1耶穌koh入會堂；tī hia有人一手枯焦ê。Iâ-so͘ koh ji̍p hōe-tn̂g; tī hia ū lâng chi̍t chhiú ko͘-tâ ê.

2In當看伊tī安歇日beh醫治iá無；意思ài beh告伊。In tng-khòaⁿ I tī an-hioh-ji̍t beh i-tī i á bô; ì-sù ài beh kò I.

3伊就kā手枯焦ê講，起來，khiā tī中央。I chiū kā chhiú ko͘-tâ ê kóng, Khí-lâi, khiā tī tiong-ng.

4就kā in講，安歇日行好，行pháiⁿ，救性命，害性命，tá-lo̍h一項是合？In靜靜。Chiū kā in kóng, An-hioh-ji̍t kiâⁿ hó, kiâⁿ pháiⁿ, kiù sìⁿ-miā, hāi sìⁿ-miā, tá-lo̍h chi̍t hāng sī ha̍p? In chēng-chēng.

5伊就受氣，四界看in，憂悶in ê心硬，kā hit-ê人講，伸你ê手。伊就伸去，手就好好。I chiū siū-khì, sì-kè khòaⁿ in, iu-būn in ê sim ngī, kā hit ê lâng kóng, Chhun lí ê chhiú. I chiū chhun-khì, chhiú chiū hó-hó.

6法利賽人出去，就隨時kap希律ê黨saⁿ-kap計謀攻擊耶穌，看thang怎樣滅伊。Hoat-lī-sài lâng chhut-khì, chiū sûi-sî kap Hi-lu̍t ê tóng saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

7耶穌kap伊ê學生退去海邊，有kui大陣ê人tùi加利利tè伊；Iâ-so͘ kap I ê ha̍k-seng thè-khì hái-piⁿ, ū kui tōa tīn ê lâng tùi Ka-lī-lī tè I;

8也有tùi猶太、耶路撒冷、Í-thó͘-mái、約旦河外，kap Chhui-lô Se-tùn境內kui大陣ê人聽見伊所行hiah-ni̍h大ê事，就來就近伊。iā ū tùi Iû-thài, Iâ-lō͘-sat-léng, Í-thó͘-mái. Iok-tàn hô gōa, kap Chhui-lô Se-tùn kéng-lāi kui tōa tīn ê lâng thiaⁿ-kìⁿ I só͘ kiâⁿ hiah-ni̍h tōa ê sū, chiū lâi chiū-kūn I.

9因為人chōe，伊就kā伊ê學生講tio̍h備辦船á來thèng候，免得in oe-khoeh伊。In-ūi lâng chōe, I chiū kā I ê ha̍k-seng kóng tio̍h pī-pān chûn-á lâi thèng-hāu, bián-tit in oe-khoeh I.

10因為伊bat醫好chōe-chōe人，致到凡有破病ê逼óa，ài beh摸伊。In-ūi I bat i-hó chōe-chōe lâng, tì-kàu hoān ū phòa-pīⁿ ê pek-óa, ài beh bong I.

11Hiah-ê邪神一下看見伊，就仆tī伊ê面前喉叫講，你是上帝ê Kiáⁿ。Hiah ê siâ-sîn chi̍t ē khòaⁿ-kìⁿ I, chiū phak tī I ê bīn-chêng âu-kiò kóng, Lí sī Siōng-tè ê Kiáⁿ.

12伊chia̍p-chia̍p警戒in，莫得kā伊報揚。I chia̍p-chia̍p kéng-kài in, bo̍h-tit kā I pò-iông.

13伊上山，照家己所ài來召人；in來就近伊。I chiūⁿ soaⁿ, chiàu ka-kī só͘ ài lâi tiàu lâng; in lâi chiū-kūn I.

14就設立十二人，thang kap伊常常tī-teh，也thang差in去宣傳道理，Chiū siat-li̍p cha̍p-jī lâng, thang kap I siông-siông tī-teh, iā thang chhe in khì soan-thoân tō-lí,

15koh有趕鬼ê權。koh ū kóaⁿ kúi ê koân.

16就稱西門做彼得。Chiū chheng Se-bûn chòe Pí-tek.

