1過兩日就是pôaⁿ過kap除酵ê節，chiah-ê祭司頭kap經學士chhē看tio̍h用甚麼詭計掠耶穌來害死伊。Kè nn̄g ji̍t chiū-sī pôaⁿ-kè kap tû-kàⁿ ê choeh, chiah ê chè-si-thâu kap keng-ha̍k-sū chhē-khòaⁿ tio̍h ēng sím-mi̍h khúi-kè lia̍h Iâ-so͘ lâi hāi-sí I.

2因為講，當節期m̄-thang，驚了百姓有擾亂。In-ūi kóng, Tng choeh-kî m̄ thang, kiaⁿ-liáu peh-sìⁿ ū jiáu-loān.

3耶穌tī伯大尼，thái-ko西門ê厝；坐桌ê時有婦人人來，帶玉瓶，內面tóe極貴氣真ê ná-ta̍t香油，khà破玉瓶，拚tī耶穌ê頭殼。Iâ-so͘ tī Pek-tāi-nî, thái-ko Se-bûn ê chhù; chē toh ê sî ū hū-jîn-lâng lâi, tòa ge̍k-pân, lāi-bīn tóe ke̍k kùi-khì chin ê ná-ta̍t hiuⁿ-iû, khà-phòa ge̍k-pân, piàⁿ tī Iâ-so͘ ê thâu-khak.

4有kúi-nā人受氣，saⁿ-kap講，Án-ni破費chit-ê香油有甚麼路用？Ū kúi-nā lâng siū-khì, saⁿ-kap kóng, Án-ni phòa-hùi chit ê hiuⁿ-iû ū sím-mi̍h lō͘-ēng?

5因為chit-ê香油能賣得銀á三百外 ê，來hō͘ sòng-hiong人。就m̄願伊。In-ūi chit ê hiuⁿ-iû ōe bōe-tit gûn-á saⁿ-pah gōa ê, lâi hō͘ sòng-hiong lâng. Chiū m̄ goān i.

6但是耶穌講，chhut-chāi伊；lín啥事刁難伊？伊所行來款待我ê是好事。Nā-sī Iâ-so͘ kóng, Chhut-chāi i; lín siáⁿ-sū thiau-lân i? i só͘ kiâⁿ lâi khoán-thāi góa ê sī hó sū.

7因為常常有sòng-hiong人kap lín tī-teh，ài好款待in，不管時lóng會；但是我無常常kap lín tī-teh。In-ūi siông-siông ū sòng-hiong lâng kap lín tī-teh, ài hó khoán-thāi in, put-koán sî lóng ōe; nā-sī góa bô siông-siông kap lín tī-teh.

8Chit-ê婦人人是盡所能ê來做；伊事先將油抹我ê身軀，來備辦埋葬。Chit ê hū-jîn-lâng sī chīn i só͘ ōe ê lâi chòe; i tāi-seng chiong iû boah góa ê seng-khu, lâi pī-pān bâi-chòng.

9我實在kā lín講，普天下無論甚麼所在傳福音，也beh講起chit-ê婦人人所行，來記念伊。Góa si̍t-chāi kā lín kóng, Phó͘ thiⁿ-ē bô lūn sím-mi̍h só͘-chāi thoân hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i.

10十二個學生ê一個，加略人猶大，去見hiah-ê祭司頭，beh將耶穌交hō͘ in。Cha̍p-jī ê ha̍k-seng ê chi̍t ê, Ka-lio̍k lâng Iû-tāi, khì kìⁿ hiah ê chè-si-thâu, beh chiong Iâ-so͘ kau hō͘ in.

11In聽見就歡喜，koh允beh hō͘伊銀。伊就chhē看有甚麼機會thang將耶穌交hō͘ in。In thiaⁿ-kìⁿ chiū hoaⁿ-hí, koh ún beh hō͘ i gûn. I chiū chhē-khòaⁿ ū sím-mi̍h ki-hōe thang chiong Iâ-so͘ kau hō͘ in.

12除酵節ê頭一日，就是thâi pôaⁿ過節ê羊羔ê日，學生問伊講，你ài阮去甚麼所在備辦hō͘你食pôaⁿ過節ah？Tû-kàⁿ-choeh ê thâu chi̍t ji̍t, chiū-sī thâi pôaⁿ-kè-choeh ê iûⁿ-ko ê ji̍t, ha̍k-seng mn̄g I kóng, Lí ài goán khì sím-mi̍h só͘-chāi pī-pān hō͘ lí chia̍h pôaⁿ-kè-choeh ah?

13耶穌差兩個學生，kā in講，Lín入城，就有一人帶水瓶beh tú-tio̍h lín，lín tio̍h tè伊去；Iâ-so͘ chhe nn̄g ê ha̍k-seng, kā in kóng, Lín ji̍p siâⁿ, chiū ū chi̍t lâng tòa chúi-pân beh tú-tio̍h lín, lín tio̍h tè i khì;

14tī伊所入ê所在kā hit-ê家主講，先生講，我ê客廳tī tá-lo̍h，我beh tī hia kap我ê學生食pôaⁿ過節。tī i só͘ ji̍p ê só͘-chāi kā hit ê ke-chú kóng, Sian-siⁿ kóng, Góa ê kheh-thiaⁿ tī tá-lo̍h, góa beh tī hia kap góa ê ha̍k-seng chia̍h pôaⁿ-kè-choeh.

