1Chiah-ê tāi-chì了後，主koh設立七十人，一對一對差in做頭去伊所beh到ta̍k ê城，ta̍k ê所在；Chiah ê tāi-chì liáu-āu, Chú koh siat-li̍p chhit-cha̍p lâng, chi̍t tùi chi̍t tùi chhe in chòe-thâu khì I só͘ beh kàu ta̍k ê siâⁿ, ta̍k ê só͘-chāi;

2對in講，Thang收成ê是chōe，做工ê是少；所以lín tio̍h求園主逼工去kā伊收成。tùi in kóng, Thang siu-sêng ê sī chōe, chòe-kang ê sī chió; só͘-í lín tio̍h kiû hn̂g Chú pek kang khì kā I siu-sêng.

3lín去ah，我差lín親像羊á入豺狼ê中間。Lín khì ah, góa chhe lín chhin-chhiūⁿ iûⁿ-á ji̍p chhâi-lông ê tiong-kan.

4莫得帶錢袋，莫得tah-liân，莫得鞋；路裡莫得kā人請安。Bo̍h-tit tòa chîⁿ-tē, bo̍h-tit tah-liân, bo̍h-tit ôe; lō͘-ni̍h bo̍h-tit kā lâng chhéng-an.

5無論入甚麼厝，tio̍h事先講，願chit家平安。Bô lūn ji̍p sím-mi̍h chhù, tio̍h tāi-seng kóng, Goān chit ke pêng-an.

6設使有合宜得tio̍h平安ê人tī hia，就lín ê平安會到tī伊；若無，就倒歸tī lín。Siat-sú ū ha̍p-gî tit-tio̍h pêng-an ê lâng tī hia, chiū lín ê pêng-an ōe kàu tī i; nā bô, chiū tò kui tī lín.

7Tio̍h tiàm tī hit家，lim食in所供給ê，因為做工人堪得得tio̍h伊ê工錢；莫得tùi chit家徙去hit家。Tio̍h tiàm tī hit ke, lim-chia̍h in só͘ kiong-kip ê, in-ūi chòe-kang lâng kham-tit tit-tio̍h i ê kang-chîⁿ; bo̍h-tit tùi chit ke sóa khì hit ke.

8無論入甚麼城，人若接納lín，tio̍h食in所排tī lín面前ê。Bô lūn ji̍p sím-mi̍h siâⁿ, lâng nā chiap-la̍p lín, tio̍h chia̍h in só͘ pâi tī lín bīn-chêng ê.

9城內有病ê，tio̍h醫好in，續kā in講，上帝國近lín lah。Siâⁿ-lāi ū pīⁿ ê, tio̍h i-hó in, sòa kā in kóng, Siōng-tè kok kūn lín lah.

10但是無論入甚麼城，人m̄接納lín，就tio̍h出去in ê大街路講，Nā-sī bô lūn ji̍p sím-mi̍h siâⁿ, lâng m̄ chiap-la̍p lín, chiū tio̍h chhut-khì in ê tōa ke-lō͘ kóng,

11連lín ê城ê土粉，tiâu tī阮ê腳ê，阮也tùi lín拭去；總是lín tio̍h知上帝ê國近lah。Liân lín ê siâⁿ ê thô͘-hún, tiâu tī goán ê kha ê, goán iā tùi lín chhit-khì; chóng-sī lín tio̍h chai Siōng-tè ê kok kūn lah.

12我kā lín講，Tī hit日所多瑪比hit-ê城iáu khah快擔當。Góa kā lín kóng, Tī hit ji̍t Só͘-to-má pí hit ê siâⁿ iáu khah khoài tam-tng.

13Ko-lia̍p-sìn ah，你有災禍！Pek-sài-tāi ah，你有災禍！因為tī lín中間所行chiah-ê權能，若有行tī chhui-lô kap Se-tùn，就in早早穿麻衫sám火灰坐teh來反悔。Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê koân-lêng, nā ū kiâⁿ tī Chhui-lô kap Se-tùn, chiū in chá-chá chhēng môa-saⁿ sám hé-hu chē-teh lâi hoán-hóe.

14但是當審判ê時Chhui-lô kap Se-tùn比lín iáu khah快擔當。Nā-sī tng sím-phòaⁿ ê sî Chhui-lô kap Se-tùn pí lín iáu khah khoài tam-tng.

15迦百農ah，你kiám會得tio̍h舉起到天mah？你beh chhia落陰府。Ka-pek-lông ah, lí kiám ōe tit-tio̍h kú-khí kàu thiⁿ mah? Lí beh chhia lo̍h im-hú.

16聽lín ê就是聽我；棄sak lín ê就是棄sak我；棄sak我ê就是棄sak差我ê。Thiaⁿ lín ê chiū-sī thiaⁿ góa; khì-sak lín ê chiū-sī khì-sak góa; khì-sak góa ê chiū-sī khì-sak chhe góa ê.

17Hiah-ê七十人倒tńg來teh歡喜講，主ah，用你ê名鬼也降服阮。Hiah ê chhit-cha̍p lâng tò-tńg-lâi teh hoaⁿ-hí kóng, Chú ah, ēng lí ê miâ kúi iā hâng-ho̍k goán.

18耶穌kā in講，我有看見撒旦親像sih-nà tùi天跋落來。Iâ-so͘ kā in kóng, Góa ū khòaⁿ-kìⁿ Sat-tàn chhin-chhiūⁿ sih-nà tùi thiⁿ poa̍h-lo̍h-lâi.

19我已經hō͘ lín有權thang踏蛇kap蠍á蟲，koh贏過對敵lóng總ê氣力；決斷無一項會害tio̍h lín。Góa í-keng hō͘ lín ū koân thang ta̍h chôa kap giat-á-thâng, koh iâⁿ-kè tùi-te̍k lóng-chóng ê khùi-la̍t; koat-toàn bô chi̍t hāng ōe hāi-tio̍h lín.

20總是莫得因為chiah-ê神降服lín來歡喜；tio̍h因為lín ê名記tī天裡來歡喜。Chóng-sī bo̍h-tit in-ūi chiah ê sîn hâng-ho̍k lín lâi hoaⁿ-hí; tio̍h in-ūi lín ê miâ kì tī thiⁿ-ni̍h lâi hoaⁿ-hí.

