1到天光，眾祭司頭kap百姓 ê長老saⁿ-kap計謀攻擊耶穌，ài hō͘伊死。Kàu thiⁿ-kng, chèng chè-si-thâu kap peh-sìⁿ ê tiúⁿ-ló saⁿ-kap kè-bô͘ kong-kek Iâ-so͘, ài hō͘ I sí.

2已經縛伊，就帶去交hō͘總督彼拉多。Í-keng pa̍k I, chiū tòa-khì kau hō͘ chóng-tok Pí-lia̍p-to.

3Hit時賣伊ê猶大看見耶穌受定罪，就退悔，將hiah-ê三十銀還chiah-ê祭司頭kap長老，Hit sî bōe I ê Iû-tāi khòaⁿ-kìⁿ Iâ-so͘ siū tēng-chōe, chiū thè-hóe, chiong hiah ê saⁿ-cha̍p gûn hêng chiah ê chè-si-thâu kap tiúⁿ-ló,

4講，我賣無罪ê ê血，有罪lah。In講，Kap阮啥干涉？你家己打算。kóng, Góa bōe bô chōe ê ê huih, ū chōe lah. In kóng, Kap goán siáⁿ kan-sia̍p? Lí ka-kī táⁿ-sǹg.

5猶大hiat hiah-ê銀tī殿裡，退去家己吊死。Iû-tāi hiat hiah ê gûn tī tiān-ni̍h, thè-khì ka-kī tiàu-sí.

6Hiah-ê祭司頭the̍h hit-ê銀，講，這是血ê價，m̄-thang lok tī庫房。Hiah ê chè-si-thâu the̍h hit ê gûn, kóng, Che sī huih ê kè, m̄-thang lok tī khò͘-pâng.

7In就參詳，將hit-ê銀去買燒磁人ê園，thang埋葬出外人。In chiū chham-siông, chiong hit ê gûn khì bóe sio-hûi lâng ê hn̂g, thang bâi-chòng chhut-gōa lâng.

8所以hit khu園到taⁿ稱做血園。Só͘-í hit khu hn̂g kàu taⁿ chheng chòe Huih-hn̂g.

9Tùi án-ni應驗早託先知耶利米所講ê，講，In the̍h受苦ê ê價銀三十，就是以色列ê kiaⁿ孫中有人所股(kó͘)ê；Tùi án-ni èng-giām chá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-cha̍p, chiū-sī Í-sek-lia̍t ê kiáⁿ-sun tiong ū lâng só͘ kó͘ ê;

10用伊來買燒磁ê ê園，照主所命令我ê。ēng i lâi bóe sio-hûi-ê ê hn̂g, chiàu Chú só͘ bēng-lēng góa ê.

11耶穌khiā tī總督ê面前；總督問伊講，你是猶太人ê王mah？耶穌kā伊講，你講，就是。Iâ-so͘ khiā tī chóng-tok ê bīn-chêng; chóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, chiū-sī.

12伊hō͘ hiah-ê祭司頭長老告，伊也無應。I hō͘ hiah ê chè-si-thâu tiúⁿ-ló kò, I iā bô ìn.

13Hit時，彼拉多kā伊講，Hiah-ê人干證你到hiah chōe項，你無聽見mah？Hit sî Pí-lia̍p-to kā I kóng, Hiah ê lâng kan-chèng lí kàu hiah chōe hāng, lí bô thiaⁿ-kìⁿ mah?

14耶穌無應伊一句話，致到總督大奇怪。Iâ-so͘ bô ìn i chi̍t kù ōe, tì-kàu chóng-tok tōa kî-koài.

15到節期總督照例放一個犯人hō͘眾人，是照in所ài ê。Kàu choeh-kî chóng-tok chiàu-lē pàng chi̍t-ê hoān-lâng hō͘ chèng lâng, sī chiàu in só͘ ài ê.

16Hit時有出名ê犯人，名叫巴拉巴。Hit sî ū chhut-miâ ê hoān-lâng, miâ kiò Pa-lia̍p-pa.

17In已經聚集，彼拉多kā in講，Lín ài我放是誰 hō͘ lín？是巴拉巴，á是稱做基督ê耶穌？In í-keng chū-chi̍p, Pí-lia̍p-to kā in kóng, Lín ài góa pàng chī-chūi hō͘ lín? sī Pa-lia̍p-pa, á-sī chheng chòe Ki-tok ê Iâ-so͘?

18因為知in為tio̍h怨妒chiah解送耶穌。In-ūi chai in ūi-tio̍h oàn-tò͘ chiah ké-sàng Iâ-so͘.