17Koh有西庇太ê Kiáⁿ雅各，kap雅各ê兄弟約翰；chit兩人伊稱in做Poàn-年-kî，就是雷ê Kiáⁿ；Koh ū Se-pí-thài ê kiáⁿ Ngá-kok, kap Ngá-kok ê hiaⁿ-tī Iok-hān; chit nn̄g lâng I chheng in chòe Poàn-nî-kî, chiū-sī Lûi ê kiáⁿ;

18koh有安得烈、腓力、Pa-to-lô-mái、馬太、To-má，A-le̍k-hui ê Kiáⁿ雅各，koh Ta̍t-thài，kap Ka-ná-nî ê西門，koh ū An-tek-lia̍t, Hui-le̍k, Pa-to-lô-mái, Má-thài, To-má, A-le̍k-hui ê kiáⁿ Ngá-kok, koh Ta̍t-thài, kap Ka-ná-nî ê Se-bûn,

19kap賣伊ê加略人猶大。kap bōe I ê Ka-lio̍k lâng Iû-tāi.

20耶穌入厝，眾人koh聚集，致到in bōe顧得食。Iâ-so͘ ji̍p chhù. Chèng lâng koh chū-chi̍p, tì-kàu in bōe kò͘-tit chia̍h.

21伊ê親人聽見，就出來beh kā伊掠teh；因為講，伊是癲狂。I ê chhin-lâng thiaⁿ-kìⁿ, chiū chhut-lâi beh kā I lia̍h-teh; in-ūi kóng, I sī tian-kông.

22Tùi耶路撒冷落來ê經學士講，伊是hō͘ Pia̍t-se-pok附身；koh講，伊是óa靠鬼王來趕鬼。Tùi Iâ-lō͘-sat-léng lo̍h-lâi ê keng-ha̍k-sū kóng, I sī hō͘ Pia̍t-se-pok hū-sin; koh kóng, I sī óa-khò kúi-ông lâi kóaⁿ kúi.

23伊叫in來，設譬喻kā in講，撒旦t海-thó話趕撒旦？I kiò in lâi, siat phì-jū kā in kóng, Sat-tàn thái-thó ōe kóaⁿ Sat-tàn?

24國家己爭拚，hit-ê國就khiā bōe-tiâu。Kok nā ka-kī cheng-piàⁿ, hit ê kok chiū khiā bōe tiâu.

25家若家己爭拚，hit-ê家也khiā bōe-tiâu。Ke nā ka-kī cheng-piàⁿ, hit ê ke iā khiā bōe tiâu.

26撒旦若起來家己爭拚，伊也khiā bōe-tiâu，的確會滅。Sat-tàn nā khí-lâi ka-kī cheng-piàⁿ, i iā khiā bōe tiâu, tek-khak ōe bia̍t.

27無人會入猛人ê厝來劫伊ê家伙；tio̍h事先縛hit-ê猛人，然後chiah beh劫伊ê厝。Bô lâng ōe ji̍p béng lâng ê chhù lâi kiap i ê ke-hé; tio̍h tāi-seng pa̍k hit ê béng lâng, jiân-āu chiah beh kiap i ê chhù.

28我實在kā lín講，見若世間人所犯ê罪，kap in所謗瀆一切謗瀆ê話，lóng beh赦免in；Góa si̍t-chāi kā lín kóng, Kìⁿ-nā sè-kan lâng só͘ hoān ê chōe, kap in só͘ pòng-to̍k it-chhè pòng-to̍k ê ōe, lóng beh sià-bián in;

29獨獨見若謗瀆聖神ê，永遠無得tio̍h赦免，就是患tio̍h永世代ê罪。to̍k-to̍k kìⁿ-nā pòng-to̍k Sèng Sîn ê, éng-oán bô tit-tio̍h sià-bián, chiū-sī hoān-tio̍h éng sè-tāi ê chōe.

30這是因為hiah-ê人講，伊患tio̍h邪神。Che sī in-ūi hiah ê lâng kóng, I hoān-tio̍h siâ-sîn.

31伊ê老母kap伊ê兄弟來khiā tī外面，差人去叫伊。I ê lāu-bú kap I ê hiaⁿ-tī lâi khiā tī gōa-bīn, chhe lâng khì kiò I.

32有kui陣ê人圍伊teh坐；有人kā伊講，你看，你ê老母kap你ê兄弟tī外面teh chhē你。Ū kui tīn ê lâng ûi I teh chē; ū lâng kā I kóng, Lí khòaⁿ, lí ê lāu-bú kap lí ê hiaⁿ-tī tī gōa-bīn teh chhē lí.