21當hit時耶穌tī聖神快樂，講，父ah，天地ê主，我o-ló你，因為你將chiah-ê事對智慧聰明ê有隱密伊，對細kiáⁿ有顯明伊；父ah，是lah，因為你看án-ni做歡喜。萬項有tùi我ê父lóng交付我；Tng hit sî Iâ-so͘ tī Sèng Sîn khoài-lo̍k, kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i; Pē ah, sī lah, in-ūi lí khòaⁿ án-ni chòe hoaⁿ-hí. Bān-hāng-ū tùi góa ê Pē lóng kau-hù góa;

22父以外無一個bat kiáⁿ是是誰；Kiáⁿ kap Kiáⁿ所ài beh指示ê以外，也無一個bat父是是誰。Pē í-gōa bô chi̍t-ê bat Kiáⁿ sī chī-chūi; Kiáⁿ kap Kiáⁿ só͘ ài beh chí-sī ê í-gōa, iā bô chi̍t-ê bat Pē sī chī-chūi.

23就oa̍t-tńg身暗靜對學生講，看見lín所看見ê，hiah-ê目睭有福氣。Chiū oa̍t-tńg-sin àm-chīⁿ tùi ha̍k-seng kóng, Khòaⁿ-kìⁿ lín só͘ khòaⁿ-kìⁿ ê, hiah ê ba̍k-chiu ū hok-khì.

24因為我kā lín講，前有chōe-chōe先知kap君王ài看lín所看見ê，也無看見，ài聽lín所聽見ê，也無聽見。In-ūi góa kā lín kóng, Chêng ū chōe-chōe sian-ti kap kun-ông ài khòaⁿ lín só͘ khòaⁿ-kìⁿ ê, iā bô khòaⁿ-kìⁿ, ài thiaⁿ lín só͘ thiaⁿ-kìⁿ ê , iā bô thiaⁿ-kìⁿ.

25有一個教律法ê先生起來試伊講，先生ah，我tio̍h怎樣做chiah會得tio̍h永活？Ū chi̍t ê kà lu̍t-hoat ê sian-siⁿ khí-lâi chhì I kóng, Sian-siⁿ ah, góa tio̍h cháiⁿ-iūⁿ chòe chiah ōe tit-tio̍h éng-oa̍h?

26耶穌對伊講，Tī律法有記甚麼？你讀了怎樣？Iâ-so͘ tùi i kóng, Tī lu̍t-hoat ū kì sím-mi̍h? Lí tha̍k-liáu cháiⁿ-iūⁿ?

27伊應講，你tio̍h盡心、盡性、盡力、盡意疼主你ê上帝；也tio̍h疼厝邊親像家己。I ìn kóng, Lí tio̍h chīn-sim, chīn-sèng, chīn-la̍t, chīn-ì thiàⁿ Chú lí ê Siōng-tè; iā tio̍h thiàⁿ chhù-piⁿ chhin-chhiūⁿ ka-kī.

28耶穌kā伊講，你所應ê是tio̍h；行chit-ê，就會活。Iâ-so͘ kā i kóng, Lí só͘ ìn ê sī tio̍h; kiâⁿ chit-ê, chiū ōe oa̍h.

29但是伊ài顯明家己做tio̍h，就對耶穌講，Chī-chūi是我ê厝邊？Nā-sī i ài hián-bêng ka-kī chòe tio̍h, chiū tùi Iâ-so͘ kóng, Chī-chūi sī góa ê chhù-piⁿ?

30耶穌應伊講，有一人tùi耶路撒冷落去耶利哥，tú-tio̍h賊pak伊ê衣裳，phah伊到半死，放hē-teh，做in去。Iâ-so͘ ìn i kóng, Ū chi̍t lâng tùi Iâ-lō͘-sat-léng lo̍h-khì Iâ-lī-ko, tú-tio̍h chha̍t pak i ê i-chiûⁿ, phah i kàu pòaⁿ-sí, pàng hē-teh, chòe in khì.

31Chhàu-khám有一個祭司tùi hit條路落去，看見伊，就閃tùi hit-pêng過去。Chhàu-khám ū chi̍t ê chè-si tùi hit tiâu lō͘ lo̍h-khì, khòaⁿ-kìⁿ i, chiū siám tùi hit pêng kè-khì.

32Koh有一個利未人到hit所在，看了猶原tùi hit-pêng過去。Koh ū chi̍t ê Lī-bī lâng kàu hit só͘-chāi, khòaⁿ-liáu iû-goân tùi hit pêng kè-khì.

33獨獨有一個撒馬利亞人行路tùi hia過，看見就憐憫伊；To̍k-to̍k ū chi̍t ê Sat-má-lī-a lâng kiâⁿ lō͘ tùi hia kè, khòaⁿ-kìⁿ chiū lîn-bín i;

34近óa，用酒thîn tī伊tio̍h傷ê所在，kā伊包teh，將家己ê cheng-siⁿ hō͘伊騎，chhōa伊到客店，來照顧伊kūn-óa, ēng chiú thîn tī i tio̍h-siong ê só͘-chāi, kā i pau-teh, chiong ka-kī ê cheng-siⁿ hō͘ i khiâ, chhōa i kàu kheh-tiàm, lâi chiàu-kò͘ i.

35隔日the̍h銀á兩個hō͘店主，講，Tio̍h照顧chit人；所費若khah加，我倒tńg來chiah還你。Keh ji̍t the̍h gûn-á nn̄g-ê hō͘ tiàm-chú, kóng, Tio̍h chiàu-kò͘ chit lâng; só͘-hùi nā khah ke, góa tò-tńg-lâi chiah hêng lí.

36Chit三人中你phah算tá-lo̍h一個做tú-tio̍h賊hit人ê厝邊？Chit saⁿ lâng tiong lí phah-sǹg tá-lo̍h chi̍t-ê chòe tú-tio̍h chha̍t hit lâng ê chhù-piⁿ?

37伊講，憐憫伊ê，就是。耶穌kā伊講，你去，照án-ni來行。I kóng, Lîn-bín i ê, chiū-sī. Iâ-so͘ kā i kóng, Lí khì, chiàu án-ni lâi kiâⁿ.

38In行ê時，耶穌入一個鄉社；有一個婦人人，名Má-tāi，接納伊tī伊ê厝。In kiâⁿ ê sî, Iâ-so͘ ji̍p chi̍t ê hiuⁿ-siā; ū chi̍t ê hū-jîn-lâng, miâ Má-tāi, chiap-la̍p I tī i ê chhù.

39伊有一個姊妹，叫做馬利亞，坐tī主ê腳下，來聽伊ê話。I ū chi̍t ê chí-bē, kiò chòe Má-lī-a, chē tī Chú ê kha-ē, lâi thiaⁿ I ê ōe.