19伊坐堂ê時，伊ê bó͘差人kā伊講，Chit-ê義人你m̄-thang干涉tio̍h；因為我今á日tī眠夢中為tio̍h伊chōe-chōe艱苦。I chē tn̂g ê sî, i ê bó͘ chhe lâng kā i kóng, Chit ê gī lâng lí m̄-thang kan-sia̍p-tio̍h; in-ūi góa kin-á-ji̍t tī bîn-bāng tiong ūi-tio̍h I chōe-chōe kan-khó͘.

20Chiah-ê祭司頭kap長老kiau-so眾人，求放巴拉巴，滅耶穌。Chiah ê chè-si-thâu kap tiúⁿ-ló kiau-so chèng lâng, kiû pàng Pa-lia̍p-pa, bia̍t Iâ-so͘.

21總督應講，Chit兩人lín ài我放tá-lo̍h一個hō͘ lín？In講，巴拉巴。彼拉多kā in講，Chóng-tok ìn kóng, Chit nn̄g lâng lín ài góa pàng tá-lo̍h chi̍t-ê hō͘ lín? In kóng, Pa-lia̍p-pa. Pí-lia̍p-to kā in kóng,

22Án-ni，就稱做基督ê耶穌，我tio̍h怎樣辦伊？In lóng講，釘伊十字架。Án-ni, chiū chheng chòe Ki-tok ê Iâ-so͘, góa tio̍h cháiⁿ-iūⁿ pān I? In lóng kóng, Tèng I si̍p-jī-kè.

23總督講，怎樣，伊有行甚麼pháiⁿ？In大聲hoah講，釘伊十字架。Chóng-tok kóng, Cháiⁿ-iūⁿ, I ū kiâⁿ sím-mi̍h pháiⁿ? In tōa siaⁿ hoah kóng, Tèng I si̍p-jī-kè.

24彼拉多看見無chhái-kang，反tńg ná擾亂，就捧水，tī眾人ê面前洗手，講，Tī chit-ê義人ê血我無罪，lín家己打算。Pí-lia̍p-to khòaⁿ-kìⁿ bô chhái-kang, hoán-tńg ná jiáu-loān, chiū phâng chúi, tī chèng lâng ê bīn-chêng sóe chhiú, kóng, Tī chit ê gī lâng ê huih góa bô chōe, lín ka-kī táⁿ-sǹg.

25百姓 lóng應伊講，伊ê血歸tī阮kap阮ê kiaⁿ孫。Peh-sìⁿ lóng ìn i kóng, I ê huih kui tī goán kap goán ê kiáⁿ-sun.

26伊就放巴拉巴hō͘ in。已經鞭phah耶穌，就發交去釘十字架。I chiū pàng Pa-lia̍p-pa hō͘ in. Í-keng piⁿ-phah Iâ-so͘, chiū hoat-kau khì tèng si̍p-jī-kè.

27Hit時總督ê兵帶耶穌入公堂，聚集thong營圍伊。Hit sî chóng-tok ê peng tòa Iâ-so͘ ji̍p kong-tn̂g, chū-chi̍p thong iâⁿ ûi I.

28Thǹg伊ê衫，將紅袍kā伊穿；Thǹg I ê saⁿ, chiong âng phàu kā I chhēng;

29用刺á編冕旒，tì tī伊ê頭殼，用蘆竹hē tī伊ê 正手，跪tī伊ê面前戲弄伊講，猶太人ê王，平安。ēng chhì-á pīⁿ bián-liû, tì tī I ê thâu-khak, ēng lô͘-tek hē tī I ê chiàⁿ-chhiú, kūi tī I ê bīn-chêng hì-lāng I kóng, Iû-thài lâng ê ông, pêng-an.

30就kā伊phùi-nōa，kia̍h hit支蘆竹，來sut伊ê頭殼。Chiū kā I phùi-nōa, kia̍h hit ki lô͘-tek, lâi sut I ê thâu-khak.

31戲弄soah，hit領袍就kā伊thǹg起來，將伊家己ê衫kā伊穿，帶伊去釘十字架。Hì-lāng soah, hit niá phàu chiū kā I thǹg-khí-lâi, chiong I ka-kī ê saⁿ kā I chhēng, tòa I khì tèng si̍p-jī-kè.

32出來ê時tú-tio̍h一個Kó͘-lī-nāi人名西門，勉強伊saⁿ-kap去，hō͘伊giâ耶穌ê十字架。Chhut-lâi ê sî tú-tio̍h chi̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê si̍p-jī-kè.

33到一所在，名各各他，就是頭殼碗ê所在，就用苦膽所調和ê酒hō͘伊lim；Kàu chi̍t só͘-chāi, miâ Kok-kok-thaⁿ, chiū-sī thâu-khak-óaⁿ ê só͘-chāi, chiū ēng khó͘-táⁿ só͘ tiâu-hô ê chiú hō͘ I lim;

34伊試看，就m̄ lim。I chhì-khòaⁿ, chiū m̄ lim.

