1耶穌講hō͘百姓聽ê話lóng明白，就入迦百農。Iâ-so͘ kóng hō͘ peh-sìⁿ thiaⁿ ê ōe lóng bêng-pe̍k, chiū ji̍p Ka-pek-lông.

2有一個百總所對重奴僕患tio̍h病，teh-beh死。Ū chi̍t ê pé-chóng só͘ tùi-tiōng ê lô͘-po̍k hoān-tio̍h pīⁿ, teh-beh sí.

3百總聽見耶穌ê事，就差猶太ê長老幾nā人，求伊來救伊ê奴僕。Pé-chóng thiaⁿ-kìⁿ Iâ-so͘ ê sū, chiū chhe Iû-thài ê tiúⁿ-ló kúi-nā lâng, kiû I lâi kiù i ê lô͘-po̍k.

4In就近耶穌切切求伊講，Chit人會堪得你kā伊行chit-ê tāi-chì；In chiū-kūn Iâ-so͘ chhiat-chhiat kiû I kóng, Chit lâng ōe kham-tit lí kā i kiâⁿ chit ê tāi-chì;

5因為伊疼咱ê百姓，koh本身替咱起會堂。in-ūi i thiàⁿ lán ê peh-sìⁿ, koh pún-sin thòe lán khí hōe-tn̂g.

6耶穌kap in去。離厝無jōa遠，百總差幾nā ê朋友就近伊，kā伊講，主ah，m̄-thang勞煩；你到我ê厝我當bōe起；Iâ-so͘ kap in khì. Lī chhù bô jōa hn̄g, pé-chóng chhe kúi-nā ê pêng-iú chiū-kūn I, kā I kóng, Chú ah, m̄-thang lô-hoân; lí kàu góa ê chhù góa tng bōe khí;

7我也掠做家己bōe堪得就近你；你若講一句話，我ê奴僕就會好。góa iā lia̍h chòe ka-kī bōe kham-tit chiū-kūn lí; lí nā kóng chi̍t kù ōe, góa ê lô͘-po̍k chiū ōe hó.

8因為我也是hō͘人管ê人，也有兵hō͘我管；kā chit-ê講，去，伊就去；kā hit-ê講，來，伊就來；kā我ê奴僕講，行án-ni，伊就行án-ni。In-ūi góa iā sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

9耶穌聽見chiah-ê話就奇怪伊，oa̍t-tńg身kā tè伊ê眾人講，我kā lín講，親像chit號ê信，連以色列中我iáu-bē bat tú-tio̍h。Iâ-so͘ thiaⁿ-kìⁿ chiah ê ōe chiū kî-koài i, oa̍t-tńg-sin kā tè I ê chèng lâng kóng, Góa kā lín kóng, chhin-chhiūⁿ chit hō ê sìn liân Í-sek-lia̍t tiong góa iáu-bē bat tú-tio̍h.

10所差ê人tò去到厝，看見奴僕已經好好。Só͘ chhe ê lâng tò-khì kàu chhù, khòaⁿ-kìⁿ lô͘-po̍k í-keng hó-hó.

11Koh無jōa久，耶穌去一個城名叫Ná-in；伊ê學生kap Kui陣人kap伊同行。Koh bô jōa kú, Iâ-so͘ khì chi̍t ê siâⁿ miâ kiò Ná-in; I ê ha̍k-seng kap kui tīn lâng kap I tâng kiâⁿ.

12Beh近城門，tú-tn̄g有人扛一個死人出來，伊ê老母孤孤生chit-ê Kiáⁿ，koh是守寡。城內有chōe-chōe人teh送伊Beh kūn siâⁿ-mn̂g, tú-tn̄g ū lâng kng chi̍t ê sí-lâng chhut-lâi, i ê lāu-bú ko͘-ko͘ siⁿ chit ê kiáⁿ, koh sī chiú-kóaⁿ. Siâⁿ-lāi ū chōe-chōe lâng teh sàng i.

13主看見就憐憫伊，kā伊講，莫得哮。Chú khòaⁿ-kìⁿ chiū lîn-bín i, kā i kóng, Bo̍h-tit háu.

14就óa去，摸hit-ê Khòa身屍ê架，扛ê人停腳；伊就講，少年人ah，我kā你講，起來。Chiū óa-khì, bong hit-ê khòa sin-si ê kè, kng ê lâng thêng-kha; I chiū kóng, Siàu-liân lâng ah, góa kā lí kóng, Khí-lâi.

15死ê人就起來坐，續講話。Sí ê lâng chiū khí-lâi chē, sòa kóng ōe.

16耶穌就將伊hō͘伊ê老母。眾人lóng驚惶，歸榮光上帝講，大先知有興起tī咱中間；koh講，上帝有看顧伊ê百姓。Iâ-so͘ chiū chiong i hō͘ i ê lāu-bú. Chèng lâng lóng kiaⁿ-hiâⁿ, kui êng-kng Siōng-tè kóng, Tōa sian-ti ū heng-khí tī lán tiong-kan; koh kóng, Siōng-tè ū khòaⁿ-kò͘ I ê peh-sìⁿ.

17Tùi án-ni耶穌chit-ê名聲遍傳tī猶太kap周圍ê地方。Tùi án-ni Iâ-so͘ chit ê miâ-siaⁿ piàn thoân tī Iû-thài kap chiu-ûi ê tōe-hng.

18約翰ê學生將chiah-ê事lóng總報in ê先生知。Iok-hān ê ha̍k-seng chiong chiah ê sū lóng-chóng pò in ê sian-siⁿ chai.

19伊就叫伊ê學生兩人來，差in就近主講，所beh來ê是你mah？á是阮tio̍h ǹg望別人ah？I chiū kiò i ê ha̍k-seng nn̄g lâng lâi, chhe in chiū-kūn Chú kóng, Só͘ beh lâi ê sī lí mah? Á-sī goán tio̍h ǹg-bāng pa̍t lâng ah?

20Hit兩人已經到，就講，行洗禮約翰差阮就近你，講，Beh來ê是你mah？á是阮tio̍h ǹg望別人ah？Hit nn̄g lâng í-keng kàu, chiū kóng, Kiâⁿ sóe-lé Iok-hān chhe goán chiū-kūn lí, kóng, Beh lâi ê sī lí mah? Á-sī goán tio̍h ǹg-bāng pa̍t lâng ah?

21Hit時耶穌醫好chōe-chōe破病ê，痛疼ê，患tio̍h鬼ê，koh hō͘ chōe-chōe chhiⁿ-mî ê得tio̍h看見。Hit sî Iâ-so͘ i-hó chōe-chōe phòa-pīⁿ ê, thàng-thiàⁿ ê, hoān-tio̍h kúi ê, koh hō͘ chōe-chōe chhiⁿ-mî ê tit-tio̍h khòaⁿ-kìⁿ.

