1除酵節，也名pôaⁿ過節，近lah。Tû-kàⁿ-choeh, iā miâ pôaⁿ-kè-choeh, kūn lah.

2Chiah-ê祭司頭kap經學士chhē看有甚麼法thang害死耶穌；因為是驚百姓。Chiah ê chè-si-thâu kap keng-ha̍k-sū chhē-khòaⁿ ū sím-mi̍h hoat thang hāi-sí Iâ-so͘; in-ūi sī kiaⁿ peh-sìⁿ.

3撒旦入tī hit-ê叫做Ka-lio̍k ê猶大，伊是十二個學生ê一個；Sat-tàn ji̍p tī hit-ê kiò chòe Ka-lio̍k ê Iû-tāi, i sī cha̍p-jī ê ha̍k-seng ê chi̍t ê;

4就去kap chiah-ê祭司頭有司官saⁿ-kap參詳，beh用甚麼法將耶穌交in。chiū khì kap chiah ê chè-si-thâu iú-si-koaⁿ saⁿ-kap chham-siông, beh ēng sím-mi̍h hoat chiong Iâ-so͘ kau in.

5In歡喜，約beh銀hō͘伊。In hoaⁿ-hí, iok beh gûn hō͘ i.

6猶大允伊；就chhē機會，當百姓無tī-teh ê時，將耶穌交in。Iû-tāi ín i; chiū chhē ki-hōe, tng peh-sìⁿ bô tī-teh ê sî, chiong Iâ-so͘ kau in.

7除酵節，應該thâi pôaⁿ過節ê羊羔，hit-ê日已經到，Tû-kàⁿ-choeh, eng-kai thâi pôaⁿ-kè-choeh ê iûⁿ-ko, hit ê ji̍t í-keng kàu,

8耶穌差彼得、約翰講，lín去替咱備辦pôaⁿ過節ê筵席，hō͘咱thang來食。Iâ-so͘ chhe Pí-tek Iok-hān kóng, Lín khì thòe lán pī-pān pôaⁿ-kè-choeh ê iân-sia̍h, hō͘ lán thang lâi chia̍h.

9Inka7伊講，Ài阮tī甚麼所在備辦？In kā I kóng, Ài goán tī sím-mi̍h só͘-chāi pī-pān?

10伊kā in講，lín去入城，就有一人帶水瓶beh tú-tio̍h lín，tio̍h tè伊入伊所入ê厝。I kā in kóng, Lín khì ji̍p siâⁿ, chiū ū chi̍t lâng tòa chúi-pân beh tú-tio̍h lín, tio̍h tè i ji̍p i só͘ ji̍p ê chhù.

11Kā hit間厝ê主人講，先生問講，客廳tī tá-lo̍h？我beh tī hia kap我ê學生食pôaⁿ過節。Kā hit keng chhù ê chú-lâng kóng, Sian-siⁿ mn̄g kóng, Kheh-thiaⁿ tī tá-lo̍h? góa beh tī hia kap góa ê ha̍k-seng chia̍h pôaⁿ-kè-choeh.

12伊beh用樓頂排設ê大聽hō͘ lín看；lín tio̍h tī hia備辦。I beh ēng lâu-téng pâi-siat ê tōa thiaⁿ hō͘ lín khòaⁿ; lín tio̍h tī hia pī-pān.

13In去，果然tú-tio̍h照伊所kā in講ê，就tī hia備辦pôaⁿ過節。In khì, kó-jiân tú-tio̍h chiàu I só͘ kā in kóng ê, chiū tī hia pī-pān pôaⁿ-kè-choeh.

14時到耶穌坐桌，使徒也kap伊坐。Sî kàu Iâ-so͘ chē toh, sù-tô͘ iā kap I chē.

15伊對in講，Tī受害ê事先，我不止意愛kap lín食chit-ê pôaⁿ過節；I tùi in kóng, Tī siū hāi ê tāi-seng góa put-chí ì-ài kap lín chia̍h chit ê pôaⁿ-kè-choeh;

16因為我kā lín講，我無beh koh食伊，到伊應驗tī上帝ê國。in-ūi góa kā lín kóng, góa bô beh koh chia̍h i, kàu i èng-giām tī Siōng-tè ê kok.

17就接杯，祝謝了講，Lín將chit-ê分hō͘ lín ta̍k人；Chiū chih poe, chiok-siā liáu kóng, Lín chiong chit-ê pun hō͘ lín ta̍k lâng;

18因為我kā lín講，taⁿ了後我無beh lim葡萄汁，到上帝ê國來。in-ūi góa kā lín kóng, taⁿ liáu-āu góa bô beh lim phû-tô chiap, kàu Siōng-tè ê kok lâi.

19Koh the̍h餅祝謝來peh hō͘ in，講，chit-ê是我ê身軀，為tio̍h lín來獻ê；lín行chit-ê來記念我。Koh the̍h piáⁿ chiok-siā lâi peh hō͘ in, kóng, Chit-ê sī góa ê seng-khu, ūi-tio̍h lín lâi hiàn ê; lín kiâⁿ chit-ê lâi kì-liām góa.

20食了後捧杯也是án-ni，講，Chit-ê杯是新約，tī我ê血來設立ê，就是為tio̍h lín流出ê。Chia̍h liáu-āu phâng poe iā sī án-ni, kóng, Chit ê poe sī sin-iok, tī góa ê huih lâi siat-li̍p ê, chiū-sī ūi-tio̍h lín lâu-chhut ê.

21但是賣我ê人，伊ê手kap我tī桌裡。Nā-sī bōe góa ê lâng, i ê chhiú kap góa tī toh-ni̍h.

22因為人子真正去，照所定tio̍h ê；但是伊hō͘甚麼人賣，hit人有災禍！In-ūi Jîn-chú chin-chiàⁿ khì, chiàu só͘ tiāⁿ-tio̍h ê; nā-sī I hō͘ sím-mi̍h lâng bōe, hit lâng ū chai-ē!

23In就相對問其中甚麼人beh做chit-ê tāi-chì。In chiū saⁿ tùi-mn̄g kî-tiong sím-mi̍h lâng beh chòe chit ê tāi-chì.

24In有teh相爭，看從中甚麼人算做大。In ū teh saⁿ-chiⁿ, khòaⁿ chiông-tiong sím-mi̍h lâng sǹg chòe tōa.

