1當hit日，耶穌tùi厝內出去，坐tī海邊。Tng hit ji̍t, Iâ-so͘ tùi chhù-lāi chhut-khì, chē tī hái-piⁿ.

2有chōe-chōe陣ê人聚集就近伊，致到伊上船來坐，kui陣ê人lóng khiā tī岸裡。Ū chōe-chōe tīn ê lâng chū-chi̍p chiū-kūn I, tì-kàu I chiūⁿ chûn lâi chē, kui tīn ê lâng lóng khiā tī hōaⁿ-ni̍h.

3就用chōe-chōe項設譬喻kā in講，你看，有掖種ê出去掖種；Chiū ēng chōe-chōe hāng siat phì-jū kā in kóng,Lí khòaⁿ, ū iā chéng ê chhut-khì iā chéng;

4掖ê時，有ê ka-la̍uh tī路邊，飛鳥到，一盡食伊；iā ê sî, ū-ê ka-la̍uh tī lō͘-piⁿ, pe-chiáu kàu, it-chīn chia̍h i;

5有ê ka-la̍uh tī石格ê地，土淺ê位；因為土無深，就發真緊；ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín;

6但是日出曝伊；因為無根，就枯焦。nā-sī ji̍t chhut pha̍k i; in-ūi bô kun, chiū ko͘-tâ.

7亦有ê ka-la̍uh tī刺á內，刺á發起遮蔽伊；Ia̍h ū-ê ka-la̍uh tī chhì-á-lāi, chhì-á hoat-khí jia-pè i;

8有ê ka-la̍uh tī好ê土地，結實，有ê百倍，有ê六十倍，有ê三十倍。ū-ê ka-la̍uh tī hó ê thó͘-tōe, kiat-si̍t, ū-ê pah pē, ū-ê la̍k-cha̍p pē, ū-ê saⁿ-cha̍p pē.

9有耳孔ê，tio̍h聽。Ū hī-khang ê, tio̍h thiaⁿ.

10學生就近伊講，你用譬喻kā in講是怎樣？Ha̍k-seng chiū-kūn I kóng, Lí ēng phì-jū kā in kóng sī cháiⁿ-iūⁿ?

11伊應講，天國ê奧妙hō͘ lín知，亦無hō͘ in。I ìn kóng, Thian-kok ê ò-biāu hō͘ lín chai, ia̍h bô hō͘ in.

12因為見若有ê，beh hō͘伊，就伊有chhun；無ê，連伊所有ê亦beh搶伊。In-ūi kìⁿ-nā ū ê, beh hō͘ i, chiū i ū chhun; bô ê, liân i só͘ ū ê ia̍h beh chhiúⁿ i.

13所以我用譬喻kā in講；因為in看，亦看無見；聽，亦聽無現，亦無曉悟。Só͘-í góa ēng phì-jū kā in kóng; in-ūi in khòaⁿ, ia̍h khòaⁿ bô kìⁿ; thiaⁿ, ia̍h thiaⁿ bô hiān, ia̍h bô hiáu-ngō͘.

14以賽亞所讖語ê，是應驗tī in，講， Lín聽是beh聽，但是決斷無曉悟； Lín看是beh看，但是決斷看無見；Í-sài-a só͘ chhàm-gú ê, sī èng-giām tī in, kóng, Lín thiaⁿ sī beh thiaⁿ, nā-sī koat-toàn bô hiáu-ngō͘; Lín khòaⁿ sī beh khòaⁿ, nā-sī koat-toàn khòaⁿ bô kìⁿ;

15因為chit-ê百姓心鈍，耳孔重， In ê目睭放khoeh； 驚了in用目睭看見， 用耳孔聽見， 用心曉悟， 來oa̍t-lìn-tńg， 我就醫好in。In-ūi chit ê peh-sìⁿ sim tūn, Hī-khang tāng, In ê ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi oa̍t-lìn-tńg, Góa chiū i-hó in.

16但是lín ê目睭有福氣，因為in看見；lín ê耳孔有福氣，因為in聽見。Nā-sī lín ê ba̍k-chiu ū hok-khì, in-ūi in khòaⁿ-kìⁿ; lín ê hī-khang ū hok-khì, in-ūi in thiaⁿ-kìⁿ.

17因為我實在kā lín講，前有chōe-chōe先知kap義人，ài看lín所看見ê，亦無看見；ài聽lín所聽見ê，亦無聽見。In-ūi góa si̍t-chāi kā lín kóng, Chêng ū chōe-chōe sian-ti kap gī lâng, ài khòaⁿ lín só͘ khòaⁿ-kìⁿ ê, ia̍h bô khòaⁿ-kìⁿ; ài thiaⁿ lín só͘ thiaⁿ-kìⁿ ê, ia̍h bô thiaⁿ-kìⁿ.

