1補過失ê祭ê規例就是án-ni；chit-ê是至聖ê。Pó͘-kè-sit ê chè ê kui-lē chiū sī án-ni; chit-ê sī chì-sèng-ê.

2tī thâi燒祭ê所在，也tio̍h tī-hia thâi補過失ê祭；伊ê血tio̍h hiù tī壇裡ê四圍。Tī thâi sio-chè ê só͘-chāi, iā tio̍h tī-hia thâi pó͘-kè-sit ê chè; i ê huih tio̍h hiù tī tôaⁿ-ni̍h ê sì-ûi.

3伊ê油tio̍h lóng獻；hit-ê肥ê尾，kap蓋臟腑ê油，兩粒腰子，I ê iû tio̍h lóng hiàn; hit ê pûi ê bé, kap khàm chōng-hú ê iû,

4kap in所有ê油，就是óa近腰雙pêng ê油，kap肝裡ê網紗，kap腰子一概the̍h起來。nn̄g lia̍p io-chí kap in só͘ ū ê iû, chiū-sī óa-kūn io siang-pêng ê iû, kap koaⁿ-ni̍h ê bāng-se, kap io-chí it-khài the̍h-khí-lâi.

5祭司tio̍h tī壇頂燒伊，做獻hō͘耶和華ê火祭；是補過失ê祭。Chè-si tio̍h tī tôaⁿ-téng sio i, chòe hiàn hō͘ Iâ-hô-hoa ê hé-chè; sī pó͘-kè-sit ê chè.

6祭司中ê ta-po͘丁lóng tio̍h食伊，tī聖ê所在食；這是至聖ê。Chè-si-tiong ê ta-po͘-teng lóng tio̍h chia̍h i, tī sèng ê só͘-chāi chia̍h; che sī chì-sèng-ê.

7贖罪祭甚麼款，補過失ê祭也是án-ni；in ê規例是一樣；用hit-ê來贖罪ê祭司，就得tio̍h chit-ê物。Sio̍k-chōe-chè sím-mi̍h khoán, pó͘-kè-sit ê chè iā-sī án-ni; in ê kui-lē sī chi̍t-iūⁿ; ēng hit-ê lâi sio̍k-chōe ê chè-si, chiū tit-tio̍h chit ê mi̍h.

8祭司kā人獻燒祭，就伊所獻燒祭ê cheng-siⁿ ê皮，歸tī祭司本身。Chè-si kā lâng hiàn sio-chè, chiū i só͘ hiàn sio-chè ê cheng-siⁿ ê phê, kui tī chè-si pún-sin.

9見若tī火爐pek ê素祭，kap tī鼎á tī煎盤備辦ê，lóng tio̍h歸tī獻hit-ê祭ê祭司。Kìⁿ-nā tī hé-lô͘ pek ê sò͘-chè, kap tī tiáⁿ-á tī chian-pôaⁿ pī-pān ê, lóng tio̍h kui tī hiàn hit ê chè ê chè-si.

10見若素祭，無論是chham油ê，á是乾ê，lóng tio̍h歸亞倫ê kiáⁿ孫，大家平分。Kìⁿ-nā sò͘-chè, bô-lūn sī chham-iû-ê, á-sī ta-ê, lóng tio̍h kui A-lûn ê kiáⁿ-sun, tāi-ke pîⁿ-pun.

11人獻謝恩祭hō͘耶和華，hit-ê規例就是án-ni。Lâng hiàn siā-un-chè hō͘ Iâ-hô-hoa, hit ê kui-lē chiū-sī án-ni.

12伊若為tio̍h感謝來獻，就tio̍h用調和油ê無酵餅，kap抹油無酵ê薄餅，以及chhiau hō͘伊chiâu ê麵粉，用油調和做ê餅，kap感謝ê祭相kap來獻。I nā ūi-tio̍h kám-siā lâi hiàn, chiū tio̍h ēng tiau-hô iû ê bô-kàⁿ-piáⁿ, kap boah-iû bô-kàⁿ ê po̍h-piáⁿ, í-ki̍p chhiau hō͘ i chiâu ê mī-hún, ēng iû tiau-hô chòe ê piáⁿ, kap kám-siā ê chè saⁿ-kap lâi hiàn.

13tio̍h用有酵ê餅，kap為tio̍h感謝來獻ê謝恩祭，kap伊ê禮物相kap來獻。Tio̍h ēng ū kàⁿ ê piáⁿ, kap ūi-tio̍h kám-siā lâi hiàn ê siā-un-chè, kap i ê lé-mi̍h saⁿ-kap lâi hiàn.

