1當hit時有幾nā人tī-teh，將加利利人ê事kā耶穌講，就是彼拉多將in ê血chham tī in ê牲禮ê。Tng hit sî ū kúi-nā lâng tī-teh, chiong Ka-lī-lī lâng ê sū kā Iâ-so͘ kóng, chiū-sī Pí-lia̍p-to chiong in ê huih chham tī in ê seng-lé ê.

2耶穌應講，因為chiah-ê加利利人受chit號ê害，lín phah算in比眾加利利人khah有罪mah？Iâ-so͘ ìn kóng, In-ūi chiah ê Ka-lī-lī lâng siū chit hō ê hāi, lín phah-sǹg in pí chèng Ka-lī-lī lâng khah ū chōe mah?

3我kā lín講，m̄是；lín若無反悔，lóng beh親像án-ni滅無。Góa kā lín kóng, M̄ sī; lín nā bô hoán-hóe, lóng beh chhin-chhiūⁿ án-ni bia̍t-bô.

4á是hit十八人，hō͘西羅亞ê塔倒落來teh死ê，lín phah算in比lóng總khiā起tī耶路撒冷ê人犯罪khah重mah？Á-sī hit cha̍p-poeh lâng, hō͘ Se-lô-a ê thah tó-lo̍h-lâi teh-sí ê, lín phah-sǹg in pí lóng-chóng khiā-khí tī Iâ-lō͘-sat-léng ê lâng hoān-chōe khah tāng mah?

5我kā lín講，m̄是；lín若無反悔，lóng beh照án-ni滅無。Góa kā lín kóng, M̄ sī; lín nā bô hoán-hóe, lóng beh chiàu án-ni bia̍t-bô.

6伊就設一個譬喻講，某人有一叢無花果樹栽tī伊ê葡萄園裡；就來hit叢chhē果子，chhē無。I chiū siat chi̍t ê phì-jū kóng, Bó͘ lâng ū chi̍t châng bû-hoa-kó chhiū chai tī i ê phû-tô hn̂g-ni̍h; chiū lâi hit châng chhē ké-chí, chhē bô.

7Chiah對管園ê講，你看，我連連三年來tùi chit叢無花果樹chhē果子，chhē無。Tio̍h kā伊chhò起來；啥事hō͘伊也tìn所在？Chiah tùi koán-hn̂g ê kóng, Lí khòaⁿ, góa liân-liân saⁿ nî lâi tùi chit châng bû-hoa-kó chhiū chhē ké-chí, chhē bô. Tio̍h kā i chhò-khí-lâi; siáⁿ-sū hō͘ i iā tìn só͘-chāi?

8應伊講，主ah，今年請koh容允伊；thèng候我四圍掘鬆èng肥；Ìn i kóng, Chú ah, kin-nî chhiáⁿ koh iông-ún i; thèng-hāu góa sì-ûi ku̍t-sang èng-pûi;

9後來若結果子，就好；若無，你chiah kā伊chhò起來。āu-lâi nā kiat ké-chí, chiū hó; nā bô, lí chiah kā i chhò-khí-lâi.

10安歇日耶穌tī一個會堂teh教示人；An-hioh-ji̍t Iâ-so͘ tī chi̍t ê hōe-tn̂g teh kà-sī lâng;

11tú-tn̄g有一個婦人人，患tio̍h邪神致病十八年久，ún-ku lóng bōe伸直。tú-tn̄g ū chi̍t ê hū-jîn-lâng, hoān-tio̍h siâ-sîn tì pīⁿ cha̍p-poeh nî kú, ún-ku lóng bōe chhun ti̍t.

12耶穌看見就叫伊講，婦人人ah，taⁿ你脫離你ê病lah。Iâ-so͘ khòaⁿ-kìⁿ chiū kiò i kóng, Hū-jîn-lâng ah, taⁿ lí thoat-lī lí ê pīⁿ lah.

13就用雙手kā伊hōaⁿ；伊即時伸直，就歸榮光上帝。Chiū ēng siang-chhiú kā i hōaⁿ; i chek-sî chhun ti̍t, chiū kui êng-kng Siōng-tè.

