1In全會ê人lóng起來，帶伊到彼拉多ê面前；In choân-hōe ê lâng lóng khí-lâi, tòa I kàu Pí-lia̍p-to ê bīn-chêng;

2告伊講，阮看chit人迷惑阮ê百姓，禁人納稅hō͘該撒，家己稱做基督，做王。kò I kóng, Goán khòaⁿ chit lâng bê-he̍k goán ê peh-sìⁿ, kìm lâng la̍p sè hō͘ Kai-sat, ka-kī chheng chòe Ki-tok, chòe ông.

3彼拉多問伊講，你是猶太人ê王mah？應伊講，你講，就是。Pí-lia̍p-to mn̄g I kóng, Lí sī Iû-thài lâng ê ông mah? Ìn i kóng, Lí kóng, chiū-sī.

4彼拉多tùi hiah-ê祭司頭kap Kui陣ê人講，我看chit人無罪。Pí-lia̍p-to tùi hiah ê chè-si-thâu kap kui tīn ê lâng kóng, Góa khòaⁿ chit lâng bô chōe.

5總是inná出力講，伊搖動百姓，遍猶太傳教，tùi加利利起到chia。Chóng-sī in ná chhut-la̍t kóng, I iô-tāng peh-sìⁿ, piàn Iû-thài thoân kàu, tùi Ka-lī-lī khí kàu chia.

6彼拉多一下聽見，就問看chit人是加利利人á m̄是。Pí-lia̍p-to chi̍t-ē thiaⁿ-kìⁿ, chiū mn̄g khòaⁿ chit lâng sī Ka-lī-lī lâng á m̄ sī.

7已經知伊屬tī希律所管轄，就送伊hō͘希律；hit時希律也tī耶路撒冷。Í-keng chai I sio̍k tī Hi-lu̍t só͘ koán-hat, chiū sàng I hō͘ Hi-lu̍t; hit sî Hi-lu̍t iā tī Iâ-lō͘-sat-léng.

8希律看見耶穌就真歡喜，是久久ài看見伊，因為bat聽見伊ê事，kohng3望看見伊行神蹟。Hi-lu̍t khòaⁿ-kìⁿ Iâ-so͘ chiū chin hoaⁿ-hí, sī kú-kú ài khòaⁿ-kìⁿ I, in-ūi bat thiaⁿ-kìⁿ I ê sū, koh ǹg-bāng khòaⁿ-kìⁿ I kiâⁿ sîn-jiah.

9就用chōe-chōe話問伊；但是耶穌無應伊一句。Chiū ēng chōe-chōe ōe mn̄g I; nā-sī Iâ-so͘ bô ìn i chi̍t kù.

10Hiah-ê祭司頭kap經學士khiā-teh，出力告伊。Hiah ê chè-si-thâu kap keng-ha̍k-sū khiā-teh, chhut-la̍t kò I.

11希律kap伊ê兵目底無伊，戲弄伊；用súi ê衫kā伊穿，koh送還彼拉多。Hi-lu̍t kap i ê peng ba̍k-tē-bô I, hì-lāng I; ēng súi ê saⁿ kā I chhēng, koh sàng hêng Pí-lia̍p-to.

12希律kap彼拉多平時結怨，hit日就做朋友。Hi-lu̍t kap Pí-lia̍p-to pêng-sî kiat-oàn, hit ji̍t chiū chòe pêng-iú.

13彼拉多召hiah-ê祭司頭，kap有司chham百姓來，Pí-lia̍p-to tiàu hiah ê chè-si-thâu, kap iú-si chham peh-sìⁿ lâi,

14對in講，Lín帶chit-ê人到我chia，講伊是迷惑百姓ê；你看，我tī lín ê面前已經審問伊；總是論到lín所告伊ê事，我查出伊lóng無罪。tùi in kóng, Lín tòa chit ê lâng kàu góa chia, kóng I sī bê-he̍k peh-sìⁿ ê; lí khòaⁿ, góa tī lín ê bīn-chêng í-keng sím-mn̄g I; chóng-sī lūn-kàu lín só͘ kò I ê sū, góa chhâ-chhut I lóng bô chōe.

15希律也是án-ni；因為有將伊送還咱；也你看，伊所行無一項應該死ê事。Hi-lu̍t iā sī án-ni; in-ūi ū chiong I sàng hêng lán; iā lí khòaⁿ, I só͘ kiâⁿ bô chi̍t hāng eng-kai sí ê sū.

16所以我behphah來tháu放伊Só͘-í góa beh phah lâi tháu-pàng I.

18In一齊喉叫講，Tio̍h除去chit-ê人，放巴拉巴hō͘阮。In chi̍t chôe âu-kiò kóng, Tio̍h tû-khì chit ê lâng, pàng Pa-lia̍p-pa hō͘ goán.

19Chit-ê 巴拉巴，因為tī城內作亂koh thâi-死人，chiah關落監。Chit ê Pa-lia̍p-pa, in-ūi tī siâⁿ-lāi chok-loān koh thâi-sí lâng, chiah koaiⁿ lo̍h kaⁿ.

20彼拉多ài放耶穌，就koh kap in講。Pí-lia̍p-to ài pàng Iâ-so͘, chiū koh kap in kóng.

21但是in叫，釘伊十字架，釘伊十字架。Nā-sī in kiò, Tèng I si̍p-jī-kè, tèng I si̍p-jī-kè.

22彼拉多第三pái對in講，是怎樣？伊有行甚麼pháiⁿ？我看伊無一項應該死ê罪；所以behphah來tháu放伊Pí-lia̍p-to tē saⁿ pái tùi in kóng, Sī cháiⁿ-iūⁿ? I ū kiâⁿ sím-mi̍h pháiⁿ? Góa khòaⁿ I bô chi̍t hāng eng-kai sí ê chōe; só͘-í beh phah lâi tháu-pàng I.

