1耶穌吩咐伊十二個學生明白，就離開hia，beh tī in hiah-ê城教示人kap傳道。Iâ-so͘ hoan-hù I cha̍p-jī ê ha̍k-seng bêng-pe̍k, chiū lī-khui hia, beh tī in hiah ê siâⁿ kà-sī lâng kap thoân-tō.

2約翰tī監裡聽見基督所行ê事；就差學生問伊講，Iok-hān tī kaⁿ-ni̍h thiaⁿ-kìⁿ Ki-tok só͘ kiâⁿ ê sū; chiū chhe ha̍k-seng mn̄g I kóng,

3所beh來ê，是你mah？á是阮tio̍h ǹg望別人ah？Só͘ beh lâi ê, sī lí mah? á-sī goán tio̍h ǹg-bāng pa̍t lâng ah?

4耶穌應講，Lín tio̍h去，將lín所聽見所看見ê，kā約翰講；Iâ-so͘ ìn kóng, Lín tio̍h khì, chiong lín só͘ thiaⁿ-kìⁿ só͘ khòaⁿ-kìⁿ ê, kā Iok-hān kóng;

5就是chhiⁿ-mî ê看見，跛腳ê行，thái-ko ê清氣，chhàu-hī人ê聽見，死ê人koh活，sòng-hiong人得tio̍h聽福音。chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im.

6見若無tī我來tio̍h-tak ê，有福氣。Kìⁿ-nā bô tī góa lâi tio̍h-tak ê, ū hok-khì.

7In去ê時，耶穌chiah提起約翰，kā眾人講，Lín前出去曠野，beh看甚麼？是蘆竹hō͘風吹振動mah？In khì ê sî, Iâ-so͘ chiah thê-khí Iok-hān, kā chèng lâng kóng, Lín chêng chhut-khì khòng-iá, beh khòaⁿ sím-mi̍h? Sī lô͘-tek hō͘ hong chhe tín-tāng mah?

8Lín出去ài看甚麼？是人穿幼軟ê衣裳mah？你看，穿幼軟ê是tī王宮。Lín chhut-khì ài khòaⁿ sím-mi̍h? Sī lâng chhēng iù-nńg ê i-chiûⁿ mah? Lí khòaⁿ, chhēng iù-nńg ê sī tī ông-kiong.

9若是án-ni lín出去beh啥事？是beh看先知mah？是lah。我kā lín講，伊是iáu khah贏過先知。Nā-sī án-ni lín chhut-khì beh siáⁿ-sū? Sī beh khòaⁿ sian-ti mah? Sī lah. Góa kā lín kóng, i sī iáu khah iâⁿ-kè sian-ti.

10Chit人就是經裡所指ê，講， 我差我ê使者tī你ê面前； 伊beh tī你ê頭前備辦你ê路。Chit lâng chiū-sī keng-ni̍h só͘ chí ê, kóng, Góa chhe góa ê sù-chiá tī lí ê bīn-chêng; I beh tī lí ê thâu-chêng pī-pān lí ê lō͘.

11我實在kā lín講，婦人人所生ê，從中bē有興起khah大tī行洗禮ê約翰；總是tī天國ê微細ê，iáu khah大伊。Góa si̍t-chāi kā lín kóng, Hū-jîn-lâng só͘ siⁿ ê, chiông-tiong bē ū heng-khí khah tōa tī kiâⁿ sóe-lé ê Iok-hān; chóng-sī tī thian-kok ê bî-sòe ê, iáu khah tōa i.

12Tùi行洗禮約翰ê時日到taⁿ，天國hō͘人強強取，強ê人用力取伊。Tùi kiâⁿ sóe-lé Iok-hān ê sî-ji̍t kàu taⁿ, thian-kok hō͘ lâng kiông-kiông chhú, kiông ê lâng ēng la̍t chhú i.

13因為眾先知kap律法有讖語到約翰ê時。In-ūi chèng sian-ti kap lu̍t-hoat ū chhàm-gú kàu Iok-hān ê sî.

14Lín若甘願承受，chit人就是teh-beh來ê以利亞。Lín nā kam-goān sêng-siū, chit lâng chiū-sī teh-beh lâi ê Í-lī-a.

15有耳孔thang聽ê，tio̍h聽。Ū hī-khang thang thiaⁿ ê, tio̍h thiaⁿ.

16Chit世代我beh用甚麼來比並伊？是親像gín-ná坐tī街市裡，來叫in ê同伴講，Chit sè-tāi góa beh ēng sím-mi̍h lâi pí-phēng i? Sī chhin-chhiūⁿ gín-ná chē tī koe-chhī-ni̍h, lâi kiò in ê tâng-phōaⁿ kóng,

17阮tùi lín pûn笛á，lín無跳舞；阮bat悲哀，lín無搥胸。Goán tùi lín pûn ta̍t-á, lín bô thiàu-bú; goán bat pi-ai, lín bô tûi heng.

18因為約翰來，無食無lim；人就講，伊患tio̍h鬼。In-ūi Iok-hān lâi, bô chia̍h bô lim; lâng chiū kóng, I hoān-tio̍h kúi.

