1耶穌就叫伊十二個學生來，hō͘ in有制壓邪神ê權，來趕逐in，續醫好ta̍k樣ê症頭，ta̍k樣ê病痛。Iâ-so͘ chiū kiò I cha̍p-jī ê ha̍k-seng lâi, hō͘ in ū chè-ap siâ-sîn ê koân, lâi kóaⁿ-tio̍k in, sòa i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ.

2十二使徒ê名就是chiah-ê：頭一個西門(叫做彼得)，kap伊ê兄弟安得烈；西庇太ê Kiáⁿ雅各，kap伊ê兄弟約翰；Cha̍p-jī sù-tô͘ ê miâ chiū-sī chiah-ê: thâu-chi̍t-ê Se-bûn( kiò chòe Pí-tek), kap i ê hiaⁿ-tī An-tek-lia̍t; Se-pí-thài ê kiáⁿ Ngá-kok, kap i ê hiaⁿ-tī Iok-hān;

3腓力，kap Pa-to-lô-mái；To-má，kap抽餉ê馬太；A-le̍k-hui ê Kiáⁿ雅各，kap Ta̍t-thài；Hui-le̍k, kap Pa-to-lô-mái; To-má, kap thiu-hiòng ê Má-thài; A-le̍k-hui ê kiáⁿ Ngá-kok, kap Ta̍t-thài;

4Ka-ná-nî ê西門，kap加略人猶大，就是賣耶穌ê。Ka-ná-nî ê Se-bûn, kap Ka-lio̍k lâng Iû-tāi, chiū-sī bōe Iâ-so͘ ê.

5耶穌差chit十二人，續吩咐in講，外邦ê路莫得行，撒馬利亞人ê城莫得入；Iâ-so͘ chhe chí cha̍p-jī lâng, sòa hoan-hù in kóng, Gōa-pang ê lō͘ bo̍h-tit kiâⁿ, Sat-má-lī-a lâng ê siâⁿ bo̍h-tit ji̍p;

6khah好tio̍h去就近以色列家失落ê羊。khah hó tio̍h khì chiū-kūn Í-sek-lia̍t ke sit-lo̍h ê iûⁿ.

7行ê時，tio̍h傳講，天國近lah。Kiâⁿ ê sî, tio̍h thoân kóng, Thian-kok kūn lah.

8醫好有病ê；hō͘死ê koh活；hō͘ thái-ko ê清氣；趕鬼；lín白白得tio̍h，tio̍h白白hō͘人。I-hó ū pīⁿ ê; hō͘ sí ê koh-oa̍h; hō͘ thái-ko ê chheng-khì; kóaⁿ kúi; lín pe̍h-pe̍h tit-tio̍h, tio̍h pe̍h-pe̍h hō͘ lâng.

9Lín ê腰肚內，lóng m̄-thang有金、銀、銅；Lín ê io-tó͘ lāi, lóng m̄-thang ū kim, gûn, tâng;

10路裡亦莫得有tah-連，莫得兩領衫，莫得鞋，莫得柺á；因為做工人堪得得tio̍h伊ê lim食。lō͘-ni̍h ia̍h bo̍h-tit ū tah-liân, bo̍h-tit nn̄g niá saⁿ, bo̍h-tit ôe, bo̍h-tit koáiⁿ-á; in-ūi chòe-kang lâng kham-tit tit-tio̍h i ê lim-chia̍h.

11Lín所入ê，無論甚麼城，甚麼鄉里，tio̍h探聽其中是誰會堪得，就tiàm tī hia，到離開ê時。Lín só͘ ji̍p ê, bô lūn sím-mi̍h siâⁿ, sím-mi̍h hiuⁿ-lí, tio̍h thàm-thiaⁿ kî-tiong chī-chūi ōe kham-tit, chiū tiàm tī hia, kàu lī-khui ê sî.

12入hit-ê厝，tio̍h kā伊請安。Ji̍p hit ê chhù, tio̍h kā i chhéng-an.

13Hit-ê厝若會堪得，就hō͘ lín ê平安到tī伊；若bōe堪得，就hō͘ lín ê平安歸tī lín。Hit ê chhù nā ōe kham-tit, chiū hō͘ lín ê pêng-an kàu tī i; nā bōe kham-tit, chiū hō͘ lín ê pêng-an kui tī lín.

14見若m̄接納lín，m̄聽lín ê話ê，出hit-ê厝，hit-ê城ê時，tio̍h拌 (pōaⁿ)去lín腳裡ê土粉。Kìⁿ-nā m̄ chiap-la̍p lín, m̄ thiaⁿ lín ê ōe ê, chhut hit ê chhù, hit ê siâⁿ ê sî, tio̍h pōaⁿ-khì lín kha-ni̍h ê thô͘-hún.

15我實在kā lín講，當審判ê日，所多馬kap Gô͘-mô͘-la̍h ê地方比hit-ê城iáu khah快擔當。Góa si̍t-chāi kā lín kóng, Tng sím-phòaⁿ ê ji̍t, Só͘-to-má kap Gô͘-mô͘-la̍h ê tōe-hng pí hit ê siâⁿ iáu khah khoài tam-tng.