35已經釘伊tī十字架，就做鬮pun伊ê衣服；Í-keng tèng I tī si̍p-jī-kè, chiū chòe-khau pun I ê i-ho̍k;

36koh坐tī hia顧守伊。koh chē tī hia kò͘-siú I.

37就hē斬條tī伊ê頭殼ê頂面，寫講，chit-ê是猶太人ê王，耶穌。Chiū hē chám-tiâu tī I ê thâu-khak ê téng-bīn, siá kóng, Chit-ê sī Iû-thài lâng ê ông, Iâ-so͘.

38Hit時，有兩個賊kap伊同釘tī十字架，一個tī chiàⁿ-pêng，一個tī tò-pêng。Hit sî ū nn̄g ê chha̍t kap I tâng tèng tī si̍p-jī-kè, chi̍t-ê tī chiàⁿ-pêng, chi̍t-ê tī tò-pêng.

39經過ê人譏刺伊，搖頭講，Keng-kè ê lâng ki-chhì I, iô thâu kóng,

40你毀壞殿，三日koh起ê，tio̍h救家己；你若是上帝ê Kiáⁿ，tio̍h tùi十字架落來。Lí húi-hoāi tiān, saⁿ ji̍t koh khí ê, tio̍h kiù ka-kī; lí nā sī Siōng-tè ê Kiáⁿ, tio̍h tùi si̍p-jī-kè lo̍h-lâi.

41Hiah-ê祭司頭kap經學士以及長老也是án-ni戲弄伊，講，Hiah ê chè-si-thâu kap keng-ha̍k-sū í-ki̍p tiúⁿ-ló iā sī án-ni hì-lāng I, kóng,

42伊bat救別人，bōe-ōe救家己。伊做以色列ê王，taⁿ tio̍h tùi十字架落來，阮就beh信伊。I bat kiù pa̍t lâng, bōe-ōe kiù ka-kī. I chòe Í-sek-lia̍t ê ông, taⁿ tio̍h tùi si̍p-jī-kè lo̍h-lâi, goán chiū beh sìn I.

43伊óa靠上帝，上帝若歡喜伊，taⁿ就tio̍h救伊；因為伊講，我就是上帝ê Kiáⁿ。I óa-khò Siōng-tè, Siōng-tè nā hoaⁿ-hí I, taⁿ chiū tio̍h kiù I; in-ūi I kóng, Góa chiū-sī Siōng-tè ê Kiáⁿ.

44Kap伊同釘hit兩個賊也是án-ni罵伊。Kap I tâng tèng hit nn̄g ê chha̍t iā sī án-ni mē I.

45Tùi日中晝到三點，遍地烏暗。Tùi ji̍t-tiong-tàu kàu saⁿ tiám, piàn tōe o͘-àm.

46差不多三點，耶穌大聲喉叫講，Í-lī，Í-lī，lia̍p-má sat-pok-tāi-nî，就是講，我ê上帝，我ê上帝，你啥事放離我？Chha-put-to saⁿ tiám, Iâ-so͘ tōa siaⁿ âu-kiò kóng, Í-lī, Í-lī, lia̍p-má sat-pok-tāi-nî, chiū-sī kóng, Góa ê Siōng-tè, góa ê Siōng-tè, lí siáⁿ-sū pàng-lī góa?

47邊頭khia7e5有人聽見就講，伊teh叫以利亞。Piⁿ-thâu khiā ê ū lâng thiaⁿ-kìⁿ chiū kóng, I teh kiò Í-lī-a.

48中間一人即時走去，the̍h海絨，浸醋，hâ tī蘆竹á尾，hō͘伊suh。Tiong-kan chi̍t lâng chek-sî cháu-khì, the̍h hái-jiông, chìm chhò͘, hâ tī lô͘-tek-á bé, hō͘ I suh.

49其餘ê講，且慢，看以利亞來救伊á無。Kî-û ê kóng, Chhiáⁿ bān, khòaⁿ Í-lī-a lâi kiù I á bô.

50耶穌koh大聲喉叫，就斷氣。Iâ-so͘ koh tōa siaⁿ âu-kiò, chiū tn̄g khùi.

