1耶穌看見hiah-ê kui陣ê人，就peh上山；已經坐，伊ê學生就近伊。Iâ-so͘ khòaⁿ-kìⁿ hiah ê kui-tīn ê lâng, chiū peh-chiūⁿ soaⁿ; í-keng chē, I ê ha̍k-seng chiū-kūn I.

2伊嘴教示in講，I khui chhùi kà-sī in kóng,

3心內sòng-hiong ê人有福氣，因為天國是in ê。Sim-lāi sòng-hiong ê lâng ū hok-khì, in-ūi thian-kok sī in ê.

4憂悶ê人有福氣，因為in beh受安慰。Iu-būn ê lâng ū hok-khì, in-ūi in beh siū an-ùi.

5溫柔ê人有福氣，因為in beh承接土地。Un-jiû ê lâng ū hok-khì, in-ūi in beh sêng-chiap thó͘-tōe.

6Iau嘴乾欣慕義ê人有福氣，因為in beh得tio̍h飽。Iau chhùi-ta him-bō͘ gī ê lâng ū hok-khì, in-ūi in beh tit-tio̍h pá.

7憐憫人ê人有福氣，因為in beh得tio̍h憐憫。Lîn-bín lâng ê lâng ū hok-khì, in-ūi in beh tit-tio̍h lîn-bín.

8清氣心肝ê人有福氣，因為in beh看見上帝。Chheng-khì sim-koaⁿ ê lâng ū hok-khì, in-ūi in beh khòaⁿ-kìⁿ Siōng-tè.

9hō͘人和平ê人有福氣，因為in beh稱做上帝ê Kiáⁿ。Hō͘ lâng hô-pêng ê lâng ū hok-khì, in-ūi in beh chheng chòe Siōng-tè ê kiáⁿ.

10為tio̍h義bat受khún-tio̍k ê人有福氣，因為天國是in ê。Ūi-tio̍h gī bat siū khún-tio̍k ê lâng ū hok-khì, in-ūi thian-kok sī in ê.

11為tio̍h我，人chiah lóe罵lín，khún-tio̍k lín，譭謗lín萬項ê pháiⁿ，lín就有福氣。Ūi-tio̍h góa, lâng chiah lóe-mē lín, khún-tio̍k lín, húi-pòng lín bān hāng ê pháiⁿ, lín chiū ū hok-khì.

12Tio̍h歡喜快樂，因為lín tī天裡ê報賞是大；因為lín以前ê先知人，人亦án-ni khún-tio̍k in。Tio̍h hoaⁿ-hí khoài-lo̍k, in-ūi lín tī thiⁿ-ni̍h ê pò-siúⁿ sī tōa; in-ūi lín í-chêng ê sian-ti lâng, lâng ia̍h án-ni khún-tio̍k in.

13Lín是地上ê鹽；鹽若失味，beh用甚麼hō͘伊鹹？後來無路用，不過hiat tī外面，hō͘人thún踏nā-tiāⁿ。Lín sī tōe-chiūⁿ ê iâm; iâm nā sit bī, beh ēng sím-mi̍h hō͘ i kiâm? Āu-lâi bô lō͘-ēng, put-kò hiat tī gōa-bīn, hō͘ lâng thún-ta̍h nā-tiāⁿ.

14Lín是世間ê光；城起tī山頂bōe-ōe隱密。Lín sī sè-kan ê kng; siâⁿ khí tī soaⁿ-téng bōe-ōe ún-ba̍t.

15無人點燈hē tī斗下，就是hē tī燈台頂，就遍照厝內ê人。Bô lâng tiám teng hē tī táu ē, chiū-sī hē tī teng-tâi téng, chiū piàn chiò chhù-lāi ê lâng.

16Án-ni lín ê光tio̍h照tī人ê面前，hō͘ in看見lín ê好所行，來歸榮光hō͘ lín tī天裡ê父。Án-ni lín ê kng tio̍h chiò tī lâng ê bīn-chêng, hō͘ in khòaⁿ-kìⁿ lín ê hó só͘ kiâⁿ, lâi kui êng-kng hō͘ lín tī thiⁿ-ni̍h ê Pē.

17莫得phah算我來是beh廢無律法，á是先知；我來m̄是beh廢無，是beh應驗。Bo̍h-tit phah-sǹg góa lâi sī beh hòe-bô lu̍t-hoat á-sī sian-ti; góa lâi m̄ sī beh hòe-bô, sī beh èng-giām.

