ê, ēng i pó͘-kè-sit ê chè, chiū-sī iûⁿ-kûn-tiong chi̍t-chiah bô hâ-chhû ê mî-iûⁿ-káng khan kàu Iâ-hô-hoa ê bīn-chêng, kau hō͘ chè-si chòe pó͘-kè-sit ê chè.

7祭司tio̍h tī耶和華ê面前，替伊贖罪，伊無論行甚麼事，hō͘伊有罪，lóng beh得tio̍h赦免。Chè-si tio̍h tī Iâ-hô-hoa ê bīn-chêng, thòe i sio̍k-chōe, i bô-lūn kiâⁿ sím-mi̍h sū, hō͘ i ū chōe, lóng beh tit-tio̍h sià-bián.

8耶和華吩咐摩西講：Iâ-hô-hoa hoan-hù Mô͘-se kóng,

9你tio̍h命令亞倫kap伊ê kiáⁿ孫講：燒祭ê例是án-ni；燒祭tio̍h hē tī壇ê柴頂，一暝到光；壇頂ê火tio̍h常常to̍h。Lí tio̍h bēng-lēng A-lûn kap i ê kiáⁿ-sun kóng, Sio-chè ê lē sī án-ni; sio-chè tio̍h hē tī tôaⁿ ê chhâ-téng, chi̍t-mî kàu kng; tôaⁿ-téng ê hé tio̍h siông-siông to̍h.

10祭司tio̍h穿幼苧布ê衣服，下身也tio̍h穿幼苧布ê褲，將壇頂ê火所燒做燒祭ê灰收起來，piàⁿ tī壇邊。Chè-si tio̍h chhēng iù-tōe-pò͘ ê i-ho̍k, ē-sin iā tio̍h chhēng iù-tōe-pò͘ ê khò͘, chiong tôaⁿ-téng ê hé só͘ sio chòe sio-chè ê hu siu-khí-lâi, piàⁿ tī tôaⁿ-piⁿ.

11然後tio̍h thǹg去chit-ê衣服，穿別號ê衣服，將火灰帶出營外到清氣ê所在。Jiân-āu tio̍h thǹg-khì chit ê i-ho̍k, chhēng pa̍t-hō ê i-ho̍k, chiong hé-hu tòa-chhut iâⁿ-gōa kàu chheng-khì ê só͘-chāi.

12壇頂ê火tio̍h tī頂面常常to̍h，m̄-thang hoa；祭司tio̍h ta̍k早起tī hit頂面燒chhâ，koh將燒祭排tī壇頂，tī hit頂面燒謝恩祭ê油。Tôaⁿ-téng ê hé tio̍h tī téng-bīn siông-siông to̍h, m̄-thang hoa; chè-si tio̍h ta̍k chá-khí tī hitteng2-bīn sio-chhâ, koh chiong sio-chè pâi tī tôaⁿ-téng, tī hí téng-bīn sio siā-un-chè ê iû.

13tī壇頂ê火tio̍h常常to̍h，m̄-thang hoa。Tī tôaⁿ-téng ê hé tio̍h siông-siông to̍h, m̄-thang hoa.

14素祭ê例是án-ni；亞倫ê kiáⁿ孫tio̍h tī壇前，將這獻tī耶和華ê面前。Sò͘-chè ê lē sī án-ni; A-lûn ê kiáⁿ-sun tio̍h tī tôaⁿ-chêng, chiong che hiàn tī Iâ-hô-hoa ê bīn-chêng.

15伊tio̍h tùi hit中間，the̍h出素祭ê麵粉一把，kap油，kap素祭中所有ê乳香，燒tī壇頂，做記念，獻hō͘耶和華做芳味。I tio̍h tùi hit tiong-kan, the̍h-chhut sò͘-chè ê mī-hún chi̍t-pé, kap iû, kap sò͘-chè-tiong só͘ ū ê jú-hiuⁿ, sio tī tôaⁿ-téng, chòe kì-liām, hiàn hō͘ Iâ-hô-hoa chòe phang-bī.

16所chhun-ê亞倫kap伊ê kiáⁿ孫tio̍h食伊；tio̍h tī聖ê所在，m̄-thang chham酵，來食；tio̍h tī會幕ê院內食。Só͘-chhun-ê A-lûn kap i ê kiáⁿ-sun tio̍h chia̍h i; tio̍h tī sèng ê só͘-chāi, m̄-thang chham kàⁿ, lâi chia̍h; tio̍h tī hōe-bō͘ ê īⁿ-lāi chia̍h.

17M̄-thang chham酵來pek伊。這是我tùi我ê火祭中，賞賜in ê份額；是至聖ê，kap贖罪祭，以及補過失ê祭一樣。M̄-thang chham kàⁿ lâi pek i. Che sī Góa tùi Góa ê hé-chè-tiong, siúⁿ-sù in ê hūn-gia̍h; sī chì-sèng-ê, kap sio̍k-chōe-chè, í-ki̍p pó͘-kè-sit ê chè chi̍t-iūⁿ.