51忽然殿內ê帳，tùi頂到下，裂做兩pêng；地動，石磐裂；Hut-jiân tiān-lāi ê tiùⁿ, tùi téng kàu ē, li̍h chòe nn̄g pêng; tōe tāng, chio̍h-pôaⁿ li̍h;

52墓開，已經teh睏ê聖徒，in ê身軀chōe-chōe起來，tùi in ê墓出；bōng khui, í-keng teh khùn ê sèng-tô͘, in ê sin-khu chōe-chōe khí-lâi, tùi in ê bōng chhut;

53到耶穌koh活了後，in入聖城，出現tī chōe-chōe人。kàu Iâ-so͘ koh-oa̍h liáu-āu, in ji̍p sèng siâⁿ, chhut-hiān tī chōe-chōe lâng.

54百總kap相同顧守耶穌ê，看見地動，kap所經過ê事，不止驚，講，Chit-ê果然是上帝ê Kiáⁿ。Pé-chóng kap saⁿ-tâng kò͘-siú Iâ-so͘ ê, khòaⁿ-kìⁿ tōe-tāng, kap só͘ keng-kè ê sū, put-chí kiaⁿ, kóng, Chit-ê kó-jiân sī Siōng-tè ê Kiáⁿ.

55有chōe-chōe婦人人tī hia遠遠teh看；in就是tùi加利利跟tè耶穌來服事伊ê；Ū chōe-chōe hū-jîn-lâng tī hia hn̄g-hn̄g teh khòaⁿ; in chiū-sī tùi Ka-lī-lī kun-tè Iâ-so͘ lâi ho̍k-sāi I ê;

56從中有抹大拉ê馬利亞，雅各約西ê老母馬利亞，kap西庇太ê Kiáⁿ ê老母。chiông-tiong ū Boa̍t-tāi-lia̍p ê Má-lī-a, Ngá-kok kah Iok-sek(**Iok-se) ê lāu-bú Má-lī-a, kap Se-pí-thài ê kiáⁿ ê lāu-bú.

57已經暗，有A-lī-má-thài ê好額人來，名做約瑟，伊也是耶穌ê學生。Í-keng àm, ū A-lī-má-thài ê hó-gia̍h lâng lâi, miâ chòe Iok-sek, i iā sī Iâ-so͘ ê ha̍k-seng.

58Hit人去見彼拉多，求耶穌ê身屍；彼拉多吩咐tio̍h hō͘伊。Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to hoan-hù tio̍h hō͘ i.

59約瑟收hit-ê身屍，用清氣ê幼布包伊；Iok-sek siu hit ê sin-si, ēng chheng-khì ê iù-pò͘ pau i;

60hē tī伊家己ê新墓，就是伊tī石磐所phah ê；就kō大塊石tī墓門，chiah去。hē tī i ka-kī ê sin bōng, chiū-sī i tī chio̍h-pôaⁿ só͘ phah ê; chiū kō tōa tè chio̍h tī bōng-mn̂g, chiah khì.

61有抹大拉ê馬利亞kap別個馬利亞tī hia，坐tī墓ê對面。Ū Boa̍t-tāi-lia̍p ê Má-lī-a kap pa̍t ê Má-lī-a tī hia, chē tī bōng ê tùi-bīn.

62隔日，就是備辦節後ê一日，hiah-ê祭司頭kap法利賽人聚集見彼拉多講，Keh ji̍t, chiū-sī pī-pān choeh āu ê chi̍t ji̍t, hiah ê chè-si-thâu kap Hoat-lī-sài lâng chū-chi̍p kìⁿ Pí-lia̍p-to kóng,

63大人ah，阮記得hit-ê迷惑人ê，活teh ê時bat講，三日後我beh koh活。Tāi-jîn ah, goán kì-tit hit ê bê-he̍k lâng ê, oa̍h-teh ê sî bat kóng, Saⁿ ji̍t āu góa beh koh-oa̍h.

64所以請你命令顧守hit-ê墓，到第三日；驚了伊ê學生來偷伊去，亦kā百姓講，伊tùi死人中koh活；án-ni，就後來ê差謬，比事先khah厲害。Só͘-í chhiáⁿ lí bēng-lēng kò͘-siú hit ê bōng, kàu tē saⁿ ji̍t; kiaⁿ-liáu I ê ha̍k-seng lâi thau I khì, ia̍h kā peh-sìⁿ kóng, I tùi sí-lâng tiong koh-oa̍h; án-ni, chiū āu-lâi ê chha-biū, pí tāi-seng khah lī-hāi.

65彼拉多kā in講，Lín領兵去，照lín所知影ê去顧守。Pí-lia̍p-to kā in kóng, Lín niá peng khì, chiàu lín só͘ chai-iáⁿ ê khì kò͘-siú.

66In就去，封石kap設兵，來顧守hit-ê墓。In chiū khì, hong chio̍h kap siat peng, lâi kò͘-siú hit ê bōng.