40Má-tāi因為接待in，tāi-chì chōe，心忙；就近耶穌講，主ah，我ê姊妹放我家己teh摸，你無要緊mah？Tio̍h kah伊來贊我。Má-tāi in-ūi chiap-thāi in, tāi-chì chōe, sim bâng; chiū-kūn Iâ-so͘ kóng, Chú ah, góa ê chí-bē pàng góa ka-kī teh bong, lí bô iàu-kín mah? Tio̍h kah i lâi chān góa.

41但是主應講，Má-tāi ah，Má-tāi ah，你為tio̍h chōe-chōe tāi-chì掛慮紛雜；Nā-sī Chú ìn kóng, Má-tāi ah, Má-tāi ah, lí ūi-tio̍h chōe-chōe tāi-chì khòa-lū hun-cha̍p;

42但是所欠用ê是一項nā-tiāⁿ；因為馬利亞已經揀tio̍h好ê份額，就是bōe kā伊搶得ê。nā-sī só͘ khiàm-ēng ê sī chi̍t hāng nā-tiāⁿ; in-ūi Má-lī-a í-keng kéng-tio̍h hó ê hūn-gia̍h, chiū-sī bōe kā i chhiúⁿ-tit ê.

1耶穌tī一所在祈禱，已經soah，伊ê學生一人對伊講，主ah，教示阮祈禱，親像約翰也bat教示伊ê學生。Iâ-so͘ tī chi̍t só͘-chāi kî-tó, í-keng soah, I ê ha̍k-seng chi̍t lâng tùi I kóng, Chú ah, kà-sī goán kî-tó, chhin-chhiūⁿ Iok-hān iā bat kà-sī i ê ha̍k-seng.

2伊就kā in講，Lín祈禱ê時tio̍h講，父ah，願你ê名聖；你ê國臨到；I chiū kā in kóng, Lín kî-tó ê sî tio̍h kóng, Pē ah, goān lí ê miâ sèng; lí ê kok lîm-kàu;

3阮ê日食日日hō͘阮；goán ê ji̍t-si̍t ji̍t-ji̍t hō͘ goán;

4赦免阮ê罪，因為阮也赦免辜負阮ê人；莫得chhōa阮入tī試。sià-bián goán ê chōe, in-ūi goán iā sià-bián ko͘-hū goán ê lâng; bo̍h-tit chhōa goán ji̍p tī chhì.

5Koh對in講，Lín甚麼人有朋友，你半暝去chhē伊，kā伊講，朋友ah，the̍h三個餅借我:Koh tùi in kóng, Lín sím-mi̍h lâng ū pêng-iú, lí pòaⁿ-mî khì chhē i, kā i kóng, Pêng-iú ah, the̍h saⁿ ê piáⁿ chioh góa:

6因為我有朋友tùi路裡來chhē我，我無物thang請伊in-ūi góa ū pêng-iú tùi lō͘-ni̍h lâi chhē góa, góa bô mi̍h thang chhiáⁿ i.

7伊tùi內面應講，莫得chô-chak我；門已經關，gín-ná kap我tī床裡；我bōe得thang起來the̍h hō͘你。I tùi lāi-bīn ìn kóng, Bo̍h-tit chô-chak góa; mn̂g í-keng koaiⁿ, gín-ná kap góa tī chhn̂g-ni̍h; góa bōe tit thang khí-lâi the̍h hō͘ lí.

8我kā你講，雖然無為tio̍h伊做朋友起來the̍h hō͘伊，iáu-kú為tio̍h伊ê迫切beh起來，照伊所欠用ê hō͘伊。Góa kā lí kóng, sui-jiân bô ūi-tio̍h i chòe pêng-iú khí-lâi the̍h hō͘ i, iáu-kú ūi-tio̍h i ê pek-chhiat beh khí-lâi, chiàu i só͘ khiàm-ēng ê hō͘ i.

9我koh kā lín講，求就hō͘ lín；chhē就tú-tio̍h；phah門就kā lín開。Góa koh kā lín kóng, Kiû chiū hō͘ lín; chhē chiū tú-tio̍h; phah mn̂g chiū kā lín khui.

10因為見若求ê得tio̍h，chhē ê tú-tio̍h；phah門ê Kā in開。In-ūi kìⁿ-nā kiû ê tit-tio̍h, chhē ê tú-tio̍h; phah mn̂g ê kā in khui.

11Lín tá-lo̍h一個做父ê，有kiáⁿ來討餅，kiám beh將石頭hō͘伊mah？á是beh魚，kiám beh將蛇準做魚hō͘伊mah？Lín tá-lo̍h chi̍t-ê chòe pē ê, ū kiáⁿ lâi thó piáⁿ, kiám beh chiong chio̍h-thâu hō͘ i mah? Á-sī beh hî, kiám beh chiong chôa chún-chòe hî hō͘ i mah?

12á是討卵，kiám beh將蠍á蟲hō͘伊mah？Á-sī thó nn̄g, kiám beh chiong giat-á-thâng hō͘ i mah?

13Lín chiah-ê雖然pháiⁿ，iáu-kú會曉得用好物hō͘ lín ê Kiáⁿ兒，何況lín tī天裡ê父，kiám無用聖神來hō͘求伊ê人mah？Lín chiah-ê sui-jiân pháiⁿ, iáu-kú ōe hiáu-tit ēng hó mi̍h hō͘ lín ê kiáⁿ-jî, hô-hòng lín tī thiⁿ-ni̍h ê Pē kiám bô ēng Sèng Sîn lâi hō͘ kiû I ê lâng mah?

14耶穌趕一個啞口鬼；已經出，啞口ê就講話；眾人奇怪。Iâ-so͘ kóaⁿ chi̍t ê é-káu kúi; í-keng chhut, é-káu ê chiū kóng ōe; chèng lâng kî-koài.

15內中有幾nā人講，伊趕鬼是靠鬼王Pia̍t-se-pok。Lāi-tiong ū kúi-nā lâng kóng, I kóaⁿ kúi sī khò kúi-ông Pia̍t-se-pok.

16Koh有人試伊，對伊求tùi天來ê神蹟。Koh ū lâng chhì I, tùi I kiû tùi thiⁿ lâi ê sîn-jiah.

