1耶穌設一個譬喻，教示in tio̍h常常祈禱，m̄-thang厭，講，Iâ-so͘ siat chi̍t ê phì-jū, kà-sī in tio̍h siông-siông kî-tó, m̄-thang ià, kóng,

2某城有一個審判官，無驚上帝也無對重人。Bó͘ siâⁿ ū chi̍t ê sím-phòaⁿ koaⁿ, bô kiaⁿ Siōng-tè iā bô tùi-tiōng lâng.

3Tī hit-ê城內有一個守寡人ta̍uh-ta̍uh去見伊講，有人kap我做對敵，求你替我伸冤。Tī hit ê siâⁿ-lāi ū chi̍t ê chiú-kóaⁿ lâng ta̍uh-ta̍uh khì kìⁿ i kóng, Ū lâng kap góa chòe tùi-te̍k, kiû lí thòe góa sin-oan.

4伊久久無beh；後來想講，我雖然無驚上帝，無對重人；I kú-kú bô beh; āu-lâi siūⁿ kóng, Góa sui-jiân bô kiaⁿ Siōng-tè, bô tùi-tiōng lâng;

5但是因為chit-ê守寡人ta̍uh-ta̍uh來攪擾，我beh替伊伸冤，免得伊永永來苦楚我。nā-sī in-ūi chit ê chiú-kóaⁿ lâng ta̍uh-ta̍uh lâi kiáu-jiáu, góa beh thòe i sin-oan, bián-tit i éng-éng lâi khó͘-chhó͘ góa.

6主koh講，Lín tio̍h聽chit-ê不義ê官所講ê。Chú koh kóng, Lín tio̍h thiaⁿ chit ê put-gī ê koaⁿ só͘ kóng ê.

7何況上帝揀ê百姓暝日喉叫伊，伊也為tio̍h in寬容，kiám無beh替in伸冤mah？Hô-hòng Siōng-tè kéng ê peh-sìⁿ mî-ji̍t âu-kiò I, I iā ūi-tio̍h in khoan-iông, kiám bô beh thòe in sin-oan mah?

8我kā lín講，伊beh緊緊替in伸冤。雖然án-ni，人子到ê時，kiám beh tú-tio̍h世間有信mah？Góa kā lín kóng, I beh kín-kín thòe in sin-oan. Sui-jiân án-ni, Jîn-chú kàu ê sî, kiám beh tú-tio̍h sè-kan ū sìn mah?

9有óa靠家己做義來看輕別人ê，耶穌設一個譬喻kā in講，Ū óa-khò ka-kī chòe gī lâi khòaⁿ-khin pa̍t lâng ê, Iâ-so͘ siat chi̍t ê phì-jū kā in kóng,

10有兩人上殿beh祈禱，一個是法利賽人，一個是抽餉ê。Ū nn̄g lâng chiūⁿ tiān beh kî-tó, chi̍t-ê sī Hoat-lī-sài lâng, chi̍t-ê sī thiu-hiòng ê.

11法利賽人khiā-teh，家己祈禱講，上帝ah，我感謝你，因為我無親像別人，勒索、不義、姦淫，也無親像chit-ê抽餉ê。Hoat-lī-sài lâng khiā-teh, ka-kī kî-tó kóng, Siōng-tè ah, góa kám-siā lí, in-ūi góa bô chhin-chhiūⁿ pa̍t lâng, le̍k-sek, put-gī, kan-îm, iā bô chhin-chhiūⁿ chit ê thiu-hiòng ê.

12我一禮拜禁食兩pái；koh將凡所得tio̍h ê，十份抽一份。Góa chi̍t lé-pài kìm-chia̍h nn̄g pái; koh chiong hoān só͘ tit-tio̍h ê, cha̍p hūn thiu chi̍t hūn.

13但是hit-ê抽餉ê遠遠khiā-teh，連kia̍h目ǹg天也m̄敢；kan-ta搥胸講，上帝ah，憐憫我chit-ê有罪ê人。Nā-sī hit ê thiu-hiòng ê hn̄g-hn̄g khiā-teh, liân kia̍h ba̍k ǹg thiⁿ iā m̄ káⁿ; kan-ta tûi heng kóng, Siōng-tè ah, lîn-bín góa chit-ê ū chōe ê lâng.

14我kā lín講，Chit-ê人tò去伊ê厝得tio̍h稱做義贏過hit-ê人。因為見若自高ê beh hō͘伊卑微；家己卑微ê beh高升伊Góa kā lín kóng, Chit ê lâng tò-khì i ê chhù tit-tio̍h chheng-chòe-gī iâⁿ-kè hit ê lâng. In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i.

15有人帶嬰á就近耶穌，beh hō͘伊摸in；學生看見就責備in。Ū lâng tòa eⁿ-á chiū-kūn Iâ-so͘, beh hō͘ I bong in; Ha̍k-seng khòaⁿ-kìⁿ chiū chek-pī in.