14Tio̍h tùi ta̍k項禮物ê中間，the̍h一項獻hō͘耶和華做舉祭；這tio̍h歸tī hiù謝恩祭ê血ê祭司。Tio̍h tùi ta̍k-hāng lé-mi̍h ê tiong-kan, the̍h chi̍t-hāng hiàn hō͘ Iâ-hô-hoa chòe kú-chè; che tio̍h kui tī hiù siā-un-chè ê huih ê chè-si.

15為tio̍h感謝來獻ê謝恩祭ê肉，tio̍h tī獻禮物ê日食伊，一點á m̄-thang 留到天光。Ūi-tio̍h kám-siā lâi hiàn ê siā-un-chè ê bah, tio̍h tī hiàn lé-mi̍h ê ji̍t chia̍h i, chi̍t-tiám-á m̄-thang lâu kàu thiⁿ-kng.

16若伊所獻ê禮物，是為tio̍h謝願，á是甘心獻ê，tio̍h tī伊獻祭ê日食伊；所chhun-ê明á日thang食伊。Nā i só͘-hiàn ê lé-mi̍h, sī ūi-tio̍h siā-goān, á-sī kam-sim hiàn ê, tio̍h tī i hiàn-chè ê ji̍t chia̍h i; só͘-chhun-ê bîn-á-ji̍t thang chia̍h i.

17獨獨所chhun ê祭肉，到第三日tio̍h用火燒。To̍k-to̍k só͘ chhun ê chè-bah, kàu tē-saⁿ ji̍t tio̍h ēng hé sio.

18到第三日若食謝恩祭ê肉，chit-ê祭無得tio̍h接納，也無kā獻ê算額；反tńg是做thang厭惡ê；食伊ê人就tio̍h擔當伊ê罪。Kàu tē-saⁿ ji̍t nā chia̍h siā-un-chè ê bah, chit ê chè bô tit-tio̍h chiap-la̍p, iā bô kā hiàn-ê sǹg-gia̍h; hoán-tńg sī chòe thang iàm-ò͘ⁿ ê; chia̍h i ê lâng chiū tio̍h tam-tng i ê chōe.

19祭肉若kha̍p-tio̍h無清氣ê物，就m̄-thang食，tio̍h用火燒。論到祭ê肉，見若清氣ê人lóng thang食伊；Chè-bah nā kha̍p-tio̍h bô chheng-khì ê mi̍h, chiū m̄-thang chia̍h, tio̍h ēng hé sio. Lūn-kàu chè ê bah, kìⁿ-nā chheng-khì ê lâng lóng thang chia̍h i;

20獨獨屬tī耶和華謝恩祭ê肉，人若身軀bak-tio̍h無清氣來食伊，chit-ê人tio̍h tùi伊ê百姓中剪除去。to̍k-to̍k sio̍k tī Iâ-hô-hoa siā-un-chè ê bah, lâng nā seng-khu bak-tio̍h bô chheng-khì lâi chia̍h i, chit ê lâng tio̍h tùi i ê peh-sìⁿ-tiong chián-tû-khì.

21有人摸tio̍h甚麼無清氣ê物，或是人ê無清氣，或是無清氣ê cheng-siⁿ，或是無清氣可惡ê物，來食tio̍h屬tī耶和華謝恩祭ê肉，chit-ê人tio̍h tùi伊ê百姓中剪除去。Ū lâng bong-tio̍h sím-mi̍h bô chheng-khì ê mi̍h, he̍k-sī lâng ê bô chheng-khì, he̍k-sī bô chheng-khì ê cheng-siⁿ, he̍k-sī bô chheng-khì khó-ò͘ⁿ ê mi̍h, lâi chia̍h-tio̍h sio̍k tī Iâ-hô-hoa siā-un-chè ê bah, chit ê lâng tio̍h tùi i ê peh-sìⁿ-tiong chián-tû-khì.

22耶和華吩咐摩西講：Iâ-hô-hoa hoan-hù Mô͘-se kóng,

23你tio̍h吩咐以色列人講：無論是牛，á是綿羊，á是山羊ê油，lín lóng m̄-thang食伊。Lí tio̍h hoan-hù Í-sek-lia̍t lâng kóng, Bô-lūn sī gû, á-sī mî-iûⁿ, á-sī soaⁿ-iûⁿ ê iû, lín lóng m̄-thang chia̍h i.

24家己死ê ê油，kap hō͘野獸拆ê ê油，thang做別物ê路用；獨獨lín千萬m̄-thang食。ka-kī sí-ê ê iû, kap hō͘ iá-siù thiah-ê ê iû, thang chòe pa̍t-mi̍h ê lō͘-ēng; to̍k-to̍k lín chhian-bān m̄-thang chia̍h.

25能thang獻hō͘耶和華做火祭ê cheng-siⁿ ê油，見若食伊ê人，hit-ê人tio̍h tùi伊ê百姓中剪除去。Ōe thang hiàn-hō͘ Iâ-hô-hoa chòe hé-chè ê cheng-siⁿ ê iû, kìⁿ-nā chia̍h i ê lâng, hit ê lâng tio̍h tùi i ê peh-sìⁿ-tiong chián-tû-khì.