25耶穌就kā in講，列邦ê君王做主來治理in；管轄in ê稱做恩主。Iâ-so͘ chiū kā in kóng, Lia̍t-pang ê kun-ông chòe chú lâi tī-lí in; koán-hat in ê chheng chòe Un-chú.

26但是lín就m̄是án-ni；lín中間最大ê tio̍h親像序細，做頭ê tio̍h親像差用。Nā-sī lín chiū m̄ sī án-ni; lín tiong-kan chòe tōa ê tio̍h chhin-chhiūⁿ sī-sòe, chòe thâu ê tio̍h chhin-chhiūⁿ chhe-ēng.

27甚麼號人最大？是坐桌ê，á是做差用ê ah？Kiám m̄是坐桌ê mah？但是我tī lín中間親像做差用ê。Sím-mi̍h hō lâng chòe tōa? sī chē toh ê, á-sī chòe chhe-ēng ê ah? kiám m̄ sī chē toh ê mah? Nā-sī góa tī lín tiong-kan chhin-chhiūⁿ chòe chhe-ēng ê.

28Lín就是常常kap我tī試煉中ê，Lín chiū-sī siông-siông kap góa tī chhì-liān tiong ê,

29我用國封lín，親像我ê父bat用國封我一樣；góa ēng kok hong lín, chhin-chhiūⁿ góa ê Pē bat ēng kok hong góa chi̍t iūⁿ;

30hō͘ lín tī我ê國lim食tī我ê桌；lín也beh坐tī座位，審判以色列十二個支派。hō͘ lín tī góa ê kok lim-chia̍h tī góa ê toh; lín iā beh chē tī chō-ūi, sím-phòaⁿ Í-sek-lia̍t cha̍p-jī ê chi-phài.

31Koh講，西門，西門ah，你看，撒旦batai3得tio̍h lín，ài簸lín親像簸麥；Koh kóng, Se-bûn, Se-bûn ah, lí khòaⁿ, Sat-tàn bat ài tit-tio̍h lín, ài pòa lín chhin-chhiūⁿ pòa be̍h;

32但是我有替你祈禱，hō͘你ê信無失落；你歸正了後，tio̍h堅固你ê兄弟。nā-sī góa ū thòe lí kî-tó, hō͘ lí ê sìn bô sit-lo̍h; lí kui-chèng liáu-āu, tio̍h kian-kò͘ lí ê hiaⁿ-tī.

33彼得kā伊講，主ah，我便便kap你關落監，也kap你死。Pí-tek kā I kóng, Chú ah, góa piān-piān kap lí koaiⁿ lo̍h kaⁿ, iā kap lí sí.

34伊就講，彼得ah，我kā你講，今á日雞iáu-bē啼，你beh三pái m̄認我。I chiū kóng, Pí-tek ah, góa kā lí kóng, kin-á-ji̍t koe iáu-bē thî, lí beh saⁿ pái m̄ jīn góa.

35Koh kā學生講，我前差lín無帶錢袋，kap tah-liân，kap鞋，lín有欠甚麼無？In講，無。Koh kā ha̍k-seng kóng, Góa chêng chhe lín bô tòa chîⁿ-tē, kap tah-liân, kap ôe, lín ū khiàm sím-mi̍h bô? In kóng, Bô.

36伊就kā in講，若是taⁿ有錢袋ê tio̍h帶伊，有tah-liân ê也tio̍h án-ni；無刀ê，tio̍h賣伊ê衫，來買刀。I chiū kā in kóng, Nā-sī taⁿ ū chîⁿ-tē ê tio̍h tòa i, ū tah-liân ê iā tio̍h án-ni; bô to ê, tio̍h bōe i ê saⁿ, lâi bóe to.

37因為我kā lín講，所記載ê講，算伊kap不法ê人同列，chit句話的確應驗tī我；因為干涉我ê taⁿ beh成lah。In-ūi góa kā lín kóng, só͘ kì-chài ê kóng, Sǹg I kap put-hoat ê lâng tâng lia̍t, chit kù ōe tek-khak èng-giām tī góa; in-ūi kan-sia̍p góa ê taⁿ beh chiâⁿ lah.

38In講，主ah，你看，tī chia有兩支刀。伊kā in講，夠額lah。In kóng, Chú ah, lí khòaⁿ, tī chia ū nn̄g ki to. I kā in kóng, Kàu-gia̍h lah.

39耶穌出去，照常去橄欖山；學生也tè伊。Iâ-so͘ chhut-khì, chiàu-siông khì Kaⁿ-ná soaⁿ; ha̍k-seng iā tè I.

40到hit所在就kā in講，Lín tio̍h祈禱，免得入迷惑。Kàu hit só͘-chāi chiū kā in kóng, Lín tio̍h kî-tó, bián-tit ji̍p bê-he̍k.

41就離開in約略有hiat石頭ê遠，跪落去祈禱講，Chiū lī-khui in iok-lio̍k ū hiat chio̍h-thâu ê hn̄g, kūi-lo̍h-khì kî-tó kóng,

42父ah，你若肯，tio̍h將chit-ê杯離開我；獨獨m̄是我ê意思，是你ê意思tio̍h成。Pē ah, lí nā khéng, tio̍h chiong chit ê poe lī-khui góa; to̍k-to̍k m̄ sī góa ê ì-sù, sī lí ê ì-sù tio̍h chiâⁿ.

43有一個天使tùi天出現，來壯伊ê力。Ū chi̍t ê thiⁿ-sài tùi thiⁿ chhut-hiān, lâi chòng I ê la̍t.

44耶穌苦痛到極，祈禱ná迫切；伊ê汗是親像大點血滴落地。Iâ-so͘ khó͘-thàng kàu ke̍k, kî-tó ná pek-chhiat; I ê kōaⁿ sī chhin-chhiūⁿ tōa tiám huih tih lo̍h tōe.

45祈禱soah起來，去就近學生，看見in為tio̍h憂悶teh睏；Kî-tó soah khí-lâi, khì chiū-kūn ha̍k-seng, khòaⁿ-kìⁿ in ūi-tio̍h iu-būn teh khùn;

46就kā in講，啥事睏？起來祈禱，免得入迷惑。chiū kā in kóng, Siáⁿ-sū khùn? khí-lâi kî-tó, bián-tit ji̍p bê-he̍k.

