1亞伯拉罕ê後裔，大衛ê後裔，耶穌基督ê家譜。A-pek-la̍h-hán ê hō͘-è, Tāi-pi̍t ê hō͘-è, Iâ-so͘ Ki-tok ê ka-phó͘.

2亞伯拉罕生以撒；以撒生雅各；雅各生猶大kap伊ê兄弟；A-pek-la̍h-hán siⁿ Í-sat; Í-sat siⁿ Ngá-kok; Ngá-kok siⁿ Iû-tāi kap i ê hiaⁿ-tī;

3猶大tùi Tāi-má氏生Hoat-le̍k-sū kap撒拉；Hoat-le̍k-sū生Í-sū-lûn；Í-sū-lûn生A-lân；Iû-tāi tùi Tāi-má--sī siⁿ Hoat-le̍k-sū kap Sat-la̍h; Hoat-le̍k-sū siⁿ Í-sū-lûn; Í-sū-lûn siⁿ A-lân;

4A-lân生A-bí-ná-ta̍t；A-bí-ná-ta̍t生Ná-sūn；Ná-sūn生Sat-bûn；A-lân siⁿ A-bí-ná-ta̍t; A-bí-ná-ta̍t siⁿ Ná-sūn; Ná-sūn siⁿ Sat-bûn;

5Sat-bûn tùi Lat-ha̍p氏生Pho-sū；Pho-sū tùi Lō͘-tek氏生O-pek；O-pek生Iâ-se；Sat-bûn tùi Lat-ha̍p--sī siⁿ Pho-sū; Pho-sū tùi Lō͘-tek--sī siⁿ O-pek; O-pek siⁿ Iâ-se;

6Iâ-se生大衛王。Iâ-se siⁿ Tāi-pi̍t ông; Tāi-pi̍t tùi O͘-lī-a ê bó͘ siⁿ Só͘-lô-bûn;

7大衛tùi O͘-lī-a ê bó͘生所羅門；所羅門生Lô-pho-àm；Lô-pho-àm生A-pí-a；A-pí-a生A-sat；Só͘-lô-bûn siⁿ Lô-pho-àm; Lô-pho-àm siⁿ A-pí-a; A-pí-a siⁿ A-sat;

8A-sat生Iok-sa-hoat；Iok-sa-hoat生Iok-lân；Iok-lân生O͘-se-a；A-sat siⁿ Iok-sa-hoat; Iok-sa-hoat siⁿ Iok-lân; Iok-lân siⁿ O͘-se-a;

9O͘-se-a生約旦；約旦生A-khap-sū；A-khap-sū生Hi-se-ka；O͘-se-a siⁿ Iok-tàn; Iok-tàn siⁿ A-khap-sū; A-khap-sū siⁿ Hi-se-ka;

10Hi-se-ka生Má-ná-se；Má-ná-se生A-bûn；A-bûn生Iok-se-a；Hi-se-ka siⁿ Má-ná-se; Má-ná-se siⁿ A-bûn; A-bûn siⁿ Iok-se-a;

11百姓受遷徙到巴比倫ê時，Iok-se-a生Iâ-ko-nî-a kap伊ê兄弟。peh-sìⁿ siū chhian-sóa kàu Pa-pí-lûn ê sî, Iok-se-a siⁿ Iâ-ko-nî-a kap i ê hiaⁿ-tī.

12遷徙到巴比倫了後，Iâ-ko-nî-a生Sat-lia̍p-thiat；Sat-lia̍p-thiat生Só͘-lô-pá-pek；Chhian-sóa kàu Pa-pí-lûn liáu-āu, Iâ-ko-nî-a siⁿ Sat-lia̍p-thiat; Sat-lia̍p-thiat siⁿ Só͘-lô-pá-pek;

13Só͘-lô-pá-pek生A-pí-ut；A-pí-ut生Í-lī-a-kim；Í-lī-a-kim生A-só͘；Só͘-lô-pá-pek siⁿ A-pí-ut; A-pí-ut siⁿ Í-lī-a-kim; Í-lī-a-kim siⁿ A-só͘;

14A-só͘生Sat-to̍k；Sat-to̍k生A-kim；A-kim生Í-lu̍t；A-só͘ siⁿ Sat-to̍k; Sat-to̍k siⁿ A-kim; A-kim siⁿ Í-lu̍t;

15Í-lu̍t生Í-lī-a-sat；Í-lī-a-sat生Má-tàn；Má-tàn生雅各；Í-lu̍t siⁿ Í-lī-a-sat; Í-lī-a-sat siⁿ Má-tàn; Má-tàn siⁿ Ngá-kok;

16雅各生約瑟，就是馬利亞ê丈夫；稱做基督ê耶穌，是tùi chit-ê馬利亞生ê。Ngá-kok siⁿ Iok-sek, chiū-sī Má-lī-a ê tiōng-hu; chheng chòe Ki-tok ê Iâ-so͘, sī tùi chit ê Má-lī-a siⁿ ê.

