1耶穌就用譬喻tùi in講，有一人知葡萄園，用籬笆圍伊，開一孔來做酒窟，起一座守更樓，租hō͘佃戶，就去別所在。Iâ-so͘ chiū ēng phì-jū tùi in kóng, Ū chi̍t lâng chai phû-tô-hn̂g, ēng lî-pa ûi i, khui chi̍t khang lâi chòe chiú-khut, khí chi̍t chō chiú-kiⁿ-lâu, cho͘ hō͘ tiān-hō͘, chiū khì pa̍t só͘-chāi.

2到期差一個奴僕就近佃戶，beh tùi佃戶收園內ê果子。Kàu kî chhe chi̍t ê lô͘-po̍k chiū-kūn tiān-hō͘, beh tùi tiān-hō͘ siu hn̂g-lāi ê ké-chí.

3佃戶掠來phah伊，hō͘伊空空tò去。Tiān-hō͘ lia̍h lâi phah i, hō͘ i khang-khang tò-khì.

4Koh差別個奴僕就近in，佃戶傷伊ê頭殼，koh凌辱伊。Koh chhe pa̍t ê lô͘-po̍k chiū-kūn in, tiān-hō͘ siong i ê thâu-khak, koh lêng-jio̍k i.

5Koh差別個奴僕，in就thâi死伊。Koh差chōe-chōe奴僕，有ê hō͘ in phah，也有ê hō͘ in thâi死。Koh chhe pa̍t ê lô͘-po̍k, in chiū thâi-sí i. Koh chhe chōe-chōe lô͘-po̍k, ū-ê hō͘ in phah, iā ū-ê hō͘ in thâi-sí.

6伊iáu有一個，是伊所疼ê Kiáⁿ，路尾也差伊就近in；phah算講，In beh尊敬我ê Kiáⁿ。I iáu ū chi̍t-ê, sī i só͘ thiàⁿ ê kiáⁿ, lō͘-bé iā chhe i chiū-kūn in; phah-sǹg kóng, In beh chun-kèng góa ê kiáⁿ.

7但是chiah-ê佃戶saⁿ-kap講，chit-ê是伊ê後嗣；咱來kā伊thâi死，業就歸咱。Nā-sī chiah ê tiān-hō͘ saⁿ-kap kóng, chit-ê sī i ê hō͘-sû; lán lâi kā i thâi-sí, gia̍p chiū kui lán.

8就掠來kā伊害死，將伊hiat tī葡萄園外。Chiū lia̍h lâi kā i hāi-sí, chiong i hiat tī phû-tô-hn̂g gōa.

9Án-ni園主beh怎樣做 ah？伊beh來滅chiah-ê佃戶，將伊ê園交代別人。Án-ni hn̂g-chú beh cháiⁿ-iūⁿ chòe ah? I beh lâi bia̍t chiah ê tiān-hō͘, chiong i ê hn̂g kau-tāi pa̍t lâng.

10聖經所記載講， 師傅所棄sak ê石， 成做厝角頭ê石；Sèng-keng só͘ kì-chài kóng, Sai-hū só͘ khì-sak ê chio̍h, Chiâⁿ chòe chhù-kak thâu ê chio̍h;

11這是主所成ê， 咱ê目睭看做奇怪，Che sī Chú só͘ chiâⁿ ê, Lán ê ba̍k-chiu khòaⁿ chòe kî-koài,

12Lín kiám bē讀mah？Hiah-ê人知chit-ê譬喻是指in來講，就ài beh掠伊，總是驚眾人。就離開伊去。Lín kiám bē tha̍k mah? Hiah ê lâng chai chit ê phì-jū sī chí in lâi kóng, chiū ài beh lia̍h I, chóng-sī kiaⁿ chèng lâng. Chiū lī-khui I khì.

13後來差法利賽kap希律黨kúi-nā人就近伊，ài就伊所講ê話來tng伊。Āu-lâi chhe Hoat-lī-sài kap Hi-lu̍t tóng kúi-nā lâng chiū-kūn I, ài chiū I só͘ kóng ê ōe lâi tng I.

14已經到，kā伊講，先生ah，阮知你是真實，也無掠甚麼人做要緊，因為你無看人ê外貌，就是真實將上帝ê路來教示人；Í-keng kàu, kā I kóng, Sian-siⁿ ah, goán chai lí sī chin-si̍t, iā bô lia̍h sím-mi̍h lâng chòe iàu-kín, in-ūi lí bô khòaⁿ lâng ê gōa-māu, chiū-sī chin-si̍t chiong Siōng-tè ê lō͘ lâi kà-sī lâng;

15納稅hō͘該撒合宜，á無？阮tio̍h納á m̄免？但是耶穌知in ê假好，就kā in講，Lín啥事試我ah？The̍h一個銀á hō͘我看。La̍p sè hō͘ Kai-sat ha̍p-gî, á bô? Goán tio̍h la̍p á m̄ bián? Nā-sī Iâ-so͘ chai in ê ké-hó, chiū kā in kóng, Lín siáⁿ-sū chhì góa ah? The̍h chi̍t ê gûn-á hō͘ góa khòaⁿ.

16In就the̍h來。耶穌kā in講，Chit-ê像kap號是是誰？In chiū the̍h-lâi. Iâ-so͘ kā in kóng, Chit ê siōng kap hō sī chī-chūi?

17In kā伊講，該撒。耶穌kā in講，Lín tio̍h將該撒ê物納 hō͘該撒，將上帝ê物納 hō͘上帝。In大奇怪伊。In kā I kóng, Kai-sat. Iâ-so͘ kā in kóng, Lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè. In tōa kî-koài I.

18有撒都該人，就是講人無koh活ê，就近伊，Ū Sat-thó͘-kai lâng, chiū-sī kóng lâng bô koh-oa̍h ê, chiū-kūn I,

19問講，先生ah，摩西寫來指示阮講，若有人伊ê兄死，留伊ê bó͘ tī-teh，也無留kiáⁿ，伊ê小弟tio̍h chhōa伊ê bó͘，生kiáⁿ來續接伊ê兄。mn̄g kóng, Sian-siⁿ ah, Mô͘-se siá lâi chí-sī goán kóng, nā ū lâng i ê hiaⁿ sí, lâu i ê bó͘ tī-teh, iā bô lâu kiáⁿ, i ê sió-tī tio̍h chhōa i ê bó͘, siⁿ kiáⁿ lâi sòa-chiap i ê hiaⁿ.

