1In行近耶路撒冷，到Pek-hoat-kî kap橄欖山ê時，耶穌差兩個學生，kā in講，In kiâⁿ kūn Iâ-lō͘-sat-léng, kàu Pek-hoat-kî kap Kaⁿ-ná soaⁿ ê sî, Iâ-so͘ chhe nn̄g ê ha̍k-seng, kā in kóng,

2Lín去對面ê鄉社，liâm-piⁿ會tú-tio̍h一隻驢縛teh，有驢á kap伊tī-teh；tháu開，牽伊來我chia。Lín khì tùi-bīn ê hiuⁿ-siā, liâm-piⁿ ōe tú-tio̍h chi̍t chiah lû pa̍k-teh, ū lû-á kap i tī-teh; tháu-khui, khan i lâi góa chia.

3若有人kā lín講甚麼，就tio̍h講，主欠用伊，伊liâm-pin beh送伊來。Nā ū lâng kā lín kóng sím-mi̍h, chiū tio̍h kóng, Chú khiàm-ēng i, i liâm-piⁿ beh sàng i lâi.

4Chit-ê事成，是beh應驗早託先知所講ê，講，Chit ê sū chiâⁿ, sī beh èng-giām chá thok sian-ti só͘ kóng ê, kóng,

5Tio̍h kā郇(Sûn)ê cha-bó͘-kiáⁿ講， 你ê王來就近你， 溫柔koh騎驢， Kap驢所生ê驢á。Tio̍h kā Sûn ê cha-bó͘-kiáⁿ kóng, Lí ê ông lâi chiū-kūn lí, Un-jiû koh khiâ lû, Kap lû só͘ siⁿ ê lû-á.

6學生去，照耶穌所吩咐in ê去行。Ha̍k-seng khì, chiàu Iâ-so͘ só͘ hoan-hù in ê khì kiâⁿ.

7牽驢kap驢á來，將家己ê衫chhu tī in頂面，耶穌就上去騎。Khan lû kap lû-á lâi, chiong ka-kī ê saⁿ chhu tī in téng-bīn, Iâ-so͘ chiū chiūⁿ-khì khiâ.

8眾人中khah chōe將家己ê衫鋪tī路裡；有ê chhò樹枝鋪tī路裡。Chèng lâng tiong khah chōe chiong ka-kī ê saⁿ pho͘ tī lō͘-ni̍h; ū-ê chhò chhiū-ki pho͘ tī lō͘-ni̍h.

9前行後tè ê眾人hoah講，大衛ê後裔，和散那，tī主ê名來ê得tio̍h o-ló，tī至koânê，和散那。Chêng kiâⁿ āu tè ê chèng lâng hoah kóng, Tāi-pi̍t ê hō͘-è, Hô-sàn-ná, tī Chú ê miâ lâi ê tit-tio̍h o-ló, tī chì-koâiⁿ ê, Hô-sàn-ná.

10伊入耶路撒冷，thong城搖choah，講，Chit-ê 是誰？I ji̍p Iâ-lō͘-sat-léng, thong siâⁿ iô-choah, kóng, Chit-ê chī-chūi?

11眾人講，chit-ê是先知耶穌，tùi加利利ê拿撒勒來ê。Chèng lâng kóng, Chit-ê sī sian-ti Iâ-so͘, tùi Ka-lī-lī ê Ná-sat-le̍k lâi ê.

12耶穌入上帝ê殿，趕出殿內一切買賣ê人，chhia倒換錢ê人ê桌，kap賣鴿á ê人ê椅。Iâ-so͘ ji̍p Siōng-tè ê tiān, kóaⁿ-chhut tiān-lāi it-chhè bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í.

13kā in講，有記載講，我ê厝beh稱做祈禱ê厝，但是lín chiah-ê hō͘伊做賊巢(siū)。Kā in kóng, Ū kì-chài kóng, Góa ê chhù beh chheng chòe kî-tó ê chhù, nā-sī lín chiah ê hō͘ i chòe chha̍t-siū.

14Chhiⁿ-mî ê，跛腳ê，tī殿裡就近耶穌，伊就醫好in。Chhiⁿ-mî ê, pái-kha ê, tī tiān-ni̍h chiū-kūn Iâ-so͘, I chiū i-hó in.

15獨獨chiah-ê祭司頭kap經學士看見伊所行ê奇事，koh看見gín-ná tī殿裡hoah講，大衛ê後裔，和散那，就受氣；kā伊講，In teh講ê，你聽見無？To̍k-to̍k chiah ê chè-si-thâu kap keng-ha̍k-sū khòaⁿ-kìⁿ I só͘ kiâⁿ ê kî-sū, koh khòaⁿ-kìⁿ gín-ná tī tiān-ni̍h hoah kóng, Tāi-pi̍t ê hō͘-è, Hô-sàn-ná, chiū siū-khì; kā I kóng, In teh kóng ê, lí thiaⁿ-kìⁿ bô?