1安歇日後，七日ê頭一日，天phú光。抹大拉ê馬利亞kap別個馬利亞來beh看hit-ê墓。An-hioh-ji̍t āu, chhit ji̍t ê thâu chi̍t ji̍t, thiⁿ phú-kng. Boa̍t-tāi-lia̍p ê Má-lī-a kap pa̍t ê Má-lī-a lâi beh khòaⁿ hit ê bōng.

2忽然地大振動，因為主ê天使tùi天落來，kō開hit塊石，來坐tī頂面。Hut-jiân tōe tōa tín-tāng, in-ūi Chú ê thiⁿ-sài tùi thiⁿ lo̍h-lâi, kō khui hit tè chio̍h, lâi chē tī téng-bīn.

3伊ê面貌親像sih-nà，衫白親像雪。I ê bīn-māu chhin-chhiūⁿ sih-nà, saⁿ pe̍h chhin-chhiūⁿ seh.

4顧守ê人因為驚，就ngia̍uh-ngia̍uh-chhoah，變親像死。Kò͘-siú ê lâng in-ūi kiaⁿ, chiū ngia̍uh-ngia̍uh-chhoah, piàn chhin-chhiūⁿ sí.

5天使應hiah-ê婦人人講，Lín m̄免驚，因為我知lín teh chhē釘十字架ê耶穌。Thiⁿ-sài ìn hiah ê hū-jîn-lâng kóng, Lín m̄ bián kiaⁿ, in-ūi góa chai lín teh chhē tèng si̍p-jī-kè ê Iâ-so͘.

6伊無tī chia，因為伊已經koh活，照伊所講ê；lín來看主所倒ê所在。I bô tī chia, in-ūi I í-keng koh-oa̍h, chiàu I só͘ kóng ê; lín lâi khòaⁿ Chú só͘ tó ê só͘-chāi.

7也tio̍h緊緊去kā伊ê學生講，伊tùi死人中koh活，也beh事先lín去加利利，tī hia lín beh看見伊；我已經kā lín講lah。Iā tio̍h kín-kín khì kā I ê ha̍k-seng kóng, I tùi sí-lâng tiong koh-oa̍h, iā beh tāi-seng lín khì Ka-lī-lī, tī hia lín beh khòaⁿ-kìⁿ I; góa í-keng kā lín kóng lah.

8In緊緊離開墓，也驚也大歡喜，走去報伊ê學生。In kín-kín lī-khui bōng, iā kiaⁿ iā tōa hoaⁿ-hí, cháu khì pò I ê ha̍k-seng.

9忽然耶穌tú-tio̍h in，講，平安。In進前，抱伊ê腳，拜伊。Hut-jiân Iâ-so͘ tú-tio̍h in, kóng, Pêng-an. In chìn-chêng, phō I ê kha, pài I.

10耶穌就kā in講，M̄免驚，去報我ê兄弟，kah in去加利利，tī hia beh看見我。Iâ-so͘ chiū kā in kóng, M̄ bián kiaⁿ, khì pò góa ê hiaⁿ-tī, kah in khì Ka-lī-lī, tī hia beh khòaⁿ-kìⁿ góa.

11婦人人去ê時，顧守ê兵有ê入城，用所經過ê事一盡報chiah-ê祭司頭。Hū-jîn-lâng khì ê sî, kò͘-siú ê peng ū-ê ji̍p siâⁿ, ēng só͘ keng-kè ê sū it-chīn pò chiah ê chè-si-thâu.

12In就kap長老聚集，saⁿ-kap參詳，用chōe-chōe銀hō͘兵，講，In chiū kap tiúⁿ-ló chū-chi̍p, saⁿ-kap chham-siông, ēng chōe-chōe gûn hō͘ peng, kóng,

13Lín tio̍h講，阮teh睏ê時，伊ê學生暝時來偷去。Lín tio̍h kóng, Goán teh khùn ê sî, I ê ha̍k-seng mî-sî lâi thau-khì.

14設使chit-ê tāi-chì hō͘總督聽見，阮就beh勸伊，hō͘ lín無事。Siat-sú chit ê tāi-chì hō͘ chóng-tok thiaⁿ-kìⁿ, goán chiū beh khǹg i, hō͘ lín bô sū.

15In the̍h hiah-ê銀，照所教in ê去行；chit-ê話就遍傳猶太人中，到tī今á日。In the̍h hiah ê gûn, chiàu só͘ kà in ê khì kiâⁿ; chit ê ōe chiū piàn thoân Iû-thài lâng tiong, kàu tī kin-á-ji̍t.

16但是十一個學生去加利利，到耶穌所bat kā in tiāⁿ-tio̍h ê山。Nā-sī cha̍p-it ê ha̍k-seng khì Ka-lī-lī, kàu Iâ-so͘ só͘ bat kā in tiāⁿ-tio̍h ê soaⁿ.