14管會堂ê，因為耶穌tī安歇日醫病，就受氣，對眾人應講，有六日應該tio̍h做工，hit六日間thang來受醫；安歇日m̄-thang。Koán hōe-tn̂g ê, in-ūi Iâ-so͘ tī an-hioh-ji̍t i-pīⁿ, chiū siū-khì, tùi chèng lâng ìn kóng, Ū la̍k ji̍t eng-kai tio̍h chòe kang, hit la̍k ji̍t kan thang lâi siū i; an-hioh-ji̍t m̄-thang.

15但是主應伊講，假好ê人ah，tī安歇日lín kiám無ta̍k人tùi槽裡tháu伊ê牛á是驢，牽去食水mah？Nā-sī Chú ìn i kóng, Ké-hó ê lâng ah, tī an-hioh-ji̍t lín kiám bô ta̍k lâng tùi chô-ni̍h tháu i ê gû á-sī lû, khan-khì chia̍h chúi mah?

16Chit-ê婦人人是亞伯拉罕ê後裔，hō͘撒旦縛伊已經十八年久，Kiám m̄應該tī安歇ê日tháu伊ê結mah？Chit ê hū-jîn-lâng sī A-pek-la̍h-hán ê hō͘-è, hō͘ Sat-tàn pa̍k i í-keng cha̍p-poeh nî kú, kiám m̄ eng-kai tī an-hioh ê ji̍t tháu i ê kat mah?

17耶穌講án-ni，chiah-ê對敵lóng見笑；眾人因為伊所行一切榮光ê事，lóng總歡喜。Iâ-so͘ kóng án-ni, chiah ê tùi-te̍k lóng kiàn-siàu; chèng lâng in-ūi I só͘ kiâⁿ it-chhè êng-kng ê sū, lóng-chóng hoaⁿ-hí.

18耶穌就講，上帝ê國親像甚麼？我beh用甚麼來比並伊？Iâ-so͘ chiū kóng, Siōng-tè ê kok chhin-chhiūⁿ sím-mi̍h? Góa beh ēng sím-mi̍h lâi pí-phēng i?

19是親像一粒芥菜子，人the̍h去種tī伊家己ê園，就大叢成做樹，空中ê鳥來歇tī伊ê枝。Sī chhin-chhiūⁿ chi̍t lia̍p kòa-chhài chí, lâng the̍h khì chèng tī i ka-kī ê hn̂g, chiū tōa châng chiâⁿ chòe chhiū, khong-tiong ê chiáu lâi hioh tī i ê ki.

20Koh講，我beh用甚麼來比並上帝ê國？Koh kóng, Góa beh ēng sím-mi̍h lâi pí-phēng Siōng-tè ê kok?

21是親像酵，婦人人the̍h去hē tī三斗ê麵粉內，到lóng總發酵。Sī chhin-chhiūⁿ kàⁿ, hū-jîn-lâng the̍h khì hē tī saⁿ táu ê mī-hún lāi, kàu lóng-chóng hoat-kàⁿ.

22耶穌經過chiah-ê城chiah-ê鄉社教示人，也ǹg耶路撒冷teh行。Iâ-so͘ keng-kè chiah ê siâⁿ chiah ê hiuⁿ-siā kà-sī lâng, iā ǹg Iâ-lō͘-sat-léng teh kiâⁿ.

23有一人kā伊講，主ah，得tio̍h救ê人是少mah？Ū chi̍t lâng kā I kóng, Chú ah, tit-tio̍h kiù ê lâng sī chió mah?

24耶穌對in講，Tio̍h盡力tùi狹門入去；因為我kā lín講，beh有chōe-chōe人求入也bōe得tio̍h。Iâ-so͘ tùi in kóng, Tio̍h chīn-la̍t tùi oe̍h mn̂g ji̍p-khì; in-ūi góa kā lín kóng, beh ū chōe-chōe lâng kiû ji̍p iā bōe tit-tio̍h.

25到家主起來關門，lín chiah khiā tī外面，phah門，講，主ah，kā阮開leh，伊就beh應lín講，Lín tùi tó位來，我m̄-bat lín。Kàu ke-chú khí-lâi koaiⁿ mn̂g, lín chiah khiā tī gōa-bīn, phah mn̂g, kóng, Chú ah, kā goán khui leh, I chiū beh ìn lín kóng, Lín tùi tó-ūi lâi, góa m̄ bat lín.

