1Hit時天國beh比並十個在室女，kia̍h in ê燈，出去迎接新kiáⁿ婿。Hit sî thian-kok beh pí-phēng cha̍p ê chāi-sek-lú, kia̍h in ê teng, chhut-khì ngiâ-chih sin-kiáⁿ-sài.

2其中五個戇ê，五個知識ê。Kî-tiong gō͘-ê gōng ê, gō͘ -ê tì-sek ê.

3戇ê kia̍h in ê燈，無另外帶油。Gōng ê kia̍h in ê teng, bô lēng-gōa tòa iû.

4獨獨知識ê kia̍h in ê燈另外帶油tī in ê器具內。To̍k-to̍k tì-sek ê kia̍h in ê teng lēng-gōa tòa iû tī in ê khì-kū lāi.

5新kiáⁿ婿延chhiân，就lóng tuh-ka-chē teh睏。Sin-kiáⁿ-sài iân-chhiân, chiū lóng tuh-ka-chē teh khùn.

6半暝，有大聲叫講，新kiáⁿ婿來lah；lín出來chih伊。Pòaⁿ mî, ū tōa siaⁿ kiò kóng, Sin-kiáⁿ-sài lâi lah; lín chhut-lâi chih i.

7Hit時chiah-ê在室女lóng起來，修整in ê燈。Hit sî chiah ê chāi-sek-lú lóng khí-lâi, siu-chéng in ê teng.

8戇ê kā知識ê講，請將lín ê油pun阮，因為阮ê燈beh hoa lah。Gōng ê kā tì-sek ê kóng, chhiáⁿ chiong lín ê iû pun goán, in-ūi goán ê teng beh hoa lah.

9知識ê應講，驚了lín阮lóng無夠；khah好去tùi賣ê人家己買。Tì-sek ê ìn kóng, Kiaⁿ-liáu lín goán lóng bô kàu; khah hó khì tùi bōe ê lâng ka-kī bóe.

10去買ê時，新kiáⁿ婿到，hiah-ê便ê kap伊入婚姻ê筵桌；門就關。Khì bóe ê sî, sin-kiáⁿ-sài kàu, hiah ê piān-ê kap i ji̍p hun-in ê iân-toh; mn̂g chiū koaiⁿ.

11然後其餘ê在室女亦來，講，主ah，主ah，kā阮開。Jiân-āu kî-û ê chāi-sek-lú ia̍h lâi, kóng, Chú ah, Chú ah, kā goán khui.

12但是伊應講，我實在kā lín講，我m̄-bat lín。Nā-sī i ìn kóng, Góa si̍t-chāi kā lín kóng, Góa m̄ bat lín.

13所以tio̍h tiuⁿ-tî，因為lín m̄知hit-ê日，hit-ê時。Só͘-í tio̍h tiuⁿ-tî, in-ūi lín m̄ chai hit ê ji̍t, hit ê sî.

14因為親像一人beh去外國；就召伊家己ê奴僕將所有ê交代in。In-ūi chhin-chhiūⁿ chi̍t lâng beh khì gōa-kok; chiū tiàu i ka-kī ê lô͘-po̍k chiong só͘ ū ê kau-tāi in.

15一個hō͘伊銀五千，一個hō͘伊兩千，一個hō͘伊一千；各照in ê châi-tiāu；就去外國。Chi̍t-ê hō͘ i gûn gō͘ chheng, chi̍t-ê hō͘ i nn̄g chheng, chi̍t-ê hō͘ i chi̍t chheng; kok chiàu in ê châi-tiāu; chiū khì gōa-kok.

16領五千ê，隨時去做seng-lí，koh thàn五千。Niá gō͘ chheng ê, sûi-sî khì chòe seng-lí, koh thàn gō͘ chheng.

17領兩千ê亦是án-ni，koh thàn兩千。Niá nn̄g chheng ê ia̍h sī án-ni, koh thàn nn̄g chheng.

18獨獨hit-ê領一千ê去，就掘地，來khǹg密伊ê主人ê銀。To̍k-to̍k hit-ê niá chi̍t chheng ê khì, chiū ku̍t tōe, lâi khǹg-ba̍t i ê chú-lâng ê gûn.

19過久久，chiah-ê奴僕ê主人到，kap in算賬。Kè kú-kú chiah ê lô͘-po̍k ê chú-lâng kàu, kap in sǹg-siàu.

20領五千ê來，koh帶五千，講，主ah，你交代我五千；你看，我有koh thàn五千。Niá gō͘ chheng ê lâi, koh tòa gō͘ chheng, kóng, Chú ah, lí kau-tāi góa gō͘ chheng; lí khòaⁿ, góa ū koh thàn gō͘ chheng.

21伊ê主人kā伊講，好ah，好koh盡忠ê奴僕，你tī少(chió)ê已經盡忠，我beh設立你來管chōe-ê；thang入你ê主人ê快樂。I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-li̍p lí lâi koán chōe-ê; thang ji̍p lí ê chú-lâng ê khoài-lo̍k.

22領兩千ê亦來，講，主ah，你交代我兩千；你看，我有koh thàn兩千。Niá nn̄g chheng ê ia̍h lâi, kóng, Chú ah, lí kau-tāi góa nn̄g chheng; lí khòaⁿ, góa ū koh thàn nn̄g chheng.

23伊ê主人kā伊講，好ah，好koh盡忠ê奴僕，你tī少ê已經盡忠，我beh設立你來管chōe-ê；thang入你ê主人ê快樂。I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-li̍p lí lâi koán chōe-ê; thang ji̍p lí ê chú-lâng ê khoài-lo̍k.

24領一千ê亦來，講，主ah，我知你是嚴核(ha̍t)ê人；bē掖ê所在，就beh收割；bē分散ê所在，就beh拾做堆。Niá chi̍t chheng ê ia̍h lâi, kóng, Chú ah, góa chai lí sī giâm-ha̍t ê lâng; bē iā ê só͘-chāi, chiū beh siu-koah; bē hun-sòaⁿ ê só͘-chāi, chiū beh khioh chòe tui.

25所以我驚，就將你一千銀去tâi tī地裡；taⁿ你ê原物還你。Só͘-í góa kiaⁿ, chiū chiong lí chi̍t chheng gûn khì tâi tī tōe-ni̍h; taⁿ lí ê goân-mi̍h hêng lí.

26伊ê主人就應伊講，Pháiⁿ koh pîn-tōaⁿ ê奴僕ah，你既然知我bē掖ê所在，就beh收割，bē分散ê所在，就beh拾做堆。I ê chú-lâng chiū ìn i kóng, Pháiⁿ koh pîn-tōaⁿ ê lô͘-po̍k ah, lí kì-jiân chai góa bē iā ê só͘-chāi, chiū beh siu-koah, bē hun-sòaⁿ ê só͘-chāi, chiū beh khioh chòe tui.

