1In就到海ê對面岸，到Kek-lah-sim人ê地方。In chiū kàu hái ê tùi-bīn hōaⁿ, kàu kek-lah-sim lâng ê tōe-hng.

2耶穌離開船；liâm-piⁿ有一人tùi墳墓中出來tú-tio̍h伊，就是hō͘邪神附身ê，平素khiā起tī墳墓中。Iâ-so͘ lī-khui chûn; liâm-piⁿ ū chi̍t lâng tùi hûn-bōng tiong chhut-lâi tú-tio̍h I, chiū-sī hō͘ siâ-sîn hū-sin ê, pêng-sò͘ khiā-khí tī hûn-bōng tiong.

3無人會縛伊，雖然用鐵鏈也bōe會；Bô lâng ōe pa̍k i, sui-jiân ēng thih-liān iā bōe-ōe;

4因為ta̍uh-ta̍uh用腳銬鐵鏈縛伊，但是鐵鏈hō͘伊chhoah斷，腳銬hō͘伊kòng碎；無人有氣力thang制壓伊。in-ūi ta̍uh-ta̍uh ēng kha-khàu thih-liān pa̍k i, nā-sī thih-liān hō͘ i chhoah-tn̄g, kha-khàu hō͘ i kòng-chhùi; bô lâng ū khùi-la̍t thang chè-ap i.

5暝日常常tī墳墓中，tī山裡，喉叫，將石頭家己傷。Mî-ji̍t siông-siông tī hûn-bōng tiong, tī soaⁿ-ni̍h, âu-kiò, chiong chio̍h-thâu ka-kī siong.

6遠遠看見耶穌；就走來拜伊，Hn̄g-hn̄g khòaⁿ-kìⁿ Iâ-so͘; chiū cháu lâi pài I,

7大聲喉叫，講，至koân上帝ê Kiáⁿ耶穌，我kap你甚麼干涉？我kí上帝來懇求你莫得苦楚我。tōa siaⁿ âu-kiò, kóng, Chì-koâiⁿ Siōng-tè ê Kiáⁿ Iâ-so͘, góa kap lí sím-mi̍h kan-sia̍p? Góa kí Siōng-tè lâi khún-kiû lí bo̍h-tit khó͘-chhó͘ góa.

8因為耶穌bat kā伊講，邪神ah，tio̍h tùi hit-ê人出去。In-ūi Iâ-so͘ bat kā i kóng, Siâ-sîn ah, tio̍h tùi hit ê lâng chhut-khì.

9耶穌問伊講，你號做甚麼名？應講，我名做營，因為阮chiah-ê真chōe。Iâ-so͘ mn̄g i kóng, Lí hō-chòe sím-mi̍h miâ? ìn kóng, Góa miâ chòe Iâⁿ, in-ūi goán chiah-ê chin chōe.

10伊就切切求伊，莫得趕in出hit-ê地方。I chiū chhiat-chhiat kiû I, bo̍h-tit kóaⁿ in chhut hit ê tōe-hng.

11Tī hit-ê山坪有大陣豬teh討食。Tī hit ê soaⁿ-phiâⁿ ū tōa tīn ti teh thó-chia̍h.

12In就求伊講，差阮入hiah-ê知，hō͘阮thang入去。In chiū kiû I kóng, Chhe goán ji̍p hiah ê ti, hō͘ goán thang ji̍p-khì.

13就允in。Hiah-ê邪神就出去，來入hiah-ê豬；hit陣豬走落山坪chông落海，約量兩千隻，tī海裡格死。Chiū ún in. Hiah ê siâ-sîn chiū chhut-khì, lâi ji̍p hiah ê ti; hit tīn ti cháu-lo̍h soaⁿ-phiâⁿ chông-lo̍h hái, iok-liōng nn̄g chheng chiah, tī hái-ni̍h kek-sí.

14顧豬ê人走去，kā城內kap鄉社ê人講。人就出來看所tú-tio̍h ê事是怎樣。Kò͘-ti ê lâng cháu-khì, kā siâⁿ-lāi kap hiuⁿ-siā ê lâng kóng. Lâng chiū chhut-lâi khòaⁿ só͘ tú-tio̍h ê sū sī cháiⁿ-iūⁿ.

15就來就近耶穌，看見hit-ê患tio̍h鬼ê就是hō͘營所纏ê，坐teh穿衫，hāi-chāi；就驚。Chiū lâi chiū-kūn Iâ-so͘, khòaⁿ-kìⁿ hit ê hoān-tio̍h kúi ê chiū-sī hō͘ iâⁿ só͘ tîⁿ ê, chē-teh chhēng saⁿ, hāi-chāi; chiū kiaⁿ.

16看見ê人將患tio̍h鬼ê人所tú-tio̍h ê，kap kui陣豬ê事lóng kā in講。Khòaⁿ-kìⁿ ê lâng chiong hoān-tio̍h kúi ê lâng só͘ tú-tio̍h ê, kap kui tīn ti ê sū lóng kā in kóng.

17In就求耶穌離開in ê境內。In chiū kiû Iâ-so͘ lī-khui in ê kéng-lāi.

18耶穌tú-á上船，hit-ê bat患tio̍h鬼ê求伊准伊saⁿ-kap去。Iâ-so͘ tú-á chiūⁿ chûn, hit ê bat hoān-tio̍h kúi ê kiû I chún i saⁿ-kap khì.