33伊就應講，甚麼人是我ê老母，我ê兄弟ah？I chiū ìn kóng, Sím-mi̍h lâng sī góa ê lāu-bú, góa ê hiaⁿ-tī ah?

34就四界看hiah-ê圍伊teh坐ê人講，Chiū sì-kè khòaⁿ hiah ê ûi I teh chē ê lâng kóng,

35你看，我ê老母kap我ê兄弟。因為見若行上帝ê旨意ê，就是我ê兄弟姊妹kap老母。Lí khòaⁿ, góa ê lāu-bú kap góa ê hiaⁿ-tī. In-ūi kìⁿ-nā kiâⁿ Siōng-tè ê chí-ì ê, chiū-sī góa ê hiaⁿ-tī chí-bē kap lāu-bú.

1耶穌koh tī海邊開嘴教示，有kui大陣ê人聚集就近伊，致到伊上船浮tī海面teh坐；眾人lóng óa近海，khiā tī乾地。Iâ-so͘ koh tī hái-piⁿ khui chhùi kà-sī. Ū kui tōa tīn ê lâng chū-chi̍p chiū-kūn I, tì-kàu I chiūⁿ chûn phû tī hái-bīn teh chē; chèng lâng lóng óa-kūn hái, khiā tī ta tōe.

2伊就用譬喻教示in chōe-chōe項；I chiū ēng phì-jū kà-sī in chōe-chōe hāng;

3teh教示ê時kā in講，Tio̍h聽ah：你看，有掖種ê出去掖種；teh kà-sī ê sî kā in kóng, Tio̍h thiaⁿ ah: Lí khòaⁿ, ū iā chéng ê chhut-khì iā chéng;

4掖ê時，有ê ka-la̍uh tī路邊，飛鳥到，一盡食伊。iā ê sî, ū-ê ka-la̍uh tī lō͘-pīⁿ, pe-chiáu kàu, it-chīn chia̍h i.

5有ê ka-la̍uh tī石格ê地，土淺ê位；因為土無深，就發真緊；Ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín;

6但是日出，曝伊，因為無根就枯焦。nā-sī ji̍t chhut, pha̍k i, in-ūi bô kun chiū ko͘-tâ.

7有ê ka-la̍uh tī刺á內，刺á發起遮蔽伊，就無結實。Ū-ê ka-la̍uh tī chhì-á-lāi, chhì-á hoat-khí jia-pè i, chiū bô kiat-si̍t.

8有ê ka-la̍uh tī好ê土地，就發起ná大叢，結實，有ê三十倍，有ê六十倍，有ê一百倍。Ū-ê ka-la̍uh tī hó ê thó͘-tōe, chiū hoat-khí ná tōa châng, kiat-si̍t, ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē.

9Koh講，有耳孔thang聽ê，tio̍h聽。Koh kóng, Ū hī-khang thang thiaⁿ ê, tio̍h thiaⁿ.

10耶穌家己tī-teh ê時，tè伊ê人kap十二個學生問伊chiah-ê譬喻。Iâ-so͘ ka-kī tī-teh ê sî, tè I ê lâng kap cha̍p-jī ê ha̍k-seng mn̄g I chiah ê phì-jū.

11伊就kā in講，上帝國ê奧妙有hō͘ lín；但是hiah-ê外面人凡事是用譬喻；I chiū kā in kóng, Siōng-tè kok ê ò-biāu ū hō͘ lín; nā-sī hiah ê gōa-bīn lâng hoān-sū sī ēng phì-jū;

12hō͘ in看，會看，也bōe見；聽，會聽也bōe明；驚了in oa̍t-l應-tńg，來得tio̍h赦免。hō͘ in khòaⁿ, ōe khòaⁿ, iā bōe kìⁿ; thiaⁿ, ōe thiaⁿ iā bōe bêng; kiaⁿ-liáu in oa̍t-lìn-tńg, lâi tit-tio̍h sià-bián.

13Koh kā in講，Lín bōe曉得chit-ê譬喻mah？也t海-thó會知眾譬喻ah？Koh kā in kóng, Lín bōe hiáu-tit chit ê phì-jū mah? iā thái-thó ōe chai chèng phì-jū ah?