27就tio̍h將我ê銀hē tī錢店；我來ê時thang得tio̍h我ê本銀kap利息。Chiū tio̍h chiong góa ê gûn hē tī chîⁿ-tiàm; góa lâi ê sî thang tit-tio̍h góa ê pún-gûn kap lī-sek.

28所以tio̍h tùi伊the̍h hit一千，來hō͘ hit-ê有十千ê。Só͘-í tio̍h tùi i the̍h hit chi̍t chheng, lâi hō͘ hit ê ū cha̍p chheng ê.

29因為見若有ê，beh hō͘伊，hō͘伊有chhun；無ê，連伊所有ê，亦beh the̍h伊。In-ūi kìⁿ-nā ū ê, beh hō͘ i, hō͘ i ū chhun; bô ê, liân i só͘ ū ê, ia̍h beh the̍h i.

30亦hit-ê無利益ê奴僕，趕伊tī外面烏暗ê所在；tī hia beh有啼哭，咬牙切齒。Ia̍h hit ê bô lī-ek ê lô͘-po̍k, kóaⁿ i tī gōa-bīn o͘-àm ê só͘-chāi; tī hia beh ū thî-khàu, kā-gê chhiat-chhí.

31當人子tī伊ê榮光，kap lóng總ê天使來ê時，伊beh坐伊榮光ê座位，Tng Jîn-chú tī I ê êng-kng, kap lóng-chóng ê thiⁿ-sài lâi ê sî, I beh chē I êng-kng ê chō-ūi,

32聚集萬邦tī伊ê面前；伊就beh分別in，親像牧者分別綿羊離開山羊。chū-chi̍p bān pang tī I ê bīn-chêng; I chiū beh hun-piat in, chhin-chhiūⁿ bo̍k-chiá hun-piat mî-iûⁿ lī-khui soaⁿ-iûⁿ.

33將綿羊hē tī伊ê chiàⁿ-pêng，山羊hē tī伊ê tò-pêng。Chiong mî-iûⁿ hē tī I ê chiàⁿ-pêng, soaⁿ-iûⁿ hē tī I ê tò-pêng.

34Hit時王beh kā chiàⁿ-pêng ê講，Lín tùi我ê父得tio̍h恩典ê，進前來承接國，就是tùi創造世間以來kā lín備辦ê。Hit sî Ông beh kā chiàⁿ-pêng ê kóng, Lín tùi góa ê Pē tit-tio̍h un-tián ê, chìn-chêng lâi sêng-chiap kok, chiū-sī tùi chhòng-chō sè-kan í-lâi kā lín pī-pān ê.

35因為我iau，Lín bat hō͘我食；我嘴乾，lín hō͘我lim；我出外，lín hō͘我tòa；我thǹg-pak-theh，lín hō͘我穿；In-ūi góa iau, lín bat hō͘ góa chia̍h; góa chhùi-ta, lín hō͘ góa lim; góa chhut-gōa, lín hō͘ góa tòa; góa thǹg-pak-theh, lín hō͘ góa chhēng;

36我破病，lín看顧我；我tī監裡，lín來chhē我。góa phòa-pīⁿ, lín khòaⁿ-kò͘ góa; góa tī kaⁿ-ni̍h, lín lâi chhē góa.

37Hit時義人beh應伊講，主ah，阮甚麼時看見你iau，來hō͘你食？嘴乾，來hō͘你lim？Hit sî gī lâng beh ìn I kóng, Chú ah, goán sím-mi̍h sî khòaⁿ-kìⁿ lí iau, lâi hō͘ lí chia̍h? chhùi-ta, lâi hō͘ lí lim?

38甚麼時看見你出外，來hō͘你tòa？thǹg-pak-theh，來hō͘你穿？Sím-mi̍h sî khòaⁿ-kìⁿ lí chhut-gōa, lâi hō͘ lí tòa? thǹg-pak-theh, lâi hō͘ lí chhēng?

39甚麼時看見你破病，á是tī監裡，來chhē你？Sím-mi̍h sî khòaⁿ-kìⁿ lí phòa-pīⁿ, á-sī tī kaⁿ-ni̍h, lâi chhē lí?

40王beh應伊講，我實在kā lín講，Lín既然行伊tī我ê兄弟至微細ê ê一個，就是行伊tī我。Ông beh ìn i kóng, Góa si̍t-chāi kā lín kóng, Lín kì-jiân kiâⁿ i tī góa ê hiaⁿ-tī chì-bî-sòe ê ê chi̍t-ê, chiū-sī kiâⁿ i tī góa.

41Koh beh kā tò-pêng ê講，Lín受咒詛 ê，tio̍h離開我，入永遠ê火，就是為tio̍h魔鬼kap伊chiah-ê使者所備辦ê。Koh beh kā tò-pêng ê kóng, Lín siū chiù-chó͘ ê, tio̍h lī-khui góa, ji̍p éng-oán ê hé, chiū-sī ūi-tio̍h Mô͘-kúi kap i chiah ê sù-chiá só͘ pī-pān ê.

42因為我iau，lín m̄-bat hō͘我食；我嘴乾，lín m̄-bat hō͘我lim；我出外，lín m̄-bat hō͘我tòa；In-ūi góa iau, lín m̄ bat hō͘ góa chia̍h; góa chhùi-ta, lín m̄ bat hō͘ góa lim; góa chhut-gōa, lín m̄ bat hō͘ góa tòa;

43我thǹg-pak-theh，lín m̄-bat hō͘我穿；我破病kap tī監裡，lín m̄-bat看顧我。góa thǹg-pak-theh, lín m̄ bat hō͘ góa chhēng; góa phòa-pīⁿ kap tī kaⁿ-ni̍h, lín m̄ bat khòaⁿ-kò͘ góa.

44In亦beh應講，主ah，阮甚麼時看見你iau，á是嘴乾，á是出外，á是thǹg-pak-theh，á是破病，á是tī監裡，來無服事你ah？In ia̍h beh ìn kóng, Chú ah, goán sím-mi̍h sî khòaⁿ-kìⁿ lí iau, á-sī chhùi-ta, á-sī chhut-gōa, á-sī thǹg-pak-theh, á-sī phòa-pīⁿ, á-sī tī kaⁿ-ni̍h, lâi bô ho̍k-sāi lí ah?

45伊就beh應伊講，我實在kā lín講，Lín既然無行伊tī chiah-ê至微細ê ê一個，就是無行伊tī我。I chiū beh ìn i kóng, Góa si̍t-chāi kā lín kóng, Lín kì-jiân bô kiâⁿ i tī chiah ê chì-bî-sòe ê ê chi̍t ê, chiū-sī bô kiâⁿ i tī góa.

46Chiah-ê人beh去入永遠ê刑罰；但是義ê人入永遠活。Chiah ê lâng beh khì ji̍p éng-oán ê hêng-hoa̍t; nā-sī gī ê lâng ji̍p éng-oán oa̍h.

