1看ah，耶和華ê日beh到，你ê貨財beh hō͘人分tī lín中間。Khòaⁿ ah, Iâ-hô-hoa ê ji̍t beh kàu, lí ê hè-châi beh hō͘ lâng pun tī lín tiong-kan.

2因為我beh聚集萬國kap耶路撒冷交戰；城beh受攻破，厝宅beh受搶劫，婦人人beh受凌辱；城內ê百姓一半受人掠去；所chhun ê百姓猶原tī城內，無致到剪除。In-ūi Góa beh chū-chi̍p bān-kok kap Iâ-lō͘-sat-léng kau-chiàn; siâⁿ beh siū kong-phòa, chhù-the̍h beh siū chhiúⁿ-kiap, hū-jîn-lâng beh siū lêng-jio̍k; siâⁿ-lāi ê peh-sìⁿ chi̍t-pòaⁿ siū lâng lia̍h--khì; só͘ chhun ê peh-sìⁿ iû-goân tī siâⁿ-lāi, bô tì-kàu chián-tû.

3Hit時耶和華beh出去kap hiah-ê國交戰，親像從前臨陣ê日交戰一樣。Hit-sî Iâ-hô-hoa beh chhut-khì kap hiah ê kok kau-chiàn, chhin-chhiūⁿ chiông-chêng lîm-tīn ê ji̍t kau-chiàn chi̍t-iūⁿ.

4當hit日，祂ê腳beh khiā tī橄欖山，chit-ê山tī耶路撒冷頭前ê東勢；橄欖山beh tùi中央裂開，tùi東到西，成做極大ê山谷；山ê一半移徙ǹg北，一半移徙ǹg南。Tng hit-ji̍t, I ê kha beh khiā tī Kaⁿ-ná soaⁿ, chit ê soaⁿ tī Iâ-lō͘-sat-léng thâu-chêng ê tang-sì; Kaⁿ-ná soaⁿ beh tùi tiong-ng li̍h-khui, tùi tang kàu sai, chiâⁿ-chòe ke̍k-tōa ê soaⁿ-kok; soaⁿ ê chi̍t-pòaⁿ î-sóa ǹg-pak, chi̍t-pòaⁿ î-sóa ǹg-lâm.

5Lín beh tùi我ê山谷中逃走，因為山谷beh透到A-sat，lín beh逃走親像猶大王O͘-se-ngá ê年間，為tio̍h地動ê逃走一樣；耶和華我ê上帝beh臨到，lóng總ê聖ê kap你來。Lín beh tùi Góa ê soaⁿ-kok-tiong tô-cháu, in-ūi soaⁿ-kok beh thàu-kàu A-sat, lín beh tô-cháu chhin-chhiūⁿ Iû-tāi ông O͘-se-ngá ê nî-kan, ūi-tio̍h tōe-tāng ê tô-cháu chi̍t-iūⁿ; Iâ-hô-hoa góa ê Siōng-tè beh lîm-kàu, lóng-chóng ê sèng--ê kap Lí lâi.

6Hit日ê光，beh m̄成光m̄成暗。Hit-ji̍t ê kng, beh m̄-chiâⁿ kng m̄-chiâⁿ àm.

7Beh有一個特別日，是耶和華所知ê，m̄是日，也m̄是暝；到ê-hng時chiah有光。Beh ū chi̍t ê te̍k-pia̍t ji̍t, sī Iâ-hô-hoa só͘ chai--ê, m̄-sī ji̍t, iā m̄-sī mî; kàu ê-hng-sî chiah ū kng.

8Hit日beh有活水tùi耶路撒冷出來；一半流去東海，一半流去西海；冬天夏天lóng是án-ni。Hit-ji̍t beh ū oa̍h-chúi tùi Iâ-lō͘-sat-léng chhut--lâi; chi̍t-pòaⁿ lâu-khì tang-hái, chi̍t-pòaⁿ lâu-khì sai-hái; tang-thiⁿ hē-thiⁿ lóng sī án-ni.

