1因為有chōe-chōe人將咱中間已經成ê事bat kia̍h筆來排列做傳；In-ūi ū chōe-chōe lâng chiong lán tiong-kan í-keng chiâⁿ ê sū bat kia̍h pit lâi pâi-lia̍t chòe toān;

2就是照hiah-ê做道理ê差用ê人，tùi起頭親目看見，來傳hō͘咱ê；chiū-sī chiàu hiah ê chòe tō-lí ê chhe-ēng ê lâng, tùi khí-thâu chhin-ba̍k khòaⁿ-kìⁿ, lâi thoân hō͘ lán ê;

3我已經tùi起頭詳細查考lóng總ê事，就想tio̍h照次序寫伊，來寄hō͘ Thê-o-hui-lô大人，góa í-keng tùi khí-thâu siông-sè chhâ-khó lóng-chóng ê sū, chiū siūⁿ tio̍h chiàu chhù-sū siá i, lâi kià hō͘ Thê-o-hui-lô tāi-jîn,

4hō͘你知所學習ê ê確實。hō͘ lí chai só͘ ha̍k-si̍p ê ê khak-si̍t.

5當猶太王希律ê時，有屬A-pí-a班ê祭司，名撒迦利亞；伊ê bó͘是亞倫ê後裔，名叫以利沙白。Tng Iû-thài ông Hi-lu̍t ê sî, ū sio̍k A-pí-a pan ê chè-si, miâ Sat-ka-lī-a; i ê bó͘ sī A-lûn ê hō͘-è, miâ kiò Í-lī-sa-pek.

6In兩人tī上帝ê面前是義ê人，照主一切ê誡命禮儀來行，無thang嫌。In nn̄g lâng tī Siōng-tè ê bīn-chêng sī gī ê lâng, chiàu Chú it-chhè ê kài-bēng lé-gî lâi kiâⁿ, bô thang hiâm.

7總是in無kiáⁿ，因為以利沙白bōe懷孕，兩人年歲又koh老。Chóng-sī in bô kiáⁿ, in-ūi Í-lī-sa-pek bōe hoâi-īn, nn̄g lâng nî-hè iū-koh lāu.

8Hit時撒迦利亞照伊ê班列行祭司ê職tī上帝ê面前，Hit sî Sat-ka-lī-a chiàu i ê pan-lia̍t kiâⁿ chè-si ê chit tī Siōng-tè ê bīn-chêng,

9照祭司職份ê例抽籤得tio̍h入主ê殿燒香；chiàu chè-si chit-hūn ê lē thiu-chhiam tit-tio̍h ji̍p Chú ê tiān sio hiuⁿ;

10當燒香ê時，百姓kui陣tī外面祈禱。tng sio hiuⁿ ê sî, peh-sìⁿ kui tīn tī gōa-bīn kî-tó.

11主ê天使出現hō͘伊看，khiā tī香壇ê chiàⁿ-pêng。Chú ê thiⁿ-sài chhut-hiān hō͘ i khòaⁿ, khiā tī hiuⁿ-tôaⁿ ê chiàⁿ-pêng.

12撒迦利亞看見，就gông-ngia̍h，驚惶。Sat-ka-lī-a khòaⁿ-kìⁿ, chiū gông-ngia̍h, kiaⁿ-hiâⁿ.

13天使對伊講，撒迦利亞ah，莫得驚，因為你ê祈禱已經聽見lah；你ê bó͘以利沙白beh生kiáⁿ，你tio̍h kā伊號名叫約翰。Thiⁿ-sài tùi i kóng, Sat-ka-lī-a ah, bo̍h-tit kiaⁿ, in-ūi lí ê kî-tó í-keng thiaⁿ-kìⁿ lah; lí ê bó͘ Í-lī-sa-pek beh siⁿ kiáⁿ, lí tio̍h kā i hō miâ kiò Iok-hān.

14你beh歡喜koh快樂；chōe-chōe人也beh為tio̍h伊出世來歡喜。Lí beh hoaⁿ-hí koh khoài-lo̍k; chōe-chōe lâng iā beh ūi-tio̍h i chhut-sì lâi hoaⁿ-hí.

15因為伊tī主ê面前beh做大，葡萄酒kap一切ê酒lóng無lim；tùi老母ê胎就hō͘聖神充滿。In-ūi i tī Chú ê bīn-chêng beh chòe tōa, phû-tô chiú kap it-chhè ê chiú lóng bô lim; tùi lāu-bú ê thai chiū hō͘ Sèng Sîn chhiong-móa.

16伊beh hō͘以色列後裔chōe-chōe人oa̍t-tńg來歸主，就是in ê上帝。I beh hō͘ Í-sek-lia̍t hō͘-è chōe-chōe lâng oa̍t-tńg lâi kui Chú, chiū-sī in ê Siōng-tè.

17伊beh用以利亞ê心神kap才能行做頭tī主ê面前，hō͘做父ê oa̍t-tńg心ǹg tī kiáⁿ，hō͘悖逆ê人thàn義人ê智慧，為tio̍h主備辦合用ê百姓。I beh ēng Í-lī-a ê sim-sîn kap châi-lêng kiâⁿ chòe-thâu tī Chú ê bīn-chêng, hō͘ chòe pē ê oa̍t-tńg sim ǹg tī kiáⁿ, hō͘ pōe-ge̍k ê lâng thàn gī lâng ê tì-hūi, ūi-tio̍h Chú pī-pān ha̍p-ēng ê peh-sìⁿ.

18撒迦利亞tùi天使講，我tùi怎樣會知chit-ê事ah？因為我已經老，我ê bó͘年歲也老lah。Sat-ka-lī-a tùi thiⁿ-sài kóng, Góa tùi cháiⁿ-iūⁿ ōe chai chit ê sū ah? In-ūi góa í-keng lāu, góa ê bó͘ nî-hè iā lāu lah.

19天使應伊講，我就是Ka-pek-lia̍t，khiā tī上帝ê面前ê，奉差kap你講話，報你chiah-ê好消息。Thiⁿ-sài ìn i kóng, Góa chiū-sī Ka-pek-lia̍t, khiā tī Siōng-tè ê bīn-chêng ê, hōng-chhe kap lí kóng ōe, pò lí chiah ê hó siau-sit.

20Taⁿ你beh靜靜bōe講話，到chiah-ê事得tio̍h成ê日，因為你m̄信我ê話，就是hiah-ê到期beh應驗ê話。Taⁿ lí beh chēng-chēng bōe kóng ōe, kàu chiah ê sū tit-tio̍h chiâⁿ ê ji̍t, in-ūi lí m̄ sìn góa ê ōe, chiū-sī hiah-ê kàu kî beh èng-giām ê ōe.

21百姓thèng候撒迦利亞，奇怪伊久久tī殿內；Peh-sìⁿ thèng-hāu Sat-ka-lī-a, kî-koài i kú-kú tī tiān-lāi;

22到出來bōe kap in講話，就知伊tī殿裡有看見異象；伊就對in比意思，竟然是啞口。kàu chhut-lâi bōe kap in kóng ōe, chiū chai i tī tiān-ni̍h ū khòaⁿ-kìⁿ īⁿ-siōng; i chiū tùi in pí ì-sù, kèng-jiân sī é-káu.