15伊beh用樓頂一間大聽，排設便便，hō͘ lín看；lín tī hia thang為tio̍h咱事先備辦。I beh ēng lâu-téng chi̍t keng tōa thiaⁿ, pâi-siat piān-piān, hō͘ lín khòaⁿ; lín tī hia thang ūi-tio̍h lán tāi-seng pī-pān.

16學生出去入城；既然tú-tio̍h照伊所kā in講ê；就備辦pôaⁿ過節。Ha̍k-seng chhut-khì ji̍p siâⁿ; kì-jiân tú-tio̍h chiàu I só͘ kā in kóng ê; chiū pī-pān pôaⁿ-kè-choeh.

17到日暗，耶穌kap十二個學生來。Kàu ji̍t àm Iâ-so͘ kap cha̍p-jī ê ha̍k-seng lâi.

18坐teh食ê時，耶穌講，我實在kā lín講，Lín中間一人，kap我saⁿ-kap食ê，beh賣我。Chē teh chia̍h ê sî, Iâ-so͘ kóng, Góa si̍t-chāi kā lín kóng, Lín tiong-kan chi̍t lâng, kap góa saⁿ-kap chia̍h ê, beh bōe góa.

19眾人憂悶，一個一個問伊講，總無是我o͘h？Chèng lâng iu-būn, chi̍t-ê chi̍t-ê mn̄g I kóng, Chóng bô sī góa o͘h?

20伊kā in講，十二學生ê一個，kap我saⁿ-kap ùn tī盤裡ê，就是。I kā in kóng, Cha̍p-jī ha̍k-seng ê chi̍t-ê, kap góa saⁿ-kap ùn tī pôaⁿ-ni̍h ê, chiū-sī.

21因為人子tò去，照所記載指伊ê話；但是賣人子ê有災禍ah！hit人無出世khah好。In-ūi Jîn-chú tò-khì, chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó.

22In teh食ê時，耶穌the̍h餅祝謝，就peh破hō͘ in，講，the̍h去，chit-ê是我ê身軀。In teh chia̍h ê sî, Iâ-so͘ the̍h piáⁿ chiok-siā, chiū peh-phòa hō͘ in, kóng, The̍h-khì, chit-ê sī góa ê seng-khu.

23捧杯祝謝hō͘ in；in lóng lim。Phâng poe chiok-siā hō͘ in; in lóng lim.

24耶穌kā in講，chit-ê是我ê血，就是盟約ê血，為tio̍h chōe-chōe人來流出ê。Iâ-so͘ kā in kóng, Chit-ê sī góa ê huih, chiū-sī bêng-iok ê huih, ūi-tio̍h chōe-chōe lâng lâi lâu-chhut ê.

25我實在kā lín講，Taⁿ了後我無koh lim葡萄ê汁，thèng候hit日我lim hit-ê新ê tī上帝ê國。Góa si̍t-chāi kā lín kóng, Taⁿ liáu-āu góa bô koh lim phû-tô ê chiap, thèng-hāu hit ji̍t góa lim hit ê sin ê tī Siōng-tè ê kok.

26已經吟詩，就出來，去橄欖山。Í-keng gîm si, chiū chhut-lâi, khì Kaⁿ-ná soaⁿ.

27耶穌kā in講，Lín lóng beh受塞礙；因為有記載講，我beh phah牧者，羊就四散；Iâ-so͘ kā in kóng, Lín lóng beh siū that-gāi; in-ūi ū kì-chài kóng, Góa beh phah bo̍k-chiá, iûⁿ chiū sì-sòaⁿ;

28但是我koh活了後beh事先lín去加利利。nā-sī góa koh-oa̍h liáu-āu beh tāi-seng lín khì Ka-lī-lī.

29彼得kā伊講，眾人雖然受塞礙，但是我無án-ni。Pí-tek kā I kóng, Chèng lâng sui-jiân siū that-gāi, nā-sī góa bô án-ni.

30耶穌kā伊講，我實在kā你講，今á日就是tī今暝，雞啼二落ê事先，你beh三pái m̄認我。Iâ-so͘ kā i kóng, Góa si̍t-chāi kā lí kóng, Kin-á-ji̍t chiū-sī tī kim-mî, koe thî jī lo̍h ê tāi-seng, lí beh saⁿ pái m̄ jīn góa.

31彼得盡力講，我就若tio̍h kap你死，也決斷無m̄認你。眾人也lóng是án-ni講。Pí-tek chīn-la̍t kóng, Góa chiū nā tio̍h kap lí sí, iā koat-toàn bô m̄ jīn lí. Chèng lâng iā lóng sī án-ni kóng.

32Saⁿ-kap到一所在，名叫客西馬尼，耶穌kā伊ê學生講，Lín坐tòa chia，thèng候我祈禱。Saⁿ-kap kàu chi̍t só͘-chāi, miâ kiò Khek-se-má-nî, Iâ-so͘ kā I ê ha̍k-seng kóng, Lín chē tòa chia, thèng-hāu góa kî-tó.

33就帶彼得、雅各、約翰，kap伊saⁿ-kap去；耶穌gông-ngia̍h慘慼。Chiū tòa Pí-tek, Ngá-kok, Iok-hān, kap I saⁿ-kap khì; Iâ-so͘ gông-ngia̍h chhám-chhoeh.

