1當眾人oe-khoeh伊，teh聽上帝ê道理ê時，耶穌khiā tī Kek-nî-sat-le̍k湖邊，Tng chèng lâng oe-khoeh I, teh thiaⁿ Siōng-tè ê tō-lí ê sî, Iâ-so͘ khiā tī Kek-nî-sat-le̍k ô͘-piⁿ,

2看見兩隻船tī湖邊，討魚人離開船teh洗網。khòaⁿ-kìⁿ nn̄g chiah chûn tī ô͘-piⁿ, thó-hî lâng lī-khui chûn teh sóe bāng.

3其中一隻是西門ê，耶穌上去，請伊將船放khah開。就坐tī船裡教示眾人。Kî-tiong chi̍t chiah sī Se-bûn ê, Iâ-so͘ chiūⁿ-khì, chhiáⁿ i chiong chûn pàng khah khui. Chiū chē tī chûn-ni̍h kà-sī chèng lâng.

4講soah就對西門講，放到深ê所在，拋網討魚。Kóng soah chiū tùi Se-bûn kóng, Pàng kàu chhim ê só͘-chāi, pha bāng thó-hî.

5西門應講，先生，阮thong暝tio̍h磨，討lóng無；總是因為你ê話，我就beh拋網。Se-bûn ìn kóng, Sian-siⁿ, goán thong mî tio̍h-bôa, thó lóng bô; chóng-sī in-ūi lí ê ōe, góa chiū beh pha bāng.

6In拋落去，就圍tio̍h魚真chōe，網到beh裂；In pha-lo̍h-khì, chiū ûi-tio̍h hî chin chōe, bāng kàu beh li̍h;

7就ia̍t別隻船ê同伴來tàu saⁿ-kāng；in就來，拾魚滿兩隻船到beh沉落去。chiū ia̍t pa̍t chiah chûn ê tâng-phōaⁿ lâi tàu saⁿ-kāng; in chiū lâi, khioh hî móa nn̄g chiah chûn kàu beh tîm-lo̍h-khì.

8西門彼得看見án-ni，就仆tī耶穌ê腳下講，主ah，離開我，我是有罪ê人。Se-bûn Pí-tek khòaⁿ-kìⁿ án-ni, chiū phak tī Iâ-so͘ ê kha-ē kóng, Chú ah, lī-khui góa, góa sī ū chōe ê lâng.

9因為西門kap同tī-teh ê人，為tio̍h in一下拋落去所掠tio̍h ê魚，無m̄ gông-ngia̍h；In-ūi Se-bûn kap tâng tī-teh ê lâng, ūi-tio̍h in chi̍t-ē pha-lo̍h-khì só͘ lia̍h-tio̍h ê hî, bô m̄ gông-ngia̍h;

10西門ê同伴，Se-pí-thài ê Kiáⁿ雅各、約翰，也是án-ni。耶穌tùi西門講，莫得驚，tùi chit-tia̍p了後你beh得tio̍h人。Se-bûn ê tâng-phōaⁿ, Se-pí-thài ê kiáⁿ Ngá-kok, Iok-hān, iā sī án-ni. Iâ-so͘ tùi Se-bûn kóng, Bo̍h-tit kiaⁿ, tùi chit tia̍p liáu-āu lí beh tit-tio̍h lâng.

11In已經拖船óa岸，就放sak一切來tè伊In í-keng thoa chûn óa hōaⁿ, chiū pàng-sak it-chhè lâi tè I.

12耶穌tī一個城，tú-tn̄g有一人遍身thái-ko，看見伊就面仆tī地裡，求講，主ah，你若肯，就會hō͘我清氣。Iâ-so͘ tī chi̍t ê siâⁿ, tú-tn̄g ū chi̍t lâng piàn-sin thái-ko, khòaⁿ-kìⁿ I chiū bīn phak tī tōe-ni̍h, kiû kóng, Chú ah, lí nā khéng, chiū ōe hō͘ góa chheng-khì.

13伊伸手摸伊講，我肯，你thang清氣。Thái-ko即時除去。I chhun chhiú bong i kóng, Góa khéng, lí thang chheng-khì. Thái-ko chek-sî tû-khì.

14耶穌吩咐伊莫得kā人講；獨獨tio̍h去，將本身hō͘祭司驗，也為tio̍h你得tio̍h清氣獻摩西所吩咐ê，來做證據tī人。Iâ-so͘ hoan-hù i bo̍h-tit kā lâng kóng; to̍k-to̍k tio̍h khì, chiong pún-sin hō͘ chè-si giām, iā ūi-tio̍h lí tit-tio̍h chheng-khì hiàn Mô͘-se só͘ hoan-hù ê, lâi chòe chèng-kù tī lâng.

15總是伊ê名聲益發報揚；kui大陣ê人聚集beh聽，也beh得tio̍h醫好in ê病。Chóng-sī I ê miâ-siaⁿ it-hoat pò-iông; kui tōa tīn ê lâng chū-chi̍p beh thiaⁿ, iā beh tit-tio̍h i-hó in ê pīⁿ.

16但是耶穌退去，tiàm tī曠野祈禱。Nā-sī Iâ-so͘ thè-khì, tiàm tī khòng-iá kî-tó.

17有一日耶穌teh教示人；有法利賽人kap教律法ê先生tī hia teh坐，in是tùi加利利ta̍k鄉社kap猶太kap耶路撒冷來ê；主ê權能kap耶穌tī-teh，hō͘伊醫好人。Ū chi̍t ji̍t Iâ-so͘ teh kà-sī lâng; ū Hoat-lī-sài lâng kap kà lu̍t-hoat ê sian-siⁿ tī hia teh chē, in sī tùi Ka-lī-lī ta̍k hiuⁿ-siā kap Iû-thài kap Iâ-lō͘-sat-léng lâi ê; Chú ê koân-lêng kap Iâ-so͘ tī-teh, hō͘ I i-hó lâng.

