1當hit時，學生就近耶穌講，Tī天國甚麼人做大？Tng hit sî, ha̍k-seng chiū-kūn Iâ-so͘ kóng, Tī thian-kok sím-mi̍h lâng chòe tōa?

2耶穌就叫一個細漢gín-ná，hō͘伊khiā tī in中間；Iâ-so͘ chiū kiò chi̍t ê sòe-hàn gín-ná, hō͘ i khiā tī in tiong-kan;

3講，我實在kā lín講，Lín若無oa̍t-tńg來成做親像細漢gín-ná ê，決斷bōe入天國。kóng, Góa si̍t-chāi kā lín kóng, Lín nā bô oa̍t-tńg lâi chiâⁿ-chòe chhin-chhiūⁿ sòe-hàn gín-ná ê, koat-toàn bōe ji̍p thian-kok.

4所以見若家己謙卑親像chit-ê細漢gín-ná ê，伊tī天國就是做大。Só͘-í kìⁿ-nā ka-kī khiam-pi chhin-chhiūⁿ chit ê sòe-hàn gín-ná ê, i tī thian-kok chiū-sī chòe tōa.

5見若tī我ê名接納chit號細漢gín-ná ê一個，就是接納我。Kìⁿ-nā tī góa ê miâ chiap-la̍p chit hō sòe-hàn gín-ná ê chi̍t ê, chiū-sī chiap-la̍p góa.

6見若hō͘ chiah-ê信我ê微細ê一個受塞礙，hit人寧可有大石磨召伊ê頷頸，thiām tī深海。Kìⁿ-nā hō͘ chiah ê sìn góa ê bî-sòe ê chi̍t ê siū that-gāi, hit lâng lêng-khó͘ ū tōa chio̍h-bō tiàu i ê ām-kún, thiām tī chhim hái.

7Chit世間有災禍ah，tùi有塞礙人ê事；因為塞礙ê事，bōe免得有；總是塞礙ê事tùi 是誰來，hit人有災禍。Chit sè-kan ū chai-ē ah, tùi ū that-gāi lâng ê sū; in-ūi that-gāi ê sū, bōe bián-tit ū; chóng-sī that-gāi ê sū tùi chī-chūi lâi, hit lâng ū chai-ē.

8設使你一手一腳塞礙你，就tio̍h斬hiat-ka̍k；你破相á是跛腳入tī活是好，khah得兩手兩腳hiat落永遠ê火。Siat-sú lí chi̍t chhiú chi̍t kha that-gāi lí, chiū tio̍h chām hiat-ka̍k; lí phòa-siùⁿ á-sī pái-kha ji̍p tī oa̍h sī hó, khah-tit nn̄g chhiú nn̄g kha hiat-lo̍h éng-oán ê hé.

9設使你一目塞礙你，就tio̍h iah hiat-ka̍k；你一目入tī活是好，khah得兩目hiat落地獄ê火。Siat-sú lí chi̍t ba̍k that-gāi lí, chiū tio̍h iah hiat-ka̍k; lí chi̍t ba̍k ji̍p tī oa̍h sī hó, khah-tit nn̄g ba̍k hiat-lo̍h tē-ge̍k ê hé.

10Lín tio̍h謹慎，莫得看輕chiah-ê微細中ê一個；因為我kā lín講，In ê天使tī天裡，常常見我tī天裡ê父ê面。Lín tio̍h kín-sīn, bo̍h-tit khòaⁿ-khin chiah ê bî-sòe tiong ê chi̍t-ê; in-ūi góa kā lín kóng, In ê thiⁿ-sài tī thiⁿ-ni̍h, siông-siông kìⁿ góa tī thiⁿ-ni̍h ê Pē ê bīn.