34kā in講，我ê心真憂悶到beh死；lín tio̍h tòa chia來警醒。Kā in kóng, Góa ê sim chin iu-būn kàu beh sí; lín tio̍h tòa chia lâi kéng-séng.

35Lio̍h-á進前仆tī地裡，祈求若能做得，就hō͘伊免tú-tio̍h chit-ê時。Lio̍h-á chìn-chèng phak tī tōe-ni̍h, kî-kiû nā ōe chòe-tit, chiū hō͘ I bián tú-tio̍h chit ê sî.

36Koh講，阿爸父ah，你萬事lóng能，願你hō͘ chit-ê杯離開我。總是m̄是照我所ài；是照你所ài。Koh kóng, A-pà Pē ah, lí bān sū lóng ōe, goān lí hō͘ chit ê poe lī-khui góa. Chóng-sī m̄ sī chiàu góa só͘ ài; sī chiàu lí só͘ ài.

37Koh來，看見in teh睏，就kā彼得講，西門，你teh睏mah？bōe會警醒一時久mah？Koh lâi, khòaⁿ-kìⁿ in teh khùn, chiū kā Pí-tek kóng, Se-bûn, lí teh khùn mah? Bōe-ōe kéng-séng chi̍t sî kú mah?

38Lín tio̍h警醒祈禱，免得入tī迷惑；心神甘願，但是肉體軟chiáⁿ。Lín tio̍h kéng-séng kî-tó, bián-tit ji̍p tī bê-he̍k; sim-sîn kam-goān, nā-sī jio̍k-thé nńg-chiáⁿ.

39koh再去祈禱，也是講hiah-ê話。Koh-chài khì kî-tó, iā sī kóng hiah ê ōe.

40Koh來看見in teh睏，因為in ê目睭真siap；in也m̄知tio̍h應怎樣。Koh lâi khòaⁿ-kìⁿ in teh khùn, in-ūi in ê ba̍k-chiu chin siap; in iā m̄ chai tio̍h ìn cháiⁿ-iūⁿ.

41第三pái來kā in講，Taⁿ thang睏來安歇lah；好lah，時到lah，人子受賣tī罪人ê手lah。Tē saⁿ pái lâi kā in kóng, Taⁿ thang khùn lâi an-hioh lah; hó lah, sî kàu lah, Jîn-chú siū bōe tī chōe-jîn ê chhiú lah.

42起來saⁿ-kap去；你看，賣我ê人近lah。Khí-lâi saⁿ-kap khì; lí khòaⁿ, bōe góa ê lâng kūn lah.

43Iáu teh講ê時，liâm-piⁿ有十二個學生ê一個，猶大，來，也有kui陣人kia̍h刀kap槌á，tùi祭司頭、經學士kap長老hia saⁿ-kap來。Iáu teh kóng ê sî, liâm-piⁿ ū cha̍p-jī ê ha̍k-seng ê chi̍t-ê, Iû-tāi, lâi, iā ū kui tīn lâng kia̍h to kap thûi-á, tùi chè-si-thâu, keng-ha̍k-sū kap tiúⁿ-ló hia saⁿ-kap lâi.

44賣伊ê bat kap in套暗號講，我kā伊chim ê，hit人就是，lín thang掠伊，細膩拖伊去。Bōe I ê bat kap in thò àm-hō kóng, Góa kā I chim ê, hit lâng chiū-sī, lín thang lia̍h I, sòe-jī thoa I khì.

45已經到，即時就近耶穌；講，拉比；就直直kā伊chim。Í-keng kàu, chek-sî chiū-kūn Iâ-so͘; kóng, Lia̍p-pí; chiū ti̍t-ti̍t kā I chim.

46In就下手掠伊。In chiū hē chhiú lia̍h I.

47邊頭khiā ê一人拔刀，thâi祭司頭ê奴僕，削去伊一個耳á。Piⁿ-thâu khiā ê chi̍t lâng pu̍ih to, thâi chè-si-thâu ê lô͘-po̍k, siah-khì i chi̍t-ê hī-á.

48耶穌kā in講，Lín kia̍h刀kap槌á出來掠我，親像beh掠賊mah？Iâ-so͘ kā in kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah?

49我日日tī殿內教示人，kap lín saⁿ-kap tī-teh，lín無掠我；Góa ji̍t-ji̍t tī tiān-lāi kà-sī lâng, kap lín saⁿ-kap tī-teh, lín bô lia̍h góa;

50總是án-ni就是beh應驗聖經，學生lóng離開伊走。chóng-sī án-ni chiū-sī beh èng-giām sèng-keng. Ha̍k-seng lóng lī-khui I cháu.

51有一個少年人thǹg-theh moa幼苧布tè耶穌；in掠伊；Ū chi̍t ê siàu-liân lâng thǹg-theh moa iù-tōe pò͘ tè Iâ-so͘; in lia̍h i;

52就棄sak幼苧布，thǹg-theh來走。chiū khì-sak iù-tōe pò͘, thǹg-theh lâi cháu.

