1耶穌Koh kā in講，我實在kā lín講，Khiā-tī chia ê有人iáu-bē死，會看見上帝ê國用權能臨到。Iâ-so͘ koh kā in kóng, góa si̍t-chāi kā lín kóng, Khiā-tī chia ê ū lâng iáu-bē sí, ōe khòaⁿ-kìⁿ Siōng-tè ê kok ēng koân-lêng lîm-kàu.

2過六日耶穌帶彼得、雅各、約翰，另外chhōa in peh上高山，kan-ta in kap伊tī-teh；Kè la̍k ji̍t Iâ-so͘ tòa Pí-tek, Ngá-kok, Iok-hān, lēng-gōa chhōa in peh-chiūⁿ koâiⁿ soaⁿ, kan-ta in kap I tī-teh;

3當in ê面前形狀變換，伊ê衫燦爛，極其白，世間漂布ê bōe會hō͘伊白到án-ni。tng in ê bīn-chêng hêng-chōng piàn-ōaⁿ, I ê saⁿ chhàn-lān, ke̍k-kî pe̍h, sè-kan phio-pò͘ ê bōe-ōe hō͘ i pe̍h kàu án-ni.

4有以利亞kap摩西對in顯現，kap耶穌講話。Ū Í-lī-a kap Mô͘-se tùi in hián-hiān, kap Iâ-so͘ kóng ōe.

5彼得對耶穌講，拉比，咱tī chia真好，阮來搭三間寮á，一間hō͘你，一間hō͘摩西，一間hō͘以利亞。Pí-tek tùi Iâ-so͘ kóng, Lia̍p-pí, lán tī chia chin hó, goán lâi tah saⁿ keng liâu-á, chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a.

6是伊m̄知tio̍h怎樣講，因為in真驚。Sī i m̄ chai tio̍h cháiⁿ-iūⁿ kóng, in-ūi in chin kiaⁿ.

7就有雲罩in，koh有聲tùi雲裡出講，chit-ê是我疼ê Kiáⁿ，lín tio̍h聽伊。Chiū ū hûn tà in, koh ū siaⁿ tùi hûn-ni̍h chhut kóng, Chit-ê sī góa thiàⁿ ê Kiáⁿ, lín tio̍h thiaⁿ I.

8In忽然四界看，無看見一人，只有耶穌kap in tī hia nā-tiāⁿ。In hut-jiân sì-kè khòaⁿ, bô khòaⁿ-kìⁿ chi̍t lâng, chí ū Iâ-so͘ kap in tī hia nā-tiāⁿ.

9In落山ê時耶穌禁in講，人子iáu-bē tùi死人中koh活，莫得用所看見ê kā人講。In lo̍h soaⁿ ê sî Iâ-so͘ kìm in kóng, Jîn-chú iáu-bē tùi sí-lâng tiong koh-oa̍h, bo̍h-tit ēng só͘ khòaⁿ-kìⁿ ê kā lâng kóng.

10學生執chit句話，saⁿ-kap議論看tùi死人中koh活，chit句甚麼意思。Ha̍k-seng chip chit kù ōe, saⁿ-kap gī-lūn khòaⁿ tùi sí-lâng tiong koh-oa̍h, chit kù sím-mi̍h ì-sù.

11Koh問耶穌講，經學士講，以利亞tio̍h事先到，是怎樣？Koh mn̄g Iâ-so͘ kóng, Keng-ha̍k-sū kóng, Í-lī-a tio̍h tāi-seng kàu, sī cháiⁿ-iūⁿ?

12伊應講，以利亞果然事先來興起萬項事；koh怎樣記載講，人子tio̍h受chōe-chōe艱苦，hō͘人看輕ah？I ìn kóng, Í-lī-a kó-jiân tāi-seng lâi heng-khí bān hāng sū; koh cháiⁿ-iūⁿ kì-chài kóng, Jîn-chú tio̍h siū chōe-chōe kan-khó͘, hō͘ lâng khòaⁿ-khin ah?

13但是我kā lín講，以利亞已經到，人也chhut-chāi意思款待伊，lóng照所記載指伊ê話。Nā-sī góa kā lín kóng, Í-lī-a í-keng kàu, lâng iā chhut-chāi ì-sù khoán-thāi i, lóng chiàu só͘ kì-chài chí i ê ōe.

14已經到學生ê所在，就看見kui大陣人圍in，也有經學士kap in辯論。Í-keng kàu ha̍k-seng ê só͘-chāi, chiū khòaⁿ-kìⁿ kui tōa tīn lâng ûi in, iā ū keng-ha̍k-sū kap in piān-lūn.

15人看見耶穌liâm-piⁿ大gông-ngia̍h，走來就近伊，kā伊請安。Lâng khòaⁿ-kìⁿ Iâ-so͘ liâm-piⁿ tōa gông-ngia̍h, cháu lâi chiū-kūn I, kā I chhéng-an.

16伊問in講，Lín kap in辯論甚麼？I mn̄g in kóng, Lín kap in piān-lūn sím-mi̍h?

