1當希律王ê時，耶穌已經出世tī猶太ê伯利恆，有幾nā個博士tùi東方來到耶路撒冷，Tng Hi-lu̍t ông ê sî, Iâ-so͘ í-keng chhut-sì tī Iû-thài ê Pek-lī-hêng, ū kúi-nā ê phok-sū tùi tang-hng lâi kàu Iâ-lō͘-sat-léng,

2講，出世做猶太人ê王ê tī tá-lo̍h？因為阮tī東方有看見伊ê星，chiah來beh拜伊。kóng, Chhut-sì chòe Iû-thài lâng ê ông ê tī tá-lo̍h? in-ūi goán tī tang-hng ū khòaⁿ-kìⁿ I ê chhiⁿ, chiah lâi beh pài I.

3希律王聽見就peh-pak，thong耶路撒冷亦是án-ni。Hi-lu̍t ông thiaⁿ-kìⁿ chiū peh-pak, thong Iâ-lō͘-sat-léng ia̍h sī án-ni.

4就聚集眾祭司頭，kap百姓間ê經學士，問in基督tio̍h tī甚麼所在出世。Chiū chū-chi̍p chèng chè-si-thâu, kap peh-sìⁿ-kan ê keng-ha̍k-sū, mn̄g in Ki-tok tio̍h tī sím-mi̍h só͘-chāi chhut-sì.

5In kā伊講，Tī猶太ê伯利恆；因為先知有記載講，In kā i kóng, Tī Iû-thài ê Pek-lī-hêng; in-ūi sian-ti ū kì-chài kóng,

6猶太地，伯利恆ah， Tī猶太chiah-ê頭人中，　　你lóng m̄是第一細ê； 因為beh有一個人君對你出，　　來照顧我ê百姓以色列。Iû-thài tōe, Pek-lī-hêng ah, Tī Iû-thài chiah ê thâu-lâng tiong, lí lóng m̄ sī tē it sòe ê; In-ūi beh ū chi̍t ê jîn-kun tùi lí chhut, lâi chiàu-kò͘ góa ê peh-sìⁿ Í-sek-lia̍t.

7Tùi án-ni，希律暗靜召博士，對in詳細查hit-ê星出現ê時。Tùi án-ni, Hi-lu̍t àm-chīⁿ tiàu phok-sū, tùi in siông-sè chhâ hit ê chhiⁿ chhut-hiān ê sî.

8就差in去伯利恆講，Lín去詳細探聽hit-ê嬰á ê事；chhē-tio̍h就來kā我講，hō͘我也thang去拜伊。Chiū chhe in khì Pek-lī-hêng kóng, Lín khì siông-sè thàm-thiaⁿ hit ê eⁿ-á ê sū; chhē-tio̍h chiū lâi kā góa kóng, hō͘ góa iā thang khì pài I.

9In聽王ê話就去；忽然東方所看見ê星做頭chhōa in，到嬰á ê所在，就歇tī hit頂面。In thiaⁿ ông ê ōe chiū khì; hut-jiân tang-hng só͘ khòaⁿ-kìⁿ ê chhiⁿ chòe thâu chhōa in, kàu eⁿ-á ê só͘-chāi, chiū hioh tī hit téng-bīn.

10In看見hit-ê星，歡喜到bōe顧得。In khòaⁿ-kìⁿ hit ê chhiⁿ, hoaⁿ-hí kàu bōe kò͘-tit.

11入厝，看見嬰á kap伊ê老母馬利亞；就仆落拜嬰á；開in ê寶盒，獻禮物hō͘伊，就是黃金、乳香、沒藥。Ji̍p chhù, khòaⁿ-kìⁿ eⁿ-á kap I ê lāu-bú Má-lī-a; chiū phak-lo̍h pài eⁿ-á; khui in ê pó-a̍h, hiàn lé-mi̍h hō͘ I, chiū-sī n̂g-kim, jú-hiuⁿ, bu̍t-io̍h.

12Koh tī眠夢中得tio̍h指點，教in m̄-thang 倒tńg去就近希律，就tùi別條路倒去本所在。Koh tī bîn-bāng-tiong tit-tio̍h chí-tiám, kah in m̄-thang tò-tńg khì chiū-kūn Hi-lu̍t, chiū tùi pa̍t tiâu lō͘ tò-khì pún só͘-chāi.