47Iáu teh講ê時，有kui陣人到；十二學生ê一個，hit-ê叫做猶大ê，行tī in ê頭前，近óa耶穌beh kā伊chim。Iáu teh kóng ê sî ū kui tīn lâng kàu; cha̍p-jī ha̍k-seng ê chi̍t ê, hit ê kiò chòe Iû-tāi ê, kiâⁿ tī in ê thâu-chêng, kūn-óa Iâ-so͘ beh kā I chim.

48但是耶穌kā伊講，猶大，你用chim嘴賣人子mah？Nā-sī Iâ-so͘ kā i kóng, Iû-tāi, lí ēng chim-chhùi bōe Jîn-chú mah?

49左右ê人看見所beh到ê事就講，主ah，阮tio̍h用刀來thâi in mah？Chó-iū ê lâng khòaⁿ-kìⁿ só͘ beh kàu ê sū chiū kóng, Chú ah, goán tio̍h ēng to lâi thâi in mah?

50其中一人thâi祭司頭ê奴僕，削去伊chiàⁿ-pêng ê耳á。Kî-tiong chi̍t lâng thâi chè-si-thâu ê lô͘-po̍k, siah-khì i chiàⁿ pêng ê hī-á.

51耶穌應講，Tāi-chì到án-ni，請容允這；就摸伊ê耳á，來醫好伊Iâ-so͘ ìn kóng, Tāi-chì kàu án-ni, chhiáⁿ iông-ún che; chiū bong i ê hī-á, lâi i-hó i.

52耶穌tùi hiah-ê來攻擊伊ê祭司頭、殿司、長老講，Lín kia̍h刀kap鎚出來親像攻擊賊mah？Iâ-so͘ tùi hiah ê lâi kong-kek I ê chè-si-thâu, tiān-si, tiúⁿ-ló kóng, Lín kia̍h to kap thûi chhut-lâi chhin-chhiūⁿ kong-kek chha̍t mah?

53我日日kap lín tī殿裡，lín無伸手攻擊我；但是chit tia̍p是lín ê時，kap烏暗ê權勢。Góa ji̍t-ji̍t kap lín tī tiān-ni̍h, lín bô chhun chhiú kong-kek góa; nā-sī chit tia̍p sī lín ê sî, kap o͘-àm ê koân-sè.

54In就掠伊，帶伊去，帶伊入祭司頭ê厝。彼得遠遠tè伊。In chiū lia̍h I, tòa I khì, tòa I ji̍p chè-si-thâu ê chhù. Pí-tek hn̄g-hn̄g tè I.

55人tī埕裡起火，saⁿ-kap teh坐，彼得也坐tī in中間。Lâng tī tiâⁿ-ni̍h khí hé, saⁿ-kap teh chē, Pí-tek iā chē tī in tiong-kan.

56有一個女婢看見伊ǹg火光teh坐，注目看伊，講，Chit人也是kap伊做陣。Ū chi̍t ê lú-pī khòaⁿ-kìⁿ i ǹg hé-kng teh chē, chù-ba̍k khòaⁿ i, kóng, Chit lâng iā sī kap I chòe tīn.

57伊m̄認講，婦人人ah，我m̄-bat伊I m̄ jīn kóng, Hū-jîn-lâng ah, góa m̄ bat I.

58Tiap-á久koh一人看見講，你也是in ê人。彼得講，人ah，我m̄是。Tiap-á-kú koh chi̍t lâng khòaⁿ-kìⁿ kóng, Lí iā sī in ê lâng. Pí-tek kóng, Lâng ah, góa m̄ sī.

59過半時久，koh一人出力講，Chit人真正kap伊做陣，因為伊也是加利利人。Kè pòaⁿ-sî kú, koh chi̍t lâng chhut-la̍t kóng, Chit lâng chin-chiàⁿ kap I chòe tīn, in-ūi i iā sī Ka-lī-lī lâng.

60但是彼得講，人ah，你所講ê，我m̄知。Iáu teh講ê時，雞liâm-piⁿ啼。Nā-sī Pí-tek kóng, Lâng ah, lí só͘ kóng ê, góa m̄ chai. Iáu teh kóng ê sî, koe liâm-piⁿ thî.

61主oa̍t頭看彼得。彼得就記得主ê話，有怎樣kā伊講，今á日雞啼ê事先，你beh三pái m̄認我。Chú oa̍t thâu khòaⁿ Pí-tek. Pí-tek chiū kì-tit Chú ê ōe, ū cháiⁿ-iūⁿ kā i kóng, Kin-á-ji̍t koe thî ê tāi-seng, lí beh saⁿ pái m̄ jīn góa.

62伊就出去外面，大啼哭。I chiū chhut-khì gōa-bīn, tōa thî-khàu.

63顧守耶穌ê人戲弄伊，phah伊；Kò͘-siú Iâ-so͘ ê lâng hì-lāng I, phah I;

64掩伊ê面，問伊講，你tio̍h做先知來講，phah你ê是是誰 ah。ng I ê bīn, mn̄g I kóng, Lí tio̍h chòe sian-ti lâi kóng, phah lí ê sī chī-chūi ah.

65Koh講chōe-chōe項來褻瀆伊Koh kóng chōe-chōe hāng lâi siat-to̍k I.

66到天光，百姓ê長老會聚集，其中有chiah-ê祭司頭kap經學士；in就帶耶穌到in ê公會講，Kàu thiⁿ kng, peh-sìⁿ ê tiúⁿ-ló-hōe chū-chi̍p, kî-tiong ū chiah ê chè-si-thâu kap keng-ha̍k-sū; in chiū tòa Iâ-so͘ kàu in ê kong-hōe kóng,

67你若是基督tio̍h kā阮講。Lí nā sī Ki-tok tio̍h kā goán kóng.

68耶穌kā in講，我若kā lín講，lín m̄信；若問lín，lín也m̄應。Iâ-so͘ kā in kóng, Góa nā kā lín kóng, lín m̄ sìn; nā mn̄g lín, lín iā m̄ ìn.

69總是taⁿ了後，人子beh坐tī上帝權能ê大pêng。Chóng-sī taⁿ liáu-āu Jîn-chú beh chē tī Siōng-tè koân-lêng ê tōa pêng.