18Taⁿ chit-ê掖種子ê ê譬喻，lín tio̍h聽。Taⁿ chit-ê iā chéng-chí ê ê phì-jū, lín tio̍h thiaⁿ.

19見若聽天國ê道理也無曉悟ê，hit-ê pháiⁿ-ê就到，將所掖tī伊ê心ê搶去；這是掖tī路邊ê。Kìⁿ-nā thiaⁿ thian-kok ê tō-lí iā bô hiáu-ngō͘ ê, hit ê pháiⁿ-ê chiū kàu, chiong só͘ iā tī i ê sim ê chhiúⁿ-khì; che sī iā tī lō͘-piⁿ ê.

20掖tī石格ê地ê，這是人聽道理，liâm-piⁿ歡喜承受伊；Iā tī chio̍h-keh ê tōe ê, che sī lâng thiaⁿ tō-lí, liâm-piⁿ hoaⁿ-hí sêng-siū i;

21總是內面無根，不過是暫時nā-tiāⁿ；到為tio̍h道理tú-tio̍h有患難khún-tio̍k liâm-piⁿ tio̍h-tak。chóng-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hoān-lān khún-tio̍k liâm-piⁿ tio̍h-tak.

22掖tī刺á內ê，這是人聽道理，亦世間ê掛慮，錢財ê迷惑，遮蔽hit-ê道理，就無結實。Iā tī chhì-á-lāi ê, che sī lâng thiaⁿ tō-lí, ia̍h sè-kan ê khòa-lū, chîⁿ-châi ê bê-he̍k, jia-pè hit ê tō-lí, chiū bô kiat-si̍t.

23掖tī好土地ê，這是人聽道理來曉悟，伊實在結實；所結ê，有ê百倍，有ê六十倍，有ê三十倍。Iā tī hó thó͘-tōe ê, che sī lâng thiaⁿ tō-lí lâi hiáu-ngō͘, i si̍t-chāi kiat-si̍t; só͘ kiat ê, ū-ê pah pē, ū-ê la̍k-cha̍p pē, ū-ê saⁿ-cha̍p pē.

24Koh設譬喻對in講，天國親像人掖好種子tī伊ê園；Koh siat phì-jū tùi in kóng, Thian-kok chhin-chhiūⁿ lâng iā hó chéng-chí tī i ê hn̂g;

25人睏ê時，伊ê kiû-siû來，掖稗tī麥中，就去。lâng khùn ê sî, i ê kiû-siû lâi, iā phōe tī be̍h tiong, chiū khì.

26到麥發起來，續結穗ê時，稗亦出現。Kàu be̍h hoat-khí-lâi, sòa kiat sūi ê sî, phōe ia̍h chhut-hiān.

27家主ê奴僕來kā伊講，頭家ah，你kiám m̄是掖好種子tī你ê園mah？tùi tá-lo̍h有稗？Ke-chú ê lô͘-po̍k lâi kā i kóng, Thâu-ke ah, lí kiám m̄ sī iā hó chéng-chí tī lí ê hn̂g mah? tùi tá-lo̍h ū phōe?

28伊kā in講，這就是kiû-siû做ê。奴僕kā伊講，你ài阮去khau伊mah？I kā in kóng, Che chiū-sī kiû-siû chòe ê. Lô͘-po̍k kā i kóng, Lí ài goán khì khau i mah?

29伊就講，無，驚了lín khau稗，連麥續拔起來。I chiū kóng, Bô, kiaⁿ-liáu lín khau phōe, liân be̍h sòa pu̍ih-khí-lâi.

30容允兩項平平大叢，thèng候收割；到收割ê時，我beh kā割ê講，事先拾hiah-ê稗，hâ kui把thang燒伊；獨獨麥tio̍h收入我ê粟倉。Iông-ún nn̄g hāng pîⁿ-pîⁿ tōa châng, thèng-hāu siu-koah; kàu siu-koah ê sî, góa beh kā koah-ê kóng, Tāi-seng khioh hiah ê phōe, hâ kui pé thang sio i; to̍k-to̍k be̍h tio̍h siu-ji̍p góa ê chhek-chhng.

31Koh設譬喻對in講，天國親像一粒芥菜子，人the̍h去亦tī伊ê園；Koh siat phì-jū tùi in kóng, Thian-kok chhin-chhiūⁿ chi̍t lia̍p kòa-chhài chí, lâng the̍h khì iā tī i ê hn̂g;

32chit-ê是百項種子ê第一細；到伊大叢，是khah大lóng總ê菜蔬，續成做樹，致到空中ê鳥來歇tī伊ê枝。chit-ê sī pah hāng chéng-chí ê tē it sòe; kàu i tōa châng, sī khah tōa lóng-chóng ê chhài-soe, sòa chiâⁿ chòe chhiū, tì-kàu khong-tiong ê chiáu lâi hioh tī i ê ki.