16耶穌kā in講，有；lín kiám m̄-bat讀tio̍h hit句，講，Tùi gín-ná kap食奶ê ê嘴，你hō͘ o-ló ê話齊備mah？Iâ-so͘ kā in kóng, Ū; lín kiám m̄ bat tha̍k-tio̍h hit kù, kóng, Tùi gín-ná kap chia̍h lin ê ê chhùi, lí hō͘ o-ló ê ōe chiâu-pī mah?

17就離開in，出城到伯大尼；tī hia歇暝。Chiū lī-khui in, chhut siâⁿ kàu Pek-tāi-nî; tī hia hioh mî.

18隔早起，tò來城裡ê時，耶穌iau；Keh chá-khí, tò-lâi siâⁿ-ni̍h ê sî, Iâ-so͘ iau;

19看見路邊一叢無花果樹，就óa近去，挽lóng無，只有葉nā-tiāⁿ；就kā樹講，Taⁿ了後，你永永無koh結果子；hit叢無花果樹liâm-piⁿ枯焦。khòaⁿ-kìⁿ lō͘-piⁿ chi̍t châng bû-hoa-kó chhiū, chiū óa-kūn khì, bán lóng bô, chí-ū hio̍h nā-tiāⁿ; chiū kā chhiū kóng, Taⁿ liáu-āu, lí éng-éng bô koh kiat ké-chí; hit châng bû-hoa-kó chhiū liâm-piⁿ ko͘-tâ.

20學生看了就奇怪，講，無花果樹怎樣liâm-piⁿ枯焦？Ha̍k-seng khòaⁿ-liáu chiū kî-koài, kóng, Bû-hoa-kó chhiū cháiⁿ-iūⁿ liâm-piⁿ ko͘-tâ?

21耶穌應講，我實在kā lín講，Lín若有信無僥疑，m̄-nā chit號行tī無花果樹ê事lín會行；就若tùi chit-ê山講，Tio̍h徙去hiat落海，亦beh成。Iâ-so͘ ìn kóng, Góa si̍t-chāi kā lín kóng, Lín nā ū sìn bô giâu-gî, m̄ nā chit hō kiâⁿ tī bû-hoa-kó chhiū ê sū lín ōe kiâⁿ; chiū nā tùi chit ê soaⁿ kóng, Tio̍h sóa-khì hiat-lo̍h hái, ia̍h beh chiâⁿ.

22Koh祈禱ê時，見若lín所求ê，信就得tio̍h。Koh kî-tó ê sî, kìⁿ-nā lín só͘ kiû ê, sìn chiū tit-tio̍h.

23耶穌入殿，教示人ê時，chiah-ê祭司頭，kap百姓 ê長老，就近伊講，你用甚麼權行chiah-ê事？koh 是誰 hō͘你chit-ê權？Iâ-so͘ ji̍p tiān, kà-sī lâng ê sî, chiah ê chè-si-thâu, kap peh-sìⁿ ê tiúⁿ-ló, chiū-kūn I kóng, Lí ēng sím-mi̍h koân kiâⁿ chiah ê sū? koh chī-chūi hō͘ lí chit ê koân?

24耶穌應講，我亦有一句話beh問lín，lín若kā我講，我chiah beh kā lín講我用甚麼權行chiah-ê事。Iâ-so͘ ìn kóng, Góa ia̍h ū chi̍t kù ōe beh mn̄g lín, lín nā kā góa kóng, góa chiah beh kā lín kóng góa ēng sím-mi̍h koân kiâⁿ chiah ê sū.

25約翰ê洗禮是tùi tá-lo̍h來？是tùi天，á是tùi人？In su-khia議論講，若講，Tùi天，伊beh kā咱講，Án-ni lín啥事m̄信伊？Iok-hān ê sóe-lé sī tùi tá-lo̍h lâi? sī tùi thiⁿ, á-sī tùi lâng? In su-khia gī-lūn kóng, Nā kóng, Tùi thiⁿ, I beh kā lán kóng, Án-ni lín siáⁿ-sū m̄ sìn i?

26若講，對人，咱又驚百姓 ；in lóng掠約翰做先知。Nā kóng, Tùi lâng, lán iū kiaⁿ peh-sìⁿ; in lóng lia̍h Iok-hān chòe sian-ti.

27就應耶穌講，阮m̄知。伊就kā in講，我亦無beh kā lín講我是用甚麼權行chiah-ê事。總是lín phah算怎樣？Chiū ìn Iâ-so͘ kóng, Goán m̄ chai. I chiū kā in kóng, Góa ia̍h bô beh kā lín kóng góa sī ēng sím-mi̍h koân kiâⁿ chiah ê sū. Chóng-sī lín phah-sǹg cháiⁿ-iūⁿ?

28人有兩個kiáⁿ，就近hit-ê頭一個講，Kiáⁿ ah，今á日去葡萄園做工。Lâng ū nn̄g ê kiáⁿ, chiū-kūn hit ê thâu-chi̍t-ê kóng, Kiáⁿ ah, kin-á-ji̍t khì phû-tô-hn̂g chòe kang.