20有兄弟七人，大ê娶bó͘，死也無留kiáⁿ。Ū hiaⁿ-tī chhit lâng, tōa-ê chhōa bó͘, sí iā bô lâu kiáⁿ.

21第二ê娶伊，也無留kiáⁿ，就死；第三ê也是án-ni。Tē jī ê chhōa i, iā bô lâu kiáⁿ, chiū sí; tē saⁿ ê iā sī án-ni.

22In七人lóng無留kiáⁿ。到路尾，婦人人也死。In chhit lâng lóng bô lâu kiáⁿ. Kàu lō͘-bé, hū-jîn-lâng iā sí.

23到koh活ê時伊beh做in中間tá-lo̍h一個ê bó͘；因為chit七人lóng有娶伊。Kàu koh-oa̍h ê sî i beh chòe in tiong-kan tá-lo̍h chi̍t-ê ê bó͘; in-ūi chí chhit lâng lóng ū chhōa i.

24耶穌kā in講，Lín ê 錯kiám m̄是tùi m̄-bat聖經kap上帝ê 權mah？Iâ-so͘ kā in kóng, Lín ê chhò kiám m̄ sī tùi m̄ bat sèng-keng kap Siōng-tè ê koân mah?

25因為tùi死人中koh活ê時，無嫁無娶，是親像天使tī天裡。In-ūi tùi sí-lâng tiong koh-oa̍h ê sî, bô kè bô chhōa, sī chhin-chhiūⁿ thiⁿ-sài tī thiⁿ-ni̍h.

26Taⁿ論死人koh活，Lín kiám bē讀tio̍h摩西ê冊，刺phè hit篇所記ê，上帝kā摩西講，我是亞伯拉罕ê上帝，以撒ê上帝，雅各ê上帝；Taⁿ lūn sí-lâng koh-oa̍h, lín kiám bē tha̍k-tio̍h Mô͘-se ê chheh, Chhì-phè hit phiⁿ só͘ kì ê, Siōng-tè kā Mô͘-se kóng, Góa sī A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè;

27伊m̄是死人ê上帝，是活人ê上帝；lín有大大錯lah。I m̄ sī sí-lâng ê Siōng-tè, sī oa̍h-lâng ê Siōng-tè; lín ū tōa-tōa chhò lah.

28有經學士一人到，聽in辯論，知耶穌gâu應，就問伊講，Chiah-ê誡命中tá-lo̍h一條是第一要緊？Ū keng-ha̍k-sū chi̍t lâng kàu, thiaⁿ in piān-lūn, chai Iâ-so͘ gâu ìn, chiū mn̄g I kóng, Chiah ê kài-bēng tiong tá-lo̍h chi̍t tiâu sī tē it iàu-kín?

29耶穌應講，Hit-ê第一要緊ê是講，以色列ah，tio̍h聽；主咱ê上帝是獨一ê主；你tio̍h盡心，盡性，盡意，盡力疼主，就是你ê上帝。Iâ-so͘ ìn kóng, Hit-ê tē it iàu-kín ê sī kóng, Í-sek-lia̍t ah, tio̍h thiaⁿ; Chú lán ê Siōng-tè sī to̍k-it ê Chú; lí tio̍h chīn sim, chīn sèng, chīn ì, chīn la̍t thiàⁿ Chú, chiū-sī lí ê Siōng-tè.

30第二ê講，Tio̍h疼你ê厝邊親像家己。Tē jī ê kóng, Tio̍h thiàⁿ lí ê chhù-piⁿ chhin-chhiūⁿ ka-kī.

31其餘ê誡命bē有比chit兩條khah大ê。Kî-û ê kài-bēng bē ū pí chí nn̄g tiâu khah tōa ê.

32經學士kā伊講，好ah，先生ah，你所講ê真正tio̍h，上帝只有一個，以外無別ê；Keng-ha̍k-sū kā I kóng, Hó ah, sian-siⁿ ah, lí só͘ kóng ê chin-chiàⁿ tio̍h, Siōng-tè chí ū chi̍t-ê, í-gōa bô pa̍t-ê;

33若盡心，盡智，盡力疼伊，koh疼厝邊親像家己，就贏過lóng總kui隻cheng-siⁿ ê燒祭，kap祭祀。nā chīn sim, chīn tì chīn la̍t thiàⁿ I, koh thiàⁿ chhù-piⁿ chhin-chhiūⁿ ka-kī, chiū iâⁿ-kè lóng-chóng kui chiah cheng-siⁿ ê sio-chè, kap chè-sū.

34耶穌看見伊應了真通，就kā伊講，你離開上帝國無遠lah。Tùi hit時無人敢koh問伊。Iâ-so͘ khòaⁿ-kìⁿ i ìn-liáu chin thong, chiū kā i kóng, Lí lī-khui Siōng-tè kok bô hn̄g lah. Tùi hit sî bô lâng káⁿ koh mn̄g I.

35耶穌tī殿堂教示in講，Chiah-ê經學士怎樣講，基督做大衛ê後裔mah？Iâ-so͘ tī tiān-tn̂g kà-sī in kóng, Chiah ê keng-ha̍k-sū cháiⁿ-iūⁿ kóng, Ki-tok chòe Tāi-pi̍t ê hō͘-è mah?

36大衛hō͘聖神感動來家己講， 主kā我ê主講， 坐我ê大pêng， thèng候我將你chiah-ê對敵做你ê腳踏椅。Tāi-pi̍t hō͘ Sèng Sîn kám-tōng lâi ka-kī kóng, Chú kā góa ê Chú kóng, Chē góa ê tōa pêng, Thèng-hāu góa chiong lí chiah ê tùi-te̍k chòe lí ê kha-ta̍h-í.