23到伊照職份服事ê日滿，就tò去in tau。Kàu i chiàu chit-hūn ho̍k-sāi ê ji̍t móa, chiū tò-khì in tau.

24Chiah-ê日了後，伊ê bó͘以利沙白有身，tiàm密五月日，Chiah ê ji̍t liáu-āu, i ê bó͘ Í-lī-sa-pek ū-sin, tiàm ba̍t gō͘ ge̍h ji̍t,

25講，主tī看顧我ê日款待我親像án-ni，來洗我ê見笑tī人ê中間。kóng, Chú tī khòaⁿ-kò͘ góa ê ji̍t khoán-thāi góa chhin-chhiūⁿ án-ni, lâi sóe góa ê kiàn-siàu tī lâng ê tiong-kan.

26到六月日天使Ka-pek-lia̍t奉上帝所差到加利利一個城，名叫拿撒勒，Kàu la̍k ge̍h ji̍t thiⁿ-sài Ka-pek-lia̍t hōng Siōng-tè só͘ chhe kàu Ka-lī-lī chi̍t ê siâⁿ, miâ kiò Ná-sat-le̍k,

27就近一個在室女，是已經配定tio̍h hō͘大衛家ê一人，名叫約瑟；chit-ê在室女名叫馬利亞。chiū-kūn chi̍t ê chāi-sek-lú, sī í-keng phòe tiāⁿ-tio̍h hō͘ Tāi-pi̍t ke ê chi̍t lâng, miâ kiò Iok-sek; chit ê chāi-sek-lú miâ kiò Má-lī-a.

28天使入去對伊講，得tio̍h大恩ê人ah，平安；主kap你tī-teh。Thiⁿ-sài ji̍p-khì tùi i kóng, Tit-tio̍h tōa un ê lâng ah, pêng-an; Chú kap lí tī-teh.

29馬利亞不止gông-ngia̍h伊ê話，想chit-ê請安是甚麼意思。Má-lī-a put-chí gông-ngia̍h i ê ōe, siūⁿ chit ê chhéng-an sī sím-mi̍h ì-sù.

30天使kā伊講，馬利亞ah，莫得驚，因為你得tio̍h上帝ê恩典。Thiⁿ-sài kā i kóng, Má-lī-a ah, bo̍h-tit kiaⁿ, in-ūi lí tit-tio̍h Siōng-tè ê un-tián.

31Taⁿ你beh懷孕生kiáⁿ，tio̍h kā伊號名叫耶穌。Taⁿ lí beh hoâi-īn siⁿ kiáⁿ, tio̍h kā I hō miâ kiò Iâ-so͘.

32伊beh做大，稱做至koânê ê Kiáⁿ；主上帝beh用伊ê祖大衛ê位hō͘伊。I beh chòe tōa, chheng chòe Chì-koâiⁿ-ê ê Kiáⁿ; Chú Siōng-tè beh ēng I ê chó͘ Tāi-pi̍t ê ūi hō͘ I.

33伊beh做王tī雅各ê家到代代，伊ê國也無窮盡。I beh chòe ông tī Ngá-kok ê ke kàu tāi-tāi, I ê kok iā bô kiông-chīn.

34馬利亞tùi天使講，我bē有嫁人，怎樣beh有chit-ê事？Má-lī-a tùi thiⁿ-sài kóng, Góa bē ū kè lâng, cháiⁿ-iūⁿ beh ū chit ê sū?

35天使應伊講，聖神beh臨到你，至koânê ê權能beh致蔭你；所以對你生ê beh稱做聖，做上帝ê Kiáⁿ。Thiⁿ-sài ìn i kóng, Sèng Sîn beh lîm-kàu lí, Chì-koâiⁿ-ê ê koân-lêng beh tì-ìm lí; só͘-í tùi lí siⁿ-ê beh chheng chòe Sèng, chòe Siōng-tè ê Kiáⁿ.

36Koh你ê親戚以利沙白已經老，也懷孕；平素稱做bōe懷孕ê，taⁿ有身六月日lah；Koh lí ê chhin-chhek Í-lī-sa-pek í-keng lāu, iā hoâi-īn; pêng-sò͘ chheng chòe bōe hoâi-īn ê, taⁿ ū-sin la̍k ge̍h ji̍t lah;

37因為上帝所講ê話，無一句無力。in-ūi Siōng-tè só͘ kóng ê ōe, bô chi̍t kù bô la̍t.

38馬利亞講，我是主ê女婢；願照你ê話應驗tī我。天使就離開伊去。Má-lī-a kóng, Góa sī Chú ê lú-pī; goān chiàu lí ê ōe èng-giām tī góa. Thiⁿ-sài chiū lī-khui i khì.

39Tī chiah-ê日ê中間馬利亞起身，趕緊去山地，到猶太一個城，Tī chiah ê ji̍t ê tiong-kan Má-lī-a khí-sin, kóaⁿ-kín khì soaⁿ-tōe, kàu Iû-thài chi̍t ê siâⁿ,

40入撒迦利亞ê厝，請安以利沙白。ji̍p Sat-ka-lī-a ê chhù, chhéng-an Í-lī-sa-pek.

41以利沙白一下聽見馬利亞請安，胎孕tī腹肚內就tiô跳。以利沙白hō͘聖神充滿，Í-lī-sa-pek chi̍t-ē thiaⁿ-kìⁿ Má-lī-a chhéng-an, thai-īn tī pak-tó͘ lāi chiū tiô-thiàu. Í-lī-sa-pek hō͘ Sèng Sîn chhiong-móa,

42就大聲講，眾婦人人ê中間你得tio̍h福氣，你所懷孕ê也得tio̍h福氣。chiū tōa siaⁿ kóng, Chèng hū-jîn-lâng ê tiong-kan lí tit-tio̍h hok-khì, lí só͘ hoâi-īn ê iā tit-tio̍h hok-khì.

43我ê主ê老母來就近我，我tùi tá-lo̍h能得tio̍h án-ni ah？Góa ê Chú ê lāu-bú lâi chiū-kūn góa, góa tùi tá-lo̍h ōe tit-tio̍h án-ni ah?

44因為你請安ê聲一下入我ê耳孔，tī我腹肚內ê胎就歡喜來tiô跳。In-ūi lí chhéng-an ê siaⁿ chi̍t-ē ji̍p góa ê hī-khang, tī góa pak-tó͘ lāi ê thai chiū hoaⁿ-hí lâi tiô-thiàu.

45信ê婦人人有福氣ah，因為主所kā伊講ê話beh應驗。Sìn ê hū-jîn-lâng ū hok-khì ah, in-ūi Chú só͘ kā i kóng ê ōe beh èng-giām.

46馬利亞講，我ê心尊敬主做大，Má-lī-a kóng, Góa ê sim chun-kèng Chú chòe tōa,

47我ê神因為救我ê上帝來歡喜。Góa ê sîn in-ūi kiù góa ê Siōng-tè lâi hoaⁿ-hí.

