1過kúi-nā日耶穌koh入迦百農；Kè kúi-nā ji̍t Iâ-so͘ koh ji̍p Ka-pek-lông;

2人聽見伊tī厝內就chōe-chōe人聚集致到無空地，連門口也無；伊就講道理hō͘ in聽。lâng thiaⁿ-kìⁿ I tī chhù-lāi chiū chōe-chōe lâng chū-chi̍p tì-kàu bô khàng-tōe, liân mn̂g-kháu iā bô; I chiū kóng tō-lí hō͘ in thiaⁿ.

3有帶一個piàn-sūi ê就近伊，是四人扛伊來。Ū tòa chi̍t ê piàn-sūi ê chiū-kūn I, sī sì lâng kng i lâi.

4因為人chōe，bōe會近óa，就tī耶穌ti暗 ê所在，拆厝頂hō͘伊開孔；就將piàn-sūi ê倒tī舖á墜落去。In-ūi lâng chōe, bōe-ōe kūn-óa, chiū tī Iâ-so͘ tiàm ê só͘-chāi, thiah chhù-téng hō͘ i kui khang; chiū chiong piàn-sūi ê tó tī pho͘-á tūi-lo̍h-khì.

5耶穌看見in ê信，就kā piàn-sūi ê講，細kiáⁿ，你ê罪赦免lah。Iâ-so͘ khòaⁿ-kìⁿ in ê sìn, chiū kā piàn-sūi ê kóng, Sòe-kiáⁿ, lí ê chōe sià-bián lah.

6有kúi-nā ê經學士坐tī hia，心內議論講，Chit-ê人怎樣án-ni講ah？Ū kúi-nā ê keng-ha̍k-sū chē tī hia, sim-lāi gī-lūn kóng, Chit ê lâng cháiⁿ-iūⁿ án-ni kóng ah?

7伊是僭權lām-sám；除上帝以外，是誰會赦免罪ah？I sī chhiàm-koân lām-sám; tû Siōng-tè í-gōa, chī-chūi ōe sià-bián chōe ah?

8耶穌心內liâm-piⁿ知in有chit號ê議論，就kā in講，Lín啥事tī心內議論chiah-ê ah？Iâ-so͘ sim-lāi liâm-piⁿ chai in ū chit hō ê gī-lūn, chiū kā in kóng, Lín siáⁿ-sū tī sim-lāi gī-lūn chiah-ê ah?

9Kā piàn-sūi ê講，你ê罪赦lah，á是講，起來，giâ你ê舖á來行，tá-lo̍h一項khah快？Kā piàn-sūi ê kóng, Lí ê chōe sià lah, á-sī kóng, Khí-lâi, giâ lí ê pho͘-á lâi kiâⁿ, tá-lo̍h chi̍t hāng khah khoài?

10獨獨beh hō͘ lín知人子tī地裡有權thang赦罪，(就kā piàn-sūi ê講)，To̍k-to̍k beh hō͘ lín chai Jîn-chú tī tōe-ni̍h ū koân thang sià chōe, (chiū kā piàn-sūi ê kóng),

11我kā你講，起來，giâ你ê舖á tò去你ê厝。Góa kā lí kóng, Khí-lâi, giâ lí ê pho͘-á tò-khì lí ê chhù.

12伊就起來，tī眾人ê面前隨時giâ伊ê舖á出去；致到眾人lóng gông-ngia̍h，歸榮光上帝講，阮從來bē bat看見án-ni-siⁿ。I chiū khí-lâi, tī chèng lâng ê bīn-chêng sûi-sî giâ i ê pho͘-á chhut-khì; tì-kàu chèng lâng lóng gông-ngia̍h, kui êng-kng Siōng-tè kóng, Goán chiông-lâi bē bat khòaⁿ-kìⁿ án-ni-siⁿ.