23In大聲迫切求釘伊tī十字架。In ê聲khah贏。In tōa siaⁿ pek-chhiat kiû tèng I tī si̍p-jī-kè. In ê siaⁿ khah-iâⁿ.

24彼拉多擬斷照in所求ê來行:Pí-lia̍p-to gí-toàn chiàu in só͘ kiû ê lâi kiâⁿ:

25就tháu放in所求hit-ê為tio̍h作亂續thâi死人關落監ê；將耶穌交in，來順in ê意思。chiū tháu-pàng in só͘ kiû hit ê ūi-tio̍h chok-loān sòa thâi-sí lâng koaiⁿ lo̍h kaⁿ ê; chiong Iâ-so͘ kau in, lâi sūn in ê ì-sù.

26帶耶穌去ê時，有一個Kó͘-lī-nāi ê人，西門，tùi鄉下來，in就khiú伊來，將十字架掛tī伊ê肩頭，hō͘伊giâ來tè耶穌。Tòa Iâ-so͘ khì ê sî, ū chi̍t ê Kó͘-lī-nāi ê lâng, Se-bûn, tùi hiuⁿ-ē lâi, in chiū khiú i lâi, chiong si̍p-jī-kè khòa tī i ê keng-thâu, hō͘ i giâ lâi tè Iâ-so͘.

27Tè伊ê人有百姓kap婦人人chōe-chōe，婦人人為tio̍h伊搥胸哀傷。Tè I ê lâng ū peh-sìⁿ kap hū-jîn-lâng chōe-chōe, hū-jîn-lâng ūi-tio̍h I tûi heng ai-siong.

28耶穌oa̍t頭對in講，耶路撒冷ê婦人人ah，莫得為tio̍h我啼哭，tio̍h為tio̍h lín家己kap家己ê Kiáⁿ兒來啼哭:Iâ-so͘ oa̍t thâu tùi in kóng, Iâ-lō͘-sat-léng ê hū-jîn-lâng ah, bo̍h-tit ūi-tio̍h góa thî-khàu, tio̍h ūi-tio̍h lín ka-kī kap ka-kī ê kiáⁿ-jî lâi thî-khàu:

29因為時beh到，人beh講，bōe會懷孕ê婦人人，bē bat生產ê胎，bē bat hō͘ gín-ná suh ê奶頭，有福氣。in-ūi sî beh kàu, lâng beh kóng, Bōe-ōe hoâi-īn ê hū-jîn-lâng, bē bat seng-sán ê thai, bē bat hō͘ gín-ná suh ê lin-thâu, ū hok-khì.

30Hit時人就beh對山講，Teh阮；也對山á講，蓋阮。Hit sî lâng chiū beh tùi soaⁿ kóng, Teh goán; iā tùi soaⁿ-á kóng, Khàm goán.

31因為tī青ê樹木若行án-ni，就tī乾ê樹木beh怎樣ah？In-ūi tī chhiⁿ ê chhiū-ba̍k nā kiâⁿ án-ni, chiū tī ta ê chhiū-ba̍k beh cháiⁿ-iūⁿ ah?

32Koh有兩個犯人hō͘人帶去，kap耶穌同受死。Koh ū nn̄g ê hoān-lâng hō͘ lâng tòa-khì, kap Iâ-so͘ tâng siū sí.

33到一所在名叫頭殼碗，就tī hia釘伊tī十字架；koh釘hiah-ê犯人，一個tī chiàⁿ-pêng，一個tī tò-pêng。Kàu chi̍t só͘-chāi miâ kiò Thâu-khak-óaⁿ, chiū tī hia tèng I tī si̍p-jī-kè; koh tèng hiah ê hoān-lâng, chi̍t-ê tī chiàⁿ pêng, chi̍t-ê tī tò pêng.

34耶穌講，父ah，赦免in，因為in所做ê，in m̄知。人就liam-khau分伊ê衫。Iâ-so͘ kóng, Pē ah, sià-bián in, in-ūi in só͘ chòe ê, in m̄ chai. Lâng chiū liam-khau pun I ê saⁿ.

35Hiah-ê有司譏刺伊講，伊bat救別人；若是做上帝ê基督，受揀選ê，tio̍h救家己。Hiah ê iú-si ki-chhì I kóng, I bat kiù pa̍t lâng; nā sī chòe Siōng-tè ê Ki-tok, siū kéng-soán ê, tio̍h kiù ka-kī.

36兵丁也戲弄伊，近óa用醋hō͘伊，Peng-teng iā hì-lāng I, kūn-óa ēng chhò͘ hō͘ I,

37講，你若是猶太人ê王，tio̍h救家己。kóng, Lí nā sī Iû-thài lâng ê ông, tio̍h kiù ka-kī.

38Tī伊ê頂面有斬條寫講，chit-ê是猶太人ê王。Tī I ê téng-bīn ū chám-tiâu siá kóng, Chit-ê sī Iû-thài lâng ê ông.

39受吊teh ê犯人一個褻瀆伊，講，你Kiám m̄是基督mah？Tio̍h救家己kap阮。Siū tiàu-teh ê hoān-lâng chi̍t-ê siat-to̍k I, kóng, Lí kiám m̄ sī Ki-tok mah? Tio̍h kiù ka-kī kap goán.

40第二個應來責備伊，講，你既然同受罪，連上帝也m̄驚mah？Tē jī ê ìn lâi chek-pī i, kóng, Lí kì-jiân tâng siū chōe, liân Siōng-tè iā m̄ kiaⁿ mah?

41咱受罪是公道；因為咱所受ê合tī咱所行；但是chit人所行ê，無一項m̄ tio̍h。Lán siū chōe sī kong-tō; in-ūi lán só͘ siū ê ha̍p tī lán só͘ kiâⁿ; nā-sī chit lâng só͘ kiâⁿ ê, bô chi̍t hāng m̄ tio̍h.