9耶和華beh tī全地做王；當hit日耶和華獨一，祂ê名也是獨一。Iâ-hô-hoa beh tī choân-tōe chòe ông; tng hit-ji̍t Iâ-hô-hoa to̍k-it, I ê miâ iā sī to̍k-it.

10全地tùi Ka-pa到耶路撒冷南方ê Lîm-bûn，beh變親像A-la̍h-pa；耶路撒冷beh升高tiàm tī伊ê本所在，就是tùi便雅憫ê門，到頭一個門ê所在，koh到角頭ê門，亦tùi Hap-lâm-gia̍p ê樓，直到王ê酒窟。Choân-tōe tùi Ka-pa kàu Iâ-lō͘-sat-léng lâm-hng ê Lîm-bûn, beh piàn chhin-chhiūⁿ A-la̍h-pa; Iâ-lō͘-sat-léng beh seng-koâiⁿ tiàm tī i ê pún só͘-chāi, chiū-sī tùi Piān-ngá-bín ê mn̂g, kàu thâu-chi̍t-ê mn̂g ê só͘-chāi, koh kàu kak-thâu ê mn̂g, ia̍h tùi Hap-lâm-gia̍p ê lâu, ti̍t-kàu ông ê chiú-khut.

11Beh有人tiàm tī hit中間，無koh有咒詛；耶路撒冷beh安然khiā起。Beh ū lâng tiàm tī hit tiong-kan, bô koh ū chiù-chó͘; Iâ-lō͘-sat-léng beh an-jiân khiā-khí.

12Hiah-ê列國kap耶路撒冷交戰ê，耶和華beh用chit號ê災厄攻擊in；in ê腳iáu khiā-teh ê時，in ê肉beh朽爛，目睭beh朽爛tī目睭孔，舌beh朽爛tī嘴內。Hiah ê lia̍t-kok kap Iâ-lō͘-sat-léng kau-chiàn--ê, Iâ-hô-hoa beh ēng chit-hō ê chai-ē kong-kek in; in ê kha iáu khiā-teh ê sî, in ê bah beh hiú-nōa, ba̍k-chiu beh hiú-nōa tī ba̍k-chiu-khang, chi̍h beh hiú-nōa tī chhùi-lāi.

13當hit日耶和華beh hō͘ in中間大擾亂；in ta̍k人用手相khiú，koh起手相攻擊。Tng hit-ji̍t Iâ-hô-hoa beh hō͘ in tiong-kan tōa jiáu-loān; in ta̍k-lâng ēng chhiú saⁿ-khiú, koh khí-chhiú saⁿ kong-kek.

14猶大也beh kap耶路撒冷交戰；hit時四圍列國ê貨財，就是金、銀、衣裳，beh聚集chōe-chōe。Iû-tāi iā beh kap Iâ-lō͘-sat-léng kau-chiàn; hit-sî sì-ûi lia̍t-kok ê hè-châi, chiū-sī kim, gûn, i-chiûⁿ, beh chū-chi̍p chōe-chōe.

15Hit-ê所beh到tī馬、騾、駱駝、驢，以及營中一切ê cheng-siⁿ ê災厄，kap chit-ê災厄一般樣。Hit-ê só͘ beh kàu tī bé, lô, lo̍k-tô, lû, í-ki̍p iâⁿ-tiong it-chhè ê cheng-siⁿ ê chai-ē, kap chit ê chai-ē chi̍t-poaⁿ-iūⁿ.

16所有來攻擊耶路撒冷ê列國chhun ê人，beh年年上來敬拜大ê王，萬軍ê耶和華，也守搭寮節。Só͘-ū lâi kong-kek Iâ-lō͘-sat-léng ê lia̍t-kok chhun ê lâng, beh nî-nî chiūⁿ-lâi kèng-pài tōa ê Ông, bān-kun ê Iâ-hô-hoa, iā siú Tah-liâu-choeh.