26Lín就beh講，阮bat tī你ê面前lim食；你也bat tī阮ê街路教示。Lín chiū beh kóng, Goán bat tī lí ê bīn-chêng lim-chia̍h; lí iā bat tī goán ê ke-lō͘ kà-sī.

27伊beh講，我kā lín講，我m̄知lín tùi tó位來；I beh kóng, Góa kā lín kóng, góa m̄ chai lín tùi tó-ūi lâi;

28lín行不義ê人lóng tio̍h離開我。Lín teh-beh看見亞伯拉罕、以撒、雅各kap眾先知tī上帝ê國，也lín家己受趕出tī外面；當hit時tī hia beh有啼哭咬牙切齒。lín kiâⁿ put-gī ê lâng lóng tio̍h lī-khui góa. Lín teh-beh khòaⁿ-kìⁿ A-pek-la̍h-hán, Í-sat, Ngá-kok kap chèng sian-ti tī Siōng-tè ê kok, iā lín ka-kī siū kóaⁿ-chhut tī gōa-bīn; tng hit sî tī hia beh ū thî-khàu kā-gê chhiat-chhí.

29Tùi東tùi西tùi南tùi北，beh有人來坐桌tī上帝ê國。Tùi tang tùi sai tùi lâm tùi pak, beh ū lâng lâi chē toh tī Siōng-tè ê kok.

30有路尾ê beh做事先，也有事先ê beh做路尾。Ū lō͘-bé ê beh chòe tāi-seng, iā ū tāi-seng ê beh chòe lō͘-bé.

31Hit時有法利賽幾nā人來kā伊講，你tio̍h離開chia去別位，因為希律ài beh thâi你。Hit sî ū Hoat-lī-sài kúi-nā lâng lâi kā I kóng, Lí tio̍h lī-khui chia khì pa̍t ūi, in-ūi Hi-lu̍t ài beh thâi lí.

32伊kā in講，lín去kā hitchiah狐狸講，你看，今á日，明á日我趕鬼醫病，到第三日我就完全。I kā in kóng, Lín khì kā hit chiah hô͘-lî kóng, Lí khòaⁿ, kin-á-ji̍t, bîn-á-ji̍t góa kóaⁿ kúi i-pīⁿ, kàu tē saⁿ ji̍t góa chiū oân-choân.

33雖然án-ni，今á日，明á日kap後日我應該tio̍h行；因為不該有先知受害死tī耶路撒冷ê外面。Sui-jiân án-ni, kin-á-ji̍t, bîn-á-ji̍t kap āu-ji̍t góa eng-kai tio̍h kiâⁿ; in-ūi put-kai ū sian-ti siū hāi-sí tī Iâ-lō͘-sat-léng ê gōa-bīn.

34耶路撒冷ah，耶路撒冷ah，就是thâi死先知人，用石頭tìm奉差到tī伊ê，我jōa choe7pai2 ài聚集你ê Kiáⁿ兒，親像雞母聚集伊ê雞á tī翼下；但是lín m̄ ài。Iâ-lō͘-sat-léng ah, Iâ-lō͘-sat-léng ah, chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê, góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; nā-sī lín m̄ ài.

35你看，lín ê厝放teh hō͘ lín；koh我kā lín講，Lín決斷bōe看見我，thèng候lín講，Tī主ê名來ê得tio̍h福氣。Lí khòaⁿ, lín ê chhù pàng teh hō͘ lín; koh góa kā lín kóng, Lín koat-toàn bōe khòaⁿ-kìⁿ góa, thèng-hāu lín kóng, Tī Chú ê miâ lâi ê tit-tio̍h hok-khì.

1安歇日耶穌入一個法利賽頭人ê厝，beh食；in teh當等伊An-hioh-ji̍t Iâ-so͘ ji̍p chi̍t ê Hoat-lī-sài thâu-lâng ê chhù, beh chia̍h; in teh tng-tán I.

2Tú-tn̄g tī伊ê面前有一個蠱脹ê人。Tú-tn̄g tī I ê bīn-chêng ū chi̍t ê kó͘-tiòng ê lâng.