19耶穌m̄允伊，講，tò去你ê家chhē你ê親人，將主kā你行hiah大ê事kap所憐憫你ê kā in講。Iâ-so͘ m̄ ún i, kóng, Tò-khì lí ê ke chhē lí ê chhin-lâng, chiong Chú kā lí kiâⁿ hiah tōa ê sū kap só͘ lîn-bín lí ê kā in kóng.

20Hit人去，tī Te-ka-pho-lī報揚耶穌所kā伊行ê大事。眾人lóng奇怪。Hit lâng khì, tī Te-ka-pho-lī pò-iông Iâ-so͘ só͘ kā i kiâⁿ ê tōa sū. Chèng lâng lóng kî-koài.

21耶穌坐船koh過去hit pêng，kui大陣ê人聚集就近伊；hit時耶穌tī海邊。Iâ-so͘ chē chûn koh kè-khì hit pêng, kui tōa tīn ê lâng chū-chi̍p chiū-kūn I; hit sî Iâ-so͘ tī hái-piⁿ.

22有一個管會堂ê，名做Gâi-ló͘來，已經看見耶穌，就仆tī伊ê腳下，Ū chi̍t ê koán hōe-tn̂g ê, miâ chòe Gâi-ló͘ lâi, í-keng khòaⁿ-kìⁿ Iâ-so͘, chiū phak tī I ê kha-ē,

23切切求伊講，我細漢ê cha-bó͘-kiáⁿ差不多beh死；請你來用手hōaⁿ伊，hō͘伊得tio̍h救來活。chhiat-chhiat kiû I kóng, Góa sòe-hàn ê cha-bó͘-kiáⁿ chha-put-to beh sí; chhiáⁿ lí lâi ēng chhiú hōaⁿ i, hō͘ i tit-tio̍h kiù lâi oa̍h.

24耶穌kap伊去，kui大陣ê人tè伊，真oe-khoeh。Iâ-so͘ kap i khì, kui tōa tīn ê lâng tè I, chin oe-khoeh.

25有一個婦人人，血漏十二年，Ū chi̍t ê hū-jîn-lâng, hiat-lāu cha̍p-jī nî,

26bat tùi chōe-chōe ê醫生受tio̍h chōe-chōe艱苦，koh一盡破費伊所有ê，但是無一絲á利益，反tńg ná傷重，bat tùi chōe-chōe ê i-seng siū-tio̍h chōe-chōe kan-khó͘, koh it-chīn phòa-hùi i só͘ ū ê, nā-sī bô chi̍t si-á lī-ek, hoán-tńg ná siong-tiōng,

27聽見耶穌ê事，就來tī眾人中，tùi伊ê後面來摸伊ê衫，thiaⁿ-kìⁿ Iâ-so͘ ê sū, chiū lâi tī chèng lâng tiong, tùi I ê āu-bīn lâi bong I ê saⁿ,

28因為講，我kan-ta摸伊ê衫，就會好。in-ūi kóng, Góa kan-ta bong I ê saⁿ, chiū ōe hó.

29Tùi án-ni血漏liâm-piⁿ止，本身知伊ê病痛已經好。Tùi án-ni hiat-lāu liâm-piⁿ chí, pún-sin chai i ê pīⁿ-thiàⁿ í-keng hó.

30耶穌即時家己知有權能tùi伊出，就oa̍t-tńg身，tī眾人中講，Chī-chūi摸我ê衫？Iâ-so͘ chek-sî ka-kī chai ū koân-lêng tùi I chhut, chiū oa̍t-tńg-sin, tī chèng lâng tiong kóng, Chī-chūi bong góa ê saⁿ?

31伊ê學生kā伊講，你看見kui陣人teh oe-khoeh你，iáu-kú問， Chī-chūi有摸我？I ê ha̍k-seng kā I kóng, Lí khòaⁿ-kìⁿ kui tīn lâng teh oe-khoeh lí, iáu-kú mn̄g Chī-chūi ū bong góa?

32耶穌遍遍看，ài看做chit-ê事ê婦人人。Iâ-so͘ piàn-piàn khòaⁿ, ài khòaⁿ chòe chit ê sū ê hū-jîn-lâng.

33婦人人知本身所歷過，驚惶ngia̍uh-ngia̍uh-chhoah，就來仆tī伊ê面前，lóng照實kā伊講。Hū-jîn-lâng chai pún-sin só͘ le̍k-kè, kiaⁿ-hiâⁿ ngia̍uh-ngia̍uh-chhoah, chiū lâi phak tī I ê bīn-chêng, lóng chiàu-si̍t kā I kóng.

34伊就kā伊講，婦人人ah，你ê信已經救你；thang安然tò去，你ê病全然好。I chiū kā i kóng, Hū-jîn-lâng ah, lí ê sìn í-keng kiù lí; thang an-jiân tò-khì, lí ê pīⁿ choân-jiân hó.

35Teh講ê時，有tùi管會堂ê家來講，你ê cha-bó͘-kiáⁿ死lah；mih-sái iáu teh勞煩先生？Teh kóng ê sî, ū tùi koán hōe-tn̂g ê ke lâi kóng, Lí ê cha-bó͘-kiáⁿ sí lah; mih-sái iáu teh lô-hoân sian-siⁿ?

36耶穌邊á聽見所講ê話，kā趕會堂ê講，莫得驚，只有tio̍h信。Iâ-so͘ piⁿ-á thiaⁿ-kìⁿ só͘ kóng ê ōe, kā koán hōe-tn̂g ê kóng, Bo̍h-tit kiaⁿ, chí ū tio̍h sìn.