70大家講，Án-ni，就你是上帝ê Kiáⁿ mah？伊對in講，Lín講我就是。Tāi-ke kóng, Án-ni, chiū lí sī Siōng-tè ê Kiáⁿ mah? I tùi in kóng, Lín kóng góa chiū-sī.

71In講，Mih-sái用別項ê干證？咱本身有聽見伊親嘴所講ê。In kóng, Mih-sái ēng pa̍t hāng ê kan-chèng? lán pún-sin ū thiaⁿ-kìⁿ I chhin-chhùi só͘ kóng ê.

1In全會ê人lóng起來，帶伊到彼拉多ê面前；In choân-hōe ê lâng lóng khí-lâi, tòa I kàu Pí-lia̍p-to ê bīn-chêng;

2告伊講，阮看chit人迷惑阮ê百姓，禁人納稅hō͘該撒，家己稱做基督，做王。kò I kóng, Goán khòaⁿ chit lâng bê-he̍k goán ê peh-sìⁿ, kìm lâng la̍p sè hō͘ Kai-sat, ka-kī chheng chòe Ki-tok, chòe ông.

3彼拉多問伊講，你是猶太人ê王mah？應伊講，你講，就是。Pí-lia̍p-to mn̄g I kóng, Lí sī Iû-thài lâng ê ông mah? Ìn i kóng, Lí kóng, chiū-sī.

4彼拉多tùi hiah-ê祭司頭kap Kui陣ê人講，我看chit人無罪。Pí-lia̍p-to tùi hiah ê chè-si-thâu kap kui tīn ê lâng kóng, Góa khòaⁿ chit lâng bô chōe.

5總是inná出力講，伊搖動百姓，遍猶太傳教，tùi加利利起到chia。Chóng-sī in ná chhut-la̍t kóng, I iô-tāng peh-sìⁿ, piàn Iû-thài thoân kàu, tùi Ka-lī-lī khí kàu chia.

6彼拉多一下聽見，就問看chit人是加利利人á m̄是。Pí-lia̍p-to chi̍t-ē thiaⁿ-kìⁿ, chiū mn̄g khòaⁿ chit lâng sī Ka-lī-lī lâng á m̄ sī.

7已經知伊屬tī希律所管轄，就送伊hō͘希律；hit時希律也tī耶路撒冷。Í-keng chai I sio̍k tī Hi-lu̍t só͘ koán-hat, chiū sàng I hō͘ Hi-lu̍t; hit sî Hi-lu̍t iā tī Iâ-lō͘-sat-léng.

8希律看見耶穌就真歡喜，是久久ài看見伊，因為bat聽見伊ê事，kohng3望看見伊行神蹟。Hi-lu̍t khòaⁿ-kìⁿ Iâ-so͘ chiū chin hoaⁿ-hí, sī kú-kú ài khòaⁿ-kìⁿ I, in-ūi bat thiaⁿ-kìⁿ I ê sū, koh ǹg-bāng khòaⁿ-kìⁿ I kiâⁿ sîn-jiah.

9就用chōe-chōe話問伊；但是耶穌無應伊一句。Chiū ēng chōe-chōe ōe mn̄g I; nā-sī Iâ-so͘ bô ìn i chi̍t kù.

10Hiah-ê祭司頭kap經學士khiā-teh，出力告伊。Hiah ê chè-si-thâu kap keng-ha̍k-sū khiā-teh, chhut-la̍t kò I.

11希律kap伊ê兵目底無伊，戲弄伊；用súi ê衫kā伊穿，koh送還彼拉多。Hi-lu̍t kap i ê peng ba̍k-tē-bô I, hì-lāng I; ēng súi ê saⁿ kā I chhēng, koh sàng hêng Pí-lia̍p-to.

12希律kap彼拉多平時結怨，hit日就做朋友。Hi-lu̍t kap Pí-lia̍p-to pêng-sî kiat-oàn, hit ji̍t chiū chòe pêng-iú.

13彼拉多召hiah-ê祭司頭，kap有司chham百姓來，Pí-lia̍p-to tiàu hiah ê chè-si-thâu, kap iú-si chham peh-sìⁿ lâi,

14對in講，Lín帶chit-ê人到我chia，講伊是迷惑百姓ê；你看，我tī lín ê面前已經審問伊；總是論到lín所告伊ê事，我查出伊lóng無罪。tùi in kóng, Lín tòa chit ê lâng kàu góa chia, kóng I sī bê-he̍k peh-sìⁿ ê; lí khòaⁿ, góa tī lín ê bīn-chêng í-keng sím-mn̄g I; chóng-sī lūn-kàu lín só͘ kò I ê sū, góa chhâ-chhut I lóng bô chōe.

15希律也是án-ni；因為有將伊送還咱；也你看，伊所行無一項應該死ê事。Hi-lu̍t iā sī án-ni; in-ūi ū chiong I sàng hêng lán; iā lí khòaⁿ, I só͘ kiâⁿ bô chi̍t hāng eng-kai sí ê sū.

16所以我behphah來tháu放伊Só͘-í góa beh phah lâi tháu-pàng I.

18In一齊喉叫講，Tio̍h除去chit-ê人，放巴拉巴hō͘阮。In chi̍t chôe âu-kiò kóng, Tio̍h tû-khì chit ê lâng, pàng Pa-lia̍p-pa hō͘ goán.

19Chit-ê 巴拉巴，因為tī城內作亂koh thâi-死人，chiah關落監。Chit ê Pa-lia̍p-pa, in-ūi tī siâⁿ-lāi chok-loān koh thâi-sí lâng, chiah koaiⁿ lo̍h kaⁿ.

20彼拉多ài放耶穌，就koh kap in講。Pí-lia̍p-to ài pàng Iâ-so͘, chiū koh kap in kóng.

21但是in叫，釘伊十字架，釘伊十字架。Nā-sī in kiò, Tèng I si̍p-jī-kè, tèng I si̍p-jī-kè.

22彼拉多第三pái對in講，是怎樣？伊有行甚麼pháiⁿ？我看伊無一項應該死ê罪；所以behphah來tháu放伊Pí-lia̍p-to tē saⁿ pái tùi in kóng, Sī cháiⁿ-iūⁿ? I ū kiâⁿ sím-mi̍h pháiⁿ? Góa khòaⁿ I bô chi̍t hāng eng-kai sí ê chōe; só͘-í beh phah lâi tháu-pàng I.