26tī lín一切所khiā起ê所在，無論是鳥á是野獸ê血，lín lóng m̄-thang食伊。Tī lín it-chhè só͘ khiā-khí ê só͘-chāi, bô-lūn sī chiáu á-sī iá-siù ê huih, lín lóng m̄-thang chia̍h i.

27無論甚麼人食甚麼血，hit人tio̍h tùi伊ê百姓中剪除去。Bô-lūn sím-mi̍h lâng chia̍h sím-mi̍h huih, hit-lâng tio̍h tùi i ê peh-sìⁿ-tiong chián-tû-khì.

28耶和華吩咐摩西講：Iâ-hô-hoa hoan-hù Mô͘-se kóng,

29你tio̍h吩咐以色列人講：見若獻謝恩祭hō͘耶和華ê，tio̍h tùi伊ê謝恩祭中，帶伊ê禮物來hō͘耶和華。Lí tio̍h hoan-hù Í-sek-lia̍t lâng kóng, Kìⁿ-nā hiàn siā-un-chè hō͘ Iâ-hô-hoa ê, tio̍h tùi i ê siā-un-chè tiong, tòa i ê lé-mi̍h lâi hō͘ Iâ-hô-hoa.

30伊tio̍h親手帶獻hō͘耶和華ê火祭來，就是帶油kap胸來，thang用胸tī耶和華ê面前做搖祭，來搖伊。I tio̍h chhin-chhiú tòa hiàn-hō͘ Iâ-hô-hoa ê hé-chè lâi, chiū-sī tòa iû kap heng lâi, thang ēng heng tī Iâ-hô-hoa ê bīn-chêng chòe iô-chè, lâi iô i.

31祭司tio̍h將油燒tī壇頂；獨獨胸 tio̍h歸tī亞倫kap伊ê kiáⁿ孫。Chè-si tio̍h chiong iû sio tī tôaⁿ-téng; to̍k-to̍k heng tio̍h kui tī A-lûn kap i ê kiáⁿ-sun.

32Lín tio̍h tùi lín謝恩祭，將chiàⁿ腿做舉祭，歸hō͘祭司。Lín tio̍h tùi lín siā-un-chè, chiong chiàⁿ-thúi chòe kú-chè, kui hō͘ chè-si.

33亞倫ê kiáⁿ孫中，獻謝恩祭ê血kap油ê，tio̍h得tio̍h chit-ê chiàⁿ腿做in ê份額。A-lûn ê kiáⁿ-sun-tiong, hiàn siā-un-chè ê huih kap iû ê, tio̍h tit-tio̍h chit ê chiàⁿ-thúi chòe in ê hūn-gia̍h.

34因為我tùi以色列人謝恩祭ê中間取chit-ê搖ê胸，kap舉起ê腿，hō͘祭司亞倫kap伊ê kiáⁿ孫，做in tùi以色列人所永遠得tio̍h ê份額。In-ūi Góa tùi Í-sek-lia̍t lâng siā-un-chè ê tiong-kan chhú chit ê iô ê heng, kap kú-khí ê thúi, hō͘ chè-si A-lûn kap i ê kiáⁿ-sun, chòe in tùi Í-sek-lia̍t lâng só͘ éng-oán tit-tio̍h ê hūn-gia̍h.

35這是tùi耶和華火祭中，the̍h出做亞倫受抹油ê份額，kap伊ê kiáⁿ孫受抹油ê份額，tī伊chhōa in來當祭司ê職服事耶和華ê日。Che sī tùi Iâ-hô-hoa hé-chè-tiong, the̍h-chhut chòe A-lûn siū-boah-iû ê hūn-gia̍h, kap i ê kiáⁿ-sun siū-boah-iû ê hūn-gia̍h, tī i chhōa in lâi tng chè-si ê chit ho̍k-sāi Iâ-hô-hoa ê ji̍t.

36就是伊kain抹油ê日，耶和華吩咐以色列人供給in ê，做in ta̍k世代永遠得tio̍h ê份額。Chiū-sī i kā in boah-iû ê ji̍t, Iâ-hô-hoa hoan-hù Í-sek-lia̍t lâng kiong-kip in ê, chòe in ta̍k sè-tāi éng-oán tit-tio̍h ê hūn-gia̍h.

37這是燒祭、素祭、贖罪祭、補過失ê祭、設立性質ê祭，kap謝恩祭ê規例。Che sī sio-chè, sò͘-chè, sio̍k-chōe-chè, pó͘-kè-sit ê chè, siat-li̍p sèng-chit ê chè, kap siā-un-chè ê kui-lē.