16但是耶穌叫hiah-ê嬰á來講，容允細kiáⁿ就近我，莫得禁伊；因為上帝ê國是chit號人ê。Nā-sī Iâ-so͘ kiò hiah ê eⁿ-á lâi kóng, Iông-ún sòe-kiáⁿ chiū-kūn góa, bo̍h-tit kìm i; in-ūi Siōng-tè ê kok sī chit hō lâng ê.

17我實在kā lín講，凡若承接上帝ê國無親像細kiáⁿ ê，決斷bōe得thang入去。Góa si̍t-chāi kā lín kóng, Hoān-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-toàn bōe tit thang ji̍p-khì.

18有一個做官ê問伊講，好ê先生ah，我tio̍h怎樣做，chiah thang承接永活？Ū chi̍t ê chòe-koaⁿ ê mn̄g I kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-oa̍h?

19耶穌kā伊講，你啥事稱呼我是好ah？無一個好，獨獨上帝nā-tiāⁿ。Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chi̍t-ê hó, to̍k-to̍k Siōng-tè nā-tiāⁿ.

20Chiah-ê誡你已經知，莫得姦淫，莫得thâi死人，莫得偷the̍h，莫得lām-sám做干證，Tio̍h敬你ê父母。Chiah ê kài lí í-keng chai, Bo̍h-tit kan-îm, Bo̍h-tit thâi-sí lâng, Bo̍h-tit thau-the̍h, Bo̍h-tit lām-sám chòe kan-chèng, Tio̍h kèng lí ê pē-bú.

21伊就講，Chiah-ê我tùi細漢lóng守伊lah。I chiū kóng, Chiah-ê góa tùi sòe-hàn lóng siú i lah.

22耶穌聽見就kā伊講，你iáu欠一項，tio̍h賣你一切所有ê來hō͘ sòng-hiong人，就beh有財寶tī天裡；koh來tè我。Iâ-so͘ thiaⁿ-kìⁿ chiū kā i kóng, Lí iáu khiàm chi̍t hāng, tio̍h bōe lí it-chhè só͘ ū ê lâi hō͘ sòng-hiong lâng, chiū beh ū châi-pó tī thiⁿ-ni̍h; koh lâi tè góa.

23Hit人聽見chiah-ê話真憂悶，因為伊真好額。Hit lâng thiaⁿ-kìⁿ chiah ê ōe chin iu-būn, in-ūi i chin hó-gia̍h.

24耶穌看見伊就講，富人入上帝ê國oh--ah。Iâ-so͘ khòaⁿ-kìⁿ i chiū kóng, Pù lâng ji̍p Siōng-tè ê kok oh--ah.

25因為駱駝穿過針鼻，比富人入上帝ê國，iáu khah快。In-ūi lo̍k-tô chhng-kè chiam-phīⁿ, pí pù lâng ji̍p Siōng-tè ê kok, iáu khah khoài.

26聽見ê人講，Án-ni，是誰能得tio̍h救ah？Thiaⁿ-kìⁿ ê lâng kóng, Án-ni, chī-chūi ōe tit-tio̍h kiù ah?

27耶穌講，在人所bōe能ê，在上帝是能。Iâ-so͘ kóng, Chāi lâng só͘ bōe-ōe ê, chāi Siōng-tè sī ōe.

28彼得講，阮已經放sak家己所有ê來tè你。Pí-tek kóng, Goán í-keng pàng-sak ka-kī só͘ ū ê lâi tè lí.

29耶穌kā in講，我實在kā lín講，無有人為tio̍h上帝ê國來放sak厝宅，á是bó͘，á是兄弟，á是父母，á是kiáⁿ兒，Iâ-so͘ kā in kóng, Góa si̍t-chāi kā lín kóng, Bô ū lâng ūi-tio̍h Siōng-tè ê kok lâi pàng-sak chhù-the̍h, á-sī bó͘, á-sī hiaⁿ-tī, á-sī pē-bú, á-sī kiáⁿ-jî,

30也無tī chit世得tio̍h幾nā倍khah chōe，來世得tio̍h永活。iā bô tī chit-sì tit-tio̍h kúi-nā pē khah chōe, lâi-sè tit-tio̍h éng-oa̍h.

31耶穌帶十二個學生，對in講，你看，咱chiah-ê上耶路撒冷，見若tùi先知所記ê lóng beh應驗tī人子。Iâ-so͘ tòa cha̍p-jī ê ha̍k-seng, tùi in kóng, Lí khòaⁿ, lán chiah-ê chiūⁿ Iâ-lō͘-sat-léng, kìⁿ-nā tùi sian-ti só͘ kì ê lóng beh èng-giām tī Jîn-chú.

32因為伊beh受解送hō͘異邦人，koh受戲弄、凌辱、phùi-nōa；In-ūi I beh siū ké-sàng hō͘ īⁿ-pang lâng, koh siū hì-lāng lêng-jio̍k phùi-nōa;

33in beh鞭phah來害死伊；第三日伊beh koh活。in beh piⁿ-phah lâi hāi-sí I; tē saⁿ ji̍t I beh koh-oa̍h.

