1Hit時人聚集幾nā萬，致到相thún踏，耶穌開嘴事先對伊ê學生講，Lín tio̍h持防法利賽人ê酵，就是假好。Hit sî lâng chū-chi̍p kúi-nā bān, tì-kàu saⁿ thún-ta̍h, Iâ-so͘ khui chhùi tāi-seng tùi I ê ha̍k-seng kóng, Lín tio̍h tî-hông Hoat-lī-sài lâng ê kàⁿ, chiū-sī ké-hó.

2無有蓋密也無露現ê，隱密無hō͘人知ê。Bô ū khàm-ba̍t iā bô lō͘-hiān ê, ún-ba̍t bô hō͘ lâng chai ê.

3所以lín tī烏暗ê中間所講ê，beh tī光明hō͘人聽見；lín tī密房àⁿ耳孔邊所講ê，beh報揚tī厝頂。Só͘-í lín tī o͘-àm ê tiong-kan só͘ kóng ê, beh tī kng-bêng hō͘ lâng thiaⁿ-kìⁿ; lín tī ba̍t-pâng àⁿ hī-khang-piⁿ só͘ kóng ê, beh pò-iông tī chhù-téng.

4我ê朋友ah，我kā lín講，害死lín身軀了後bōe會做別項ê，莫得驚in。Góa ê pêng-iú ah, góa kā lín kóng, Hāi-sí lín seng-khu liáu-āu bōe-ōe chòe pa̍t hāng ê, bo̍h-tit kiaⁿ in.

5我beh指示lín所tio̍h驚ê；tio̍h驚hit-ê害死了後koh有權hiat tī地獄ê；實在ah，我kā lín講，所tio̍h驚ê是chit-ê。Góa beh chí-sī lín só͘ tio̍h kiaⁿ ê; tio̍h kiaⁿ hit-ê hāi-sí liáu-āu koh ū koân hiat tī tē-ge̍k ê; si̍t-chāi ah, góa kā lín kóng, Só͘ tio̍h kiaⁿ ê sī chit-ê.

6五個雀鳥á kiám m̄是賣兩分銀mah？tī上帝ê面前連一隻也無bōe記得。Gō͘ ê chhek-chiáu-á kiám m̄ sī bōe nn̄g hun gûn mah? tī Siōng-tè ê bīn-chêng liân chi̍t chiah iā bô bōe kì-tit.

7就lín ê頭毛也lóng計算。莫得驚；lín比chōe-chōe雀鳥á khah貴氣。Chiū lín ê thâu-mn̂g iā lóng kè-sǹg. Bo̍h-tit kiaⁿ; lín pí chōe-chōe chhek-chiáu-á khah kùi-khì.

8我也kā lín講，見若tī人ê面前認我ê，人子tī上帝ê天使ê面前也beh認伊。Góa iā kā lín kóng, Kìⁿ-nā tī lâng ê bīn-chêng jīn góa ê, Jîn-chú tī Siōng-tè ê thiⁿ-sài ê bīn-chêng iā beh jīn i.

9若是tī人ê面前無認我ê，tī上帝ê天使ê面前，也behm7認伊。Nā-sī tī lâng ê bīn-chêng bô jīn góa ê, tī Siōng-tè ê thiⁿ-sài ê bīn-chêng, iā beh m̄ jīn i.

10凡若講話來攻擊人子ê，beh赦免伊；但是褻瀆聖神ê，無beh赦免伊Hoān-nā kóng ōe lâi kong-kek Jîn-chú ê, beh sià-bián i; nā-sī siat-to̍k Sèng Sîn ê, bô beh sià-bián i.

11人帶lín到會堂kap辦政事以及有權ê ê面前，莫得掛慮beh怎樣分訴，beh分訴甚麼，beh講甚麼；Lâng tòa lín kàu hōe-tn̂g kap pān chèng-sū í-ki̍p ū koân ê ê bīn-chêng, bo̍h-tit khòa-lū beh cháiⁿ-iūⁿ hun-sò͘, beh hun-sò͘ sím-mi̍h, beh kóng sím-mi̍h;

12因為hit時聖神beh教示lín所tio̍h講ê。in-ūi hit sî Sèng Sîn beh kà-sī lín só͘ tio̍h kóng ê.

13眾人中有一人kā伊講，先生ah，請你kah我ê兄弟kap我分祖業。Chèng lâng tiong ū chi̍t lâng kā I kóng, Sian-siⁿ ah, chhiáⁿ lí kah góa ê hiaⁿ-tī kap góa pun chó͘-gia̍p.

14但是耶穌kā伊講，你chit-ê人ah，是誰設立我做lín ê審判官，á是做分家業ê mah？Nā-sī Iâ-so͘ kā i kóng, Lí chit ê lâng ah, chī-chūi siat-li̍p góa chòe lín ê sím-phòaⁿ koaⁿ, á-sī chòe pun ke-gia̍p ê mah?

15就對眾人講，Tio̍h謹慎，約束家己，lóng無貪心；因為人ê活命不在伊所積聚ê豐盛。Chiū tùi chèng lâng kóng, Tio̍h kín-sīn, iok-sok ka-kī, lóng bô tham-sim; in-ūi lâng ê oa̍h-miā put-chāi i só͘ chek-chū ê hong-sēng.