18Tú-tn̄g有人將舖á扛piàn-sūi ê來，ài beh扛入去hē tī伊ê面前。Tú-tn̄g ū lâng chiong pho͘-á kng piàn-sūi ê lâi, ài beh kng ji̍p-khì hē tī I ê bīn-chêng.

19因為人chōe，chhē無縫thang扛入去；就上厝頂，tùi厝蓋中將人連舖á縋（lūi）落去，hē tī中央，tī耶穌ê面前。In-ūi lâng chōe, chhē bô phāng thang kng ji̍p-khì; chiū chiūⁿ chhù-téng, tùi chhù-kòa tiong chiong lâng liân pho͘-á lūi[tūi]tūi-lo̍h-khì, hē tī tiong-ng, tī Iâ-so͘ ê bīn-chêng.

20耶穌看見in ê信就講，某人ah，你ê罪赦lah。Iâ-so͘ khòaⁿ-kìⁿ in ê sìn chiū kóng, Bó͘ lâng ah, lí ê chōe sià lah.

21經學士kap法利賽人就議論講，Chit-ê講僭權lām-sám ê話ê是是誰 ah？上帝以外，是誰能赦罪ah？Keng-ha̍k-sū kap Hoat-lī-sài lâng chiū gī-lūn kóng, Chit ê kóng chhiàm-koân lām-sám ê ōe ê sī chī-chūi ah? Siōng-tè í-gōa, chī-chūi ōe sià-chōe ah?

22耶穌知in ê議論，就應講，Lín心內teh議論甚麼ah？Iâ-so͘ chai in ê gī-lūn, chiū ìn kóng, Lín sim-lāi teh gī-lūn sím-mi̍h ah?

23講，你ê罪赦á是講，你起來行，tá-lo̍h一項khah快？Kóng, Lí ê chōe sià á-sī kóng, Lí khí-lâi kiâⁿ, tá-lo̍h chi̍t hāng khah khoài?

24總是beh hō͘ lín知人子tī地裡有權thang赦免罪，(就ka7pian3-sūi ê講) ，我kā你講，起來，giâ你ê舖á tò去你ê厝。Chóng-sī beh hō͘ lín chai Jîn-chú tī tōe-ni̍h ū koân thang sià-bián chōe, (chiū kā piàn-sūi ê kóng), Góa kā lí kóng, Khí-lâi, giâ lí ê pho͘-á tò-khì lí ê chhù.

25Hit人tī眾人ê面前即時起來，giâ伊所睏ê，tò去伊ê厝，歸榮光上帝。Hit lâng tī chèng lâng ê bīn-chêng chek-sî khí-lâi, giâ i só͘ khùn ê, tò-khì i ê chhù, kui êng-kng Siōng-tè.

26眾人lóng gông-ngia̍h，也歸榮光上帝；koh滿心驚惶講，咱今á日看見意外ê事。Chèng lâng lóng gông-ngia̍h, iā kui êng-kng Siōng-tè; koh móa-sim kiaⁿ-hiâⁿ kóng, Lán kin-á-ji̍t khòaⁿ-kìⁿ ì-gōa ê sū.

27Chiah-ê tāi-chì了後，耶穌出去，看見一個抽餉ê，名叫利未，坐tī餉關；就kā伊講，Tè我。Chiah ê tāi-chì liáu-āu, Iâ-so͘ chhut-khì, khòaⁿ-kìⁿ chi̍t ê thiu-hiòng ê, miâ kiò Lī-bī, chē tī hiòng-koan; chiū kā i kóng, Tè góa.

28伊就放sak一切，起來tè伊I chiū pàng-sak it-chhè, khí-lâi tè I.

29利未為tio̍h伊辦大筵席tī in tau；有抽餉ê以及別人chōe-chōe kap in同坐桌。Lī-bī ūi-tio̍h I pān tōa iân-sia̍h tī in tau; ū thiu-hiòng ê í-ki̍p pa̍t lâng chōe-chōe kap in tâng chē toh.

30法利賽人kap in ê經學士tùi伊ê學生nga̍uh-nga̍uh念，講，Lín啥事kap抽餉ê以及pháiⁿ人lim食ah？Hoat-lī-sài lâng kap in ê keng-ha̍k-sū tùi I ê ha̍k-seng nga̍uh-nga̍uh-liām, kóng, Lín siáⁿ-sū kap thiu-hiòng ê í-ki̍p pháiⁿ lâng lim-chia̍h ah?

31耶穌應講，勇壯ê人無欠用醫生，但是破病ê人就tio̍h；Iâ-so͘ ìn kóng, Ióng-chòng ê lâng bô khiàm-ēng i-seng, nā-sī phòa-pīⁿ ê lâng chiū tio̍h;

32我來m̄是beh招義人，是beh招pháiⁿ人來反悔。góa lâi m̄ sī beh chio gī lâng, sī beh chio pháiⁿ lâng lâi hoán-hóe.

33In對伊講，約翰ê學生ta̍uh-ta̍uh禁食祈禱；法利賽ê學生也是án-ni；但是你ê學生也lim也食。In tùi I kóng, Iok-hān ê ha̍k-seng ta̍uh-ta̍uh kìm-chia̍h kî-tó; Hoat-lī-sài ê ha̍k-seng iā sī án-ni; nā-sī lí ê ha̍k-seng iā lim iā chia̍h.

34耶穌對in講，新kiáⁿ婿kap賀娶ê人saⁿ-kap tī-teh，kiám會hō͘賀娶ê人禁食mah？Iâ-so͘ tùi in kóng, Sin-kiáⁿ-sài kap hō-chhōa ê lâng saⁿ-kap tī-teh, kiám ōe hō͘ hō-chhōa ê lâng kìm-chia̍h mah?

35但是日子beh到，新kiáⁿ婿對in中間無--去；tī hiah-ê日in就beh禁食。Nā-sī ji̍t-chí beh kàu, sin-kiáⁿ-sài tùi in tiong-kan bô--khì; tī hiah ê ji̍t in chiū beh kìm-chia̍h.