37耶穌tī彼得、雅各kap雅各ê兄弟約翰以外，m̄准別人tè伊saⁿ-kap去。Iâ-so͘ tī Pí-tek, Ngá-kok, kap Ngá-kok ê hiaⁿ-tī Iok-hān í-gōa, m̄ chún pa̍t lâng tè I saⁿ-kap khì.

38到管會堂ê家，看見有hōa-hōa哮，也有啼哭大聲哮ê人。Kàu koán hōe-tn̂g ê ke, khòaⁿ-kìⁿ ū hōa-hōa-háu, iā ū thî-khàu tōa siaⁿ háu ê lâng.

39已經入去就kā in講，Lín啥事hōa-hōa哮teh啼哭ah？Gín-ná m̄是死，是teh睏nā-tiāⁿ。Í-keng ji̍p-khì chiū kā in kóng, Lín siáⁿ-sū hōa-hōa-háu teh thî-khàu ah? Gín-ná m̄ sī sí, sī teh khùn nā-tiāⁿ.

40In就恥笑伊。但是伊趕in眾人出去，就chhōa gín-ná ê父母以及kap伊來ê人，入gín-ná所tòa ê所在；In chiū thí-chhiò I. Nā-sī I kóaⁿ in chèng lâng chhut-khì, chiū chhōa gín-ná ê pē-bú í-ki̍p kap I lâi ê lâng, ji̍p gín-ná só͘ tòa ê só͘-chāi;

41就牽gín-ná ê手kā伊講，Tāi-lī-tāi-kó͘-bí，翻譯就是講，Cha-bó͘ gín-ná，我命令你，起來。chiū khan gín-ná ê chhiú kā i kóng, Tāi-lī-tāi kó͘-bí, hoan-e̍k chiū-sī kóng, Cha-bó͘ gín-ná, góa bēng-lēng lí, khí-lâi.

42Cha-bó͘ gín-ná liâm-piⁿ起來行；因為伊十二歲lah。眾人就大gông-ngia̍h奇怪。Cha-bó͘ gín-ná liâm-piⁿ khí-lâi kiâⁿ; in-ūi i cha̍p-jī hè lah. Chèng lâng chiū tōa gông-ngia̍h kî-koài.

43耶穌嚴嚴禁戒in莫得hō͘人知；就吩咐tio̍h hō͘ cha-bó͘ gín-ná食。Iâ-so͘ giâm-giâm kìm-kài in bo̍h-tit hō͘ lâng chai; chiū hoan-hù tio̍h hō͘ cha-bó͘ gín-ná chia̍h.

1耶穌tùi hia出去，到伊ê本鄉，伊ê學生tè伊。Iâ-so͘ tùi hia chhut-khì, kàu I ê pún-hiuⁿ, I ê ha̍k-seng tè I.

2到安歇日就tī會堂教示人。Chōe-chōe人聽見就奇怪講，Chit-ê人tùi tá-lo̍h會án-ni ah？koh所賞賜hō͘伊ê智慧是甚麼ah？也有án-ni ê大權能tùi伊ê嘴出，是怎樣？Kàu an-hioh-ji̍t chiū tī hōe-tn̂g kà-sī lâng. Chōe-chōe lâng thiaⁿ-kìⁿ chiū kî-koài kóng, Chit ê lâng tùi tá-lo̍h ōe án-ni ah? Koh, só͘ siúⁿ-sù hō͘ I ê tì-hūi sī sím-mi̍h ah? iā ū án-ni ê tōa koân-lêng tùi I ê chhùi chhut, sī cháiⁿ-iūⁿ?

3Chit-ê kiám m̄是木工mah？kiám m̄是馬利亞ê Kiáⁿ，雅各、約西、猶大、西門ê兄弟mah？伊ê姊妹kiám m̄是kap咱tī chia mah？In就厭賤伊。Chit-ê kiám m̄ sī ba̍k-kang mah? kiám m̄ sī Má-lī-a ê kiáⁿ, Ngá-kok, Iok-se, Iû-tāi, Se-bûn ê hiaⁿ-tī mah? I ê chí-bē kiám m̄ sī kap lán tī chia mah? In chiū iàm-chiān I.

4耶穌就kā in講，先知tī本鄉、宗族，家己ê家以外，無m̄尊貴。Iâ-so͘ chiū kā in kóng, Sian-ti tī pún-hiuⁿ, chong-cho̍k, ka-kī ê ke í-gōa, bô m̄ chun-kùi.

5伊tī hia bōe得行甚麼權能，不過用手hōaⁿ kúi-nā ê病人，來醫好in。I tī hia bōe-tit kiâⁿ sím-mi̍h koân-lêng, put-kò ēng chhiú hōaⁿ kúi-nā ê pīⁿ lâng, lâi i-hó in.

6Koh奇怪in m̄信。就四界行hiah-ê鄉社，教示人。Koh kî-koài in m̄ sìn. Chiū sì-kè kiâⁿ hiah ê hiuⁿ-siā, kà-sī lâng.

