1當hit時該撒A-kó͘-sū-tok有出詔，命令天下lóng造家甲。Tng hit sî Kai-sat A-kó͘-sū-tok ū chhut chiàu, bēng-lēng thiⁿ-ē lóng chō ke-kah.

2這頭一pái ê家甲是Ku-lí-liú做敘利亞總督ê時來做ê。Che thâu chi̍t pái ê ke-kah sī Ku-lí-liú chòe Sū-lī-a chóng-tok ê sî lâi chòe ê.

3眾人去造家甲，ta̍k人tò去本城。Chèng lâng khì chō ke-kah, ta̍k lâng tò-khì pún siâⁿ.

4約瑟ê世系屬tī大衛ê家，所以tùi加利利ê拿撒勒城上去猶太，到大衛ê城，名叫伯利恆ê，beh kap伊所聘定ê馬利亞saⁿ-kap造家甲；Iok-sek ê sè-hē sio̍k tī Tāi-pi̍t ê ke, só͘-í tùi Ka-lī-lī ê Ná-sat-le̍k siâⁿ chiūⁿ-khì Iû-thài, kàu Tāi-pi̍t ê siâⁿ, miâ kiò Pek-lī-hêng ê, beh kap i só͘ phèng-tiāⁿ ê Má-lī-a saⁿ-kap chō ke-kah;

5hit時馬利亞已經有身孕。hit sî Má-lī-a í-keng ū sin-īn.

6In tī hia ê時，生產ê期到。In tī hia ê sî seng-sán ê kî kàu.

7就生頭chiūⁿ kiáⁿ，用布包伊，hō͘伊睏tī槽裡；因為客館無所在thang容允in。Chiū siⁿ thâu-chiūⁿ kiáⁿ, ēng pò͘ pau I, hō͘ I khùn tī chô-ni̍h; in-ūi kheh-koán bô só͘-chāi thang iông-ún in.

8Hit地方有顧羊ê tòa tī山裡，暝時守更顧in ê羊群。Hit tōe-hng ū kò͘-iûⁿ ê tòa tī soaⁿ-ni̍h, mî-sî chiú-kiⁿ kò͘ in ê iûⁿ-kûn.

9主ê天使khiā tī in ê身邊，主ê榮光圍纍照in；顧羊ê大驚。Chú ê thiⁿ-sài khiā tī in ê sin-piⁿ, Chú ê êng-kng ûi-lûi chiò in; kò͘-iûⁿ ê tōa kiaⁿ.

10天使kā in講，莫得驚；因為我報lín大歡喜ê好消息，hō͘百姓lóng有份；Thiⁿ-sài kā in kóng, Bo̍h-tit kiaⁿ; in-ūi góa pò lín tōa hoaⁿ-hí ê hó siau-sit, hō͘ peh-sìⁿ lóng ū hūn;

11因為今á日tī大衛ê城已經為tio̍h lín生一個拯救ê，就是主基督。in-ūi kin-á-ji̍t tī Tāi-pi̍t ê siâⁿ í-keng ūi-tio̍h lín siⁿ chi̍t ê Chín-kiù-ê, chiū-sī Chú Ki-tok.

12Lín beh看見一個嬰á用布包，睏tī槽裡ê，chit-ê就是hō͘ lín做記號。Lín beh khòaⁿ-kìⁿ chi̍t ê eⁿ-á ēng pò͘ pau, khùn tī chô-ni̍h ê, chit-ê chiū-sī hō͘ lín chòe kì-hō.

13忽然有chōe-chōe天兵kap hit-ê天使saⁿ-kap tī-teh，o-ló上帝，講，Hut-jiân ū chōe-chōe thian-peng kap hit ê thiⁿ-sài saⁿ-kap tī-teh, o-ló Siōng-tè, kóng,

14Tī極高ê位榮光歸tī上帝， 地上和平tī伊所歡喜ê人ê中間。Tī ke̍k koâiⁿ ê ūi êng-kng kui tī Siōng-tè, Tōe-chiūⁿ hô-pêng tī I só͘ hoaⁿ-hí ê lâng ê tiong-kan.

15Chiah-ê天使離開in上天ê時，顧羊ê saⁿ-kap講，Taⁿ咱來去伯利恆，看所成ê事，就是主所報咱知ê。Chiah ê thiⁿ-sài lī-khui in chiūⁿ thiⁿ ê sî, kò͘-iûⁿ ê saⁿ-kap kóng, Taⁿ lán lâi khì Pek-lī-hêng, khòaⁿ só͘ chiâⁿ ê sū, chiū-sī Chú só͘ pò lán chai ê.

16就緊緊去，chhē-tio̍h馬利亞kap約瑟，koh看見嬰á睏tī槽裡。Chiū kín-kín khì, chhē-tio̍h Má-lī-a kap Iok-sek, koh khòaⁿ-kìⁿ eⁿ-á khùn tī chô-ni̍h.

17看了，就將天使所對in講chit-ê嬰á ê事報人知。Khòaⁿ-liáu, chiū chiong thiⁿ-sài só͘ tùi in kóng chit ê eⁿ-á ê sū pò lâng chai.

18聽見ê人lóng奇怪顧羊ê所對in講ê事。Thiaⁿ-kìⁿ ê lâng lóng kî-koài kò͘-iûⁿ ê só͘ tùi in kóng ê sū.

19獨獨馬利亞將chiah-ê話記tiâu-tiâu，心內常常teh想。To̍k-to̍k Má-lī-a chiong chiah ê ōe kì tiâu-tiâu, sim-lāi siông-siông teh siūⁿ.

20顧羊ê tò去，為tio̍h所聽見ê，所看見ê，就是天使所對in講ê，來歸榮光o-ló上帝。Kò͘-iûⁿ ê tò-khì, ūi-tio̍h só͘ thiaⁿ-kìⁿ ê, só͘ khòaⁿ-kìⁿ ê, chiū-sī thiⁿ-sài só͘ tùi in kóng ê, lâi kui êng-kng o-ló Siōng-tè.