29應講，我m̄；後來反悔就去。Ìn kóng, Góa m̄; āu-lâi hoán-hóe chiū khì.

30Koh就近第二個，亦án-ni講。應講，主ah，我beh；就竟然無去。Koh chiū-kūn tē-jī-ê, ia̍h án-ni kóng. Ìn kóng, Chú ah, góa beh; chiū kèng-jiân bô khì.

31此(Chí)兩個tá-lo̍h一個行老父ê意思ah？In講，頭一個。耶穌kā in講，我實在kā lín講，chiah-ê抽餉ê kap娼妓事先lín入上帝ê國。Chí nn̄g ê tá-lo̍h chi̍t ê kiâⁿ lāu-pē ê ì-sù ah? In kóng, Thâu-chi̍t-ê. Iâ-so͘ kā in kóng, Góa si̍t-chāi kā lín kóng chiah ê thiu-hiòng ê kap chhiong-ki tāi-seng lín ji̍p Siōng-tè ê kok.

32因為約翰tī義ê路就近lín，lín無信伊；抽餉ê kap娼妓就信伊；koh lín看了，亦無反悔去信伊。In-ūi Iok-hān tī gī ê lō͘ chiū-kūn lín, lín bô sìn i; thiu-hiòng ê kap chhiong-ki chiū sìn i; koh lín khòaⁿ-liáu, ia̍h bô hoán-hóe khì sìn i.

33Koh聽一個譬喻：有一個家主，知一園葡萄，用籬笆圍伊，內面開酒窟，起一個守更樓，租hō͘佃戶，就去別所在。Koh thiaⁿ chi̍t ê phì-jū: Ū chi̍t ê ke-chú, chai chi̍t hn̂g phû-tô, ēng lî-pa ûi i, lāi-bīn khui chiú-khut, khí chi̍t ê chiú-kiⁿ lâu, cho͘ hō͘ tiān-hō͘, chiū khì pa̍t só͘-chāi.

34收果子ê時beh到，就差伊ê奴僕就近佃戶，收伊ê果子。Siu ké-chí ê sî beh kàu, chiū chhe i ê lô͘-po̍k chiū-kūn tiān-hō͘, siu i ê ké-chí.

35佃戶掠伊ê奴僕，一個phah，一個thâi，一個用石頭tìm。Tiān-hō͘ lia̍h i ê lô͘-po̍k, chi̍t-ê phah, chi̍t-ê thâi, chi̍t-ê ēng chio̍h-thâu tìm.

36Koh差別個奴僕，比前khah chōe；in猶原án-ni款待in。Koh chhe pa̍t ê lô͘-po̍k, pí chêng khah chōe; in iû-goân án-ni khoán-thāi in.

37後來差伊ê Kiáⁿ就近in，想講，In beh尊敬我ê Kiáⁿ。Āu-lâi chhe i ê kiáⁿ chiū-kūn in, siūⁿ kóng, In beh chun-kèng góa ê kiáⁿ.

38但是佃戶看見hit-ê Kiáⁿ，就saⁿ-kap講，chit-ê是伊ê後嗣；來，kā伊thâi死，thang得伊ê業。Nā-sī tiān-hō͘ khòaⁿ-kìⁿ hit ê kiáⁿ, chiū saⁿ-kap kóng, Chit-ê sī i ê hō͘-sû; lâi, kā i thâi-sí, thang tit i ê gia̍p.

39就掠伊，chhia伊出園外，害死伊。Chiū lia̍h i, chhia i chhut hn̂g-gōa, hāi-sí i.

40Taⁿ園主若到，beh怎樣來辦chiah-ê佃戶？Taⁿ hn̂g-chú nā kàu, beh cháiⁿ-iūⁿ lâi pān chiah ê tiān-hō͘?

41In kā伊講，伊beh用惡報來滅chiah-ê惡人；將葡萄園租別個佃戶，就是照時納果子ê。In kā I kóng, I beh ēng ok-pò lâi bia̍t chiah ê ok-lâng; chiong phû-tô-hn̂g cho͘ pa̍t ê tiān-hō͘, chiū-sī chiàu-sî la̍p ké-chí ê.

42耶穌對in講，經裡所記載， 師傅所去sak ê石， 成做厝角頭ê石； 這是主所成ê， 咱ê目睭看做奇怪，lín kiám bē讀mah？Iâ-so͘ tùi in kóng, Keng-ni̍h só͘ kì-chài, Sai-hū só͘ khì-sak ê chio̍h, Chiâⁿ-chòe chhù-kak-thâu ê chio̍h; Che sī Chú só͘ chiâⁿ ê, Lán ê ba̍k-chiu khòaⁿ chòe kî-koài,lín kiám bē tha̍k mah?

43所以我kā lín講，上帝ê國beh tùi lín搶去，來賞賜結伊ê果子ê百姓Só͘-í góa kā lín kóng, Siōng-tè ê kok beh tùi lín chhiúⁿ-khì, lâi siúⁿ-sù kiat i ê ké-chí ê peh-sìⁿ.