16就用譬喻對in講，有一個富人伊ê田園真好收。Chiū ēng phì-jū tùi in kóng, Ū chi̍t ê pù lâng i ê chhân-hn̂g chin hó siu.

17伊想來想去講，我無所在thang囤我ê土產，taⁿ beh怎樣？I siūⁿ-lâi siūⁿ-khì kóng, Góa bô só͘-chāi thang tún góa ê thó͘-sán, taⁿ beh cháiⁿ-iūⁿ?

18Koh講，我beh án-ni做，beh拆我ê粟倉，起khah大ê；就我ê五穀kap財物lóng beh囤tī hia；Koh kóng, Góa beh án-ni chòe, beh thiah góa ê chhek-chhng, khí khah tōa ê; chiū góa ê gō͘-kak kap châi-bu̍t lóng beh tún tī hia;

19也beh kā我ê靈魂講，靈魂ah，你有chōe-chōe財物積聚做chōe-chōe年ê路用，thang清閒、lim食、快樂。iā beh kā góa ê lêng-hûn kóng, Lêng-hûn ah, lí ū chōe-chōe châi-bu̍t chek-chū chòe chōe-chōe nî ê lō͘-ēng, thang chheng-êng, lim-chia̍h, khoài-lo̍k.

20但是上帝kā伊講，戇人ah，今暝beh對你討你ê靈魂；就你所備辦ê beh歸甚麼人ah？Nā-sī Siōng-tè kā i kóng, Gōng lâng ah, Kim mî beh tùi lí thó lí ê lêng-hûn; chiū lí só͘ pī-pān ê beh kui sím-mi̍h lâng ah?

21見若為tio̍h家己積聚財寶，tī上帝ê面前無好額ê，也是án-ni。Kìⁿ-nā ūi-tio̍h ka-kī chek-chū châi-pó, tī Siōng-tè ê bīn-chêng bô hó-gia̍h ê, iā sī án-ni.

22Koh對伊ê學生講，所以我kā lín講，莫得為tio̍h性命掛慮beh食甚麼，á是為tio̍h lín ê身軀掛慮beh穿甚麼；Koh tùi I ê ha̍k-seng kóng, Só͘-í góa kā lín kóng, Bo̍h-tit ūi-tio̍h sìⁿ-miā khòa-lū beh chia̍h sím-mi̍h, á-sī ūi-tio̍h lín ê seng-khu khòa-lū beh chhēng sím-mi̍h;

23因為性命比米糧khah對重，身軀比衣裳khah對重。in-ūi sìⁿ-miā pí bí-niû khah tùi-tiōng, seng-khu pí i-chiûⁿ khah tùi-tiōng.

24Tio̍h試想烏鴉，in無種作無收成，也無庫房無粟倉，上帝iáu-kú養飼in；lín比鳥á hit-ê貴氣到怎樣？Tio̍h chhì-siūⁿ o͘-a, in bô chèng-choh bô siu-sêng, iā bô khò͘-pâng bô chhek-chhng, Siōng-tè iáu-kú iúⁿ-chhī in; lín pí chiáu-á hit ê kùi-khì kàu cháiⁿ-iūⁿ?

25Lín甚麼人會用掛慮hō͘性命khah長一刻久ah？Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú ah?

26Án-ni至sió-khóa ê lín iáu-kú無法得，啥事掛慮其餘ê ah？Án-ni chì sió-khóa ê lín iáu-kú bô hoat-tit, siáⁿ-sū khòa-lū kî-û ê ah?

27試想百合花怎樣ná大叢，伊無tio̍h磨無紡績；但是我kā lín講，當所羅門極hâng-ngó͘ ê時，伊所穿m̄達tio̍h chit號花ê一蕊。Chhì-siūⁿ pek-ha̍p-hoe cháiⁿ-iūⁿ ná tōa châng, i bô tio̍h-bôa bô pháng-cheh; nā-sī góa kā lín kóng, Tng Só͘-lô-bûn ke̍k hâng-ngó͘ ê sî, i só͘ chhēng m̄ ta̍t-tio̍h chit hō hoe ê chi̍t lúi.

28Taⁿ山裡ê草，今á日tī-teh，明á日hiat tī火爐，上帝尚且hō͘伊穿到án-ni，何況lín小信ê人ah？Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hé-lô͘, Siōng-tè siōng-chhiáⁿ hō͘ i chhēng kàu án-ni, hô-hòng lín sió-sìn ê lâng ah?

29Lín莫得求beh食甚麼beh lim甚麼，也莫得煩心；Lín bo̍h-tit kiû beh chia̍h sím-mi̍h beh lim sím-mi̍h, iā bo̍h-tit hoân-sim;

30因為chiah-ê lóng是世間ê列邦人所求ê，lín ê父也知chiah-ê是lín欠用ê。in-ūi chiah-ê lóng sī sè-kan ê lia̍t-pang lâng só͘ kiû ê, lín ê Pē iā chai chiah-ê sī lín khiàm-ēng ê.

31獨獨lín tio̍h求伊ê國，就chiah-ê物beh續hō͘ lín。To̍k-to̍k lín tio̍h kiû I ê kok, chiū chiah ê mi̍h beh sòa hō͘ lín.

32Lín細ê羊群ah，莫得驚，因為lín ê父歡喜用國hō͘ lín。Lín sòe ê iûⁿ-kûn ah, bo̍h-tit kiaⁿ, in-ūi lín ê Pē hoaⁿ-hí ēng kok hō͘ lín.