14掖種ê是報揚道理。Iā chéng ê sī pò-iông tō-lí.

15掖tī路邊，報揚道理ê所在ê，就是人聽道理，撒旦liâm-piⁿ來，將所掖tī in心內ê道理搶去。Iā tī lō͘-piⁿ, pò-iông tō-lí ê só͘-chāi ê, chiū-sī lâng thiaⁿ tō-lí, Sat-tàn liâm-piⁿ lâi, chiong só͘ iā tī in sim-lāi ê tō-lí chhiúⁿ-khì.

16Chiah-ê親像掖tī石格ê地ê，就是in聽tio̍h道理，liâm-piⁿ歡喜承受伊；Chiah-ê chhin-chhiūⁿ iā tī chio̍h-keh ê tōe ê, chiū-sī in thiaⁿ-tio̍h tō-lí, liâm-piⁿ hoaⁿ-hí sêng-siū i;

17但是內面無根，不過是暫時nā-tiāⁿ；到為tio̍h道理tú-tio̍h有患難khún-tio̍k，liâm-piⁿ tio̍h-tak。nā-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hoān-lān khún-tio̍k, liâm-piⁿ tio̍h-tak.

18掖tī刺á內ê，就是人已經聽tio̍h道理，Iā tī chhì-á lāi ê, chiū-sī lâng í-keng thiaⁿ-tio̍h tō-lí,

19就有世間ê掛慮，錢財ê迷惑，kap別物ê私慾入來遮蔽hit-ê道理，就無結實。chiū ū sè-kan ê khòa-lū, chîⁿ-châi ê bê-he̍k, kap pa̍t mi̍h ê su-io̍k ji̍p lâi jia-pè hit ê tō-lí, chiū bô kiat-si̍t.

20Chiah-ê掖tī好ê土地ê，就是人聽道理，亦承受伊，亦結實，有ê三十倍，有ê六十倍，有ê一百倍。Chiah-ê iā tī hó ê thó͘-tōe ê, chiū-sī lâng thiaⁿ tō-lí, ia̍h sêng-siū i, ia̍h kiat-si̍t, ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē.

21Koh kā in講，人kia̍h燈來，kiám是beh hē-tī斗下，á是床下？kiám m̄是beh hē-tī燈台頂？Koh kā in kóng, Lâng kia̍h teng lâi, kiám sī beh hē tī táu ē á-sī chhn̂g ē? kiám m̄ sī beh hē tī teng-tâi téng?

22因為有隱密ê，無m̄是beh顯出；收khǹg ê，無m̄是beh露現。In-ūi ū ún-ba̍t ê, bô m̄ sī beh hián-chhut; siu-khǹg ê, bô m̄ sī beh lō͘-hiān.

23若有耳孔thang聽ê，tio̍h聽。Nā ū hī-khang thang thiaⁿ ê, tio̍h thiaⁿ.

24Koh kā in講，Tio̍h謹慎所聽ê；lín用甚麼量來量，也beh用這量hō͘ lín；koh beh加添hō͘ lín。Koh kā in kóng, Tio̍h kín-sīn só͘ thiaⁿ ê; lín ēng sím-mi̍h niû lâi niû, iā beh ēng che niû hō͘ lín; koh beh ke-thiⁿ hō͘ lín.

25因為見若有ê，beh hō͘伊；無ê，連伊所有ê，也beh kā伊搶去。In-ūi kìⁿ-nā ū ê, beh hō͘ i; bô ê, liân i só͘ ū ê, iā beh kā i chhiúⁿ-khì.

26Koh講，上帝ê國親像人掖種tī地裡；Koh kóng, Siōng-tè ê kok chhin-chhiūⁿ lâng iā chéng tī tōe-ni̍h;

27暝時睏，日時起來，hit-ê種子發，koh漸漸大，伊m̄知hit-ê所以然。mî-sî khùn, ji̍t-sî khí-lâi, hit ê chéng-chí hoat, koh chiām-chiām tōa, i m̄ chai hit ê só͘-í-jiân.

28地自然生物；起頭是秧，後來有穗，koh後來穗就結成五穀。Tōe chū-jiân siⁿ mi̍h; khí-thâu sī ng, āu-lâi ū sūi, koh āu-lâi sūi chiū kiat-chiâⁿ gō͘-kak.

