1Hit時耶穌kā眾人kap伊ê學生講，Hit sî Iâ-so͘ kā chèng lâng kap I ê ha̍k-seng kóng,

2經學士kap法利賽人坐摩西ê位。Keng-ha̍k-sū kap Hoat-lī-sài lâng chē Mô͘-se ê ūi.

3所以見若in所kā lín講ê，lóng tio̍h行來守伊；總是莫得照in ê所做來行；因為in有講，也無行。Só͘-í kìⁿ-nā in só͘ kā lín kóng ê, lóng tio̍h kiâⁿ lâi siú i; chóng-sī bo̍h-tit chiàu in ê só͘ chòe lâi kiâⁿ; in-ūi in ū kóng, iā bô kiâⁿ.

4In用重koh oh擔ê擔縛來hē tī人ê肩頭頂，但是in家己m̄肯用一支指頭á振動伊。In ēng tāng koh oh taⁿ ê tàⁿ pa̍k lâi hē tī lâng ê keng-thâu téng, nā-sī in ka-kī m̄ khéng ēng chi̍t ki chńg-thâu-á tín-tāng i.

5In一切ê所做，lóng是beh hō͘人看chiah做；因為in ê背肩(pōe-keng)做khah闊，衫á裾ê鬚做khah長。In it-chhè ê só͘ chòe, lóng sī beh hō͘ lâng khòaⁿ chiah chòe; in-ūi in ê pōe-keng chòe khah khoah, saⁿ-á-ku ê chhiu chòe khah tn̂g.

6Ài筵桌裡坐大位，會堂內坐高位，Ài iân-toh-ni̍h chē tōa ūi, hōe-tn̂g lāi chē koâiⁿ ūi,

7街市裡hō͘人請安，也hō͘人稱呼in拉比。koe-chhī-ni̍h hō͘ lâng chhéng-an, iā hō͘ lâng chheng-ho͘ in Lia̍p-pí.

8但是lín莫得hō͘人稱做拉比；因為lín ê先生是一個，lín lóng是兄弟。Nā-sī lín bo̍h-tit hō͘ lâng chheng chòe Lia̍p-pí; in-ūi lín ê sian-siⁿ sī chi̍t ê, lín lóng sī hiaⁿ-tī.

9Tī地裡也莫得稱人做父；因為lín ê父是一個，就是tī天裡ê。Tī tōe-ni̍h iā bo̍h-tit chheng lâng chòe pē; in-ūi lín ê Pē sī chi̍t ê, chiū-sī tī thiⁿ-ni̍h ê.

10也莫得hō͘人稱做先生；因為lín ê先生是一個，就是基督。Iā bo̍h-tit hō͘ lâng chheng chòe sian-siⁿ; in-ūi lín ê sian-siⁿ sī chi̍t ê, chiū-sī Ki-tok.

11但是lín中間做大ê，beh做lín ê差用。Nā-sī lín tiong-kan chòe tōa ê, beh chòe lín ê chhe-ēng.

12凡若自高ê，beh hō͘伊卑微；家己卑微ê，beh高升伊。Hoān-nā chū-ko ê, beh hō͘ i pi-bî; ka-kī pi-bî ê, beh ko-seng i.

13Lín假好ê經學士kap法利賽人，有災禍ah！因為lín tī人ê面前關密天國；lín家己無入，teh-beh入ê人，lín也m̄准in入。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín tī lâng ê bīn-chêng koaiⁿ-ba̍t thian-kok; lín ka-kī bô ji̍p, teh-beh ji̍p ê lâng, lín iā m̄ chún in ji̍p.

15Lín假好ê經學士kap法利賽人，有災禍ah！因為lín遍行水路陸路，hō͘一人入到；既然入，就hō͘伊做地獄ê人，比lín加倍。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín piàn kiâⁿ chúi-lō͘ lio̍k-lō͘, hō͘ chi̍t lâng ji̍p kàu; kì-jiân ji̍p, chiū hō͘ i chòe tē-ge̍k ê lâng, pí lín ka-pē.

16Lín chhiⁿ-mî做chhōa頭ê，有災禍ah！lín講，見若kí殿來chiù-chōa ê，無事；獨獨見若kí殿裡ê金來chiù-chōa ê，就tio̍h守伊。Lín chhiⁿ-mî chòe chhōa-thâu ê, ū chai-ē ah! lín kóng, Kìⁿ-nā kí tiān lâi chiù-chōa ê, bô sū; to̍k-to̍k kìⁿ-nā kí tiān-ni̍h ê kim lâi chiù-chōa ê, chiū tio̍h siú i.

17Lín戇koh chhiⁿ-mî；因為tá-lo̍h一項khah大，是金，á是hō͘金成聖ê殿ah？Lín gōng koh chhiⁿ-mî; in-ūi tá-lo̍h chi̍t hāng khah tōa, sī kim, á-sī hō͘ kim chiâⁿ sèng ê tiān ah?