33Tio̍h賣lín所有ê來賑濟人；為tio̍h lín本身備辦bōe會舊ê錢袋，tī天裡用bōe了ê財寶，就是賊bōe到，蟲bōe蛀ê所在。Tio̍h bōe lín só͘ ū ê lâi chín-chè lâng; ūi-tio̍h lín pún-sin pī-pān bōe-ōe kū ê chîⁿ-tē, tī thiⁿ-ni̍h ēng bōe liáu ê châi-pó, chiū-sī chha̍t bōe kàu, thâng bōe chiù ê só͘-chāi.

34因為lín ê財寶tī hia，lín ê心也beh tī hia。In-ūi lín ê châi-pó tī hia, lín ê sim iā beh tī hia.

35Lín ê腰tio̍h hâ-teh，lín ê燈tio̍h點teh；Lín ê io tio̍h hâ-teh, lín ê teng tio̍h tiám-teh;

36lín tio̍h親像人teh thèng候in ê主人tùi婚姻ê筵桌tò來；到tè phah門thang liâm-piⁿ kā伊開。lín tio̍h chhin-chhiūⁿ lâng teh thèng-hāu in ê chú-lâng tùi hun-in ê iân-toh tò-lâi; kàu tè phah mn̂g thang liâm-piⁿ kā i khui.

37主人到，看見in警醒，hiah-ê奴僕有福氣。我實在kā lín講，主人beh hō͘ in坐桌，家己hâ帶，進前來伺候in。Chú-lâng kàu, khòaⁿ-kìⁿ in kéng-séng, hiah ê lô͘-po̍k ū hok-khì. Góa si̍t-chāi kā lín kóng, Chú-lâng beh hō͘ in chē toh, ka-kī hâ tòa, chìn-chêng lâi su-hāu in.

38Kiám-chhái二更á是三更到，看見in án-ni，hiah奴僕有福氣。Kiám-chhái jī kiⁿ á-sī saⁿ kiⁿ kàu, khòaⁿ-kìⁿ in án-ni, hiah lô͘-po̍k ū hok-khì.

39家主若知賊甚麼時beh到，伊就tiuⁿ-tî，不致伊ê厝受iah孔，這是lín所知。Ke-chú nā chai chha̍t sím-mi̍h sî beh kàu, i chiū tiuⁿ-tî, put-tì i ê chhù siū iah khang, che sī lín só͘ chai.

40Lín也tio̍h備辦便，因為lín無phah算ê時人子來lah。Lín iā tio̍h pī-pān piān, in-ūi lín bô phah-sǹg ê sî Jîn-chú lâi lah.

41彼得講，主ah，你設chit-ê譬喻是對阮講，á是也對眾人ah？Pí-tek kóng, Chú ah, lí siat chit ê phì-jū sī tùi goán kóng, á-sī iā tùi chèng lâng ah?

42主講，甚麼人是盡忠知識ê管家，主人所beh設立來管理伊家內ê人，照時發米糧hō͘ in ah？Chú kóng, Sím-mi̍h lâng sī chīn-tiong tì-sek ê koán-ke, chú-lâng só͘ beh siat-li̍p lâi koán-lí i ke-lāi ê lâng, chiàu sî hoat bí-niû hō͘ in ah?

43伊ê主人來看見伊án-ni行，hit-ê奴僕有福氣。I ê chú-lâng lâi khòaⁿ-kìⁿ i án-ni kiâⁿ, hit ê lô͘-po̍k ū hok-khì.

44我實在kā lín講，主人beh設立伊來管理伊一切所有ê。Góa si̍t-chāi kā lín kóng, chú-lâng beh siat-li̍p i lâi koán-lí i it-chhè só͘ ū ê.

45設使hit-ê奴僕心內phah算，我ê主人延chhiân chiah beh來，就phah hiah-ê奴僕女婢，lim食koh酒醉，Siat-sú hit ê lô͘-po̍k sim-lāi phah-sǹg, Góa ê chú-lâng iân-chhiân chiah beh lâi, chiū phah hiah ê lô͘-po̍k lú-pī, lim-chia̍h koh chiú-chùi,

46就tī無phài-phe ê日m̄知ê時，hit-ê奴僕ê主人beh到，重重刑罰伊，辦伊kap m̄信ê人同等。chiū tī bô phài-phe ê ji̍t m̄ chai ê sî, hit ê lô͘-po̍k ê chú-lâng beh kàu, tāng-tāng hêng-hoa̍t i, pān i kap m̄ sìn ê lâng tâng-téng.

47奴僕知伊ê主人ê意思，也無備辦，也無順伊ê意思來行，beh受phah chōe下。Lô͘-po̍k chai i ê chú-lâng ê ì-sù, iā bô pī-pān, iā bô sūn i ê ì-sù lâi kiâⁿ, beh siū phah chōe ē.

48但是m̄知來行應該受phah ê事，伊beh受phah少下。見若hō͘伊chōe ê，beh kā伊the̍h chōe；託重伊chōe ê，beh kā伊討khah chōe。Nā-sī m̄ chai lâi kiâⁿ eng-kai siū phah ê sū i beh siū phah chió ē. Kìⁿ-nā hō͘ i chōe ê, beh kā i the̍h chōe; thok-tiōng i chōe ê, beh kā i thó khah chōe.