48因為伊看顧女婢ê卑微； Tùi taⁿ以後萬世代beh講我有福氣。In-ūi I khòaⁿ-kò͘ lú-pī ê pi-bî; Tùi taⁿ í-āu bān sè-tāi beh kóng góa ū hok-khì.

49因為hit-ê有權能ê為tio̍h我做大ê tāi-chì， 伊ê名是聖。In-ūi hit ê ū koân-lêng ê ūi-tio̍h góa chòe tōa ê tāi-chì, I ê miâ sī sèng.

50敬畏伊ê人伊憐憫in， 到代代。Kèng-ùi I ê lâng I lîn-bín in, Kàu tāi-tāi.

51伊bat用伊ê手出氣力， 心志驕傲ê人伊有趕散in。I bat ēng I ê chhiú chhut khùi-la̍t, Sim-chì kiau-ngō͘ ê lâng I ū kóaⁿ-sòaⁿ in.

52有權能ê人，伊lut in ê位， 卑微ê人，伊升in做高。Ū koân-lêng ê lâng, I lut in ê ūi, Pi-bî ê lâng, I seng in chòe koâiⁿ.

53Iau ê人伊用好物hō͘ in食到飽， 富ê人，伊hō͘ in空空tò去。Iau ê lâng I ēng hó mi̍h hō͘ in chia̍h kàu pá, Pù ê lâng, I hō͘ in khang-khang tò-khì.

54伊扶助伊ê奴僕以色列， 來記念憐憫，I hû-chō͘ I ê lô͘-po̍k Í-sek-lia̍t, Lâi kì-liām lîn-bín,

55(照伊對咱ê祖所講ê話) ， 來施落hō͘亞伯拉罕kap伊ê後裔到永世代。(Chiàu I tùi lán ê chó͘ só͘ kóng ê ōe), Lâi si-lo̍h hō͘ A-pek-la̍h-hán kap i ê hō͘-è kàu éng sè-tāi.

56馬利亞kap伊saⁿ-kap tòa約略有三月日，chiah tò去in tau。Má-lī-a kap i saⁿ-kap tòa iok-lio̍k ū saⁿ ge̍h ji̍t, chiah tò-khì in tau.

57以利沙白生產ê期已經到，就生kiáⁿ。Í-lī-sa-pek seng-sán ê kî í-keng kàu, chiū siⁿ kiáⁿ.

58厝邊親戚聽見主大憐憫伊，就kap伊saⁿ-kap歡喜。Chhù-piⁿ chhin-chhek thiaⁿ-kìⁿ Chú tōa lîn-bín i, chiū kap i saⁿ-kap hoaⁿ-hí.

59到第八日in來beh kā嬰á行割禮，ài照伊ê老父ê名號伊做撒迦利亞。Kàu tē poeh ji̍t in lâi beh kā eⁿ-á kiâⁿ kat-lé, ài chiàu i ê lāu-pē ê miâ hō i chòe Sat-ka-lī-a.

60伊ê老母應講，無lah，tio̍h名伊做約翰。I ê lāu-bú ìn kóng, Bô lah, tio̍h miâ i chòe Iok-hān.

61In就對伊講，你ê親戚中無人號chit-ê名。In chiū tùi i kóng, Lí ê chhin-chhek tiong bô lâng hō chit ê miâ.

62In就比意思問伊ê老父，ài kā伊號甚麼名。In chiū pí ì-sù mn̄g i ê lāu-pē, ài kā i hō sím-mi̍h miâ.

63伊ê老父討寫字ê板，寫講，伊ê名是約翰。大家奇怪。I ê lāu-pē thó siá-jī ê pán, siá kóng, I ê miâ sī Iok-hān. Tāi-ke kî-koài.

64撒迦利亞ê嘴liâm-piⁿ開，舌也tháu，就講話來o-ló上帝。Sat-ka-lī-a ê chhùi liâm-piⁿ khui, chi̍h iā tháu, chiū kóng ōe lâi o-ló Siōng-tè.

65四圍khiā起ê人lóng驚。Chiah-ê一切ê話遍遍報揚tī猶太ê山地。Sì-ûi khiā-khí ê lâng lóng kiaⁿ. Chiah ê it-chhè ê ōe piàn-piàn pò-iông tī Iû-thài ê soaⁿ-tōe.

66聽見ê人lóng將chiah-ê事khǹg tī心裡，講，Án-ni，chit-ê嬰á將來beh怎樣？因為主ê手kap伊tī-teh。Thiaⁿ-kìⁿ ê lâng lóng chiong chiah ê sū khǹg tī sim-ni̍h, kóng, Án-ni, chit-ê eⁿ-á chiong-lâi beh cháiⁿ-iūⁿ? In-ūi Chú ê chhiú kap i tī-teh.

67伊ê老父撒迦利亞就hō͘聖神充滿，做先知來講，I ê lāu-pē Sat-ka-lī-a chiū hō͘ Sèng Sîn chhiong-móa, chòe sian-ti lâi kóng,

68Tio̍h o-ló主，以色列ê上帝， 因為伊有看顧伊ê百姓來贖回伊；Tio̍h o-ló Chú, Í-sek-lia̍t ê Siōng-tè, In-ūi I ū khòaⁿ-kò͘ I ê peh-sìⁿ lâi sio̍k-hôe i;

69替咱興起拯救ê角， Tī伊ê奴僕大衛ê家。Thòe lán heng-khí chín-kiù ê kak, Tī I ê lô͘-po̍k Tāi-pi̍t ê ke.

70照伊tùi有世間以來用伊聖ê先知ê嘴所講ê，Chiàu I tùi ū sè-kan í-lâi ēng I sèng ê sian-ti ê chhùi só͘ kóng ê,

71就是救咱脫離對敵kap見若怨恨咱ê人ê手，Chiū-sī kiù lán thoat-lī tùi-te̍k kap kìⁿ-nā oàn-hūn lán ê lâng ê chhiú,

72來行憐憫tī咱ê列祖， 來記念伊聖ê約；Lâi kiâⁿ lîn-bín tī lán ê lia̍t-chó͘, Lâi kì-liām I sèng ê iok;

73就是kap咱ê祖亞伯拉罕所chiù ê chōa，Chiū-sī kap lán ê chó͘ A-pek-la̍h-hán só͘ chiù ê chōa,

74Hō͘咱已經脫離chiah-ê對敵ê手，Hō͘ lán í-keng thoat-lī chiah ê tùi-te̍k ê chhiú,

75一世人tī伊ê面前用聖用義無驚來服事伊。Chi̍t-sì-lâng tī I ê bīn-chêng ēng sèng ēng gī bô kiaⁿ lâi ho̍k-sāi I.