36Koh用譬喻對in講，無人拆新衫來補舊衫；若án-ni，就拆破新衫，koh所補hit塊新ê無合tī舊ê。Koh ēng phì-jū tùi in kóng, Bô lâng thiah sin saⁿ lâi pó͘ kū saⁿ; nā án-ni, chiū thiah-phòa sin saⁿ, koh só͘ pó͘ hit tè sin ê bô ha̍h tī kū ê.

37也無人用新酒tóe tī舊皮囊；若án-ni，就新酒beh爆裂皮囊，酒漏，lông也phah pháiⁿ。Iā bô lâng ēng sin chiú tóe tī kū phê-lông; nā án-ni, chiū sin chiú beh piak-li̍h phê-lông, chiú lāu, lông iā phah pháiⁿ.

38獨獨新酒tio̍h入tī新ê皮囊。To̍k-to̍k sin chiú tio̍h ji̍p tī sin ê phê-lông.

39Koh無人lim舊酒也ài hit-ê新ê；因為講，舊ê是好。Koh bô lâng lim kū chiú iā ài hit ê sin ê; in-ūi kóng, Kū ê sī hó.

1有一個安歇日耶穌tùi麥園經過，伊ê學生摘麥穗，用手揉伊來食。Ū chi̍t ê an-hioh-ji̍t Iâ-so͘ tùi be̍h-hn̂g keng-kè, I ê ha̍k-seng tiah be̍h-sūi, ēng chhiú jê i lâi chia̍h.

2有法利賽幾nā人講，安歇日所m̄應該行ê，lín啥事行伊？Ū Hoat-lī-sài kúi-nā lâng kóng, An-hioh-ji̍t só͘ m̄ eng-kai kiâⁿ ê, lín siáⁿ-sū kiâⁿ i?

3耶穌應講，大衛kap跟tè ê人Iau ê時所行ê，lín bē讀tio̍h mah？Iâ-so͘ ìn kóng, Tāi-pi̍t kap kun-tè ê lâng iau ê sî só͘ kiâⁿ ê, lín bē tha̍k-tio̍h mah?

4伊入上帝ê厝，the̍h排列ê餅來食，koh hō͘伊跟tè ê人；chit號餅，若m̄是祭司，就lóng m̄應該食。I ji̍p Siōng-tè ê chhù, the̍h pâi-lia̍t ê piáⁿ lâi chia̍h, koh hō͘ i kun-tè ê lâng; chit hō piáⁿ, nā m̄ sī chè-si, chiū lóng m̄ eng-kai chia̍h.

5Koh kā in講，人子也是安歇日ê主。Koh kā in kóng, Jîn-chú iā sī an-hioh-ji̍t ê Chú.

6Koh一個安歇日，耶穌入會堂教示；tī hia有一人伊ê chiàⁿ手枯焦。Koh chi̍t ê an-hioh-ji̍t, Iâ-so͘ ji̍p hōe-tn̂g kà-sī; tī hia ū chi̍t lâng i ê chiàⁿ chhiú ko͘-tâ.

7經學士kap法利賽人當看伊tī安歇日beh醫病á無；意思是ài chhē縫thang告伊。Keng-ha̍k-sū kap Hoat-lī-sài lâng tng khòaⁿ I tī an-hioh-ji̍t beh i-pīⁿ á bô; ì-sù sī ài chhē phāng thang kò I.

8耶穌知in ê意思，就kā hit-ê手枯焦ê人講，起來，khiā tī中央；伊就起來khiā。Iâ-so͘ chai in ê ì-sù, chiū kā hit-ê chhiú ko͘-tâ ê lâng kóng, khí-lâi, khiā tī tiong-ng; i chiū khí-lâi khiā.

9耶穌就對in講，我問lín，tī安歇日行好事行pháiⁿ事，救性命害性命，tá-lo̍h一項khah合宜ah？Iâ-so͘ chiū tùi in kóng, Góa mn̄g lín, tī an-hioh-ji̍t kiâⁿ hó sū kiâⁿ pháiⁿ sū, kiù sìⁿ-miā hāi sìⁿ-miā, tá-lo̍h chi̍t hāng khah ha̍p-gî ah?

10就四界看眾人，kā hit人講，伸你ê手。伊伸出去；手就好好。Chiū sì-kè khòaⁿ chèng lâng, kā hit lâng kóng, Chhun lí ê chhiú. I chhun-chhut-khì; chhiú chiū hó-hó.

11Hiah-ê人滿心受氣；saⁿ-kap議論tio̍h怎樣來辦耶穌。Hiah ê lâng móa-sim siū-khì; saⁿ-kap gī-lūn tio̍h cháiⁿ-iūⁿ lâi pān Iâ-so͘.

12當hit時耶穌出去山裡祈禱，thong暝祈求上帝。Tng hit sî Iâ-so͘ chhut-khì soaⁿ-ni̍h kî-tó, thong mî kî-kiû Siōng-tè.

13到天光就叫伊ê學生來；對in中間揀十二人，稱in做使徒；Kàu thiⁿ-kng chiū kiò I ê ha̍k-seng lâi; tùi in tiong-kan kéng cha̍p-jī lâng, chheng in chòe sù-tô͘;

14有西門，耶穌koh號伊ê名做彼得，kap伊ê兄弟安得烈，koh有雅各kap約翰，腓力kap巴多羅買；ū Se-bûn, Iâ-so͘ koh hō i ê miâ chòe Pí-tek, kap i ê hiaⁿ-tī An-tek-lia̍t, koh ū Ngá-kok kap Iok-hān, Hui-le̍k kap Pa-to-lô-mái;

15馬太kap多馬，亞勒腓ê Kiáⁿ雅各kap稱做西羅底ê西門，Má-thài kap To-má, A-le̍k-hui ê kiáⁿ Ngá-kok kap chheng chòe Se-lô-tí ê Se-bûn,

16雅各ê Kiáⁿ猶大，kap賣先生ê加略人猶大。Ngá-kok ê kiáⁿ Iû-tāi, kap bōe sian-siⁿ ê Ka-lio̍k lâng Iû-tāi.