44Koh跋倒(poa̍h-tó)tī chit塊石頂ê teh-beh破kô͘-kô͘；hō͘ chit塊石teh tī伊頂面ê beh幼boa̍h-boa̍h。Koh poa̍h-tó tī chit tè chio̍h téng ê teh-beh phòa kô͘-kô͘; hō͘ chit tè chio̍h teh tī i téng-bīn ê beh iù boa̍h-boa̍h.

45Chiah-ê祭司頭kap法利賽人聽見伊ê譬喻，知伊所講ê是指in。Chiah ê chè-si-thâu kap Hoat-lī-sài lâng thiaⁿ-kìⁿ I ê phì-jū, chai I só͘ kóng ê sī chí in.

46就ài beh掠伊，但是驚眾人；因為眾人掠伊做先知。Chiū ài beh lia̍h I, nā-sī kiaⁿ chèng lâng; in-ūi chèng lâng lia̍h I chòe sian-ti.

1耶穌應伊，koh用譬喻kā in講，Iâ-so͘ ìn i, koh ēng phì-jū kā in kóng,

2天國比並人君，kā伊ê Kiáⁿ備辦婚姻ê筵席。Thian-kok pí-phēng jîn-kun, kā i ê kiáⁿ pī-pān hun-in ê iân-sia̍h.

3差伊ê奴僕召所請ê來赴筵席；但是in m̄來。Chhe i ê lô͘-po̍k tiàu só͘ chhiáⁿ ê lâi hù iân-sia̍h; nā-sī in m̄ lâi.

4Koh差別個奴僕講，去kā所請ê講，我ê桌已經備辦便，我ê牛kap肥ê cheng-siⁿ已經thâi，百項物lóng便，tio̍h來赴筵席。Koh chhe pa̍t ê lô͘-po̍k kóng, Khì kā só͘ chhiáⁿ ê kóng, Góa ê toh í-keng pī-pān piān, góa ê gû kap pûi ê cheng-siⁿ í-keng thâi, pah-hāng mi̍h lóng piān, tio̍h lâi hù iân-sia̍h.

5In無要緊，做in去；一個去伊ê田園，一個去伊ê seng-lí場；In bô iàu-kín, chòe in khì; chi̍t ê khì i ê chhân-hn̂g, chi̍t ê khì i ê seng-lí tiûⁿ;

6其餘ê掠伊ê奴僕，凌辱in，thâi in。kî-û ê lia̍h i ê lô͘-po̍k, lêng-jio̍k in, thâi in.

7人君受氣，差伊ê軍兵剿滅hiah-ê凶犯，續燒in ê城。Jîn-kun siū-khì, chhe i ê kun-peng châu-bia̍t hiah ê hiong-hoān, sòa sio in ê siâⁿ.

8就kā伊ê奴僕講，婚姻ê筵席已經便，但是所請ê bōe堪得。Chiū kā i ê lô͘-po̍k kóng, Hun-in ê iân-sia̍h í-keng piān, nā-sī só͘ chhiáⁿ ê bōe kham-tit.

9所以lín去大路頭，見若所tú-tio̍h ê lóng請伊來赴筵席。Só͘-í lín khì tōa lō͘-thâu, kìⁿ-nā só͘ tú-tio̍h ê lóng chhiáⁿ i lâi hù iân-sia̍h.

10Hiah-ê奴僕出去路裡，聚集凡所tú-tio̍h ê，無論好pháiⁿ；婚姻ê客廳人客就滿。Hiah ê lô͘-po̍k chhut-khì lō͘-ni̍h, chū-chi̍p hoān só͘ tú-tio̍h ê, bô lūn hó pháiⁿ; hun-in ê kheh-thiaⁿ lâng-kheh chiū móa.

11人君入去看人客，看見tī hia一人無穿禮服；Jîn-kun ji̍p-khì khòaⁿ lâng-kheh, khòaⁿ-kìⁿ tī hia chi̍t lâng bô chhēng lé-ho̍k;

12kā伊講，朋友ah，你無穿婚姻ê禮服，怎樣入來chia？伊就靜靜。kā i kóng, Pêng-iú ah, lí bô chhēng hun-in ê lé-ho̍k, cháiⁿ-iūⁿ ji̍p-lâi chia? I chiū chēng-chēng.

13Hit時人君kā chiah-ê差用講，縛伊ê腳手，將伊hiat tī外面烏暗ê所在；tī hia beh有啼哭咬牙切齒。Hit sî jîn-kun kā chiah ê chhe-ēng kóng, Pa̍k i ê kha-chhiú, chiong i hiat tī gōa-bīn o͘-àm ê só͘-chāi; tī hia beh ū thî-khàu kā-gê chhiat-chhí.

14因為受召ê chōe，受揀ê少。In-ūi siū tiàu ê chōe, siū kéng ê chió.

15Hit時法利賽人去參詳，看thang怎樣就伊ê話來tauh伊。Hit sî Hoat-lī-sài lâng khì chham-siông, khòaⁿ thang cháiⁿ-iūⁿ chiū I ê ōe lâi tauh I.