18因為我實在kā lín講，就到天地廢無，律法ê一點一畫亦決斷bōe廢無，到lóng總成。In-ūi góa si̍t-chāi kā lín kóng, Chiū kàu thiⁿ tōe hòe-bô, lu̍t-hoat ê chi̍t tiám chi̍t u̍ih ia̍h koat-toàn bōe hòe-bô, kàu lóng-chóng chiâⁿ.

19所以見若毀壞chiah-ê誡命至微細ê一條，續 án-ni教示人ê，tī天國beh稱伊做至微細；獨獨見若行續教示人ê，tī天國beh稱伊做大。Só͘-í kìⁿ-nā húi-hoāi chiah ê kài-bēng chì-bî-sòe ê chi̍t tiâu, sòa án-ni kà-sī lâng ê, tī thian-kok beh chheng i chòe chì-bî-sòe; to̍k-to̍k kìⁿ-nā kiâⁿ sòa kà-sī lâng ê, tī thian-kok beh chheng i chòe tōa.

20因為我kā lín講，設使lín ê義無贏過經學士kap法利賽人ê義，決斷bōe得入天國。In-ūi góa kā lín kóng, siat-sú lín ê gī bô iâⁿ-kè keng-ha̍k-sū kap Hoat-lī-sài lâng ê gī, koat-toàn bōe-tit ji̍p thian-kok.

21Lín bat聽見有對古早人講，M̄-thang害死人；害死人ê tio̍h受審判。Lín bat thiaⁿ-kìⁿ ū tùi kó͘-chá lâng kóng, M̄-thang hāi-sí lâng; hāi-sí lâng ê tio̍h siū sím-phòaⁿ.

22總是我kā lín講，見若受氣伊ê兄弟ê，tio̍h受審判；見若對伊ê兄弟講Lia̍p-ka ê，tio̍h受公會辦；見若講Mô͘-lī ê，tio̍h受地獄ê火。Chóng-sī góa kā lín kóng, kìⁿ-nā siū-khì i ê hiaⁿ-tī ê, tio̍h siū sím-phòaⁿ; kìⁿ-nā tùi i ê hiaⁿ-tī kóng Lia̍p-ka ê, tio̍h siū kong-hōe pān; kìⁿ-nā kóng Mô͘-lī ê, tio̍h siū tē-ge̍k ê hé.

23所以你若teh獻你ê禮物tī祭壇，也tī hia記得你ê兄弟有甚麼hia̍p-hiâm你；Só͘-í lí nā teh hiàn lí ê lé-mi̍h tī chè-tôaⁿ, iā tī hia kì-tit lí ê hiaⁿ-tī ū sím-mi̍h hia̍p-hiâm lí;

24tio̍h tī hia放下你ê禮物tī壇前，事先去kap你ê兄弟和好，然後來獻你ê禮物。tio̍h tī hia pàng-hē lí ê lé-mi̍h tī tôaⁿ-chêng, tāi-seng khì kap lí ê hiaⁿ-tī hô-hó, jiân-āu lâi hiàn lí ê lé-mi̍h.

25你iáu kap你ê對敵tī路裡，tio̍h緊緊kap伊和，驚了對敵交你hō͘審判官，審判官交你hō͘衙役，你就受關落監。Lí iáu kap lí ê tùi-te̍k tī lō͘-ni̍h, tio̍h kín-kín kap i hô, kiaⁿ-liáu tùi-te̍k kau lí hō͘ sím-phòaⁿ koaⁿ, sím-phòaⁿ koaⁿ kau lí hō͘ gê-ia̍h, lí chiū siū koaiⁿ lo̍h kaⁿ.

26我實在kā你講，一絲一毫bē還，你決斷bōe-ōe出hia。Góa si̍t-chāi kā lí kóng, Chi̍t si chi̍t hô bē hêng, lí koat-toàn bōe-ōe chhut hia.

27Lín bat聽見有話講，M̄-thang行姦淫；Lín bat thiaⁿ-kìⁿ ū ōe kóng, M̄-thang kiâⁿ kan-îm;

28但是我kā lín講，見若看見婦女，來動起慾念ê，心內已經淫伊。nā-sī góa kā lín kóng, kìⁿ-nā khòaⁿ-kìⁿ hū-lú, lâi tōng-khí io̍k-liām ê, sim-lāi í-keng îm i.

29設使你ê chiàⁿ目致到你犯罪，就tio̍h iah hiat-ka̍k；寧可百體喪失一體，免致你全身hiat落地獄。Siat-sú lí ê chiàⁿ ba̍k tì-kàu lí hoān-chōe, chiū tio̍h iah hiat-ka̍k; lêng-khó͘ pah-thé sòng-sit chi̍t thé, bián-tì lí choân-sin hiat-lo̍h tē-ge̍k.