19人子來亦食亦lim；人就講，伊是貪食好酒ê人，抽餉kap pháiⁿ人ê朋友。但是智慧tùi伊ê所行顯明伊是tio̍h。Jîn-chú lâi ia̍h chia̍h ia̍h lim; lâng chiū kóng, I sī tham-chia̍h hò͘ⁿ-chiú ê lâng, thiu-hiòng kap pháiⁿ lâng ê pêng-iú. Nā-sī Tì-hūi tùi i ê só͘ kiâⁿ hián-bêng i sī tio̍h.

20耶穌bat tī hiah-ê城行chōe-chōe權能，因為in lóng無反悔，hit時chiah責備in講，Iâ-so͘ bat tī hiah ê siâⁿ kiâⁿ chōe-chōe koân-lêng, in-ūi in lóng bô hoán-hóe, hit sî chiah chek-pī in kóng,

21Ko-lia̍p-sìn ah，你有災禍！Pek-sài-tāi ah，你有災禍！因為tī lín中間所行chiah-ê權能，若有行tī Chhui-lô kap Se-tùn，in就早早穿麻衫sám火灰(hu)來反悔。Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê koân-lêng, nā ū kiâⁿ tī Chhui-lô kap Se-tùn, in chiū chá-chá chhēng môa saⁿ sám hé-hu lâi hoán-hóe.

22但是我kā lín講，當審判ê日，Chhui-lô kap Se-tùn比lín iáu khah快擔當。Nā-sī góa kā lín kóng, tng sím-phòaⁿ ê ji̍t, Chhui-lô kap Se-tùn pí lín iáu khah khoài tam-tng.

23迦百農ah，你kiám會得tio̍h舉起到天mah？你beh墮落陰府；因為tī你ê中間所行chiah-ê權能，若有行tī Só͘-to-má，就到今á日伊iáu tī-teh。Ka-pek-lông ah, lí kiám ōe tit-tio̍h kú-khí kàu thiⁿ mah? lí beh tūi-lo̍h im-hú; in-ūi tī lí ê tiong-kan só͘ kiâⁿ chiah ê koân-lêng, nā ū kiâⁿ tī Só͘-to-má, chiū kàu kin-á-ji̍t i iáu tī-teh.

24但是我kā lín講，當審判ê日，Só͘ -to-ma2e5地方比你khah快擔當。Nā-sī góa kā lín kóng, tng sím-phòaⁿ ê ji̍t, Só͘-to-má ê tōe-hng pí lí khah khoài tam-tng.

25當hit時耶穌應講，父ah，天地ê主，我o-ló你，因為你將chiah-ê事，tùi智慧聰明ê有隱密伊，tùi細kiáⁿ有顯明伊；Tng hit sî Iâ-so͘ ìn kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū, tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i;

26父ah，是lah；因為你看án-ni做歡喜。Pē ah, sī lah; in-ūi lí khòaⁿ án-ni chòe hoaⁿ-hí.

27萬項有tùi我ê父交付我，父以外無一個bat Kiáⁿ；Kiáⁿ kap Kiáⁿ所ài beh指示ê以外，無一個bat父。Bān-hāng-ū tùi góa ê Pē kau-hù góa, Pē í-gōa bô chi̍t-ê bat Kiáⁿ; Kiáⁿ kap Kiáⁿ só͘ ài beh chí-sī ê í-gōa, bô chi̍t-ê bat Pē.

28Lín見若tio̍h磨擔(taⁿ)重擔(tàⁿ)ê，tio̍h就近我；我beh hō͘ lín安歇。Lín kìⁿ-nā tio̍h-bôa taⁿ tāng-tàⁿ ê, tio̍h chiū-kūn góa; góa beh hō͘ lín an-hioh.

29我心內溫柔謙遜；lín背我ê taⁿ，來tùi我學，就lín ê心神會得tio̍h安歇。Góa sim-lāi un-jiû khiam-sùn; lín pē góa ê taⁿ, lâi tùi góa o̍h, chiū lín ê sim-sîn ōe tit-tio̍h an-hioh.

30因為我ê taⁿ是快，我ê擔是輕。In-ūi góa ê taⁿ sī khoài, góa ê tàⁿ sī khin.

1當hit時，耶穌tī安歇日tùi麥園經過；伊ê學生iau，就摘(tiah)麥穗來食。Tng hit sî, Iâ-so͘ tī an-hioh-ji̍t tùi be̍h-hn̂g keng-kè; I ê ha̍k-seng iau, chiū tiah be̍h-sūi lâi chia̍h.

2但是法利賽人看見就kā伊講，你看，你ê學生行安歇日所m̄應該行ê事。Nā-sī Hoat-lī-sài lâng khòaⁿ-kìⁿ chiū kā I kóng, Lí khòaⁿ, lí ê ha̍k-seng kiâⁿ an-hioh-ji̍t só͘ m̄ eng-kai kiâⁿ ê sū.

3耶穌就kā in講，大衛kap跟tè ê人iau ê時所行ê，lín無讀tio̍h mah？Iâ-so͘ chiū kā in kóng, Tāi-pi̍t kap kun-tè ê lâng iau ê sî só͘ kiâⁿ ê, lín bô tha̍k-tio̍h mah?

4就是伊入上帝ê厝，食排列ê餅；這m̄是伊kap跟tè ê人所thang食ê，獨獨祭司thang nā-tiāⁿ。Chiū-sī i ji̍p Siōng-tè ê chhù, chia̍h pâi-lia̍t ê piáⁿ; che m̄ sī i kap kun-tè ê lâng só͘ thang chia̍h ê, to̍k-to̍k chè-si thang nā-tiāⁿ.