33Koh用譬喻kā in講，天國親像酵，婦人人the̍h去khǹg tī三斗麵粉ê內面，到lóng發酵。Koh ēng phì-jū kā in kóng, Thian-kok chhin-chhiūⁿ kàⁿ, hū-jîn-lâng the̍h khì khǹg tī saⁿ táu mī-hún ê lāi-bīn, kàu lóng hoat kàⁿ.

34Chiah-ê lóng是耶穌用譬喻kā眾人講；若m̄是用譬喻，就無所kā in講；Chiah-ê lóng sī Iâ-so͘ ēng phì-jū kā chèng lâng kóng; nā m̄ sī ēng phì-jū, chiū bô só͘ kā in kóng;

35來應驗早託先知所講ê，講， 我beh開嘴設譬喻， 闡明創造世間以來所隱密ê。lâi èng-giām chá thok sian-ti só͘ kóng ê, kóng, Góa beh khui chhùi siat phì-jū, Chhián-bêng chhòng-chō sè-kan í-lâi só͘ ún-ba̍t ê.

36Hit時耶穌hō͘眾人四散，chiah入厝；伊ê學生就近伊講，園ê稗á ê譬喻，kā阮解明。Hit sî Iâ-so͘ hō͘ chèng lâng sì-sòaⁿ, chiah ji̍p chhù; I ê ha̍k-seng chiū-kūn I kóng, Hn̂g ê phōe-á ê phì-jū, kā goán kóe-bêng.

37伊應講，掖好種子ê是人子；園就是世間；I ìn kóng, Iā hó chéng-chí ê sī Jîn-chú; hn̂g chiū-sī sè-kan;

38好種子ê就是天國ê Kiáⁿ；稗，就是pháiⁿ-ê ê Kiáⁿ；hó chéng-chí ê chiū-sī thian-kok ê kiáⁿ; phōe, chiū-sī pháiⁿ-ê ê kiáⁿ;

39掖稗ê kiû-siû，就是魔鬼；收割ê時，是世界ê路尾；割ê，就是天使。iā phōe ê kiû-siû, chiū-sī Mô͘-kúi; siu-koah ê sî, sī sè-kài ê lō͘-bé; koah ê, chiū-sī thiⁿ-sài.

40所以親像拾稗á來用火燒；tī世界ê路尾亦beh án-ni。Só͘-í chhin-chhiūⁿ khioh phōe-á lâi ēng hé sio; tī sè-kài ê lō͘-bé ia̍h beh án-ni.

41人子beh差伊ê天使tùi伊ê國內收拾見若hō͘人tio̍h-tak ê，kap做不法ê；Jîn-chú beh chhe I ê thiⁿ-sài tùi I ê kok-lāi siu-si̍p kìⁿ-nā hō͘ lâng tio̍h-tak ê, kap chòe put-hoat ê;

42hiat in tī火爐，tī hia beh有啼哭咬牙切齒。hiat in tī hé-lô͘, tī hia beh ū thî-khàu kā-gê chhiat-chhí.

43Hit時義人beh發出光親像日，tī in ê父ê國。有耳孔ê tio̍h聽。Hit sî gī lâng beh hoat-chhut kng chhin-chhiūⁿ ji̍t, tī in ê Pē ê kok. Ū hī-khang ê tio̍h thiaⁿ.

44天國親像寶貝khǹg tī園裡；人tú-tio̍h就khǹg密伊；因為歡喜chiah去賣一切所有ê，來買hit khu園。Thian-kok chhin-chhiūⁿ pó-pòe khǹg tī hn̂g-ni̍h; lâng tú-tio̍h chiū khǹg-ba̍t i; in-ūi hoaⁿ-hí chiah khì bōe it-chhè só͘ ū ê, lâi bóe hit khu hn̂g.

45Koh天國親像seng-lí人chhē好ê珠；Koh thian-kok chhin-chhiūⁿ seng-lí lâng chhē hó ê chu;

46tú-tio̍h一粒不止值錢ê，就去賣一切所有ê來買伊。tú-tio̍h chi̍t lia̍p put-chí ta̍t chîⁿ ê, chiū khì bōe it-chhè só͘ ū ê lâi bóe i.

47Koh天國親像網拋tī海裡，聚集ta̍k類ê水族；Koh thian-kok chhin-chhiūⁿ bāng pha tī hái-ni̍h, chū-chi̍p ta̍k lūi ê chúi-cho̍k;

48已經滿，就拖上坪(phiâⁿ)；坐teh，拾好ê入器具，m̄好ê hiat-ka̍k tī外面。í-keng móa, chiū thoa chiūⁿ phiâⁿ; chē-teh, khioh hó ê ji̍p khì-kū, m̄ hó ê hiat-ka̍k tī gōa-bīn.