17耶穌kap in落來khiā tī平ê所在，有伊chōe-chōe ê學生kap Kui大陣ê百姓，tùi猶太全地kap耶路撒冷以及Chhui-lo5Se-tùn沿海墘ê地來beh聽伊，也beh得tio̍h醫好in ê病；Iâ-so͘ kap in lo̍h-lâi khiā tī pîⁿ ê só͘-chāi, ū I chōe-chōe ê ha̍k-seng kap kui tōa tīn ê peh-sìⁿ, tùi Iû-thài choân-tōe kap Iâ-lō͘-sat-léng í-ki̍p Chhui-lô Se-tùn iân hái-kîⁿ ê tōe lâi beh thiaⁿ I, iā beh tit-tio̍h i-hó in ê pīⁿ;

18koh有hō͘邪神所刁難ê也得tio̍h醫好。koh ū hō͘ siâ-sîn só͘ thiau-lân ê iā tit-tio̍h i-hó.

19眾人lóng ài摸伊，因為有權能對伊出，來醫好in大家。Chèng lâng lóng ài bong I, in-ūi ū koân-lêng tùi I chhut, lâi i-hó in tāi-ke.

20耶穌kia̍h目看伊ê學生，講，Lín sòng-hiong ê人有福氣ah，因為上帝ê國是lín ê。Iâ-so͘ kia̍h ba̍k khòaⁿ I ê ha̍k-seng, kóng, Lín sòng-hiong ê lâng ū hok-khì ah, in-ūi Siōng-tè ê kok sī lín ê.

21Lín現在teh iau ê人有福氣ah；因為lín beh得tio̍h飽。Lín現在啼哭ê人有福氣ah，因為lín teh-beh笑。Lín hiān-chāi teh iau ê lâng ū hok-khì ah; in-ūi lín beh tit-tio̍h pá. Lín hiān-chāi thî-khàu ê lâng ū hok-khì ah, in-ūi lín teh-beh chhiò.

22人為tio̍h人子來怨恨lín，拒絕lín，lóe罵lín，掠lín ê名做pháiⁿ來棄sak伊，lín就有福氣ah。Lâng ūi-tio̍h Jîn-chú lâi oàn-hūn lín, kū-choa̍t lín, lóe-mē lín, lia̍h lín ê miâ chòe pháiⁿ lâi khì-sak i, lín chiū ū hok-khì ah.

23當hit日lín tio̍h歡喜tiô跳；因為tī天裡lín ê報賞是大，是in ê祖款待先知也是án-ni。Tng hit ji̍t lín tio̍h hoaⁿ-hí tiô-thiàu; in-ūi tī thiⁿ-ni̍h lín ê pò-siúⁿ sī tōa, sī in ê chó͘ khoán-thāi sian-ti iā sī án-ni.

24但是lín好額人有災禍ah！因為lín已經受tio̍h lín ê安慰。Nā-sī lín hó-gia̍h lâng ū chai-ē ah! in-ūi lín í-keng siū-tio̍h lín ê an-ùi.

25Lín現在飽ê人有災禍ah！因為lín teh-beh iau。Lín現在笑ê人有災禍ah！因為lín beh哀傷啼哭。Lín hiān-chāi pá ê lâng ū chai-ē ah! in-ūi lín teh-beh iau. Lín hiān-chāi chhiò ê lâng ū chai-ē ah! in-ūi lín beh ai-siong thî-khàu.

26Lín Hō͘眾人o-ló ê有災禍ah！因為in ê祖款待假ê先知也是án-ni。Lín hō͘ chèng lâng o-ló ê ū chai-ē ah! in-ūi in ê chó͘ khoán-thāi ké ê sian-ti iā sī án-ni.

27但是我kā lín teh聽ê人講，對敵lín ê tio̍h疼in；怨恨lín ê，tio̍h好款待in；Nā-sī góa kā lín teh thiaⁿ ê lâng kóng, Tùi-te̍k lín ê tio̍h thiàⁿ in; oàn-hūn lín ê, tio̍h hó khoán-thāi in;

28lóe罵lín ê，tio̍h kā in祝福；凌辱lín ê，tio̍h替in祈禱。lóe-mē lín ê, tio̍h kā in chiok-hok; lêng-jio̍k lín ê, tio̍h thòe in kî-tó.

29人siàn你chit-pêng ê嘴phóe，就tio̍h oa̍t hit-pêng ǹg伊人the̍h lín ê外衫，連內衫也莫得擋伊Lâng siàn lí chit pêng ê chhùi-phóe, chiū tio̍h oa̍t hit pêng ǹg i. Lâng the̍h lín ê gōa-saⁿ, liân lāi-saⁿ iā bo̍h-tit tòng i.

30凡若求你ê tio̍h hō͘伊；the̍h你ê物ê，莫得koh kā伊討。Hoān-nā kiû lí ê tio̍h hō͘ i; the̍h lí ê mi̍h ê, bo̍h-tit koh kā i thó.

31Lín ài人怎樣款待lín，也tio̍h án-ni款待人。Lín ài lâng cháiⁿ-iūⁿ khoán-thāi lín, iā tio̍h án-ni khoán-thāi lâng.

32Lín若疼hiah-ê疼lín ê，有甚麼恩惠？因為pháiⁿ人也是疼hiah-ê疼in ê人。Lín nā thiàⁿ hiah-ê thiàⁿ lín ê, ū sím-mi̍h un-hūi? in-ūi pháiⁿ lâng iā sī thiàⁿ hiah-ê thiàⁿ in ê lâng.

33Lín若好款待hiah-ê好款待lín ê，有甚麼恩惠？因為pháiⁿ人也是án-ni行。Lín nā hó khoán-thāi hiah-ê hó khoán-thāi lín ê, ū sím-mi̍h un-hūi? in-ūi pháiⁿ lâng iā sī án-ni kiâⁿ.