13In倒去了，有主ê天使tī約瑟眠夢中出現講，起來，chhōa嬰á kap伊ê老母，走去埃及，tòa hia到我kā你講；因為希律beh chhē嬰á來滅伊。In tò-khì liáu, ū Chú ê thiⁿ-sài tī Iok-sek bîn-bāng-tiong chhut-hiān kóng, Khí-lâi, chhōa eⁿ-á kap I ê lāu-bú, cháu khì Ai-ki̍p, tòa hia kàu góa kā lí kóng; in-ūi Hi-lu̍t beh chhē eⁿ-á lâi bia̍t I.

14伊就起來，透暝chhōa嬰á kap伊ê老母去埃及。；tòa hia到希律死；I chiū khí-lâi, thàu-mî chhōa eⁿ-á kap I ê lāu-bú khì Ai-ki̍p.; tòa hia kàu Hi-lu̍t sí;

15是beh應驗主託先知所講ê，講，我bat召我ê kiáⁿ出埃及。sī beh èng-giām Chú thok sian-ti só͘ kóng ê, kóng, Góa bat tiàu góa ê kiáⁿ chhut Ai-ki̍p.

16Hit時希律知hō͘博士設去，就大受氣，差人將伯利恆kap周圍所有ê ta-po͘ gín-ná，照伊tùi博士詳細查ê時，凡若二歲以下ê一盡thâi。Hit sî Hi-lu̍t chai hō͘ phok-sū siat-khì, chiū tōa siū-khì, chhe lâng chiong Pek-lī-hêng kap chiu-ûi só͘ ū ê ta-po͘ gín-ná, chiàu i tùi phok-sū siông-sè chhâ ê sî, hoān-nā nn̄g hè í-hā ê it-chīn thâi.

17Án-ni應驗早託先知耶利米所講ê，講，Án-ni èng-giām chá thok sian-ti Iâ-lī-bí só͘ kóng ê, kóng,

18Tī Lia̍p-má聽見聲， 啼哭koh大傷悲， Lia̍p-結哭伊ê kiáⁿ兒； M̄願受安慰，因為in無--去。Tī Lia̍p-má thiaⁿ-kìⁿ siaⁿ, Thî-khàu koh tōa siong-pi, Lia̍p-kiat khàu i ê kiáⁿ-jî; M̄ goān siū an-ùi, in-ūi in bô--khì.

19希律已經死，主ê天使tī埃及，tī約瑟眠夢中出現講，Hi-lu̍t í-keng sí, Chú ê thiⁿ-sài tī Ai-ki̍p, tī Iok-sek bîn-bāng-tiong chhut-hiān kóng,

20起來，chhōa嬰á kap伊ê老母去以色列地；因為hiah-ê ài害嬰á ê性命ê已經死lah。Khí-lâi, chhōa eⁿ-á kap I ê lāu-bú khì Í-sek-lia̍t tōe; in-ūi hiah-ê ài hāi eⁿ-á ê sìⁿ-miā ê í-keng sí lah.

21伊就起來，chhōa嬰á kap伊ê老母到以色列地。I chiū khí-lâi, chhōa eⁿ-á kap I ê lāu-bú kàu Í-sek-lia̍t tōe.

22總是聽見A-ki-ló續接伊ê老父希律tī猶太做王，就m̄敢去hia；既然tī眠夢中得tio̍h指點，就退去加利利ê境內。Chóng-sī thiaⁿ-kìⁿ A-ki-ló sòa-chiap i ê lāu-pē Hi-lu̍t tī Iû-thài chòe ông, chiū m̄ káⁿ khì hia; kì-jiân tī bîn-bāng-tiong tit-tio̍h chí-tiám, chiū thè-khì Ka-lī-lī ê kéng-lāi.

23到一個城，名拿撒勒，tiàm hia khiā起；是beh應驗早託chiah-ê先知所講ê講，伊beh叫做拿撒勒人。Kàu chi̍t ê siâⁿ, miâ Ná-sat-le̍k, tiàm hia khiā-khí; sī beh èng-giām chá thok chiah ê sian-ti só͘ kóng ê kóng, I beh kiò chòe Ná-sat-le̍k lâng.

1當hit時，行洗禮ê約翰來，tī猶太ê曠野宣傳講，Tng hit sî, kiâⁿ sóe-lé ê Iok-hān lâi, tī Iû-thài ê khòng-iá soan-thoân kóng,

2Lín tio̍h反悔；因為天國近lah。Lín tio̍h hoán-hóe; in-ūi thian-kok kūn lah.