17眾人中一人應伊講，先生，我有chhōa我ê Kiáⁿ到你chia，伊患tio̍h啞口ê神；Chèng lâng tiong chi̍t lâng ìn I kóng, Sian-siⁿ, góa ū chhōa góa ê kiáⁿ kàu lí chia, i hoān-tio̍h é-káu ê sîn;

18無論tī甚麼所在掠伊，就kā伊siak倒；伊就流nōa，咬齒，koh tâ-lâ去；我bat請你ê學生趕伊，也in bōe會。bô lūn tī sím-mi̍h só͘-chāi lia̍h i, chiū kā i siak-tó; i chiū lâu-nōa, kā-khí, koh tâ-lâ-khì; góa bat chhiáⁿ lí ê ha̍k-seng kóaⁿ i, iā in bōe-ōe.

19耶穌應講，Ha應 ah，m̄信ê世代ah，我beh kap lín tòa jōa久ah？我beh吞忍lín jōa久ah？帶伊來就近我。Iâ-so͘ ìn kóng, Hàiⁿ ah, m̄ sìn ê sè-tāi ah, góa beh kap lín tòa jōa kú ah? góa beh thun-lún lín jōa kú ah? Tòa i lâi chiū-kūn góa.

20In就帶伊來。一下看見耶穌，hit-ê鬼liâm-piⁿ hō͘伊大thiu-chhoah，就倒tī土腳翻來翻去流nōa。In chiū tòa i lâi. Chi̍t ē khòaⁿ-kìⁿ Iâ-so͘, hit ê kúi liâm-piⁿ hō͘ i tōa thiu-chhoah, chiū tó tī thô͘-kha hoan-lâi hoan-khì lâu-nōa.

21耶穌問伊ê老父講，伊患tio̍h chit-ê jōa久lah？講，Tùi細漢ê時。Iâ-so͘ mn̄g i ê lāu-pē kóng, I hoān-tio̍h chit-ê jōa kú lah? Kóng, Tùi sòe-hàn ê sî.

22Ta̍uh-ta̍uh將伊hiat落火，hiat落水，beh滅伊。總是你若會做甚麼，tio̍h憐憫來幫贊阮。Ta̍uh-ta̍uh chiong i hiat-lo̍h hé, hiat-lo̍h chúi, beh bia̍t i. Chóng-sī lí nā ōe chòe sím-mi̍h, tio̍h lîn-bín lâi pang-chān goán.

23耶穌kā伊講，怎樣講，你若會ah？有信ê人，ta̍k項lóng會。Iâ-so͘ kā i kóng, Cháiⁿ-iūⁿ kóng, Lí nā ōe ah? ū sìn ê lâng, ta̍k hāng lóng ōe.

24Gín-ná ê老父liâm-piⁿ喉叫講，我信lah；我所信無夠ê，你tio̍h幫贊我。Gín-ná ê lāu-pē liâm-piⁿ âu-kiò kóng, Góa sìn lah; góa só͘ sìn bô kàu ê, lí tio̍h pang-chān góa.

25耶穌看見kui陣人走óa來，就責備hit-ê邪神，kā伊講，你啞口臭耳人ê神ah，我命令你離開chit-ê人，無koh入伊。Iâ-so͘ khòaⁿ-kìⁿ kui tīn lâng cháu-óa lâi, chiū chek-pī hit ê siâ-sîn, kā i kóng, Lí é-káu chhàu-hī-lâng ê sîn ah, góa bēng-lēng lí lī-khui chit ê lâng, bô koh ji̍p i.

26Hit-ê神喉叫，大khiú-la̍k伊，chiah出去；hit-ê gín-ná親像死一樣，致到人khah chōe講，伊已經死。Hit ê sîn âu-kiò, tōa khiú-la̍k i, chiah chhut-khì; hit ê gín-ná chhin-chhiūⁿ sí chi̍t iūⁿ, tì-kàu lâng khah chōe kóng, I í-keng sí.

27但是耶穌牽伊ê手，扶伊起來；伊就起來。Nā-sī Iâ-so͘ khan i ê chhiú, hû i khí-lâi; i chiū khí-lâi.

28入厝，伊ê學生暗靜問伊講，阮bōe趕伊是怎樣？Ji̍p chhù I ê ha̍k-seng àm-chīⁿ mn̄g I kóng, Goán bōe kóaⁿ i sī cháiⁿ-iūⁿ?

29伊kā in講，若m̄是用祈禱，chit類就bōe得伊出。I kā in kóng, Nā m̄ sī ēng kî-tó, chit lūi chiū bōe tit i chhut.

30In tùi hia去經過加利利，耶穌m̄ ài人知。In tùi hia khì keng-kè Ka-lī-lī, Iâ-so͘ m̄ ài lâng chai.

31因為伊教示伊ê學生，kā in講，人子beh受解送tī人ê手，人beh害死伊；害死了後三日beh koh活。In-ūi I kà-sī I ê ha̍k-seng, kā in kóng, Jîn-chú beh siū kè-sàng tī lâng ê chhiú, lâng beh hāi-sí I; hāi-sí liáu-āu saⁿ ji̍t beh koh-oa̍h.

32In bōe曉悟chit-ê話，也m̄敢問伊。In bōe hiáu-ngō͘ chit ê ōe, iā m̄ káⁿ mn̄g I.

33In來到迦百農，耶穌tī厝內問in講，Lín tī路裡議論甚麼？In lâi kàu Ka-pek-lông, Iâ-so͘ tī chhù-lāi mn̄g in kóng, Lín tī lō͘-ni̍h gī-lūn sím-mi̍h?