17看見伊，就拜伊；總是有ê僥疑。Khòaⁿ-kìⁿ I, chiū pài I; chóng-sī ū-ê giâu-gî.

18耶穌近óa來對in講話，講，天頂地下ê權，已經lóng總hō͘我。Iâ-so͘ kūn-óa lâi tùi in kóng ōe, kóng, Thiⁿ-téng tōe-ē ê koân, í-keng lóng-chóng hō͘ góa.

19所以lín tio̍h去招萬百姓 來做學生，kā in行洗禮，hō͘ in歸tī父，Kiáⁿ，聖神ê名；Só͘-í lín tio̍h khì chio bān peh-sìⁿ lâi chòe ha̍k-seng, kā in kiâⁿ sóe-lé, hō͘ in kui tī Pē, Kiáⁿ, Sèng Sîn ê miâ;

20見若我所有命令lín ê，tio̍h教示in守；koh我日日kap lín tī-teh，到世間ê路尾。kìⁿ-nā góa só͘ ū bēng-lēng lín ê, tio̍h kà-sī in siú; koh góa ji̍t-ji̍t kap lín tī-teh, kàu sè-kan ê lō͘-bé.

1上帝ê Kiáⁿ耶穌基督福音ê起頭。Siōng-tè ê Kiáⁿ Iâ-so͘ Ki-tok hok-im ê khí-thâu.

2親像tī先知以賽亞ê冊所記載講， 我差我ê使者tī你ê面前， 來修整你ê路；Chhin-chhiūⁿ tī sian-ti Í-sài-a ê chheh só͘ kì-chài kóng, Góa chhe góa ê sù-chiá tī lí ê bīn-chêng, Lâi siu-chéng lí ê lō͘;

3有teh叫tī曠野ê，伊ê聲講， Tio̍h備辦主ê路， 修直伊ê小路。Ū teh kiò tī khòng-iá ê, i ê siaⁿ kóng, Tio̍h pī-pān Chú ê lō͘, Siu ti̍t I ê sió lō͘.

4約翰來tī曠野行洗禮，傳反悔ê洗禮，hō͘人得tio̍h赦罪。Iok-hān lâi tī khòng-iá kiâⁿ sóe-lé, thoân hoán-hóe ê sóe-lé, hō͘ lâng tit-tio̍h sià-chōe.

5Thong猶太地kap耶路撒冷ê眾人lóng出來就近伊，認in ê罪，tī約旦河tùi伊受洗禮。Thong Iû-thài tōe kap Iâ-lō͘-sat-léng ê chèng lâng lóng chhut-lâi chiū-kūn i, jīn in ê chōe, tī Iok-tàn hô tùi i siū sóe-lé.

6Chit-ê約翰穿駱駝毛，腰hâ皮帶，食草蜢kap山野ê蜜。Chit ê Iok-hān chhēng lo̍k-tô-mn̂g, io hâ phê-tòa, chia̍h chháu-meh kap soaⁿ-iá ê bi̍t.

7伊傳講，有一個比我khah有權能ê tè尾我來；就屈落來tháu伊ê鞋帶，我也bōe堪得。I thoân kóng, Ū chi̍t-ê pí góa khah ū koân-lêng ê tè-bé góa lâi; chiū khut-lo̍h lâi tháu I ê ôe-tòa, góa iā bōe kham-tit.

8我bat用水kā lín行洗禮，伊beh用聖神kā lín洗。Góa bat ēng chúi kā lín kiâⁿ sóe-lé, I beh ēng Sèng Sîn kā lín sóe.

9當chiah-ê日耶穌tùi加利利ê拿撒勒來，tī約旦河tùi約翰受洗禮。Tng chiah ê ji̍t Iâ-so͘ tùi Ka-lī-lī ê Ná-sat-le̍k lâi, tī Iok-tàn hô tùi Iok-hān siū sóe-lé.

10即時tùi水起來，就看見天裂開，聖神親像鴿á降臨tī伊ê頂面；Chek-sî tùi chúi khí-lâi, chiū khòaⁿ-kìⁿ thiⁿ li̍h-khui, Sèng Sîn chhin-chhiūⁿ chíⁿ-á kàng-lîm tī I ê téng-bīn;

11koh tùi天有聲講，你是我所疼ê Kiáⁿ，我歡喜你。koh tùi thiⁿ ū siaⁿ kóng, Lí sī góa só͘ thiàⁿ ê Kiáⁿ, góa hoaⁿ-hí lí.

12聖神即時逼伊去曠野。Sèng Sîn chek-sî pek I khì khòng-iá.

