1耶和華默示ê話，託重瑪拉基傳hō͘以色列ê。Iâ-hô-hoa be̍k-sī ê ōe, thok-tiōng Má-la̍h-ki thoân hō͘ Í-sek-lia̍t--ê.

2耶和華講，我有疼lín；總是lín講，你tī甚麼事疼阮ah？耶和華講，以掃kiám m̄是雅各ê兄mah？總是我疼雅各；Iâ-hô-hoa kóng, Góa ū thiàⁿ lín; chóng-sī lín kóng, Lí tī sím-mi̍h sū thiàⁿ goán ah? Iâ-hô-hoa kóng, Í-sò kiám m̄-sī Ngá-kok ê hiaⁿ mah? Chóng-sī Góa thiàⁿ Ngá-kok;

3怨恨以掃，hō͘伊ê山荒廢，用伊ê業交hō͘曠野ê山狗。oàn-hūn Í-sò, hō͘ i ê soaⁿ hong-hòe, ēng i ê gia̍p kau hō͘ khòng-iá ê soaⁿ-káu.

4Í-tong講，阮現在雖然毀壞，iáu-kú beh koh起荒廢ê所在；萬軍ê耶和華án-ni講，In beh起伊，我beh毀伊；人beh稱伊做罪惡ê境界，做耶和華永遠受氣ê百姓。Í-tong kóng, Goán hiān-chāi sui-jiân húi-hoāi, iáu-kú beh koh khí hong-hòe ê só͘-chāi; bān-kun ê Iâ-hô-hoa án-ni kóng, In beh khí i, Góa beh húi i; lâng beh chheng i chòe Chōe-ok ê kéng-kài, chòe Iâ-hô-hoa éng-oán siū-khì ê peh-sìⁿ.

5Lín beh親目看見，也beh講，Tī以色列警戒ê外面，耶和華beh做大。Lín beh chhin-ba̍k khòaⁿ-kìⁿ, iā beh kóng, Tī Í-sek-lia̍t kéng-kài ê gōa-bīn, Iâ-hô-hoa beh chòe-tōa.

6看輕我ê名ê祭司ah，萬軍ê耶和華對lín講，Kiáⁿ尊敬伊ê老父，奴僕尊敬伊ê主人，我若做父，我得tio̍h尊敬tī toh-lo̍h？我若做主人，我得tio̍h敬畏tī toh-lo̍h？Lín就講，阮tī甚麼事看輕你ê名ah？Khòaⁿ-khin Góa ê miâ ê chè-si ah, bān-kun ê Iâ-hô-hoa tùi lín kóng, Kiáⁿ chun-kèng i ê lāu-pē, lô͘-po̍k chun-kèng i ê chú-lâng, Góa nā chòe pē, Góa tit-tio̍h chun-kèng tī toh-lo̍h? Góa nā chòe chú-lâng, Góa tit-tio̍h kèng-ùi tī toh-lo̍h? Lín chiū kóng, Goán tī sím-mi̍h sū khòaⁿ-khin Lí ê miâ ah?

7lín用無清氣ê餅獻tī我ê壇；iáu koh講，阮tī甚麼事褻瀆你ah？因為lín講，耶和華ê桌是thang看輕ê。Lín ēng bô chheng-khì ê piáⁿ hiàn tī Góa ê tôaⁿ; iáu koh kóng, Goán tī sím-mi̍h sū siat-to̍k Lí ah? In-ūi lín kóng, Iâ-hô-hoa ê toh sī thang khòaⁿ-khin--ê.

8Lín將chhiⁿ-mî ê cheng-siⁿ獻做祭物，這kiám m̄是pháiⁿ mah？將跛腳á是有病ê cheng-siⁿ來獻，這kiám m̄是pháiⁿ mah？Lín 試獻hō͘ lín ê總督，伊beh歡喜lín，接納lín mah？這是萬軍ê耶和華講ê。Lín chiong chhiⁿ-mî ê cheng-siⁿ hiàn chòe chè-mi̍h, che kiám-m̄-sī pháiⁿ mah? Chiong pái-kha á-sī ū pīⁿ ê cheng-siⁿ lâi hiàn, che kiám-m̄-sī pháiⁿ mah? Lín chhì-hiàn hō͘ lín ê chóng-tok, i beh hoaⁿ-hí lín, chiap-la̍p lín mah? Che sī bān-kun ê Iâ-hô-hoa kóng-ê.