17地上萬族中，見若無上耶路撒冷敬拜大ê王，萬軍ê耶和華ê，beh無落雨tī in hia。Tōe-chiūⁿ bān-cho̍k-tiong, kìⁿ-nā bô chiūⁿ Iâ-lō͘-sat-léng kèng-pài tōa ê Ông, bān-kun ê Iâ-hô-hoa--ê, beh bô lo̍h-hō͘ tī in hia.

18埃及族若無上來，beh無雨tī in hia；beh有災厄，就是耶和華用來攻擊hiah-ê無上來守搭寮節ê列國ê。Ai-ki̍p cho̍k nā bô chiūⁿ-lâi, beh bô hō͘ tī in hia; beh ū chai-ē, chiū-sī Iâ-hô-hoa ēng lâi kong-kek hiah-ê bô chiūⁿ-lâi siú Tah-liâu-choeh ê lia̍t-kok-ê.

19這就是埃及ê刑罰，也是hiah-ê無上來守搭寮節ê列國ê刑罰。Che chiū-sī Ai-ki̍p ê hêng-hoa̍t, iā-sī hiah-ê bô chiūⁿ-lâi siú Tah-liâu-choeh ê lia̍t-kok ê hêng-hoa̍t.

20當hit日，馬ê hâm-lêng beh刻字講，做聖歸tī耶和華；耶和華殿內ê鍋，beh親像壇前ê碗。Tng hit-ji̍t, bé ê hâm-lêng beh khek-jī kóng, Chòe sèng kui tī Iâ-hô-hoa; Iâ-hô-hoa tiān-lāi ê e, beh chhin-chhiūⁿ tôaⁿ-chêng ê óaⁿ.

21見若耶路撒冷kap猶大ê鍋，lóng beh做聖歸萬軍ê耶和華；見若獻祭ê，lóng beh用chiah-ê鍋，煮肉tī hit內面；當hit日，tī萬軍ê耶和華ê殿內，無koh有迦南人。Kìⁿ-nā Iâ-lō͘-sat-léng kap Iû-tāi ê e, lóng beh chòe-sèng kui bān-kun ê Iâ-hô-hoa; kìⁿ-nā hiàn-chè--ê, lóng beh ēng chiah ê e, chú-bah tī hit lāi-bīn; tng hit-ji̍t, tī bān-kun ê Iâ-hô-hoa ê tiān-lāi, bô koh ū Ka-lâm lâng.

1耶和華默示ê話，託重瑪拉基傳hō͘以色列ê。Iâ-hô-hoa be̍k-sī ê ōe, thok-tiōng Má-la̍h-ki thoân hō͘ Í-sek-lia̍t--ê.

2耶和華講，我有疼lín；總是lín講，你tī甚麼事疼阮ah？耶和華講，以掃kiám m̄是雅各ê兄mah？總是我疼雅各；Iâ-hô-hoa kóng, Góa ū thiàⁿ lín; chóng-sī lín kóng, Lí tī sím-mi̍h sū thiàⁿ goán ah? Iâ-hô-hoa kóng, Í-sò kiám m̄-sī Ngá-kok ê hiaⁿ mah? Chóng-sī Góa thiàⁿ Ngá-kok;

3怨恨以掃，hō͘伊ê山荒廢，用伊ê業交hō͘曠野ê山狗。oàn-hūn Í-sò, hō͘ i ê soaⁿ hong-hòe, ēng i ê gia̍p kau hō͘ khòng-iá ê soaⁿ-káu.