13耶穌koh出去到海墘；眾人lóng就近伊，就教示in。Iâ-so͘ koh chhut-khì kàu hái-kîⁿ; chèng lâng lóng chiū-kūn I, chiū kà-sī in.

14經過ê時看見A-le̍k-hui ê Kiáⁿ Lī-bī坐tī餉關，就kā伊講，Tè我。伊就起來tè伊。Keng-kè ê sî khòaⁿ-kìⁿ A-le̍k-hui ê kiáⁿ Lī-bī chē tī hiòng-koan, chiū kā i kóng, Tè góa. I chiū khí-lâi tè I.

15耶穌坐桌tī Lī-bī ê厝，有chōe-chōe抽餉ê kap pháiⁿ人kap耶穌chham伊ê學生同坐，因為hiah-ê人是chōe，也teh tè伊。Iâ-so͘ chē toh tī Lī-bī ê chhù, ū chōe-chōe thiu-hiòng ê kap pháiⁿ lâng kap Iâ-so͘ chham I ê ha̍k-seng tâng chē, in-ūi hiah ê lâng sī chōe, iā teh tè I.

16法利賽ê經學士看見伊kap pháiⁿ人以及抽餉ê saⁿ-kap食，就kā伊ê學生講，伊kap抽餉ê以及pháiⁿ人saⁿ-kap lim食ah。Hoat-lī-sài ê keng-ha̍k-sū khòaⁿ-kìⁿ I kap pháiⁿ lâng í-ki̍p thiu-hiòng ê saⁿ-kap chia̍h, chiū kā I ê ha̍k-seng kóng, I kap thiu-hiòng ê í-ki̍p pháiⁿ lâng saⁿ-kap lim-chia̍h ah.

17耶穌聽見，就kā in講，勇健ê無欠醫生，但是破病ê就tio̍h；我來m̄是beh招義人，是beh招pháiⁿ人。Iâ-so͘ thiaⁿ-kìⁿ, chiū kā in kóng, Ióng-kiāⁿ ê bô khiàm i-seng, nā-sī phòa-pīⁿ ê chiū tio̍h; góa lâi m̄ sī beh chio gī lâng, sī beh chio pháiⁿ lâng.

18約翰ê學生kap法利賽人當teh禁食；in就近來kā伊講，約翰ê學生kap法利賽人ê學生禁食，你ê學生無禁食，是怎樣？Iok-hān ê ha̍k-seng kap Hoat-lī-sài lâng tng teh kìm-chia̍h; in chiū-kūn lâi kā I kóng, Iok-hān ê ha̍k-seng kap Hoat-lī-sài lâng ê ha̍k-seng kìm-chia̍h, lí ê ha̍k-seng bô kìm-chia̍h, sī cháiⁿ-iūⁿ?

19耶穌kā in講，新kiáⁿ婿kap賀娶ê人tī-teh ê時，in kiám會禁食mah？新kiáⁿ婿iáu同tī-teh，in bōe會禁食。Iâ-so͘ kā in kóng, Sin-kiáⁿ-sài kap hō-chhōa ê lâng tī-teh ê sî, in kiám ōe kìm-chia̍h mah? sin-kiáⁿ-sài iáu tâng tī-teh, in bōe-ōe kìm-chia̍h.

20但是時日beh到，新kiáⁿ婿beh tùi in中間無去，hit日in就beh禁食。Nā-sī sî-ji̍t beh kàu, sin-kiáⁿ-sài beh tùi in tiong-kan bô-khì, hit ji̍t in chiū beh kìm-chia̍h.

21無人用新布補舊衫；若有，就所補ê hit塊會kiù裂伊，就是新ê kiù裂舊ê，伊ê破孔koh-khah大。Bô lâng ēng sin pò͘ pó͘ kū saⁿ; nā ū, chiū só͘ pó͘ ê hit tè ōe kiù-li̍h i, chiū-sī sin ê kiù-li̍h kū ê, i ê phòa-khang koh khah tōa.