29五穀已經熟，就用koeh-á；因為收割ê時到lah。Gō͘-kak í-keng se̍k, chiū ēng koeh-á; in-ūi siu-koah ê sî kàu lah.

30Koh講，上帝ê國咱beh怎樣來比並伊？á是用甚麼譬喻表明伊ah？Koh kóng, Siōng-tè ê kok lán beh cháiⁿ-iūⁿ lâi pí-phēng i? á-sī ēng sím-mi̍h phì-jū piáu-bêng i ah?

31是親像一粒芥菜子掖落地，雖然比地上百項ê種子khah細粒，Sī chhin-chhiūⁿ chi̍t lia̍p kòa-chhài chí iā lo̍h tōe, sui-jiân pí tōe-chiūⁿ pah-hāng ê chéng-chí khah sòe lia̍p,

32但是已經掖落去，就發生漸漸khah大tī lóng總ê菜蔬；koh發出大ê枝，致到空中ê鳥ōe歇伊ê蔭下。nā-sī í-keng iā lo̍h-khì, chiū hoat-siⁿ chiām-chiām khah tōa tī lóng-chóng ê chhài-soe; koh hoat-chhut tōa ê ki tì-kàu khong-tiong ê chiáu ōe hioh i ê ìm-ē.

33伊用chōe-chōe親像chit號ê譬喻傳道理hō͘ in，照in所會聽ê。I ēng chōe-chōe chhin-chhiūⁿ chit hō ê phì-jū thoân tō-lí hō͘ in, chiàu in só͘ ōe thiaⁿ ê.

34若無用譬喻就無kā in講；到單單學生kap伊tī-teh ê時，就lóng總kā in解明。Nā bô ēng phì-jū chiū bô kā in kóng; kàu toaⁿ-toaⁿ ha̍k-seng kap I tī-teh ê sî, chiū lóng-chóng kā in kóe-bêng.

35Hit日已經暗，伊kā學生講，咱過來去hit-pêng岸。Hit ji̍t í-keng àm I kā ha̍k-seng kóng, Lán kè-lâi khì hit pêng hōaⁿ.

36In離開眾人，chhōa耶穌就án-ni落船，kap in saⁿ-kap去；iáu有別隻船kap伊去。In lī-khui chèng lâng, chhōa Iâ-so͘ chiū án-ni lo̍h chûn, kap in saⁿ-kap khì; iáu ū pa̍t chiah chûn kap I khì.

37報頭風大起，湧潑入船，致到船teh-beh滿。Pò-thâu hong tōa khí, éng phoah ji̍p chûn, tì-kàu chûn teh-beh móa.

38但是伊tī船尾倒tī枕頭teh睏；學生叫伊醒，kā伊講，先生，阮beh無命，你無要緊mah？Nā-sī I tī chûn-bé tó tī chím-thâu teh khùn; ha̍k-seng kiò I chhíⁿ, kā I kóng, Sian-siⁿ, goán beh bô miā, lí bô iàu-kín mah?

39伊就醒，責備風，kā海講，Tio̍h靜靜。風就soah，也大平定。I chiū chhíⁿ, chek-pī hong, kā hái kóng, Tio̍h chēng-chēng. Hong chiū soah, iā tōa pîⁿ-tiāⁿ.

40伊就kā in講，Lín啥事hiah驚？lín iáu-bē有信mah？I chiū kā in kóng, Lín siáⁿ-sū hiah kiaⁿ? lín iáu-bē ū sìn mah?

41In就大驚，saⁿ-kap講，chit-ê是甚麼人，連風kap海lóng順伊？In chiū tōa kiaⁿ, saⁿ-kap kóng, Chit-ê sī sím-mi̍h lâng, liân hong kap hái lóng sūn I?

1In就到海ê對面岸，到Kek-lah-sim人ê地方。In chiū kàu hái ê tùi-bīn hōaⁿ, kàu kek-lah-sim lâng ê tōe-hng.

2耶穌離開船；liâm-piⁿ有一人tùi墳墓中出來tú-tio̍h伊，就是hō͘邪神附身ê，平素khiā起tī墳墓中。Iâ-so͘ lī-khui chûn; liâm-piⁿ ū chi̍t lâng tùi hûn-bōng tiong chhut-lâi tú-tio̍h I, chiū-sī hō͘ siâ-sîn hū-sin ê, pêng-sò͘ khiā-khí tī hûn-bōng tiong.