7耶穌召十二個學生來，就差in一對一對出去，賞賜in有權來制壓hiah-ê邪神；Iâ-so͘ tiàu cha̍p-jī ê ha̍k-seng lâi, chiū chhe in chi̍t tùi chi̍t tùi chhut-khì, siúⁿ-sù in ū koân lâi chè-ap hiah ê siâ-sîn;

8koh吩咐in莫得帶路費，獨獨一支柺á，莫得乾糧，莫得tah-liân，莫得khǹg錢tī腰帶；koh hoan-hù in bo̍h-tit tòa lō͘-hùi, to̍k-to̍k chi̍t ki koáiⁿ-á, bo̍h-tit kan-niû, bo̍h-tit tah-liân, bo̍h-tit khǹg chîⁿ tī io-tòa;

9tio̍h穿出露ê鞋；也莫得穿兩領衫。tio̍h chhēng chhut-lō͘ ê ôe; iā bo̍h-tit chhēng nn̄g niá saⁿ.

10Koh kā in講，見若lín所入ê厝，tio̍h tòa tī hia，直到離開hit-ê地方ê時。Koh kā in kóng, Kìⁿ-nā lín só͘ ji̍p ê chhù, tio̍h tòa tī hia, ti̍t-kàu lī-khui hit ê tōe-hng ê sî.

11無論甚麼所在m̄接納lín，m̄聽lín ê，到離開hia ê時，tio̍h拌去腳chiah底 ê土粉，來對in做干證。Bô lūn sím-mi̍h só͘-chāi m̄ chiap-la̍p lín, m̄ thiaⁿ lín ê, kàu lī-khui hia ê sî, tio̍h pōaⁿ-khì kha-chiah-tóe ê thô͘-hún, lâi tùi in chòe kan-chèng.

12In就出去宣傳，講人tio̍h反悔。In chiū chhut-khì soan-thoân, kóng lâng tio̍h hoán-hóe.

13In也趕出chōe-chōe鬼，用油抹chōe-chōe破病ê人，醫好in。In iā kóaⁿ-chhut chōe-chōe kúi, ēng iû boah chōe-chōe phòa-pīⁿ ê lâng, i-hó in.

14希律王聽見，因為耶穌ê名聲已經出；就講，行洗禮ê約翰tùi死人中koh活，所以有chiah-ê權能tùi伊顯出。Hi-lu̍t ông thiaⁿ-kìⁿ, in-ūi Iâ-so͘ ê miâ-siaⁿ í-keng chhut; chiū kóng, Kiâⁿ sóe-lé ê Iok-hān tùi sí-lâng tiong koh-oa̍h, só͘-í ū chiah ê koân-lêng tùi i hián-chhut.

15但是有別人講，是以利亞。Koh有人講，是先知，親像先知中ê一個。Nā-sī ū pa̍t lâng kóng, Sī Í-lī-a. Koh ū lâng kóng, Sī sian-ti, chhin-chhiūⁿ sian-ti tiong ê chi̍t-ê.

16總是希律聽見就講，我所thâi頭ê約翰已經koh活。Chóng-sī Hi-lu̍t thiaⁿ-kìⁿ chiū kóng, Góa só͘ thâi-thâu ê Iok-hān í-keng koh-oa̍h.

17因為希律家己bat差人掠約翰，縛伊tī監裡，是為tio̍h希律ê兄弟腓力ê bó͘希羅底ê緣故；因為希律有娶伊。In-ūi Hi-lu̍t ka-kī bat chhe lâng lia̍h Iok-hān, pa̍k i tī kaⁿ-ni̍h, sī ūi-tio̍h Hi-lu̍t ê hiaⁿ-tī Hui-le̍k ê bó͘ Hi-lô-tí ê iân-kò͘; in-ūi Hi-lu̍t ū chhōa i.

18是約翰bat kā希律講，你娶兄弟ê bó͘是不該。Sī Iok-hān bat kā Hi-lu̍t kóng, Lí chhōa hiaⁿ-tī ê bó͘ sī put-kai.

19希羅底就怨恨約翰，ài thâi伊，也bōe得tio̍h。Hi-lô-tí chiū oàn-hūn Iok-hān, ài thâi i, iā bōe tit-tio̍h.

20因為希律知約翰ê做人義koh聖，所以驚畏，來保護伊；聽伊ê話，就大大躊躇，也歡喜聽伊。In-ūi Hi-lu̍t chai Iok-hān ê chòe-lâng gī koh sèng, só͘-í kiaⁿ-ùi, lâi pó-hō͘ i; thiaⁿ i ê ōe, chiū tōa-tōa tiû-tû, iā hoaⁿ-hí thiaⁿ i.

21tn̄g-tio̍h好機會ê日，就是希律tī生日辦桌，請hiah-ê大官、千總kap加利利尊貴ê人。Tn̄g-tio̍h hó ki-hōe ê ji̍t, chiū-sī Hi-lu̍t tī siⁿ-ji̍t pān-toh, chhiáⁿ hiah ê tōa koaⁿ, chhian-chóng, kap Ka-lī-lī chun-kùi ê lâng.

22希羅底親生ê cha-bó͘-kiáⁿ入去跳舞，hō͘希律kap同桌ê人lóng歡喜；王就kā cha-bó͘ gín-ná講，見若你所ài ê，求我，我beh hō͘你。Hi-lô-tí chhin-siⁿ ê cha-bó͘-kiáⁿ ji̍p-khì thiàu-bú, hō͘ Hi-lu̍t kap tâng-toh ê lâng lóng hoaⁿ-hí; ông chiū kā cha-bó͘ gín-ná kóng, Kìⁿ-nā lí só͘ ài ê, kiû góa, góa beh hō͘ lí.