22就應講，Lín tio̍h去，將lín所看見所聽見ê報約翰知；就是chhiⁿ-mî ê看見，跛腳ê行，thái-ko ê清氣，臭耳人ê聽見，死ê人koh活，sòng-hiong人得tio̍h聽福音；Chiū ìn kóng, Lín tio̍h khì, chiong lín só͘ khòaⁿ-kìⁿ só͘ thiaⁿ-kìⁿ ê pò Iok-hān chai; chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im;

23見若無tī我來tio̍h-tak ê，有福氣。kìⁿ-nā bô tī góa lâi tio̍h-tak ê, ū hok-khì.

24約翰所差ê人去了，耶穌chiah提起約翰，tùi眾人講，Lín前出去曠野，beh看甚麼？是蘆竹hō͘風吹振動mah？Iok-hān só͘ chhe ê lâng khì-liáu, Iâ-so͘ chiah thê-khí Iok-hān, tùi chèng lâng kóng, Lín chêng chhut-khì khòng-iá, beh khòaⁿ sím-mi̍h? sī lô͘-tek hō͘ hong chhe tín-tāng mah?

25Lín出去beh看甚麼？是人穿幼軟ê衣裳mah？你看，穿衫hâng-ngó͘享受宴樂ê是tī王宮。Lín chhut-khì beh khòaⁿ sím-mi̍h? sī lâng chhēng iù-nńg ê i-chiûⁿ mah? Lí khòaⁿ, chhēng saⁿ hâng-ngó͘ hióng-siū iàn-lo̍k ê sī tī ông-kiong.

26Án-ni，lín出去beh看甚麼？先知人mah？是lah，我kā lín講，也是khah贏過先知ê。Án-ni, lín chhut-khì beh khòaⁿ sím-mi̍h? sian-ti lâng mah? Sī lah, góa kā lín kóng, iā sī khah iâⁿ-kè sian-ti ê.

27Chit人就是經裡所指ê，講， 你看，我差我ê使者tī你ê面前， Ibeh tī你ê頭前備辦你ê路。Chit lâng chiū-sī keng-ni̍h só͘ chí ê, kóng, Lí khòaⁿ, góa chhe góa ê sù-chiá tī lí ê bīn-chêng, I beh tī lí ê thâu-chêng pī-pān lí ê lō͘.

28我kā lín講，婦人人所生bē有khah大約翰ê；總是tī上帝國ê微細ê iáu khah大伊Góa kā lín kóng, Hū-jîn-lâng só͘ siⁿ bē ū khah tōa Iok-hān ê; chóng-sī tī Siōng-tè kok ê bî-sòe ê iáu khah tōa i.

29眾百姓kap抽餉ê人，已經受約翰ê洗禮，一下聽見這，就稱呼上帝做義。Chèng peh-sìⁿ kap thiu-hiòng ê lâng, í-keng siū Iok-hān ê sóe-lé, chi̍t-ē thiaⁿ-kìⁿ che, chiū chheng-ho͘ Siōng-tè chòe gī.

30若是法利賽人kap教律法ê先生無受伊ê洗禮，家己phah無上帝ê旨意。Nā-sī Hoat-lī-sài lâng kap kà lu̍t-hoat ê sian-siⁿ bô siū i ê sóe-lé, ka-kī phah-bô Siōng-tè ê chí-ì.

31主講，Chit世代ê人，我beh用甚麼來比並in？in是親像甚麼ah？Chú kóng, Chit sè-tāi ê lâng, góa beh ēng sím-mi̍h lâi pí-phēng in? In sī chhin-chhiūⁿ sím-mi̍h ah?

32是親像gín-ná坐tī街市裡，saⁿ叫講，阮對lín pûn笛á，lín無跳舞；阮bat悲哀，lín無啼哭。Sī chhin-chhiūⁿ gín-ná chē tī koe-chhī-ni̍h, saⁿ kiò kóng, Goán tùi lín pûn ta̍t-á, lín bô thiàu-bú; goán bat pi-ai, lín bô thî-khàu.

33因為行洗禮ê約翰來，無食餅無lim酒，lín就講，伊患tio̍h鬼。In-ūi kiâⁿ sóe-lé ê Iok-hān lâi, bô chia̍h piáⁿ bô lim chiú, lín chiū kóng, I hoān-tio̍h kúi.

34人子來也食也lim，lín就講，伊是貪食好酒ê人，抽餉ê Kap pháiⁿ人ê朋友。Jîn-chú lâi iā chia̍h iā lim, lín chiū kóng, I sī tham-chia̍h hò͘ⁿ-chiú ê lâng, thiu-hiòng ê kap pháiⁿ lâng ê pêng-iú.

35若是智慧對伊ê眾kiáⁿ顯明伊是tio̍h。Nā-sī Tì-hūi tùi i ê chèng kiáⁿ hián-bêng i sī tio̍h.

36有一個法利賽人請耶穌saⁿ-kap食，伊就入法利賽人ê厝坐桌。Ū chi̍t ê Hoat-lī-sài lâng chhiáⁿ Iâ-so͘ saⁿ-kap chia̍h. I chiū ji̍p Hoat-lī-sài lâng ê chhù chē toh.

37Tú-tn̄g城內有一個pháiⁿ婦人人，知伊坐桌tī法利賽人ê厝，就tòa tóe香油ê玉罐來；Tú-tn̄g siâⁿ-lāi ū chi̍t ê pháiⁿ hū-jîn-lâng, chai I chē toh tī Hoat-lī-sài lâng ê chhù, chiū tòa tóe hiuⁿ-iû ê ge̍k-koàn lâi;

38khiā tī耶穌ê後面，óa伊ê腳teh啼哭；有目屎滴tâm伊ê腳，就用伊ê頭毛拭伊；koh chia̍p-chia̍p chim伊ê腳，用香油抹伊khiā tī Iâ-so͘ ê āu-bīn, óa I ê kha teh thî-khàu; ū ba̍k-sái tih-tâm I ê kha, chiū ēng i ê thâu-mn̂g chhit i; koh chia̍p-chia̍p chim I ê kha, ēng hiuⁿ-iû boah i.

39請耶穌ê法利賽人看見án-ni，心內想講，Chit人若是先知，的確會知摸伊ê人是是誰，koh是甚麼號ê婦人人，就是pháiⁿ人。Chhiáⁿ Iâ-so͘ ê Hoat-lī-sài lâng khòaⁿ-kìⁿ án-ni, sim-lāi siūⁿ kóng, Chit lâng nā sī sian-ti, tek-khak ōe chai bong I ê lâng sī chī-chūi, koh sī sím-mi̍h hō ê hū-jîn-lâng, chiū-sī pháiⁿ lâng.

40耶穌應伊講，西門，我有話beh kā你講。西門講，先生，請你講。Iâ-so͘ ìn i kóng, Se-bûn, góa ū ōe beh kā lí kóng. Se-bûn kóng, Sian-siⁿ, chhiáⁿ lí kóng.

41伊就講，某個債主有兩人欠伊ê債，一個欠伊五百ê銀á，一個欠伊五十。I chiū kóng, Bó͘ ê chè-chú ū nn̄g lâng khiàm i ê chè, chi̍t-ê khiàm i gō͘-pah ê gûn-á, chi̍t-ê khiàm i gō͘-cha̍p.