5á是lín亦m̄-bat讀律法所記載，當安歇日祭司tī殿裡患tio̍h安歇亦是無罪mah？Á-sī lín ia̍h m̄ bat tha̍k lu̍t-hoat só͘ kì-chài, tng an-hioh-ji̍t chè-si tī tiān-ni̍h hoān-tio̍h an-hioh ia̍h sī bô chōe mah?

6獨獨我kā lín講，tī chia有比殿khah大ê。To̍k-to̍k góa kā lín kóng, tī chia ū pí tiān khah tōa ê.

7總是lín若知，我ài憐憫，無ài祭祀，chit句ê意義，就無責罪無罪ê人。Chóng-sī lín nā chai, Góa ài lîn-bín, bô ài chè-sū, chit kù ê ì-gī, chiū bô chek-chōe bô chōe ê lâng.

8因為人子是安歇日ê主。In-ūi Jîn-chú sī an-hioh-ji̍t ê chú.

9耶穌離開hia，入in ê會堂；tú-tn̄g有人一手枯焦(tâ)。Iâ-so͘ lī-khui hia, ji̍p in ê hōe-tn̂g; tú-tn̄g ū lâng chi̍t chhiú ko͘-tâ.

10人問伊講，安歇日行醫，thang mah？意思ài beh告伊。Lâng mn̄g I kóng, An-hioh-ji̍t hêng i, thang mah? ì-sù ài beh kò I.

11伊就kā in講，Lín中間甚麼人有一隻羊，若tī安歇日跋落坑，無kā伊掠起來mah？I chiū kā in kóng, Lín tiong-kan sím-mi̍h lâng ū chi̍t chiah iûⁿ, nā tī an-hioh-ji̍t poa̍h-lo̍h khiⁿ, bô kā i lia̍h-khí-lâi mah?

12何況人比羊加jōa貴氣ah！所以安歇日行好事是thang。Hô-hòng lâng pí iûⁿ ke jōa kùi-khì ah! Só͘-í an-hioh-ji̍t kiâⁿ hó-sū sī thang.

13就kā hit人講，伸你ê手。伊就伸，隨時好好，親像別支手。Chiū kā hit lâng kóng, Chhun lí ê chhiú. I chiū chhun, sûi-sî hó-hó, chhin-chhiūⁿ pa̍t ki chhiú.

14法利賽人出去，saⁿ-kap計謀攻擊耶穌，看thang怎樣滅伊。Hoat-lī-sài lâng chhut-khì, saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

15耶穌知，就退去，離開hia；有chōe-chōe人tè伊，就lóng kā in醫；Iâ-so͘ chai, chiū thè-khì, lī-khui hia; ū chōe-chōe lâng tè I, chiū lóng kā in i;

16亦警戒in莫得將伊報揚；ia̍h kéng-kài in bo̍h-tit chiong I pò-iông;

17是beh應驗託先知以賽亞所講ê，講，sī beh èng-giām thok sian-ti Í-sài-a só͘ kóng ê, kóng,

18你看，我ê奴僕，我所揀ê， 我所疼ê，我ê心所歡喜ê； 我beh將我ê神付hō͘伊。 伊beh用判斷通知外邦。Lí khòaⁿ, góa ê lô͘-po̍k, góa só͘ kéng ê, Góa só͘ thiàⁿ ê, góa ê sim só͘ hoaⁿ-hí ê; Góa beh chiong góa ê Sîn hù-hō͘ I. I beh ēng phòaⁿ-toàn thong-ti gōa-pang.

19伊無beh相爭，無beh喧嚷； Tī街市無人聽見伊ê聲。I bô beh saⁿ-chiⁿ, bô beh soan-jióng; Tī koe-chhī bô lâng thiaⁿ-kìⁿ I ê siaⁿ.

20受傷ê蘆竹，伊無beh at折， Beh hoa ê火星，伊無phah熄， 到hō͘公義會得勝。Siū-siong ê lô͘-tek, I bô beh at-chi̍h, Beh hoa ê hé-chhiⁿ, I bô phah-sit, Kàu hō͘ kong-gī ōe tek-sèng.

21外邦亦beh靠伊ê名來ǹg望。Gōa-pang ia̍h beh khò I ê miâ lâi ǹg-bāng.

22Hit時有chhōa一個患tio̍h鬼，chhiⁿ-mî kòa啞口ê來就近伊。伊就醫好伊，hō͘啞口ê講話，續會看見。Hit sî ū chhōa chi̍t ê hoān-tio̍h kúi, chhiⁿ-mî kòa é-káu ê lâi chiū-kūn I. I chiū i-hó i, hō͘ é-káu ê kóng ōe, sòa ōe khòaⁿ-kìⁿ.

23眾人lóng gông-ngia̍h，講，chit-ê總無是大衛ê後裔o͘h？Chèng lâng lóng gông-ngia̍h, kóng, chit-ê chóng-bô sī Tāi-pi̍t ê hō͘-è o͘h?

24但是法利賽人聽見就講，Chit人趕鬼無m̄是靠鬼王Pia̍t-se-pok。Nā-sī Hoat-lī-sài lâng thiaⁿ-kìⁿ chiū kóng, Chit lâng kóaⁿ kúi bô m̄ sī khò kúi-ông Pia̍t-se-pok.