3無人會縛伊，雖然用鐵鏈也bōe會；Bô lâng ōe pa̍k i, sui-jiân ēng thih-liān iā bōe-ōe;

4因為ta̍uh-ta̍uh用腳銬鐵鏈縛伊，但是鐵鏈hō͘伊chhoah斷，腳銬hō͘伊kòng碎；無人有氣力thang制壓伊。in-ūi ta̍uh-ta̍uh ēng kha-khàu thih-liān pa̍k i, nā-sī thih-liān hō͘ i chhoah-tn̄g, kha-khàu hō͘ i kòng-chhùi; bô lâng ū khùi-la̍t thang chè-ap i.

5暝日常常tī墳墓中，tī山裡，喉叫，將石頭家己傷。Mî-ji̍t siông-siông tī hûn-bōng tiong, tī soaⁿ-ni̍h, âu-kiò, chiong chio̍h-thâu ka-kī siong.

6遠遠看見耶穌；就走來拜伊，Hn̄g-hn̄g khòaⁿ-kìⁿ Iâ-so͘; chiū cháu lâi pài I,

7大聲喉叫，講，至koân上帝ê Kiáⁿ耶穌，我kap你甚麼干涉？我kí上帝來懇求你莫得苦楚我。tōa siaⁿ âu-kiò, kóng, Chì-koâiⁿ Siōng-tè ê Kiáⁿ Iâ-so͘, góa kap lí sím-mi̍h kan-sia̍p? Góa kí Siōng-tè lâi khún-kiû lí bo̍h-tit khó͘-chhó͘ góa.

8因為耶穌bat kā伊講，邪神ah，tio̍h tùi hit-ê人出去。In-ūi Iâ-so͘ bat kā i kóng, Siâ-sîn ah, tio̍h tùi hit ê lâng chhut-khì.

9耶穌問伊講，你號做甚麼名？應講，我名做營，因為阮chiah-ê真chōe。Iâ-so͘ mn̄g i kóng, Lí hō-chòe sím-mi̍h miâ? ìn kóng, Góa miâ chòe Iâⁿ, in-ūi goán chiah-ê chin chōe.

10伊就切切求伊，莫得趕in出hit-ê地方。I chiū chhiat-chhiat kiû I, bo̍h-tit kóaⁿ in chhut hit ê tōe-hng.

11Tī hit-ê山坪有大陣豬teh討食。Tī hit ê soaⁿ-phiâⁿ ū tōa tīn ti teh thó-chia̍h.

12In就求伊講，差阮入hiah-ê知，hō͘阮thang入去。In chiū kiû I kóng, Chhe goán ji̍p hiah ê ti, hō͘ goán thang ji̍p-khì.

13就允in。Hiah-ê邪神就出去，來入hiah-ê豬；hit陣豬走落山坪chông落海，約量兩千隻，tī海裡格死。Chiū ún in. Hiah ê siâ-sîn chiū chhut-khì, lâi ji̍p hiah ê ti; hit tīn ti cháu-lo̍h soaⁿ-phiâⁿ chông-lo̍h hái, iok-liōng nn̄g chheng chiah, tī hái-ni̍h kek-sí.

14顧豬ê人走去，kā城內kap鄉社ê人講。人就出來看所tú-tio̍h ê事是怎樣。Kò͘-ti ê lâng cháu-khì, kā siâⁿ-lāi kap hiuⁿ-siā ê lâng kóng. Lâng chiū chhut-lâi khòaⁿ só͘ tú-tio̍h ê sū sī cháiⁿ-iūⁿ.

15就來就近耶穌，看見hit-ê患tio̍h鬼ê就是hō͘營所纏ê，坐teh穿衫，hāi-chāi；就驚。Chiū lâi chiū-kūn Iâ-so͘, khòaⁿ-kìⁿ hit ê hoān-tio̍h kúi ê chiū-sī hō͘ iâⁿ só͘ tîⁿ ê, chē-teh chhēng saⁿ, hāi-chāi; chiū kiaⁿ.

16看見ê人將患tio̍h鬼ê人所tú-tio̍h ê，kap kui陣豬ê事lóng kā in講。Khòaⁿ-kìⁿ ê lâng chiong hoān-tio̍h kúi ê lâng só͘ tú-tio̍h ê, kap kui tīn ti ê sū lóng kā in kóng.