21到第八日，kā嬰á行割禮ê期，就號伊ê名叫耶穌，就是伊bē投胎ê時天使所號ê。Kàu tē poeh ji̍t, kā eⁿ-á kiâⁿ kat-lé ê kî, chiū hō I ê miâ kiò Iâ-so͘, chiū-sī I bē tâu-thai ê sî thiⁿ-sài só͘ hō ê.

22照摩西ê律例，in清氣ê日已經滿，就抱嬰á上耶路撒冷，beh獻hō͘主，Chiàu Mô͘-se ê lu̍t-lē, in chheng-khì ê ji̍t í-keng móa, chiū phō eⁿ-á chiūⁿ Iâ-lō͘-sat-léng, beh hiàn hō͘ Chú,

23(照主ê律例所記載講，見若頭chiūⁿ ê ta-po͘-kiáⁿ beh稱做聖，歸tī主) ，(chiàu Chú ê lu̍t-lē só͘ kì-chài kóng, Kìⁿ-nā thâu-chiūⁿ ê ta-po͘-kiáⁿ beh chheng chòe sèng, kui tī Chú),

24也beh獻祭，照主ê律例所講，用一對ê Ka-chui，á是兩隻鴿á-kiáⁿ。iā beh hiàn-chè, chiàu Chú ê lu̍t-lē só͘ kóng, Ēng chi̍t tùi ê ka-chui, á-sī nn̄g chiah chíⁿ-á-kiáⁿ.

25Tú-tn̄g tī耶路撒冷有一人，名叫西門；chit人義koh敬虔，平時欣慕hit-ê安慰以色列ê；聖神tiàm tī伊。Tú-tn̄g tī Iâ-lō͘-sat-léng ū chi̍t lâng, miâ kiò Se-biān; chit lâng gī koh kèng-khiân, pêng-sî him-bō͘ hit ê an-ùi Í-sek-lia̍t ê; Sèng Sîn tiàm tī i.

26伊bat得tio̍h聖神指示，知伊iáu-bē死beh事先看見主ê基督。I bat tit-tio̍h Sèng Sîn chí-sī, chai i iáu-bē sí beh tāi-seng khòaⁿ-kìⁿ Chú ê Ki-tok.

27伊hō͘聖神感動就入殿；tú-á耶穌ê父母抱嬰á入來，beh kā伊照律法ê例來行，I hō͘ Sèng Sîn kám-tōng chiū ji̍p tiān; tú-á Iâ-so͘ ê pē-bú phō eⁿ-á ji̍p-lâi, beh kā I chiàu lu̍t-hoat ê lē lâi kiâⁿ,

28hit時西門用手chih嬰á，o-ló上帝講，hit sî Se-biān ēng chhiú chih eⁿ-á, o-ló Siōng-tè kóng,

29主ah，taⁿ照祢ê話teh tháu放你ê奴僕 安然過世。Chú ah, taⁿ chiàu lí ê ōe teh tháu-pàng lí ê lô͘-po̍k An-jiân kè-sì.

30因為我ê目睭已經看見你ê拯救，In-ūi góa ê ba̍k-chiu í-keng khòaⁿ-kìⁿ lí ê chín-kiù,

31就是你所備辦tī萬百姓ê面前ê，Chiū-sī lí só͘ pī-pān tī bān peh-sìⁿ ê bīn-chêng ê,

32做光來照外邦， Koh做你以色列百姓ê榮光。Chòe kng lâi chiò gōa-pang, Koh chòe lí Í-sek-lia̍t peh-sìⁿ ê êng-kng.

33伊ê父kap伊ê母teh奇怪所論嬰á ê話；I ê pē kap I ê bú teh kî-koài só͘ lūn eⁿ-á ê ōe;

34西門kā in祝福，koh對伊ê老母馬利亞講，Chit-ê嬰á受設立beh hō͘以色列中chōe-chōe人跋倒，chōe-chōe人起來，也做受辯駁ê記號；Se-biān kā in chiok-hok, koh tùi I ê lāu-bú Má-lī-a kóng, Chit ê eⁿ-á siū siat-li̍p beh hō͘ Í-sek-lia̍t tiong chōe-chōe lâng poa̍h-tó, chōe-chōe lâng khí-lâi, iā chòe siū piān-pok ê kì-hō;

35(koh你家己ê心也beh有劍鑿透過) ；hō͘ chōe-chōe人心內ê念頭會露出。(koh lí ka-kī ê sim iā beh ū kiàm chha̍k thàu-kè); hō͘ chōe-chōe lâng sim-lāi ê liām-thâu ōe lō͘-chhut.

36Koh有A-siat ê支派，Hoat-lōe-le̍k ê cha-bó͘-kiáⁿ，A-ná，伊是做先知，(年歲已經老，tùi在室女ê時嫁hō͘丈夫七年久，Koh ū A-siat ê chi-phài, Hoat-lōe-le̍k ê cha-bó͘-kiáⁿ, A-ná, i sī chòe sian-ti, (nî-hè í-keng lāu, tùi chāi-sek-lú ê sî kè hō͘ tiōng-hu chhit nî kú,

37就守寡八十四年) ，lóng無離開殿，禁食祈禱，暝日服事。chiū chiú-kóaⁿ poeh-cha̍p-sì nî), lóng bô lī-khui tiān, kìm-chia̍h kî-tó, mî-ji̍t ho̍k-sāi.

38Tú-tú hit時伊進前，稱謝上帝，tùi見若欣慕耶路撒冷得tio̍h贖回ê人講起chit-ê嬰á ê事。Tú-tú hit sî i chìn-chêng, chheng-siā Siōng-tè, tùi kìⁿ-nā him-bō͘ Iâ-lō͘-sat-léng tit-tio̍h sio̍k-hôe ê lâng kóng-khí chit ê eⁿ-á ê sū.

39In照主ê律法行ta̍k項tāi-chì明白，tò去加利利，到本城拿撒勒。In chiàu Chú ê lu̍t-hoat kiâⁿ ta̍k hāng tāi-chì bêng-pe̍k, tò-khì Ka-lī-lī, kàu pún siâⁿ Ná-sat-le̍k.