49我來是beh用火hiat tī地裡；火若已經to̍h，我iáu-kú ài甚麼？Góa lâi sī beh ēng hé hiat tī tōe-ni̍h; hé nā í-keng to̍h, góa iáu-kú ài sím-mi̍h?

50我有應該受ê洗；hit-ê洗iáu-bē成，我迫切到怎樣？Góa ū eng-kai siū ê sóe; hit ê sóe iáu-bē chiâⁿ, góa pek-chhiat kàu cháiⁿ-iūⁿ?

51Lín phah算我來是beh hō͘地上和平mah？我kā lín講，m̄是，反tńg是冤家。Lín phah-sǹg góa lâi sī beh hō͘ tōe-chiūⁿ hô-pêng mah? Góa kā lín kóng, M̄ sī, hoán-tńg sī oan-ke.

52Taⁿ了後一家五有人beh冤家，三個kap兩個冤家，兩個kap三個冤家。Taⁿ liáu-āu chi̍t ke gō͘ lâng beh oan-ke, saⁿ-ê kap nn̄g-ê oan-ke, nn̄g-ê kap saⁿ-ê oan-ke.

53父kap Kiáⁿ，kiáⁿ kap父，老母kap cha-bó͘-kiáⁿ，cha-bó͘-kiáⁿ kap老母，ta-ke kap伊ê sim-pū，sim-pū kap ta-ke，in lóng beh冤家。Pē kap kiáⁿ, kiáⁿ kap pē, lāu-bú kap cha-bó͘-kiáⁿ, cha-bó͘-kiáⁿ kap lāu-bú, ta-ke kap i ê sim-pū, sim-pū kap ta-ke, in lóng beh oan-ke.

54伊就koh對眾人講，Lín看見雲tùi西勢起，lín就講，Beh落雨；果然有án-ni；I chiū koh tùi chèng lâng kóng, Lín khòaⁿ-kìⁿ hûn tùi sai-sì khí, lín chiū kóng, Beh lo̍h hō͘; kó-jiân ū án-ni;

55看見風tùi南勢吹來，lín就講，Beh燒熱；也有án-ni。khòaⁿ-kìⁿ hong tùi lâm-sì chhe lâi, lín chiū kóng, Beh sio-joa̍h; iā ū án-ni.

56假好ê人ah，天kap地ê形式lín to看會出，怎樣bōe會看出chit-ê時ah？Ké-hó ê lâng ah, thiⁿ kap tōe ê hêng-sek lín to khòaⁿ ōe chhut, cháiⁿ-iūⁿ bōe-ōe khòaⁿ-chhut chit ê sî ah?

57Lín家己怎樣無省察hit-ê合tī義ê ah？Lín ka-kī cháiⁿ-iūⁿ bô séng-chhat hit-ê ha̍p tī gī ê ah?

58因為你kap告你ê去見官府，iáu tī路裡tio̍h營為hō͘伊放你soah；驚了伊拖你到tī審判官，審判官將你交差役，差役續將你關落監。In-ūi lí kap kò lí ê khì kìⁿ koaⁿ-hú, iáu tī lō͘-ni̍h tio̍h êng-ûi hō͘ i pàng lí soah; kiaⁿ-liáu i thoa lí kàu tī sím-phòaⁿ koaⁿ, sím-phòaⁿ koaⁿ chiong lí kau chhe-ia̍h, chhe-ia̍h sòa chiong lí koaiⁿ lo̍h kaⁿ.

59我kā你講，一絲一毫bē還，你決斷bōe會出hia。Góa kā lí kóng, Chi̍t si chi̍t hô bē hêng, lí koat-toàn bōe-ōe chhut hia.

1當hit時有幾nā人tī-teh，將加利利人ê事kā耶穌講，就是彼拉多將in ê血chham tī in ê牲禮ê。Tng hit sî ū kúi-nā lâng tī-teh, chiong Ka-lī-lī lâng ê sū kā Iâ-so͘ kóng, chiū-sī Pí-lia̍p-to chiong in ê huih chham tī in ê seng-lé ê.

2耶穌應講，因為chiah-ê加利利人受chit號ê害，lín phah算in比眾加利利人khah有罪mah？Iâ-so͘ ìn kóng, In-ūi chiah ê Ka-lī-lī lâng siū chit hō ê hāi, lín phah-sǹg in pí chèng Ka-lī-lī lâng khah ū chōe mah?

3我kā lín講，m̄是；lín若無反悔，lóng beh親像án-ni滅無。Góa kā lín kóng, M̄ sī; lín nā bô hoán-hóe, lóng beh chhin-chhiūⁿ án-ni bia̍t-bô.

4á是hit十八人，hō͘西羅亞ê塔倒落來teh死ê，lín phah算in比lóng總khiā起tī耶路撒冷ê人犯罪khah重mah？Á-sī hit cha̍p-poeh lâng, hō͘ Se-lô-a ê thah tó-lo̍h-lâi teh-sí ê, lín phah-sǹg in pí lóng-chóng khiā-khí tī Iâ-lō͘-sat-léng ê lâng hoān-chōe khah tāng mah?

5我kā lín講，m̄是；lín若無反悔，lóng beh照án-ni滅無。Góa kā lín kóng, M̄ sī; lín nā bô hoán-hóe, lóng beh chiàu án-ni bia̍t-bô.