22也無人用新酒tóe tī舊皮囊；若有，就新酒會爆裂皮囊，酒漏，lông也phah-pháiⁿ。獨獨新酒tio̍h入tī新皮囊。Iā bô lâng ēng sin chiú tóe tī kū phê-lông; nā ū, chiū sin chiú ōe piak-li̍h phê-lông, chiú lāu, lông iā phah-pháiⁿ. To̍k-to̍k sin chiú tio̍h ji̍p tī sin phê-lông.

23耶穌tī安歇日tùi麥園經過，伊ê學生行路ê時摘麥穗。Iâ-so͘ tī an-hioh-ji̍t tùi be̍h-hn̂g keng-kè, I ê ha̍k-seng kiâⁿ lō͘ ê sî tiah be̍h-sūi.

24法利賽人kā伊講，你看，in tī安歇日行所m̄應該行ê，是怎樣？Hoat-lī-sài lâng kā I kóng, Lí khòaⁿ, in tī an-hioh-ji̍t kiâⁿ só͘ m̄ eng-kai kiâⁿ ê, sī cháiⁿ-iūⁿ?

25耶穌kā in講，大衛kap跟tè ê人，當欠缺koh iau ê時所行ê，lín bē讀tio̍h mah？Iâ-so͘ kā in kóng, Tāi-pi̍t kap kun-tè ê lâng, tng khiàm-kheh koh iau ê sî só͘ kiâⁿ ê, lín bē tha̍k-tio̍h mah?

26就是當A-pí-a-thah做祭司頭ê時伊有怎樣入上帝ê厝，食排列ê餅，續hō͘跟tè伊ê人；chit號餅，若m̄是祭司，就m̄-thang食。Chiū-sī tng A-pí-a-thah chòe chè-si-thâu ê sî i ū cháiⁿ-iūⁿ ji̍p Siōng-tè ê chhù, chia̍h pâi-lia̍t ê piáⁿ, sòa hō͘ kun-tè i ê lâng; chi̍t hō piáⁿ, nā m̄ sī chè-si, chiū m̄ thang chia̍h.

27Koh kā in講，安歇日為tio̍h人來設立，m̄是人為tio̍h安歇日。Koh kā in kóng, An-hioh-ji̍t ūi-tio̍h lâng lâi siat-li̍p, m̄ sī lâng ūi-tio̍h an-hioh-ji̍t.

28所以人子也是安歇日ê主。Só͘-í Jîn-chú iā sī an-hioh-ji̍t ê Chú.

1耶穌koh入會堂；tī hia有人一手枯焦ê。Iâ-so͘ koh ji̍p hōe-tn̂g; tī hia ū lâng chi̍t chhiú ko͘-tâ ê.

2In當看伊tī安歇日beh醫治iá無；意思ài beh告伊。In tng-khòaⁿ I tī an-hioh-ji̍t beh i-tī i á bô; ì-sù ài beh kò I.

3伊就kā手枯焦ê講，起來，khiā tī中央。I chiū kā chhiú ko͘-tâ ê kóng, Khí-lâi, khiā tī tiong-ng.

4就kā in講，安歇日行好，行pháiⁿ，救性命，害性命，tá-lo̍h一項是合？In靜靜。Chiū kā in kóng, An-hioh-ji̍t kiâⁿ hó, kiâⁿ pháiⁿ, kiù sìⁿ-miā, hāi sìⁿ-miā, tá-lo̍h chi̍t hāng sī ha̍p? In chēng-chēng.

5伊就受氣，四界看in，憂悶in ê心硬，kā hit-ê人講，伸你ê手。伊就伸去，手就好好。I chiū siū-khì, sì-kè khòaⁿ in, iu-būn in ê sim ngī, kā hit ê lâng kóng, Chhun lí ê chhiú. I chiū chhun-khì, chhiú chiū hó-hó.