40嬰á漸漸大，日日勇壯，智慧充滿；上帝ê恩典kap伊tī-teh。Eⁿ-á chiām-chiām tōa, ji̍t-ji̍t ióng-chòng, tì-hūi chhiong-móa; Siōng-tè ê un-tián kap I tī-teh.

41Ta̍k年pôaⁿ過節ê時伊ê父母去耶路撒冷。Ta̍k nî pôaⁿ-kè-choeh ê sî I ê pē-bú khì Iâ-lō͘-sat-léng.

42到伊十二歲ê時，照節期ê例lóng上耶路撒冷。Kàu I cha̍p-jī hè ê sî, chiàu choeh-kî ê lē lóng chiūⁿ Iâ-lō͘-sat-léng.

43節期已經明白，in tò去ê時，gín-ná耶穌iáu tòa tī耶路撒冷；伊ê父母m̄知。Choeh-kî í-keng bêng-pe̍k, in tò-khì ê sî, gín-ná Iâ-so͘ iáu tòa tī Iâ-lō͘-sat-léng; I ê pē-bú m̄ chai.

44phah算伊tī同行ê人ê中間，行一日ê路站；chiah tī親戚kap相識ê人ê中間chhē伊。Phah-sǹg I tī tâng kiâⁿ ê lâng ê tiong-kan, kiâⁿ chi̍t ji̍t ê lō͘-chām; chiah tī chhin-chhek kap saⁿ-bat ê lâng ê tiong-kan chhē I.

45Chhē無tio̍h，就倒tńg去耶路撒冷chhē伊。Chhē bô tio̍h, chiū tò-tńg khì Iâ-lō͘-sat-léng chhē I.

46三日後chhē-tio̍h伊tī殿裡，坐tī hiah-ê先生ê中間，也teh聽，也teh問。Saⁿ ji̍t āu chhē-tio̍h I tī tiān-ni̍h, chē tī hiah ê sian-siⁿ ê tiong-kan, iā teh thiaⁿ, iā teh mn̄g.

47聽伊ê人lóng奇怪伊ê聰明kap伊ê應答。Thiaⁿ I ê lâng lóng kî-koài I ê chhang-miâ kap I ê ìn-tap.

48父母看見伊就gông-ngia̍h；伊ê老母對伊講，Kiáⁿ ah，你啥事án-ni款待阮？你看，你ê父kap我傷心chhē你。Pē-bú khòaⁿ-kìⁿ I chiū gông-ngia̍h; I ê lāu-bú tùi I kóng, Kiáⁿ ah, lí siáⁿ-sū án-ni khoán-thāi goán? lí khòaⁿ, lí ê pē kap góa siong-sim chhē lí.

49伊kā in講，啥事chhē我？Kiám m̄知我應該tī我ê父ê厝mah？I kā in kóng, Siáⁿ-sū chhē góa? Kiám m̄ chai góa eng-kai tī góa ê Pē ê chhù mah?

50In bōe曉得伊所kā in講ê話。In bōe hiáu-tit I só͘ kā in kóng ê ōe.

51耶穌就kap in落去到拿撒勒，來承順in。伊ê老母將chiah-ê話lóng記tī心裡。Iâ-so͘ chiū kap in lo̍h-khì kàu Ná-sat-le̍k, lâi sêng-sūn in. I ê lāu-bú chiong chiah ê ōe lóng kì tī sim-ni̍h.

52耶穌ê智慧kap年歲ná加添，上帝kap人ná疼伊。Iâ-so͘ ê tì-hūi kap nî-hè ná ke-thiⁿ, Siōng-tè kap lâng ná thiàⁿ I.

1Th ê-pì-liû該撒坐位ê十五年本丟彼拉多做猶太ê總督，希律做加利利分封ê人君，伊ê兄弟腓力做Í-thó͘-lī-a kap tek-lia̍p-khó-nî地方分封ê人君，Lū-sat-liap做A-pí-lī-nî分封ê人君，Thê-pì-liû Kai-sat chē ūi ê cha̍p-gō͘ nî Pún-tiu Pí-lia̍p-to chòe Iû-thài ê chóng-tok, Hi-lu̍t chòe Ka-lī-lī hun-hong ê jîn-kun, i ê hiaⁿ-tī Hui-le̍k chòe Í-thó͘-lī-a kap Tek-lia̍p-khó-nî tōe-hng hun-hong ê jîn-kun, Lū-sat-liap chòe A-pí-lī-nî hun-hong ê jîn-kun,

2A-ná kap Kai-a-hoat做祭司頭ê時，撒迦利亞ê Kiáⁿ約翰tī曠野裡，上帝ê話到tī伊。A-ná kap Kai-a-hoat chòe chè-si-thâu ê sî, Sat-ka-lī-a ê kiáⁿ Iok-hān tī khòng-iá-ni̍h, Siōng-tè ê ōe kàu tī i.

3伊就到約旦河ê四方，傳反悔ê洗禮，hō͘人得tio̍h赦罪。I chiū kàu Iok-tàn hô ê sì-hng, thoân hoán-hóe ê sóe-lé, hō͘ lâng tit-tio̍h sià-chōe.

4親像先知以賽亞冊裡所記ê話，講， 有teh叫tī曠野ê，伊ê聲講， 備辦主ê路， 修直伊ê小路。Chhin-chhiūⁿ sian-ti Í-sài-a chheh-ni̍h só͘ kì ê ōe, kóng, Ū teh kiò tī khòng-iá ê, i ê siaⁿ kóng, Pī-pān Chú ê lō͘, Siu ti̍t I ê sió lō͘.

5Chiah-ê山谷lóng beh thūn-tīⁿ， Chiah-ê大小ê山頭lóng beh hō͘伊低， 彎曲ê，beh hō͘伊直， Khâm-khia̍t ê，beh hō͘伊平；Chiah ê soaⁿ-kok lóng beh thūn-tīⁿ, Chiah ê tōa sió ê soaⁿ-thâu lóng beh hō͘ i kē, Oan-khiau ê, beh hō͘ i ti̍t, Khâm-khia̍t ê, beh hō͘ i pîⁿ;

6凡有肉體ê beh看見上帝ê拯救。Hoān ū jio̍k-thé ê beh khòaⁿ-kìⁿ Siōng-tè ê chín-kiù.