17耶穌知in ê意思就kā in講，凡若國家己爭拚，會致到拋荒，厝一間一間倒壞；Iâ-so͘ chai in ê ì-sù chiū kā in kóng, Hoān-nā kok ka-kī cheng-piàⁿ, ōe tì-kàu pha-hng, chhù chi̍t keng chi̍t keng tó-hoāi;

18若撒旦家己爭拚，伊ê國thài-thó khiā會tiâu？因為lín講我靠Pia̍t-se-pok趕鬼。nā Sat-tàn ka-kī cheng-piàⁿ, i ê kok thài-thó khiā ōe tiâu? in-ūi lín kóng góa khò Pia̍t-se-pok kóaⁿ kúi.

19設使我靠Pia̍t-se-pok趕鬼，就lín ê子弟趕鬼，óa靠是誰 ah？Án-nṳn beh擬斷lín。Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi, óa-khò chī-chūi ah? Án-ni in beh gí-toàn lín.

20獨獨我若靠上帝ê手趕鬼，就上帝ê國已經到tī lín。To̍k-to̍k góa nā khò Siōng-tè ê chhiú kóaⁿ kúi, chiū Siōng-tè ê kok í-keng kàu tī lín.

21猛人穿盔甲kia̍h ke-si顧守伊ê厝，伊所有ê就安穩。Béng lâng chhēng khoe-kah kia̍h ke-si kò͘-siú i ê chhù, i só͘ ū ê chiū an-ún.

22總是比伊khah猛ê到來贏伊，就搶伊所óa靠全副ê戰器，來分伊ê物件。Chóng-sī pí i khah béng ê kàu lâi iâⁿ i, chiū chhiúⁿ i só͘ óa-khò choân-hù ê chiàn-khì, lâi pun i ê mi̍h-kiāⁿ.

23無同我ê就是對敵我；無kap我收拾ê就是teh phah散。Bô tâng góa ê chiū-sī tùi-te̍k góa; bô kap góa siu-khioh ê chiū-sī teh phah-sòaⁿ.

24邪神已經離開人，經過無水ê地，求安歇；無得tio̍h，就講，我beh tò去所出來ê厝。Siâ-sîn í-keng lī-khui lâng, keng-kè bô chúi ê tōe, kiû an-hioh; bô tit-tio̍h, chiū kóng, Góa beh tò-khì só͘ chhut-lâi ê chhù.

25到tè，就看見拚掃齊整；Kàu tè, chiū khòaⁿ-kìⁿ piàⁿ-sàu chôe-chéng;

26就去koh帶七個神比家己khah pháiⁿ，入去khiā起。Hit人路尾ê景況比起頭khah慘。chiū khì koh tòa chhit ê sîn pí ka-kī khah pháiⁿ, ji̍p-khì khiā-khí. Hit lâng lō͘-bé ê kéng-hóng pí khí-thâu khah chhám.

27伊講chiah-ê話ê時，眾人中有一個婦人人大聲kā伊講，生你ê腹肚，hō͘你suh ê奶頭有福氣ah。I kóng chiah ê ōe ê sî, chèng lâng tiong ū chi̍t ê hū-jîn-lâng tōa siaⁿ kā I kóng, Siⁿ lí ê pak-tó͘, hō͘ lí suh ê lin-thâu ū hok-khì ah.

28但是耶穌講：M̄達tio̍h聽上帝ê道理來守ê Khah有福氣。Nā-sī Iâ-so͘ kóng, M̄ ta̍t-tio̍h thiaⁿ Siōng-tè ê tō-lí lâi siú ê khah ū hok-khì.

29人聚集ná chōe，耶穌就講，Chit世代是pháiⁿ ê世代，in求神蹟，但是除約拿ê神蹟以外，無beh神蹟hō͘伊。Lâng chū-chi̍p ná chōe, Iâ-so͘ chiū kóng, Chit sè-tāi sī pháiⁿ ê sè-tāi, in kiû sîn-jiah, nā-sī tû Iok-ná ê sîn-jiah í-gōa, bô beh sîn-jiah hō͘ i.

30因為約拿成做神蹟來hō͘尼尼微人，親像án-ni人子也beh成做神蹟來hō͘ chit世代。In-ūi Iok-ná chiâⁿ-chòe sîn-jiah lâi hō͘ Nî-nî-bî lâng, chhin-chhiūⁿ án-ni Jîn-chú iā beh chiâⁿ-chòe sîn-jiah lâi hō͘ chit sè-tāi.

31南方ê女王當審判ê時，beh kap chit世代ê人saⁿ-kap起來，續擬定chit世代ê罪；因為伊tùi地ê極頭來聽所羅門知識ê話，何況tī chia有比所羅門khah大ê。Lâm-hng ê lú-ông tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí-tiāⁿ chit sè-tāi ê chōe; in-ūi i tùi tōe ê ke̍k-thâu lâi thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê.

32尼尼微人當審判ê時beh kap chit世代ê人saⁿ-kap khiā起來，續擬定chit世代ê罪；因為in tùi約拿所傳ê來反悔，何況tī chia有比約拿khah大ê。Nî-nî-bî lâng tng sím-phòaⁿ ê sî beh kap chit sè-tāi ê lâng saⁿ-kap khiā-khí-lâi, sòa gí-tiāⁿ chit sè-tāi ê chōe; in-ūi in tùi Iok-ná só͘ thoân ê lâi hoán-hóe, hô-hòng tī chia ū pí Iok-ná khah tōa ê.

33無人點燈hē tī隱密ê所在，á是tī斗下；就是hē tī燈台頂，hō͘入來ê人看見hit-ê光。Bô lâng tiám teng hē tī ún-ba̍t ê só͘-chāi, á-sī tī táu ē; chiū-sī hē tī teng-tâi téng, hō͘ ji̍p-lâi ê lâng khòaⁿ-kìⁿ hit ê kng.

34身軀ê燈就是你ê目睭；你ê目睭若金，就thong身軀也光；你ê目睭若花，就身軀也暗。Seng-khu ê teng chiū-sī lí ê ba̍k-chiu; lí ê ba̍k-chiu nā kim, chiū thong seng-khu iā kng; lí ê ba̍k-chiu nā hoe, chiū seng-khu iā àm.

35所以tio̍h謹慎驚了你內面ê 光是暗。Só͘-í tio̍h kín-sīn kiaⁿ-liáu lí lāi-bīn ê kng sī àm.

36設使你thong身軀lóng光，無一跡暗，就beh完全光，親像燈ê 光nà-nà teh照你。Siat-sú lí thong seng-khu lóng kng, bô chi̍t jiah àm, chiū beh oân-choân kng, chhin-chhiūⁿ teng ê kng nà-nà teh chiò lí.