34Lín若借hiah-ê有thàngng望伊還ê，有甚麼恩惠？因為pháiⁿ人也借pháiⁿ人，ài in照數額來還。Lín nā chioh hiah-ê ū thang ǹg-bāng i hêng ê, ū sím-mi̍h un-hūi? in-ūi pháiⁿ lâng iā chioh pháiⁿ lâng, ài in chiàu siàu-gia̍h lâi hêng.

35但是lín tio̍h疼lín ê對敵好款待in；借人也無絕望；lín ê報賞就大，koh lín beh做至koânê ê Kiáⁿ兒；因為伊好款待蒙恩kap pháiⁿ ê人。Nā-sī lín tio̍h thiàⁿ lín ê tùi-te̍k hó khoán-thāi in; chioh lâng iā bô choa̍t-bāng; lín ê pò-siúⁿ chiū tōa, koh lín beh chòe Chì-koâiⁿ-ê ê kiáⁿ-jî; in-ūi I hó khoán-thāi bông-un kap pháiⁿ ê lâng.

36所以lín tio̍h有憐憫，親像lín ê父ê憐憫一樣。Só͘-í lín tio̍h ū lîn-bín, chhin-chhiūⁿ lín ê Pē ê lîn-bín chi̍t iūⁿ.

37莫得批評人，就無tú-tio̍h批評；莫得責罪人，就無tú-tio̍h責罪；lín放人soah，就beh放lín soah；Bo̍h-tit phoe-phêng lâng, chiū bô tú-tio̍h phoe-phêng; bo̍h-tit chek-chōe lâng, chiū bô tú-tio̍h chek-chōe; lín pàng lâng soah, chiū beh pàng lín soah;

38hō͘人，就beh hō͘ lín；beh用足額ê斗，ji̍h，搖，hō͘伊cha̍t到pôaⁿ出來，拚tī lín ê衫á-phè。因為lín用甚麼量來量，也beh án-ni倒量hō͘ lín。hō͘ lâng, chiū beh hō͘ lín; beh ēng chiok-gia̍h ê táu, ji̍h, iô, hō͘ i cha̍t kàu pôaⁿ-chhut-lâi, piàⁿ tī lín ê saⁿ-á-phè. In-ūi lín ēng sím-mi̍h niû lâi niû, iā beh án-ni tò niû hō͘ lín.

39Koh用譬喻kā in講，Chhiⁿ-mî ê能kā chhiⁿ-mî ê chhōa路mah？兩ê Kiám bōe lóng跋落陷坑mah？Koh ēng phì-jū kā in kóng, Chhiⁿ-mî ê ōe kā chhiⁿ-mî ê chhōa lō͘ mah? Nn̄g-ê kiám bōe lóng poa̍h-lo̍h hām-khiⁿ mah?

40學生bōe會pôaⁿ過先生；總是見若成做齊備ê beh親像伊ê先生。Ha̍k-seng bōe-ōe pôaⁿ-kè sian-siⁿ; chóng-sī kìⁿ-nā chiâⁿ chòe chiâu-pī ê beh chhin-chhiūⁿ i ê sian-siⁿ.

41Koh你怎樣看見兄弟目睭內ê草á幼，也無想你目睭內ê楹á柴ah？Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu lāi ê chháu-á-iù, iā bô siūⁿ lí ba̍k-chiu lāi ê îⁿ-á-chhâ ah?

42á是beh thài會kā你ê兄弟講，兄弟ah，你目睭內ê草á幼hō͘我kā你the̍h去，也本身無看見你目睭內ê楹á柴ah？假好ê人ah，事先the̍h去你目睭內ê楹á柴，chiah會明明看見thang the̍h去兄弟目睭內ê草á幼。Á-sī beh thài ōe kā lí ê hiaⁿ-tī kóng, Hiaⁿ-tī ah, lí ba̍k-chiu lāi ê chháu-á-iù hō͘ góa kā lí the̍h-khì, iā pún-sin bô khòaⁿ-kìⁿ lí ba̍k-chiu lāi ê îⁿ-á-chhâ ah? Ké-hó ê lâng ah, tāi-seng the̍h-khì lí ba̍k-chiu lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu lāi ê chháu-á-iù.

43因為無有好樹結pháiⁿ果子；也無有pháiⁿ樹結好果子。In-ūi bô ū hó chhiū kiat pháiⁿ ké-chí; iā bô ū pháiⁿ chhiū kiat hó ké-chí.

44因為ta̍k叢樹對伊家己ê果子來bat伊；刺phè內無人挽無花果，草刺內無人摘葡萄。In-ūi ta̍k châng chhiū tùi i ka-kī ê ké-chí lâi bat i; chhì-phè lāi bô lâng bán bû-hoa-kó, chháu-chhì lāi bô lâng tiah phû-tô.

45好人對伊ê心所積聚ê好來發出好；pháiⁿ人對伊所積聚ê pháiⁿ來發出pháiⁿ；因為tùi心所充滿ê，嘴就講出。Hó lâng tùi i ê sim só͘ chek-chū ê hó lâi hoat-chhut hó; pháiⁿ lâng tùi i só͘ chek-chū ê pháiⁿ lâi hoat-chhut pháiⁿ; in-ūi tùi sim só͘ chhiong-móa ê, chhùi chiū kóng chhut.

46Lín啥事稱呼我，主ah，主ah，也無行我所講ê ah？Lín siáⁿ-sū chheng-ho͘ góa, Chú ah, Chú ah, iā bô kiâⁿ góa só͘ kóng ê ah?

47見若就近我，聽我chiah-ê話來行伊ê人，我beh報lín知hit-ê人親像甚麼。Kìⁿ-nā chiū-kūn góa, thiaⁿ góa chiah ê ōe lâi kiâⁿ i ê lâng, góa beh pò lín chai hit ê lâng chhin-chhiūⁿ sím-mi̍h.