42就講，耶穌ah，你tī你ê國來ê時，tio̍h記得我。Chiū kóng, Iâ-so͘ ah, lí tī lí ê kok lâi ê sî, tio̍h kì-tit góa.

43耶穌就kā伊講，我實在kā你講，今á日你beh kap我tī樂園。Iâ-so͘ chiū kā i kóng, Góa si̍t-chāi kā lí kóng, Kin-á-ji̍t lí beh kap góa tī Lo̍k-hn̂g.

44日中晝，全地烏暗；到三點鐘ê時，日ê光無去；Ji̍t tiong-tàu, choân tōe o͘-àm; kàu saⁿ tiám cheng ê sî, ji̍t ê kng bô-khì;

45殿內ê帳tùi中裂開。tiān-lāi ê tiùⁿ tùi tiong li̍h-khui.

46耶穌大聲叫，就講，父ah，我ê神交代你ê手。Chiah-ê話講soah，氣就斷。Iâ-so͘ tōa siaⁿ kiò, chiū kóng, Pē ah, góa ê sîn kau-tāi lí ê chhiú. Chiah ê ōe kóng soah, khùi chiū tn̄g.

47百總看見chit-ê tāi-chì，歸榮光上帝，講，Chit-ê真正是義ê人。Pé-chóng khòaⁿ-kìⁿ chit ê tāi-chì, kui êng-kng Siōng-tè, kóng, Chit-ê chin-chiàⁿ sī gī ê lâng.

48聚集teh看ê眾人看見chiah-ê tāi-chì，lóng搥胸tò去。Chū-chi̍p teh khòaⁿ ê chèng lâng khòaⁿ-kìⁿ chiah ê tāi-chì, lóng tûi heng tò-khì.

49Hiah-ê Kap耶穌相識ê，以及hiah-ê tùi加利利tè伊來ê婦人人，lóng遠遠teh khiā，來看chiah-ê事。Hiah-ê kap Iâ-so͘ saⁿ-bat ê, í-ki̍p hiah-ê tùi Ka-lī-lī tè I lâi ê hū-jîn-lâng, lóng hn̄g-hn̄g teh khiā, lâi khòaⁿ chiah ê sū.

50有一人名約瑟，伊是議員，做人好koh義；Ū chi̍t lâng miâ Iok-sek, i sī gī-oân, chòe lâng hó koh gī;

51伊無同hiah-ê人所計謀所做ê，伊是屬猶太人ê A-lī-má-thài城，平素欣慕上帝國ê。i bô tâng hiah ê lâng só͘ kè-bô͘ só͘ chòe ê, i sī sio̍k Iû-thài lâng ê A-lī-má-thài siâⁿ, pêng-sò͘ him-bō͘ Siōng-tè kok ê.

52Chit人去見彼拉多，來求耶穌ê身屍。Chit lâng khì kìⁿ Pí-lia̍p-to, lâi kiû Iâ-so͘ ê sin-si.

53就收伊落來，用幼苧布包伊，hē tī石鑿ê墓，lóng bē bat埋葬人ê。Chiū siu I lo̍h-lâi, ēng iù-tōe pò͘ pau I, hē tī chio̍h chha̍k ê bōng, lóng bē bat bâi-chòng lâng ê.

54Hit日就是備辦節ê日，安歇日近lah。Hit ji̍t chiū-sī pī-pān choeh ê ji̍t, an-hioh-ji̍t kūn lah.

55Tùi加利利kap耶穌saⁿ-kap來hiah-ê婦人人tè tī後面，看伊ê墓，kap怎樣hē伊ê身屍。Tùi Ka-lī-lī kap Iâ-so͘ saⁿ-kap lâi hiah ê hū-jîn-lâng tè tī āu-bīn, khòaⁿ I ê bōng, kap cháiⁿ-iūⁿ hē I ê sin-si.

56就tò去備辦香料、香油；當安歇日照誡命來歇。Chiū tò-khì pī-pān hiuⁿ-liāu hiuⁿ-iû; tng an-hioh-ji̍t chiàu kài-bēng lâi hioh.

1七日ê頭一日，天phú光，hiah-ê婦人人帶所備辦hiah-ê香料到墓；Chhit-ji̍t ê thâu chi̍t ji̍t, thiⁿ phú-kng, hiah ê hū-jîn-lâng tòa só͘ pī-pān hiah ê hiuⁿ-liāu kàu bōng;

2看見石已經tùi墓門kō開。khòaⁿ-kìⁿ chio̍h í-keng tùi bōng-mn̂g kō khui.

3就入去，無看見主ê身屍。Chiū ji̍p-khì, bô khòaⁿ-kìⁿ Chú ê sin-si.

4為tio̍h án-ni teh躊躇ê時，忽然有兩人khiā tī in身邊，衣裳光nà-nà。Ūi-tio̍h án-ni teh tiû-tû ê sî, hut-jiân ū nn̄g lâng khiā tī in sin-piⁿ, i-chiûⁿ kng nà-nà.

5婦人人驚惶，面àⁿ落地；hit兩人kā in講，啥事tī死人中chhē活人ah？Hū-jîn-lâng kiaⁿ-hiâⁿ, bīn àⁿ-lo̍h tōe; hit nn̄g lâng kā in kóng, Siáⁿ-sū tī sí-lâng tiong chhē oa̍h-lâng ah?

6伊無tī chia，已經koh活。Lín tio̍h記得伊iáu tī加利利ê時有怎樣kā lín講，I bô tī chia, í-keng koh-oa̍h. Lín tio̍h kì-tit I iáu tī Ka-lī-lī ê sî ū cháiⁿ-iūⁿ kā lín kóng,

7人子的確tio̍h交tī罪人ê手，hō͘ in釘tī十字架，第三日koh活。Jîn-chú tek-khak tio̍h kau tī chōe-jîn ê chhiú, hō͘ in tèng tī si̍p-jī-kè, tē saⁿ ji̍t koh-oa̍h.