16就差in ê學生kap希律黨就近伊講，先生ah，阮知你是真實，koh用真實將上帝ê路教示人；你也無掠甚麼人做要緊，因為你無看人ê外貌。Chiū chhe in ê ha̍k-seng kap Hi-lu̍t tóng chiū-kūn I kóng, Sian-siⁿ ah, goán chai lí sī chin-si̍t, koh ēng chin-si̍t chiong Siōng-tè ê lō͘ kà-sī lâng; lí iā bô lia̍h sím-mi̍h lâng chòe iàu-kín, in-ūi lí bô khòaⁿ lâng ê gōa-māu.

17納稅hō͘該撒合宜á無？你phah算怎樣？請kā阮講。La̍p sè hō͘ Kai-sat ha̍p-gî á bô? Lí phah-sǹg cháiⁿ-iūⁿ? chhiáⁿ kā goán kóng.

18耶穌知in ê pháiⁿ，就講，假好ê人ah，啥事試我。Iâ-so͘ chai in ê pháiⁿ, chiū kóng, Ké-hó ê lâng ah, siáⁿ-sū chhì góa.

19用納稅ê銀á hō͘我看。In就the̍h一個銀á hō͘伊。Ēng la̍p sè ê gûn-á hō͘ góa khòaⁿ. In chiū the̍h chi̍t ê gûn-á hō͘ I.

20耶穌kā in講，Chit-ê像(siōng)kap號是是誰？Iâ-so͘ kā in kóng, Chit ê siōng kap hō sī chī-chūi?

21kā伊講，該撒。伊就kā in講，Án-ni，lín tio̍h將該撒ê物納hō͘該撒，將上帝ê物納hō͘上帝。Kā I kóng, Kai-sat. I chiū kā in kóng, Án-ni, lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè.

22In聽見就奇怪，離開伊去。In thiaⁿ-kìⁿ chiū kî-koài, lī-khui I khì.

23Hit日有撒都該人，就是講人無koh活ê，就近伊，問講，Hit ji̍t ū Sat-thó͘-kai lâng, chiū-sī kóng lâng bô koh-oa̍h ê, chiū-kūn I, mn̄g kóng,

24先生ah，摩西講，人死也無kiáⁿ，伊ê小弟tio̍h娶伊ê bó͘；生kiáⁿ來續接伊ê兄。Sian-siⁿ ah, Mô͘-se kóng, Lâng sí iā bô kiáⁿ, i ê sió-tī tio̍h chhōa i ê bó͘; siⁿ kiáⁿ lâi sòa-chiap i ê hiaⁿ.

25Taⁿ阮中間有兄弟七人；大ê娶，就死去，無kiáⁿ；留伊ê bó͘ hō͘小弟。Taⁿ goán tiong-kan ū hiaⁿ-tī chhit lâng; tōa-ê chhōa, chiū sí-khì, bô kiáⁿ; lâu i ê bó͘ hō͘ sió-tī.

26第二ê，第三ê，到第七ê也lóng是án-ni。Tē jī ê, tē saⁿ ê, kàu tē chhit ê iā lóng sī án-ni.

27到尾，hit-ê婦人人也死。Kàu bé, hit ê hū-jîn-lâng iā sí.

28Án-ni tī koh活ê時，七人中婦人人beh做是誰 ê bó͘？因為lóng有娶伊。Án-ni tī koh-oa̍h ê sî, chhit lâng tiong hū-jîn-lâng beh chòe chī-chūi ê bó͘? in-ūi lóng ū chhōa i.

29耶穌應伊講，Lín錯lah，因為lín m̄-bat聖經kap上帝ê權能。Iâ-so͘ ìn i kóng, Lín chhò lah, in-ūi lín m̄ bat sèng-keng kap Siōng-tè ê koân-lêng.

30因為koh活ê時，無嫁無娶；是親像天使tī天裡。In-ūi koh-oa̍h ê sî, bô kè bô chhōa; sī chhin-chhiūⁿ thiⁿ-sài tī thiⁿ-ni̍h.

31論到死人koh活，kiám bē讀tio̍h上帝所kā lín講ê講，Lūn-kàu sí-lâng koh-oa̍h, kiám bē tha̍k-tio̍h Siōng-tè só͘ kā lín kóng ê kóng,

32我就是亞伯拉罕ê上帝，以撒ê上帝，雅各ê上帝？伊m̄是死人ê上帝，是活人ê上帝。Góa chiū-sī A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè? I m̄ sī sí-lâng ê Siōng-tè, sī oa̍h-lâng ê Siōng-tè.

33眾人聽見，奇怪伊ê教示。Chèng lâng thiaⁿ-kìⁿ, kî-koài I ê kà-sī.

34法利賽人聽見伊已經塞密撒都該人ê嘴，就saⁿ-kap聚集。Hoat-lī-sài lâng thiaⁿ-kìⁿ I í-keng that-ba̍t Sat-thó͘-kai lâng ê chhùi, chiū saⁿ-kap chū-chi̍p.