3Chit人就是主託先知以賽亞所指ê，講， 有teh叫tī曠野ê，伊ê聲講， 備辦主ê路， 修直伊ê小路。Chit lâng chiū-sī Chú thok sian-ti Í-sài-a só͘ chí ê, kóng, Ū teh kiò tī khòng-iá ê, i ê siaⁿ kóng, Pī-pān Chú ê lō͘, Siu ti̍t I ê sió-lō͘.

4Chit-ê約翰穿駱駝毛ê衫，腰hâ皮帶；伊所食是草蜢kap山野ê蜜。Chit ê Iok-hān chhēng lo̍k-tô-mn̂g ê saⁿ, io hâ phê-tòa; i só͘ chia̍h sī chháu-meh kap soaⁿ-iá ê bi̍t.

5Hit時耶路撒冷kap thong猶太，以及約旦四方ê眾人出來就近伊；Hit sî Iâ-lō͘-sat-léng kap thong Iû-thài, í-ki̍p Iok-tàn sì-hng ê chèng lâng chhut-lâi chiū-kūn i;

6tī約旦河tùi伊受洗禮，認in ê罪。tī Iok-tàn hô tùi i siū sóe-lé, jīn in ê chōe.

7約翰看見法利賽kap撒都該人，chōe-chōe就近伊ê洗禮，就kā in講，毒蛇ê類ah，是誰-á指示lín閃避將來ê受氣ah？Iok-hān khòaⁿ-kìⁿ Hoat-lī-sài kap Sat-thó͘-kai lâng, chōe-chōe chiū-kūn i ê sóe-lé, chiū kā in kóng, To̍k-chôa ê lūi ah, chī-chūi-á chí-sī lín siám-pī chiong-lâi ê siū-khì ah?

8所以lín tio̍h結hit號合tī反悔ê果子。Só͘-í lín tio̍h kiat hit hō ha̍p tī hoán-hóe ê ké-chí.

9莫得家己phah算講，有亞伯拉罕做阮ê父；因為我kā lín講，上帝會tùi chiah-ê石頭出kiáⁿ孫hō͘亞伯拉罕。Bo̍h-tit ka-kī phah-sǹg kóng, Ū A-pek-la̍h-hán chòe goán ê pē; in-ūi góa kā lín kóng, Siōng-tè ōe tùi chiah ê chio̍h-thâu chhut kiáⁿ-sun hō͘ A-pek-la̍h-hán.

10Taⁿ斧頭已經hē tī樹頭；見若樹無結好果子ê，就chhò伊，hiat落火。Taⁿ pó͘-thâu í-keng hē tī chhiū-thâu; kìⁿ-nā chhiū bô kiat hó ké-chí ê, chiū chhò i, hiat-lo̍h hé.

11我用水kā lín行洗禮，beh hō͘ lín反悔；但是tè尾我來ê，比我khah有權能，伊ê鞋我亦bōe堪得the̍h；伊beh用聖神kap火kā lín洗。Góa ēng chúi kā lín kiâⁿ sóe-lé, beh hō͘ lín hoán-hóe; nā-sī tè-bé góa lâi ê, pí góa khah ū koân-lêng, I ê ôe góa ia̍h bōe kham-tit the̍h; I beh ēng Sèng Sîn kap hé kā lín sóe.

12伊ê手the̍h簸箕，beh將伊hit場一盡簸，收伊ê麥入倉；若是麥hiūⁿ就用bōe-hoa ê火燒伊。I ê chhiú the̍h pòa-ki, beh chiong I hit tiûⁿ it-chīn pòa, siu I ê be̍h ji̍p chhng; nā-sī be̍h-hiūⁿ chiū ēng bōe hoa ê hé sio i.

13Hit時耶穌tùi加利利到約旦，就近約翰，beh tùi伊受洗禮。Hit sî Iâ-so͘ tùi Ka-lī-lī kàu Iok-tàn, chiū-kūn Iok-hān, beh tùi i siū sóe-lé.

14但是約翰阻止伊講，我ha̍p-kai對你受洗禮，你反tńg就近我mah？Nā-sī Iok-hān chó͘-chí I kóng, Góa ha̍p-kai tùi lí siū sóe-lé, lí hoán-tńg chiū-kūn góa mah?

15耶穌應伊講，Taⁿ請允我，因為咱合宜tio̍h án-ni，來盡lóng總ê義。就允伊。Iâ-so͘ ìn i kóng, Taⁿ chhiáⁿ ún góa, in-ūi lán ha̍p-gî tio̍h án-ni, lâi chīn lóng-chóng ê gī. Chiū ún I.