53Hiah-ê人帶耶穌到祭司頭ê所在；也有眾祭司頭、長老、經學士lóng來kap伊saⁿ-kap聚集。Hiah ê lâng tòa Iâ-so͘ kàu chè-si-thâu ê só͘-chāi; iā ū chèng chè-si-thâu, tiúⁿ-ló, keng-ha̍k-sū lóng lâi kap i saⁿ-kap chū-chi̍p.

54彼得遠遠tè耶穌，到祭司頭ê院，入內面，kap hiah-ê差役坐teh烘火。Pí-tek hn̄g-hn̄g tè Iâ-so͘, kàu chè-si-thâu ê īⁿ, ji̍p lāi-bīn, kap hiah ê chhe-ia̍h chē-teh hang-hé.

55Chiah-ê祭司頭kap全公會chhē干證攻擊耶穌，beh hō͘伊死，也無得tio̍h。Chiah ê chè-si-thâu kap choân kong-hōe chhē kan-chèng kong-kek Iâ-so͘, beh hō͘ I sí, iā bô tit-tio̍h.

56因為lām-sám干證來攻擊伊ê chōe-chōe，但是in所干證ê無對同。In-ūi lām-sám kan-chèng lâi kong-kek I ê chōe-chōe, nā-sī in só͘ kan-chèng ê bô tùi-tâng.

57也有kúi-nā人起來，lām-sám干證伊講，Iā ū kúi-nā lâng khí-lâi, lām-sám kan-chèng I kóng,

58阮bat聽見伊講，我beh毀壞chit間人ê手所起ê殿，三日內koh起一間，m̄是人ê手所起 ê。Goán bat thiaⁿ-kìⁿ I kóng, Góa beh húi-hoāi chit keng lâng ê chhiú só͘ khí ê tiān, saⁿ-ji̍t lāi koh khí chi̍t keng, m̄-sī lâng ê chhiú só͘ khí ê.

59In干證án-ni也無對同。In kan-chèng án-ni iā bô tùi-tâng.

60祭司頭起來khiā tī中間，問耶穌講，你lóng無應mah？Chiah-ê人所干證你ê是甚麼？Chè-si-thâu khí-lāi khiā tī tiong-kan, mn̄g Iâ-so͘ kóng, Lí lóng bô ìn mah? Chiah ê lâng só͘ kan-chèng lí ê sī sím-mi̍h?

61耶穌靜靜lóng無應。祭司頭koh問伊講，你是thang o-ló ê ê Kiáⁿ，基督，á m̄是？Iâ-so͘ chēng-chēng lóng bô ìn. Chè-si-thâu koh mn̄g I kóng, Lí sī thang o-ló ê ê Kiáⁿ, Ki-tok, á m̄ sī?

62耶穌講，我是；lín beh看見人子坐tī有權能ê ê大pêng，kap天ê雲來。Iâ-so͘ kóng, Góa sī; lín beh khòaⁿ-kìⁿ Jîn-chú chē tī ū koân-lêng ê ê tōa pêng, kap thiⁿ ê hûn lâi.

63祭司頭拆裂家己ê衫，講，咱iáu欠甚麼干證ah？Chè-si-thâu thiah-li̍h ka-kī ê saⁿ, kóng, Lán iáu khiàm sím-mi̍h kan-chèng ah?

64Lín已經聽見伊ê僭權褻瀆lah；lín phah算àn怎樣？In lóng擬伊該死。Lín í-keng thiaⁿ-kìⁿ I ê chhiàm-koân siat-to̍k lah; lín phah-sǹg àn-cháiⁿ-iūⁿ? In lóng gí I kai sí.

65Hit時有人就phùi-nōa伊，掩伊ê面，用拳頭母cheng伊，kā伊講，你tio̍h做先知來講。Hiah-ê差役帶去，用手phah伊。Hit sî ū lâng chiū phùi-nōa I, ng I ê bīn, ēng kûn-thâu-bú cheng I, kā I kóng, Lí tio̍h chòe sian-ti lâi kóng. Hiah ê chhe-ia̍h tòa-khì, ēng chhiú phah I.

66彼得tī下面外院ê時，有祭司頭一個女婢來；Pí-tek tī ē-bīn gōa īⁿ ê sî ū chè-si-thâu chi̍t ê lú-pī lâi;

67看見彼得teh烘火，相伊，講，你也bat kap hit-ê拿撒勒人耶穌做陣。khòaⁿ-kìⁿ Pí-tek teh hang-hé siòng i kóng, Lí iā bat kap hit ê Ná-sat-le̍k lâng Iâ-so͘ chòe tīn.

68伊m̄認講，我m̄知，也bōe曉得你teh講甚麼。就出去到前院。雞就啼。I m̄ jīn kóng, Góa m̄ chai, iā bōe hiáu-tit lí teh kóng sím-mi̍h. Chiū chhut-khì kàu chêng īⁿ. Koe chiū thî.

69Hit-ê女婢看見伊，koh kā邊á khiā ê人講，Chit-ê也是屬tī in ê黨。伊koh m̄認。Hit ê lú-pī khòaⁿ-kìⁿ i, koh kā piⁿ-á khiā ê lâng kóng, Chit-ê iā sī sio̍k tī in ê tóng. I koh m̄ jīn.