23Koh kap伊chiù-chōa講，見若你所求我ê，雖然我國ê一半，我也beh hō͘你。Koh kap i chiù-chōa kóng, Kìⁿ-nā lí só͘ kiû góa ê, sui-jiân góa kok ê chi̍t pòaⁿ, góa iā beh hō͘ lí.

24Cha-bó͘ gín-ná出去kā伊ê老母講，我beh求甚麼？應講，行洗禮約翰ê頭殼。Cha-bó͘ gín-ná chhut-khì kā i ê lāu-bú kóng, Góa beh kiû sím-mi̍h? Ìn kóng, Kiâⁿ sóe-lé Iok-hān ê thâu-khak.

25Cha-bó͘ gín-ná liâm-piⁿ走入去，見王求講，我ài你將行洗禮約翰ê頭殼tóe tī盤裡即時hō͘我。Cha-bó͘ gín-ná liâm-piⁿ cháu ji̍p-khì, kìⁿ ông kiû kóng, Góa ài lí chiong kiâⁿ sóe-lé Iok-hān ê thâu-khak tóe tī pôaⁿ-ni̍h chek-sî hō͘ góa.

26王就大憂悶；總是為tio̍h伊所chiù ê chōa，koh有同桌ê人tī-teh，所以m̄ ài推辭。Ông chiū tōa iu-būn; chóng-sī ūi-tio̍h i só͘ chiù ê chōa, koh ū tâng-toh ê lâng tī-teh, só͘-í m̄ ài the-sî.

27王即時差一個侍衛，吩咐取伊ê頭殼來；Ông chek-sî chhe chi̍t ê sī-ōe, hoan-hù chhú i ê thâu-khak lâi;

28伊就去監裡，thâi伊ê頭，tóe伊ê頭殼tī盤裡，捧來hō͘ cha-bó͘ gín-ná，cha-bó͘ gín-ná就hō͘伊ê老母。i chiū khì kaⁿ-ni̍h, thâi i ê thâu, tóe i ê thâu-khak tī pôaⁿ-ni̍h, phâng lâi hō͘ cha-bó͘ gín-ná, cha-bó͘ gín-ná chiū hō͘ i ê lāu-bú.

29約翰ê學生聽見，就來收伊ê身屍，埋葬tī墓裡。Iok-hān ê ha̍k-seng thiaⁿ-kìⁿ, chiū lâi siu i ê sin-si, bâi-chòng tī bōng-ni̍h.

30使徒聚集就近耶穌，將in所行所教示ê lóng kā伊講。Sù-tô͘ chū-chi̍p chiū-kūn Iâ-so͘, chiong in só͘ kiâⁿ só͘ kà-sī ê lóng kā I kóng.

31耶穌kā in講，Lín家己kap我來去曠野ê所在，歇睏tiap-á-kú。因為往來ê人chōe，連食也bōe顧得。Iâ-so͘ kā in kóng, Lín ka-kī kap góa lâi khì khòng-iá ê só͘-chāi, hioh-khùn tiap-á-kú. In-ūi óng-lâi ê lâng chōe, liân chia̍h iā bōe kò͘-tit.

32In就上船，去曠野ê所在，家己tòa。In chiū chiūⁿ chûn, khì khòng-iá ê só͘-chāi, ka-kī tòa.

33眾人看見in去，有chōe-chōe人知；就tùi ta̍k ê城步行saⁿ-kap走，事先in到。Chèng lâng khòaⁿ-kìⁿ in khì, ū chōe-chōe lâng chai; chiū tùi ta̍k ê siâⁿ pō͘-kiâⁿ saⁿ-kap cháu, tāi-seng in kàu.

34耶穌出去看見kui大陣ê人，就憐憫伊，因為in親像羊無牧者；chiah用chōe-chōe項教示in。Iâ-so͘ chhut-khì khòaⁿ-kìⁿ kui tōa tīn ê lâng, chiū lîn-bín i, in-ūi in chhin-chhiūⁿ iûⁿ bô bo̍k-chiá; chiah ēng chōe-chōe hāng kà-sī in.

35日beh落，伊ê學生就近伊講，Chia就是曠野，日beh落lah；Ji̍t beh lo̍h, I ê ha̍k-seng chiū-kūn I kóng, Chia chiū-sī khòng-iá, ji̍t beh lo̍h lah;

36請四散眾人，hō͘ in去周圍ê鄉社，家己買物thang食。chhiáⁿ sì-sòaⁿ chèng lâng, hō͘ in khì chiu-ûi ê hiuⁿ-siā, ka-kī bóe mi̍h thang chia̍h.

37伊應講，Lín hō͘ in食。In kā伊講，總無阮用兩百ê銀á去買餅來hō͘ in食mah？I ìn kóng, Lín hō͘ in chia̍h. In kā I kóng, Chóng bô goán ēng nn̄g pah ê gûn-á khì bóe piáⁿ lâi hō͘ in chia̍h mah?

38伊kā in講，Lín有餅jōa chōe，去看māi。已經知就講，五個餅，兩尾魚。I kā in kóng, Lín ū piáⁿ jōa chōe, khì khòaⁿ-māi. Í-keng chai chiū kóng, Gō͘ ê piáⁿ, nn̄g bé hî.

39伊就吩咐in hō͘眾人排kui列，坐tī青翠ê草埔。I chiū hoan-hù in hō͘ chèng lâng pâi kui-lia̍t, chē tī chhiⁿ-chhùi ê chháu-po͘.

40In就分隊來坐，有ê一百，有ê五十。In chiū hun-tūi lâi chē, ū-ê chi̍t-pah, ū-ê gō͘-cha̍p.