37大衛既然家己稱伊做主，就基督àn怎樣做伊ê後裔？眾人lóng歡喜聽伊。Tāi-pi̍t kì-jiân ka-kī chheng I chòe Chú, chiū Ki-tok àn-cháiⁿ-iūⁿ chòe i ê hō͘-è? Chèng lâng lóng hoaⁿ-hí thiaⁿ I.

38耶穌教示ê時koh講，Tio̍h持防hiah-ê經學士，in ài穿長衫，四界行，ài tī街市裡hō͘人請安，Iâ-so͘ kà-sī ê sî koh kóng, Tio̍h tî-hông hiah ê keng-ha̍k-sū, in ài chhēng tn̂g saⁿ, sì-kè kiâⁿ, ài tī koe-chhī-ni̍h hō͘ lâng chhéng-an,

39會堂內坐高位，筵桌裡坐大位；hōe-tn̂g lāi chē koâiⁿ ūi, iân-toh-ni̍h chē tōa ūi;

40in hiau吞守寡人ê家伙，假意長長祈禱。In beh受罪koh-khah重。in hiau-thun chiú-kóaⁿ-lâng ê ke-hé, ké-ì tn̂g-tn̂g kî-tó. In beh siū-chōe koh khah tāng.

41耶穌坐tī庫房ê對面；眾人teh用錢hiat落庫房；有chōe-chōe富人用chōe-chōe錢hiat落去。Iâ-so͘ chē tī khò͘-pâng ê tùi-bīn; chèng lâng teh ēng chîⁿ hiat-lo̍h khò͘-pâng; ū chōe-chōe pù lâng ēng chōe-chōe chîⁿ hiat-lo̍h-khì.

42有一個sòng-hiong ê守寡人來hiat兩個半釐ê，就是一釐。Ū chi̍t ê sòng-hiong ê chiú-kóaⁿ lâng lâi hiat nn̄g ê pòaⁿ-lî ê, chiū-sī chi̍t lî.

43耶穌就叫伊ê學生來kā in講，我實在kā lín講，Chit-ê sòng-hiong ê守寡人所hiat ê比眾hiat落庫房ê khah chōe。Iâ-so͘ chiū kiò I ê ha̍k-seng lâi kā in kóng, Góa si̍t-chāi kā lín kóng, Chit ê sòng-hiong ê chiú-kóaⁿ lâng só͘ hiat ê pí chèng hiat-lo̍h khò͘-pâng ê khah chōe.

44因為hiah-ê眾人是tùi in有chhun ê來hiat；但是chit-ê婦人人是tùi tī伊ê無夠，來一盡hiat伊所有ê，就是伊所óa靠來活ê。In-ūi hiah ê chèng lâng sī tùi in ū chhun ê lâi hiat; nā-sī chit ê hū-jîn-lâng sī tùi tī i ê bô kàu, lâi it-chīn hiat i só͘ ū ê, chiū-sī i só͘ óa-khò lâi oa̍h ê.

1耶穌出殿 ê時，有一個學生kā伊講，先生，你看leh，chit號石，chit號厝宅！Iâ-so͘ chhut tiān ê sî ū chi̍t ê ha̍k-seng kā I kóng, Sian-siⁿ, lí khòaⁿ-leh, chit hō chio̍h, chit hō chhù-the̍h!

2耶穌kā伊講，你看chiah-ê大厝mah？Tī chia beh無一塊石留tī石ê頂面，也無chhia落去。Iâ-so͘ kā i kóng, Lí khòaⁿ chiah ê tōa chhù mah? Tī chia beh bô chi̍t tè chio̍h lâu tī chio̍h ê téng-bīn, iā bô chhia-lo̍h-khì.

3耶穌tī橄欖山坐tī殿 ê對面；彼得、雅各、約翰kap安得烈暗靜問伊講，Iâ-so͘ tī Kaⁿ-ná soaⁿ chē tī tiān ê tùi-bīn; Pí-tek, Ngá-kok, Iok-hān kap An-tek-lia̍t àm-chīⁿ mn̄g I kóng,

4請kā阮講，甚麼時有chiah-ê事？Koh chiah-ê事beh成ê時有甚麼兆頭ah？Chhiáⁿ kā goán kóng, sím-mi̍h sî ū chiah ê sū? Koh chiah ê sū beh chiâⁿ ê sî ū sím-mi̍h tiāu-thâu ah?

5耶穌chiah kā in講，Lín tio̍h謹慎，莫得hō͘人迷惑。Iâ-so͘ chiah kā in kóng, Lín tio̍h kín-sīn, bo̍h-tit hō͘ lâng bê-he̍k.

6Beh有chōe-chōe人託我ê名來講，我就是基督，來迷惑chōe-chōe人。Beh ū chōe-chōe lâng thok góa ê miâ lâi kóng, Góa chiū-sī Ki-tok, lâi bê-he̍k chōe-chōe lâng.

7Koh lín聽見交戰kap交戰ê風聲ê時，莫得驚；因為chiah-ê事的確有，總是末期iáu-bē到。Koh lín thiaⁿ-kìⁿ kau-chiàn kap kau-chiàn ê hong-siaⁿ ê sî, bo̍h-tit kiaⁿ; in-ūi chiah ê sū tek-khak ū, chóng-sī boa̍t-kî iáu-bē kàu.

8因為百姓beh起來攻擊百姓，國也beh攻擊國；ta̍k所在beh有地動，也beh有飢荒；chiah-ê事就是苦痛ê起頭。In-ūi peh-sìⁿ beh khí-lâi kong-kek peh-sìⁿ, kok iā beh kong-kek kok; ta̍k só͘-chāi beh ū tōe-tāng, iā beh ū ki-hng; chiah ê sū chiū-sī khó͘-thàng ê khí-thâu.

9但是lín tio̍h家己謹慎，因為人beh將lín送交公會，lín beh受phah tī會堂裡；也beh為tio̍h我ê緣故khiā tī官府kap君王ê面前，來對in做干證。Nā-sī lín tio̍h ka-kī kín-sīn, in-ūi lâng beh chiong lín sàng-kau kong-hōe, lín beh siū phah tī hōe-tn̂g-ni̍h; iā beh ūi-tio̍h góa ê iân-kò͘ khiā tī koaⁿ-hú kap kun-ông ê bīn-chêng, lâi tùi in chòe kan-chèng.

