1耶和華吩咐摩西講：Iâ-hô-hoa hoan-hù Mô͘-se kóng,

2若有人犯罪干犯耶和華，對伊ê厝邊行詭詐，或是所交代伊物件，或是kau-koan買賣，或是搶人ê財物，Nā ū lâng hoān-chōe kan-hoān Iâ-hô-hoa, tùi i ê chhù-piⁿ kiâⁿ khúi-chà, he̍k-sī só͘ kau-tài i mi̍h-kiāⁿ, he̍k-sī kau-koan bóe-bōe, he̍k-sī chhiúⁿ lâng ê châi-bu̍t,

3或是欺壓厝邊，或是拾tio̍h失落ê物，行詭詐，白賊來chiù -chōa；tī人所行一切ê事ê中間，犯tio̍h一項，來有罪；he̍k-sī khi-ap chhù-piⁿ, he̍k-sī khioh-tio̍h sit-lo̍h ê mi̍h, kiâⁿ khúi-chà, pe̍h-chha̍t lâi chiù-chōa; tī lâng só͘ kiâⁿ it-chhè ê sū ê tiong-kan, hoān-tio̍h chi̍t-hāng, lâi ū chōe;

4伊若犯tio̍h致到有過失，就tio̍h 還所搶ê，á是因為欺壓所得tio̍h-ê，á是所交代伊ê物，á是人失落hō͘伊所拾tio̍h ê物；i nā hoān-tio̍h tì-kàu ū kè-sit, chiū tio̍h hêng só͘ chhiúⁿ-ê, á-sī in-ūi khi-ap só͘ tit-tio̍h-ê, á-sī só͘ kau-tài i ê mi̍h, á-sī lâng sit-lo̍h hō͘ i só͘ khioh-tio̍h ê mi̍h;

5á是伊因為甚麼物白賊chiù -chōa，就tio̍h照數額來還，另外加五份ê一份；tī查出伊有過失ê日，tio̍h還本主。á-sī i in-ūi sím-mi̍h mi̍h pe̍h-chha̍t chiù-chōa, chiū tio̍h chiàu siàu-gia̍h lâi hêng, lēng-gōa ke gō͘-hūn ê chi̍t-hūn; tī chhâ-chhut i ū kè-sit ê ji̍t, tio̍h hêng pún-chú.

6也tio̍h照你所估ê，用伊補過失ê祭，就是羊群中一隻無瑕疵ê綿羊káng牽到耶和華ê面前，交hō͘祭司做補過失ê祭。Iā tio̍h chiàu lí só͘ kó͘ ê, ēng i pó͘-kè-sit ê chè, chiū-sī iûⁿ-kûn-tiong chi̍t-chiah bô hâ-chhû ê mî-iûⁿ-káng khan kàu Iâ-hô-hoa ê bīn-chêng, kau hō͘ chè-si chòe pó͘-kè-sit ê chè.

7祭司tio̍h tī耶和華ê面前，替伊贖罪，伊無論行甚麼事，hō͘伊有罪，lóng beh得tio̍h赦免。Chè-si tio̍h tī Iâ-hô-hoa ê bīn-chêng, thòe i sio̍k-chōe, i bô-lūn kiâⁿ sím-mi̍h sū, hō͘ i ū chōe, lóng beh tit-tio̍h sià-bián.

8耶和華吩咐摩西講：Iâ-hô-hoa hoan-hù Mô͘-se kóng,

9你tio̍h命令亞倫kap伊ê kiáⁿ孫講：燒祭ê例是án-ni；燒祭tio̍h hē tī壇ê柴頂，一暝到光；壇頂ê火tio̍h常常to̍h。Lí tio̍h bēng-lēng A-lûn kap i ê kiáⁿ-sun kóng, Sio-chè ê lē sī án-ni; sio-chè tio̍h hē tī tôaⁿ ê chhâ-téng, chi̍t-mî kàu kng; tôaⁿ-téng ê hé tio̍h siông-siông to̍h.

10祭司tio̍h穿幼苧布ê衣服，下身也tio̍h穿幼苧布ê褲，將壇頂ê火所燒做燒祭ê灰收起來，piàⁿ tī壇邊。Chè-si tio̍h chhēng iù-tōe-pò͘ ê i-ho̍k, ē-sin iā tio̍h chhēng iù-tōe-pò͘ ê khò͘, chiong tôaⁿ-téng ê hé só͘ sio chòe sio-chè ê hu siu-khí-lâi, piàⁿ tī tôaⁿ-piⁿ.

11然後tio̍h thǹg去chit-ê衣服，穿別號ê衣服，將火灰帶出營外到清氣ê所在。Jiân-āu tio̍h thǹg-khì chit ê i-ho̍k, chhēng pa̍t-hō ê i-ho̍k, chiong hé-hu tòa-chhut iâⁿ-gōa kàu chheng-khì ê só͘-chāi.

12壇頂ê火tio̍h tī頂面常常to̍h，m̄-thang hoa；祭司tio̍h ta̍k早起tī hit頂面燒chhâ，koh將燒祭排tī壇頂，tī hit頂面燒謝恩祭ê油。Tôaⁿ-téng ê hé tio̍h tī téng-bīn siông-siông to̍h, m̄-thang hoa; chè-si tio̍h ta̍k chá-khí tī hitteng2-bīn sio-chhâ, koh chiong sio-chè pâi tī tôaⁿ-téng, tī hí téng-bīn sio siā-un-chè ê iû.