42In既然無thang還，債主就赦免in兩人。Án-ni，就tá-lo̍h一個khah疼債主ah？In kì-jiân bô thang hêng, chè-chú chiū sià-bián in nn̄g lâng. Án-ni, chiū tá-lo̍h chi̍t-ê khah thiàⁿ chè-chú ah?

43西門應講，我phah算是hit-ê hō͘伊赦免khah chōe ê。耶穌kā伊講，你所斷ê是tio̍h。Se-bûn ìn kóng, Góa phah-sǹg sī hit-ê hō͘ i sià-bián khah chōe ê. Iâ-so͘ kā i kóng, Lí só͘ toàn ê sī tio̍h.

44就oa̍t頭ǹg婦人人，kā西門講，你看見chit-ê婦人人無？我入你ê厝，你無用水hō͘我洗腳；但是伊用目屎滴tâm我ê腳，用頭毛拭伊Chiū oa̍t thâu ǹg hū-jîn-lâng, kā Se-bûn kóng, Lí khòaⁿ-kìⁿ chit ê hū-jîn-lâng bô? Góa ji̍p lí ê chhù, lí bô ēng chúi hō͘ góa sóe kha; nā-sī i ēng ba̍k-sái tih-tâm góa ê kha, ēng thâu-mn̂g chhit i.

45你無kā我chim；獨獨伊tùi我入來ê時chim我ê腳無soah。Lí bô kā góa chim; to̍k-to̍k i tùi góa ji̍p-lâi ê sî chim góa ê kha bô soah.

46你無用油抹我ê頭殼；但是伊用香油抹我ê腳。Lí bô ēng iû boah góa ê thâu-khak; nā-sī i ēng hiuⁿ-iû boah góa ê kha.

47所以我kā你講，伊chōe-chōe ê罪kòa已經赦免，因為伊ê疼是chōe；但是得tio̍h赦免少ê，伊ê疼伊ā是少。Só͘-í góa kā lí kóng, I chōe-chōe ê chōe-kòa í-keng sià-bián, in-ūi i ê thiàⁿ sī chōe; nā-sī tit-tio̍h sià-bián chió ê, i ê thiàⁿ iā sī chió.

48就kā婦人人講，你ê罪赦lah。Chiū kā hū-jîn-lâng kóng, Lí ê chōe sià lah.

49同桌ê人心內講，Chit-ê teh赦罪ê是甚麼人？Tâng toh ê lâng sim-lāi kóng, Chit-ê teh sià chōe ê sī sím-mi̍h lâng?

50耶穌tùi婦人人講，你ê信有救你；做你安心tò去。Iâ-so͘ tùi hū-jîn-lâng kóng, Lí ê sìn ū kiù lí; chòe lí an-sim tò-khì.

1過無幾日，耶穌四界行ta̍k ê城ta̍k ê鄉社，宣傳來報揚上帝國ê福音；十二個學生也kap伊去；Kè bô kúi ji̍t, Iâ-so͘ sì-kè kiâⁿ ta̍k ê siâⁿ ta̍k ê hiuⁿ-siā, soan-thoân lâi pò-iông Siōng-tè kok ê hok-im; cha̍p-jī ê ha̍k-seng iā kap I khì;

2也有幾nā ê婦人人，有ê bat患tio̍h鬼，有ê有破病，taⁿ已經得tio̍h醫好；其中有Boa̍t-tāi-lia̍p ê馬利亞，bat有七個鬼對伊出去；iā ū kúi-nā ê hū-jîn-lâng, ū-ê bat hoān-tio̍h kúi, ū-ê ū phòa-pīⁿ, taⁿ í-keng tit-tio̍h i-hó; kî-tiong ū Boa̍t-tāi-lia̍p ê Má-lī-a, bat ū chhit ê kúi tùi i chhut-khì;

3koh有希律ê管家Khó͘-sat ê bó͘ Iok-a-ná；koh有So͘-sat-ná；以外iáu有chōe-chōe婦人人，lóng用in所有ê來服事in。koh ū Hi-lu̍t ê koán-ke Khó͘-sat ê bó͘ Iok-a-ná; koh ū So͘-sat-ná; í-gōa iáu ū chōe-chōe hū-jîn-lâng, lóng ēng in só͘ ū ê lâi ho̍k-sāi in.

4有chōe-chōe人聚集，koh有人tùi ta̍k ê城來就近伊；Ū chōe-chōe lâng chū-chi̍p, koh ū lâng tùi ta̍k ê siâⁿ lâi chiū-kūn I;

5hit時耶穌設譬喻kā in講，有掖種ê出去掖種。Teh也ê時，有ê Ka-la̍uh tī路邊，hō͘人所踏，天中ê飛鳥一盡食伊hit sî Iâ-so͘ siat phì-jū kā in kóng, Ū iā chéng ê chhut-khì iā chéng. Teh iā ê sî, ū-ê ka-la̍uh tī lō͘-piⁿ, hō͘ lâng só͘ ta̍h, thiⁿ-tiong ê pe-chiáu it-chīn chia̍h i.

6有ê ka-la̍uh tī石磐頂，發起來就乾去，因為無潤澤。Ū-ê ka-la̍uh tī chio̍h-pôaⁿ téng, hoat-khí-lâi chiū ta-khì, in-ūi bô lūn-te̍k.

7有ê ka-la̍uh tī刺á中，刺á平平發起來，遮蔽伊Ū-ê ka-la̍uh tī chhì-á tiong, chhì-á pîⁿ-pîⁿ hoat-khí-lâi, jia-pè i.

8有ê ka-la̍uh tī好ê土地，發起來結實到一百倍。Chiah-ê話講了，就叫講，有耳孔thang聽ê，tio̍h聽。Ū-ê ka-la̍uh tī hó ê thó͘-tōe, hoat-khí-lâi kiat-si̍t kàu chi̍t-pah pē. Chiah ê ōe kóng-liáu, chiū kiò kóng, Ū hī-khang thang thiaⁿ ê, tio̍h thiaⁿ.

9伊ê學生問伊chit-ê譬喻怎樣。I ê ha̍k-seng mn̄g I chit ê phì-jū cháiⁿ-iūⁿ.

10耶穌講，上帝國ê奧妙hō͘ lín知；但是tùi別人就用譬喻，beh hō͘ in看，看bōe見，聽也bōe曉悟。Iâ-so͘ kóng, Siōng-tè kok ê ò-biāu hō͘ lín chai; nā-sī tùi pa̍t lâng chiū ēng phì-jū, beh hō͘ in khòaⁿ, khòaⁿ bōe kìⁿ, thiaⁿ iā bōe hiáu-ngō͘.

11Chit-ê譬喻就是án-ni:種子就是上帝ê道理。Chit ê phì-jū chiū-sī án-ni: Chéng-chí chiū-sī Siōng-tè ê tō-lí.