37講話ê時有法利賽人請伊saⁿ-kap食。耶穌就入去坐。Kóng ōe ê sî ū Hoat-lī-sài lâng chhiáⁿ i saⁿ-kap chia̍h. Iâ-so͘ chiū ji̍p-khì chē.

38Hit-ê法利賽人看見伊bē洗來食，就奇怪。Hit ê Hoat-lī-sài lâng khòaⁿ-kìⁿ I bē sóe lâi chia̍h, chiū kî-koài.

39主就對伊講，Taⁿ lín法利賽人清氣杯kap盤 ê外面；但是lín內面就有搶劫kap惡毒滿滿。Chú chiū tùi i kóng, Taⁿ lín Hoat-lī-sài lâng chheng-khì poe kap pôaⁿ ê gōa-bīn; nā-sī lín lāi-bīn chiū ū chhiúⁿ-kiap kap ok-to̍k móa-móa.

40Lín戇人ah，創造外面ê kiám無也創造內面mah？Lín gōng lâng ah, chhòng-chō gōa-bīn ê kiám bô iā chhòng-chō lāi-bīn mah?

41總是tio̍h將chiah-ê內面ê物賑濟人，就ta̍k項物在lín lóng清氣。Chóng-sī tio̍h chiong chiah ê lāi-bīn ê mi̍h chín-chè lâng, chiū ta̍k hāng mi̍h chāi lín lóng chheng-khì.

42Lín法利賽人有災禍ah！因為lín將薄荷，芸香kap ta̍k樣ê菜蔬十份抽一份，但是公義kap疼上帝ê事就放無要緊；總是chiah-ê是應該tio̍h行ê，hiah-ê也m̄-thang放sak。Lín Hoat-lī-sài lâng ū chai-ē ah! in-ūi lín chiong po̍k-hô, ûn-hiong, kap ta̍k iūⁿ ê chhài-soe cha̍p hūn thiu chi̍t hūn, nā-sī kong-gī kap thiàⁿ Siōng-tè ê sū chiū pàng bô iàu-kín; chóng-sī chiah-ê sī eng-kai tio̍h kiâⁿ ê, hiah-ê iā m̄-thang pàng-sak.

43Lín法利賽人有災禍ah！因為lín ài會堂內坐高位，街市裡hō͘人請安。Lín Hoat-lī-sài lâng ū chai-ē ah! in-ūi lín ài hōe-tn̂g lāi chē koâiⁿ ūi, koe-chhī-ni̍h hō͘ lâng chhéng-an.

44Lín有災禍ah！因為lín親像隱密ê墓，人行tī hit頂面m̄知。Lín ū chai-ē ah! in-ūi lín chhin-chhiūⁿ ún-ba̍t ê bōng, lâng kiâⁿ tī hit téng-bīn m̄ chai.

45有一個教律法ê先生應伊講，先生，你講chiah-ê話也暴辱tio̍h阮。Ū chi̍t ê kà lu̍t-hoat ê sian-siⁿ ìn I kóng, Sian-siⁿ, lí kóng chiah ê ōe iā pō͘-jio̍k-tio̍h goán.

46但是伊講：Lín教律法ê先生也有災禍ah！因為lín將oh得擔ê擔hō͘人擔；但是lín本身無用一支指頭á來摸hiah-ê擔。Nā-sī I kóng, Lín kà lu̍t-hoat ê sian-siⁿ iā ū chai-ē ah! in-ūi lín chiong oh-tit taⁿ ê tàⁿ hō͘ lâng taⁿ; nā-sī lín pún-sin bô ēng chi̍t ki chńg-thâu-á lâi bong hiah ê tàⁿ.

47Lín有災禍ah！因為lín chhòng先知人ê墓，也lín ê祖bat害死in。Lín ū chai-ē ah! in-ūi lín chhòng sian-ti lâng ê bōng, iā lín ê chó͘ bat hāi-sí in.

48Án-ni，lín ê祖所做ê，lín做干證，koh歡喜伊；因為in害死in，也lín chhòng in ê墓。Án-ni, lín ê chó͘ só͘ chòe ê, lín chòe kan-chèng, koh hoaⁿ-hí i; in-ūi in hāi-sí in, iā lín chhòng in ê bōng.

49所以上帝ê智慧有講，我beh差先知kap使徒就近in，其中有ê in beh害死伊，有ê in beh khún-tio̍k伊；Só͘-í Siōng-tè ê Tì-hūi ū kóng, Góa beh chhe sian-ti kap sù-tô͘ chiū-kūn in, kî-tiong ū-ê in beh hāi-sí i, ū-ê in beh khún-tio̍k i;

50致到tùi創造世間以來所流眾先知ê血lóng beh kā chit世代討；tì-kàu tùi chhòng-chō sè-kan í-lâi só͘ lâu chèng sian-ti ê huih lóng beh kā chit sè-tāi thó;

51就是tùi亞伯ê血到撒迦利亞死tī殿kap壇ê中間ê血，實在ah，我kā lín講，lóng beh對chit世代討。chiū-sī tùi A-pek ê huih kàu Sat-ka-lī-a sí tī tiān kap tôaⁿ ê tiong-kan ê huih, si̍t-chāi ah, góa kā lín kóng, lóng beh tùi chit sè-tāi thó.

52Lín教律法ê先生有災禍ah！因為lín將知識ê鎖匙kia̍h去；lín家己m̄入，teh-beh入ê人lín就阻擋伊Lín kà lu̍t-hoat ê sian-siⁿ ū chai-ē ah! in-ūi lín chiong chai-bat ê só-sî kia̍h-khì; lín ka-kī m̄ ji̍p, teh-beh ji̍p ê lâng lín chiū chó͘-tòng i.

53耶穌tùi hia出來ê時，經學士kap法利賽人出力逼伊，激伊講khah chōe話；Iâ-so͘ tùi hia chhut-lâi ê sî, keng-ha̍k-sū kap Hoat-lī-sài lâng chhut-la̍t pek I, kek I kóng khah chōe ōe;

54當等伊，ài掠伊ê話縫。tng-tán I, ài lia̍h I ê ōe-phāng.