6伊就設一個譬喻講，某人有一叢無花果樹栽tī伊ê葡萄園裡；就來hit叢chhē果子，chhē無。I chiū siat chi̍t ê phì-jū kóng, Bó͘ lâng ū chi̍t châng bû-hoa-kó chhiū chai tī i ê phû-tô hn̂g-ni̍h; chiū lâi hit châng chhē ké-chí, chhē bô.

7Chiah對管園ê講，你看，我連連三年來tùi chit叢無花果樹chhē果子，chhē無。Tio̍h kā伊chhò起來；啥事hō͘伊也tìn所在？Chiah tùi koán-hn̂g ê kóng, Lí khòaⁿ, góa liân-liân saⁿ nî lâi tùi chit châng bû-hoa-kó chhiū chhē ké-chí, chhē bô. Tio̍h kā i chhò-khí-lâi; siáⁿ-sū hō͘ i iā tìn só͘-chāi?

8應伊講，主ah，今年請koh容允伊；thèng候我四圍掘鬆èng肥；Ìn i kóng, Chú ah, kin-nî chhiáⁿ koh iông-ún i; thèng-hāu góa sì-ûi ku̍t-sang èng-pûi;

9後來若結果子，就好；若無，你chiah kā伊chhò起來。āu-lâi nā kiat ké-chí, chiū hó; nā bô, lí chiah kā i chhò-khí-lâi.

10安歇日耶穌tī一個會堂teh教示人；An-hioh-ji̍t Iâ-so͘ tī chi̍t ê hōe-tn̂g teh kà-sī lâng;

11tú-tn̄g有一個婦人人，患tio̍h邪神致病十八年久，ún-ku lóng bōe伸直。tú-tn̄g ū chi̍t ê hū-jîn-lâng, hoān-tio̍h siâ-sîn tì pīⁿ cha̍p-poeh nî kú, ún-ku lóng bōe chhun ti̍t.

12耶穌看見就叫伊講，婦人人ah，taⁿ你脫離你ê病lah。Iâ-so͘ khòaⁿ-kìⁿ chiū kiò i kóng, Hū-jîn-lâng ah, taⁿ lí thoat-lī lí ê pīⁿ lah.

13就用雙手kā伊hōaⁿ；伊即時伸直，就歸榮光上帝。Chiū ēng siang-chhiú kā i hōaⁿ; i chek-sî chhun ti̍t, chiū kui êng-kng Siōng-tè.

14管會堂ê，因為耶穌tī安歇日醫病，就受氣，對眾人應講，有六日應該tio̍h做工，hit六日間thang來受醫；安歇日m̄-thang。Koán hōe-tn̂g ê, in-ūi Iâ-so͘ tī an-hioh-ji̍t i-pīⁿ, chiū siū-khì, tùi chèng lâng ìn kóng, Ū la̍k ji̍t eng-kai tio̍h chòe kang, hit la̍k ji̍t kan thang lâi siū i; an-hioh-ji̍t m̄-thang.

15但是主應伊講，假好ê人ah，tī安歇日lín kiám無ta̍k人tùi槽裡tháu伊ê牛á是驢，牽去食水mah？Nā-sī Chú ìn i kóng, Ké-hó ê lâng ah, tī an-hioh-ji̍t lín kiám bô ta̍k lâng tùi chô-ni̍h tháu i ê gû á-sī lû, khan-khì chia̍h chúi mah?

16Chit-ê婦人人是亞伯拉罕ê後裔，hō͘撒旦縛伊已經十八年久，Kiám m̄應該tī安歇ê日tháu伊ê結mah？Chit ê hū-jîn-lâng sī A-pek-la̍h-hán ê hō͘-è, hō͘ Sat-tàn pa̍k i í-keng cha̍p-poeh nî kú, kiám m̄ eng-kai tī an-hioh ê ji̍t tháu i ê kat mah?

17耶穌講án-ni，chiah-ê對敵lóng見笑；眾人因為伊所行一切榮光ê事，lóng總歡喜。Iâ-so͘ kóng án-ni, chiah ê tùi-te̍k lóng kiàn-siàu; chèng lâng in-ūi I só͘ kiâⁿ it-chhè êng-kng ê sū, lóng-chóng hoaⁿ-hí.

18耶穌就講，上帝ê國親像甚麼？我beh用甚麼來比並伊？Iâ-so͘ chiū kóng, Siōng-tè ê kok chhin-chhiūⁿ sím-mi̍h? Góa beh ēng sím-mi̍h lâi pí-phēng i?

19是親像一粒芥菜子，人the̍h去種tī伊家己ê園，就大叢成做樹，空中ê鳥來歇tī伊ê枝。Sī chhin-chhiūⁿ chi̍t lia̍p kòa-chhài chí, lâng the̍h khì chèng tī i ka-kī ê hn̂g, chiū tōa châng chiâⁿ chòe chhiū, khong-tiong ê chiáu lâi hioh tī i ê ki.

20Koh講，我beh用甚麼來比並上帝ê國？Koh kóng, Góa beh ēng sím-mi̍h lâi pí-phēng Siōng-tè ê kok?