70Koh tiap-á久，邊á khiā ê koh kā彼得講，你屬in ê黨；因為你是加利利人。Koh tiap-á-kú piⁿ-á khiā ê koh kā Pí-tek kóng, Lí sio̍k in ê tóng; in-ūi lí sī Ka-lī-lī lâng.

71伊就咒詛 koh chiù-chōa講，Lín所講hit-ê人我m̄-bat伊。I chiū chiù-chó͘ koh chiù-chōa kóng, Lín só͘ kóng hit ê lâng góa m̄ bat I.

72雞即時啼二落。彼得就記得耶穌所kā伊講ê話，講，雞啼二落ê事先，你beh三pái m̄認我；想tio̍h就啼哭。Koe chek-sî thî jī lo̍h. Pí-tek chiū kì-tit Iâ-so͘ só͘ kā i kóng ê ōe, kóng, Koe thî jī lo̍h ê tāi-seng, lí beh saⁿ pái m̄ jīn góa; siūⁿ-tio̍h chiū thî-khàu.

1到天光，hiah-ê祭司頭、長老、經學士kap全公會saⁿ-kap議論，縛耶穌，帶伊去，交hō͘彼拉多。Kàu thiⁿ-kng hiah-ê chè-si-thâu, tiúⁿ-ló, keng-ha̍k-sū kap choân kong-hōe saⁿ-kap gī-lūn, pa̍k Iâ-so͘, tòa I khì, kau hō͘ Pí-lia̍p-to.

2彼拉多問伊講，你是猶太人ê王mah？伊應講，你講，就是。Pí-lia̍p-to mn̄g I kóng, Lí sī Iû-thài lâng ê ông mah? I ìn kóng, Lí kóng, chiū-sī.

3祭司頭用chōe-chōe項告伊。Chè-si-thâu ēng chōe-chōe hāng kò I.

4彼拉多koh問伊講，你lóng無應mah？你看，in告你hiah chōe項。Pí-lia̍p-to koh mn̄g I kóng, Lí lóng bô ìn mah? Lí khòaⁿ, in kò lí hiah chōe hāng.

5但是耶穌iáu-kú無應；致到彼拉多奇怪。Nā-sī Iâ-so͘ iáu-kú bô ìn; tì-kàu Pí-lia̍p-to kî-koài.

6到節期，總督éng有放一個犯人hō͘ in，照in所求ê。Kàu choeh-kî chóng-tok éng ū pàng chi̍t ê hoān-lâng hō͘ in, chiàu in só͘ kiû ê.

7有一人，名巴拉巴，kap hiah-ê作亂ê人同受縛，in tī作亂ê時bat thâi死人。Ū chi̍t lâng, miâ Pa-lia̍p-pa, kap hiah ê chok-loān ê lâng tâng siū pa̍k, in tī chok-loān ê sî bat thâi-sí lâng.

8眾人就起去，求彼拉多照常來行。Chèng lâng chiū khí-khì, kiû Pí-lia̍p-to chiàu siông lâi kiâⁿ.

9彼拉多應講，Lín ài我放猶太人ê王hō͘ lín mah？Pí-lia̍p-to ìn kóng, Lín ài góa pàng Iû-thài lâng ê ông hō͘ lín mah?

10因為知hiah-ê祭司頭是為tio̍h怨妒，chiah 解送伊。In-ūi chai hiah ê chè-si-thâu sī ūi-tio̍h oàn-tò͘, chiah kè-sàng I.

11但是hiah-ê祭司頭使唆眾人，寧可求放巴拉巴hō͘ in。Nā-sī hiah ê chè-si-thâu sái-sō chèng lâng, lêng-khó͘ kiû pâng Pa-lia̍p-pa hō͘ in.

12彼拉多koh應講，Án-ni就lín所叫做猶太人ê王ê，我tio̍h怎樣辦伊？Pí-lia̍p-to koh ìn kóng, Án-ni chiū lín só͘ kiò chòe Iû-thài lâng ê ông ê, góa tio̍h cháiⁿ-iūⁿ pān I?

13In koh喉叫講，釘伊tī十字架。In koh âu-kiò kóng, Tèng I tī si̍p-jī-kè.

14彼拉多kā in講，怎樣ah，伊做甚麼pháiⁿ？總是in ná大聲喉叫講，釘伊tī十字架。Pí-lia̍p-to kā in kóng, Cháiⁿ-iūⁿ ah, I chòe sím-mi̍h pháiⁿ? Chóng-sī in ná tōa siaⁿ âu-kiò kóng, Tèng I tī si̍p-jī-kè.

15彼拉多因為ài hō͘眾人歡喜，就放巴拉巴hō͘ in；已經鞭phah耶穌，就發交去釘十字架。Pí-lia̍p-to in-ūi ài hō͘ chèng lâng hoaⁿ-hí, chiū pàng Pa-lia̍p-pa hō͘ in; í-keng piⁿ-phah Iâ-so͘, chiū hoat-kau khì tèng si̍p-jī-kè.

16兵丁拖伊入院內，就是公堂，就會齊thong營，Peng-teng thoa I ji̍p īⁿ-lāi, chiū-sī kong-tn̂g, chiū hōe-chôe thong iâⁿ,

17用紫色ê袍hō͘伊穿，koh編刺á ê冕旒kā伊戴，ēng chí-sek ê phàu hō͘ I chhēng, koh pīⁿ chhì-á ê bián-liû kā I tì,

18就kā伊請安，講，猶太人ê王，平安！chiū kā I chhéng-an, kóng, Iû-thài lâng ê ông, pêng-an!