12Tī路邊ê，就是人聽見道理；魔鬼就來，對in ê心內將道理搶去，免得in信來得tio̍h救。Tī lō͘-piⁿ ê, chiū-sī lâng thiaⁿ-kìⁿ tō-lí; Mô͘-kúi chiū lâi, tùi in ê sim-lāi chiong tō-lí chhiúⁿ-khì, bián-tit in sìn lâi tit-tio̍h kiù.

13Tī石磐頂ê，就是人聽了歡喜承受道理；但是in無根，是暫時信nā-tiāⁿ，tú-tio̍h試煉ê時就pōe-biū。Tī chio̍h-pôaⁿ téng ê, chiū-sī lâng thiaⁿ-liáu hoaⁿ-hí sêng-siū tō-lí; nā-sī in bô kun, sī chiām-sî sìn nā-tiāⁿ, tú-tio̍h chhì-liān ê sî chiū pōe-biū.

14落tī刺á內ê，chiah-ê就是人聽了就去，hō͘在生ê掛慮、貨財、宴樂所遮蔽，就結m̄成粒。Lo̍h tī chhì-á lāi ê, chiah-ê chiū-sī lâng thiaⁿ-liáu chiū khì, hō͘ chāi-siⁿ ê khòa-lū, hè-châi, iàn-lo̍k só͘ jia-pè, chiū kiat m̄ chiâⁿ lia̍p.

15Tī好土地ê，chiah-ê就是人用好koh善良ê心聽道理來執守伊，koh吞忍來結實。Tī hó thó͘-tōe ê, chiah-ê chiū-sī lâng ēng hó koh siān-liông ê sim thiaⁿ tō-lí lâi chip-siú i, koh thun-lún lâi kiat-si̍t.

16無人點燈用器具來蓋伊，á是hē tī眠床下，就是hē tī燈台頂，hō͘入來ê人看見hit-ê光。Bô lâng tiám teng ēng khì-kū lâi khàm i, á-sī hē tī bîn-chhn̂g ē, chiū-sī hē tī teng-tâi téng, hō͘ ji̍p-lâi ê lâng khòaⁿ-kìⁿ hit ê kng.

17因為無有隱密，也將來無露現ê；無有祕密，將來無hō͘人知koh露現ê。In-ūi bô ū ún-ba̍t, iā chiong-lâi bô lō͘-hiān ê; bô ū pì-ba̍t, chiong-lâi bô hō͘ lâng chai koh lō͘-hiān ê.

18所以lín tio̍h謹慎怎樣來聽；因為見若有ê，beh hō͘伊；無ê，連伊家己掠做有ê，也beh kā伊搶去。Só͘-í lín tio̍h kín-sīn cháiⁿ-iūⁿ lâi thiaⁿ; in-ūi kìⁿ-nā ū ê, beh hō͘ i; bô ê, liân i ka-kī lia̍h-chòe ū ê, iā beh kā i chhiúⁿ-khì.

19耶穌ê老母kap兄弟來就近伊；因為人chōe，bōe得近óa。Iâ-so͘ ê lāu-bú kap hiaⁿ-tī lâi chiū-kūn I; in-ūi lâng chōe, bōe-tit kūn-óa.

20有人kā伊講，你ê老母kap你ê兄弟khiā tī外面，ài beh看你。Ū lâng kā I kóng, Lí ê lāu-bú kap lí ê hiaⁿ-tī khiā tī gōa-bīn, ài beh khòaⁿ lí.

21伊應講，我ê老母kap我ê兄弟就是chiah-ê聽上帝ê道理來行ê人。I ìn kóng, Góa ê lāu-bú kap góa ê hiaⁿ-tī chiū-sī chiah ê thiaⁿ Siōng-tè ê tō-lí lâi kiâⁿ ê lâng.

22有一日耶穌kap伊ê學生上船，kā in講，咱來去湖ê hit-pêng岸。就開船。Ū chi̍t ji̍t Iâ-so͘ kap I ê ha̍k-seng chiūⁿ chûn, kā in kóng, Lán lâi khì ô͘ ê hit pêng hōaⁿ. Chiū khui chûn.

23行ê時耶穌睏去。有報頭風phah落來湖裡，船內ê水差不多滿，盡在危險。Kiâⁿ ê sî Iâ-so͘ khùn-khì. Ū pò-thâu-hong phah-lo̍h-lâi ô͘-ni̍h, chûn-lāi ê chúi chha-put-to móa, chīn-chāi gûi-hiám.

24學生近óa，叫伊醒，講，先生ah，先生ah，beh無命lah。伊就醒，責備風kap海湧，風湧就soah，也平定。Ha̍k-seng kūn-óa, kiò I chhíⁿ, kóng, Sian-siⁿ ah, sian-siⁿ ah, beh bô miā lah. I chiū chhíⁿ, chek-pī hong kap hái-éng, hong éng chiū soah, iā pîⁿ-tiāⁿ.

25伊就kā學生講，Lín ê信tī tá-lo̍h？In就驚惶奇怪，saⁿ-kap講，這是甚麼人，命令風kap水，in也順伊？I chiū kā ha̍k-seng kóng, Lín ê sìn tī tá-lo̍h? In chiū kiaⁿ-hiâⁿ kî-koài, saⁿ-kap kóng, Che sī sím-mi̍h lâng, bēng-lēng hong kap chúi, in iā sūn I?

26船到Keh-lah-sim人ê地方，就是加利利ê對面。Chûn kàu Keh-lah-sim lâng ê tōe-hng, chiū-sī Ka-lī-lī ê tùi-bīn.

27耶穌離開船，上岸；有一人tùi城裡出來tú-tio̍h伊，是患tio̍h鬼ê，久久無穿衫無tiàm厝內，獨獨tiàm tī墳墓中。Iâ-so͘ lī-khui chûn, chiūⁿ hōaⁿ; ū chi̍t lâng tùi siâⁿ-ni̍h chhut-lâi tú-tio̍h I, sī hoān-tio̍h kúi ê, kú-kú bô chhēng saⁿ bô tiàm chhù-lāi, to̍k-to̍k tiàm tī hûn-bōng tiong.

28看見耶穌就喉叫，仆tī伊ê面前，大聲講，至koân上帝ê Kiáⁿ耶穌，我kap你有甚麼干涉？求你莫得苦楚我。Khòaⁿ-kìⁿ Iâ-so͘ chiū âu-kiò, phak tī I ê bīn-chêng, tōa siaⁿ kóng, Chì-koâiⁿ Siōng-tè ê Kiáⁿ Iâ-so͘, góa kap lí ū sím-mi̍h kan-sia̍p? kiû lí bo̍h-tit khó͘-chhó͘ góa.

29因為耶穌有命令邪神tùi hit-ê人出來。因為邪神常常掠伊；人用鐵鏈鏈伊，用腳銬銬伊，來顧守伊；伊就chhoah斷所縛伊ê器具，伊hō͘鬼趕到曠野。In-ūi Iâ-so͘ ū bēng-lēng siâ-sîn tùi hit ê lâng chhut-lâi. In-ūi siâ-sîn siông-siông lia̍h i; lâng ēng thih-liān liān i, ēng kha-khàu khàu i, lâi kò͘-siú i; i chiū chhoah-tn̄g só͘ pa̍k i ê khì-kū, i hō͘ kúi kóaⁿ kàu khòng-iá.