76嬰á ah，你也beh稱做至koânê ê先知， 因為你beh行tī主ê面前來備辦伊ê路，Eⁿ-á ah, lí iā beh chheng chòe Chì-koâiⁿ-ê ê sian-ti, In-ūi lí beh kiâⁿ tī Chú ê bīn-chêng lâi pī-pān I ê lō͘,

77Hō͘伊ê百姓tùi得tio̍h赦罪， 就知拯救ê恩，Hō͘ I ê peh-sìⁿ tùi tit-tio̍h sià-chōe, Chiū chai chín-kiù ê un,

78為tio̍h咱ê上帝憐憫ê心， Tùi án-ni hō͘早起時ê日tùi頂面來到tī咱，Ūi-tio̍h lán ê Siōng-tè lîn-bín ê sim, Tùi án-ni hō͘ chá-khí sî ê ji̍t tùi téng-bīn lâi kàu tī lán,

79來照hiah-ê坐tī烏暗kap死蔭中ê人， Chhōa咱ê腳入平安ê路。Lâi chiò hiah-ê chē tī o͘-àm kap sí-ìm tiong ê lâng, Chhōa lán ê kha ji̍p pêng-an ê lō͘.

80嬰á漸漸大，心神日日勇壯；tiàm tī曠野到顯明tī以色列ê日。Eⁿ-á chiām-chiām tōa, sim-sîn ji̍t-ji̍t ióng-chòng; tiàm tī khòng-iá kàu hián-bêng tī Í-sek-lia̍t ê ji̍t.

1當hit時該撒A-kó͘-sū-tok有出詔，命令天下lóng造家甲。Tng hit sî Kai-sat A-kó͘-sū-tok ū chhut chiàu, bēng-lēng thiⁿ-ē lóng chō ke-kah.

2這頭一pái ê家甲是Ku-lí-liú做敘利亞總督ê時來做ê。Che thâu chi̍t pái ê ke-kah sī Ku-lí-liú chòe Sū-lī-a chóng-tok ê sî lâi chòe ê.

3眾人去造家甲，ta̍k人tò去本城。Chèng lâng khì chō ke-kah, ta̍k lâng tò-khì pún siâⁿ.

4約瑟ê世系屬tī大衛ê家，所以tùi加利利ê拿撒勒城上去猶太，到大衛ê城，名叫伯利恆ê，beh kap伊所聘定ê馬利亞saⁿ-kap造家甲；Iok-sek ê sè-hē sio̍k tī Tāi-pi̍t ê ke, só͘-í tùi Ka-lī-lī ê Ná-sat-le̍k siâⁿ chiūⁿ-khì Iû-thài, kàu Tāi-pi̍t ê siâⁿ, miâ kiò Pek-lī-hêng ê, beh kap i só͘ phèng-tiāⁿ ê Má-lī-a saⁿ-kap chō ke-kah;

5hit時馬利亞已經有身孕。hit sî Má-lī-a í-keng ū sin-īn.

6In tī hia ê時，生產ê期到。In tī hia ê sî seng-sán ê kî kàu.

7就生頭chiūⁿ kiáⁿ，用布包伊，hō͘伊睏tī槽裡；因為客館無所在thang容允in。Chiū siⁿ thâu-chiūⁿ kiáⁿ, ēng pò͘ pau I, hō͘ I khùn tī chô-ni̍h; in-ūi kheh-koán bô só͘-chāi thang iông-ún in.

8Hit地方有顧羊ê tòa tī山裡，暝時守更顧in ê羊群。Hit tōe-hng ū kò͘-iûⁿ ê tòa tī soaⁿ-ni̍h, mî-sî chiú-kiⁿ kò͘ in ê iûⁿ-kûn.

9主ê天使khiā tī in ê身邊，主ê榮光圍纍照in；顧羊ê大驚。Chú ê thiⁿ-sài khiā tī in ê sin-piⁿ, Chú ê êng-kng ûi-lûi chiò in; kò͘-iûⁿ ê tōa kiaⁿ.

10天使kā in講，莫得驚；因為我報lín大歡喜ê好消息，hō͘百姓lóng有份；Thiⁿ-sài kā in kóng, Bo̍h-tit kiaⁿ; in-ūi góa pò lín tōa hoaⁿ-hí ê hó siau-sit, hō͘ peh-sìⁿ lóng ū hūn;

11因為今á日tī大衛ê城已經為tio̍h lín生一個拯救ê，就是主基督。in-ūi kin-á-ji̍t tī Tāi-pi̍t ê siâⁿ í-keng ūi-tio̍h lín siⁿ chi̍t ê Chín-kiù-ê, chiū-sī Chú Ki-tok.

12Lín beh看見一個嬰á用布包，睏tī槽裡ê，chit-ê就是hō͘ lín做記號。Lín beh khòaⁿ-kìⁿ chi̍t ê eⁿ-á ēng pò͘ pau, khùn tī chô-ni̍h ê, chit-ê chiū-sī hō͘ lín chòe kì-hō.

13忽然有chōe-chōe天兵kap hit-ê天使saⁿ-kap tī-teh，o-ló上帝，講，Hut-jiân ū chōe-chōe thian-peng kap hit ê thiⁿ-sài saⁿ-kap tī-teh, o-ló Siōng-tè, kóng,

14Tī極高ê位榮光歸tī上帝， 地上和平tī伊所歡喜ê人ê中間。Tī ke̍k koâiⁿ ê ūi êng-kng kui tī Siōng-tè, Tōe-chiūⁿ hô-pêng tī I só͘ hoaⁿ-hí ê lâng ê tiong-kan.

15Chiah-ê天使離開in上天ê時，顧羊ê saⁿ-kap講，Taⁿ咱來去伯利恆，看所成ê事，就是主所報咱知ê。Chiah ê thiⁿ-sài lī-khui in chiūⁿ thiⁿ ê sî, kò͘-iûⁿ ê saⁿ-kap kóng, Taⁿ lán lâi khì Pek-lī-hêng, khòaⁿ só͘ chiâⁿ ê sū, chiū-sī Chú só͘ pò lán chai ê.

16就緊緊去，chhē-tio̍h馬利亞kap約瑟，koh看見嬰á睏tī槽裡。Chiū kín-kín khì, chhē-tio̍h Má-lī-a kap Iok-sek, koh khòaⁿ-kìⁿ eⁿ-á khùn tī chô-ni̍h.

17看了，就將天使所對in講chit-ê嬰á ê事報人知。Khòaⁿ-liáu, chiū chiong thiⁿ-sài só͘ tùi in kóng chit ê eⁿ-á ê sū pò lâng chai.

18聽見ê人lóng奇怪顧羊ê所對in講ê事。Thiaⁿ-kìⁿ ê lâng lóng kî-koài kò͘-iûⁿ ê só͘ tùi in kóng ê sū.

19獨獨馬利亞將chiah-ê話記tiâu-tiâu，心內常常teh想。To̍k-to̍k Má-lī-a chiong chiah ê ōe kì tiâu-tiâu, sim-lāi siông-siông teh siūⁿ.

20顧羊ê tò去，為tio̍h所聽見ê，所看見ê，就是天使所對in講ê，來歸榮光o-ló上帝。Kò͘-iûⁿ ê tò-khì, ūi-tio̍h só͘ thiaⁿ-kìⁿ ê, só͘ khòaⁿ-kìⁿ ê, chiū-sī thiⁿ-sài só͘ tùi in kóng ê, lâi kui êng-kng o-ló Siōng-tè.