7Chōe-chōe人出來beh受約翰ê洗禮，伊就對in講，毒蛇ê類ah，是誰-á指示lín閃避將來ê受氣ah？Chōe-chōe lâng chhut-lâi beh siū Iok-hān ê sóe-lé, i chiū tùi in kóng, To̍k-chôa ê lūi ah, chī-chūi-á chí-sī lín siám-pī chiong-lâi ê siū-khì ah?

8所以lín tio̍h結hit號合tī反悔ê果子。莫得家己phah算，有亞伯拉罕做阮ê父；因為我kā lín講，上帝會tùi chiah-ê石頭出kiaⁿ孫hō͘亞伯拉罕。Só͘-í lín tio̍h kiat hit hō ha̍p tī hoán-hóe ê ké-chí. Bo̍h-tit ka-kī phah-sǹg, Ū A-pek-la̍h-hán chòe goán ê pē; in-ūi góa kā lín kóng, Siōng-tè ōe tùi chiah ê chio̍h-thâu chhut kiáⁿ-sun hō͘ A-pek-la̍h-hán.

9Taⁿ斧頭已經hē tī樹頭；見若樹無結好果子ê，就chhò伊，hiat落火。Taⁿ pó͘-thâu í-keng hē tī chhiū-thâu; kìⁿ-nā chhiū bô kiat hó ké-chí ê, chiū chhò i, hiat-lo̍h hé.

10眾人問伊講，Án-ni，阮tio̍h怎樣做？Chèng lâng mn̄g i kóng, Án-ni, goán tio̍h cháiⁿ-iūⁿ chòe?

11伊應講，有兩領衫ê tio̍h分hō͘無ê；有物thang食ê，也tio̍h án-ni。I ìn kóng, Ū nn̄g niá saⁿ ê tio̍h pun hō͘ bô ê; ū mi̍h thang chia̍h ê, iā tio̍h án-ni.

12抽餉ê也來beh受洗禮，對伊講，先生ah，阮tio̍h怎樣做？Thiu-hiòng ê iā lâi beh siū sóe-lé, tùi i kóng, Sian-siⁿ ah, goán tio̍h cháiⁿ-iūⁿ chòe?

13伊對in講，定tio̍h ê餉以外，莫得加the̍h。I tùi in kóng, Tiāⁿ-tio̍h ê hiòng í-gōa, bo̍h-tit ke the̍h.

14兵丁也問伊講，也阮tio̍h怎樣做？伊對in講，莫得勒索人，莫得歪人；tio̍h掠lín所得tio̍h ê糧做夠額。Peng-teng iā mn̄g i kóng, Iā goán tio̍h cháiⁿ-iūⁿ chòe? I tùi in kóng, Bo̍h-tit le̍k-sek lâng, bo̍h-tit oaiⁿ lâng; tio̍h lia̍h lín só͘ tit-tio̍h ê niû chòe kàu-gia̍h.

15百姓teh ǹg望ê時，眾人心內teh議論約翰kiám-chhái是基督，Peh-sìⁿ teh ǹg-bāng ê sî, chèng lâng sim-lāi teh gī-lūn Iok-hān kiám-chhái sī Ki-tok,

16約翰應眾人講，我用水kā lín行洗禮；獨獨有一個比我khah有權能ê beh來，就若tháu伊ê鞋帶我也bōe堪得；伊beh用聖神kap火kā lín洗。Iok-hān ìn chèng lâng kóng, Góa ēng chúi kā lín kiâⁿ sóe-lé; to̍k-to̍k ū chi̍t-ê pí góa khah ū koân-lêng ê beh lâi, chiū nā tháu I ê ôe-tòa góa iā bōe kham-tit; I beh ēng Sèng Sîn kap hé kā lín sóe.

17伊ê手the̍h簸箕，beh將伊hit場一盡簸，收麥入伊ê倉；但是麥hiūⁿ就用bōe hoa ê火燒伊。I ê chhiú the̍h pòa-ki, beh chiong I hit tiûⁿ it-chīn pòa, siu be̍h ji̍p I ê chhng; nā-sī be̍h-hiūⁿ chiū ēng bōe hoa ê hé sio i.

18約翰另外用chōe-chōe項苦勸來傳福音hō͘百姓。Iok-hān lēng-gōa ēng chōe-chōe hāng khó͘-khǹg lâi thoân hok-im hō͘ peh-sìⁿ.

19獨獨分封ê人君希律，因為伊ê兄弟ê bó͘ Hi-lô-tí ê緣故，koh因為所行lóng總ê pháiⁿ tāi，hō͘約翰責備，To̍k-to̍k hun-hong ê jîn-kun Hi-lu̍t, in-ūi i ê hiaⁿ-tī ê bó͘ Hi-lô-tí ê iân-kò͘, koh in-ūi só͘ kiâⁿ lóng-chóng ê pháiⁿ tāi, hō͘ Iok-hān chek-pī,

20taⁿ koh加一項，就是將約翰關tī監裡。taⁿ koh ke chi̍t hāng, chiū-sī chiong Iok-hān koaiⁿ tī kaⁿ-ni̍h.

21眾百姓已經受洗禮，耶穌也已經受洗禮，祈禱ê時，天開，Chèng peh-sìⁿ í-keng siū sóe-lé, Iâ-so͘ iā í-keng siū sóe-lé, kî-tó ê sî, thiⁿ khui,

22聖神降臨tī伊ê頂面，形狀親像鴿á；koh tùi天有聲講，你是我疼ê Kiáⁿ，我歡喜你。Sèng Sîn kàng-lîm tī I ê téng-bīn, hêng-chōng chhin-chhiūⁿ chíⁿ-á; koh tùi thiⁿ ū siaⁿ kóng, Lí sī góa thiàⁿ ê Kiáⁿ, góa hoaⁿ-hí lí.