1耶穌講chiah-ê話soah，就kā伊ê學生講，Iâ-so͘ kóng chiah ê ōe soah, chiū kā I ê ha̍k-seng kóng,

2Lín知過兩日pôaⁿ過節就到，人子tú-tio̍h解送去釘十字架。Lín chai kè nn̄g ji̍t pôaⁿ-kè-choeh chiū kàu, Jîn-chú tú-tio̍h kè-sàng khì tèng si̍p-jī-kè.

3Hit時hiah-ê祭司頭kap百姓 ê長老聚集tī祭司頭，名該亞法ê院，Hit sî hiah ê chè-si-thâu kap peh-sìⁿ ê tiúⁿ-ló chū-chi̍p tī chè-si-thâu, miâ Kai-a-hoat ê īⁿ,

4saⁿ-kap參詳用詭譎ê計掠耶穌來thâi伊。saⁿ-kap chham-siông ēng khúi-khiat ê kè lia̍h Iâ-so͘ lâi thâi I.

5總是講，當節期m̄-thang，驚了百姓 ê中間有擾亂。Chóng-sī kóng, Tng choeh-kî m̄-thang, kiaⁿ-liáu peh-sìⁿ ê tiong-kan ū jiáu-loān.

6耶穌tī伯大尼，thái-ko西門ê厝，Iâ-so͘ tī Pek-tāi-nî, thái-ko Se-bûn ê chhù,

7有婦人人tòa玉瓶，內面tóe極貴氣ê香油，就近伊，當伊坐桌ê時拚(piàⁿ)tī伊頭殼頂。ū hū-jîn-lâng tòa ge̍k-pân, lāi-bīn tóe ke̍k kùi-khì ê hiuⁿ-iû, chiū-kūn I, tng I chē toh ê sî piàⁿ tī I thâu-khak téng.

8學生看見就受氣，講，Án-ni破費有啥路用？Ha̍k-seng khòaⁿ-kìⁿ chiū siū-khì, kóng, Án-ni phòa-hùi ū siáⁿ lō͘-ēng?

9因為chit-ê油能賣得chōe-chōe銀，來hō͘ sòng-hiong人。In-ūi chit ê iû ōe bōe-tit chōe-chōe gûn, lâi hō͘ sòng-hiong lâng.

10耶穌知就kā in講，Lín啥事刁難chit-ê婦人人ah？因為伊所行來款待我ê是好事。Iâ-so͘ chai chiū kā in kóng, Lín siáⁿ-sū thiau-lân chit ê hū-jîn-lâng ah? in-ūi i só͘ kiâⁿ lâi khoán-thāi góa ê sī hó sū.

11因為常常有sòng-hiong人kap lín tī-teh，但是我無常常kap lín tī-teh。In-ūi siông-siông ū sòng-hiong lâng kap lín tī-teh, nā-sī góa bô siông-siông kap lín tī-teh.

12因為伊倒chit-ê油tī我身軀，就是備辦我埋葬來行ê。In-ūi i tò chit ê iû tī góa seng-khu, chiū-sī pī-pān góa bâi-chòng lâi kiâⁿ ê.

13我實在kā lín講，普天下，無論甚麼所在傳chit-ê福音，也beh講起chit-ê婦人人所行，來記念伊。Góa si̍t-chāi kā lín kóng, Phó͘ thiⁿ-ē, bô lūn sím-mi̍h só͘-chāi thoân chit ê hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i.

14Hit時十二個學生一個，名做加略人猶大，去見hiah-ê祭司頭，Hit sî cha̍p-jī ê ha̍k-seng chi̍t-ê, miâ chòe Ka-lio̍k lâng Iû-tāi, khì kìⁿ hiah ê chè-si-thâu,

15講，Lín beh hō͘我jōa chōe，我beh將伊交hō͘ lín？In就kap伊約，hō͘伊銀三十。kóng, Lín beh hō͘ góa jōa chōe, góa beh chiong I kau hō͘ lín? In chiū kap i iok, hō͘ i gûn saⁿ-cha̍p.

16Tùi hit時伊chhē機會將耶穌交hō͘ in。Tùi hit sî i chhē ki-hōe chiong Iâ-so͘ kau hō͘ in.

17除酵節ê頭一日，學生就近耶穌講，Ài阮tī甚麼所在kā你備辦食pôaⁿ過節？Tû-kàⁿ-choeh ê thâu-chi̍t ji̍t, ha̍k-seng chiū-kūn Iâ-so͘ kóng, Ài goán tī sím-mi̍h só͘-chāi kā lí pī-pān chia̍h pôaⁿ-kè-choeh?

18伊講，Lín入城chhē某人，kā伊講，先生講，我ê時近lah；我kap我ê學生守pôaⁿ過節tī你tau。I kóng, Lín ji̍p siâⁿ chhē bó͘ lâng, kā i kóng, Sian-siⁿ kóng, Góa ê sî kūn lah; góa kap góa ê ha̍k-seng siú pôaⁿ-kè-choeh tī lí tau.

19學生照耶穌所吩咐ê去行：就備辦pôaⁿ過節。Ha̍k-seng chiàu Iâ-so͘ só͘ hoan-hù ê khì kiâⁿ: chiū pī-pān pôaⁿ-kè-choeh.

20到日暗耶穌kap十二個學生坐桌。Kàu ji̍t àm Iâ-so͘ kap cha̍p-jī ê ha̍k-seng chē toh.

21食ê時，耶穌講，我實在kā lín講，lín中間一人beh賣我。Chia̍h ê sî, Iâ-so͘ kóng, Góa si̍t-chāi kā lín kóng, lín tiong-kan chi̍t lâng beh bōe góa.

22眾人真憂悶，一個一個kā伊講，主ah，總無是我o͘h？Chèng lâng chin iu-būn, chi̍t-ê chi̍t-ê kā I kóng, Chú ah, chóng bô sī góa o͘h?

23伊應講，Kap我伸手tī盤裡ê，hit-ê beh賣我。I ìn kóng, Kap góa chhun chhiú tī pôaⁿ-ni̍h ê, hit-ê beh bōe góa.

24人子tò去照所記載指伊ê話；但是賣人子ê有災禍ah！hit人無出世khah好。Jîn-chú tò-khì chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó.

25賣伊ê猶大講，拉比，總無是我o͘h？kā伊講，你已經講lah。Bōe I ê Iû-tāi kóng, Lia̍p-pí, chóng bô sī góa o͘h? Kā i kóng, Lí í-keng kóng lah.

26In teh食ê時，耶穌the̍h餅，祝謝peh破，pun hō͘學生，講，the̍h去食；chit-ê是我ê身軀。In teh chia̍h ê sî, Iâ-so͘ the̍h piáⁿ, chiok-siā peh-phòa, pun hō͘ ha̍k-seng, kóng, The̍h-khì chia̍h; chit-ê sī góa ê seng-khu.