8In就記得伊ê話；In chiū kì-tit I ê ōe;

9tùi墓裡tò去，將chiah-ê事lóng報hō͘十一個學生kap其餘ê眾人知。tùi bōng-ni̍h tò-khì, chiong chiah ê sū lóng pò hō͘ cha̍p-it ê ha̍k-seng kap kî-û ê chèng lâng chai.

10去tùi使徒講chiah-ê tāi-chì ê，就是Boa̍t-tāi-lia̍p ê馬利亞，kapIok-a-ná，kap雅各ê老母馬利亞，以及其餘kap in做伴ê婦人人。Khì tùi sù-tô͘ kóng chiah ê tāi-chì ê, chiū-sī Boa̍t-tāi-lia̍p ê Má-lī-a, kap Iok-a-ná, kap Ngá-kok ê lāu-bú Má-lī-a, í-ki̍p kî-û kap in chòe-phōaⁿ ê hū-jîn-lâng.

11使徒看hiah-ê話做無影，也m̄信伊Sù-tô͘ khòaⁿ hiah ê ōe chòe bô iáⁿ, iā m̄ sìn i.

12但是彼得起來走到墓裡，àⁿ落去看，只有看見幼苧布nā-tiāⁿ；就tò去in厝，teh奇怪所經過ê事。Nā-sī Pí-tek khí-lâi cháu kàu bōng-ni̍h, àⁿ-lo̍h-khì khòaⁿ, chí-ū khòaⁿ-kìⁿ iù-tōe pò͘ nā-tiāⁿ; chiū tò-khì in chhù, teh kî-koài só͘ keng-kè ê sū.

13Siāng hit日，學生中有兩人去一個鄉社，名Í-má-ngó͘，離耶路撒冷二十五里。Siāng hit ji̍t ha̍k-seng tiong ū nn̄g lâng khì chi̍t ê hiuⁿ-siā, miâ Í-má-ngó͘, lī Iâ-lō͘-sat-léng jī-cha̍p-gō͘ lí.

14In saⁿ-kap談論所經過lóng總ê事。In saⁿ-kap tâm-lūn só͘ keng-kè lóng-chóng ê sū.

15In teh談論相問ê時，耶穌本身近óa，kap in saⁿ-kap行。In teh tâm-lūn saⁿ-mn̄g ê sî, Iâ-so͘ pún-sin kūn-óa, kap in saⁿ-kap kiâⁿ.

16In兩人迷目，致到bōe認得伊。In nn̄g lâng bê-ba̍k, tì-kàu bōe jīn-tit I.

17伊對in講，Lín行ê時，saⁿ-kap辯論ê是甚麼話？In就khiā-teh，面帶憂容。I tùi in kóng, Lín kiâⁿ ê sî, saⁿ-kap piān-lūn ê sī sím-mi̍h ōe? In chiū khiā-teh, bīn tài-iu-iông.

18其中一個，名Kek-liû-pa，應伊講，你kiám單身出外tī耶路撒冷，也m̄知近日tī hia所經過ê事mah？Kî-tiong chi̍t-ê, miâ Kek-liû-pa, ìn I kóng, Lí kiám toaⁿ-sin chhut-gōa tī Iâ-lō͘-sat-léng, iā m̄ chai kūn-ji̍t tī hia só͘ keng-kè ê sū mah?

19伊kā in講，甚麼事ah？Inka7伊講，就是拿撒勒人耶穌ê事；伊是先知人，tī上帝kap眾百姓ê面前所講所行有權能；I kā in kóng, Sím-mi̍h sū ah? In kā I kóng, Chiū-sī Ná-sat-le̍k lâng Iâ-so͘ ê sū; I sī sian-ti lâng, tī Siōng-tè kap chèng peh-sìⁿ ê bīn-chêng só͘ kóng só͘ kiâⁿ ū koân-lêng;

20也hiah-ê祭司頭kap咱ê序大解送伊去定死罪，釘伊tī十字架。iā hiah ê chè-si-thâu kap lán ê sī-tōa ké-sàng I khì tēng sí chōe, tèng I tī si̍p-jī-kè.

21但是阮平素teh ǹg望伊就是hit-ê beh贖回以色列ê。M̄-nā án-ni，koh chiah-ê事成已經三日lah。Nā-sī goán pêng-sò͘ teh ǹg-bāng I chiū-sī hit-ê beh sio̍k-hôe Í-sek-lia̍t ê. M̄ nā án-ni, koh chiah ê sū chiâⁿ í-keng saⁿ ji̍t lah.

22Koh阮中間幾nā ê婦人人hō͘阮真gông-ngia̍h；因為inphah-phú光到墓裡；Koh goán tiong-kan kúi-nā ê hū-jîn-lâng hō͘ goán chin gông-ngia̍h; in-ūi in phah-phú-kng kàu bōng-ni̍h;

23無看見伊ê身屍，就來講，in有看見天使出現，講伊koh活lah。bô khòaⁿ-kìⁿ I ê sin-si, chiū lâi kóng, in ū khòaⁿ-kìⁿ thiⁿ-sài chhut-hiān, kóng I koh-oa̍h lah.

24阮中間幾nā人到墓裡，果然看見照婦人人所講ê；總是無看見伊Goán tiong-kan kúi-nā lâng kàu bōng-ni̍h, kó-jiân khòaⁿ-kìⁿ chiàu hū-jîn-lâng só͘ kóng ê; chóng-sī bô khòaⁿ-kìⁿ I.

25耶穌對in講，無知ê人ah，先知所講一切ê話，lín ê心怎樣hiah oh信ah！Iâ-so͘ tùi in kóng, Bû-ti ê lâng ah, sian-ti só͘ kóng it-chhè ê ōe, lín ê sim cháiⁿ-iūⁿ hiah oh sìn ah!