3耶穌對教律法ê先生kap法利賽人講，安歇日醫病thang á m̄-thang？Iâ-so͘ tùi kà lu̍t-hoat ê sian-siⁿ kap Hoat-lī-sài lâng kóng, An-hioh-ji̍t i-pīⁿ thang á m̄-thang?

4In靜靜。耶穌牽hit-ê人，醫好伊，hō͘伊去。In chēng-chēng. Iâ-so͘ khan hit ê lâng, i-hó i, hō͘ i khì.

5續對in講，Lín中間甚麼人有驢á是牛tī安歇日跋落溝窟，也無liâm-piⁿ牽伊起來mah？Sòa tùi in kóng, Lín tiong-kan sím-mi̍h lâng ū lû á-sī gû tī an-hioh-ji̍t poa̍h-lo̍h kau-khut, iā bô liâm-piⁿ khan i khí-lâi mah?

6Chiah-ê話in bōe會應。Chiah ê ōe in bōe-ōe ìn.

7耶穌看hiah-ê人客揀大位，就設譬喻對in講，Iâ-so͘ khòaⁿ hiah ê lâng-kheh kéng tōa ūi, chiū siat phì-jū tùi in kóng,

8Lín Hō͘人請去赴婚姻ê筵桌，莫得坐大位，驚了比你khah尊貴ê也hō͘伊請，就請你kap請伊ê來kā你講，讓位hō͘ chit人；Lín hō͘ lâng chhiáⁿ khì hù hun-in ê iân-toh, bo̍h-tit chē tōa ūi, kiaⁿ-liáu pí lí khah chun-kùi ê iā hō͘ i chhiáⁿ, chiū chhiáⁿ lí kap chhiáⁿ i ê lâi kā lí kóng, Niū ūi hō͘ chit lâng;

9你就見笑，退去坐tī尾位。lí chiū kiàn-siàu, thè-khì chē tī bé ūi.

10獨獨hō͘人請ê時tio̍h去坐尾位，就請你ê來kā你講，朋友ah，坐起來；hit時你tī同桌ê人ê面前就有體面。To̍k-to̍k hō͘ lâng chhiáⁿ ê sî tio̍h khì chē bé ūi, chiū chhiáⁿ lí ê lâi kā lí kóng, Pêng-iú ah, chē khí-lâi; hit sî lí tī tâng toh ê lâng ê bīn-chêng chiū ū thé-biān.

11因為見若自高ê beh hō͘伊卑微；家己卑微ê beh高升伊。In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i.

12耶穌也kā請伊ê人講，你辦日晝頓á是ê-hng頓，m̄-thang請你ê朋友，á是兄弟，á是親戚，á是好額ê厝邊，驚了in倒請你，你就受報答。Iâ-so͘ iā kā chhiáⁿ I ê lâng kóng, Lí pān ji̍t-tàu tǹg á-sī ê-hng tǹg, m̄-thang chhiáⁿ lí ê pêng-iú, á-sī hiaⁿ-tī, á-sī chhin-chhek, á-sī hó-gia̍h ê chhù-piⁿ, kiaⁿ-liáu in tò chhiáⁿ lí, lí chiū siū pò-tap.

13但是你辦筵桌ê時，tio̍h請sòng-hiong ê、破相ê、跛腳ê、chhiⁿ-mî ê；你就有福氣；Nā-sī lí pān iân-toh ê sî, tio̍h chhiáⁿ sòng-hiong ê, phòa-siùⁿ ê, pái-kha ê, chhiⁿ-mî ê; lí chiū ū hok-khì;

14因為in無thang報答你；就tī義人koh活ê時你beh得tio̍h報答。in-ūi in bô thang pò-tap lí; chiū tī gī lâng koh-oa̍h ê sî lí beh tit-tio̍h pò-tap.

15同桌ê一人聽見chiah-ê話，就kā伊講，Beh tī上帝ê國食ê，有福氣ah。Tâng toh ê chi̍t lâng thiaⁿ-kìⁿ chiah ê ōe, chiū kā I kóng, Beh tī Siōng-tè ê kok chia̍h ê, ū hok-khì ah.