13tī壇頂ê火tio̍h常常to̍h，m̄-thang hoa。Tī tôaⁿ-téng ê hé tio̍h siông-siông to̍h, m̄-thang hoa.

14素祭ê例是án-ni；亞倫ê kiáⁿ孫tio̍h tī壇前，將這獻tī耶和華ê面前。Sò͘-chè ê lē sī án-ni; A-lûn ê kiáⁿ-sun tio̍h tī tôaⁿ-chêng, chiong che hiàn tī Iâ-hô-hoa ê bīn-chêng.

15伊tio̍h tùi hit中間，the̍h出素祭ê麵粉一把，kap油，kap素祭中所有ê乳香，燒tī壇頂，做記念，獻hō͘耶和華做芳味。I tio̍h tùi hit tiong-kan, the̍h-chhut sò͘-chè ê mī-hún chi̍t-pé, kap iû, kap sò͘-chè-tiong só͘ ū ê jú-hiuⁿ, sio tī tôaⁿ-téng, chòe kì-liām, hiàn hō͘ Iâ-hô-hoa chòe phang-bī.

16所chhun-ê亞倫kap伊ê kiáⁿ孫tio̍h食伊；tio̍h tī聖ê所在，m̄-thang chham酵，來食；tio̍h tī會幕ê院內食。Só͘-chhun-ê A-lûn kap i ê kiáⁿ-sun tio̍h chia̍h i; tio̍h tī sèng ê só͘-chāi, m̄-thang chham kàⁿ, lâi chia̍h; tio̍h tī hōe-bō͘ ê īⁿ-lāi chia̍h.

17M̄-thang chham酵來pek伊。這是我tùi我ê火祭中，賞賜in ê份額；是至聖ê，kap贖罪祭，以及補過失ê祭一樣。M̄-thang chham kàⁿ lâi pek i. Che sī Góa tùi Góa ê hé-chè-tiong, siúⁿ-sù in ê hūn-gia̍h; sī chì-sèng-ê, kap sio̍k-chōe-chè, í-ki̍p pó͘-kè-sit ê chè chi̍t-iūⁿ.

18見若亞倫kiáⁿ孫中ta-po͘-ê，lóng tio̍h食伊，tùi耶和華ê火祭中，做永遠ê份額，直到lín ê萬代；摸 chiah-ê祭物ê，lóng beh成做聖。Kìⁿ-nā A-lûn kiáⁿ-sun-tiong ta-po͘-ê, lóng tio̍h chia̍h i, tùi Iâ-hô-hoa ê hé-chè-tiong, chòe éng-oán ê hūn-gia̍h, ti̍t-kàu lín ê bān-tāi; bong chiah ê chè-mi̍h ê, lóng beh chiâⁿ-chòe sèng.

19耶和華吩咐摩西講：Iâ-hô-hoa hoan-hù Mô͘-se kóng,

20亞倫kap伊ê kiáⁿ孫tī伊受抹油ê日，所tio̍h獻hō͘耶和華ê禮物，就是幼ê麵粉i-hoat十份ê一份，做常常獻ê素祭；早起時一半，ê-hng時一半。A-lûn kap i ê kiáⁿ-sun tī i siū boah-iû ê ji̍t, só͘ tio̍h hiàn hō͘ Iâ-hô-hoa ê lé-mi̍h, chiū-sī iù ê mī-hún i-hoat cha̍p-hūn ê chi̍t-hūn, chòe siông-siông hiàn ê sò͘-chè; chá-khí-sî chi̍t-pòaⁿ, ê-hng-sî chi̍t-pòaⁿ.

21Tio̍h tī 煎盤用油來做；調和了，你就tio̍h the̍h入來；pek好一塊一塊，做素祭，獻hō͘耶和華做芳味。Tio̍h tī chian-pôaⁿ ēng iû lâi chòe; tiau-hô-liáu, lí chiū tio̍h the̍h-ji̍p-lâi; pek hó chi̍t-tè chi̍t-tè, chòe sò͘-chè, hiàn hō͘ Iâ-hô-hoa chòe phang-bī.

22伊ê kiáⁿ孫中續接伊受抹油做祭司，tio̍h獻伊，tio̍h一盡燒hō͘耶和華；這是永遠ê例。I ê kiáⁿ-sun-tiong sòa-chiap i siū boah-iû chòe chè-si, tio̍h hiàn i, tio̍h it-chīn sio hō͘ Iâ-hô-hoa; che sī éng-oán ê lē.

23祭司ê素祭tio̍h一盡燒，m̄-thang食伊。Chè-si ê sò͘-chè tio̍h it-chīn sio, m̄-thang chia̍h i.