17tùi亞伯拉罕到大衛，共十四代；tùi大衛到遷徙去巴比倫ê時，亦十四代；tùi遷徙去巴比倫ê時到基督，koh十四代。tùi A-pek-la̍h-hán kàu Tāi-pi̍t, kiōng cha̍p-sì tāi; tùi Tāi-pi̍t kàu chhian-sóa khì Pa-pí-lûn ê sî, ia̍h cha̍p-sì tāi; tùi chhian-sóa khì Pa-pí-lûn ê sî kàu Ki-tok, koh cha̍p-sì tāi.

18耶穌基督ê出世，記tī下底：伊ê老母馬利亞已經做約瑟定tio̍h，iáu-bē娶過門，就tùi聖神有身孕。Iâ-so͘ Ki-tok ê chhut-sì, kì tī ē-tóe: I ê lāu-bú Má-lī-a í-keng chòe Iok-sek tiāⁿ-tio̍h, iáu-bē chhōa kè-mn̂g, chiū tùi Sèng Sîn ū sin-īn.

19伊ê丈夫約瑟是義ê人，m̄ ài顯然辦伊，按算beh暗靜廢親。I ê tiōng-hu Iok-sek sī gī ê lâng, m̄ ài hián-jiân pān i, àn-sǹg beh àm-chīⁿ hòe-chhin.

20Teh想ê時，有主ê天使tī伊ê眠夢中出現講，大衛ê後裔，約瑟ah，莫得驚，tio̍h娶你ê bó͘馬利亞過門；因為伊所懷孕ê是tùi聖神。Teh siūⁿ ê sî, ū Chú ê thiⁿ-sài tī i ê bîn-bāng-tiong chhut-hiān kóng, Tāi-pi̍t ê hō͘-è, Iok-sek ah, bo̍h-tit kiaⁿ, tio̍h chhōa lí ê bó͘ Má-lī-a kè-mn̂g; in-ūi i só͘ hoâi-īn ê sī tùi Sèng Sîn.

21伊beh生kiáⁿ，你tio̍h叫伊ê名做耶穌；因為伊beh救伊ê百姓 脫出in ê罪惡。I beh siⁿ kiáⁿ, lí tio̍h kiò I ê miâ chòe Iâ-so͘; in-ūi I beh kiù I ê peh-sìⁿ thoat-chhut in ê chōe-ok.

22Chit-ê事lóng成，是beh應驗主託先知所講ê，講，Chit ê sū lóng chiâⁿ, sī beh èng-giām Chú thok sian-ti só͘ kóng ê, kóng,

23你看，在室女beh身孕生kiáⁿ； 人beh叫伊ê名做以馬內利；翻譯就是上帝kap咱tī-teh。Lí khòaⁿ, chāi-sek-lú beh sin-īn siⁿ kiáⁿ; Lâng beh kiò I ê miâ chòe Í-má-lōe-lī;hoan-e̍k chiū-sī Siōng-tè kap lán tī-teh.

24約瑟睏醒起來，照主ê天使所命令去行，娶伊ê bó͘過門；Iok-sek khùn-chhíⁿ khí-lâi, chiàu Chú ê thiⁿ-sài só͘ bēng-lēng khì kiâⁿ, chhōa i ê bó͘ kè-mn̂g;

25無kap伊同房，到伊生kiáⁿ；就叫伊ê名做耶穌。bô kap i tâng pâng, kàu i siⁿ kiáⁿ; chiū kiò I ê miâ chòe Iâ-so͘.

1當希律王ê時，耶穌已經出世tī猶太ê伯利恆，有幾nā個博士tùi東方來到耶路撒冷，Tng Hi-lu̍t ông ê sî, Iâ-so͘ í-keng chhut-sì tī Iû-thài ê Pek-lī-hêng, ū kúi-nā ê phok-sū tùi tang-hng lâi kàu Iâ-lō͘-sat-léng,

2講，出世做猶太人ê王ê tī tá-lo̍h？因為阮tī東方有看見伊ê星，chiah來beh拜伊。kóng, Chhut-sì chòe Iû-thài lâng ê ông ê tī tá-lo̍h? in-ūi goán tī tang-hng ū khòaⁿ-kìⁿ I ê chhiⁿ, chiah lâi beh pài I.