18Lín亦講見若kí壇來chiù-chōa ê，無事；獨獨見若kí壇頂ê禮物來chiù-chōa ê，就tio̍h守伊。Lín ia̍h kóng Kìⁿ-nā kí tôaⁿ lâi chiù-chōa ê, bô sū; to̍k-to̍k kìⁿ-nā kí tôaⁿ-téng ê lé-mi̍h lâi chiù-chōa ê, chiū tio̍h siú i.

19Lín chhiⁿ-mî ah；因為tá-lo̍h一項khah大，是禮物á是hō͘禮物成聖ê壇？Lín chhiⁿ-mî ah; in-ūi tá-lo̍h chi̍t hāng khah tōa, sī lé-mi̍h á-sī hō͘ lé-mi̍h chiâⁿ sèng ê tôaⁿ?

20所以人kí壇來chiù-chōa，是kí壇kap見若tī伊頂面ê，來chiù-chōa。Só͘-í lâng kí tôaⁿ lâi chiù-chōa, sī kí tôaⁿ kap kìⁿ-nā tī i téng-bīn ê, lâi chiù-chōa.

21人kí殿來chiù-chōa，是kí殿kap tiàm tī hit內面ê來chiù-chōa。Lâng kí tiān lâi chiù-chōa, sī kí tiān kap tiàm tī hit lāi-bīn ê lâi chiù-chōa.

22人kí天來chiù-chōa，是kí上帝ê座位kap坐tī hit頂面ê，來chiù-chōa。Lâng kí thiⁿ lâi chiù-chōa, sī kí Siōng-tè ê chō-ūi kap chē tī hit téng-bīn ê, lâi chiù-chōa.

23Lín假好ê經學士kap法利賽人，有災禍ah！因為lín將薄荷、八角、馬芹，十份抽一份；但是律法ê khah tùi-tiōng ê，就是公義、憐憫kap信實，lín就放sak；總是chiah-ê是應該tio̍h行ê，hiah-ê也是m̄-thang放sak。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chiong po̍k-hô, poeh-kak, má-khûn, cha̍p hūn thiu chi̍t hūn; nā-sī lu̍t-hoat ê khah tùi-tiōng ê, chiū-sī kong-gī, lîn-bín kap sìn-si̍t, lín chiū pàng-sak; chóng-sī chiah-ê sī eng-kai tio̍h kiâⁿ ê, hiah-ê iā sī m̄-thang pàng-sak.

24Lín chhiⁿ-mî做chhōa頭ê，蚊á就lū起來，駱駝就吞落去。Lín chhiⁿ-mî chòe chhōa-thâu ê, báng-á chiū lū-khí-lâi, lo̍k-tô chiū thun-lo̍h-khì.

25Lín假好ê經學士kap法利賽人，有災禍ah！因為lín清氣杯盤ê外面，但是hit內面tóe勒索kap放蕩滿滿。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chheng-khì poe-pôaⁿ ê gōa-bīn, nā-sī hit lāi-bīn tóe le̍k-sek kap hòng-tōng móa-móa.

26你chhiⁿ-mî ê法利賽人ah，事先清氣杯盤ê內面，hō͘伊ê外面亦會清氣。Lí chhiⁿ-mî ê Hoat-lī-sài lâng ah, tāi-seng chheng-khì poe-pôaⁿ ê lāi-bīn, hō͘ i ê gōa-bīn ia̍h ōe chheng-khì.

27Lín假好ê經學士kap法利賽人，有災禍ah！因為lín親像粉白ê 墓，外面看是súi，但是內面tóe死人ê骨頭kap ta̍k項ê污穢滿滿。Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chhin-chhiūⁿ hún pe̍h ê bōng, gōa-bīn khòaⁿ sī súi, nā-sī lāi-bīn tóe sí-lâng ê kut-thâu kap ta̍k hāng ê ù-òe móa-móa.

28Án-ni，lín外面hō͘人看是義，但是內面就假好kap不法滿滿。Án-ni, lín gōa-bīn hō͘ lâng khòaⁿ sī gī, nā-sī lāi-bīn chiū ké-hó kap put-hoat móa-móa.

29Lín假好ê經學士kap法利賽人，有災禍ah！因為lín chhòng先知人ê 墓，修整義人ê墳墓；Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chhòng sian-ti lâng ê bōng, siu-chéng gī lâng ê hûn-bōng;

30亦講，設使阮tī阮祖ê時，就無kap in有份tī流先知人ê血。ia̍h kóng, Siat-sú goán tī goán chó͘ ê sî, chiū bô kap in ū hūn tī lâu sian-ti lâng ê huih.

31Án-ni，lín家己干證是做thâi先知人ê ê後裔。Án-ni, lín ka-kī kan-chèng sī chòe thâi sian-ti lâng ê ê hō͘-è.

32做lín去滿lín祖ê份量。Chòe lín khì móa lín chó͘ ê hūn-liōng.

33蛇ah！毒蟲ê類ah！lín thài會逃閃地獄ê刑罰？Chôa ah! to̍k-thâng ê lūi ah! lín thài ōe tô-siám tē-ge̍k ê hêng-hoa̍t?