21到第八日，kā嬰á行割禮ê期，就號伊ê名叫耶穌，就是伊bē投胎ê時天使所號ê。Kàu tē poeh ji̍t, kā eⁿ-á kiâⁿ kat-lé ê kî, chiū hō I ê miâ kiò Iâ-so͘, chiū-sī I bē tâu-thai ê sî thiⁿ-sài só͘ hō ê.

22照摩西ê律例，in清氣ê日已經滿，就抱嬰á上耶路撒冷，beh獻hō͘主，Chiàu Mô͘-se ê lu̍t-lē, in chheng-khì ê ji̍t í-keng móa, chiū phō eⁿ-á chiūⁿ Iâ-lō͘-sat-léng, beh hiàn hō͘ Chú,

23(照主ê律例所記載講，見若頭chiūⁿ ê ta-po͘-kiáⁿ beh稱做聖，歸tī主) ，(chiàu Chú ê lu̍t-lē só͘ kì-chài kóng, Kìⁿ-nā thâu-chiūⁿ ê ta-po͘-kiáⁿ beh chheng chòe sèng, kui tī Chú),

24也beh獻祭，照主ê律例所講，用一對ê Ka-chui，á是兩隻鴿á-kiáⁿ。iā beh hiàn-chè, chiàu Chú ê lu̍t-lē só͘ kóng, Ēng chi̍t tùi ê ka-chui, á-sī nn̄g chiah chíⁿ-á-kiáⁿ.

25Tú-tn̄g tī耶路撒冷有一人，名叫西門；chit人義koh敬虔，平時欣慕hit-ê安慰以色列ê；聖神tiàm tī伊。Tú-tn̄g tī Iâ-lō͘-sat-léng ū chi̍t lâng, miâ kiò Se-biān; chit lâng gī koh kèng-khiân, pêng-sî him-bō͘ hit ê an-ùi Í-sek-lia̍t ê; Sèng Sîn tiàm tī i.

26伊bat得tio̍h聖神指示，知伊iáu-bē死beh事先看見主ê基督。I bat tit-tio̍h Sèng Sîn chí-sī, chai i iáu-bē sí beh tāi-seng khòaⁿ-kìⁿ Chú ê Ki-tok.

27伊hō͘聖神感動就入殿；tú-á耶穌ê父母抱嬰á入來，beh kā伊照律法ê例來行，I hō͘ Sèng Sîn kám-tōng chiū ji̍p tiān; tú-á Iâ-so͘ ê pē-bú phō eⁿ-á ji̍p-lâi, beh kā I chiàu lu̍t-hoat ê lē lâi kiâⁿ,

28hit時西門用手chih嬰á，o-ló上帝講，hit sî Se-biān ēng chhiú chih eⁿ-á, o-ló Siōng-tè kóng,

29主ah，taⁿ照祢ê話teh tháu放你ê奴僕 安然過世。Chú ah, taⁿ chiàu lí ê ōe teh tháu-pàng lí ê lô͘-po̍k An-jiân kè-sì.

30因為我ê目睭已經看見你ê拯救，In-ūi góa ê ba̍k-chiu í-keng khòaⁿ-kìⁿ lí ê chín-kiù,

31就是你所備辦tī萬百姓ê面前ê，Chiū-sī lí só͘ pī-pān tī bān peh-sìⁿ ê bīn-chêng ê,

32做光來照外邦， Koh做你以色列百姓ê榮光。Chòe kng lâi chiò gōa-pang, Koh chòe lí Í-sek-lia̍t peh-sìⁿ ê êng-kng.

33伊ê父kap伊ê母teh奇怪所論嬰á ê話；I ê pē kap I ê bú teh kî-koài só͘ lūn eⁿ-á ê ōe;

34西門kā in祝福，koh對伊ê老母馬利亞講，Chit-ê嬰á受設立beh hō͘以色列中chōe-chōe人跋倒，chōe-chōe人起來，也做受辯駁ê記號；Se-biān kā in chiok-hok, koh tùi I ê lāu-bú Má-lī-a kóng, Chit ê eⁿ-á siū siat-li̍p beh hō͘ Í-sek-lia̍t tiong chōe-chōe lâng poa̍h-tó, chōe-chōe lâng khí-lâi, iā chòe siū piān-pok ê kì-hō;

35(koh你家己ê心也beh有劍鑿透過) ；hō͘ chōe-chōe人心內ê念頭會露出。(koh lí ka-kī ê sim iā beh ū kiàm chha̍k thàu-kè); hō͘ chōe-chōe lâng sim-lāi ê liām-thâu ōe lō͘-chhut.

36Koh有A-siat ê支派，Hoat-lōe-le̍k ê cha-bó͘-kiáⁿ，A-ná，伊是做先知，(年歲已經老，tùi在室女ê時嫁hō͘丈夫七年久，Koh ū A-siat ê chi-phài, Hoat-lōe-le̍k ê cha-bó͘-kiáⁿ, A-ná, i sī chòe sian-ti, (nî-hè í-keng lāu, tùi chāi-sek-lú ê sî kè hō͘ tiōng-hu chhit nî kú,

37就守寡八十四年) ，lóng無離開殿，禁食祈禱，暝日服事。chiū chiú-kóaⁿ poeh-cha̍p-sì nî), lóng bô lī-khui tiān, kìm-chia̍h kî-tó, mî-ji̍t ho̍k-sāi.

38Tú-tú hit時伊進前，稱謝上帝，tùi見若欣慕耶路撒冷得tio̍h贖回ê人講起chit-ê嬰á ê事。Tú-tú hit sî i chìn-chêng, chheng-siā Siōng-tè, tùi kìⁿ-nā him-bō͘ Iâ-lō͘-sat-léng tit-tio̍h sio̍k-hôe ê lâng kóng-khí chit ê eⁿ-á ê sū.

39In照主ê律法行ta̍k項tāi-chì明白，tò去加利利，到本城拿撒勒。In chiàu Chú ê lu̍t-hoat kiâⁿ ta̍k hāng tāi-chì bêng-pe̍k, tò-khì Ka-lī-lī, kàu pún siâⁿ Ná-sat-le̍k.

40嬰á漸漸大，日日勇壯，智慧充滿；上帝ê恩典kap伊tī-teh。Eⁿ-á chiām-chiām tōa, ji̍t-ji̍t ióng-chòng, tì-hūi chhiong-móa; Siōng-tè ê un-tián kap I tī-teh.

41Ta̍k年pôaⁿ過節ê時伊ê父母去耶路撒冷。Ta̍k nî pôaⁿ-kè-choeh ê sî I ê pē-bú khì Iâ-lō͘-sat-léng.

42到伊十二歲ê時，照節期ê例lóng上耶路撒冷。Kàu I cha̍p-jī hè ê sî, chiàu choeh-kî ê lē lóng chiūⁿ Iâ-lō͘-sat-léng.

43節期已經明白，in tò去ê時，gín-ná耶穌iáu tòa tī耶路撒冷；伊ê父母m̄知。Choeh-kî í-keng bêng-pe̍k, in tò-khì ê sî, gín-ná Iâ-so͘ iáu tòa tī Iâ-lō͘-sat-léng; I ê pē-bú m̄ chai.