6法利賽人出去，就隨時kap希律ê黨saⁿ-kap計謀攻擊耶穌，看thang怎樣滅伊。Hoat-lī-sài lâng chhut-khì, chiū sûi-sî kap Hi-lu̍t ê tóng saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

7耶穌kap伊ê學生退去海邊，有kui大陣ê人tùi加利利tè伊；Iâ-so͘ kap I ê ha̍k-seng thè-khì hái-piⁿ, ū kui tōa tīn ê lâng tùi Ka-lī-lī tè I;

8也有tùi猶太、耶路撒冷、Í-thó͘-mái、約旦河外，kap Chhui-lô Se-tùn境內kui大陣ê人聽見伊所行hiah-ni̍h大ê事，就來就近伊。iā ū tùi Iû-thài, Iâ-lō͘-sat-léng, Í-thó͘-mái. Iok-tàn hô gōa, kap Chhui-lô Se-tùn kéng-lāi kui tōa tīn ê lâng thiaⁿ-kìⁿ I só͘ kiâⁿ hiah-ni̍h tōa ê sū, chiū lâi chiū-kūn I.

9因為人chōe，伊就kā伊ê學生講tio̍h備辦船á來thèng候，免得in oe-khoeh伊。In-ūi lâng chōe, I chiū kā I ê ha̍k-seng kóng tio̍h pī-pān chûn-á lâi thèng-hāu, bián-tit in oe-khoeh I.

10因為伊bat醫好chōe-chōe人，致到凡有破病ê逼óa，ài beh摸伊。In-ūi I bat i-hó chōe-chōe lâng, tì-kàu hoān ū phòa-pīⁿ ê pek-óa, ài beh bong I.

11Hiah-ê邪神一下看見伊，就仆tī伊ê面前喉叫講，你是上帝ê Kiáⁿ。Hiah ê siâ-sîn chi̍t ē khòaⁿ-kìⁿ I, chiū phak tī I ê bīn-chêng âu-kiò kóng, Lí sī Siōng-tè ê Kiáⁿ.

12伊chia̍p-chia̍p警戒in，莫得kā伊報揚。I chia̍p-chia̍p kéng-kài in, bo̍h-tit kā I pò-iông.

13伊上山，照家己所ài來召人；in來就近伊。I chiūⁿ soaⁿ, chiàu ka-kī só͘ ài lâi tiàu lâng; in lâi chiū-kūn I.

14就設立十二人，thang kap伊常常tī-teh，也thang差in去宣傳道理，Chiū siat-li̍p cha̍p-jī lâng, thang kap I siông-siông tī-teh, iā thang chhe in khì soan-thoân tō-lí,

15koh有趕鬼ê權。koh ū kóaⁿ kúi ê koân.

16就稱西門做彼得。Chiū chheng Se-bûn chòe Pí-tek.

17Koh有西庇太ê Kiáⁿ雅各，kap雅各ê兄弟約翰；chit兩人伊稱in做Poàn-年-kî，就是雷ê Kiáⁿ；Koh ū Se-pí-thài ê kiáⁿ Ngá-kok, kap Ngá-kok ê hiaⁿ-tī Iok-hān; chit nn̄g lâng I chheng in chòe Poàn-nî-kî, chiū-sī Lûi ê kiáⁿ;

18koh有安得烈、腓力、Pa-to-lô-mái、馬太、To-má，A-le̍k-hui ê Kiáⁿ雅各，koh Ta̍t-thài，kap Ka-ná-nî ê西門，koh ū An-tek-lia̍t, Hui-le̍k, Pa-to-lô-mái, Má-thài, To-má, A-le̍k-hui ê kiáⁿ Ngá-kok, koh Ta̍t-thài, kap Ka-ná-nî ê Se-bûn,

19kap賣伊ê加略人猶大。kap bōe I ê Ka-lio̍k lâng Iû-tāi.

20耶穌入厝，眾人koh聚集，致到in bōe顧得食。Iâ-so͘ ji̍p chhù. Chèng lâng koh chū-chi̍p, tì-kàu in bōe kò͘-tit chia̍h.