12Lín phah算怎樣？人若有一百隻羊，來phah-m̄見一隻，kiám無且放下hit九十九隻，去山裡chhē hit隻phah-m̄見ê mah？Lín phah-sǹg cháiⁿ-iūⁿ? Lâng nā ū chi̍t pah chiah iûⁿ, lâi phah-m̄-kìⁿ chi̍t chiah, kiám bô chhiáⁿ pàng-hē hit káu-cha̍p-káu chiah, khì soaⁿ-ni̍h chhē hit chiah phah-m̄-kìⁿ ê mah?

13若果然chhē-tio̍h，我實在kā lín講，伊為tio̍h hit隻歡喜，贏過九十九隻無phah-m̄見ê。Nā kó-jiân chhē-tio̍h, góa si̍t-chāi kā lín kóng, i ūi-tio̍h hit chiah hoaⁿ-hí, iâⁿ-kè káu-cha̍p-káu chiah bô phah-m̄-kìⁿ ê.

14Án-ni chiah-ê微細中ê一個沉淪，也m̄是lín tī天裡ê父ê旨意。Án-ni chiah ê bî-sòe tiong ê chi̍t-ê tîm-lûn, iā m̄ sī lín tī thiⁿ-ni̍h ê Pē ê chí-ì.

15設使你ê兄弟得罪你，就tio̍h去，kan-ta你kap伊tī-teh ê時，指明伊ê m̄-tio̍h；伊若聽你，就得tio̍h你ê兄弟。Siat-sú lí ê hiaⁿ-tī tek-chōe lí , chiū tio̍h khì, kan-ta lí kap i tī-teh ê sî, chí-bêng i ê m̄-tio̍h; i nā thiaⁿ lí, chiū tit-tio̍h lí ê hiaⁿ-tī.

16伊若m̄聽，就tio̍h chhōa一兩人saⁿ-kap去，用兩三人ê嘴做干證，ta̍k句話thang做憑準。I nā m̄ thiaⁿ, chiū tio̍h chhōa chi̍t nn̄g lâng saⁿ-kap khì, ēng nn̄g saⁿ lâng ê chhùi chòe kan-chèng, ta̍k kù ōe thang chòe pîn-chún.

17若m̄肯聽in，就kā教會講；若koh m̄肯聽教會，就tio̍h看伊親像外邦人，kap抽餉ê一樣。Nā m̄ khéng thiaⁿ in, chiū kā kàu-hōe kóng; nā koh m̄ khéng thiaⁿ kàu-hōe, chiū tio̍h khòaⁿ i chhin-chhiūⁿ gōa-pang lâng, kap thiu-hiòng ê chi̍t iūⁿ.

18我實在kā lín講，凡若lín tī地裡縛ê，tī天裡也beh縛in；凡若lín tī地裡tháu ê，tī天裡也beh tháu in。Góa si̍t-chāi kā lín kóng, Hoān-nā lín tī tōe-ni̍h pa̍k ê, tī thiⁿ-ni̍h iā beh pa̍k in; hoān-nā lín tī tōe-ni̍h tháu ê, tī thiⁿ-ni̍h iā beh tháu in.

19我koh kā lín講，設使lín中間兩人tī地裡無論求甚麼，若是同心，就我tī天裡ê父beh kā in做成。Góa koh kā lín kóng, siat-sú lín tiong-kan nn̄g lâng tī tōe-ni̍h bô lūn kiû sím-mi̍h, nā sī tâng-sim, chiū góa tī thiⁿ-ni̍h ê Pē beh kā in chòe chiâⁿ.

20因為不論甚麼所在有兩三人tī我ê名聚集，我也tī in中間。In-ūi put-lūn sím-mi̍h só͘-chāi ū nn̄g saⁿ lâng tī góa ê miâ chū-chi̍p, góa iā tī in tiong-kan.

21Hit時彼得óa來kā伊講，主ah，我ê兄弟得罪我，我赦免伊tio̍h幾pái？Tio̍h七pái mah？Hit sî Pí-tek óa-lâi kā I kóng, Chú ah, góa ê hiaⁿ-tī tek-chōe góa, góa sià-bián i tio̍h kúi pái? Tio̍h chhit pái mah?