21是親像酵，婦人人the̍h去hē tī三斗ê麵粉內，到lóng總發酵。Sī chhin-chhiūⁿ kàⁿ, hū-jîn-lâng the̍h khì hē tī saⁿ táu ê mī-hún lāi, kàu lóng-chóng hoat-kàⁿ.

22耶穌經過chiah-ê城chiah-ê鄉社教示人，也ǹg耶路撒冷teh行。Iâ-so͘ keng-kè chiah ê siâⁿ chiah ê hiuⁿ-siā kà-sī lâng, iā ǹg Iâ-lō͘-sat-léng teh kiâⁿ.

23有一人kā伊講，主ah，得tio̍h救ê人是少mah？Ū chi̍t lâng kā I kóng, Chú ah, tit-tio̍h kiù ê lâng sī chió mah?

24耶穌對in講，Tio̍h盡力tùi狹門入去；因為我kā lín講，beh有chōe-chōe人求入也bōe得tio̍h。Iâ-so͘ tùi in kóng, Tio̍h chīn-la̍t tùi oe̍h mn̂g ji̍p-khì; in-ūi góa kā lín kóng, beh ū chōe-chōe lâng kiû ji̍p iā bōe tit-tio̍h.

25到家主起來關門，lín chiah khiā tī外面，phah門，講，主ah，kā阮開leh，伊就beh應lín講，Lín tùi tó位來，我m̄-bat lín。Kàu ke-chú khí-lâi koaiⁿ mn̂g, lín chiah khiā tī gōa-bīn, phah mn̂g, kóng, Chú ah, kā goán khui leh, I chiū beh ìn lín kóng, Lín tùi tó-ūi lâi, góa m̄ bat lín.

26Lín就beh講，阮bat tī你ê面前lim食；你也bat tī阮ê街路教示。Lín chiū beh kóng, Goán bat tī lí ê bīn-chêng lim-chia̍h; lí iā bat tī goán ê ke-lō͘ kà-sī.

27伊beh講，我kā lín講，我m̄知lín tùi tó位來；I beh kóng, Góa kā lín kóng, góa m̄ chai lín tùi tó-ūi lâi;

28lín行不義ê人lóng tio̍h離開我。Lín teh-beh看見亞伯拉罕、以撒、雅各kap眾先知tī上帝ê國，也lín家己受趕出tī外面；當hit時tī hia beh有啼哭咬牙切齒。lín kiâⁿ put-gī ê lâng lóng tio̍h lī-khui góa. Lín teh-beh khòaⁿ-kìⁿ A-pek-la̍h-hán, Í-sat, Ngá-kok kap chèng sian-ti tī Siōng-tè ê kok, iā lín ka-kī siū kóaⁿ-chhut tī gōa-bīn; tng hit sî tī hia beh ū thî-khàu kā-gê chhiat-chhí.

29Tùi東tùi西tùi南tùi北，beh有人來坐桌tī上帝ê國。Tùi tang tùi sai tùi lâm tùi pak, beh ū lâng lâi chē toh tī Siōng-tè ê kok.

30有路尾ê beh做事先，也有事先ê beh做路尾。Ū lō͘-bé ê beh chòe tāi-seng, iā ū tāi-seng ê beh chòe lō͘-bé.

31Hit時有法利賽幾nā人來kā伊講，你tio̍h離開chia去別位，因為希律ài beh thâi你。Hit sî ū Hoat-lī-sài kúi-nā lâng lâi kā I kóng, Lí tio̍h lī-khui chia khì pa̍t ūi, in-ūi Hi-lu̍t ài beh thâi lí.

32伊kā in講，lín去kā hitchiah狐狸講，你看，今á日，明á日我趕鬼醫病，到第三日我就完全。I kā in kóng, Lín khì kā hit chiah hô͘-lî kóng, Lí khòaⁿ, kin-á-ji̍t, bîn-á-ji̍t góa kóaⁿ kúi i-pīⁿ, kàu tē saⁿ ji̍t góa chiū oân-choân.

33雖然án-ni，今á日，明á日kap後日我應該tio̍h行；因為不該有先知受害死tī耶路撒冷ê外面。Sui-jiân án-ni, kin-á-ji̍t, bîn-á-ji̍t kap āu-ji̍t góa eng-kai tio̍h kiâⁿ; in-ūi put-kai ū sian-ti siū hāi-sí tī Iâ-lō͘-sat-léng ê gōa-bīn.

34耶路撒冷ah，耶路撒冷ah，就是thâi死先知人，用石頭tìm奉差到tī伊ê，我jōa choe7pai2 ài聚集你ê Kiáⁿ兒，親像雞母聚集伊ê雞á tī翼下；但是lín m̄ ài。Iâ-lō͘-sat-léng ah, Iâ-lō͘-sat-léng ah, chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê, góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; nā-sī lín m̄ ài.

35你看，lín ê厝放teh hō͘ lín；koh我kā lín講，Lín決斷bōe看見我，thèng候lín講，Tī主ê名來ê得tio̍h福氣。Lí khòaⁿ, lín ê chhù pàng teh hō͘ lín; koh góa kā lín kóng, Lín koat-toàn bōe khòaⁿ-kìⁿ góa, thèng-hāu lín kóng, Tī Chú ê miâ lâi ê tit-tio̍h hok-khì.