21伊ê親人聽見，就出來beh kā伊掠teh；因為講，伊是癲狂。I ê chhin-lâng thiaⁿ-kìⁿ, chiū chhut-lâi beh kā I lia̍h-teh; in-ūi kóng, I sī tian-kông.

22Tùi耶路撒冷落來ê經學士講，伊是hō͘ Pia̍t-se-pok附身；koh講，伊是óa靠鬼王來趕鬼。Tùi Iâ-lō͘-sat-léng lo̍h-lâi ê keng-ha̍k-sū kóng, I sī hō͘ Pia̍t-se-pok hū-sin; koh kóng, I sī óa-khò kúi-ông lâi kóaⁿ kúi.

23伊叫in來，設譬喻kā in講，撒旦t海-thó話趕撒旦？I kiò in lâi, siat phì-jū kā in kóng, Sat-tàn thái-thó ōe kóaⁿ Sat-tàn?

24國家己爭拚，hit-ê國就khiā bōe-tiâu。Kok nā ka-kī cheng-piàⁿ, hit ê kok chiū khiā bōe tiâu.

25家若家己爭拚，hit-ê家也khiā bōe-tiâu。Ke nā ka-kī cheng-piàⁿ, hit ê ke iā khiā bōe tiâu.

26撒旦若起來家己爭拚，伊也khiā bōe-tiâu，的確會滅。Sat-tàn nā khí-lâi ka-kī cheng-piàⁿ, i iā khiā bōe tiâu, tek-khak ōe bia̍t.

27無人會入猛人ê厝來劫伊ê家伙；tio̍h事先縛hit-ê猛人，然後chiah beh劫伊ê厝。Bô lâng ōe ji̍p béng lâng ê chhù lâi kiap i ê ke-hé; tio̍h tāi-seng pa̍k hit ê béng lâng, jiân-āu chiah beh kiap i ê chhù.

28我實在kā lín講，見若世間人所犯ê罪，kap in所謗瀆一切謗瀆ê話，lóng beh赦免in；Góa si̍t-chāi kā lín kóng, Kìⁿ-nā sè-kan lâng só͘ hoān ê chōe, kap in só͘ pòng-to̍k it-chhè pòng-to̍k ê ōe, lóng beh sià-bián in;

29獨獨見若謗瀆聖神ê，永遠無得tio̍h赦免，就是患tio̍h永世代ê罪。to̍k-to̍k kìⁿ-nā pòng-to̍k Sèng Sîn ê, éng-oán bô tit-tio̍h sià-bián, chiū-sī hoān-tio̍h éng sè-tāi ê chōe.

30這是因為hiah-ê人講，伊患tio̍h邪神。Che sī in-ūi hiah ê lâng kóng, I hoān-tio̍h siâ-sîn.

31伊ê老母kap伊ê兄弟來khiā tī外面，差人去叫伊。I ê lāu-bú kap I ê hiaⁿ-tī lâi khiā tī gōa-bīn, chhe lâng khì kiò I.

32有kui陣ê人圍伊teh坐；有人kā伊講，你看，你ê老母kap你ê兄弟tī外面teh chhē你。Ū kui tīn ê lâng ûi I teh chē; ū lâng kā I kóng, Lí khòaⁿ, lí ê lāu-bú kap lí ê hiaⁿ-tī tī gōa-bīn teh chhē lí.

33伊就應講，甚麼人是我ê老母，我ê兄弟ah？I chiū ìn kóng, Sím-mi̍h lâng sī góa ê lāu-bú, góa ê hiaⁿ-tī ah?