23耶穌出頭ê時約略三十歲；伊(照人看) 是約瑟ê Kiáⁿ，約瑟是Hi-lí ê Kiáⁿ，Iâ-so͘ chhut-thâu ê sî iok-lio̍k saⁿ-cha̍p hè; I (chiàu lâng khòaⁿ) sī Iok-sek ê kiáⁿ, Iok-sek sī Hi-lí ê kiáⁿ,

24Hi-lí是Má-thap ê Kiáⁿ，Má-thap是利未ê Kiáⁿ，利未是Be̍k-ki ê Kiáⁿ，Be̍k-ki是Ngá-ná ê Kiáⁿ，Ngá-ná是約瑟ê Kiáⁿ，Hi-lí sī Má-thap ê kiáⁿ, Má-thap sī Lī-bī ê kiáⁿ, Lī-bī sī Be̍k-ki ê kiáⁿ, Be̍k-ki sī Ngá-ná ê kiáⁿ, Ngá-ná sī Iok-sek ê kiáⁿ,

25約瑟是Má-tāi-th ê-a ê kiáⁿ，Má-tāi-th ê-a是A-mô͘-sū ê kiáⁿ，A-mô͘-sū是Ná-hông ê kiáⁿ，Ná-hông是Í-sū-lí ê kiáⁿ，Í-sū-lí是Ná-kai ê kiáⁿ，Iok-sek sī Má-tāi-thê-a ê kiáⁿ, Má-tāi-thê-a sī A-mô͘-sū ê kiáⁿ, A-mô͘-sū sī Ná-hông ê kiáⁿ, Ná-hông sī Í-sū-lí ê kiáⁿ, Í-sū-lí sī Ná-kai ê kiáⁿ,

26Ná-kai是Má-ap ê Kiáⁿ，Má-ap是Má-tāi-th ê-a ê Kiáⁿ，Má-tāi-th ê-a是Se-bí ê Kiáⁿ，Se-bí是約瑟ê Kiáⁿ，約瑟是猶大ê Kiáⁿ，猶大是Iok-a-ná ê Kiáⁿ，Ná-kai sī Má-ap ê kiáⁿ, Má-ap sī Má-tāi-thê-a ê kiáⁿ, Má-tāi-thê-a sī Se-bí ê kiáⁿ, Se-bí sī Iok-sek ê kiáⁿ, Iok-sek sī Iû-tāi ê kiáⁿ, Iû-tāi sī Iok-a-ná ê kiáⁿ,

27Iok-a-ná是Lī-sat ê Kiáⁿ，Lī-sat是Só͘-lô-pa-pek ê Kiáⁿ，Só͘-lô-pa-pek是Sat-lia̍p-thiat ê Kiáⁿ，Sat-lia̍p-thiat是Nî-lī ê Kiáⁿ，Iok-a-ná sī Lī-sat ê kiáⁿ, Lī-sat sī Só͘-lô-pa-pek ê kiáⁿ, Só͘-lô-pa-pek sī Sat-lia̍p-thiat ê kiáⁿ, Sat-lia̍p-thiat sī Nî-lī ê kiáⁿ,

28Nî-lī是Be̍k-ki ê Kiáⁿ，Be̍k-ki是A-tí ê Kiáⁿ，A-tí是Ko-song ê Kiáⁿ，Ko-song是Í-mô͘-tông ê Kiáⁿ，Í-mô͘-tông是Jíⁿ ê Kiáⁿ，Jíⁿ是Iok-sè ê Kiáⁿ，Nî-lī sī Be̍k-ki ê kiáⁿ, Be̍k-ki sī A-tí ê kiáⁿ, A-tí sī Ko-song ê kiáⁿ, Ko-song sī Í-mô͘-tông ê kiáⁿ, Í-mô͘-tông sī Jíⁿ ê kiáⁿ, Jíⁿ sī Iok-sè ê kiáⁿ,

29Iok-sè是Í-lia̍t-sat ê Kiáⁿ，Í-lia̍t-sat是Iok-lēng ê Kiáⁿ，Iok-lēng是Má-thap ê Kiáⁿ，Má-thap是利未ê Kiáⁿ，Iok-sè sī Í-lia̍t-sat ê kiáⁿ, Í-lia̍t-sat sī Iok-lēng ê kiáⁿ, Iok-lēng sī Má-thap ê kiáⁿ, Má-thap sī Lī-bī ê kiáⁿ,

30利未是西門ê Kiáⁿ，西門是猶大ê Kiáⁿ。猶大是約瑟ê Kiáⁿ，約瑟是Iok-lâm ê Kiáⁿ，Iok-lâm是Í-lī-a-kim ê Kiáⁿ，Lī-bī sī Se-biān ê kiáⁿ, Se-biān sī Iû-tāi ê kiáⁿ. Iû-tāi sī Iok-sek ê kiáⁿ, Iok-sek sī Iok-lâm ê kiáⁿ, Iok-lâm sī Í-lī-a-kim ê kiáⁿ,

31Í-lī-a-kim是Bí-lī-a ê Kiáⁿ，Bí-lī-a是Mái-lâm ê Kiáⁿ，Mái-lâm是Má-ta̍t-thaⁿ ê Kiáⁿ，Má-ta̍t-thaⁿ是Ná-taⁿ ê Kiáⁿ，Ná-tan是大衛ê Kiáⁿ，Í-lī-a-kim sī Bí-lī-a ê kiáⁿ, Bí-lī-a sī Mái-lâm ê kiáⁿ, Mái-lâm sī Má-ta̍t-thaⁿ ê kiáⁿ, Má-ta̍t-thaⁿ sī Ná-tan ê kiáⁿ, Ná-tan sī Tāi-pi̍t ê kiáⁿ,

32大衛是Iâ-se ê Kiáⁿ，Iâ-se是O-pek ê Kiáⁿ，O-pek是Pho-sū ê Kiáⁿ，Pho-sū是Sat-bûn ê Kiáⁿ，Sat-bûn是Ná-sūn ê Kiáⁿ，Tāi-pi̍t sī Iâ-se ê kiáⁿ, Iâ-se sī O-pek ê kiáⁿ, O-pek sī Pho-sū ê kiáⁿ, Pho-sū sī Sat-bûn ê kiáⁿ, Sat-bûn sī Ná-sūn ê kiáⁿ,