34所以我差先知知識ê人，經學士就近lín；有ê lín beh thâi伊，beh釘伊tī十字架；也有ê beh tī lín ê會堂用鞭phah伊，tùi chit-ê城趕逐in到hit-ê城。Só͘-í góa chhe sian-ti tì-sek ê lâng, keng-ha̍k-sū chiū-kūn lín; ū-ê lín beh thâi i, beh tèng i tī si̍p-jī-kè; iā ū-ê beh tī lín ê hōe-tn̂g ēng piⁿ phah i, tùi chit ê siâⁿ kóaⁿ-tio̍k in kàu hit ê siâⁿ.

35致到地上所流義人ê血，lóng歸tī lín，就是tùi義人A-pek ê血到Pa-lia̍p-ka ê Kiáⁿ撒迦利亞ê血，伊是lín所thâi tī殿kap壇ê中間ê。Tì-kàu tōe-chiūⁿ só͘ lâu gī lâng ê huih, lóng kui tī lín, chiū-sī tùi gī lâng A-pek ê huih kàu Pa-lia̍p-ka ê kiáⁿ Sat-ka-lī-a ê huih, i sī lín só͘ thâi tī tiān kap tôaⁿ ê tiong-kan ê.

36我實在kā lín講，Chiah-ê事lóng beh歸tī chit代。Góa si̍t-chāi kā lín kóng, Chiah ê sū lóng beh kui tī chit tāi.

37耶路撒冷ah！耶路撒冷ah！就是thâi死先知人，用石頭tìm奉差到tī伊ê；我jōa chōe pái ài聚集你ê kiáⁿ兒，親像雞母聚集伊ê雞á tī翼(si̍t)下；但是lín m̄ ài。Iâ-lō͘-sat-léng ah! Iâ-lō͘-sat-léng ah! chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê; góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; nā-sī lín m̄ ài.

38你看！lín ê厝beh拋荒，留teh hō͘ lín。Lí khòaⁿ! lín ê chhù beh pha-hng, lâu-teh hō͘ lín.

39因為我kā lín講，Taⁿ了後，lín無看見我；thèng候lín講，Tī主ê名來ê，得tio̍h福氣。In-ūi góa kā lín kóng, Taⁿ liáu-āu, lín bô khòaⁿ-kìⁿ góa; thèng-hāu lín kóng, Tī Chú ê miâ lâi ê, tit-tio̍h hok-khì.

1耶穌出殿，tú teh行，伊ê學生就近伊，用殿堂hiah-ê厝報伊看。Iâ-so͘ chhut tiān, tú teh kiâⁿ, I ê ha̍k-seng chiū-kūn I, ēng tiān-tn̂g hiah ê chhù pò I khòaⁿ.

2但是伊應講，Lín無看見chiah-ê mah？我實在kā lín講，Tī chia beh無一塊石留tī石頂，也無chhia落去。Nā-sī I ìn kóng, Lín bô khòaⁿ-kìⁿ chiah ê mah? góa si̍t-chāi kā lín kóng, Tī chia beh bô chi̍t tè chio̍h lâu tī chio̍h téng, iā bô chhia-lo̍h-khì.

3耶穌坐tī橄欖山ê時，學生su-khia就近伊講，請kā阮講，tī時有chiah-ê tāi-chì？也你koh來，kap世界ê結局有甚麼兆頭？Iâ-so͘ chē tī Kaⁿ-ná soaⁿ ê sî, ha̍k-seng su-khia chiū-kūn I kóng, Chhiáⁿ kā goán kóng, tī-sî ū chiah ê tāi-chì? iā lí koh lâi, kap sè-kài ê kiat-kio̍k ū sím-mi̍h tiāu-thâu?

4耶穌應講，Tio̍h謹慎，莫得hō͘人迷惑。Iâ-so͘ ìn kóng, Tio̍h kín-sīn, bo̍h-tit hō͘ lâng bê-he̍k.

5因為beh有chōe-chōe人tī我ê名來，講，我是基督，來迷惑chōe-chōe人。In-ūi beh ū chōe-chōe lâng tī góa ê miâ lâi, kóng, Góa sī Ki-tok, lâi bê-he̍k chōe-chōe lâng.

6Lín beh聽見交戰kap交戰ê風聲，謹慎莫得驚；因為chiah-ê的確有，總是末期iáu-bē到。Lín beh thiaⁿ-kìⁿ kau-chiàn kap kau-chiàn ê hong-siaⁿ, kín-sīn bo̍h-tit kiaⁿ; in-ūi chiah-ê tek-khak ū, chóng-sī boa̍t-kî iáu-bē kàu.

7因為百姓 beh起來攻擊百姓 ，國起來攻擊國；chōe-chōe所在beh有飢荒、地動。In-ūi peh-sìⁿ beh khí-lâi kong-kek peh-sìⁿ, kok beh khí-lâi kong-kek kok; chōe-chōe só͘-chāi beh ū ki-hng, tōe-tāng.

8Chiah-ê lóng是苦痛ê起頭。Chiah-ê lóng sī khó͘-thàng ê khí-thâu.

9Hit時人beh交付lín tī患難，thâi死lín。Lín因為我ê名beh hō͘萬邦怨恨。Hit sî lâng beh kau-hù lín tī hoān-lān, thâi-sí lín. Lín in-ūi góa ê miâ beh hō͘ bān pang oàn-hūn.