34Hiah-ê tāi-chì學生無一項會曉得；koh chit-ê話tùi tī in是隱密，in也m̄知伊所講ê。Hiah ê tāi-chì ha̍k-seng bô chi̍t hāng ōe hiáu-tit; koh chit ê ōe tùi tī in sī ún-ba̍t, in iā m̄ chai I só͘ kóng ê.

35近耶利哥ê時，有一個chhiⁿ-mî ê坐tī路邊teh乞食；Kūn Iâ-lī-ko ê sî, ū chi̍t ê chhiⁿ-mî ê chē tī lō͘-piⁿ teh khit-chia̍h;

36聽見chōe-chōe人經過，就問是甚麼tāi-chì。thiaⁿ-kìⁿ chōe-chōe lâng keng-kè, chiū mn̄g sī sím-mi̍h tāi-chì.

37人kā伊講，拿撒勒耶穌tùi chia過。Lâng kā i kóng, Ná-sat-le̍k Iâ-so͘ tùi chia kè.

38伊就喉叫講，大衛ê後裔，耶穌，可憐我。I chiū âu-kiò kóng, Tāi-pi̍t ê hō͘-è, Iâ-so͘, khó-lîn góa.

39頭前行ê人責備伊，kah伊tio̍h靜靜；但是伊益發大聲喉叫講，大衛ê後裔ah，可憐我。Thâu-chêng kiâⁿ ê lâng chek-pī i, kah i tio̍h chēng-chēng; nā-sī i it-hoat tōa siaⁿ âu-kiò kóng, Tāi-pi̍t ê hō͘-è ah, khó-lîn góa.

40耶穌停腳，kah人牽伊來；已經近óa，就問伊講，Iâ-so͘ thêng-kha, kah lâng khan i lâi; í-keng kūn-óa, chiū mn̄g i kóng,

41Ài我kā你做甚麼？伊就講，主ah，我ài得tio̍h看見。Ài góa kā lí chòe sím-mi̍h? I chiū kóng, Chú ah, góa ài tit-tio̍h khòaⁿ-kìⁿ.

42耶穌kā伊講，你thang得tio̍h看見，你ê信有救你lah。Iâ-so͘ kā i kóng, Lí thang tit-tio̍h khòaⁿ-kìⁿ, lí ê sìn ū kiù lí lah.

43伊liâm-piⁿ得tio̍h看見，就tè耶穌歸榮光上帝；眾人看見也lóng歸榮光上帝。I liâm-piⁿ tit-tio̍h khòaⁿ-kìⁿ, chiū tè Iâ-so͘ kui êng-kng Siōng-tè; chèng lâng khòaⁿ-kìⁿ iā lóng kui êng-kng Siōng-tè.

1耶穌入耶利哥，teh過去ê時，Iâ-so͘ ji̍p Iâ-lī-ko, teh kè-khì ê sî,

2有一人名叫撒該，是做抽餉ê頭人，也是好額。ū chi̍t lâng miâ kiò Sat-kai, sī chòe thiu-hiòng ê thâu-lâng, iā sī hó-gia̍h.

3伊ài beh看耶穌是甚麼人，但是人chōe，看bōe tio̍h，因為伊身軀矮細。I ài beh khòaⁿ Iâ-so͘ sī sím-mi̍h lâng, nā-sī lâng chōe, khòaⁿ bōe tio̍h, in-ūi i seng-khu óe-sòe.

4就走做前，peh上桑châi樹，beh看伊；因為耶穌beh tùi hia過。Chiū cháu chòe chêng, peh-chiūⁿ sng-châi chhiū, beh khòaⁿ I; in-ūi Iâ-so͘ beh tùi hia kè.

5耶穌到hit位，kia̍h頭看伊講，撒該緊緊落來，因為今á日我的確tio̍h tiàm你ê家。Iâ-so͘ kàu hit ūi, kia̍h thâu khòaⁿ i kóng, Sat-kai kín-kín lo̍h-lâi, in-ūi kin-á-ji̍t góa tek-khak tio̍h tiàm lí ê ke.

6就緊緊落來，歡喜接納伊Chiū kín-kín lo̍h-lâi, hoaⁿ-hí chiap-la̍p I.

7眾人看見，nga̍uh-nga̍uh念講，伊入去歇tī pháiⁿ人ê厝。Chèng lâng khòaⁿ-kìⁿ, nga̍uh-nga̍uh-liām kóng, I ji̍p khì hioh tī pháiⁿ lâng ê chhù.

8撒該khiā-teh，對主講，主ah，我將所有ê一半hō͘ sòng-hiong人；若是bat歪甚麼人，就將四倍賠伊Sat-kai khiā-teh, tùi Chú kóng, Chú ah, góa chiong só͘ ū ê chi̍t pòaⁿ hō͘ sòng-hiong lâng; nā sī bat oaiⁿ sím-mi̍h lâng, chiū chiong sì-pē pê i.