23In大聲迫切求釘伊tī十字架。In ê聲khah贏。In tōa siaⁿ pek-chhiat kiû tèng I tī si̍p-jī-kè. In ê siaⁿ khah-iâⁿ.

24彼拉多擬斷照in所求ê來行:Pí-lia̍p-to gí-toàn chiàu in só͘ kiû ê lâi kiâⁿ:

25就tháu放in所求hit-ê為tio̍h作亂續thâi死人關落監ê；將耶穌交in，來順in ê意思。chiū tháu-pàng in só͘ kiû hit ê ūi-tio̍h chok-loān sòa thâi-sí lâng koaiⁿ lo̍h kaⁿ ê; chiong Iâ-so͘ kau in, lâi sūn in ê ì-sù.

26帶耶穌去ê時，有一個Kó͘-lī-nāi ê人，西門，tùi鄉下來，in就khiú伊來，將十字架掛tī伊ê肩頭，hō͘伊giâ來tè耶穌。Tòa Iâ-so͘ khì ê sî, ū chi̍t ê Kó͘-lī-nāi ê lâng, Se-bûn, tùi hiuⁿ-ē lâi, in chiū khiú i lâi, chiong si̍p-jī-kè khòa tī i ê keng-thâu, hō͘ i giâ lâi tè Iâ-so͘.

27Tè伊ê人有百姓kap婦人人chōe-chōe，婦人人為tio̍h伊搥胸哀傷。Tè I ê lâng ū peh-sìⁿ kap hū-jîn-lâng chōe-chōe, hū-jîn-lâng ūi-tio̍h I tûi heng ai-siong.

28耶穌oa̍t頭對in講，耶路撒冷ê婦人人ah，莫得為tio̍h我啼哭，tio̍h為tio̍h lín家己kap家己ê Kiáⁿ兒來啼哭:Iâ-so͘ oa̍t thâu tùi in kóng, Iâ-lō͘-sat-léng ê hū-jîn-lâng ah, bo̍h-tit ūi-tio̍h góa thî-khàu, tio̍h ūi-tio̍h lín ka-kī kap ka-kī ê kiáⁿ-jî lâi thî-khàu:

29因為時beh到，人beh講，bōe會懷孕ê婦人人，bē bat生產ê胎，bē bat hō͘ gín-ná suh ê奶頭，有福氣。in-ūi sî beh kàu, lâng beh kóng, Bōe-ōe hoâi-īn ê hū-jîn-lâng, bē bat seng-sán ê thai, bē bat hō͘ gín-ná suh ê lin-thâu, ū hok-khì.

30Hit時人就beh對山講，Teh阮；也對山á講，蓋阮。Hit sî lâng chiū beh tùi soaⁿ kóng, Teh goán; iā tùi soaⁿ-á kóng, Khàm goán.

31因為tī青ê樹木若行án-ni，就tī乾ê樹木beh怎樣ah？In-ūi tī chhiⁿ ê chhiū-ba̍k nā kiâⁿ án-ni, chiū tī ta ê chhiū-ba̍k beh cháiⁿ-iūⁿ ah?

32Koh有兩個犯人hō͘人帶去，kap耶穌同受死。Koh ū nn̄g ê hoān-lâng hō͘ lâng tòa-khì, kap Iâ-so͘ tâng siū sí.

33到一所在名叫頭殼碗，就tī hia釘伊tī十字架；koh釘hiah-ê犯人，一個tī chiàⁿ-pêng，一個tī tò-pêng。Kàu chi̍t só͘-chāi miâ kiò Thâu-khak-óaⁿ, chiū tī hia tèng I tī si̍p-jī-kè; koh tèng hiah ê hoān-lâng, chi̍t-ê tī chiàⁿ pêng, chi̍t-ê tī tò pêng.

34耶穌講，父ah，赦免in，因為in所做ê，in m̄知。人就liam-khau分伊ê衫。Iâ-so͘ kóng, Pē ah, sià-bián in, in-ūi in só͘ chòe ê, in m̄ chai. Lâng chiū liam-khau pun I ê saⁿ.

35Hiah-ê有司譏刺伊講，伊bat救別人；若是做上帝ê基督，受揀選ê，tio̍h救家己。Hiah ê iú-si ki-chhì I kóng, I bat kiù pa̍t lâng; nā sī chòe Siōng-tè ê Ki-tok, siū kéng-soán ê, tio̍h kiù ka-kī.

36兵丁也戲弄伊，近óa用醋hō͘伊，Peng-teng iā hì-lāng I, kūn-óa ēng chhò͘ hō͘ I,

37講，你若是猶太人ê王，tio̍h救家己。kóng, Lí nā sī Iû-thài lâng ê ông, tio̍h kiù ka-kī.

38Tī伊ê頂面有斬條寫講，chit-ê是猶太人ê王。Tī I ê téng-bīn ū chám-tiâu siá kóng, Chit-ê sī Iû-thài lâng ê ông.

39受吊teh ê犯人一個褻瀆伊，講，你Kiám m̄是基督mah？Tio̍h救家己kap阮。Siū tiàu-teh ê hoān-lâng chi̍t-ê siat-to̍k I, kóng, Lí kiám m̄ sī Ki-tok mah? Tio̍h kiù ka-kī kap goán.

40第二個應來責備伊，講，你既然同受罪，連上帝也m̄驚mah？Tē jī ê ìn lâi chek-pī i, kóng, Lí kì-jiân tâng siū chōe, liân Siōng-tè iā m̄ kiaⁿ mah?

41咱受罪是公道；因為咱所受ê合tī咱所行；但是chit人所行ê，無一項m̄ tio̍h。Lán siū chōe sī kong-tō; in-ūi lán só͘ siū ê ha̍p tī lán só͘ kiâⁿ; nā-sī chit lâng só͘ kiâⁿ ê, bô chi̍t hāng m̄ tio̍h.

42就講，耶穌ah，你tī你ê國來ê時，tio̍h記得我。Chiū kóng, Iâ-so͘ ah, lí tī lí ê kok lâi ê sî, tio̍h kì-tit góa.