30設使你ê chiàⁿ手致到你犯罪，就tio̍h斬hiat-ka̍k；寧可百體喪失一體，免致你全身去地獄。Siat-sú lí ê chiàⁿ chhiú tì-kàu lí hoān-chōe, chiū tio̍h chām hiat-ka̍k; lêng-khó͘ pah-thé sòng-sit chi̍t thé, bián-tì lí choân-sin khì tē-ge̍k.

31Koh有話講，人若beh離伊ê bó͘，tio̍h用離書hō͘伊；Koh ū ōe kóng, Lâng nā beh lî i ê bó͘, tio̍h ēng lî-chu hō͘ i;

32但是我kā lín講，見若m̄是為tio̍h姦淫ê緣故來離伊ê bó͘，便是hō͘伊做有îm-hēng ê；見若chhōa所離ê，亦是行姦淫。nā-sī góa kā lín kóng, kìⁿ-nā m̄ sī ūi-tio̍h kan-îm ê iân-kò͘ lâi lî i ê bó͘, piān sī hō͘ i chòe ū îm-hēng ê; kìⁿ-nā chhōa só͘ lî ê, ia̍h sī kiâⁿ kan-îm.

33Koh Lín bat聽見有對古早人講，M̄-thang背chiù-chōa，你所chiù ê chōa，tio̍h還hō͘主；Koh lín bat thiaⁿ-kìⁿ ū tùi kó͘-chá lâng kóng, M̄-thang pōe chiù-chōa, lí só͘ chiù ê chōa, tio̍h hêng hō͘ Chú;

34但是我kā lín講，一概莫得chiù-chōa；莫得kí天，因為天是上帝ê座位；nā-sī góa kā lín kóng, It-khài bo̍h-tit chiù-chōa; bo̍h-tit kí thiⁿ, in-ūi thiⁿ sī Siōng-tè ê chō-ūi;

35莫得kí地，因為地是伊ê腳踏；莫得kí耶路撒冷，因為是大人君ê城。bo̍h-tit kí tōe, in-ūi tōe sī I ê kha-ta̍h; bo̍h-tit kí Iâ-lō͘-sat-léng, in-ūi sī tōa Jîn-kun ê siâⁿ.

36亦莫得kí你ê頭殼來chiù-chōa，因為一支頭毛，你bōe hō͘伊做烏做白。Ia̍h bo̍h-tit kí lí ê thâu-khak lâi chiù-chōa, in-ūi chi̍t ki thâu-mn̂g, lí bōe hō͘ i chòe o͘ chòe pe̍h.

37但是lín ê話tio̍h講，是，就是；m̄是，就m̄是；chiah-ê以外是tùi hit-ê pháiⁿ-ê出。Nā-sī lín ê ōe tio̍h kóng, Sī, chiū Sī; M̄ sī, chiū M̄ sī; chiah-ê í-gōa sī tùi hit ê pháiⁿ-ê chhut.

38Lín bat聽見有話講，目睭賠目睭，嘴齒賠嘴齒；Lín bat thiaⁿ-kìⁿ ū ōe kóng, Ba̍k-chiu pê ba̍k-chiu, chhùi-khí pê chhùi-khí;

39但是我kā lín講，莫得kap pháiⁿ抵敵；若有人siàn你chiàⁿ-pêng ê嘴phóe，tò-pêng-ê亦oa̍t hō͘伊。nā-sī góa kā lín kóng, Bo̍h-tit kap pháiⁿ tí-te̍k; nā ū lâng siàn lí chiàⁿ-pêng ê chhùi-phóe, tò-pêng-ê ia̍h oa̍t hō͘ i.

40有人ài告你，the̍h你ê內衫，外衫亦放hō͘伊。Ū lâng ài kò lí, the̍h lí ê lāi-saⁿ, gōa-saⁿ ia̍h pàng hō͘ i.

41有人勉強你行一里，就kap伊行兩里。Ū lâng bián-kióng lí kiâⁿ chi̍t lí, chiū kap i kiâⁿ nn̄g lí.

42對你求ê，hō͘伊；beh kā你借ê，莫得oa̍t走。Tùi lí kiû ê, hō͘ i; beh kā lí chioh ê, bo̍h-tit oa̍t-cháu.