38lóng是耶和華tī西奈山所命令摩西ê，就是伊tī西奈曠野命令以色列人獻禮物hō͘耶和華ê日。Lóng sī Iâ-hô-hoa tī Se-nái soaⁿ só͘ bēng-lēng Mô͘-se-ê, chiū-sī i tī Se-nái khòng-iá bēng-lēng Í-sek-lia̍t lâng hiàn lé-mi̍h hō͘ Iâ-hô-hoa ê ji̍t.

1耶和華吩咐摩西講：Iâ-hô-hoa hoan-hù Mô͘-se kóng,

2你tio̍h將亞倫kap伊ê kiáⁿ，以及衣服，抹in ê油，kap贖罪祭ê一隻牛káng，兩隻綿羊káng，一筐無酵餅，lóng帶來。Lí tio̍h chiong A-lûn kap i ê kiáⁿ, í-ki̍p i-ho̍k, boah in ê iû, kap sio̍k-chōe-chè ê chi̍t chiah gû-káng, nn̄g chiah mî-iûⁿ-káng, chi̍t kheng bô-kàⁿ-piáⁿ, lóng tòa-lâi.

3Koh招集會眾到會幕門口。Koh chio-chi̍p hōe-chiòng kàu hōe-bō͘ mn̂g-kháu.

4摩西照耶和華所命令伊ê來行；tùi án-ni會眾就聚集tī會幕門口。Mô͘-se chiàu Iâ-hô-hoa só͘ bēng-lēng i-ê lâi kiâⁿ; tùi án-ni hōe-chiòng chiū chū-chi̍p tī hōe-bō͘ mn̂g-kháu.

5摩西kā會眾講：這就是耶和華所命令tio̍h行ê事。Mô͘-se kā hōe-chiòng kóng, Che chiū-sī Iâ-hô-hoa só͘ bēng-lēng tio̍h kiâⁿ ê sū.

6摩西帶亞倫kap伊ê kiáⁿ來，用水kā in洗。Mô͘-se tòa A-lûn kap i ê kiáⁿ lâi, ēng chúi kā in sóe.

7Kā伊穿內衫，hâ帶，穿外袍，tha̍h í-hut-tek，用奇巧ê工所織í-hut-tek ê帶 kā伊hâ，用án-ni來縛伊tī伊ê身軀。Kā i chhēng lāi-saⁿ, hâ tòa, chhēng gōa-phàu, tha̍h í-hut-tek, ēng kî-khá ê kang só͘ chit í-hut-tek ê tòa kā i hâ, ēng án-ni lâi pa̍k i tī i ê seng-khu.

8Koh kā伊tiò補褂，用O͘-lêng kap Thó͘-bêng，hē tī補褂內。Koh kā i tiò pó͘-kòa, ēng O͘-lêng kap Thó͘-bêng, hē tī pó͘-kòa-lāi.

9用帽戴tī伊ê頭殼；tī帽頭前ê頂面tiò金牌，就是聖ê冕旒；lóng是照耶和華所命令摩西ê。Ēng bō tì tī i ê thâu-khak; tī bō thâu-chêng ê téng-bīn tiò kim-pâi, chiū-sī sèng ê bián-liû; lóng sī chiàu Iâ-hô-hoa só͘ bēng-lēng Mô͘-se ê.

10摩西用抹in ê油抹會幕，kap其中所有ê物，分別伊做聖。Mô͘-se ēng boah in ê iû boah hōe-bō͘, kap kî-tiong só͘ ū ê mi̍h, hun-piat i chòe-sèng.

11Koh用hit-ê油hiù壇頂七pái，也抹壇kap伊一切ê器具kap洗盪ê盆，kap伊ê座，分別伊做聖。Koh ēng hit ê iû hiù tôaⁿ-téng chhit-pái, iā boah tôaⁿ kap i it-chhè ê khì-kū kap sóe-tn̄g ê phûn, kap i ê chō, hun-piat i chòe-sèng.

12Koh用抹ê油倒tī亞倫ê頭殼頂，來抹伊，分別伊做聖。Koh ēng boah ê iû tò tī A-lûn ê thâu-khak-téng, lâi boah i, hun-piat i chòe-sèng.

13摩西帶亞倫ê kiáⁿ來，kain穿內衫，hâ帶，包頭殼ê巾；lóng是照耶和華所命令摩西ê。Mô͘-se tòa A-lûn ê kiáⁿ lâi, kā in chhēng lāi-saⁿ, hâ tòa, pau thâu-khak ê kun; lóng sī chiàu Iâ-hô-hoa só͘ bēng-lēng Mô͘-se ê.

14伊牽贖罪祭ê牛káng-á來；亞倫kap伊ê kiáⁿ 按手tī贖罪祭牛káng-á ê頭殼。I khan sio̍k-chōe-chè ê gû-káng-á lâi; A-lûn kap i ê kiáⁿ hōaⁿ-chhiú tī sio̍k-chōe-chè gû-káng-á ê thâu-khak.