17In就求耶穌離開in ê境內。In chiū kiû Iâ-so͘ lī-khui in ê kéng-lāi.

18耶穌tú-á上船，hit-ê bat患tio̍h鬼ê求伊准伊saⁿ-kap去。Iâ-so͘ tú-á chiūⁿ chûn, hit ê bat hoān-tio̍h kúi ê kiû I chún i saⁿ-kap khì.

19耶穌m̄允伊，講，tò去你ê家chhē你ê親人，將主kā你行hiah大ê事kap所憐憫你ê kā in講。Iâ-so͘ m̄ ún i, kóng, Tò-khì lí ê ke chhē lí ê chhin-lâng, chiong Chú kā lí kiâⁿ hiah tōa ê sū kap só͘ lîn-bín lí ê kā in kóng.

20Hit人去，tī Te-ka-pho-lī報揚耶穌所kā伊行ê大事。眾人lóng奇怪。Hit lâng khì, tī Te-ka-pho-lī pò-iông Iâ-so͘ só͘ kā i kiâⁿ ê tōa sū. Chèng lâng lóng kî-koài.

21耶穌坐船koh過去hit pêng，kui大陣ê人聚集就近伊；hit時耶穌tī海邊。Iâ-so͘ chē chûn koh kè-khì hit pêng, kui tōa tīn ê lâng chū-chi̍p chiū-kūn I; hit sî Iâ-so͘ tī hái-piⁿ.

22有一個管會堂ê，名做Gâi-ló͘來，已經看見耶穌，就仆tī伊ê腳下，Ū chi̍t ê koán hōe-tn̂g ê, miâ chòe Gâi-ló͘ lâi, í-keng khòaⁿ-kìⁿ Iâ-so͘, chiū phak tī I ê kha-ē,

23切切求伊講，我細漢ê cha-bó͘-kiáⁿ差不多beh死；請你來用手hōaⁿ伊，hō͘伊得tio̍h救來活。chhiat-chhiat kiû I kóng, Góa sòe-hàn ê cha-bó͘-kiáⁿ chha-put-to beh sí; chhiáⁿ lí lâi ēng chhiú hōaⁿ i, hō͘ i tit-tio̍h kiù lâi oa̍h.

24耶穌kap伊去，kui大陣ê人tè伊，真oe-khoeh。Iâ-so͘ kap i khì, kui tōa tīn ê lâng tè I, chin oe-khoeh.

25有一個婦人人，血漏十二年，Ū chi̍t ê hū-jîn-lâng, hiat-lāu cha̍p-jī nî,

26bat tùi chōe-chōe ê醫生受tio̍h chōe-chōe艱苦，koh一盡破費伊所有ê，但是無一絲á利益，反tńg ná傷重，bat tùi chōe-chōe ê i-seng siū-tio̍h chōe-chōe kan-khó͘, koh it-chīn phòa-hùi i só͘ ū ê, nā-sī bô chi̍t si-á lī-ek, hoán-tńg ná siong-tiōng,

27聽見耶穌ê事，就來tī眾人中，tùi伊ê後面來摸伊ê衫，thiaⁿ-kìⁿ Iâ-so͘ ê sū, chiū lâi tī chèng lâng tiong, tùi I ê āu-bīn lâi bong I ê saⁿ,

28因為講，我kan-ta摸伊ê衫，就會好。in-ūi kóng, Góa kan-ta bong I ê saⁿ, chiū ōe hó.

29Tùi án-ni血漏liâm-piⁿ止，本身知伊ê病痛已經好。Tùi án-ni hiat-lāu liâm-piⁿ chí, pún-sin chai i ê pīⁿ-thiàⁿ í-keng hó.

30耶穌即時家己知有權能tùi伊出，就oa̍t-tńg身，tī眾人中講，Chī-chūi摸我ê衫？Iâ-so͘ chek-sî ka-kī chai ū koân-lêng tùi I chhut, chiū oa̍t-tńg-sin, tī chèng lâng tiong kóng, Chī-chūi bong góa ê saⁿ?

31伊ê學生kā伊講，你看見kui陣人teh oe-khoeh你，iáu-kú問， Chī-chūi有摸我？I ê ha̍k-seng kā I kóng, Lí khòaⁿ-kìⁿ kui tīn lâng teh oe-khoeh lí, iáu-kú mn̄g Chī-chūi ū bong góa?