35其中一人做教法師ê試伊，問講，Kî-tiong chi̍t lâng chòe kàu-hoat-su ê chhì I, mn̄g kóng,

36先生ah，律法中，甚麼誡最大？Sian-siⁿ ah, lu̍t-hoat tiong, sím-mi̍h kài chòe tōa?

37伊kā伊講，你tio̍h盡心，盡性，盡意疼主你ê上帝。I kā i kóng, Lí tio̍h chīn sim, chīn sèng, chīn ì thiàⁿ Chú lí ê Siōng-tè.

38Chit-ê誡是大ê，也是頭一個。Chit ê kài sī tōa ê, iā sī thâu chi̍t ê.

39第二個也saⁿ親像，是講，你tio̍h疼厝邊親像家己。Tē jī ê iā saⁿ chhin-chhiūⁿ, sī kóng, Lí tio̍h thiàⁿ chhù-piⁿ chhin-chhiūⁿ ka-kī.

40Chit兩條誡是全律法kap先知ê總根頭。Chit nn̄g tiâu kài sī choân lu̍t-hoat kap sian-ti ê chóng-kun-thâu.

41法利賽人聚集ê時耶穌問in講，Hoat-lī-sài lâng chū-chi̍p ê sî Iâ-so͘ mn̄g in kóng,

42論基督lín phah算怎樣？伊是是誰 ê後裔？In kā伊講，是大衛ê。Lūn Ki-tok lín phah-sǹg cháiⁿ-iūⁿ? I sī chī-chūi ê hō͘-è? In kā I kóng, Sī Tāi-pi̍t ê.

43伊kā in講，Án-ni，就大衛hō͘聖神感動，怎樣稱伊做主ah，講，I kā in kóng, Án-ni, chiū Tāi-pi̍t hō͘ Sèng Sîn kám-tōng, cháiⁿ-iūⁿ chheng I chòe Chú ah, kóng,

44主kā我ê主講， 坐我ê大pêng， thèng候我將你chiah-ê對敵hē tī你ê腳下？Chú kā góa ê Chú kóng, Chē góa ê tōa pêng, Thèng-hāu góa chiong lí chiah ê tùi-te̍k hē tī lí ê kha-ē?

45大衛既然稱伊做主，就基督怎樣做伊ê後裔ah？Tāi-pi̍t kì-jiân chheng I chòe Chú, chiū Ki-tok cháiⁿ-iūⁿ chòe I ê hō͘-è ah?

46無人會應伊一句；tùi hit日也無人敢koh問伊。Bô lâng ōe ìn I chi̍t kù; tùi hit ji̍t iā bô lâng káⁿ koh mn̄g I.

1Hit時耶穌kā眾人kap伊ê學生講，Hit sî Iâ-so͘ kā chèng lâng kap I ê ha̍k-seng kóng,

2經學士kap法利賽人坐摩西ê位。Keng-ha̍k-sū kap Hoat-lī-sài lâng chē Mô͘-se ê ūi.

3所以見若in所kā lín講ê，lóng tio̍h行來守伊；總是莫得照in ê所做來行；因為in有講，也無行。Só͘-í kìⁿ-nā in só͘ kā lín kóng ê, lóng tio̍h kiâⁿ lâi siú i; chóng-sī bo̍h-tit chiàu in ê só͘ chòe lâi kiâⁿ; in-ūi in ū kóng, iā bô kiâⁿ.

4In用重koh oh擔ê擔縛來hē tī人ê肩頭頂，但是in家己m̄肯用一支指頭á振動伊。In ēng tāng koh oh taⁿ ê tàⁿ pa̍k lâi hē tī lâng ê keng-thâu téng, nā-sī in ka-kī m̄ khéng ēng chi̍t ki chńg-thâu-á tín-tāng i.

5In一切ê所做，lóng是beh hō͘人看chiah做；因為in ê背肩(pōe-keng)做khah闊，衫á裾ê鬚做khah長。In it-chhè ê só͘ chòe, lóng sī beh hō͘ lâng khòaⁿ chiah chòe; in-ūi in ê pōe-keng chòe khah khoah, saⁿ-á-ku ê chhiu chòe khah tn̂g.

6Ài筵桌裡坐大位，會堂內坐高位，Ài iân-toh-ni̍h chē tōa ūi, hōe-tn̂g lāi chē koâiⁿ ūi,

7街市裡hō͘人請安，也hō͘人稱呼in拉比。koe-chhī-ni̍h hō͘ lâng chhéng-an, iā hō͘ lâng chheng-ho͘ in Lia̍p-pí.

8但是lín莫得hō͘人稱做拉比；因為lín ê先生是一個，lín lóng是兄弟。Nā-sī lín bo̍h-tit hō͘ lâng chheng chòe Lia̍p-pí; in-ūi lín ê sian-siⁿ sī chi̍t ê, lín lóng sī hiaⁿ-tī.

9Tī地裡也莫得稱人做父；因為lín ê父是一個，就是tī天裡ê。Tī tōe-ni̍h iā bo̍h-tit chheng lâng chòe pē; in-ūi lín ê Pē sī chi̍t ê, chiū-sī tī thiⁿ-ni̍h ê.