9耶穌對伊講，今á日拯救到tī chit-ê家；為tio̍h伊也是亞伯拉罕ê Kiaⁿ孫。Iâ-so͘ tùi i kóng, Kin-á-ji̍t chín-kiù kàu tī chit ê ke; ūi-tio̍h i iā sī A-pek-la̍h-hán ê kiáⁿ-sun.

10因為人子到，是beh chhē失落ê，來救伊。In-ūi Jîn-chú kàu, sī beh chhē sit-lo̍h ê, lâi kiù i.

11In聽見chiah-ê話ê時，耶穌koh設一個譬喻，是因為伊已經近耶路撒冷，in也phah算上帝ê國beh liâm-piⁿ顯明。In thiaⁿ-kìⁿ chiah ê ōe ê sî, Iâ-so͘ koh siat chi̍t ê phì-jū, sī in-ūi I í-keng kūn Iâ-lō͘-sat-léng, in iā phah-sǹg Siōng-tè ê kok beh liâm-piⁿ hián-bêng.

12伊就講，有一個尊貴ê人去遠遠ê所在beh受封來得tio̍h國，chiah 倒tńg來。I chiū kóng, Ū chi̍t ê chun-kùi ê lâng khì hn̄g-hn̄g ê só͘-chāi beh siū hong lâi tit-tio̍h kok, chiah tò-tńg lâi.

13就叫伊十個奴僕，用銀十斤hō͘ in，對in講，去做seng-lí到我tò來。Chiū kiò i cha̍p ê lô͘-po̍k, ēng gûn cha̍p kun hō͘ in, tùi in kóng, Khì chòe seng-lí kàu góa tò-lâi.

14總是伊本國ê百姓怨恨伊，差使者tè後去講，阮m̄ ài chit人做阮ê王。Chóng-sī i pún-kok ê peh-sìⁿ oàn-hūn i, chhe sù-chiá tè-āu khì kóng, Goán m̄ ài chit lâng chòe goán ê ông.

15伊得tio̍h國倒tńg來，就吩咐叫hiah-ê對伊領銀ê奴僕來，ài beh知in做seng-lí所thàn ê。I tit-tio̍h kok tò-tńg lâi, chiū hoan-hù kiò hiah ê tùi i niá gûn ê lô͘-po̍k lâi, ài beh chai in chòe seng-lí só͘ thàn ê.

16頭一個來伊ê面前講，主ah，你一斤ê銀已經thàn十斤lah。Thâu-chi̍t-ê lâi i ê bīn-chêng kóng, Chú ah, lí chi̍t kun ê gûn í-keng thàn cha̍p kun lah.

17伊kā伊講，好ah，好ê奴僕，因為你tī至sió-khóa ê事已經盡忠，taⁿ hō͘你管十個城。I kā i kóng, Hó ah, hó ê lô͘-po̍k, in-ūi lí tī chì sió-khóa ê sū í-keng chīn-tiong, taⁿ hō͘ lí koán cha̍p ê siâⁿ.

18Hit-ê第二個來講，主ah，你一斤ê銀已經得tio̍h五斤lah。Hit ê tē jī ê lâi kóng, Chú ah, lí chi̍t kun ê gûn í-keng tit-tio̍h gō͘ kun lah.

19伊也kā伊講，hō͘你也管五個城。I iā kā i kóng, Hō͘ lí iā koán gō͘ ê siâⁿ.

20Koh一個來講，主ah，你看，你一斤ê銀tī chia，我用手巾包khǹg-teh；Koh chi̍t ê lâi kóng, Chú ah, lí khòaⁿ, lí chi̍t kun ê gûn tī chia, góa ēng chhiú-kun pau khǹg-teh;

21因為我驚你，你是嚴核ê人，the̍h所無hē ê，割所無掖ê。in-ūi góa kiaⁿ lí, lí sī giâm-ha̍t ê lâng, the̍h só͘ bô hē ê, koah só͘ bô iā ê.

22伊kā伊講，Pháiⁿ ê奴僕ah，就你所講ê我beh擬斷你。你既然知我是嚴核ê人，the̍h所無hē ê，割所無掖ê；I kā i kóng, Pháiⁿ ê lô͘-po̍k ah, chiū lí só͘ kóng ê góa beh gí-toàn lí. Lí kì-jiân chai góa sī giâm-ha̍t ê lâng, the̍h só͘ bô hē ê, koah só͘ bô iā ê;

23啥事m̄將我ê銀去lokti7錢店，到我來ê時，thang連hit-ê利息續the̍h？siáⁿ-sū m̄ chiong góa ê gûn khì lok tī chîⁿ-tiàm, kàu góa lâi ê sî, thang liân hit ê lī-sek sòa the̍h?

24就kā邊á khiā ê人講，將伊一斤ê銀kā伊the̍h來，hō͘ hit-ê有十斤ê。Chiū kā piⁿ-á khiā ê lâng kóng, Chiong i chi̍t kun ê gûn kā i the̍h-lâi, hō͘ hit ê ū cha̍p kun ê.