49世界ê路尾，亦beh án-ni；chiah-ê天使beh出來，tùi義人ê中間來分別pháiⁿ人；Sè-kài ê lō͘-bé, ia̍h beh án-ni; chiah ê thiⁿ-sài beh chhut-lâi, tùi gī lâng ê tiong-kan lâi hun-piat pháiⁿ lâng;

50hiat in tī火爐，tī hia beh有啼哭咬牙切齒。hiat in tī hé-lô͘, tī hia beh ū thî-khàu kā-gê chhiat-chhí.

51Chiah-ê lín lóng會曉得bōe？In講，會。Chiah-ê lín lóng ōe hiáu-tit bōe? In kóng, Ōe.

52伊kā in講，所以見若經學士做天國ê學生ê，是親像家主tùi伊ê庫房the̍h出新舊ê物ê。I kā in kóng, Só͘-í kìⁿ-nā keng-ha̍k-sū chòe thian-kok ê ha̍k-seng ê, sī chhin-chhiūⁿ ke-chú tùi i ê khò͘-pâng the̍h-chhut sin kū ê mi̍h ê.

53耶穌已經講chiah-ê譬喻明白，就離開hia。Iâ-so͘ í-keng kóng chiah ê phì-jū bêng-pe̍k, chiū lī-khui hia.

54到伊ê本鄉，tī in ê會堂教示in；致到in gông-ngia̍h講，Chit人tùi tá-lo̍h得tio̍h chit-ê智慧，kap chiah-ê權能ah？Kàu I ê pún hiuⁿ, tī in ê hōe-tn̂g kà-sī in; tì-kàu in gông-ngia̍h kóng, Chit lâng tùi tá-lo̍h tit-tio̍h chit ê tì-hūi, kap chiah ê koân-lêng ah?

55Chit-ê kiám m̄是木匠ê Kiáⁿ mah？伊ê老母kiám m̄是叫做馬利亞，伊ê兄弟雅各、約瑟、西門、猶大mah？Chit-ê kiám m̄ sī ba̍k-chhiūⁿ ê kiáⁿ mah? I ê lāu-bú kiám m̄ sī kiò chòe Má-lī-a, I ê hiaⁿ-tī Ngá-kok, Iok-sek, Se-bûn, Iû-tāi mah?

56伊ê姊妹kiám無lóng kap咱tī chia mah？Án-ni chit人tùi tá-lo̍h得tio̍h chiah-ê一切ah？I ê chí-bē kiám bô lóng kap lán tī chia mah? Án-ni chit lâng tùi tá-lo̍h tit-tio̍h chiah-ê it-chhè ah?

57In就厭賤伊。但是耶穌kā in講，先知人tī本鄉本家以外，無m̄尊貴。In chiū iàm-chiān I. Nā-sī Iâ-so͘ kā in kóng, Sian-ti lâng tī pún hiuⁿ pún ke í-gōa, bô m̄ chun-kùi.

58耶穌tī hia無行chōe-chōe權能，因為in無信伊。Iâ-so͘ tī hia bô kiâⁿ chōe-chōe koân-lêng, in-ūi in bô sìn I.

1當hit時，分封ê人君希律聽見耶穌ê名聲；Tng hit sî, hun-hong ê jîn-kun Hi-lu̍t thiaⁿ-kìⁿ Iâ-so͘ ê miâ-siaⁿ;

2就kā伊ê差用講，Chit-ê就是行洗禮ê約翰，伊是tùi死人中koh活；所以有chiah-ê權能tùi伊顯出。chiū kā i ê chhe-ēng kóng, Chit-ê chiū-sī kiâⁿ sóe-lé ê Iok-hān, i sī tùi sí-lâng tiong koh-oa̍h; só͘-í ū chiah ê koân-lêng tùi i hián-chhut.

3因為前希律為tio̍h伊ê兄弟腓力ê bó͘希羅底ê緣故，有掠約翰縛伊，關落監。In-ūi chêng Hi-lu̍t ūi-tio̍h i ê hiaⁿ-tī Hui-le̍k ê bó͘ Hi-lô-tí ê iân-kò͘, ū lia̍h Iok-hān pa̍k i, koaiⁿ lo̍h kaⁿ.

4因為約翰bat kā伊講，你接納chit-ê婦人人是不法。In-ūi Iok-hān bat kā i kóng, Lí chiap-la̍p chit ê hū-jîn-lâng sī put-hoat.

5希律ài thâi伊，獨獨驚百姓 ；因為in掠約翰做先知。Hi-lu̍t ài thâi i, to̍k-to̍k kiaⁿ peh-sìⁿ; in-ūi in lia̍h Iok-hān chòe sian-ti.

6Tú-tio̍h希律做生日，希羅底ê cha-bó͘-kiáⁿ跳舞tī in中間，來hō͘希律歡喜。Tú-tio̍h Hi-lu̍t chòe siⁿ-ji̍t, Hi-lô-tí ê cha-bó͘-kiáⁿ thiàu-bú tī in tiong-kan, lâi hō͘ Hi-lu̍t hoaⁿ-hí.