10也莫得hō͘人稱做先生；因為lín ê先生是一個，就是基督。Iā bo̍h-tit hō͘ lâng chheng chòe sian-siⁿ; in-ūi lín ê sian-siⁿ sī chi̍t ê, chiū-sī Ki-tok.

11但是lín中間做大ê，beh做lín ê差用。Nā-sī lín tiong-kan chòe tōa ê, beh chòe lín ê chhe-ēng.

12凡若自高ê，beh hō͘伊卑微；家己卑微ê，beh高升伊。Hoān-nā chū-ko ê, beh hō͘ i pi-bî; ka-kī pi-bî ê, beh ko-seng i.

13Lín假好ê經學士kap法利賽人，有災禍ah！因為lín tī人ê面前關密天國；lín家己無入，teh-beh入ê人，lín也m̄准in入。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín tī lâng ê bīn-chêng koaiⁿ-ba̍t thian-kok; lín ka-kī bô ji̍p, teh-beh ji̍p ê lâng, lín iā m̄ chún in ji̍p.

15Lín假好ê經學士kap法利賽人，有災禍ah！因為lín遍行水路陸路，hō͘一人入到；既然入，就hō͘伊做地獄ê人，比lín加倍。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín piàn kiâⁿ chúi-lō͘ lio̍k-lō͘, hō͘ chi̍t lâng ji̍p kàu; kì-jiân ji̍p, chiū hō͘ i chòe tē-ge̍k ê lâng, pí lín ka-pē.

16Lín chhiⁿ-mî做chhōa頭ê，有災禍ah！lín講，見若kí殿來chiù-chōa ê，無事；獨獨見若kí殿裡ê金來chiù-chōa ê，就tio̍h守伊。Lín chhiⁿ-mî chòe chhōa-thâu ê, ū chai-ē ah! lín kóng, Kìⁿ-nā kí tiān lâi chiù-chōa ê, bô sū; to̍k-to̍k kìⁿ-nā kí tiān-ni̍h ê kim lâi chiù-chōa ê, chiū tio̍h siú i.

17Lín戇koh chhiⁿ-mî；因為tá-lo̍h一項khah大，是金，á是hō͘金成聖ê殿ah？Lín gōng koh chhiⁿ-mî; in-ūi tá-lo̍h chi̍t hāng khah tōa, sī kim, á-sī hō͘ kim chiâⁿ sèng ê tiān ah?

18Lín亦講見若kí壇來chiù-chōa ê，無事；獨獨見若kí壇頂ê禮物來chiù-chōa ê，就tio̍h守伊。Lín ia̍h kóng Kìⁿ-nā kí tôaⁿ lâi chiù-chōa ê, bô sū; to̍k-to̍k kìⁿ-nā kí tôaⁿ-téng ê lé-mi̍h lâi chiù-chōa ê, chiū tio̍h siú i.

19Lín chhiⁿ-mî ah；因為tá-lo̍h一項khah大，是禮物á是hō͘禮物成聖ê壇？Lín chhiⁿ-mî ah; in-ūi tá-lo̍h chi̍t hāng khah tōa, sī lé-mi̍h á-sī hō͘ lé-mi̍h chiâⁿ sèng ê tôaⁿ?

20所以人kí壇來chiù-chōa，是kí壇kap見若tī伊頂面ê，來chiù-chōa。Só͘-í lâng kí tôaⁿ lâi chiù-chōa, sī kí tôaⁿ kap kìⁿ-nā tī i téng-bīn ê, lâi chiù-chōa.

21人kí殿來chiù-chōa，是kí殿kap tiàm tī hit內面ê來chiù-chōa。Lâng kí tiān lâi chiù-chōa, sī kí tiān kap tiàm tī hit lāi-bīn ê lâi chiù-chōa.

22人kí天來chiù-chōa，是kí上帝ê座位kap坐tī hit頂面ê，來chiù-chōa。Lâng kí thiⁿ lâi chiù-chōa, sī kí Siōng-tè ê chō-ūi kap chē tī hit téng-bīn ê, lâi chiù-chōa.

23Lín假好ê經學士kap法利賽人，有災禍ah！因為lín將薄荷、八角、馬芹，十份抽一份；但是律法ê khah tùi-tiōng ê，就是公義、憐憫kap信實，lín就放sak；總是chiah-ê是應該tio̍h行ê，hiah-ê也是m̄-thang放sak。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chiong po̍k-hô, poeh-kak, má-khûn, cha̍p hūn thiu chi̍t hūn; nā-sī lu̍t-hoat ê khah tùi-tiōng ê, chiū-sī kong-gī, lîn-bín kap sìn-si̍t, lín chiū pàng-sak; chóng-sī chiah-ê sī eng-kai tio̍h kiâⁿ ê, hiah-ê iā sī m̄-thang pàng-sak.