32耶穌遍遍看，ài看做chit-ê事ê婦人人。Iâ-so͘ piàn-piàn khòaⁿ, ài khòaⁿ chòe chit ê sū ê hū-jîn-lâng.

33婦人人知本身所歷過，驚惶ngia̍uh-ngia̍uh-chhoah，就來仆tī伊ê面前，lóng照實kā伊講。Hū-jîn-lâng chai pún-sin só͘ le̍k-kè, kiaⁿ-hiâⁿ ngia̍uh-ngia̍uh-chhoah, chiū lâi phak tī I ê bīn-chêng, lóng chiàu-si̍t kā I kóng.

34伊就kā伊講，婦人人ah，你ê信已經救你；thang安然tò去，你ê病全然好。I chiū kā i kóng, Hū-jîn-lâng ah, lí ê sìn í-keng kiù lí; thang an-jiân tò-khì, lí ê pīⁿ choân-jiân hó.

35Teh講ê時，有tùi管會堂ê家來講，你ê cha-bó͘-kiáⁿ死lah；mih-sái iáu teh勞煩先生？Teh kóng ê sî, ū tùi koán hōe-tn̂g ê ke lâi kóng, Lí ê cha-bó͘-kiáⁿ sí lah; mih-sái iáu teh lô-hoân sian-siⁿ?

36耶穌邊á聽見所講ê話，kā趕會堂ê講，莫得驚，只有tio̍h信。Iâ-so͘ piⁿ-á thiaⁿ-kìⁿ só͘ kóng ê ōe, kā koán hōe-tn̂g ê kóng, Bo̍h-tit kiaⁿ, chí ū tio̍h sìn.

37耶穌tī彼得、雅各kap雅各ê兄弟約翰以外，m̄准別人tè伊saⁿ-kap去。Iâ-so͘ tī Pí-tek, Ngá-kok, kap Ngá-kok ê hiaⁿ-tī Iok-hān í-gōa, m̄ chún pa̍t lâng tè I saⁿ-kap khì.

38到管會堂ê家，看見有hōa-hōa哮，也有啼哭大聲哮ê人。Kàu koán hōe-tn̂g ê ke, khòaⁿ-kìⁿ ū hōa-hōa-háu, iā ū thî-khàu tōa siaⁿ háu ê lâng.

39已經入去就kā in講，Lín啥事hōa-hōa哮teh啼哭ah？Gín-ná m̄是死，是teh睏nā-tiāⁿ。Í-keng ji̍p-khì chiū kā in kóng, Lín siáⁿ-sū hōa-hōa-háu teh thî-khàu ah? Gín-ná m̄ sī sí, sī teh khùn nā-tiāⁿ.

40In就恥笑伊。但是伊趕in眾人出去，就chhōa gín-ná ê父母以及kap伊來ê人，入gín-ná所tòa ê所在；In chiū thí-chhiò I. Nā-sī I kóaⁿ in chèng lâng chhut-khì, chiū chhōa gín-ná ê pē-bú í-ki̍p kap I lâi ê lâng, ji̍p gín-ná só͘ tòa ê só͘-chāi;

41就牽gín-ná ê手kā伊講，Tāi-lī-tāi-kó͘-bí，翻譯就是講，Cha-bó͘ gín-ná，我命令你，起來。chiū khan gín-ná ê chhiú kā i kóng, Tāi-lī-tāi kó͘-bí, hoan-e̍k chiū-sī kóng, Cha-bó͘ gín-ná, góa bēng-lēng lí, khí-lâi.

42Cha-bó͘ gín-ná liâm-piⁿ起來行；因為伊十二歲lah。眾人就大gông-ngia̍h奇怪。Cha-bó͘ gín-ná liâm-piⁿ khí-lâi kiâⁿ; in-ūi i cha̍p-jī hè lah. Chèng lâng chiū tōa gông-ngia̍h kî-koài.

43耶穌嚴嚴禁戒in莫得hō͘人知；就吩咐tio̍h hō͘ cha-bó͘ gín-ná食。Iâ-so͘ giâm-giâm kìm-kài in bo̍h-tit hō͘ lâng chai; chiū hoan-hù tio̍h hō͘ cha-bó͘ gín-ná chia̍h.