16但是耶穌kā伊講，有一人辦大筵席，所請ê chōe-chōe。Nā-sī Iâ-so͘ kā i kóng, Ū chi̍t lâng pān tōa iân-sia̍h, só͘ chhiáⁿ ê chōe-chōe.

17到beh食ê時，差伊ê奴僕kā所請ê人講，Tio̍h來，百項物便lah。Kàu beh chia̍h ê sî, chhe i ê lô͘-po̍k kā só͘ chhiáⁿ ê lâng kóng, Tio̍h lâi, pah hāng mi̍h piān lah.

18眾人就同一樣心推辭。頭一個kā伊講，我有買園，ko͘-put-chiong tio̍h去看伊；請hō͘我辭。Chèng lâng chiū tâng chi̍t iūⁿ sim the-sî. Thâu-chi̍t-ê kā i kóng, Góa ū bóe hn̂g, ko͘-put-chiong tio̍h khì khòaⁿ i; chhiáⁿ hō͘ góa sî.

19Koh一人講，我有買牛五對，beh去驗看，請hō͘我辭。Koh chi̍t lâng kóng, Góa ū bóe gû gō͘ tùi, beh khì giām-khòaⁿ, chhiáⁿ hō͘ góa sî.

20Koh一個講，我有娶bó͘，chiah bōe得來。Koh chi̍t ê kóng, Góa ū chhōa bó͘, chiah bōe tit lâi.

21奴僕tò去將chiah-ê事kā伊ê主人講。家主受氣，kā伊ê奴僕講，緊緊出去到城內ê大街小巷，chhōa hiah-ê sòng-hiong ê、破相ê、chhiⁿ-mî ê、跛腳ê來chia。Lô͘-po̍k tò-khì chiong chiah ê sū kā i ê chú-lâng kóng. Ke-chú siū-khì, kā i ê lô͘-po̍k kóng, Kín-kín chhut-khì kàu siâⁿ-lāi ê tōa koe sió hāng, chhōa hiah ê sòng-hiong ê, phòa-siùⁿ ê, chhiⁿ-mî ê, pái-kha ê lâi chia.

22奴僕講，主ah，你所命令ê已經行伊；但是iáu-kú有chhun位。Lô͘-po̍k kóng, Chú ah, lí só͘ bēng-lēng ê í-keng kiâⁿ i; nā-sī iáu-kú ū chhun ūi.

23主人對伊ê奴僕講，出去路裡kap籬笆邊勉強人入來，hō͘我ê厝滿滿。Chú-lâng tùi i ê lô͘-po̍k kóng, Chhut-khì lō͘-ni̍h kap lî-pa piⁿ bián-kióng lâng ji̍p-lâi, hō͘ góa ê chhù móa-móa.

24因為我kā lín講，前所請ê無一人會得食我ê筵席。In-ūi góa kā lín kóng, Chêng só͘ chhiáⁿ ê bô chi̍t lâng ōe tit chia̍h góa ê iân-sia̍h.

25Chōe-chōe人kap伊同行，伊就oa̍t過來，對in講，Chōe-chōe lâng kap I tâng kiâⁿ, I chiū oa̍t-kè-lâi, tùi in kóng,

26若有人就近我，也無怨恨伊ê父母、bó͘-kiáⁿ、兄弟、姊妹，以及家己ê性命，就bōe能做我ê學生。Nā ū lâng chiū-kūn góa, iā bô oàn-hūn i ê pē-bú, bó͘-kiáⁿ, hiaⁿ-tī, chí-bē, í-ki̍p ka-kī ê sìⁿ-miā, chiū bōe-ōe chòe góa ê ha̍k-seng.

27無giâ家己ê十字架來tè我ê，也bōe能做我ê學生。Bô giâ ka-kī ê si̍p-jī-kè lâi tè góa ê, iā bōe-ōe chòe góa ê ha̍k-seng.

28Lín中間甚麼人beh起塔，kiám無事先坐teh，來算hit-ê所費，看能起到成bōe？Lín tiong-kan sím-mi̍h lâng beh khí thah, kiám bô tāi-seng chē-teh, lâi sǹg hit ê só͘-hùi, khòaⁿ ōe khí kàu chiâⁿ bōe?