43Lín bat聽見有話講，Tio̍h疼你ê厝邊，怨恨你ê對敵；Lín bat thiaⁿ-kìⁿ ū ōe kóng, Tio̍h thiàⁿ lí ê chhù-piⁿ, oàn-hūn lí ê tùi-te̍k;

44但是我kā lín講，對敵lín ê，tio̍h疼in；khún-tio̍k lín ê，tio̍h替in祈禱；nā-sī góa kā lín kóng, Tùi-te̍k lín ê, tio̍h thiàⁿ in; khún-tio̍k lín ê, tio̍h thòe in kî-tó;

45hō͘ lín成做lín tī天裡ê父ê Kiáⁿ；因為伊hō͘伊ê日起來照pháiⁿ人kap好人，亦用雨ak義kap不義ê人。hō͘ lín chiâⁿ-chòe lín tī thiⁿ-ni̍h ê Pē ê kiáⁿ; in-ūi I hō͘ I ê ji̍t khí lâi chiò pháiⁿ lâng kap hó lâng, ia̍h ēng hō͘ ak gī kap put-gī ê lâng.

46因為lín若疼疼lín ê，有甚麼報賞？hiah-ê抽餉ê kiám無án-ni行mah？In-ūi lín nā thiàⁿ thiàⁿ lín ê, ū sím-mi̍h pò-siúⁿ? hiah ê thiu-hiòng ê kiám bô án-ni kiâⁿ mah?

47Lín kan-ta請安lín ê兄弟，有甚麼khah贏人？外邦人kiám無án-ni行mah？Lín kan-ta chhéng-an lín ê hiaⁿ-tī, ū sím-mi̍h khah-iâⁿ lâng? gōa-pang lâng kiám bô án-ni kiâⁿ mah?

48所以lín tioh88純全，親像lín ê天父ê純全。Só͘-í lín tio̍h sûn-choân, chhin-chhiūⁿ lín ê Thiⁿ Pē ê sûn-choân.

1謹慎莫得tī人ê面前行lín ê義，故意hō͘ in看見；若án-ni，就無得tio̍h報賞tī lín天裡ê父。Kín-sīn bo̍h-tit tī lâng ê bīn-chêng kiâⁿ lín ê gī, kò͘-ì hō͘ in khòaⁿ-kìⁿ; nā án-ni, chiū bô tit-tio̍h pò-siúⁿ tī lín thiⁿ-ni̍h ê Pē.

2所以賑濟ê時，莫得tī你ê面前pûn號頭，親像假好ê人tī會堂kap街路所做ê，ài人榮光in。我實在kā lín講，In已經受tio̍h in ê報賞lah。Só͘-í chín-chè ê sî, bo̍h-tit tī lí ê bīn-chêng pûn hō-thâu, chhin-chhiūⁿ ké-hó ê lâng tī hōe-tn̂g kap ke-lō͘ só͘ chòe ê, ài lâng êng-kng in. Góa si̍t-chāi kā lín kóng, In í-keng siū-tio̍h in ê pò-siúⁿ lah.

3獨獨你賑濟ê時，莫得hō͘你ê tò手知你ê chiàⁿ手ê所做；To̍k-to̍k lí chín-chè ê sî, bo̍h-tit hō͘ lí ê tò-chhiú chai lí ê chiàⁿ-chhiú ê só͘ chòe;

4hō͘你ê賑濟隱密；就你ê父，鑑察tī隱密ê，beh報答你。hō͘ lí ê chín-chè ún-ba̍t; chiū lí ê Pē, kàm-chhat tī ún-ba̍t ê, beh pò-tap lí.

5Lín祈禱ê時，莫得親像假好ê人；因為in ài khiā tī會堂kap大街面ê oat-kak祈禱，beh hō͘人看見。我實在kā lín講，In已經受tio̍h in ê報賞lah。Lín kî-tó ê sî, bo̍h-tit chhin-chhiūⁿ ké-hó ê lâng; in-ūi in ài khiā tī hōe-tn̂g kap tōa koe-bīn ê oat-kak kî-tó, beh hō͘ lâng khòaⁿ-kìⁿ. Góa si̍t-chāi kā lín kóng, In í-keng siū-tio̍h in ê pò-siúⁿ lah.

6獨獨你祈禱ê時，tio̍h入你ê密房，關門，求你ê父，tiàm tī隱密ê；就你ê父，鑑察tī隱密ê，beh報答你。To̍k-to̍k lí kî-tó ê sî, tio̍h ji̍p lí ê ba̍t-pâng, koaiⁿ mn̂g, kiû lí ê Pē, tiàm tī ún-ba̍t ê; chiū lí ê Pē, kàm-chhat tī ún-ba̍t ê, beh pò-tap lí.