33Ná-sūn是A-bí-ná-ta̍t ê Kiáⁿ，A-bí-ná-ta̍t是A-lân ê Kiáⁿ，A-lân是Í-sū-lûn ê Kiáⁿ，Í-sū-lûn是Hoat-le̍k-sū ê Kiáⁿ，Hoat-le̍k-sū是猶大ê Kiáⁿ，Ná-sūn sī A-bí-ná-ta̍t ê kiáⁿ, A-bí-ná-ta̍t sī A-lân ê kiáⁿ, A-lân sī Í-sū-lûn ê kiáⁿ, Í-sū-lûn sī Hoat-le̍k-sū ê kiáⁿ, Hoat-le̍k-sū sī Iû-tāi ê kiáⁿ,

34猶大是雅各ê Kiáⁿ，雅各是以撒ê Kiáⁿ，以撒是亞伯拉罕ê Kiáⁿ，亞伯拉罕是Thaⁿ-la̍h ê Kiáⁿ，Thaⁿ-la̍h是Ná-ho̍k ê Kiáⁿ，Iû-tāi sī Ngá-kok ê kiáⁿ, Ngá-kok sī Í-sat ê kiáⁿ, Í-sat sī A-pek-la̍h-hán ê kiáⁿ, A-pek-la̍h-hán sī Thaⁿ-la̍h ê kiáⁿ, Thaⁿ-la̍h sī Ná-ho̍k ê kiáⁿ,

35Ná-ho̍k是Sat-lo̍k ê Kiáⁿ，Sat-lo̍k是Lia̍p-kó͘ ê Kiáⁿ，Lia̍p-kó͘是Hoat-le̍k ê Kiáⁿ，Hoat-le̍k是Hi-pek ê Kiáⁿ，Hi-pek是Sat-lia̍p ê Kiáⁿ，Ná-ho̍k sī Sat-lo̍k ê kiáⁿ, Sat-lo̍k sī Lia̍p-kó͘ ê kiáⁿ, Lia̍p-kó͘ sī Hoat-le̍k ê kiáⁿ, Hoat-le̍k sī Hi-pek ê kiáⁿ, Hi-pek sī Sat-lia̍p ê kiáⁿ,

36Sat-lia̍p是Kai-lâm ê Kiáⁿ，Kai-lâm是A-hoat-sat ê Kiáⁿ，A-hoat-sat是Siám ê Kiáⁿ，Siám是挪亞ê Kiáⁿ，挪亞是La̍h-be̍k ê Kiáⁿ，Sat-lia̍p sī Kai-lâm ê kiáⁿ, Kai-lâm sī A-hoat-sat ê kiáⁿ, A-hoat-sat sī Siám ê kiáⁿ, Siám sī Ná-a ê kiáⁿ, Ná-a sī La̍h-be̍k ê kiáⁿ,

37La̍h-be̍k是Má-thó͘-sat-la̍h ê Kiáⁿ，Má-thó͘-sat-la̍h是Í-lo̍k ê Kiáⁿ，Í-lo̍k是Ngá-lia̍t ê Kiáⁿ，Ngá-lia̍t是Má-le̍k-lia̍t ê Kiáⁿ，Má-le̍k-lia̍t是Kai-lâm ê Kiáⁿ，Kai-lâm是Í-ná-sū ê Kiáⁿ，La̍h-be̍k sī Má-thó͘-sat-la̍h ê kiáⁿ, Má-thó͘-sat-la̍h sī Í-lo̍k ê kiáⁿ, Í-lo̍k sī Ngá-lia̍t ê kiáⁿ, Ngá-lia̍t sī Má-le̍k-lia̍t ê kiáⁿ, Má-le̍k-lia̍t sī Kai-lâm ê kiáⁿ, Kai-lâm sī Í-ná-sū ê kiáⁿ,

38Í-ná-sū是Siat ê Kiáⁿ，Siat是亞當ê Kiáⁿ，亞當是上帝ê Kiáⁿ。Í-ná-sū sī Siat ê kiáⁿ, Siat sī A-tong ê kiáⁿ, A-tong sī Siōng-tè ê kiáⁿ.

1耶穌受聖神充滿，tùi約旦河tò來；hō͘聖神chhōa伊tī曠野裡四十日久，hō͘魔鬼試伊。Iâ-so͘ siū Sèng Sîn chhiong-móa, tùi Iok-tàn hô tò-lâi; hō͘ Sèng Sîn chhōa I tī khòng-iá-ni̍h sì-cha̍p ji̍t kú, hō͘ Mô͘-kúi chhì I.

2chiah-ê日ê中間無食甚麼物，後來就iau。chiah ê ji̍t ê tiong-kan bô chia̍h sím-mi̍h mi̍h, āu-lâi chiū iau.

3魔鬼kā伊講，你若是上帝ê Kiáⁿ，tio̍h kah chit-ê石變做餅。Mô͘-kúi kā I kóng, Lí nā sī Siōng-tè ê Kiáⁿ, tio̍h kah chit ê chio̍h pìⁿ-chòe piáⁿ.

4耶穌應伊講，有記載講，人ê活m̄-nā óa靠餅。Iâ-so͘ ìn i kóng, Ū kì-chài kóng, Lâng ê oa̍h m̄ nā óa-khò piáⁿ.

5魔鬼koh chhōa伊peh上高，一目ni h久用天下萬國hō͘伊看，Mô͘-kúi koh chhōa I peh-chiūⁿ koâiⁿ, chi̍t-ba̍k-nih kú ēng thiⁿ-ē bān kok hō͘ I khòaⁿ,

6就kā伊講，Chit-ê一切ê權，kap in ê榮光我beh hō͘你；因為chit-ê已經交hō͘我，chhut-chāi我beh hō͘甚麼人就hō͘伊；chiū kā I kóng, Chit ê it-chhè ê koân, kap in ê êng-kng góa beh hō͘ lí; in-ūi chit-ê í-keng kau hō͘ góa, chhut-chāi góa beh hō͘ sím-mi̍h lâng chiū hō͘ i;

7所以你若拜tī我ê面前，就lóng總是你ê。só͘-í lí nā pài tī góa ê bīn-chêng, chiū lóng-chóng sī lí ê.