4Í-tong講，阮現在雖然毀壞，iáu-kú beh koh起荒廢ê所在；萬軍ê耶和華án-ni講，In beh起伊，我beh毀伊；人beh稱伊做罪惡ê境界，做耶和華永遠受氣ê百姓。Í-tong kóng, Goán hiān-chāi sui-jiân húi-hoāi, iáu-kú beh koh khí hong-hòe ê só͘-chāi; bān-kun ê Iâ-hô-hoa án-ni kóng, In beh khí i, Góa beh húi i; lâng beh chheng i chòe Chōe-ok ê kéng-kài, chòe Iâ-hô-hoa éng-oán siū-khì ê peh-sìⁿ.

5Lín beh親目看見，也beh講，Tī以色列警戒ê外面，耶和華beh做大。Lín beh chhin-ba̍k khòaⁿ-kìⁿ, iā beh kóng, Tī Í-sek-lia̍t kéng-kài ê gōa-bīn, Iâ-hô-hoa beh chòe-tōa.

6看輕我ê名ê祭司ah，萬軍ê耶和華對lín講，Kiáⁿ尊敬伊ê老父，奴僕尊敬伊ê主人，我若做父，我得tio̍h尊敬tī toh-lo̍h？我若做主人，我得tio̍h敬畏tī toh-lo̍h？Lín就講，阮tī甚麼事看輕你ê名ah？Khòaⁿ-khin Góa ê miâ ê chè-si ah, bān-kun ê Iâ-hô-hoa tùi lín kóng, Kiáⁿ chun-kèng i ê lāu-pē, lô͘-po̍k chun-kèng i ê chú-lâng, Góa nā chòe pē, Góa tit-tio̍h chun-kèng tī toh-lo̍h? Góa nā chòe chú-lâng, Góa tit-tio̍h kèng-ùi tī toh-lo̍h? Lín chiū kóng, Goán tī sím-mi̍h sū khòaⁿ-khin Lí ê miâ ah?

7lín用無清氣ê餅獻tī我ê壇；iáu koh講，阮tī甚麼事褻瀆你ah？因為lín講，耶和華ê桌是thang看輕ê。Lín ēng bô chheng-khì ê piáⁿ hiàn tī Góa ê tôaⁿ; iáu koh kóng, Goán tī sím-mi̍h sū siat-to̍k Lí ah? In-ūi lín kóng, Iâ-hô-hoa ê toh sī thang khòaⁿ-khin--ê.

8Lín將chhiⁿ-mî ê cheng-siⁿ獻做祭物，這kiám m̄是pháiⁿ mah？將跛腳á是有病ê cheng-siⁿ來獻，這kiám m̄是pháiⁿ mah？Lín 試獻hō͘ lín ê總督，伊beh歡喜lín，接納lín mah？這是萬軍ê耶和華講ê。Lín chiong chhiⁿ-mî ê cheng-siⁿ hiàn chòe chè-mi̍h, che kiám-m̄-sī pháiⁿ mah? Chiong pái-kha á-sī ū pīⁿ ê cheng-siⁿ lâi hiàn, che kiám-m̄-sī pháiⁿ mah? Lín chhì-hiàn hō͘ lín ê chóng-tok, i beh hoaⁿ-hí lín, chiap-la̍p lín mah? Che sī bān-kun ê Iâ-hô-hoa kóng-ê.

9Taⁿ勸lín，懇求上帝施恩寬容咱；chit-ê事tùi lín ê手chiah有；祂kiám beh接納lín中間一人mah？這是萬軍ê耶和華講ê。Taⁿ khǹg lín, khún-kiû Siōng-tè si-un khoan-iông lán; chit ê sū tùi lín ê chhiú chiah ū; I kiám beh chiap-la̍p lín tiong-kan chi̍t-lâng mah? Che sī bān-kun ê Iâ-hô-hoa kóng--ê.

10願lín中間有人關殿門，免得lín空空tī我ê壇起火。萬軍ê耶和華講，我無歡喜lín，亦無beh tùi lín ê手接納禮物。Goān lín tiong-kan ū lâng koaiⁿ tiān-mn̂g, bián-tit lín khang-khang tī Góa ê tôaⁿ khí hé. Bān-kun ê Iâ-hô-hoa kóng, Góa bô hoaⁿ-hí lín, ia̍h bô beh tùi lín ê chhiú chiap-la̍p lé-mi̍h.