30耶穌問伊講，你叫甚麼名？伊講，營；因為有chōe-chōe鬼入伊Iâ-so͘ mn̄g i kóng, Lí kiò sím-mi̍h miâ? I kóng, Iâⁿ; in-ūi ū chōe-chōe kúi ji̍p i.

31鬼求耶穌莫得吩咐in入深淵。Kúi kiû Iâ-so͘ bo̍h-tit hoan-hù in ji̍p chhim-ian.

32Tī hia有kui陣豬，tī山裡teh討食。鬼求伊准in入hiah-ê豬。就准in。Tī hia ū kui tīn ti, tī soaⁿ-ni̍h teh thó-chia̍h. Kúi kiû I chún in ji̍p hiah ê ti. Chiū chún in.

33鬼就tùi hit人出去，入hiah-ê豬；kui陣豬就走落山坪，chông落湖，格死。Kúi chiū tùi hit lâng chhut-khì, ji̍p hiah ê ti; kui tīn ti chiū cháu-lo̍h soaⁿ-phiâⁿ, chông-lo̍h ô͘, kek-sí.

34顧豬ê看見chit-ê tāi-chì就走去，報城內kap鄉社ê人知。Kò͘-ti ê khòaⁿ-kìⁿ chit ê tāi-chì chiū cháu-khì, pò siâⁿ-lāi kap hiuⁿ-siā ê lâng chai.

35In就出來，ài看chit-ê tāi-chì；就近耶穌，tú-tio̍h鬼所對伊出來hit人，穿衫，hāi-chāi，坐tī耶穌腳下；in就驚。In chiū chhut-lâi, ài khòaⁿ chit ê tāi-chì; chiū-kūn Iâ-so͘, tú-tio̍h kúi só͘ tùi i chhut-lâi hit lâng, chhēng saⁿ, hāi-chāi, chē tī Iâ-so͘ kha-ē; in chiū kiaⁿ.

36看見ê人將患tio̍h鬼ê人怎樣得tio̍h救報in知。Khòaⁿ-kìⁿ ê lâng chiong hoān-tio̍h kúi ê lâng cháiⁿ-iūⁿ tit-tio̍h kiù pò in chai.

37Keh-lah-sim四方ê人lóng求耶穌離開in；因為in大驚ê緣故；伊就上船倒tńg去。Keh-lah-sim sì-hng ê lâng lóng kiû Iâ-so͘ lī-khui in; in-ūi in tōa kiaⁿ ê iân-kò͘; I chiū chiūⁿ chûn tò-tńg-khì.

38鬼所對伊出去ê人求beh kap伊去。但是耶穌差伊去講，Kúi só͘ tùi i chhut-khì ê lâng kiû beh kap I khì. Nā-sī Iâ-so͘ chhe i khì kóng,

39tò去lín tau，將上帝為tio̍h你行hiah大ê事排列hō͘人知。伊就去，遍城宣傳耶穌為tio̍h伊所行hiah大ê事。Tò-khì lín tau, chiong Siōng-tè ūi-tio̍h lí kiâⁿ hiah tōa ê sū pâi-lia̍t hō͘ lâng chai. I chiū khì, piàn siâⁿ soan-thoân Iâ-so͘ ūi-tio̍h i só͘ kiâⁿ hiah tōa ê sū.

40耶穌倒tńg來ê時眾人接納伊；因為in lóng teh thèng候伊Iâ-so͘ tò-tńg-lâi ê sî chèng lâng chiap-la̍p I; in-ūi in lóng teh thèng-hāu I.

41有一人，名Gâi-ló͘，就是趕會堂ê，來仆tī耶穌ê腳下，求伊到伊ê家；Ū chi̍t lâng, miâ Gâi-ló͘, chiū-sī koán hōe-tn̂g ê, lâi phak tī Iâ-so͘ ê kha-ē, kiû I kàu i ê ke;

42因為伊有孤生ê cha-bó͘-kiáⁿ約略十二歲，teh-beh死。耶穌去ê時，眾人oe-khoeh伊in-ūi i ū ko͘-siⁿ ê cha-bó͘-kiáⁿ iok-lio̍k cha̍p-jī hè, teh-beh sí. Iâ-so͘ khì ê sî, chèng lâng oe-khoeh I.

43有一個婦人人，血漏十二年，因為請醫生家伙破到了，無一人能醫好伊，Ū chi̍t ê hū-jîn-lâng, hiat-lāu cha̍p-jī nî, in-ūi chhiáⁿ i-seng ke-hé phòa kàu liáu, bô chi̍t lâng ōe i-hó i,

44來到耶穌ê ka-chiah後，摸伊衫á裾ê鬚；血漏即時止。lâi kàu Iâ-so͘ ê ka-chiah-āu, bong I saⁿ-á-ku ê chhiu; hiat-lāu chek-sî chí.

45耶穌講，摸我ê是是誰？大家講無；彼得kap同行ê人講，先生，眾人逼óa，khoeh-tio̍h你。Iâ-so͘ kóng, Bong góa ê sī chī-chūi? Tāi-ke kóng bô; Pí-tek kap tâng kiâⁿ ê lâng kóng, Sian-siⁿ, chèng lâng pek-óa, khoeh-tio̍h lí.

46耶穌講，有人摸我，因為我知有權能tùi我出。Iâ-so͘ kóng, Ū lâng bong góa, in-ūi góa chai ū koân-lêng tùi góa chhut.

47婦人人看伊khng3boe7密，ngia̍uh-ngia̍uh-chhoah來仆tī伊腳下；當眾人ê面前講明摸伊ê緣故，kap伊怎樣liâm-piⁿ好。Hū-jîn-lâng khòaⁿ i khǹg bōe ba̍t, ngia̍uh-ngia̍uh-chhoah lâi phak tī I kha-ē; tng chèng lâng ê bīn-chêng kóng-bêng bong I ê iân-kò͘, kap i cháiⁿ-iūⁿ liâm-piⁿ hó.

48耶穌kā伊講，婦人人ah，你ê信有救你，做你安心tò去。Iâ-so͘ kā i kóng, Hū-jîn-lâng ah, lí ê sìn ū kiù lí, chòe lí an-sim tò-khì.

49伊iáu teh講ê時，有人tùi趕會堂ê ê家來講，你ê cha-bó͘-kiáⁿ已經死，免勞動先生。I iáu teh kóng ê sî, ū lâng tùi koán hōe-tn̂g ê ê ke lâi kóng, Lí ê cha-bó͘-kiáⁿ í-keng sí, bián lô-tōng sian-siⁿ.

50耶穌聽見就應伊講，M̄免驚，只有tio̍h信，伊就得tio̍h救。Iâ-so͘ thiaⁿ-kìⁿ chiū ìn i kóng, M̄ bián kiaⁿ, chí-ū tio̍h sìn, i chiū tit-tio̍h kiù.