10總是福音的確事先傳tī萬邦。Chóng-sī hok-im tek-khak tāi-seng thoân tī bān pang.

11人拖lín，將lín送交ê時，莫得事先掛慮beh怎樣講；當hit時所賞賜lín講ê lín tio̍h講伊；因為m̄是lín家己講，就是聖神teh講。Lâng thoa lín, chiong lín sàng-kau ê sî, bo̍h-tit tāi-seng khòa-lū beh cháiⁿ-iūⁿ kóng; tng hit sî só͘ siúⁿ-sù lín kóng ê lín tio̍h kóng i; in-ūi m̄ sī lín ka-kī kóng, chiū-sī Sèng Sîn teh kóng.

12兄弟beh將兄弟送交去死；父款待kiáⁿ也是án-ni；kiáⁿ兒beh起來攻擊父母hō͘伊死。Hiaⁿ-tī beh chiong hiaⁿ-tī sàng-kau khì sí; pē khoán-thāi kiáⁿ iā sī án-ni; kiáⁿ-jî beh khí-lâi kong-kek pē-bú hō͘ i sí.

13也lín因為我ê名beh hō͘眾人怨恨；獨獨吞忍到路尾ê，伊beh得tio̍h救。Iā lín in-ūi góa ê miâ beh hō͘ chèng lâng oàn-hūn; to̍k-to̍k thun-lún kàu lō͘-bé ê, i beh tit-tio̍h kiù.

14總是lín看見hit-ê殘害可惡ê khiā tī伊m̄應該khiā ê所在(讀ê人tio̍h曉悟)，hit時tī猶太ê tio̍h走去山裡；Chóng-sī lín khòaⁿ-kìⁿ hit ê chân-hāi khó-ò͘ⁿ ê khiā tī i m̄ eng-kai khiā ê só͘-chāi (tha̍k ê lâng tio̍h hiáu-ngō͘), hit sî tī Iû-thài ê tio̍h cháu-khì soaⁿ-ni̍h;

15tī厝頂ê莫得入去厝內the̍h甚麼；tī chhù-téng ê bo̍h-tit ji̍p-khì chhù-lāi the̍h sím-mi̍h;

16tī園裡ê莫得tò來hiaⁿh伊ê衫。tī hn̂g-ni̍h ê bo̍h-tit tò-lâi hiaⁿh i ê saⁿ.

17當hiah-ê日有身孕kap hō͘嬰á食奶ê婦人人有災禍！Tng hiah ê ji̍t ū sin-īn kap hō͘ eⁿ-á chia̍h lin ê hū-jîn-lâng ū chai-ē!

18Lín tio̍h祈禱免得冬天時tú-tio̍h chit-ê事。Lín tio̍h kî-tó bián-tit tang-thiⁿ sî tú-tio̍h chit ê sū.

19因為hiah-ê日beh有患難，就是tùi上帝創造世間ê起頭，到chit tia̍p bē有án-ni，後來也無。In-ūi hiah ê ji̍t beh ū hoān-lān, chiū-sī tùi Siōng-tè chhòng-chō sè-kan ê khí-thâu, kàu chit tia̍p bē ū án-ni, āu-lâi iā bô.

20若m̄是主減少hiah-ê日，就凡有肉體ê無一個得救。總是為tio̍h揀ê百姓，就是伊所揀ê ê緣故，伊有減少hiah-ê日。Nā m̄ sī Chú kiám-chió hiah ê ji̍t, chiū hoān ū jio̍k-thé ê bô chi̍t-ê tit kiù. Chóng-sī ūi-tio̍h kéng ê peh-sìⁿ, chiū-sī I só͘ kéng ê, ê iân-kò͘, I ū kiám-chió hiah ê ji̍t.

21Hit時若有人kā lín講，基督tī chia，á是講，Tī hia，莫得信。Hit sî nā ū lâng kā lín kóng, Ki-tok tī chia, á-sī kóng, Tī hia, bo̍h-tit sìn.

22因為beh有假基督、假先知起來，行神蹟kap兆頭；beh是會，連揀ê百姓，也迷惑in。In-ūi beh ū ké Ki-tok, ké sian-ti khí-lâi, kiâⁿ sîn-jiah kap tiāu-thâu; beh sī ōe, liân kéng ê peh-sìⁿ, iā bê-he̍k in.

23總是lín tio̍h謹慎；我已經事先lóng kā lín講。Chóng-sī lín tio̍h kín-sīn; góa í-keng tāi-seng lóng kā lín kóng.

24當hiah-ê日，hit-ê患難ê了後，日beh烏暗，月無出伊ê 光，Tng hiah ê ji̍t, hit ê hoān-lān ê liáu-āu, ji̍t beh o͘-àm, ge̍h bô chhut i ê kng,

25星tùi天ka-la̍uh，tī天裡ê象beh振動。chhiⁿ tùi thiⁿ ka-la̍uh, tī thiⁿ-ni̍h ê siōng beh tín-tāng.

26Hit時beh看見人子用大權能kap榮光，tī雲中臨到。Hit sî beh khòaⁿ-kìⁿ Jîn-chú ēng tōa koân-lêng kap êng-kng, tī hûn-tiong lîm-kàu.

27Hit時伊beh差伊ê天使tùi四方聚集伊所揀ê百姓，tùi地極到天邊。Hit sî I beh chhe I ê thiⁿ-sài tùi sì-hng chū-chi̍p I só͘ kéng ê peh-sìⁿ, tùi tōe-ke̍k kàu thiⁿ-piⁿ.

28Lín tio̍h學無花果樹chit-ê譬喻；當枝軟葉發ê時，lín就知夏天近lah。Lín tio̍h o̍h bû-hoa-kó chhiū chit ê phì-jū; tng ki nńg hio̍h hoat ê sî, lín chiū chai hē-thiⁿ kūn lah.

29Án-ni lín看chiah-ê事，tio̍h知是近，到門口lah。Án-ni lín khòaⁿ chiah ê sū, tio̍h chai sī kūn, kàu mn̂g-kháu lah.