48伊是親像人起厝，掘hō͘伊深，hē地基tī石磐頂；大水一下到，溪流沖tio̍h厝，bōe會搖動伊，因為伊起得好。I sī chhin-chhiūⁿ lâng khí chhù, ku̍t hō͘ i chhim, hē tōe-ki tī chio̍h-pôaⁿ téng; tōa chúi chi̍t-ē kàu, khoe lâu chhiong-tio̍h chhù, bōe-ōe iô-tāng i, in-ūi i khí-tit hó.

49但是聽了無行ê人，是親像人起厝tī土頂，無hē地基；溪流沖tio̍h伊，就倒；hit間厝ê倒壞是傷重。Nā-sī thiaⁿ-liáu bô kiâⁿ ê lâng, sī chhin-chhiūⁿ lâng khí chhù tī thô͘-téng, bô hē tōe-ki; khoe lâu chhiong-tio̍h i, chiū tó; hit keng chhù ê tó-hoāi sī siong-tiōng.

1耶穌講hō͘百姓聽ê話lóng明白，就入迦百農。Iâ-so͘ kóng hō͘ peh-sìⁿ thiaⁿ ê ōe lóng bêng-pe̍k, chiū ji̍p Ka-pek-lông.

2有一個百總所對重奴僕患tio̍h病，teh-beh死。Ū chi̍t ê pé-chóng só͘ tùi-tiōng ê lô͘-po̍k hoān-tio̍h pīⁿ, teh-beh sí.

3百總聽見耶穌ê事，就差猶太ê長老幾nā人，求伊來救伊ê奴僕。Pé-chóng thiaⁿ-kìⁿ Iâ-so͘ ê sū, chiū chhe Iû-thài ê tiúⁿ-ló kúi-nā lâng, kiû I lâi kiù i ê lô͘-po̍k.

4In就近耶穌切切求伊講，Chit人會堪得你kā伊行chit-ê tāi-chì；In chiū-kūn Iâ-so͘ chhiat-chhiat kiû I kóng, Chit lâng ōe kham-tit lí kā i kiâⁿ chit ê tāi-chì;

5因為伊疼咱ê百姓，koh本身替咱起會堂。in-ūi i thiàⁿ lán ê peh-sìⁿ, koh pún-sin thòe lán khí hōe-tn̂g.

6耶穌kap in去。離厝無jōa遠，百總差幾nā ê朋友就近伊，kā伊講，主ah，m̄-thang勞煩；你到我ê厝我當bōe起；Iâ-so͘ kap in khì. Lī chhù bô jōa hn̄g, pé-chóng chhe kúi-nā ê pêng-iú chiū-kūn I, kā I kóng, Chú ah, m̄-thang lô-hoân; lí kàu góa ê chhù góa tng bōe khí;

7我也掠做家己bōe堪得就近你；你若講一句話，我ê奴僕就會好。góa iā lia̍h chòe ka-kī bōe kham-tit chiū-kūn lí; lí nā kóng chi̍t kù ōe, góa ê lô͘-po̍k chiū ōe hó.

8因為我也是hō͘人管ê人，也有兵hō͘我管；kā chit-ê講，去，伊就去；kā hit-ê講，來，伊就來；kā我ê奴僕講，行án-ni，伊就行án-ni。In-ūi góa iā sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

9耶穌聽見chiah-ê話就奇怪伊，oa̍t-tńg身kā tè伊ê眾人講，我kā lín講，親像chit號ê信，連以色列中我iáu-bē bat tú-tio̍h。Iâ-so͘ thiaⁿ-kìⁿ chiah ê ōe chiū kî-koài i, oa̍t-tńg-sin kā tè I ê chèng lâng kóng, Góa kā lín kóng, chhin-chhiūⁿ chit hō ê sìn liân Í-sek-lia̍t tiong góa iáu-bē bat tú-tio̍h.

10所差ê人tò去到厝，看見奴僕已經好好。Só͘ chhe ê lâng tò-khì kàu chhù, khòaⁿ-kìⁿ lô͘-po̍k í-keng hó-hó.

11Koh無jōa久，耶穌去一個城名叫Ná-in；伊ê學生kap Kui陣人kap伊同行。Koh bô jōa kú, Iâ-so͘ khì chi̍t ê siâⁿ miâ kiò Ná-in; I ê ha̍k-seng kap kui tīn lâng kap I tâng kiâⁿ.

12Beh近城門，tú-tn̄g有人扛一個死人出來，伊ê老母孤孤生chit-ê Kiáⁿ，koh是守寡。城內有chōe-chōe人teh送伊Beh kūn siâⁿ-mn̂g, tú-tn̄g ū lâng kng chi̍t ê sí-lâng chhut-lâi, i ê lāu-bú ko͘-ko͘ siⁿ chit ê kiáⁿ, koh sī chiú-kóaⁿ. Siâⁿ-lāi ū chōe-chōe lâng teh sàng i.

13主看見就憐憫伊，kā伊講，莫得哮。Chú khòaⁿ-kìⁿ chiū lîn-bín i, kā i kóng, Bo̍h-tit háu.

14就óa去，摸hit-ê Khòa身屍ê架，扛ê人停腳；伊就講，少年人ah，我kā你講，起來。Chiū óa-khì, bong hit-ê khòa sin-si ê kè, kng ê lâng thêng-kha; I chiū kóng, Siàu-liân lâng ah, góa kā lí kóng, Khí-lâi.

15死ê人就起來坐，續講話。Sí ê lâng chiū khí-lâi chē, sòa kóng ōe.

16耶穌就將伊hō͘伊ê老母。眾人lóng驚惶，歸榮光上帝講，大先知有興起tī咱中間；koh講，上帝有看顧伊ê百姓。Iâ-so͘ chiū chiong i hō͘ i ê lāu-bú. Chèng lâng lóng kiaⁿ-hiâⁿ, kui êng-kng Siōng-tè kóng, Tōa sian-ti ū heng-khí tī lán tiong-kan; koh kóng, Siōng-tè ū khòaⁿ-kò͘ I ê peh-sìⁿ.