25耶穌知in ê意思，就kā in講，見若國家己爭拚，會致到拋荒；見若城á是家家己爭拚，的確khiā bōe tiâu。Iâ-so͘ chai in ê ì-sù, chiū kā in kóng, Kìⁿ-nā kok ka-kī cheng-piàⁿ, ōe tì-kàu pha-hng; kìⁿ-nā siâⁿ á-sī ke ka-kī cheng-piàⁿ, tek-khak khiā bōe tiâu.

26若撒旦趕撒旦，是家己爭拚，伊ê國thài-thó khiā會tiâu？Nā Sat-tàn kóaⁿ Sat-tàn, sī ka-kī cheng-piàⁿ, i ê kok thài-thó khiā ōe tiâu?

27設使我靠Pia̍t-se-pok趕鬼，就lín ê子弟趕鬼óa靠是誰 ah？Án-ni in beh擬斷lín。Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi óa-khò chī-chūi ah? Án-ni in beh gí-toàn lín.

28獨獨我若靠上帝ê神趕鬼，就上帝ê國已經到lín lah。To̍k-to̍k góa nā khò Siōng-tè ê Sîn kóaⁿ kúi, chiū Siōng-tè ê kok í-keng kàu lín lah.

29人怎樣會入猛人ê厝，劫伊ê家伙？kiám m̄ tio̍h事先縛猛人，然後劫伊ê厝mah？Lâng cháiⁿ-iūⁿ ōe ji̍p béng lâng ê chhù, kiap i ê ke-hé? kiám m̄ tio̍h tāi-seng pa̍k béng lâng, jiân-āu kiap i ê chhù mah?

30無同我ê，就是對敵我；無kap我收拾ê，就是teh phah散。Bô tâng góa ê, chiū-sī tùi-te̍k góa; bô kap góa siu-khioh ê, chiū-sī teh phah-sòaⁿ.

31所以我kā lín講，見若罪惡謗瀆，lóng beh赦免伊；獨獨謗瀆聖神ê，無beh赦免伊。Só͘-í góa kā lín kóng, Kìⁿ-nā chōe-ok pòng-to̍k, lóng beh sià-bián i; to̍k-to̍k pòng-to̍k Sèng Sîn ê, bô beh sià-bián i.

32見若講話攻擊人子ê，beh赦免伊；獨獨見若講話攻擊聖神ê，不論今世來世，無beh赦免伊。Kìⁿ-nā kóng ōe kong-kek Jîn-chú ê, beh sià-bián i; to̍k-to̍k kìⁿ-nā kóng ōe kong-kek Sèng Sîn ê, put-lūn kim-sè lâi-sè, bô beh sià-bián i.

33Lín tio̍h掠hit-ê樹做好，伊ê果子亦做好；或是掠hit-ê樹做pháiⁿ，伊ê果子亦做pháiⁿ；因為tùi果子來bat樹。Lín tio̍h lia̍h hit ê chhiū chòe hó, i ê ké-chí ia̍h chòe hó; he̍k-sī lia̍h hit ê chhiū chòe pháiⁿ, i ê ké-chí ia̍h chòe pháiⁿ; in-ūi tùi ké-chí lâi bat chhiū.

34毒蛇ê類ah，lín已經是pháiⁿ，thài會講好話？因為是tùi心所充滿ê，嘴就講出。To̍k-chôa ê lūi ah, lín í-keng sī pháiⁿ, thài ōe kóng hó ōe? in-ūi sī tùi sim só͘ chhiong-móa ê, chhùi chiū kóng chhut.

35好人tùi所積聚ê好，來發出chiah-ê好；pháiⁿ人tùi所積聚ê pháiⁿ，來發出chiah-ê pháiⁿ。Hó lâng tùi só͘ chek-chū ê hó, lâi hoat-chhut chiah ê hó; pháiⁿ lâng tùi só͘ chek-chū ê pháiⁿ, lâi hoat-chhut chiah ê pháiⁿ.

36我kā lín講，見若人所講ê閒á話，in tī審判日，ta̍k句tio̍h訴明。Góa kā lín kóng, kìⁿ-nā lâng só͘ kóng ê êng-á-ōe, in tī sím-phòaⁿ ê ji̍t, ta̍k kù tio̍h sò͘-bêng.

37因為對你ê話beh稱你做義；亦對你ê話beh擬你有罪。In-ūi tùi lí ê ōe beh chheng lí chòe gī; ia̍h tùi lí ê ōe beh gí lí ū chōe.

38Hit時有經學士kap法利賽幾nā人應伊講，先生ah，阮ài tùi你看一個神蹟。Hit sî ū keng-ha̍k-sū kap Hoat-lī-sài kúi-nā lâng ìn I kóng, Sian-siⁿ ah, goán ài tùi lí khòaⁿ chi̍t ê sîn-jiah.

39但是伊應講，惡毒姦淫ê世代求神蹟；tû先知約拿ê神蹟以外，無beh神蹟hō͘ in；Nā-sī I ìn kóng, Ok-to̍k kan-îm ê sè-tāi kiû sîn-jiah; tû sian-ti Iok-ná ê sîn-jiah í-gōa, bô beh sîn-jiah hō͘ in;

40因為親像約拿三日三暝tī大魚ê腹肚內，人子亦beh án-ni三日三暝tī地內。in-ūi chhin-chhiūⁿ Iok-ná saⁿ ji̍t saⁿ mî tī tōa hî ê pak-tó͘ lāi, Jîn-chú ia̍h beh án-ni saⁿ ji̍t saⁿ mî tī tōe-lāi.