30我實在kā lín講，Chit世代iáu-bē過去，到chiah-ê tāi-chì lóng成。Góa si̍t-chāi kā lín kóng, Chit sè-tāi iáu-bē kè-khì, kàu chiah ê tāi-chì lóng chiâⁿ.

31天地beh廢無，我ê話bōe廢無。Thiⁿ tōe beh hòe-bô, góa ê ōe bōe hòe-bô.

32但是論hit日hit時人m̄知，tī天裡ê天使也m̄知。Kiáⁿ也m̄知，獨獨父知伊。Nā-sī lūn hit ji̍t hit sî lâng m̄ chai, tī thiⁿ-ni̍h ê thiⁿ-sài iā m̄ chai. Kiáⁿ iā m̄ chai, to̍k-to̍k Pē chai i.

33Tio̍h謹慎警醒來祈禱，因為lín m̄知hit-ê期是tī甚麼時。Tio̍h kín-sīn kéng-séng lâi kî-tó, in-ūi lín m̄ chai hit ê kî sī tī sím-mi̍h sî.

34是親像一人離開伊ê家，去出外，將權交代伊chiah-ê奴僕，有派工hō͘ ta̍k人做，koh吩咐顧門ê tio̍h tiuⁿ-tî。Sī chhin-chhiūⁿ chi̍t lâng lī-khui i ê ke, khì chhut-gōa, chiong koân kau-tāi i chiah ê lô͘-po̍k, ū phài kang hō͘ ta̍k lâng chòe, koh hoan-hù kò͘-mn̂g ê tio̍h tiuⁿ-tî.

35所以lín tio̍h tiuⁿ-tî，因為lín m̄知lín ê主甚麼時beh來，或是日暗，或是半暝，或是雞啼，或是天光早；Só͘-í lín tio̍h tiuⁿ-tî, in-ūi lín m̄ chai lín ê Chú sím-mi̍h sî beh lâi, he̍k-sī ji̍t-àm, he̍k-sī pòaⁿ-mî, he̍k-sī koe thî, he̍k-sī thiⁿ-kng chá;

36驚了伊忽然來tú-tio̍h lín teh睏。kiaⁿ-liáu I hut-jiân lâi tú-tio̍h lín teh khùn.

37我所kā lín講ê，也kā眾人講，Tio̍h tiuⁿ-tî。Góa só͘ kā lín kóng ê, iā kā chèng lâng kóng, Tio̍h tiuⁿ-tî.

1過兩日就是pôaⁿ過kap除酵ê節，chiah-ê祭司頭kap經學士chhē看tio̍h用甚麼詭計掠耶穌來害死伊。Kè nn̄g ji̍t chiū-sī pôaⁿ-kè kap tû-kàⁿ ê choeh, chiah ê chè-si-thâu kap keng-ha̍k-sū chhē-khòaⁿ tio̍h ēng sím-mi̍h khúi-kè lia̍h Iâ-so͘ lâi hāi-sí I.

2因為講，當節期m̄-thang，驚了百姓有擾亂。In-ūi kóng, Tng choeh-kî m̄ thang, kiaⁿ-liáu peh-sìⁿ ū jiáu-loān.

3耶穌tī伯大尼，thái-ko西門ê厝；坐桌ê時有婦人人來，帶玉瓶，內面tóe極貴氣真ê ná-ta̍t香油，khà破玉瓶，拚tī耶穌ê頭殼。Iâ-so͘ tī Pek-tāi-nî, thái-ko Se-bûn ê chhù; chē toh ê sî ū hū-jîn-lâng lâi, tòa ge̍k-pân, lāi-bīn tóe ke̍k kùi-khì chin ê ná-ta̍t hiuⁿ-iû, khà-phòa ge̍k-pân, piàⁿ tī Iâ-so͘ ê thâu-khak.

4有kúi-nā人受氣，saⁿ-kap講，Án-ni破費chit-ê香油有甚麼路用？Ū kúi-nā lâng siū-khì, saⁿ-kap kóng, Án-ni phòa-hùi chit ê hiuⁿ-iû ū sím-mi̍h lō͘-ēng?

5因為chit-ê香油能賣得銀á三百外 ê，來hō͘ sòng-hiong人。就m̄願伊。In-ūi chit ê hiuⁿ-iû ōe bōe-tit gûn-á saⁿ-pah gōa ê, lâi hō͘ sòng-hiong lâng. Chiū m̄ goān i.

6但是耶穌講，chhut-chāi伊；lín啥事刁難伊？伊所行來款待我ê是好事。Nā-sī Iâ-so͘ kóng, Chhut-chāi i; lín siáⁿ-sū thiau-lân i? i só͘ kiâⁿ lâi khoán-thāi góa ê sī hó sū.

7因為常常有sòng-hiong人kap lín tī-teh，ài好款待in，不管時lóng會；但是我無常常kap lín tī-teh。In-ūi siông-siông ū sòng-hiong lâng kap lín tī-teh, ài hó khoán-thāi in, put-koán sî lóng ōe; nā-sī góa bô siông-siông kap lín tī-teh.

8Chit-ê婦人人是盡所能ê來做；伊事先將油抹我ê身軀，來備辦埋葬。Chit ê hū-jîn-lâng sī chīn i só͘ ōe ê lâi chòe; i tāi-seng chiong iû boah góa ê seng-khu, lâi pī-pān bâi-chòng.

9我實在kā lín講，普天下無論甚麼所在傳福音，也beh講起chit-ê婦人人所行，來記念伊。Góa si̍t-chāi kā lín kóng, Phó͘ thiⁿ-ē bô lūn sím-mi̍h só͘-chāi thoân hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i.

10十二個學生ê一個，加略人猶大，去見hiah-ê祭司頭，beh將耶穌交hō͘ in。Cha̍p-jī ê ha̍k-seng ê chi̍t ê, Ka-lio̍k lâng Iû-tāi, khì kìⁿ hiah ê chè-si-thâu, beh chiong Iâ-so͘ kau hō͘ in.