51已經到伊ê家，tī彼得，約翰，雅各，kap cha-bó͘ gín-ná ê父母以外，m̄准別人kap伊入去。Í-keng kàu i ê ke, tī Pí-tek, Iok-hān, Ngá-kok, kap cha-bó͘ gín-ná ê pē-bú í-gōa, m̄ chún pa̍t lâng kap I ji̍p-khì.

52眾人teh啼哭，為tio̍h伊來搥胸；耶穌講，莫得啼哭，因為伊m̄是死，是teh睏nā-tiāⁿ。Chèng lâng teh thî-khàu, ūi-tio̍h i lâi tûi heng; Iâ-so͘ kóng, Bo̍h-tit thî-khàu, in-ūi i m̄ sī sí, sī teh khùn nā-tiāⁿ.

53In就恥笑伊，因為知伊已經死lah。In chiū thí-chhiò I, in-ūi chai i í-keng sí lah.

54耶穌牽cha-bó͘ gín-ná ê手叫講，Cha-bó͘ gín-ná，起來。Iâ-so͘ khan cha-bó͘ gín-ná ê chhiú kiò kóng, Cha-bó͘ gín-ná, khí-lâi.

55伊ê神復到，即時起來；耶穌吩咐hō͘伊食。I ê sîn ho̍k-tò, chek-sî khí-lâi; Iâ-so͘ hoan-hù hō͘ i chia̍h.

56伊ê父母gông-ngia̍h；耶穌命令in莫得將所行ê kā人講。I ê pē-bú gông-ngia̍h; Iâ-so͘ bēng-lēng in bo̍h-tit chiong só͘ kiâⁿ ê kā lâng kóng.

1耶穌叫十二個學生lóng來，hō͘ in有能力權柄，能制壓lóng總ê鬼，醫好病症。Iâ-so͘ kiò cha̍p-jī ê ha̍k-seng lóng lâi, hō͘ in ū lêng-le̍k koân-pèng, ōe chè-ap lóng-chóng ê kúi, i-hó pīⁿ-chèng.

2就差in去傳上帝ê國，醫好破病人。Chiū chhe in khì thoân Siōng-tè ê kok, i-hó phòa-pīⁿ lâng.

3Koh對in講，莫得帶路費，莫得柺á，莫得tah-liân，莫得乾糧，莫得銀，也莫得兩領衫。Koh tùi in kóng, Bo̍h-tit tòa lō͘-hùi, bo̍h-tit koáiⁿ-á, bo̍h-tit tah-liân, bo̍h-tit kan-niû, bo̍h-tit gûn, iā bo̍h-tit nn̄g niá saⁿ.

4見所入ê厝，tio̍h tòa tī hia，也tio̍h tùi hia起身。Kìⁿ só͘ ji̍p ê chhù, tio̍h tòa tī hia, iā tio̍h tùi hia khí-sin.

5凡若m̄接納lín ê，出in ê城ê時，tio̍h拌去lín腳裡ê土粉，來干證in。Hoān-nā m̄ chiap-la̍p lín ê, chhut in ê siâⁿ ê sî, tio̍h pōaⁿ-khì lín kha-ni̍h ê thô͘-hún, lâi kan-chèng in.

6學生就出去，遍行hiah-ê鄉社傳福音，ta̍k所在醫病。Ha̍k-seng chiū chhut-khì, piàn-kiâⁿ hiah ê hiuⁿ-siā thoân hok-im, ta̍k só͘-chāi i-pīⁿ.

7分封ê人君希律聽見一切ê事，就不止躊躇，因為有人講，約翰tùi死人中koh活；Hun-hong ê jîn-kun Hi-lu̍t thiaⁿ-kìⁿ it-chhè ê sū, chiū put-chí tiû-tû, in-ūi ū lâng kóng, Iok-hān tùi sí-lâng tiong koh-oa̍h;

8有ê講，以利亞出現；也有ê講，古早ê先知一人koh活。ū-ê kóng, Í-lī-a chhut-hiān; iā ū-ê kóng, kó͘-chá ê sian-ti chi̍t lâng koh-oa̍h.

9但是希律講，約翰我已經kā伊thâi頭；taⁿ我聽見伊chit號事，這是甚麼人？就chhē機會ài看見伊Nā-sī Hi-lu̍t kóng, Iok-hān góa í-keng kā i thâi-thâu; taⁿ góa thiaⁿ-kìⁿ I chit hō sū, che sī sím-mi̍h lâng? Chiū chhē ki-hōe ài khòaⁿ-kìⁿ I.

10使徒tò來，將in所行ê排列hō͘耶穌聽。耶穌就chhōa in退開到一個城，名Pek-sài-tāi。Sù-tô͘ tò-lâi, chiong in só͘ kiâⁿ ê pâi-lia̍t hō͘ Iâ-so͘ thiaⁿ. Iâ-so͘ chiū chhōa in thè-khui kàu chi̍t ê siâⁿ, miâ Pek-sài-tāi.

11但是眾人知就tè伊；伊接納in，對in講論上帝ê國；凡若欠用醫病，就kā伊醫。Nā-sī chèng lâng chai chiū tè I; I chiap-la̍p in, tùi in káng-lūn Siōng-tè ê kok; hoān-nā khiàm-ēng i-pīⁿ, chiū kā i i.

12日beh落，十二個學生來kā伊講，請四散眾人，hō͘ in去四圍ê鄉社kap山場投歇，設法食；因為咱chia是曠野ê所在。Ji̍t beh lo̍h, cha̍p-jī ê ha̍k-seng lâi kā I kóng, Chhiáⁿ sì-sòaⁿ chèng lâng, hō͘ in khì sì-ûi ê hiuⁿ-siā kap soaⁿ-tiûⁿ tâu-hioh siat-hoat chia̍h; in-ūi lán chia sī khòng-iá ê só͘-chāi.

13耶穌對in講，Lín Hō͘ in食。In講，阮若無去替chiah-ê眾人買食，就不過有五個餅，兩尾魚nā-tiāⁿ。Iâ-so͘ tùi in kóng, Lín hō͘ in chia̍h. In kóng, Goán nā bô khì thòe chiah ê chèng lâng bóe chia̍h, chiū put-kò ū gō͘ ê piáⁿ, nn̄g bé hî nā-tiāⁿ.

14因為hiah-ê人約略有五千。耶穌tùi學生講，Hō͘眾人坐kui列，每列五十人。In-ūi hiah ê lâng iok-lio̍k ū gō͘-chheng. Iâ-so͘ tùi ha̍k-seng kóng, Hō͘ chèng lâng chē kui lia̍t, múi lia̍t gō͘-cha̍p lâng.

15學生照án-ni行，hō͘眾人lóng坐。Ha̍k-seng chiàu án-ni kiâⁿ, hō͘ chèng lâng lóng chē.

16耶穌the̍h五個餅兩尾魚，ǹg天祝謝來peh伊，hō͘學生排tī眾人ê面前。Iâ-so͘ the̍h gō͘ ê piáⁿ nn̄g bé hî, ǹg thiⁿ chiok-siā lâi peh i, hō͘ ha̍k-seng pâi tī chèng lâng ê bīn-chêng.