25Inka7伊講，主ah，伊有十斤lah。In kā i kóng, Chú ah, i ū cha̍p kun lah.

26我kā lín講，見若有ê beh hō͘伊；無ê，連伊所有ê也beh kā伊the̍h去。Góa kā lín kóng, Kìⁿ-nā ū-ê beh hō͘ i; bô-ê, liân i só͘ ū ê iā beh kā i the̍h-khì.

27但是我hiah-ê對敵，m̄ ài我做in ê王ê，tio̍h拖in來，tī我ê面前thâi死in。Nā-sī góa hiah ê tùi-te̍k, m̄ ài góa chòe in ê ông ê, tio̍h thoa in lâi, tī góa ê bīn-chêng thâi-sí in.

28耶穌講soah，進前行，上耶路撒冷。Iâ-so͘ kóng soah, chìn-chêng kiâⁿ, chiūⁿ Iâ-lō͘-sat-léng.

29行近Pek-hoat-kî kap 伯大尼，tī hit-ê名叫橄欖ê山，就差兩個學生，講，Kiâⁿ kūn Pek-hoat-kî kap Pek-tāi-nî, tī hit-ê miâ kiò Kaⁿ-ná ê soaⁿ, chiū chhe nn̄g ê ha̍k-seng, kóng,

30lín去對面ê鄉社，入去ê時beh tú-tio̍h一隻驢á縛tī hia，iáu-bē bat有人騎ê，tháu開kā伊牽來。Lín khì tùi-bīn ê hiuⁿ-siā, ji̍p-khì ê sî beh tú-tio̍h chi̍t chiah lû-á pa̍k tī hia, iáu-bē bat ū lâng khiâ ê, tháu-khui kā i khan lâi.

31若有人問lín，Tháu驢beh啥事？lín tio̍h講，主欠用伊。Nā ū lâng mn̄g lín, Tháu lû beh siáⁿ-sū? lín tio̍h kóng, Chú khiàm-ēng i.

32所差ê人去，果然tú-tio̍h照伊所kā in講ê。Só͘ chhe ê lâng khì, kó-jiân tú-tio̍h chiàu I só͘ kā in kóng ê.

33Tháu驢á ê時，主人對in講，Tháu驢á beh啥事？Tháu lû-á ê sî, chú-lâng tùi in kóng, Tháu lû-á beh siáⁿ-sū?

34In講，主欠用伊。In kóng, Chú khiàm-ēng i.

35就牽伊就近耶穌；將in ê衫phoa̍h tī驢á頂，扶耶穌騎伊。Chiū khan i chiū-kūn Iâ-so͘; chiong in ê saⁿ phoa̍h tī lû-á téng, hû Iâ-so͘ khiâ i.

36伊行ê時，人用in ê衫鋪tī路裡。I kiâⁿ ê sî, lâng ēng in ê saⁿ pho͘ tī lō͘-ni̍h.

37已經近，beh落橄欖山，kui陣ê學生就歡喜，大聲o-ló上帝，為tio̍h所看見lóng總ê權能；Í-keng kūn, beh lo̍h Kaⁿ-ná soaⁿ, kui tīn ê ha̍k-seng chiū hoaⁿ-hí, tōa siaⁿ o-ló Siōng-tè, ūi-tio̍h só͘ khòaⁿ-kìⁿ lóng-chóng ê koân-lêng;

38講，Tī主ê名來ê王，應該得tio̍h o-ló，tī天裡和平，tī至koânê位榮光。kóng, Tī Chú ê miâ lâi ê ông, eng-kai tit-tio̍h o-ló, tī thiⁿ-ni̍h hô-pêng, tī chì-koâiⁿ ê ūi êng-kng.

39眾人中有幾nā ê法利賽人對伊講，先生ah，tio̍h責備你ê學生。Chèng lâng tiong ū kúi-nā ê Hoat-lī-sài lâng tùi I kóng, Sian-siⁿ ah, tio̍h chek-pī lí ê ha̍k-seng.

40伊應講，我kā lín講，in若靜靜，hiah-ê石頭beh喉叫。I ìn kóng, Góa kā lín kóng, in nā chēng-chēng, hiah ê chio̍h-thâu beh âu-kiò.

41已經近，看見城就為tio̍h伊啼哭，講，Í-keng kūn, khòaⁿ-kìⁿ siâⁿ chiū ūi-tio̍h i thî-khàu, kóng,

42設使你tī chit日若知關係平安ê事！總是taⁿ對你ê目睭隱密。Siat-sú lí tī chit ji̍t nā chai koan-hē pêng-an ê sū! chóng-sī taⁿ tùi lí ê ba̍k-chiu ún-ba̍t.