41尼尼微人當審判ê時，beh kap chit世代ê人saⁿ-kap起來，續擬in ê罪；因為in tùi約拿所傳來反悔；何況tī chia有比約拿khah大ê。Nî-nî-bî lâng tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí in ê chōe; in-ūi in tùi Iok-ná só͘ thoân lâi hoán-hóe; hô-hòng tī chia ū pí Iok-ná khah tōa ê.

42南方ê女王，當審判ê時beh kap chit世代ê人saⁿ-kap起來，續擬in ê罪；因為伊tùi地ê極頭來，beh聽所羅門知識ê話，何況tī chia有比所羅門khah大ê。Lâm-hng ê lú-ông, tng sím-phòaⁿ ê sî beh kap chit sè-tāi ê lâng saⁿ-kap khí-lâi, sòa gí in ê chōe; in-ūi i tùi tōe ê ke̍k-thâu lâi, beh thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê.

43邪神已經離開人，經過無水ê地，求安歇亦無得tio̍h。Siâ-sîn í-keng lī-khui lâng, keng-kè bô chúi ê tōe, kiû an-hioh ia̍h bô tit-tio̍h.

44就講，我beh tò去所出來ê厝；到tè，就看見空空，拚掃，修整；Chiū kóng, Góa beh tò-khì só͘ chhut-lâi ê chhù; kàu tè, chiū khòaⁿ-kìⁿ khang-khang, piàⁿ-sàu, siu-chéng;

45就去，koh帶七個神，比家己khah pháiⁿ ê，入去khiā起；hit人路尾ê景況，比起頭ê khah慘。Chit-ê pháiⁿ ê世代亦beh親像án-ni。chiū khì, koh tòa chhit ê sîn, pí ka-kī khah pháiⁿ ê, ji̍p-khì khiā-khí; hit lâng lō͘-bé ê kéng-hóng, pí khí-thâu ê khah chhám. Chit ê pháiⁿ ê sè-tāi ia̍h beh chhin-chhiūⁿ án-ni.

46伊iáu對眾人講話ê時，tú-tn̄g伊ê老母kap伊ê兄弟khiā tī外面，ài beh kap伊講話。I iáu tùi chèng lâng kóng ōe ê sî, tú-tn̄g I ê lāu-bú kap I ê hiaⁿ-tī khiā tī gōa-bīn, ài beh kap I kóng ōe.

47有人kā伊講，你看，你ê老母kap你ê兄弟khiā tī外面，ài beh kap你講話。Ū lâng kā I kóng, Lí khòaⁿ, lí ê lāu-bú kap lí ê hiaⁿ-tī khiā tī gōa-bīn, ài beh kap lí kóng ōe.

48就應hit-ê kā伊講ê講，甚麼人是我ê老母？甚麼人是我ê兄弟ah？Chiū ìn hit ê kā I kóng ê kóng, Sím-mi̍h lâng sī góa ê lāu-bú? sím-mi̍h lâng sī góa ê hiaⁿ-tī ah?

49就伸手kí伊ê學生講，你看，我ê老母kap我ê兄弟。Chiū chhun chhiú kí I ê ha̍k-seng kóng, Lí khòaⁿ, góa ê lāu-bú kap góa ê hiaⁿ-tī.

50因為見若行我tī天裡ê父ê旨意ê，就是我ê兄弟、姊妹，kap老母。In-ūi kìⁿ-nā kiâⁿ góa tī thiⁿ-ni̍h ê Pē ê chí-ì ê, chiū-sī góa ê hiaⁿ-tī, chí-bē, kap lāu-bú.

1當hit日，耶穌tùi厝內出去，坐tī海邊。Tng hit ji̍t, Iâ-so͘ tùi chhù-lāi chhut-khì, chē tī hái-piⁿ.

2有chōe-chōe陣ê人聚集就近伊，致到伊上船來坐，kui陣ê人lóng khiā tī岸裡。Ū chōe-chōe tīn ê lâng chū-chi̍p chiū-kūn I, tì-kàu I chiūⁿ chûn lâi chē, kui tīn ê lâng lóng khiā tī hōaⁿ-ni̍h.

3就用chōe-chōe項設譬喻kā in講，你看，有掖種ê出去掖種；Chiū ēng chōe-chōe hāng siat phì-jū kā in kóng,Lí khòaⁿ, ū iā chéng ê chhut-khì iā chéng;

4掖ê時，有ê ka-la̍uh tī路邊，飛鳥到，一盡食伊；iā ê sî, ū-ê ka-la̍uh tī lō͘-piⁿ, pe-chiáu kàu, it-chīn chia̍h i;

5有ê ka-la̍uh tī石格ê地，土淺ê位；因為土無深，就發真緊；ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín;

6但是日出曝伊；因為無根，就枯焦。nā-sī ji̍t chhut pha̍k i; in-ūi bô kun, chiū ko͘-tâ.