16Taⁿ我差lín親像羊tī豺狼ê中間；所以lín tio̍h知識親像蛇，純良親像鴿á。Taⁿ góa chhe lín chhin-chhiūⁿ iûⁿ tī chhâi-lông ê tiong-kan; só͘-í lín tio̍h tì-sek chhin-chhiūⁿ chôa, sûn-liông chhin-chhiūⁿ chíⁿ-á.

17總是tio̍h持防人；因為in beh將lín交hō͘公會，亦beh tī lín ê會堂鞭phah lín；Chóng-sī tio̍h tî-hông lâng; in-ūi in beh chiong lín kau hō͘ kong-hōe, ia̍h beh tī lín ê hōe-tn̂g piⁿ-phah lín;

18koh lín亦beh為tio̍h我ê緣故，受拖到總督kap君王ê面前，來做干證tī in kap外邦人。koh lín ia̍h beh ūi-tio̍h góa ê iân-kò͘, siū thoa kàu chóng-tok kap kun-ông ê bīn-chêng, lâi chòe kan-chèng tī in kap gōa-pang lâng.

19但是lín受送交ê時，莫得掛慮beh怎樣講，á是講甚麼話；因為所tio̍h講ê，beh tī hit時賞賜lín。Nā-sī lín siū sàng-kau ê sî, bo̍h-tit khòa-lū beh cháiⁿ-iūⁿ kóng, á-sī kóng sím-mi̍h ōe; in-ūi só͘ tio̍h kóng ê, beh tī hit sî siúⁿ-sù lín.

20因為m̄是lín家己講，是lín ê父ê神tiàm-tī lín teh講。In-ūi m̄ sī lín ka-kī kóng, sī lín ê Pē ê Sîn tiàm-tī lín teh kóng.

21兄弟beh將兄弟送交去死，父款待kiáⁿ亦án-ni；kiáⁿ兒beh起來攻擊父母，hō͘ in死。Hiaⁿ-tī beh chiong hiaⁿ-tī sàng-kau khì sí, pē khoán-thāi kiáⁿ ia̍h án-ni; kiáⁿ-jî beh khí-lâi kong-kek pē-bú, hō͘ in sí.

22亦lín因為我ê名beh hō͘眾人怨恨，獨獨吞忍到路尾ê，伊beh得tio̍h救。Ia̍h lín in-ūi góa ê miâ beh hō͘ chèng lâng oàn-hūn, to̍k-to̍k thun-lún kàu lō͘-bé ê, i beh tit-tio̍h kiù.

23Tī chit-ê城khún-tio̍k lín，tio̍h走到hit城；我實在kā lín講，以色列chiah-ê城，lín行bē thàng，人子就到。Tī chit ê siâⁿ khún-tio̍k lín, tio̍h cháu kàu hit siâⁿ; góa si̍t-chāi kā lín kóng, Í-sek-lia̍t chiah ê siâⁿ, lín kiâⁿ bē thàng, Jîn-chú chiū kàu.

24學生bōe pôaⁿ過先生，奴僕bōe pôaⁿ過主人。Ha̍k-seng bōe pôaⁿ-kè sian-siⁿ, lô͘-po̍k bōe pôaⁿ-kè chú-lâng.

25學生親像先生，奴僕親像主人，就夠額。人既然叫家主做Pia̍t-se-pok，何況叫伊家內ê人。Ha̍k-seng chhin-chhiūⁿ sian-siⁿ, lô͘-po̍k chhin-chhiūⁿ chú-lâng, chiū kàu-gia̍h. Lâng kì-jiân kiò ke-chú chòe Pia̍t-se-pok, hô-hòng kiò i ke-lāi ê lâng.

26所以莫得驚in；因為無有蓋密後來無露出ê事；亦無有隱密後來無hō͘人知ê。Só͘-í bo̍h-tit kiaⁿ in; in-ūi bô ū khàm-ba̍t āu-lâi bô lō͘-chhut ê sū; ia̍h bô ū ún-ba̍t āu-lâi bô hō͘ lâng chai ê.

27我tī暗中kā lín講ê，lín tio̍h tī光明ê所在講出；àⁿ tī耳孔kā lín講ê，tio̍h tī厝頂傳伊。Góa tī àm-tiong kā lín kóng ê, lín tio̍h tī kng-bêng ê só͘-chāi kóng-chhut; àⁿ tī hī-khang kā lín kóng ê, tio̍h tī chhù-téng thoân i.

28Hiah-ê害死身軀，bōe害死靈魂ê，莫得驚in；獨獨hit-ê會滅靈魂kap身軀tī地獄ê，khah tio̍h驚。Hiah ê hāi-sí sin-khu, bōe hāi-sí lêng-hûn ê, bo̍h-tit kiaⁿ in; to̍k-to̍k hit-ê ōe bia̍t lêng-hûn kap sin-khu tī tē-ge̍k ê, khah tio̍h kiaⁿ.