26基督受chiah-ê艱苦，來入伊ê榮光，Kiám m̄應該mah？Ki-tok siū chiah ê kan-khó͘, lâi ji̍p I ê êng-kng, kiám m̄ eng-kai mah?

27就tùi摩西kap眾先知起，見若聖經中所指伊ê，lóng kā in解明。Chiū tùi Mô͘-se kap chèng sian-ti khí, kìⁿ-nā sèng-keng tiong só͘ chí I ê, lóng kā in kóe-bêng.

28將近所去ê鄉社，耶穌親像beh行khah遠。Chiong-kūn só͘ khì ê hiuⁿ-siā, Iâ-so͘ chhin-chhiūⁿ beh kiâⁿ khah hn̄g.

29兩人強留伊講，請kap阮tòa；時已經òaⁿ，日beh落lah。伊就入去，beh kap in tòa。Nn̄g lâng kiông lâu I kóng, Chhiáⁿ kap goán tòa; sî í-keng òaⁿ, ji̍t beh lo̍h lah. I chiū ji̍p-khì, beh kap in tòa.

30Saⁿ-kap坐桌ê時，耶穌the̍h餅祝謝，peh來hō͘ in。Saⁿ-kap chē toh ê sî, Iâ-so͘ the̍h piáⁿ chiok-siā, peh lâi hō͘ in.

31In ê目睭開，就認得伊；liâm-piⁿ無koh看見。In ê ba̍k-chiu khui, chiū jīn-tit I; liâm-piⁿ bô koh khòaⁿ-kìⁿ.

32In就saⁿ-kap講，路裡伊kap咱講話，開拆聖經ê時，咱ê心kiám無熱mah？In chiū saⁿ-kap kóng, Lō͘-ni̍h I kap lán kóng ōe, khui-thiah sèng-keng ê sî, lán ê sim kiám bô jia̍t mah?

33就即時起身，tò去耶路撒冷，tú-tio̍h十一個學生，kap同tī-teh ê人聚集teh講，Chiū chek-sî khí-sin, tò-khì Iâ-lō͘-sat-léng, tú-tio̍h cha̍p-it ê ha̍k-seng, kap tâng tī-teh ê lâng chū-chi̍p teh kóng,

34主果然koh活，也出現hō͘西門看見。Chú kó-jiân koh-oa̍h, iā chhut-hiān hō͘ Se-bûn khòaⁿ-kìⁿ.

35In兩人也講起tī路裡所tú-tio̍h ê事，kap tī peh餅ê時in怎樣認得伊In nn̄g lâng iā kóng-khí tī lō͘-ni̍h só͘ tú-tio̍h ê sū, kap tī peh piáⁿ ê sî in cháiⁿ-iūⁿ jīn-tit I.

36In teh講chiah-ê話ê時，耶穌本身khiā tī in中間，kā in講，願lín平安。In teh kóng chiah ê ōe ê sî, Iâ-so͘ pún-sin khiā tī in tiong-kan, kā in kóng, Goān lín pêng-an.

37In gông-ngia̍h koh驚，掠做所看見ê是神。In gông-ngia̍h koh kiaⁿ, lia̍h-chòe só͘ khòaⁿ-kìⁿ ê sī sîn.

38伊就kā in講，Lín啥事jû亂，心內生起僥疑ah？I chiū kā in kóng, Lín siáⁿ-sū jû-loān, sim-lāi siⁿ-khí giâu-gî ah?

39Tio̍h看我ê手我ê腳，就是我本身；摸我，就知；因為神無骨無肉，照lín看見我lóng是有。Tio̍h khòaⁿ góa ê chhiú góa ê kha, chiū-sī góa pún-sin; bong góa, chiū chai; in-ūi sîn bô kut bô bah, chiàu lín khòaⁿ-kìⁿ góa lóng sī ū.

40講án-ni，就將手kap腳hō͘ in看。Kóng án-ni, chiū chiong chhiú kap kha hō͘ in khòaⁿ.

41學生為tio̍h歡喜ê緣故，iáu-kú無信，koh teh奇怪，伊kā in講，Lín tī chia有甚麼thang食無？Ha̍k-seng ūi-tio̍h hoaⁿ-hí ê iân-kò͘, iáu-kú bô sìn, koh teh kî-koài, I kā in kóng, Lín tī chia ū sím-mi̍h thang chia̍h bô?

42In就將pek ê魚一片hō͘伊；In chiū chiong pek ê hî chi̍t phìⁿ hō͘ I;

43伊the̍h去，當in ê面前食伊。I the̍h-khì, tng in ê bīn-chêng chia̍h i.

44Koh對in講，Chiah-ê就是我iáu-kú kap lín tī-teh ê時所對lín講ê話，講見若tī摩西ê律法，kap hiah-ê先知，以及詩篇，所記載指我ê話lóng的確tio̍h應驗。Koh tùi in kóng, Chiah-ê chiū-sī góa iáu-kú kap lín tī-teh ê sî só͘ tùi lín kóng ê ōe, kóng kìⁿ-nā tī Mô͘-se ê lu̍t-hoat, kap hiah ê sian-ti, í-ki̍p Si-phian, só͘ kì-chài chí góa ê ōe lóng tek-khak tio̍h èng-giām.

45就開in ê心竅，hō͘ in能曉悟hiah-ê聖經。Chiū khui in ê sim-khiàu, hō͘ in ōe hiáu-ngō͘ hiah ê sèng-keng.

46Koh kā in講，有án-ni記載，基督tio̍h受苦，第三日tùi死人中koh活；Koh kā in kóng, Ū án-ni kì-chài, Ki-tok tio̍h siū khó͘, tē saⁿ ji̍t tùi sí-lâng tiong koh-oa̍h;

47也反悔kap赦罪ê道理beh tī伊ê名來傳到萬邦，是tùi耶路撒冷起。iā hoán-hóe kap sià-chōe ê tō-lí beh tī I ê miâ lâi thoân kàu bān pang, sī tùi Iâ-lō͘-sat-léng khí.