17Tùi án-ni耶穌chit-ê名聲遍傳tī猶太kap周圍ê地方。Tùi án-ni Iâ-so͘ chit ê miâ-siaⁿ piàn thoân tī Iû-thài kap chiu-ûi ê tōe-hng.

18約翰ê學生將chiah-ê事lóng總報in ê先生知。Iok-hān ê ha̍k-seng chiong chiah ê sū lóng-chóng pò in ê sian-siⁿ chai.

19伊就叫伊ê學生兩人來，差in就近主講，所beh來ê是你mah？á是阮tio̍h ǹg望別人ah？I chiū kiò i ê ha̍k-seng nn̄g lâng lâi, chhe in chiū-kūn Chú kóng, Só͘ beh lâi ê sī lí mah? Á-sī goán tio̍h ǹg-bāng pa̍t lâng ah?

20Hit兩人已經到，就講，行洗禮約翰差阮就近你，講，Beh來ê是你mah？á是阮tio̍h ǹg望別人ah？Hit nn̄g lâng í-keng kàu, chiū kóng, Kiâⁿ sóe-lé Iok-hān chhe goán chiū-kūn lí, kóng, Beh lâi ê sī lí mah? Á-sī goán tio̍h ǹg-bāng pa̍t lâng ah?

21Hit時耶穌醫好chōe-chōe破病ê，痛疼ê，患tio̍h鬼ê，koh hō͘ chōe-chōe chhiⁿ-mî ê得tio̍h看見。Hit sî Iâ-so͘ i-hó chōe-chōe phòa-pīⁿ ê, thàng-thiàⁿ ê, hoān-tio̍h kúi ê, koh hō͘ chōe-chōe chhiⁿ-mî ê tit-tio̍h khòaⁿ-kìⁿ.

22就應講，Lín tio̍h去，將lín所看見所聽見ê報約翰知；就是chhiⁿ-mî ê看見，跛腳ê行，thái-ko ê清氣，臭耳人ê聽見，死ê人koh活，sòng-hiong人得tio̍h聽福音；Chiū ìn kóng, Lín tio̍h khì, chiong lín só͘ khòaⁿ-kìⁿ só͘ thiaⁿ-kìⁿ ê pò Iok-hān chai; chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im;

23見若無tī我來tio̍h-tak ê，有福氣。kìⁿ-nā bô tī góa lâi tio̍h-tak ê, ū hok-khì.

24約翰所差ê人去了，耶穌chiah提起約翰，tùi眾人講，Lín前出去曠野，beh看甚麼？是蘆竹hō͘風吹振動mah？Iok-hān só͘ chhe ê lâng khì-liáu, Iâ-so͘ chiah thê-khí Iok-hān, tùi chèng lâng kóng, Lín chêng chhut-khì khòng-iá, beh khòaⁿ sím-mi̍h? sī lô͘-tek hō͘ hong chhe tín-tāng mah?

25Lín出去beh看甚麼？是人穿幼軟ê衣裳mah？你看，穿衫hâng-ngó͘享受宴樂ê是tī王宮。Lín chhut-khì beh khòaⁿ sím-mi̍h? sī lâng chhēng iù-nńg ê i-chiûⁿ mah? Lí khòaⁿ, chhēng saⁿ hâng-ngó͘ hióng-siū iàn-lo̍k ê sī tī ông-kiong.

26Án-ni，lín出去beh看甚麼？先知人mah？是lah，我kā lín講，也是khah贏過先知ê。Án-ni, lín chhut-khì beh khòaⁿ sím-mi̍h? sian-ti lâng mah? Sī lah, góa kā lín kóng, iā sī khah iâⁿ-kè sian-ti ê.

27Chit人就是經裡所指ê，講， 你看，我差我ê使者tī你ê面前， Ibeh tī你ê頭前備辦你ê路。Chit lâng chiū-sī keng-ni̍h só͘ chí ê, kóng, Lí khòaⁿ, góa chhe góa ê sù-chiá tī lí ê bīn-chêng, I beh tī lí ê thâu-chêng pī-pān lí ê lō͘.

28我kā lín講，婦人人所生bē有khah大約翰ê；總是tī上帝國ê微細ê iáu khah大伊Góa kā lín kóng, Hū-jîn-lâng só͘ siⁿ bē ū khah tōa Iok-hān ê; chóng-sī tī Siōng-tè kok ê bî-sòe ê iáu khah tōa i.

29眾百姓kap抽餉ê人，已經受約翰ê洗禮，一下聽見這，就稱呼上帝做義。Chèng peh-sìⁿ kap thiu-hiòng ê lâng, í-keng siū Iok-hān ê sóe-lé, chi̍t-ē thiaⁿ-kìⁿ che, chiū chheng-ho͘ Siōng-tè chòe gī.

30若是法利賽人kap教律法ê先生無受伊ê洗禮，家己phah無上帝ê旨意。Nā-sī Hoat-lī-sài lâng kap kà lu̍t-hoat ê sian-siⁿ bô siū i ê sóe-lé, ka-kī phah-bô Siōng-tè ê chí-ì.

31主講，Chit世代ê人，我beh用甚麼來比並in？in是親像甚麼ah？Chú kóng, Chit sè-tāi ê lâng, góa beh ēng sím-mi̍h lâi pí-phēng in? In sī chhin-chhiūⁿ sím-mi̍h ah?

32是親像gín-ná坐tī街市裡，saⁿ叫講，阮對lín pûn笛á，lín無跳舞；阮bat悲哀，lín無啼哭。Sī chhin-chhiūⁿ gín-ná chē tī koe-chhī-ni̍h, saⁿ kiò kóng, Goán tùi lín pûn ta̍t-á, lín bô thiàu-bú; goán bat pi-ai, lín bô thî-khàu.