11萬軍ê耶和華講，Tùi日出到日落ê所在，我ê名做大tī列邦中；ta̍k所在奉我ê名燒香，獻清氣ê禮物；因為我ê名做大tī列邦中。Bān-kun ê Iâ-hô-hoa kóng, Tùi ji̍t-chhut kàu ji̍t-lo̍h ê só͘-chāi, Góa ê miâ chòe-tōa tī lia̍t-pang-tiong; ta̍k só͘-chāi hōng Góa ê miâ sio-hiuⁿ, hiàn chheng-khì ê lé-mi̍h; in-ūi Góa ê miâ chòe tōa tī lia̍t-pang-tiong.

12總是lín褻瀆伊，講，耶和華ê桌無清氣，伊ê頂面ê食物是thang看輕ê。Chóng-sī lín siat-to̍k i, kóng, Iâ-hô-hoa ê toh bô chheng-khì, i ê téng-bīn ê chia̍h-mi̍h sī thang khòaⁿ-khin--ê.

13Lín koh講，看ah，到hiah囉嗦費氣；亦掩鼻厭賤伊；這是萬軍ê耶和華講ê。lín用所搶ê，跛腳ê，破相ê，the̍h來獻做禮物，我kiám beh tùi lín ê手接納mah？這是耶和華講ê。Lín koh kóng, Khòaⁿ ah, kàu hiah lo-so hùi-khì; ia̍h ng-phīⁿ iàm-chiān i; che sī bān-kun ê Iâ-hô-hoa kóng--ê. Lín ēng só͘ chhiúⁿ--ê, pái-kha--ê, phòa-siùⁿ--ê, the̍h-lâi hiàn-chòe lé-mi̍h, Góa kiám beh tùi lín ê chhiú chiap-la̍p mah? Che sī Iâ-hô-hoa kóng--ê.

14假好ê人，tī kui群中有公ê cheng-siⁿ，伊下願就用有瑕疵ê，獻hō͘主，chit號ê人thang咒詛，因為我是大君王，我ê名tī列國中是thang驚畏ê；這是萬軍ê耶和華講ê。Ké-hó ê lâng, tī kui-kûn-tiong ū kang ê cheng-siⁿ, i hē-goān chiū ēng ū hâ-chhû--ê, hiàn hō͘ Chú, chit-hō ê lâng thang chiù-chó͘, in-ūi Góa sī tōa kun-ông, Góa ê miâ tī lia̍t-kok-tiong sī thang kiaⁿ-ùi--ê; che sī bān-kun ê Iâ-hô-hoa kóng--ê.

1Lín chiah-ê祭司ah，chit-ê命令是hō͘ lín-ê。Lín chiah ê chè-si ah, chit ê bēng-lēng sī hō͘ lín--ê.

2萬軍ê耶和華講，Lín若m̄聽，m̄ hē tī心裡，來歸榮光我ê名，我就hō͘咒詛到tī lín，hō͘ lín ê福氣變做咒詛；我已經咒詛，因為lín無將命令hē tī心裡。Bān-kun ê Iâ-hô-hoa kóng, Lín nā m̄-thiaⁿ, m̄ hē tī sim--nih, lâi kui êng-kng Góa ê miâ, Góa chiū hō͘ chiù-chó͘ kàu tī lín, hō͘ lín ê hok-khì piàn-chòe chiù-chó͘; Góa í-keng chiù-chó͘, in-ūi lín bô chiong bēng-lēng hē tī sim--nih.

3看ah，我beh為tio̍h lín來phah-pháiⁿ種子，koh用糞糊lín ê面，就是lín ê牲禮ê糞；lín beh kap伊平平除去。Khòaⁿ ah, Góa beh ūi-tio̍h lín lâi phah-pháiⁿ chéng-chí, koh ēng pùn kô͘ lín ê bīn, chiū-sī lín ê seng-lé ê pùn; lín beh kap i pîⁿ-pîⁿ tû--khì.