1安歇日耶穌入一個法利賽頭人ê厝，beh食；in teh當等伊An-hioh-ji̍t Iâ-so͘ ji̍p chi̍t ê Hoat-lī-sài thâu-lâng ê chhù, beh chia̍h; in teh tng-tán I.

2Tú-tn̄g tī伊ê面前有一個蠱脹ê人。Tú-tn̄g tī I ê bīn-chêng ū chi̍t ê kó͘-tiòng ê lâng.

3耶穌對教律法ê先生kap法利賽人講，安歇日醫病thang á m̄-thang？Iâ-so͘ tùi kà lu̍t-hoat ê sian-siⁿ kap Hoat-lī-sài lâng kóng, An-hioh-ji̍t i-pīⁿ thang á m̄-thang?

4In靜靜。耶穌牽hit-ê人，醫好伊，hō͘伊去。In chēng-chēng. Iâ-so͘ khan hit ê lâng, i-hó i, hō͘ i khì.

5續對in講，Lín中間甚麼人有驢á是牛tī安歇日跋落溝窟，也無liâm-piⁿ牽伊起來mah？Sòa tùi in kóng, Lín tiong-kan sím-mi̍h lâng ū lû á-sī gû tī an-hioh-ji̍t poa̍h-lo̍h kau-khut, iā bô liâm-piⁿ khan i khí-lâi mah?

6Chiah-ê話in bōe會應。Chiah ê ōe in bōe-ōe ìn.

7耶穌看hiah-ê人客揀大位，就設譬喻對in講，Iâ-so͘ khòaⁿ hiah ê lâng-kheh kéng tōa ūi, chiū siat phì-jū tùi in kóng,

8Lín Hō͘人請去赴婚姻ê筵桌，莫得坐大位，驚了比你khah尊貴ê也hō͘伊請，就請你kap請伊ê來kā你講，讓位hō͘ chit人；Lín hō͘ lâng chhiáⁿ khì hù hun-in ê iân-toh, bo̍h-tit chē tōa ūi, kiaⁿ-liáu pí lí khah chun-kùi ê iā hō͘ i chhiáⁿ, chiū chhiáⁿ lí kap chhiáⁿ i ê lâi kā lí kóng, Niū ūi hō͘ chit lâng;

9你就見笑，退去坐tī尾位。lí chiū kiàn-siàu, thè-khì chē tī bé ūi.

10獨獨hō͘人請ê時tio̍h去坐尾位，就請你ê來kā你講，朋友ah，坐起來；hit時你tī同桌ê人ê面前就有體面。To̍k-to̍k hō͘ lâng chhiáⁿ ê sî tio̍h khì chē bé ūi, chiū chhiáⁿ lí ê lâi kā lí kóng, Pêng-iú ah, chē khí-lâi; hit sî lí tī tâng toh ê lâng ê bīn-chêng chiū ū thé-biān.

11因為見若自高ê beh hō͘伊卑微；家己卑微ê beh高升伊。In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i.

12耶穌也kā請伊ê人講，你辦日晝頓á是ê-hng頓，m̄-thang請你ê朋友，á是兄弟，á是親戚，á是好額ê厝邊，驚了in倒請你，你就受報答。Iâ-so͘ iā kā chhiáⁿ I ê lâng kóng, Lí pān ji̍t-tàu tǹg á-sī ê-hng tǹg, m̄-thang chhiáⁿ lí ê pêng-iú, á-sī hiaⁿ-tī, á-sī chhin-chhek, á-sī hó-gia̍h ê chhù-piⁿ, kiaⁿ-liáu in tò chhiáⁿ lí, lí chiū siū pò-tap.

13但是你辦筵桌ê時，tio̍h請sòng-hiong ê、破相ê、跛腳ê、chhiⁿ-mî ê；你就有福氣；Nā-sī lí pān iân-toh ê sî, tio̍h chhiáⁿ sòng-hiong ê, phòa-siùⁿ ê, pái-kha ê, chhiⁿ-mî ê; lí chiū ū hok-khì;

14因為in無thang報答你；就tī義人koh活ê時你beh得tio̍h報答。in-ūi in bô thang pò-tap lí; chiū tī gī lâng koh-oa̍h ê sî lí beh tit-tio̍h pò-tap.

15同桌ê一人聽見chiah-ê話，就kā伊講，Beh tī上帝ê國食ê，有福氣ah。Tâng toh ê chi̍t lâng thiaⁿ-kìⁿ chiah ê ōe, chiū kā I kóng, Beh tī Siōng-tè ê kok chia̍h ê, ū hok-khì ah.

16但是耶穌kā伊講，有一人辦大筵席，所請ê chōe-chōe。Nā-sī Iâ-so͘ kā i kóng, Ū chi̍t lâng pān tōa iân-sia̍h, só͘ chhiáⁿ ê chōe-chōe.

17到beh食ê時，差伊ê奴僕kā所請ê人講，Tio̍h來，百項物便lah。Kàu beh chia̍h ê sî, chhe i ê lô͘-po̍k kā só͘ chhiáⁿ ê lâng kóng, Tio̍h lâi, pah hāng mi̍h piān lah.

18眾人就同一樣心推辭。頭一個kā伊講，我有買園，ko͘-put-chiong tio̍h去看伊；請hō͘我辭。Chèng lâng chiū tâng chi̍t iūⁿ sim the-sî. Thâu-chi̍t-ê kā i kóng, Góa ū bóe hn̂g, ko͘-put-chiong tio̍h khì khòaⁿ i; chhiáⁿ hō͘ góa sî.