9Taⁿ勸lín，懇求上帝施恩寬容咱；chit-ê事tùi lín ê手chiah有；祂kiám beh接納lín中間一人mah？這是萬軍ê耶和華講ê。Taⁿ khǹg lín, khún-kiû Siōng-tè si-un khoan-iông lán; chit ê sū tùi lín ê chhiú chiah ū; I kiám beh chiap-la̍p lín tiong-kan chi̍t-lâng mah? Che sī bān-kun ê Iâ-hô-hoa kóng--ê.

10願lín中間有人關殿門，免得lín空空tī我ê壇起火。萬軍ê耶和華講，我無歡喜lín，亦無beh tùi lín ê手接納禮物。Goān lín tiong-kan ū lâng koaiⁿ tiān-mn̂g, bián-tit lín khang-khang tī Góa ê tôaⁿ khí hé. Bān-kun ê Iâ-hô-hoa kóng, Góa bô hoaⁿ-hí lín, ia̍h bô beh tùi lín ê chhiú chiap-la̍p lé-mi̍h.

11萬軍ê耶和華講，Tùi日出到日落ê所在，我ê名做大tī列邦中；ta̍k所在奉我ê名燒香，獻清氣ê禮物；因為我ê名做大tī列邦中。Bān-kun ê Iâ-hô-hoa kóng, Tùi ji̍t-chhut kàu ji̍t-lo̍h ê só͘-chāi, Góa ê miâ chòe-tōa tī lia̍t-pang-tiong; ta̍k só͘-chāi hōng Góa ê miâ sio-hiuⁿ, hiàn chheng-khì ê lé-mi̍h; in-ūi Góa ê miâ chòe tōa tī lia̍t-pang-tiong.

12總是lín褻瀆伊，講，耶和華ê桌無清氣，伊ê頂面ê食物是thang看輕ê。Chóng-sī lín siat-to̍k i, kóng, Iâ-hô-hoa ê toh bô chheng-khì, i ê téng-bīn ê chia̍h-mi̍h sī thang khòaⁿ-khin--ê.

13Lín koh講，看ah，到hiah囉嗦費氣；亦掩鼻厭賤伊；這是萬軍ê耶和華講ê。lín用所搶ê，跛腳ê，破相ê，the̍h來獻做禮物，我kiám beh tùi lín ê手接納mah？這是耶和華講ê。Lín koh kóng, Khòaⁿ ah, kàu hiah lo-so hùi-khì; ia̍h ng-phīⁿ iàm-chiān i; che sī bān-kun ê Iâ-hô-hoa kóng--ê. Lín ēng só͘ chhiúⁿ--ê, pái-kha--ê, phòa-siùⁿ--ê, the̍h-lâi hiàn-chòe lé-mi̍h, Góa kiám beh tùi lín ê chhiú chiap-la̍p mah? Che sī Iâ-hô-hoa kóng--ê.

14假好ê人，tī kui群中有公ê cheng-siⁿ，伊下願就用有瑕疵ê，獻hō͘主，chit號ê人thang咒詛，因為我是大君王，我ê名tī列國中是thang驚畏ê；這是萬軍ê耶和華講ê。Ké-hó ê lâng, tī kui-kûn-tiong ū kang ê cheng-siⁿ, i hē-goān chiū ēng ū hâ-chhû--ê, hiàn hō͘ Chú, chit-hō ê lâng thang chiù-chó͘, in-ūi Góa sī tōa kun-ông, Góa ê miâ tī lia̍t-kok-tiong sī thang kiaⁿ-ùi--ê; che sī bān-kun ê Iâ-hô-hoa kóng--ê.

1Lín chiah-ê祭司ah，chit-ê命令是hō͘ lín-ê。Lín chiah ê chè-si ah, chit ê bēng-lēng sī hō͘ lín--ê.

2萬軍ê耶和華講，Lín若m̄聽，m̄ hē tī心裡，來歸榮光我ê名，我就hō͘咒詛到tī lín，hō͘ lín ê福氣變做咒詛；我已經咒詛，因為lín無將命令hē tī心裡。Bān-kun ê Iâ-hô-hoa kóng, Lín nā m̄-thiaⁿ, m̄ hē tī sim--nih, lâi kui êng-kng Góa ê miâ, Góa chiū hō͘ chiù-chó͘ kàu tī lín, hō͘ lín ê hok-khì piàn-chòe chiù-chó͘; Góa í-keng chiù-chó͘, in-ūi lín bô chiong bēng-lēng hē tī sim--nih.