34就四界看hiah-ê圍伊teh坐ê人講，Chiū sì-kè khòaⁿ hiah ê ûi I teh chē ê lâng kóng,

35你看，我ê老母kap我ê兄弟。因為見若行上帝ê旨意ê，就是我ê兄弟姊妹kap老母。Lí khòaⁿ, góa ê lāu-bú kap góa ê hiaⁿ-tī. In-ūi kìⁿ-nā kiâⁿ Siōng-tè ê chí-ì ê, chiū-sī góa ê hiaⁿ-tī chí-bē kap lāu-bú.

1耶穌koh tī海邊開嘴教示，有kui大陣ê人聚集就近伊，致到伊上船浮tī海面teh坐；眾人lóng óa近海，khiā tī乾地。Iâ-so͘ koh tī hái-piⁿ khui chhùi kà-sī. Ū kui tōa tīn ê lâng chū-chi̍p chiū-kūn I, tì-kàu I chiūⁿ chûn phû tī hái-bīn teh chē; chèng lâng lóng óa-kūn hái, khiā tī ta tōe.

2伊就用譬喻教示in chōe-chōe項；I chiū ēng phì-jū kà-sī in chōe-chōe hāng;

3teh教示ê時kā in講，Tio̍h聽ah：你看，有掖種ê出去掖種；teh kà-sī ê sî kā in kóng, Tio̍h thiaⁿ ah: Lí khòaⁿ, ū iā chéng ê chhut-khì iā chéng;

4掖ê時，有ê ka-la̍uh tī路邊，飛鳥到，一盡食伊。iā ê sî, ū-ê ka-la̍uh tī lō͘-pīⁿ, pe-chiáu kàu, it-chīn chia̍h i.

5有ê ka-la̍uh tī石格ê地，土淺ê位；因為土無深，就發真緊；Ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín;

6但是日出，曝伊，因為無根就枯焦。nā-sī ji̍t chhut, pha̍k i, in-ūi bô kun chiū ko͘-tâ.

7有ê ka-la̍uh tī刺á內，刺á發起遮蔽伊，就無結實。Ū-ê ka-la̍uh tī chhì-á-lāi, chhì-á hoat-khí jia-pè i, chiū bô kiat-si̍t.

8有ê ka-la̍uh tī好ê土地，就發起ná大叢，結實，有ê三十倍，有ê六十倍，有ê一百倍。Ū-ê ka-la̍uh tī hó ê thó͘-tōe, chiū hoat-khí ná tōa châng, kiat-si̍t, ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē.

9Koh講，有耳孔thang聽ê，tio̍h聽。Koh kóng, Ū hī-khang thang thiaⁿ ê, tio̍h thiaⁿ.

10耶穌家己tī-teh ê時，tè伊ê人kap十二個學生問伊chiah-ê譬喻。Iâ-so͘ ka-kī tī-teh ê sî, tè I ê lâng kap cha̍p-jī ê ha̍k-seng mn̄g I chiah ê phì-jū.

11伊就kā in講，上帝國ê奧妙有hō͘ lín；但是hiah-ê外面人凡事是用譬喻；I chiū kā in kóng, Siōng-tè kok ê ò-biāu ū hō͘ lín; nā-sī hiah ê gōa-bīn lâng hoān-sū sī ēng phì-jū;

12hō͘ in看，會看，也bōe見；聽，會聽也bōe明；驚了in oa̍t-l應-tńg，來得tio̍h赦免。hō͘ in khòaⁿ, ōe khòaⁿ, iā bōe kìⁿ; thiaⁿ, ōe thiaⁿ iā bōe bêng; kiaⁿ-liáu in oa̍t-lìn-tńg, lâi tit-tio̍h sià-bián.

13Koh kā in講，Lín bōe曉得chit-ê譬喻mah？也t海-thó會知眾譬喻ah？Koh kā in kóng, Lín bōe hiáu-tit chit ê phì-jū mah? iā thái-thó ōe chai chèng phì-jū ah?

14掖種ê是報揚道理。Iā chéng ê sī pò-iông tō-lí.