27Koh捧(phâng)杯祝謝hō͘ in，講，Lín lóng tio̍h lim伊；Koh phâng poe chiok-siā hō͘ in, kóng, Lín lóng tio̍h lim i;

28chit-ê是我ê血，就是盟約ê血，為tio̍h chōe-chōe人來流出ê，致到罪得tio̍h赦免。chit-ê sī góa ê huih, chiū-sī bêng iok ê huih, ūi-tio̍h chōe-chōe lâng lâi lâu-chhut ê, tì-kàu chōe tit-tio̍h sià-bián.

29但是我kā lín講，taⁿ了後我無lim chit-ê葡萄ê汁，thèng候hit日我kap lín lim hit-ê新ê tī我ê父ê國。Nā-sī góa kā lín kóng, taⁿ liáu-āu góa bô lim chit ê phû-tô ê chiap, thèng-hāu hit ji̍t góa kap lín lim hit ê sin-ê tī góa ê Pē ê kok.

30已經吟詩，就出來，去橄欖山。Í-keng gîm si, chiū chhut-lâi, khì Kaⁿ-ná soaⁿ.

31Hit時耶穌kā in講，今暝lín lóng beh為tio̍h我來受塞礙，因為有記載講，我beh phah牧者，就羊群四散。Hit sî Iâ-so͘ kā in kóng, Kim-mî lín lóng beh ūi-tio̍h góa lâi siū that-gāi, in-ūi ū kì-chài kóng, Góa beh phah bo̍k-chiá, chiū iûⁿ-kûn sì-sòaⁿ.

32但是我koh活了後beh事先lín去加利利。Nā-sī góa koh-oa̍h liáu-āu beh tāi-seng lín khì Ka-lī-lī.

33彼得應伊講，眾人雖然為tio̍h你來受塞礙，也我永永無受塞礙。Pí-tek ìn I kóng, Chèng lâng sui-jiân ūi-tio̍h lí lâi siū that-gāi, iā góa éng-éng bô siū that-gāi.

34耶穌kā伊講，我實在kā你講，今暝雞iáu-bē啼，你beh三pái m̄認我。Iâ-so͘ kā i kóng, Góa si̍t-chāi kā lí kóng, kim-mî koe iáu-bē thî, lí beh saⁿ pái m̄ jīn góa.

35彼得kā伊講，我就若tio̍h kap你死，也決斷無m̄認你。眾學生也lóng是án-ni講。Pí-tek kā I kóng, Góa chiū nā tio̍h kap lí sí, iā koat-toàn bô m̄ jīn lí. Chèng ha̍k-seng iā lóng sī án-ni kóng.

36耶穌kap in到一所在，名客西馬尼，kā伊ê學生講，Lín chiah-ê坐chia，thèng候我去hia祈禱。Iâ-so͘ kap in kàu chi̍t só͘-chāi, miâ Khek-se-má-nî, kā I ê ha̍k-seng kóng, Lín chiah-ê chē chia, thèng-hāu góa khì hia kî-tó.

37Chiah chhōa彼得kap西庇太兩個kiáⁿ saⁿ-kap去；就憂悶、慘慼。Chiah chhōa Pí-tek kap Se-pí-thài nn̄g ê kiáⁿ saⁿ-kap khì; chiū iu-būn, chhám-chhoeh.

38kā in講，我ê心真憂悶到beh死，lín tòa chia kap我警醒。Kā in kóng, Góa ê sim chin iu-būn kàu beh sí, lín tòa chia kap góa kéng-séng.

39Lio̍h-lio̍h-á進前，面phak tī地裡，祈禱，講，我ê父ah，若會做得，tio̍h hō͘ chit-ê杯離開我；總是m̄是照我所ài，是照你所ài。Lio̍h-lio̍h-á chìn-chêng, bīn phak tī tōe-ni̍h, kî-tó, kóng, Góa ê Pē ah, nā ōe chòe-tit, tio̍h hō͘ chit ê poe lī-khui góa; chóng-sī m̄ sī chiàu góa só͘ ài, sī chiàu lí só͘ ài.

40就來學生hia，看見in teh睏，kā彼得講，Án怎樣，lín bōe-ōe kap我警醒半時久ah？Chiū lâi ha̍k-seng hia, khòaⁿ-kìⁿ in teh khùn, kā Pí-tek kóng, Án-cháiⁿ-iūⁿ, lín bōe-ōe kap góa kéng-séng pòaⁿ-sî kú ah?

41Tio̍h警醒，tio̍h祈禱，免得入tī迷惑；心神甘願，但是肉體軟chiáⁿ。Tio̍h kéng-séng, tio̍h kî-tó, bián-tit ji̍p tī bê-he̍k; sim-sîn kam-goān, nā-sī jio̍k-thé nńg-chiáⁿ.

42第二pái koh去祈禱，講，我ê父ah，chit-ê杯若bōe得離開我，的確tio̍h我lim伊，就願你ê旨意得成。Tē jī pái koh khì kî-tó, kóng, Góa ê Pē ah, chit-ê poe nā bōe-tit lī-khui góa, tek-khak tio̍h góa lim i, chiū goān lí ê chí-ì tit chiâⁿ.

43koh再來看見in又teh睏，因為in ê目睭siap。Koh-chài lâi khòaⁿ-kìⁿ in iū teh khùn, in-ūi in ê ba̍k-chiu siap.

44離開in koh去，第三pái祈禱，也是講hiah-ê話。Lī-khui in koh khì, tē saⁿ pái kî-tó, iā sī kóng hiah ê ōe.

45Hit-tia̍p koh就近學生，kā in講，Taⁿ thang睏來安歇lah。時近lah，人子受賣tī罪人ê手。Hit tia̍p koh chiū-kūn ha̍k-seng, kā in kóng, Taⁿ thang khùn lâi an-hioh lah. Sî kūn lah, Jîn-chú siū bōe tī chōe-jîn ê chhiú.

46起來saⁿ-kap行；賣我ê人近lah。Khí-lâi saⁿ-kap kiâⁿ; bōe góa ê lâng kūn lah.

47Iáu-teh講ê時，忽然十二個學生ê一個，猶大，來，也有kui陣人kia̍h刀kap槌á，tùi chiah-ê祭司頭kap百姓 ê長老hia saⁿ-kap來。Iáu teh kóng ê sî, hut-jiân cha̍p-jī ê ha̍k-seng ê chi̍t ê, Iû-tāi, lâi, iā ū kui tīn lâng kia̍h to kap thûi-á, tùi chiah ê chè-si-thâu kap peh-sìⁿ ê tiúⁿ-ló hia saⁿ-kap lâi.