3看ah，我beh為tio̍h lín來phah-pháiⁿ種子，koh用糞糊lín ê面，就是lín ê牲禮ê糞；lín beh kap伊平平除去。Khòaⁿ ah, Góa beh ūi-tio̍h lín lâi phah-pháiⁿ chéng-chí, koh ēng pùn kô͘ lín ê bīn, chiū-sī lín ê seng-lé ê pùn; lín beh kap i pîⁿ-pîⁿ tû--khì.

4Lín就知我用chit-ê命令hō͘ lín，thang做我kap利未所立ê約；這是萬軍ê耶和華講ê。Lín chiū chai Góa ēng chit ê bēng-lēng hō͘ lín, thang chòe Góa kap Lī-bī só͘ li̍p ê iok; che sī bān-kun ê Iâ-hô-hoa kóng--ê.

5我kap伊所立ê，是活命kap平安ê約；我將這hō͘伊，hō͘伊驚畏；伊就驚畏我，敬畏我ê名。Góa kap i só͘ li̍p--ê, sī oa̍h-miā kap pêng-an ê iok; Góa chiong che hō͘ i, hō͘ i kiaⁿ-ùi; i chiū kiaⁿ-ùi Góa, kèng-ùi Góa ê miâ.

6真理ê律法tī伊ê嘴內；tī伊ê嘴唇chhē無不義；伊用平安正直kap我同行，hō͘ chōe-chōe人oa̍t-tńg離開pháiⁿ。Chin-lí ê lu̍t-hoat tī i ê chhùi-lāi; tī i ê chhùi-tûn chhē bô put-gī; i ēng pêng-an chèng-ti̍t kap Góa tâng-kiâⁿ, hō͘ chōe-chōe lâng oa̍t-tńg lī-khui pháiⁿ.

7因為祭司ê嘴唇tio̍h存智識，人tio̍h對伊ê嘴請教律法，因為伊是萬軍ê耶和華ê使者。In-ūi chè-si ê chhùi-tûn tio̍h chûn tì-sek, lâng tio̍h tùi i ê chhùi chhéng-kàu lu̍t-hoat, in-ūi i sī bān-kun ê Iâ-hô-hoa ê sù-chiá.

8總是lín有離開hit條路，hō͘ chōe-chōe人tī律法tio̍h-tak；lín敗壞利未ê約；這是萬軍ê耶和華講ê。Chóng-sī lín ū lī-khui hit tiâu lō͘, hō͘ chōe-chōe lâng tī lu̍t-hoat tio̍h-tak; lín pāi-hoāi Lī-bī ê iok; che sī bān-kun ê Iâ-hô-hoa kóng--ê.

9所以我hō͘ lín受眾人看輕，看做下賤；因為lín無守我ê道路，tī律法用偏私款待人。Só͘-í Góa hō͘ lín siū chèng-lâng khòaⁿ-khin, khòaⁿ-chòe hā-chiān; in-ūi lín bô siú Góa ê tō-lō͘, tī lu̍t-hoat ēng phian-su khoán-thāi lâng.

10咱kiám m̄是同一個父mah？Kiám m̄是一位上帝創造咱mah？咱ta̍k人啥事用詭詐款待兄弟，敗壞列祖ê約ah？Lán kiám-m̄-sī tâng chi̍t ê pē mah? Kiám-m̄-sī chi̍t ūi Siōng-tè chhòng-chō lán mah? Lán ta̍k-lâng siáⁿ-sū ēng khúi-chà khoán-thāi hiaⁿ-tī, pāi-hoāi lia̍t-chó͘ ê iok ah?

11猶大行詭詐koh tī以色列kap耶路撒冷ê中間行可惡ê事；因為猶大褻瀆耶和華所疼ê聖所；chhōa服事外邦ê上帝ê cha-bó͘-kiáⁿ做bó͘。Iû-tāi kiâⁿ khúi-chà koh tī Í-sek-lia̍t kap Iâ-lō͘-sat-léng ê tiong-kan kiâⁿ khó-ò͘ⁿ ê sū; in-ūi Iû-tāi siat-to̍k Iâ-hô-hoa só͘ thiàⁿ ê sèng-só͘; chhōa ho̍k-sāi gōa-pang ê siōng-tè ê cha-bó͘-kiáⁿ chòe bó͘.