19Koh用蘆竹sut伊ê頭殼，kā伊phùi-nōa，跪落拜伊。Koh ēng lô͘-tek sut I ê thâu-khak, kā I phùi-nōa, kūi-lo̍h pài I.

20戲弄soah，hit領紫色ê袍就kā伊thǹg起來，將伊家己ê衫kā伊穿落去；帶伊出，beh釘伊十字架。Hì-lāng soah, hit niá chí-sek ê phàu chiū kā I thǹg-khí-lâi, chiong I ka-kī ê saⁿ kā I chhēng-lo̍h-khì; tòa I chhut, beh tèng I si̍p-jī-kè.

21有Kó͘-lī-nāi人西門，就是亞力山大kap Ló͘-hu ê老父，tùi山場來àn hia過，in勉強伊saⁿ-kap去，來giâ耶穌ê十字架。Ū Kó͘-lī-nāi lâng Se-bûn, chiū-sī A-le̍k-san-tāi kap Ló͘-hu ê lāu-pē, tùi soaⁿ-tiûⁿ lâi àn hia kè, in bián-kióng i saⁿ-kap khì, lâi giâ Iâ-so͘ ê si̍p-jī-kè.

22In帶耶穌到各各他ê所在，翻譯就是頭殼碗ê所在；In tòa Iâ-so͘ kàu Kok-kok-thaⁿ ê só͘-chāi, hoan-e̍k chiū-sī Thâu-khak-óaⁿ ê só͘-chāi;

23用kiáu沒藥ê酒hō͘伊；耶穌m̄受。ēng kiáu bu̍t-io̍h ê chiú hō͘ I; Iâ-so͘ m̄ siū.

24就釘伊tī十字架，pun伊ê衣服，liam-khau看甚麼人得tio̍h甚麼。Chiū tèng I tī si̍p-jī-kè, pun I ê i-ho̍k, liam-khau khòaⁿ sím-mi̍h lâng tit-tio̍h sím-mi̍h.

25Hit時九點鐘，就釘伊tī十字架。Hit sî káu tiám cheng, chiū tèng I tī si̍p-jī-kè.

26用斬條寫伊ê罪狀，講，猶太人ê王。Ēng chám-tiâu siá I ê chōe-chōng, kóng, Iû-thài lâng ê ông.

27也有兩個賊kap伊同釘十字架，一個tī chiàⁿ-pêng，一個tī tò-pêng。Iā ū nn̄g ê chha̍t kap I tâng tèng si̍p-jī-kè, chi̍t-ê tī chiàⁿ-pêng, chi̍t-ê tī tò-pêng.

29經過ê人褻瀆伊，搖頭講，Āi ah，你毀壞殿，三日起伊ê，Keng-kè ê lâng siat-to̍k I, iô thâu kóng, Āi ah, lí húi-hoāi tiān, saⁿ ji̍t khí i ê,

30taⁿ tio̍h救家己，tùi十字架落來。taⁿ tio̍h kiù ka-kī, tùi si̍p-jī-kè lo̍h-lâi.

31Hiah-ê祭司頭kap經學士也是án-ni恥笑伊，saⁿ-kap講，伊bat救別人，也bōe會救家己。Hiah ê chè-si-thâu kap keng-ha̍k-sū iā sī án-ni thí-chhiò I, saⁿ-kap kóng, I bat kiù pa̍t lâng, iā bōe-ōe kiù ka-kī.

32以色列ê王基督taⁿ tio̍h tùi十字架落來hō͘阮看來信伊。同釘tī十字架ê也罵伊。Í-sek-lia̍t ê ông Ki-tok taⁿ tio̍h tùi si̍p-jī-kè lo̍h-lâi hō͘ goán khòaⁿ lâi sìn I. Tâng tèng tī si̍p-jī-kè ê iā mē I.

33日中晝全地烏暗，到三點鐘ê時；Ji̍t tiong-tàu choân tōe o͘-àm, kàu saⁿ tiám cheng ê sî;

34三點鐘ê時，耶穌大聲叫講，Í-lô-i，Í-lô-i，lia̍p-ma2sat-pak-tāi-nî，翻譯就是，我ê上帝，我ê上帝，你啥事放離我。saⁿ tiám cheng ê sî Iâ-so͘ tōa siaⁿ kiò kóng, Í-lô-i, Í-lô-i, lia̍p-má sat-pak-tāi-nî, hoan-e̍k chiū-sī, Góa ê Siōng-tè, góa ê Siōng-tè, lí siáⁿ-sū pàng-lī góa.

35邊頭khiā ê有人聽見，就講，你看，伊teh叫以利亞。Piⁿ-thâu khiā ê ū lâng thiaⁿ-kìⁿ, chiū kóng, Lí khòaⁿ, I teh kiò Í-lī-a.

36有一人走去用海絨浸醋，hâ tī蘆竹á尾，hō͘伊suh，講，且慢，試看以利亞來救伊落來á無。Ū chi̍t lâng cháu-khì ēng hái-jiông chìm chhò͘, hâ tī lô͘-tek-á bé, hō͘ i suh, kóng, Chhiáⁿ bān, chhì-khòaⁿ Í-lī-a lâi kiù I lo̍h-lâi á bô.