22耶穌kā伊講，我無kā你講tio̍h到七pái，就是到七十ê七pái。Iâ-so͘ kā i kóng, Góa bô kā lí kóng tio̍h kàu chhit pái, chiū-sī kàu chhit-cha̍p ê chhit pái.

23所以天國比並人君ài beh kap伊ê奴僕算賬。Só͘-í thian-kok pí-phēng jîn-kun ài beh kap i ê lô͘-po̍k sǹg-siàu.

24起頭算ê時，有chhōa一個欠伊千萬銀ê來。Khí-thâu sǹg ê sî, ū chhōa chi̍t-ê khiàm i chheng-bān gûn ê lâi.

25既然無thang還，伊ê主人命令tio̍h賣伊本身，kap伊ê bó͘-kiáⁿ，連伊一切所有ê，來還。Kì-jiân bô thang hêng, i ê chú-lâng bēng-lēng tio̍h bōe i pún-sin, kap i ê bó͘-kiáⁿ, liân i it-chhè só͘ ū ê, lâi hêng.

26Hit-ê奴僕就仆teh，拜伊，講，主ah，tio̍h寬容我，我beh lóng總還。Hit ê lô͘-po̍k chiū phak-teh, pài i, kóng, Chú ah, tio̍h khoan-iông góa, góa beh lóng-chóng hêng.

27奴僕ê主人就憐憫來放伊，koh赦免伊ê債。Lô͘-po̍k ê chú-lâng chiū lîn-bín lâi pàng i, koh sià-bián i ê chè.

28Hit-ê奴僕出去，tú-tio̍h伊一個同做奴僕ê，欠伊一百ê銀á，就掠伊，叉伊ê頷頸，講，你所欠ê tio̍h還。Hit ê lô͘-po̍k chhut-khì, tú-tio̍h i chi̍t-ê tâng chòe lô͘-po̍k ê, khiàm i chi̍t pah ê gûn-á, chiū lia̍h i, chhe i ê ām-kún, kóng, Lí só͘ khiàm ê tio̍h hêng.

29同做奴僕ê仆teh，求伊講，Tio̍h寬容我，我beh還你。Tâng chòe lô͘-po̍k ê phak-teh, kiû i kóng, Tio̍h khoan-iông góa, góa beh hêng lí.

30但是伊m̄肯，就去kā伊關落監，來thèng候伊還所欠ê。Nā-sī i m̄ khéng, chiū khì kā i koaiⁿ-lo̍h kaⁿ, lâi thèng-hāu i hêng só͘ khiàm ê.

31Chiah-ê同做奴僕ê看見chit-ê tāi-chì，真憂悶，將lóng總ê事對主人講明。Chiah-ê tâng chòe lô͘-po̍k ê khòaⁿ-kìⁿ chit ê tāi-chì, chin iu-būn, chiong lóng-chóng ê sū tùi chú-lâng kóng bêng.

32Tùi án-ni伊ê主人召伊來，kā伊講，Pháiⁿ ê奴僕ah，因為你對我求，我就將你所欠ê lóng赦免。Tùi án-ni i ê chú-lâng tiàu i lâi, kā i kóng, Pháiⁿ ê lô͘-po̍k ah, in-ūi lí tùi góa kiû, góa chiū chiong lí só͘ khiàm ê lóng sià-bián.

33你kiám m̄ tio̍h憐憫你同做奴僕ê，親像我憐憫你？Lí kiám m̄ tio̍h lîn-bín lí tâng chòe lô͘-po̍k ê, chhin-chhiūⁿ góa lîn-bín lí?

34伊ê主人受氣，將伊交代刑杖，thèng候伊一盡還所欠ê。I ê chú-lâng siū-khì, chiong i kau-tāi hêng-tiōng, thèng-hāu i it-chīn hêng só͘ khiàm ê.