12行chit號事ê人，願耶和華tùi雅各ê布棚中，除去伊所有ê人，或是醒ê，或是應ê，以及獻禮物hō͘萬軍ê耶和華ê。Kiâⁿ chit-hō sū ê lâng, goān Iâ-hô-hoa tùi Ngá-kok ê pò͘-pîⁿ-tiong, tû-khì i só͘-ū ê lâng, he̍k-sī chhíⁿ--ê, he̍k-sī ìn--ê, í-ki̍p hiàn lé-mi̍h hō͘ bān-kun ê Iâ-hô-hoa--ê.

13Lín koh án-ni做，hō͘目屎啼哭kap吐氣遍滿耶和華ê壇，致到祂無koh看顧禮物，也無歡喜tùi lín ê手接納。Lín koh án-ni chòe, hō͘ ba̍k-sái thî-khàu kap thó͘-khùi piàn-móa Iâ-hô-hoa ê tôaⁿ, tì-kàu I bô koh khòaⁿ-kò͘ lé-mi̍h, iā bô hoaⁿ-hí tùi lín ê chhiú chiap-la̍p.

14Lín iáu-kú講，這是啥事？因為耶和華tī你kap你少年所娶ê bó͘ ê中間做干證；伊雖然是你ê匹配，koh是你盟約ê bó͘，你iáu-kú用詭詐款待伊。Lín iáu-kú kóng, Che sī siáⁿ-sū? In-ūi Iâ-hô-hoa tī lí kap lí siàu-liân só͘ chhōa ê bó͘ ê tiong-kan chòe kan-chèng; i sui-jiân sī lí ê phit-phòe, koh sī lí bêng-iok ê bó͘, lí iáu-kú ēng khúi-chà khoán-thāi i.

15伊ê神雖然有chhun，kiám m̄是造一個mah？啥事只有一個？就是beh求聖ê後裔。所以tio̍h謹守lín ê心，ta̍k人m̄-thang用詭詐款待少年所娶ê bó͘。I ê sîn sui-jiân ū chhun, kiám-m̄-sī chō chi̍t-ê mah? Siáⁿ-sū chí-ū chi̍t-ê? chiū-sī beh kiû sèng ê hō͘-è. Só͘-í tio̍h kín-siú lín ê sim, ta̍k-lâng m̄-thang ēng khúi-chà khoán-thāi siàu-liân só͘ chhōa ê bó͘.

16耶和華以色列ê上帝講，離bó͘ ê事，kap用強暴款待bó͘ ê人，我怨恨伊；所以tio̍h謹慎守lín ê心，m̄-thang行詭詐；這是萬軍ê耶和華講ê。Iâ-hô-hoa Í-sek-lia̍t ê Siōng-tè kóng, Lî-bó͘ ê sū, kap ēng kiông-pō khoán-thāi bó͘ ê lâng, Góa oàn-hūn i; só͘-í tio̍h kín-sīn siú lín ê sim, m̄-thang kiâⁿ khúi-chà; che sī bān-kun ê Iâ-hô-hoa kóng--ê.

17Lín用話刁難耶和華。Lín iáu-kú講，阮用甚麼刁難伊ah？因為lín講，凡若做pháiⁿ-ê，耶和華看伊做好，koh歡喜伊；á是公義ê上帝tī toh-lo̍h ah？Lín ēng ōe thiau-lân Iâ-hô-hoa. Lín iáu-kú kóng, Goán ēng sím-mi̍h thiau-lân I ah? In-ūi lín kóng, Hoān-nā chòe-pháiⁿ--ê, Iâ-hô-hoa khòaⁿ i chòe hó, koh hoaⁿ-hí i; á-sī kong-gī ê Siōng-tè tī toh-lo̍h ah?

1萬軍ê耶和華講，看ah，我差我ê使者，伊beh tī我ê頭前備辦路；lín所chhē ê主，beh忽然到祂ê殿，盟約ê使者，就是lín所欣慕ê，看ah，祂來lah。Bān-kun ê Iâ-hô-hoa kóng, Khòaⁿ ah, Góa chhe Góa ê sù-chiá, i beh tī Góa ê thâu-chêng pī-pān lō͘; lín só͘ chhē ê Chú, beh hut-jiân kàu I ê tiān, bêng-iok ê sù-chiá, chiū-sī lín só͘ him-bō͘--ê, khòaⁿ ah, i lâi lah.