34學生靜靜，因為tī路裡bat爭論是誰最大。Ha̍k-seng chēng-chēng, in-ūi tī lō͘-ni̍h bat cheng-lūn chī-chūi chòe tōa.

35伊就坐teh，叫十二個學生，kā in講，若ài做事先ê tio̍h做眾人ê路尾，也做眾人ê差用。I chiū chē-teh, kiò cha̍p-jī ê ha̍k-seng, kā in kóng, Nā ài chòe tāi-seng ê tio̍h chòe chèng lâng ê lō͘-bé, iā chòe chèng lâng ê chhe-ēng.

36Koh chhōa一個gín-ná，hō͘伊khiā tī中間，續抱伊；Koh chhōa chi̍t ê gín-ná, hō͘ i khiā tī tiong-kan, sòa phō i;

37kā學生講，見若為tio̍h我ê名接納一個親像chit號ê gín-ná ê，就是接納我；見若接納我ê，m̄是接納我，就是接納差我ê。kā ha̍k-seng kóng, Kìⁿ-nā ūi-tio̍h góa ê miâ chiap-la̍p chi̍t-ê chhin-chhiūⁿ chit hō ê gín-ná ê, chiū-sī chiap-la̍p góa; kìⁿ-nā chiap-la̍p góa ê, m̄ sī chiap-la̍p góa, chiū-sī chiap-la̍p chhe góa ê.

38約翰kā耶穌講，先生，阮bat看見一人用你ê名趕鬼；阮就禁止伊，因為伊無tè咱。Iok-hān kā Iâ-so͘ kóng, Sian-siⁿ, goán bat khòaⁿ-kìⁿ chi̍t lâng ēng lí ê miâ kóaⁿ kúi; goán chiū kìm-chí i, in-ūi i bô tè lán.

39耶穌講，莫得禁伊，因為無有人奉我ê名行權能，也會liâm-piⁿ譭謗我。Iâ-so͘ kóng, Bo̍h-tit kìm i, in-ūi bô ū lâng hōng góa ê miâ kiâⁿ koân-lêng, iā ōe liâm-piⁿ húi-pòng góa.

40見若無攻擊咱ê就是為咱。Kìⁿ-nā bô kong-kek lán ê chiū-sī ūi lán.

41見若因為lín屬基督，就用一杯水hō͘ lín lim ê，我實在kā lín講，伊將來無失落伊ê賞。Kìⁿ-nā in-ūi lín sio̍k Ki-tok, chiū ēng chi̍t poe chúi hō͘ lín lim ê, góa si̍t-chāi kā lín kóng, i chiong-lâi bô sit-lo̍h i ê siúⁿ.

42見若hō͘ chiah-ê信我ê微細ê一個去犯罪，hit人寧可受大石磨縛伊ê頷頸，hiat tī海裡。Kìⁿ-nā hō͘ chiah ê sìn góa ê bî-sòe ê chi̍t-ê khì hoān-chōe, hit lâng lêng-khó͘ siū tōa chio̍h-bō pa̍k i ê ām-kún, hiat tī hái-ni̍h.

43設使你一手致到你犯罪就tio̍h斬斷伊；你寧可破相入tī活，莫得兩手去地獄，入bōe hoa ê火。Siat-sú lí chi̍t chhiú tì-kàu lí hoān-chōe chiū tio̍h chám-tn̄g i; lí lêng-khó͘ phòa-siùⁿ ji̍p tī oa̍h, bo̍h-tit nn̄g chhiú khì tē-ge̍k, ji̍p bōe hoa ê hé.

45設使你一腳致到你犯罪，就tio̍h斬斷伊；你寧可跛腳入活，莫得兩腳受hiat落地獄。Siat-sú lí chi̍t kha tì-kàu lí hoān-chōe, chiū tio̍h chám-tn̄g i; lí lêng-khó͘ pái-kha ji̍p oa̍h, bo̍h-tit nn̄g kha siū hiat-lo̍h tē-ge̍k.

47設使你一目致到你犯罪，就tioh削去；你寧可一目入tī上帝ê國，莫得兩目hiat落地獄；Siat-sú lí chi̍t ba̍k tì-kàu lí hoān-chōe, chiū tio̍h iah-khì; lí lêng-khó͘ chi̍t ba̍k ji̍p tī Siōng-tè ê kok, bo̍h-tit nn̄g ba̍k hiat-lo̍h tē-ge̍k;

48tī hia in ê蟲無死，火無hoa。tī hia in ê thâng bô sí, hé bô hoa.

49因為ta̍k人beh用火來sīⁿ伊。In-ūi ta̍k lâng beh ēng hé lâi sīⁿ i.

50鹽是好；鹽若失落伊ê 鹹，beh用甚麼來復到伊ê味？Lín ê內面應該tio̍h有鹽；也大家tio̍h saⁿ和好。Iâm sī hó; iâm nā sit-lo̍h i ê kiâm, beh ēng sím-mi̍h lâi ho̍k-tò i ê bī? Lín ê lāi-bīn eng-kai tio̍h ū iâm; iā tāi-ke tio̍h saⁿ hô-hó.