41耶穌the̍h hit五個餅，兩尾魚，ǹg天來祝謝；peh餅hō͘學生來排tī眾人ê面前；也用兩尾魚pun hō͘眾人。Iâ-so͘ the̍h hit gō͘ ê piáⁿ, nn̄g bé hî, ǹg thiⁿ lâi chiok-siā; peh piáⁿ hō͘ ha̍k-seng lâi pâi tī chèng lâng ê bīn-chêng; iā ēng nn̄g bé hî pun hō͘ chèng lâng.

42In lóng食到飽。In lóng chia̍h kàu pá.

43拾hiah-ê餅碎kap魚屑滿十二筐。Khioh hiah ê piáⁿ-chhùi kap hî-sut móa cha̍p-jī kheng.

44食餅ê人ta-po͘ ê有五千。Chia̍h piáⁿ ê lâng ta-po͘ ê ū gō͘-chheng.

45耶穌liâm-piⁿ逼伊ê學生上船事先過去hit-pêng岸，到伯賽大，thèng候伊四散眾人。Iâ-so͘ liâm-piⁿ pek I ê ha̍k-seng chiūⁿ chûn tāi-seng kè-khì hit pêng hōaⁿ, kàu Pek-sài-tāi, thèng-hāu I sì-sòaⁿ chèng lâng.

46已經kap in離別，就去山裡祈禱。Í-keng kap in lī-pia̍t, chiū khì soaⁿ-ni̍h kî-tó.

47已經暗，船tī海中，只有耶穌家己tī岸裡。Í-keng àm, chûn tī hái-tiong, chí-ū Iâ-so͘ ka-kī tī hōaⁿ-ni̍h.

48看見學生划槳，真艱苦，因為是對頭風。暝時約略四更，耶穌tùi海面行就近in，ài beh tùi in hia過去。Khòaⁿ-kìⁿ ha̍k-seng kò-chiúⁿ, chin kan-khó͘, in-ūi sī tùi-thâu hong. Mî-sî iok-lio̍k sì kiⁿ, Iâ-so͘ tùi hái-bīn kiâⁿ chiū-kūn in, ài beh tùi in hia kè-khì.

49In看見伊行tī海面，掠做怪物，就喉叫；In khòaⁿ-kìⁿ I kiâⁿ tī hái-bīn, lia̍h chòe koài mi̍h, chiū âu-kiò;

50因為in lóng看見伊，就生驚。耶穌liâm-piⁿ kap in講話，kā in講，安lín ê心，是我，m̄免驚。in-ūi in lóng khòaⁿ-kìⁿ I, chiū chhiⁿ-kiaⁿ. Iâ-so͘ liâm-piⁿ kap in kóng ōe, kā in kóng, An lín ê sim, sī góa, m̄ bián kiaⁿ.

51就上船就近in；風就定；in心內不止gông-ngia̍h；Chiū chiūⁿ chûn chiū-kūn in; hong chiū tiāⁿ; in sim-lāi put-chí gông-ngia̍h;

52因為in bōe曉悟hit-ê餅ê神蹟，也in ê心鈍。in-ūi in bōe hiáu-ngō͘ hit ê piáⁿ ê sîn-jiah, iā in ê sim tūn.

53過去了，就到Kek-nî-sat-le̍k地，船拋tī岸裡。Kè-khì liáu, chiū kàu Kek-nî-sat-le̍k tōe, chûn pha tī hōaⁿ-ni̍h.

54已經離開船，人liâm-piⁿ認得伊，Í-keng lī-khui chûn, lâng liâm-piⁿ jīn-tit I,

55遍遍走hit-ê地方；聽見伊tī甚麼所在，就將舖á扛病人到hia。piàn-piàn cháu hit ê tōe-hng; thiaⁿ-kìⁿ I tī sím-mi̍h só͘-chāi, chiū chiong pho͘-á kng pīⁿ-lâng kàu hia.

56見若伊所入ê鄉社、城市、鄉下，in將病人hē tī街市，求伊若sái hō͘ in摸伊ê衫á裾ê 鬚；見若摸ê人lóng得tio̍h好。Kìⁿ-nā I só͘ ji̍p ê hiuⁿ-siā, siâⁿ-chhī, hiuⁿ-ē, in chiong pīⁿ-lâng hē tī koe-chhī, kiû I nā sái hō͘ in bong I ê saⁿ-á-ku ê chhiu; kìⁿ-nā bong ê lâng lóng tit-tio̍h hó.

1有法利賽人kap kúi-nā ê經學士聚集就近耶穌；in是tùi耶路撒冷來，Ū Hoat-lī-sài lâng kap kúi-nā ê keng-ha̍k-sū chū-chi̍p chiū-kūn Iâ-so͘; in sī tùi Iâ-lō͘-sat-léng lâi,

2也bat看見伊ê學生中有ê用俗手teh食，就是未有洗ê手。iā bat khòaⁿ-kìⁿ I ê ha̍k-seng tiong ū-ê ēng sio̍k-chhiú teh chia̍h, chiū-sī bē ū sóe ê chhiú.