44phah算伊tī同行ê人ê中間，行一日ê路站；chiah tī親戚kap相識ê人ê中間chhē伊。Phah-sǹg I tī tâng kiâⁿ ê lâng ê tiong-kan, kiâⁿ chi̍t ji̍t ê lō͘-chām; chiah tī chhin-chhek kap saⁿ-bat ê lâng ê tiong-kan chhē I.

45Chhē無tio̍h，就倒tńg去耶路撒冷chhē伊。Chhē bô tio̍h, chiū tò-tńg khì Iâ-lō͘-sat-léng chhē I.

46三日後chhē-tio̍h伊tī殿裡，坐tī hiah-ê先生ê中間，也teh聽，也teh問。Saⁿ ji̍t āu chhē-tio̍h I tī tiān-ni̍h, chē tī hiah ê sian-siⁿ ê tiong-kan, iā teh thiaⁿ, iā teh mn̄g.

47聽伊ê人lóng奇怪伊ê聰明kap伊ê應答。Thiaⁿ I ê lâng lóng kî-koài I ê chhang-miâ kap I ê ìn-tap.

48父母看見伊就gông-ngia̍h；伊ê老母對伊講，Kiáⁿ ah，你啥事án-ni款待阮？你看，你ê父kap我傷心chhē你。Pē-bú khòaⁿ-kìⁿ I chiū gông-ngia̍h; I ê lāu-bú tùi I kóng, Kiáⁿ ah, lí siáⁿ-sū án-ni khoán-thāi goán? lí khòaⁿ, lí ê pē kap góa siong-sim chhē lí.

49伊kā in講，啥事chhē我？Kiám m̄知我應該tī我ê父ê厝mah？I kā in kóng, Siáⁿ-sū chhē góa? Kiám m̄ chai góa eng-kai tī góa ê Pē ê chhù mah?

50In bōe曉得伊所kā in講ê話。In bōe hiáu-tit I só͘ kā in kóng ê ōe.

51耶穌就kap in落去到拿撒勒，來承順in。伊ê老母將chiah-ê話lóng記tī心裡。Iâ-so͘ chiū kap in lo̍h-khì kàu Ná-sat-le̍k, lâi sêng-sūn in. I ê lāu-bú chiong chiah ê ōe lóng kì tī sim-ni̍h.

52耶穌ê智慧kap年歲ná加添，上帝kap人ná疼伊。Iâ-so͘ ê tì-hūi kap nî-hè ná ke-thiⁿ, Siōng-tè kap lâng ná thiàⁿ I.

1Th ê-pì-liû該撒坐位ê十五年本丟彼拉多做猶太ê總督，希律做加利利分封ê人君，伊ê兄弟腓力做Í-thó͘-lī-a kap tek-lia̍p-khó-nî地方分封ê人君，Lū-sat-liap做A-pí-lī-nî分封ê人君，Thê-pì-liû Kai-sat chē ūi ê cha̍p-gō͘ nî Pún-tiu Pí-lia̍p-to chòe Iû-thài ê chóng-tok, Hi-lu̍t chòe Ka-lī-lī hun-hong ê jîn-kun, i ê hiaⁿ-tī Hui-le̍k chòe Í-thó͘-lī-a kap Tek-lia̍p-khó-nî tōe-hng hun-hong ê jîn-kun, Lū-sat-liap chòe A-pí-lī-nî hun-hong ê jîn-kun,

2A-ná kap Kai-a-hoat做祭司頭ê時，撒迦利亞ê Kiáⁿ約翰tī曠野裡，上帝ê話到tī伊。A-ná kap Kai-a-hoat chòe chè-si-thâu ê sî, Sat-ka-lī-a ê kiáⁿ Iok-hān tī khòng-iá-ni̍h, Siōng-tè ê ōe kàu tī i.

3伊就到約旦河ê四方，傳反悔ê洗禮，hō͘人得tio̍h赦罪。I chiū kàu Iok-tàn hô ê sì-hng, thoân hoán-hóe ê sóe-lé, hō͘ lâng tit-tio̍h sià-chōe.

4親像先知以賽亞冊裡所記ê話，講， 有teh叫tī曠野ê，伊ê聲講， 備辦主ê路， 修直伊ê小路。Chhin-chhiūⁿ sian-ti Í-sài-a chheh-ni̍h só͘ kì ê ōe, kóng, Ū teh kiò tī khòng-iá ê, i ê siaⁿ kóng, Pī-pān Chú ê lō͘, Siu ti̍t I ê sió lō͘.

5Chiah-ê山谷lóng beh thūn-tīⁿ， Chiah-ê大小ê山頭lóng beh hō͘伊低， 彎曲ê，beh hō͘伊直， Khâm-khia̍t ê，beh hō͘伊平；Chiah ê soaⁿ-kok lóng beh thūn-tīⁿ, Chiah ê tōa sió ê soaⁿ-thâu lóng beh hō͘ i kē, Oan-khiau ê, beh hō͘ i ti̍t, Khâm-khia̍t ê, beh hō͘ i pîⁿ;

6凡有肉體ê beh看見上帝ê拯救。Hoān ū jio̍k-thé ê beh khòaⁿ-kìⁿ Siōng-tè ê chín-kiù.

7Chōe-chōe人出來beh受約翰ê洗禮，伊就對in講，毒蛇ê類ah，是誰-á指示lín閃避將來ê受氣ah？Chōe-chōe lâng chhut-lâi beh siū Iok-hān ê sóe-lé, i chiū tùi in kóng, To̍k-chôa ê lūi ah, chī-chūi-á chí-sī lín siám-pī chiong-lâi ê siū-khì ah?

8所以lín tio̍h結hit號合tī反悔ê果子。莫得家己phah算，有亞伯拉罕做阮ê父；因為我kā lín講，上帝會tùi chiah-ê石頭出kiaⁿ孫hō͘亞伯拉罕。Só͘-í lín tio̍h kiat hit hō ha̍p tī hoán-hóe ê ké-chí. Bo̍h-tit ka-kī phah-sǹg, Ū A-pek-la̍h-hán chòe goán ê pē; in-ūi góa kā lín kóng, Siōng-tè ōe tùi chiah ê chio̍h-thâu chhut kiáⁿ-sun hō͘ A-pek-la̍h-hán.

9Taⁿ斧頭已經hē tī樹頭；見若樹無結好果子ê，就chhò伊，hiat落火。Taⁿ pó͘-thâu í-keng hē tī chhiū-thâu; kìⁿ-nā chhiū bô kiat hó ké-chí ê, chiū chhò i, hiat-lo̍h hé.

10眾人問伊講，Án-ni，阮tio̍h怎樣做？Chèng lâng mn̄g i kóng, Án-ni, goán tio̍h cháiⁿ-iūⁿ chòe?

11伊應講，有兩領衫ê tio̍h分hō͘無ê；有物thang食ê，也tio̍h án-ni。I ìn kóng, Ū nn̄g niá saⁿ ê tio̍h pun hō͘ bô ê; ū mi̍h thang chia̍h ê, iā tio̍h án-ni.