33因為行洗禮ê約翰來，無食餅無lim酒，lín就講，伊患tio̍h鬼。In-ūi kiâⁿ sóe-lé ê Iok-hān lâi, bô chia̍h piáⁿ bô lim chiú, lín chiū kóng, I hoān-tio̍h kúi.

34人子來也食也lim，lín就講，伊是貪食好酒ê人，抽餉ê Kap pháiⁿ人ê朋友。Jîn-chú lâi iā chia̍h iā lim, lín chiū kóng, I sī tham-chia̍h hò͘ⁿ-chiú ê lâng, thiu-hiòng ê kap pháiⁿ lâng ê pêng-iú.

35若是智慧對伊ê眾kiáⁿ顯明伊是tio̍h。Nā-sī Tì-hūi tùi i ê chèng kiáⁿ hián-bêng i sī tio̍h.

36有一個法利賽人請耶穌saⁿ-kap食，伊就入法利賽人ê厝坐桌。Ū chi̍t ê Hoat-lī-sài lâng chhiáⁿ Iâ-so͘ saⁿ-kap chia̍h. I chiū ji̍p Hoat-lī-sài lâng ê chhù chē toh.

37Tú-tn̄g城內有一個pháiⁿ婦人人，知伊坐桌tī法利賽人ê厝，就tòa tóe香油ê玉罐來；Tú-tn̄g siâⁿ-lāi ū chi̍t ê pháiⁿ hū-jîn-lâng, chai I chē toh tī Hoat-lī-sài lâng ê chhù, chiū tòa tóe hiuⁿ-iû ê ge̍k-koàn lâi;

38khiā tī耶穌ê後面，óa伊ê腳teh啼哭；有目屎滴tâm伊ê腳，就用伊ê頭毛拭伊；koh chia̍p-chia̍p chim伊ê腳，用香油抹伊khiā tī Iâ-so͘ ê āu-bīn, óa I ê kha teh thî-khàu; ū ba̍k-sái tih-tâm I ê kha, chiū ēng i ê thâu-mn̂g chhit i; koh chia̍p-chia̍p chim I ê kha, ēng hiuⁿ-iû boah i.

39請耶穌ê法利賽人看見án-ni，心內想講，Chit人若是先知，的確會知摸伊ê人是是誰，koh是甚麼號ê婦人人，就是pháiⁿ人。Chhiáⁿ Iâ-so͘ ê Hoat-lī-sài lâng khòaⁿ-kìⁿ án-ni, sim-lāi siūⁿ kóng, Chit lâng nā sī sian-ti, tek-khak ōe chai bong I ê lâng sī chī-chūi, koh sī sím-mi̍h hō ê hū-jîn-lâng, chiū-sī pháiⁿ lâng.

40耶穌應伊講，西門，我有話beh kā你講。西門講，先生，請你講。Iâ-so͘ ìn i kóng, Se-bûn, góa ū ōe beh kā lí kóng. Se-bûn kóng, Sian-siⁿ, chhiáⁿ lí kóng.

41伊就講，某個債主有兩人欠伊ê債，一個欠伊五百ê銀á，一個欠伊五十。I chiū kóng, Bó͘ ê chè-chú ū nn̄g lâng khiàm i ê chè, chi̍t-ê khiàm i gō͘-pah ê gûn-á, chi̍t-ê khiàm i gō͘-cha̍p.

42In既然無thang還，債主就赦免in兩人。Án-ni，就tá-lo̍h一個khah疼債主ah？In kì-jiân bô thang hêng, chè-chú chiū sià-bián in nn̄g lâng. Án-ni, chiū tá-lo̍h chi̍t-ê khah thiàⁿ chè-chú ah?

43西門應講，我phah算是hit-ê hō͘伊赦免khah chōe ê。耶穌kā伊講，你所斷ê是tio̍h。Se-bûn ìn kóng, Góa phah-sǹg sī hit-ê hō͘ i sià-bián khah chōe ê. Iâ-so͘ kā i kóng, Lí só͘ toàn ê sī tio̍h.

44就oa̍t頭ǹg婦人人，kā西門講，你看見chit-ê婦人人無？我入你ê厝，你無用水hō͘我洗腳；但是伊用目屎滴tâm我ê腳，用頭毛拭伊Chiū oa̍t thâu ǹg hū-jîn-lâng, kā Se-bûn kóng, Lí khòaⁿ-kìⁿ chit ê hū-jîn-lâng bô? Góa ji̍p lí ê chhù, lí bô ēng chúi hō͘ góa sóe kha; nā-sī i ēng ba̍k-sái tih-tâm góa ê kha, ēng thâu-mn̂g chhit i.

45你無kā我chim；獨獨伊tùi我入來ê時chim我ê腳無soah。Lí bô kā góa chim; to̍k-to̍k i tùi góa ji̍p-lâi ê sî chim góa ê kha bô soah.

46你無用油抹我ê頭殼；但是伊用香油抹我ê腳。Lí bô ēng iû boah góa ê thâu-khak; nā-sī i ēng hiuⁿ-iû boah góa ê kha.

47所以我kā你講，伊chōe-chōe ê罪kòa已經赦免，因為伊ê疼是chōe；但是得tio̍h赦免少ê，伊ê疼伊ā是少。Só͘-í góa kā lí kóng, I chōe-chōe ê chōe-kòa í-keng sià-bián, in-ūi i ê thiàⁿ sī chōe; nā-sī tit-tio̍h sià-bián chió ê, i ê thiàⁿ iā sī chió.

48就kā婦人人講，你ê罪赦lah。Chiū kā hū-jîn-lâng kóng, Lí ê chōe sià lah.

49同桌ê人心內講，Chit-ê teh赦罪ê是甚麼人？Tâng toh ê lâng sim-lāi kóng, Chit-ê teh sià chōe ê sī sím-mi̍h lâng?

50耶穌tùi婦人人講，你ê信有救你；做你安心tò去。Iâ-so͘ tùi hū-jîn-lâng kóng, Lí ê sìn ū kiù lí; chòe lí an-sim tò-khì.