8耶穌應伊講，有記載講，Tio̍h拜主，你ê上帝，獨獨服事伊nā-tiāⁿ。Iâ-so͘ ìn i kóng, Ū kì-chài kóng, Tio̍h pài Chú, lí ê Siōng-tè, to̍k-to̍k ho̍k-sāi I nā-tiāⁿ.

9Koh chhōa伊到耶路撒冷，hō͘伊khiā tī殿ê尾溜，kā伊講，你若是上帝ê Kiáⁿ，tio̍h tùi chia家己tiô落去；Koh chhōa I kàu Iâ-lō͘-sat-léng, hō͘ I khiā tī tiān ê bé-liu, kā I kóng, Lí nā sī Siōng-tè ê Kiáⁿ, tio̍h tùi chia ka-kī tiô-lo̍h-khì;

10因為有記載講， 伊beh為tio̍h你命令伊ê天使保護你；in-ūi ū kì-chài kóng, I beh ūi-tio̍h lí bēng-lēng I ê thiⁿ-sài pó-hō͘ lí;

11Koh講， In beh用手扶你， 免得你ê腳tak-tio̍h石。Koh kóng, In beh ēng chhiú hû lí, Bián-tit lí ê kha tak-tio̍h chio̍h.

12耶穌應伊講，有講，莫得試主，你ê上帝。Iâ-so͘ ìn i kóng, Ū kóng, Bo̍h-tit chhì Chú, lí ê Siōng-tè.

13魔鬼已經盡ta̍k項ê試，就暫時離開伊。Mô͘-kúi í-keng chīn ta̍k hāng ê chhì, chiū chiām-sî lī-khui I.

14耶穌tī聖神ê權能倒tńg去加利利。伊ê名聲遍傳tī四圍ê地方。Iâ-so͘ tī Sèng Sîn ê koân-lêng tò-tńg-khì Ka-lī-lī. I ê miâ-siaⁿ piàn thoân tī sì-ûi ê tōe-hng.

15伊tī in ê會堂教示，hō͘眾人o-ló伊。I tī in ê hōe-tn̂g kà-sī, hō͘ chèng lâng o-ló I.

16耶穌到拿撒勒，就是伊長成ê所在；tī安歇日照伊平常ê法度日會堂，就khiā-teh beh讀。Iâ-so͘ kàu Ná-sat-le̍k, chiū-sī I tióng-sêng ê só͘-chāi; tī an-hioh-ji̍t chiàu I pêng-siông ê hoat-tō͘ ji̍p hōe-tn̂g, chiū khiā-teh beh tha̍k.

17有人將先知以賽亞ê冊hō͘伊；伊就掀開，chhē-tio̍h hit所在，記講，Ū lâng chiong sian-ti Í-sài-a ê chheh hō͘ I; I chiū hian-khui, chhē-tio̍h hit só͘-chāi, kì kóng,

18主ê神臨到我， 因為伊用油抹我，hō͘我傳福音hō͘ sòng-hiong人； 伊有差我kā受掠ê人講，in會得tháu放，Kā chhiⁿ-mî ê講，in會得tio̍h koh光， 來tháu放受壓制ê人，Chú ê Sîn lîm-kàu góa, In-ūi I ēng iû boah góa, hō͘ góa thoân hok-im hō͘ sòng-hiong lâng; I ū chhe góa kā siū lia̍h ê lâng kóng, in ōe tit tháu-pàng, Kā chhiⁿ-mî ê kóng, in ōe tit-tio̍h koh kng, Lâi tháu-pàng siū ap-chè ê lâng,

19宣傳主歡喜ê年。Soan-thoân Chú hoaⁿ-hí ê nî.

20耶穌ha̍p冊，還執事，就坐teh；tī會堂ê眾人lóng注目看伊Iâ-so͘ ha̍p chheh, hêng chip-sū, chiū chē-teh; tī hōe-tn̂g ê chèng lâng lóng chù-ba̍k khòaⁿ I.

21伊就開嘴對in講，Chit-ê聖經ê應驗，lín今á日有聽見lah。I chiū khui chhùi tùi in kóng, Chit ê sèng-keng ê èng-giām, lín kin-á-ji̍t ū thiaⁿ-kìⁿ lah.

22眾人lóng干證伊，奇怪伊ê嘴所出恩典ê話；就講，Chit-ê Kiám m̄是約瑟ê Kiáⁿ mah？Chèng lâng lóng kan-chèng I, kî-koài I ê chhùi só͘ chhut un-tián ê ōe; chiū kóng, Chit-ê kiám m̄ sī Iok-sek ê kiáⁿ mah?

23伊就對in講，Lín的確引chit-ê俗語，tùi我講，醫生ah，你tio̍h家己醫；見若阮聽見你行tī迦百農ê，也tio̍h行tī chia，就是你ê本所在。I chiū tùi in kóng, Lín tek-khak ín chit ê sio̍k-gú, tùi góa kóng, I-seng ah, lí tio̍h ka-kī i; kìⁿ-nā goán thiaⁿ-kìⁿ lí kiâⁿ tī Ka-pek-lông ê, iā tio̍h kiâⁿ tī chia, chiū-sī lí ê pún só͘-chāi.

24Koh講，我實在kā lín講，Bē有先知tī本所在hō͘人接納伊Koh kóng, Góa si̍t-chāi kā lín kóng, Bē ū sian-ti tī pún só͘-chāi hō͘ lâng chiap-la̍p i.

25但是我真實kā lín講，當以利亞ê時，天炕旱三年半，遍地大飢荒，hit時以色列中有chōe-chōe守寡人，Nā-sī góa chin-si̍t kā lín kóng, Tng Í-lī-a ê sî, thiⁿ khòng-hān saⁿ nî pòaⁿ, piàn-tōe tōa ki-hng, hit sî Í-sek-lia̍t tiong ū chōe-chōe chiú-kóaⁿ lâng,

26以利亞bē bat奉差去chhē in一人；只有去Se-tùn ê Sat-le̍k-tāi，chhē一個守寡人。Í-lī-a bē bat hōng-chhe khì chhē in chi̍t lâng; chí ū khì Se-tùn ê Sat-le̍k-tāi, chhē chi̍t ê chiú-kóaⁿ lâng.