15掖tī路邊，報揚道理ê所在ê，就是人聽道理，撒旦liâm-piⁿ來，將所掖tī in心內ê道理搶去。Iā tī lō͘-piⁿ, pò-iông tō-lí ê só͘-chāi ê, chiū-sī lâng thiaⁿ tō-lí, Sat-tàn liâm-piⁿ lâi, chiong só͘ iā tī in sim-lāi ê tō-lí chhiúⁿ-khì.

16Chiah-ê親像掖tī石格ê地ê，就是in聽tio̍h道理，liâm-piⁿ歡喜承受伊；Chiah-ê chhin-chhiūⁿ iā tī chio̍h-keh ê tōe ê, chiū-sī in thiaⁿ-tio̍h tō-lí, liâm-piⁿ hoaⁿ-hí sêng-siū i;

17但是內面無根，不過是暫時nā-tiāⁿ；到為tio̍h道理tú-tio̍h有患難khún-tio̍k，liâm-piⁿ tio̍h-tak。nā-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hoān-lān khún-tio̍k, liâm-piⁿ tio̍h-tak.

18掖tī刺á內ê，就是人已經聽tio̍h道理，Iā tī chhì-á lāi ê, chiū-sī lâng í-keng thiaⁿ-tio̍h tō-lí,

19就有世間ê掛慮，錢財ê迷惑，kap別物ê私慾入來遮蔽hit-ê道理，就無結實。chiū ū sè-kan ê khòa-lū, chîⁿ-châi ê bê-he̍k, kap pa̍t mi̍h ê su-io̍k ji̍p lâi jia-pè hit ê tō-lí, chiū bô kiat-si̍t.

20Chiah-ê掖tī好ê土地ê，就是人聽道理，亦承受伊，亦結實，有ê三十倍，有ê六十倍，有ê一百倍。Chiah-ê iā tī hó ê thó͘-tōe ê, chiū-sī lâng thiaⁿ tō-lí, ia̍h sêng-siū i, ia̍h kiat-si̍t, ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē.

21Koh kā in講，人kia̍h燈來，kiám是beh hē-tī斗下，á是床下？kiám m̄是beh hē-tī燈台頂？Koh kā in kóng, Lâng kia̍h teng lâi, kiám sī beh hē tī táu ē á-sī chhn̂g ē? kiám m̄ sī beh hē tī teng-tâi téng?

22因為有隱密ê，無m̄是beh顯出；收khǹg ê，無m̄是beh露現。In-ūi ū ún-ba̍t ê, bô m̄ sī beh hián-chhut; siu-khǹg ê, bô m̄ sī beh lō͘-hiān.

23若有耳孔thang聽ê，tio̍h聽。Nā ū hī-khang thang thiaⁿ ê, tio̍h thiaⁿ.

24Koh kā in講，Tio̍h謹慎所聽ê；lín用甚麼量來量，也beh用這量hō͘ lín；koh beh加添hō͘ lín。Koh kā in kóng, Tio̍h kín-sīn só͘ thiaⁿ ê; lín ēng sím-mi̍h niû lâi niû, iā beh ēng che niû hō͘ lín; koh beh ke-thiⁿ hō͘ lín.

25因為見若有ê，beh hō͘伊；無ê，連伊所有ê，也beh kā伊搶去。In-ūi kìⁿ-nā ū ê, beh hō͘ i; bô ê, liân i só͘ ū ê, iā beh kā i chhiúⁿ-khì.

26Koh講，上帝ê國親像人掖種tī地裡；Koh kóng, Siōng-tè ê kok chhin-chhiūⁿ lâng iā chéng tī tōe-ni̍h;

27暝時睏，日時起來，hit-ê種子發，koh漸漸大，伊m̄知hit-ê所以然。mî-sî khùn, ji̍t-sî khí-lâi, hit ê chéng-chí hoat, koh chiām-chiām tōa, i m̄ chai hit ê só͘-í-jiân.