37耶穌大聲叫，氣就斷。Iâ-so͘ tōa siaⁿ kiò, khùi chiū tn̄g.

38殿內ê帳籬tùi頂到下裂做兩pêng。Tiān-lāi ê tiùⁿ-lî tùi téng kàu ē li̍h chòe nn̄g pêng.

39百總khiā tī耶穌ê對面，看見伊án-ni氣斷，就講，Chit人真正是上帝ê Kiáⁿ。Pé-chóng khiā tī Iâ-so͘ ê tùi-bīn, khòaⁿ-kìⁿ I án-ni khùi tn̄g, chiū kóng, Chit lâng chin-chiàⁿ sī Siōng-tè ê Kiáⁿ.

40Koh有kúi-nā ê婦人人tùi遠遠teh看，從中有抹大拉ê馬利亞，kap小雅各約西ê老母馬利亞，以及Sat-lô-bí，Koh ū kúi-nā ê hū-jîn-lâng tùi hn̄g-hn̄g teh khòaⁿ, chiông-tiong ū Boa̍t-tāi-lia̍p ê Má-lī-a, kap sió Ngá-kok Iok-se ê lāu-bú Má-lī-a, í-ki̍p Sat-lô-bí,

41就是耶穌tī加利利ê時，跟tè來服事伊ê，也有chōe-chōe婦人人kap耶穌同上耶路撒冷ê，lóng遠遠teh看。chiū-sī Iâ-so͘ tī Ka-lī-lī ê sî, kun-tè lâi ho̍k-sāi I ê, iā ū chōe-chōe hū-jîn-lâng kap Iâ-so͘ tâng chiūⁿ Iâ-lō͘-sat-léng ê, lóng hn̄g-hn̄g teh khòaⁿ.

42已經暗，因為hit日是備辦節ê日，就是安歇日前ê一日，Í-keng àm, in-ūi hit ji̍t sī pī-pān choeh ê ji̍t, chiū-sī an-hioh-ji̍t chêng ê chi̍t ji̍t,

43有A-lī-má-thài ê約瑟來，伊是尊貴ê議員，本身也是欣慕上帝ê國ê，好膽入去見彼拉多，求耶穌ê身屍。ū A-lī-má-thài ê Iok-sek lâi, i sī chun-kùi ê gī-oân, pún-sin iā sī him-bō͘ siōng-tè ê kok ê, hó-táⁿ ji̍p-khì kìⁿ Pí-lia̍p-to, kiû Iâ-so͘ ê sin-si.

44彼拉多奇怪伊已經死；叫百總來問看伊死久bē。Pí-lia̍p-to kî-koài I í-keng sí; kiò pé-chóng lâi mn̄g khòaⁿ I sí kú bē.

45已經tùi百總得tio̍h知，就用身屍hō͘約瑟。Í-keng tùi pé-chóng tit-tio̍h chai, chiū ēng sin-si hō͘ Iok-sek.

46約瑟買幼苧布，收耶穌落來；用幼苧布包伊，hē tī石磐所phah ê墓；也kō一塊石tī墓門。Iok-sek bóe iù-tōe pò͘, siu Iâ-so͘ lo̍h-lâi; ēng iù-tōe pò͘ pau I, hē tī chio̍h-pôaⁿ só͘ phah ê bōng; iā kō chi̍t tè chio̍h tī bōng-mn̂g.

47抹大拉ê馬利亞，kap約西ê老母馬利亞，看見伊所埋葬ê所在。Boa̍t-tāi-lia̍p ê Má-lī-a, kap Iok-se ê lāu-bú Má-lī-a, khòaⁿ-kìⁿ I só͘ bâi-chòng ê só͘-chāi.

1安歇日已經過身，抹大拉ê馬利亞kap雅各ê老母馬利亞，kap Sat-lô-bí，有買香料，beh來抹耶穌。An-hioh-ji̍t í-keng kè-sin, Boa̍t-tāi-lia̍p ê Má-lī-a kap Ngá-kok ê lāu-bú Má-lī-a, kap Sat-lô-bí, ū bóe hiuⁿ-liāu, beh lâi boah Iâ-so͘.

2七日頭一日，真早，日tú-á出，in到墓；Chhit-ji̍t thâu chi̍t ji̍t, chin chá, ji̍t tú-á chhut, in kàu bōng;

3saⁿ-kap講，Chī-chūi-á beh替咱kō hit塊石離開墓門ah？saⁿ-kap kóng, Chī-chūi-á beh thòe lán kō hit tè chio̍h lī-khui bōng-mn̂g ah?

4Kia̍h目就看見hit塊石已經kō開；因為是真大塊。Kia̍h ba̍k chiū khòaⁿ-kìⁿ hit tè chio̍h í-keng kō khui; in-ūi sī chin tōa tè.

5入墓，看見一個少年人坐tī chiàⁿ-pêng，穿白衫；就gông-ngia̍h。Ji̍p bōng, khòaⁿ-kìⁿ chi̍t ê siàu-liân lâng chē tī chiàⁿ-pêng, chhēng pe̍h saⁿ; chiū gông-ngia̍h.