48賣伊ê bat kap in套暗號，講，我kā伊chim ê，hit人就是，lín thang掠伊。Bōe I ê bat kap in thò àm-hō, kóng, Góa kā I chim ê, hit lâng chiū-sī, lín thang lia̍h I.

49即時就近耶穌，講，拉比，平安；就直直kā伊chim。Chek-sî chiū-kūn Iâ-so͘, kóng, Lia̍p-pí, pêng-an; chiū ti̍t-ti̍t kā I chim.

50耶穌kā伊講，朋友ah，你beh來做ê，就做。Hiah-ê人就進前，起手掠耶穌。Iâ-so͘ kā i kóng, Pêng-iú ah, lí beh lâi chòe ê, chiū chòe. Hiah ê lâng chiū chìn-chêng, khí chhiú lia̍h Iâ-so͘.

51忽然有kap耶穌tī-teh ê一人伸手拔刀，thâi祭司頭ê奴僕，削去伊一個耳á。Hut-jiân ū kap Iâ-so͘ tī-teh ê chi̍t lâng chhun chhiú pu̍ih to, thâi chè-si-thâu ê lô͘-po̍k, siah-khì i chi̍t ê hī-á.

52耶穌就kā伊講，收你ê刀入原位，因為凡若kia̍h刀ê beh tùi刀死。Iâ-so͘ chiū kā i kóng, Siu lí ê to ji̍p goân-ūi, in-ūi hoān-nā kia̍h to ê beh tùi to sí.

53Á是你phah算我bōe-ōe求我ê父，就伊tī chit-tia̍p beh kā我差十二營khah加ê天使mah？Á-sī lí phah-sǹg góa bōe-ōe kiû góa ê Pē, chiū I tī chit tia̍p beh kā góa chhe cha̍p-jī iâⁿ khah ke ê thiⁿ-sài mah?

54若án-ni，就聖經所講chit-ê tāi-chì的確有ê，怎樣會應驗ah？Nā án-ni, chiū sèng-keng só͘ kóng chit ê tāi-chì tek-khak ū ê, cháiⁿ-iūⁿ ōe èng-giām ah?

55Hit時耶穌kā in hiah-ê人講，Lín kia̍h刀kap槌á出來掠我，親像beh掠賊mah？我日日坐tī殿內教示人，也lín無掠我。Hit sî Iâ-so͘ kā in hiah ê lâng kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah? Góa ji̍t-ji̍t chē tī tiān-lāi kà-sī lâng, iā lín bô lia̍h góa.

56總是chit-ê事lóng成，是beh應驗先知所記載ê。」Hit時學生lóng離開伊走。Chóng-sī chit ê sū lóng chiâⁿ, sī beh èng-giām sian-ti só͘ kì-chài ê. Hit sî ha̍k-seng lóng lī-khui I cháu.

57掠耶穌ê帶伊到祭司頭該亞法ê所在，tī hia hiah-ê經學士kap長老已經聚集。Lia̍h Iâ-so͘ ê tòa I kàu chè-si-thâu Kai-a-hoat ê só͘-chāi, tī hia hiah ê keng-ha̍k-sū kap tiúⁿ-ló í-keng chū-chi̍p.

58彼得遠遠tè伊到祭司頭ê院，入內面kap hiah-ê差役saⁿ-kap坐，beh看hit-ê結局。Pí-tek hn̄g-hn̄g tè I kàu chè-si-thâu ê īⁿ, ji̍p lāi-bīn kap hiah ê chhe-ia̍h saⁿ-kap chē, beh khòaⁿ hit ê kiat-kio̍k.

59Chiah-ê祭司頭kap全公會chhē lām-sám ê干證攻擊耶穌，ài hō͘伊死。Chiah ê chè-si-thâu kap choân kong-hōe chhē lām-sám ê kan-chèng kong-kek Iâ-so͘, ài hō͘ I sí.

60雖然chōe-chōe lām-sám干證ê來，也無得tio̍h。後來有兩個到，講，Sui-jiân chōe-chōe lām-sám kan-chèng ê lâi, iā bô tit-tio̍h. Āu-lâi ū nn̄g-ê kàu, kóng,

61Chit人bat講，我會毀壞上帝ê殿，三日就起伊。Chit lâng bat kóng, Góa ōe húi-hoāi Siōng-tè ê tiān, saⁿ ji̍t chiū khí i.

62祭司頭起來kā伊講，你lóng無應mah？Chiah-ê人所干證你ê是甚麼？Chè-si-thâu khí-lâi kā I kóng, Lí lóng bô ìn mah? Chiah ê lâng só͘ kan-chèng lí ê sī sím-mi̍h?

63但是耶穌靜靜。祭司頭kā伊講，當chit-ê真活上帝，我命令你chiù-chōa來kā阮講，你果然是上帝ê Kiáⁿ，基督，á m̄是。Nā-sī Iâ-so͘ chēng-chēng. Chè-si-thâu kā I kóng, Tng chit ê chin-oa̍h Siōng-tè, góa bēng-lēng lí chiù-chōa lâi kā goán kóng, lí kó-jiân sī Siōng-tè ê Kiáⁿ, Ki-tok, á m̄ sī.

64耶穌kā伊講，你已經講lah；但是我kā lín講，Tùi chit-tia̍p了後lín beh看見人子坐tī有權能ê ê大pêng，坐天 ê雲來。Iâ-so͘ kā i kóng, Lí í-keng kóng lah; nā-sī góa kā lín kóng, Tùi chit tia̍p liáu-āu lín beh khòaⁿ-kìⁿ Jîn-chú chē tī ū koân-lêng ê ê tōa pêng, chē thiⁿ ê hûn lâi.

65Tùi án-ni祭司頭拆裂家己ê衫，講，伊講出僭權褻瀆ê話；咱iáu-kú欠甚麼干證ah？Taⁿ lín已經聽見伊ê僭權褻瀆lah。Tùi án-ni chè-si-thâu thiah-li̍h ka-kī ê saⁿ, kóng, I kóng-chhut chhiàm-koân siat-to̍k ê ōe; lán iáu-kú khiàm sím-mi̍h kan-chèng ah? Taⁿ lín í-keng thiaⁿ-kìⁿ I ê chhiàm-koân siat-to̍k lah.

66Lín phah算怎樣？應講，伊該死。Lín phah-sǹg cháiⁿ-iūⁿ? Ìn kóng, I kai sí.

67就phùi-nōa tī伊ê面，用拳頭母cheng伊；也有5用手siàn伊，Chiū phùi-nōa tī I ê bīn, ēng kûn-thâu-bú cheng I; iā ū-ê ēng chhiú siàn I,

68講，基督ah，你是先知，tio̍h kā阮講，phah你ê是是誰。kóng, Ki-tok ah, lí sī sian-ti, tio̍h kā goán kóng, phah lí ê sī chī-chūi.