43因為時日beh到，你ê對敵beh周圍起土城來圍你，四面困苦你；In-ūi sî-ji̍t beh kàu, lí ê tùi-te̍k beh chiu-ûi khí thô͘-siâⁿ lâi ûi lí, sì-bīn khùn-khó͘ lí;

44koh beh hō͘你kap你內中ê kiáⁿ兒lóng倒地；無留兩塊石相疊；因為你m̄知眷顧你ê日。koh beh hō͘ lí kap lí lāi-tiong ê kiáⁿ-jî lóng tó tōe; bô lâu nn̄g tè chio̍h saⁿ-tha̍h; in-ūi lí m̄ chai koàn-kò͘ lí ê ji̍t.

45已經入殿堂，就趕出hiah-ê賣物ê；Í-keng ji̍p tiān-tn̂g, chiū kóaⁿ-chhut hiah ê bōe mi̍h ê;

46kā in講，有記載講，我ê厝beh做祈禱ê厝，但是lín hō͘伊做賊巢。kā in kóng, Ū kì-chài kóng, Góa ê chhù beh chòe kî-tó ê chhù, nā-sī lín hō͘ i chòe chha̍t-siū.

47耶穌日日tī殿裡教示人。Chiah-ê祭司頭、經學士以及百姓ê序大計謀beh滅伊；Iâ-so͘ ji̍t-ji̍t tī tiān-ni̍h kà-sī lâng. Chiah ê chè-si-thâu keng-ha̍k-sū í-ki̍p peh-sìⁿ ê sī-tōa kè-bô͘ beh bia̍t I;

48總是chhē無步，因為百姓lóng致意聽伊。chóng-sī chhē bô pō͘, in-ūi peh-sìⁿ lóng tì-ì thiaⁿ I.

1有一日耶穌tī殿裡教示百姓，傳福音ê時，hiah-ê祭司頭經學士kap長老逼óa來對伊講，Ū chi̍t ji̍t Iâ-so͘ tī tiān-ni̍h kà-sī peh-sìⁿ, thoân hok-im ê sî, hiah ê chè-si-thâu keng-ha̍k-sū kap tiúⁿ-ló pek-óa lâi tùi I kóng,

2Tio̍h kā阮講，你用甚麼權行chiah-ê事？koh用chit-ê權hō͘你ê是是誰？Tio̍h kā goán kóng, Lí ēng sím-mi̍h koân kiâⁿ chiah ê sū? koh ēng chit ê koân hō͘ lí ê sī chī-chūi?

3伊應講，我也問lín一句話，lín kā我講，I ìn kóng, Góa iā mn̄g lín chi̍t kù ōe, lín kā góa kóng,

4約翰ê洗禮是tùi天á是tùi人ah？Iok-hān ê sóe-lé sī tùi thiⁿ á-sī tùi lâng ah?

5In saⁿ-kap議論講，若講，Tùi thiⁿ；伊beh講，Án-ni，lín啥事m̄信伊？In saⁿ-kap gī-lūn kóng, Nā kóng, Tùi thiⁿ; I beh kóng, Án-ni, lín siáⁿ-sū m̄ sìn i?

6若講，Tùi人，百姓lóng beh用石頭tìm咱；因為百姓lóng深信約翰做先知。Nā kóng, Tùi lâng, peh-sìⁿ lóng beh ēng chio̍h-thâu tìm lán; in-ūi peh-sìⁿ lóng chhim-sìn Iok-hān chòe sian-ti.

7In就應講，m̄知伊是tùi tá-lo̍h。In chiū ìn kóng, M̄ chai i sī tùi tá-lo̍h.

8耶穌就kā in講，我也無beh kā lín講我是用甚麼權行chiah-ê tāi-chì。Iâ-so͘ chiū kā in kóng, Góa iā bô beh kā lín kóng góa sī ēng sím-mi̍h koân kiâⁿ chiah ê tāi-chì.

9耶穌就設chit-ê譬喻對百姓講，有一人知葡萄園，租hō͘佃戶，就去別位久久。Iâ-so͘ chiū siat chit ê phì-jū tùi peh-sìⁿ kóng, Ū chi̍t lâng chai phû-tô hn̂g, cho͘ hō͘ tiān-hō͘, chiū khì pa̍t ūi kú-kú.

10到期差一個奴僕就近佃戶，kah in將園內ê果子納伊；總是佃戶phah伊，hō͘伊空空去。Kàu kî chhe chi̍t ê lô͘-po̍k chiū-kūn tiān-hō͘, kah in chiong hn̂g-lāi ê ké-chí la̍p i; chóng-sī tiān-hō͘ phah i, hō͘ i khang-khang khì.

11Koh差別個奴僕；in也phah伊，也凌辱伊，hō͘伊空空去。Koh chhe pa̍t ê lô͘-po̍k; in iā phah i, iā lêng-jio̍k i, hō͘ i khang-khang khì.

12Koh差第三個；in也傷伊，koh chhia伊出去。Koh chhe tē saⁿ ê; in iā siong i, koh chhia i chhut-khì.