24耶和華吩咐摩西講：Iâ-hô-hoa hoan-hù Mô͘-se kóng,

25你tio̍h吩咐亞倫kap伊ê kiáⁿ孫講：贖罪祭ê例，就是án-ni；tio̍h tī耶和華ê面前thâi燒祭ê cheng-siⁿ ê所在，來thâi贖罪祭ê cheng-siⁿ；這是至聖ê物。Lí tio̍h hoan-hù A-lûn kap i ê kiáⁿ-sun kóng, Sio̍k-chōe-chè ê lē, chiū-sī án-ni; tio̍h tī Iâ-hô-hoa ê bīn-chêng thâi sio-chè ê cheng-siⁿ ê só͘-chāi, lâi thâi sio̍k-chōe-chè ê cheng-siⁿ; che sī chì-sèng ê mi̍h.

26為贖罪獻chit-ê祭ê祭司tio̍h食伊；tio̍h tī聖ê所在，就是tī會幕ê院內食伊。Ūi sio̍k-chōe hiàn chit ê chè ê chè-si tio̍h chia̍h i; tio̍h tī sèng ê só͘-chāi, chiū-sī tī hōe-bō͘ ê īⁿ-lāi chia̍h i.

27見若摸伊ê肉ê，beh成做聖；伊ê血若hiù tī甚麼衣服ê頂面，所hiù-tio̍h hit領，你tio̍h tī聖ê所在洗。Kìⁿ-nā bong i ê bah ê, beh chiâⁿ-chòe sèng; i ê huih nā hiù tī sím-mi̍h i-ho̍k ê téng-bīn, só͘ hiù-tio̍h hit-niá, lí tio̍h tī sèng ê só͘-chāi sóe.

28若煮tī磁ê器具，tio̍h kā伊kòng破；若煮tī銅ê器具，chit-ê器具tio̍h 過磨，chiah用水洗。Nā chú tī hûi ê khì-kū, tio̍h kā i kòng-phòa; nā chú tī tâng ê khì-kū, chit ê khì-kū tio̍h kè-bôa, chiah ēng chúi sóe.

29見若祭司中ê ta-po͘丁，lóng tio̍h食伊；這是至聖ê物。Kìⁿ-nā chè-si-tiong ê ta-po͘-teng, lóng tio̍h chia̍h i; che sī chì-sèng ê mi̍h.

30見若贖罪祭，伊ê血若帶入會幕tī聖所贖罪，lóng m̄-thang食伊；tio̍h用火燒伊。Kìⁿ-nā sio̍k-chōe-chè, i ê huih nā tòa ji̍p hōe-bō͘ tī sèng-só͘ sio̍k-chōe, lóng m̄-thang chia̍h i; tio̍h ēng hé sio i.

1補過失ê祭ê規例就是án-ni；chit-ê是至聖ê。Pó͘-kè-sit ê chè ê kui-lē chiū sī án-ni; chit-ê sī chì-sèng-ê.

2tī thâi燒祭ê所在，也tio̍h tī-hia thâi補過失ê祭；伊ê血tio̍h hiù tī壇裡ê四圍。Tī thâi sio-chè ê só͘-chāi, iā tio̍h tī-hia thâi pó͘-kè-sit ê chè; i ê huih tio̍h hiù tī tôaⁿ-ni̍h ê sì-ûi.

3伊ê油tio̍h lóng獻；hit-ê肥ê尾，kap蓋臟腑ê油，兩粒腰子，I ê iû tio̍h lóng hiàn; hit ê pûi ê bé, kap khàm chōng-hú ê iû,

4kap in所有ê油，就是óa近腰雙pêng ê油，kap肝裡ê網紗，kap腰子一概the̍h起來。nn̄g lia̍p io-chí kap in só͘ ū ê iû, chiū-sī óa-kūn io siang-pêng ê iû, kap koaⁿ-ni̍h ê bāng-se, kap io-chí it-khài the̍h-khí-lâi.

5祭司tio̍h tī壇頂燒伊，做獻hō͘耶和華ê火祭；是補過失ê祭。Chè-si tio̍h tī tôaⁿ-téng sio i, chòe hiàn hō͘ Iâ-hô-hoa ê hé-chè; sī pó͘-kè-sit ê chè.

6祭司中ê ta-po͘丁lóng tio̍h食伊，tī聖ê所在食；這是至聖ê。Chè-si-tiong ê ta-po͘-teng lóng tio̍h chia̍h i, tī sèng ê só͘-chāi chia̍h; che sī chì-sèng-ê.

7贖罪祭甚麼款，補過失ê祭也是án-ni；in ê規例是一樣；用hit-ê來贖罪ê祭司，就得tio̍h chit-ê物。Sio̍k-chōe-chè sím-mi̍h khoán, pó͘-kè-sit ê chè iā-sī án-ni; in ê kui-lē sī chi̍t-iūⁿ; ēng hit-ê lâi sio̍k-chōe ê chè-si, chiū tit-tio̍h chit ê mi̍h.

8祭司kā人獻燒祭，就伊所獻燒祭ê cheng-siⁿ ê皮，歸tī祭司本身。Chè-si kā lâng hiàn sio-chè, chiū i só͘ hiàn sio-chè ê cheng-siⁿ ê phê, kui tī chè-si pún-sin.

9見若tī火爐pek ê素祭，kap tī鼎á tī煎盤備辦ê，lóng tio̍h歸tī獻hit-ê祭ê祭司。Kìⁿ-nā tī hé-lô͘ pek ê sò͘-chè, kap tī tiáⁿ-á tī chian-pôaⁿ pī-pān ê, lóng tio̍h kui tī hiàn hit ê chè ê chè-si.