35Án-ni lín ta̍k人無用心赦免lín ê兄弟，就我ê天父也beh án-ni款待lín。Án-ni lín ta̍k lâng bô ēng sim sià-bián lín ê hiaⁿ-tī, chiū góa ê Thiⁿ Pē iā beh án-ni khoán-thāi lín.

1耶穌講chiah-ê話soah，就離開加利利，到猶太ê境內，約旦河外；Iâ-so͘ kóng chiah ê ōe soah, chiū lī-khui Ka-lī-lī, kàu Iû-thài ê kéng-lāi, Iok-tàn hô gōa;

2有kui大陣ê人tè伊，就tī hia醫好in。ū kui tōa tīn ê lâng tè I, chiū tī hia i-hó in.

3有法利賽人來試伊，講，人不論甚麼緣故thang離伊ê bó͘ mah？Ū Hoat-lī-sài lâng lâi chhì I, kóng, Lâng put-lūn sím-mi̍h iân-kò͘ thang lî i ê bó͘ mah?

4就應講，Lín kiám無讀tio̍h創造ê主源起頭創造in有男有女？Chiū ìn kóng, Lín kiám bô tha̍k-tio̍h chhòng-chō ê Chú goân khí-thâu chhòng-chō in ū lâm ū lú?

5續講，因為án-ni人beh離開父母，結聯伊ê bó͘，兩個beh成做一體；sòa kóng, In-ūi án-ni lâng beh lī-khui pē-bú, kiat-liân i ê bó͘, nn̄g-ê beh chiâⁿ-chòe chi̍t thé;

6親像án-ni無koh做兩個，是做一體。所以上帝所配合ê，人m̄-thang分開伊。chhin-chhiūⁿ án-ni bô koh chòe nn̄g-ê, sī chòe chi̍t thé. Só͘-í Siōng-tè só͘ phòe-ha̍p ê, lâng m̄-thang pun-khui i.

7In kā伊講，若是án-ni，摩西怎樣吩咐用離書hō͘伊，來離伊ah？In kā I kóng, Nā-sī án-ni, Mô͘-se cháiⁿ-iūⁿ hoan-hù ēng lî-chu hō͘ i, lâi lî i ah?

8伊kā in講，摩西因為lín ê心硬，准lín離bó͘；但是tùi起頭m̄是án-ni。I kā in kóng, Mô͘-se in-ūi lín ê sim ngī, chún lín lî bó͘; nā-sī tùi khí-thâu m̄ sī án-ni.

9Koh我kā lín講，見若人，m̄是為tio̍h姦淫ê緣故，離伊ê bó͘來chhōa別ê，就是行淫；chhōa人所離出ê也是行淫。Koh góa kā lín kóng, Kìⁿ-nā lâng, m̄ sī ūi-tio̍h kan-îm ê iân-kò͘, lî i ê bó͘ lâi chhōa pa̍t-ê, chiū-sī kiâⁿ îm; chhōa lâng só͘ lî-chhut ê iā sī kiâⁿ îm.

10學生kā伊講，人kap伊ê bó͘ ê事既然是án-ni，寧可無chhōa。Ha̍k-seng kā I kóng, Lâng kap i ê bó͘ ê sū kì-jiân sī án-ni, lêng-khó͘ bô chhōa.

11伊就kā in講，chit號話m̄是眾人所會承受ê；只有得tio̍h賞賜ê chiah會。I chiū kā in kóng, Chit hō ōe m̄ sī chèng lâng só͘ ōe sêng-siū ê; chí ū tit-tio̍h siúⁿ-sù ê chiah ōe.

12因為有閹ê，tùi母胎出世就án-ni；也有hō͘人閹ê；也有為tio̍h天國家己閹ê。會承受ê tio̍h承受伊。In-ūi ū iam ê, tùi bú-thai chhut-sì chiū án-ni; iā ū hō͘ lâng iam ê; iā ū ūi-tio̍h thian-kok ka-kī iam ê. Ōe sêng-siū ê tio̍h sêng-siū i.