10也hit時chōe-chōe人beh受塞礙，saⁿ解送，saⁿ怨恨。Iā hit sî chōe-chōe lâng beh siū that-gāi, saⁿ ké-sàng, saⁿ oàn-hūn.

11Koh有chōe-chōe假先知beh起來迷惑chōe-chōe人。Koh ū chōe-chōe ké sian-ti beh khí-lâi bê-he̍k chōe-chōe lâng.

12因為不法大大加添，chōe-chōe人ê疼漸漸冷淡。In-ūi put-hoat tōa-tōa ke-thiⁿ, chōe-chōe lâng ê thiàⁿ chiām-chiām léng-tām.

13獨獨吞忍到路尾ê，伊會得tio̍h救。To̍k-to̍k thun-lún kàu lō͘-bé ê, i ōe tit-tio̍h kiù.

14Chit-ê天國ê福音beh傳到thong天下，做干證tī萬邦；hit時末期就到。Chit ê thian-kok ê hok-im beh thoân kàu thong thiⁿ-ē, chòe kan-chèng tī bān pang; hit sî boa̍t-kî chiū kàu.

15所以lín看見早託先知但以理所講，hit-ê殘害可惡ê khiā tī聖ê所在，(讀ê人tio̍h曉悟) ，Só͘-í lín khòaⁿ-kìⁿ chá thok sian-ti Tàn-í-lí só͘ kóng, hit ê chân-hāi khó-ò͘ⁿ ê khiā tī sèng ê só͘-chāi, (tha̍k ê lâng tio̍h hiáu-ngō͘),

16hit時tī猶太ê tio̍h走去山裡；hit sî tī Iû-thài ê tio̍h cháu-khì soaⁿ-ni̍h;

17tī厝頂ê莫得落來the̍h伊家內ê物；tī chhù-téng ê bo̍h-tit lo̍h-lâi the̍h i ke-lāi ê mi̍h;

18tī園裡ê莫得tò去hiaⁿh伊ê衫。tī hn̂g-ni̍h ê bo̍h-tit tò-khì hiaⁿh i ê saⁿ.

19當hiah-ê日，有身孕kap hō͘嬰á食奶ê婦人人有災禍ah！Tng hiah ê ji̍t, ū sin-īn kap hō͘ eⁿ-á chia̍h lin ê hū-jîn-lâng ū chai-ē ah!

20Lín tio̍h祈禱，免得lín ê逃走tī冬天時，á是安歇日。Lín tio̍h kî-tó, bián-tit lín ê tô-cháu tī tang-thiⁿ sî, á-sī an-hioh-ji̍t.

21因為hit時beh有大患難，tùi世間ê起頭到taⁿ bē bat有án-ni；後來也決斷無。In-ūi hit sî beh ū tōa hoān-lān, tùi sè-kan ê khí-thâu kàu taⁿ bē bat ū án-ni; āu-lâi iā koat-toàn bô.

22若無減少hiah-ê日，就凡有肉體ê無一個得救，獨獨為tio̍h揀ê百姓 ，hiah-ê日beh減少。Nā bô kiám-chió hiah ê ji̍t, chiū hoān ū jio̍k-thé ê bô chi̍t-ê tit kiù, to̍k-to̍k ūi-tio̍h kéng ê peh-sìⁿ, hiah ê ji̍t beh kiám-chió.

23Hit時若有人kā lín講，你看，基督tī chia，á是講，Tī hia，lín莫得信。Hit sî nā ū lâng kā lín kóng, Lí khòaⁿ, Ki-tok tī chia, á-sī kóng, Tī hia, lín bo̍h-tit sìn.

24因為beh有假基督、假先知起來行大ê神蹟kap兆頭；beh是會，連揀ê百姓也迷惑伊。In-ūi beh ū ké Ki-tok, ké sian-ti khí-lâi kiâⁿ tōa ê sîn-jiah kap tiāu-thâu; beh sī ōe, liân kéng ê peh-sìⁿ iā bê-he̍k i.

25我已經事先kā lín講。Góa í-keng tāi-seng kā lín kóng.

26所以人若kā lín講，你看，伊是tī曠野，lín莫得出去；á是講，你看，伊是tī密厝，lín莫得信。Só͘-í lâng nā kā lín kóng, Lí khòaⁿ, I sī tī khòng-iá, lín bo̍h-tit chhut-khì; á-sī kóng, Lí khòaⁿ, I sī tī ba̍t chhù, lín bo̍h-tit sìn.

27因為親像sih-nà tùi東勢teh sih，若到西勢，人子ê koh來也beh án-ni。In-ūi chhin-chhiūⁿ sih-nà tùi tang-sì teh sih, nā kàu sai-sì, Jîn-chú ê koh lâi iā beh án-ni.

28身屍若tī hia，鷹鳥也beh聚集tī hia。Sin-si nā tī hia, eng-chiáu iā beh chū-chi̍p tī hia.