7亦有ê ka-la̍uh tī刺á內，刺á發起遮蔽伊；Ia̍h ū-ê ka-la̍uh tī chhì-á-lāi, chhì-á hoat-khí jia-pè i;

8有ê ka-la̍uh tī好ê土地，結實，有ê百倍，有ê六十倍，有ê三十倍。ū-ê ka-la̍uh tī hó ê thó͘-tōe, kiat-si̍t, ū-ê pah pē, ū-ê la̍k-cha̍p pē, ū-ê saⁿ-cha̍p pē.

9有耳孔ê，tio̍h聽。Ū hī-khang ê, tio̍h thiaⁿ.

10學生就近伊講，你用譬喻kā in講是怎樣？Ha̍k-seng chiū-kūn I kóng, Lí ēng phì-jū kā in kóng sī cháiⁿ-iūⁿ?

11伊應講，天國ê奧妙hō͘ lín知，亦無hō͘ in。I ìn kóng, Thian-kok ê ò-biāu hō͘ lín chai, ia̍h bô hō͘ in.

12因為見若有ê，beh hō͘伊，就伊有chhun；無ê，連伊所有ê亦beh搶伊。In-ūi kìⁿ-nā ū ê, beh hō͘ i, chiū i ū chhun; bô ê, liân i só͘ ū ê ia̍h beh chhiúⁿ i.

13所以我用譬喻kā in講；因為in看，亦看無見；聽，亦聽無現，亦無曉悟。Só͘-í góa ēng phì-jū kā in kóng; in-ūi in khòaⁿ, ia̍h khòaⁿ bô kìⁿ; thiaⁿ, ia̍h thiaⁿ bô hiān, ia̍h bô hiáu-ngō͘.

14以賽亞所讖語ê，是應驗tī in，講， Lín聽是beh聽，但是決斷無曉悟； Lín看是beh看，但是決斷看無見；Í-sài-a só͘ chhàm-gú ê, sī èng-giām tī in, kóng, Lín thiaⁿ sī beh thiaⁿ, nā-sī koat-toàn bô hiáu-ngō͘; Lín khòaⁿ sī beh khòaⁿ, nā-sī koat-toàn khòaⁿ bô kìⁿ;

15因為chit-ê百姓心鈍，耳孔重， In ê目睭放khoeh； 驚了in用目睭看見， 用耳孔聽見， 用心曉悟， 來oa̍t-lìn-tńg， 我就醫好in。In-ūi chit ê peh-sìⁿ sim tūn, Hī-khang tāng, In ê ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi oa̍t-lìn-tńg, Góa chiū i-hó in.

16但是lín ê目睭有福氣，因為in看見；lín ê耳孔有福氣，因為in聽見。Nā-sī lín ê ba̍k-chiu ū hok-khì, in-ūi in khòaⁿ-kìⁿ; lín ê hī-khang ū hok-khì, in-ūi in thiaⁿ-kìⁿ.

17因為我實在kā lín講，前有chōe-chōe先知kap義人，ài看lín所看見ê，亦無看見；ài聽lín所聽見ê，亦無聽見。In-ūi góa si̍t-chāi kā lín kóng, Chêng ū chōe-chōe sian-ti kap gī lâng, ài khòaⁿ lín só͘ khòaⁿ-kìⁿ ê, ia̍h bô khòaⁿ-kìⁿ; ài thiaⁿ lín só͘ thiaⁿ-kìⁿ ê, ia̍h bô thiaⁿ-kìⁿ.

18Taⁿ chit-ê掖種子ê ê譬喻，lín tio̍h聽。Taⁿ chit-ê iā chéng-chí ê ê phì-jū, lín tio̍h thiaⁿ.

19見若聽天國ê道理也無曉悟ê，hit-ê pháiⁿ-ê就到，將所掖tī伊ê心ê搶去；這是掖tī路邊ê。Kìⁿ-nā thiaⁿ thian-kok ê tō-lí iā bô hiáu-ngō͘ ê, hit ê pháiⁿ-ê chiū kàu, chiong só͘ iā tī i ê sim ê chhiúⁿ-khì; che sī iā tī lō͘-piⁿ ê.

20掖tī石格ê地ê，這是人聽道理，liâm-piⁿ歡喜承受伊；Iā tī chio̍h-keh ê tōe ê, che sī lâng thiaⁿ tō-lí, liâm-piⁿ hoaⁿ-hí sêng-siū i;

21總是內面無根，不過是暫時nā-tiāⁿ；到為tio̍h道理tú-tio̍h有患難khún-tio̍k liâm-piⁿ tio̍h-tak。chóng-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hoān-lān khún-tio̍k liâm-piⁿ tio̍h-tak.

22掖tī刺á內ê，這是人聽道理，亦世間ê掛慮，錢財ê迷惑，遮蔽hit-ê道理，就無結實。Iā tī chhì-á-lāi ê, che sī lâng thiaⁿ tō-lí, ia̍h sè-kan ê khòa-lū, chîⁿ-châi ê bê-he̍k, jia-pè hit ê tō-lí, chiū bô kiat-si̍t.

23掖tī好土地ê，這是人聽道理來曉悟，伊實在結實；所結ê，有ê百倍，有ê六十倍，有ê三十倍。Iā tī hó thó͘-tōe ê, che sī lâng thiaⁿ tō-lí lâi hiáu-ngō͘, i si̍t-chāi kiat-si̍t; só͘ kiat ê, ū-ê pah pē, ū-ê la̍k-cha̍p pē, ū-ê saⁿ-cha̍p pē.