69彼得坐tī外院；有一個女婢近óa伊講，你也bat kap加利利人耶穌做陣。Pí-tek chē tī gōa īⁿ; ū chi̍t ê lú-pī kūn-óa i kóng, Lí iā bat kap Ka-lī-lī lâng Iâ-so͘ chòe tīn.

70彼得當眾人ê面前m̄認講，我m̄知你teh講甚麼。Pí-tek tng chèng lâng ê bīn-chêng m̄ jīn kóng, Góa m̄ chai lí teh kóng sím-mi̍h.

71出去到院門，koh一個女婢看見伊，kā tī hia ê人講，Chit-ê也bat kap拿撒勒人耶穌做陣。Chhut-khì kàu īⁿ mn̂g, koh chi̍t ê lú-pī khòaⁿ-kìⁿ i, kā tī hia ê lâng kóng, Chit-ê iā bat kap Ná-sat-le̍k lâng Iâ-so͘ chòe tīn.

72彼得koh m̄認，續chiù-chōa講，我m̄-bat hit-ê人。Pí-tek koh m̄ jīn, sòa chiù-chōa kóng, Góa m̄ bat hit ê lâng.

73有hiah久，邊á teh khiā ê人近óa kā彼得講，你實在也是in ê黨，因為對你ê腔口露出。Ū hiah kú, piⁿ-á teh khiā ê lâng kūn-óa kā Pí-tek kóng, Lí si̍t-chāi iā sī in ê tóng, in-ūi tùi lí ê khiuⁿ-kháu lō͘-chhut.

74伊chiah咒罵，koh chiù-chōa，講，我m̄-bat hit-ê人。雞就啼。I chiah chiù-mē, koh chiù-chōa, kóng, Góa m̄ bat hit ê lâng. Koe chiū thî.

75彼得就記得耶穌ê話講，雞iáu-bē啼，你beh三pái m̄認我。就出去外面，大啼哭。Pí-tek chiū kì-tit Iâ-so͘ ê ōe kóng, Koe iáu-bē thî, lí beh saⁿ pái m̄ jīn góa. Chiū chhut-khì gōa-bīn, tōa thî-khàu.

1到天光，眾祭司頭kap百姓 ê長老saⁿ-kap計謀攻擊耶穌，ài hō͘伊死。Kàu thiⁿ-kng, chèng chè-si-thâu kap peh-sìⁿ ê tiúⁿ-ló saⁿ-kap kè-bô͘ kong-kek Iâ-so͘, ài hō͘ I sí.

2已經縛伊，就帶去交hō͘總督彼拉多。Í-keng pa̍k I, chiū tòa-khì kau hō͘ chóng-tok Pí-lia̍p-to.

3Hit時賣伊ê猶大看見耶穌受定罪，就退悔，將hiah-ê三十銀還chiah-ê祭司頭kap長老，Hit sî bōe I ê Iû-tāi khòaⁿ-kìⁿ Iâ-so͘ siū tēng-chōe, chiū thè-hóe, chiong hiah ê saⁿ-cha̍p gûn hêng chiah ê chè-si-thâu kap tiúⁿ-ló,

4講，我賣無罪ê ê血，有罪lah。In講，Kap阮啥干涉？你家己打算。kóng, Góa bōe bô chōe ê ê huih, ū chōe lah. In kóng, Kap goán siáⁿ kan-sia̍p? Lí ka-kī táⁿ-sǹg.

5猶大hiat hiah-ê銀tī殿裡，退去家己吊死。Iû-tāi hiat hiah ê gûn tī tiān-ni̍h, thè-khì ka-kī tiàu-sí.

6Hiah-ê祭司頭the̍h hit-ê銀，講，這是血ê價，m̄-thang lok tī庫房。Hiah ê chè-si-thâu the̍h hit ê gûn, kóng, Che sī huih ê kè, m̄-thang lok tī khò͘-pâng.

7In就參詳，將hit-ê銀去買燒磁人ê園，thang埋葬出外人。In chiū chham-siông, chiong hit ê gûn khì bóe sio-hûi lâng ê hn̂g, thang bâi-chòng chhut-gōa lâng.

8所以hit khu園到taⁿ稱做血園。Só͘-í hit khu hn̂g kàu taⁿ chheng chòe Huih-hn̂g.

9Tùi án-ni應驗早託先知耶利米所講ê，講，In the̍h受苦ê ê價銀三十，就是以色列ê kiaⁿ孫中有人所股(kó͘)ê；Tùi án-ni èng-giām chá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-cha̍p, chiū-sī Í-sek-lia̍t ê kiáⁿ-sun tiong ū lâng só͘ kó͘ ê;

10用伊來買燒磁ê ê園，照主所命令我ê。ēng i lâi bóe sio-hûi-ê ê hn̂g, chiàu Chú só͘ bēng-lēng góa ê.

11耶穌khiā tī總督ê面前；總督問伊講，你是猶太人ê王mah？耶穌kā伊講，你講，就是。Iâ-so͘ khiā tī chóng-tok ê bīn-chêng; chóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, chiū-sī.

12伊hō͘ hiah-ê祭司頭長老告，伊也無應。I hō͘ hiah ê chè-si-thâu tiúⁿ-ló kò, I iā bô ìn.

13Hit時，彼拉多kā伊講，Hiah-ê人干證你到hiah chōe項，你無聽見mah？Hit sî Pí-lia̍p-to kā I kóng, Hiah ê lâng kan-chèng lí kàu hiah chōe hāng, lí bô thiaⁿ-kìⁿ mah?

14耶穌無應伊一句話，致到總督大奇怪。Iâ-so͘ bô ìn i chi̍t kù ōe, tì-kàu chóng-tok tōa kî-koài.

15到節期總督照例放一個犯人hō͘眾人，是照in所ài ê。Kàu choeh-kî chóng-tok chiàu-lē pàng chi̍t-ê hoān-lâng hō͘ chèng lâng, sī chiàu in só͘ ài ê.

16Hit時有出名ê犯人，名叫巴拉巴。Hit sî ū chhut-miâ ê hoān-lâng, miâ kiò Pa-lia̍p-pa.

17In已經聚集，彼拉多kā in講，Lín ài我放是誰 hō͘ lín？是巴拉巴，á是稱做基督ê耶穌？In í-keng chū-chi̍p, Pí-lia̍p-to kā in kóng, Lín ài góa pàng chī-chūi hō͘ lín? sī Pa-lia̍p-pa, á-sī chheng chòe Ki-tok ê Iâ-so͘?

18因為知in為tio̍h怨妒chiah解送耶穌。In-ūi chai in ūi-tio̍h oàn-tò͘ chiah ké-sàng Iâ-so͘.

19伊坐堂ê時，伊ê bó͘差人kā伊講，Chit-ê義人你m̄-thang干涉tio̍h；因為我今á日tī眠夢中為tio̍h伊chōe-chōe艱苦。I chē tn̂g ê sî, i ê bó͘ chhe lâng kā i kóng, Chit ê gī lâng lí m̄-thang kan-sia̍p-tio̍h; in-ūi góa kin-á-ji̍t tī bîn-bāng tiong ūi-tio̍h I chōe-chōe kan-khó͘.