1耶穌tùi hia起身到猶太ê地界，到約旦河外；chōe-chōe陣 ê人koh聚集就近伊；伊照常koh教示in。Iâ-so͘ tùi hia khí-sin kàu Iû-thài ê tōe-kài, kàu Iok-tàn hô gōa; chōe-chōe tīn ê lâng koh chū-chi̍p chiū-kūn I; I chiàu siông koh kà-sī in.

2有法利賽人就近伊，問講，人離出伊ê bó͘，thang mah？是teh試伊。Ū Hoat-lī-sài lâng chiū-kūn I, mn̄g kóng, Lâng lî-chhut i ê bó͘, thang mah? sī teh chhì I.

3耶穌應講，摩西命令lín怎樣？Iâ-so͘ ìn kóng, Mô͘-se bēng-lēng lín cháiⁿ-iūⁿ?

4In講，摩西准人寫離書，來離伊。In kóng, Mô͘-se chún lâng siá lî-chu, lâi lî i.

5但是耶穌kā in講，摩西因為lín ê心硬，chiah寫chit-ê命令hō͘ lín；Nā-sī Iâ-so͘ kā in kóng, Mô͘-se in-ūi lín ê sim ngī, chiah siá chit ê bēng-lēng hō͘ lín;

6總是tùi造化ê起頭，主創造in有男有女。chóng-sī tùi chō-hòa ê khí-thâu, Chú chhòng-chō in ū lâm ū lú.

7因為án-ni人beh離開父母，結聯伊ê bó͘，兩個beh成做一體；In-ūi án-ni lâng beh lī-khui pē-bú, kiat-liân i ê bó͘, nn̄g ê beh chiâⁿ-chòe chi̍t thé;

8親像án-ni，無做兩個，是做一體。Chhin-chhiūⁿ án-ni, bô chòe nn̄g ê, sī chòe chi̍t thé.

9所以上帝所配合ê，人m̄-thang分開伊。Só͘-í Siōng-tè só͘ phòe-ha̍p ê, lâng m̄ thang pun-khui i.

10入厝學生koh將chit-ê tāi-chì問伊。Ji̍p chhù ha̍k-seng koh chiong chit ê tāi-chì mn̄g I.

11伊kā in講，凡若離出伊ê bó͘來娶別ê ê，是行姦淫來辜負伊；I kā in kóng, Hoān-nā lî-chhut i ê bó͘ lâi chhōa pa̍t-ê ê, sī kiâⁿ kan-îm lâi ko͘-hū i;

12bó͘若棄sak伊ê丈夫來嫁別ê，也是行姦淫。bó͘ nā khì-sak i ê tiōng-hu lâi kè pa̍t-ê, iā sī kiâⁿ kan-îm.

13有人帶細kiáⁿ就近耶穌beh hō͘伊摸in；學生責備in。Ū lâng tòa sòe-kiáⁿ chiū-kūn Iâ-so͘ beh hō͘ I bong in; ha̍k-seng chek-pī in.

14耶穌看見án-ni，大無歡喜，kā學生講，容允細kiáⁿ就近我，莫得禁in；因為上帝ê國是chit號人ê。Iâ-so͘ khòaⁿ-kìⁿ án-ni, tōa bô hoaⁿ-hí, kā ha̍k-seng kóng, Iông-ún sòe-kiáⁿ chiū-kūn góa, bo̍h-tit kìm in; in-ūi Siōng-tè ê kok sī chit hō lâng ê.

15我實在kā lín講，凡若承接上帝ê國無親像細kiáⁿ ê，決斷bōe得入去。Góa si̍t-chāi kā lín kóng, Hoān-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-toàn bōe tit ji̍p-khì.

16就抱in，kā in hōaⁿ手，祝福in。Chiū phō in, kā in hōaⁿ chhiú, chiok-hok in.

17耶穌出去tī路裡，有一人走進前來跪伊，問講，好ê先生ah，我tio̍h怎樣做，chiah thang承接永活？Iâ-so͘ chhut-khì tī lō͘-ni̍h, ū chi̍t lâng cháu chìn-chêng lâi kūi I, mn̄g kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-oa̍h?

18耶穌kā伊講，你啥事稱呼我是好ah？無一個好，獨獨上帝nā-tiāⁿ。Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chi̍t-ê hó, to̍k-to̍k Siōng-tè nā-tiāⁿ.

19Chiah-ê誡你已經知，莫得thâi死人，莫得姦淫，莫得偷the̍h，莫得lām-sám做干證，莫得刻虧人，Tio̍h敬你ê父母。Chiah ê kài lí í-keng chai, Bo̍h-tit thâi-sí lâng, Bo̍h-tit kan-îm, Bo̍h-tit thau-the̍h, Bo̍h-tit lām-sám chòe kan-chèng, Bo̍h-tit khek-khui lâng, Tio̍h kèng lí ê pē-bú.

20伊應講，先生ah，chiah-ê我tùi細漢lóng守伊。I ìn kóng, Sian-siⁿ ah, chiah-ê góa tùi sòe-hàn lóng siú i.

21耶穌看伊，疼伊，就kā伊講，你iáu欠一項；tio̍h去賣你凡所有ê，來hō͘ sòng-hiong人，就beh有財寶tī天裡，koh來tè我。Iâ-so͘ khòaⁿ i, thiàⁿ i, chiū kā i kóng, Lí iáu khiàm chi̍t hāng; tio̍h khì bōe lī hoān só͘ ū ê, lâi hō͘ sòng-hiong lâng, chiū beh ū châi-pó tī thiⁿ-ni̍h, koh lâi tè góa.