10見若素祭，無論是chham油ê，á是乾ê，lóng tio̍h歸亞倫ê kiáⁿ孫，大家平分。Kìⁿ-nā sò͘-chè, bô-lūn sī chham-iû-ê, á-sī ta-ê, lóng tio̍h kui A-lûn ê kiáⁿ-sun, tāi-ke pîⁿ-pun.

11人獻謝恩祭hō͘耶和華，hit-ê規例就是án-ni。Lâng hiàn siā-un-chè hō͘ Iâ-hô-hoa, hit ê kui-lē chiū-sī án-ni.

12伊若為tio̍h感謝來獻，就tio̍h用調和油ê無酵餅，kap抹油無酵ê薄餅，以及chhiau hō͘伊chiâu ê麵粉，用油調和做ê餅，kap感謝ê祭相kap來獻。I nā ūi-tio̍h kám-siā lâi hiàn, chiū tio̍h ēng tiau-hô iû ê bô-kàⁿ-piáⁿ, kap boah-iû bô-kàⁿ ê po̍h-piáⁿ, í-ki̍p chhiau hō͘ i chiâu ê mī-hún, ēng iû tiau-hô chòe ê piáⁿ, kap kám-siā ê chè saⁿ-kap lâi hiàn.

13tio̍h用有酵ê餅，kap為tio̍h感謝來獻ê謝恩祭，kap伊ê禮物相kap來獻。Tio̍h ēng ū kàⁿ ê piáⁿ, kap ūi-tio̍h kám-siā lâi hiàn ê siā-un-chè, kap i ê lé-mi̍h saⁿ-kap lâi hiàn.

14Tio̍h tùi ta̍k項禮物ê中間，the̍h一項獻hō͘耶和華做舉祭；這tio̍h歸tī hiù謝恩祭ê血ê祭司。Tio̍h tùi ta̍k-hāng lé-mi̍h ê tiong-kan, the̍h chi̍t-hāng hiàn hō͘ Iâ-hô-hoa chòe kú-chè; che tio̍h kui tī hiù siā-un-chè ê huih ê chè-si.

15為tio̍h感謝來獻ê謝恩祭ê肉，tio̍h tī獻禮物ê日食伊，一點á m̄-thang 留到天光。Ūi-tio̍h kám-siā lâi hiàn ê siā-un-chè ê bah, tio̍h tī hiàn lé-mi̍h ê ji̍t chia̍h i, chi̍t-tiám-á m̄-thang lâu kàu thiⁿ-kng.

16若伊所獻ê禮物，是為tio̍h謝願，á是甘心獻ê，tio̍h tī伊獻祭ê日食伊；所chhun-ê明á日thang食伊。Nā i só͘-hiàn ê lé-mi̍h, sī ūi-tio̍h siā-goān, á-sī kam-sim hiàn ê, tio̍h tī i hiàn-chè ê ji̍t chia̍h i; só͘-chhun-ê bîn-á-ji̍t thang chia̍h i.

17獨獨所chhun ê祭肉，到第三日tio̍h用火燒。To̍k-to̍k só͘ chhun ê chè-bah, kàu tē-saⁿ ji̍t tio̍h ēng hé sio.

18到第三日若食謝恩祭ê肉，chit-ê祭無得tio̍h接納，也無kā獻ê算額；反tńg是做thang厭惡ê；食伊ê人就tio̍h擔當伊ê罪。Kàu tē-saⁿ ji̍t nā chia̍h siā-un-chè ê bah, chit ê chè bô tit-tio̍h chiap-la̍p, iā bô kā hiàn-ê sǹg-gia̍h; hoán-tńg sī chòe thang iàm-ò͘ⁿ ê; chia̍h i ê lâng chiū tio̍h tam-tng i ê chōe.

19祭肉若kha̍p-tio̍h無清氣ê物，就m̄-thang食，tio̍h用火燒。論到祭ê肉，見若清氣ê人lóng thang食伊；Chè-bah nā kha̍p-tio̍h bô chheng-khì ê mi̍h, chiū m̄-thang chia̍h, tio̍h ēng hé sio. Lūn-kàu chè ê bah, kìⁿ-nā chheng-khì ê lâng lóng thang chia̍h i;

20獨獨屬tī耶和華謝恩祭ê肉，人若身軀bak-tio̍h無清氣來食伊，chit-ê人tio̍h tùi伊ê百姓中剪除去。to̍k-to̍k sio̍k tī Iâ-hô-hoa siā-un-chè ê bah, lâng nā seng-khu bak-tio̍h bô chheng-khì lâi chia̍h i, chit ê lâng tio̍h tùi i ê peh-sìⁿ-tiong chián-tû-khì.