13Tī曠野四十日，tú-tio̍h撒旦試，也kap野獸saⁿ-kap tòa；有天使伺候伊。Tī khòng-iá sì-cha̍p ji̍t, tú-tio̍h Sat-tàn chhì, iā kap iá-siù saⁿ-kap tòa; ū thiⁿ-sài su-hāu I.

14約翰已經關監，耶穌到加利利，傳上帝ê福音，講，Iok-hān í-keng koaiⁿ-kaⁿ, Iâ-so͘ kàu Ka-lī-lī, thoân Siōng-tè ê hok-im, kóng,

15日期滿lah，上帝ê國近lah；lín tio̍h反悔來信福音。Ji̍t-kî móa lah, Siōng-tè ê kok kūn lah; lín tio̍h hoán-hóe lâi sìn hok-im.

16耶穌經過加利利ê海墘，看見西門kap伊ê兄弟安得烈拋網tī海裡；因為是討魚人。Iâ-so͘ keng-kè Ka-lī-lī ê hái-kîⁿ, khòaⁿ-kìⁿ Se-bûn kap i ê hiaⁿ-tī An-tek-lia̍t pha bāng tī hái-ni̍h; in-ūi sī thó-hî lâng.

17耶穌kā in講，Lín來tè我，我beh hō͘ lín得tio̍h人親像討魚ê。Iâ-so͘ kā in kóng, Lín lâi tè góa, góa beh hō͘ lín tit-tio̍h lâng chhin-chhiūⁿ thó-hî ê.

18In liâm-piⁿ離開網，來tè伊。In liâm-piⁿ lī-khui bāng, lâi tè I.

19Lio̍h-á進前，看見西庇太ê Kiáⁿ雅各kap伊ê兄弟約翰tī船裡teh補網。Lio̍h-á chìn-chêng, khòaⁿ-kìⁿ Se-pí-thài ê kiáⁿ Ngá-kok kap i ê hiaⁿ-tī Iok-hān tī chûn-ni̍h teh pó͘ bāng.

20伊liâm-piⁿ招in，in就拜別in老父西庇太kap倩工人tī船裡，來tè tī伊ê後面。I liâm-piⁿ chio in, in chiū pài-pia̍t in lāu-pē Se-pí-thài kap chhiàⁿ-kang lâng tī chûn-ni̍h, lâi tè tī I ê āu-bīn.

21In入迦百農，耶穌tī安歇日入會堂，教示人。In ji̍p Ka-pek-lông, Iâ-so͘ tī an-hioh-ji̍t ji̍p hōe-tn̂g, kà-sī lâng.

22人奇怪伊ê教示；因為伊教示人親像有權ê，無親像經學士。Lâng kî-koài I ê kà-sī; in-ūi I kà-sī lâng chhin-chhiūⁿ ū koân ê, bô chhin-chhiūⁿ keng-ha̍k-sū.

23Tú-á會堂內有一個患tio̍h鬼ê人喉叫講，Tú-á hōe-tn̂g lāi ū chi̍t ê hoān-tio̍h kúi ê lâng âu-kiò kóng,

24拿撒勒人耶穌，阮kap你甚麼干涉？你來beh滅阮mah？我知你是是誰，就是上帝ê聖ê。Ná-sat-le̍k lâng Iâ-so͘, goán kap lí sím-mi̍h kan-sia̍p? Lí lâi beh bia̍t goán mah? Góa chai lí sī chī-chūi, chiū-sī Siōng-tè ê Sèng ê.

25耶穌責備伊講，你tio̍h靜靜，tùi chit人出去。Iâ-so͘ chek-pī i kóng, Lí tio̍h chēng-chēng, tùi chit lâng chhut-khì.

26邪神thiu-chhoah hit人，大聲叫，就tùi伊出去。Siâ-sîn thiu-chhoah hit lâng, tōa siaⁿ kiò, chiū tùi i chhut-khì.

27眾人lóng gông-ngia̍h，致到saⁿ辯論，講，chit-ê是怎樣？是新ê教示。伊用權命令邪神，邪神也sūn-thàn伊。Chèng lâng lóng gông-ngia̍h, tì-kàu saⁿ piān-lūn, kóng, Chit-ê sī cháiⁿ-iūⁿ? Sī sin ê kà-sī. I ēng koân bēng-lēng siâ-sîn, siâ-sîn iā sūn-thàn I.

28伊ê名聲隨時遍傳加利利ê四方。I ê miâ-siaⁿ sûi-sî piàn thoân Ka-lī-lī ê sì-hng.

29In已經出會堂，隨時kap雅各約翰入西門kap安得烈ê家。In í-keng chhut hōe-tn̂g, sûi-sî kap Ngá-kok Iok-hān ji̍p Se-bûn kap An-tek-lia̍t ê ke.