4Lín就知我用chit-ê命令hō͘ lín，thang做我kap利未所立ê約；這是萬軍ê耶和華講ê。Lín chiū chai Góa ēng chit ê bēng-lēng hō͘ lín, thang chòe Góa kap Lī-bī só͘ li̍p ê iok; che sī bān-kun ê Iâ-hô-hoa kóng--ê.

5我kap伊所立ê，是活命kap平安ê約；我將這hō͘伊，hō͘伊驚畏；伊就驚畏我，敬畏我ê名。Góa kap i só͘ li̍p--ê, sī oa̍h-miā kap pêng-an ê iok; Góa chiong che hō͘ i, hō͘ i kiaⁿ-ùi; i chiū kiaⁿ-ùi Góa, kèng-ùi Góa ê miâ.

6真理ê律法tī伊ê嘴內；tī伊ê嘴唇chhē無不義；伊用平安正直kap我同行，hō͘ chōe-chōe人oa̍t-tńg離開pháiⁿ。Chin-lí ê lu̍t-hoat tī i ê chhùi-lāi; tī i ê chhùi-tûn chhē bô put-gī; i ēng pêng-an chèng-ti̍t kap Góa tâng-kiâⁿ, hō͘ chōe-chōe lâng oa̍t-tńg lī-khui pháiⁿ.

7因為祭司ê嘴唇tio̍h存智識，人tio̍h對伊ê嘴請教律法，因為伊是萬軍ê耶和華ê使者。In-ūi chè-si ê chhùi-tûn tio̍h chûn tì-sek, lâng tio̍h tùi i ê chhùi chhéng-kàu lu̍t-hoat, in-ūi i sī bān-kun ê Iâ-hô-hoa ê sù-chiá.

8總是lín有離開hit條路，hō͘ chōe-chōe人tī律法tio̍h-tak；lín敗壞利未ê約；這是萬軍ê耶和華講ê。Chóng-sī lín ū lī-khui hit tiâu lō͘, hō͘ chōe-chōe lâng tī lu̍t-hoat tio̍h-tak; lín pāi-hoāi Lī-bī ê iok; che sī bān-kun ê Iâ-hô-hoa kóng--ê.

9所以我hō͘ lín受眾人看輕，看做下賤；因為lín無守我ê道路，tī律法用偏私款待人。Só͘-í Góa hō͘ lín siū chèng-lâng khòaⁿ-khin, khòaⁿ-chòe hā-chiān; in-ūi lín bô siú Góa ê tō-lō͘, tī lu̍t-hoat ēng phian-su khoán-thāi lâng.

10咱kiám m̄是同一個父mah？Kiám m̄是一位上帝創造咱mah？咱ta̍k人啥事用詭詐款待兄弟，敗壞列祖ê約ah？Lán kiám-m̄-sī tâng chi̍t ê pē mah? Kiám-m̄-sī chi̍t ūi Siōng-tè chhòng-chō lán mah? Lán ta̍k-lâng siáⁿ-sū ēng khúi-chà khoán-thāi hiaⁿ-tī, pāi-hoāi lia̍t-chó͘ ê iok ah?

11猶大行詭詐koh tī以色列kap耶路撒冷ê中間行可惡ê事；因為猶大褻瀆耶和華所疼ê聖所；chhōa服事外邦ê上帝ê cha-bó͘-kiáⁿ做bó͘。Iû-tāi kiâⁿ khúi-chà koh tī Í-sek-lia̍t kap Iâ-lō͘-sat-léng ê tiong-kan kiâⁿ khó-ò͘ⁿ ê sū; in-ūi Iû-tāi siat-to̍k Iâ-hô-hoa só͘ thiàⁿ ê sèng-só͘; chhōa ho̍k-sāi gōa-pang ê siōng-tè ê cha-bó͘-kiáⁿ chòe bó͘.