20Chiah-ê祭司頭kap長老kiau-so眾人，求放巴拉巴，滅耶穌。Chiah ê chè-si-thâu kap tiúⁿ-ló kiau-so chèng lâng, kiû pàng Pa-lia̍p-pa, bia̍t Iâ-so͘.

21總督應講，Chit兩人lín ài我放tá-lo̍h一個hō͘ lín？In講，巴拉巴。彼拉多kā in講，Chóng-tok ìn kóng, Chit nn̄g lâng lín ài góa pàng tá-lo̍h chi̍t-ê hō͘ lín? In kóng, Pa-lia̍p-pa. Pí-lia̍p-to kā in kóng,

22Án-ni，就稱做基督ê耶穌，我tio̍h怎樣辦伊？In lóng講，釘伊十字架。Án-ni, chiū chheng chòe Ki-tok ê Iâ-so͘, góa tio̍h cháiⁿ-iūⁿ pān I? In lóng kóng, Tèng I si̍p-jī-kè.

23總督講，怎樣，伊有行甚麼pháiⁿ？In大聲hoah講，釘伊十字架。Chóng-tok kóng, Cháiⁿ-iūⁿ, I ū kiâⁿ sím-mi̍h pháiⁿ? In tōa siaⁿ hoah kóng, Tèng I si̍p-jī-kè.

24彼拉多看見無chhái-kang，反tńg ná擾亂，就捧水，tī眾人ê面前洗手，講，Tī chit-ê義人ê血我無罪，lín家己打算。Pí-lia̍p-to khòaⁿ-kìⁿ bô chhái-kang, hoán-tńg ná jiáu-loān, chiū phâng chúi, tī chèng lâng ê bīn-chêng sóe chhiú, kóng, Tī chit ê gī lâng ê huih góa bô chōe, lín ka-kī táⁿ-sǹg.

25百姓 lóng應伊講，伊ê血歸tī阮kap阮ê kiaⁿ孫。Peh-sìⁿ lóng ìn i kóng, I ê huih kui tī goán kap goán ê kiáⁿ-sun.

26伊就放巴拉巴hō͘ in。已經鞭phah耶穌，就發交去釘十字架。I chiū pàng Pa-lia̍p-pa hō͘ in. Í-keng piⁿ-phah Iâ-so͘, chiū hoat-kau khì tèng si̍p-jī-kè.

27Hit時總督ê兵帶耶穌入公堂，聚集thong營圍伊。Hit sî chóng-tok ê peng tòa Iâ-so͘ ji̍p kong-tn̂g, chū-chi̍p thong iâⁿ ûi I.

28Thǹg伊ê衫，將紅袍kā伊穿；Thǹg I ê saⁿ, chiong âng phàu kā I chhēng;

29用刺á編冕旒，tì tī伊ê頭殼，用蘆竹hē tī伊ê 正手，跪tī伊ê面前戲弄伊講，猶太人ê王，平安。ēng chhì-á pīⁿ bián-liû, tì tī I ê thâu-khak, ēng lô͘-tek hē tī I ê chiàⁿ-chhiú, kūi tī I ê bīn-chêng hì-lāng I kóng, Iû-thài lâng ê ông, pêng-an.

30就kā伊phùi-nōa，kia̍h hit支蘆竹，來sut伊ê頭殼。Chiū kā I phùi-nōa, kia̍h hit ki lô͘-tek, lâi sut I ê thâu-khak.

31戲弄soah，hit領袍就kā伊thǹg起來，將伊家己ê衫kā伊穿，帶伊去釘十字架。Hì-lāng soah, hit niá phàu chiū kā I thǹg-khí-lâi, chiong I ka-kī ê saⁿ kā I chhēng, tòa I khì tèng si̍p-jī-kè.

32出來ê時tú-tio̍h一個Kó͘-lī-nāi人名西門，勉強伊saⁿ-kap去，hō͘伊giâ耶穌ê十字架。Chhut-lâi ê sî tú-tio̍h chi̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê si̍p-jī-kè.

33到一所在，名各各他，就是頭殼碗ê所在，就用苦膽所調和ê酒hō͘伊lim；Kàu chi̍t só͘-chāi, miâ Kok-kok-thaⁿ, chiū-sī thâu-khak-óaⁿ ê só͘-chāi, chiū ēng khó͘-táⁿ só͘ tiâu-hô ê chiú hō͘ I lim;

34伊試看，就m̄ lim。I chhì-khòaⁿ, chiū m̄ lim.

35已經釘伊tī十字架，就做鬮pun伊ê衣服；Í-keng tèng I tī si̍p-jī-kè, chiū chòe-khau pun I ê i-ho̍k;

36koh坐tī hia顧守伊。koh chē tī hia kò͘-siú I.

37就hē斬條tī伊ê頭殼ê頂面，寫講，chit-ê是猶太人ê王，耶穌。Chiū hē chám-tiâu tī I ê thâu-khak ê téng-bīn, siá kóng, Chit-ê sī Iû-thài lâng ê ông, Iâ-so͘.

38Hit時，有兩個賊kap伊同釘tī十字架，一個tī chiàⁿ-pêng，一個tī tò-pêng。Hit sî ū nn̄g ê chha̍t kap I tâng tèng tī si̍p-jī-kè, chi̍t-ê tī chiàⁿ-pêng, chi̍t-ê tī tò-pêng.

39經過ê人譏刺伊，搖頭講，Keng-kè ê lâng ki-chhì I, iô thâu kóng,

40你毀壞殿，三日koh起ê，tio̍h救家己；你若是上帝ê Kiáⁿ，tio̍h tùi十字架落來。Lí húi-hoāi tiān, saⁿ ji̍t koh khí ê, tio̍h kiù ka-kī; lí nā sī Siōng-tè ê Kiáⁿ, tio̍h tùi si̍p-jī-kè lo̍h-lâi.

41Hiah-ê祭司頭kap經學士以及長老也是án-ni戲弄伊，講，Hiah ê chè-si-thâu kap keng-ha̍k-sū í-ki̍p tiúⁿ-ló iā sī án-ni hì-lāng I, kóng,

42伊bat救別人，bōe-ōe救家己。伊做以色列ê王，taⁿ tio̍h tùi十字架落來，阮就beh信伊。I bat kiù pa̍t lâng, bōe-ōe kiù ka-kī. I chòe Í-sek-lia̍t ê ông, taⁿ tio̍h tùi si̍p-jī-kè lo̍h-lâi, goán chiū beh sìn I.