7Koh lín祈禱ê時，話莫得ta̍uh-ta̍uh重(têng)，親像外邦人；因為in phah算講chōe-chōe話，chiah得tio̍h聽見。Koh lín kî-tó ê sî, ōe bo̍h-tit ta̍uh-ta̍uh têng, chhin-chhiūⁿ gōa-pang lâng; in-ūi in phah-sǹg kóng chōe-chōe ōe, chiah tit-tio̍h thiaⁿ-kìⁿ.

8所以lín莫得學in；因為lín bē求伊ê事先，lín ê父已經知lín所欠用ê。Só͘-í lín bo̍h-tit o̍h in; in-ūi lín bē kiû I ê tāi-seng, lín ê Pē í-keng chai lín só͘ khiàm-ēng ê.

9所以lín tio̍h án-ni祈禱：阮tī天裡ê父，願你ê名聖。Só͘-í lín tio̍h án-ni kî-tó: Goán tī thiⁿ-ni̍h ê Pē, Goān lí ê miâ sèng.

10你ê國臨到。你ê旨意得成，tī地裡親像tī天裡。Lí ê kok lîm-kàu. Lí ê chí-ì tit chiâⁿ, tī tōe-ni̍h chhin-chhiūⁿ tī thiⁿ-ni̍h.

11阮ê日食，今á日hō͘阮。Goán ê ji̍t-si̍t, kin-á-ji̍t hō͘ goán.

12赦免阮ê辜負，親像阮亦有赦免辜負阮ê人。Sià-bián goán ê ko͘-hū, chhin-chhiūⁿ goán ia̍h ū sià-bián ko͘-hū goán ê lâng.

13莫得chhōa阮入tī試，tio̍h救阮脫離hit-ê pháiⁿ-ê。Bo̍h-tit chhōa goán ji̍p tī chhì, tio̍h kiù goán thoat-lī hit ê pháiⁿ-ê.

14因為lín若赦免人ê過失，lín ê天父亦beh赦免lín。In-ūi lín nā sià-bián lâng ê kè-sit, lín ê Thiⁿ Pē ia̍h beh sià-bián lín.

15Lín若無赦免人ê過失，lín ê父亦無beh赦免lín ê過失。Lín nā bô sià-bián lâng ê kè-sit, lín ê Pē ia̍h bô beh sià-bián lín ê kè-sit.

16Koh lín禁食ê時，莫得親像假好ê人帶憂容；因為in將in ê面變pháiⁿ看，beh hō͘人看見in teh禁食。我實在kā lín講，In已經受tio̍h in ê報賞lah。Koh lín kìm-chia̍h ê sî, bo̍h-tit chhin-chhiūⁿ ké-hó ê lâng tài iu-iông; in-ūi in chiong in ê bīn pìⁿ pháiⁿ khòaⁿ, beh hō͘ lâng khòaⁿ-kìⁿ in teh kìm-chia̍h. Góa si̍t-chāi kā lín kóng, In í-keng siū-tio̍h in ê pò-siúⁿ lah.

17獨獨你禁食ê時，tio̍h抹你ê頭，洗你ê面；To̍k-to̍k lí kìm-chia̍h ê sî, tio̍h boah lí ê thâu, sóe lí ê bīn;

18無hō͘人看見你teh禁食，是hō͘你tòa tī隱密ê父看見；就你ê父，鑑察tī隱密ê，beh報答你。bô hō͘ lâng khòaⁿ-kìⁿ lí teh kìm-chia̍h, sī hō͘ lí tòa tī ún-ba̍t ê Pē khòaⁿ-kìⁿ; chiū lí ê Pē, kàm-chhat tī ún-ba̍t ê, beh pò-tap lí.

19莫得為tio̍h家己積聚財寶tī地裡，有蟲kap sian phah-pháiⁿ，也有賊iah孔偷the̍h ê所在。Bo̍h-tit ūi-tio̍h ka-kī chek-chū châi-pó tī tōe-ni̍h, ū thâng kap sian phah-pháiⁿ, iā ū chha̍t iah khang thau-the̍h ê só͘-chāi.

20獨獨為tio̍h家己積聚財寶tī天裡，蟲kap sian無phah-pháiⁿ，也無賊iah孔偷the̍h ê所在。To̍k-to̍k ūi-tio̍h ka-kī chek-chū châi-pó tī thiⁿ-ni̍h, thâng kap sian bô phah-pháiⁿ, iā bô chha̍t iah khang thau-the̍h ê só͘-chāi.