17Lóng食到飽；拾所chhun ê屑á十二筐。Lóng chia̍h kàu pá; khioh só͘ chhun ê sut-á cha̍p-jī kheng.

18耶穌家己teh祈禱，學生kap伊tī hia；伊就問in講，眾人講我是是誰？Iâ-so͘ ka-kī teh kî-tó, ha̍k-seng kap I tī hia; I chiū mn̄g in kóng, Chèng lâng kóng góa sī chī-chūi?

19應講，是行洗禮ê約翰；也有人講，是以利亞；koh有人講，是古早ê先知一人koh活。Ìn kóng, sī kiâⁿ sóe-lé ê Iok-hān; iā ū lâng kóng, sī Í-lī-a; koh ū lâng kóng, sī kó͘-chá ê sian-ti chi̍t lâng koh-oa̍h.

20伊kā in講，若是lín講我是是誰？彼得應講，是上帝ê基督。I kā in kóng, Nā-sī lín kóng góa sī chī-chūi? Pí-tek ìn kóng, Sī Siōng-tè ê Ki-tok.

21伊就禁戒in莫得將這kā人講；I chiū kìm-kài in bo̍h-tit chiong che kā lâng kóng;

22續講，人子的確tio̍h受有chōe-chōe艱苦，hō͘ chiah-ê長老、祭司頭、經學士所棄sak，koh受害死，第三日koh活。sòa kóng, Jîn-chú tek-khak tio̍h siū chōe-chōe kan-khó͘, hō͘ chiah ê tiúⁿ-ló, chè-si-thâu, keng-ha̍k-sū só͘ khì-sak, koh siū hāi-sí, tē saⁿ ji̍t koh-oa̍h.

23Koh對眾人講，若有人ài tè我，就tio̍h看無家己，日日giâ伊ê十字架來tè我。Koh tùi chèng lâng kóng, Nā ū lâng ài tè góa, chiū tio̍h khòaⁿ-bô ka-kī, ji̍t-ji̍t giâ i ê si̍p-jī-kè lâi tè góa.

24因為見若ài救伊ê性命ê beh失落伊；總是見若為tio̍h我來失落伊ê性命ê teh-beh救伊。In-ūi kìⁿ-nā ài kiù i ê sìⁿ-miā ê beh sit-lo̍h i; chóng-sī kìⁿ-nā ūi-tio̍h góa lâi sit-lo̍h i ê sìⁿ-miā ê teh-beh kiù i.

25因為人若得tio̍h全世界來失落家己，損壞家己，有甚麼利益ah？In-ūi lâng nā tit-tio̍h choân sè-kài lâi sit-lo̍h ka-kī, sún-hoāi ka-kī, ū sím-mi̍h lī-ek ah?

26見若掠我kap我ê話做見笑ê，人子用家己kap父kap聖天使ê榮光來ê時，也beh掠hit人做見笑。Kìⁿ-nā lia̍h góa kap góa ê ōe chòe kiàn-siàu ê, Jîn-chú ēng ka-kī kap Pē kap sèng thiⁿ-sài ê êng-kng lâi ê sî, iā beh lia̍h hit lâng chòe kiàn-siàu.

27我真實kā lín講，Khiā tī chia ê，有人iáu-bē死，beh看見上帝ê國。Góa chin-si̍t kā lín kóng, Khiā tī chia ê, ū lâng iáu-bē sí, beh khòaⁿ-kìⁿ Siōng-tè ê kok.

28講chiah-ê話了後差不多八日，耶穌帶彼得、約翰、雅各saⁿ-kap上山祈禱。Kóng chiah ê ōe liáu-āu chha-put-to poeh ji̍t, Iâ-so͘ tòa Pí-tek, Iok-hān, Ngá-kok saⁿ-kap chiūⁿ soaⁿ kî-tó.

29祈禱ê時伊ê面貌有koh-iūⁿ，伊ê衫白，koh光nà-nà。Kî-tó ê sî I ê bīn-māu ū koh-iūⁿ, I ê saⁿ pe̍h, koh kng nà-nà.

30忽然有兩人kap伊講話，就是摩西、以利亞。Hut-jiân ū nn̄g lâng kap I kóng ōe, chiū-sī Mô͘-se, Í-lī-a.

31In tī榮光出現，談論伊ê過世，就是伊tī耶路撒冷所beh歷過ê。In tī êng-kng chhut-hiān, tâm-lūn I ê kè-sì, chiū-sī I tī Iâ-lō͘-sat-léng só͘ beh le̍k-kè ê.

32彼得kap同tī-teh ê人厭倦眠去；到in精神，就看見耶穌ê榮光，以及kap伊khiā-teh hit兩人。Pí-tek kap tâng tī-teh ê lâng ià-siān bîn-khì; kàu in cheng-sîn, chiū khòaⁿ-kìⁿ Iâ-so͘ ê êng-kng, í-ki̍p kap I khiā-teh hit nn̄g lâng.

33當hit兩人離別伊ê時，彼得tùi耶穌講，先生，咱tī chia真好；阮來搭三間寮á，一間hō͘你，一間hō͘摩西，一間hō͘以利亞；是m̄知伊所講ê。Tng hit nn̄g lâng lī-pia̍t I ê sî, Pí-tek tùi Iâ-so͘ kóng, Sian-siⁿ, lán tī chia chin hó; goán lâi tah saⁿ keng liâu-á, chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a; sī m̄ chai i só͘ kóng ê.

34講chiah-ê話ê時，有雲罩in；in入tī雲內就驚。Kóng chiah ê ōe ê sî, ū hûn tà in; in ji̍p tī hûn-lāi chiū kiaⁿ.

35有聲tùi雲裡出，講，chit-ê是我ê Kiáⁿ，我所揀ê；lín tio̍h聽伊Ū siaⁿ tùi hûn-ni̍h chhut, kóng, Chit-ê sī góa ê Kiáⁿ, góa só͘ kéng ê; lín tio̍h thiaⁿ I.

36Hit-ê聲已經出，就看見耶穌家己tī-teh。學生靜靜；hit時無將所看見ê Kā人講。Hit ê siaⁿ í-keng chhut, chiū khòaⁿ-kìⁿ Iâ-so͘ ka-kī tī-teh. Ha̍k-seng chēng-chēng; hit sî bô chiong só͘ khòaⁿ-kìⁿ ê kā lâng kóng.

37隔日in落山ê時，有kui陣人來接伊Keh ji̍t in lo̍h soaⁿ ê sî, ū kui tīn lâng lâi chih I.

38從中有一人大聲叫講，先生ah，求你看我ê Kiáⁿ，伊是我孤生ê。Chiông-tiong ū chi̍t lâng tōa siaⁿ kiò kóng, Sian-siⁿ ah, kiû lí khòaⁿ góa ê kiáⁿ, i sī góa ko͘-siⁿ ê.

39有神掠伊，就liâm-piⁿ喉叫，hō͘伊thiu-chhoah到流nōa，koh重重傷伊；離開伊實在oh。Ū sîn lia̍h i, chiū liâm-piⁿ âu-kiò, hō͘ i thiu-chhoah kàu lâu nōa, koh tāng-tāng siong i; lī-khui i si̍t-chāi oh.