12抽餉ê也來beh受洗禮，對伊講，先生ah，阮tio̍h怎樣做？Thiu-hiòng ê iā lâi beh siū sóe-lé, tùi i kóng, Sian-siⁿ ah, goán tio̍h cháiⁿ-iūⁿ chòe?

13伊對in講，定tio̍h ê餉以外，莫得加the̍h。I tùi in kóng, Tiāⁿ-tio̍h ê hiòng í-gōa, bo̍h-tit ke the̍h.

14兵丁也問伊講，也阮tio̍h怎樣做？伊對in講，莫得勒索人，莫得歪人；tio̍h掠lín所得tio̍h ê糧做夠額。Peng-teng iā mn̄g i kóng, Iā goán tio̍h cháiⁿ-iūⁿ chòe? I tùi in kóng, Bo̍h-tit le̍k-sek lâng, bo̍h-tit oaiⁿ lâng; tio̍h lia̍h lín só͘ tit-tio̍h ê niû chòe kàu-gia̍h.

15百姓teh ǹg望ê時，眾人心內teh議論約翰kiám-chhái是基督，Peh-sìⁿ teh ǹg-bāng ê sî, chèng lâng sim-lāi teh gī-lūn Iok-hān kiám-chhái sī Ki-tok,

16約翰應眾人講，我用水kā lín行洗禮；獨獨有一個比我khah有權能ê beh來，就若tháu伊ê鞋帶我也bōe堪得；伊beh用聖神kap火kā lín洗。Iok-hān ìn chèng lâng kóng, Góa ēng chúi kā lín kiâⁿ sóe-lé; to̍k-to̍k ū chi̍t-ê pí góa khah ū koân-lêng ê beh lâi, chiū nā tháu I ê ôe-tòa góa iā bōe kham-tit; I beh ēng Sèng Sîn kap hé kā lín sóe.

17伊ê手the̍h簸箕，beh將伊hit場一盡簸，收麥入伊ê倉；但是麥hiūⁿ就用bōe hoa ê火燒伊。I ê chhiú the̍h pòa-ki, beh chiong I hit tiûⁿ it-chīn pòa, siu be̍h ji̍p I ê chhng; nā-sī be̍h-hiūⁿ chiū ēng bōe hoa ê hé sio i.

18約翰另外用chōe-chōe項苦勸來傳福音hō͘百姓。Iok-hān lēng-gōa ēng chōe-chōe hāng khó͘-khǹg lâi thoân hok-im hō͘ peh-sìⁿ.

19獨獨分封ê人君希律，因為伊ê兄弟ê bó͘ Hi-lô-tí ê緣故，koh因為所行lóng總ê pháiⁿ tāi，hō͘約翰責備，To̍k-to̍k hun-hong ê jîn-kun Hi-lu̍t, in-ūi i ê hiaⁿ-tī ê bó͘ Hi-lô-tí ê iân-kò͘, koh in-ūi só͘ kiâⁿ lóng-chóng ê pháiⁿ tāi, hō͘ Iok-hān chek-pī,

20taⁿ koh加一項，就是將約翰關tī監裡。taⁿ koh ke chi̍t hāng, chiū-sī chiong Iok-hān koaiⁿ tī kaⁿ-ni̍h.

21眾百姓已經受洗禮，耶穌也已經受洗禮，祈禱ê時，天開，Chèng peh-sìⁿ í-keng siū sóe-lé, Iâ-so͘ iā í-keng siū sóe-lé, kî-tó ê sî, thiⁿ khui,

22聖神降臨tī伊ê頂面，形狀親像鴿á；koh tùi天有聲講，你是我疼ê Kiáⁿ，我歡喜你。Sèng Sîn kàng-lîm tī I ê téng-bīn, hêng-chōng chhin-chhiūⁿ chíⁿ-á; koh tùi thiⁿ ū siaⁿ kóng, Lí sī góa thiàⁿ ê Kiáⁿ, góa hoaⁿ-hí lí.

23耶穌出頭ê時約略三十歲；伊(照人看) 是約瑟ê Kiáⁿ，約瑟是Hi-lí ê Kiáⁿ，Iâ-so͘ chhut-thâu ê sî iok-lio̍k saⁿ-cha̍p hè; I (chiàu lâng khòaⁿ) sī Iok-sek ê kiáⁿ, Iok-sek sī Hi-lí ê kiáⁿ,

24Hi-lí是Má-thap ê Kiáⁿ，Má-thap是利未ê Kiáⁿ，利未是Be̍k-ki ê Kiáⁿ，Be̍k-ki是Ngá-ná ê Kiáⁿ，Ngá-ná是約瑟ê Kiáⁿ，Hi-lí sī Má-thap ê kiáⁿ, Má-thap sī Lī-bī ê kiáⁿ, Lī-bī sī Be̍k-ki ê kiáⁿ, Be̍k-ki sī Ngá-ná ê kiáⁿ, Ngá-ná sī Iok-sek ê kiáⁿ,

25約瑟是Má-tāi-th ê-a ê kiáⁿ，Má-tāi-th ê-a是A-mô͘-sū ê kiáⁿ，A-mô͘-sū是Ná-hông ê kiáⁿ，Ná-hông是Í-sū-lí ê kiáⁿ，Í-sū-lí是Ná-kai ê kiáⁿ，Iok-sek sī Má-tāi-thê-a ê kiáⁿ, Má-tāi-thê-a sī A-mô͘-sū ê kiáⁿ, A-mô͘-sū sī Ná-hông ê kiáⁿ, Ná-hông sī Í-sū-lí ê kiáⁿ, Í-sū-lí sī Ná-kai ê kiáⁿ,

26Ná-kai是Má-ap ê Kiáⁿ，Má-ap是Má-tāi-th ê-a ê Kiáⁿ，Má-tāi-th ê-a是Se-bí ê Kiáⁿ，Se-bí是約瑟ê Kiáⁿ，約瑟是猶大ê Kiáⁿ，猶大是Iok-a-ná ê Kiáⁿ，Ná-kai sī Má-ap ê kiáⁿ, Má-ap sī Má-tāi-thê-a ê kiáⁿ, Má-tāi-thê-a sī Se-bí ê kiáⁿ, Se-bí sī Iok-sek ê kiáⁿ, Iok-sek sī Iû-tāi ê kiáⁿ, Iû-tāi sī Iok-a-ná ê kiáⁿ,

27Iok-a-ná是Lī-sat ê Kiáⁿ，Lī-sat是Só͘-lô-pa-pek ê Kiáⁿ，Só͘-lô-pa-pek是Sat-lia̍p-thiat ê Kiáⁿ，Sat-lia̍p-thiat是Nî-lī ê Kiáⁿ，Iok-a-ná sī Lī-sat ê kiáⁿ, Lī-sat sī Só͘-lô-pa-pek ê kiáⁿ, Só͘-lô-pa-pek sī Sat-lia̍p-thiat ê kiáⁿ, Sat-lia̍p-thiat sī Nî-lī ê kiáⁿ,