15就thâi伊；摩西the̍h血，用指頭á抹tī壇頂四周圍hiah-ê角，hō͘壇清氣；將血倒tī壇腳hia，分別伊做聖，kā伊贖罪。Chiū thâi i; Mô͘-se the̍h huih, ēng chńg-thâu-á boah tī tôaⁿ-téng sì-chiu-ûi hiah ê kak, hō͘ tôaⁿ chheng-khì; chiong huih tò tī tôaⁿ-kha hia, hun-piat i chòe sèng, kā i sio̍k-chōe.

16Koh the̍h臟腑所有ê油，kap肝裡ê網紗，以及兩-粒腰子，kap in所有ê油，摩西lóng燒伊tī壇頂。Koh the̍h chōng-hú só͘ ū ê iû, kap koaⁿ-ni̍h ê bāng-se, í-ki̍p nn̄g-lia̍p io-chí, kap in só͘ ū ê iû, Mô͘-se lóng sio i tī tôaⁿ-téng.

17若是牛káng-á，伊ê皮，伊ê肉，伊ê糞，用火燒tī營外；是照耶和華所命令摩西ê。Nā-sī gû-káng-á, i ê phê, i ê bah, i ê pùn, ēng hé sio tī iâⁿ-gōa; sī chiàu Iâ-hô-hoa só͘ bēng-lēng Mô͘-se ê.

18伊牽燒祭ê綿羊káng來；亞倫kap伊ê kiáⁿ 按手tī羊káng ê頭殼。I khan sio-chè ê mî-iûⁿ-káng lâi; A-lûn kap i ê kiáⁿ hōaⁿ-chhiú tī iûⁿ-káng ê thâu-khak.

19就thâi伊；摩西用血hiù tī壇頂ê周圍。Chiū thâi i; Mô͘-se ēng huih hiù tī tôaⁿ-téng ê chiu-ûi.

20將羊切一塊一塊；摩西用頭，kap肉塊，以及油lóng燒伊。Chiong iûⁿ chhiat chi̍t-tè chi̍t-tè; Mô͘-se ēng thâu, kap bah-tè, í-ki̍p iû lóng sio i.

21用水洗臟腑kap腿；摩西就將ka-nn̂g 隻羊燒tī壇頂，做芳芳ê燒祭，做火祭獻hō͘耶和華；lóng是照耶和華所命令摩西ê。Ēng chúi sóe chōng-hú kap thúi; Mô͘-se chiū chiong ka-nn̂g chiah iûⁿ sio tī tôaⁿ-téng, chòe phang-phang ê sio-chè, chòe hé-chè hiàn hō͘ Iâ-hô-hoa; lóng sī chiàu Iâ-hô-hoa só͘ bēng-lēng Mô͘-se ê.

22伊koh牽第二隻綿羊káng，就是設立性質ê禮ê羊，亞倫kap伊ê kiáⁿ 按手tī羊ê頭殼。I koh khan tē-jī chiah mî-iûⁿ-káng, chiū-sī siat-li̍p sèng-chit ê lé ê iûⁿ, A-lûn kap i ê kiáⁿ hōaⁿ-chhiú tī iûⁿ ê thâu-khak.

23就thâi伊；摩西the̍h淡薄血抹tī亞倫ê chiàⁿ-pêng ê耳á錘，kap chiàⁿ手ê大pō͘拇，kap chiàⁿ腳ê大pō͘拇。Chiū thâi i; Mô͘-se the̍h tām-po̍h huih boah tī A-lûn ê chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú.

24Koh帶亞倫ê kiáⁿ來，摩西用淡薄血抹tṳn chiàⁿ-pêng ê耳á錘，kap chiàⁿ手ê大pō͘拇，kap chiàⁿ腳ê大pō͘拇；摩西koh用血hiù tī壇頂ê周圍。Koh tòa A-lûn ê kiáⁿ lâi, Mô͘-se ēng tām-po̍h huih boah tī in chiàⁿ-pêng ê hī-á-sûi, kap chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú; Mô͘-se koh ēng huih hiù tī tôaⁿ-téng ê chiu-ûi.

25Koh取油，kap肥ê尾，以及臟腑一切ê油，kap肝裡ê網紗，兩粒腰子kap in ê油，kap chiàⁿ腿。Koh chhú iû, kap pûi ê bé, í-ki̍p chōng-hú it-chhè ê iû, kap koaⁿ-ni̍h ê bāng-se, nn̄g lia̍p io-chí kap in ê iû, kap chiàⁿ-thúi.