3希律王聽見就peh-pak，thong耶路撒冷亦是án-ni。Hi-lu̍t ông thiaⁿ-kìⁿ chiū peh-pak, thong Iâ-lō͘-sat-léng ia̍h sī án-ni.

4就聚集眾祭司頭，kap百姓間ê經學士，問in基督tio̍h tī甚麼所在出世。Chiū chū-chi̍p chèng chè-si-thâu, kap peh-sìⁿ-kan ê keng-ha̍k-sū, mn̄g in Ki-tok tio̍h tī sím-mi̍h só͘-chāi chhut-sì.

5In kā伊講，Tī猶太ê伯利恆；因為先知有記載講，In kā i kóng, Tī Iû-thài ê Pek-lī-hêng; in-ūi sian-ti ū kì-chài kóng,

6猶太地，伯利恆ah， Tī猶太chiah-ê頭人中，　　你lóng m̄是第一細ê； 因為beh有一個人君對你出，　　來照顧我ê百姓以色列。Iû-thài tōe, Pek-lī-hêng ah, Tī Iû-thài chiah ê thâu-lâng tiong, lí lóng m̄ sī tē it sòe ê; In-ūi beh ū chi̍t ê jîn-kun tùi lí chhut, lâi chiàu-kò͘ góa ê peh-sìⁿ Í-sek-lia̍t.

7Tùi án-ni，希律暗靜召博士，對in詳細查hit-ê星出現ê時。Tùi án-ni, Hi-lu̍t àm-chīⁿ tiàu phok-sū, tùi in siông-sè chhâ hit ê chhiⁿ chhut-hiān ê sî.

8就差in去伯利恆講，Lín去詳細探聽hit-ê嬰á ê事；chhē-tio̍h就來kā我講，hō͘我也thang去拜伊。Chiū chhe in khì Pek-lī-hêng kóng, Lín khì siông-sè thàm-thiaⁿ hit ê eⁿ-á ê sū; chhē-tio̍h chiū lâi kā góa kóng, hō͘ góa iā thang khì pài I.

9In聽王ê話就去；忽然東方所看見ê星做頭chhōa in，到嬰á ê所在，就歇tī hit頂面。In thiaⁿ ông ê ōe chiū khì; hut-jiân tang-hng só͘ khòaⁿ-kìⁿ ê chhiⁿ chòe thâu chhōa in, kàu eⁿ-á ê só͘-chāi, chiū hioh tī hit téng-bīn.

10In看見hit-ê星，歡喜到bōe顧得。In khòaⁿ-kìⁿ hit ê chhiⁿ, hoaⁿ-hí kàu bōe kò͘-tit.

11入厝，看見嬰á kap伊ê老母馬利亞；就仆落拜嬰á；開in ê寶盒，獻禮物hō͘伊，就是黃金、乳香、沒藥。Ji̍p chhù, khòaⁿ-kìⁿ eⁿ-á kap I ê lāu-bú Má-lī-a; chiū phak-lo̍h pài eⁿ-á; khui in ê pó-a̍h, hiàn lé-mi̍h hō͘ I, chiū-sī n̂g-kim, jú-hiuⁿ, bu̍t-io̍h.

12Koh tī眠夢中得tio̍h指點，教in m̄-thang 倒tńg去就近希律，就tùi別條路倒去本所在。Koh tī bîn-bāng-tiong tit-tio̍h chí-tiám, kah in m̄-thang tò-tńg khì chiū-kūn Hi-lu̍t, chiū tùi pa̍t tiâu lō͘ tò-khì pún só͘-chāi.

13In倒去了，有主ê天使tī約瑟眠夢中出現講，起來，chhōa嬰á kap伊ê老母，走去埃及，tòa hia到我kā你講；因為希律beh chhē嬰á來滅伊。In tò-khì liáu, ū Chú ê thiⁿ-sài tī Iok-sek bîn-bāng-tiong chhut-hiān kóng, Khí-lâi, chhōa eⁿ-á kap I ê lāu-bú, cháu khì Ai-ki̍p, tòa hia kàu góa kā lí kóng; in-ūi Hi-lu̍t beh chhē eⁿ-á lâi bia̍t I.