43耶穌就kā伊講，我實在kā你講，今á日你beh kap我tī樂園。Iâ-so͘ chiū kā i kóng, Góa si̍t-chāi kā lí kóng, Kin-á-ji̍t lí beh kap góa tī Lo̍k-hn̂g.

44日中晝，全地烏暗；到三點鐘ê時，日ê光無去；Ji̍t tiong-tàu, choân tōe o͘-àm; kàu saⁿ tiám cheng ê sî, ji̍t ê kng bô-khì;

45殿內ê帳tùi中裂開。tiān-lāi ê tiùⁿ tùi tiong li̍h-khui.

46耶穌大聲叫，就講，父ah，我ê神交代你ê手。Chiah-ê話講soah，氣就斷。Iâ-so͘ tōa siaⁿ kiò, chiū kóng, Pē ah, góa ê sîn kau-tāi lí ê chhiú. Chiah ê ōe kóng soah, khùi chiū tn̄g.

47百總看見chit-ê tāi-chì，歸榮光上帝，講，Chit-ê真正是義ê人。Pé-chóng khòaⁿ-kìⁿ chit ê tāi-chì, kui êng-kng Siōng-tè, kóng, Chit-ê chin-chiàⁿ sī gī ê lâng.

48聚集teh看ê眾人看見chiah-ê tāi-chì，lóng搥胸tò去。Chū-chi̍p teh khòaⁿ ê chèng lâng khòaⁿ-kìⁿ chiah ê tāi-chì, lóng tûi heng tò-khì.

49Hiah-ê Kap耶穌相識ê，以及hiah-ê tùi加利利tè伊來ê婦人人，lóng遠遠teh khiā，來看chiah-ê事。Hiah-ê kap Iâ-so͘ saⁿ-bat ê, í-ki̍p hiah-ê tùi Ka-lī-lī tè I lâi ê hū-jîn-lâng, lóng hn̄g-hn̄g teh khiā, lâi khòaⁿ chiah ê sū.

50有一人名約瑟，伊是議員，做人好koh義；Ū chi̍t lâng miâ Iok-sek, i sī gī-oân, chòe lâng hó koh gī;

51伊無同hiah-ê人所計謀所做ê，伊是屬猶太人ê A-lī-má-thài城，平素欣慕上帝國ê。i bô tâng hiah ê lâng só͘ kè-bô͘ só͘ chòe ê, i sī sio̍k Iû-thài lâng ê A-lī-má-thài siâⁿ, pêng-sò͘ him-bō͘ Siōng-tè kok ê.

52Chit人去見彼拉多，來求耶穌ê身屍。Chit lâng khì kìⁿ Pí-lia̍p-to, lâi kiû Iâ-so͘ ê sin-si.

53就收伊落來，用幼苧布包伊，hē tī石鑿ê墓，lóng bē bat埋葬人ê。Chiū siu I lo̍h-lâi, ēng iù-tōe pò͘ pau I, hē tī chio̍h chha̍k ê bōng, lóng bē bat bâi-chòng lâng ê.

54Hit日就是備辦節ê日，安歇日近lah。Hit ji̍t chiū-sī pī-pān choeh ê ji̍t, an-hioh-ji̍t kūn lah.

55Tùi加利利kap耶穌saⁿ-kap來hiah-ê婦人人tè tī後面，看伊ê墓，kap怎樣hē伊ê身屍。Tùi Ka-lī-lī kap Iâ-so͘ saⁿ-kap lâi hiah ê hū-jîn-lâng tè tī āu-bīn, khòaⁿ I ê bōng, kap cháiⁿ-iūⁿ hē I ê sin-si.

56就tò去備辦香料、香油；當安歇日照誡命來歇。Chiū tò-khì pī-pān hiuⁿ-liāu hiuⁿ-iû; tng an-hioh-ji̍t chiàu kài-bēng lâi hioh.

1七日ê頭一日，天phú光，hiah-ê婦人人帶所備辦hiah-ê香料到墓；Chhit-ji̍t ê thâu chi̍t ji̍t, thiⁿ phú-kng, hiah ê hū-jîn-lâng tòa só͘ pī-pān hiah ê hiuⁿ-liāu kàu bōng;

2看見石已經tùi墓門kō開。khòaⁿ-kìⁿ chio̍h í-keng tùi bōng-mn̂g kō khui.

3就入去，無看見主ê身屍。Chiū ji̍p-khì, bô khòaⁿ-kìⁿ Chú ê sin-si.

4為tio̍h án-ni teh躊躇ê時，忽然有兩人khiā tī in身邊，衣裳光nà-nà。Ūi-tio̍h án-ni teh tiû-tû ê sî, hut-jiân ū nn̄g lâng khiā tī in sin-piⁿ, i-chiûⁿ kng nà-nà.

5婦人人驚惶，面àⁿ落地；hit兩人kā in講，啥事tī死人中chhē活人ah？Hū-jîn-lâng kiaⁿ-hiâⁿ, bīn àⁿ-lo̍h tōe; hit nn̄g lâng kā in kóng, Siáⁿ-sū tī sí-lâng tiong chhē oa̍h-lâng ah?

6伊無tī chia，已經koh活。Lín tio̍h記得伊iáu tī加利利ê時有怎樣kā lín講，I bô tī chia, í-keng koh-oa̍h. Lín tio̍h kì-tit I iáu tī Ka-lī-lī ê sî ū cháiⁿ-iūⁿ kā lín kóng,

7人子的確tio̍h交tī罪人ê手，hō͘ in釘tī十字架，第三日koh活。Jîn-chú tek-khak tio̍h kau tī chōe-jîn ê chhiú, hō͘ in tèng tī si̍p-jī-kè, tē saⁿ ji̍t koh-oa̍h.

8In就記得伊ê話；In chiū kì-tit I ê ōe;

9tùi墓裡tò去，將chiah-ê事lóng報hō͘十一個學生kap其餘ê眾人知。tùi bōng-ni̍h tò-khì, chiong chiah ê sū lóng pò hō͘ cha̍p-it ê ha̍k-seng kap kî-û ê chèng lâng chai.