22伊聽chit-ê話，面就失色，憂悶就去。因為伊產業真chōe。I thiaⁿ chit ê ōe, bīn chiū sit-sek, iu-būn chiū khì. In-ūi i sán-gia̍p chin chōe.

23耶穌四界看，kā伊ê學生講，富人入上帝ê國oh---ah。Iâ-so͘ sì-kè khòaⁿ, kā I ê ha̍k-seng kóng, Pù lâng ji̍p Siōng-tè ê kok oh---ah.

24學生奇怪伊ê話；耶穌koh應講，細kiáⁿ ah，óa靠錢財ê人入上帝ê國oh--ah。Ha̍k-seng kî-koài I ê ōe; Iâ-so͘ koh ìn kóng, Sòe-kiáⁿ ah, óa-khò chîⁿ-châi ê lâng ji̍p Siōng-tè ê kok oh--ah.

25駱駝穿過針鼻比富人入上帝ê國iáu khah快。Lo̍k-tô chhng-kè chiam-phīⁿ pí pù lâng ji̍p Siōng-tè ê kok iáu khah khoài.

26學生益發gông-ngia̍h，kā伊講，Án-ni 是誰會得tio̍h救ah？Ha̍k-seng it-hoat gông-ngia̍h, kā I kóng, Án-ni chī-chūi ōe tit-tio̍h kiù ah?

27耶穌看in講，在人是bōe會，在上帝就m̄是án-ni；因為在上帝萬事lóng會。Iâ-so͘ khòaⁿ in kóng, Chāi lâng sī bōe-ōe, chāi Siōng-tè chiū m̄ sī án-ni; in-ūi chāi Siōng-tè bān sū lóng ōe.

28彼得就kā伊講，阮bat放sak一切來tè你。Pí-tek chiū kā I kóng, Goán bat pàng-sak it-chhè lâi tè lí.

29耶穌講，我實在kā lín講，無有人為tio̍h我kap福音ê緣故放sak厝宅、兄弟、姊妹、老母、老父、kiáⁿ兒、田園，Iâ-so͘ kóng, Góa si̍t-chāi kā lín kóng, Bô ū lâng ūi-tio̍h góa kap hok-im ê iân-kò͘ pàng-sak chhù-the̍h, hiaⁿ-tī, chí-bē, lāu-bú, lāu-pē, kiáⁿ-jî, chhân-hn̂g,

30就tī現時無得tio̍h百倍，就是厝宅、兄弟、姊妹、母親、kiáⁿ兒、田園，kiám有khún-tio̍k，koh tī來世beh得tio̍h永活。chiū tī hiān-sî bô tit-tio̍h pah pē, chiū-sī chhù-the̍h, hiaⁿ-tī, chí-bē, bú-chhin, kiáⁿ-jî, chhân-hn̂g, kiam ū khún-tio̍k, koh tī lâi-sè beh tit-tio̍h éng-oa̍h.

31總是事先ê chōe-chōe beh做路尾，路尾ê也beh做事先。Chóng-sī tāi-seng ê chōe-chōe beh chòe lō͘-bé, lō͘-bé ê iā beh chòe tāi-seng.

32In上耶路撒冷，tī路裡耶穌行tī頭前，學生gông-ngia̍h，tè ê人驚惶。耶穌koh帶十二個學生，將伊所beh tú-tio̍h ê事kā in講，In chiūⁿ Iâ-lō͘-sat-léng, tī lō͘-ni̍h Iâ-so͘ kiâⁿ tī thâu-chêng, ha̍k-seng gông-ngia̍h, tè ê lâng kiaⁿ-hiâⁿ. Iâ-so͘ koh tòa cha̍p-jī ê ha̍k-seng, chiong I só͘ beh tú-tio̍h ê sū kā in kóng,

33Taⁿ咱上耶路撒冷，人子beh受解送hō͘ chiah-ê祭司頭，kap經學士；jn beh擬伊死罪，也beh 解送伊hō͘外邦人；Taⁿ lán chiūⁿ Iâ-lō͘-sat-léng, Jîn-chú beh siū kè-sàng hō͘ chiah ê chè-si-thâu, kap keng-ha̍k-sū; in beh gí I sí-chōe, iā beh kè-sàng I hō͘ gōa-pang-lâng;

34jn beh戲弄伊，phùi-nōa伊，鞭phah伊，害死伊；過三日伊beh koh活。in beh hì-lāng I, phùi-nōa I, piⁿ-phah I, hāi-sí I; kè saⁿ ji̍t I beh koh-oa̍h.

35西庇太ê Kiáⁿ雅各kap約翰就近來kā伊講，先生ah，見若阮所對你求ê，ài你kā阮行伊。Se-pí-thài ê kiáⁿ Ngá-kok kap Iok-hān chiū-kūn lâi kā I kóng, Sian-siⁿ ah, kìⁿ-nā goán só͘ tùi lí kiû ê, ài lí kā goán kiâⁿ i.

36伊就kā in講，Ài我kā lín行甚麼ah？I chiū kā in kóng, Ài góa kā lín kiâⁿ sím-mi̍h ah?