29兩隻雀鳥á kiám m̄是賣一分銀mah？若m̄是lín ê父有准，一隻亦bōe ka-la̍uh地；Nn̄g chiah chhek-chiáu-á kiám m̄ sī bōe chi̍t hun gûn mah? nā m̄ sī lín ê Pē ū chún, chi̍t chiah ia̍h bōe ka-la̍uh tōe;

30就lín ê頭毛亦lóng計算。chiū lín ê thâu-mn̂g ia̍h lóng kè-sǹg.

31所以lín莫得驚；lín比chōe-chōe雀鳥á khah貴氣。Só͘-í lín bo̍h-tit kiaⁿ; lín pí chōe-chōe chhek-chiáu-á khah kùi-khì.

32所以見若tī人ê面前認我ê，我亦tī我tī天裡ê父ê面前beh認伊。Só͘-í kìⁿ-nā tī lâng ê bīn-chêng jīn góa ê, góa ia̍h tī góa tī thiⁿ-ni̍h ê Pē ê bīn-chêng beh jīn i.

33見若tī人ê面前m̄認我ê，我亦tī我tī天裡ê父ê面前beh m̄認伊。Kìⁿ-nā tī lâng ê bīn-chêng m̄ jīn góa ê, góa ia̍h tī góa tī thiⁿ-ni̍h ê Pē ê bīn-chêng beh m̄ jīn i.

34莫得phah算我來是beh hō͘地上和平；我來m̄是beh hō͘伊和平，就是hiat落刀劍。Bo̍h-tit phah-sǹg góa lâi sī beh hō͘ tōe-chiūⁿ hô-pêng; góa lâi m̄ sī beh hō͘ i hô-pêng, chiū-sī hiat-lo̍h to-kiàm.

35因為我來，是hō͘ kiáⁿ kap伊ê老父絕情，cha-bó͘-kiáⁿ kap伊ê老母，sim-pū kap伊ê ta-ke，亦beh án-ni。In-ūi góa lâi, sī hō͘ kiáⁿ kap i ê lāu-pē choa̍t-chêng, cha-bó͘-kiáⁿ kap i ê lāu-bú, sim-pū kap i ê ta-ke, ia̍h beh án-ni.

36Koh人ê對敵就是伊家己家內ê人。Koh lâng ê tùi-te̍k chiū-sī i ka-kī ke-lāi ê lâng.

37疼父母khah過頭tī疼我ê，bōe堪得tī我；疼kiáⁿ, cha-bó͘-kiáⁿ khah過頭tī疼我ê，bōe堪得tī我；Thiàⁿ pē-bú khah kè-thâu tī thiàⁿ góa ê, bōe kham-tit tī góa; thiàⁿ kiáⁿ cha-bó͘-kiáⁿ khah kè-thâu tī thiàⁿ góa ê, bōe kham-tit tī góa;

38m̄背家己ê十字架來tè tī我ê後面ê，亦bōe堪得tī我。m̄ pē ka-kī ê si̍p-jī-kè lâi tè tī góa ê āu-bīn ê, ia̍h bōe kham-tit tī góa.

39得tio̍h伊ê性命ê人，beh失落伊；為tio̍h我失落伊ê性命ê人，beh得tio̍h伊。Tit-tio̍h i ê sìⁿ-miā ê lâng, beh sit-lo̍h i; ūi-tio̍h góa sit-lo̍h i ê sìⁿ-miā ê lâng, beh tit-tio̍h i.

40接納lín ê，就是接納我；接納我ê，就是接納差我ê。Chiap-la̍p lín ê, chiū-sī chiap-la̍p góa; chiap-la̍p góa ê, chiū-sī chiap-la̍p chhe góa ê.

41為tio̍h先知ê名來接納先知ê，beh得tio̍h先知ê賞；為tio̍h義人ê名來接納義人ê，beh得tio̍h義人ê賞。Ūi-tio̍h sian-ti ê miâ lâi chiap-la̍p sian-ti ê, beh tit-tio̍h sian-ti ê siúⁿ; ūi-tio̍h gī lâng ê miâ lâi chiap-la̍p gī lâng ê, beh tit-tio̍h gī lâng ê siúⁿ.

42見若為tio̍h學生ê名，kan-ta用一杯冷水hō͘ chiah-ê細kiáⁿ ê一個lim ê，我實在kā lín講，伊決斷bōe失落伊ê賞。Kìⁿ-nā ūi-tio̍h ha̍k-seng ê miâ, kan-ta ēng chi̍t poe léng-chúi hō͘ chiah ê sòe-kiáⁿ ê chi̍t ê lim ê, góa si̍t-chāi kā lín kóng, i koat-toàn bōe sit-lo̍h i ê siúⁿ.

1耶穌吩咐伊十二個學生明白，就離開hia，beh tī in hiah-ê城教示人kap傳道。Iâ-so͘ hoan-hù I cha̍p-jī ê ha̍k-seng bêng-pe̍k, chiū lī-khui hia, beh tī in hiah ê siâⁿ kà-sī lâng kap thoân-tō.