2獨獨祂來ê日，是誰當ōe-khí；祂顯現ê時，是誰 khiā-ōe-tiâu？因為祂親像鍛鍊ê ê火，koh親像漂布ê ê鹼(kiⁿ)。To̍k-to̍k I lâi ê ji̍t, chī-chūi tng-ōe-khí; I hián-hiān ê sî, chī-chūi khiā-ōe-tiâu? In-ūi I chhin-chhiūⁿ thoàn-liān--ê ê hé, koh chhin-chhiūⁿ phiò-pò͘--ê ê kiⁿ.

3祂beh坐teh，親像鍛鍊銀hō͘伊清氣ê，來清氣利未ê kiáⁿ孫，鍛鍊in親像金銀；in就beh憑公義獻禮物hō͘耶和華。I beh chē-teh, chhin-chhiūⁿ thoàn-liān gûn hō͘ i chheng-khì-ê, lâi chheng-khì Lī-bī ê kiáⁿ-sun, thoàn-liān in chhin-chhiūⁿ kim-gûn; in chiū beh pîn kong-gī hiàn lé-mi̍h hō͘ Iâ-hô-hoa.

4Hit時猶大kap耶路撒冷所獻ê禮物，beh得tio̍h耶和華歡喜，親像舊時ê日，古早ê年。Hit-sî Iû-tāi kap Iâ-lō͘-sat-léng só͘ hiàn ê lé-mi̍h, beh tit-tio̍h Iâ-hô-hoa hoaⁿ-hí, chhin-chhiūⁿ kū-sî ê ji̍t, kó͘-chá ê nî.

5萬軍ê耶和華講，我beh臨到lín，來審判；我beh緊緊做干證來指明行邪術ê，行姦淫ê，lām-sám chiù-chōa-ê，虧負做工人ê工錢ê，欺壓寡婦孤兒ê，冤枉出外人ê，kap無驚畏我ê。Bān-kun ê Iâ-hô-hoa kóng, Góa beh lîm-kàu lín, lâi sím-phòaⁿ; Góa beh kín-kín chòe kan-chèng lâi chí-bêng kiâⁿ siâ-su̍t--ê, kiâⁿ kan-îm--ê, lām-sám chiù-chōa--ê, khui-hū chòe-kang lâng ê kang-chîⁿ--ê, khi-ap kóaⁿ-hū ko͘-jî--ê, oan-óng chhut-gōa lâng--ê, kap bô kiaⁿ-ùi Góa--ê.

6因為我耶和華無改換；所以lín雅各ê kiáⁿ無tú-tio̍h滅無。In-ūi Góa Iâ-hô-hoa bô kóe-ōaⁿ; só͘-í lín Ngá-kok ê kiáⁿ bô tú-tio̍h bia̍t-bô.

7萬軍ê耶和華講，Tùi lín列祖ê日以來，lín有違背我ê律例，也無守伊；taⁿ lín tio̍h oa̍t-tńg chhē我，我就oa̍t-tńg chhē lín；總是lín講，阮tio̍h怎樣oa̍t-tńg？Bān-kun ê Iâ-hô-hoa kóng, Tùi lín lia̍t-chó͘ ê ji̍t í-lâi, lín ū ûi-pōe Góa ê lu̍t-lē, iā bô siú i; taⁿ lín tio̍h oa̍t-tńg chhē Góa, Góa chiū oa̍t-tńg chhē lín; chóng-sī lín kóng, Goán tio̍h cháiⁿ-iūⁿ oa̍t-tńg?

8人kiám thang偷the̍h上帝ê物mah？Lín竟然偷the̍h我ê物。總是lín講，阮tī甚麼事偷the̍h你ê物ah？就是tī應該納ê十份一kap禮物。Lâng kiám thang thau-the̍h Siōng-tè ê mi̍h mah? Lín kèng-jiân thau-the̍h Góa ê mi̍h. Chóng-sī lín kóng, Goán tī sím-mi̍h sū thau-the̍h Lí ê mi̍h ah? Chiū-sī tī eng-kai la̍p ê cha̍p-hūn-chi̍t kap lé-mi̍h.

9因為lín thong國ê人，lóng偷the̍h我ê物；所以lín受重ê咒詛。In-ūi lín thong-kok ê lâng, lóng thau-the̍h Góa ê mi̍h; só͘-í lín siū tāng ê chiù-chó͘.