37In kā伊講，准阮tī你ê榮光，一個坐你ê chiàⁿ-pêng，一個坐你ê tò-pêng。In kā I kóng, Chún goán tī lí ê êng-kng, chi̍t-ê chē lí ê chiàⁿ-pêng, chi̍t-ê chē lí ê tò-pêng.

38但是耶穌kā in講，Lín所求ê，lín m̄知。我所lim ê杯，lín會lim mah？我所受ê洗，lín會受mah？Nā-sī Iâ-so͘ kā in kóng, Lín só͘ kiû ê, lín m̄ chai. Góa só͘ lim ê poe , lín ōe lim mah? góa só͘ siū ê sóe, lín ōe siū mah?

39In講會。伊kā in講，我所lim ê杯，lín beh lim伊，我所受ê洗，lín beh受伊；In kóng, Ōe. I kā in kóng, Góa só͘ lim ê poe, lín beh lim i, góa só͘ siū ê sóe, lín beh siū i;

40總是坐我ê chiàⁿ-pêng tò-pêng m̄是我會thang hō͘人，獨獨為tio̍h甚麼人備辦ê就hō͘伊。chóng-sī chē góa ê chiàⁿ-pêng tò-pêng m̄ sī góa ōe thang hō͘ lâng, to̍k-to̍k ūi-tio̍h sím-mi̍h lâng pī-pān ê chiū hō͘ i.

41十個學生聽見，就受氣雅各kap約翰。Cha̍p-ê ha̍k-seng thiaⁿ-kìⁿ, chiū siū-khì Ngá-kok kap Iok-hān.

42耶穌叫in來kā in講，Lín知外邦所尊做人君ê做主來治理in，in ê大人管轄in。Iâ-so͘ kiò in lâi kā in kóng, Lín chai gōa-pang só͘ chun chòe jîn-kun ê chòe chú lâi tī-lí in, in ê tāi-jîn koán-hat in.

43獨獨lín中間m̄是án-ni；lín中間ài做大ê beh做lín ê差用；To̍k-to̍k lín tiong-kan m̄ sī án-ni; lín tiong-kan ài chòe tōa ê beh chòe lín ê chhe-ēng;

44lín中間ài做頭ê beh做眾人ê奴僕。lín tiong-kan ài chòe thâu ê beh chòe chèng lâng ê lô͘-po̍k.

45因為人子到m̄是beh差用人，是beh hō͘人差用，koh獻伊ê性命來贖回chōe-chōe人。In-ūi Jîn-chú kàu m̄ sī beh chhe-ēng lâng, sī beh hō͘ lâng chhe-ēng, koh hiàn I ê sìⁿ-miā lâi sio̍k-hôe chōe-chōe lâng.

46In到耶利哥；耶穌kap伊ê學生kap大陣人出耶利哥ê時，有Tí-mái ê Kiáⁿ，巴底買，就是chhiⁿ-mî做乞食ê，坐tī路邊；In kàu Iâ-lī-ko; Iâ-so͘ kap I ê ha̍k-seng kap tōa tīn lâng chhut Iâ-lī-ko ê sî, ū Tí-mái ê kiáⁿ, Pa-tí-mái, chiū-sī chhiⁿ-mî chòe khit-chia̍h ê, chē tī lō͘-piⁿ;

47已經聽見是拿撒勒人耶穌，就喉叫講，大衛ê後裔，耶穌，可憐我。í-keng thiaⁿ-kìⁿ sī Ná-sat-le̍k lâng Iâ-so͘, chiū âu-kiò kóng, Tāi-pi̍t ê hō͘-è, Iâ-so͘, khó-lîn góa.

48Chōe-chōe人責備伊，kah伊靜靜；但是伊益發大聲喉叫講，大衛ê後裔ah，可憐我。Chōe-chōe lâng chek-pī i, kah i chēng-chēng; nā-sī i it-hoat tōa siaⁿ âu-kiò kóng, Tāi-pi̍t ê hō͘-è ah, khó-lîn góa.

49耶穌停腳講，叫伊來。就叫chhiⁿ-mî人，kā伊講，安你ê心，起來，伊teh叫你ah。Iâ-so͘ thêng-kha kóng, Kiò i lâi. Chiū kiò chhiⁿ-mî lâng, kā i kóng, An lí ê sim, khí-lâi, I teh kiò lí ah.

50伊就放sak伊ê衫，跳起來去就近耶穌。I chiū pàng-sak i ê saⁿ, thiàu-khí-lâi khì chiū-kūn Iâ-so͘.

51耶穌應伊講，Ài我kā你做甚麼？Chhiⁿ-mî人kā伊講，Lia̍p-pho-nî，我ài得tio̍h看見。Iâ-so͘ ìn i kóng, Ài góa kā lí chòe sím-mi̍h? Chhiⁿ-mî lâng kā I kóng, Lia̍p-pho-nî, góa ài tit-tio̍h khòaⁿ-kìⁿ.

52耶穌kā伊講，去ah，你ê信有救你lah。伊liâm-piⁿ得tio̍h看見，就tī路裡tè耶穌。Iâ-so͘ kā i kóng, Khì ah, lí ê sìn ū kiù lí lah. I liâm-piⁿ tit-tio̍h khòaⁿ-kìⁿ, chiū tī lō͘-ni̍h tè Iâ-so͘.