13Hit時有人chhōa細kiáⁿ就近伊，ài伊用手hōaⁿ in，來祈禱；學生責備in。Hit sî ū lâng chhōa sòe-kiáⁿ chiū-kūn I, ài I ēng chhiú hōaⁿ in, lâi kî-tó; ha̍k-seng chek-pī in.

14但是耶穌講，容允細kiáⁿ就近我，莫得禁伊；因為天國是屬tī chit號ê。Nā-sī Iâ-so͘ kóng, Iông-ún sòe-kiáⁿ chiū-kūn góa, bo̍h-tit kìm i; in-ūi thian-kok sī sio̍k tī chit hō ê.

15就用手hōaⁿ in；離開hia去。Chiū ēng chhiú hōaⁿ in; lī-khui hia khì.

16Tú-tn̄g有一人就近伊，講，先生，我tio̍h行甚麼好thang得tio̍h永活？Tú-tn̄g ū chi̍t lâng chiū-kūn I, kóng, Sian-siⁿ, góa tio̍h kiâⁿ sím-mi̍h hó thang tit-tio̍h éng-oa̍h?

17伊kā伊講，你怎樣提起好，來問我？好ê是一個。總是你若ài入tī活，tio̍h守chiah-ê誡命。I kā i kóng, Lí cháiⁿ-iūⁿ thê-khí hó, lâi mn̄g góa? Hó-ê sī chi̍t-ê. Chóng-sī lí nā ài ji̍p tī oa̍h, tio̍h siú chiah ê kài-bēng.

18伊kā伊講，是甚麼ê？耶穌講，莫得thâi死人，莫得行淫，莫得偷the̍h，莫得lām-sám做干證，I kā I kóng, Sī sím-mi̍h ê? Iâ-so͘ kóng, Bo̍h-tit thâi-sí lâng, Bo̍h-tit kiâⁿ îm, Bo̍h-tit thau-the̍h, Bo̍h-tit lām-sám chòe kan-chèng,

19敬你ê父母，Tio̍h疼你ê厝邊親像家己。Kèng lí ê pē-bú, Tio̍h thiàⁿ lí ê chhù-piⁿ chhin-chhiūⁿ ka-kī.

20少年人kā伊講，Chiah-ê我lóng有守伊；iáu-kú欠甚麼？Siàu-liân lâng kā I kóng, Chiah-ê góa lóng ū siú i; iáu-kú khiàm sím-mi̍h?

21耶穌kā伊講，你若ài做完全，tio̍h去賣你所有ê來hō͘ sòng-hiong人，就有財寶tī天裡；koh來tè我。Iâ-so͘ kā i kóng, Lí nā ài chòe oân-choân, tio̍h khì bōe lí só͘ ū ê lâi hō͘ sòng-hiong lâng, chiū ū châi-pó tī thiⁿ-ni̍h; koh lâi tè góa.

22少年人聽見這話，憂悶就去；因為伊產業真chōe。Siàu-liân lâng thiaⁿ-kìⁿ che ōe, iu-būn chiū khì; in-ūi i sán-gia̍p chin chōe.

23耶穌就kā伊ê學生講，我實在kā lín講，富人入天國oh--ah！Iâ-so͘ chiū kā I ê ha̍k-seng kóng, Góa si̍t-chāi kā lín kóng, Pù lâng ji̍p thian-kok oh--ah!

24我koh kā lín講，駱駝穿過針鼻，比富人入上帝ê國，khah快。Góa koh kā lín kóng, Lo̍k-tô chhng-kè chiam-phīⁿ, pí pù lâng ji̍p Siōng-tè ê kok, khah khoài.

25學生聽見大gông-ngia̍h，講，若是án-ni，就是誰會得tio̍h救ah？Ha̍k-seng thiaⁿ-kìⁿ tōa gông-ngia̍h, kóng, Nā-sī án-ni, chiū chī-chūi ōe tit-tio̍h kiù ah?