21因為lín ê財寶tī hia，lín ê心也beh tī hia。In-ūi lín ê châi-pó tī hia, lín ê sim iā beh tī hia.

22身軀ê燈就是目睭；你ê目睭若金，thong身軀就有光。Seng-khu ê teng chiū-sī ba̍k-chiu; lí ê ba̍k-chiu nā kim, thong seng-khu chiū kng.

23你ê目睭若花，thong身軀就暗。你內面ê光若暗，hit-ê暗jōa大ah！Lí ê ba̍k-chiu nā hoe, thong seng-khu chiū àm. Lí lāi-bīn ê kng nā àm, hit ê àm jōa tōa ah!

24無人會服事兩個主人；因為伊會怨恨chit-ê，疼hit-ê；á是會tùi-tiōng chit-ê，看輕hit-ê；lín bōe-ōe服事上帝續服事錢財。Bô lâng ōe ho̍k-sāi nn̄g ê chú-lâng; in-ūi i ōe oàn-hūn chit-ê, thiàⁿ hit-ê; á-sī ōe tùi-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-tè sòa ho̍k-sāi chîⁿ-châi.

25所以我kā lín講，莫得掛慮lín ê性命beh食甚麼，beh lim甚麼，á是lín ê身軀beh穿甚麼。Lín ê性命kiám無khah大tī米糧，也lín ê身軀kiám無khah大tī衣裳mah？Só͘-í góa kā lín kóng, Bo̍h-tit khòa-lū lín ê sìⁿ-miā beh chia̍h sím-mi̍h, beh lim sím-mi̍h, á-sī lín ê seng-khu beh chhēng sím-mi̍h. Lín ê sìⁿ-miā kiám bô khah tōa tī bí-niû, iā lín ê seng-khu kiám bô khah tōa tī i-chiûⁿ mah?

26試看天中ê飛鳥，無種作，無收成，無積聚tī粟倉，lín ê天父也teh飼in。Lín kiám無比hiah-ê khah貴氣mah？Chhì-khòaⁿ thiⁿ-tiong ê pe-chiáu, bô chèng-choh, bô siu-sêng, bô chek-chū tī chhek-chhng, lín ê Thiⁿ Pē iā teh chhī in. Lín kiám bô pí hiah-ê khah kùi-khì mah?

27Lín甚麼人會用掛慮hō͘性命khah長一刻久？Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú?

28啥事為tio̍h衣裳掛慮ah？試想山裡ê百合花，怎樣大叢；in無tio̍h磨，無紡績(cheh)；Siáⁿ-sū ūi-tio̍h i-chiûⁿ khòa-lū ah? Chhì-siūⁿ soaⁿ-ni̍h ê pek-ha̍p-hoe, cháiⁿ-iūⁿ tōa châng; in bô tio̍h-bôa, bô pháng cheh;

29但是我kā lín講，當所羅門極hâng-ngó͘ ê時，伊所穿ê m̄值tio̍h chit號花ê一蕊。nā-sī góa kā lín kóng, tng Só͘-lô-bûn ke̍k hâng-ngó͘ ê sî, i só͘ chhēng ê m̄ ta̍t-tio̍h chit hō hoe ê chi̍t lúi.

30Taⁿ山裡ê草，今á日tī-teh，明á日hiat tī火爐，上帝hō͘伊穿到án-ni，何況lín，小信ê人ah？Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hé-lô͘, Siōng-tè hō͘ i chhēng kàu án-ni, hô-hòng lín, sió-sìn ê lâng ah?

31所以莫得掛慮講，阮beh食甚麼？Beh lim甚麼？Beh穿甚麼？Só͘-í bo̍h-tit khòa-lū kóng, Goán beh chia̍h sím-mi̍h? Beh lim sím-mi̍h? Beh chhēng sím-mi̍h?

32因為chiah-ê lóng是外邦人所求ê；lín ê天父也知chiah-ê lóng是lín欠用ê。In-ūi chiah-ê lóng sī gōa-pang lâng só͘ kiû ê; lín ê Thiⁿ Pē iā chai chiah-ê lóng sī lín khiàm-ēng ê.

33獨獨事先求伊ê國kap伊ê義，就chiah-ê物lóng beh 續 hō͘ lín。To̍k-to̍k tāi-seng kiû I ê kok kap I ê gī, chiū chiah ê mi̍h lóng beh sòa hō͘ lín.