2約翰tī監裡聽見基督所行ê事；就差學生問伊講，Iok-hān tī kaⁿ-ni̍h thiaⁿ-kìⁿ Ki-tok só͘ kiâⁿ ê sū; chiū chhe ha̍k-seng mn̄g I kóng,

3所beh來ê，是你mah？á是阮tio̍h ǹg望別人ah？Só͘ beh lâi ê, sī lí mah? á-sī goán tio̍h ǹg-bāng pa̍t lâng ah?

4耶穌應講，Lín tio̍h去，將lín所聽見所看見ê，kā約翰講；Iâ-so͘ ìn kóng, Lín tio̍h khì, chiong lín só͘ thiaⁿ-kìⁿ só͘ khòaⁿ-kìⁿ ê, kā Iok-hān kóng;

5就是chhiⁿ-mî ê看見，跛腳ê行，thái-ko ê清氣，chhàu-hī人ê聽見，死ê人koh活，sòng-hiong人得tio̍h聽福音。chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im.

6見若無tī我來tio̍h-tak ê，有福氣。Kìⁿ-nā bô tī góa lâi tio̍h-tak ê, ū hok-khì.

7In去ê時，耶穌chiah提起約翰，kā眾人講，Lín前出去曠野，beh看甚麼？是蘆竹hō͘風吹振動mah？In khì ê sî, Iâ-so͘ chiah thê-khí Iok-hān, kā chèng lâng kóng, Lín chêng chhut-khì khòng-iá, beh khòaⁿ sím-mi̍h? Sī lô͘-tek hō͘ hong chhe tín-tāng mah?

8Lín出去ài看甚麼？是人穿幼軟ê衣裳mah？你看，穿幼軟ê是tī王宮。Lín chhut-khì ài khòaⁿ sím-mi̍h? Sī lâng chhēng iù-nńg ê i-chiûⁿ mah? Lí khòaⁿ, chhēng iù-nńg ê sī tī ông-kiong.

9若是án-ni lín出去beh啥事？是beh看先知mah？是lah。我kā lín講，伊是iáu khah贏過先知。Nā-sī án-ni lín chhut-khì beh siáⁿ-sū? Sī beh khòaⁿ sian-ti mah? Sī lah. Góa kā lín kóng, i sī iáu khah iâⁿ-kè sian-ti.

10Chit人就是經裡所指ê，講， 我差我ê使者tī你ê面前； 伊beh tī你ê頭前備辦你ê路。Chit lâng chiū-sī keng-ni̍h só͘ chí ê, kóng, Góa chhe góa ê sù-chiá tī lí ê bīn-chêng; I beh tī lí ê thâu-chêng pī-pān lí ê lō͘.

11我實在kā lín講，婦人人所生ê，從中bē有興起khah大tī行洗禮ê約翰；總是tī天國ê微細ê，iáu khah大伊。Góa si̍t-chāi kā lín kóng, Hū-jîn-lâng só͘ siⁿ ê, chiông-tiong bē ū heng-khí khah tōa tī kiâⁿ sóe-lé ê Iok-hān; chóng-sī tī thian-kok ê bî-sòe ê, iáu khah tōa i.

12Tùi行洗禮約翰ê時日到taⁿ，天國hō͘人強強取，強ê人用力取伊。Tùi kiâⁿ sóe-lé Iok-hān ê sî-ji̍t kàu taⁿ, thian-kok hō͘ lâng kiông-kiông chhú, kiông ê lâng ēng la̍t chhú i.

13因為眾先知kap律法有讖語到約翰ê時。In-ūi chèng sian-ti kap lu̍t-hoat ū chhàm-gú kàu Iok-hān ê sî.

14Lín若甘願承受，chit人就是teh-beh來ê以利亞。Lín nā kam-goān sêng-siū, chit lâng chiū-sī teh-beh lâi ê Í-lī-a.

15有耳孔thang聽ê，tio̍h聽。Ū hī-khang thang thiaⁿ ê, tio̍h thiaⁿ.

16Chit世代我beh用甚麼來比並伊？是親像gín-ná坐tī街市裡，來叫in ê同伴講，Chit sè-tāi góa beh ēng sím-mi̍h lâi pí-phēng i? Sī chhin-chhiūⁿ gín-ná chē tī koe-chhī-ni̍h, lâi kiò in ê tâng-phōaⁿ kóng,

17阮tùi lín pûn笛á，lín無跳舞；阮bat悲哀，lín無搥胸。Goán tùi lín pûn ta̍t-á, lín bô thiàu-bú; goán bat pi-ai, lín bô tûi heng.

18因為約翰來，無食無lim；人就講，伊患tio̍h鬼。In-ūi Iok-hān lâi, bô chia̍h bô lim; lâng chiū kóng, I hoān-tio̍h kúi.