18見若亞倫kiáⁿ孫中ta-po͘-ê，lóng tio̍h食伊，tùi耶和華ê火祭中，做永遠ê份額，直到lín ê萬代；摸 chiah-ê祭物ê，lóng beh成做聖。Kìⁿ-nā A-lûn kiáⁿ-sun-tiong ta-po͘-ê, lóng tio̍h chia̍h i, tùi Iâ-hô-hoa ê hé-chè-tiong, chòe éng-oán ê hūn-gia̍h, ti̍t-kàu lín ê bān-tāi; bong chiah ê chè-mi̍h ê, lóng beh chiâⁿ-chòe sèng.

19耶和華吩咐摩西講：Iâ-hô-hoa hoan-hù Mô͘-se kóng,

20亞倫kap伊ê kiáⁿ孫tī伊受抹油ê日，所tio̍h獻hō͘耶和華ê禮物，就是幼ê麵粉i-hoat十份ê一份，做常常獻ê素祭；早起時一半，ê-hng時一半。A-lûn kap i ê kiáⁿ-sun tī i siū boah-iû ê ji̍t, só͘ tio̍h hiàn hō͘ Iâ-hô-hoa ê lé-mi̍h, chiū-sī iù ê mī-hún i-hoat cha̍p-hūn ê chi̍t-hūn, chòe siông-siông hiàn ê sò͘-chè; chá-khí-sî chi̍t-pòaⁿ, ê-hng-sî chi̍t-pòaⁿ.

21Tio̍h tī 煎盤用油來做；調和了，你就tio̍h the̍h入來；pek好一塊一塊，做素祭，獻hō͘耶和華做芳味。Tio̍h tī chian-pôaⁿ ēng iû lâi chòe; tiau-hô-liáu, lí chiū tio̍h the̍h-ji̍p-lâi; pek hó chi̍t-tè chi̍t-tè, chòe sò͘-chè, hiàn hō͘ Iâ-hô-hoa chòe phang-bī.

22伊ê kiáⁿ孫中續接伊受抹油做祭司，tio̍h獻伊，tio̍h一盡燒hō͘耶和華；這是永遠ê例。I ê kiáⁿ-sun-tiong sòa-chiap i siū boah-iû chòe chè-si, tio̍h hiàn i, tio̍h it-chīn sio hō͘ Iâ-hô-hoa; che sī éng-oán ê lē.

23祭司ê素祭tio̍h一盡燒，m̄-thang食伊。Chè-si ê sò͘-chè tio̍h it-chīn sio, m̄-thang chia̍h i.

24耶和華吩咐摩西講：Iâ-hô-hoa hoan-hù Mô͘-se kóng,

25你tio̍h吩咐亞倫kap伊ê kiáⁿ孫講：贖罪祭ê例，就是án-ni；tio̍h tī耶和華ê面前thâi燒祭ê cheng-siⁿ ê所在，來thâi贖罪祭ê cheng-siⁿ；這是至聖ê物。Lí tio̍h hoan-hù A-lûn kap i ê kiáⁿ-sun kóng, Sio̍k-chōe-chè ê lē, chiū-sī án-ni; tio̍h tī Iâ-hô-hoa ê bīn-chêng thâi sio-chè ê cheng-siⁿ ê só͘-chāi, lâi thâi sio̍k-chōe-chè ê cheng-siⁿ; che sī chì-sèng ê mi̍h.

26為贖罪獻chit-ê祭ê祭司tio̍h食伊；tio̍h tī聖ê所在，就是tī會幕ê院內食伊。Ūi sio̍k-chōe hiàn chit ê chè ê chè-si tio̍h chia̍h i; tio̍h tī sèng ê só͘-chāi, chiū-sī tī hōe-bō͘ ê īⁿ-lāi chia̍h i.

27見若摸伊ê肉ê，beh成做聖；伊ê血若hiù tī甚麼衣服ê頂面，所hiù-tio̍h hit領，你tio̍h tī聖ê所在洗。Kìⁿ-nā bong i ê bah ê, beh chiâⁿ-chòe sèng; i ê huih nā hiù tī sím-mi̍h i-ho̍k ê téng-bīn, só͘ hiù-tio̍h hit-niá, lí tio̍h tī sèng ê só͘-chāi sóe.

28若煮tī磁ê器具，tio̍h kā伊kòng破；若煮tī銅ê器具，chit-ê器具tio̍h 過磨，chiah用水洗。Nā chú tī hûi ê khì-kū, tio̍h kā i kòng-phòa; nā chú tī tâng ê khì-kū, chit ê khì-kū tio̍h kè-bôa, chiah ēng chúi sóe.

29見若祭司中ê ta-po͘丁，lóng tio̍h食伊；這是至聖ê物。Kìⁿ-nā chè-si-tiong ê ta-po͘-teng, lóng tio̍h chia̍h i; che sī chì-sèng ê mi̍h.

30見若贖罪祭，伊ê血若帶入會幕tī聖所贖罪，lóng m̄-thang食伊；tio̍h用火燒伊。Kìⁿ-nā sio̍k-chōe-chè, i ê huih nā tòa ji̍p hōe-bō͘ tī sèng-só͘ sio̍k-chōe, lóng m̄-thang chia̍h i; tio̍h ēng hé sio i.