29Tú-tú chiah-ê日ê患難了後，日beh烏暗，月無出光，星tùi天ka-la̍uh，天上振動。Tú-tú chiah ê ji̍t ê hoān-lān liáu-āu, ji̍t beh o͘-àm, ge̍h bô chhut kng, chhiⁿ tùi thiⁿ ka-la̍uh, thiⁿ-siōng tín-tāng.

30Hit時人子ê兆頭beh出現tī天裡；tī地裡chiah-ê族類lóng beh啼哭，也beh看見人子用權能kap大榮光坐天 ê雲臨到。Hit sî Jîn-chú ê tiāu-thâu beh chhut-hiān tī thiⁿ-ni̍h; tī tōe-ni̍h chiah ê cho̍k-lūi lóng beh thî-khàu, iā beh khòaⁿ-kìⁿ Jîn-chú ēng koân-lêng kap tōa êng-kng chē thiⁿ ê hûn lîm-kàu.

31伊beh差伊ê天使，用號頭響亮ê聲，in beh tùi四方chit pêng ê天邊到hit pêng ê天邊，聚集伊所揀ê百姓I beh chhe I ê thiⁿ-sài, ēng hō-thâu hiáng-liāng ê siaⁿ, in beh tùi sì-hng chit pêng ê thiⁿ-piⁿ kàu hit pêng ê thiⁿ-piⁿ, chū-chi̍p I só͘ kéng ê peh-sìⁿ.

32Lín tio̍h tùi無花果樹取譬喻；當伊枝軟葉發ê時，就知夏天近lah。Lín tio̍h tùi bû-hoa-kó chhiū chhú phì-jū; tng i ki nńg hio̍h hoat ê sî, chiū chai hē-thiⁿ kūn lah.

33Án-ni，lín看lóng總chiah-ê事，就知已經近，到門口lah。Án-ni, lín khòaⁿ lóng-chóng chiah ê sū, chiū chai í-keng kūn, kàu mn̂g-kháu lah.

34我實在kā lín講，Chit世代決斷bē過去，到chiah-ê tāi-chì lóng成。Góa si̍t-chāi kā lín kóng, Chit sè-tāi koat-toàn bē kè-khì, kàu chiah ê tāi-chì lóng chiâⁿ.

35天kap地beh廢無，我ê話bōe廢無。Thiⁿ kap tōe beh hòe-bô, góa ê ōe bōe hòe-bô.

36但是論hit日、hit時，人m̄知，天使也m̄知，Kiáⁿ也m̄知，獨獨父知nā-tiāⁿ。Nā-sī lūn hit ji̍t, hit sî, lâng m̄ chai, thiⁿ-sài iā m̄ chai, Kiáⁿ iā m̄ chai, to̍k-to̍k Pē chai nā-tiāⁿ.

37Koh親像挪亞ê日，人子ê koh來也beh án-ni。Koh chhin-chhiūⁿ Ná-a ê ji̍t, Jîn-chú ê koh lâi iā beh án-ni.

38因為大水ê事先hiah-ê日，人teh lim食、嫁娶，到挪亞入大船ê日，In-ūi tōa chúi ê tāi-seng hiah ê ji̍t, lâng teh lim-chia̍h, kè-chhōa, kàu Ná-a ji̍p tōa chûn ê ji̍t,

39in竟然m̄知，到大水到，一盡滅in，人子ê koh來也beh án-ni。in kèng-jiân m̄ chai, kàu tōa chúi kàu, it-chīn bia̍t in, Jîn-chú ê koh lâi iā beh án-ni.

40Hit時beh有兩人tī園裡，一個取去，一個放teh。Hit sî beh ū nn̄g lâng tī hn̂g-ni̍h, chi̍t-ê chhú-khì, chi̍t-ê pàng-teh.

41兩個婦人人挨磨，一個取去，一個放teh。Nn̄g ê hū-jîn-lâng oe bō, chi̍t-ê chhú-khì, chi̍t-ê pàng-teh.

42所以tio̍h tiuⁿ-tî，因為lín m̄知lín ê主甚麼日beh來。Só͘-í tio̍h tiuⁿ-tî, in-ūi lín m̄ chai lín ê Chú sím-mi̍h ji̍t beh lâi.

43家主若知賊甚麼更beh到，伊就tiuⁿ-tî，無容允人iah孔伊ê厝，這是lín所知。Ke-chú nā chai chha̍t sím-mi̍h kiⁿ beh kàu, i chiū tiuⁿ-tî, bô iông-ún lâng iah khang i ê chhù, che sī lín só͘ chai.

44所以lín亦tio̍h備辦便；因為lín無phah算ê時，人子來lah。Só͘-í lín ia̍h tio̍h pī-pān piān; in-ūi lín bô phah-sǹg ê sî, Jîn-chú lâi lah.

45Chī-chūi是盡忠智慧ê奴僕，主人所設立來管伊家內ê人，thang照時pun米糧hō͘ in。Chī-chūi sī chīn-tiong tì-hūi ê lô͘-po̍k, chú-lâng só͘ siat-li̍p lâi koán i ke-lāi ê lâng, thang chiàu sî pun bí-niû hō͘ in.