13園主就講，我beh怎樣做ah？我beh差我所疼ê Kiáⁿ，in敢會敬伊。Hn̂g-chú chiū kóng, Góa beh cháiⁿ-iūⁿ chòe ah? Góa beh chhe góa só͘ thiàⁿ ê kiáⁿ, in káⁿ ōe kèng i.

14但是佃戶看見伊，就saⁿ-kap議論講，chit-ê是伊承接業ê Kiáⁿ，咱來害死伊，hō͘ hit-ê業歸tī咱。Nā-sī tiān-hō͘ khòaⁿ-kìⁿ i, chiū saⁿ-kap gī-lūn kóng, Chit-ê sī i sêng-chiap gia̍p ê kiáⁿ, lán lâi hāi-sí i, hō͘ hit ê gia̍p kui tī lán.

15就chhia伊出園外，來害死伊園主beh怎樣來辦in ah？Chiū chhia i chhut hn̂g gōa, lâi hāi-sí i. Hn̂g-chú beh cháiⁿ-iūⁿ lâi pān in ah?

16伊beh來滅hiah-ê佃戶，將伊ê園交代別人。In聽見就講，莫得有án-ni。I beh lâi bia̍t hiah ê tiān-hō͘, chiong i ê hn̂g kau-tāi pa̍t lâng. In thiaⁿ-kìⁿ chiū kóng, Bo̍h-tit ū án-ni.

17耶穌看in就講，所記載講， 師傅所棄sak ê石， 成做厝角頭ê石，Iâ-so͘ khòaⁿ in chiū kóng, Só͘ kì-chài kóng, Sai-hū só͘ khì-sak ê chio̍h, Chiâⁿ-chòe chhù-kak-thâu ê chio̍h,

18chit句怎樣ah？見若跋倒tī chit塊石頂ê teh-beh破kô͘-kô͘；hō͘ chit塊石teh伊ê頂面ê beh幼boa̍h-boa̍h。chit kù cháiⁿ-iūⁿ ah? Kìⁿ-nā poa̍h-tó tī chit tè chio̍h téng ê teh-beh phòa kô͘-kô͘; hō͘ chit tè chio̍h teh i ê téng-bīn ê beh iù boa̍h-boa̍h.

19Hit時hiah-ê經學士kap祭司頭知伊chit-ê譬喻是指in來講，就ài beh下手掠伊，但是驚百姓。Hit sî hiah ê keng-ha̍k-sū kap chè-si-thâu chai I chit ê phì-jū sī chí in lâi kóng, chiū ài beh hē chhiú lia̍h I, nā-sī kiaⁿ peh-sìⁿ.

20就當伊，也差sòe-choh假做義人，beh掠伊ê話縫，thang將伊交付總督ê政治kap權柄。Chiū tng I, iā chhe sòe-choh ké-chòe gī lâng, beh lia̍h i ê ōe-phāng, thang chiong I kau-hù chóng-tok ê chèng-tī kap koân-pèng.

21就問伊講，先生ah，阮知你所講所教示ê是正直，你也無用外貌取人，就是真實用上帝ê路教示人。Chiū mn̄g I kóng, Sian-siⁿ ah, goán chai lí só͘ kóng só͘ kà-sī ê sī chèng-ti̍t, lí iā bô ēng gōa-māu chhú lâng, chiū-sī chin-si̍t ēng Siōng-tè ê lō͘ kà-sī lâng.

22阮納稅hō͘該撒，合宜á無？Goán la̍p-sè hō͘ Kai-sat, ha̍p-gî á bô?

23但是耶穌知in ê奸詐，就對in講，Nā-sī Iâ-so͘ chai in ê kan-chà, chiū tùi in kóng,

24將一個銀á hō͘我看。Chit-ê像kap號是是誰 ah？In講，該撒。Chiong chi̍t ê gûn-á hō͘ góa khòaⁿ. Chit ê siōng kap hō sī chī-chūi ah? In kóng, Kai-sat.

25伊就kā in講，Án-ni，lín tio̍h將該撒ê物納hō͘該撒，將上帝ê物納hō͘上帝。I chiū kā in kóng, Án-ni, lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè.

26In當百姓ê面前bōe會掠伊ê話縫；koh奇怪伊ê應答，就靜靜。In tng peh-sìⁿ ê bīn-chêng bōe-ōe lia̍h I ê ōe-phāng; koh kî-koài I ê ìn-tap, chiū chēng-chēng.

27有撒都該人，就是講人無koh活ê，幾nā ê就近來問耶穌講，Ū Sat-thó͘-kai lâng, chiū-sī kóng lâng bô koh-oa̍h ê, kúi-nā ê chiū-kūn lâi mn̄g Iâ-so͘ kóng,

28先生ah，摩西有記來指示阮講，若有人，伊ê兄死有bó͘也無kiáⁿ，伊ê小弟tio̍h娶伊ê bó͘，生kiáⁿ來續接伊ê兄。Sian-siⁿ ah, Mô͘-se ū kì lâi chí-sī goán kóng, Nā ū lâng, i ê hiaⁿ sí ū bó͘ iā bô kiáⁿ, i ê sió-tī tio̍h chhōa i ê bó͘, siⁿ kiáⁿ lâi sòa-chiap i ê hiaⁿ.