21有人摸tio̍h甚麼無清氣ê物，或是人ê無清氣，或是無清氣ê cheng-siⁿ，或是無清氣可惡ê物，來食tio̍h屬tī耶和華謝恩祭ê肉，chit-ê人tio̍h tùi伊ê百姓中剪除去。Ū lâng bong-tio̍h sím-mi̍h bô chheng-khì ê mi̍h, he̍k-sī lâng ê bô chheng-khì, he̍k-sī bô chheng-khì ê cheng-siⁿ, he̍k-sī bô chheng-khì khó-ò͘ⁿ ê mi̍h, lâi chia̍h-tio̍h sio̍k tī Iâ-hô-hoa siā-un-chè ê bah, chit ê lâng tio̍h tùi i ê peh-sìⁿ-tiong chián-tû-khì.

22耶和華吩咐摩西講：Iâ-hô-hoa hoan-hù Mô͘-se kóng,

23你tio̍h吩咐以色列人講：無論是牛，á是綿羊，á是山羊ê油，lín lóng m̄-thang食伊。Lí tio̍h hoan-hù Í-sek-lia̍t lâng kóng, Bô-lūn sī gû, á-sī mî-iûⁿ, á-sī soaⁿ-iûⁿ ê iû, lín lóng m̄-thang chia̍h i.

24家己死ê ê油，kap hō͘野獸拆ê ê油，thang做別物ê路用；獨獨lín千萬m̄-thang食。ka-kī sí-ê ê iû, kap hō͘ iá-siù thiah-ê ê iû, thang chòe pa̍t-mi̍h ê lō͘-ēng; to̍k-to̍k lín chhian-bān m̄-thang chia̍h.

25能thang獻hō͘耶和華做火祭ê cheng-siⁿ ê油，見若食伊ê人，hit-ê人tio̍h tùi伊ê百姓中剪除去。Ōe thang hiàn-hō͘ Iâ-hô-hoa chòe hé-chè ê cheng-siⁿ ê iû, kìⁿ-nā chia̍h i ê lâng, hit ê lâng tio̍h tùi i ê peh-sìⁿ-tiong chián-tû-khì.

26tī lín一切所khiā起ê所在，無論是鳥á是野獸ê血，lín lóng m̄-thang食伊。Tī lín it-chhè só͘ khiā-khí ê só͘-chāi, bô-lūn sī chiáu á-sī iá-siù ê huih, lín lóng m̄-thang chia̍h i.

27無論甚麼人食甚麼血，hit人tio̍h tùi伊ê百姓中剪除去。Bô-lūn sím-mi̍h lâng chia̍h sím-mi̍h huih, hit-lâng tio̍h tùi i ê peh-sìⁿ-tiong chián-tû-khì.

28耶和華吩咐摩西講：Iâ-hô-hoa hoan-hù Mô͘-se kóng,

29你tio̍h吩咐以色列人講：見若獻謝恩祭hō͘耶和華ê，tio̍h tùi伊ê謝恩祭中，帶伊ê禮物來hō͘耶和華。Lí tio̍h hoan-hù Í-sek-lia̍t lâng kóng, Kìⁿ-nā hiàn siā-un-chè hō͘ Iâ-hô-hoa ê, tio̍h tùi i ê siā-un-chè tiong, tòa i ê lé-mi̍h lâi hō͘ Iâ-hô-hoa.

30伊tio̍h親手帶獻hō͘耶和華ê火祭來，就是帶油kap胸來，thang用胸tī耶和華ê面前做搖祭，來搖伊。I tio̍h chhin-chhiú tòa hiàn-hō͘ Iâ-hô-hoa ê hé-chè lâi, chiū-sī tòa iû kap heng lâi, thang ēng heng tī Iâ-hô-hoa ê bīn-chêng chòe iô-chè, lâi iô i.

31祭司tio̍h將油燒tī壇頂；獨獨胸 tio̍h歸tī亞倫kap伊ê kiáⁿ孫。Chè-si tio̍h chiong iû sio tī tôaⁿ-téng; to̍k-to̍k heng tio̍h kui tī A-lûn kap i ê kiáⁿ-sun.

32Lín tio̍h tùi lín謝恩祭，將chiàⁿ腿做舉祭，歸hō͘祭司。Lín tio̍h tùi lín siā-un-chè, chiong chiàⁿ-thúi chòe kú-chè, kui hō͘ chè-si.

33亞倫ê kiáⁿ孫中，獻謝恩祭ê血kap油ê，tio̍h得tio̍h chit-ê chiàⁿ腿做in ê份額。A-lûn ê kiáⁿ-sun-tiong, hiàn siā-un-chè ê huih kap iû ê, tio̍h tit-tio̍h chit ê chiàⁿ-thúi chòe in ê hūn-gia̍h.

34因為我tùi以色列人謝恩祭ê中間取chit-ê搖ê胸，kap舉起ê腿，hō͘祭司亞倫kap伊ê kiáⁿ孫，做in tùi以色列人所永遠得tio̍h ê份額。In-ūi Góa tùi Í-sek-lia̍t lâng siā-un-chè ê tiong-kan chhú chit ê iô ê heng, kap kú-khí ê thúi, hō͘ chè-si A-lûn kap i ê kiáⁿ-sun, chòe in tùi Í-sek-lia̍t lâng só͘ éng-oán tit-tio̍h ê hūn-gia̍h.