3因為法利賽人kap眾猶太人lóng是拘執古早人ê流傳；若無出力洗伊ê手就無食；In-ūi Hoat-lī-sài lâng kap chèng Iû-thài lâng lóng sī khu-chip kó͘-chá lâng ê liû-thoân; nā bô chhut-la̍t sóe i ê chhiú chiū bô chia̍h;

4tùi街市tò來，若無洗也無食；in所受來執守ê iáu有chōe-chōe項，親像洗杯、罐、銅器，hiah-ê。tùi koe-chhī tò-lâi, nā bô sóe iā bô chia̍h; in só͘ siū lâi chip-siú ê iáu ū chōe-chōe hāng, chhin-chhiūⁿ sóe poe, koàn, tâng-khì, hiah-ê.

5法利賽人kap經學士問伊講，你ê學生無照古早人ê流傳來行，用俗手來食是怎樣？Hoat-lī-sài lâng kap keng-ha̍k-sū mn̄g I kóng, Lí ê ha̍k-seng bô chiàu kó͘-chá lâng ê liû-thoân lâi kiâⁿ, ēng sio̍k-chhiú lâi chia̍h sī cháiⁿ-iūⁿ?

6伊kā in講，以賽亞所讖語指lín假好ê人真正tio̍h，照所記載講， Chit-ê百姓用嘴唇尊敬我， 但是in ê心離開我遠遠；I kā in kóng, Í-sài-a só͘ chhàm-gú chí lín ké-hó ê lâng chin-chiàⁿ tio̍h, chiàu só͘ kì-chài kóng, Chit ê peh-sìⁿ ēng chhùi-tûn chun-kèng góa, Nā-sī in ê sim lī-khui góa hn̄g-hn̄g;

7In敬拜我是空空， 因為in用人所命令做教示，來教示人。In kèng-pài góa sī khang-khang, In-ūi in ēng lâng só͘ bēng-lēng chòe kà-sī, lâi kà-sī lâng.

8Án-ni lín是放sak上帝ê誡命，拘執人ê流傳。Án-ni lín sī pàng-sak Siōng-tè ê kài-bēng, khu-chip lâng ê liû-thoân.

9Koh kā in講，Lín實在是棄sak上帝ê誡命，beh守lín ê流傳。Koh kā in kóng, Lín si̍t-chāi sī khì-sak Siōng-tè ê kài-bēng, beh siú lín ê liû-thoân.

10因為摩西bat講，Tio̍h尊敬你ê老父kap你ê老母；koh講，罵父罵母ê人的確tio̍h hō͘伊死。In-ūi Mô͘-se bat kóng, Tio̍h chun-kèng lí ê lāu-pē kap lí ê lāu-bú; koh kóng, Mē pē mē bú ê lâng tek-khak tio̍h hō͘ i sí.

11但是lín講，人若對伊ê父á是伊ê母講，你本所會thang tùi我得tio̍h ê利益已經做Kok-pán，(就是講，禮物)；Nā-sī lín kóng, Lâng nā tùi i ê pē á-sī i ê bú kóng, Lí pún só͘ ōe thang tùi góa tit-tio̍h ê lī-ek í-keng chòe Kok-pán, (chiū-sī kóng, Lé-mi̍h);

12以後lín就m̄准伊用甚麼服事伊ê父 á是伊ê母；í-āu lín chiū m̄ chún i ēng sím-mi̍h ho̍k-sāi i ê pē á-sī i ê bú;

13是將lín所傳授ê流傳廢無上帝ê道理；koh lín所做ê chōe-chōe親像chit號款。sī chiong lín só͘ thoân-siū ê liû-thoân hòe-bô Siōng-tè ê tō-lí; koh lín só͘ chòe ê chōe-chōe chhin-chhiūⁿ chit hō khoán.

14就koh叫眾人就近伊，kā in講，Lín lóng tio̍h聽我來曉悟；Chiū koh kiò chèng lâng chiū-kūn I, kā in kóng, Lín lóng tio̍h thiaⁿ góa lâi hiáu-ngō͘;

15見若tùi人ê外面入ê bōe會bak lâ-sâm人；獨獨tùi人ê內面出ê，chiah-ê就是bak lâ-sâm人。kìⁿ-nā tùi lâng ê gōa-bīn ji̍p ê bōe-ōe bak lâ-sâm lâng; to̍k-to̍k tùi lâng ê lāi-bīn chhut ê, chiah-ê chiū-sī bak lâ-sâm lâng.

17耶穌離開眾人入厝，伊ê學生將chit-ê譬喻問伊。Iâ-so͘ lī-khui chèng lâng ji̍p chhù, I ê ha̍k-seng chiong chit ê phì-jū mn̄g I.

18伊就kā in講，Lín也án-ni bōe曉悟mah？I chiū kā in kóng, Lín iā án-ni bōe hiáu-ngō͘ mah?

19Kiám m̄知見若tùi外面入tī人ê，bōe會bak lâ-sâm人；因為m̄是入伊ê心，就是入伊ê腹肚，來放tī廁池。伊講án-ni是hō͘ ta̍k項ê食物lóng清氣。Kiám m̄ chai kìⁿ-nā tùi gōa-bīn ji̍p tī lâng ê, bōe-ōe bak lâ-sâm lâng; in-ūi m̄ sī ji̍p i ê sim, chiū-sī ji̍p i ê pak-tó͘, lâi pàng tī chhè-tî. I kóng án-ni sī hō͘ ta̍k hāng ê chia̍h-mi̍h lóng chheng-khì.

20Koh講，Tùi人ê內面出ê，就是bak lâ-sâm人。Koh kóng, Tùi lâng ê lāi-bīn chhut ê, chiū-sī bak lâ-sâm lâng.