1Hit時人聚集幾nā萬，致到相thún踏，耶穌開嘴事先對伊ê學生講，Lín tio̍h持防法利賽人ê酵，就是假好。Hit sî lâng chū-chi̍p kúi-nā bān, tì-kàu saⁿ thún-ta̍h, Iâ-so͘ khui chhùi tāi-seng tùi I ê ha̍k-seng kóng, Lín tio̍h tî-hông Hoat-lī-sài lâng ê kàⁿ, chiū-sī ké-hó.

2無有蓋密也無露現ê，隱密無hō͘人知ê。Bô ū khàm-ba̍t iā bô lō͘-hiān ê, ún-ba̍t bô hō͘ lâng chai ê.

3所以lín tī烏暗ê中間所講ê，beh tī光明hō͘人聽見；lín tī密房àⁿ耳孔邊所講ê，beh報揚tī厝頂。Só͘-í lín tī o͘-àm ê tiong-kan só͘ kóng ê, beh tī kng-bêng hō͘ lâng thiaⁿ-kìⁿ; lín tī ba̍t-pâng àⁿ hī-khang-piⁿ só͘ kóng ê, beh pò-iông tī chhù-téng.

4我ê朋友ah，我kā lín講，害死lín身軀了後bōe會做別項ê，莫得驚in。Góa ê pêng-iú ah, góa kā lín kóng, Hāi-sí lín seng-khu liáu-āu bōe-ōe chòe pa̍t hāng ê, bo̍h-tit kiaⁿ in.

5我beh指示lín所tio̍h驚ê；tio̍h驚hit-ê害死了後koh有權hiat tī地獄ê；實在ah，我kā lín講，所tio̍h驚ê是chit-ê。Góa beh chí-sī lín só͘ tio̍h kiaⁿ ê; tio̍h kiaⁿ hit-ê hāi-sí liáu-āu koh ū koân hiat tī tē-ge̍k ê; si̍t-chāi ah, góa kā lín kóng, Só͘ tio̍h kiaⁿ ê sī chit-ê.

6五個雀鳥á kiám m̄是賣兩分銀mah？tī上帝ê面前連一隻也無bōe記得。Gō͘ ê chhek-chiáu-á kiám m̄ sī bōe nn̄g hun gûn mah? tī Siōng-tè ê bīn-chêng liân chi̍t chiah iā bô bōe kì-tit.

7就lín ê頭毛也lóng計算。莫得驚；lín比chōe-chōe雀鳥á khah貴氣。Chiū lín ê thâu-mn̂g iā lóng kè-sǹg. Bo̍h-tit kiaⁿ; lín pí chōe-chōe chhek-chiáu-á khah kùi-khì.

8我也kā lín講，見若tī人ê面前認我ê，人子tī上帝ê天使ê面前也beh認伊。Góa iā kā lín kóng, Kìⁿ-nā tī lâng ê bīn-chêng jīn góa ê, Jîn-chú tī Siōng-tè ê thiⁿ-sài ê bīn-chêng iā beh jīn i.

9若是tī人ê面前無認我ê，tī上帝ê天使ê面前，也behm7認伊。Nā-sī tī lâng ê bīn-chêng bô jīn góa ê, tī Siōng-tè ê thiⁿ-sài ê bīn-chêng, iā beh m̄ jīn i.

10凡若講話來攻擊人子ê，beh赦免伊；但是褻瀆聖神ê，無beh赦免伊Hoān-nā kóng ōe lâi kong-kek Jîn-chú ê, beh sià-bián i; nā-sī siat-to̍k Sèng Sîn ê, bô beh sià-bián i.

11人帶lín到會堂kap辦政事以及有權ê ê面前，莫得掛慮beh怎樣分訴，beh分訴甚麼，beh講甚麼；Lâng tòa lín kàu hōe-tn̂g kap pān chèng-sū í-ki̍p ū koân ê ê bīn-chêng, bo̍h-tit khòa-lū beh cháiⁿ-iūⁿ hun-sò͘, beh hun-sò͘ sím-mi̍h, beh kóng sím-mi̍h;

12因為hit時聖神beh教示lín所tio̍h講ê。in-ūi hit sî Sèng Sîn beh kà-sī lín só͘ tio̍h kóng ê.

13眾人中有一人kā伊講，先生ah，請你kah我ê兄弟kap我分祖業。Chèng lâng tiong ū chi̍t lâng kā I kóng, Sian-siⁿ ah, chhiáⁿ lí kah góa ê hiaⁿ-tī kap góa pun chó͘-gia̍p.

14但是耶穌kā伊講，你chit-ê人ah，是誰設立我做lín ê審判官，á是做分家業ê mah？Nā-sī Iâ-so͘ kā i kóng, Lí chit ê lâng ah, chī-chūi siat-li̍p góa chòe lín ê sím-phòaⁿ koaⁿ, á-sī chòe pun ke-gia̍p ê mah?

15就對眾人講，Tio̍h謹慎，約束家己，lóng無貪心；因為人ê活命不在伊所積聚ê豐盛。Chiū tùi chèng lâng kóng, Tio̍h kín-sīn, iok-sok ka-kī, lóng bô tham-sim; in-ūi lâng ê oa̍h-miā put-chāi i só͘ chek-chū ê hong-sēng.

16就用譬喻對in講，有一個富人伊ê田園真好收。Chiū ēng phì-jū tùi in kóng, Ū chi̍t ê pù lâng i ê chhân-hn̂g chin hó siu.

17伊想來想去講，我無所在thang囤我ê土產，taⁿ beh怎樣？I siūⁿ-lâi siūⁿ-khì kóng, Góa bô só͘-chāi thang tún góa ê thó͘-sán, taⁿ beh cháiⁿ-iūⁿ?

18Koh講，我beh án-ni做，beh拆我ê粟倉，起khah大ê；就我ê五穀kap財物lóng beh囤tī hia；Koh kóng, Góa beh án-ni chòe, beh thiah góa ê chhek-chhng, khí khah tōa ê; chiū góa ê gō͘-kak kap châi-bu̍t lóng beh tún tī hia;

19也beh kā我ê靈魂講，靈魂ah，你有chōe-chōe財物積聚做chōe-chōe年ê路用，thang清閒、lim食、快樂。iā beh kā góa ê lêng-hûn kóng, Lêng-hûn ah, lí ū chōe-chōe châi-bu̍t chek-chū chòe chōe-chōe nî ê lō͘-ēng, thang chheng-êng, lim-chia̍h, khoài-lo̍k.