1In行近耶路撒冷，到橄欖山邊ê Pek-hoat-kî kap伯大尼ê時，In kiâⁿ kūn Iâ-lō͘-sat-léng, kàu Kaⁿ-ná soaⁿ-piⁿ ê Pek-hoat-kî kap Pek-tāi-nî ê sî,

2耶穌差兩個學生，kā in講，Lín去對面ê鄉社，已經入去就beh tú-tio̍h一隻驢á縛tī hia，iáu-bē bat有人騎ê；tháu開kā伊牽來。Iâ-so͘ chhe nn̄g ê ha̍k-seng, kā in kóng, Lín khì tùi-bīn ê hiuⁿ-siā, í-keng ji̍p-khì chiū beh tú-tio̍h chi̍t chiah lû-á pa̍k tī hia, iáu-bē bat ū lâng khiâ ê; tháu-khui kā i khan lâi.

3若有人問lín講，啥事做án-ni？lín就tio̍h講，主欠用伊；liâm-pjn beh hō͘伊tò來chia。Nā ū lâng mn̄g lín kóng, Siáⁿ-sū chòe án-ni? lín chiū tio̍h kóng, Chú khiàm-ēng i; liâm-piⁿ beh hō͘ i tò-lâi chia.

4兩人就去，tú-tio̍h一隻驢á，tī路裡ê oat角，縛tī門外，就tháu伊。Nn̄g lâng chiū khì, tú-tio̍h chi̍t chiah lû-á, tī lō͘-ni̍h ê oat-kak, pa̍k tī mn̂g-gōa, chiū tháu i.

5邊頭khiā ê人有ê講，Lín tháu驢á beh啥事？Piⁿ-thâu khiā ê lâng ū-ê kóng, Lín tháu lû-á beh siáⁿ-sū?

6In照耶穌所講ê kā in講；hiah-ê人就放hō͘伊去。In chiàu Iâ-so͘ só͘ kóng ê kā in kóng; hiah ê lâng chiū pàng hō͘ i khì.

7In就牽驢á就近耶穌，續用家己ê衫phoa̍h tī hit頂面；耶穌就騎伊。In chiū khan lû-á chiū-kūn Iâ-so͘, sòa ēng ka-kī ê saⁿ phoa̍h tī hit téng-bīn; Iâ-so͘ chiū khiâ i.

8有chōe-chōe人用in ê衫鋪tī路裡；也有ê用樹枝，就是tùi園裡所chhò來ê。Ū chōe-chōe lâng ēng in ê saⁿ pho͘ tī lō͘-ni̍h; iā ū-ê ēng chhiū-ki, chiū-sī tùi hn̂g-ni̍h só͘ chhò lâi ê.

9前行後tè ê叫講，和散那，tī主ê名來ê，應該得tio̍h o-ló；Chêng kiâⁿ āu tè ê kiò kóng, Hô-sàn-ná, tī Chú ê miâ lâi ê, eng-kai tit-tio̍h o-ló;

10hit-ê teh-beh來ê國，就是咱ê祖公大衛ê國，應該得tio̍h o-ló ah；tī至koânê位ah，和散那。hit-ê teh-beh lâi ê kok, chiū-sī lán ê chó͘-kong Tāi-pi̍t ê kok, eng-kai tit-tio̍h o-ló ah; tī chì-koâiⁿ ê ūi ah, Hô-sàn-ná.

11耶穌入耶路撒冷，入殿堂；四界看ta̍k項ê物；日已經暗，就kap十二個學生出去到伯大尼。Iâ-so͘ ji̍p Iâ-lō͘-sat-léng, ji̍p tiān-tn̂g; sì-kè khòaⁿ ta̍k hāng ê mi̍h; ji̍t í-keng àm, chiū kap cha̍p-jī ê ha̍k-seng chhut-khì kàu Pek-tāi-nî.

12隔日，in tùi伯大尼出來，耶穌iau。Keh ji̍t, in tùi Pek-tāi-nî chhut-lâi, Iâ-so͘ iau.

13遠遠看見一叢無花果樹有葉，就去看tī hit頂面有所得tio̍h無；已經到，竟然無所得tio̍h，只有葉nā-tiāⁿ；因為m̄是無花果ê時；Hn̄g-hn̄g khòaⁿ-kìⁿ chi̍t châng bû-hoa-kó chhiū ū hio̍h, chiū khì khòaⁿ tī hit téng-bīn ū só͘ tit-tio̍h bô; í-keng kàu, kèng-jiân bô só͘ tit-tio̍h, chí ū hio̍h nā-tiāⁿ; in-ūi m̄ sī bû-hoa-kó ê sî;

14就tùi hit叢樹講，Taⁿ了後永永無人食tio̍h你ê果子。伊ê學生也聽見。chiū tùi hit châng chhiū kóng, Taⁿ liáu-āu éng-éng bô lâng chia̍h-tio̍h lí ê ké-chí. I ê ha̍k-seng iā thiaⁿ-kìⁿ.

15In到耶路撒冷，耶穌入殿；就趕出殿內買賣ê人，chhia-tó換錢ê人ê 桌，kap賣鴿á ê人ê椅；In kàu Iâ-lō͘-sat-léng, Iâ-so͘ ji̍p tiān; chiū kóaⁿ-chhut tiān-lāi bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í;

16續m̄准人帶器具tùi殿裡經過。sòa m̄ chún lâng tòa khì-kū tùi tiān-ni̍h keng-kè.