21因為tùi內面，就是tùi人ê心，出chiah-ê pháiⁿ念頭，私通、偷the̍h、thâi人，In-ūi tùi lāi-bīn, chiū-sī tùi lâng ê sim, chhut chiah ê pháiⁿ liām-thâu, su-thong, thau-the̍h, thâi lâng,

22姦淫、貪心、邪惡、奸詐、好色、pháiⁿ目，譭謗，驕傲，猖狂；kan-îm, tham-sim, siâ-ok, kan-chà, hò͘ⁿ-sek, pháiⁿ-ba̍k, húi-pòng, kiau-ngō͘, chhiong-kông;

23凡若食ê pháiⁿ lóng是tùi內面出，也bak lâ-sâm人。hoān-nā chia̍h ê pháiⁿ lóng sī tùi lāi-bīn chhut, iā bak lâ-sâm lâng.

24耶穌tùi hia起身，去到Chhui-lô Se-tùn ê交界，入一間厝，m̄ ài人知；但是khǹg bōe密。Iâ-so͘ tùi hia khí-sin, khì kàu Chhui-lô Se-tùn ê kau-kài, ji̍p chi̍t keng chhù, m̄ ài lâng chai; nā-sī khǹg bōe ba̍t.

25Liâm-piⁿ有一個婦人人，伊ê細漢cha-bó͘-kiáⁿ hō͘邪神附身，聽見耶穌ê事，就來仆tī伊ê腳下。Liâm-piⁿ ū chi̍t ê hū-jîn-lâng, i ê sòe-hàn cha-bó͘-kiáⁿ hō͘ siâ-sîn hū-sin, thiaⁿ-kìⁿ Iâ-so͘ ê sū, chiū lâi phak tī I ê kha-ē.

26Chit-ê婦人人是Hi-lī-nî人，屬Sū-lī-hui-nî-ki ê族；伊求耶穌趕鬼離開伊ê cha-bó͘-kiáⁿ。Chit ê hū-jîn-lâng sī Hi-lī-nî lâng, sio̍k Sū-lī-hui-nî-ki ê cho̍k; i kiû Iâ-so͘ kóaⁿ kúi lī-khui i ê cha-bó͘-kiáⁿ.

27耶穌kā伊講，Tio̍h hō͘ gín-ná事先食飽；因為the̍h gín-ná ê餅hiat hō͘狗是m̄好。Iâ-so͘ kā i kóng, Tio̍h hō͘ gín-ná tāi-seng chia̍h pá; in-ūi the̍h gín-ná ê piáⁿ hiat hō͘ káu sī m̄ hó.

28婦人人應伊講，主ah，是lah；總是桌腳ê狗也食細kiáⁿ ê餅碎。Hū-jîn-lâng ìn I kóng, Chú ah, sī lah; chóng-sī toh-kha ê káu iā chia̍h sòe-kiáⁿ ê piáⁿ-chhùi.

29耶穌kā伊講，因為chit句話你thang tò去，鬼已經離開你ê cha-bó͘-kiáⁿ出去。Iâ-so͘ kā i kóng, In-ūi chit kù ōe lí thang tò-khì, kúi í-keng lī-khui lí ê cha-bó͘-kiáⁿ chhut-khì.

30婦人人tò去in tau，看見cha-bó͘-kiáⁿ倒tī眠床，鬼已經出去。Hū-jîn-lâng tò-khì in tau, khòaⁿ-kìⁿ cha-bó͘-kiáⁿ tó tī bîn-chhn̂g, kúi í-keng chhut-khì.

31耶穌koh tùi Chhui-lô ê境界，經過Se-tùn，tùi Te-ka-pho-lī境ê中央，到加利利海。Iâ-so͘ koh tùi Chhui-lô ê kéng-kài, keng-kè Se-tùn, tùi Te-ka-pho-lī kéng ê tiong-ng, kàu Ka-lī-lī hái.

32有人chhōa一個臭耳人kòa tiuh舌根ê就近伊，求伊kā伊hōaⁿ手。Ū lâng chhōa chi̍t ê chhàu-hī-lâng kòa tiuh-chi̍h-kun ê chiū-kūn I, kiû I kā i hōaⁿ chhiú.

33耶穌chhōa hit人離開眾人到邊頭，就用指頭á探伊雙pêng ê耳孔，koh phùi-hōa來摸伊ê舌，Iâ-so͘ chhōa hit lâng lī-khui chèng lâng kàu piⁿ-thâu, chiū ēng chńg-thâu-á thàm i siang-pêng ê hī-khang, koh phùi-nōa lâi bong i ê chi̍h,

34ǹg天吐氣，kā伊講，Í-hoat-tāi，就是講，開。ǹg thiⁿ thó͘-khùi, kā i kóng, Í-hoat-tāi, chiū-sī kóng, Khui.

35伊雙pêng ê耳孔就開，舌根也tháu，講話明明。I siang-pêng ê hī-khang chiū khui, chi̍h-kun iā tháu, kóng ōe bêng-bêng.

36耶穌警戒in莫得kā人講；總是ná警戒，in ná報揚。Iâ-so͘ kéng-kài in bo̍h-tit kā lâng kóng; chóng-sī ná kéng-kài, in ná pò-iông.

37也不止奇怪講，伊所做lóng是好，hō͘臭耳人ê聽見，啞口ê講話。Iā put-chí kî-koài kóng, I só͘ chòe lóng sī hó, hō͘ chhàu-hī-lâng ê thiaⁿ-kìⁿ, é-káu ê kóng ōe.