19人子來亦食亦lim；人就講，伊是貪食好酒ê人，抽餉kap pháiⁿ人ê朋友。但是智慧tùi伊ê所行顯明伊是tio̍h。Jîn-chú lâi ia̍h chia̍h ia̍h lim; lâng chiū kóng, I sī tham-chia̍h hò͘ⁿ-chiú ê lâng, thiu-hiòng kap pháiⁿ lâng ê pêng-iú. Nā-sī Tì-hūi tùi i ê só͘ kiâⁿ hián-bêng i sī tio̍h.

20耶穌bat tī hiah-ê城行chōe-chōe權能，因為in lóng無反悔，hit時chiah責備in講，Iâ-so͘ bat tī hiah ê siâⁿ kiâⁿ chōe-chōe koân-lêng, in-ūi in lóng bô hoán-hóe, hit sî chiah chek-pī in kóng,

21Ko-lia̍p-sìn ah，你有災禍！Pek-sài-tāi ah，你有災禍！因為tī lín中間所行chiah-ê權能，若有行tī Chhui-lô kap Se-tùn，in就早早穿麻衫sám火灰(hu)來反悔。Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê koân-lêng, nā ū kiâⁿ tī Chhui-lô kap Se-tùn, in chiū chá-chá chhēng môa saⁿ sám hé-hu lâi hoán-hóe.

22但是我kā lín講，當審判ê日，Chhui-lô kap Se-tùn比lín iáu khah快擔當。Nā-sī góa kā lín kóng, tng sím-phòaⁿ ê ji̍t, Chhui-lô kap Se-tùn pí lín iáu khah khoài tam-tng.

23迦百農ah，你kiám會得tio̍h舉起到天mah？你beh墮落陰府；因為tī你ê中間所行chiah-ê權能，若有行tī Só͘-to-má，就到今á日伊iáu tī-teh。Ka-pek-lông ah, lí kiám ōe tit-tio̍h kú-khí kàu thiⁿ mah? lí beh tūi-lo̍h im-hú; in-ūi tī lí ê tiong-kan só͘ kiâⁿ chiah ê koân-lêng, nā ū kiâⁿ tī Só͘-to-má, chiū kàu kin-á-ji̍t i iáu tī-teh.

24但是我kā lín講，當審判ê日，Só͘ -to-ma2e5地方比你khah快擔當。Nā-sī góa kā lín kóng, tng sím-phòaⁿ ê ji̍t, Só͘-to-má ê tōe-hng pí lí khah khoài tam-tng.

25當hit時耶穌應講，父ah，天地ê主，我o-ló你，因為你將chiah-ê事，tùi智慧聰明ê有隱密伊，tùi細kiáⁿ有顯明伊；Tng hit sî Iâ-so͘ ìn kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū, tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i;

26父ah，是lah；因為你看án-ni做歡喜。Pē ah, sī lah; in-ūi lí khòaⁿ án-ni chòe hoaⁿ-hí.

27萬項有tùi我ê父交付我，父以外無一個bat Kiáⁿ；Kiáⁿ kap Kiáⁿ所ài beh指示ê以外，無一個bat父。Bān-hāng-ū tùi góa ê Pē kau-hù góa, Pē í-gōa bô chi̍t-ê bat Kiáⁿ; Kiáⁿ kap Kiáⁿ só͘ ài beh chí-sī ê í-gōa, bô chi̍t-ê bat Pē.

28Lín見若tio̍h磨擔(taⁿ)重擔(tàⁿ)ê，tio̍h就近我；我beh hō͘ lín安歇。Lín kìⁿ-nā tio̍h-bôa taⁿ tāng-tàⁿ ê, tio̍h chiū-kūn góa; góa beh hō͘ lín an-hioh.

29我心內溫柔謙遜；lín背我ê taⁿ，來tùi我學，就lín ê心神會得tio̍h安歇。Góa sim-lāi un-jiû khiam-sùn; lín pē góa ê taⁿ, lâi tùi góa o̍h, chiū lín ê sim-sîn ōe tit-tio̍h an-hioh.

30因為我ê taⁿ是快，我ê擔是輕。In-ūi góa ê taⁿ sī khoài, góa ê tàⁿ sī khin.

1當hit時，耶穌tī安歇日tùi麥園經過；伊ê學生iau，就摘(tiah)麥穗來食。Tng hit sî, Iâ-so͘ tī an-hioh-ji̍t tùi be̍h-hn̂g keng-kè; I ê ha̍k-seng iau, chiū tiah be̍h-sūi lâi chia̍h.

2但是法利賽人看見就kā伊講，你看，你ê學生行安歇日所m̄應該行ê事。Nā-sī Hoat-lī-sài lâng khòaⁿ-kìⁿ chiū kā I kóng, Lí khòaⁿ, lí ê ha̍k-seng kiâⁿ an-hioh-ji̍t só͘ m̄ eng-kai kiâⁿ ê sū.

3耶穌就kā in講，大衛kap跟tè ê人iau ê時所行ê，lín無讀tio̍h mah？Iâ-so͘ chiū kā in kóng, Tāi-pi̍t kap kun-tè ê lâng iau ê sî só͘ kiâⁿ ê, lín bô tha̍k-tio̍h mah?