14伊就起來，透暝chhōa嬰á kap伊ê老母去埃及。；tòa hia到希律死；I chiū khí-lâi, thàu-mî chhōa eⁿ-á kap I ê lāu-bú khì Ai-ki̍p.; tòa hia kàu Hi-lu̍t sí;

15是beh應驗主託先知所講ê，講，我bat召我ê kiáⁿ出埃及。sī beh èng-giām Chú thok sian-ti só͘ kóng ê, kóng, Góa bat tiàu góa ê kiáⁿ chhut Ai-ki̍p.

16Hit時希律知hō͘博士設去，就大受氣，差人將伯利恆kap周圍所有ê ta-po͘ gín-ná，照伊tùi博士詳細查ê時，凡若二歲以下ê一盡thâi。Hit sî Hi-lu̍t chai hō͘ phok-sū siat-khì, chiū tōa siū-khì, chhe lâng chiong Pek-lī-hêng kap chiu-ûi só͘ ū ê ta-po͘ gín-ná, chiàu i tùi phok-sū siông-sè chhâ ê sî, hoān-nā nn̄g hè í-hā ê it-chīn thâi.

17Án-ni應驗早託先知耶利米所講ê，講，Án-ni èng-giām chá thok sian-ti Iâ-lī-bí só͘ kóng ê, kóng,

18Tī Lia̍p-má聽見聲， 啼哭koh大傷悲， Lia̍p-結哭伊ê kiáⁿ兒； M̄願受安慰，因為in無--去。Tī Lia̍p-má thiaⁿ-kìⁿ siaⁿ, Thî-khàu koh tōa siong-pi, Lia̍p-kiat khàu i ê kiáⁿ-jî; M̄ goān siū an-ùi, in-ūi in bô--khì.

19希律已經死，主ê天使tī埃及，tī約瑟眠夢中出現講，Hi-lu̍t í-keng sí, Chú ê thiⁿ-sài tī Ai-ki̍p, tī Iok-sek bîn-bāng-tiong chhut-hiān kóng,

20起來，chhōa嬰á kap伊ê老母去以色列地；因為hiah-ê ài害嬰á ê性命ê已經死lah。Khí-lâi, chhōa eⁿ-á kap I ê lāu-bú khì Í-sek-lia̍t tōe; in-ūi hiah-ê ài hāi eⁿ-á ê sìⁿ-miā ê í-keng sí lah.

21伊就起來，chhōa嬰á kap伊ê老母到以色列地。I chiū khí-lâi, chhōa eⁿ-á kap I ê lāu-bú kàu Í-sek-lia̍t tōe.

22總是聽見A-ki-ló續接伊ê老父希律tī猶太做王，就m̄敢去hia；既然tī眠夢中得tio̍h指點，就退去加利利ê境內。Chóng-sī thiaⁿ-kìⁿ A-ki-ló sòa-chiap i ê lāu-pē Hi-lu̍t tī Iû-thài chòe ông, chiū m̄ káⁿ khì hia; kì-jiân tī bîn-bāng-tiong tit-tio̍h chí-tiám, chiū thè-khì Ka-lī-lī ê kéng-lāi.

23到一個城，名拿撒勒，tiàm hia khiā起；是beh應驗早託chiah-ê先知所講ê講，伊beh叫做拿撒勒人。Kàu chi̍t ê siâⁿ, miâ Ná-sat-le̍k, tiàm hia khiā-khí; sī beh èng-giām chá thok chiah ê sian-ti só͘ kóng ê kóng, I beh kiò chòe Ná-sat-le̍k lâng.

1當hit時，行洗禮ê約翰來，tī猶太ê曠野宣傳講，Tng hit sî, kiâⁿ sóe-lé ê Iok-hān lâi, tī Iû-thài ê khòng-iá soan-thoân kóng,

2Lín tio̍h反悔；因為天國近lah。Lín tio̍h hoán-hóe; in-ūi thian-kok kūn lah.

3Chit人就是主託先知以賽亞所指ê，講， 有teh叫tī曠野ê，伊ê聲講， 備辦主ê路， 修直伊ê小路。Chit lâng chiū-sī Chú thok sian-ti Í-sài-a só͘ chí ê, kóng, Ū teh kiò tī khòng-iá ê, i ê siaⁿ kóng, Pī-pān Chú ê lō͘, Siu ti̍t I ê sió-lō͘.

4Chit-ê約翰穿駱駝毛ê衫，腰hâ皮帶；伊所食是草蜢kap山野ê蜜。Chit ê Iok-hān chhēng lo̍k-tô-mn̂g ê saⁿ, io hâ phê-tòa; i só͘ chia̍h sī chháu-meh kap soaⁿ-iá ê bi̍t.