29驚了kiám-chhái hē地基，也bōe能起到好；就看見ê人lóng恥笑伊，講，Kiaⁿ-liáu kiám-chhái hē tōe-ki, iā bōe-ōe khí kàu hó; chiū khòaⁿ-kìⁿ ê lâng lóng thí-chhiò i, kóng,

30Chit-ê人有動工，也bōe起到好。Chit ê lâng ū tāng kang, iā bōe khí kàu hó.

31á是甚麼王出來beh kap別個王交戰，kiám無事先坐teh參謀；看能用一萬兵抵敵hit-ê chhōa兩萬兵來攻擊伊ê，á bōe？Á-sī sím-mi̍h ông chhut-lâi beh kap pa̍t ê ông kau-chiàn, kiám bô tāi-seng chē-teh chham-bô͘; khòaⁿ ōe ēng chi̍t-bān peng tí-te̍k hit-ê chhōa nn̄g-bān peng lâi kong-kek i ê, á bōe?

32若bōe，就趁伊iáu遠，差使者去kap伊講和。Nā bōe, chiū thàn i iáu hn̄g, chhe sù-chiá khì kap i káng hô.

33Án-ni，lín中間見若無放sak一切所有ê，bōe能做我ê學生。Án-ni, lín tiong-kan kìⁿ-nā bô pàng-sak it-chhè só͘ ū ê, bōe-ōe chòe góa ê ha̍k-seng.

34Taⁿ鹽是好，鹽若續失味，beh用甚麼復到伊ê味？Taⁿ iâm sī hó, iâm nā sòa sit-bī, beh ēng sím-mi̍h ho̍k-tò i ê bī?

35也bōe落園得，也bōe做肥得；只有hiat tī外面。有耳孔thang聽ê，tio̍h聽。Iā bōe lo̍h hn̂g tit, iā bōe chòe pûi tit; chí ū hiat tī gōa-bīn. Ū hī-khang thang thiaⁿ ê, tio̍h thiaⁿ.

1眾抽餉ê Kap pháiⁿ人teh就近耶穌來聽伊Chèng thiu-hiòng ê kap pháiⁿ lâng teh chiū-kūn Iâ-so͘ lâi thiaⁿ I.

2法利賽人kap經學士nga̍uh-nga̍uh念講，Chit-ê人接納pháiⁿ人，續kap in食。Hoat-lī-sài lâng kap keng-ha̍k-sū nga̍uh-nga̍uh-liām kóng, Chit ê lâng chiap-la̍p pháiⁿ lâng, sòa kap in chia̍h.

3耶穌設chit-ê譬喻對in講，Iâ-so͘ siat chit ê phì-jū tùi in kóng,

4Lín中間甚麼人有一百隻羊，失落一隻，kiám無請放九十九隻tī山裡，去chhē所失落ê到得tio̍h mah？Lín tiong-kan sím-mi̍h lâng ū chi̍t-pah chiah iûⁿ, sit-lo̍h chi̍t chiah, kiám bô chhiáⁿ pàng káu-cha̍p-káu chiah tī soaⁿ-ni̍h, khì chhē só͘ sit-lo̍h ê kàu tit-tio̍h mah?

5已經chhē-tio̍h就歡喜，背伊tī肩頭頂。Í-keng chhē-tio̍h chiū hoaⁿ-hí, pē i tī keng-thâu téng.

6到厝就聚集伊ê朋友厝邊，kā in講，Tio̍h kap我歡喜，因為所失落ê羊我已經chhē-tio̍h。Kàu chhù chiū chū-chi̍p i ê pêng-iú chhù-piⁿ, kā in kóng, Tio̍h kap góa hoaⁿ-hí, in-ūi só͘ sit-lo̍h ê iûⁿ góa í-keng chhē-tio̍h.

7我kā lín講，Pháiⁿ人中有一人反悔，就tī天裡也beh án-ni為tio̍h伊歡喜，比為tio̍h九十九ê義人m̄免反悔ê，koh khah歡喜。Góa kā lín kóng, Pháiⁿ lâng tiong ū chi̍t lâng hoán-hóe, chiū tī thiⁿ-ni̍h iā beh án-ni ūi-tio̍h i hoaⁿ-hí, pí ūi-tio̍h káu-cha̍p-káu ê gī lâng m̄ bián hoán-hóe ê, koh khah hoaⁿ-hí.