10萬軍ê耶和華講，Lín tio̍h用十份ê一份，完全送入府庫，hō͘我ê厝有米糧；用chit-ê來試我，看我果然kā lín開天ê窗á，piàⁿ福氣hō͘ lín，到無teh thang hē無？Bān-kun ê Iâ-hô-hoa kóng, Lín tio̍h ēng cha̍p-hūn ê chi̍t-hūn, oân-choân sàng-ji̍p hú-khò͘, hō͘ Góa ê chhù ū bí-niû; ēng chit-ê lâi chhì Góa, khòaⁿ Góa kó-jiân kā lín khui thiⁿ ê thang-á, piàⁿ hok-khì hō͘ lín, kàu bô tè(**teh) thang hē bô?

11萬軍ê耶和華講，我beh為lín責備草蜢，無容允伊毀壞土產；lín田裡ê葡萄樹，tī未熟ê事先，也無落粒。Bān-kun ê Iâ-hô-hoa kóng, Góa beh ūi lín chek-pī chháu-meh, bô iông-ún i húi-hoāi thó͘-sán; lín chhân--nih ê phû-tô-chhiū, tī bē se̍k ê tāi-seng, iā bô lak-lia̍p.

12萬軍ê耶和華講，萬國beh稱lín做有福氣ê，因為lín beh做thang歡喜ê地。Bān-kun ê Iâ-hô-hoa kóng, Bān-kok beh chheng lín chòe ū hok-khì--ê, in-ūi lín beh chòe thang hoaⁿ-hí ê tōe.

13耶和華講，lín用硬ê話激我。Lín iáu-kú講，阮用甚麼話激你ah？Iâ-hô-hoa kóng, Lín ēng ngī ê ōe kek Góa. Lín iáu-kú kóng, Goán ēng sím-mi̍h ōe kek Lí ah?

14Lín bat講，服事上帝是空空，阮遵守祂ê命令，tī萬軍ê耶和華面前刻苦來行，有甚麼利益ah？Lín bat kóng, Ho̍k-sāi Siōng-tè sī khang-khang, goán chun-siú I ê bēng-lēng, tī bān-kun ê Iâ-hô-hoa bīn-chêng khek-khó͘ lâi kiâⁿ, ū sím-mi̍h lī-ek ah?

15Taⁿ阮稱驕傲ê人有福氣；亦koh行pháiⁿ ê人得tio̍h建立；in試上帝，iáu-kú得tio̍h救出。Taⁿ goán chheng kiau-ngō͘ ê lâng ū hok-khì; ia̍h koh kiâⁿ-pháiⁿ ê lâng tit-tio̍h kiàn-li̍p; in chhì Siōng-tè, iáu-kú tit-tio̍h kiù-chhut.

16Hit時敬畏耶和華ê人相kap講，耶和華俯耳孔teh聽；koh有記念ê冊寫tī祂ê面前，是為tio̍h敬畏耶和華siàu念祂ê名ê人。Hit-sî kèng-ùi Iâ-hô-hoa ê lâng saⁿ-kap kóng, Iâ-hô-hoa àⁿ hī-khang teh thiaⁿ; koh ū kì-liām ê chheh siá tī I ê bīn-chêng, sī ūi-tio̍h kèng-ùi Iâ-hô-hoa siàu-liām I ê miâ ê lâng.

17萬軍ê耶和華講，Tī我所定tio̍h ê日，in beh歸tī我，做特別ê寶貝；我beh疼惜in，親像人疼惜hit-ê服事伊ê kiáⁿ兒。Bān-kun ê Iâ-hô-hoa kóng, Tī Góa só͘ tiāⁿ-tio̍h ê ji̍t, in beh kui tī Góa, chòe te̍k-pia̍t ê pó-pòe; Góa beh thiàⁿ-sioh in, chhin-chhiūⁿ lâng thiàⁿ-sioh hit-ê ho̍k-sāi i ê kiáⁿ-jî.

18Hit時lín beh koh ōe曉得好人kap pháiⁿ人ê分別，服事上帝ê人kap無服事上帝ê人ê分別。Hit-sî lín beh koh ōe hiáu-tit hó-lâng kap pháiⁿ-lâng ê hun-piat, ho̍k-sāi Siōng-tè ê lâng kap bô ho̍k-sāi Siōng-tè ê lâng ê hun-piat.