35這是tùi耶和華火祭中，the̍h出做亞倫受抹油ê份額，kap伊ê kiáⁿ孫受抹油ê份額，tī伊chhōa in來當祭司ê職服事耶和華ê日。Che sī tùi Iâ-hô-hoa hé-chè-tiong, the̍h-chhut chòe A-lûn siū-boah-iû ê hūn-gia̍h, kap i ê kiáⁿ-sun siū-boah-iû ê hūn-gia̍h, tī i chhōa in lâi tng chè-si ê chit ho̍k-sāi Iâ-hô-hoa ê ji̍t.

36就是伊kain抹油ê日，耶和華吩咐以色列人供給in ê，做in ta̍k世代永遠得tio̍h ê份額。Chiū-sī i kā in boah-iû ê ji̍t, Iâ-hô-hoa hoan-hù Í-sek-lia̍t lâng kiong-kip in ê, chòe in ta̍k sè-tāi éng-oán tit-tio̍h ê hūn-gia̍h.

37這是燒祭、素祭、贖罪祭、補過失ê祭、設立性質ê祭，kap謝恩祭ê規例。Che sī sio-chè, sò͘-chè, sio̍k-chōe-chè, pó͘-kè-sit ê chè, siat-li̍p sèng-chit ê chè, kap siā-un-chè ê kui-lē.

38lóng是耶和華tī西奈山所命令摩西ê，就是伊tī西奈曠野命令以色列人獻禮物hō͘耶和華ê日。Lóng sī Iâ-hô-hoa tī Se-nái soaⁿ só͘ bēng-lēng Mô͘-se-ê, chiū-sī i tī Se-nái khòng-iá bēng-lēng Í-sek-lia̍t lâng hiàn lé-mi̍h hō͘ Iâ-hô-hoa ê ji̍t.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h將亞倫kap伊ê kiáⁿ，以及衣服，抹in ê油，kap贖罪祭ê一隻牛káng，兩隻綿羊káng，一筐無酵餅，lóng帶來。Lí tio̍h chiong A-lûn kap i ê kiáⁿ, í-ki̍p i-ho̍k, boah in ê iû, kap sio̍k-chōe-chè ê chi̍t chiah gû-káng, nn̄g chiah mî-iûⁿ-káng, chi̍t kheng bô-kàⁿ-piáⁿ, lóng tòa-lâi.

3Koh招集會眾到會幕門口。Koh chio-chi̍p hōe-chiòng kàu hōe-bō͘ mn̂g-kháu.

4摩西照耶和華所命令伊ê來行；tùi án-ni會眾就聚集tī會幕門口。Mô͘-se chiàu Iâ-hô-hoa só͘ bēng-lēng i-ê lâi kiâⁿ; tùi án-ni hōe-chiòng chiū chū-chi̍p tī hōe-bō͘ mn̂g-kháu.

5摩西kā會眾講：這就是耶和華所命令tio̍h行ê事。Mô͘-se kā hōe-chiòng kóng, Che chiū-sī Iâ-hô-hoa só͘ bēng-lēng tio̍h kiâⁿ ê sū.

6摩西帶亞倫kap伊ê kiáⁿ來，用水kā in洗。Mô͘-se tòa A-lûn kap i ê kiáⁿ lâi, ēng chúi kā in sóe.

7Kā伊穿內衫，hâ帶，穿外袍，tha̍h í-hut-tek，用奇巧ê工所織í-hut-tek ê帶 kā伊hâ，用án-ni來縛伊tī伊ê身軀。Kā i chhēng lāi-saⁿ, hâ tòa, chhēng gōa-phàu, tha̍h í-hut-tek, ēng kî-khá ê kang só͘ chit í-hut-tek ê tòa kā i hâ, ēng án-ni lâi pa̍k i tī i ê seng-khu.

8Koh kā伊tiò補褂，用O͘-lêng kap Thó͘-bêng，hē tī補褂內。Koh kā i tiò pó͘-kòa, ēng O͘-lêng kap Thó͘-bêng, hē tī pó͘-kòa-lāi.

9用帽戴tī伊ê頭殼；tī帽頭前ê頂面tiò金牌，就是聖ê冕旒；lóng是照耶和華所命令摩西ê。Ēng bō tì tī i ê thâu-khak; tī bō thâu-chêng ê téng-bīn tiò kim-pâi, chiū-sī sèng ê bián-liû; lóng sī chiàu Iâ-hô-hoa só͘ bēng-lēng Mô͘-se ê.

10摩西用抹in ê油抹會幕，kap其中所有ê物，分別伊做聖。Mô͘-se ēng boah in ê iû boah hōe-bō͘, kap kî-tiong só͘ ū ê mi̍h, hun-piat i chòe-sèng.

11Koh用hit-ê油hiù壇頂七pái，也抹壇kap伊一切ê器具kap洗盪ê盆，kap伊ê座，分別伊做聖。Koh ēng hit ê iû hiù tôaⁿ-téng chhit-pái, iā boah tôaⁿ kap i it-chhè ê khì-kū kap sóe-tn̄g ê phûn, kap i ê chō, hun-piat i chòe-sèng.

12Koh用抹ê油倒tī亞倫ê頭殼頂，來抹伊，分別伊做聖。Koh ēng boah ê iû tò tī A-lûn ê thâu-khak-téng, lâi boah i, hun-piat i chòe-sèng.