20但是上帝kā伊講，戇人ah，今暝beh對你討你ê靈魂；就你所備辦ê beh歸甚麼人ah？Nā-sī Siōng-tè kā i kóng, Gōng lâng ah, Kim mî beh tùi lí thó lí ê lêng-hûn; chiū lí só͘ pī-pān ê beh kui sím-mi̍h lâng ah?

21見若為tio̍h家己積聚財寶，tī上帝ê面前無好額ê，也是án-ni。Kìⁿ-nā ūi-tio̍h ka-kī chek-chū châi-pó, tī Siōng-tè ê bīn-chêng bô hó-gia̍h ê, iā sī án-ni.

22Koh對伊ê學生講，所以我kā lín講，莫得為tio̍h性命掛慮beh食甚麼，á是為tio̍h lín ê身軀掛慮beh穿甚麼；Koh tùi I ê ha̍k-seng kóng, Só͘-í góa kā lín kóng, Bo̍h-tit ūi-tio̍h sìⁿ-miā khòa-lū beh chia̍h sím-mi̍h, á-sī ūi-tio̍h lín ê seng-khu khòa-lū beh chhēng sím-mi̍h;

23因為性命比米糧khah對重，身軀比衣裳khah對重。in-ūi sìⁿ-miā pí bí-niû khah tùi-tiōng, seng-khu pí i-chiûⁿ khah tùi-tiōng.

24Tio̍h試想烏鴉，in無種作無收成，也無庫房無粟倉，上帝iáu-kú養飼in；lín比鳥á hit-ê貴氣到怎樣？Tio̍h chhì-siūⁿ o͘-a, in bô chèng-choh bô siu-sêng, iā bô khò͘-pâng bô chhek-chhng, Siōng-tè iáu-kú iúⁿ-chhī in; lín pí chiáu-á hit ê kùi-khì kàu cháiⁿ-iūⁿ?

25Lín甚麼人會用掛慮hō͘性命khah長一刻久ah？Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú ah?

26Án-ni至sió-khóa ê lín iáu-kú無法得，啥事掛慮其餘ê ah？Án-ni chì sió-khóa ê lín iáu-kú bô hoat-tit, siáⁿ-sū khòa-lū kî-û ê ah?

27試想百合花怎樣ná大叢，伊無tio̍h磨無紡績；但是我kā lín講，當所羅門極hâng-ngó͘ ê時，伊所穿m̄達tio̍h chit號花ê一蕊。Chhì-siūⁿ pek-ha̍p-hoe cháiⁿ-iūⁿ ná tōa châng, i bô tio̍h-bôa bô pháng-cheh; nā-sī góa kā lín kóng, Tng Só͘-lô-bûn ke̍k hâng-ngó͘ ê sî, i só͘ chhēng m̄ ta̍t-tio̍h chit hō hoe ê chi̍t lúi.

28Taⁿ山裡ê草，今á日tī-teh，明á日hiat tī火爐，上帝尚且hō͘伊穿到án-ni，何況lín小信ê人ah？Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hé-lô͘, Siōng-tè siōng-chhiáⁿ hō͘ i chhēng kàu án-ni, hô-hòng lín sió-sìn ê lâng ah?

29Lín莫得求beh食甚麼beh lim甚麼，也莫得煩心；Lín bo̍h-tit kiû beh chia̍h sím-mi̍h beh lim sím-mi̍h, iā bo̍h-tit hoân-sim;

30因為chiah-ê lóng是世間ê列邦人所求ê，lín ê父也知chiah-ê是lín欠用ê。in-ūi chiah-ê lóng sī sè-kan ê lia̍t-pang lâng só͘ kiû ê, lín ê Pē iā chai chiah-ê sī lín khiàm-ēng ê.

31獨獨lín tio̍h求伊ê國，就chiah-ê物beh續hō͘ lín。To̍k-to̍k lín tio̍h kiû I ê kok, chiū chiah ê mi̍h beh sòa hō͘ lín.

32Lín細ê羊群ah，莫得驚，因為lín ê父歡喜用國hō͘ lín。Lín sòe ê iûⁿ-kûn ah, bo̍h-tit kiaⁿ, in-ūi lín ê Pē hoaⁿ-hí ēng kok hō͘ lín.

33Tio̍h賣lín所有ê來賑濟人；為tio̍h lín本身備辦bōe會舊ê錢袋，tī天裡用bōe了ê財寶，就是賊bōe到，蟲bōe蛀ê所在。Tio̍h bōe lín só͘ ū ê lâi chín-chè lâng; ūi-tio̍h lín pún-sin pī-pān bōe-ōe kū ê chîⁿ-tē, tī thiⁿ-ni̍h ēng bōe liáu ê châi-pó, chiū-sī chha̍t bōe kàu, thâng bōe chiù ê só͘-chāi.

34因為lín ê財寶tī hia，lín ê心也beh tī hia。In-ūi lín ê châi-pó tī hia, lín ê sim iā beh tī hia.

35Lín ê腰tio̍h hâ-teh，lín ê燈tio̍h點teh；Lín ê io tio̍h hâ-teh, lín ê teng tio̍h tiám-teh;

36lín tio̍h親像人teh thèng候in ê主人tùi婚姻ê筵桌tò來；到tè phah門thang liâm-piⁿ kā伊開。lín tio̍h chhin-chhiūⁿ lâng teh thèng-hāu in ê chú-lâng tùi hun-in ê iân-toh tò-lâi; kàu tè phah mn̂g thang liâm-piⁿ kā i khui.

37主人到，看見in警醒，hiah-ê奴僕有福氣。我實在kā lín講，主人beh hō͘ in坐桌，家己hâ帶，進前來伺候in。Chú-lâng kàu, khòaⁿ-kìⁿ in kéng-séng, hiah ê lô͘-po̍k ū hok-khì. Góa si̍t-chāi kā lín kóng, Chú-lâng beh hō͘ in chē toh, ka-kī hâ tòa, chìn-chêng lâi su-hāu in.

38Kiám-chhái二更á是三更到，看見in án-ni，hiah奴僕有福氣。Kiám-chhái jī kiⁿ á-sī saⁿ kiⁿ kàu, khòaⁿ-kìⁿ in án-ni, hiah lô͘-po̍k ū hok-khì.

39家主若知賊甚麼時beh到，伊就tiuⁿ-tî，不致伊ê厝受iah孔，這是lín所知。Ke-chú nā chai chha̍t sím-mi̍h sî beh kàu, i chiū tiuⁿ-tî, put-tì i ê chhù siū iah khang, che sī lín só͘ chai.