10去tùi使徒講chiah-ê tāi-chì ê，就是Boa̍t-tāi-lia̍p ê馬利亞，kapIok-a-ná，kap雅各ê老母馬利亞，以及其餘kap in做伴ê婦人人。Khì tùi sù-tô͘ kóng chiah ê tāi-chì ê, chiū-sī Boa̍t-tāi-lia̍p ê Má-lī-a, kap Iok-a-ná, kap Ngá-kok ê lāu-bú Má-lī-a, í-ki̍p kî-û kap in chòe-phōaⁿ ê hū-jîn-lâng.

11使徒看hiah-ê話做無影，也m̄信伊Sù-tô͘ khòaⁿ hiah ê ōe chòe bô iáⁿ, iā m̄ sìn i.

12但是彼得起來走到墓裡，àⁿ落去看，只有看見幼苧布nā-tiāⁿ；就tò去in厝，teh奇怪所經過ê事。Nā-sī Pí-tek khí-lâi cháu kàu bōng-ni̍h, àⁿ-lo̍h-khì khòaⁿ, chí-ū khòaⁿ-kìⁿ iù-tōe pò͘ nā-tiāⁿ; chiū tò-khì in chhù, teh kî-koài só͘ keng-kè ê sū.

13Siāng hit日，學生中有兩人去一個鄉社，名Í-má-ngó͘，離耶路撒冷二十五里。Siāng hit ji̍t ha̍k-seng tiong ū nn̄g lâng khì chi̍t ê hiuⁿ-siā, miâ Í-má-ngó͘, lī Iâ-lō͘-sat-léng jī-cha̍p-gō͘ lí.

14In saⁿ-kap談論所經過lóng總ê事。In saⁿ-kap tâm-lūn só͘ keng-kè lóng-chóng ê sū.

15In teh談論相問ê時，耶穌本身近óa，kap in saⁿ-kap行。In teh tâm-lūn saⁿ-mn̄g ê sî, Iâ-so͘ pún-sin kūn-óa, kap in saⁿ-kap kiâⁿ.

16In兩人迷目，致到bōe認得伊。In nn̄g lâng bê-ba̍k, tì-kàu bōe jīn-tit I.

17伊對in講，Lín行ê時，saⁿ-kap辯論ê是甚麼話？In就khiā-teh，面帶憂容。I tùi in kóng, Lín kiâⁿ ê sî, saⁿ-kap piān-lūn ê sī sím-mi̍h ōe? In chiū khiā-teh, bīn tài-iu-iông.

18其中一個，名Kek-liû-pa，應伊講，你kiám單身出外tī耶路撒冷，也m̄知近日tī hia所經過ê事mah？Kî-tiong chi̍t-ê, miâ Kek-liû-pa, ìn I kóng, Lí kiám toaⁿ-sin chhut-gōa tī Iâ-lō͘-sat-léng, iā m̄ chai kūn-ji̍t tī hia só͘ keng-kè ê sū mah?

19伊kā in講，甚麼事ah？Inka7伊講，就是拿撒勒人耶穌ê事；伊是先知人，tī上帝kap眾百姓ê面前所講所行有權能；I kā in kóng, Sím-mi̍h sū ah? In kā I kóng, Chiū-sī Ná-sat-le̍k lâng Iâ-so͘ ê sū; I sī sian-ti lâng, tī Siōng-tè kap chèng peh-sìⁿ ê bīn-chêng só͘ kóng só͘ kiâⁿ ū koân-lêng;

20也hiah-ê祭司頭kap咱ê序大解送伊去定死罪，釘伊tī十字架。iā hiah ê chè-si-thâu kap lán ê sī-tōa ké-sàng I khì tēng sí chōe, tèng I tī si̍p-jī-kè.

21但是阮平素teh ǹg望伊就是hit-ê beh贖回以色列ê。M̄-nā án-ni，koh chiah-ê事成已經三日lah。Nā-sī goán pêng-sò͘ teh ǹg-bāng I chiū-sī hit-ê beh sio̍k-hôe Í-sek-lia̍t ê. M̄ nā án-ni, koh chiah ê sū chiâⁿ í-keng saⁿ ji̍t lah.

22Koh阮中間幾nā ê婦人人hō͘阮真gông-ngia̍h；因為inphah-phú光到墓裡；Koh goán tiong-kan kúi-nā ê hū-jîn-lâng hō͘ goán chin gông-ngia̍h; in-ūi in phah-phú-kng kàu bōng-ni̍h;

23無看見伊ê身屍，就來講，in有看見天使出現，講伊koh活lah。bô khòaⁿ-kìⁿ I ê sin-si, chiū lâi kóng, in ū khòaⁿ-kìⁿ thiⁿ-sài chhut-hiān, kóng I koh-oa̍h lah.

24阮中間幾nā人到墓裡，果然看見照婦人人所講ê；總是無看見伊Goán tiong-kan kúi-nā lâng kàu bōng-ni̍h, kó-jiân khòaⁿ-kìⁿ chiàu hū-jîn-lâng só͘ kóng ê; chóng-sī bô khòaⁿ-kìⁿ I.

25耶穌對in講，無知ê人ah，先知所講一切ê話，lín ê心怎樣hiah oh信ah！Iâ-so͘ tùi in kóng, Bû-ti ê lâng ah, sian-ti só͘ kóng it-chhè ê ōe, lín ê sim cháiⁿ-iūⁿ hiah oh sìn ah!

26基督受chiah-ê艱苦，來入伊ê榮光，Kiám m̄應該mah？Ki-tok siū chiah ê kan-khó͘, lâi ji̍p I ê êng-kng, kiám m̄ eng-kai mah?

27就tùi摩西kap眾先知起，見若聖經中所指伊ê，lóng kā in解明。Chiū tùi Mô͘-se kap chèng sian-ti khí, kìⁿ-nā sèng-keng tiong só͘ chí I ê, lóng kā in kóe-bêng.

28將近所去ê鄉社，耶穌親像beh行khah遠。Chiong-kūn só͘ khì ê hiuⁿ-siā, Iâ-so͘ chhin-chhiūⁿ beh kiâⁿ khah hn̄g.

29兩人強留伊講，請kap阮tòa；時已經òaⁿ，日beh落lah。伊就入去，beh kap in tòa。Nn̄g lâng kiông lâu I kóng, Chhiáⁿ kap goán tòa; sî í-keng òaⁿ, ji̍t beh lo̍h lah. I chiū ji̍p-khì, beh kap in tòa.