4就是伊入上帝ê厝，食排列ê餅；這m̄是伊kap跟tè ê人所thang食ê，獨獨祭司thang nā-tiāⁿ。Chiū-sī i ji̍p Siōng-tè ê chhù, chia̍h pâi-lia̍t ê piáⁿ; che m̄ sī i kap kun-tè ê lâng só͘ thang chia̍h ê, to̍k-to̍k chè-si thang nā-tiāⁿ.

5á是lín亦m̄-bat讀律法所記載，當安歇日祭司tī殿裡患tio̍h安歇亦是無罪mah？Á-sī lín ia̍h m̄ bat tha̍k lu̍t-hoat só͘ kì-chài, tng an-hioh-ji̍t chè-si tī tiān-ni̍h hoān-tio̍h an-hioh ia̍h sī bô chōe mah?

6獨獨我kā lín講，tī chia有比殿khah大ê。To̍k-to̍k góa kā lín kóng, tī chia ū pí tiān khah tōa ê.

7總是lín若知，我ài憐憫，無ài祭祀，chit句ê意義，就無責罪無罪ê人。Chóng-sī lín nā chai, Góa ài lîn-bín, bô ài chè-sū, chit kù ê ì-gī, chiū bô chek-chōe bô chōe ê lâng.

8因為人子是安歇日ê主。In-ūi Jîn-chú sī an-hioh-ji̍t ê chú.

9耶穌離開hia，入in ê會堂；tú-tn̄g有人一手枯焦(tâ)。Iâ-so͘ lī-khui hia, ji̍p in ê hōe-tn̂g; tú-tn̄g ū lâng chi̍t chhiú ko͘-tâ.

10人問伊講，安歇日行醫，thang mah？意思ài beh告伊。Lâng mn̄g I kóng, An-hioh-ji̍t hêng i, thang mah? ì-sù ài beh kò I.

11伊就kā in講，Lín中間甚麼人有一隻羊，若tī安歇日跋落坑，無kā伊掠起來mah？I chiū kā in kóng, Lín tiong-kan sím-mi̍h lâng ū chi̍t chiah iûⁿ, nā tī an-hioh-ji̍t poa̍h-lo̍h khiⁿ, bô kā i lia̍h-khí-lâi mah?

12何況人比羊加jōa貴氣ah！所以安歇日行好事是thang。Hô-hòng lâng pí iûⁿ ke jōa kùi-khì ah! Só͘-í an-hioh-ji̍t kiâⁿ hó-sū sī thang.

13就kā hit人講，伸你ê手。伊就伸，隨時好好，親像別支手。Chiū kā hit lâng kóng, Chhun lí ê chhiú. I chiū chhun, sûi-sî hó-hó, chhin-chhiūⁿ pa̍t ki chhiú.

14法利賽人出去，saⁿ-kap計謀攻擊耶穌，看thang怎樣滅伊。Hoat-lī-sài lâng chhut-khì, saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

15耶穌知，就退去，離開hia；有chōe-chōe人tè伊，就lóng kā in醫；Iâ-so͘ chai, chiū thè-khì, lī-khui hia; ū chōe-chōe lâng tè I, chiū lóng kā in i;

16亦警戒in莫得將伊報揚；ia̍h kéng-kài in bo̍h-tit chiong I pò-iông;

17是beh應驗託先知以賽亞所講ê，講，sī beh èng-giām thok sian-ti Í-sài-a só͘ kóng ê, kóng,

18你看，我ê奴僕，我所揀ê， 我所疼ê，我ê心所歡喜ê； 我beh將我ê神付hō͘伊。 伊beh用判斷通知外邦。Lí khòaⁿ, góa ê lô͘-po̍k, góa só͘ kéng ê, Góa só͘ thiàⁿ ê, góa ê sim só͘ hoaⁿ-hí ê; Góa beh chiong góa ê Sîn hù-hō͘ I. I beh ēng phòaⁿ-toàn thong-ti gōa-pang.

19伊無beh相爭，無beh喧嚷； Tī街市無人聽見伊ê聲。I bô beh saⁿ-chiⁿ, bô beh soan-jióng; Tī koe-chhī bô lâng thiaⁿ-kìⁿ I ê siaⁿ.

20受傷ê蘆竹，伊無beh at折， Beh hoa ê火星，伊無phah熄， 到hō͘公義會得勝。Siū-siong ê lô͘-tek, I bô beh at-chi̍h, Beh hoa ê hé-chhiⁿ, I bô phah-sit, Kàu hō͘ kong-gī ōe tek-sèng.

21外邦亦beh靠伊ê名來ǹg望。Gōa-pang ia̍h beh khò I ê miâ lâi ǹg-bāng.