26Koh tùi耶和華ê面前tóe無酵餅ê筐，the̍h出一塊無酵餅，一塊油餅，一塊薄餅，lóng hē tī油kap chiàⁿ腿頂。Koh tùi Iâ-hô-hoa ê bīn-chêng tóe bô-kàⁿ-piáⁿ ê kheng, the̍h-chhut chi̍t tè bô-kàⁿ-piáⁿ, chi̍t tè iû-piáⁿ, chi̍t tè po̍h-piáⁿ, lóng hē tī iû kap chiàⁿ-thúi-téng.

27將這一切hē tī亞倫ê手，kap伊ê kiáⁿ ê手，做搖祭，tī耶和華ê面前搖伊。Chiong che it-chhè hē tī A-lûn ê chhiú, kap i ê kiáⁿ ê chhiú, chòe iô-chè, tī Iâ-hô-hoa ê bīn-chêng iô i.

28摩西tùi in ê手the̍h落來，燒tī壇裡燒祭ê頂面，lóng是設立性質ê禮，做芳芳；是做獻hō͘耶和華ê火祭。Mô͘-se tùi in ê chhiú the̍h-lo̍h-lâi, sio tī tôaⁿ-ni̍h sio-chè ê téng-bīn, lóng sī siat-li̍p sèng-chit ê lé, chòe phang-phang; sī chòe hiàn hō͘ Iâ-hô-hoa ê hé-chè.

29摩西the̍h羊ê胸做搖祭，tī耶和華ê面前搖伊；是tī設立性質ê禮ê羊，摩西所得tio̍h ê份額；lóng是照耶和華所命令摩西ê。Mô͘-se the̍h iûⁿ ê heng chòe iô-chè, tī Iâ-hô-hoa ê bīn-chêng iô i; sī tī siat-li̍p sèng-chit ê lé ê iûⁿ, Mô͘-se só͘ tit-tio̍h ê hūn-gia̍h; lóng sī chiàu Iâ-hô-hoa só͘ bēng-lēng Mô͘-se ê.

30摩西the̍h抹ê油，kap壇頂ê血，hiù tī亞倫kap伊ê衫，以及伊ê kiáⁿ，kap伊ê kiáⁿ ê衫；hō͘亞倫kap伊ê衫，以及伊ê kiáⁿ kap伊ê kiáⁿ ê衫，相kap做聖。Mô͘-se the̍h boah ê iû, kap tôaⁿ-téng ê huih, hiù tī A-lûn kap i ê saⁿ, í-ki̍p i ê kiáⁿ, kap i ê kiáⁿ ê saⁿ; hō͘ A-lûn kap i ê saⁿ, í-ki̍p i ê kiáⁿ kap i ê kiáⁿ ê saⁿ, saⁿ-kap chòe-sèng.

31摩西對亞倫kap伊ê kiáⁿ講：將肉煮tī會幕ê門口，tī-hia食伊，也食設立性質ê禮筐á內ê餅，照我所命令ê，講：這是亞倫kap伊ê kiáⁿ tio̍h食ê。Mô͘-se tùi A-lûn kap i ê kiáⁿ kóng, Chiong bah chú tī hōe-bō͘ ê mn̂g-kháu, tī-hia chia̍h i, iā chia̍h siat-li̍p sèng-chit ê lé kheng-á-lāi ê piáⁿ, chiàu góa só͘ bēng-lēng-ê, kóng, Che sī A-lûn kap i ê kiáⁿ tio̍h chia̍h ê.

32所chhun ê肉kap餅，lín tio̍h用火燒去。Só͘ chhun ê bah kap piáⁿ, lín tio̍h ēng hé sio-khì.

33Lín七日久m̄-thang出會幕ê毛，到lín受設立ê禮ê日滿；因為七日久伊beh kā lín行設立ê禮。Lín chhit-ji̍t kú m̄-thang chhut hōe-bō͘ ê mn̂g, kàu lín siū siat-li̍p ê lé ê ji̍t móa; in-ūi chhit-ji̍t kú I beh kā lín kiâⁿ siat-li̍p ê lé.

34親像今á日所行ê，耶和華吩咐tio̍h án-ni行，為tio̍h lín贖罪。Chhin-chhiūⁿ kin-á-ji̍t só͘ kiâⁿ-ê, Iâ-hô-hoa hoan-hù tio̍h án-ni kiâⁿ, ūi-tio̍h lín sio̍k-chōe.

35七日久lín tio̍h暝日tiàm tī會幕門口，守耶和華所命令ê職份，免得lín死；因為我所受ê命令是án-ni。Chhit-ji̍t kú lín tio̍h mî-ji̍t tiàm tī hōe-bō͘ mn̂g-kháu, siú Iâ-hô-hoa só͘ bēng-lēng ê chit-hūn, bián-tit lín sí; in-ūi góa só͘ siū ê bēng-lēng sī án-ni.