46主人來，tú-tio̍h伊án-ni行，hit-ê奴僕有福氣。Chú-lâng lâi, tú-tio̍h i án-ni kiâⁿ, hit ê lô͘-po̍k ū hok-khì.

47我實在kā lín講，主人beh設立伊來管伊一切所有ê。Góa si̍t-chāi kā lín kóng, chú-lâng beh siat-li̍p i lâi koán i it-chhè só͘ ū ê.

48獨獨hit-ê pháiⁿ ê奴僕，若心內講，我ê主人teh 延chhiân；To̍k-to̍k hit ê pháiⁿ ê lô͘-po̍k, nā sim-lāi kóng, Góa ê chú-lâng teh iân-chhiân;

49就phah hiah-ê kap伊同做奴僕ê，koh kap醉漢saⁿ-kap lim食，chiū phah hiah-ê kap i tâng chòe lô͘-po̍k ê, koh kap chùi-hàn saⁿ-kap lim-chia̍h,

50就tī無phài-phe ê日，m̄知ê時，hit-ê奴僕ê主人beh到。chiū tī bô phài-phe ê ji̍t, m̄ chai ê sî, hit ê lô͘-po̍k ê chú-lâng beh kàu.

51重重刑罰伊，chhú-tī伊kap假好ê人平等，tī hia beh有啼哭咬牙切齒。tāng-tāng hêng-hoa̍t i, chhú-tī i kap ké-hó ê lâng pîⁿ-téng, tī hia beh ū thî-khàu kā-gê chhiat-chhí.

1Hit時天國beh比並十個在室女，kia̍h in ê燈，出去迎接新kiáⁿ婿。Hit sî thian-kok beh pí-phēng cha̍p ê chāi-sek-lú, kia̍h in ê teng, chhut-khì ngiâ-chih sin-kiáⁿ-sài.

2其中五個戇ê，五個知識ê。Kî-tiong gō͘-ê gōng ê, gō͘ -ê tì-sek ê.

3戇ê kia̍h in ê燈，無另外帶油。Gōng ê kia̍h in ê teng, bô lēng-gōa tòa iû.

4獨獨知識ê kia̍h in ê燈另外帶油tī in ê器具內。To̍k-to̍k tì-sek ê kia̍h in ê teng lēng-gōa tòa iû tī in ê khì-kū lāi.

5新kiáⁿ婿延chhiân，就lóng tuh-ka-chē teh睏。Sin-kiáⁿ-sài iân-chhiân, chiū lóng tuh-ka-chē teh khùn.

6半暝，有大聲叫講，新kiáⁿ婿來lah；lín出來chih伊。Pòaⁿ mî, ū tōa siaⁿ kiò kóng, Sin-kiáⁿ-sài lâi lah; lín chhut-lâi chih i.

7Hit時chiah-ê在室女lóng起來，修整in ê燈。Hit sî chiah ê chāi-sek-lú lóng khí-lâi, siu-chéng in ê teng.

8戇ê kā知識ê講，請將lín ê油pun阮，因為阮ê燈beh hoa lah。Gōng ê kā tì-sek ê kóng, chhiáⁿ chiong lín ê iû pun goán, in-ūi goán ê teng beh hoa lah.

9知識ê應講，驚了lín阮lóng無夠；khah好去tùi賣ê人家己買。Tì-sek ê ìn kóng, Kiaⁿ-liáu lín goán lóng bô kàu; khah hó khì tùi bōe ê lâng ka-kī bóe.

10去買ê時，新kiáⁿ婿到，hiah-ê便ê kap伊入婚姻ê筵桌；門就關。Khì bóe ê sî, sin-kiáⁿ-sài kàu, hiah ê piān-ê kap i ji̍p hun-in ê iân-toh; mn̂g chiū koaiⁿ.

11然後其餘ê在室女亦來，講，主ah，主ah，kā阮開。Jiân-āu kî-û ê chāi-sek-lú ia̍h lâi, kóng, Chú ah, Chú ah, kā goán khui.

12但是伊應講，我實在kā lín講，我m̄-bat lín。Nā-sī i ìn kóng, Góa si̍t-chāi kā lín kóng, Góa m̄ bat lín.

13所以tio̍h tiuⁿ-tî，因為lín m̄知hit-ê日，hit-ê時。Só͘-í tio̍h tiuⁿ-tî, in-ūi lín m̄ chai hit ê ji̍t, hit ê sî.

14因為親像一人beh去外國；就召伊家己ê奴僕將所有ê交代in。In-ūi chhin-chhiūⁿ chi̍t lâng beh khì gōa-kok; chiū tiàu i ka-kī ê lô͘-po̍k chiong só͘ ū ê kau-tāi in.

15一個hō͘伊銀五千，一個hō͘伊兩千，一個hō͘伊一千；各照in ê châi-tiāu；就去外國。Chi̍t-ê hō͘ i gûn gō͘ chheng, chi̍t-ê hō͘ i nn̄g chheng, chi̍t-ê hō͘ i chi̍t chheng; kok chiàu in ê châi-tiāu; chiū khì gōa-kok.