34所以莫得為tio̍h明á日掛慮；因為hit-ê明á日，伊beh家己掛慮。一日ê艱苦tī一日夠額。Só͘-í bo̍h-tit ūi-tio̍h bîn-á-ji̍t khòa-lū; in-ūi hit ê bîn-á-ji̍t, i beh ka-kī khòa-lū. Chi̍t ji̍t ê kan-khó͘ tī chi̍t ji̍t kàu-gia̍h.

1莫得批評人，chiah免tú-tio̍h批評。Bo̍h-tit phoe-phêng lâng, chiah bián tú-tio̍h phoe-phêng.

2因為lín用甚麼批評來批評，亦beh án-ni受批評；lín用甚麼量來量，亦beh án-ni量hō͘ lín。In-ūi lín ēng sím-mi̍h phoe-phêng lâi phoe-phêng, ia̍h beh án-ni siū phoe-phêng; lín ēng sím-mi̍h niû lâi niû, ia̍h beh án-ni niû hō͘ lín.

3Koh你怎樣看見兄弟目睭內ê草á幼，亦無想你目睭內ê楹á柴ah？Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu-lāi ê chháu-á-iù, ia̍h bô siūⁿ lí ba̍k-chiu-lāi ê îⁿ-á-chhâ ah?

4Beh怎樣kā你ê兄弟講，你目睭內ê草á幼hō͘我kā你the̍h起來，亦你目睭內竟然有楹á柴ah？Beh cháiⁿ-iūⁿ kā lí ê hiaⁿ-tī kóng, Lí ba̍k-chiu-lāi ê chháu-á-iù hō͘ góa kā lí the̍h-khí-lâi, ia̍h lí ba̍k-chiu-lāi kèng-jiân ū îⁿ-á-chhâ ah?

5假好ê人ah，事先the̍h去你目睭內ê楹á柴，chiah會明明看見thang the̍h去兄弟目睭內ê草á幼。Ké-hó ê lâng ah, tāi-seng the̍h-khì lí ba̍k-chiu-lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu-lāi ê chháu-á-iù.

6莫得用聖ê物hō͘狗，亦莫得用lín ê珍珠hiat tī豬ê頭前；驚了in用腳踏伊，oa̍t-lìn-tńg來咬lín。Bo̍h-tit ēng sèng ê mi̍h hō͘ káu, ia̍h bo̍h-tit ēng lín ê chin-chu hiat tī ti ê thâu-chêng; kiaⁿ-liáu in ēng kha ta̍h i, oa̍t-lìn-tńg lâi kā lín.

7求就hō͘ lín，chhē就tú-tio̍h，phah門就kā lín開。Kiû chiū hō͘ lín, chhē chiū tú-tio̍h, phah mn̂g chiū kā lín khui.

8因為見若求ê得tio̍h；chhē ê tú-tio̍h；phah門ê，就kā伊開。In-ūi kìⁿ-nā kiû ê tit-tio̍h; chhē ê tú-tio̍h; phah mn̂g ê, chiū kā i khui.

9Lín中間有甚麼人，伊ê Kiáⁿ kā伊討餅，kiám beh用石頭hō͘伊？Lín tiong-kan ū sím-mi̍h lâng, i ê kiáⁿ kā i thó piáⁿ, kiám beh ēng chio̍h-thâu hō͘ i?

10á是beh ti̍h魚，kiám beh用蛇hō͘伊？á-sī beh ti̍h hî, kiám beh ēng chôa hō͘ i?

11Lín chiah-ê雖然pháiⁿ，iáu-kú會曉得用好物hō͘ lín ê Kiáⁿ兒，何況lín tī天裡ê父，kiám無beh用好物hō͘求伊ê人mah？Lín chiah-ê sui-jiân pháiⁿ, iáu-kú ōe hiáu-tit ēng hó mi̍h hō͘ lín ê kiáⁿ-jî, hô-hòng lín tī thiⁿ-ni̍h ê Pē, kiám bô beh ēng hó mi̍h hō͘ kiû I ê lâng mah?

12所以lín見若ài人款待lín ê，lín亦tio̍h án-ni款待人；因為這是律法kap先知。Só͘-í lín kìⁿ-nā ài lâng khoán-thāi lín ê, lín ia̍h tio̍h án-ni khoán-thāi lâng; in-ūi che sī lu̍t-hoat kap sian-ti.

13Lín tio̍h tùi hit-ê狹門入；因為透到滅無ê，hit-ê門闊，hit-ê路大條，tùi hia入ê人chōe。Lín tio̍h tùi hit ê oe̍h mn̂g ji̍p; in-ūi thàu kàu bia̍t-bô ê, hit ê mn̂g khoah, hit ê lō͘ tōa tiâu, tùi hia ji̍p ê lâng chōe.