22Hit時有chhōa一個患tio̍h鬼，chhiⁿ-mî kòa啞口ê來就近伊。伊就醫好伊，hō͘啞口ê講話，續會看見。Hit sî ū chhōa chi̍t ê hoān-tio̍h kúi, chhiⁿ-mî kòa é-káu ê lâi chiū-kūn I. I chiū i-hó i, hō͘ é-káu ê kóng ōe, sòa ōe khòaⁿ-kìⁿ.

23眾人lóng gông-ngia̍h，講，chit-ê總無是大衛ê後裔o͘h？Chèng lâng lóng gông-ngia̍h, kóng, chit-ê chóng-bô sī Tāi-pi̍t ê hō͘-è o͘h?

24但是法利賽人聽見就講，Chit人趕鬼無m̄是靠鬼王Pia̍t-se-pok。Nā-sī Hoat-lī-sài lâng thiaⁿ-kìⁿ chiū kóng, Chit lâng kóaⁿ kúi bô m̄ sī khò kúi-ông Pia̍t-se-pok.

25耶穌知in ê意思，就kā in講，見若國家己爭拚，會致到拋荒；見若城á是家家己爭拚，的確khiā bōe tiâu。Iâ-so͘ chai in ê ì-sù, chiū kā in kóng, Kìⁿ-nā kok ka-kī cheng-piàⁿ, ōe tì-kàu pha-hng; kìⁿ-nā siâⁿ á-sī ke ka-kī cheng-piàⁿ, tek-khak khiā bōe tiâu.

26若撒旦趕撒旦，是家己爭拚，伊ê國thài-thó khiā會tiâu？Nā Sat-tàn kóaⁿ Sat-tàn, sī ka-kī cheng-piàⁿ, i ê kok thài-thó khiā ōe tiâu?

27設使我靠Pia̍t-se-pok趕鬼，就lín ê子弟趕鬼óa靠是誰 ah？Án-ni in beh擬斷lín。Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi óa-khò chī-chūi ah? Án-ni in beh gí-toàn lín.

28獨獨我若靠上帝ê神趕鬼，就上帝ê國已經到lín lah。To̍k-to̍k góa nā khò Siōng-tè ê Sîn kóaⁿ kúi, chiū Siōng-tè ê kok í-keng kàu lín lah.

29人怎樣會入猛人ê厝，劫伊ê家伙？kiám m̄ tio̍h事先縛猛人，然後劫伊ê厝mah？Lâng cháiⁿ-iūⁿ ōe ji̍p béng lâng ê chhù, kiap i ê ke-hé? kiám m̄ tio̍h tāi-seng pa̍k béng lâng, jiân-āu kiap i ê chhù mah?

30無同我ê，就是對敵我；無kap我收拾ê，就是teh phah散。Bô tâng góa ê, chiū-sī tùi-te̍k góa; bô kap góa siu-khioh ê, chiū-sī teh phah-sòaⁿ.

31所以我kā lín講，見若罪惡謗瀆，lóng beh赦免伊；獨獨謗瀆聖神ê，無beh赦免伊。Só͘-í góa kā lín kóng, Kìⁿ-nā chōe-ok pòng-to̍k, lóng beh sià-bián i; to̍k-to̍k pòng-to̍k Sèng Sîn ê, bô beh sià-bián i.

32見若講話攻擊人子ê，beh赦免伊；獨獨見若講話攻擊聖神ê，不論今世來世，無beh赦免伊。Kìⁿ-nā kóng ōe kong-kek Jîn-chú ê, beh sià-bián i; to̍k-to̍k kìⁿ-nā kóng ōe kong-kek Sèng Sîn ê, put-lūn kim-sè lâi-sè, bô beh sià-bián i.

33Lín tio̍h掠hit-ê樹做好，伊ê果子亦做好；或是掠hit-ê樹做pháiⁿ，伊ê果子亦做pháiⁿ；因為tùi果子來bat樹。Lín tio̍h lia̍h hit ê chhiū chòe hó, i ê ké-chí ia̍h chòe hó; he̍k-sī lia̍h hit ê chhiū chòe pháiⁿ, i ê ké-chí ia̍h chòe pháiⁿ; in-ūi tùi ké-chí lâi bat chhiū.

34毒蛇ê類ah，lín已經是pháiⁿ，thài會講好話？因為是tùi心所充滿ê，嘴就講出。To̍k-chôa ê lūi ah, lín í-keng sī pháiⁿ, thài ōe kóng hó ōe? in-ūi sī tùi sim só͘ chhiong-móa ê, chhùi chiū kóng chhut.

35好人tùi所積聚ê好，來發出chiah-ê好；pháiⁿ人tùi所積聚ê pháiⁿ，來發出chiah-ê pháiⁿ。Hó lâng tùi só͘ chek-chū ê hó, lâi hoat-chhut chiah ê hó; pháiⁿ lâng tùi só͘ chek-chū ê pháiⁿ, lâi hoat-chhut chiah ê pháiⁿ.

36我kā lín講，見若人所講ê閒á話，in tī審判日，ta̍k句tio̍h訴明。Góa kā lín kóng, kìⁿ-nā lâng só͘ kóng ê êng-á-ōe, in tī sím-phòaⁿ ê ji̍t, ta̍k kù tio̍h sò͘-bêng.