13摩西帶亞倫ê kiáⁿ來，kain穿內衫，hâ帶，包頭殼ê巾；lóng是照耶和華所命令摩西ê。Mô͘-se tòa A-lûn ê kiáⁿ lâi, kā in chhēng lāi-saⁿ, hâ tòa, pau thâu-khak ê kun; lóng sī chiàu Iâ-hô-hoa só͘ bēng-lēng Mô͘-se ê.

14伊牽贖罪祭ê牛káng-á來；亞倫kap伊ê kiáⁿ 按手tī贖罪祭牛káng-á ê頭殼。I khan sio̍k-chōe-chè ê gû-káng-á lâi; A-lûn kap i ê kiáⁿ hōaⁿ-chhiú tī sio̍k-chōe-chè gû-káng-á ê thâu-khak.

15就thâi伊；摩西the̍h血，用指頭á抹tī壇頂四周圍hiah-ê角，hō͘壇清氣；將血倒tī壇腳hia，分別伊做聖，kā伊贖罪。Chiū thâi i; Mô͘-se the̍h huih, ēng chńg-thâu-á boah tī tôaⁿ-téng sì-chiu-ûi hiah ê kak, hō͘ tôaⁿ chheng-khì; chiong huih tò tī tôaⁿ-kha hia, hun-piat i chòe sèng, kā i sio̍k-chōe.

16Koh the̍h臟腑所有ê油，kap肝裡ê網紗，以及兩-粒腰子，kap in所有ê油，摩西lóng燒伊tī壇頂。Koh the̍h chōng-hú só͘ ū ê iû, kap koaⁿ-ni̍h ê bāng-se, í-ki̍p nn̄g-lia̍p io-chí, kap in só͘ ū ê iû, Mô͘-se lóng sio i tī tôaⁿ-téng.

17若是牛káng-á，伊ê皮，伊ê肉，伊ê糞，用火燒tī營外；是照耶和華所命令摩西ê。Nā-sī gû-káng-á, i ê phê, i ê bah, i ê pùn, ēng hé sio tī iâⁿ-gōa; sī chiàu Iâ-hô-hoa só͘ bēng-lēng Mô͘-se ê.

18伊牽燒祭ê綿羊káng來；亞倫kap伊ê kiáⁿ 按手tī羊káng ê頭殼。I khan sio-chè ê mî-iûⁿ-káng lâi; A-lûn kap i ê kiáⁿ hōaⁿ-chhiú tī iûⁿ-káng ê thâu-khak.

19就thâi伊；摩西用血hiù tī壇頂ê周圍。Chiū thâi i; Mô͘-se ēng huih hiù tī tôaⁿ-téng ê chiu-ûi.

20將羊切一塊一塊；摩西用頭，kap肉塊，以及油lóng燒伊。Chiong iûⁿ chhiat chi̍t-tè chi̍t-tè; Mô͘-se ēng thâu, kap bah-tè, í-ki̍p iû lóng sio i.

21用水洗臟腑kap腿；摩西就將ka-nn̂g 隻羊燒tī壇頂，做芳芳ê燒祭，做火祭獻hō͘耶和華；lóng是照耶和華所命令摩西ê。Ēng chúi sóe chōng-hú kap thúi; Mô͘-se chiū chiong ka-nn̂g chiah iûⁿ sio tī tôaⁿ-téng, chòe phang-phang ê sio-chè, chòe hé-chè hiàn hō͘ Iâ-hô-hoa; lóng sī chiàu Iâ-hô-hoa só͘ bēng-lēng Mô͘-se ê.

22伊koh牽第二隻綿羊káng，就是設立性質ê禮ê羊，亞倫kap伊ê kiáⁿ 按手tī羊ê頭殼。I koh khan tē-jī chiah mî-iûⁿ-káng, chiū-sī siat-li̍p sèng-chit ê lé ê iûⁿ, A-lûn kap i ê kiáⁿ hōaⁿ-chhiú tī iûⁿ ê thâu-khak.

23就thâi伊；摩西the̍h淡薄血抹tī亞倫ê chiàⁿ-pêng ê耳á錘，kap chiàⁿ手ê大pō͘拇，kap chiàⁿ腳ê大pō͘拇。Chiū thâi i; Mô͘-se the̍h tām-po̍h huih boah tī A-lûn ê chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú.

24Koh帶亞倫ê kiáⁿ來，摩西用淡薄血抹tṳn chiàⁿ-pêng ê耳á錘，kap chiàⁿ手ê大pō͘拇，kap chiàⁿ腳ê大pō͘拇；摩西koh用血hiù tī壇頂ê周圍。Koh tòa A-lûn ê kiáⁿ lâi, Mô͘-se ēng tām-po̍h huih boah tī in chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú; Mô͘-se koh ēng huih hiù tī tôaⁿ-téng ê chiu-ûi.

25Koh取油，kap肥ê尾，以及臟腑一切ê油，kap肝裡ê網紗，兩粒腰子kap in ê油，kap chiàⁿ腿。Koh chhú iû, kap pûi ê bé, í-ki̍p chōng-hú it-chhè ê iû, kap koaⁿ-ni̍h ê bāng-se, nn̄g lia̍p io-chí kap in ê iû, kap chiàⁿ-thúi.