24Lín chhiⁿ-mî做chhōa頭ê，蚊á就lū起來，駱駝就吞落去。Lín chhiⁿ-mî chòe chhōa-thâu ê, báng-á chiū lū-khí-lâi, lo̍k-tô chiū thun-lo̍h-khì.

25Lín假好ê經學士kap法利賽人，有災禍ah！因為lín清氣杯盤ê外面，但是hit內面tóe勒索kap放蕩滿滿。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chheng-khì poe-pôaⁿ ê gōa-bīn, nā-sī hit lāi-bīn tóe le̍k-sek kap hòng-tōng móa-móa.

26你chhiⁿ-mî ê法利賽人ah，事先清氣杯盤ê內面，hō͘伊ê外面亦會清氣。Lí chhiⁿ-mî ê Hoat-lī-sài lâng ah, tāi-seng chheng-khì poe-pôaⁿ ê lāi-bīn, hō͘ i ê gōa-bīn ia̍h ōe chheng-khì.

27Lín假好ê經學士kap法利賽人，有災禍ah！因為lín親像粉白ê 墓，外面看是súi，但是內面tóe死人ê骨頭kap ta̍k項ê污穢滿滿。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chhin-chhiūⁿ hún pe̍h ê bōng, gōa-bīn khòaⁿ sī súi, nā-sī lāi-bīn tóe sí-lâng ê kut-thâu kap ta̍k hāng ê ù-òe móa-móa.

28Án-ni，lín外面hō͘人看是義，但是內面就假好kap不法滿滿。Án-ni, lín gōa-bīn hō͘ lâng khòaⁿ sī gī, nā-sī lāi-bīn chiū ké-hó kap put-hoat móa-móa.

29Lín假好ê經學士kap法利賽人，有災禍ah！因為lín chhòng先知人ê 墓，修整義人ê墳墓；Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chhòng sian-ti lâng ê bōng, siu-chéng gī lâng ê hûn-bōng;

30亦講，設使阮tī阮祖ê時，就無kap in有份tī流先知人ê血。ia̍h kóng, Siat-sú goán tī goán chó͘ ê sî, chiū bô kap in ū hūn tī lâu sian-ti lâng ê huih.

31Án-ni，lín家己干證是做thâi先知人ê ê後裔。Án-ni, lín ka-kī kan-chèng sī chòe thâi sian-ti lâng ê ê hō͘-è.

32做lín去滿lín祖ê份量。Chòe lín khì móa lín chó͘ ê hūn-liōng.

33蛇ah！毒蟲ê類ah！lín thài會逃閃地獄ê刑罰？Chôa ah! to̍k-thâng ê lūi ah! lín thài ōe tô-siám tē-ge̍k ê hêng-hoa̍t?

34所以我差先知知識ê人，經學士就近lín；有ê lín beh thâi伊，beh釘伊tī十字架；也有ê beh tī lín ê會堂用鞭phah伊，tùi chit-ê城趕逐in到hit-ê城。Só͘-í góa chhe sian-ti tì-sek ê lâng, keng-ha̍k-sū chiū-kūn lín; ū-ê lín beh thâi i, beh tèng i tī si̍p-jī-kè; iā ū-ê beh tī lín ê hōe-tn̂g ēng piⁿ phah i, tùi chit ê siâⁿ kóaⁿ-tio̍k in kàu hit ê siâⁿ.

35致到地上所流義人ê血，lóng歸tī lín，就是tùi義人A-pek ê血到Pa-lia̍p-ka ê Kiáⁿ撒迦利亞ê血，伊是lín所thâi tī殿kap壇ê中間ê。Tì-kàu tōe-chiūⁿ só͘ lâu gī lâng ê huih, lóng kui tī lín, chiū-sī tùi gī lâng A-pek ê huih kàu Pa-lia̍p-ka ê kiáⁿ Sat-ka-lī-a ê huih, i sī lín só͘ thâi tī tiān kap tôaⁿ ê tiong-kan ê.

36我實在kā lín講，Chiah-ê事lóng beh歸tī chit代。Góa si̍t-chāi kā lín kóng, Chiah ê sū lóng beh kui tī chit tāi.

37耶路撒冷ah！耶路撒冷ah！就是thâi死先知人，用石頭tìm奉差到tī伊ê；我jōa chōe pái ài聚集你ê kiáⁿ兒，親像雞母聚集伊ê雞á tī翼(si̍t)下；但是lín m̄ ài。Iâ-lō͘-sat-léng ah! Iâ-lō͘-sat-léng ah! chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê; góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; nā-sī lín m̄ ài.

38你看！lín ê厝beh拋荒，留teh hō͘ lín。Lí khòaⁿ! lín ê chhù beh pha-hng, lâu-teh hō͘ lín.

39因為我kā lín講，Taⁿ了後，lín無看見我；thèng候lín講，Tī主ê名來ê，得tio̍h福氣。In-ūi góa kā lín kóng, Taⁿ liáu-āu, lín bô khòaⁿ-kìⁿ góa; thèng-hāu lín kóng, Tī Chú ê miâ lâi ê, tit-tio̍h hok-khì.