37因為對你ê話beh稱你做義；亦對你ê話beh擬你有罪。In-ūi tùi lí ê ōe beh chheng lí chòe gī; ia̍h tùi lí ê ōe beh gí lí ū chōe.

38Hit時有經學士kap法利賽幾nā人應伊講，先生ah，阮ài tùi你看一個神蹟。Hit sî ū keng-ha̍k-sū kap Hoat-lī-sài kúi-nā lâng ìn I kóng, Sian-siⁿ ah, goán ài tùi lí khòaⁿ chi̍t ê sîn-jiah.

39但是伊應講，惡毒姦淫ê世代求神蹟；tû先知約拿ê神蹟以外，無beh神蹟hō͘ in；Nā-sī I ìn kóng, Ok-to̍k kan-îm ê sè-tāi kiû sîn-jiah; tû sian-ti Iok-ná ê sîn-jiah í-gōa, bô beh sîn-jiah hō͘ in;

40因為親像約拿三日三暝tī大魚ê腹肚內，人子亦beh án-ni三日三暝tī地內。in-ūi chhin-chhiūⁿ Iok-ná saⁿ ji̍t saⁿ mî tī tōa hî ê pak-tó͘ lāi, Jîn-chú ia̍h beh án-ni saⁿ ji̍t saⁿ mî tī tōe-lāi.

41尼尼微人當審判ê時，beh kap chit世代ê人saⁿ-kap起來，續擬in ê罪；因為in tùi約拿所傳來反悔；何況tī chia有比約拿khah大ê。Nî-nî-bî lâng tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí in ê chōe; in-ūi in tùi Iok-ná só͘ thoân lâi hoán-hóe; hô-hòng tī chia ū pí Iok-ná khah tōa ê.

42南方ê女王，當審判ê時beh kap chit世代ê人saⁿ-kap起來，續擬in ê罪；因為伊tùi地ê極頭來，beh聽所羅門知識ê話，何況tī chia有比所羅門khah大ê。Lâm-hng ê lú-ông, tng sím-phòaⁿ ê sî beh kap chit sè-tāi ê lâng saⁿ-kap khí-lâi, sòa gí in ê chōe; in-ūi i tùi tōe ê ke̍k-thâu lâi, beh thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê.

43邪神已經離開人，經過無水ê地，求安歇亦無得tio̍h。Siâ-sîn í-keng lī-khui lâng, keng-kè bô chúi ê tōe, kiû an-hioh ia̍h bô tit-tio̍h.

44就講，我beh tò去所出來ê厝；到tè，就看見空空，拚掃，修整；Chiū kóng, Góa beh tò-khì só͘ chhut-lâi ê chhù; kàu tè, chiū khòaⁿ-kìⁿ khang-khang, piàⁿ-sàu, siu-chéng;

45就去，koh帶七個神，比家己khah pháiⁿ ê，入去khiā起；hit人路尾ê景況，比起頭ê khah慘。Chit-ê pháiⁿ ê世代亦beh親像án-ni。chiū khì, koh tòa chhit ê sîn, pí ka-kī khah pháiⁿ ê, ji̍p-khì khiā-khí; hit lâng lō͘-bé ê kéng-hóng, pí khí-thâu ê khah chhám. Chit ê pháiⁿ ê sè-tāi ia̍h beh chhin-chhiūⁿ án-ni.

46伊iáu對眾人講話ê時，tú-tn̄g伊ê老母kap伊ê兄弟khiā tī外面，ài beh kap伊講話。I iáu tùi chèng lâng kóng ōe ê sî, tú-tn̄g I ê lāu-bú kap I ê hiaⁿ-tī khiā tī gōa-bīn, ài beh kap I kóng ōe.

47有人kā伊講，你看，你ê老母kap你ê兄弟khiā tī外面，ài beh kap你講話。Ū lâng kā I kóng, Lí khòaⁿ, lí ê lāu-bú kap lí ê hiaⁿ-tī khiā tī gōa-bīn, ài beh kap lí kóng ōe.

48就應hit-ê kā伊講ê講，甚麼人是我ê老母？甚麼人是我ê兄弟ah？Chiū ìn hit ê kā I kóng ê kóng, Sím-mi̍h lâng sī góa ê lāu-bú? sím-mi̍h lâng sī góa ê hiaⁿ-tī ah?

49就伸手kí伊ê學生講，你看，我ê老母kap我ê兄弟。Chiū chhun chhiú kí I ê ha̍k-seng kóng, Lí khòaⁿ, góa ê lāu-bú kap góa ê hiaⁿ-tī.

50因為見若行我tī天裡ê父ê旨意ê，就是我ê兄弟、姊妹，kap老母。In-ūi kìⁿ-nā kiâⁿ góa tī thiⁿ-ni̍h ê Pē ê chí-ì ê, chiū-sī góa ê hiaⁿ-tī, chí-bē, kap lāu-bú.