17Koh教示in講，Kiám無記載講，我ê厝beh稱做萬邦祈禱ê厝mah？但是lín hō͘伊做賊巢。Koh kà-sī in kóng, Kiám bô kì-chài kóng, Góa ê chhù beh chheng chòe bān pang kî-tó ê chhù mah? nā-sī lín hō͘ i chòe chha̍t-siū.

18Chiah-ê祭司頭kap經學士聽見，就chhē看thang怎樣來滅伊，因為驚伊；是眾人lóng奇怪伊ê教示。Chiah ê chè-si-thâu kap keng-ha̍k-sū thiaⁿ-kìⁿ, chiū chhē-khòaⁿ thang cháiⁿ-iūⁿ lâi bia̍t I, in-ūi kiaⁿ I; sī chèng lâng lóng kî-koài I ê kà-sī.

19Ta̍k ê-hng耶穌出城去。Ta̍k ê-hng Iâ-so͘ chhut siâⁿ khì.

20早起時，in tùi hia經過，就看見hit叢無花果樹根枝lóng枯焦去。Chá-khí sî in tùi hia keng-kè, chiū khòaⁿ-kìⁿ hit châng bû-hoa-kó chhiū kun-ki lóng ko͘-tâ-khì.

21彼得記得就kā伊講，拉比，你看，你所咒詛 ê無花果樹已經乾去。Pí-tek kì-tit chiū kā I kóng, Lia̍p-pí, lí khòaⁿ, lí só͘ chiù-chó͘ ê bû-hoa-kó chhiū í-keng ta-khì.

22耶穌應講，Lín tio̍h信上帝。Iâ-so͘ ìn kóng, Lín tio̍h sìn Siōng-tè.

23我實在kā lín講，凡若kā chit-ê山講，徙去，hiat tī海裡，心內無僥疑，獨獨信伊所講ê的確成，就beh kā伊成。Góa si̍t-chāi kā lín kóng, Hoān-nā kā chit ê soaⁿ kóng, Sóa-khì, hiat tī hái-ni̍h, sim-lāi bô giâu-gî, to̍k-to̍k sìn i só͘ kóng ê tek-khak chiâⁿ, chiū beh kā i chiâⁿ.

24所以我kā lín講，見若lín所祈禱來求ê，tio̍h信是已經得tio̍h，就beh kā lín成。Só͘-í góa kā lín kóng, Kìⁿ-nā lín só͘ kî-tó lâi kiû ê, tio̍h sìn sī í-keng tit-tio̍h, chiū beh kā lín chiâⁿ.

25見若Lín khiā-teh祈禱ê時想tio̍h有人得罪你甚麼，就tio̍h赦免伊；hō͘ lín tī天裡ê父也赦免lín ê過失。Kìⁿ-nā lín khiā-teh kî-tó ê sî siūⁿ-tio̍h ū lâng tek-chōe lí sím-mi̍h, chiū tio̍h sià-bián i; hō͘ lín tī thiⁿ-ni̍h ê Pē iā siá-bián lín ê kè-sit.

27In koh到耶路撒冷；耶穌tī殿內teh行ê時，hiah-ê祭司頭經學士kap長老就近伊講，In koh kàu Iâ-lō͘-sat-léng; Iâ-so͘ tī tiān-lāi teh kiâⁿ ê sî, hiah ê chè-si-thâu keng-ha̍k-sū kap tiúⁿ-ló chiū-kūn I kóng,

28你用甚麼權行chiah-ê事？koh 是誰 hō͘你chit-ê 權thang行伊ah？Lí ēng sím-mi̍h koân kiâⁿ chiah ê sū? koh chī-chūi hō͘ lí chit ê koân thang kiâⁿ i ah?

29耶穌就kā in講，我也問lín一句話；lín若應我，我chiah beh kā lín講我用甚麼權行chiah-ê事。Iâ-so͘ chiū kā in kóng, Góa iā mn̄g lín chi̍t kù ōe; lín nā ìn góa, góa chiah beh kā lín kóng góa ēng sím-mi̍h koân kiâⁿ chiah ê sū.

30約翰ê洗禮是tùi天á是tùi人ah？lín tio̍h應我。Iok-hān ê sóe-lé sī tùi thiⁿ á-sī tùi lâng ah? lín tio̍h ìn góa.

31In saⁿ-kap議論講，若講，Tùi天，伊beh講，Án-ni lín啥事m̄信伊？In saⁿ-kap gī-lūn kóng, Nā kóng, Tùi thiⁿ, I beh kóng, Án-ni lín siáⁿ-sū m̄ sìn i?

32若講，Tùi人，—in就kiaⁿ百姓，因為眾人實在掠約翰做先知。Nā kóng, Tùi lâng,—in chiū kiaⁿ peh-sìⁿ, in-ūi chèng lâng si̍t-chāi lia̍h Iok-hān chòe sian-ti.

33就應耶穌講，阮m̄知。耶穌就kā in講，我也無beh kā lín講我是用甚麼權行chiah-ê事。Chiū ìn Iâ-so͘ kóng, Goán m̄ chai. Iâ-so͘ chiū kā in kóng, Góa iā bô beh kā lín kóng góa sī ēng sím-mi̍h koân kiâⁿ chiah ê sū.