11In聽見就歡喜，koh允beh hō͘伊銀。伊就chhē看有甚麼機會thang將耶穌交hō͘ in。In thiaⁿ-kìⁿ chiū hoaⁿ-hí, koh ún beh hō͘ i gûn. I chiū chhē-khòaⁿ ū sím-mi̍h ki-hōe thang chiong Iâ-so͘ kau hō͘ in.

12除酵節ê頭一日，就是thâi pôaⁿ過節ê羊羔ê日，學生問伊講，你ài阮去甚麼所在備辦hō͘你食pôaⁿ過節ah？Tû-kàⁿ-choeh ê thâu chi̍t ji̍t, chiū-sī thâi pôaⁿ-kè-choeh ê iûⁿ-ko ê ji̍t, ha̍k-seng mn̄g I kóng, Lí ài goán khì sím-mi̍h só͘-chāi pī-pān hō͘ lí chia̍h pôaⁿ-kè-choeh ah?

13耶穌差兩個學生，kā in講，Lín入城，就有一人帶水瓶beh tú-tio̍h lín，lín tio̍h tè伊去；Iâ-so͘ chhe nn̄g ê ha̍k-seng, kā in kóng, Lín ji̍p siâⁿ, chiū ū chi̍t lâng tòa chúi-pân beh tú-tio̍h lín, lín tio̍h tè i khì;

14tī伊所入ê所在kā hit-ê家主講，先生講，我ê客廳tī tá-lo̍h，我beh tī hia kap我ê學生食pôaⁿ過節。tī i só͘ ji̍p ê só͘-chāi kā hit ê ke-chú kóng, Sian-siⁿ kóng, Góa ê kheh-thiaⁿ tī tá-lo̍h, góa beh tī hia kap góa ê ha̍k-seng chia̍h pôaⁿ-kè-choeh.

15伊beh用樓頂一間大聽，排設便便，hō͘ lín看；lín tī hia thang為tio̍h咱事先備辦。I beh ēng lâu-téng chi̍t keng tōa thiaⁿ, pâi-siat piān-piān, hō͘ lín khòaⁿ; lín tī hia thang ūi-tio̍h lán tāi-seng pī-pān.

16學生出去入城；既然tú-tio̍h照伊所kā in講ê；就備辦pôaⁿ過節。Ha̍k-seng chhut-khì ji̍p siâⁿ; kì-jiân tú-tio̍h chiàu I só͘ kā in kóng ê; chiū pī-pān pôaⁿ-kè-choeh.

17到日暗，耶穌kap十二個學生來。Kàu ji̍t àm Iâ-so͘ kap cha̍p-jī ê ha̍k-seng lâi.

18坐teh食ê時，耶穌講，我實在kā lín講，Lín中間一人，kap我saⁿ-kap食ê，beh賣我。Chē teh chia̍h ê sî, Iâ-so͘ kóng, Góa si̍t-chāi kā lín kóng, Lín tiong-kan chi̍t lâng, kap góa saⁿ-kap chia̍h ê, beh bōe góa.

19眾人憂悶，一個一個問伊講，總無是我o͘h？Chèng lâng iu-būn, chi̍t-ê chi̍t-ê mn̄g I kóng, Chóng bô sī góa o͘h?

20伊kā in講，十二學生ê一個，kap我saⁿ-kap ùn tī盤裡ê，就是。I kā in kóng, Cha̍p-jī ha̍k-seng ê chi̍t-ê, kap góa saⁿ-kap ùn tī pôaⁿ-ni̍h ê, chiū-sī.

21因為人子tò去，照所記載指伊ê話；但是賣人子ê有災禍ah！hit人無出世khah好。In-ūi Jîn-chú tò-khì, chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó.

22In teh食ê時，耶穌the̍h餅祝謝，就peh破hō͘ in，講，the̍h去，chit-ê是我ê身軀。In teh chia̍h ê sî, Iâ-so͘ the̍h piáⁿ chiok-siā, chiū peh-phòa hō͘ in, kóng, The̍h-khì, chit-ê sī góa ê seng-khu.

23捧杯祝謝hō͘ in；in lóng lim。Phâng poe chiok-siā hō͘ in; in lóng lim.

24耶穌kā in講，chit-ê是我ê血，就是盟約ê血，為tio̍h chōe-chōe人來流出ê。Iâ-so͘ kā in kóng, Chit-ê sī góa ê huih, chiū-sī bêng-iok ê huih, ūi-tio̍h chōe-chōe lâng lâi lâu-chhut ê.

25我實在kā lín講，Taⁿ了後我無koh lim葡萄ê汁，thèng候hit日我lim hit-ê新ê tī上帝ê國。Góa si̍t-chāi kā lín kóng, Taⁿ liáu-āu góa bô koh lim phû-tô ê chiap, thèng-hāu hit ji̍t góa lim hit ê sin ê tī Siōng-tè ê kok.

26已經吟詩，就出來，去橄欖山。Í-keng gîm si, chiū chhut-lâi, khì Kaⁿ-ná soaⁿ.

27耶穌kā in講，Lín lóng beh受塞礙；因為有記載講，我beh phah牧者，羊就四散；Iâ-so͘ kā in kóng, Lín lóng beh siū that-gāi; in-ūi ū kì-chài kóng, Góa beh phah bo̍k-chiá, iûⁿ chiū sì-sòaⁿ;

28但是我koh活了後beh事先lín去加利利。nā-sī góa koh-oa̍h liáu-āu beh tāi-seng lín khì Ka-lī-lī.

29彼得kā伊講，眾人雖然受塞礙，但是我無án-ni。Pí-tek kā I kóng, Chèng lâng sui-jiân siū that-gāi, nā-sī góa bô án-ni.

30耶穌kā伊講，我實在kā你講，今á日就是tī今暝，雞啼二落ê事先，你beh三pái m̄認我。Iâ-so͘ kā i kóng, Góa si̍t-chāi kā lí kóng, Kin-á-ji̍t chiū-sī tī kim-mî, koe thî jī lo̍h ê tāi-seng, lí beh saⁿ pái m̄ jīn góa.