7Tùi án-ni chiù-chōa，隱beh照伊所ài求ê lóng hō͘伊。Tùi án-ni chiù-chōa, ún beh chiàu i só͘ ài kiû ê lóng hō͘ i.

8伊hō͘ in老母使唆，就講，將行洗禮約翰ê頭殼tóe tī盤裡，就chia hō͘我。I hō͘ in lāu-bú sái-sō, chiū kóng, Chiong kiâⁿ sóe-lé Iok-hān ê thâu-khak tóe tī pôaⁿ-ni̍h, chiū chia hō͘ góa.

9王真憂悶；總是為tio̍h所chiù ê chōa，koh有同桌ê人tī-teh，就命令hō͘伊；Ông chin iu-būn; chóng-sī ūi-tio̍h só͘ chiù ê chōa, koh ū tâng toh ê lâng tī-teh, chiū bēng-lēng hō͘ i;

10差人去監裡thâi約翰。chhe lâng khì kaⁿ-ni̍h thâi Iok-hān.

11將伊ê頭殼tóe tī盤裡，來hō͘ cha-bó͘ gín-ná；伊就捧去hō͘伊ê老母。Chiong i ê thâu-khak tóe tī pôaⁿ-ni̍h, lâi hō͘ cha-bó͘ gín-ná; i chiū phâng-khì hō͘ i ê lāu-bú.

12伊ê學生來收伊ê身屍，去埋葬；就去kā耶穌講。I ê ha̍k-seng lâi siu i ê sin-si, khì bâi-chòng; chiū khì kā Iâ-so͘ kóng.

13耶穌聽見就上船，tùi hia退去曠野，家己tòa；眾人聽見，就tùi chiah-ê城步行tè伊。Iâ-so͘ thiaⁿ-kìⁿ chiū chiūⁿ chûn, tùi hia thè-khì khòng-iá, ka-kī tòa; chèng lâng thiaⁿ-kìⁿ, chiū tùi chiah ê siâⁿ pō͘-kiâⁿ tè I.

14伊出去，看見kui大陣ê人，就憐憫in，醫好in中間有病ê。I chhut-khì, khòaⁿ-kìⁿ kui tōa tīn ê lâng, chiū lîn-bín in, i-hó in tiong-kan ū pīⁿ ê.

15日mńg晡，學生就近伊講，chia是曠野，koh時已經過；tio̍h hō͘眾人四散，thang去鄉社買食。Ji̍t mńg-po͘, ha̍k-seng chiū- kūn I kóng, Chia sī khòng-iá, koh sî í-keng kè; tio̍h hō͘ chèng lâng sì-sòaⁿ, thang khì hiuⁿ-siā bóe chia̍h.

16耶穌kā in講，In m̄免去，lín hō͘ in食。Iâ-so͘ kā in kóng, In m̄ bián khì, lín hō͘ in chia̍h.

17In kā伊講，阮tī chia只有五個餅，兩尾魚。In kā I kóng, Goán tī chia chí ū gō͘ ê piáⁿ, nn̄g bé hî.

18伊講，The̍h來hō͘我。I kóng, The̍h lâi hō͘ góa.

19就吩咐眾人坐tī草埔，就the̍h hit五個餅，兩尾魚，ǹg天來祝謝，peh餅hō͘學生，學生hō͘眾人。Chiū hoan-hù chèng lâng chē tī chháu-po͘, chiū the̍h hit gō͘ ê piáⁿ, nn̄g bé hî, ǹg thiⁿ lâi chiok-siā, peh piáⁿ hō͘ ha̍k-seng, ha̍k-seng hō͘ chèng lâng.

20Lóng食到飽；拾所chhun ê屑á，滿十二筐(kheng)。Lóng chia̍h kàu pá; khioh só͘ chhun ê sut-á, móa cha̍p-jī kheng.

21食ê人，婦人人gín-ná以外，約略五千。Chia̍h ê lâng, hū-jîn-lâng gín-ná í-gōa, iok-lio̍k gō͘ chheng.

22伊隨時逼學生上船，事先過去hit pêng，thèng候伊四散眾人。I sûi-sî pek ha̍k-seng chiūⁿ chûn, tāi-seng kè-khì hit pêng, thèng-hāu I sì-sòaⁿ chèng lâng.

23四散眾人了後，就家己上山祈禱；已經暗，只有伊家己tī hia。Sì-sòaⁿ chèng lâng liáu-āu, chiū ka-kī chiūⁿ soaⁿ kî-tó; í-keng àm, chí ū I ka-kī tī hia.

24Hit時船tī海中，hō͘湧搖choah；因為是對頭風。Hit sî chûn tī hái-tiong, hō͘ éng iô-choah; in-ūi sī tùi-thâu hong.