48Lín做chiah-ê tāi-chì ê干證。Lín chòe chiah ê tāi-chì ê kan-chèng.

49也我beh差我ê父所應允ê到tī lín；總是lín tio̍h tiàm tī chit-ê城，thèng候tùi頂面落來ê權能親像衫kā lín穿。Iā góa beh chhe góa ê Pē só͘ èng-ún ê kàu tī lín; chóng-sī lín tio̍h tiàm tī chit ê siâⁿ, thèng-hāu tùi téng-bīn lo̍h-lâi ê koân-lêng chhin-chhiūⁿ saⁿ kā lín chhēng.

50就chhōa in出去到伯大尼 ê對面，kia̍h起手，kā in祝福。Chiū chhōa in chhut-khì kàu Pek-tāi-nî ê tùi-bīn, kia̍h-khí chhiú, kā in chiok-hok.

51祝福ê時，就離別in，受chih接上天。Chiok-hok ê sî, chiū lī-pia̍t in, siū chih-chiap chiūⁿ thiⁿ.

52In就拜伊；就倒tńg去耶路撒冷，大大歡喜:In chiū pài I; chiū tò-tńg-khì Iâ-lō͘-sat-léng, tōa-tōa hoaⁿ-hí:

53常常tī殿內，o-ló上帝。siông-siông tī tiān-lāi, o-ló Siōng-tè.

1Tī起頭有道，道kap上帝saⁿ-kap tī-teh，道就是上帝。Tī khí-thâu ū Tō, Tō kap Siōng-tè saⁿ-kap tī-teh, Tō chiū-sī Siōng-tè.

2Chit-ê道tī起頭kap上帝saⁿ-kap tī-teh。Chit ê Tō tī khí-thâu kap Siōng-tè saⁿ-kap tī-teh.

3萬物tùi道來創造；見若受創造ê，無一項m̄是對伊來創造。Bān mi̍h tùi Tō lâi chhòng-chō; kìⁿ-nā siū chhòng-chō ê, bô chi̍t hāng m̄ sī tùi I lâi chhòng-chō.

4活命tī伊ê內面；chit-ê活命是人ê光。Oa̍h-miā tī I ê lāi-bīn; chit ê oa̍h-miā sī lâng ê kng.

5光照tī烏暗；烏暗無接納伊。Kng chiò tī o͘-àm; o͘-àm bô chiap-la̍p i.

6有一人tùi上帝差來，名叫約翰。Ū chi̍t lâng tùi Siōng-tè chhe lâi, miâ kiò Iok-hān.

7Chit-ê人來做干證，是beh為tio̍h光做干證，hō͘眾人對伊來信。Chit ê lâng lâi chòe kan-chèng, sī beh ūi-tio̍h kng chòe kan-chèng, hō͘ chèng lâng tùi I lâi sìn.

8伊m̄是hit-ê光，是beh為tio̍h光做干證nā-tiāⁿ。I m̄ sī hit ê kng, sī beh ūi-tio̍h kng chòe kan-chèng nā-tiāⁿ.

9有真ê光來入世間，teh照萬人。Ū chin ê kng lâi ji̍p sè-kan, teh chiò bān lâng.

10伊tī世間，世間對伊來創造，也世間m̄-bat伊。I tī sè-kan, sè-kan tùi I lâi chhòng-chō, iā sè-kan m̄ bat I.

11伊到家己ê所在，也家己ê人m̄接納伊。I kàu ka-kī ê só͘-chāi, iā ka-kī ê lâng m̄ chiap-la̍p I.

12見若接納伊ê，就是信伊ê名ê人，伊就賞賜in有權，成做上帝ê kiáⁿ兒；Kìⁿ-nā chiap-la̍p I ê, chiū-sī sìn I ê miâ ê lâng, I chiū siúⁿ-sù in ū koân, chiâⁿ-chòe Siōng-tè ê kiáⁿ-jî;

13in m̄是tùi血氣，亦m̄是tùi肉體ê意思，亦m̄是tùi人ê意思生ê，就是tùi上帝。in m̄ sī tùi hiat-khì, ia̍h m̄ sī tùi jio̍k-thé ê ì-sù, ia̍h m̄ sī tùi lâng ê ì-sù siⁿ ê, chiū-sī tùi Siōng-tè.

14道成肉體，khiā起tī咱中間，有恩典kap真理滿滿；koh阮bat看見伊ê榮光，親像獨生ê kiáⁿ tùi父所得ê榮光。Tō chiâⁿ jio̍k-thé, khiā-khí tī lán tiong-kan, ū un-tián kap chin-lí móa-móa; koh goán bat khòaⁿ-kìⁿ I ê êng-kng, chhin-chhiūⁿ to̍k siⁿ ê Kiáⁿ tùi Pē só͘ tit ê êng-kng.

15約翰為tio̍h伊做干證，叫講，Chit-ê就是我所講，tè尾我來ê，成做我ê事先；因為伊本事先我tī-teh。Iok-hān ūi-tio̍h I chòe kan-chèng, kiò kóng, Chit-ê chiū-sī góa só͘ kóng, tè-bé góa lâi ê, chiâⁿ-chòe góa ê tāi-seng; in-ūi I pún tāi-seng góa tī-teh.

16因為tùi伊ê充滿咱lóng有所受，就恩典續接恩典。In-ūi tùi I ê chhiong-móa lán lóng ū só͘ siū, chiū un-tián sòa-chiap un-tián.

17因為律法是tùi摩西來傳；恩典kap真理是tùi耶穌基督chiah有。In-ūi lu̍t-hoat sī tùi Mô͘-se lâi thoân; un-tián kap chin-lí sī tùi Iâ-so͘ Ki-tok chiah ū.