26耶穌看in講，在tī人是bōe-ōe，在tī上帝，萬事lóng會。Iâ-so͘ khòaⁿ in kóng, Chāi-tī lâng sī bōe-ōe, chāi-tī Siōng-tè, bān sū lóng ōe.

27Hit時彼得應伊講，阮bat放sak一切來tè你，阮beh得tio̍h甚麼ah？Hit sî Pí-tek ìn I kóng, Goán bat pàng-sak it-chhè lâi tè lí, goán beh tit-tio̍h sím-mi̍h ah?

28耶穌kā in講，我實在kā lín講，lín chiah-ê tè我，到koh興起ê時，人子坐伊榮光ê座位，lín也beh坐十二ê座位，來審判以色列十二ê支派。Iâ-so͘ kā in kóng, Góa si̍t-chāi kā lín kóng, lín chiah-ê tè góa, kàu koh heng-khí ê sî, Jîn-chú chē I êng-kng ê chō-ūi, lín iā beh chē cha̍p-jī ê chō-ūi, lâi sím-phòaⁿ Í-sek-lia̍t cha̍p-jī ê chi-phài.

29見若為tio̍h我ê名放sak厝宅，á是兄弟、姊妹、老父、老母、kiáⁿ兒，á是田園，beh得tio̍h百倍，來承接永活。Kìⁿ-nā ūi-tio̍h góa ê miâ pàng-sak chhù-the̍h, á-sī hiaⁿ-tī, chí-bē, lāu-pē, lāu-bú, kiáⁿ-jî, á-sī chhân-hn̂g, beh tit-tio̍h pah-pē, lâi sêng-chiap éng-oa̍h.

30總是事先ê chōe-chōe beh做路尾；路尾ê beh做事先。Chóng-sī tāi-seng ê chōe-chōe beh chòe lō͘-bé; lō͘-bé ê beh chòe tāi-seng.

1因為天國親像家主透早出去倩(chhiàⁿ)工入伊ê葡萄園；In-ūi thian-kok chhin-chhiūⁿ ke-chú thàu-chá chhut-khì chhiàⁿ kang ji̍p i ê phû-tô-hn̂g;

2kap做工ê人約一日一錢銀；就差in入伊ê園。kap chòe-kang ê lâng iok chi̍t ji̍t chi̍t chîⁿ gûn; chiū chhe in ji̍p i ê hn̂g.

3九點ê時出去，koh看見有閒閒khiā tī街市裡ê，就kā in講，Káu tiám ê sî chhut-khì, koh khòaⁿ-kìⁿ ū êng-êng khiā tī koe-chhī-ni̍h ê, chiū kā in kóng,

4Lín亦去葡萄園，我beh照公道hō͘ lín；in就去。Lín ia̍h khì phû-tô-hn̂g, góa beh chiàu kong-tō hō͘ lín; in chiū khì.

5十二點kap三點ê時koh出去，也án-ni做。Cha̍p-jī tiám kap saⁿ tiám ê sî koh chhut-khì, iā án-ni chòe.

6五點ê時出去，koh tú-tio̍h有人khiā-teh，就kā in講，Lín啥事thong日閒閒khiā tī chia ah？Gō͘ tiám ê sî chhut-khì, koh tú-tio̍h ū lâng khiā-teh, chiū kā in kóng, Lín siáⁿ-sū thong ji̍t êng-êng khiā tī chia ah?

7In kā伊講，因為無人倩阮。伊kā in講，Lín也去葡萄園。In kā i kóng, In-ūi bô lâng chhiàⁿ goán. I kā in kóng, Lín iā khì phû-tô-hn̂g.

8到日暗，園主kā伊ê管家講，叫做工ê，hō͘ in工錢，tùi路尾來ê起，到事先來ê為止。Kàu ji̍t àm, hn̂g-chú kā i ê koán-ke kóng, Kiò chòe-kang ê, hō͘ in kang-chîⁿ, tùi lō͘-bé lâi ê khí, kàu tāi-seng lâi ê ûi-chí.