30Saⁿ-kap坐桌ê時，耶穌the̍h餅祝謝，peh來hō͘ in。Saⁿ-kap chē toh ê sî, Iâ-so͘ the̍h piáⁿ chiok-siā, peh lâi hō͘ in.

31In ê目睭開，就認得伊；liâm-piⁿ無koh看見。In ê ba̍k-chiu khui, chiū jīn-tit I; liâm-piⁿ bô koh khòaⁿ-kìⁿ.

32In就saⁿ-kap講，路裡伊kap咱講話，開拆聖經ê時，咱ê心kiám無熱mah？In chiū saⁿ-kap kóng, Lō͘-ni̍h I kap lán kóng ōe, khui-thiah sèng-keng ê sî, lán ê sim kiám bô jia̍t mah?

33就即時起身，tò去耶路撒冷，tú-tio̍h十一個學生，kap同tī-teh ê人聚集teh講，Chiū chek-sî khí-sin, tò-khì Iâ-lō͘-sat-léng, tú-tio̍h cha̍p-it ê ha̍k-seng, kap tâng tī-teh ê lâng chū-chi̍p teh kóng,

34主果然koh活，也出現hō͘西門看見。Chú kó-jiân koh-oa̍h, iā chhut-hiān hō͘ Se-bûn khòaⁿ-kìⁿ.

35In兩人也講起tī路裡所tú-tio̍h ê事，kap tī peh餅ê時in怎樣認得伊In nn̄g lâng iā kóng-khí tī lō͘-ni̍h só͘ tú-tio̍h ê sū, kap tī peh piáⁿ ê sî in cháiⁿ-iūⁿ jīn-tit I.

36In teh講chiah-ê話ê時，耶穌本身khiā tī in中間，kā in講，願lín平安。In teh kóng chiah ê ōe ê sî, Iâ-so͘ pún-sin khiā tī in tiong-kan, kā in kóng, Goān lín pêng-an.

37In gông-ngia̍h koh驚，掠做所看見ê是神。In gông-ngia̍h koh kiaⁿ, lia̍h-chòe só͘ khòaⁿ-kìⁿ ê sī sîn.

38伊就kā in講，Lín啥事jû亂，心內生起僥疑ah？I chiū kā in kóng, Lín siáⁿ-sū jû-loān, sim-lāi siⁿ-khí giâu-gî ah?

39Tio̍h看我ê手我ê腳，就是我本身；摸我，就知；因為神無骨無肉，照lín看見我lóng是有。Tio̍h khòaⁿ góa ê chhiú góa ê kha, chiū-sī góa pún-sin; bong góa, chiū chai; in-ūi sîn bô kut bô bah, chiàu lín khòaⁿ-kìⁿ góa lóng sī ū.

40講án-ni，就將手kap腳hō͘ in看。Kóng án-ni, chiū chiong chhiú kap kha hō͘ in khòaⁿ.

41學生為tio̍h歡喜ê緣故，iáu-kú無信，koh teh奇怪，伊kā in講，Lín tī chia有甚麼thang食無？Ha̍k-seng ūi-tio̍h hoaⁿ-hí ê iân-kò͘, iáu-kú bô sìn, koh teh kî-koài, I kā in kóng, Lín tī chia ū sím-mi̍h thang chia̍h bô?

42In就將pek ê魚一片hō͘伊；In chiū chiong pek ê hî chi̍t phìⁿ hō͘ I;

43伊the̍h去，當in ê面前食伊。I the̍h-khì, tng in ê bīn-chêng chia̍h i.

44Koh對in講，Chiah-ê就是我iáu-kú kap lín tī-teh ê時所對lín講ê話，講見若tī摩西ê律法，kap hiah-ê先知，以及詩篇，所記載指我ê話lóng的確tio̍h應驗。Koh tùi in kóng, Chiah-ê chiū-sī góa iáu-kú kap lín tī-teh ê sî só͘ tùi lín kóng ê ōe, kóng kìⁿ-nā tī Mô͘-se ê lu̍t-hoat, kap hiah ê sian-ti, í-ki̍p Si-phian, só͘ kì-chài chí góa ê ōe lóng tek-khak tio̍h èng-giām.

45就開in ê心竅，hō͘ in能曉悟hiah-ê聖經。Chiū khui in ê sim-khiàu, hō͘ in ōe hiáu-ngō͘ hiah ê sèng-keng.

46Koh kā in講，有án-ni記載，基督tio̍h受苦，第三日tùi死人中koh活；Koh kā in kóng, Ū án-ni kì-chài, Ki-tok tio̍h siū khó͘, tē saⁿ ji̍t tùi sí-lâng tiong koh-oa̍h;

47也反悔kap赦罪ê道理beh tī伊ê名來傳到萬邦，是tùi耶路撒冷起。iā hoán-hóe kap sià-chōe ê tō-lí beh tī I ê miâ lâi thoân kàu bān pang, sī tùi Iâ-lō͘-sat-léng khí.

48Lín做chiah-ê tāi-chì ê干證。Lín chòe chiah ê tāi-chì ê kan-chèng.

49也我beh差我ê父所應允ê到tī lín；總是lín tio̍h tiàm tī chit-ê城，thèng候tùi頂面落來ê權能親像衫kā lín穿。Iā góa beh chhe góa ê Pē só͘ èng-ún ê kàu tī lín; chóng-sī lín tio̍h tiàm tī chit ê siâⁿ, thèng-hāu tùi téng-bīn lo̍h-lâi ê koân-lêng chhin-chhiūⁿ saⁿ kā lín chhēng.

50就chhōa in出去到伯大尼 ê對面，kia̍h起手，kā in祝福。Chiū chhōa in chhut-khì kàu Pek-tāi-nî ê tùi-bīn, kia̍h-khí chhiú, kā in chiok-hok.

51祝福ê時，就離別in，受chih接上天。Chiok-hok ê sî, chiū lī-pia̍t in, siū chih-chiap chiūⁿ thiⁿ.

52In就拜伊；就倒tńg去耶路撒冷，大大歡喜:In chiū pài I; chiū tò-tńg-khì Iâ-lō͘-sat-léng, tōa-tōa hoaⁿ-hí:

53常常tī殿內，o-ló上帝。siông-siông tī tiān-lāi, o-ló Siōng-tè.