16耶穌已經受洗禮，liâm-piⁿ tùi水上來：天忽然為tio̍h伊開，伊就看見上帝ê神，親像鴿á降臨tī伊ê頂面。Iâ-so͘ í-keng siū sóe-lé, liâm-piⁿ tùi chúi chiūⁿ-lâi: thiⁿ hut-jiân ūi-tio̍h I khui, I chiū khòaⁿ-kìⁿ Siōng-tè ê Sîn, chhin-chhiūⁿ chíⁿ-á kàng-lîm tī I ê téng-bīn.

17Koh tùi天有聲講，chit-ê是我疼ê Kiáⁿ，我所歡喜ê。Koh tùi thiⁿ ū siaⁿ kóng, Chit-ê sī góa thiàⁿ ê Kiáⁿ, góa só͘ hoaⁿ-hí ê.

1Hit時耶穌hō͘聖神chhōa到曠野，beh受魔鬼試。Hit sî Iâ-so͘ hō͘ Sèng Sîn chhōa kàu khòng-iá, beh siū Mô͘-kúi chhì.

2已經禁食四十日暝，後來就iau。Í-keng kìm-chia̍h sì-cha̍p ji̍t-mî, āu-lâi chiū iau.

3試ê óa來kā伊講，你若是上帝ê Kiáⁿ，就教chiah-ê石變做餅。但是伊應講，Chhì-ê óa-lâi kā I kóng, Lí nā sī Siōng-tè ê Kiáⁿ, chiū kah chiah ê chio̍h pìⁿ chòe piáⁿ. Nā-sī I ìn kóng,

4有記載講，人ê活，m̄-nā óa靠餅，就是óa靠tùi上帝ê嘴所出lóng總ê話。Ū kì-chài kóng, Lâng ê oa̍h, m̄ nā óa-khò piáⁿ, chiū-sī óa-khò tùi Siōng-tè ê chhùi só͘ chhut lóng-chóng ê ōe.

5魔鬼就chhōa伊到聖城，hō͘伊khiā tī殿ê尾溜，kā伊講，Mô͘-kúi chiū chhōa I kàu sèng siâⁿ, hō͘ I khiā tī tiān ê bé-liu, kā I kóng,

6你若是上帝ê Kiáⁿ，tio̍h家己tiô落去；因為有記載講， 伊beh為tio̍h你命令伊ê天使， In beh用手扶你， 免得你ê腳tak-tio̍h石。Lí nā sī Siōng-tè ê Kiáⁿ, tio̍h ka-kī tiô-lo̍h-khì; in-ūi ū kì-chài kóng, I beh ūi-tio̍h lí bēng-lēng I ê thiⁿ-sài, In beh ēng chhiú hû lí, Bián-tit lí ê kha tak-tio̍h chio̍h.

7耶穌kā伊講，Koh有記載講，莫得試主你ê上帝。Iâ-so͘ kā i kóng, Koh ū kì-chài kóng, Bo̍h-tit chhì Chú lí ê Siōng-tè.

8魔鬼koh chhōa伊上極高ê山，用天下萬國kap in ê榮光hō͘伊看；Mô͘-kúi koh chhōa I chiūⁿ ke̍k koâiⁿ ê soaⁿ, ēng thiⁿ-ē bān kok kap in ê êng-kng hō͘ I khòaⁿ;

9kā伊講，你若仆落拜我，chiah-ê我lóng hō͘你。kā I kóng, Lí nā phak-lo̍h pài góa, chiah-ê góa lóng hō͘ lí.

10耶穌就kā伊講，撒旦，退去；因為有記載講，Tio̍h拜主，你ê上帝；獨獨服事inā-tiāⁿ。Iâ-so͘ chiū kā i kóng, Sat-tàn, thè-khì; in-ūi ū kì-chài kóng, Tio̍h pài Chú, lí ê Siōng-tè; to̍k-to̍k ho̍k-sāi I nā-tiāⁿ.

11Tùi án-ni魔鬼離開伊；有天使到，來伺候伊。Tùi án-ni Mô͘-kúi lī-khui I; ū thiⁿ-sài kàu, lâi su-hāu I.