9Hiah-ê五點鐘所倩ê到，ta̍k-ê領一錢銀。Hiah-ê gō͘ tiám cheng só͘ chhiàⁿ ê kàu, ta̍k-ê niá chi̍t chîⁿ gûn.

10事先倩ê到，in phah算beh領khah chōe；m̄-kú in也ta̍k-ê領一錢銀。Tāi-seng chhiàⁿ ê kàu, in phah-sǹg beh niá khah chōe; m̄-kú in iā ta̍k-ê niá chi̍t chîⁿ gûn.

11領了，就對家主nga̍uh-nga̍uh念講，Niá liáu, chiū tùi ke-chú nga̍uh-nga̍uh-liām kóng,

12阮thong日拖磨受熱；hiah-ê路尾倩ê，做工一點鐘久，竟然hō͘ in kap阮平。Goán thong ji̍t thoa-bôa siū joa̍h; hiah-ê lō͘-bé chhiàⁿ ê, chòe kang chi̍t tiám-cheng kú, kèng-jiân hō͘ in kap goán pîⁿ.

13伊就對in一人應講，朋友ah，我m̄是無公道款待你；你kiám m̄是kap我約一錢銀mah？I chiū tùi in chi̍t lâng ìn kóng, Pêng-iú ah, góa m̄ sī bô kong-tō khoán-thāi lí; lí kiám m̄ sī kap góa iok chi̍t chîⁿ gûn mah?

14你ê你the̍h，做你去。我beh hō͘ chit-ê路尾ê kap你平。Lí-ê lí the̍h, chòe lí khì. Góa beh hō͘ chit-ê lō͘-bé ê kap lí pîⁿ.

15用我ê物，行我所ài，kiám bōe做得？á是因為我做好，你teh目赤mah？Ēng góa ê mi̍h, kiâⁿ góa só͘ ài, kiám bōe chòe-tit? Á-sī in-ūi góa chòe hó, lí teh ba̍k-chhiah mah?

16親像án-ni，路尾ê beh做事先，事先ê beh做路尾。Chhin-chhiūⁿ án-ni, lō͘-bé ê beh chòe tāi-seng, tāi-seng ê beh chòe lō͘-bé.

17耶穌上耶路撒冷ê時tī路裡chhōa十二ê學生到邊á，kā in講，Iâ-so͘ chiūⁿ Iâ-lō͘-sat-léng ê sî tī lō͘-ni̍h chhōa cha̍p-jī ê ha̍k-seng kàu piⁿ-á, kā in kóng,

18Taⁿ咱上耶路撒冷；人子beh受解送hō͘ chiah-ê祭司頭kap經學士，in beh擬伊死罪；Taⁿ lán chiūⁿ Iâ-lō͘-sat-léng; Jîn-chú beh siū ké-sàng hō͘ chiah ê chè-si-thâu kap keng-ha̍k-sū, in beh gí I sí-chōe;

19也beh解送伊hō͘外邦人，致到戲弄伊，鞭phah伊，釘伊tī十字架；第三日伊beh koh活。iā beh ké-sàng I hō͘ gōa-pang lâng, tì-kàu hì-lāng I, piⁿ phah I, tèng I tī si̍p-jī-kè; tē saⁿ ji̍t I beh koh-oa̍h.

20Hit時西庇太ê Kiáⁿ ê老母kap伊ê Kiáⁿ就近來拜伊，求一項事。Hit sî Se-pí-thài ê kiáⁿ ê lāu-bú kap i ê kiáⁿ chiū-kūn lâi pài I, kiû chi̍t hāng sū.

21伊kā伊講，你ài甚麼？應講，願你出命令，hō͘我chit兩個kiáⁿ tī你ê國，一個坐你ê chiàⁿ-pêng，一個坐你ê tò-pêng。I kā i kóng, Lí ài sím-mi̍h? Ìn kóng, Goān lí chhut bēng-lēng, hō͘ góa chit nn̄g ê kiáⁿ tī lí ê kok, chi̍t-ê chē lí ê chiàⁿ-pêng, chi̍t-ê chē lí ê tò-pêng.