30西門ê丈母患tio̍h熱病倒teh，隨時有人將這kā耶穌講。Se-bûn ê tiūⁿ-ḿ hoān-tio̍h jia̍t-pīⁿ tó-teh. Sûi-sî ū lâng chiong che kā Iâ-so͘ kóng.

31伊近óa牽伊ê手，hō͘伊起來，熱就退；婦人人就伺候in。I kūn-óa khan i ê chhiú, hō͘ i khí-lâi, jia̍t chiū thè; hū-jîn-lâng chiū su-hāu in.

32到黃昏暗，日落了，有人chhōa lóng總有破病ê，kap患tio̍h鬼ê人就近伊。Kàu hông-hun àm, ji̍t lo̍h liáu, ū lâng chhōa lóng-chóng ū phòa-pīⁿ ê, kap hoān-tio̍h kúi ê lâng chiū-kūn I.

33Thong城lóng聚集tī門口。Thong siâⁿ lóng chū-chi̍p tī mn̂g-kháu.

34耶穌醫好ta̍k樣病ê人chōe-chōe，koh趕chōe-chōe鬼；因為鬼bat伊，所以m̄准in講。Iâ-so͘ i-hó ta̍k iūⁿ pīⁿ ê lâng chōe-chōe, koh kóaⁿ chōe-chōe kúi; in-ūi kúi bat I, só͘-í m̄ chún in kóng.

35隔早起，天iáu不止暗，耶穌起來出去曠野ê所在，tī hia祈禱。Keh chá-khí, thiⁿ iáu put-chí àm, Iâ-so͘ khí-lâi chhut-khì khòng-iá ê só͘-chāi, tī hia kî-tó.

36西門kap同伴ê人追chhē伊。Se-bûn kap tâng-phōaⁿ ê lâng tui-chhē I.

37已經tú-tio̍h就kā伊講，眾人lóng teh chhē你。Í-keng tú-tio̍h chiū kā I kóng, Chèng lâng lóng teh chhē lí.

38伊kā in講，咱來去別位；到附近ê埠頭，hō͘我thang tī hia傳道；因為我為tio̍h chit-ê事，chiah出來。I kā in kóng, Lán lâi khì pa̍t ūi; kàu hū-kūn ê po͘-thâu, hō͘ góa thang tī hia thoân-tō; in-ūi góa ūi-tio̍h chit ê sū, chiah chhut-lâi.

39就去遍加利利，入in ê會堂，宣傳道理，koh趕鬼。Chiū khì piàn Ka-lī-lī, ji̍p in ê hōe-tn̂g, soan-thoân tō-lí, koh kóaⁿ kúi.

40有一個thái-ko ê就近伊，求伊，跪伊，kā伊講，你若肯，就會hō͘我清氣。Ū chi̍t ê thái-ko ê chiū-kūn I, kiû I, kūi I, kā I kóng, Lí nā khéng, chiū ōe hō͘ góa chheng-khì.

41耶穌可憐，伸手摸伊，kā伊講，我肯，你thang清氣。Iâ-so͘ khó-lîn, chhun chhiú bong i, kā i kóng, Góa khéng, lí thang chheng-khì.

42Thái-ko即時除去；伊就清氣。Thái-ko chek-sî tû--khì; i chiū chheng-khì.

43耶穌嚴嚴警戒伊，隨時kah伊去；也kā伊講，Iâ-so͘ giâm-giâm kéng-kài i, sûi-sî kah i khì; iā kā i kóng,

44Tio̍h謹慎莫得kā人講甚麼；獨獨tio̍h去，將本身hō͘祭司驗，亦為tio̍h你得tio̍h清氣，獻摩西所吩咐ê，來做證據tī人。Tio̍h kín-sīn bo̍h-tit kā lâng kóng sím-mi̍h; to̍k-to̍k tio̍h khì, chiong pún-sin hō͘ chè-si giām, ia̍h ūi-tio̍h lí tit-tio̍h chheng-khì, hiàn Mô͘-se só͘ hoan-hù ê, lâi chòe chèng-kù tī lâng.

45總是伊出去，就大大宣傳，四界報揚chit-ê事；致到耶穌無thang koh顯然入城，獨獨tòa tī外面曠野ê所在。人tùi四方就近伊。Chóng-sī i chhut-khì, chiū tōa-tōa soan-thoân, sì-kè pò-iông chit ê sū; tì-kàu Iâ-so͘ bô thang koh hián-jiân ji̍p siâⁿ, to̍k-to̍k tòa tī gōa-bīn khòng-iá ê só͘-chāi. Lâng tùi sì-hng chiū-kūn I.