18Bē bat有人看見上帝；只有tī父心懷中獨生ê kiáⁿ有表明伊。Bē bat ū lâng khòaⁿ-kìⁿ Siōng-tè; chí-ū tī Pē sim-hoâi tiong to̍k-siⁿ ê Kiáⁿ ū piáu-bêng I.

19約翰ê干證記tī下底： 猶太人tùi耶路撒冷差祭司kap利未人就近伊來問講，你是是誰？Iok-hān ê kan-chèng kì tī ē-tóe: Iû-thài lâng tùi Iâ-lō͘-sat-léng chhe chè-si kap Lī-bī lâng chiū-kūn i lâi mn̄g kóng, Lí sī chī-chūi?

20Hit時約翰承認無隱瞞；伊承認講，我m̄是基督。Hit sî Iok-hān sêng-jīn bô ún-môa; i sêng-jīn kóng, Góa m̄ sī Ki-tok.

21Koh問伊，這是怎樣？你是以利亞mah？伊講，m̄是。你是hit-ê先知mah？應講，m̄是。Koh mn̄g i, Che sī cháiⁿ-iūⁿ? Lí sī Í-lī-a mah? I kóng, M̄ sī. Lí sī hit ê sian-ti mah? Ìn kóng, M̄ sī.

22就kā伊講，你是是誰？hō͘阮thang回覆差阮ê。你tio̍h講家己是怎樣？Chiū kā i kóng, Lí sī chī-chūi? hō͘ goán thang hê-hok chhe goán ê. Lí tio̍h kóng ka-kī sī cháiⁿ-iūⁿ?

23講，我就是teh叫tī曠野ê ê聲，講，修直主ê路，親像先知以賽亞所講ê。Kóng, Góa chiū-sī teh kiò tī khòng-iá ê ê siaⁿ, kóng, Siu ti̍t Chú ê lō͘, chhin-chhiūⁿ sian-ti Í-sài-a só͘ kóng ê.

24Hiah-ê人就是法利賽人所差ê。Hiah ê lâng chiū-sī Hoat-lī-sài lâng só͘ chhe ê.

25In koh問伊講，你若m̄是基督，亦m̄是以利亞，亦m̄是hit-ê先知，怎樣行洗禮ah？In koh mn̄g i kóng, Lí nā m̄ sī Ki-tok, ia̍h m̄ sī Í-lī-a, ia̍h m̄ sī hit ê sian-ti, cháiⁿ-iūⁿ kiâⁿ sóe-lé ah?

26約翰應伊，講，我是用水行洗禮；有khiā tī lín中間ê，lín m̄-bat伊。Iok-hān ìn i, kóng, Góa sī ēng chúi kiâⁿ sóe-lé; ū khiā tī lín tiong-kan ê, lín m̄ bat I.

27伊就是tè尾我來ê，就tháu伊ê鞋帶，我亦bōe堪得。I chiū-sī tè-bé góa lâi ê, chiū tháu I ê ôe-tòa, góa ia̍h bōe kham-tit.

28Chiah-ê事行tī約旦外ê伯大尼，就是約翰行洗禮ê所在。Chiah ê sū kiâⁿ tī Iok-tàn gōa ê Pek-tāi-nî, chiū-sī Iok-hān kiâⁿ sóe-lé ê só͘-chāi.

29隔日，約翰看見耶穌就近伊，就講，你看，上帝ê羊羔，就是擔當世間ê罪ê。Keh ji̍t, Iok-hān khòaⁿ-kìⁿ Iâ-so͘ chiū-kūn i, chiū kóng, Lí khòaⁿ, Siōng-tè ê Iûⁿ-ko, chiū-sī tam-tng sè-kan ê chōe ê.

30Chit-ê就是我所bat講，有一人tè尾我來，成做我ê事先，因為伊本事先我tī-teh。Chit-ê chiū-sī góa só͘ bat kóng, Ū chi̍t lâng tè-bé góa lâi, chiâⁿ-chòe góa ê tāi-seng, in-ūi I pún tāi-seng góa tī-teh.

31我本m̄-bat伊；獨獨beh hō͘伊顯明tī以色列人，所以我來用水行洗禮。Góa pún m̄ bat I; to̍k-to̍k beh hō͘ I hián-bêng tī Í-sek-lia̍t lâng, só͘-í góa lâi ēng chúi kiâⁿ sóe-lé.

32約翰koh干證講，我bat看見聖神親像鴿á tùi天降落，歇tī伊頂面。Iok-hān koh kan-chèng kóng, Góa bat khòaⁿ-kìⁿ Sèng Sîn chhin-chhiūⁿ chíⁿ-á tùi thiⁿ kàng-lo̍h, hioh tī I téng-bīn.

33我平素m̄-bat伊；獨獨差我用水行洗禮ê，kā我講，你看聖神降臨，歇tī伊頂面，伊就是用聖神行洗禮ê。Góa pêng-sò͘ m̄ bat I; to̍k-to̍k chhe góa ēng chúi kiâⁿ sóe-lé ê, kā góa kóng, Lí khòaⁿ Sèng Sîn kàng-lîm, hioh tī I téng-bīn, I chiū-sī ēng Sèng Sîn kiâⁿ sóe-lé ê.

34我bat看見，來干證chit-ê是上帝ê kiáⁿ。Góa bat khòaⁿ-kìⁿ, lâi kan-chèng chit-ê sī Siōng-tè ê Kiáⁿ.

35Koh隔日，約翰kap伊兩個學生teh khiā；Koh keh ji̍t, Iok-hān kap i nn̄g ê ha̍k-seng teh khiā;

36看見耶穌teh行，就講，你看，上帝ê羊羔。khòaⁿ-kìⁿ Iâ-so͘ teh kiâⁿ, chiū kóng, Lí khòaⁿ, Siōng-tè ê Iûⁿ-ko.