19Koh一人講，我有買牛五對，beh去驗看，請hō͘我辭。Koh chi̍t lâng kóng, Góa ū bóe gû gō͘ tùi, beh khì giām-khòaⁿ, chhiáⁿ hō͘ góa sî.

20Koh一個講，我有娶bó͘，chiah bōe得來。Koh chi̍t ê kóng, Góa ū chhōa bó͘, chiah bōe tit lâi.

21奴僕tò去將chiah-ê事kā伊ê主人講。家主受氣，kā伊ê奴僕講，緊緊出去到城內ê大街小巷，chhōa hiah-ê sòng-hiong ê、破相ê、chhiⁿ-mî ê、跛腳ê來chia。Lô͘-po̍k tò-khì chiong chiah ê sū kā i ê chú-lâng kóng. Ke-chú siū-khì, kā i ê lô͘-po̍k kóng, Kín-kín chhut-khì kàu siâⁿ-lāi ê tōa koe sió hāng, chhōa hiah ê sòng-hiong ê, phòa-siùⁿ ê, chhiⁿ-mî ê, pái-kha ê lâi chia.

22奴僕講，主ah，你所命令ê已經行伊；但是iáu-kú有chhun位。Lô͘-po̍k kóng, Chú ah, lí só͘ bēng-lēng ê í-keng kiâⁿ i; nā-sī iáu-kú ū chhun ūi.

23主人對伊ê奴僕講，出去路裡kap籬笆邊勉強人入來，hō͘我ê厝滿滿。Chú-lâng tùi i ê lô͘-po̍k kóng, Chhut-khì lō͘-ni̍h kap lî-pa piⁿ bián-kióng lâng ji̍p-lâi, hō͘ góa ê chhù móa-móa.

24因為我kā lín講，前所請ê無一人會得食我ê筵席。In-ūi góa kā lín kóng, Chêng só͘ chhiáⁿ ê bô chi̍t lâng ōe tit chia̍h góa ê iân-sia̍h.

25Chōe-chōe人kap伊同行，伊就oa̍t過來，對in講，Chōe-chōe lâng kap I tâng kiâⁿ, I chiū oa̍t-kè-lâi, tùi in kóng,

26若有人就近我，也無怨恨伊ê父母、bó͘-kiáⁿ、兄弟、姊妹，以及家己ê性命，就bōe能做我ê學生。Nā ū lâng chiū-kūn góa, iā bô oàn-hūn i ê pē-bú, bó͘-kiáⁿ, hiaⁿ-tī, chí-bē, í-ki̍p ka-kī ê sìⁿ-miā, chiū bōe-ōe chòe góa ê ha̍k-seng.

27無giâ家己ê十字架來tè我ê，也bōe能做我ê學生。Bô giâ ka-kī ê si̍p-jī-kè lâi tè góa ê, iā bōe-ōe chòe góa ê ha̍k-seng.

28Lín中間甚麼人beh起塔，kiám無事先坐teh，來算hit-ê所費，看能起到成bōe？Lín tiong-kan sím-mi̍h lâng beh khí thah, kiám bô tāi-seng chē-teh, lâi sǹg hit ê só͘-hùi, khòaⁿ ōe khí kàu chiâⁿ bōe?

29驚了kiám-chhái hē地基，也bōe能起到好；就看見ê人lóng恥笑伊，講，Kiaⁿ-liáu kiám-chhái hē tōe-ki, iā bōe-ōe khí kàu hó; chiū khòaⁿ-kìⁿ ê lâng lóng thí-chhiò i, kóng,

30Chit-ê人有動工，也bōe起到好。Chit ê lâng ū tāng kang, iā bōe khí kàu hó.

31á是甚麼王出來beh kap別個王交戰，kiám無事先坐teh參謀；看能用一萬兵抵敵hit-ê chhōa兩萬兵來攻擊伊ê，á bōe？Á-sī sím-mi̍h ông chhut-lâi beh kap pa̍t ê ông kau-chiàn, kiám bô tāi-seng chē-teh chham-bô͘; khòaⁿ ōe ēng chi̍t-bān peng tí-te̍k hit-ê chhōa nn̄g-bān peng lâi kong-kek i ê, á bōe?

32若bōe，就趁伊iáu遠，差使者去kap伊講和。Nā bōe, chiū thàn i iáu hn̄g, chhe sù-chiá khì kap i káng hô.

33Án-ni，lín中間見若無放sak一切所有ê，bōe能做我ê學生。Án-ni, lín tiong-kan kìⁿ-nā bô pàng-sak it-chhè só͘ ū ê, bōe-ōe chòe góa ê ha̍k-seng.

34Taⁿ鹽是好，鹽若續失味，beh用甚麼復到伊ê味？Taⁿ iâm sī hó, iâm nā sòa sit-bī, beh ēng sím-mi̍h ho̍k-tò i ê bī?

35也bōe落園得，也bōe做肥得；只有hiat tī外面。有耳孔thang聽ê，tio̍h聽。Iā bōe lo̍h hn̂g tit, iā bōe chòe pûi tit; chí ū hiat tī gōa-bīn. Ū hī-khang thang thiaⁿ ê, tio̍h thiaⁿ.