5Hit時耶路撒冷kap thong猶太，以及約旦四方ê眾人出來就近伊；Hit sî Iâ-lō͘-sat-léng kap thong Iû-thài, í-ki̍p Iok-tàn sì-hng ê chèng lâng chhut-lâi chiū-kūn i;

6tī約旦河tùi伊受洗禮，認in ê罪。tī Iok-tàn hô tùi i siū sóe-lé, jīn in ê chōe.

7約翰看見法利賽kap撒都該人，chōe-chōe就近伊ê洗禮，就kā in講，毒蛇ê類ah，是誰-á指示lín閃避將來ê受氣ah？Iok-hān khòaⁿ-kìⁿ Hoat-lī-sài kap Sat-thó͘-kai lâng, chōe-chōe chiū-kūn i ê sóe-lé, chiū kā in kóng, To̍k-chôa ê lūi ah, chī-chūi-á chí-sī lín siám-pī chiong-lâi ê siū-khì ah?

8所以lín tio̍h結hit號合tī反悔ê果子。Só͘-í lín tio̍h kiat hit hō ha̍p tī hoán-hóe ê ké-chí.

9莫得家己phah算講，有亞伯拉罕做阮ê父；因為我kā lín講，上帝會tùi chiah-ê石頭出kiáⁿ孫hō͘亞伯拉罕。Bo̍h-tit ka-kī phah-sǹg kóng, Ū A-pek-la̍h-hán chòe goán ê pē; in-ūi góa kā lín kóng, Siōng-tè ōe tùi chiah ê chio̍h-thâu chhut kiáⁿ-sun hō͘ A-pek-la̍h-hán.

10Taⁿ斧頭已經hē tī樹頭；見若樹無結好果子ê，就chhò伊，hiat落火。Taⁿ pó͘-thâu í-keng hē tī chhiū-thâu; kìⁿ-nā chhiū bô kiat hó ké-chí ê, chiū chhò i, hiat-lo̍h hé.

11我用水kā lín行洗禮，beh hō͘ lín反悔；但是tè尾我來ê，比我khah有權能，伊ê鞋我亦bōe堪得the̍h；伊beh用聖神kap火kā lín洗。Góa ēng chúi kā lín kiâⁿ sóe-lé, beh hō͘ lín hoán-hóe; nā-sī tè-bé góa lâi ê, pí góa khah ū koân-lêng, I ê ôe góa ia̍h bōe kham-tit the̍h; I beh ēng Sèng Sîn kap hé kā lín sóe.

12伊ê手the̍h簸箕，beh將伊hit場一盡簸，收伊ê麥入倉；若是麥hiūⁿ就用bōe-hoa ê火燒伊。I ê chhiú the̍h pòa-ki, beh chiong I hit tiûⁿ it-chīn pòa, siu I ê be̍h ji̍p chhng; nā-sī be̍h-hiūⁿ chiū ēng bōe hoa ê hé sio i.

13Hit時耶穌tùi加利利到約旦，就近約翰，beh tùi伊受洗禮。Hit sî Iâ-so͘ tùi Ka-lī-lī kàu Iok-tàn, chiū-kūn Iok-hān, beh tùi i siū sóe-lé.

14但是約翰阻止伊講，我ha̍p-kai對你受洗禮，你反tńg就近我mah？Nā-sī Iok-hān chó͘-chí I kóng, Góa ha̍p-kai tùi lí siū sóe-lé, lí hoán-tńg chiū-kūn góa mah?

15耶穌應伊講，Taⁿ請允我，因為咱合宜tio̍h án-ni，來盡lóng總ê義。就允伊。Iâ-so͘ ìn i kóng, Taⁿ chhiáⁿ ún góa, in-ūi lán ha̍p-gî tio̍h án-ni, lâi chīn lóng-chóng ê gī. Chiū ún I.

16耶穌已經受洗禮，liâm-piⁿ tùi水上來：天忽然為tio̍h伊開，伊就看見上帝ê神，親像鴿á降臨tī伊ê頂面。Iâ-so͘ í-keng siū sóe-lé, liâm-piⁿ tùi chúi chiūⁿ-lâi: thiⁿ hut-jiân ūi-tio̍h I khui, I chiū khòaⁿ-kìⁿ Siōng-tè ê Sîn, chhin-chhiūⁿ chíⁿ-á kàng-lîm tī I ê téng-bīn.

17Koh tùi天有聲講，chit-ê是我疼ê Kiáⁿ，我所歡喜ê。Koh tùi thiⁿ ū siaⁿ kóng, Chit-ê sī góa thiàⁿ ê Kiáⁿ, góa só͘ hoaⁿ-hí ê.