16領五千ê，隨時去做seng-lí，koh thàn五千。Niá gō͘ chheng ê, sûi-sî khì chòe seng-lí, koh thàn gō͘ chheng.

17領兩千ê亦是án-ni，koh thàn兩千。Niá nn̄g chheng ê ia̍h sī án-ni, koh thàn nn̄g chheng.

18獨獨hit-ê領一千ê去，就掘地，來khǹg密伊ê主人ê銀。To̍k-to̍k hit-ê niá chi̍t chheng ê khì, chiū ku̍t tōe, lâi khǹg-ba̍t i ê chú-lâng ê gûn.

19過久久，chiah-ê奴僕ê主人到，kap in算賬。Kè kú-kú chiah ê lô͘-po̍k ê chú-lâng kàu, kap in sǹg-siàu.

20領五千ê來，koh帶五千，講，主ah，你交代我五千；你看，我有koh thàn五千。Niá gō͘ chheng ê lâi, koh tòa gō͘ chheng, kóng, Chú ah, lí kau-tāi góa gō͘ chheng; lí khòaⁿ, góa ū koh thàn gō͘ chheng.

21伊ê主人kā伊講，好ah，好koh盡忠ê奴僕，你tī少(chió)ê已經盡忠，我beh設立你來管chōe-ê；thang入你ê主人ê快樂。I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-li̍p lí lâi koán chōe-ê; thang ji̍p lí ê chú-lâng ê khoài-lo̍k.

22領兩千ê亦來，講，主ah，你交代我兩千；你看，我有koh thàn兩千。Niá nn̄g chheng ê ia̍h lâi, kóng, Chú ah, lí kau-tāi góa nn̄g chheng; lí khòaⁿ, góa ū koh thàn nn̄g chheng.

23伊ê主人kā伊講，好ah，好koh盡忠ê奴僕，你tī少ê已經盡忠，我beh設立你來管chōe-ê；thang入你ê主人ê快樂。I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-li̍p lí lâi koán chōe-ê; thang ji̍p lí ê chú-lâng ê khoài-lo̍k.

24領一千ê亦來，講，主ah，我知你是嚴核(ha̍t)ê人；bē掖ê所在，就beh收割；bē分散ê所在，就beh拾做堆。Niá chi̍t chheng ê ia̍h lâi, kóng, Chú ah, góa chai lí sī giâm-ha̍t ê lâng; bē iā ê só͘-chāi, chiū beh siu-koah; bē hun-sòaⁿ ê só͘-chāi, chiū beh khioh chòe tui.

25所以我驚，就將你一千銀去tâi tī地裡；taⁿ你ê原物還你。Só͘-í góa kiaⁿ, chiū chiong lí chi̍t chheng gûn khì tâi tī tōe-ni̍h; taⁿ lí ê goân-mi̍h hêng lí.

26伊ê主人就應伊講，Pháiⁿ koh pîn-tōaⁿ ê奴僕ah，你既然知我bē掖ê所在，就beh收割，bē分散ê所在，就beh拾做堆。I ê chú-lâng chiū ìn i kóng, Pháiⁿ koh pîn-tōaⁿ ê lô͘-po̍k ah, lí kì-jiân chai góa bē iā ê só͘-chāi, chiū beh siu-koah, bē hun-sòaⁿ ê só͘-chāi, chiū beh khioh chòe tui.

27就tio̍h將我ê銀hē tī錢店；我來ê時thang得tio̍h我ê本銀kap利息。Chiū tio̍h chiong góa ê gûn hē tī chîⁿ-tiàm; góa lâi ê sî thang tit-tio̍h góa ê pún-gûn kap lī-sek.

28所以tio̍h tùi伊the̍h hit一千，來hō͘ hit-ê有十千ê。Só͘-í tio̍h tùi i the̍h hit chi̍t chheng, lâi hō͘ hit ê ū cha̍p chheng ê.

29因為見若有ê，beh hō͘伊，hō͘伊有chhun；無ê，連伊所有ê，亦beh the̍h伊。In-ūi kìⁿ-nā ū ê, beh hō͘ i, hō͘ i ū chhun; bô ê, liân i só͘ ū ê, ia̍h beh the̍h i.

30亦hit-ê無利益ê奴僕，趕伊tī外面烏暗ê所在；tī hia beh有啼哭，咬牙切齒。Ia̍h hit ê bô lī-ek ê lô͘-po̍k, kóaⁿ i tī gōa-bīn o͘-àm ê só͘-chāi; tī hia beh ū thî-khàu, kā-gê chhiat-chhí.

31當人子tī伊ê榮光，kap lóng總ê天使來ê時，伊beh坐伊榮光ê座位，Tng Jîn-chú tī I ê êng-kng, kap lóng-chóng ê thiⁿ-sài lâi ê sî, I beh chē I êng-kng ê chō-ūi,

32聚集萬邦tī伊ê面前；伊就beh分別in，親像牧者分別綿羊離開山羊。chū-chi̍p bān pang tī I ê bīn-chêng; I chiū beh hun-piat in, chhin-chhiūⁿ bo̍k-chiá hun-piat mî-iûⁿ lī-khui soaⁿ-iûⁿ.