8Á是甚麼婦人人有十個銀á，若失落一個，kiám無點燈、掃厝，勤勤chhē到tio̍h mah？Á-sī sím-mi̍h hū-jîn-lâng ū cha̍p ê gûn-á, nā sit-lo̍h chi̍t ê, kiám bô tiám teng, sàu chhù, khûn-khûn chhē kàu tio̍h mah?

9已經chhē-tio̍h，就聚集伊ê朋友厝邊講，Tio̍h kap我歡喜，因為所失落ê銀á我已經chhē-tio̍h。Í-keng chhē-tio̍h, chiū chū-chi̍p i ê pêng-iú chhù-piⁿ kóng, Tio̍h kap góa hoaⁿ-hí, in-ūi só͘ sit-lo̍h ê gûn-á góa í-keng chhē-tio̍h.

10我kā lín講，Pháiⁿ人中有一人反悔，就tī上帝天使ê面前為tio̍h伊歡喜也是án-ni。Góa kā lín kóng, Pháiⁿ lâng tiong ū chi̍t lâng hoán-hóe, chiū tī Siōng-tè thiⁿ-sài ê bīn-chêng ūi-tio̍h i hoaⁿ-hí iā sī án-ni.

11Koh講，某人有兩個kiáⁿ；Koh kóng, Bó͘ lâng ū nn̄g ê kiáⁿ;

12hit-ê第二ê Kā老父講，阿爸ah，將我應得ê業，分hō͘我。伊ê老父就kā in分家伙。hit-ê tē jī ê kā lāu-pē kóng, A-pà ah, chiong góa èng tit ê gia̍p, pun hō͘ góa. I ê lāu-pē chiū kā in pun ke-hé.

13Koh無幾日，hit-ê第二kiáⁿ一盡收拾伊ê物，出外去遠遠ê所在；tī hia放蕩毀壞伊ê業。Koh bô kúi ji̍t, hit ê tē jī kiáⁿ it-chīn siu-si̍p i ê mi̍h, chhut-gōa khì hn̄g-hn̄g ê só͘-chāi; tī hia hòng-tōng húi-hoāi i ê gia̍p.

14已經sńg了了，tú-tio̍h hit所在大飢荒，伊chiah知欠缺ê艱苦。Í-keng sńg liáu-liáu, tú-tio̍h hit só͘-chāi tōa ki-hng, i chiah chai khiàm-kheh ê kan-khó͘.

15就去óa Hit所在一個百姓；hit人差伊去山裡飼豬；Chiū khì óa hit só͘-chāi chi̍t ê peh-sìⁿ; hit lâng chhe i khì soaⁿ-ni̍h chhī ti;

16ài將豬所食ê豆koeh來止饑，也無人hō͘伊。ài chiong ti só͘ chia̍h ê tāu-koeh lâi chí-ki, iā bô lâng hō͘ i.

17伊醒悟就講，我ê老父有jōa chōe長工，米糧食有chhun；但是我tī chia teh-beh餓死ah。I chhíⁿ-gō͘ chiū kóng, Góa ê lāu-pē ū jōa chōe tn̂g-kang, bí-niû chia̍h ū chhun; nā-sī góa tī chia teh-beh gō-sí ah.

18我beh起來去chhē我ê老父，kā伊講，阿爸ah，我有得罪天kap tī你ê面前；Góa beh khí-lâi khì chhē góa ê lāu-pē, kā i kóng, A-pà ah, góa ū tek-chōe thiⁿ kap tī lí ê bīn-chêng;

19taⁿ了後我bōe堪得叫做你ê Kiáⁿ，tio̍h hō͘我親像你ê長工ê一個。taⁿ liáu-āu góa bōe kham-tit kiò chòe lí ê kiáⁿ, tio̍h hō͘ góa chhin-chhiūⁿ lí ê tn̂g-kang ê chi̍t ê.

20就起來去chhē伊ê老父。相離iáu-kú遠，伊ê老父看見伊，就憐憫伊，走去抱伊ê頷頸，直直kā伊chim。Chiū khí-lâi khì chhē i ê lāu-pē. Saⁿ-lī iáu-kú hn̄g, i ê lāu-pē khòaⁿ-kìⁿ i, chiū lîn-bín i, cháu-khì phō i ê ām-kún, ti̍t-ti̍t kā i chim.