25暝時四更，耶穌tùi海面行，就近in。Mî-sî sì kiⁿ, Iâ-so͘ tùi hái-bīn kiâⁿ, chiū-kūn in.

26學生看見伊行tī海面，就生驚，講，是怪物；因為驚就喉叫。Ha̍k-seng khòaⁿ-kìⁿ I kiâⁿ tī hái-bīn, chiū chhiⁿ-kiaⁿ, kóng, Sī koài mi̍h; in-ūi kiaⁿ chiū âu-kiò.

27耶穌liâm-piⁿ kap in講話，講，安lín ê心；是我；m̄免驚。Iâ-so͘ liâm-piⁿ kap in kóng ōe, kóng, An lín ê sim; sī góa; m̄ bián kiaⁿ.

28彼得應伊講，主ah，果然是你，就命令我行水面就近你。Pí-tek ìn I kóng, Chú ah, kó-jiân sī lí, chiū bēng-lēng góa kiâⁿ chúi-bīn chiū-kūn lí.

29伊講，來。彼得就tùi船裡落去，行水面，beh就近耶穌。I kóng, Lâi. Pí-tek chiū tùi chûn-ni̍h lo̍h-khì, kiâⁿ chúi-bīn, beh chiū-kūn Iâ-so͘.

30總是看見風，就驚；teh-beh沉落去，就喉叫講，主ah，救我。Chóng-sī khòaⁿ-kìⁿ hong, chiū kiaⁿ; teh-beh tîm-lo̍h-khì, chiū âu-kiò kóng, Chú ah, kiù góa.

31耶穌隨時伸手牽伊，講，小信ê人，啥事僥疑？Iâ-so͘ sûi-sî chhun chhiú khan i, kóng, Sió-sìn ê lâng, siáⁿ-sū giâu-gî?

32In上船，風就定。In chiūⁿ chûn, hong chiū tiāⁿ.

33船裡ê人拜伊講，你真正是上帝ê Kiáⁿ。Chûn-ni̍h ê lâng pài I kóng, Lí chin-chiàⁿ sī Siōng-tè ê Kiáⁿ.

34已經過去，就到Kek-nî-sat-le̍k地。Í-keng kè-khì, chiū kàu Kek-nî-sat-le̍k tōe.

35Hit位ê人bat伊，差人去四方，chhōa一切有病ê來就近伊；Hit ūi ê lâng bat I, chhe lâng khì sì-hng, chhōa it-chhè ū pīⁿ ê lâi chiū-kūn I;

36求伊但使hō͘ in摸伊ê衫á裾ê鬚；見若摸ê人齊全好。kiû I nā-sái hō͘ in bong I ê saⁿ-á-ku ê chhiu; kìⁿ-nā bong ê lâng chiâu-chn̂g hó.

1Hit時有法利賽人kap經學士，tùi耶路撒冷來就近耶穌，講，Hit sî ū Hoat-lī-sài lâng kap keng-ha̍k-sū, tùi Iâ-lō͘-sat-léng lâi chiū-kūn Iâ-so͘, kóng,

2你ê學生啥事患tio̍h古早人ê流傳？因為食ê時in無洗手。Lí ê ha̍k-seng siáⁿ-sū hoān-tio̍h kó͘-chá lâng ê liû-thoân? in-ūi chia̍h ê sî in bô sóe chhiú.

3伊就應講，啥事lín亦tùi lín ê流傳來患tio̍h上帝ê命令ah？I chiū ìn kóng, Siáⁿ-sū lín ia̍h tùi lín ê liû-thoân lâi hoān-tio̍h Siōng-tè ê bēng-lēng ah?

4因為上帝講，Tio̍h敬lín ê父，lín ê母；koh有講，罵父á是罵母ê，的確tio̍h hō͘伊死。In-ūi Siōng-tè kóng, Tio̍h kèng lín ê pē, lín ê bú; koh ū kóng, Mē pē á-sī mē bú ê, tek-khak tio̍h hō͘ i sí.

5但是lín就講，見若人tùi父á是母講，Nā-sī lín chiū kóng, Kìⁿ-nā lâng tùi pē á-sī bú kóng,

6你本所會thang tùi我得tio̍h ê利益，已經獻去；hit人就決斷無敬伊ê父。Lín就tùi lín ê流傳已經廢上帝ê道理。Lí pún só͘ ōe thang tùi góa tit-tio̍h ê lī-ek, í-keng hiàn-khì; hit lâng chiū koat-toàn bô kèng i ê pē. Lín chiū tùi lín ê liû-thoân í-keng hòe Siōng-tè ê tō-lí.