27Koh先知Í-lī-sa ê時，以色列中有chōe-chōe thái-ko ê；其中無一人得tio̍h清氣，只有敘利亞人Nái-bān nā-tiāⁿ。Koh sian-ti Í-lī-sa ê sî, Í-sek-lia̍t tiong ū chōe-chōe thái-ko ê; kî-tiong bô chi̍t lâng tit-tio̍h chheng-khì, chí-ū Sū-lī-a lâng Nái-bān nā-tiāⁿ.

28Tī會堂ê人聽見chiah-ê話，lóng滿心受氣；Tī hōe-tn̂g ê lâng thiaⁿ-kìⁿ chiah ê ōe, lóng móa-sim siū-khì;

29就起來趕伊出城外，in ê城起tī山頂，眾人帶伊到山崁，beh kā伊chhia落去。chiū khí-lâi kóaⁿ I chhut siâⁿ-gōa, in ê siâⁿ khí tī soaⁿ-téng, chèng lâng tòa I kàu soaⁿ-khàm, beh kā I chhia-lo̍h-khì.

30但是耶穌對in中間行過，做伊去。Nā-sī Iâ-so͘ tùi in tiong-kan kiâⁿ-kè, chòe I khì.

31落去到迦百農，就是加利利一個城；tī安歇日教示人。Lo̍h-khì kàu Ka-pek-lông, chiū-sī Ka-lī-lī chi̍t ê siâⁿ; tī an-hioh-ji̍t kà-sī lâng.

32人奇怪伊ê教示，因為伊ê話有權。Lâng kî-koài I ê kà-sī, in-ūi I ê ōe ū koân.

33會堂內有一個患tio̍h鬼ê人，大聲叫講，Hōe-tn̂g lāi ū chi̍t ê hoān-tio̍h kúi ê lâng, tōa siaⁿ kiò kóng,

34Hàiⁿ，拿撒勒ê耶穌，阮kap你甚麼干涉，你來beh滅阮mah？我知你是誰，就是上帝ê聖ê。Hàiⁿ, Ná-sat-le̍k ê Iâ-so͘, goán kap lí sím-mi̍h kan-sia̍p, lí lâi beh bia̍t goán mah? Góa chai lí chī-chūi, chiū-sī Siōng-tè ê Sèng-ê.

35耶穌責備伊講，你tio̍h靜靜，tùi伊出去。鬼就chhia-tó Hit人tī眾人ê中間，chiah出去，lóng無傷tio̍h伊Iâ-so͘ chek-pī i kóng, Lí tio̍h chēng-chēng, tùi i chhut-khì. Kúi chiū chhia-tó hit lâng tī chèng lâng ê tiong-kan, chiah chhut-khì, lóng bô siong-tio̍h i.

36眾人gông-ngia̍h saⁿ-kap議論講，這是甚麼話ah？因為伊用權柄kap能力命令chiah-ê邪神，in就出去。Chèng lâng gông-ngia̍h saⁿ-kap gī-lūn kóng, Che sī sím-mi̍h ōe ah? in-ūi I ēng koân-pèng kap lêng-le̍k bēng-lēng chiah ê siâ-sîn, in chiū chhut-khì.

37伊ê名聲就遍傳tī四圍ê地方。I ê miâ-siaⁿ chiū piàn-thoân tī sì-ûi ê tōe-hng.

38耶穌tùi會堂起來，入西門ê家。西門ê丈母患tio̍h重ê熱病；人替伊求耶穌。Iâ-so͘ tùi hōe-tn̂g khí-lâi, ji̍p Se-bûn ê ke. Se-bûn ê tiūⁿ-ḿ hoān-tio̍h tāng ê jia̍t-pīⁿ; lâng thòe i kiû Iâ-so͘.

39耶穌khiā-óa，àⁿ落責備伊ê熱病，熱就退；婦人人隨時起來，伺候in。Iâ-so͘ khiā-óa, àⁿ-lo̍h chek-pī i ê jia̍t-pīⁿ, jia̍t chiū thè; hū-jîn-lâng sûi-sî khí-lâi, su-hāu in.

40日落ê時，見若有病ê，不論患tio̍h甚麼病，人lóng tòa in來就近耶穌。耶穌hōaⁿ手tī in ta̍k人ê身上，來醫好in。Ji̍t lo̍h ê sî, kìⁿ-nā ū pīⁿ ê, put-lūn hoān-tio̍h sím-mi̍h pīⁿ, lâng lóng tòa in lâi chiū-kūn Iâ-so͘. Iâ-so͘ hōaⁿ chhiú tī in ta̍k lâng ê sin-chiūⁿ, lâi i-hó in.

41Koh有鬼tùi chōe-chōe人出去，叫講，你就是上帝ê Kiáⁿ。耶穌因為鬼bat伊是基督，就責備in，m̄准in講。Koh ū kúi tùi chōe-chōe lâng chhut-khì, kiò kóng, Lí chiū-sī Siōng-tè ê Kiáⁿ. Iâ-so͘ in-ūi kúi bat I sī Ki-tok, chiū chek-pī in, m̄ chún in kóng.

42天光ê時耶穌去tī曠野ê所在；kui陣人chhē伊，就近伊，ài留伊，hō͘伊莫得離開in去。Thiⁿ-kng ê sî Iâ-so͘ khì tī khòng-iá ê só͘-chāi; kui tīn lâng chhē I, chiū-kūn I, ài lâu I, hō͘ I bo̍h-tit lī-khui in khì.

43但是伊對in講，我也tio̍h tī別個城傳上帝國ê福音，因為我奉差就是為tio̍h這。Nā-sī I tùi in kóng, Góa iā tio̍h tī pa̍t ê siâⁿ thoân Siōng-tè kok ê hok-im, in-ūi góa hōng-chhe chiū-sī ūi-tio̍h che.

44伊就tī加利利chiah-ê會堂來宣傳。I chiū tī Ka-lī-lī chiah ê hōe-tn̂g lâi soan-thoân.