6少年人kā in講，M̄免gông-ngia̍h，lín是chhē釘十字架ê拿撒勒人耶穌。伊已經koh活，無tī chia；你看，伊埋葬ê所在。Siàu-liân lâng kā in kóng, M̄ bián gông-ngia̍h, lín sī chhē tèng si̍p-jī-kè ê Ná-sat-le̍k lâng Iâ-so͘. I í-keng koh-oa̍h, bô tī chia; lí khòaⁿ, I bâi-chòng ê só͘-chāi.

7Taⁿ tio̍h去，kā伊ê學生kap彼得講，伊事先lín去加利利；lín tī hia beh看見伊，照伊所kā lín講ê。Taⁿ tio̍h khì, kā I ê ha̍k-seng kap Pí-tek kóng, I tāi-seng lín khì Ka-lī-lī; lín tī hia beh khòaⁿ-kìⁿ I, chiàu I só͘ kā lín kóng ê.

8Chiah-ê婦人人出去離開墓，就走，因為ngia̍uh-ngia̍uh-chhoah gông-ngia̍h；也無kā人講甚麼，因為in真驚。Chiah ê hū-jîn-lâng chhut-khì lī-khui bōng, chiū cháu, in-ūi ngia̍uh-ngia̍uh-chhoah gông-ngia̍h; iā bô kā lâng kóng sím-mi̍h, in-ūi in chin kiaⁿ.

9七日ê頭日清早，耶穌已經koh活，事先出現tī抹大拉ê馬利亞，就是耶穌前bat tùi伊趕出七個鬼ê。Chhit-ji̍t ê thâu ji̍t chheng chá, Iâ-so͘ í-keng koh-oa̍h, tāi-seng chhut-hiān tī Boa̍t-tāi-lia̍p ê Má-lī-a, chiū-sī Iâ-so͘ chêng bat tùi i kóaⁿ-chhut chhit ê kúi ê.

10平時kap耶穌同tī-teh ê人，hit時teh憂悶啼哭；馬利亞去kā in講。Pêng-sî kap Iâ-so͘ tâng tī-teh ê lâng hit sî teh iu-būn thî-khàu; Má-lī-a khì kā in kóng.

11In聽見伊活，koh hō͘馬利亞看見，竟然m̄信。In thiaⁿ-kìⁿ I oa̍h, koh hō͘ Má-lī-a khòaⁿ-kìⁿ, kèng-jiân m̄ sìn.

12以後in中間兩人去山場；teh行ê時，耶穌出現hō͘ in看見，伊ê 容貌kap平常無同。Í-āu in tiong-kan nn̄g lâng khì soaⁿ-tiûⁿ; teh kiâⁿ ê sî, Iâ-so͘ chhut-hiān hō͘ in khòaⁿ-kìⁿ, I ê iông-māu kap pêng-siông bô tâng.

13In去kā其餘ê講；總是in hiah-ê人也m̄信。In khì kā kî-û ê kóng; chóng-sī in hiah ê lâng iā m̄ sìn.

14後來十一個學生坐teh食ê時，耶穌出現hō͘ in看見，責備in ê m̄信kap硬心；因為有人看見伊已經koh活，in也m̄信hiah-ê人ê話。Āu-lâi cha̍p-it ê ha̍k-seng chē teh chia̍h ê sî, Iâ-so͘ chhut-hiān hō͘ in khòaⁿ-kìⁿ, chek-pī in ê m̄ sìn kap ngī-sim; in-ūi ū lâng khòaⁿ-kìⁿ I í-keng koh-oa̍h, in iā m̄ sìn hiah ê lâng ê ōe.

15耶穌koh kā in講，lín去普天下，傳福音hō͘萬百姓。Iâ-so͘ koh kā in kóng, Lín khì phó͘ thiⁿ-ē, thoân hok-im hō͘ bān peh-sìⁿ.

16信來受洗禮ê，beh得tio̍h救；m̄信ê，beh受定罪。Sìn lâi siū sóe-lé ê, beh tit-tio̍h kiù; m̄ sìn ê, beh siū tēng-chōe.

17信ê人beh有chiah-ê神蹟tè in；就是託重我ê名趕鬼，講新ê腔口；Sìn ê lâng beh ū chiah ê sîn-jiah tè in; chiū-sī thok-tiōng góa ê miâ kóaⁿ kúi, kóng sin ê khiuⁿ-kháu;

18掠蛇，á是lim-tio̍h甚麼毒，也lóng無傷害；koh用手hōaⁿ破病ê人，in就好。lia̍h chôa, á-sī lim-tio̍h sím-mi̍h to̍k, iā lóng bô siong-hāi; koh ēng chhiú hōaⁿ phòa-pīⁿ ê lâng, in chiū hó.

19主耶穌kap in講soah，就得tio̍h接納上天，坐tī上帝ê大pêng。Chú Iâ-so͘ kap in kóng soah, chiū tit-tio̍h chiap-la̍p chiūⁿ thiⁿ, chē tī Siōng-tè ê tōa pêng.

20學生出去，ta̍k所在宣傳，主kap in做工，用tè in ê神蹟證明chit-ê道理。À-bēng。Ha̍k-seng chhut-khì, ta̍k só͘-chāi soan-thoân, Chú kap in chòe kang, ēng tè in ê sîn-jiah chèng-bêng chit ê tō-lí. À-bēng.