7假好ê人ah，以賽亞指lín來讖語ê真正tio̍h；伊講，Ké-hó ê lâng ah, Í-sài-a chí lín lâi chhàm-gú ê chin-chiàⁿ tio̍h; i kóng,

8Chit-ê百姓 用嘴唇尊敬我； 但是in ê心離開我遠遠。Chit ê peh-sìⁿ ēng chhùi-tûn chun-kèng góa; Nā-sī in ê sim lī-khui góa hn̄g-hn̄g.

9In敬拜我是空空， 因為in用人所命令ê做教示來教示人。In kèng-pài góa sī khang-khang, In-ūi in ēng lâng só͘ bēng-lēng ê chòe kà-sī lâi kà-sī lâng.

10就叫眾人來，kā in講，Lín tio̍h聽來曉悟。Chiū kiò chèng lâng lâi, kā in kóng, Lín tio̍h thiaⁿ lâi hiáu-ngō͘.

11m̄是tùi嘴入ê話hō͘人污穢；就是tùi嘴出ê，chit-ê話hō͘人污穢。M̄ sī tùi chhùi ji̍p-ê ōe hō͘ lâng ù-òe; chiū-sī tùi chhùi chhut-ê, chit-ê ōe hō͘ lâng ù-òe.

12Hit時學生就近來kā伊講，法利賽人聽見chit-ê話，真m̄願，你知mah？Hit sî ha̍k-seng chiū-kūn lâi kā I kóng, Hoat-lī-sài lâng thiaⁿ-kìⁿ chit ê ōe, chin m̄ goān, lí chai mah?

13伊應講，見若栽種ê物m̄是我ê天父所栽種ê，beh拔伊ê根。I ìn kóng, Kìⁿ-nā chai-chèng ê mi̍h m̄ sī góa ê Thiⁿ Pē só͘ chai-chèng ê, beh pu̍ih i ê kun.

14chhut-chāi in；in是chhiⁿ-mî teh chhōa路ê。若是chhiⁿ-mî kā chhiⁿ-mî ê chhōa路，兩個teh-beh跋落陷坑。Chhut-chāi in; in sī chhiⁿ-mî teh chhōa lō͘ ê. Nā-sī chhiⁿ-mî kā chhiⁿ-mî ê chhōa lō͘, nn̄g ê teh-beh poa̍h-lo̍h hām-khiⁿ.

15彼得應伊講，Chit-ê譬喻，請kā阮解明。Pí-tek ìn I kóng, Chit ê phì-jū, chhiáⁿ kā goán kóe-bêng.

16伊就講，Lín亦iáu-kú bē曉悟mah？I chiū kóng, Lín ia̍h iáu-kú bē hiáu-ngō͘ mah?

17Kiám bōe曉得，見若tùi嘴入ê，落tī腹肚，來放tī廁池ah？Kiám bōe hiáu-tit, kìⁿ-nā tùi chhùi ji̍p ê, lo̍h tī pak-tó͘, lâi pàng tī chhè-tî ah?

18但是tùi嘴出ê；是tùi心內發出；chiah-ê hō͘人污穢。Nā-sī tùi chhùi chhut ê; sī tùi sim-lāi hoat-chhut; chiah-ê hō͘ lâng ù-òe.

19因為tùi心發出pháiⁿ念頭，行兇、姦淫、私通、偷the̍h、lām-sám干證、謗瀆；In-ūi tùi sim hoat-chhut pháiⁿ liām-thâu, hêng-hiong, kan-îm, su-thong, thau-the̍h, lām-sám kan-chèng, pòng-to̍k;

20chiah-ê是hō͘人污穢；但是無洗手來食，bōe hō͘人污穢。chiah-ê sī hō͘ lâng ù-òe; nā-sī bô sóe chhiú lâi chia̍h, bōe hō͘ lâng ù-òe.

21耶穌tùi hia出去退去到Chhui-lo5Se-tùn ê境界。Iâ-so͘ tùi hia chhut-khì thè-khì kàu Chhui-lô Se-tùn ê kéng-kài.

22Tú-tn̄g有迦南ê婦人人出in ê交界，喉叫講，主ah，大衛ê後裔，憐憫我；我ê cha-bó͘-kiáⁿ患tio̍h鬼，真艱苦。Tú-tn̄g ū Ka-lâm ê hū-jîn-lâng chhut in ê kau-kài, âu-kiò kóng, Chú ah, Tāi-pi̍t ê hō͘-è, lîn-bín góa; góa ê cha-bó͘-kiáⁿ hoān-tio̍h kúi, chin kan-khó͘.

23耶穌無應伊一句。伊ê學生來，求伊講，Tio̍h kah伊去，因為伊tī咱ê後面teh喉叫。Iâ-so͘ bô ìn i chi̍t kù. I ê ha̍k-seng lâi, kiû I kóng, Tio̍h kah i khì, in-ūi i tī lán ê āu-bīn teh âu-kiò.

24伊就應講，我奉差，無m̄是就近以色列家失落ê羊nā-tiāⁿ。I chiū ìn kóng, Góa hōng chhe, bô m̄ sī chiū-kūn Í-sek-lia̍t ke sit-lo̍h ê iûⁿ nā-tiāⁿ.