36亞倫kap伊ê kiáⁿ就行耶和華託摩西所命令一切ê事。A-lûn kap i ê kiáⁿ chiū kiâⁿ Iâ-hô-hoa thok Mô͘-se só͘ bēng-lēng it-chhè ê sū.

1到第八日，摩西召亞倫kap伊ê kiáⁿ，以及以色列hiah-ê長老來。Kàu tē-poeh ji̍t, Mô͘-se tiàu A-lûn kap i ê kiáⁿ, í-ki̍p Í-sek-lia̍t hiah ê tiúⁿ-ló lâi.

2對亞倫講：你tio̍h取一隻細隻牛káng-á，做贖罪祭，一隻綿羊káng做燒祭，tio̍h無瑕疵ê，獻tī耶和華ê面前。Tùi A-lûn kóng, Lí tio̍h chhú chi̍t-chiah sòe chiah gû-káng-á, chòe sio̍k-chōe-chè, chi̍t chiah mî-iûⁿ-káng chòe sio-chè, tio̍h bô hâ-chhû-ê, hiàn tī Iâ-hô-hoa ê bīn-chêng.

3你也tio̍h吩咐以色列人講：Lín tio̍h取一隻山羊káng做贖罪祭；koh取一隻牛á-kiáⁿ，kap一隻綿羊á，lóng tio̍h未滿年，koh tio̍h無瑕疵ê，做燒祭。Lí iā tio̍h hoan-hù Í-sek-lia̍t lâng kóng, Lín tio̍h chhú chi̍t chiah soaⁿ-iûⁿ-káng chòe sio̍k-chōe-chè; koh chhú chi̍t chiah gû-á-kiáⁿ, kap chi̍t chiah mî-iûⁿ-á, lóng tio̍h bē-móa-nî, koh tio̍h bô hâ-chhû ê, chòe sio-chè.

4Koh取一隻牛káng，一隻綿羊káng，做謝恩祭，獻tī耶和華ê面前，kap取調和油ê素祭；因為今á日耶和華beh顯現hō͘ lín看。Koh chhú chi̍t chiah gû-káng, chi̍t chiah mî-iûⁿ-káng, chòe siā-un-chè, hiàn tī Iâ-hô-hoa ê bīn-chêng, kap chhú tiau-hô iû ê sò͘-chè; in-ūi kin-á-ji̍t Iâ-hô-hoa beh hián-hiān hō͘ lín khòaⁿ.

5In就照摩西所命令ê帶到會幕前；會眾lóng近óa來khiā tī耶和華ê面前。In chiū chiàu Mô͘-se só͘ bēng-lēng-ê tòa kàu hōe-bō͘ chêng; hōe-chiòng lóng kūn-óa lâi khiā tī Iâ-hô-hoa ê bīn-chêng.

6摩西講：這是耶和華命令lín所tio̍h行ê；耶和華ê榮光就beh顯現hō͘ lín看。Mô͘-se kóng, Che sī Iâ-hô-hoa bēng-lēng lín só͘ tio̍h kiâⁿ ê; Iâ-hô-hoa ê êng-kng chiū beh hián-hiān hō͘ lín khòaⁿ.

7摩西對亞倫講：你tio̍h到壇前，獻你ê贖罪祭，kap你ê燒祭，為本身kap百姓贖罪；koh獻百姓ê禮物，替in贖罪，lóng照耶和華所命令ê。Mô͘-se tùi A-lûn kóng, Lí tio̍h kàu tôaⁿ-chêng, hiàn lí ê sio̍k-chōe-chè, kap lí ê sio-chè, ūi pún-sin kap peh-sìⁿ sio̍k-chōe; koh hiàn peh-sìⁿ ê lé-mi̍h, thòe in sio̍k-chōe, lóng chiàu Iâ-hô-hoa só͘ bēng-lēng-ê.

8亞倫就到壇前，thâi hit隻牛á-kiáⁿ，ūi本身做贖罪祭ê。A-lûn chiū kàu tôaⁿ-chêng, thâi hit chiah gû-á-kiáⁿ, ūi pún-sin chòe sio̍k-chōe-chè ê.

9亞倫chiah-ê kiáⁿ phâng hit-ê血hō͘伊；伊就用指頭á ùn血，抹tī壇頂hiah-ê角；koh用血tò tī壇腳裡。A-lûn chiah ê kiáⁿ phâng hit ê huih hō͘ i; i chiū ēng chńg-thâu-á ùn huih, boah tī tôaⁿ-téng hiah ê kak; koh ēng huih tò tī tôaⁿ-kha-ni̍h.

10獨獨贖罪祭ê油kap腰子，kap肝裡ê網紗，伊lóng燒tī壇頂；照耶和華所命令摩西ê。To̍k-to̍k sio̍k-chōe-chè ê iû kap io-chí, kap koaⁿ-ni̍h ê bāng-se, i lóng sio tī tôaⁿ-téng; chiàu Iâ-hô-hoa só͘ bēng-lēng Mô͘-se ê.