40Lín也tio̍h備辦便，因為lín無phah算ê時人子來lah。Lín iā tio̍h pī-pān piān, in-ūi lín bô phah-sǹg ê sî Jîn-chú lâi lah.

41彼得講，主ah，你設chit-ê譬喻是對阮講，á是也對眾人ah？Pí-tek kóng, Chú ah, lí siat chit ê phì-jū sī tùi goán kóng, á-sī iā tùi chèng lâng ah?

42主講，甚麼人是盡忠知識ê管家，主人所beh設立來管理伊家內ê人，照時發米糧hō͘ in ah？Chú kóng, Sím-mi̍h lâng sī chīn-tiong tì-sek ê koán-ke, chú-lâng só͘ beh siat-li̍p lâi koán-lí i ke-lāi ê lâng, chiàu sî hoat bí-niû hō͘ in ah?

43伊ê主人來看見伊án-ni行，hit-ê奴僕有福氣。I ê chú-lâng lâi khòaⁿ-kìⁿ i án-ni kiâⁿ, hit ê lô͘-po̍k ū hok-khì.

44我實在kā lín講，主人beh設立伊來管理伊一切所有ê。Góa si̍t-chāi kā lín kóng, chú-lâng beh siat-li̍p i lâi koán-lí i it-chhè só͘ ū ê.

45設使hit-ê奴僕心內phah算，我ê主人延chhiân chiah beh來，就phah hiah-ê奴僕女婢，lim食koh酒醉，Siat-sú hit ê lô͘-po̍k sim-lāi phah-sǹg, Góa ê chú-lâng iân-chhiân chiah beh lâi, chiū phah hiah ê lô͘-po̍k lú-pī, lim-chia̍h koh chiú-chùi,

46就tī無phài-phe ê日m̄知ê時，hit-ê奴僕ê主人beh到，重重刑罰伊，辦伊kap m̄信ê人同等。chiū tī bô phài-phe ê ji̍t m̄ chai ê sî, hit ê lô͘-po̍k ê chú-lâng beh kàu, tāng-tāng hêng-hoa̍t i, pān i kap m̄ sìn ê lâng tâng-téng.

47奴僕知伊ê主人ê意思，也無備辦，也無順伊ê意思來行，beh受phah chōe下。Lô͘-po̍k chai i ê chú-lâng ê ì-sù, iā bô pī-pān, iā bô sūn i ê ì-sù lâi kiâⁿ, beh siū phah chōe ē.

48但是m̄知來行應該受phah ê事，伊beh受phah少下。見若hō͘伊chōe ê，beh kā伊the̍h chōe；託重伊chōe ê，beh kā伊討khah chōe。Nā-sī m̄ chai lâi kiâⁿ eng-kai siū phah ê sū i beh siū phah chió ē. Kìⁿ-nā hō͘ i chōe ê, beh kā i the̍h chōe; thok-tiōng i chōe ê, beh kā i thó khah chōe.

49我來是beh用火hiat tī地裡；火若已經to̍h，我iáu-kú ài甚麼？Góa lâi sī beh ēng hé hiat tī tōe-ni̍h; hé nā í-keng to̍h, góa iáu-kú ài sím-mi̍h?

50我有應該受ê洗；hit-ê洗iáu-bē成，我迫切到怎樣？Góa ū eng-kai siū ê sóe; hit ê sóe iáu-bē chiâⁿ, góa pek-chhiat kàu cháiⁿ-iūⁿ?

51Lín phah算我來是beh hō͘地上和平mah？我kā lín講，m̄是，反tńg是冤家。Lín phah-sǹg góa lâi sī beh hō͘ tōe-chiūⁿ hô-pêng mah? Góa kā lín kóng, M̄ sī, hoán-tńg sī oan-ke.

52Taⁿ了後一家五有人beh冤家，三個kap兩個冤家，兩個kap三個冤家。Taⁿ liáu-āu chi̍t ke gō͘ lâng beh oan-ke, saⁿ-ê kap nn̄g-ê oan-ke, nn̄g-ê kap saⁿ-ê oan-ke.

53父kap Kiáⁿ，kiáⁿ kap父，老母kap cha-bó͘-kiáⁿ，cha-bó͘-kiáⁿ kap老母，ta-ke kap伊ê sim-pū，sim-pū kap ta-ke，in lóng beh冤家。Pē kap kiáⁿ, kiáⁿ kap pē, lāu-bú kap cha-bó͘-kiáⁿ, cha-bó͘-kiáⁿ kap lāu-bú, ta-ke kap i ê sim-pū, sim-pū kap ta-ke, in lóng beh oan-ke.

54伊就koh對眾人講，Lín看見雲tùi西勢起，lín就講，Beh落雨；果然有án-ni；I chiū koh tùi chèng lâng kóng, Lín khòaⁿ-kìⁿ hûn tùi sai-sì khí, lín chiū kóng, Beh lo̍h hō͘; kó-jiân ū án-ni;

55看見風tùi南勢吹來，lín就講，Beh燒熱；也有án-ni。khòaⁿ-kìⁿ hong tùi lâm-sì chhe lâi, lín chiū kóng, Beh sio-joa̍h; iā ū án-ni.

56假好ê人ah，天kap地ê形式lín to看會出，怎樣bōe會看出chit-ê時ah？Ké-hó ê lâng ah, thiⁿ kap tōe ê hêng-sek lín to khòaⁿ ōe chhut, cháiⁿ-iūⁿ bōe-ōe khòaⁿ-chhut chit ê sî ah?

57Lín家己怎樣無省察hit-ê合tī義ê ah？Lín ka-kī cháiⁿ-iūⁿ bô séng-chhat hit-ê ha̍p tī gī ê ah?

58因為你kap告你ê去見官府，iáu tī路裡tio̍h營為hō͘伊放你soah；驚了伊拖你到tī審判官，審判官將你交差役，差役續將你關落監。In-ūi lí kap kò lí ê khì kìⁿ koaⁿ-hú, iáu tī lō͘-ni̍h tio̍h êng-ûi hō͘ i pàng lí soah; kiaⁿ-liáu i thoa lí kàu tī sím-phòaⁿ koaⁿ, sím-phòaⁿ koaⁿ chiong lí kau chhe-ia̍h, chhe-ia̍h sòa chiong lí koaiⁿ lo̍h kaⁿ.

59我kā你講，一絲一毫bē還，你決斷bōe會出hia。Góa kā lí kóng, Chi̍t si chi̍t hô bē hêng, lí koat-toàn bōe-ōe chhut hia.