22耶穌應講，Lín所求ê，lín m̄知。我所beh lim ê杯，lín會lim mah？應講，會。Iâ-so͘ ìn kóng, Lín só͘ kiû ê, lín m̄ chai. Góa só͘ beh lim ê poe, lín ōe lim mah? Ìn kóng, Ōe.

23伊kā in講，我ê杯lín果然beh lim；總是坐我ê chiàⁿ-pêng tò-pêng，m̄是我會thang hō͘人，獨獨是我ê父為tio̍h甚麼人備辦ê，就hō͘ in。I kā in kóng, Góa ê poe lín kó-jiân beh lim; chóng-sī chē góa ê chiàⁿ-pêng tò-pêng, m̄ sī góa ōe thang hō͘ lâng, to̍k-to̍k sī góa ê Pē ūi-tio̍h sím-mi̍h lâng pī-pān ê, chiū hō͘ in.

24十個學生聽見，就受氣hit兩個兄弟。Cha̍p ê ha̍k-seng thiaⁿ-kìⁿ, chiū siū-khì hit nn̄g ê hiaⁿ-tī.

25耶穌叫in來講，Lín知外邦ê人君做主來治理in，in ê大人管轄in；Iâ-so͘ kiò in lâi kóng, Lín chai gōa-pang ê jîn-kun chòe chú lâi tī-lí in, in ê tāi-jîn koán-hat in;

26獨獨lín中間m̄是án-ni；lín中間ài做大ê，beh做lín ê差用；to̍k-to̍k lín tiong-kan m̄ sī án-ni; lín tiong-kan ài chòe tōa ê, beh chòe lín ê chhe-ēng;

27ài做頭ê，beh做lín ê奴僕。ài chòe thâu ê, beh chòe lín ê lô͘-po̍k.

28親像人子來，m̄是beh差用人，是beh hō͘人差用；koh獻伊ê性命，來贖回chōe-chōe人。Chhin-chhiūⁿ Jîn-chú lâi, m̄ sī beh chhe-ēng lâng, sī beh hō͘ lâng chhe-ēng; koh hiàn I ê sìⁿ-miā, lâi sio̍k-hôe chōe-chōe lâng.

29In出耶利哥ê時，kui大陣ê人tè伊。In chhut Iâ-lī-ko ê sî, kui tōa tīn ê lâng tè I.

30Tú-tn̄g有兩個chhiⁿ-mî ê坐tī路邊，聽見耶穌tùi hia過，就hoah講，主，大衛ê後裔ah，憐憫阮。Tú-tn̄g ū nn̄g ê chhiⁿ-mî ê chē tī lō͘-piⁿ, thiaⁿ-kìⁿ Iâ-so͘ tùi hia kè, chiū hoah kóng, Chú, Tāi-pi̍t ê hō͘-è ah, lîn-bín goán.

31眾人嫌in，kah in靜靜；但是in koh khah大聲叫講，主，大衛ê後裔ah，憐憫阮。Chèng lâng hiâm in, kah in chēng-chēng; nā-sī in koh khah tōa siaⁿ kiò kóng, Chú, Tāi-pi̍t ê hō͘-è ah, lîn-bín goán.

32耶穌停腳，叫in來講，Ài我kā lín做甚麼？Iâ-so͘ thêng-kha, kiò in lâi kóng, Ài góa kā lín chòe sím-mi̍h?

33In kā伊講，主ah，阮ài得tio̍h目睭開。In kā I kóng, Chú ah, goán ài tit-tio̍h ba̍k-chiu khui.

34耶穌可憐in，摸in ê目睭；in liâm-piⁿ看見，就tè伊。Iâ-so͘ khó-lîn in, bong in ê ba̍k-chiu; in liâm-piⁿ khòaⁿ-kìⁿ, chiū tè I.