12行chit號事ê人，願耶和華tùi雅各ê布棚中，除去伊所有ê人，或是醒ê，或是應ê，以及獻禮物hō͘萬軍ê耶和華ê。Kiâⁿ chit-hō sū ê lâng, goān Iâ-hô-hoa tùi Ngá-kok ê pò͘-pîⁿ-tiong, tû-khì i só͘-ū ê lâng, he̍k-sī chhíⁿ--ê, he̍k-sī ìn--ê, í-ki̍p hiàn lé-mi̍h hō͘ bān-kun ê Iâ-hô-hoa--ê.

13Lín koh án-ni做，hō͘目屎啼哭kap吐氣遍滿耶和華ê壇，致到祂無koh看顧禮物，也無歡喜tùi lín ê手接納。Lín koh án-ni chòe, hō͘ ba̍k-sái thî-khàu kap thó͘-khùi piàn-móa Iâ-hô-hoa ê tôaⁿ, tì-kàu I bô koh khòaⁿ-kò͘ lé-mi̍h, iā bô hoaⁿ-hí tùi lín ê chhiú chiap-la̍p.

14Lín iáu-kú講，這是啥事？因為耶和華tī你kap你少年所娶ê bó͘ ê中間做干證；伊雖然是你ê匹配，koh是你盟約ê bó͘，你iáu-kú用詭詐款待伊。Lín iáu-kú kóng, Che sī siáⁿ-sū? In-ūi Iâ-hô-hoa tī lí kap lí siàu-liân só͘ chhōa ê bó͘ ê tiong-kan chòe kan-chèng; i sui-jiân sī lí ê phit-phòe, koh sī lí bêng-iok ê bó͘, lí iáu-kú ēng khúi-chà khoán-thāi i.

15伊ê神雖然有chhun，kiám m̄是造一個mah？啥事只有一個？就是beh求聖ê後裔。所以tio̍h謹守lín ê心，ta̍k人m̄-thang用詭詐款待少年所娶ê bó͘。I ê sîn sui-jiân ū chhun, kiám-m̄-sī chō chi̍t-ê mah? Siáⁿ-sū chí-ū chi̍t-ê? chiū-sī beh kiû sèng ê hō͘-è. Só͘-í tio̍h kín-siú lín ê sim, ta̍k-lâng m̄-thang ēng khúi-chà khoán-thāi siàu-liân só͘ chhōa ê bó͘.

16耶和華以色列ê上帝講，離bó͘ ê事，kap用強暴款待bó͘ ê人，我怨恨伊；所以tio̍h謹慎守lín ê心，m̄-thang行詭詐；這是萬軍ê耶和華講ê。Iâ-hô-hoa Í-sek-lia̍t ê Siōng-tè kóng, Lî-bó͘ ê sū, kap ēng kiông-pō khoán-thāi bó͘ ê lâng, Góa oàn-hūn i; só͘-í tio̍h kín-sīn siú lín ê sim, m̄-thang kiâⁿ khúi-chà; che sī bān-kun ê Iâ-hô-hoa kóng--ê.

17Lín用話刁難耶和華。Lín iáu-kú講，阮用甚麼刁難伊ah？因為lín講，凡若做pháiⁿ-ê，耶和華看伊做好，koh歡喜伊；á是公義ê上帝tī toh-lo̍h ah？Lín ēng ōe thiau-lân Iâ-hô-hoa. Lín iáu-kú kóng, Goán ēng sím-mi̍h thiau-lân I ah? In-ūi lín kóng, Hoān-nā chòe-pháiⁿ--ê, Iâ-hô-hoa khòaⁿ i chòe hó, koh hoaⁿ-hí i; á-sī kong-gī ê Siōng-tè tī toh-lo̍h ah?