21Kiáⁿ就kā伊講，阿爸ah，我有得罪天kap tī你ê面前；taⁿ了後bōe堪得叫做你ê Kiáⁿ。Kiáⁿ chiū kā i kóng, A-pà ah, góa ū tek-chōe thiⁿ kap tī lí ê bīn-chêng; taⁿ liáu-āu bōe kham-tit kiò chòe lí ê kiáⁿ.

22但是老父對伊hiah-ê奴僕講，緊緊hiaⁿh siōng好ê衫來kā伊穿，koh kā伊掛手指，續kā伊穿鞋；Nā-sī lāu-pē tùi i hiah ê lô͘-po̍k kóng, Kín-kín hiaⁿh siōng-hó ê saⁿ lâi kā i chhēng, koh kā i kòa chhiú-chí, sòa kā i chhēng ôe;

23也牽hit隻肥ê牛á來thâi，咱食來歡喜。iā khan hit chiah pûi ê gû-á lâi thâi, lán chia̍h lâi hoaⁿ-hí.

24因為我chit-ê Kiáⁿ死有koh活，失落有koh得tio̍h。In就saⁿ-kap歡喜。In-ūi góa chit ê kiáⁿ sí ū koh-oa̍h, sit-lo̍h ū koh tit-tio̍h. In chiū saⁿ-kap hoaⁿ-hí.

25Hit時伊ê大kiáⁿ tī園裡；tò來beh到厝，聽見作樂kap跳舞ê聲。Hit sî i ê tōa-kiáⁿ tī hn̂g-ni̍h; tò-lâi beh kàu chhù, thiaⁿ-kìⁿ chok-ga̍k kap thiàu-bú ê siaⁿ.

26就叫一個奴僕來問伊teh啥事。Chiū kiò chi̍t ê lô͘-po̍k lâi mn̄g i teh siáⁿ tāi.

27伊kā伊講，Lín小弟來lah；lín老父因為得tio̍h伊好好tò來，所以thâi hit隻肥ê牛á。I kā i kóng, Lín sió-tī lâi lah; lín lāu-pē in-ūi tit-tio̍h i hó-hó tò-lâi, só͘-í thâi hit chiah pûi ê gû-á.

28大kiáⁿ受氣，m̄入去；伊ê老父出來勸伊。Tōa-kiáⁿ siū-khì, m̄ ji̍p-khì; i ê lāu-pē chhut-lâi khǹg i.

29伊應伊ê老父講，你看，我服事你hiah chōe年，lóng bē bat違逆你ê命令；你也bē bat hō͘我一隻羊á-kiáⁿ，thang kap我ê朋友saⁿ-kap歡喜。I ìn i ê lāu-pē kóng, Lí khòaⁿ, góa ho̍k-sāi lí hiah chōe nî, lóng bē bat ûi-ke̍h lí ê bēng-lēng; lí iā bē bat hō͘ góa chi̍t chiah iûⁿ-á-kiáⁿ, thang kap góa ê pêng-iú saⁿ-kap hoaⁿ-hí.

30總是你chit-ê kiáⁿ，交陪娼妓，一盡破費你ê業，一下tò來，你就為tio̍h伊thâi肥ê牛á。Chóng-sī lí chit ê kiáⁿ, kau-pôe chhiong-ki, it-chīn phòa-hùi lí ê gia̍p, chi̍t-ē tò-lâi, lí chiū ūi-tio̍h i thâi pûi ê gû-á.

31老父就kā伊講，Kiáⁿ ah，你常常kap我tī-teh，凡我所有ê lóng是你ê；但是你chit-ê小弟死有koh活，失落有koh得tio̍h，咱應該tio̍h歡喜快樂。Lāu-pē chiū kā i kóng, Kiáⁿ ah, lí siông-siông kap góa tī-teh, hoān góa só͘ ū ê lóng sī lí ê; nā-sī lí chit ê sió-tī sí ū koh-oa̍h, sit-lo̍h ū koh tit-tio̍h, lán eng-kai tio̍h hoaⁿ-hí khoài-lo̍k.