29Án-ni，有兄弟七人，大ê娶bó͘，無kiáⁿ就死；Án-ni, ū hiaⁿ-tī chhit lâng, tōa-ê chhōa bó͘, bô kiáⁿ chiū sí;

30第二個、第三個也娶伊；tē jī ê tē saⁿ ê iā chhōa i;

31七個lóng án-ni，無留kiáⁿ就死去。chhit ê lóng án-ni, bô lâu kiáⁿ chiū sí-khì.

32後來婦人人也死。Āu-lâi hū-jîn-lâng iā sí.

33Án-ni，tī koh活ê時，chit-ê婦人人beh做in中間tá-lo̍h一個ê bó͘？因為chit七人lóng有娶伊做bó͘。Án-ni, tī koh-oa̍h ê sî, chit ê hū-jîn-lâng beh chòe in tiong-kan tá-lo̍h chi̍t-ê ê bó͘? in-ūi chí chhit lâng lóng ū chhōa i chòe bó͘.

34耶穌kā in講，Chit世界ê人有嫁有娶；Iâ-so͘ kā in kóng, Chit sè-kài ê lâng ū kè ū chhōa;

35但是算做能堪得得tio̍h hit-ê世界，也tùi死人中koh活ê，就無嫁無娶；nā-sī sǹg chòe ōe kham-tit tit-tio̍h hit ê sè-kài, iā tùi sí-lâng tiong koh-oa̍h ê, chiū bô kè bô chhōa;

36因為也bōe會koh死；是親像天使一樣；已經做koh活ê人，就做上帝ê Kiáⁿ。in-ūi iā bōe-ōe koh sí; sī chhin-chhiūⁿ thiⁿ-sài chi̍t iūⁿ; í-keng chòe koh-oa̍h ê lâng, chiū chòe Siōng-tè ê kiáⁿ.

37論死人koh活，摩西tī刺phè hit篇有指明，稱呼主做亞伯拉罕ê上帝，以撒ê上帝，雅各ê上帝。Lūn sí-lâng koh-oa̍h, Mô͘-se tī Chhì-phè hit phiⁿ ū chí-bêng, chheng-ho͘ Chú chòe A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè.

38伊m̄是死人ê上帝，是活人ê上帝；因為眾人為tio̍h伊來活。I m̄ sī sí-lâng ê Siōng-tè, sī oa̍h-lâng ê Siōng-tè; in-ūi chèng lâng ūi-tio̍h I lâi oa̍h.

39有經學士幾nā人應講，先生ah，你所講ê是好。Ū keng-ha̍k-sū kúi-nā lâng ìn kóng, Sian-siⁿ ah, lí só͘ kóng ê sī hó.

40因為in m̄敢koh問伊甚麼。In-ūi in m̄ káⁿ koh mn̄g I sím-mi̍h.

41耶穌就對in講，人怎樣講基督做大衛ê後裔ah？Iâ-so͘ chiū tùi in kóng, Lâng cháiⁿ-iūⁿ kóng Ki-tok chòe Tāi-pi̍t ê hō͘-è ah?

42因為tī詩篇中大衛家己講， 主kā我ê主講， 坐我ê大pêng，In-ūi tī Si-phian tiong Tāi-pi̍t ka-kī kóng, Chú kā góa ê Chú kóng, Chē góa ê tōa pêng,

43thèng候我將你ê對敵做你ê腳踏椅。Thèng-hāu góa chiong lí ê tùi-te̍k chòe lí ê kha-ta̍h-í.

44大衛既然稱伊做主，就基督怎樣做伊ê後裔ah？Tāi-pi̍t kì-jiân chheng I chòe Chú, chiū Ki-tok cháiⁿ-iūⁿ chòe i ê hō͘-è ah?

45當眾百姓teh聽ê時，伊就kā伊ê學生講，Tng chèng peh-sìⁿ teh thiaⁿ ê sî, I chiū kā I ê ha̍k-seng kóng,

46Tio̍h持防hiah-ê經學士，inài穿長衫四界行，真ài tī街市裡hō͘人請安，會堂內坐高位，筵桌裡坐大位；Tio̍h tî-hông hiah ê keng-ha̍k-sū, in ài chhēng tn̂g saⁿ sì-kè kiâⁿ, chin ài tī koe-chhī-ni̍h hō͘ lâng chhéng-an, hōe-tn̂g lāi chē koâiⁿ ūi, iân-toh-ni̍h chē tōa ūi;

47in hiau-thun守寡人ê家伙，假意長長祈禱；in beh受罪koh-khah重。in hiau-thun chiú-kóaⁿ lâng ê ke-hé, ké-ì tn̂g-tn̂g kî-tó; in beh siū-chōe koh khah tāng.