43伊óa靠上帝，上帝若歡喜伊，taⁿ就tio̍h救伊；因為伊講，我就是上帝ê Kiáⁿ。I óa-khò Siōng-tè, Siōng-tè nā hoaⁿ-hí I, taⁿ chiū tio̍h kiù I; in-ūi I kóng, Góa chiū-sī Siōng-tè ê Kiáⁿ.

44Kap伊同釘hit兩個賊也是án-ni罵伊。Kap I tâng tèng hit nn̄g ê chha̍t iā sī án-ni mē I.

45Tùi日中晝到三點，遍地烏暗。Tùi ji̍t-tiong-tàu kàu saⁿ tiám, piàn tōe o͘-àm.

46差不多三點，耶穌大聲喉叫講，Í-lī，Í-lī，lia̍p-má sat-pok-tāi-nî，就是講，我ê上帝，我ê上帝，你啥事放離我？Chha-put-to saⁿ tiám, Iâ-so͘ tōa siaⁿ âu-kiò kóng, Í-lī, Í-lī, lia̍p-má sat-pok-tāi-nî, chiū-sī kóng, Góa ê Siōng-tè, góa ê Siōng-tè, lí siáⁿ-sū pàng-lī góa?

47邊頭khia7e5有人聽見就講，伊teh叫以利亞。Piⁿ-thâu khiā ê ū lâng thiaⁿ-kìⁿ chiū kóng, I teh kiò Í-lī-a.

48中間一人即時走去，the̍h海絨，浸醋，hâ tī蘆竹á尾，hō͘伊suh。Tiong-kan chi̍t lâng chek-sî cháu-khì, the̍h hái-jiông, chìm chhò͘, hâ tī lô͘-tek-á bé, hō͘ I suh.

49其餘ê講，且慢，看以利亞來救伊á無。Kî-û ê kóng, Chhiáⁿ bān, khòaⁿ Í-lī-a lâi kiù I á bô.

50耶穌koh大聲喉叫，就斷氣。Iâ-so͘ koh tōa siaⁿ âu-kiò, chiū tn̄g khùi.

51忽然殿內ê帳，tùi頂到下，裂做兩pêng；地動，石磐裂；Hut-jiân tiān-lāi ê tiùⁿ, tùi téng kàu ē, li̍h chòe nn̄g pêng; tōe tāng, chio̍h-pôaⁿ li̍h;

52墓開，已經teh睏ê聖徒，in ê身軀chōe-chōe起來，tùi in ê墓出；bōng khui, í-keng teh khùn ê sèng-tô͘, in ê sin-khu chōe-chōe khí-lâi, tùi in ê bōng chhut;

53到耶穌koh活了後，in入聖城，出現tī chōe-chōe人。kàu Iâ-so͘ koh-oa̍h liáu-āu, in ji̍p sèng siâⁿ, chhut-hiān tī chōe-chōe lâng.

54百總kap相同顧守耶穌ê，看見地動，kap所經過ê事，不止驚，講，Chit-ê果然是上帝ê Kiáⁿ。Pé-chóng kap saⁿ-tâng kò͘-siú Iâ-so͘ ê, khòaⁿ-kìⁿ tōe-tāng, kap só͘ keng-kè ê sū, put-chí kiaⁿ, kóng, Chit-ê kó-jiân sī Siōng-tè ê Kiáⁿ.

55有chōe-chōe婦人人tī hia遠遠teh看；in就是tùi加利利跟tè耶穌來服事伊ê；Ū chōe-chōe hū-jîn-lâng tī hia hn̄g-hn̄g teh khòaⁿ; in chiū-sī tùi Ka-lī-lī kun-tè Iâ-so͘ lâi ho̍k-sāi I ê;

56從中有抹大拉ê馬利亞，雅各約西ê老母馬利亞，kap西庇太ê Kiáⁿ ê老母。chiông-tiong ū Boa̍t-tāi-lia̍p ê Má-lī-a, Ngá-kok kah Iok-sek(**Iok-se) ê lāu-bú Má-lī-a, kap Se-pí-thài ê kiáⁿ ê lāu-bú.

57已經暗，有A-lī-má-thài ê好額人來，名做約瑟，伊也是耶穌ê學生。Í-keng àm, ū A-lī-má-thài ê hó-gia̍h lâng lâi, miâ chòe Iok-sek, i iā sī Iâ-so͘ ê ha̍k-seng.

58Hit人去見彼拉多，求耶穌ê身屍；彼拉多吩咐tio̍h hō͘伊。Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to hoan-hù tio̍h hō͘ i.

59約瑟收hit-ê身屍，用清氣ê幼布包伊；Iok-sek siu hit ê sin-si, ēng chheng-khì ê iù-pò͘ pau i;

60hē tī伊家己ê新墓，就是伊tī石磐所phah ê；就kō大塊石tī墓門，chiah去。hē tī i ka-kī ê sin bōng, chiū-sī i tī chio̍h-pôaⁿ só͘ phah ê; chiū kō tōa tè chio̍h tī bōng-mn̂g, chiah khì.

61有抹大拉ê馬利亞kap別個馬利亞tī hia，坐tī墓ê對面。Ū Boa̍t-tāi-lia̍p ê Má-lī-a kap pa̍t ê Má-lī-a tī hia, chē tī bōng ê tùi-bīn.

62隔日，就是備辦節後ê一日，hiah-ê祭司頭kap法利賽人聚集見彼拉多講，Keh ji̍t, chiū-sī pī-pān choeh āu ê chi̍t ji̍t, hiah ê chè-si-thâu kap Hoat-lī-sài lâng chū-chi̍p kìⁿ Pí-lia̍p-to kóng,

63大人ah，阮記得hit-ê迷惑人ê，活teh ê時bat講，三日後我beh koh活。Tāi-jîn ah, goán kì-tit hit ê bê-he̍k lâng ê, oa̍h-teh ê sî bat kóng, Saⁿ ji̍t āu góa beh koh-oa̍h.

64所以請你命令顧守hit-ê墓，到第三日；驚了伊ê學生來偷伊去，亦kā百姓講，伊tùi死人中koh活；án-ni，就後來ê差謬，比事先khah厲害。Só͘-í chhiáⁿ lí bēng-lēng kò͘-siú hit ê bōng, kàu tē saⁿ ji̍t; kiaⁿ-liáu I ê ha̍k-seng lâi thau I khì, ia̍h kā peh-sìⁿ kóng, I tùi sí-lâng tiong koh-oa̍h; án-ni, chiū āu-lâi ê chha-biū, pí tāi-seng khah lī-hāi.

65彼拉多kā in講，Lín領兵去，照lín所知影ê去顧守。Pí-lia̍p-to kā in kóng, Lín niá peng khì, chiàu lín só͘ chai-iáⁿ ê khì kò͘-siú.

66In就去，封石kap設兵，來顧守hit-ê墓。In chiū khì, hong chio̍h kap siat peng, lâi kò͘-siú hit ê bōng.