24Koh設譬喻對in講，天國親像人掖好種子tī伊ê園；Koh siat phì-jū tùi in kóng, Thian-kok chhin-chhiūⁿ lâng iā hó chéng-chí tī i ê hn̂g;

25人睏ê時，伊ê kiû-siû來，掖稗tī麥中，就去。lâng khùn ê sî, i ê kiû-siû lâi, iā phōe tī be̍h tiong, chiū khì.

26到麥發起來，續結穗ê時，稗亦出現。Kàu be̍h hoat-khí-lâi, sòa kiat sūi ê sî, phōe ia̍h chhut-hiān.

27家主ê奴僕來kā伊講，頭家ah，你kiám m̄是掖好種子tī你ê園mah？tùi tá-lo̍h有稗？Ke-chú ê lô͘-po̍k lâi kā i kóng, Thâu-ke ah, lí kiám m̄ sī iā hó chéng-chí tī lí ê hn̂g mah? tùi tá-lo̍h ū phōe?

28伊kā in講，這就是kiû-siû做ê。奴僕kā伊講，你ài阮去khau伊mah？I kā in kóng, Che chiū-sī kiû-siû chòe ê. Lô͘-po̍k kā i kóng, Lí ài goán khì khau i mah?

29伊就講，無，驚了lín khau稗，連麥續拔起來。I chiū kóng, Bô, kiaⁿ-liáu lín khau phōe, liân be̍h sòa pu̍ih-khí-lâi.

30容允兩項平平大叢，thèng候收割；到收割ê時，我beh kā割ê講，事先拾hiah-ê稗，hâ kui把thang燒伊；獨獨麥tio̍h收入我ê粟倉。Iông-ún nn̄g hāng pîⁿ-pîⁿ tōa châng, thèng-hāu siu-koah; kàu siu-koah ê sî, góa beh kā koah-ê kóng, Tāi-seng khioh hiah ê phōe, hâ kui pé thang sio i; to̍k-to̍k be̍h tio̍h siu-ji̍p góa ê chhek-chhng.

31Koh設譬喻對in講，天國親像一粒芥菜子，人the̍h去亦tī伊ê園；Koh siat phì-jū tùi in kóng, Thian-kok chhin-chhiūⁿ chi̍t lia̍p kòa-chhài chí, lâng the̍h khì iā tī i ê hn̂g;

32chit-ê是百項種子ê第一細；到伊大叢，是khah大lóng總ê菜蔬，續成做樹，致到空中ê鳥來歇tī伊ê枝。chit-ê sī pah hāng chéng-chí ê tē it sòe; kàu i tōa châng, sī khah tōa lóng-chóng ê chhài-soe, sòa chiâⁿ chòe chhiū, tì-kàu khong-tiong ê chiáu lâi hioh tī i ê ki.

33Koh用譬喻kā in講，天國親像酵，婦人人the̍h去khǹg tī三斗麵粉ê內面，到lóng發酵。Koh ēng phì-jū kā in kóng, Thian-kok chhin-chhiūⁿ kàⁿ, hū-jîn-lâng the̍h khì khǹg tī saⁿ táu mī-hún ê lāi-bīn, kàu lóng hoat kàⁿ.

34Chiah-ê lóng是耶穌用譬喻kā眾人講；若m̄是用譬喻，就無所kā in講；Chiah-ê lóng sī Iâ-so͘ ēng phì-jū kā chèng lâng kóng; nā m̄ sī ēng phì-jū, chiū bô só͘ kā in kóng;

35來應驗早託先知所講ê，講， 我beh開嘴設譬喻， 闡明創造世間以來所隱密ê。lâi èng-giām chá thok sian-ti só͘ kóng ê, kóng, Góa beh khui chhùi siat phì-jū, Chhián-bêng chhòng-chō sè-kan í-lâi só͘ ún-ba̍t ê.

36Hit時耶穌hō͘眾人四散，chiah入厝；伊ê學生就近伊講，園ê稗á ê譬喻，kā阮解明。Hit sî Iâ-so͘ hō͘ chèng lâng sì-sòaⁿ, chiah ji̍p chhù; I ê ha̍k-seng chiū-kūn I kóng, Hn̂g ê phōe-á ê phì-jū, kā goán kóe-bêng.

37伊應講，掖好種子ê是人子；園就是世間；I ìn kóng, Iā hó chéng-chí ê sī Jîn-chú; hn̂g chiū-sī sè-kan;

38好種子ê就是天國ê Kiáⁿ；稗，就是pháiⁿ-ê ê Kiáⁿ；hó chéng-chí ê chiū-sī thian-kok ê kiáⁿ; phōe, chiū-sī pháiⁿ-ê ê kiáⁿ;

39掖稗ê kiû-siû，就是魔鬼；收割ê時，是世界ê路尾；割ê，就是天使。iā phōe ê kiû-siû, chiū-sī Mô͘-kúi; siu-koah ê sî, sī sè-kài ê lō͘-bé; koah ê, chiū-sī thiⁿ-sài.

40所以親像拾稗á來用火燒；tī世界ê路尾亦beh án-ni。Só͘-í chhin-chhiūⁿ khioh phōe-á lâi ēng hé sio; tī sè-kài ê lō͘-bé ia̍h beh án-ni.