31彼得盡力講，我就若tio̍h kap你死，也決斷無m̄認你。眾人也lóng是án-ni講。Pí-tek chīn-la̍t kóng, Góa chiū nā tio̍h kap lí sí, iā koat-toàn bô m̄ jīn lí. Chèng lâng iā lóng sī án-ni kóng.

32Saⁿ-kap到一所在，名叫客西馬尼，耶穌kā伊ê學生講，Lín坐tòa chia，thèng候我祈禱。Saⁿ-kap kàu chi̍t só͘-chāi, miâ kiò Khek-se-má-nî, Iâ-so͘ kā I ê ha̍k-seng kóng, Lín chē tòa chia, thèng-hāu góa kî-tó.

33就帶彼得、雅各、約翰，kap伊saⁿ-kap去；耶穌gông-ngia̍h慘慼。Chiū tòa Pí-tek, Ngá-kok, Iok-hān, kap I saⁿ-kap khì; Iâ-so͘ gông-ngia̍h chhám-chhoeh.

34kā in講，我ê心真憂悶到beh死；lín tio̍h tòa chia來警醒。Kā in kóng, Góa ê sim chin iu-būn kàu beh sí; lín tio̍h tòa chia lâi kéng-séng.

35Lio̍h-á進前仆tī地裡，祈求若能做得，就hō͘伊免tú-tio̍h chit-ê時。Lio̍h-á chìn-chèng phak tī tōe-ni̍h, kî-kiû nā ōe chòe-tit, chiū hō͘ I bián tú-tio̍h chit ê sî.

36Koh講，阿爸父ah，你萬事lóng能，願你hō͘ chit-ê杯離開我。總是m̄是照我所ài；是照你所ài。Koh kóng, A-pà Pē ah, lí bān sū lóng ōe, goān lí hō͘ chit ê poe lī-khui góa. Chóng-sī m̄ sī chiàu góa só͘ ài; sī chiàu lí só͘ ài.

37Koh來，看見in teh睏，就kā彼得講，西門，你teh睏mah？bōe會警醒一時久mah？Koh lâi, khòaⁿ-kìⁿ in teh khùn, chiū kā Pí-tek kóng, Se-bûn, lí teh khùn mah? Bōe-ōe kéng-séng chi̍t sî kú mah?

38Lín tio̍h警醒祈禱，免得入tī迷惑；心神甘願，但是肉體軟chiáⁿ。Lín tio̍h kéng-séng kî-tó, bián-tit ji̍p tī bê-he̍k; sim-sîn kam-goān, nā-sī jio̍k-thé nńg-chiáⁿ.

39koh再去祈禱，也是講hiah-ê話。Koh-chài khì kî-tó, iā sī kóng hiah ê ōe.

40Koh來看見in teh睏，因為in ê目睭真siap；in也m̄知tio̍h應怎樣。Koh lâi khòaⁿ-kìⁿ in teh khùn, in-ūi in ê ba̍k-chiu chin siap; in iā m̄ chai tio̍h ìn cháiⁿ-iūⁿ.

41第三pái來kā in講，Taⁿ thang睏來安歇lah；好lah，時到lah，人子受賣tī罪人ê手lah。Tē saⁿ pái lâi kā in kóng, Taⁿ thang khùn lâi an-hioh lah; hó lah, sî kàu lah, Jîn-chú siū bōe tī chōe-jîn ê chhiú lah.

42起來saⁿ-kap去；你看，賣我ê人近lah。Khí-lâi saⁿ-kap khì; lí khòaⁿ, bōe góa ê lâng kūn lah.

43Iáu teh講ê時，liâm-piⁿ有十二個學生ê一個，猶大，來，也有kui陣人kia̍h刀kap槌á，tùi祭司頭、經學士kap長老hia saⁿ-kap來。Iáu teh kóng ê sî, liâm-piⁿ ū cha̍p-jī ê ha̍k-seng ê chi̍t-ê, Iû-tāi, lâi, iā ū kui tīn lâng kia̍h to kap thûi-á, tùi chè-si-thâu, keng-ha̍k-sū kap tiúⁿ-ló hia saⁿ-kap lâi.

44賣伊ê bat kap in套暗號講，我kā伊chim ê，hit人就是，lín thang掠伊，細膩拖伊去。Bōe I ê bat kap in thò àm-hō kóng, Góa kā I chim ê, hit lâng chiū-sī, lín thang lia̍h I, sòe-jī thoa I khì.

45已經到，即時就近耶穌；講，拉比；就直直kā伊chim。Í-keng kàu, chek-sî chiū-kūn Iâ-so͘; kóng, Lia̍p-pí; chiū ti̍t-ti̍t kā I chim.

46In就下手掠伊。In chiū hē chhiú lia̍h I.

47邊頭khiā ê一人拔刀，thâi祭司頭ê奴僕，削去伊一個耳á。Piⁿ-thâu khiā ê chi̍t lâng pu̍ih to, thâi chè-si-thâu ê lô͘-po̍k, siah-khì i chi̍t-ê hī-á.

48耶穌kā in講，Lín kia̍h刀kap槌á出來掠我，親像beh掠賊mah？Iâ-so͘ kā in kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah?

49我日日tī殿內教示人，kap lín saⁿ-kap tī-teh，lín無掠我；Góa ji̍t-ji̍t tī tiān-lāi kà-sī lâng, kap lín saⁿ-kap tī-teh, lín bô lia̍h góa;

50總是án-ni就是beh應驗聖經，學生lóng離開伊走。chóng-sī án-ni chiū-sī beh èng-giām sèng-keng. Ha̍k-seng lóng lī-khui I cháu.

51有一個少年人thǹg-theh moa幼苧布tè耶穌；in掠伊；Ū chi̍t ê siàu-liân lâng thǹg-theh moa iù-tōe pò͘ tè Iâ-so͘; in lia̍h i;

52就棄sak幼苧布，thǹg-theh來走。chiū khì-sak iù-tōe pò͘, thǹg-theh lâi cháu.