12耶穌聽見約翰關監，就退去加利利；Iâ-so͘ thiaⁿ-kìⁿ Iok-hān koaiⁿ-kaⁿ, chiū thè-khì Ka-lī-lī;

13離開拿撒勒，去迦百農khiā起；chit所在tī海邊，tī Se-pò͘-lûn kap La̍p-tāi-lī ê交界；lī-khui Ná-sat-le̍k, khì Ka-pek-lông khiā-khí; chit só͘-chāi tī hái-piⁿ, tī Se-pò͘-lûn kap La̍p-tāi-lī ê kau-kài;

14是beh應驗早託先知以賽亞所講ê，講，sī beh èng-giām chá thok sian-ti Í-sài-a só͘ kóng ê, kóng,

15Se-pò͘-lûn ê地，La̍p-tāi-lī ê地， 沿海墘ê路，約旦ê河外， 外邦ê加利利；Se-pò͘-lûn ê tōe, La̍p-tāi-lī ê tōe, Iân hái-kîⁿ ê lō͘, Iok-tàn ê hô gōa, Gōa-pang ê Ka-lī-lī;

16坐tī烏暗ê百姓 ， Bat看見大光； 坐tī死蔭ê地ê， 有光起來照in。Chē tī o͘-àm ê peh-sìⁿ, Bat khòaⁿ-kìⁿ tōa kng; Chē tī sí-ìm ê tōe ê, Ū kng khí-lâi chiò in.

17Tùi hit時耶穌起頭宣傳講，Lín tio̍h反悔，因為天國近lah。Tùi hit sî Iâ-so͘ khí-thâu soan-thoân kóng, Lín tio̍h hoán-hóe, in-ūi thian-kok kūn lah.

18耶穌行tī加利利ê海墘；看見兩個兄弟á，就是西門，叫做彼得，kap伊ê兄弟安得烈，拋網tī海裡，因為是討魚人。Iâ-so͘ kiâⁿ tī Ka-lī-lī ê hái-kîⁿ; khòaⁿ-kìⁿ nn̄g ê hiaⁿ-tī-á, chiū-sī Se-bûn, kiò chòe Pí-tek, kap i ê hiaⁿ-tī An-tek-lia̍t, pha bāng tī hái-ni̍h, in-ūi sī thó-hî lâng.

19伊就kā in講，來tè我，我beh hō͘ lín得tio̍h人親像討魚ê。I chiū kā in kóng, Lâi tè góa, góa beh hō͘ lín tit-tio̍h lâng chhin-chhiūⁿ thó-hî ê.

20In liâm-piⁿ離開網來tè伊。In liâm-piⁿ lī-khui bāng lâi tè I.

21Tùi chia進前，koh看見兩個兄弟á，就是西庇太ê Kiáⁿ雅各kap伊ê兄弟約翰，kap in老父西庇太tī船裡teh補網；耶穌招in。Tùi chia chìn-chêng, koh khòaⁿ-kìⁿ nn̄g ê hiaⁿ-tī-á, chiū-sī Se-pí-thài ê kiáⁿ Ngá-kok kap i ê hiaⁿ-tī Iok-hān, kap in lāu-pē Se-pí-thài tī chûn-ni̍h teh pó͘ bāng; Iâ-so͘ chio in.

22In liâm-piⁿ離開船，拜別in ê老父，來tè伊。In liâm-piⁿ lī-khui chûn, pài-pia̍t in ê lāu-pē, lâi tè I.

23耶穌遍行加利利，tī in ê會堂教示，宣傳天國ê福音，醫好百姓間ta̍k樣ê症頭，kap ta̍k樣ê病痛。Iâ-so͘ piàn kiâⁿ Ka-lī-lī, tī in ê hōe-tn̂g kà-sī, soan-thoân thian-kok ê hok-im, i-hó peh-sìⁿ-kan ta̍k iūⁿ ê chèng-thâu, kap ta̍k iūⁿ ê pīⁿ-thiàⁿ.

24伊ê名聲報揚到thong敘利亞；凡有致病ê，tú-tio̍h chōe-chōe樣ê症頭kap痛疼ê，患tio̍h鬼ê、羊-hîn ê，piàn-sūi ê，chhōa in lóng來就近伊，伊就醫好in。I ê miâ-siaⁿ pò-iông kàu thong Sū-lī-a; hoān ū tì pīⁿ ê, tú-tio̍h chōe-chōe iūⁿ ê chèng-thâu kap thàng-thiàⁿ ê, hoān-tio̍h kúi ê, iûⁿ-hîn ê, piàn-sūi ê, chhōa in lóng lâi chiū-kūn I, I chiū i-hó in.

25Hit時，tùi加利利、Te-ka-pho-lī、耶路撒冷、猶太，kap約旦外，有 chōe-chōe陣ê人來tè伊。Hit sî, tùi Ka-lī-lī, Te-ka-pho-lī, Iâ-lō͘-sat-léng, Iû-thài, kap Iok-tàn gōa, ū chōe-chōe tīn ê lâng lâi tè I.