41人子beh差伊ê天使tùi伊ê國內收拾見若hō͘人tio̍h-tak ê，kap做不法ê；Jîn-chú beh chhe I ê thiⁿ-sài tùi I ê kok-lāi siu-si̍p kìⁿ-nā hō͘ lâng tio̍h-tak ê, kap chòe put-hoat ê;

42hiat in tī火爐，tī hia beh有啼哭咬牙切齒。hiat in tī hé-lô͘, tī hia beh ū thî-khàu kā-gê chhiat-chhí.

43Hit時義人beh發出光親像日，tī in ê父ê國。有耳孔ê tio̍h聽。Hit sî gī lâng beh hoat-chhut kng chhin-chhiūⁿ ji̍t, tī in ê Pē ê kok. Ū hī-khang ê tio̍h thiaⁿ.

44天國親像寶貝khǹg tī園裡；人tú-tio̍h就khǹg密伊；因為歡喜chiah去賣一切所有ê，來買hit khu園。Thian-kok chhin-chhiūⁿ pó-pòe khǹg tī hn̂g-ni̍h; lâng tú-tio̍h chiū khǹg-ba̍t i; in-ūi hoaⁿ-hí chiah khì bōe it-chhè só͘ ū ê, lâi bóe hit khu hn̂g.

45Koh天國親像seng-lí人chhē好ê珠；Koh thian-kok chhin-chhiūⁿ seng-lí lâng chhē hó ê chu;

46tú-tio̍h一粒不止值錢ê，就去賣一切所有ê來買伊。tú-tio̍h chi̍t lia̍p put-chí ta̍t chîⁿ ê, chiū khì bōe it-chhè só͘ ū ê lâi bóe i.

47Koh天國親像網拋tī海裡，聚集ta̍k類ê水族；Koh thian-kok chhin-chhiūⁿ bāng pha tī hái-ni̍h, chū-chi̍p ta̍k lūi ê chúi-cho̍k;

48已經滿，就拖上坪(phiâⁿ)；坐teh，拾好ê入器具，m̄好ê hiat-ka̍k tī外面。í-keng móa, chiū thoa chiūⁿ phiâⁿ; chē-teh, khioh hó ê ji̍p khì-kū, m̄ hó ê hiat-ka̍k tī gōa-bīn.

49世界ê路尾，亦beh án-ni；chiah-ê天使beh出來，tùi義人ê中間來分別pháiⁿ人；Sè-kài ê lō͘-bé, ia̍h beh án-ni; chiah ê thiⁿ-sài beh chhut-lâi, tùi gī lâng ê tiong-kan lâi hun-piat pháiⁿ lâng;

50hiat in tī火爐，tī hia beh有啼哭咬牙切齒。hiat in tī hé-lô͘, tī hia beh ū thî-khàu kā-gê chhiat-chhí.

51Chiah-ê lín lóng會曉得bōe？In講，會。Chiah-ê lín lóng ōe hiáu-tit bōe? In kóng, Ōe.

52伊kā in講，所以見若經學士做天國ê學生ê，是親像家主tùi伊ê庫房the̍h出新舊ê物ê。I kā in kóng, Só͘-í kìⁿ-nā keng-ha̍k-sū chòe thian-kok ê ha̍k-seng ê, sī chhin-chhiūⁿ ke-chú tùi i ê khò͘-pâng the̍h-chhut sin kū ê mi̍h ê.

53耶穌已經講chiah-ê譬喻明白，就離開hia。Iâ-so͘ í-keng kóng chiah ê phì-jū bêng-pe̍k, chiū lī-khui hia.

54到伊ê本鄉，tī in ê會堂教示in；致到in gông-ngia̍h講，Chit人tùi tá-lo̍h得tio̍h chit-ê智慧，kap chiah-ê權能ah？Kàu I ê pún hiuⁿ, tī in ê hōe-tn̂g kà-sī in; tì-kàu in gông-ngia̍h kóng, Chit lâng tùi tá-lo̍h tit-tio̍h chit ê tì-hūi, kap chiah ê koân-lêng ah?

55Chit-ê kiám m̄是木匠ê Kiáⁿ mah？伊ê老母kiám m̄是叫做馬利亞，伊ê兄弟雅各、約瑟、西門、猶大mah？Chit-ê kiám m̄ sī ba̍k-chhiūⁿ ê kiáⁿ mah? I ê lāu-bú kiám m̄ sī kiò chòe Má-lī-a, I ê hiaⁿ-tī Ngá-kok, Iok-sek, Se-bûn, Iû-tāi mah?

56伊ê姊妹kiám無lóng kap咱tī chia mah？Án-ni chit人tùi tá-lo̍h得tio̍h chiah-ê一切ah？I ê chí-bē kiám bô lóng kap lán tī chia mah? Án-ni chit lâng tùi tá-lo̍h tit-tio̍h chiah-ê it-chhè ah?

57In就厭賤伊。但是耶穌kā in講，先知人tī本鄉本家以外，無m̄尊貴。In chiū iàm-chiān I. Nā-sī Iâ-so͘ kā in kóng, Sian-ti lâng tī pún hiuⁿ pún ke í-gōa, bô m̄ chun-kùi.

58耶穌tī hia無行chōe-chōe權能，因為in無信伊。Iâ-so͘ tī hia bô kiâⁿ chōe-chōe koân-lêng, in-ūi in bô sìn I.