28地自然生物；起頭是秧，後來有穗，koh後來穗就結成五穀。Tōe chū-jiân siⁿ mi̍h; khí-thâu sī ng, āu-lâi ū sūi, koh āu-lâi sūi chiū kiat-chiâⁿ gō͘-kak.

29五穀已經熟，就用koeh-á；因為收割ê時到lah。Gō͘-kak í-keng se̍k, chiū ēng koeh-á; in-ūi siu-koah ê sî kàu lah.

30Koh講，上帝ê國咱beh怎樣來比並伊？á是用甚麼譬喻表明伊ah？Koh kóng, Siōng-tè ê kok lán beh cháiⁿ-iūⁿ lâi pí-phēng i? á-sī ēng sím-mi̍h phì-jū piáu-bêng i ah?

31是親像一粒芥菜子掖落地，雖然比地上百項ê種子khah細粒，Sī chhin-chhiūⁿ chi̍t lia̍p kòa-chhài chí iā lo̍h tōe, sui-jiân pí tōe-chiūⁿ pah-hāng ê chéng-chí khah sòe lia̍p,

32但是已經掖落去，就發生漸漸khah大tī lóng總ê菜蔬；koh發出大ê枝，致到空中ê鳥ōe歇伊ê蔭下。nā-sī í-keng iā lo̍h-khì, chiū hoat-siⁿ chiām-chiām khah tōa tī lóng-chóng ê chhài-soe; koh hoat-chhut tōa ê ki tì-kàu khong-tiong ê chiáu ōe hioh i ê ìm-ē.

33伊用chōe-chōe親像chit號ê譬喻傳道理hō͘ in，照in所會聽ê。I ēng chōe-chōe chhin-chhiūⁿ chit hō ê phì-jū thoân tō-lí hō͘ in, chiàu in só͘ ōe thiaⁿ ê.

34若無用譬喻就無kā in講；到單單學生kap伊tī-teh ê時，就lóng總kā in解明。Nā bô ēng phì-jū chiū bô kā in kóng; kàu toaⁿ-toaⁿ ha̍k-seng kap I tī-teh ê sî, chiū lóng-chóng kā in kóe-bêng.

35Hit日已經暗，伊kā學生講，咱過來去hit-pêng岸。Hit ji̍t í-keng àm I kā ha̍k-seng kóng, Lán kè-lâi khì hit pêng hōaⁿ.

36In離開眾人，chhōa耶穌就án-ni落船，kap in saⁿ-kap去；iáu有別隻船kap伊去。In lī-khui chèng lâng, chhōa Iâ-so͘ chiū án-ni lo̍h chûn, kap in saⁿ-kap khì; iáu ū pa̍t chiah chûn kap I khì.

37報頭風大起，湧潑入船，致到船teh-beh滿。Pò-thâu hong tōa khí, éng phoah ji̍p chûn, tì-kàu chûn teh-beh móa.

38但是伊tī船尾倒tī枕頭teh睏；學生叫伊醒，kā伊講，先生，阮beh無命，你無要緊mah？Nā-sī I tī chûn-bé tó tī chím-thâu teh khùn; ha̍k-seng kiò I chhíⁿ, kā I kóng, Sian-siⁿ, goán beh bô miā, lí bô iàu-kín mah?

39伊就醒，責備風，kā海講，Tio̍h靜靜。風就soah，也大平定。I chiū chhíⁿ, chek-pī hong, kā hái kóng, Tio̍h chēng-chēng. Hong chiū soah, iā tōa pîⁿ-tiāⁿ.

40伊就kā in講，Lín啥事hiah驚？lín iáu-bē有信mah？I chiū kā in kóng, Lín siáⁿ-sū hiah kiaⁿ? lín iáu-bē ū sìn mah?

41In就大驚，saⁿ-kap講，chit-ê是甚麼人，連風kap海lóng順伊？In chiū tōa kiaⁿ, saⁿ-kap kóng, Chit-ê sī sím-mi̍h lâng, liân hong kap hái lóng sūn I?