14透到狹ê，hit-ê門狹，hit-ê路細條，chhē-tio̍h ê人少。Thàu kàu oa̍h ê, hit ê mn̂g oe̍h, hit ê lō͘ sòe tiâu, chhē-tio̍h ê lâng chió.

15謹慎持防假ê先知，in就近lín，外面是羊羔，內面是狠惡ê豺狼。Kín-sīn tî-hông ké ê sian-ti, in chiū-kūn lín, gōa-bīn sī iûⁿ-ko, lāi-bīn sī hiông-ok ê chhâi-lông.

16Lín beh tùi in ê果子來bat伊；kiám tùi刺phè挽(bán)葡萄，tùi蒺藜(chi̍t-lê)挽無花果mah？Lín beh tùi in ê ké-chí lâi bat i; kiám tùi chhì-phè bán phû-tô, tùi chi̍t-lê bán bû-hoa-kó mah?

17Án-ni見若好樹結好果子；pháiⁿ樹結pháiⁿ果子。Án-ni kìⁿ-nā hó chhiū kiat hó ké-chí; pháiⁿ chhiū kiat pháiⁿ ké-chí.

18好樹bōe結pháiⁿ果子，pháiⁿ樹bōe結好果子。Hó chhiū bōe kiat pháiⁿ ké-chí, pháiⁿ chhiū bōe kiat hó ké-chí.

19見若樹無結好果子ê，就chhò伊，hiat落火。Kìⁿ-nā chhiū bô kiat hó ké-chí ê, chiū chhò i, hiat-lo̍h hé.

20所以lín beh tùi in ê果子來bat伊。Só͘-í lín beh tùi in ê ké-chí lâi bat i.

21見若稱呼我講，主ah，主ah ê，無一盡入天國；獨獨行我tī天裡ê父ê旨意ê，chiah會。Kìⁿ-nā chheng-ho͘ góa kóng, Chú ah, Chú ah ê, bô it-chīn ji̍p thian-kok; to̍k-to̍k kiâⁿ góa tī thiⁿ-ni̍h ê Pē ê chí-ì ê, chiah ōe.

22當hit日chōe-chōe人beh kā我講，主ah，主ah，阮kiám m̄是用你ê名傳教，用你ê名趕鬼，用你ê名行chōe-chōe權能mah？Tng hit ji̍t chōe-chōe lâng beh kā góa kóng, Chú ah, Chú ah, goán kiám m̄ sī ēng lí ê miâ thoân kàu, ēng lí ê miâ kóaⁿ kúi, ēng lí ê miâ kiâⁿ chōe-chōe koân-lêng mah?

23就hit時我beh明明kā in講，我lóng m̄-bat lín；做不法ê，tio̍h離開我去。Chiū hit sî góa beh bêng-bêng kā in kóng, Góa lóng m̄ bat lín; chòe put-hoat ê, tio̍h lī-khui góa khì.

24所以見若聽我chiah-ê話來行ê，beh比並知識ê人，起伊ê厝tī石磐頂；Só͘-í kìⁿ-nā thiaⁿ góa chiah ê ōe lâi kiâⁿ ê, beh pí-phēng tì-sek ê lâng, khí i ê chhù tī chio̍h-pôaⁿ téng;

25雨落，大水到，風吹，衝tio̍h hit間厝，亦無倒；因為地基tī石磐頂。hō͘ lo̍h, tōa chúi kàu, hong chhe, chhiong-tio̍h hit keng chhù, ia̍h bô tó; in-ūi tōe-ki tī chio̍h-pôaⁿ téng.

26見若聽我chiah-ê話，無行ê，beh比並戇人，起伊ê厝tī沙頂；Kìⁿ-nā thiaⁿ góa chiah ê ōe, bô kiâⁿ ê, beh pí-phēng gōng lâng, khí i ê chhù tī soa téng;

27雨落，大水到，風吹，衝tio̍h hit間厝，就倒；koh伊ê倒是傷重。hō͘ lo̍h, tōa chúi kàu, hong chhe, chhiong-tio̍h hit keng chhù, chiū tó; koh i ê tó sī siong-tiōng.

28耶穌講chiah-ê話soah，眾人奇怪伊ê教示。Iâ-so͘ kóng chiah ê ōe soah, chèng lâng kî-koài I ê kà-sī.

29因為伊教示人，親像有權能ê，無親像in ê經學士。In-ūi I kà-sī lâng, chhin-chhiūⁿ ū koân-lêng ê, bô chhin-chhiūⁿ in ê keng-ha̍k-sū.