33將綿羊hē tī伊ê chiàⁿ-pêng，山羊hē tī伊ê tò-pêng。Chiong mî-iûⁿ hē tī I ê chiàⁿ-pêng, soaⁿ-iûⁿ hē tī I ê tò-pêng.

34Hit時王beh kā chiàⁿ-pêng ê講，Lín tùi我ê父得tio̍h恩典ê，進前來承接國，就是tùi創造世間以來kā lín備辦ê。Hit sî Ông beh kā chiàⁿ-pêng ê kóng, Lín tùi góa ê Pē tit-tio̍h un-tián ê, chìn-chêng lâi sêng-chiap kok, chiū-sī tùi chhòng-chō sè-kan í-lâi kā lín pī-pān ê.

35因為我iau，Lín bat hō͘我食；我嘴乾，lín hō͘我lim；我出外，lín hō͘我tòa；我thǹg-pak-theh，lín hō͘我穿；In-ūi góa iau, lín bat hō͘ góa chia̍h; góa chhùi-ta, lín hō͘ góa lim; góa chhut-gōa, lín hō͘ góa tòa; góa thǹg-pak-theh, lín hō͘ góa chhēng;

36我破病，lín看顧我；我tī監裡，lín來chhē我。góa phòa-pīⁿ, lín khòaⁿ-kò͘ góa; góa tī kaⁿ-ni̍h, lín lâi chhē góa.

37Hit時義人beh應伊講，主ah，阮甚麼時看見你iau，來hō͘你食？嘴乾，來hō͘你lim？Hit sî gī lâng beh ìn I kóng, Chú ah, goán sím-mi̍h sî khòaⁿ-kìⁿ lí iau, lâi hō͘ lí chia̍h? chhùi-ta, lâi hō͘ lí lim?

38甚麼時看見你出外，來hō͘你tòa？thǹg-pak-theh，來hō͘你穿？Sím-mi̍h sî khòaⁿ-kìⁿ lí chhut-gōa, lâi hō͘ lí tòa? thǹg-pak-theh, lâi hō͘ lí chhēng?

39甚麼時看見你破病，á是tī監裡，來chhē你？Sím-mi̍h sî khòaⁿ-kìⁿ lí phòa-pīⁿ, á-sī tī kaⁿ-ni̍h, lâi chhē lí?

40王beh應伊講，我實在kā lín講，Lín既然行伊tī我ê兄弟至微細ê ê一個，就是行伊tī我。Ông beh ìn i kóng, Góa si̍t-chāi kā lín kóng, Lín kì-jiân kiâⁿ i tī góa ê hiaⁿ-tī chì-bî-sòe ê ê chi̍t-ê, chiū-sī kiâⁿ i tī góa.

41Koh beh kā tò-pêng ê講，Lín受咒詛 ê，tio̍h離開我，入永遠ê火，就是為tio̍h魔鬼kap伊chiah-ê使者所備辦ê。Koh beh kā tò-pêng ê kóng, Lín siū chiù-chó͘ ê, tio̍h lī-khui góa, ji̍p éng-oán ê hé, chiū-sī ūi-tio̍h Mô͘-kúi kap i chiah ê sù-chiá só͘ pī-pān ê.

42因為我iau，lín m̄-bat hō͘我食；我嘴乾，lín m̄-bat hō͘我lim；我出外，lín m̄-bat hō͘我tòa；In-ūi góa iau, lín m̄ bat hō͘ góa chia̍h; góa chhùi-ta, lín m̄ bat hō͘ góa lim; góa chhut-gōa, lín m̄ bat hō͘ góa tòa;

43我thǹg-pak-theh，lín m̄-bat hō͘我穿；我破病kap tī監裡，lín m̄-bat看顧我。góa thǹg-pak-theh, lín m̄ bat hō͘ góa chhēng; góa phòa-pīⁿ kap tī kaⁿ-ni̍h, lín m̄ bat khòaⁿ-kò͘ góa.

44In亦beh應講，主ah，阮甚麼時看見你iau，á是嘴乾，á是出外，á是thǹg-pak-theh，á是破病，á是tī監裡，來無服事你ah？In ia̍h beh ìn kóng, Chú ah, goán sím-mi̍h sî khòaⁿ-kìⁿ lí iau, á-sī chhùi-ta, á-sī chhut-gōa, á-sī thǹg-pak-theh, á-sī phòa-pīⁿ, á-sī tī kaⁿ-ni̍h, lâi bô ho̍k-sāi lí ah?

45伊就beh應伊講，我實在kā lín講，Lín既然無行伊tī chiah-ê至微細ê ê一個，就是無行伊tī我。I chiū beh ìn i kóng, Góa si̍t-chāi kā lín kóng, Lín kì-jiân bô kiâⁿ i tī chiah ê chì-bî-sòe ê ê chi̍t ê, chiū-sī bô kiâⁿ i tī góa.

46Chiah-ê人beh去入永遠ê刑罰；但是義ê人入永遠活。Chiah ê lâng beh khì ji̍p éng-oán ê hêng-hoa̍t; nā-sī gī ê lâng ji̍p éng-oán oa̍h.