40我bat求你ê學生趕伊，也in bōe能。Góa bat kiû lí ê ha̍k-seng kóaⁿ i, iā in bōe-ōe.

41耶穌應講，Hàiⁿ ah，m̄信koh悖逆ê世代ah，我kap lín tòa，吞忍lín，beh到jōa久ah？Tio̍h chhōa你ê Kiáⁿ來chia。Iâ-so͘ ìn kóng, Hàiⁿ ah, m̄ sìn koh pōe-ge̍k ê sè-tāi ah, góa kap lín tòa, thun-lún lín, beh kàu jōa kú ah? Tio̍h chhōa lí ê kiáⁿ lâi chia.

42來ê時鬼siakhou7伊倒，hō͘伊大thiu-chhoah。耶穌就責備邪神，醫好hit-ê gín-ná，交hō͘伊ê老父。Lâi ê sî kúi siak hō͘ i tó, hō͘ i tōa thiu-chhoah. Iâ-so͘ chiū chek-pī siâ-sîn, i-hó hit ê gín-ná, kau hō͘ i ê lāu-pē.

43眾人lóng gông-ngia̍h上帝ê大威嚴。 眾人奇怪伊所做lóng總ê事，hit時耶穌tùi伊ê學生講，Chèng lâng lóng gông-ngia̍h Siōng-tè ê tōa ui-giâm. Chèng lâng kî-koài I só͘ chòe lóng-chóng ê sū, hit sî Iâ-so͘ tùi I ê ha̍k-seng kóng,

44Chiah-ê話lín tio̍h聽去落耳；因為人子beh tú-tio̍h解送tī人ê手。Chiah ê ōe lín tio̍h thiaⁿ khì lo̍h-hī; in-ūi Jîn-chú beh tú-tio̍h ké-sàng tī lâng ê chhiú.

45學生bōe曉悟chit-ê話，是對in隱密，hō͘ in bōe明白；in也m̄敢用chit-ê話問伊。Ha̍k-seng bōe hiáu-ngō͘ chit ê ōe, sī tùi in ún-ba̍t, hō͘ in bōe bêng-pe̍k; in iā m̄ káⁿ ēng chit ê ōe mn̄g I.

46學生中生起辯論，看是誰 beh做大。Ha̍k-seng tiong siⁿ-khí piān-lūn, khòaⁿ chī-chūi beh chòe tōa.

47但是耶穌看出in心內所辯論，就牽一個gín-ná hō͘伊khiā tī身邊，Nā-sī Iâ-so͘ khòaⁿ-chhut in sim-lāi só͘ piān-lūn, chiū khan chi̍t ê gín-ná hō͘ i khiā tī sin-piⁿ,

48chiah kā in講，見若為tio̍h我ê名接納chit-ê gín-ná ê就是接納我；見若接納我ê是接納差我ê；因為lín眾人ê中間第一微細ê，伊是做大ê。chiah kā in kóng, Kìⁿ-nā ūi-tio̍h góa ê miâ chiap-la̍p chit ê gín-ná ê chiū-sī chiap-la̍p góa; kìⁿ-nā chiap-la̍p góa ê sī chiap-la̍p chhe góa ê; in-ūi lín chèng lâng ê tiong-kan tē it bî-sòe ê, i sī chòe tōa ê.

49約翰應講，先生，阮bat看見一人用你ê名趕鬼；阮就禁止伊，因為伊無kap阮tè你。Iok-hān ìn kóng, Sian-siⁿ, goán bat khòaⁿ-kìⁿ chi̍t lâng ēng lí ê miâ kóaⁿ kúi; goán chiū kìm-chí i, in-ūi i bô kap goán tè lí.

50耶穌對伊講，莫得禁止伊，因為見若無攻擊lín ê就是為lín。Iâ-so͘ tùi i kóng, Bo̍h-tit kìm-chí i, in-ūi kìⁿ-nā bô kong-kek lín ê chiū-sī ūi lín.

51耶穌受chih接上天ê日期beh到，就決意ǹg耶路撒冷來行，差使者做頭去；Iâ-so͘ siū chih-chiap chiūⁿ thiⁿ ê ji̍t-kî beh kàu, chiū koat-ì ǹg Iâ-lō͘-sat-léng lâi kiâⁿ, chhe sù-chiá chòe-thâu khì;

52in去入撒馬利亞人一個鄉社，beh kā伊備辦。in khì ji̍p Sat-má-lī-a lâng chi̍t ê hiuⁿ-siā, beh kā I pī-pān.

53但是in m̄接納伊，因為伊ǹg耶路撒冷teh行。Nā-sī in m̄ chiap-la̍p I, in-ūi I ǹg Iâ-lō͘-sat-léng teh kiâⁿ.

54伊ê學生雅各約翰看見án-ni，就講，主ah，你ài阮叫火tùi天落來滅in mah？I ê ha̍k-seng Ngá-kok Iok-hān khòaⁿ-kìⁿ án-ni, chiū kóng, Chú ah, lí ài goán kiò hé tùi thiⁿ lo̍h-lâi bia̍t in mah?

55耶穌oa̍t-tńg身責備in。Iâ-so͘ oa̍t-tńg-sin chek-pī in.

56大家就去別個鄉社。Tāi-ke chiū khì pa̍t ê hiuⁿ-siā.

57In行路ê時有人tùi耶穌講，你無論tá-lo̍h去，我beh tè你。In kiâⁿ lō͘ ê sî ū lâng tùi Iâ-so͘ kóng, Lí bô lūn tá-lo̍h khì, góa beh tè lí.

58耶穌kā伊講，狐狸有孔，天中ê飛鳥有巢；獨獨人子無khòa頭殼ê所在。Iâ-so͘ kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi.

59Koh對一人講，Tè我。Hit人講，主ah，hō͘我tò去，先埋葬我ê老父。Koh tùi chi̍t lâng kóng, Tè góa. Hit lâng kóng, Chú ah, hō͘ góa tò-khì, seng bâi-chòng góa ê lāu-pē.

60耶穌kā伊講，chhut-chāi死人埋葬in ê死人；但是你tio̍h去傳報上帝ê國。Iâ-so͘ kā i kóng, Chhut-chāi sí-lâng bâi-chòng in ê sí-lâng; nā-sī lí tio̍h khì thoân-pò Siōng-tè ê kok.

61Koh一人講，主ah，我beh tè你；總是准我先去kap家內ê人相辭。Koh chi̍t lâng kóng, Chú ah, góa beh tè lí; chóng-sī chún góa seng khì kap ke-lāi ê lâng saⁿ-sî.

62耶穌對伊講，見若手hōaⁿ犁尾來看後面ê，無合tī上帝ê國。Iâ-so͘ tùi i kóng, Kìⁿ-nā chhiú hōaⁿ lôe-bé lâi khòaⁿ āu-bīn ê, bô ha̍p tī Siōng-tè ê kok.