11伊koh用火將肉kap皮燒tī營外。I koh ēng hé chiong bah kap phê sio tī iâⁿ-gōa.

12就thâi燒祭ê cheng-siⁿ；亞倫chiah-ê kiáⁿ phâng血hō͘伊，伊就hiù tī壇頂ê周圍。Chiū thâi sio-chè ê cheng-siⁿ; A-lûn chiah ê kiáⁿ phâng huih hō͘ i, i chiū hiù tī tôaⁿ-téng ê chiu-ûi.

13In koh用燒祭ê肉，一塊一塊連頭the̍h hō͘伊；伊lóng燒tī壇頂。In koh ēng sio-chè ê bah, chi̍t-tè chi̍t-tè liân thâu the̍h hō͘ i; i lóng sio tī tôaⁿ-téng.

14伊koh洗臟腑kap腿，燒tī壇頂燒祭ê頂面。I koh sóe chōng-hú kap thúi, sio tī tôaⁿ-téng sio-chè ê téng-bīn.

15伊帶百姓ê禮物，將hit隻做百姓贖罪祭ê山羊káng thâi伊，為tio̍h罪來獻，kap起頭ê同一樣。I tòa peh-sìⁿ ê lé-mi̍h, chiong hit-chiah chòe peh-sìⁿ sio̍k-chōe-chè ê soaⁿ-iûⁿ-káng thâi i, ūi-tio̍h chōe lâi hiàn, kap khí-thâu-ê tâng chi̍t-iūⁿ.

16也帶燒祭照例來獻。Iā tòa sio-chè chiàu lē lâi hiàn.

17伊koh帶素祭，tùi hit中間mi一把；這是tī早起時ê燒祭以外。I koh tòa sò͘-chè, tùi hit tiong-kan mi chi̍t-pé; che sī tī chá-khí-sî ê sio-chè í-gōa.

18Koh thâi牛káng kap綿羊káng做百姓ê謝恩祭；亞倫chiah-ê kiáⁿ phâng血hō͘伊，伊就hiù tī壇頂ê周圍。Koh thâi gû-káng kap mî-iûⁿ-káng chòe peh-sìⁿ ê siā-un-chè; A-lûn chiah ê kiáⁿ phâng huih hō͘ i, i chiū hiù tī tôaⁿ-téng ê chiu-ûi.

19Koh the̍h牛káng ê油；kap綿羊káng肥ê尾，以及蓋臟腑ê油，kap腰子，kap肝裡ê網紗。Koh the̍h gû-káng ê iû; kap mî-iûⁿ-káng pûi ê bé, í-ki̍p khàm chōng-hú ê iû, kap io-chí, kap koaⁿ-ni̍h ê bāng-se.

20In將chiah-ê油hē tī hiah-ê胸 ê頂面，伊就將油燒tī壇頂。In chiong chiah ê iû hē tī hiah ê heng ê téng-bīn, i chiū chiong iû sio tī tôaⁿ-téng.

21chiah-ê胸kap chiàⁿ腿，亞倫用伊做搖祭，tī耶和華ê面前搖伊；lóng是照摩西所命令ê。Chiah ê heng kap chiàⁿ-thúi, A-lûn ēng i chòe iô-chè, tī Iâ-hô-hoa ê bīn-chêng iô i; lóng sī chiàu Mô͘-se só͘ bēng-lēng-ê.

22亞倫ǹg百姓kia̍h起手，kain祝福；伊已經獻贖罪祭、燒祭、謝恩祭，就落來。A-lûn ǹg peh-sìⁿ kia̍h-khí chhiú, kā in chiok-hok; i í-keng hiàn sio̍k-chōe-chè, sio-chè, siā-un-chè, chiū lo̍h-lâi.

23摩西亞倫進入會幕，koh出來kā百姓祝福；耶和華ê榮光就顯現hō͘眾百姓看見。Mô͘-se A-lûn chìn-ji̍p hōe-bō͘, koh chhut-lâi kā peh-sìⁿ chiok-hok; Iâ-hô-hoa ê êng-kng chiū hián-hiān hō͘ chèng peh-sìⁿ khòaⁿ-kìⁿ.

24有火tùi耶和華ê面前出來，燒壇頂ê燒祭，kap油；眾百姓看見，就出大歡喜ê聲，仆tī地裡。Ū hé tùi Iâ-hô-hoa ê bīn-chêng chhut-lâi, sio tôaⁿ-téng ê sio-chè, kap iû; chèng peh-sìⁿ khòaⁿ-kìⁿ, chiū chhut tōa hoaⁿ-hí ê siaⁿ, phak tī tōe-ni̍h.