25婦人人來拜伊講，主ah，幫贊我。Hū-jîn-lâng lâi pài I kóng, Chú ah, pang-chān góa.

26但是伊講，The̍h kiáⁿ兒ê餅，hiat hō͘狗á，是m̄合。Nā-sī I kóng, The̍h kiáⁿ-jî ê piáⁿ, hiat hō͘ káu-á, sī m̄ ha̍p.

27婦人人講，主ah，tio̍h；因為連狗á亦會得食in ê主人桌腳ka-la̍uh ê餅幼。Hū-jîn-lâng kóng, Chú ah, tio̍h; in-ūi liân káu-á ia̍h ōe tit chia̍h in ê chú-lâng toh-kha ka-la̍uh ê piáⁿ-iù.

28Tùi án-ni耶穌應講，婦人人ah，你ê信大lah；照你所ài ê，kā你做成。Tùi hit時伊ê cha-bó͘-kiáⁿ已經好。Tùi án-ni Iâ-so͘ ìn kóng, Hū-jîn-lâng ah, lí ê sìn tōa lah; chiàu lí só͘ ài ê, kā lí chòe chiâⁿ. Tùi hit sî i ê cha-bó͘-kiáⁿ í-keng hó.

29耶穌離開hia，到加利利海邊；上山teh坐。Iâ-so͘ lī-khui hia, kàu Ka-lī-lī hái-piⁿ; chiūⁿ soaⁿ teh chē.

30有chōe-chōe陣ê人就近伊，續帶跛腳ê、chhiⁿ-mî ê、啞口ê、破相ê，kap chōe-chōe別款ê來，hē tī伊ê腳前；就醫好in。Ū chōe-chōe tīn ê lâng chiū-kūn I, sòa tòa pái-kha ê, chhiⁿ-mî ê, é-káu ê, phòa-siùⁿ ê, kap chōe-chōe pa̍t khoán ê lâi, hē tī I ê kha-chêng; chiū i-hó in.

31致到眾人gông-ngia̍h；因為看見啞口ê講話，破相ê lóng好，跛腳ê行，chhiⁿ-mî ê看見；就歸榮光以色列ê上帝。Tì-kàu chèng lâng gông-ngia̍h; in-ūi khòaⁿ-kìⁿ é-káu ê kóng ōe, phòa-siùⁿ ê lóng hó, pái-kha ê kiâⁿ, chhiⁿ-mî ê khòaⁿ-kìⁿ; chiū kui êng-kng Í-sek-lia̍t ê Siōng-tè.

32耶穌叫伊ê學生來，講，我憐憫chiah-ê人，因為in已經kap我tòa三日；亦無物thang食；我m̄甘hō͘ in iau-iau去，驚了in路裡厭倦。Iâ-so͘ kiò I ê ha̍k-seng lâi, kóng, Góa lîn-bín chiah ê lâng, in-ūi in í-keng kap góa tòa saⁿ ji̍t; ia̍h bô mi̍h thang chia̍h; góa m̄ kam hō͘ in iau-iau khì, kiaⁿ-liáu in lō͘-ni̍h ià-siān.

33學生kā伊講，阮tī曠野，tùi tá-lo̍h有hiah chōe餅thang hō͘ chiah chōe人食飽？Ha̍k-seng kā I kóng, Goán tī khòng-iá, tùi tá-lo̍h ū hiah chōe piáⁿ thang hō͘ chiah chōe lâng chia̍h pá?

34耶穌kā in講，Lín有jōa chōe餅？應講，七個，kap淡薄細尾魚。Iâ-so͘ kā in kóng, Lín ū jōa chōe piáⁿ? ìn kóng, Chhit ê, kap tām-po̍h sòe bé hî.

35就吩咐眾人坐tī地裡；Chiū hoan-hù chèng lâng chē tī tōe-ni̍h;

36The̍h hit七個餅kap魚，祝謝peh，交hō͘學生，學生就hō͘眾人。The̍h hí chhit ê piáⁿ kap hî, chiok-siā peh, kau hō͘ ha̍k-seng, ha̍k-seng chiū hō͘ chèng lâng.

37Lóng食到飽；拾所chhun ê屑á，tóe滿七籃。Lóng chia̍h kàu pá; khioh só͘ chhun ê sut-á, tóe-móa chhit nâ.

38食ê，婦人人gín-ná以外，共四千人。Chia̍h ê, hū-jîn-lâng gín-ná í-gōa, kiōng sì-chheng lâng.

39既然hō͘眾人四散，就上船，到Má-ka-tàn ê交界。Kì-jiân hō͘ chèng lâng sì-sòaⁿ, chiū chiūⁿ chûn, kàu Má-ka-tàn ê kau-kài.