37Hit兩個學生聽伊所講，就tè耶穌。Hit nn̄g ê ha̍k-seng thiaⁿ i só͘ kóng, chiū tè Iâ-so͘.

38耶穌oa̍t-tńg身，看in teh tè伊，就kā in講，Lín teh chhē甚麼？In kā伊講，拉比，你tiàm-tī tá-lo̍h？(拉比，翻譯就是先生)Iâ-so͘ oa̍t-tńg-sin, khòaⁿ in teh tè I, chiū kā in kóng, Lín teh chhē sím-mi̍h? In kā I kóng, Lia̍p-pí, lí tiàm tī tá-lo̍h? (Lia̍p-pí, hoan-e̍k chiū-sī Sian-siⁿ).

39耶穌kā in講，Lín來就會看見。In就去，看伊所tòa ê所在；hit日kap伊saⁿ-kap tòa；hit時約略四點鐘。Iâ-so͘ kā in kóng, Lín lâi chiū ōe khòaⁿ-kìⁿ. In chiū khì, khòaⁿ I só͘ tòa ê só͘-chāi; hit ji̍t kap I saⁿ-kap tòa; hit sî iok-lio̍k sì tiám cheng.

40聽約翰ê話來tè耶穌ê兩人，其中一個是西門彼得ê兄弟，安得烈。Thiaⁿ Iok-hān ê ōe lâi tè Iâ-so͘ ê nn̄g lâng, kî-tiong chi̍t-ê sī Se-bûn Pí-tek ê hiaⁿ-tī, An-tek-lia̍t.

41伊事先tú-tio̍h in兄弟西門，kā伊講，阮已經tú-tio̍h彌賽亞(翻譯就是基督)。I tāi-seng tú-tio̍h in hiaⁿ-tī Se-bûn, kā i kóng, Goán í-keng tú-tio̍h Bí-sài-a (hoan-e̍k chiū-sī Ki-tok).

42就chhōa伊就近耶穌。耶穌看伊講，你就是約翰ê kiáⁿ西門；你beh稱做磯法(翻譯就是彼得)。Chiū chhōa i chiū-kūn Iâ-so͘. Iâ-so͘ khòaⁿ i kóng, Lí chiū-sī Iok-hān ê kiáⁿ Se-bûn; lí beh chheng chòe Ki-hoat (hoan-e̍k chiū-sī Pí-tek).

43Koh隔日，耶穌beh去加利利，tú-tio̍h腓力；就kā伊講，Tè我。Koh keh ji̍t, Iâ-so͘ beh khì Ka-lī-lī, tú-tio̍h Hui-le̍k; chiū kā i kóng, Tè góa.

44腓力是伯賽大ê人，kap安得烈彼得同城。Hui-le̍k sī Pek-sài-tāi ê lâng , kap An-tek-lia̍t Pí-tek tâng siâⁿ.

45腓力tú-tio̍h那但業，就kā伊講，摩西記tī律法kap chiah-ê先知所記ê，阮已經tú-tio̍h伊，就是約瑟ê kiáⁿ，拿撒勒人，耶穌。Hui-le̍k tú-tio̍h Ná-tàn-gia̍p, chiū kā i kóng, Mô͘-se kì tī lu̍t-hoat kap chiah ê sian-ti só͘ kì ê, goán í-keng tú-tio̍h I, chiū-sī Iok-sek ê kiáⁿ, Ná-sat-le̍k lâng, Iâ-so͘.

46那但業kā伊講，拿撒勒kiám會出甚麼好物mah？腓力講，來看。Ná-tàn-gia̍p kā i kóng, Ná-sat-le̍k kiám ōe chhut sím-mi̍h hó mi̍h mah? Hui-le̍k kóng, Lâi khòaⁿ.

47耶穌看見那但業就近伊，就chí伊，講，你看，真正是以色列人，sim無詭譎ê。Iâ-so͘ khòaⁿ-kìⁿ Ná-tàn-gia̍p chiū-kūn I, chiū chí i, kóng, Lí khòaⁿ, chin-chiàⁿ sī Í-sek-lia̍t lâng, sim bô khúi-khiat ê.

48那但業kā伊講，Tùi tá-lo̍h bat我？耶穌講，腓力iáu-bē叫你，你tī無花果樹腳，我已經看見你lah。Ná-tàn-gia̍p kā i kóng, Tùi tá-lo̍h bat góa? Iâ-so͘ kóng, Hui-le̍k iáu-bē kiò lí, lí tī bû-hoa-kó chhiū kha, góa í-keng khòaⁿ-kìⁿ lí lah.

49那但業應伊講，拉比，你就是上帝ê kiáⁿ；你就是以色列ê王。Ná-tàn-gia̍p ìn I kóng, Lia̍p-pí, lí chiū-sī Siōng-tè ê Kiáⁿ; lí chiū-sī Í-sek-lia̍t ê Ông.

50耶穌應伊講，因為我kā你講，我已經看見你tī無花果樹腳，你就信mah？你beh看見tāi-chì比chiah-ê khah大ê。Iâ-so͘ ìn i kóng, In-ūi góa kā lí kóng, Góa í-keng khòaⁿ-kìⁿ lí tī bû-hoa-kó chhiū kha, lí chiū sìn mah? Lí beh khòaⁿ-kìⁿ tāi-chì pí chiah-ê khah tōa ê.

51Koh kā伊講，我實實kā lín講，Lín beh看見天開，上帝ê天使上落tī人子ê頂面。Koh kā i kóng, Góa si̍t-si̍t kā lín kóng, Lín beh khòaⁿ-kìⁿ thiⁿ khui, Siōng-tè ê thiⁿ-sài chiūⁿ-lo̍h tī Jîn-chú ê téng-bīn.