53Hiah-ê人帶耶穌到祭司頭ê所在；也有眾祭司頭、長老、經學士lóng來kap伊saⁿ-kap聚集。Hiah ê lâng tòa Iâ-so͘ kàu chè-si-thâu ê só͘-chāi; iā ū chèng chè-si-thâu, tiúⁿ-ló, keng-ha̍k-sū lóng lâi kap i saⁿ-kap chū-chi̍p.

54彼得遠遠tè耶穌，到祭司頭ê院，入內面，kap hiah-ê差役坐teh烘火。Pí-tek hn̄g-hn̄g tè Iâ-so͘, kàu chè-si-thâu ê īⁿ, ji̍p lāi-bīn, kap hiah ê chhe-ia̍h chē-teh hang-hé.

55Chiah-ê祭司頭kap全公會chhē干證攻擊耶穌，beh hō͘伊死，也無得tio̍h。Chiah ê chè-si-thâu kap choân kong-hōe chhē kan-chèng kong-kek Iâ-so͘, beh hō͘ I sí, iā bô tit-tio̍h.

56因為lām-sám干證來攻擊伊ê chōe-chōe，但是in所干證ê無對同。In-ūi lām-sám kan-chèng lâi kong-kek I ê chōe-chōe, nā-sī in só͘ kan-chèng ê bô tùi-tâng.

57也有kúi-nā人起來，lām-sám干證伊講，Iā ū kúi-nā lâng khí-lâi, lām-sám kan-chèng I kóng,

58阮bat聽見伊講，我beh毀壞chit間人ê手所起ê殿，三日內koh起一間，m̄是人ê手所起 ê。Goán bat thiaⁿ-kìⁿ I kóng, Góa beh húi-hoāi chit keng lâng ê chhiú só͘ khí ê tiān, saⁿ-ji̍t lāi koh khí chi̍t keng, m̄-sī lâng ê chhiú só͘ khí ê.

59In干證án-ni也無對同。In kan-chèng án-ni iā bô tùi-tâng.

60祭司頭起來khiā tī中間，問耶穌講，你lóng無應mah？Chiah-ê人所干證你ê是甚麼？Chè-si-thâu khí-lāi khiā tī tiong-kan, mn̄g Iâ-so͘ kóng, Lí lóng bô ìn mah? Chiah ê lâng só͘ kan-chèng lí ê sī sím-mi̍h?

61耶穌靜靜lóng無應。祭司頭koh問伊講，你是thang o-ló ê ê Kiáⁿ，基督，á m̄是？Iâ-so͘ chēng-chēng lóng bô ìn. Chè-si-thâu koh mn̄g I kóng, Lí sī thang o-ló ê ê Kiáⁿ, Ki-tok, á m̄ sī?

62耶穌講，我是；lín beh看見人子坐tī有權能ê ê大pêng，kap天ê雲來。Iâ-so͘ kóng, Góa sī; lín beh khòaⁿ-kìⁿ Jîn-chú chē tī ū koân-lêng ê ê tōa pêng, kap thiⁿ ê hûn lâi.

63祭司頭拆裂家己ê衫，講，咱iáu欠甚麼干證ah？Chè-si-thâu thiah-li̍h ka-kī ê saⁿ, kóng, Lán iáu khiàm sím-mi̍h kan-chèng ah?

64Lín已經聽見伊ê僭權褻瀆lah；lín phah算àn怎樣？In lóng擬伊該死。Lín í-keng thiaⁿ-kìⁿ I ê chhiàm-koân siat-to̍k lah; lín phah-sǹg àn-cháiⁿ-iūⁿ? In lóng gí I kai sí.

65Hit時有人就phùi-nōa伊，掩伊ê面，用拳頭母cheng伊，kā伊講，你tio̍h做先知來講。Hiah-ê差役帶去，用手phah伊。Hit sî ū lâng chiū phùi-nōa I, ng I ê bīn, ēng kûn-thâu-bú cheng I, kā I kóng, Lí tio̍h chòe sian-ti lâi kóng. Hiah ê chhe-ia̍h tòa-khì, ēng chhiú phah I.

66彼得tī下面外院ê時，有祭司頭一個女婢來；Pí-tek tī ē-bīn gōa īⁿ ê sî ū chè-si-thâu chi̍t ê lú-pī lâi;

67看見彼得teh烘火，相伊，講，你也bat kap hit-ê拿撒勒人耶穌做陣。khòaⁿ-kìⁿ Pí-tek teh hang-hé siòng i kóng, Lí iā bat kap hit ê Ná-sat-le̍k lâng Iâ-so͘ chòe tīn.

68伊m̄認講，我m̄知，也bōe曉得你teh講甚麼。就出去到前院。雞就啼。I m̄ jīn kóng, Góa m̄ chai, iā bōe hiáu-tit lí teh kóng sím-mi̍h. Chiū chhut-khì kàu chêng īⁿ. Koe chiū thî.

69Hit-ê女婢看見伊，koh kā邊á khiā ê人講，Chit-ê也是屬tī in ê黨。伊koh m̄認。Hit ê lú-pī khòaⁿ-kìⁿ i, koh kā piⁿ-á khiā ê lâng kóng, Chit-ê iā sī sio̍k tī in ê tóng. I koh m̄ jīn.

70Koh tiap-á久，邊á khiā ê koh kā彼得講，你屬in ê黨；因為你是加利利人。Koh tiap-á-kú piⁿ-á khiā ê koh kā Pí-tek kóng, Lí sio̍k in ê tóng; in-ūi lí sī Ka-lī-lī lâng.

71伊就咒詛 koh chiù-chōa講，Lín所講hit-ê人我m̄-bat伊。I chiū chiù-chó͘ koh chiù-chōa kóng, Lín só͘ kóng hit ê lâng góa m̄ bat I.

72雞即時啼二落。彼得就記得耶穌所kā伊講ê話，講，雞啼二落ê事先，你beh三pái m̄認我；想tio̍h就啼哭。Koe chek-sî thî jī lo̍h. Pí-tek chiū kì-tit Iâ-so͘ só͘ kā i kóng ê ōe, kóng, Koe thî jī lo̍h ê tāi-seng, lí beh saⁿ pái m̄ jīn góa; siūⁿ-tio̍h chiū thî-khàu.