26Koh tùi耶和華ê面前tóe無酵餅ê筐，the̍h出一塊無酵餅，一塊油餅，一塊薄餅，lóng hē tī油kap chiàⁿ腿頂。Koh tùi Iâ-hô-hoa ê bīn-chêng tóe bô-kàⁿ-piáⁿ ê kheng, the̍h-chhut chi̍t tè bô-kàⁿ-piáⁿ, chi̍t tè iû-piáⁿ, chi̍t tè po̍h-piáⁿ, lóng hē tī iû kap chiàⁿ-thúi-téng.

27將這一切hē tī亞倫ê手，kap伊ê kiáⁿ ê手，做搖祭，tī耶和華ê面前搖伊。Chiong che it-chhè hē tī A-lûn ê chhiú, kap i ê kiáⁿ ê chhiú, chòe iô-chè, tī Iâ-hô-hoa ê bīn-chêng iô i.

28摩西tùi in ê手the̍h落來，燒tī壇裡燒祭ê頂面，lóng是設立性質ê禮，做芳芳；是做獻hō͘耶和華ê火祭。Mô͘-se tùi in ê chhiú the̍h-lo̍h-lâi, sio tī tôaⁿ-ni̍h sio-chè ê téng-bīn, lóng sī siat-li̍p sèng-chit ê lé, chòe phang-phang; sī chòe hiàn hō͘ Iâ-hô-hoa ê hé-chè.

29摩西the̍h羊ê胸做搖祭，tī耶和華ê面前搖伊；是tī設立性質ê禮ê羊，摩西所得tio̍h ê份額；lóng是照耶和華所命令摩西ê。Mô͘-se the̍h iûⁿ ê heng chòe iô-chè, tī Iâ-hô-hoa ê bīn-chêng iô i; sī tī siat-li̍p sèng-chit ê lé ê iûⁿ, Mô͘-se só͘ tit-tio̍h ê hūn-gia̍h; lóng sī chiàu Iâ-hô-hoa só͘ bēng-lēng Mô͘-se ê.

30摩西the̍h抹ê油，kap壇頂ê血，hiù tī亞倫kap伊ê衫，以及伊ê kiáⁿ，kap伊ê kiáⁿ ê衫；hō͘亞倫kap伊ê衫，以及伊ê kiáⁿ kap伊ê kiáⁿ ê衫，相kap做聖。Mô͘-se the̍h boah ê iû, kap tôaⁿ-téng ê huih, hiù tī A-lûn kap i ê saⁿ, í-ki̍p i ê kiáⁿ, kap i ê kiáⁿ ê saⁿ; hō͘ A-lûn kap i ê saⁿ, í-ki̍p i ê kiáⁿ kap i ê kiáⁿ ê saⁿ, saⁿ-kap chòe-sèng.

31摩西對亞倫kap伊ê kiáⁿ講：將肉煮tī會幕ê門口，tī-hia食伊，也食設立性質ê禮筐á內ê餅，照我所命令ê，講：這是亞倫kap伊ê kiáⁿ tio̍h食ê。Mô͘-se tùi A-lûn kap i ê kiáⁿ kóng, Chiong bah chú tī hōe-bō͘ ê mn̂g-kháu, tī-hia chia̍h i, iā chia̍h siat-li̍p sèng-chit ê lé kheng-á-lāi ê piáⁿ, chiàu góa só͘ bēng-lēng-ê, kóng, Che sī A-lûn kap i ê kiáⁿ tio̍h chia̍h ê.

32所chhun ê肉kap餅，lín tio̍h用火燒去。Só͘ chhun ê bah kap piáⁿ, lín tio̍h ēng hé sio-khì.

33Lín七日久m̄-thang出會幕ê毛，到lín受設立ê禮ê日滿；因為七日久伊beh kā lín行設立ê禮。Lín chhit-ji̍t kú m̄-thang chhut hōe-bō͘ ê mn̂g, kàu lín siū siat-li̍p ê lé ê ji̍t móa; in-ūi chhit-ji̍t kú I beh kā lín kiâⁿ siat-li̍p ê lé.

34親像今á日所行ê，耶和華吩咐tio̍h án-ni行，為tio̍h lín贖罪。Chhin-chhiūⁿ kin-á-ji̍t só͘ kiâⁿ-ê, Iâ-hô-hoa hoan-hù tio̍h án-ni kiâⁿ, ūi-tio̍h lín sio̍k-chōe.

35七日久lín tio̍h暝日tiàm tī會幕門口，守耶和華所命令ê職份，免得lín死；因為我所受ê命令是án-ni。Chhit-ji̍t kú lín tio̍h mî-ji̍t tiàm tī hōe-bō͘ mn̂g-kháu, siú Iâ-hô-hoa só͘ bēng-lēng ê chit-hūn, bián-tit lín sí; in-ūi góa só͘ siū ê bēng-lēng sī án-ni.

36亞倫kap伊ê kiáⁿ就行耶和華託摩西所命令一切ê事。A-lûn kap i ê kiáⁿ chiū kiâⁿ Iâ-hô-hoa thok Mô͘-se só͘ bēng-lēng it-chhè ê sū.