28Nî-lī是Be̍k-ki ê Kiáⁿ，Be̍k-ki是A-tí ê Kiáⁿ，A-tí是Ko-song ê Kiáⁿ，Ko-song是Í-mô͘-tông ê Kiáⁿ，Í-mô͘-tông是Jíⁿ ê Kiáⁿ，Jíⁿ是Iok-sè ê Kiáⁿ，Nî-lī sī Be̍k-ki ê kiáⁿ, Be̍k-ki sī A-tí ê kiáⁿ, A-tí sī Ko-song ê kiáⁿ, Ko-song sī Í-mô͘-tông ê kiáⁿ, Í-mô͘-tông sī Jíⁿ ê kiáⁿ, Jíⁿ sī Iok-sè ê kiáⁿ,

29Iok-sè是Í-lia̍t-sat ê Kiáⁿ，Í-lia̍t-sat是Iok-lēng ê Kiáⁿ，Iok-lēng是Má-thap ê Kiáⁿ，Má-thap是利未ê Kiáⁿ，Iok-sè sī Í-lia̍t-sat ê kiáⁿ, Í-lia̍t-sat sī Iok-lēng ê kiáⁿ, Iok-lēng sī Má-thap ê kiáⁿ, Má-thap sī Lī-bī ê kiáⁿ,

30利未是西門ê Kiáⁿ，西門是猶大ê Kiáⁿ。猶大是約瑟ê Kiáⁿ，約瑟是Iok-lâm ê Kiáⁿ，Iok-lâm是Í-lī-a-kim ê Kiáⁿ，Lī-bī sī Se-biān ê kiáⁿ, Se-biān sī Iû-tāi ê kiáⁿ. Iû-tāi sī Iok-sek ê kiáⁿ, Iok-sek sī Iok-lâm ê kiáⁿ, Iok-lâm sī Í-lī-a-kim ê kiáⁿ,

31Í-lī-a-kim是Bí-lī-a ê Kiáⁿ，Bí-lī-a是Mái-lâm ê Kiáⁿ，Mái-lâm是Má-ta̍t-thaⁿ ê Kiáⁿ，Má-ta̍t-thaⁿ是Ná-taⁿ ê Kiáⁿ，Ná-tan是大衛ê Kiáⁿ，Í-lī-a-kim sī Bí-lī-a ê kiáⁿ, Bí-lī-a sī Mái-lâm ê kiáⁿ, Mái-lâm sī Má-ta̍t-thaⁿ ê kiáⁿ, Má-ta̍t-thaⁿ sī Ná-tan ê kiáⁿ, Ná-tan sī Tāi-pi̍t ê kiáⁿ,

32大衛是Iâ-se ê Kiáⁿ，Iâ-se是O-pek ê Kiáⁿ，O-pek是Pho-sū ê Kiáⁿ，Pho-sū是Sat-bûn ê Kiáⁿ，Sat-bûn是Ná-sūn ê Kiáⁿ，Tāi-pi̍t sī Iâ-se ê kiáⁿ, Iâ-se sī O-pek ê kiáⁿ, O-pek sī Pho-sū ê kiáⁿ, Pho-sū sī Sat-bûn ê kiáⁿ, Sat-bûn sī Ná-sūn ê kiáⁿ,

33Ná-sūn是A-bí-ná-ta̍t ê Kiáⁿ，A-bí-ná-ta̍t是A-lân ê Kiáⁿ，A-lân是Í-sū-lûn ê Kiáⁿ，Í-sū-lûn是Hoat-le̍k-sū ê Kiáⁿ，Hoat-le̍k-sū是猶大ê Kiáⁿ，Ná-sūn sī A-bí-ná-ta̍t ê kiáⁿ, A-bí-ná-ta̍t sī A-lân ê kiáⁿ, A-lân sī Í-sū-lûn ê kiáⁿ, Í-sū-lûn sī Hoat-le̍k-sū ê kiáⁿ, Hoat-le̍k-sū sī Iû-tāi ê kiáⁿ,

34猶大是雅各ê Kiáⁿ，雅各是以撒ê Kiáⁿ，以撒是亞伯拉罕ê Kiáⁿ，亞伯拉罕是Thaⁿ-la̍h ê Kiáⁿ，Thaⁿ-la̍h是Ná-ho̍k ê Kiáⁿ，Iû-tāi sī Ngá-kok ê kiáⁿ, Ngá-kok sī Í-sat ê kiáⁿ, Í-sat sī A-pek-la̍h-hán ê kiáⁿ, A-pek-la̍h-hán sī Thaⁿ-la̍h ê kiáⁿ, Thaⁿ-la̍h sī Ná-ho̍k ê kiáⁿ,

35Ná-ho̍k是Sat-lo̍k ê Kiáⁿ，Sat-lo̍k是Lia̍p-kó͘ ê Kiáⁿ，Lia̍p-kó͘是Hoat-le̍k ê Kiáⁿ，Hoat-le̍k是Hi-pek ê Kiáⁿ，Hi-pek是Sat-lia̍p ê Kiáⁿ，Ná-ho̍k sī Sat-lo̍k ê kiáⁿ, Sat-lo̍k sī Lia̍p-kó͘ ê kiáⁿ, Lia̍p-kó͘ sī Hoat-le̍k ê kiáⁿ, Hoat-le̍k sī Hi-pek ê kiáⁿ, Hi-pek sī Sat-lia̍p ê kiáⁿ,

36Sat-lia̍p是Kai-lâm ê Kiáⁿ，Kai-lâm是A-hoat-sat ê Kiáⁿ，A-hoat-sat是Siám ê Kiáⁿ，Siám是挪亞ê Kiáⁿ，挪亞是La̍h-be̍k ê Kiáⁿ，Sat-lia̍p sī Kai-lâm ê kiáⁿ, Kai-lâm sī A-hoat-sat ê kiáⁿ, A-hoat-sat sī Siám ê kiáⁿ, Siám sī Ná-a ê kiáⁿ, Ná-a sī La̍h-be̍k ê kiáⁿ,

37La̍h-be̍k是Má-thó͘-sat-la̍h ê Kiáⁿ，Má-thó͘-sat-la̍h是Í-lo̍k ê Kiáⁿ，Í-lo̍k是Ngá-lia̍t ê Kiáⁿ，Ngá-lia̍t是Má-le̍k-lia̍t ê Kiáⁿ，Má-le̍k-lia̍t是Kai-lâm ê Kiáⁿ，Kai-lâm是Í-ná-sū ê Kiáⁿ，La̍h-be̍k sī Má-thó͘-sat-la̍h ê kiáⁿ, Má-thó͘-sat-la̍h sī Í-lo̍k ê kiáⁿ, Í-lo̍k sī Ngá-lia̍t ê kiáⁿ, Ngá-lia̍t sī Má-le̍k-lia̍t ê kiáⁿ, Má-le̍k-lia̍t sī Kai-lâm ê kiáⁿ, Kai-lâm sī Í-ná-sū ê kiáⁿ,

38Í-ná-sū是Siat ê Kiáⁿ，Siat是亞當ê Kiáⁿ，亞當是上帝ê Kiáⁿ。Í-ná-sū sī Siat ê kiáⁿ, Siat sī A-tong ê kiáⁿ, A-tong sī Siōng-tè ê kiáⁿ.